You are currently viewing MARY TE CHHUNGKUA

MARY TE CHHUNGKUA

Spread the love

Vanlalpeki Fanai

‘’ Ihmaw thiannu, kan țhenawm nu hian amah chauhin a fate 2 hi a țulpui ve ngar ngar a, an khawsak a harsat bakah, pa tello a khawsa reng tawh an ni a kan khawngaih thin viau. Khawtlang pawhin kan tanpui ve fo mai. Mahse, hmanni lawk khan kan khuaah pa pakhat inhlawhfa chawpa rawn pem thar nen hian an inzui ta fo mai a, tunah phei chuan a rawn luhkhung hial tawh mawle! Mak kan ti khawp mai. Kan thenawmnu hi hetianga mipa ngaihsak leh pasal nei leh duh tur chi hi ni niin kan hrengai miah silova, a mak kan ti takzet ‘’ rawn ti bawrh bawrh tu ka thiannu chu chik zet hian ka ka lo en kar mai a, eng aiah nge maw an thenawmte chhungkaw chanchin chu min hrilh tak vak mai ni. Mahse le, kan vei zawng leh rilrua riak reng thil te hi chu sawichhuah a nuam a, kan zep thei lo chu a nih ber hi maw. A bikin hmeichhia ngat phei hi chuan eng thilmah hi kan zep bo rei thei tak tak lo a nih hi.

Amah ka thiannu hi keini aia thingtlang khua ve lehchhawng, khaw te bengngawng tak mai atanga rawn kal ve vang vang a ni a, tunah hian Aizawlah a college kalna tur tihfel tuma kal niin kan khua hi a rawn paltlang ve a, tihian kan inah zan hnih vel chu a rawn riak tawh bawk. Sumo service a mumal chiahloh vangin a tangkhang ta rih a nih ber chu. Amah hi Sangzuali  niin, tunhma chuan kan khaw schoolah te pah a rawn lut ve lawp lawp thin a, chuta tanga inhria te pawh chu kan ni nghe nghe. Inbe chho zelin tun hun hi kan thleng ta kan ti mai ang chu.

‘’ I thenawmnu pasal thar chu khawilam atanga rawn lut nge a nih a, inhrechiang hlawm em? A fel lemlo tihna emni?’’ tia ka lo chhan let takah chuan a hmui chu rawn ti sawi nang nang chung hian,

‘’ ka hrebiklo, tunah rih chuan ala fel hmel viau a, bakah, khawi khua atnga rawn lut nge tih pawh ka hre chuanglo. A hmelhmai sawrbawl zawng zawng nen khan hmuh tawhna nei tlat chuan ka inhriaa, ka chiang ngam lo thung. Chubakah, a inzuah buk em em reng a, a sam a buk bawk si ka mi ten zawng tak a ni’’ a ti zui leh ta hlawih hlawih mai. Kei chu ka lo nui ve sak thung. Tichuan, an thenawmte chanchin sawi chu duhtawkin class kalna tur vel kan sawi chhunzawm ta zel a, keipawhin aizawl chu ka chhukthlak har tawh loh tur thu ka sawi ve nghal zat bawk.

Tum lawj angin Sangzuali pawh kan khuaa ni thum leh zan thum a cham hnu chuan Aizawl lam a pan ve thei ta hram a, a phur phian lehnghal. A ruala han kal ve nghal mai chu ka tan tak pawh a remchan zawk tehlul nen, chhungkaw damlohna avangin ka duh ang pawn ka la khawsa hleitheilo a, kan chhungkua chu kan indamloh chhawk reng mai bawk nen, lung a zing duh map map khawp mai. Heng kan nih avang hian thil tak tak chu kan la ti ve thei lo a ni ber.

Sangzuali’n min kalsan atanga thla a liam leh meuh chuan keini chhungkua pawh Pathian zarah dam fel ve ta in, keipawh class tan a hun tawh takzet nen, aizawl lam pana ka liam chu a lo hun ve ta der. Class chu an țanna rei ve deuh tawh mahsela, zir em em an la neih chuang loh avangin ka rilru pawh a hmanhmawh uchuak hran lo.

Hetihlaia ka sawi hmaih loh tur chu, thla te pawh lo vei ve nual tawh mahsela Maryte nufa thihna case erawh kha chu ala kal ve reng a, police ho pawhin an tha thlah miahlo in an hna chu an la thawk ve ngat ngat bawk. Mahse, hmasawnna awm lo leh case dang buaipui ngai ve zel thin nen chuan awmzia a nei tam lo thin khawp mai. Chutihrualin, beidawn tumlo poloce mithiam rual te chuan mipui hnenah thu thlamuanthlak leh ngaihnawm tak tak chu min la fah awl lo va, ngawihbopui reng ai chuan ngaih pawh an ti tha zawk e.

Tichuan, aizawla ka nî  te bulah bawk zu awm leh in, min lo duat lehpek hle a, ka awmchilh thei tur pawh chu lawm der thiam tak hi an ni e. sangzuali nen pawh inhmu leh tawhin, class khatah kan awm ho thei bawk a, ani erawh hi chu mahnia inluah hrang ve thung in, kan veng a thuhmun lo bawk. Collegeah erawh kan inkawp chawt thung.

‘’ Awi! Manghet, tunlai chu ka rilru hi a hah ve tawp’’ thawk deuh halh pah hian ka bula țhu Sangzuali chuan a rawn ti deuh hlut a. Amah en tur chuan ka insiamrem ve nghal zat bawk.

‘’ Eng thilah nge ni ta? Ngaihzawng chungchang emni?’’

Ka tih chuan rang fe hian a lu alo thing zui nawk nawk. Chutah, rilru hah hmel tak bawk hian,

‘’ Kan thenawmte chhungkua bawk kha mawle. Ka lo buai ve vak na tur chu awm lo mahse, tunhnai hian a pasal thar khan kut a lo thlak nasa mah mah thin a ni awm a, thenawmnu ne hi chuan hman atanga inclose em em kan nihna te, ka nu leh pa te lahin fanu ang hiala an lo chhawmdawl tawh thinna ah te hian ngaihtuahna an la peng nasa lo thei thin silo a, ‘’ inthiamloh hmel taka a rawn tih leh chuan thil hlui min hriatchhuahtir ve zawk. Nia, kei tak pawh hi Mary te chhungkua vanga ka hah thin zia leh rilru buai reng reng a ka awm nasat tawh dan te kha ka ngaihtuah kir lo thei lo a ni.

‘’ Engtia nasa in nge anpa chuan kut a thlak thin le ‘’ ka tih ve chuan rang fea min lo chhang let leh thuaiin,

‘’ Na tak a nih hmel. Ka nu te min rawn hrilh dan chuan rehhlum alo tum a niawm a, a hmai leh taksa dangah pawh duk leh pem a awm thluah mai anti! A fate khan ka chhungte chu han koh nachang an hre hma hlauh zawk a, ni lo se, a nunna pawhin a tuar thei daih ang chu’’ a thaw zui leh hak mai.

‘’ Chutiang te chu police emaw MHIP lam te hriattir chi a ni lo emni? Ava tih chi loh ve a’’ awki sang fea ka lo tih leh chuan,

‘’ Police ah em chuan an report lo a, nia, MHIP lamah thung chuan thu an thlen ve tawh ngei e, vawikhat kha chu an zu kalchilh tawh bawk a, mahse, a bak a awm lo’’ lo ti chuai leh raihin a ngaih dan chu a ih hmel chiah loh hle a, chutiang chiah chu keipawh ka ni ve tho mai.

Tunlaiah hmeichhia leh naupang humhalhna dan a tha tawh nasa si a, chutihlaikara hetiang intihduhdahna leh kut inthlakna thawm vel hriattur a lo la awm fo mai hi chu ka ngaih dan a pel ta khawp mai. A tuar lo turin an tuar zel a, nunna hlu takte pawh kan chân ta fo mai chu a nih hi mawle. Nge, kan rama dan dinglai tamtak hi an la khauh tha tawk lo in, thil tisualtute hrem theihna pawh ala na tawk lo fo ni ang. Dan hnuaia leng intih ve na ram ni si ah chuan sualna hi a thleng nasa a a rapthlak lulai deuh mah mah lo maw, ka ti ve  a ni.

‘’ U Manghet, ‘’ ka mutui lai chu ka tho chhuak zawk. Vawiin hi class kan neih loh avangin in lamah ka tawm nileng dawn e ka tia mut mai mai pahin zirlaibute chu ka lo en kual bawk. Chutihlai tak chuan ka hming ngeia min ko thawm hriain ka thochhuak nghal hluai a, ka hawi zui ruai thei. Inah hian mahni chauh a ka awm lai a ni a, min rawn ko ringawt tu tur an awm hnaiin ka hre theilo. Chutia makti taka ka lo hawi ruai ruai lai chuan ka bul lawka tukverh inhawng sa chu rawn invaw khar thuaiin ka phu phar dawrh. Chutah, khum atanga chhukthlak zawt zawt pah chuan aw khur dur dur chung hian tu nge a nih chu ka zawt ve ringawt a, a nihna takah chuan thli chhia maimai pawh a lo ni thei tih hrechhuak lehin ka inbengdai ta deuh hlek. Mahse, chu erawh chu ka rin dan diktak a ni em tih ka chiang hauh lo thung. Mihring dang awm ve hauh silo in kotu ka nei a, chutah, tukverh  a rawn invaw khar leh ngawt bawk. A zavai khan thli chhe hnathawh an ni tihna em ni dawn? Ka ring hauh lo. Roomah chuan ka awm luih theih tawh ngang loh avangin choka lamah ka tlan phei vut a, ka la hawi kual hrek hrek reng bawk. Zorami te in hi a lian in a zau ve thawkhat hle a, chutia chhun pachan laia mahni chauh a han khawsakna atan chuan a nuam duh the fahran lo.

‘’ Manghet, kan nufa thihnaah hian thudik hailan a nih theih nan min tanpui rawh. Misual hi manchhuah a nih hma loh chuan keini nufa hian zalenna famkim kan nei thei lo a ni ‘’ rawn titu hmel ka’n en chiang chu Mary nu, nu Dingi kha a lo ni reng. A hmel lan dan chu pangngai vekin mitthi tawh hmel reng reng a pu lo lova, mahse, a ngui hle thung si.

‘’ Ka Nu Ding, khawiah nge Maryte unau?’’ tia ka zawhna chu zawi sap, fiah tak si hian,

‘’ An awmna tur hmun diktakah awm theilo in an la vakvai kual rih a ni e’’ tia min lo chhangin a bo zui ta daih a. keipawh ka mumang ram atang chuan ka harh chiang kek kawk hle. Thawk deuh huai pah hian ka mumang te chu ka han ngaihtuah tha leh rih thin a, a mak ka ti tawp thei lo. Eng aiah nge Mary te nufa hian tawp chin neilo a min la tihbuai fo mai le. A hma zawng khan Mary niin, tunah erawh nu zawk a ni ve thung. An tan hian tangkaina leh tihtheih nei ve turah min ngai tak tak nge? Ka tihtheih a awm phawt chuan chu tluka chak chu ka nei bik hauh lovang. Mahse, engtinnge, khawi atanga țan tur nge ni dawn. Tunah rih chuan a mual bo in ka la bo takzet a nih hi mawle. Ka buai rukna te hi Sangzuali hnenah khan sawichhuak ta ila tih dan te a lo hre mial a ngem? Nge, thilmak hmuhin min hmu chhunzawm zawk ang. Buaithlak vel hle mai a!

Kan college ah chuan education zirtirtu thar an rawn dah dawn tih chu a ri leh ta nuai nuai mai a, kei leh Sangzuali chu kan subject a lo nih bawk si avangin kan helhhawlh ru ve hle. Hmeichhia nge mipa ni ang? Mipa ni ta se tlangval ala ni a ngem? Hmm,, nula han nih ve takah chuan hetiang lam hi rilruah alo awm ve lo thei thin lo.

Sawi lawk ang ngeiin kan zirtirtu thar chu classah a rawn lut ta zan zan mai le. A hmel ka han hmuchiang chiah kha kei chu ka lo phu deuh zawk thei. Amah chu pavalai bawr vel tur hi niin a inzuah buk vei phian lehnghal a, mahse, chu chu ka en ber pawh a ni chuang lo. Chu lam ai mah chuan e amah kha. Amah mawlh mai kha, ka mihring hmuh hnu ni tlata hriatna ka nei zawk tlat a ni. Ni e, amah Pu Rochhunga, Mary pa ngei kha nia hriatna lian tak ka nei ta tlat. Thil ni thei niin ka hre silova, mahse, ka en chian poh leh amah ah chuan Mary pa hmel leh nihna hlir chu a lang fiah tual tual mai bawk si. Mary pa khan phirpui alo nei reng emni zawk? Ni lo, chutiang thu chu ka hre ve ngai lo ve. Kha leh chen kan inthenawm chhung khan unaupa a neih thu leh chutiang reng reng sawirik a awm ngailo. Marawhchu, an sawilan ngai loh avang ngawt khan pianpui a neilo e tihna chu a ni hauh lovang. Chutia uluk fahran maia zirtirtupa hmel ka lo en tlawk tlawk lai chuan ka bula thu Sangzuali khan min rawn nghawk ta zauh chung hian,

‘’ Tlangval chu ava nih hmel si loh em’’ tih pah hian min siai zui zauh. Rilru pangkhing angreng taka lo khik ve suk pah hian keipawh chuan

‘’ I ho mai mai e, a hnaah chiang se fel hle se a tawk der “ lo ti ve in rilruah erawh thildang , hmun dang hlir a awm zui thung a. He kan zirtirtu thar hi ka belhchian deuh a țul dawn nia hriatna ka nei zui ta a ni. Engtinnge bul ka țan ang? 

‘’ Sir, rem I tih chuan thil engemaw ka lo sawi ve lawk ‘’ 

Kan sir thsr pawhin ni thum lai chu class a rawn join ve tawh ang tihah hian zahtheihloh chhuahin ka thutna atang ka ding chhuak deuh thurh a, amah leh midang ho chuan maktih hmel fe hian min rawn en nghal thap. Sir pawh chuan chiang taka min rawn en chung hian a mitko alo san uk a, a hmel lan dan mawlh mai chu, tlemin inzuah buk deuh mahsela Pu Rochhunga chiah chiah kha nia hriatna ka nei tlat si. Mahse, mak takin he kan sir that hi a hming chu R.Lalhmuakliana tih a ni daih thung a, umm,,chungte chu hming lem hmangin documents engkim a siam danglam vek thei a, hming nise a thlak tir theih vek tawh bawk. Tualthah hreh miahlo mi nunrawng Mary pa bak kha a ni hlei lawnge.

‘’ Han  sawi ta che ‘’ rawn ti sup tu avang chuan  ka suangtuahna khawvel ata harhchhuak zawkin ka mit te chu ka han khap leh deuh sak sak a,  ka lu ka thing zui deuh nawk bawk. 

‘’ Awle sir, he college ah hian ni thum vel awrh chauh ila rawn thawk tih chu hre vek mahila, I zirtir nih hi nuam kan ti a, a fiah fai kan tiin nangmah hrim hrim pawh hi mi ngainatawm tak I niin kan hre vek bawk. Tin, reilote chhung chauh la inhre mahila he college hi chhuahsan lo la, cham ve reng thei zawk la kan ti. Keini naupang ho pawh hian I pawisawi loh hram kan tum theuh anga, tihpalh thil a lo thleng a nih pawhin tha taka inhrilhfiah zel tum hlawm bawk ila, ava han nuam dawn si em. Sir, keini hian I thiantha nih kan duh a ni’’

Ka sawi laklawh lai te chuan ka tha khur a rawn chhuak a, ka mualpho teuh kher. Mahse, control thei haluhin ka mualpho lo hram a ni e.  chutia ka han sawi zo chu, kan sir mawlh mai khan a tarmit kar atang chiang uluk fahran mai hian min lo en ve kal mai a, a mi melhna chu a fiahin ka zam chhe lo chauh. Amah lah kha a hmel lan dan a thutakin ala ngawi ngal reng mai bawk nen, class chhung chu a reh deuh thap. A pawi ka sawi ta emni aw tia ka lo inngaihtuah lai tak hian rawn nui chhuak hawkin zawimuang hian a kut chu a beng ta thek thek a, chuveleh, midangho pawh chuan an rawn chhunzawm ve tliar tliar. Ka va han zak chhe tawh si em. Thu tura min tih hnuin thaw halh chung hian ka thu thla hnawk a, Sangzuali leh bawk chuan min lo mellh râng nasa ngei. Zawi ser sawr zet mai hian,

‘’ Engvangin nge khatiang te I sawi vak mai a? ‘’ a rawn tih chuan keipawhin rang zet  hian,

‘’ Ka tih a ngai tlat’’ ka lo ti liam ve puat a, ani thung chuan a ngaihna a hriat loh hmel kher. Ka ngai pawimawh zui duh ta lo thung.

‘’ Manghet, Lalrinngheti ini em kha?’’ hnunglam atanga min rawn titu aw avang chuan inher deuh vutin, ka han lehhawi nak chuan kan zirtirtu thar ngei mai kha a lo ni khauh. A mitmeng fiah tak khan chiang fahran hian min lo en kuau mai a, ka țim deuh sawk thei. 

‘’ Aw ni e sir ‘’ ti chhuak sapin ka lo ding nghal a. ani pawh ka bula rawn phei ve zel pah chuan a han khuh leh kharh kharh phawt.

‘’ Chawmhma lama I thusawo vang khan ka lawm khawp mai. Zawm ngei  pawh kan tum tLang dawn a nia aw. Zirlai tha tak I nih ngei pawh ka ring bawk e’’ ti sur surin min kalpel a, kei chuan ka lo en zui vung vung thung. Ka chhan let ve na pawh nghak miahlo a chutianga min han kalsan zui daih mai chu mak ka ti ru in, nuam lo ka ti angreng hle a, a lawm lohna tur chi ka sawi tel ta emni aw ka ti hial. Mahsela, chutiang thil chu engmah ka sawi chhuak lo tih ka inhrechiang a, inthiamlohna viau tur chu ka nei leh pawhin ka hre leh ta lo ve.

Ka zan hun awlah ka chhungte nen inbe lehin Mary te case pawh ka zawt tel nghal luam a, mahse, eng thumah an lo hriatbelh bik lo. Hetihlai hian ka sir thar chungchang a ka nagih dan vel te kha tu hnenah mah ka la sawi lang duh hauh loa, hei hi chu keimah ngei hian finfiah ka chak tlat a tin ni. Ka ti ngei bawk ang. 

‘’ Manghet, ka assignment hi min lo thehluh sak ve mai aw, haw lawk ka ngai dawn a’’  

Zing ka thawhchhuah rualin Sangzuali hmel chu hmuh tur a awm nghal a, a lan dan atang ngawt pawh chuan a buai hmel takzet. Tin, a tap nge tih chu ka hre lo, a mit te pawh chu a bui lâk mai a, a shawl bah lai te chuan a hmai te chu a hru leh pawk thin bawk. A awm dan buai zet chu ka hriatthiam loh em avangin zawhna ka siam ta nge nge. Mahse le, min chhanna zet chu ka rin loh lam daih a nih bakah min țhawng takmeuh.

‘’ Ka thenawmnu ka sawi ve fo te kha an nufa thumin an inchhungah an ruang chhar a ni a! A pasal thar lah kha hmuh tur a awm zui lo bawk , thuhrimin an pa hi chu an inneih atang khan hna vangin khaw dangah a kal bo fo va, a rawn haw ngun em em thung. A rawn haw apiang hian a nupui fanaute chu a rikrap ziah bawk’’ 

Karei!! Leh! Ka thu hriat zet chuan ka tha a tizawi zo vek a, sofa chungah chuan midang mitmei pawh veng lem lo hian ka thu nghal hnawk thei. Hetihlai vek hian Maryte nufa chunga thilthleng te kha ka ngaihtuah chhuak lo theilo a, he thil thlen tir tu hi pa ber, Pu Rochhunga tho kha a ni thei a ngem? Ni ta se, a hma daih atang tawhin engatinge tuman eng thilmah an sawi miah loh. A thlalak kha thehdarh niin, anni khua hian an lo hmu ve mahlo tihna emni? Sangzuali hian engah nge thil reng reng hi a sawifiah chian ve theih miah loh. Ngawi lawk! Tunah hian kan sir thar Hmuaka pawh kha a zinbo lai tak a ni ve asin! Sangzuali khan eng nge a sawi kha, an pa ber chu hna vangin a zinbo thin a ti a ni lawm ni? Ka tho chhuak zawk a, roomah tlan lut lehnghalin class kal tur chuan ka insiam zui ta sawk sawk a, midang pawh ngaihtuah ta lo chuan chaw pawh bar zui lo in ka phit chhuak ta vut.

College ka thlen rual rual chuan tumah pawh ka be lo. Principal roomah ka tlanlut nghal a, vanneihthlak tak hian ani pawh chu alo kal ve tawh hlauh. Chutia a office kawngkhar pawh kik khawmawi lo a ka han tlan lut puat mai chuan a ti hrilhhai ve deuh nge ni, a meng phawk angreng hlemai a; min lo en deuh vung vung. Mahse, keimah zawk chu insiamtha zung zungin thupha te ka chawi leh te te phawt a, ani pawh lungawi awm tak chuan alo bu ve tlauh tlauh. 

‘’ Eng thu nge I rawn neih le aw? Ava emergency hmel rup rup bawk em!’’ nuihza hmel insum taka a rawn tih hnu chuan keipawhin chil ka lo lem khawlh. Sawi tan dan tur chu a vang ka ti hlemai. Mahse, khawmuang rei thei ka ni lo tih inhria in,

‘’ Sir, kan education zirtirtu thar Sir Hmuaka kha khawi khawchhuak nge a nih tih hi min hrilh thei a ngem? Chuan eng lo, tunah hian khawi hmunah nge a zin tih pawh hi ka tan hriat a pawimawh lutuk a’’  ka ti ve ringawt. Zirlai naupang tan chutianga mahni zirtirtute mimal thil han buaipui chiam mai chu thil nih dan tur leh mawi pawh niin a lang chiah lo na a, ka hun tawn mekah hi chuan hriatchian kha a țul miau mai bawk si. Kan principal lah chuan chiang kel kawl zet hian min han en run run a, a ngawi tlat mai bawk si nen ka tan chuan nuam duh lo vai vai tak a ni. Mahse, rinloh dan deuh in zaidam fe mai hian min rawn chhang ta khauh a nih chu.

‘’ Sir Hmuaka chu tunah hian an khua Kolasib lamah a fanu kum 11 mi damlohna avangin a haw lawk a, a lo kir leh tep tawh ang. Tichuan, I zawhna chu ka chhang fel fai deuh em aw ‘’ a rawn tih leh takah chuan ka su deuh dup thei. Sir Hmuaka chu kolasib khua daih maw a nih a? Tin, Principal sawi dan atang chuan fanu a nei bawk. Hei hi thudik a nih tehmeuh zawngin Sir Hmuaka inti hi Mary pa a nih daih theihna chance a awm lo chu a ni dawn si a, a nih chuan kei hian thil țullo ka buaipui lek fang tihna emni dawn? Nge, heng thil zawng zawng hi lemchanna vek ni zawk ta ang. Ka rinhlelh em em kan zirtirtu a kal bo mek a, a kalbona pawh chawlhkar khat lai a liam leh tawh ang chu. Tichuan, Sangzualite khuaah kan khuaa Mary te nufa chunga thil thleng ang chiah kha a thleng zui lehnghal bawk. Sir Hmuaka hi tunah hian kolasib lamah chuan a awm tak tak a ngem? Kolasib chu an khua pawh a ni chiah em? Tu nge hria? Tuman. Tumah hian kan va hmuh pui kher tawh hleinem mawle. Umm,,amah chauh lo hi chu rinhlelh tur dang reng ka hre tawh lo kei chuan.

‘’ Tawngkam mawilo nilo se, in sir Hmuaka hi nupui sÛn tawh pathlawi fa 3 nei lai a ni a, a nupuiin a boralsanna pawh hi ala rei lo. A fate hi an la naupang angreng hlawm a, a upa ber pawhin pawl 10 a zir ve mek. Tunah a fate chu kolasiba a farnute bulah dah rih in, ani erawh tihian hnathawka a vahchhuah a ngai thin si a, a khawvel hi khawngaihthlak ve deuh mai asin ‘’  Principali’n a rawn tih leh chuan  ka khawngaih phiangsen lo ve, dawt bur a nih hi ka lo ti rikru hmarh hmarh a. lawmthu te hrilh leh te tein office pawh chu ka chhuahsan fel thei ta a ni. Engtinnge ka tih ang? Engtia hmalak tur nge? Lalpa, min tanpui lul rawh.

‘’ Awi Bawihte, inu Dingite nufa chunga thil thleng ang chiah ciah kha hei, I thiannu Zuali te khuaah khan a thleng leh a, a mak ka ti lutuk. Keizawng, ka thla hi a muang tawh lo em mai ‘’ ka nu nena kan inbiak chuan a rawn ti deuh bawrh bawrh mai. A thlir dan atang chuan rapthlak in hlauhawm viau mahsela kei erawh chuan thlir dan dang hlak ka lo nei ve thung. He tualthah hmang mihring hian bitum bik a nei tih a hriat mai a. a bikin, nuthlawi, hmeithai, chutiang mi chu nupuiah neiin a tawpha a zia a chhuah a, a that ta mai ni ah ka ngai .  chutianga a hranpaa mi nazawng va thah tum ang chi kha chu a nih hmel pawhin ka hre ve lem lo. Bitum bik a nei a ni.

‘’ UManghet, min ngaihthlak theih chuan thudik ka hrilh ang che aw’’ min ti tu thlarau mai Mary hmel chu ka han en a, thil êng nasa takin min chhun khalh vang chu nimaw, a hmel chu chiangkuang pawhin ka hmu hleithei der lo. Mahse, amah ngei kha chu a ni tih ka chiang viau thung.

‘’ UManghet, Rochhunga kha ka pa min hringtu a ni ve lo asin!’’ a rawn tih leh chuan ka lo phu deuh uih thei a, ka muhil lai pawh chu ka duh loh dan deuh hian ka hrah zui nghal kawk. A thusawi te kha ka ngaihtuah let in, a sawi zawh fel hmaa ka harhsan ta daih chu ka ui ngawih ngawih a, ka thinrim țeuh mai bawk. Engpawhnise, Mary te nufa hian duh an nei a, chumi ti tur pawh chuan kei ve mai hi rawn ngiat tih ka hria. Tin, amah Mary kha Pu Rochhunga fa hrin a nih ve loh chuan tu nge a pa ni ta ang? Ka rilru an va han tibuai tak em aw.

‘’ Nu, Mary kha tu fa nge a nih ve a? Pu Rochhunga fa kha ani ve lo tak tak tihna mi? ‘’ ka zawhna mawlmang lutuk chu ka nu chuan maktih hmel fe hian a lo dawngsawng a, a nui hul hak mai. 

‘’ I hrelo chu I demawm hran chuang lo ve. Mary nen khan kum 3 vel arh chauhin in inthlau a, hre ve lo pawh ni la a awm lutuk tho. Eng lo a nia e, Mary pa diktak hi Mary pian atanga thla 7na vel a ni awm e a a boral tak kha. Tikhan a nu in harsa takin a enkawl chho ve tan a, chutihlai vek chuan kan khuaah hian Rochhunga kha zirtirtu hna thawk turin a rawn lut ve hlawl mai a, intawng chhunzawmin an innei chu a ni ta mai. Naupantet atanga lo in enkawl chho ngar ngar ta chu pafa tak tak an ni lo tih hrelo pawh hi a awm nual. Nang chauh I ni bik lo e Bawihi. Mahse, tinge chu chu tunah chauh min zawh a, ava mak the thut ve ‘’ rawn ti tha lehin kei erawh ka lo riat nawi ta vel mai mai. A hma daih atang tawh a ka lo rin tawh thil a nih dan te chu sawiin dawt var chu ka hrilh ve ta ngawt a. 

Tunah chuan Sir Hmuaka pawh a zinna hmun atanga lo haw ve leh tawhin, ka thinlunga rinhlelhna inmung reng vang hi nge ka hre lo, a hmel te pawh chu rawn danglam ta sawt hian ka han hre eh kual vel a. a pawr deuh fap ni te khan ka hria. Tin, keiin hetia ka lo rinhleleh ruk em em lai hia buaina dang awm leh thei ta chu, thiannu Sangzuali mawlh hian Sir Hmuaka chungchangah chuan eng thumah a sawi ve ngai lo hi a  ni. Keiin, tualthattua rinhlelh Mary pa kha ang ka tih em em laiin, Sangzuali thung chuan an thenawmte pa thar, tlanbo ta nen khan an in an ve tep thu a sawi duh chauh mai a, chhete tal pawh hian amah chu rinhlelhna a nei ve lo nge, kei hi ka buai thui lutuk zawk tih pawh ka hrethiam tawh lo. A ruk thei ang bera sawipui ngial ka tum pawhin a theih tlat loh a, Sir Hmuaka chu a ringhlel thei hlawllo te pawh kan ti thei ang chu. Chuti a nih chuan mahni chauh a ka buipui leh fat fat a țul dawn a nih ber hi a. 

Amah ah chuan tlaktlum tumin thiehtawp kha ka chhuah ve a, inngainat tir a, biak tam ka duh bawk. Mahse, Sir Hmuaka awm dan erawh hi chu danglam sawt tak a ni. A bikin, ka lakah hian a khawsak dan a danglam zual hle a, a khawlh lutuk tlat bawk. Assingment nise tha taka ka tih ve thlap pawh hian sawiselna tur a hre em em a, kei aia tichhe zawk nia ka hriat te lakah erawh buaina nei lo ang mai hian a awm leh thlap thin thung. Classah nise, zawhna ka siam apiangin thu dang a sawi zel a, midang zawhna erawh chu duh ai aia seiin a chhan sak leh thung thin si. chumai chu ala ni lo cheu, class test kan neih apiang hian min sawiselna tur a hre thei em em a, ka tlin lohna lai ngawt hi a zawng char char ni in ka hre ber. Kei hi a mil loh zawng tak ka ni nge, principal bula a chanchin ka lo zawh chungchang kha hre lehin min ngei thar ta riau ni ang. 

Eng em em mah tihtheih nei rih ta lo chu ngaihngam fahran lo chuan class pawh pangngai takin ka kal ve zel a, sir Hmuaka chet duh dan pawh a hma ang tho kha ala ni e. A bikin ka chungah chuan sual ala chhuah lui ngar ngar a, engmah chu tisual miahlo mahila min sawisel erawh chu a bang thei lo.  

Sangzuali pawhin an thenawmte nufa thihna chunchang chu ngaihtuahnaah dah reng mahsela, kei aiin a bangbo veleh chhawng a, tihtheih vak a nei bik chuang lo khawp. Chutiang chiah chu ka nih ve mek dan tho a ni. Tin, kan sir chu rinhlelh vang ngawtin va report ta ila, eng kawngro mah a sut loh chu sawi loh, buaina lian zawk ka neih phah ngei ang le. Rinhlelhtur lah chuan a awm tha duh der lo a, ka tan tak pawh a beidawnthlak takzet a ni. 

Ni khat kan class bang chu Sangzuali nena kan lo kal dun bek bek lai hian  kan hmalamah thilmak ka va hmu ta. Ka ke pen lai tawp meuhin hmalam chu chik fe hian ka han en leh te te phawt a, ka awm dan the thut avang chuan Sangzuali pawh chu alo hawihai nasa the e. Min melh leh rulh rulh thin. Chutah, zawi ser sawr leh ngaihthat loh hmel fe a,

‘’ Eng nge ni ta?’’ a rawn tih lai tak chuan kei ka lo tlan deuh thut. Min umzui rang mai mai asin. Ka hmazawn hla lutuk lo ka thlen phei lai chuan ka mi umlai kha ka hlauh ta tlat. Ka hawi ka hawi ta mai a. chutihlai chuan Sangzuali pawh rawn thleng phei ve leh chiahin, hah thaw hluam hluam chung hian,

‘’ Tinge khatia I tlan vak a?’’ min rawn tih pawh chuan chhan ngaihna ka hre mai lo. Ni lo, chhanna chang ka hre lo a ni mah zawk.

‘’ khawnge a?” tih paha ka hawi hu hu lai te chuan eng nge ka zawn tih hre silo hian alo hawi kual ve nasa mai a, a nuihzatthlak thei lek lek zawk mai.

‘’ tu nge I zawn a?’’ a rawn tih leh tak hû ah chuan keipawhin fiah fai deuh hian,

‘’ Misual mawle. Ka hmu chiang alawm’’ tih pahin ka tei kual vut vut a, ka talbuai a ni. Ni e, ka mi hmuh kha mi namai a ni lo tlat a tin ni. Mary pa, Pu Rochhunga niawm tak kha ka hmu niin ka hriaa, a lehlamah sir Hmuaka pawh a ang tel tho bawk si. Ka buai vek. He ka thiannu hian eng thilmah hi a hmu ve thei lo tihna nge le aw. Ka thin te chu a rim hlur tawh nia. Tichuan, ka mi um ber hmuh zui tur awm ta lo chu beidawng zet hian ka kiansan ve leh mai a, rilru erawh chu a nuam duh lem lo khawp mai. Sangzuali pawhin zawhna a neih zui tak loh avangin mahni ngaihtuahna kawm ve ve chung chuan kan haw zui ta a ni. 

‘’ Sir, kan chenna veng a thuhmun tih hi ka lo hre ngai miahlo a, dawp titih hian sir Hmuaka chu chhun chawlh laiin remchang ka hmu fuh hlauh a, ka zawt ta nge nge. Ka zawhna avang chuan maktih hmel fe hian min rawn thlek deuh haw mai a, min melh chiang kawk kawk hle lehnghal. Mahse, rawn khik deuh suk pah hian,

‘’ Engvangin maw? Ka va han ring chiah lo em’’

‘’ Nimin class ban hnu khan kan veng kawngah ka hmu che alawm ‘’ ka han tih leh chuan a mitmeng a buai ta deuh nak ni hian ka hriaa, ka ngaihbel maimai a ni em tih phei chu ka hre hauh lo. Mahse, ka mi hmuh kha ka chiang a, amah zawk hi Hmuaka nge Rochhunga zawk tih ka chiang lo mai chauh a ni. 

‘’ Ekhai! Manghet, min hai chhiava a nih lek dawn chu. Keizawng, zemabawk lam daih a khawsa ka ni e ‘’ nui vur vur chunga a rawn tih leh takah chuan sawi tur ka hre ta lo ngei mai. Kan chenna hmun a inpersan zia ka hriatchian hnuah ngat phei chuan ka rilru pawh a buai zual ta hle. Engtiinge hma ka lak tak zel ang? Police hnenah kalin ka thil hmuh leh hriatte hi ka va sawi vek mai dawn emni ang. A ni theiin ka hre chiah bawk si lo. Umm, engpawhni rawh se, police hnenah chuan ka kal tho tho a ngai a ni ti chungin ka insehruh ta nghek.

‘’ Ka pu, ka inrawlh ve na tur a awm em tih phei chu hre hauh lo mahila, case pakhat chungchangah buaina ka nei miau mai a, min tanpui thei a ngem le?’’ va ti thawrin S.I pakhat hmaah chuan ka thu chawt a. Ani thung chuan chiang zet hian min lo en vung vung. Min chhang dawn ta lo emaw ka tihn hnuah a rawn tawng chhuak ve ta sup a. 

‘’ Han sawi la’ tiin. Chuveleh, kei chu ka helhhawlh nge ka hrelo, sawi hmasak ber tur pawh hre lo chuan ka han ngawi leh ren rawn phawt a. chutah, Mary te nufa case a hmasawnna an neih leh neih loh te chu zawt pahin, rinhlelh ka neih ve thu te nen lam chuan ka hrilh fai ta vek mai a. A hmelah chuan danglamna hmu em em lo mahila ka thusawi erawh chu a ngaithla uluk a, a ngaihtuah ve tih pawh a hirat. Mahse, keimah zawk hi ka zam laklawh ve miau a, ka dik hleithei meuh lo a ni.

‘’ Umm, a hmasa ber atan chuan nula, kan information te hi a tul tawpah lo chuan pawnlamah a ri chhuak thiang lo va, engpawhnise, nangpawh lo fimkhur nasa la, theihtawp chhuahin țan ho kan tum zel ang chu ‘’

Chu zawng chu anni police hnen atanga ka thu dawn theih chhun a nih si avang chuan lungkim lo zet hian station pawh cu ka chhuahsan leh ta hnu hnu a. Diktaka sawi chuan ka thu hriat anga ng te intithei takin ka va hrilh ve a ni a, khatiang the tawp chhanna han inpek mai chu a lawmawm loh ka ti lo thei lo a ni. Mahse ni e, khawi hmunah pawh dan hi a awm vek si a, kei an thawhpui pawh ni lem lo hnenah chuan an hriat ang ang an lo sawi ve ngawt nachhan tur kha a awm lo reng a ni. A sawi ang khan tualthattu lakah hian fimkhur hle ila, buaina tawh palh theih thil lakah pawh nveng tha hle ila a tawk mai. Tun atan chuan sir Hmuaka kan ti dawn nge, Pu Rochhunga zawk, ani lakah hian fimkhur zual ka ngai dawn a, tin, ka thiam ang anga amah enthlak hna hi ka thawh ve pawh a ngai ang. Hetia tangkaina neilo ang maia lo awm mawl ve tawp hi ka tum hauh lo, ka thlen chin chin thlen pawh ka tum a ni. He misual hi duh aiin a zalen rei tawh viau a, tu mitmei mah veng lo hian avak kual hnem tawh mah mah. 

‘’ Tunlai hi engati nge, I rilru ava han buai hmel thei em em. A thuhrimin, Sir Hmuaka nen hian tunhma ai khan in inpawh deuh riau, engemaw riau te hi a awm a ni lo maw?’’ rawn ti sur sur tu Sangzuali chu ka melh deuh kawk a, alo nui sâwng leh ta nghal. Chutah, bung deuh nghat hian,

‘’ Mawli, mi rilru hah lai laiin. Class banah sir Hmuaka hi ka zui haw ru dawn a, ilo kal ve dawn em?’’ ka thusawi vang chu ni maw, ani chu lo meng bial deuh kawkin, a hawi zui nghal zak zak.

‘’ Eng nge I thil sawi awmzia? Min ti hlauthawng a nia aw’’ a rawn tih chuan a thil awmze hrelo lutuk chuan ka tum lawk pawh ni miahlo hian mi nuih chhuah tir hak. He nu hian thil thlen dan leh awmzia engkim te hi hriatchian a phu ve niin ka hriaa, ka hriat ang zawng zawng chu ka hrilhfai ve ta nghek nge nge. Chutah, a chal chuar deuh nang nang chung hian,

‘’ Chuti chu Sir Hmuaka hi pawikhawihtu leh tualthattu kha a ni bawk I tihna maw? A mak dawn e! A ni thei dawn emni?’’ a rawn tih leh tak hlutah chuan  rang zet hian a kâ chu lo hup sak vatin, kan thusawi te chu hre pha tur an awm em tih en kualin ka hawi nghal zung zung a, vanneihthlak tak hian tute mah chuan min lo uksak hran lo hlauh.

‘’ Mawli, tikhan au vak vak ma ta che. Ihmaw, Sir Hmuaka hi a ni ngei e tih thu ka sawi lo a, a khawsak dan leh a hmel lan dan te hi a rinhlelhawm ka ti mai a ni. Chuvang tak chuan amah hi en thlak hna kan thawh a ngai. Chuan, keini pahnih pawh hi kan fimkhur viau a tul ang aw’’ ti leh zung zungin amah bawk chuan hmel dâng sâwp sâwp chung hian,

‘’ Taka, I sawi takah chuan maw, heta a rawn thawh hlim pawh khan kan thenawmnu pasal kha ka lo hrechhuak zawk tawh a, mahse, ani kha chu a nihka ring phak lo hrim hrim,. Chubakah, inkhuaa pawikhawihna chungchangah khapa kha a inhnamhnawih ang tih rinngaihna pawh ka hre lo. Khawvelah hian mihring inang kan tam em em a, ka ring thei lo bur. Chuvang a nia, engmah ka sawi that peihloh a, rinhlelhna chang lah ka hriat chhunzawm tak loh ‘’ a rawn tih leh takah chuan keipawh ka lo bu nghat nghat.

Tichuan, chawhnu dar 3 velah class pawh bang chhunzawm in, kei leh Sangzuali chu hmanhmawh ru fe hian kan inzui chhuak ve nghal a. sir Hmuaka  mawlh mai kha kan umphak lo mai ang tih kan hlau a ni. Sir Hmuaka hian lirthei eng chi mah a rawn keng chhuak ngai lo va, chuvang tak chuan a bus channa hmun turah a hmuhtheih loha kan lo awm ve kha a ngai tih pawh kan hria. Tichuan, a hawna tur bus changin tlar hmalamah a ding hawi vang vang reng a, keini thung chu midang zawng zawng hnungah ding in, amah melh reng chung si chuan bus pawh chu kan lo chang ve thung a ni. A tawp atawpah chuan Zemabawk pan tlan tur bus pawh chu lo thleng in Sir Hmuaka chu a kawngka hmalamah a lut zui thak a, keini thian dun erawh kawngka hnunglamah chuan midang rualin kan inhnawh lut ve rawk rawk. Sir Hmuaka mawlh khan min hmu ang tih hlau si hian mi phenah kan biru tawm kar reng a, ava han nuam lem lo tak aw. 

Zemabawk kan lut ta.

Bus a ding a, kan chhuk zui sap sap bawk. Kan mi zui ruk lai hloh hlau tak chuan a hnung zelah fimkhur tak hian kan kal ve reng a, a tawpah zawng, a chenna in niawm tak pawh kan thleng ve thei ta hram alawm. 

Inchhung a lut, kawngka a khar leh rual chiah hian keini thiandun pawh bang pawn lam atang thawm mgaithla turin kan ding ngawi ta kar mai. Chutihlaiin Sangzuali hlauthawng lah chu alo khur ve hlak hlak reng a, ka nghawk sawk sawk reng tawh mai. Timing hre lo thei kir ker lutuk hian. Rei pawh chutiang chuan kan ding hman lovang tihturah Sir Hmuaka phone ri hre zuiin a hello thawm ngeipawh kan hre chhawm ta.

‘’ Rawn kir thei ka ni rih lo. Ka tan helai hmuna khawsak phawt hi a tha rih tlat’’  

A thil sawi avang chuan kei chu ka lo kang deuh awk awk hman a, engtin emaw tak hian mi țhawng viau bawk. Chuti chu, ani hian aizawl hi a sual tih thup nan  bihrukna hmunah a rawn hmang lek tak tak tihna em ni ang? Tunah hian zawn mek a ni tih hria in a hmelhmai te pawh a tidanglam vek a ni lawm ni? Engtinnge he thil chungchangah hian hma ka lak tak zel ang le? Police hnenah kalin misual chu  awmna hmun ka hriat tawh thu ka va sawi ngawt mai dawn nge. Mahse, ani ngei e tih fiahna pakhatmah ka la nei lo tlat. Fiahna ka mamawh ta.

‘’ Engtia tih zel nge I tum?’’ 

Chak zeta pen hlawk hlawk pah hian Sangzuali chuan a rawn ti leh a. chhanna pek mai dan tur hrelo in ka ngawi ta reng.

Hetih hun chhung pawh hian ka chhungte hnenah chuan Mary pa chanchin zawh chu ka bang chuang lova, kan police ho hna thlen chin te pawh an hriat theih ang ang chu min hrilh ve thin. Mahse le, hmasawnna chu a zuang lem lo niin a lang thung. 

Thawkkhatlai khan Pu Rochhunga chu amah niawm taka hmu tu an kat fur mai a, amaherawhchu, tute mah khan an thil hmuh chu amah ngei a ni e tih fiahna an neih hlawm loh avangin hnuchhuitute tan tak pawh chet lak dan tur a vang chhunzawm hle. 

‘’ Manghet, office chhungah hian zirtirtute document thenkhat chu a awm ngei dawn a, luh ruk dan kan zawng dawn emni?’’ rawn ti tu Sangzuali chu ka lo melh let vat. A ngaih dan chu dik hmel viau tho mahse, Sir Hmuaka hian lem a chang mai mai a nih ngat zawngin helai hmunah hian a documents te chu a lem vek, a siamchawp tir vek bakk an awm dawn lo tih ka chiang. Chu ai chuan a chenna hmun kan hre tawh a, a nihna diktak hriat fiah theihnan chuan a pindan chhungril ber kan lipse kha a pawimawh zawk maithei.

‘’ In thenawmte nufa thihna chungchangah khan rinhlelh an nei ve em? Hriat te hi inei ve reng reng em?’’  ka tih chuan Sangzuali chu alo ner ve sak ringawt a. A chek leh hlak bawk.

‘’ Engmah hriat ka nei tawh lo. Ka chhungte ka zawh ve pawhin sawi that theih an nei ngai bawk si lo nen. A mualbo in ka bo a ni’’  a rawn tih tak si ah chuan ka lo  țhen sak. Kei erqwh chuan,a tir atanga ka lo sawi tawh ang khan Mary te nufa thihna chungchanga inhnamhnawih nia rinhlelh Pu Rochhunga tho kha ka ringhlel a ni a, tualthattu hi mi thuhmun an ni emaw, nilo emaw, Mary te nufs phuba hi chu ka laksak ngei tura ka ngaih avangin Pu Rochhunga ngar ngar hi ka bitum pawh a ni reng a ni. Policeah nihna nei ka ni lo va, CID ka ni bawk lo va, detective lah ka ni hek lo. Mahse, a tuartu te nufa min ngenna angin hetiang hian ka hna lo turah ka buai ta erh chu a nia, mahse, ka la inchhir chhin eih lo. 

‘’ UManghet, hna chu zawh a ni dawn ta!’’ 

Mittui tling piau a ,im en reng tu Mary chu ka lo melh ngawt ngawt ringawt a, a thusawi awmzia mawlh chuka hre lo a ni.

‘’ Mary, eng nge I thilsawi awmzia chu. Hna te chu kan la zo fel reng reng hleinem. Tunah I pa pawh a awmna chin hriat ala ni lo va,  engtinnge?’’ lo ti let ve sawk sawkin, tlem hian nui hmel a rawn pu ta deuh a. mahse, hnuailam ena kun ngaih chung hian,

‘’ Hremhmun kawngah hnuh liamin a awm mek ‘’ rawn ti lehin biak zui tur awm lo hian a bo leh ta hmak mai a, ka buai nasa ta mai. 

Ka mumang ram atanga ka harh hnu thleng pawhin Mary thilsawi ringawt mai kha ngaihtuahnaah a lut zui a, a sawi awmzia reng reng kha ka hrethei lo. Tin, vawiin hian ruahmanna engemaw tak neiin, Sangzuali nen chuan class tlanbo a, Sir Hmuaka In lam pan kan tum ru deuha, ani in college lamah hun a hman laiin a inchhung chu luhchhuah kan tum dawn a ni. Vanneihthlak takin hmanni kan zui ruk lai khan a chabi dahna kan hre fuh hlauh pek a, a remchang lehzual hlr ang. 

Ruahman ang ngei chuan chaw eikham lamah Sangzuali nen Zemabawk lam bawk chu kan pan leh ta vang vang a. sir Hmuaka pawh class kal turin a chhuak tawh ngei ang chu. Kan thil tih tum hi a hlawhtling thei a nih ngat chuan engemaw tak, tualthattu a nihna emaw, a nihlohna zawk  te thelng pawhin a ni ang chu, kan hriatchhuah phah ngei a rinawm a. Finfiah hi a tha hrim hrim a ni.

Sir Hmuaka chenna chu kan thleng ta. Rinlawk ang chiah hian ani chu alo chhuak daih tawh a. kawngka pawh chu tala lianpui mai hian alo inkalh deuh rup tawh nghe nghe. A chahbi dahthatna atang chahbi chu ka pawt chhuak tih ah, kan bul maiah hian keimahni lam hawi zawnga uipa lian zet rawn bauh tuar tuar chu kan hre ta mai a. kan thiandun pawh chu phu nasa tak hi kan ni e. sangzuali lah chuan hlau mangang chunga bangkil lam nek rawk rawk pah hian,

‘’ Awi! He ui hian eng ge a hriat a? Eng hmuhin nge min hmuh a, ka hlau a nia aw a bauh reng mai bawk si’’  a rawn tih chuan kei chu ka lo intihuaisen lui leh daih tawh thung. Chutah, bung nghut hian,

‘’ Ui a nia, a bauh ve bawk ang chu. Tawng thei hek lo, engahmah ngai suh lut ang’’ ti zawm zatin inchhungah kan lut a, kawngka kan han khar phui meuh chuan ui bauh thawm pawh chu a reh fel nghal hmiah. Eng khaw sawi set set lo hian kei chu room lamah ka tei lut nghal nawlh a, room chhung te chu mipa chenna ni awm a mawilo fahra hian alo felfai thlup mai. Engkim mai chu a awmna tur hmun diktakah an awm vek a, kan sir hi mi chengvawng tak a nih zia pawh kan hriat belh leh e. mahse, chutihruala mak ka tih leh deuh erawh chu, Pu Rochhunga nen khan ka khaikhin lo thei thin silo a, ani Pu Rochhunga thung kha chu zu ngawlvei niin a che pawh a felfai ve hauhlo. Chutihlaiin sir Hmuaka erawh hetianga mi ti thlip thlep mi hi ani leh rih si a, aa engpawhnise, chet dan phung te chu a thlak danglam theih lutuk alawm le. A nun an hmasa kha chu man chhuah a hlauh vang hrim hrim pawhin a thup bo vek thei tih chu ngaihtuah tha lehin, bangkil lama chhuar lian tak lo ding lam chu ka pan ta zawk a. A inkalh lo hlauh e. hawng zui rawk rawkin a chhungah chuan felfai em em hian thawmhnaw tam vak lo hi a lo inthlep tha thlap a, a thawmhnaw inthlep karah chuan file ka hmu zui ta bawk. Chu chu ban zui leh zatin chhuatah ka thutpui nghal a, ka hawng zui sawk sawk. Ka awm dan engkim min lo hmu tu Sangzuali pawh chu rawn tlanphei ve thuaiin, ka bulah chuan a rawn thu thla ve vat a. 

‘’ Eng thil nge I hmuh bik. En thuai thuai tehang’’  a rawn tih chuan ka chhang let lem lo. 

File chhungah chuan documents pawimawh hmel tak tak leh lehkha hrang hrang hi alo awm nual mai a, han en mai chuan Sir Hmuaka hi lemchang tihtur a ang ta lo riau. Chutah, file chhunga la awm reng eng document ber emaw ni chuan ka mit a la ta riau mai a, ka phawrhchhuak zui vat. Aw le, mak tak maiin chu lehkhaah chuan Pu Rochhunga hming leh a passport copy chuanna chu alo awm vang mai nia! Lehkha dangkam fahran a ni biklo, a birth certificate ngei tih a chiang hle. Mak ti lutuk in ka meng zau nghal kawk kawk a, ka lehkha kenna kut te chu a khur ru der der thei tawh. Sangzuali lah chuan thil awmzia I lo zawt ve chhen a, tawngkaa chhang ta mai lo in birth certificate chu a kutah chuan ka hmehbel zui ta zawk.

Sir Hmuaka tia kan lo hriat ve hi ka lo rinhlelh lawk ang ngei khan Pu Rochhunga zawk a lo ni tak tak tihna emni? Chu chu thudik o ni ta se, a documents pawimawh dang zawng zawngah Hmuaka tih vekin a awm si a, a nih chuan engvangin nge a bulpui pakhat birth certificate ber mai hi thlak danglam a nih ve loh tak. Thilmak a nih piahlamah ka ngaihtuah thiam chi pawh a ni ta ngut lo ve.

‘ ‘’ Rochhunga kha ka unaupa ngei a ni e’’ 

Chu rawn tawng thawm avang chuan kei leh Sangzuali chu phu zawkin, hnunglam hawi hian kan inher zui ta thuai a. karei! Sir Hmuaka chu kan hnung maiah lo ding in, keini thandun chu rum fahran mai hian min lo chhuk melh run nia! A kawngka hawng thawm leh a lo lut lai kan hre miahlo te chu thilmak leh awihawm loh tak a ni. Chutah, kan tawngchhuah ve hma hian amah bawk chuan,

‘’ Hetah hian eng thil nge inlo tih? ‘’ rawn ti chang leh fakin Sangzuali chu ka va en zawk a, a hlauhthawn hmel tawh hle.

‘’ ihh..’’

‘’ Aw ka hria alawm Rinnghet. Hetah hian ilo kal ang tih te chu ka hre sa vek alawm. Hmanni lawkah pawh inthiandun hian min zui ruk tak kha! A bultanna atang tawh khan nang hi chu ka hre lutuk tawh che. A chhan I hre duh maw? E le.. I thenawmpa, Mary pahrawn, Mary pawh pawngsuala lomkhawih chhe tawh tu Rochhunga ngei mai kha ka pianpui niin, ka chhâng chiah a ni miau alawm le! An chhungkaw tana I inpek zia leh an thih hnu thleng pawha ila buaipui zia te kha ka unaupa hnen atang ka lo hre kilh kelh tawh e. I fiah ta kuar em? Chutihlaiin, I chungah hian engvangin nge thil thalo engmah ka thlen tir loh tih hi I hre duh ngei a nga, umm, ka unaupa kha mi pawngsuala tualthattu chu nu tehmeuh mahse, a sahimna ka zawnsak a, ka lo humhim ve lawk tihloh ah kha chuan buaina ka duh be lem lo. Tualthah hmang lah ka ni lo, ka ni duh hek lo. Thla hlawh lut tamtak ka nei a, fa enkawl lai ka nei bawk. Tuna ka nun dan mekah hian keizawng ka la hkim tawk rih khawp mai nulate u’’ nuam tih hmel zeta a tawng lai chu lo pawtchatin kei chuan, 

‘’ Ka lo kir thei rih lo, I tih kha eng nge awmzia? Kan zui ruk ni che khan I phone be lai kan hre vek alawm. Nang hi Hmuaka ni lovin, Rochhunga zawk I ni tih ka hria, dawt min hrilh hlek suh aw’’  lo ti let ve khar kharin amah chu rum rum fe hian ka melh reng bawk a, ani erawh chu ala nui sawng duh chauh mai.

‘’ Ka nupui hual ka be mai a nih kha. I ngaih dan tenawm lutuk ang chi kha engmah a awm lo aw. Ka file nise in lipse vek tawh a, engah nge maw kei chu min la rinhlelh tlat ni. A.. ngawi the. Ka unaupa thihna chungchang vanga rawn haw hma ka ni a, nangni pahnih vang phiangsen hian ka thil tihtur theihnghilh  țhaka hun ka’n hman chu le’’ a rawn tih leh avang chuan keipawh ka lo nghing ve dawt. Chutah, amah bawk chuan a room chhunga phet kual vut vut pah hian,

‘’ Hre rawh u. nangni vang tehhrep hian ka unaupa nunna kha tihtawp a ni asin! A thi! A ruang an chhar! Khai khai! Eng chungchang te nge maw ka han hrilh chiam che u chu le. Stationah kal vat ka ngai ‘’ tia riat nawk nawkin a chhuar lian zet mai te chu a hawng vel thul. A khat tawk hian a rawn hui leh pap thin bawk a. kei thung chu  a thilsawi engkim mai avang khan ka lo sa deuh pup pup tawh a, min tihrilhhai takzet zet a ni. ‘’Ka unaupa a thi’’ a tih chu Pu Rochhunga kha a ni thei a ngem? Chu chu lo ni ta ang se, engtinnge a thlen theih zawk le. Tuin nge that a, tuin nge va hmuchhuak a, nge mahni inthat zawk? 

Chutia mu leh mal pawh nei manglo a kan lo awm mawp mawp lai chuan ka phone rawn riin, ka han en nak chuan ka pa hi a lo ni a. ka chhang zui vat. Chutah, lehlam atang hian hlauthawng aw zetin ka nu zawk chuan,

‘’ Bawihi, Mary pa, Rochhunga ruang kha an chhar a! Tukin dar 8 vel khan an chhar tawh a, mahse, an puangzar lawk lo a ni’’ 

‘’ Khawiah, khawi hmunah nge an chhar a? ‘’ aw khur hlawk hlawka lo ti let ve thuaiin ka nu bawk chuan,

‘’ I thiannu Sangzualite khuaah. Ramhnuaiah an chhar a nih hmel chu. A rapthlak khawp mai’’ a rawn tih leh chuan phone chu ka thlauh țhelh a. sangzuali lah chuan bangbo zet hian min lo la en reng mai bawk. 

Engkim thih leh buaina thleng vel zawng zawngah khan amah Rochhunga ngei hi bultumtu niin, thilthleng te kha ama tih vek an ni bawk tih chu a ruang bulah lehkha hnutchhiahin a lo awm a, a ziak lang vek bawk a ni.  A fa hrawn Mary a pawngsual thin avangin karlovah a nupui chuan a hrechhuak nghal a, mi zawng zawng hrilh a tum thu a sawi tak fo ah chuan tikhan a ruih laiin a that mang ta phiar mai a nih kha. Tichuan, tlanchhe zuiin, he a unaupa Hmuaka bulah hian a biru ta char char a, a hmel lan dan pawh nasa takin a thlak danglam hman bawk. Chumi hnuah, amah hretu an awm lemlohna, khawte bengngawng kan tih mai Sangzualite khuaah hian kal lehin,hna athawk bawk a, tikhan nupuite va na nei leh in, reiloteah a zia a rawn chhuah leh a, a nupui thar leh a fate 3 ngawt chu a dahtha lehbhmak a nih kha. Mihring sual leh nunrawng tak chu ava han ni chiang em ve aw. Mahse, a hremna dawn tur hmu hman lo a a liam ta mai erawh hi chu ka lo ui ve ngawih ngawih. Tichuan, hun rei tak misual lo humtu kan Sir Hmuaka pawh chu a hremna tawh tur chin tawkin jailah kum 3 lai chu a hun ava hmang dawn ta a nih kha. A phu viau e ka ti mai. 

Pu Rochhunga nunna chu a tawp ta rau rau a nih si chuan a chanpual hmuin, Mary sawi dan takah, hremhmun kawngah chuan han inpal lut mawlh the se.

***     ****     *****     ****      ***      ******        *****       ****        *****      ****

Leave a Reply