You are currently viewing NANGMAH EMNI!? (1)

NANGMAH EMNI!? (1)

Spread the love

Vanlalpeki Fanai

“Aw hei, traffic jam a nasa lutuk a, Hrangbana College bulah khan kan la tang khawm mek” tiin ka phone chu ka han au khum deuh chiam a. Hetia ka han au tak chiam chhan pawh hi pawn lamah chuan namen loin ruah a sur bengchheng bawk si a, chuvang chauh chu ani e. 

Chutia phone hmang a kalo au lauh lauh lai chuan ka motor glass chu an rawn kik ri ta karh karh. Chuveleh, ka ṭawng lai pawh chu tawp chawt in thawm awmna lamah ka hawi zui vat a. Ka’n en nak chuan pawn aṭanga keimah min lo bih reng tu hmeichhe pakhat chu ka va hmu ta phut. Amah chu ka hmu ve ani tih a hriat rual rual hian a kut chuan kawngka chu hawn sak turin min rawn ti lehnghal ngawt. Tunge maw anih le? Ti rilru neuh neuh chung chuan ka hawn sak ta tho a. Motor seat ah chuan a rawn ṭhu lut rang ngei mai. Amah lah chu ala huh dup zui si a, ka lungawi lo teuh kher. Ka motor hi ka duat ve tehlul nen. Makti zet a kalo en reng lai chuan a rawn hawi zuk a, a nui deuh sâng bawk. 

“Ka tihpalh lutuk, class kan bâng chiah a, ruah alo sur chiam mai bawk si nen, ka lo lut ve tawp” ati deuh ser ser. Ka rilru erawh in i nghal ve reuh hlemai alo ti hman lehpek. A hrim hrim in hei zat hi college kawt ah motor a ding ṭhup a, ka motor ah berkher rawn in tah luh ve ngawt tiin ka la lungawi theilo hle. Mahse, chung thil vel chu dahṭha in ṭha tak chuan ka be ta zawk a.

“Aw anih chu ava zialo ve, khawi veng a haw tur nge inih a? ” ka ti chhuak ta hram.

Chutah,

“College veng PUC bulah!” Ati ta mai. Ka hawi buai hman ṭhelh a. Kan chenna veng pawh alo inang lehzel a maw!? Hetiang khawp a nula hmelṭha leh hleitling hi engtinnge maw ka lo hriat ngai miahloh theih zawk le? Anih loh pawhin pem thar emaw thingtlang lam aṭanga In rawn luah ang chi te alo ni maithei. Kei erawh, college veng mi hlun ka inti ngam sak bawk si. Mahse le, keimah hrim hrim pawh hi Mizoram ah ka tal tam lo hle a, zirna avangin phai ah kum engemawzat chu kalo awm bo ve tawh ṭhin. Tunah hian hna te nei chhunzawm in Mizoram ah pawh kum 1 chuang awrh chu ka awm veleh tawh ani mai a, kan veng chhungah pawh he nula tihloh midang tamtak hmel thar hi hriatloh hmuh ṭhin chu ka neih nual tak kha maw. 

Tunah hian hna dang zawn pah tiin Home Mission School Zemabawk ah ka han thawk lailawk phawt ani a, private school anih angin ka in enkawl theihna tawk hlawh nei a  ka mamawh chhungte pur buailo a ka awm theih kha ka tan pawh a thawven thlak zawk.  He kan ram zimte ah hian hna zawn a hautak in, kan thawh theih tawk tur, kan qualification in a phak ve tawk te pawh sawrkar hnaruak han bawhzui ṭhin mahila, tlin a harsat chu keini in kan hriat ve meuh hi chuan an lo in la fel diam tawh ṭhin e antih chu. Umm, kha chu sawi thui lo teh ang.

Motor steering herh kual pap pap pah chuan ka bula ṭhu nula chu ka han melh leh zeuh ṭhin a. Alo luh hlim ai ngawt chuan a mizia chu danglam nasa tawh tak hi ani. A ngawi reng a, biak hmasak loh chuan min biak a tum tawh eihlo bawk. Vawt tih hmel tak a a ṭhu khur hlak hlak chu hmuh nuam ka tih tak loh avangin seat hnunglam a ka dah, ka jacket chu ha mai tur hian ka han ti a, ani pawh chuan sawi buai neilo in a la a, a ha zui ve mai. Tichuan, a tawi zawng in, kan veng kan lut a, ani chu an in awmna ni a a sawi ah chuan ka han drop leh te te a, tichuan lawmthu min hrilh leh luam hnuah keipawh ka haw zui veleh ta ani. 

In ka thleng chu ka nu alo phul deuh hlut, 

“Mama, tinge i phone i switch off tlat a, bazar ah lo kal kawi la ka duh tehlul nen” a tih chuan mak kalo kher. Ka phone chu ka off awzawng silo. Theihpatawp a ka switch off loh thu ka han hrilh hnu pawhin ani chuan a awih duh tlat lo, ka nu tak hi chu aw..

“Anih, chutia i awih duh tlat siloh chuan tikhan lo call leh chhin teh, ka la khawih danglam miahlo ania phone hi” tiin dawhkan chung ah ka phone chu ka dah zui zat. Chutah le, ka sawi ang ngei ngei in a ni chuan a rawn call leh ta ngat. Ka phone chu rawn ri chhunzawm ral ral in makti zet hian ani chuan min rawn en ta he haw a, chutihlaiin ka pa thung chuan

“In va ho nufa maimai e aw. Signal ṭhat loh vang te pawh ani ang chu” tiin alo nui deuh huk huk a. Mahse ka nu lung chu a dam theih thlawt loh bakah ka signal hi a bo ve maimai ngailo tlat chu mak ka ti. Umm, engpawhnise, zanriah ei phawt ang ril te pawh a ṭam tawh tiin ngaihṭha zet chuan ka awm zui ta tho.

Zan dar 10 a rawn ri chho a, mu tur a kalo insiam vel lai tak hian ka phone chu a rawn nghawr ta dar dar. Lak tum a ka’n en nak chuan ka number hriat ngai loh alo ni tlat.

“Hello”

A reh zui vang vang ta mai a. Vawihnih dang hello ka tih leh hnu pawh a ala reh zui tak reng avang chuan off mai ka tum, mahse, chutihlai tak chuan thawm ka hre ta. Nasa tak a hmeichhe au thawm ngei mai chu! 

“Ka duh lo pa, min hlap tawh suh. A nâ a nâ!” Tiin a au zui rawng rawng. Ka hamhaih a chet ngaihna pawh ka hretawh lo chu khum chung ah ka ṭhu khawng ta reng. Chutia a ṭe ruai ruai hnu chuan call chu amah in a rawn tawp zui ta daih mai a. Mak ka ti takzet. Ka taksa khur hlawk hlawk thunun chung in chu number bawk chu  call let ka han tum leh a, mahse, switch off a inti tlat zu nia! A landan ah chuan hmeichhe pakhat chu ṭanpui ngai in a awm ngei ani. Mahse engtinnge, khawi hmunah nge tih erawh helai aṭang chuan hriat zui ngaihna a awm map silo. A number kha chhui tir turin tun ang hunah chuan airtel office lam an in hawng tawh dawn der silo. Han biak mai tur a thawk te leh hmelhriat lah chu ka nei leh chuang bawk silo. Ka va buai ru tak em. Engpawhnise, tihian mut hmunah chu number chu call tum ngat ngat phawt ila tiin ka dial ta ngat ngat a, mahse, a hma ang chiah. Switch off a inti reng ringawt. Tichuan, beidawng in zing lam dar 1 ah ka muthilhsan ta nge nge. Ka mumang ah thleng thleng chuan ka la hmu zui leh ta nghal a, a nuam hranpa lo hle.

A tuk ka hna kal tur mawlh chu ka phur lo hle a, ka rit deuh luk nimai hian ka in hre ber. A hmasa ber atan chu phone number chu tung hmang tih ka hriat duh avangin  airtel office lamah ka lut phawt. Mahse, a beidawnthlak takmeuh. Office a thawk te chuan number chu kum 2 liam ta a a thih tawh thu leh hmang tu an awm tawhloh thu chu min lo hrilh nia mawle! Min va han ti hrilhhai nasa zual em. Beidawng takin office chu ka chhuahsan a, school ka pan zui ta ringawt ani. Chutia ngaihtuahna kawm a hmalam ringawt kalo melh ding reng lai chuan thawklehkhat ah ka motor tlan lai chu ti ding chawt tu an awm tlat. Ka ding dawt a, hma lam ah ka bu zui deuh lawp bawk. Le,,, ka hma zawn fiah taka ka’n hmuh theih nak chuan hmeichhe pakhat, nimin lama kalo phurh tawh nu ngei mai kha ka motor hmaah chuan a lo ding reng a, kei chu chiang zet hian min lo melh reng bawk. Chutia ka din tak tlat si ah chuan hnunglam a rawn tlan ve midang ho pawh in horn an rawn pe zui ta tluar tluar a, ka harhchhuak zawk thei. Ka dinna hmun hi kawngpui lun lai ani tih pawh ka hrechhuak nghal uarh thei. Tichuan, rang tak a chu nu chu hui lut nghal in 

“Lo lut rawh, vat vat in” ka va ti zui lauh lauh. Ani pawh engdang sawi lo hian motor chu a rawn pan a, rawn ṭhut luh pah hian a thaw zui deuh hawk bawk.

“Engvang a khatia lo awm ngawt nge maw inih le. Khawlai lun ah tak lehnghal. I chesual lo a, kan vannei tlang ta anih ber kha” tiin amah chu ka va melh pah zeuh. Chutah, rinloh lutuk hian a mittui chu a rawn tla ta mai a. Min ti hamhaih kher. Insut deuh hlap hlap chung hian

“Ihh..kan khuaah thih ngam in ka nu a damlo tih thu min rawn hrilh a, ka rilru chavai lutuk tikhan ka awm ta mai alawm le, a zialo ngawt mai” tiin pawnlam a melh zui ta daih. Ka zawhna te kha lak let leh theih anni tawh silo a, ka inthiam lo lehling khawp mai. Tichuan, engmah pawh sawi zui tawh lo in an college ah ka drop a, kei chu ka hnathawhna hmun pan in ka tlan zui leh ta vang vang. Nimin leh vawiin chu eng aiah nge maw he nula te hian min ṭhawn thut thut ṭhin ni. Ka inrin loh laiin a rawn lang thut zel bawk si a. Lungphu ṭhalo min neih tir takngial dawn alawm le. A hmel te kha ṭha in tlawntlai ṭha viau lo phei se zawng, ka ngaidam tawh hauh lovang le.

Nileng a naupang zirtirna han pek zet chu a chauh thlak ṭhin in a lehlam zawng erawh chuan a hlimawm duh phian lawi. Chau zet a in lam pan a ka tlan leh par par laiin Hrangbana college kawt ah kha nula bawk kha ka va hmu leh ta. A landan chuan a haw na tur motor alo chang mek niin ka hria a, khaw tlai tawh lo hian a bulah chuan ka va ding zui dat. Ka hmel a hmuh rual in ani pawh chuan min lo nuih zui ve var var a, chuang ve tur a sawm hranpa pawh a ṭul tawhlo, hrethiam tak hian a rawn ṭhu lut ve nghal a, kan tlan zui leh ta nghal ani. Tun ṭum chu hun dang zawng aiin kan inbe nasa a, ani pawh kal lam ai ngawt kha chuan alo ṭawng duh ve tawh a, a hmel hmuh pawh a nuam ta hle. Kawngtluan in chanchin te kan in zawt a, ani chu North Vanlaiphai khawchhuak daih niin tihian a nau te pahnih nen Aizawl ah school te kal in college vengah in an rawn luah ve hi alo ni a, a nu leh pa te erawh Vanlaiphai ah chuan la awm thung. An chhungkua hian buh hmun leilet zau ṭha tak leh huan ram te an neih thu a sawi bawk. Tin, amah hringtu a pa tak hian kum 15 mi anih laiin alo boralsan tawh a, pahrawn a hrawn thu a sawi lang tel zeuh bawk. Aw, chuan he nula hming hi Lalchhanhimi niin kei hi Vanlalhriatpuia ka ni e.

Inchhung ka lut chu ka nu titau tûm deuh bâr hmel ka hmu hmasa  ber. Ka nui deuh suk. Ka nu hi chu kei a fapa neihchhun lakah hian a pangchang in han tihtauh kual vel te hi nuam ati hle ṭhin a, mahse, naupangchhia tak a kan inthlem hnu reivak lo ah a ziaawm zui leh mai ṭhin. Hemi tlai pawh hian a bulah chuan ṭhu in ka han kuah deuh hlûn phawt a, min lo melh ṭha duh der lo. Chutah, naupang chhia zet in kei chuan

“Nu,,,  i fapa rangkachak hian kalo ti thinur leh tawh che emni? Mawh mawh” tia ka’n nek deuh salh salh hnu chuan vin hlak hian

“Engvangin nge call theihloh hian i awm ziah a, tho la, bazar ah kal lehnghal ang. I hna ban hun te hi remchangah lo lak han tum ve ṭhin mahila a theih reng reng loh mai. Khawiah nge i han fawr kual ṭhin ni? ” min ti ta zek. Min hrawk nasat poh leh ka nuih hi a za tual tual mai ṭhin si a, mahse ka ngaih erawh a ṭha bik chiahlo. Zan hmasa lamah lah kan problem ngai bawk avangin min hau tawh a, ka phone ka check lah chuan signal chu a ṭha vek ṭhin lawi si. A mak em mai tih chauh loh chu sawi ngaihna pawh ka hre ta mang lo e. Tichuan, a lungawi nan tiin ka nu chu a tlai a tlai chuan bazar lamah ka tlanchhuah pui leh ta ngawt.

Bazar kan thlen hian khua chu a a thim deuh chhulh tawh a, mihring erawh kan la ṭhahnem map map hle. Chutia ka nu bul mai a ka kal ve zel lai chuan tu emaw hian min rawn su thawi deuh thuak. Ka hawi let vat a, mahse chutiang a keimah min rawn su thei tur khawp a min rawn kal hnaih tu chu an awm miahlo. Mak ka tihna leh mihring tam dan chu a in hen tawk viau awm e. Hmalam pan chung a ka lo hawi let veng veng lai tho chuan ka kekawr ip a ka dah ka phone chu a rawn nghawr zui leh dar dar. Ka phu zawk thei nia. Phone ka’n en nak chuan zan hmasa lam a min rawn call tawh tu number hriat ngai loh tho kha alo ni lehpek. Mak tiin ka meng phawk zui nasa ta hle. Chutah, ka nu chu bekbawrh zauh in tlem a mihring thawl na deuh hmun reh lam chu ka pan lawk tur thu ka han hrilh a. Ka kalsan nghal nal nal. Tlem a hmun reh lai ni a ka hriat, step thim rik rek ah chuan ka va ding a, call chu ka chhang zui thuai bawk. Mahse, a mak khawp mai, hman zan ang chiah khan a tir lamah chuan a reh zui leh vung vung a, reilote ka nghah leh hnuin hmeichhe ngai bawk kha a rawn au leh ta chiam anih chu! Kalo ngaihchan ruk reng mahnise, min ti phu chiang kher.

“Pa, engvangin nge kut hi min thlak reng?” Tiin hmeichhe pakhat chu a ṭap zui hlawp hlawp a. Chutihlaiin a pa ni tur awm ang thawm erawh chu ka hre ve hauh silo. A mak tih zawng animai e. Chutia lo ngaihthlak mawl tawp aiah chuan tiin ka ṭawng chhuak ve ta nge nge a. Ka aw te chu a khur dur dur lehnghal a.

“Tu pawh ni la, khawngaih in min rawn tibuai tawh suh. En teh, tunge inih tih hi ka hrengai lo che ania” kalo ti let ve mawlh mawlh. Mahse chu hmeichhia chuan ka ṭawng ri chu hria awm pawh in a awm hauhlo a, a hma ang khan a ṭap a, a pa niawm tak chu a ko chul bawk. Ka tihngaihna hrelo lutuk chu ka hawi lawl lawl a, min pui thei tu ka mamawh takzet ani he hmeichhe awmna chin hre tur hian. 

Chutah,

“Ka pu, khawngaihin i fanu kha kut lo thlak tawh suh, hei, i awmna chin kan rawn chhui mek ania” ka ti leh ringawt. A hria em tih hre hauhlo mahila tihngaihna dang hlawl kha ka hre tawh silo. Chutia ka han tih rual chiah chuan lehlam thawm chu mak tak hian a reh zui nghal hmak a. Ka hamhaih zawk hle. Ka thin pawh a phu dup dup thei hial. Thawm ngaichang a kalo din ngawih reng lai in call chu an hmet tawp zui ta daih bawk a, call let ka tum lehnghal zat bawk. Mahse a hma ang tho khan a theih leh chuang loh fo. Chutia phone bih a kalo kun ngur lai chuan ka hnunglam aṭang hian tu emaw in min rawn be ta thut

“Tah khan eng nge ilo tih reng a? ” 

Phu dawrh chung hian aw lo chhuahna lam chu ka han hawi vat a, ka nu chuan ngaihṭhat loh hmel fe hian min lo en reng. Ka hamhaih tal vel chu ṭul hlei lo ah ka nui ta suk mai.

“Aa…eng nilo e, call pawimawh emaw ka tia” tiin a thil khai bawr luk te chu ka va lakchhawk ta zung zung a. Tichuan engdang sawi tawhlo in kan haw ta nal nal. 

In kan thlen hnuah pawh ngaihṭhat loh na chuan min la um zui zel a, engtia hmalak chi nge ni ang tih chu ka buaina ber ani a, mahni chauh chuan he thil hi chhui zui ngaihna hlawl ka hrelo ani. Ka chhungte chu hrilh ve pawh ni ila, kei ai hian hmalak dan tur an hriat bik vak ka ring silo. Ka umami tal awm se aw ka ti vawng vawng thei. Ni e , ani hi chu rual a pawl deuh a, han zawh zau tur leh tih vel dan tur pawh alo hre khiah thei asin le. A pasal hna avangin Goa lamah an pem bo daih tawh mai si a, kawng hi a kaw lo ani e. Engpawhnise, khua var sela, airtel office ah bawk khan han kal leh tur ani. Thil an lo hre sual ve thei tho alawm le tiin beiseina chhete nen chuan ka muhil zui veleh ta.

“Ka pu, hei chu nimin ah pawh kan en fiah sak vek tawh che kha. Tihngaihna a awmlo ani. I duh chuan hei, kan registration bu te pawh hi en la, kha number kha chu i hmu kher tawhlo ang. A thi tawh miau a, ziah lan ani tawh lo” tiin lehkhabu lian lampang hi ka hmaah chuan a rawn nawr phei a, kalo keu zui vat. Ka peih chin tawk a rei ka en ngial hnu pawhin kha number ang reng reng kha chu ka hmu ta lo, min va han ti beidawng tak em. Chutah, lehkhabu chu khup thawk in thaw halh chung hian ka hmaa ṭhu tlangval hnenah lehkhabu bawk chu ka han pe let leh a, ani chuan tihngaihna hriatloh hmel zet hian min lo en let ve kar.

“Chutia i mangan pui viau chuan ka pu, police ah thlen tawp mai la. Anni in tihdan dang deuh te pawh an lo hre mial maithei asin” atih chuan ka harhchhuak zawk. Ni e, police nge nge chuan tihngaihna te pawh an lo hre zawk tak anga, mahse evidence pakhatmah awmlo chuan min ring ngawt dawn silo a, engtik hunah nge kha number aṭang khan call ka dawn leh ang tih lah chu ka hre bawk silo. Anih chuan he thil hi hmanhmawh vut vut a tihchi pawh ani lo e tiin min lo call leh hunah call ka record anga chu chu a ṭha ber ang tiin ka ngaih chu ka han ti ṭha chawp leh a. Mahse, ka ngaihtuah dan chu an hria nge maw tih mai tur, chu zan chuan eng call mah ka dawng zui ta reng renglo a, ka ngei ru angreng hle.

Tui tak a ka muhil lai chu kaiharh tu awm ang mai hian ka harh zawk mai a. Harh chiang kek kawk tak ka ni e. Ka khum lu a tukverh chu alo in hawng hiai mai niin, kalo kalh theihnghilh ani ngei ang. Pawn lam a thlifim thaw heuh heuh chuan ka parda zar te pawh a rawn chhem phe hlap hlap. Tukverh khar tum a ka’n ban na lamah chuan van boruak awmdan chu ka han thlir tawi leh rih. Khua chu alo dur ṭha khup khup viau a, ruahsur tur in mung vel ani ngei ang hetia thli pawh alo thawt heuh heuh ni ti rilru neuh neuh a tukverh khar ka tum lai chuan thilmak tak ka va hmu ta. Ṭhenawmte in rel hnuai zawk ah chuan tu emaw ding ni awm tak hi ka va hmu ta anih kha! A ding  satliah pawh nilo in chu thil chuan kan in lam hi a rawn hawi a, a che eih lo bawk. Zan thim hnuai anih bakah a awmna lai chu light eng in a chhun ṭhat vakloh avangin a thim deuh ruai a, duh ang tak chuan ka hmu fiah theilo ani e. Mahse, hmeichhia ngei hi niin ka han  hre leh tlat pek a, tun ang hun ah eng thil nge maw chulai hmun thim ah chuan a tih ang le tih ngaihtuah pah a ka hawi sawn zeuh, ka han hawi let leh chuan alo bo daih tawh! Engtinnge anih theih zawk a? Ramsa nge mihring? Nilo, a pianhmang kha mihring ngei ani e. Tu emaw hian min lo fiam mai mai te anilo maw? Aa chu zawng, ka awih lullo e, tun ang hun tlai tawh leh boruak nuamlo tak ah hian a khawi a pa fiamthu duh ber pawhin fiamthu chu a rawn thawh peih bik hauhlo ang le. Chubakah ka lo hmu fuh ngei dawn ani tih pawh a hre kher awmlo nen. Ka ngaihtuah dan chu a atthlak hlawm tawp tiin tukverh chu ka khar ṭha zui a, ngaihngam lo zet chuan ka mu ṭha veleh ta ani.

“Nizan chu tukverh khar ṭhat ka tum na lamah ṭhenawmte inhnuai aṭanga min lo thlir reng tu awm ang deuh hian ka va hmu a, mak ka ti khawp mai” tiin tukṭhuan ei lai chuan ka han sawi khaw mawi ve a. Chuveleh rang zet hian ka nu chuan

“Chuvang ani maw zanlai lai ah thawm i chhuah reng a” a rawn tih chuan phawk fe hian keiin

“Engtin vak nge ka awm a” kalo ti hû. Ka pa zawk chuan min rawn melh deuh kawk pah hian

“I awmdan pawh i hre tawh nange? A chang in tui i herh haw thul, bathroom ah i lut chhuak reng bawk a, i room kawngka i tih rik ngun zia pawh kha i hre tawhlo maw!?” A rawn ti leh ta. Ka hamhaih em avangin ka chaw bar tur pawh ka ṭhulh ṭhak a, an hmel chu chik zetin ka en ta ngawt ngawt mai. A landan aṭang chuan dawt sawi hmel reng an pu bawk silo nen. Chubakah anni hian khatiang maimai ah dawt an sawi dawn lo tih ka chiang bawk. Tun ni reilote chhung a ka chung a thilthleng te hi eng nge awmzia ni ta ang? Tu emaw, min tihbuai chak ve hrim hrim hi an awm nge? Engmah hi ka hrethiam tawh love.

Hemi ni hi sunday anih ang in inkhawm tur chuan ka han insiam ve nial nual a, ka phur lem lo hle. Ka insiam pah in ṭhenawmte in lam chu ka va thlek leh zauh ṭhin a, zan lam a ka thil hmuh nen a tin zawn theih tur, saiip chhia emaw chutiang engmah chu ka va hmu hran lo bawk. 

Biak in chhung ah pawh ka ngheh theihloh em avang leh ka rilru chu hmundang a a awm daih si avangin ka hawi kual leh zuk zuk ṭhin a, mahse, chutia ka hawi kual na lamah chuan hmeichhe tlar hma lam a ṭhu, keimah min en a hnunglam rawn hawi reng chu ka va hmu ta thut. Amah chu tudang ni lo in ka ṭhiannu thar, Chhanhimi kha ani tih ka va hrenghal. Chutia chiang em em a min lo melh tak reng ah chuan ka va nuih suk mai a. Ani erawh a nui ve hauh lo a, a hmel ah khan hlim loh ruk riau na hi awm in ka hre nghe nghe. Inkhawm ban hunah biak tur anih hi tiin ka ngaihtuah zui neuh neuh. Chutia ka en let ve tak reng ah chuan ani pawh hmalam hawiin a inher zui ve ta hram e. Ka thaw deuh huai thei nia. Mahse, inkhawm ban rual a a hmel ka han zawn chiam pawh chuan ka hmu zui ta hauh lo. A pawi hlemai ti sup in a tûk hnathawh hunah ka hmuh leh tho chu ka rin bawk avangin ka ngaih te chu ka han ti ṭha chawp leh ta vel.

A tukah chuan mak tak maiin Chhanhimi hmel reng reng kha hmuh tur a awmlo a, kal lamah ka hmulo a, haw kawng ah tal chuan hmuh tur a awm tawh em ang chu tiin kan bân hnuah Hrangbana College lam chu ka han thlek zoh a, mahse a hmel reng reng chu ka hmu ta chuang lo ani. A nu damlo kha a zual deuh anga, a haw thut emni ang aw te ka ti vel maimai. A number tal kha lo dil ve hrim hrim ila ṭha tur tiin keimah chu ka han in dem leh rih ṭhin. Umm a pawilo e , ka hmuh leh hmasak ber ah ka dil tawh ang tiin rilru ka siam nghal thlap bawk. 

Rin lawk ang ngeiin a tuk leh mai ah chuan a hmel chu ka hmu leh ta a. Kan in awmna kha kalo hrilh hriat ve tawh tho avang in ngawi reng hian pawn ah chuan min lo nghak tawp alo ni. Rawn lut ve mai tur a ka tih pawh in chhuanlam tur a hre reuh lutuk a, ka tilui duh ta bik hran lo. Nimin lam a a bikbo chhan te ka han zawh chuan a damsam loh thu chu a sawi leh mai a.

NANGMAH EMNI!?(2)

Dawt a sawi in ka ring lo, a mitkhur pawh a tla duk thei alawm. Mahse, kalo tum lawk anga a number ka han dil erawh chuan chhuanlam bawk siam leh in a phone ala chhiat thu leh siam tir tur a pawisa ala remchan loh thu te chu a sawi ta daih. Ka va han ngei maimai reuh tak. Nimahse, tihian nitin kan kal rual a, kan haw dun leh thei a, kan inhmu fo thei tho alawm tiin ka inhnem chawp ta ringawt.

Khata ṭang kha chuan kan in ngainat dan chu a thuk tawh hle a, hunawl apiang ah inhmu in khawi khawiah emaw kan leng dun ṭhin. A bul a awm chu nuam ka tiin ka zangkhai phah a, ṭhian dang reng hi ka ngai lem lo thei hle. Keimah hrim hrim hi ṭhian ngaina leh kawm tam chi ka nilo a, ka leng chhuak tam lo hle bawk. Ṭhiante nen a lenchhuah ai chuan ka hun awl ah lehkhabu ṭha chhiar daih ka ching a, ka duh zawk bawk. Mahse, mak tak mai a Chhanhimi nen kan intawn hnu kha chuan ṭhian kawm chu alo nawm zia te, nun alo hlim phah ṭhin zia te pawh ka hrechhuak hnuhnawh veleh a, hun dang leh kum dang aiin kumin chu ka tan kum ṭha leh chhinchhiah tlak ani ka ti ngam hial. Mahse, hetia kan in ngaina a kan inkawp tam viau tawh chung pawh hian In leh lo in tlawh sak kan ti dawn nge, in len pawh na hi kan la nei miahlo a, a chenna inchhung ah ka la lut miahlo ang bawk in ani pawh hi ala rawn chuangkai biklo. Kan gate bulah alo ding ngawi reng ṭhin tih mai loh chu. Ka chhungte erawh in ṭhian thar ka chhar tih chu ka sawi tawh avangin an hre vek tawh tho a, min la hmuh pui lem lo tih mai ani. Ka nu phei chuan ka ṭhian thar chu nula ani tih a hriat hnu in hmuh hi a han chak laileng khawp a, a phur thei surh surh hle. Ni e, fa hi pahnih tlawng min nei a, chutah, an fanu zawk lah chuan pasal neiin hmun dangah a awmbosan daih tawh bawk si. Kei ngawt hi chuan an khawhar na ka hnem zo lo a, ka umami te chhungkua lah an lo zin fo thei bawk silo nen. Kei hian nupui nei ila fa te nei ve tawh ila tih chu a ruk tak a an duhthusam ani tih ka hria. Chutihlaiin ka rilru ah erawh nupui lam chu ala lang lo nasa mai si a, ka hmu zo emaw zo lo emaw, nupui nei a chhungkaw han din tur em chuan ka engmah hi ala in peih lo ani. Tlangval ve uaih tawh e tilo in ka nu lakah lah ka la inti baby ve ṭhin si a, khang zawng zawng kha nupui ka neih hunah ka sim nghal ngawt dawn der silo, nupui nei ila, nupuiten eng angin nge min ngaih ang? A hman apiang leh a kâ nei nazawng in a nupui nei rawh intih ngawt ṭhin pawh hi ani lo e. 

“Naktuk chu holiday anj bawk a, khawi hmunah nge kan len kual leh ang? ” ka tih chuan a ṭhutna seat ngheng ar ar chung hian alo thaw deuh halh a, peih loh hmel fe a min rawn nuih sen sen pah in

“Naktuk chu ka naute an awm dawn lo a, i duh chuan kan inah lo leng ta mai che” a rawn ti sap chu kalo lawm ngei mai. 

Mak tak maiin khatia number hriatloh aṭanga call ka dawn ṭhin kha a tawp zui ta daih a. Ka ngaihtuahna kha an hre ve taktak emaw tihtur khawp a thilmak chu ani ve e. Mahse, eng hunah pawh rawn call leh se, ka tumdan kha ala pangngai reng a, ka record thlap anga, evidence atan police hmaah ka thehchhuak ang tih chu ka la vawng ru khiau.

Tum lawk ang ngei in a tuk ah chuan Chhanhimi te in chu eitur tam tak keng chung hian ka pan ta a. A nau te an awm dawn lo bawk a, ani leh kei chu free halh in kan inkawm thei dawn e tiin nui vur vur pah a kal lai chuan an inluah pawh ka thleng chawpchilh ve nghal. Mahse, mak tak maiin an kawngka chu alo inkalh bur nia. Ka tihngaihna hrelo lutuk chuan an tala te chu ka han khawih che kual vel ta ringawt a. Chutia mangang ru tak a kalo awm lai chuan an inchung nu ni ngei tur hian min rawn hmu fuh in mak tih hmel zet chuan min rawn be zui nghe nghe.

“Eng thil nge tih i tum a?” chang deuh hlek hian a rawn ti a. A meng no fahran lo bawk. Kei chuan lu thak lo pui hiah nuah nuah pah hian

“Khawnge an kal bo vek a?” Kalo ti let. Chutah,

“Tumah an awmlo” ti hmuk in inchung lam chu a pan ta daih a. Ava hrilhhai thlak ṭhin e aw. An awmlo tih te chu ka hre ve reng a, zaidam deuh khan a chhan te pawh a sawifiah theih mai loh emni le? Mihring ṭheuh ṭheuh hi alo inzahpah loh theih ngei mai tiin lawm lo ru tak chuan ka haw zui leh ta hnak hnak.

Chutia ka lenna tur leh ka nileng hna tur ber a flop tak si ah chuan tiin ka room ah ka tawm a, chicken soup for the soul ka chhiar ta ringawt. Ka in chhiar tui dawn chauh tih ah choka lamah chuan thawm ka hre ta a. Hetihlai hian mahni chauh a awm ka ni nghe nghe a, kawngka nise chhung lamah ka kalh thlap bawk. Che chhuak mailo in thawm chu ka han ngaithla leh rih a, a reh zui leh daih lawi si. Ngaihtuah zui duhlo in lehkhabu bawk chu ka chhiar san leh. Mahse, hun rei pawh ani lo, thawklehkhat ah hian kan bathroom kawngkhar chu a rawn ri ta bur mai a, ka phu chiang teh asin. Ka mu lai chu tho chhuak zawk in choka lamah ka tlan phei nghal a, rin ang ngeiin bathroom kawngka chu alo in hawng huau. Mahni chauh a awm ka nih vang nimaw, tlem chuan ka zak ve deuh e. Nimahse, eng nge thil awmzia hi ka hriat duh vang hrim hrim in bathroom chu ka kal hnaih hrama , zawimuang leh thawm dim zet a bathroom khar ka tum lai tak chuan a chhunglam aṭang hian kan zawhte Billy-a a rawn tlan chhuak phut. Ala ngiau zui ṭhawt lehnghal a. Kei a phu nasa lutuk pawh kalo zuang dawrh thei. Zawng billy a maimai chu tiin ka han melh rum zui nghek a. Ka nu zawhte duat lai chu nilo la ka vawm bo nghal ang che mawle tih melh hian ka melh nghek.

Awle, engkim a ṭha a, eng thil danglam mah thleng pawh a awmloh hi ti a ka thawk huai zawh hnu lawk ah kan kawngkapui chu an rawn sawi leh ta dawt dawt. Ka phu nasa lehpek hle bawk. Chutah, ring leh pawr fahran hian

“Tunge!” Ka’n ti tuarh mai a, mahse vanneihthlak deuh in ka nu te aw chu ka hre zawm nghal. A thawh hnih nan tha pui thawh meuh hian thawk chu ka’n la leh rih. Rang takin kawngka chu ka va hawng leh ta ani.

Pawn lam a lo ding reng ka nu leh pa te hmel chu a hlim riau hian ka han hre tlat pek a, a bik in ka nu chu a hlim zual niin a lang.

“Mama, i u te nufa an lo zin dawn a, naktukah an lo chhuak ang” ati ta reng bawk. Ni e, ka u hian pasal a neih hnu reilo ah a pasal hna avangin Goa lam ah min pemsan tawh a, tunah hian fa naupang te te pahnih nei ve tawh in kum 1 ah vawikhat ang vel chauh hi an rawn zin ve thei ṭhin. A pasal tak phei hi chu kei chuan an inneih hnuah vawihnih bak ka la hmulo reng reng a, umm keipawh hi Mizoram a awm tlem ngang ka ni a, ka dem awm hran lo e. 

“Umami chu an pa a rawn tel ve thei dawn em?” Ka’n tih chuan ka pa in min lo chhang thung a.

“Thei dawn lo. An pa hi zawng, an hnathawhna hmun Lawng lamah hian an buai khawp a, a hming a manager hial te alo kaisan ve tak si ah chuan a chhuak zen zen theilo ani ber a” alo ti. Ni e, ka u pasal hi kum naupang te in hnathawk tur hian Goa ah a awmna a rei tawh a, Cruise ah thawk in casino dealer aṭang bul a ṭan chho a, tihian kaisang zel in tunah chuan manager ah hial kai chho in an khawsak pawh a ziaawm tawh khawp mai. Amah tak pawh hian zah a kai ve tawh hle bawk. A hmaifang te a chhelo in a taima bawk a, a nihna chu a phu pawh ka ti hle ani. Chutihlaiin ka umami erawh in engmah thawk zui theilo in a fate a buaipui ṭhin thung. 

Chutia a fanu lo zin tur thawm a hriat avanga ka nu hlim hmel ka han hmu chu kei tak pawh hian nuam ka ti a, ka helhhawlh deuh bawk. A hma lawk a ka thil tawn, thin ti ṭhawng thei te kha chu ka hrechang leh tawh mawlh lo ani.

Zan alo ni a, inkhawm hunlai tih takah kan veng bawr chu a reh ṭha duk duk hle. A zawhte Billy a awmna chin zawng a ka nu pawn chhuak chu hmanhmawh tak a rawn tlan lut leh thuai in phawk fe hian mi rawn melh a. 

“Mama, saw tunge gate bulah hmeichhe pakhat a ding reng ania, ka bia a min chhang bawk silo, i ṭhiannu chu ani em rawn en teh” tiin min hui deuh sawk sawk. Keipawh chu tho chhuak lawk in pawn ah chuan ka tlan chhuak ve nghal a. A sawi ang ngei in kan gate bulah chuan hmeichhe pakhat, sam thlah hniang mai hi min hnungchhawn deuh chuan alo ding ngawi reng. Reivaklo chu kawngka bul aṭanga ka thlek leh te te hnuin Chhanhimi kha niin ka hre ta a, ka va pan hnai ta chauh.

“Chhani, chhante, nangmah ini em?” Tiin a dar ah chuan ka vuan zui chawt a. Alo che deuh hrut. Min chhan let mailoh avangin a hmel chu en chian tum hian ka han bih zui leh ngawt a, rin ang ngeiin Chhanhimi alo ni e. A mittui te chu alo tla deuh par bawk nen min ti hrilhhai angreng viau. A hnu a kan in lam ka va hawi phei leh chuan ka nu khan tlanchhiat in ring reng hian min lo thlir reng ani tih ka va hmu chu ka nuih deuh suk. Zaizir in lut tur chuan ka han ti zui a, ani pawh engdang sawilo hian hreh hmel zet in a lut ta nge nge. Ka nu a lut ta maw tih ah Chhanhimi chu be leh in

“Ti rawh, inchhung ah lo lut la, hei, khua a dur nasa mai si a, thli thaw reng nen helai chu a vawt em mai” tiin inchhung a hruai luh mai ka tum chu alo ṭangkawh tlat. A in sut ri deuh hraih bawk a. Eng buaina tak chu nei ang maw ti a ngaihṭha lo zet a ka en reng lai in ani chu a rawn ṭawng chhuak ve ta hram.

“Kan khuaah ka nu a damlo nasa lutuk a, ka nau te ka hrilh ngam bawk silo, an hriat chuan buaina hlir ani dawn. Ka rilru hi a hah em ani” tiin a inhnit leh hlap hlap. Engtinnge ka hnem tak ang le tih ngaihtuah a kalo ngawih ruk reuh reuh lai chuan ka awm ah a rawn bei zui thlawp. Min ti hamhaih angreng hle. Mahse, in ngaihtuah buai nan hun ka hmang reilo, amah chu zawimuang a lo kuah zui in a sam te chu ka chul sak ta hliau hliau zawk a. Lungngaite hnem lam a mihring expert kalo nih lemloh avang hian sawitur ka hamhaih a,, ka chavai ani ber.

“Ti rawh, inchhungah lut ila, ka nu pawh a awm a kei aiin ruahmanna siam pawh a thiam zawk dawn asin. Nu te nge nge chu” ti a hruai luh leh mai ka tum chu alo ṭang khawng leh tlat. Chutah, chiang zet a ka hmel chu rawn en in a kiai deuh sak a, a mittui luang niaih te pawh chu hruk leh zauh pah hian

“Aih a ngailo, a zahthlak. Ka haw tawh zawk ange, ka nau te mang alo ang hman palh ang,  hetia ka lungngaihna te thlen na tur ilo awm hrim hrim pawh hi ka lawm lutuk. Midang tihbuai lehzel kha chu ka duh tawhlo ani” tiin kal mai a han tum chu kalo pawt ding leh.

“Khawi, ka va thlah ang che” tiin inchhung ah chuan ka han lut leh te te phawt a, ka nu chu chanchin hrilh thuak in ka tlan chhuak leh. Ka nu hmel ah khan sawithiam siloh mak tihna ka hmu in ka hria a, min lo melh phawk deuh hrâ bawk. Ngawi reng a inzui in kawngpui chu kan chuang chhuak a, chutah, ka pa inkhawm bâng nen kan intawk leh hlawl bawk

“Kha, mama, khawi lamah nge i len dawn a?” Min lo ti vat. Kei chuan PUC lam chu kawk in

“Tah khuan ka’n kal lawk ange” tiin ka pa chu kan pel zui nghal. Mak deuh hian an inluah kan han thleng chu alo thim deuh khup mai a, a nau te chu an mu zo tawh nge, khua nise ala tlai tehchiam silo a tiin kalo in khap buai leh fe hman. Inchhung ka pen lut dawn chiah tih in ani chuan min rawn nam ta salh a.

“Lo lut hrih lo mai rawh. Ka nau te an harh palh ang. Nichin vang khan ka lawm lutuk ania, chuan, muttui aw” ati leh ta zung zung. Min ti bangbo lutuk chu ka ding khawng ta reng a, mit ka khap fuk fuk bawk. Mahse karlo ah harhchhuak leh in ka tawlhhnung zui a

“E, awle, awle, a pawi lo ka kal mai ang muttui le, tui deuh khan mut tum la, i nu chungah pawh eng em a thleng lovang” tiin kan in thlir liam zui ta ani.

Zankhua in mut hmunah Chhanhimi nungchang leh khawsak dan maksak taktak ṭhin te chu ka han ngaihtuah kual ta vel a, engvang a kimki reng mai nge anih tih te, a ṭawng tamlo em em te leh hlim hmel a put khat zia te, a nun dan chu hahthlak hmel ka tiin thil liantham engemaw tak thup hi nei in ka hre tlat bawk a, chu erawh min hrilh anih lem loh chuan ka tan zawh chhuah kha a nuam hauhlo. Mahse le, a sawi tawh ang khan an khuaah a nu chu thih ngam in a na mek tih a sawi a, keipawh min hmangajh em em tu ka nu chung a thleng ve ni ta se, ani ai hian ka tawrh dan a nep bik chuang hauhlo ang chu. Nimahse, chutiang khawp a buaipui ngai ni tawh si chu engvangin nge an khuaah chuan han haw a a nu chu a buaipui mai loh. Huiham, hetia kalo ngaihtuah kual vak vak hian awmzia a nei tam lo em mai tiin ka in let thawk a, ka muhil chu ani der.

Awle, ni a ral a, ka umami te nufa pawh mahni in lumah ngei an rawn thleng ve ta. An rawn thlen zan chuan keini chhungkua chu kan hlim tlang dar dar hle a, a fate pahnih, ka tû te mawlh mai kha hmuh an nuam in, hei leh chen inhmu lo mah ni ila min ngaina nghal em em thei a, an hmel lah chu hmun pui a khawsa annih vang nimaw, a ṭha in an fai vûk a, an thianghlim reuh hle bawk. 

Ka û hian fa pahnih, mipa ve ve nei in, a fa û zawk hi Jeremy-a niin a ruakhau hle a, tunah hian a kum 10 na a hmang mek. Tin, a nau zawk Jonathana erawh hi chu a û ang lo takin a â buang mai a, a sa pawh ṭha zawk in a duhawm thei turh turh hle. Tunah hian a kum 7 na a hmang ve mek bawk a, a û ai chuan ala ṭawng duh zawk zui a, an rawn thlen zan pawh hian zin chauh neilo in a titi nghal siam siam thei. Ka hlimna leh lawmna chu dahṭha ta ila, ka nu leh pa te hlim hmel mawlh mai kha hmuh nuam ka ti a, tin, ka u tak pawh chu mahni in ngei a a han awm leh thei kha nuam a tiin a thla pawh a muang hle tih ka hria. Hetiang anih vang hian a pasal leh a pasal chhungte an sual a, an monu chu an lo ti ṭha lo e ka tihna erawh ani hauh lo. Tunge mahni pian seilenna inchhung ah chuan hlim lo bik ang.

“A pute, i bulah kalo mu ve” tiin umami fapa naupang zawk, Jonathana chu zanlai lai ah mit nuai chat chat hian ka khum a rawn pan a, mutpui neih ve chhin hrim hrim kha ka chak tlat avangin kalo lawm viau. Amah chu lo pawm vat in ka mut tir ve nghal a. Jonathana kuah hle hle pah a kalo muthilh leh dawn lai takin ani chu ring lel lawl leh fiah zet hian a rawn ṭawng chhuak leh thut. Ka harh phah zawk nghe nghe.

“A pute, tunge khami kha!?” Tiin min lo melh deuh kiau a. A tir chuan a sawi awmzia ka hriat loh em avangin ka meng buai vek hman. Mahse, in thingharh leh thuai in

“Tumaw? Tunge i hmuh a? I mumang a ṭhalo emni?” Kalo ti thung. Amah bawk chuan a hma aia zawi ta zawk hian

“Kawngka bulah khan hmeichhia alo ding a, mama(a nu a sawina) emaw ka ti a, mahse, ngawi reng in a kalsawn leh daih” ati leh ta zel. A sawi zawh rual in ka room kawngka lam chu ka hawi vat a, alo in khar ṭha khap bawk si. Min va ti hrilhhai reuh tak. Mahse le, naupang â mai ala ni a, a mumang ṭhalo nen a ngaih pawlh thei ani tih hria in muhil leh tur chuan ka ti ta zawk a, a lu ka chul sak hliau hliau bawk. Tichuan, ani pawh thudang sawi tawhlo in a ngawi zui ve mai a, a muhil ta ani ang a thaw sek sek mai.

Thilmak leh hrilhfiah harsa zet zet hian engvanga min hual reng nge annih ang. Hmuh theih siloh thawm ri chauh te, a ruangam ka hmuh chhun pawh belhchian theih siloh a bo zui daih te, khang phone call mak zozai tak leh phone number thi tawh ni tlat lawi si te, kei hi engvanga heng thil hrilhfiah harsa taktak te hian min hual reng nge annih ang le. 

Hemi ni pawh hian a vawi engemaw zat nan Chhanhimi hmel chu hmuh tur ala awm lo fo a. Kha zan, ka thlah haw zan tihloh kha chu a hmel hi ka la hmu nawn leh miahlo. A chanchin han zawt turin phone kha a nei rih miau silo a, kan chenna hmuh erawh inkar hlat viau lo mahse, ka umami te lo zin nen ka chhuahsan hleithei meuh silo. Chumi tlai ka hna bang pawh chu namen lo hian ruah a baw leh hawk hawk mai a, a hma ang bawk khan Hrangbana college zawn ah chuan motor jam vangin kan ding khawm leh ṭhup tawh. Motor glass chhan aṭang pawn lam chu ka thlir reng a, college tual vel a an college naupang zi deuh liai liai te pawh chu ka thlir pah reng. A nihna takah chuan Chhanhimi hmel kha hmuh ka tum reng a, kan inhmuh hmasak ber ni ang khan motor a chuan ve te chu min rawn dil leh dawn ni tlat hian ka han hre thul. Eng thil nge ka chung a thleng ta hi ka hrethiam lo, amah chu ka ngai veng veng a, thup tamtak nei chung a a nui hmel te, ka awm a bei chung a a ṭap hlap hlap lai te leh hlim hmel tak a a titi siam siam lai te kha. Engvang a hetia reh leh daih ṭhin hi nge anih chu ka hrethiam lo hulhual. An inluah nei tute kha zawt ila an hriatpui angem? Emaw, an inah khan ka va kalchilh zawk dawn emni? Nuam chu ka ti bik chiah silova, nge ni a a nu damlohna avang khan an khua, norh vanlaiphai lamah chuan an lo haw ta diak zawk ni ang. Vala hi a vawikhatna atan hmeichhe pakhat vangin ka rilru a buai ve ta. Ni e, tunah hian tlangval naupang tak ka ni tawhlo a, ka tunhma nun ah te khan hmeichhia te chu lo tawng ve tawh ṭhin mahila, a tu a te mah kha han ngaihven zui leh uksak zui kha ka nei ngailo, ka zei lemloh chu thuhran nise, ka zirna ka dah pawimawh a, ka dah sang zawk tlat ṭhin bawk. Tunah tihian ani chu ka inrinloh laiin ka nunah seng luh ani a, ka duhdan leh tum lawk pawh ni miah silo in ka la vei zui lehnghal dawn anih hmel. Thinlung takin han in zawt ta ila, he hmeichhia hi ka hnar miahlo mawle. A background chiang tak hrelo mahila a nungchang leh hawiher te, a ṭawngkam chhuak leh inchei duhdan aṭang te erawh kei khawpui tlangval hian khawpui nula tamtak ai hi chuan ka la thlang zawk cheu.

“A pute, dawr ah min lo kalpui” tiin zan dar 7 velah ka tupa te zawk chuan min rawn ko deuh lauh lauh a. Keipawh ihe lo in a thu zawm chuan ka chhuak ve nghal mai. Kawngpui chhuah chhoh na tur kawi kan thleng tih in kawngsir chehrual buk laih bulah hian tu emaw lo ding zum reng chu ka va hmu ta. Amah chu ka hriat hnu ni tlat a ka hriat avang chuan ka tupa pawh ngaihsak tawh lo in mihring dinna lam chu ka pan nghal. Jonathana lah chuan ka kut kai chung hian ngawi reng in min zui ve zel a. Chulai hmun a lo ding ngawi reng chu tudang nilo in Chhanhimi ngei kha alo ni tih pawh ka hre zawm zat. Zawi te hian

“Chhante” ka han ti sup a. Ani chu muangchang in a rawn hawi chhuak nghal a. A meng hnual raih bawk. 

“Tinge khaw nuam lo leh thim zing ah hian ilo din ngawih reng a. Nghah i nei emni?” Ka tih leh chuan min chhan let hma in Jonathana bawk chuan ka kut chu pawh ṭawng ṭawng pah hian

“A pute, kal tawh ang. Ruah a sur dawn ania” tiin alo rak ve sek.

“Aw, khatin puitling kan inbiak laiin awm ṭhin loh tur. Kan kal ṭep” tiin ka han vin deuh ṭhat a. Jonathana chu tum zui bar bar in kan in panna kawng ah chuan a chhukthla zui ta hnung hnung. Chu chu Chhanhimi chuan lo hmu ve reng in alo nui deuh sak.

“Kha, a titau ania aw. Va umzui vat rawh. Kei chu ngaihtuah awm ka nilo, inchhung a tawm reng ka ning a, ka rawn chhuak harh ve mai mai anih hi” alo ti sap. Kei erawh chuan chutiang naupang titau tih vel chu ka ngai pawimawh der silo a. Ani hi zawh tur tamtak ka nei a, a bul a awm hi ka thlahlel in ka ngai ngawih ngawih zawk ani. A dar tawn tawn a vuan chung hian

“Min en teh, tinge mak tak tak hian i khawsak ṭhin a, sawi lawk pawh awm lo in i bo vang vang zel a, tunah lah mak tak bawk in i rawn lang leh thut si. Eng nge i awmzia hi ni ngai a?” Tiin amah chu ka sawi deuh nawk bawk. A hriat ve loh tur a ka ṭang ru ṭeuh te chuan min ti hah hluah hluah bawk. Chutah, chiang zet a mjn rawn melh deuh kar pah hian min nuih leh seih mai a. A hmel han ṭhat zia te hi aw.

“Ka tihpalh ani. Engkim hrilhna tur che in mobile ka neilo ka tih tawh kha. Ih englo ania, kan khuaah ka haw ve lawk e ka tia, ka nau te erawh ka hruai haw lo thung” a tih leh lai chuan lo pawt chat thuai in

“Chuan, i nu chu eng nge alo an tawh a?” Kalo ti vat. A bo vang vang chhan a han sawi tak ah kha chuan tlem in ka ngaih chu a ṭha ta deuh a, ani chuan a chil chu han lem rik khalh pah hian

“Umm alo ziaawm viau tawh e. Min lo ngai em a, a hnathawk nasa nen alo chau zual deuh ani e” ati veleh mai. Tichuan chu lai hmun thim leh biru tak ah chuan rei deuh tak chu kan han inbe leh phawt a, ka thlah haw hnuin keipawh kan in lam pan chuan ka haw zui ve ta ani. Rilru engthawl leh thawveng zet  a inchhung ka han lut chu ka chhungte chuan ngawi reng hian min lo melh deuh teh ṭhap. Jonathana phei kha a pi mal chungah ṭhu in alo tûm lian viau nghe nghe.

“Eng nge? Khatia min melh ṭhap a!?” Ka tih he haw hnu ah umami chu a rawn nui chhuak ta hawk.

“Bawihtea’n a putea chu chehrual hnimbuk te a be chiam chiam a, min ngaihsak tawhlo reng reng ati che a” tiin a nui leh uarh uarh. Keipawh chu ka nuih alo za hman hle.

NANGMAH EMNI!?(3)

Mahse, ka nu chu lo ṭawng chhuak ve leh in min la melhrum viau zui.

“Hrim hrim in khawnge i kal kawi daih a. Hei, i tupa nise beidawng in i rawn let tir leh a, engvangin nge hnimbuk mai mai pawh chu ilo biak vak vak ni?” A rawn tih chuan umami nen kan nui zui hak hak. Jonathana bula ṭhut thlak ve pah in ka kawr ipte aṭang chuan waiwai bawm khat hi ka han phawrh zui zat a.

“Kha le Bawiha, nichin khan ka ṭhiannu kha ilo hmu ve lo ani maw? Nia, alo dinna hmun kha a thim angreng a i hmu ve lo te pawh ani ange” ti a thawhsan mai ka tum lai chuan Jonathana chu ring zet leh lung nilo tih hriat tak hian a rawn ṭawng chhuak leh ta a.

“Tumah an awm bawk lo aw. Motor alo tlan a, motor light in chehrual a rawn chhun lai pawh khan kan pahnih chauh in kan awm reng!” A rawn ti leh ta mai! Chuveleh puitling ho chu kan in melh kual ta hrek hrek a. Jonathana bul a ṭhut thlak leh pah in zaidam zawk hian ka han be leh

“Bawiha, tumah hmeichhia pawh kha i hmu ve lo maw?” Ka tih chuan a lu chu lo bu zui nghat in a pi pawmna ata chu a tal chhuak a, a nu bulah a kal ta daih. Chuta ka han hawi chhuak leh chu ka chhungte chuan mak tihna mitmeng hian min lo melh ṭhap mai a, an hmel ah nuihzatna a lang tawhlo reng reng. Kei chuan sawi mai tur ka hriat tak loh em avangin ka nui tawi taka , thawhchhuah ṭuih ṭuih pah in

“A hmu fuh lo anih dawn kha” tiin room a luh mai chu ka han tum a, chutihlai tak chuan ka kekawr ipte a ka mobile dah chu a rawn nghawr ta dar dar. Call ka’n en nak chuan kha number hriatloh bawk kha alo ni leh! Ava han mak lehzel e aw. Tichuan room ah a rang a rang in ka tlan lut a, call chu pick up zuiin ka record nghal thlap bawk. Tun ṭum chu a hma anga ngawi reng lo khan call ka lak aṭang thawm a nasa em em a, min ti hrilhhai hle bawk. Hmeichhe mangang aurawl chu hre hmasa leh ber in

“Duhtawk rawh pa, min ṭanpui ru, hetah, hetah ka awm. A nâ lutuk, duhtawk rawh!” Tiin a au ṭe leh ta chiam mai. Engtinnge ka tih dawn, ka vir buai vek a. Ka biak a ka chhan let vak chuan ka chhungte chu ka ti mangang mai ang tih ka hlau bawk si. Khumah ka ṭhu leh phawt a, insehruh ngat ngat chung hian chu hmeichhe mangang au rawl chu ka ngaithla tluan leh ta zak mai ani. A tawp nan a hma aia ring mah chuan a rawn au a, keipawh chu ka phu deuh zawk thei. Tikhan call chu a tawp zui leh ta ani. Call a tawp rual rual in file manager ah ka lut a, audio tih lo awm chu hmetchhuak leh in ka han ngaithla ta a. A chiang viau e, a record ṭha thlap tiin ngaihṭha tak leh hmanhmawh takin ka hoodie ka inbel sawk sawk a, car chahbi la leh in room aṭang chuan ka chhuak zui nghal.

Chutia  hmanhmawh tak a ka han chhuak leh ngawt mai chu ka chhungte bawk ka ti phawklek lehpek. Min lo en leh deuh ṭhap in ka chhuak tur chu ka nu in min ko ding zui.

“Mama, khawiah nge tun ang hunah i kal leh dawn a. Ilo haw chauh a, eng nge thil awmzia?” Atih chuan mumal lo deuh hian ka chhang let ta nawk nawk. Ka tlanchhuak zui bawk. Motor ka tih nun lai te chuan ka nu leh umami chu pawn ah rawn tlan chhuak in chanchin min rawn zawt sek a. Kei lah in a pawimawh zia thu bak kalo sawi duh bik silo. An hamhaih ve khawp ang le. Chutah, kan compound aṭanga tlanchhuah puat pah chuan

“Nakinah ka la hrilhfiah vek ang che u” tiin ka kalsan ta ani 

Kan awmna aṭanga Police Station hnai ber ah chuan ka tlan lut rawk a. Zan tlai lam anih tawh ang in police pawh pathum chauh an lo awm. An zing a thunei leh lalber Inspector ṭhutna lamah chuan tlan phei leh thuai in thaw hlawp hlawp hian a hmaah chuan ka va ding a. Engdang ka sawi hma hian ani chuan a hmaa chair chu min lo kawhhmuh vat. Muangchang a ṭhut fel leh te te pahin ka phone chu ka han phawrh a, ani inspector pawh chuan ka che vel chu ngawi reng hian min lo en kar. Chutah, ka call record sa thlap kha hmetchhuak in full volume ka pe zui bawk.

“He thil hi i chhui zui ngei a ngai dawn ani” tiin audio chu ka han play a. Police dangte pawh chuan min dinchilh in phone chu an lo melh ṭhap. Ka call record kha a rawn ri chhuak mai dawn emaw ka tih laiin a reh ta vang vang. Second 10 vel kan nghah ṭhap hnuah pawh eng thawm mah ala awm chuanglo. Audio lah chu a in play kal zut zut reng tho si a, police ho chuan min melh hrek hrek tawh. Kut khur dar dar in phone chu ka han la kang a, a volume ka check lah in a full vek tho bawk si. Eng nge thil awmzia hi ni ta!? Ka off a, ka play nawn leh sek hnu pawhin audio reng reng chuan thawm a chhuah lo a, station chhung chu a reh zui tlawk tlawk zawk ringawt. Chutah, ka sir a ding police pahnih te chu rawn nui chhuak halh in

“Chhui chhuah a harsat viau loh pawhin a awlsam ngawt ta ve ang” tiin pakhat chu a rawn phun sup a, a kalsawn daih bawk. Kei chu thinrim leh mak tihna in pawlh avangin ka lo ṭang ru ṭeuh a, ka thlanfim a bawl nasa in ka inhumruh ṭeuh tawh bawk.

“Eng audio nge ni reng reng a?” Tiin ka hmaa ṭhu inspector chu a rawn ṭawng chhuak ta nge nge. Kalo melh deuh kar bawk. Chutah, aw khur hlak hlak hian kei chuan

Vawitam number hriatloh aṭanga call ka dawn dan leh hmeichhe ṭanpui ngai an awm ngei ni a ka hriat thu te, number chu ka chhui zui tir ngial pawh a tihngaihna awmloh thu te, phone number thi tawh anih thu leh call chu ka record a, anni police tal in tihngaihna an lo hriat ka rin avanga evidence atan a ti ka nih thu te chu beidawng ru tak chuan ka han hrilh fai ta vek a. Ka sawi zawh chuan ka hmaa ṭhu police hmel ah erawh engmah danglam ka hmu hlek lo. Dawhkan ah chuan a kut chu rawn dah pharh in phone chu min dil a. Kalo pek hnuin call log a en chhunzawm nghal.

“A chung ber number kha ania” kalo ti zauh. Min rawn melh leh zuk a. Phone bawk chu a en leh. Tichuan, ka phone kaltlang bawk in chu number chu call a han tum ve chhin a, computer bawk lo ṭawng leh in chu number chu hman tawhloh anih thu pawh chiang takin a rawn sawi. Vawi 5 vel lai call a tum hnu pawh a awmzia a neih tak siloh ah chuan a number chu lehkhapuan ah a ziak ta mual mual a. Phone min pek kir leh pah hian

“Naktuk lamah tihdan kan lo zawng anga, mahse, beisei neih san lutuk erawh a chi loh ang. A chhan chu sim card thi tawh, number thi bo hmak tawh anih angin tihngaihna a vang viau dawn. Amaerawh chu, kha number aṭanga call i dawng a hmeichhe mangang aurawl i hre ṭhin anih si chuan ngaihthah chi chu ani miah bawk silo a, chuvang chauh in he thil hi kan lo buaipui dawn ani” ati ta dap dap. Kei erawh kalo thaw huai na in beiseina ka nei chau hle. Mak leh em em chu, khatia ka record zawh hlim ka ngaihthlak pawh a engkim ṭha vek si kha, police hma a ngaihthlak dawn veleh a ṭha leh theih miahlo nge tih lai tak kha. Ka hrethiam thei hlawllo ani. 

In ka thlen leh lai pawhin ka chhungte chu, naupang tihloh an lo la meng ṭhap mai a. Ngui zet hian an bulah chuan ka va ṭhu deuh hnawk. Rang taka ka nu in min lo kuah pah hian

“Mama, eng nge maw i chungah hian thleng ta le. I chhungte hi min han hrilh ve tehh” zaidam dap chuan alo ti seuh seuh. Ka nu chu lo kuah let ve chial in ka thaw zui hawk. Sawi chhuah dan tur mai ka hriatloh bakah sawi chi ani em tih ka la hrelo lehzel. Sawi pawh ni ila min ring kher angem tih chu ka buaina ani. Tichuan, ka phone phawrh in engdang sawi tawhlo hian audio chu han play leh ta a. Mahse, a ngai ang chiah. Rannung hram ri takngial pawh hriat tur awmlohna audio chu a in play kal leh ta zut zut a, a beidawnthlak mange. Ka chhungte thung chuan a ngaihna hrelo zet hian min melh ṭhap ringawt. Anni aiin a ngaihna chu ka la hrelo hlei hlei. Tha tho lo leh mood uih zetin phone chu ka hmet thim a, engdang sawi ta lo in room ah ka luhsan daih. Uluk zawk in earphone nen mut hmunah audio chu ka han play leh ngat a. Ngai teh, ka record ang thlap khan thawm chu a rawn chhuak leh ta anih kha! Nimahse, ka chi ai peih tawhlo a, police ka pan lo anga, ka chhungte ka hrilh heklo ang. Keimah in uluk zawk chuan ka han ngaithla ta a, chu hmeichhe thlabar aw chu ka hriat fo hnu ang riau te hian ka han hre leh ṭhin. Aaa hriat te pawh ka hre tawh ang chu, a vawikhat min call na chauh pawh ani tawh hleinem le.

A tuk hna kalkawng leh haw kawng tluan te pawh chuan Chhanhimi chu ka bulah awm reng mahse, ka rilru chu hmun dang ah a awm daih thung a. Police ho mawlh khan number chu engtinnge an chhui zui tak ang tih ringawt ka ngaihtuah. Mahse, han bawhzui rum rum turin tun tut tut ah chuan eng thil mah an la tih hman kha ka ring silo. Chuvang chuan station pawh chu tlawh kawi tawhlo in in lamah kan haw zui ta zawk ani.

“Hriatpui, vawiin chu i awmdan ava diklo ve. Kal lamah nise i ngawi reng a, biakloh chuan min biak pawh i tum bawk silo,tunah pawh chuti tho”  tiin Chhanhimi chu a vawikhatna atan a phun ve deuh niah niah a, a hmel chu en in ka nui suk ringawt. Nia, ka rilru hi a tawt up up a, sawichhuah a ṭawng chhuah min ti harsa khawp in min hnawh tawt ka ti mai e. A kut vawt raih mai chu vawn sak pah in

“Nangmah vang ani lo ania, chhungkaw problem leh hna thil vang chauh ani e. Tlem in kalo chau ve deuh alawm le” tiin a kut vawt lutuk te chu ka ngaih a ṭhalo ru deuh a, rang tak hian a pang te chu ka han deh sak leh rih. Ka rilru chu lo hrethiam thuai in ka kut chu alo chelh zui vat a.

“Ka damṭha alawm, ka ṭha lutuk. Ka kut leh ke hi chu a vawt ruih ṭhin hrim hrim” tiin motor aṭang chuan a chhuak a. An in peng a thlen thlengin ka thlir zui ta vang vang. 

Ka zan lam tihtur hrelo leh police biak nan hun ka la tih loh si avangin ka insiam mual mual a. Chhanhimi te in a len chu ka tum ani. Hrilhlawkna ka nei lemlo a, alo duhlo leh em lo ang chu maw. An in ka va thleng chu alo la eng deuh pap a, an la meng ngei anih hi tiin an in panna step chu ka zawh chho thlarh thlarh. Mahse, ka ke pen lai ti tawp chawt tur khawp thil ka hmu fuh leh ta. An in luhna tur step tawp ah tak chuan tuemaw hi ding in min lo en reng anih chu le. Ka meng bial kawk hman a, mahse Chhanhimi ni a ka hriat leh tak si ah chuan kal chhunzawm in ka nuih tlawn titih bawk. Ani erawh alo nui hauhlo a, ka hmel a hmu thut chu a lawm lo zawk emaw tihtur hian a hmel a hlim lo.

“Lo len ka tum a, eng nge hetah ilo tih?” Ka tih chuan thaw zui hak in

“Inchhungah chuan ka nau ten lehkha an zir a, a tihchi loh. Chubakah, inleng ka neih thu hi ka nu te an hrilh anih chuan a chi dawn loh lutuk a, tihian pawn ah inkawm mai ang aw” atih chuan ka lawm lo ru hle. Chutia mahni inleng tur te pawn khaw vawt a han ṭhut pui daih mai chu a dangdai ka ti ru hle bawk. Mahse, tihtheih nei bik ta lo chuan a thu chu ka zawm mai a ṭul tih hria in step ah chuan kan han ṭhu dun ta ren rawn a. Zawite te in kan titi dun ser ser a, kan nui leh kar kar ṭhin bawk. Mahse chutia keimah zawk kalo titi barh barh lai chuan an inchung lawk tukverh chu rawn in hawng zui rak rak in tuemaw hi a rawn dak ta heu! Kei chu chiang takin min rawn hmu ani tih hriat tak hian min melh ta run mai a, ka ṭawng lai tawp meuh hian kei lah in a hmel chu kalo en ve reng bawk si. Mahse, engdang sawilo hian ani chuan tukverh chu khar ṭha in a reh zui veleh mai bawk. Ka thaw zui huai mai. Chuveleh, zawi sap hian ka bul a ṭhu chuan

“Kan ṭawng rinloh tehreng nen tiraw?” Tiin a hmui chu a hup a, a nui zui kar kar bawk. Chutiang chuan zanlai dar 12 thleng ṭhu dun in keipawh chuan ka haw san veleh ta ani. 

A tuk chu inrinni anih angin nilengin in lamah umami leh ka nu chu ka pui ve a, naupang ho nen a infiam pahin thuamhnaw leh blanket te kan su a, kan rak chel chul bawk. Chutia kan compound zau leh lian ṭha hek hawk tak mai a naupang ho nen insukna sahbawn phuan chhem puar a kan lo rik dar dar lai chuan umami chu phone hmang chung hian a rawn tlanchhuak ta mai a. A hmel ka han en chian deuh chuan a meng nur in a ngaih chu a ṭhatloh hmel kher bawk. Chutia kalo thlir veng veng lai chuan thawklehkhat ah a rawn au chhuak ta ṭhat.

“Khatin i fanu kha kutthlak tawh suh”  a rawn ti deuh tuarh.

Chutihrual deuhthaw chuan phone chu a melh zui vang vang a, keipawh a lam pan a tlan phei ve thuaiin a kut a a ken mek chu ka phone ani tih pawh ka va hre chhunzawm nghal. A bul ka va thlen ve nak chuan mak tih hmel zet hian min lo en kara, a khur der der tih pawh ka hria.

Chutah, aw khur hlak hlak hian rawn ṭawngchhuak in

“Mama, tun a rawn call tu che tunge a? Engvangin nge a pa khan kut a thlak chiam mai” chu a zawhna avang chuan call ngai bawk kha ka dawng leh ani tih chu ka hre thei mai. Chutah, rang zet hian umami kut aṭang chuan ka phone chu ka han la sawn thuai a, list ka en nak chuan ka ngajhdan kha alo dik chiah bawk. Umami chu pawi ti tih hriat zetin ka han melh zui vang vang a. Ka phone chu lek kan pah in

“Kha vang khan ania, ka buai ruk ṭhin em em. He call hi vawitam ka dawng tawh a, mahse, khawi aṭanga lo kal nge anih tih hi chhuichhuah theih ala ni tlat lo”  ka tih chuan ani chu alo ter deuh at. 

“Chhui chhuah theihloh a!? ” tiin min en deuh hâw a. A mak ti leh hamhaih hmel mawlh chu ka lainat em avangin engkim kha ka hrilh ve ta vek. A tihngaihna hrelo leh hamhaih hmel mawlh kha a khawngaihthlak zawk teh asin. A tawpah phei chuan hui deuh pap pap pah hian

“Hmeichhe lainatawm tak ani. Khawi hmun a cheng leh khawsa nge anih ang. Mama, hriatchhuah dan hram zawng teh aw. Mahse, engtinnge number thi tawh aṭanga call chu i dawn ngawt theih zawk le” tiin thil thui tak a ngaihtuah zui tih hriat tak hian a chhing ta vang vang a. Kei takngial pawh hian a zawhna chu chhanna ka nei bik silo. Tin, heng thil zozai a thlen hnuah hi chuan mi tuemaw in min fiam ani ang atih theih tawh hauhloh.

Chutia ka umami ber in min hriatpui tak si ah chuan tu khaw kha hriatloh in a police hmelhriat neih ang ang te chu min biak ruk sak ve ta fo a. Thil nihdan kimchang leh phone number te a han pek,  a an lo bawhzui ngial pawhin a tute mah chuan chu number location chu an chhui hmu thei pawh nilo hian an beidawnpui zel zawk si. Kan tan zawng, beidawnna belhchhahtu mai anni e. Umami’n call alo dawn aṭang kha chuan chu number pawh chu a reh zui leh ta vang vang mai a. Hetihlai hian ka ṭhiannu Chhanhimi khawsak dan phung erawh alo danglam chho ve zel thung a. Khawiah pawh kal dawn ila, ka kalna tur kawng a lo din ngawih leh veng veng te a ching chho a, zanrei lam a kan gate bul a lo din leh vung vung te leh a dang tamtak maksak tak hi anni mai e. Thin ati ṭhawng in min ti hrilhhai ṭhin khawp mai. Engemaw chang phei chuan biak mawlh mawlh pawh hian min chhan mai nachang a hrengai lo a, min chhanglo a min en leh ngut ngut te pawh a hrat hle. 

Thawkkhat lai phei chu a mitkhur hi a rawn tla dawk mai a, a cher zual em em bawk. A chhan ka han zawh lah in engmah chu sawitur a hre leh lem silova, a riat nawi vel maimai ṭhin. Damdawiin a kal ka han rawt phei chu a thinrim ṭeuh a, min biak duhloh reng phah nghe nghe anih kha. Mak ka tih zawk erawh chu a khawsak dan hi niin, damdawi te hi a lo rui ṭhin emni ang aw tih chang ka nei ta fo. A damdawi rui hi hetiang hian mak taktak in a khawsa ta ṭhin emni ang tih ka ngaihtuah. A bulah erawh chuan sawichhuah chi ani der mai silo a. Ka ngaihdan ang chiah a damdawi rui ṭhin alo nih vaih zawng in ka thlah hlen vang vang a ṭul ang. Sawi tawh ang khan a nungchang leh inchei duhdan, a hmel engkim chuan ka lung chu dum zan mahse, hmeichhe ṭhalo alo nih leh vaih si chuan e, keiin duh in iai lo ringawt mahila an fapa neihchhun nupui tur atan chuan hetiang hmeichhia hi min hringtu ka nu leh pa te hian an pawm dawn hauhlo tih ka hria. Chuvang tak chuan a awmdan hi zawhfiah tawl mai chi emni ang tih te chu ka ngaihtuahna tibuai tu anni a, thui tak kan kal dun hma hian hriatfiah chu a ṭha zawk lovem ni tih te ka ngaihtuah bawk. Ka ngaihruat anga engmah alo ni leh silo anih erawh chuan min huat hlen phah thei daih bawk. Huiham, thil engkim hi a chingchivet kual zo anih tak ber hi. Hringnun hi a hring reng lo ang bawk in, alo tluang purh reng thei bik lo ani e.

Ni khat ka school kal chu class ka lak lai hian hmanhmawh ru takin miss Mary chu class ah a rawn tlan lut a. Min rawn bekbawr sar sar in

“Mi tu emaw in a zawng che a” a rawn ti ta mai. Ka meng phawk nghal hrû a, miss chu zuiin class ka chhuahsan nghal. Pawnah chuan in dinchilh leh pah hian thil awmzia ka zawt zui leh. Ani chuan meng phelh phang chung hian

“Office ah keimah chauh a kalo awm lai ania, hmeichhe kawrfual bal ṭet hrip hrep ha hi a rawn lut hlawl a. A sam lah kha a han thur em em khawp a, a hmai a bal bawk si nen, a ke ah lah eng chapal mah a bun bawk lo a. Ka sawithiam dan ber chuan a bal hi ani tawp. Ngawi reng hian a rawn lut chhur chhur a, a tirah kha chuan kalo hlau hman ṭep a, mahse, a hmel ka’n en khan hlauh chi ziazang niin ka hre leh lo, a lainatawm zawk. A duh kalo zawt a, kutdawh emaw ka tih tak vang ani pakhat bawk. Tichuan nangmah a rawn zawn thu che hi a sawi ta ani. Mak hi ka’n ti em em khawp a, khatiang hneichhia in nang daih a han zwng ta che kha. Mahse, i hmelhriat alo ni thei tho ka tih vangin ka inbengdai a, class i lak thu chu ṭha tak a ka hrilh hnuin ani pawh chuan pen leh paper min dil a, hei hi a ziah zawh hnu in min chhuahsan leh ta anih kha”  tiin a kut aṭang chuan lehkhapuan tereuhte hi min rawn pe zui zat. Rang takin a thil mi pek chu ka han en thuai a. Karei leh! Engtinnge heng thil hi a thlen theih zawk le. Miss mary hmuh lai chuan ka meng phawk nasa ta mai. Engdang anilo, chu paper tereuhte ah chuan kha phone number, call ka dawn fo na ṭhin ngei mai kha alo in ziak tlat ani. Paper chu lei ah thlauh in school pawnlam ah ka tlanchhuak ta vut a, mahse eng thil mah hmuh zui erawh chu ka neilo thung. Tlan let leh thuai in Mary bulah bawk chuan ka va kal leh a, vin zet hian

“Tinge a kalbo hma khan min rawn koh loh? Ava han pawi tak” tiin ka lu chu ka dawm zui vang vang. Ani lah chuan engmah hre ve heklo le. Makti leh bangbo zet hian min en deuh hâw ringawt a. A hamhaih hle.

“A pawimawh viau kalo ring lo a. Chubakah a numbber a dah tho si a, call mai la” atih chuan school bang te chu ka chum zui bur. Mahse, ka awmdan chu a diklo tih hria in ka insiamṭha leh thuai a, chutiang a khawsa tur chu ka ni miahlo,  a bikin midang hmuh lai ngat phei chuan. Anni hian thil chinchang engmah an hre ve hleinem le. Chutah, harhchhuak thut niawm tak hian Mary bân ah chuan ka han kai lawp mai a, alo meng phawk chiang teh e.

“Ti rawh, principal va hmu lawk ila, police station ah i thil hmuh kha a landan diktak i sawi a ṭul” tiin principal office kan pan phawt a, alo remtih hnuah school chu kan chhuahsan ta ani. A hma pawh a kalo kal tawhna station bawk chu pan leh in khami zan a lo awm inspector bawk kha alo awm leh hlauh mai. Tichuan, inspector hmaah engkim chu hrilhfiah in Mary pawh chuan a mi hmuh chungchang chu a han sawi ve a, a hmel hmai awmdan zawng zawng a sawi te chu constable pakhat chuan lo chhinchhiah thlap in phone number pawh kha an han call zui leh a, mahse chu erawh, a hma ang chiah khan a thleng leh ti mai ang. A mak teh fo mange, he hmeichhia hian tunge ka nih tih chu a hre phawt chu ania, mahse tinge a rawn inlar ṭhat duh miahloh le. Ka hnathawhna hmun chen in a hre vek tawh anih si chuan keimah ngei hi min rawn hmachhawn sela, ṭanpui a mamawh takzet anih chuan kalo pui mai tur. Engvanga hetia min chhaih kual reng nge maw anih le aw. Kei min hmu hreh a, ṭanpui a mamawh bawk si anih chuan police emaw, amah ṭanpui thei tur hnaivai te pawh pan ta se, nge kei kher hi min thlang tihna zawk? Rilru chu a tibuai ve hle ani.

Hetiang ka thil tawn maksak taktak te hi Chhanhimi pawh hrilh hre ve tawh in,a hmelah chuan engmah chhiar theih nilo mahse, mak chu min tihpui ve ṭhin hle tih ka hria a, tin, kha hmeichhia in ka hnathawhna school thleng thleng a min rawn zawn thu ka han hrilh phei kha chuan min fiam nan tak a hmang zui a, a khat tawkin min fiam leh zuk zel. 

Tlai khat ka school bâng, inchhung ka han lut chu ka nu hian amah ang rual vel tur kum upa lam inleng hi lo neiin an lo titi sar sar mai a. Chutia ka han lut thut pawh chu an titi lai chawl meuh in min lo melh dun reng. Kei chuan nuih sak pah hian

“Ee sawi zawm ru, ka sawichhuah sak dwn hleinem che u” tiin ka han fiam zui hlut a. Chutah, ka nu zawk chuan aw ring lutuk lem lo hian 

NANGMAH EMNI!?(4)

“Mama, hei, i nu Sangi hian an ṭhenawmte inluah ṭhin tu chungchang min lo hrilh a. Han ngaithla ve teh” a rawn ti hlut. Kei chu kalo hawihai deuh hman a, anni ṭhenawmte inluah chungchang maimai hriat pawh chu tiin ka nu chu a sawi ho ka ti hman hle. Mahse ka nu thu chu zawm in thildang pawh ti ta lo chuan an kiangah ṭhut hmun chu ka han rem zui ve mai bawk. Ka nu bawk chu rawn ṭawngchhuak hmasa ah ṭang leh in

“I nu Sangi te hi PUC bul mai a awm saw anni a, an ṭhenawm hnai te inluahtu, an nula hi hman kum ah khan alo boral tawh ani awm e, aa Sangi, nangman a nihdan kimchang khan lo hrilh ve teh” tiin ka nu chu a tho zui a, choka lamah lut in a chawhmeh chhuan lai ava buaipui zui daih. Chutah, ka nu ṭhiannu chuan a thingpui chu dawt hlak pah hian a han tep zui chap chap a.

“A mak reuh em a, i nu pawh kalo hrilh hre ve mai ania, aa tunlai chu kan awmna bawr vel ah mipa, amah chauh a rawn ṭawng leh bul bul ṭhin te an lo hre fo ani awm a. Nimin lamah a in neitu ten an sawichhuak chauh a, an han sawi takah chuan nula boral ta, tunhma a chu in lo luah tawh ṭhin ngei mai niawm tak thla te kha an hmuh fo thu chu an sawi zui ta sap sap a, keini chhungkua lahin chung vel chu hriat pakhatmah kan lo nei ve bawk silo a, mak pawh kan ti khwp mai”  a han tih tak chuar chuar ah chuan kei chu tih danglam hian ka awm ta emaw tih mai tur, ka hik chhuak vek a, engtin emaw tak Nu Sangi thusawi chuan keimah ah hian nghawng a nei ani. Ka sawithiam lo zawk. 

“Anih leh Nu Sang, PUC bul khawilai tak ah sawn nge in awm a? Chuan he nula te in hlui bawr vel chu khawiah tak nge a awm ve min han hrilh teh” aw khur deuh dar dar chuan ka han ti a. Ka aw khur chu thup ka tum nasat luat ah a lang fiah niin ka hria a. Ka zawhna zawh vel dan kher pawh kha a ṭul lo ka ti hnuhnawh leh hle. Min rinhlelh phah mai ang tih chu ka hlau a, a bik in ka nu hian min rinhlelh zual ka hlau ani. Mahse, awmzia a awm tawhlo ka zawt zo vek tawh thung.

Chutah, Nu Sangi bawk chuan

“Keini hi chu college canteen bul chiah saw kan awmna ani a, an chanchin ka sawi mek te erawh Redeem hospital chhak tlâng lamah khian ani e” atih leh lek phei chuan ka thlanfim an bawl chhuak vek tawh a, ka tho chhuak zawt bawk. Ani thei in ka hrelo, a sawi mek hi Chhanhimi te chenna bawr vel kha ani tlat si. Thil ni theilo tawp anih hi ti rilru chungin room ah ka tlan lut ta daih a. Khumah ṭhu zui hnawk in thil awmdan vel chu ka han ngaihtuah ṭha leh rih. Redeem hospital chhak lamah chuan mihring chenna In tamtak a awm ve a, Chhanhimi te chauh lo pawh hi mi in luah a khawsa nula an awm ve ngei ang chu. Keipawh hi eng nge ka hriat le, hetia mahni leh ṭhiante a chhe zawng a han inrinhlelh vak pawh chu. Diktak chuan ani kha boral tawh thlarau ni ta se, engtinnge a hmel ka hmu a ka khawih theih ngawt ang. Tunge mitthi tawh thlarau nen a inhmu a in ngaizawng ngai? Movie leh thawnthu chauh lo ah chuan a awm thei ngawt lovang e. Ka â zo tawh chu anih ber hi, hetiang thil ho leh awihawm loh lutuk buaipui a rilru tihah hman hi ka nilo e, buaipui tur liantham dang ka ngah lutuk tia inti thawveng chawp in ka inthlak sawk sawk a, inbual turin bathroom ah ka lut zui ta daih. Ka inbualfai hnu in ka insiam zui leh sawk sawk a, ka nu pawh chanchin hrilh tawh lemlo in Police Station ka pan zui nghal.

Station ka thlen hian thawm alo reh duk a, an buailoh lai tak anih hmel e tiin ka lawm ru phian. Vanneihthlak takin ka hmelhriat tawh sa inspector pawh kha alo awm hlauh a, mahse haw tum a alo intintuah lai vel ka va ningching ta alo ni. Ka hmel alo hmuh rual in ani pawh chuan ka kal chhan tur chu a hria tih hriat tak hian a dawhkan lam a pan zui leh vat a. Chair ah chuan ṭhu in kei chu chiang zet hian han melh leh rih. Chutah ṭhu tur a min hui leh zoh in keipawh chu ka ṭhu fel ve nghal mai. Uluk zet a min la  melh reng chung hian ani chuan

“En teh vala, i case hi a khirh thei riau mai a, thildang, mihring nilo, thlarau lam te hi a inrawlh ta emni aw ka ti ru hial. Mahse, chu zawng, ka ring lutuk lem lo a” tiin za fahran lo chuan a han nui zui suk a.

Kei lah in rang zet hian

“Chuan engtinnge ka pu, in bawhzui ve reng reng em?” Tiin ka hmanhmawh ta hle. Muangchang a a lu chu buk nghut nghut pah hian 

“I rawn sawi ni la la khan a theih dan ang in ka nau te ka en kual tir a, a hmel hmang leh a inthuam dan vel in sawi hmang khan kawtthler tin an dap bawk a, an zawng ru bawk. Mahse, amah ang tak chu an hmu fuh na a, chu erawh an belhchian hnuin rilru kimlo leh khawlai a kutdawh ṭhin hi alo ni a, a thla te pawh laksak in i ṭhiannu hnenah khan kan kalpui nghe nghe. Kan mi zawn lai chu alo ni leh lo tih a rawn nemnghet chiah bawk ani. Hetiang bak hi chuan he thil hi chu buaipui dan teh vak a awmlo ani e. A detail kimchang tak nise, tute mah hian kan hre hlawm silo a, buhpawl zing a hriau zawn ang maiin a harsa ti mai teh ang” tiin a han thaw zui halh a. Min ti beidawng zual mang tak e. Hnuichhui thiam Police te ber in a tihngaihna an hriat miah siloh chuan kei a tan hma han lak vak dan kha a vâng hle si. Mahse, chuti mai a beidawnsan leh tawpsan erawh ka tum awzawng lo a, engtik hunah pawh thawm rawn neiin emaw, rawn in lan leh mahse, ka bawhzui zel tho ang. Kei private school zirtirtu satliah ve mai hi min mamawh tu an phawt chuan tlanchhiatsan kha ka tum reng reng lo 

Khatia police te an beidawn hnu aṭang phei kha chuan keima thiam dan leh remhriat dan ang angin kha hmeichhe maksak tak ni thei tur awm kha ka zawng kual ta fo mai a, kawtthler lun lai te phei chu chik lehzual hian ka bih fo ṭhin. Mahse, chung mihring tamtak inpel suau suau karah chuan Mary sawi ang hmeichhe kawr bal leh chhe tak ha a sam thur em en leh pheikhawk pawh bun lo a vak kual vel hmuh tur chu an awmlo. An awmlo hlawm tawp hi ani mai e. Chutiang a veng hrang hrang kawtthler lun lai ka hrut kual chiam hnu pawh a ka hmuh tak silo ah chuan tlem in ka beidawng chho ve ṭan ta. In lamah nise, ka farnu leh ka nu hian ka khawsak phung danglam an tih sawt zia ringawt chu min lo hrilh chamchi bawk a. Chutihlai vekin Chhanhimi lah hmuh tur reng reng alo awm leh tawh lo bawk. Mahse, ani erawh, a hma daih khan an khua a a haw tum thu a sawi zauh tawh a, a haw ta ni tur ah ka ngai mai. An in luah a va kal turin hun thawl ka la nei map bawk silo. A ruk tak chuan ka ngai a, kalo ngaihtuah leh veng veng ṭhin tho.

Zan khat ka insumtheilo chu an inluah ah kal in ka rin ang ngei chuan an lo awm lo bawk. An in chu a thim ṭhuap mai a, a reh tlawk tlawk hle. Kan pahnih chauh a thawmdim leh in veng ru tak a kan inkawmna hmun, an in panna step te chu ka melh vang vang a, ka han ṭhu kual ta vel thul. Chutia thim zing a kalo ṭhut ngawih veng veng lai chuan an inchung aṭang bawk khan thawm alo awm leh ta. Ka ṭhutna zawn tukverh bawk rawn in hawng leh in hmeichhe la naupan hmel tak hi a rawn dak ta heu mai. Kei chu min rawn hmu thei ni a ka hriat avangin kalo nui deuh vur vur thung a. Chutah chu hmeichhia chuan

“Nichin khan i thawm ka hria a, duh i neih chuan hetah lo chho ta che” a rawn ti ta hlauh. Inchhung ka han lut chu amah leh pitar, upat hmel tawh tak, kut khur hlak hlak a lo ṭhu mek chauh chu hmuh tur an lo awm a. Nula bawk kha rawn ṭawng chhuak leh in a hmel hlim sâng chuan awm ati nuam takzet bawk.

“Lo ṭhu rawh. Tinge khulai step thim deuh ah khan ilo ṭhut ngawih reng a?” Min tih chuan ka nui hul leh hak. He nula hnenah hian Chhanhimi chanchin chu zawt ta ila a hre ve angem tih ka ngaihtuah ani. Amah lah hi ka vawikhat hmuhna niin mikhual a ang bawk si a. Mahse, ka in ngaihtuah rei lemlo. Khuh deuh kharh pah hian

“Englo mawle, in inhnuai luah ṭhin nula Chhanhimi North Vanlaiphai Khua kha rawn hmuh ka tum deuh a, alo awm ta  silo a” ka ti ban deuh chuar chuar. Ka sawi zawh rual deuhthaw hian tv hma lawk a ṭhu pitar kha a rawn hawi vat a, a lu te chu a thin nasat em avangin kei chuan kalo rap ru hman hle. Mahse leṭ tar chak tawhlo ani a, natna engemaw vanga chutia awm chauh chu anih ka rin leh bawk avangin ka rap ruk riau na pawh chu a ziaawm leh ta deuh. Mahse, a mit ṭha lam zawk a min la melh ngar ngar avang chuan nuam chu ka la ti chiahlo hle.

Nula bawk chua

“Chhanhimi, ee UChhanhimi, college kal a awm ṭhin kha emni i tih chu. Awi, kei hi Aizawl a ka awm loh na a rei lutuk tawh a, tun pawh hi ka putea te chhung an zin vek dawn avang in hei, a pi hi awmpui tu tur an mamawh si a min rawn ko leh chauh ania, engmah hriat fumfe pawh hi ka nei tawhlo r” tiin a riat nawi ta vel niah niah. A ṭawngkam chu a dam in ngaihthlak a nuam a a zangkhai ru viau bawk si. Tichuan, ka bul a rawn ṭhut thlak ve pah in amah bawk chu a ṭawng chhunzawm leh zat a.

“Chuan, U Chhanhimi te nen chuan in inkawm ṭhin tihna emni? Heta ka awm ṭhin lai khan nau ang hian min en a, kan inzui ve nasa ṭhin asin aw. A phone number te pawh kha la nei maithei, mahse a hmang tawhlo nge, biak ka tum hian a tlang thei tawh miahlo a” tiin a phone chu a han bih zui ta ngar ngar a. Ka beng verh zawng tak lo niin a number chu a la hmang emaw hmang lo emaw, dil tho kha ṭha in ka hre ta. A chhan chu tun pawh hi a phone chhiat vabg chauh ani a, chuvang chuan he nula pawh hian be tlang theilo chauh chu anih ka ring mai. A hma daih khan hetiang te chu lo ngaihtuah chhuah ve bawk tur ania.

“Tunah chuan a phone a chhia a, a biak tlang theih loh ang. Mahse a number min lo pe ve tho ta che” tiin ka phone chu ka han pe zui a, ani chuan lo ban chat in Chhanhimi number ni ngei tur chu a chhu zui mial mial a, a save nghal thlap bawk. Min nuih seih pah a phone chu min pek leh pah hian

“Umm kei hrim hrim pawh hi ka mawl lutuk a, khati khawp a inkawm nasa si an chanchin te chu putea te pawh lo zawh ve awm hi ania. Ti ila, ka rawn thlen rual deuhthaw khan anni chu an zinna tur lamah an chhuak nghal ani mai a. Engmah han sawiho na hun kha a awm lemlo bawk ani. Kum a liam nual tawh hnu a lo kal leh chauh kalo ni bawk nen kalo mangnghilb ve hrim hrim a, a zialo taktak. Thingpui in rawh aw” ti zawm zat in a tho nghal a. A ṭawng duh ka ti reuh kher. A thusawi pawh chu hnial lemlo in a thingpui lum tui tak chu ka han in leh te te phawt a, tichuan ngaihṭha takin ka haw san ve ta ani.

Hun a ral a, chawlhkar a liam a, keipawhin ka hun te chu a ngai te in ka la hmang chho ve zel. Hetihlai hian Chhanhimi pwh kha ala rawn kir leh hauhlo a, a cham rei ka ti tawh in ka ngai takzet tawh. Tin, hetih chhung zawng hian ka call maksak dawn ṭhin te pawh kha dawng tawh lo in hmeichhe maksak tak pawh khan min zawng tawh bawk heklo. Hetihlai vek hian Umami te nufa pawh kan hnenah chuan an la cham ve reng a, a khat tawk in a pasal te in lamah pawh an va riak phei ve lawp lawp ṭhin tho. Anni pawhin an tute pahnih chu an lo ngai thei hle ani.

Zan khat ka khawhar tihtur hrelo leh Umami te nufa awm bawk silo kan inchhung reh lutuk avang chuan khumah ka mu zal ar ar a, phone te chu ka hmel kual pah vel maimai. Chutihlai chuan ka rilru ah hian eng nge rwn thawk tih pawh ka hrebik lo, Chhanhimi phone kha a chhia tih chu hre tho mahila ka tihtur hrelo lutuk chuan ka call chhin chak ta tlat pek. Chutah, a number chu hmet chhuak in ka call nghal. Rinlawk ang ngeiin ka call tlang theilo pang. Mahse, kha computer thilsawi khan ka beng a verh deuh zar mai a. Chhanhimi number chu a nung tawhlo maw!? 

Ka mu lai chu ṭhu chhuak zawt in ka han call nawn leh ngat a. umm number chu hman tawhlo, number thi tawh ngei ani tih chu a chiang ta. Mak ka ti kher asin aw. Chutiang in simcard hi a thi zung zung pawhin kalo hre silo a, a phone tihchhiat hun lah kha kalo hriatpui thlap der bawk silo. Aa a phone chu lo chhia pawhnise chutia mahni sim card hman lai thi tur a han hlamchhiah ngawt thu chu a awm dawn emni ka ti. Hetia ka buai ruk em em lai hian ka buai belhchhah na tur thilmak ka hmu fuh leh  ta. A phone number mawlh kha! A number kha a hming nen thlap pangngai taka in save sa vek anih angin a tir ah khan en mai nachang kalo hrelo ani. He Chhanhimi phone numbet ngei mai hi ani call dangdai tak kalo dawn fo tawh ṭhinna kha! Ni e, kha call mak ka dawn fo ṭhinna number kha ka thluak leh mit te hian an chhinchhiah hneh tawh lutuk a, theihnghilh maimai theih ani tawh lo. Chuti anih chuan, Chhanhimi hnen aṭang ngei ani maw call te kha kalo dawn ṭhin? Mak ka ti lutuk leh min ṭhawng lutuk chu ka meng zau kawk kawk a. Tunah hian police hnenah ka thil hriat thar te hi report pe turin ka kal zui nghal ange nge. Nilo, nilo, Chhanhimi alo nih taktak si chuan khatiang buaina liantham kut inthlakna tih vel kha a hringnun ah a tawn awm pawh a sawi ngailo a, chubakah khatia amah sawisa ṭhin tu kha a pa ngei anih si chuan Chhanhimi chu hetah a awm reng a, call ka dawn hunlai te pawh khan ani chu hetah College Veng ah ngei hian a awm tih ka hria. Chutihlaiin a pa thung chu an khua, North Vanlaiphai ah a awm daih anih kha. Thil thleng theilo tawp ani he thil hi. Chutiang anih tak ah chuan a sim card hi miin ruk sak in min fiam nan tak an hmang emni dawn? Chu pawh chu thil ni thei ala ni chuanglo. Chhanhimi hian ka phone number a nei ngailo hrim hrim. Huiha, rilru ava buai duh tehreng em. Engtia hmalak tur nge ka hrethiam ta lo tawp mai. Engpawhni rawh se, a chanchin chu ngaihven pah in an khua North Vanlaiphai lamah chuan ka han kal ngei a ṭul dawn ani. Awle, ka kal ang. North Vanlaiphai ah chuan ka kal ngei dawn ani tawp.

A tuk ah chuan zing hma takah tho in motor ka la chhuak nghal a, tin, hetia ka chhuah lai hian ka chhungte tumah tho chhuak an la awm lo bawk a, umami hnenah message ka hnutchhiah ringawt. Tichuan, kawngtluan a ka mamawh tur engkim chu in ring sa vek in Serchhip District a khawpui pakhat, North vanlaiphai lam pan chuan ka in khalh chhuak ta par par. Kawng lakah chawl hauh lo in ka tlan zel a, ka tum ram pawh tlai lam dar 5 velah thleng in ihe lo hian tourist lodge ah ka in nghat zui bawk. He khua ka luh lai hian ni ala tla fel chiahlo a, unau hmelhai hun vel chu ni tawh mahse, a khaw thleng vel chu nawm hmel ka ti ru hle. Mahse chu zawng, khawvar hunah ka hria in ka la hmu dawn chauh alawm tiin ka thlenna room ah chuan ka inbual nghal sar sar. 

Ka inbual zawh a zanriah te ka han ei kham fel meuh chuan zan dar 8 lai alo ri vû tawh mai a, ka tlanna lamah ka chau deuh bawk nen ka chhungte chu be hmasa leh te te in ka muhil zui nghal hmak. Mahse, chutia ka mu tui lai chu thawm engemaw vang hian ka harh leh zawk mai a, khum aṭang chuan ṭhu chhuak deuh hluai in ka room bang rawn hiat ri tu chu an awm tlat a hriatna ka nei ta. Ka hawi buai hman hle a, thawm chu ka ngaithla pah reng bawk. Chutah, ka room kawngka chu tu emaw hian an rawn beng ri zui dawp. Ka va han phu nasa tehreng em aw. Tha khur hlawk hlawk in khum aṭang chuan ka chhukthla zawt zawt a, kawngka ka va hawn dawn lai takin vawikhat a rawn chum ri leh dawp mai. Ka ke pen pawh chu a tawp zui chawih. Mahse, pawnlam aṭang a mipa aw ngei chu ka hre ta. Thaw huai chung hian kawngka chu ka va hawng zui a. Ka room pawn ah chuan mipa lian lampang hi meng phelh phung leh boxer chauh ha hian alo ding vung mai a, room lehlam zawk luah tu anih chu ka ring thiam nghal. Chutah, chu pa chuan

“Ṭhianpa, mamawh inei emni? Khati vak vak a kan kawngka i rawn chum tak chiam” alo ti daih. Ka va han bangbo tak aw. Ka nihloh zia thu leh ka mu tui lai min tih harh zawk thu ka han hrilh hnu chuan a khap ta fuk fuk a, min rinloh hmel fe a min chhuk melh run chung hian a khabe hmul a zut zui nuap nuap. Chutah, rum nghat chung hian

“Umm mamawh i neih chuan ṭha deuh in min  hrilh dawn nia” ti nghut in a in her a, an room ah a lut zui daih. Hram hram tak chuan aw tiin a hnunglamah ka melh zui nghek. Ka ngaih chu a ṭha tawh lo in ka awm pawh a nuam chiah lo. Muthilh leh dawn in khua pawh a var ṭep tawh tho a tiiin thawmhnaw ka inbel zui sawk sawk a, hmai te phih leh te te in room chu ka chhuahsan nghal. Tichuan kan riahna bul kawng nuam tak lam chu pan in zawimuang hian ka tlan ta dat dat a, taksa sawizawi nan chu zing boruak thiang ṭha tak chu hmang hlauh mai ang tiin ka tlan zel. Tlan zel in reception counter lam chu ka zu pawh thla ta a, a compound ah chuan zan lam pawh a kalo hmuh tawh, lodge nghak tu pa tereuh te bawk kha alo awm leh. Ani chu thingpui no dawm hian alo hawi vang vang mai a, a bul ka thlen hnaih chuan mak tih hmel fe in min en reng. Kei chuan ka han nuih deuh suk ringawt a. Chutah,

“I va tho chhuak hma em em ve a” a rawn ti hmasa khauh. Chhan let mai dan tur ka hrelo chu ka tukkhum thaklo pui te hiat in ka khi deuh vur vur a.

“In khua chu ka rinai daih in alo nuam” ka’n ti thla ngawt a. Ani erawh alo bu nghut nghut thung. 

Ka kal chhan tak leh ka rilru a riak reng chu engtinnge ka han zawh chhuah ang tih ngaihtuah in ka buai leh ta. Amah Chhanhimi chauh chu hriat ka nei si a, a pa hming emaw a chhungte hming reng reng kalo hre hauh lo. Keipawh hi aw…mahse, Aizawl te ang em em a khawpui lian leh mihring bit na ang kha ala ni lemlo a,an khua chu lian in mihring pawh ṭhahnem ve viau tho mahse, ka mi zawn tur hi chu a danglam bik a, an hre thei mai tur ah ngai tawp ang tiin ka han inhnem leh rih. Ni e, amah hmu lo kha chuan let leh mai ka tum reng reng lo a, engtikawng pawh a zawn hmuh kha ka tum tawp mai ani. Khua a rawn var chiang a, ni a tlang sang ta bawk a, keipawh ka riahna lam pan in ka let leh a, ka inbualfai leh te te phawt. Tukṭhuan ei hma tiin zan lam a thawm ka hriatna lai te chu ka han bih kual ta vel rih a, khatianga bang rawn hiat ri hrawih hrawih thei khawp kha chuan a hiat na ve tawk in bang te pawh chu râng deuh ruai tur a ngaih theih ani. Mahse, ka hmuhphak chin ah chutiang chu engmah a awm leh bawk silo. Mihring thiltih nge ni anga min chhaih buai tum tu emaw kan tawng zawk ni ang tih ngaihtuah reuh reuh chungin dinning hall lam pan chuan ka kal zel a. Heta ka sawihmaih hauhloh tur chu, kan riahna room building hi hmun hran a awm niin, dinning hall leh reception counter erawh block khat anni thung tih hi.

Tukṭhuan ei a dinning hall a kan ṭhut laiin zing lam a kalo hmuh tawh, lodge nghak tu pa bawk kha lo kal leh in kei chuan remchang kalo dap vat. Ka be ta ani.

“Ka pu, in khuaah hian Chhanhimi Aizawl lama college kal ṭhin, an unau a inluah i hre mial lo maw” kalo ti chu a beng lehlam a rawn dawh ta hû mai a. Chuveleh, reception counter a lo awm nula pakhat chuan min  rawn be ve nghal in nui sâng mai hian

“Tlem a biak rin deuh angai, a induh ve deuh hlek tawh a” a rawn tih chuan ka bul ami chu a beng a ṭha vak tawhlo tih ka hrethiam ta chauh. Nuamlo pawh ka ti ru hman hle. Tichuan, ka zawhna ngai bawk kha zawt leh in a hma ai khan ka awki pawh chu ka ti sâng ta hlek.

“E, aw, ka hria alawm” a han ti deuh tak na a a mitmeng aṭang chuan ka thilsawi kha ala hrefiah tawk lo niin ka hre deuh. Chutihlai vek chuan counter nghaktu nula bawk kha rawn ṭawngchhuak leh in

“I mi sawi chu Hrangbana college a lut ṭhin kha emni?” A rawn tih chuan rang zet hian amah chu ka en a, ka bu zui nghut. Chuveleh, chu nula hmel chu rawn inthlak danglam nghal in hnuailam a melh ta reng a. Sawisual a nei nge, tih dikloh ka nei zawk tih ngaihtuah a amah kalo ngaihchan reng lai chuan rawn hawichhuak leh in

“Engtik nge i hmuh hnuhnun ber a? Englo, a chhungte hmuh i duh anih chuan an veng awmna chu ka hrilh thei ang che” a rawn ti leh sap. A chhanna min pek dan chuan ka lawmna ati kim zo hauhlo. Amah zawng na na na a, a chhungte min han sawi hmuh daih mai chu a ngaihna ka hrelo in ka lawm lo ṭep.  Pawn lam a chhuah tum pah hian

“Pa ber hming tal chu min lo hrilh la, nakinah ka zawng chhuak ve mai aniang chu” ka ti deuh nghut.

“A pa chu Pu Rochansanga niin a nu pawh Liandingi ani e. Chuan, i tan zawn hmuh a awlsam zawk nan Damdawi veng ah an awm bawk aw” tiin mi rawn nuih deuh sak a. Lawmthu ka hrilh leh hnuah ka room pan in ka kal zui vanv vang.

Ka room ka thleng a, inthiar turin bathroom ka pan lehnghal. Rei lutuk awmlo in ka chhuak leh mai a, mahse eng thil nge ka va hmuh tak hi le. Khum chungah chuan amah, mi zawn lai mek  Chhanhimi ngei mai chu alo ṭhu fel at nia mawle! Chiang zet leh nui hmel pu sang chung hian lo melh let ve reng lehnghal.

NANGMAH EMNI!?(5)

Kei lah chu min ṭhawn nasat em avang khan ka han meng phawk em em lehnghal a. Mahse, karlovah pangngai zui leh vatin a bulah chuan ka va ṭhu thla ve zat.

“Eng- eng nge thil awmzia hi?” Tiin ka dang te chu a awk vek tawh. Anj erawh chu alo nui leh mai a. Chawl lo lekin min la melh ngar ngar tho nia. Keimah bawk chuan

“Engtinnge ka awmna hmun i hriat theih?” Ka ti leh sup. Chutah, ka rinloh lutuk a ka biang chu rawn chul thuak pah hian

“Min zawng emni?” A ti sap a, chiang takin ka mitah chuan ala en reng bawk. Ṭawngka a chhang lo chuan ka lo bu deuh nghut nghut a. Counter nghak tu nula khan alo hrilh ani ngei ang tih ka ring nghal bur. Mahse, ka rilru hria niawm tak hian amah bawk chuan

“Ilo kal thu hi tumah in min hrilh lo, ka hriatna a ṭha a, ka hre ve tawp” tiin a nui leh ringawt a. Chutihlai tak chuan amah chu kuah thut a fawh vawng vawng mai hi ka nap a, mahse ka ngam teuh silo. Nitin deuhthaw kan inhmuh ṭhin lai pawh khan chu thil chu ka ti ngam tawhlo ani a, tunah phei chuan hnailo lutuk ringawt. Mipa ve si, ka hmeichhe hmangaih hmaah hian ka va han nep sazu tak em.

“Engvangin nge ilo kir leh tak miahloh a” heiha, sawitur ka ngah lutuk hi ka kha a chih zo a, sawi hmasak ber tur pawh ka thlang thiam tawhlo ani e.

“Nia, hetah hna an ṭul nasa mai si a, ka nu damṭha hleithei lo nen, ka rawn let leh lawk ta lo ani e. Mahse hei, nangmah zawk ilo kal hlauh a, a tihzia” tiin min nuih leh sak. Ava han hmelṭha chiang tehlul em.

Engtinnge ka thu pai maksak taktak te kha ka sawichhuah tak ang le. A chhan hriatfiah duh vang a kal kha ka ni pakhat ve si a, sawichhuak lo a haw san leh daih chu thil ni thei ani bawk silo.

“Eng lo ania Chhante, thilmak deuh mai hriat ka nei a,chu chu” ti a sawi ka tum lai takin amah zawk chuan ka hmui chu a rawn hup that. Chiang zetin kan inmelh zui vangvang a, chiang kek kawk tak ani. Ani chu a mittui te ala tling zui pam lehnghal a, eng nge maw thil awmzia hi le.

“I sawitur engkim hi ka hre vek asin. A zavai hian ka hria. I hriatloh thleng te pawh khan ka hre hial ang” a rawn ti ta mai. Ka meng bial deuh kawk hman a, mahse engkim chu hriat vek ka duh avangin ngawi reng thei ka ni lo thung.

“Ilo hre vek a maw!? I hriatna a rei tawh em? Chhani, engkim min hrilh rawh, engvangin nge danglam taktak hian i khawsak ṭhin a?” Ka ti ta zung zung. Min chhan let hmain keimah bawk chuan

“Hetah i sawi theilo anih pawhin in chenna hmunah kalo kal mai ang. I nu damlo rawn kan pah te pawh animai a” ka tih leh erawh chuan a lu alo thing deuh nawk nawk. Hnuailam en hian a kun zui ta daih bawk. Nimahsela, chutia a kun reng lai a rawn hawichhuah leh a min han en nak chuan ka tawlhhnung rawk rawk thei. Hei hi Chhanhimi, ka hriat ṭhin leh ka thinlung a riak reng Chhanhimi hmel kha ni thei in ka hre tawh mawlh lo. A mitmu te chu a fim ral tawhlo a, a pual rû kan ti dawn nge, a hmelhmai nise mitthi ṭawih tawh ang mai hian a tawlh per pur a, a khem nuan bawk si. A hmai kha a dâng var puap a, a pilh hrep hrup bawk. Chutihlai vek chuan chu room chhung chu a rawn rimchhe zui ta em em lehnghal a. Ka hnar hup in bathroom bulah ka va ding zui thuai. Mahse, ani thung chuan chiang zet hian min la melh zui vawng vawng a, ka khur chhuak vek thei nia. 

Chutah, aw vawt ruih leh zawi sap a rawn ṭawng chhuak in

“Ka ngai ṭhin khawp mai che Hriatpui” a rawn ti a, a aw te chu a khawk deuh rum rum nimai hian ka hre zui. Ka va rap tehlul. Kei chuan chhan dan tur reng reng ka hrelo a, ka khur hlawk hlawk ringawt mai ani. 

Tichuan le, a ṭhu ṭha hle hle lai chu rawn ding chhuak in ka awmna lam a rawn pan ta mai. Bathroom ah chuan ka tawlh lut lo chauh tawh a, rang tak a ka kut phar chhuak nghal in

“Rawn kal hnai hlek suh. Nang hi Chhanhimi kha ini lo, tunge inih? Eng thil nge i duh a?” Tiin zan hmasa lama kan thawm hriat te kha ka han ngaihtuah kir a, he ramhuai thiltih ngei hi anih ka ring zui ta bawk. Chutia ka tih ṭhawt takah chuan ani pawh a ding zui ve chawt. Chiang taka min la en reng chung hian a mittui chu a rawn tla ta mai a, tin, a hmel landan pawn rawn inthlak leh riai riai in a hma lawk a Chhanhimi mihring pangngai hnel chiah kha a rawn lang chhuak leh ta. Chung vel vang chuan kei chu kalo thaw deuh hak.

A mittui luang ngiai ngiai kar aṭanga min la rawn melh kiau chung hian a han nui leh sak a.

“Hriatpui, kei hi mihring damlai ka ni tawh hleinem! Khang hun, i kianga ka awm chhung zwngte pawh khan mihring ka ni ve tawhlo” tiin hnuailam en chuan a kun leh ta reng mai a. A thusawi khan min ṭhawn em avang leh min tih hrilhhai bawk avang chuan chet mai ngaihna pawh ka hre ta lova, a mah chu ka melh vang vang. Tin, ka tha khur te pawh kha an la reh fel eihlo a, ka la ringhlel deuh tlat bawk niin a lang. Ka hmaa ding mek hi mihring anilo tih zawng ka hrechiang tawh a, mahseṭ Chhanhimi kha chu niin ka ring thei tlat bawk silo. Chutia sawitur leh tihtur ber pawh hrelo a amah kalo melh ngawt ngawt lai chuan rawn hawichhuak leh in min han nuih sen sen phawt a.

“”Khang hun chhung zawng khan i bulah chuan awm ve bawk mahila, tute mah khan min hmu thei ngailo a, engtinngs nang hian min rinhlelh loh theih zawk le ka ti. Mahse le, inhmu ve fo mahila mipui tamna hmun ang chi ah kha chuan ka awmpui duh ngailo hrim hrim che anih kha. I nu in min hmu thei tih ka hriat pawh khan mak ka ti lutuk, mahse ka Pathian hian min ṭanpui ni tur ah ka ngai a, nangmah rawn ko chhuak tur che khan. Nimahse, i pa leh i tupa naupang te kha chuan min hmu leh thei chuang hauhlo” a tih lai chuan thil engkim kha kalo mitthla zut zut a, a sawi dik vek bawk si. Anih chuan mathei lovin he nu hi Chhanhimi ani tih chu ka pawm angai dawn ta tihna anj maw!!?

“Engvangin nge heng thil zawng zawng hi ka chungah i thlen tir nachhan? Mitthi i nih tawh chuan mitthi khuaah kal ta mai che” ka ti khur deuh hlak hlak. Ani erawh a mittui chu ala luang kawi niaih reng a, hlim hmel a pu sâng reng thung.

“Number thi tawh aṭanga call i dawn ṭhin kha ila hria em?”  A rawn tih leh sap chuan chiang zet hian kalo melh kawk. Eng aiah nge chu chu ka han hriat loh tehlul ang ni. Amah pawh hi ka hrilh ve nghe nghe a, a hnuah phei chuan a ma phone number ngei ani tih ka hriatchhuah nghe nghe kha. Hemi vang pakhat a helai hmun pawh hi kal thleng ka ni reng ani.

“Hria e, kha number kha i phone number ngei ani bawk” kalo tih chuan a nui leh mai.

“Khang zozai phone call i dawn ṭhin te kha maw, keimah aṭanga rawn kal vek annih kha!”  A aw chu a zawi viau na in a fiah ṭha a, a vawt reih ruih hle bawk. Chu a thilsawi zet chu, a hma ang chu nise, ka awihlo nasa hle ang. Mahse, tunah erawh ka hmaa ding mek ka ṭhiannu hi thlarau mai ani tawh tih ka hria a, awih chin ka nei ve ta ani.

“Engvang a heng hi ti nge inih?” Ka ti leh khur khur.

“Phone call a thawm i hriat ṭhin kha keimah niin, ka damlai a ka chung a thilthleng te kha hriattir in i awm ṭhin ani. Ihmaw Hriatpui, i ngaih ang aiin ka damlai hringnun kha a rethei a, a hahthlak bawk. Tunhma a kalo hrilh tawh ang che khan keimah min hringtu ka pa hian min boralsan tawh a, pahrawn hrawn in ani chuan tiang khan kut min thlak fo a, kei chu a kut thak hnawih na niin hrehawm tamtak kha pal chhuak zo lo in ka nunna chu tih tawp alo ni ta ani”

Tunah zet chuan ani hi hlau a khurh chhiat reng a hun tawhlo tih hria in, zawimuang hian khum lam chu ka pan ta zawk a. Khum a ka ṭhut fel hnuah

“Anih, engvangin nge ka thawhna school ah te khan ilo kal. Tin, eng aiah nge hetiang tur hian kei kher hi min thlan nachhan. In khuaah daih  i ruang te chu zalh niin thlah liam ini awm si a” ka tih chuan rang zet hian

“Thah ka nih vang ani e Hriatpui” a rawn ti chang ta fak. Min va han ṭhawng chiang tak. Ni e, thih hnu a an thla rwn inlar leh ṭhin te hian lungawi loh na leh fel hlel thil a awm ṭhin vang ani tih chu ka ring tehmeuh, mahse a chungchang bik hi chu a danglam a, min ṭhawng na bik em ani.

Chutah, amah bawk chuan

“Nia, nang kher ka tihchhan chu aizawl hi ka hun tam zawk kalo hman ral ve tawhna ani a, ka ngaiin ka la thlahlel hle nghe nghe. Tin, nang hi chuan tunhma ka damlai pawh khan min la hmu ve kher in ka ring lo a, kei thung chuan vawi 3 lai chiang taktak in ka hmu tawh che. Ka mipa ngainat leh duhzawng tak ini dawn in ka hria a, i chanchin hi khatihlai a ka ṭhian kawm ṭhin college veng nula hnenah khan zawt in ka rin ang ngeiin ka duhzawng tak ilo ni bawk. Chuvang chuan ka damlai khan i kiangah hun hmang theilo mahila, ka rauthla tal hi chuan i kianga hun hnuhnung hman kha a duh ve si ani. Min hrethiam hram dawn ania. Tin, in school a kalo kal chungchang pawh kha, min hrechhuak thuai la tih ka duh a, amaherawh chu, kei mi  dawihzep hian hmaichhan ah engmah ka hrilh ngam silo che ani. Tin khami ni a ka landan kha ka nihdan leh landan diktak pawh ani a, min ring sual lo e” 

Engkim, a thusawi zozai te chuan min khawih takmeuh a, hnuk te lam lam a ti ulh thei dawn hian ka hria. Engvangin nge a damlai khan kan lo intawn ve mailoh le aw. Pathian remruat dan hi chu a mak ṭhin teh zawng anih hi. Awle, tunah chuan khatiang a hma a lak chiam nachhan chu ka hrethiam ta uarh a, nimahsela, engvang ber a boral ta leh tu thah nge tih chu ka hriattur awmchhun ani ta. Amah pawh melh ngam tawhlo hian kawngkapui lam chu ka hawi zui daih.

“Tunge that che? Tin, engvanga that che nge annih?” Ka ti leh sup. Ani chu ka bulah rawn kal hnai hret in ka kiang hla lutuk lo ah chuan a rawn ding ve ta a.

“Engkim thlen dan kha a zavaiin ka hrilh vek ang che. Mahse, chumi hma in heng thil zozai ka chung a thlen tirtu hi man tir la, a phu tawk hremna chang ngei se ka duh ani. Kum hei leh chen hnuah pawh tualthattu chuan tihsual nei lo ang maiin tual ala leng maimai ka hmuh hian ka nâ a, ka thlarau zalen tur pawh ala phuarbet tlat ani”  atih chuan thutlukna siam awlsam tak nilo mahse, ka tih ngei a ṭul dawn tih ka hriat avangin kalo bu deuh nghut nghut.

“Awle, Hriatpui, ka sawi tawh ang khan min hringtu ka pa in min boralsan tawh a, kei chauh hi fa min nei hman bawk. A chhan chu, ka pa kha pa hrisel lo leh thawkrim lutuk anih vang ania. Tin, keini chhungkua hian khang hunlai ata tawh khan leilet zau ṭha tak neiin huan zau em em te pawh kan nei bawk.  Tun thleng hian chung zawng zawng chu kan la nei vek a. Chung chu kan ei hmuhna ber ani nghe nghe. Ka pa khan a ṭhat vanglai in nasa leh rim tak in hna a thawk ṭhin a, chutiang bawk in ka nu pawn. Kei, an fa neihchhun hi rethei tak a ka awm kha an duhlo bur ani mai e. Mahse, hun a rei a, ka pa chu a hriselna pan tual tual in a chhiava ta hlemai a, hna rum a thawk hleithei ta meuh lo. Chutihlai a kan bul a awm ve ṭhin, ka pa ten hnathawk tur a an chhawr ni bawk kan hlawhfa pa khan ka nu nen hna engkim chu enkawl chho in hlawhfa dangte pawh an rawih belh zel. Mahse, Pu Rochansanga tih chauhlo kha chu kan bulah an khawsa zui lem lo. Tin, ani hi pathlawi fa pakhat nei tawh  ani nghe nghe. Khatia ka pa damlo khan zual lam pan zel in, ka kum 15 na piancham thlen ni ah chiah min boralsan ta ani. Ka tuar thiamlo teh asin. Mahse, ka pa boral aṭanga kum 1 a liam leh hnu in ka rinloh tak hian ka nu leh kan hlawhfa chhawr, Pu Rochansanga te chuan inneih an tum thu min hrilh ta mai a. Kei chu min ṭhawng na takzet a, an inneih aṭanga kum chanve chhung kha chu pawn pawh ka chhuak ṭha ngamlo. Mahse, school naupang ka nih vang erawh kha chuan inchhungah a tawm ngut ngut theih bik silo a, a hrehawmin a zahthlak duh ṭhin asin aw.

Tichuan le, ka pa sul lo sut kuak tawh chu ka pa thar chuan a rawn chen chho ve ta a. Ka nu kha a hah phah ṭhin teh asin. Ka nu zawk kha a thawk ṭauh ṭauh a, ka pahrawn erawh chuan in lamah a hun tam zawk hi a hmang ta ani ber. A tlangnel chho tual tual a, engkim chu a ta ang vek a a neih chinah phei kha chuan a fanu nula senior hial pawh a rawn hruai lut tel ta anih kha. Anî, a fanu lah kha nula senior phanchang tawh tih takah zahpah a neilo in a kum khan a chaldelh ve hrim hrim a, sawi zah pawh hi anei tawhlo. A hming in sumdawnna chhete a khawih ve a, a thluak a hmang nasa in a che fair lo thei phian lehnghal. Kei chuan kalo hriat ruk pui vek ṭhin bawk si a, ka ngei thei lutuk. Tin, kohhran leh khawtlang ah a inhmang phian bawk a, mi hriat pawh a hlawh chho hrep. Ka hmuh dan ber ah chuan senior tawh vang cbauh a kohhran leh khawtlang a active ṭhin hi niin ka hria. A nunah khan Pathian thiltih a lang ngailo a, bum hlum tur zawng reng reng leh a ṭânghma hai chauh in a hmanhlel ṭhin ani.

Ani chungchang hi chu dahṭha ta ila, ka pahrawn mawlh khan kei chu min hmu mawh chho in, ka nu nen fa an han neih tak chin ah phei kha chuan an bulah chuan khawsa ve tawhlo ila min ti ru ṭhin hle. Khatiang rilru a rawn put tak aṭang kha chuan thil ho te te ah kut min thlak a,  zuruih a hrat sawt hle bawk. A ruih apiang hian ka nu nen  kut min thlak a tum ṭhin a, kan nufa khan mi inah kan riak chhuak fo bawk. Chutiang tehnuaih chu kan chhungkua kan lo nih chhoh tak avang leh a sumdawnna in hma a sawn tak bawk avangin kan nula senior-i pawh chuan min chhuahsan a, amah in a awm hrang ta anih kha. Ka tan chuan thawk khat a veng hawk, a chhan chu an pafa khan an ṭang dun tlat a, ka pa in kut min thlak lai te pawhin min lo chhan chu sawiloh, kilkhat aṭang hian a pa chu alo fuihpawrh zawk ṭhin nia.

A thawventhlak huai ka han ti tak na in ka pa khan min vuak chu a sim thei reng reng silo a, ka nu mangang lutuk tihngaihna hre tawhlo khan Aizawl lamah min dah dan a zawng ta ringawt mai ani. Vanneihthlak takin hetihlai vek hian college kal thei tur kalo ni ve tawh a, kan khuaah erawh college ala din ve miau loh avang leh kan VC fel taktak ten college a din theihnan a hma an lak mek chauh avangin nghah rei kha ala ṭul dawn tho si a tiin Aizawl lamah kan chhuk thla ve ta rawih mai ani. Mahse, ka damlai aṭanga an beih tawh kha tun thleng hian kan khuaah college chu ala ding ta chuang lo a. Hei, kum 3 lai chu a vei leh tawh hi. Aizawl a ka awm hnu pawh hian ka college senso engkim kha ka inhlawh chawp na aṭang a in tum vek ka niin, a khat tawk hian ka nu chuan tlem a zawng min sihchuah ve ṭhin bawk. Mahse hun rei erawh ani lo thung. Ka pahrawn khan a hria ang tih a hlauh em avangin a pawisa min thawn ṭhin chu tih tawp sak in keimah ka in enkawl ve theih thu ka hrilh ta ringawt mai ani. Hetihlai hian ka nau te erwh ka pa chuan regular takin an mamawh leina tur pawisa chu a rawn thawn ṭhin thung a.  A rilru nat thlak duh thei takzet.

A thusawi lai chu lo pawt chat in kei chuan

“Chutia i pa pawisa rawn thawn ṭhin chu i kut ah a lut ve reng em? Nge i kawlsak ṭhin hial zawk” kalo ti zauh. Hetah hian a hmel chu ka la en leh miahlo a, ka en ngamlo ani zawk mah.

“Aw, keiman ka kawl ṭhat sak vek a, chengkhat pawh hi ka hman hek sak ngailo. Pawisa tamtham kawl tur khan naupang mai anni a, an tihbo kha ka hlau ani ber. Tin, chung chu ka pa pawh khan pawi a tih ka ring cbuang lo a, mahse maw, alo nilo nasa. Chawlh hmang a khua kan han chho chu, dawt hlir a min lo puh in ka nau te pawisa zawng zawng pawh ka hman sak thu leh keimah ngei pawh sum tuak nan a ka inzawrh ṭhin thu chu min lo hrilh ta mai a. Chutiang dawt muhlum lutuk chu ka nau te tu emaw zawk zawk in an hrilh anih ka ring mai. Inzuar ṭhin anga min han chhuah tawp mai pawh chu khatihlai khan class ban rual in dawr ah ka inhlawh a, zanrei taktak a ka haw chauh ṭhin vang ani pakhat. Chung dawt thu vel vang chuan ka pahrawn bawk khan min vaw leh ta hrep mai a, khatihlai a ka zah ṭhin zia kha aw. College kal rual, nula ve uaih tawh ka ni si a, ka zak thei takzet.

Hetihlai vek hian Huan lo ram velah chuan hamṭhatna neuh neuh a sumfai ang zawng te pawh a an lo dawn ve avang khan ka pa bawk chu a hmai a uang leh ta hle a. En teh Hriatpui, mihring chapona lo lan chhuah hma zia hi ka ti ta ani. Khatiang hamṭhatna tam thamlo leh dinchhuahpui tham em pawh ni lo khan pa ber rilru chu hruai kual leh in, khawtlang ah pawh a thei ber leh nei ber len hian a leng zui vah vah mai nia. Diktak chuan kan khuaah hian leilet leh huan ram zau ṭha taktak nei an tam a, hamṭhatna chu an dawng ve vek. Mahse, ka pa khawsak anga khawsak ta kha chu sawitur ka hre hauhlo thung. Ni e, a awm viau mai. A thawh hah leh a sulsut kuak hmang a chung te chu nei thei kha ani miau lova. Ani chuan a rahchhuah chiah chang in, ka nu erawh chuan hah chiah a chang thung anih ber hi” tiin a thusawi chu a han tawp lailawk leh a. A mittui alo luang ngiah ngiah bawk tih ka hmuh chuan ka khawngaih reuh hle.

Ka aw han then deuh kharh pah hian

“Anih leh Chhante, i hun tawp thlen dan chu min han hrilh tawh ta che” tiin amah chu ka melh leh zuk.

“Krismas chawlh hmang tur a kan haw ṭum hian ania engkim a tawp tak chu. Kan haw aṭanga chawlhkar khat pawh a ral lo ang tihtur ah ka pa khan huan vel hi i hmu khat em mai tiin huan ah chuan min hruai ta a, huan kan thlen thlak hlim chuan engtinmah thil danglam a thleng lo, fel tak leh ṭha tak hian a khawsa a, thei leh thlai rah te pawh lo in kan la inbe ṭha lutuk. Mahse, chawhnu her aṭang kgan a khawsak dan chu danglam chho ṭan in ka inring lo lai chu min bei thut a, min pawngsual hmasa phawt in min rekhlum zui ta ani. Ka hnuk a chat fel ni a a hriat hnuah kan huan piahlam a kham chhawrdawh lam ah chuan ka ruang chu hnukphei leh in min paih thla ta ani. A tihtur a tih zawk vek hnuah khaw lam chu hmanhmawh tak a pan  leh in ka zunram thiar tur ka chetsual thu chu thiam takin a han zualko leh a, ka ruang la chhuak tur khan khaw mipui tamtak an liam thla ve nghal bawk”  a tih lai chuan kei chu ka lo ip chawih chawih thei. Tin, mathei lovin a pahrawn chu thilsual titu anih ang in police hnen a report tur pawhin min duh ngei ka ring. Ka thei angem ka hrelo, a chhan chu heng zawng zawng min hrilh tu leh a tuartu ber hi thlarau mai ani tlat si. Mihring damlai tan thlarau khin chu a harsa dawn miah silo a. Lalpa, min ṭanpui lul teh tiin ka ṭawngṭai ru zui mawlh mawlh. Chutah, amah bawk chu rawn ṭawng chhunzawm leh in

“Hriatpui, phuba min laksak hunah chuan thil pakhat tih hmaih miahloh tur inei aw” kei chuan rang fe hian

“Eng thil nge?” Kalo ti vat a. Ani chuan thaw deuh hak pah hian

“Kha, ka pa fanu nula senior , senior lutuk vang a awmngaihna hrelo pawh khan a pa thilsual tih hi a hriatpui in a zep sak tlat a, vawitam tihṭhaih in han inlar khum ve bawk mahila ala inpuang duh tlat lo. Khawngaihin ani kha lo theihnghilh miah suh”  a rawn ti leh sap. Kei erawh kalo thaw zui hak thung a, ni e, ka hma a thil awm te hian min ti chau in ka huphurh takzet bawk ani.. tichuan, amah bawk chu rawn ṭawng chhuak leh in

“Hriatpui, tunah chuan ka kalsan tawh ang che. Tin, hma chu min laksak thei anih ngat chuan i damchhung zawngin i hrehawm ka ring tawhlo. Mahse, muangchang suh aw. A chhan chu tunah hian ka nu a damlo nasa hle a, a bulpui ber pawh ka pahrawn vanga a hrehawm tawrh mek te anni. Ka nu hi ka hmangaih a, a hrehawm tuar hmel ka hmu thei tawhlo bawk. Chuan, ka ngai ngawt ang che” tiin ka kut chu a rawn vuan a, a kut vawt thlar avang erawh chuan kalo phu uih thung. Mahse, pangngai zui leh vat in he hmeichhia, ka bul a ding mek hi karlo ah a hmel hmuh tur a awm zui tawh dawn silo a, reilote atan chauh anilo, chatuan chatuan ani tawh ang. Kha leh chen a kiang a hun kalo hman tawh te kha ka han ngaihtuah kir a, ka ngai dawn hle in ka hria. Tin, ka phallo takmeuh bawk. Mihring damlai ni a kalo hriat ve chhung zawng pawh khan nupui atan hial ka iai lo anih kha. Chutiang khawp chuan ka lo vei in kalo duh ve tawh tih pawh ka inhria a, ka kal tir thei dawn emni? Engvangin nge ka hmangaih tawn ve chhun hi chhuhsak ka nih leh mai le. A fair lo ka va ti em. A kut vawt thler mai chu chelh nghet sauh in, ka mittui a rawn far ta fap mai a, a kut chungah tak lehnghal. Chutah, rang zet a a hmel chu han en leh in ka insum thei tawh ngang lo, a hmui dang lap mai a fawh ka han tum chu ani erawh zawimuang hian alo ral riai riai niin. A kut ka chelh reng pawh chu rang tak a en leh thuai in chu pawh a kut kaltlang chuan keima kutphah zawk ka hmu thei lehzel. Ka va han mangang tak em. A ni chuan a tawp nan ti niawm takin nui sâng mai hian 

NANGMAH EMNI!?(6 LAST)

“Hriatpui, muangchang suh. Ka hmangaih che” a rawn ti thâm ta riai riai a, ani chu a thamral zo ta. Hmuh zui tur a awm tawhlo. Kei chu ka ruak nghal huai nimai hian ka inhria a, ṭah bawrh bawrh chu chak hle mahila chutiang ti hman ka nilo tih hria in pawnah ka chhuak vut a, khua pawh alo thim lek lek tawh mai.

 Tichuan, rang tak bawkin reception counter lam chu ka pan thla leh ta hlawk hlawk. Counter nghak tu nula bulah chuan thaw hlawp hlawp hian police station hnai ber call tur leh rang taka Damdawi veng a Pu Rochansanga te in pan nghal tur a hrilh turin ka ti zui nghut. A hmelah khan mak tihna nasa tak rawn lang chhuak mahse, ka thutak zia a hria ani ngei ang, min hnial buailo hian Police chu a call ta nghal a, tichuan keipawh motor la chhuak in Chhanhimi te veng lam pan tur chuan ka in khalh chhuak ve ta ani.

An veng ka thlen chuan an in awmna tak ka hriat miau loh avangin pa ber hming khan ka han zawng chawp leh rih a, karlovah ka va hmu ta mai. Hrilh lawk tawh angin an police te pawh an rawn che chhuak rang a, tichuan inchhung ah lut in Chhanhimi thlarau ka hmuh dan leh a thusawi engkim te kha sawichhuak vek in Pu Rochansanga chu kan phih awk ta. Hetah hian a tir lamah chuan police te meuh pawh khan ka thusawi chu an awihlo hle a, mahse thudik anih zia chu natna khum a mu mek, Chhanhimi nu khan a rawn tuihnih ve tak avangin dikna chuan ro a rel thei ta hram ani. Tin, pa ber pawh chu a ṭang rei ngamlo hle a, a thiltih hriatpui vek tu a fanu nula senior chen chuan sawi lut in ani pawh a chenna aṭang hruaichhuah niin station lam an pan pui ta ani.

Engkim chu ka rinai a hmaa chinfel anih tak avangin ka lawm hle a, Chhanhimi nu nen pawh lawmthu kan inhrilh tawn mawlh mawlh hnuah thlamuang leh engthawl  tak hian lodge lam chu ka pan leh ta chauh ani.

Ka mu tui lai chu tih harh a awm in ka han men nak chuan ka mutna bul maiah Chhanhimi bawk kha alo ṭhu ve reng. Kei chu hmel hlim deuh hian min lo nuih sen sen a.

“Ka lawm e aw Hriatpui, tunah chuan thlamuang takin ka chatuan hmun ka pan thei dawn ta. Nangpawh tui takin muhil leh tawh rawh le, ka hmangaih che tih kha lo hrereng bawk la” tiin kaa mit pahnih chu a rawn hup zui a. A thim ta vek. Ka hmangaih thu tal sawi ve tum a ka an zuau zuau laiin ka nu aw ka hre ta vuai vuai nia! Tehdaih chuan.

“Mama, mama, engtinnge j awm?” Chu aw chu hla tak aṭanga rawn ri chhuak ang hian ka hre viai viai a. Mu reng e ti lo chuan ka lu lah chu a hai em em lehnghal. Chutah, ring leh chiang zet a ka nu aw bawk in

“Mama, VANLALHRIATPUI!  Tho rawh. Em em che, hna i tlai dawn, i pawh a kal daih tawh” a rawn tih tuarh chuan ka meng kawk a, ka ṭhu chhuak hlawl bawk. 

Engmaw? Khang zawng zawng kha ka mumang lek maw ni a!? Thu awihawm loh lutuk anih chu. Mahse, ka mumang mai ani tih chu ka khum chung a ka mut danah leh ka bul lawk a ka nu ding reng avang te chuan a chiang em em lawi si. Hmanhmawh zet a khum aṭanga chhukthlak zawt zawt pah hian

“Nu, North Vanlaiphai aṭang khan engtikah nge  kalo haw a?” Ka ti zo chiah ka tukkhum a ri zui nghal fawk. 

“Mu mai mai chung khan North Vanlaiphai ah te ilo va zin bik elo!? Laktlak loh pa, chaw ei la, hna kal turin insiam nghal rawh” min ti let erh a. Amah chu mak ti zet a en let hû chung hian

“Khawnge umami te nufa ho hi an va reh ve” ka la ti let hram chu room aṭang min um chhuak nghal.

Chumi nileng chuan hnaah pawh ka rilru ka pe thei meuhlo a, khang thil zozai te kha mumang mai ni tur chuan an tak mah mah ani. Chhanhimi hmel te, khua leh hmun hrang hrang, aaa a zavai mai khan mumang ni tur chuan ka ring phallo.  Ka nu khan min tihder ani ang tih te chu ka han ring deuh thut thut hman a. Mahse, Vanlaiphai aṭanga Aizawl lam pan a ka haw let leh lai erawh chu ka hre hauh silo. Chuvang erawh chuan mumang mai annih theihna chance kha a awm in ka hre leh lawi. Mahse, ka hriat miahloh in ka khumah khan tuemaw hian min lo dah tawp pawh ani thei tho a. Ekhai! Chu em em zawng, thlarau khawvelah nilo in mihring damlai khawvel ah ani ka la awm ni.

School ka chhuahsan dawn ruai ah ruah lah chu namen lo hian a rawn baw ta nghek lehnghal a. Umm, traffic a jam nasa leh dawn anih hi tiin car ah ka ṭhu lut vat. Tichuan, school chu chhuahsan in ka inkhalh haw zui a. Awle, ka rinlawk ang chiah in Chanmari phei velah chuan motor an lo ding khawm nghuk mai. Keipawh chu zawimuang a tawlh hma hret hret zelin Hrangbana college zawn ah tak ka ding leh chat. 

Pawnlam chu ka han hawi kual vel ngial a, ka mumang lo ni ta a he college ka hmuh ngun zia te kha ngaihtuah pah a kalo hawi veng veng lai tak chuan ka motor glass rawn kik karh karh thawm chu ka hre ta. Ka phu zawk a, rang zetin thawm lo chhuahna lam ka’n en nak chuan karei!! Ka mumang a ka nula hmuh, Chhanhimi ang tak kha pawnlamah chuan alo ding reng! Chutah, min rawn nuih ver ver pah hian ka koh pawh nghak tawhlo chuan motor kawngka chu a rawn hawnga, a la rawn lut zui! Kei chuan mitkhap lo lek hian ka lo en reng a, he nula hi ka mumang a Chhanhimi kha a ang satliah lo, amah chiah chiah zawk kha ani. Chutia kalo en reng lai chuan a rawn hawi phei thut a kan in melh chiang kek kawk hle. Min la nuih var var leh ta nghal a. A ruk tak chuan ka tiril a khur ṭan tawh. Chutah, ngam leh ngam lo aw khur dar dar chung hian

“Nangmah emni!? ” ka’n ti ngawt a. Ani lah chuan mak tak maiin a lu chu alo bu zeuh.

Hei hi ka mumang kha ala ni em? Nge a in ṭan chho dawn chauh zawk. Zing ah khan ka nu khan min kaitho taktak em? A rukin ka han in sik chhin ta vâwt a, alo na hrep mai. Anih chuan hei ka mumang ni tawhlo in a tak ram ngei ani ta. Chutah le,, ka mumang a kalo hriat fo tawh hmeichhe aw no hnap mai chuan

“College veng, PUC bulah kan awm a” a rawn ti!

Leave a Reply