You are currently viewing PHIR UNAU!!

PHIR UNAU!!

Spread the love

Vanlalpeki Fanai

********************************

 ‘’ Thlah rawh! Khawi, min pe rawh ka ta a nih hi ‘’

‘’ Keima ta zawk a nih hi, ka ta aw ‘’ tia au tuarh tuarh chung hian hmeichhe naupang pahnih inang takte chuan nautelem chhe zet pakhat inchuh chuan an lo inpawt tawn ngat ngat mai a, chungnung zawk nih chu an tum nghet dun hle.

Aw le, hemite unau hi phir niin, an hmel a țhaa, an duhawmin chhawnchhaih pawh an hlawh thin viau. Tunah hian an kum 11 na hmang ve mekin, Ramthansangi hi a upa zawk a ni a, Lalramsangi erawh hi chu minute 2 in a piang tlai zawk thung a, mahse, a unaunu ai hian a taksa erawh chu a lian zawk hlauh thung. Tin, a harhvang em em a, țawng duh tak a ni bawk. 

‘’ Ava han mak e aw, thil ho mai mai an lo inchuh leh ta e. Ramthansang, I nau kha pe rawh. In mak em em lutuk em mai’’ an nu Rosangkimi chuan rawn tih hlawk hlawk pah hian a fate pahnih inpawt buai mek pawh chu a rawn pawt hrang ta sawk sawk mai. Anni unau erawh chu nasa zet hian an rak chhunzawm ta tuarh tuarh mai thung.

Kum 35 mi niin tunah hian Rosangkimi hian a fate 2 hi a tulpui ve mek a, pa telloa chhungkaw din chu thil harsa tak pawh niin a hre ve thin. Chutihrualin, a pasal hlui a fate pa hnenah erawh kha chuan chhete mahin lunglennna a nei tawh ngai lo thung a, ni e, nupa an nih hunlai ata tawh khan retheihna hlir hian hringnun hi an hmang ve a,rilru leh taksa a rethei em em a, thinlung dam leh thlamuang khan zan khat takngial pawh hi a mut tak awm pawh a hre lo hial. A nia sin, pasal lerh lutuk leh ruih ching bawk neih kha chu tu hmeichhia mah hian an tlin bik in a ring lo e.  Tihian, a pasal hlui nen an inthenna pawh kum 3 lai chu lo ni ve tawh in, a fate pahnih thung hi chuan a khat tawk hian an pa chanchin chu an zawt ve leh fo thin. Chutiang hunah erawh chuan tha taka lo chhang ve mai thin in anni naupangte pawh an ngaih a tha chhunzawm ve leh thuai mai a, an sawi zui leh mai mai tawh ngai lo bawk. 

Rosangkimi hian hna nghet chelh lai a nei lem lo a, part time hlirin hna hrang pathum ngawt a thawh kawp mek a, a buaiin a chau ve thei takzet. Hetiang a nih vang tak hian a hnathawh hlana a fate lo enkawl thei tu tur nula pakhat chu ruai ve in hlawh pawh a pe tam thei hauh lo thung, mahse, an ni nufa hi mi hautak an ni hran lo a, thawh tur hna an ngah lem lo bawk nen an awmpui nula pawh chu a hahdam thei thin phian. Hun engemaw chang phei chuan, in lama a khawsa tlem lutuk leh a fate a uap bet hman lo thin kutuk te hian a fate nungchang pawh chu a hriat tam loh phah a, a control zo meuh lo nia inhriat phah in a inthiam lo ve fo thin bawk. Mahse, eng nge tihtheih a neih chuan, a fate an ni a, ani hian an eitur leh mamawh engkim a thawhchhuah loh chuan sum leh pai a vurtu midang an nei lo tih a  hrechiang ve tlat. Engpawhnise, nu ber a nihna ang tal pawh hian a fate tan chuan a thawk  țauh țauh phawt mai tur a ni ang chu. Zing dar 4 velah thochhuak thin in a hna hmasa ber atan a kal phawt a, chhun dar 12 velah haw leh in, chawlh hahdamna hun pawh nei lo hian mi hausa ho inchhung tifai tur chuan chhun dar 1 atanga tlai dar 5 thleng a thawk leh a, zan dar 6 atang zing lam dar 1 thleng rawk hotel lamah room service ang in a thawk leh thin. Heng atang ringawt pawh hian a taksa rim dan tur leh chauh thin dan tur chu kan hriatpui thei riai ruai awm e. ‘Nu’ dinhmun hi a namai lo a, fate tan ngawt pawh theihtawp chhuaha eng thil mai pawh hi tih an inhuam tawh thin. Chu chu nu pangngai leh hmeichhe diktak chauhin an nei nghe nghe bawk. Nu hmangaihna thuk zia leh ril zia hi khawvel țawng chi hrang tamtak te pawh hian an hrilhfiah zo ngut lo vang e. A ropui a ni, ti thlawt mai the ang.

‘’ Nu, sikulah kan zirtirtuten ka monthly fee pe ve tawh turin min ti a nia ‘’ Ramsangi zawk chuan a nu mu lai chu rawn dinchilh in a melh deuh khai khai bawk a, a nu pawh a rawn meng ve ta siar siar bawk. Hemi ni hian a khawsik  a reh hleihtheih loh avang in hnaah pawh a kal dawn lo a ni. 

‘’ Bawihte, vawiin chu tikhan lo va kal leh phawt la, inzirtirtute chuan an lo sawi leh pawhin hlawh ka la lak loh thu leh, a rei tawh dawn loh thu I sawi mai dawn nia ‘’ tih pah chuan a han khuh zui bawrh bawrh mai a. A nu biakna pawh chu chhang let tawh lo hian a inher tau sawk a, room chu a chhuahsan nghal nal nal. Rosangkimi pawhin a fanu khawsak duh dan chu hmu in hre ve nual tawh mahsela, tihngaihna vak phei chu a hre tam lo hle a, hauh a sawt lo in a bik takin, Ramsangi mawlh mai hi a mizia a danglam hle a, tunhnaiah hian a inthlak nasa lehzual hle nghe nghe. 

‘Bawihi, vawiin chu I damlo ka rawn kan ang che aw. Ei chak te I nei em?’’ a messsage dawn chu chhiarin Rosangkimi chu a nui leh var var thin a, amah rawn be tu hi tudang mah ni lo in, hun rei vaklo atanga a lo kawp ve tawh hotel lama a thawhpui ni bawk, an manager Lalthlamuana a ni a, tlangval senior, pa fel leh sar vuah mai hi a ni roh a, a innghahna tlak hmel fu. A bultanna ah chuan amah Rosangkimi zawk hian mahni insitna avangin a lo hnial khawmawi ve a, ani ang nuthlawi fa pahnih lai nei tawh te chu khawilam tlangval tha leh fel pangngai tak mah hian an hmangaih theih tak tak a ring ve lo a ni. Mahse, Thlamuana hi a beidawng duh hauh lo a, tihian tunah chuan an inkawp rem ve thei ta hram a ni ber e. A fare nen pawh hian inhmelhriattir tawh in, Ramthansangi zawk hi chuan a ngaina deuh nghal mai a, mahse le, sawi leh sawi hnu, Lalramsangi bawk hi a lo dangdai leh thin. A nu bialpa chu biak pawh lo be tha duh lo kual vel in a melh eih lo a, chu chu sawi loh, roomah a luh tauhsan hmak mai nia mawle! Mahse, hriatthiamna nen en zel in, tun hun hi an thlen theih phah kan ti mai ang chu.

A intiam ang ngeiin Rosangkimi damlo mu bet reng mai chu ava lenchilh ta reng a, a,amah Rosangkimi ngei pawh chu lo lawm ve hle in, a rawn thochhuak peih ve hial bawk. Chhun dar 12 a rawn ri a, anni pahnih pawh sittting roomah inkawm in an lo hlim dun hle. Chutihlai chuan Ramsangi zawk chu uniform nen a rawn lut chhat chhat mai a, a nu leh a thianpa te hmel a rawn hmuh rual chuan a ding nghal chawt. Rum em em a va melh ngar ngar chung hian pawnlamah tlanchhuah leh mai a han tum deuh ut ut a, mahse, a nu chuan a lo ko zui vat,

‘’ Bawihi, iva bang hma bik ve a, khawiah nge I u? ‘’ a lo ti. Chu, a nu biakna pawh chu chhang duh ta lem lo chuan inchung lamah a tlan chhohsan hmak a, anni thiandun pawh chuan ngawi reng hian an thlir zui ve vang vang ringawt.

A khum tereuhte ah chuan thinrim tih hriat tak hian a țhu thla deuh hnawk a, a thaw deuh ham ham bawk. Thinrim vanga insehruh pan pan chung chuan a kut te chu a han humruh leh vel te te a, ala mengrum em em lehnghal vei nen, a awm dan chu naupang kum 11 mi lek awm dan tur pawh niin a lang lo riau. A mak lutuk mah mah zawk a ni.

‘’ Ramsangi hi chuan min ngaina ve thei thlawt lo a nih hi tiraw. A mak ka ti, tikhawp hian  a lakah țhat chu ka chhuah ve bawk asin le aw, keimah ah hian dik lo eng nge awm ang le tih te hi ka lo ngaihtuah leh vung vung zel ‘’ tiin Thlamuana chu a phun ve sap sap a, a meng hnual deuh raih mai bawk.  Mahse, a bul lawka a thu ve a bialnu chuan a kut chu rawn vawnsak de de chung hian zawi sap in,

‘’ Ngai pawimawh lutuk duh suh aw, ani hi chu tu chungah pawh hetiang hian a khawsa vek a, nang chauh I ni lo a nia, ngaih tih thatlohna tur thil a awm reng reng lo a nia ‘’ ti ve in, an in en a, za fahran lo chuan an nui dun ta sak. Chutihlai vek chuan Ramthansangi pawh kha inchhungah a lo lut ve leh chiah a, a nu te hmel a rawn hmuh chuan ani thung chu a rawn nui ta sen sen mai. Tichuan, an bulah tlan phei nghalin anni pawh chuan an lo pawm ve chat bawk a, an be sawm nghal zung zung bawk. Mahse, Ramthani chuan thu tha lo tak mai a rawn sawi ta tlat.

‘’   Nu, vawiinah maw Ramsangi hian school a rawn kal miahlo a, a tlanbo a ni ang ‘’

Chu thu a han sawi zet chu a nu thin a sa nghal phat phat thei a, tih dan tur a ngaihtuah nghal char char bawk. Thlamuana chu va melh zawkin, ani erawh chu a lo nui var var thung a, engmah phei chu a sawipui zui ta lem lo. Boruak inmung mek te chu hrethiam ve ni awm tak hian reiloah haw zai a rel ta thuai a, nu ber pawh a ter zui nghal at mai. A bialpa a chhuak fel ta maw tih ah inchung lam pan chuan a inkapchhuak ve nghal zat a, a hnungah chuan Ramthani pawh khan a rawn zui ve nghal hnak hnak bawk. 

A fanu room kawngkhar chu hawng deuh pawp im Ramsangi pawh a rawn hawichhuak rang hle mai a, khum chungah chuan a lo la thu ngawi ve ran mai bawk.

Pen phei pawk pawkin a fanu hmaah tak chuan a va ding ta run mai a, a fanu chu a chhuk melh zui run mai. Chutah, ram deuh hmak hian,

‘’ Ramsang, min en rawh. Chiang takin ka mitah hian rawn en rawh’’ ti deuh khur khur mahse, mi luhlul leh ngawhngawl tak Ramsangi thung chu a che sawn eih lo! A nu biakna te pawh chu hria ang in a awm duh thak lo a, a nu tan zawng a tha nat thlak thin khawp ang le. 

‘’ Lalramsang, ka thusawi te kha I hria em? Min en rawh ka ti che a ni lawm ni? ‘’ a tih leh hlak pawh chuan chu hmeicche naupangluhlul leh ngeng zet mai chu a la che chuang eih lo. Chutah zet zawng, nu ber thin chuan tuar lo nghal in a fanu ban ah t ak mai chuan a han phih sak lawp ta mai a, Ramsangi meuh pawh chu a lo țe chhuak ve ta țhat. Phih tho lawp chung hian  a fanu hmaah chuan a thu tung zui zat a. Tichuan, chiang taka a hmel chu en vang vang in, Ramsangi erawh chuan hnuailam a la melh ngar ngar thung. A chang țhial bap bap chung hian ,

‘’ Ka fanu I ni ang tih hi ka la ringhlel fo. Engvangin nge vawiinah school kallo a I tlanbo, a chhan sawi rawh. A chhan diktak sawi ang che engvang nge? Eng aiah nge I u ang hian tha taka I nun ve mai thin loh le’’ amah sawi pah nawk nawk chuan a han zawt a. Mahse, Ramsangi thung chuan chhanna pakhatmah ala pe chuang miah lo. He nau hi eng ti ang chiaha luhlul leh ngeng nge maw a nih le. Kum naupang te niin hetiang khawp hian a rilru a lian a, a luhlul in a sakhat tawh hle a nih si chuan a nu tan hian enkawl a la hahthlak chho tual tual a ngem? A nu hian mi pangngai hmeichhe awmnem leh laktlak ni tur hian ala siamthat chhoh theih meuh a rinawm em? Eng anga enkawl tur nge ni ang tih pawh hi ngaihtuah tham tak a ni

Channa a pek duh tak reng reng si loh ah chuan nu ber insumthei tawh lo chuan a hmai chu a bensak ta sawk mai a, an hnunga lo ding ve reng Ramthani zawk pawh kha alo phu ve uih mai. Chutah, Ramsangi insum zo tawh lo chuan  țap insut faih faih chung leh vin zet hian,

‘’ Ka nu pawh I ni lo! Ramhuai I nih kha! Ka hua che!’’ tih pah hian a nu chu a rawn melh rawm rawm a, a rak zui ta chiam chiam lehghal. Chuveleh, a fanu tawngkam rapthlak zet avang chuan Rosangkimi pawh a ter zui leh at. A fanu taksa chu phih phar deuh lawpin, na zet hian khumah a theh mu ta hnawk mai a, a melh zui leh ngawt ngawt. Sehchilh rap rap pah hian,

‘’ Hetah hian awm reng la, rawn chhuak hlek suh ang che ‘’ ti nawk nawkin a chhuahsan zui a, Ramsangi pawh chu a insut nghal hliam hliam bawk. Khatiang tawngkam bawlhhlawh kha faten u te chungah an cheh tur a ni ngai emni? A khawsak dan khirhkhanzet pawh kha nu te chunga awm dan mawi  a ni reng reng em? Engkim a ngaihtuah kual a a rilru a hah in a na takzet. Țah hawm hawm mai a duh a, mahse, chu chu chak lohna lantir dan chikhat a ni tih pawh a hre ve kar mai bawk nen, a țhulh leh hmak. Hetiang reng an nih dawn chuan a pa bulah a fate hi dah zawk ta se tih te chu a han ngaihtuah lailawk leh rih a, ni lo , khatiang pa nihna pawh inhre lo taka lerh kual thin mipa hnenah khan a fanu te hi a dah thei lullo ang. A hmangaih a fate hi a hnen ata tuman an la hrang bawk hek lo vang.

Hun ral leh hretin, Sangkimi pawh in dam lam a pan ve leh tawh a, a helh em em leh, Ramsangi school hial tlanbo nachhan pakhat, an thla tin fee pawh a pe tlak ve leh thei ta. A thawl huai ta mai. Tunah chuan a fate nen an inkar chu tha leh deuh tawh mahse, Ramsangi zawk bawk hi buaithlak chang a la tam hle a, hei hi chu a kum te rawn tam zel in ziaawm lam a la pan ve thei mai turah a ngai ta ngawt.

Ni khat chu an thenawm putar, Pu Tharnghaka chu an inah a rawn chuangkai ve the hlawl mai a, ani hi pa taptawm tak mai niin, khawiahmah a chhuak zen zen tawh ngai lo a, tin, amah hi sipai pension tawh  niin a fate pawh an puitling vek tawh a, a fate zingah hian engineer hlawhtling leh doctor hna chelh mek te pawh an awm nuk a, mahse, an nu leh pa te  bulah hian a tu a te mah chu an khawsa zui ta lem lo thung. Sangkimi te thenawm chiah ah hian an nupa rekin an khawsa ve a, an mamawh tinreng chu an fate zarah nei ve zel in an awm nuam phian a, pawnlamah pawh an hmel hmuh tur hi a vang thin hle. Tin, naupang hi an ngaina in an lawm em em a, an duat bawk a, engemaw chang chuan Ramsangi te unau pawh hi an in lamah an lo awm leh lawp lawp thin bawk. Chuvang pakhat chuan anni unau pawh hian an ngaina ta phian a, an nu thu hmu lo te pawh hian an va leng lut ve fo thin.

‘’ A pu, lo leng rawh, hetah hian lo thu rawh ‘’ 

Ramthansangi zawk khan a pu chu lo kai vat in, thutna turte a lo kawhhmuh zung zung bawk. Chutihlaiin, Ramsangi zawk erawh a lo țhu ngawi reng thung a, a tawngchhuak ve eih lo nia. 

Pu Thara pawhin phur tak hian amah kaitu hmeichhe naupang chu a zui ve zel a, a nui leh huk huk thin. A  thut fel hnu ah, a kuta a khai reng polythene dum chu a han hawng leh rak rak phawt a,

‘’ Hei le, thil tha deuh ka lo hawnsak che u nia, vawiin chu ka va bazar ve e ka tia ‘’ tih surh surh pah hian sarang chhung atang chuan barbie nalh leh manto hmel tak pahnih hi  a rawn phawrh ta mai a, Thansangi leh anmahni awmpuitu nula Remremi te chu phur tih hriat tak hian an lo rak nghal chul a, chutihlai vekin Ramsangi thung kha chu a lo la hawi kual ralh ralh thung. Hetihlai hian nu ber erawh kha chu hnaah a kal daih a, a awm ve lo a ni.

‘’ A pu, ka lawm e. Hei, Sangi, I ta ve tur aw ‘’ ti deuh chul chung hian Ramthani chu ala phur hle a, a phusa angreng hle bawk. Chu chu a hmuh in Pu Thara pawh a lawm ve hle a, a nui deuh kur kur reng mai. A thilpek turte a pek zawh a, thingpui hang te a in zawh leh hnu chuan an in lamah a phei zui leh mai a, mite tana thiltha tih hi, te tham viau ang in lang mahse, nuam a tiin, a inchhir ngai loA, a tu leh fa a enkawl phak loh a awm te chunga a tih theih ve dan ah ngaiin hetiang hian naupang dangte lakah hlimna a thlensak ta mai thin zawk a ni. Hetihlai hian a nupui PI Rami pawh chu bang chuang hauh lo mahse, ani erawh chhungpuinu te a ni a, a chhuak ve zen zen thei thei lo thung. Tin, an  nupa hi taksa lamah pawh chhuan tur nei vak tawh lo, tar chhia kan tih ang chi kha an ni ve tan tawh bawk a, an khawngaihthlak zawk hle. Engpawhnise, nupa fel leh tha tak zawng an ni e, tiin I tlip phawt mai the ang.

‘’ Remrem, zanin chu lo riak mai ta che. Hei, ka thianpa nen zanriah ei tura chhuah kan lo rel a, ka haw chin tur ka hre thei lo tlat mai ‘’ tiin Sangkimi chuan an nula Remremi chu hrilh in, an lo indinchilh ran bawk a, chuta Remremi’n chhanna pek hma chuan Ramthansangi zawk kha chokaah a rawn tlan lut nawlh mai a, a nu chu phur gmel fe a rawn en chung hian,

‘’ Nu, khawiah nge I kal dawn a? Min hruai ve a ngem? ‘’ rawn ti nghal thar thar in, a nu pawh chu a lo khi ve sak ringawt. 

‘’ Hruai dawn lo e. A lehpekah in unau hian ka hruai ve tawh ang che u aw. Zanah fel deuh in lo awm ula, au Remremi tgu lo awih bawk ula, ka lo haw har lo ang ‘’ tih pah hian a fanu chal chu a fawhsak ta zeuh a. Chutihlaiin, Ramsangi thung kha chu inchungah ngawi reng hian a lo chho leh nal nal tawh a, a nu pawh chuan thaw halh chung hian a awm dan buaithlak zet mai te chu a en zui ve ta vang vang ringawt. Reiloteah, Thlamuana pawh rawn thleng be nghal in anni pahnih chu an an chaw eina tur hmun Hotel lam pan chuan an inzuichhak ta nghal a ni.

Khua a thim chhalh tawh a, Ramthasangi te unau pawhin zanriah te ei zo fel in, an roomah an tawmdun leh reng tawh. Anmahni awmpuitu Remremi thung kha chu inhnuai lamah hnathawk in a la phe buai vat vat viau. 

Chhuatlaia thu reng phir unau te chuan an lehkhabu chu chhuatah pharh diai hian an dah a, lem an ziak melh melh bawk. Ham bai bai paha Ramthani zawkin a nau lemziah a va en nak chuan a meng phar zui ta awn awn mai.

‘’ Sangi, eng nge kha kha ? Tu lem nge I ziah ‘’ ti sar sar in Ramsangi  chu a rawn hawichhuak zuk a, ngeiawm deuh hian a  țhen ta sak. 

‘’ Putar pa kha a thi dawn alawm! ‘’ ti sup in a ziah chhunzawm leh mawlh mawlh mai a, Ramthani thung chu a unaunu thusawi vang  chuan a lo dang sawp sawp thei. Ni e, hetah hian Ramsangi hian thil lem pangngai a ziak hauh lo mai a, a lehkhapuan ah chuan mipa lem hi ziakin  rawng sen hmang hian a chei rang leh nuan bawk a, chu milem pum zawnah te, hrawk zawnah te chuan chemte lem thisen kai niawm tak hi an bur fer fur bawk a nih chu! Rapthlak hian.

‘’ Lo kal rawh. Min rawn zui rawh ‘’ ti khar khar in , Ramthansangi zawk chu hlauh vang hian a lo khur titih der tawh a, a unaunu khawsak dan mawlh mai chuan a ti awm nuam thei tawh lo a ni ber. 

‘’ Khawiah nge kan kal dawn ‘’ tiin a aw te pawh chu a khur chhe lek lek tawh hial a, mahse, mi rilru dawih leh no chi tih takah, a laizawnnu chu a zui lo ngam tehchai bawk si lo. Tiril khur der der chuan an inzuichhuak ta hram a ni. Inhnuaiah chhuk in, an U Remremi hnenah chuan thenawmte Ina an kal lawk tur thu chu an sawi deuh zung zung a, Remremi pawh chuan ngaihthat lohna nei lem lo hian a lo phalsak ve mai. 

Thenawm pitar leh putar  Pu Thara te inah chuan chuangkai zuiin, an ni nupa chuan cool tak hian TV an lo thlir mek a, light te pawh chu an chhi dul angreng hle. Chutianga an naupang duat em em mai te hmel an han hmuh takah chuan lo phul deuh hlutin, tv te pawh chu enpui ve nghal tur chuan an lo sawm thuai thuai bawk a. Anni unau pawh an thu tha ve nghal thuai. Tichuan, Rei pawh an la awm hman lo ang  tihtur ah hian Ramsangi zawk chu a thochhuak leh nalh a, bathroom a kal tur thu sawiin a inher nghal vut bawk. Hetihlai hian a tu te mah chuan ngaihthat lohna chang an la hre lo a, rinhlelh tur pakhatmah pawh awm in an hre bawk hek lo. NGawi reng in an thu a, tv chu an en deuh tlawk tlawk ringawt mai a ni. Nu ber Rami thung chu taksa chak tawh lo a nihna laiah a thu muthlu lawp lawp reng mai a, mahse, chu erawh an ngai pawimawh hran lem lo thung. Chutia tui ti taka t.v lam hawia an lo thlir thap lai chuan thawm na vak lo hi hria in Ramthani chu a pi leh pu te thutna lam hawi chuan a inher deuh ta nghat a, khai aw! A laizawnnu ngei mai chu a Pu Thara hnungah chuan dingin chemte hi a lo kengbawk tih a va hmu ta mai a! Chu mai a la ni lo, ngawi renga thu putar chak tawh lo tak hrawk hrui chhat chuan thisen nen a lo ding ngawi reng a nih chu mawle! Thawm hria in  nu zawk pawh kha a lo harh ve vat a, chutia an inleng naupangin a pasal hrawk a zai ta mai tih a hriat chuan a awrawl neih zawng zawng chuan a han au ve bawk a, a ring tawk zo mawlh si lo. A theihpatawpa thawhchhuah ve țaih țaih pah chuan tlanchhiat mai a han tum a, mahse, Ramsangi bawk khan lo hmakhalh leh in pitari chu  hlauhlawp hian chhuatah a tlu ta. Chuveleh, Ramsangi bawk chuan a chemte ken hmang ngei mai chuan a pi, hmangaiha amah duat em em tu hnungzangah chuan a zu vit ta thawih mai a, piatari erawh chu ala tlawm duh bik miah lo. Ramsangi chu a theihtawpa ban ve hram hram chung hian,

‘’ Nang, naupang ve mai hi. I va rapthlak em em ve ‘’ ti hlak hlak chung chuan chhuatah pawtthlu tawp a, mahse, han khawih zui viau turin hliam a lo nei tawh nen, tar chak lo ni tawh bawk si nen chuan engtinmah a khawih na chhunzawm thei lo thung. Bawk vakin  kawngka lam chu  a pan chhunzawm zel zawk. Hetah hian Ramsangi pawh kha rang taka inperh tho leh thuaiin, a pi hnungah chuan a zui ve zel a, khawih nawn leh mai tawh lo in a ngaichang a ni ber e. A mi beihte hi kum upa tawh tak, taksaah pawh chak lo leh mahni duh dan dana che zung zung thei tawh lo an ni tih hi a hrechiang ve em a, a che hmanhmawh duh bik hauh lo. A chet duh dan hi mi nunrawng diktak che zia ka ti lo thei lo a ni. Chutihlaiin, Ramthani zawk kha chu a thil hmuh leh hriat te chuan an țhawn bawk em avangin a che chhuak hleithei tawh lo a, a thutna ngaiah chuan thu in, a unaunu chet dan  chu khur zawih zawih leh lungphu su dup dup hian a lo thlir ve reng ringawt . A hlau takzet zet a ni. A unaunu in anmhani duat em em thin tu kawngka bula mu hlawm reng tawh, an pi hnungzang leh taksa hmun hrang hrang  a vih sawk sawk lai te pawh chuan ani chu khawi dang mmah hawi thei lo lek hian a lo thu thlan ve dup tawh a, a thil hmuh leh hriat zozaite hian an ti a vek niin a hria a, awm dan tur ber pawh a hre tawh lo hial. Tu emaw chuan a kutah rawn kai thutin, a phih tho ta dawrh mai a, tudang a lo ni lo, a unaun ngei kha a ni.

‘’ Hmanhmawh rawh. Kan tlan haw vat a ngai ‘’ tiin pawnlamah chuan an inkaichhuak ta dawr dawr mai a, chutihlai te pawh chuan Ramthani chuan mu leh mal em em a nei tawh lo, a laizawnnu tih ang ang chuan a awm mawl ve tawp tawh mai a ni e. Anmahni inchhungah tlanlut rawk rawk in, an nu te leng pawh kha an lo thleng fel ve chiah hi a lo ni a, chutianga a fate hlau thlabara rawn tlan lut ta chu makti zet hian an lo thlir thap.

‘’ Khawiah nge in kal daih a? Tinge khatiang khan In awm tak vak mai.Eng nge thleng sawi the u ‘’ nu ber chuan lo ti nghal chul in, chutah, Thlamuana pawh kha a ran inrawlh ve ta vat a.

‘’ Kha, hmeichhiate u, thisen te inkai tlata ka hriat chu le, eng thil nge thleng a?’’ a rawn tih leh takah phei chuan Sangkimi chu a mangang nasa a, a hawi buai nasa ta hle. A fate thuamhnaw leh taksa vel chu enchiang nghal thut thut in a mitui a tling piau tawh bawk. A mangangin a hrilhhai takzet tawh a ni.

‘’ Ih Ih, nu, thenawmte inah len kan tum a, mahse, anni chu, ihmaw, an lo thi daih!’’ Ramsangi zawk chuan hlauhthawn hmel fe hian a rawn sawichhuak ta hram a, puitling pathum te chu an lo phu rual dual. An in melh nghal hrek hrek bawk. Chuveleh, eng thilmah pawh sawi chhunzawm tawh lo hian Tlamuana chu a tlanchhuak nghal vat a, Remi leh Sangkimi te pawh chuan an umzui ve nghal bawk. 

Thenawmte In an va thlen nak chuan le, raptlak hi an va han ti tak em. Sangkimi ngat phei kha chu a thidang țhelh hial mai. Thlamuana chuan police be nghal vatin anni ho pawh karlovah an rawn thleng mai a. Hnuhma te chu enfiah leh zung zung in, an veng chhung mi te chuan thilthleng chu an hre pung chak hle ta mai bawk. Hun rei fe mai chulai hmuna an khawsak hnu chuan inrawkna a ni lo tih chu an hre thei nghal mai a, thil awmzia zau zawka hriat tumin police ho chu Sangkimi te inah chuan an lut khawm ta dial. 

‘’ Hei le Pi Sangkim, I thenawm te nupa chunga thilthleng chu heti hi a ni a, kan lo hriat dan ah chuan I fate pahnih hian thil engemaw tak chu  hriat an nei niawm tak a nih hmel a, kan lo be ve chhin dawn emni ang?’’ an han tih tak dap dap ah chuan Sangkimi pawhin hnial en ah a lo en lem lo phawt. A fate 2 chu ko thuaiin a bulah a thut that tir leh te te a, tichuan police ho nen inhmachhawn zui ran in, thu chu an zawt  țan ta a. A harh tha pangngai zawk anga lang Ramsangi kha chu a ngawi leh ta tlat mai. Ramthani thung erawh a la meng a ruai reng a, biak țawng theih mai mai hmel a la pu lo tlat. Chutia a fate ber an țawng chhuah theih tak si loh ah chuan harhchhuak thut niawm tak hian Sangkimichu a han ding deuh hluai a, police ho bulah chuan ram deuh hmak hian

‘’ Eng thil nge maw ti nia in inhriat hi le. Ka fate hi naupang kum pawh la tling em lo mai chauh an ni a, inzawhna han zawh duh dan hmangah chuan , anmahni hi in ringhlel ta mai emaw tih tur ni nghal chuan. A țul ka ti lo hlemai. Nakinah keimah ngei hian ka lo zawt ang a, thu chiang chu inhre thei turah ngai rawh u ‘’

‘’ Ni lo ve ka pi, I fate hi kan ringhlel tihna a ni hauh lo, va hmu hmasa ber tu an nih piahlamah, an ke hniak niawm tak hi inchhungah khan a ther fer fur bawk a, chuvang tak chuan thil engmaw hi chu hmuh leh hriat an neih ngei niin kan ngai tlat a tin ni. Kan hnsthawhna tura min puih pawh chu iva hreh awm em em ve aw ‘’  Inspector chuan lo ti let vat in, Sangkimi erawh chu a pawr tulh tulh thung si. 

‘’Mi hausa chhungkua ni ta ila getiang hian an fate chungah in che ve tho a ngem? An nu ka awm ve a, ka fate chu ka lo zawt fiah mai ang ka ti lo em ni? Tunah rih chuan an thil hmuh te khan ala ti hlauthawng ve em em a,  țawng pawh an țawng hleithei lo a nih hi’’ ti leh hlak hlak in a fate chu inchungah a nawr chho ta rawk rawk mai a, police ho pawh chu an lo thaw ve hak mai.

‘’ Aw le, a nih chuan, I intiam ang ngeiin I fate chu thuchiang zawhfiah lo tum la, kan rawn lang nawn leh ngei ang. I lakah hian rinna kan nghat thui khawp mai aw’’ tiin lungni lem lo zet chuan an chhuahsan ve ta hram a. Thlamuana pawh kha a lo thaw zui ve hak. Sangkimi erawh a lawm lo hle tih hriat tak hian a la ang chhunzawm bian bian thung a, Thlamuana leh Remi te chuan an en reng ringawt.

Zan a rei a, a muhil thei thlawt lo chu a inlet tawn sek ringawt. A tawp a tawpah thaw hawk chunga tho chhuakin, a fate room lamah thawm dim thei ang ber hian a pen phei ta dan dan mai a. Dimte bawka kawngka chuhawng lehin, a fate chu an lo mu reh thiap tawh. Mahse, a lut zui ta tho. Mak tak hian Ramthani zawk kha a lo la meng ve kar mai a, a nu pawh chu a tihlau hman lek lek hial. A fanu bulah chuan dim zeta țhut thlak pah hian a kuah zui ta hle hle a, a fanu erawh chuan chiang zet hian amah chu a lo melh let ve kiau thung.

‘’ Bawihte, I muhil thei lo emni?’’ 

Ramthani chuan a lu chu a lo bu deuh nghat nghat a. A țawngchhuak hauh lo thung.

‘’ A nih leh maw Bawihte, zanina thilthleng te kha  engatinge police hnenah khan engmah I hrilh duh loh a?’’ a han tih leh chuan Ramthani chu a lo ip deuh zawk ni hian a hriaa, mahse, a awm pangngai zui leh vat tho. Zawi ser sawr zet mai hian,

‘’ Engmah sawitur ka nei lo alawm. A chhan chu hmuh kha ka nei lo miau a, ih, an lo thi ringawt a’’  Sangkimi chu a lo thaw leh hak phawt. Tichuan, a fanu sama chulsak hliau hliau pah bawk chuan,

‘’ Mihring tlanchhe lai emaw, chutiang vel pawh chu engmah I hmu lo maw? ‘’ a tih leh pawhin Ramthai chu a lo bu zui nghat nghat ringawt.

‘’ A nih chuan, naktuk khawvar hunah police kan bia anga, I thil hriat dan engkim te hi hrillh vek ang che aw, a nih loh chuan, in unau hian police ho khan an man daih ang che u tih ka hlau a, I hriat ang ang kha hrilh tawp rawh aw ‘’ rawn ti leh sar sar in Ramthani pawh a lo bu zui leh nghat. Tichuan, a fanu chal chu fawhsak leh zauh in a chhuahsan ta nghal. A chhuak fel ta maw tih rual hian a muhil emaw tihtura lo mu ngawi reng Ramsangi chu rang zet hian a mutna atang a rawn dawkchhuak zawk a, a unaunu chu va bawhbet nghal thlawpin,

‘’ Thudik hi I sawichhuah vaih chuan I lu ka la ang, I hria em? Engmah I hriat loh thu leh, an lo thih daih tawh thu chiah sawi ang che ‘’ ti khar khar in a unaunu chhipsam ah chuan  a țhambehsak reng mai bawk si a, hlau lutuk tih hriat zet hian Ramthani chu a lo chik feih feih tawh mai. Tichuan, zawite bawkin eng thilmah a sawichhuah loh tur thu chu a han sawi ve hlawp hlawp a, Ramsangi pawhin a kalsan ve leh ta mai.

Chutiang chuan a tukah police nen inbiaktir niin, a unaunu vau na thu rum takte kha ala hrereng bawk a, eng thudik mah chu a sawichhuak ngam ta lo hial. Thenawmte inah chuan len tumin an kal ngei a, mahse, kawngka bul maiah khan nu zawk ruang chu thisen nena lo inchiahpiah nuai hian an va hmu nghal a, lut thuk leh hretin, țhutthlengsei chungah chuan pa zawk ruang pawh an va hmuh lehnghal thu leh, an tlanchhuah nghal thuai thu chu mawi takin a sawi lang ta hmiah hmiah a, a awihawm hle ni tur a ni, police ho pawh chu an lo bu tliar tliar mai. Mahse, hetah hian police leh thilthlen dan hretu mitam zawk te chuan mak tih deuh mai an nei tlat a, chu chu, engtinnge ruang pakhat zawk an hmuh rual khan tlanchhe mai lo a inchhungah lam chu pan zawk zel nge an nih tih hi. Anni ang rual naupang ah mai pawh ni lo, puitling thil tawn pawh ni zawk ta se, an tih ang hian an rawn ti ve ngam kher a ngem? Tiih hi zawhna pakhat a ni ve bawk. Huaisen tia koh tur nge an nih a nga, mawl tihtur zawk?

Kha thil thlen hnu atang kha chuan Sangkimi chu ngaihngam tak hian a awm hleithei ta reng reng lo a, a fate a ngaihtuah zual in a hmuhphak loha an awm fo ngai thin te pawh chu hrehawm a ti thar leh ta hle a, khatiang a thlen hnu atang kha chuan ngaihbel theih tur ting in a fanu upa zawk, Ramsangi mizia lah chu a lo inthlak ve hlawk bawk si a, a hma ang khan amah chu a zangkhaiin a hlimawm viau tawh lo a, biak a harsa sawt in thil engemaw ngaihtuah uluk deuh nei ang mai hian a melh ngai te a lo melh leh vung vung thin a, midangte chu biak hmasak nachang lah a hre fumfe tawh bawk hek lo. Um, a bula awm chu a nuam lo takzet tawh a ni ber mai e.

‘’ Hei hi ka ta zawk a nih hi. Thlah rawh zawngi! Thlah rang rawh. Hmelchhenu! ‘’ tia rak duar duar in an thil cheina rawng inchuh chuan an lo in kek ngawr ngawr a, nu ber chuan rang zet hian a va dinchilh vat a, a țhelh zui vat bawk. Chutah, sam thur bem bum chung hian Ramthani zawk chuan a nau chu a rawn kawk ta sawk sawk mai a,

‘ THI RAWH!’’ tiin chil a chhak pharh a, a tlanchhuak zui ta daih. Chu thil zet chuan an  nu Sangkimi pawh a țhawng ve hle a, a meng phar zui awn awn mai. Hetiang thil rapthlak leh tawngkam tenawm tak tak te hi a fate hian khawi atang nge an zirchhuah ang le tih chu a ngaihtuah kual ngial a, a hrechhuak zo thlawt lo. Phone a neih tir lo a, t.v nise an on mai mai ngai hek lo. School lamah lah naupang fel tia hriat lar pawl an ni ve  thin a, thil hi a hrethiam thei hlawl tawh lo a ni. A bikin, Ramthansangi zawk ngat phei hi chu hmeichhe naupang fel leh nu hnip hnep kha a ni thin si a, hetiang em em a tawngkam rapthlak phuhchhuak tur hi chuan a lo ring ngai lo hlawm hlak. Nu thinlung a na a, a rum bawk a, harsa a tiin a phur chu rit a ti sawt tak meuh. Hetiang reng reng chuan engtinnge kan damchhuah ve tak ang Lalpa, tiin bathroom bang ngheng chuan a awm a dawm vang vang a, a țap ta tlawk tlawk mai.

Pa tello nun hi a hniam in a harsa a, huphurhawm tak a ni. Chutihrual erawh chuan pa laktlak loh tak bula naupang țhanlen tir pawh chu hremhmun ang hlauh a ni dawn tho bawk si. Nun hi ava han harsa thin tehlul em ve le!

‘’ Bawihi, kei hi I pasal ni turin min duh em? Kumkhuaa I pasal tak tak ni turin min pawm ve thei a ngem?’’ tiin Thlamuana chuan zungbun a rawn phawrh ta mai a, Sangkimi phur kutuk leh țhawng bawk si chu a lo meng bial nghal kawk kawk a, a hmui hupin a mittui te chu a tling zui piau bawk. Hetihlai hian Inah chuan an pahnih chauhin an awm a, sunday a nih ang in naupangte chu an inkhawm daih thung. Zungbun chu zawimuanga phawrhchhuak in a hmangaih leh duh em em, a bialnu kut mawi takah chuan buntir tumin a lo inpuahchah mek a, mahse, chutihlai tak chuan a fate inkhawm bang chu rawn haw ve in, an nu awmdan an rawn hmuh chuan an lawm hmel loh kher. Rum em em a rawn melh ngar ngar chung leh tawng miah lo in inchungah an chhohsan ta daih nia! Anni thiandun chu bangbo zet hian an inmelhtawn ralh ralh thin a, nuam lo duh tak a ni. Marawhchu, zungbun chu inbuntir ta tho in an hmel erawh a pha deuh dui mai a, an che lai kual zo vel vek hi a ni mai e.

Zanriah ei lai te pawh kan phir unaute chu an rawn inlan duh ta hlek lo a, nu ber rilru chu a nuam tawh mawlh lo. Zanriah pawh tui ti lem lo taka bar sawk sawkin inchungah chuan a tlanchho ta vat. A fate roomah lut tlang nghal thuaiin, anni unau chuan chguatah bawk milem kha an lo ziak leh mawlh mawlh a, an bih uluk dun in an nu lo kal pawh chu hre lo ang hmak hian an awm nghe nghe. Mahse, a rei lo, Ramsangi zawk chuan a nu hmel chu va hmu thuaiin a lehkhabu pawh chu a khup ta vat a,a laizawnnu a va nghawk leh zoh bawk. Chuveleh, Ramthani pawh chuan rawn hawichhuah zuk pah hian a lehkhabu te chu a khup ve leh sawk sawk zui. Chutah, Sangkimi chuan thawk deuh halh pah hian a fate chu a han melh tawn leh te te phawt a,

‘’ Bawihi te u, vawiina in thil hmuh te avang khan ka tihpalh tih hi hrilh che u ka duh a, mahse, chutihrual erawh chuan ka hlim asin ‘’  a han tih chuan anni unau chu an lo inmelh deuh ralh.

‘’ A,,inpa kha inngai thin tih chu ka hriaa, pa tia koh tur hi in mamawh ngawih ngawih bawk. Han ngaihtuah ula, in school kalnaah te engkim tihna hmun apiangah pa neih loh chu hrehawm inla ti chho tulh tulh dawn a, eng anga chhungkaw hausa leh dinhmun sang pawh ni ila pa ber an awm miau loh chuan zahna a dawn tak tak theihloh. Tumah hian pa awmlohna chhungkua  inchhungkhur chu an zah tak tak thei ngai lo asin. Chuvang chuan maw Bawihi te u ‘’

‘’ Pa kan duh lo! Kan mamawh lo bawk ‘’

A nu thusawi pawh ngaithla zo lo chuan an lo inrawlh leh ta khauh mai. Rosangkimi pawh chu a ngawi nghal hmiah thei. A fate hmel a han en chuan, anni unau chu rum theihpatawp a rum hian an lo mengdur khai khai tawh mai a, naupang mai chu ni lo se zawng, an nu tan pawh hian hlauham thin tak tur chu niin an hriat. An nun a rawng a, an tawngkam chhakchhuah duhzawng reng a rapthlak in, hei hi naupang tha leh mi pangngai khawsak dan tur chi niin a lang mawlh lo tlat. Nu tan chuan a hahthlak ve thin khawp ang le.

‘’ Pa kan duh lo, chu ai chuan tlanbo pawh kan thlang zawk!’’ an la rawn ti lehzel!

Heng an tawngkam mak leh chhe tak tak te hi khawi atanga an thiam nge tih leh an hriattheihna tur awm chi reng reng hi Rosangkimi hian a hrethiam thei lo hulhual a, zirtir thin tu an nei nge, fuihpawrhna tha lo tak tak te an dawng thin ni ang tih chu ngaihtuah in a rilru a buai tak zet. Tichuan, thinrim leh rilru ni lo zet chuan a fate chu a thawhsan thurh a, ram hmak mai hian,

‘’ In duh emaw, duh lo emaw, nangni neih tur pawh a ni lem lo a, kha chu ka kutah dah rawh u ‘’ ti hmakin a inher a, a chhuahsan ta vang vang. 

Heng a fate khawsak dan leh tawngkam zozaite hi a bialpa hnenah chuan a sawichhuak duh ngai lo thung a, a hmuhsit zui emaw, a iai phah a hlau te emaw a ni mahna le. Ngawi reng in a tuar a, a hmachhawn a a paltlang ve thei mai turah pawh a inngai nghet tlat bawk. Tin, a fate an nihna ah pawh midang hnena an chanchin chhe lai sawi vak vak kha a duh lo a, mualphothlak a ti ve pawh a ni thei bawk ang chu.

Hetihlai vek hian Pu Thara te nupa thihna case pawh kha ala kal ve reng a, tualthattu chu chhuichhuah la ni chiah lo mahse, police ho erawh chuan hma an sawn zel thu leh, a hmawr an bawk tep theih thu an inrin dan te pawh an sawi lang ta hial a, mipui tan tak pawh chuan a thlamuanthlak ve hle ang tih chu a rin theih mai awm e. Tin, forensic mithiamte pawhin kutzia leh evidence dang awm thei thil an hmuh ho te pawh kha bihchianna nei zui ve reng in result an peih tep  thu chu an sawilang tel nghe nghe bawk. Chhuichhuakin, misual tualthattu hi han hlingchat the se.

Ni khat chu Rosangkimi hnaa a lo buai em em lai hian call a dawng ta thut mai a. Chu pawh call pawimawh hmel tak a fate zirtirtu hnen atang a lo ni leh ta nghala, buai hle mahse lak loh chi ngawt a ni tlat lo a ni. 

‘’ Hello, Miss Sangte, eng thil nge ni ta a? ‘’ tiin engmah ngaihthhat lohna pawh a nei lem chuang lo. Chutah, lehlam atang Mss Sangtei chu thlaphang leh lungawi loh hmel tak hian a rawn tawngchhuak ve nghal vat.

‘’ Pi sangkim, tunah hian hmahmawh deuhin schoolah I rawn kal thei a ngem le? Buaina kan nei tlat ‘’ ti chung hian a rawn thaw deuh hlawp hlawp bawk a, Rosangkmi chu a hamhaih ta angreng hle. Phone off sawk sawkin an pu office lamah a tlan thuai a, chanchin a hrilh hnu chuan hmanhmawh tak bawk hian a fate school lam pan turin a chhuak ta nghal a ni.

School va thlengin Principal roomah a tlanlut ve hmiah. Chutah chuan a fanu naupang zawk Lalramsangi chu principal hmaah lo ding zum zat hian ava hmu ta mai. Tin, amah rawn call tu an miss pawh kha alo awm ve reng tawh bawk a, a hmel a rawn hmuh rual chuan thawveng ta deuh huai ni hian a lang nghe nghe.

Hah thaw hlawp hlawpin,

‘’ Principal, eng chungchang nge ni ta ? Hei, ka theih anga rangin ka rawn kal nghal a, eng nge thil awmzia?’’ tih zung zung pah chuan a fanu lo ding ngawi reng mai chu a han melh thuak a, ani lah chu rum em em a meng chung leh tum bur hian hnuailam enin a lo ding zum ve reng thung. Chutah, Principal chuan chiang fek fawka amah chu rawn melh pah hian,

‘’ Miss, naupang dang chhungte kha va ko rawh le ‘’ tiin,

‘’ Eng lo a nia Pi sangkim, hei vawiin chu ka rinphak bak thil a thleng tlat mai a. He school hi kum 7 liamtaa din kha niin, a din tirh ata ka lo thawk ve ngar ngar tawh bawk a, mahse, vawiina thilthleng ang em hi chu ka la tawng chhin ngai lo. Tin, mumang lamah pawh hetiang thil hi chu hmuh ka duh heklo’’ ti hmasa te tein , Sangkimi thin chu phu nasa tawh tak hi a ni ringawt. Mahse, a chhan let hma hauh chuan tu emaw hi a rawn ang lut ta bawrh bawrh mai a, an hawirual nghal  țhap. Chutah, nu pakhat thau lampang chu rawn pen lut hlawk hlawki, principal hmaa lo ding ngawi reng Ramsangi chu rawn khawih a tum ta mai!

‘’ Nang, nang naupang sual leh tihmawh vang hian ka fanu ka chan lo chauh asin. I hria em? I ke ruh te hi vuak tliah law law a țul a nih hi’’ ti zui leh hlawk hlawkin, Sangkimi thung chuan a fanu chu a rawn kuah bet ve thuai a, midang lo awm ve te chuan chu nu chu an lo khap ve zung zung bawk. Chutah, lungni lo tih hriat zet hian Sangkimi pawh chuan

‘’ Eng thil nge ni ta chiam chiam a? Hetah a nu ka awm ve reng a, ka bulah hian I duh chu sawi mai ta che. I va timak em em ve a, nutling ve meuh si ‘’ lo ti zui ve nawk nawkin, chu nutling bawk chu a rawn tawngchhuak leh nghal zat.

‘’ Khatiang fa rapthlak lutuk I nei te kha inchhuan phah nan hmang reng reng suh. Dam ve tlak pawh a nih nek loh kha! ‘’

Chu zet chuan Rosangkimi thinlung chu a vit na ta ngei mai le. A fanu chu hnawlsawn rawk rawk pah in chu nu dinna lamah chuan a tleh phei zui ve ta mai a. mahse, an inkhawih fuh hman tep tih in Principal a rawn au țhat. Anni pahnih pawh an ding zui chat mai. Principal chuan rum zeta rawn melh rulh rulh chung hian chiang takin a entawn dun ta vung vung a, a hmel zet chu a hlauhawm thei lek lek hial mai.

‘’ Zah pawh hi inzaklo ka ti. Kei ka awm a, mi zahna chhete nah hi in nei miah nange? Tha takin thu kan sawiho ang a, puitling takin thu kan relho ang chu tihlaiin engvanga hetia khawsa mai hi nge innih a, in va ngam zawk ve le. Tunah chuan ngawi rengin chairah khan thu ula, tute mah kha lo au buai tawh suh ang che’’ ti hmak hmakin, anni pahnih pawh chu thuawih hmel fe hian an thu chhunzawm ve ta mai a, an thinrim insum nasa lutuk te chu an thaw leh ham ham thin bawk. Boruak inmung mek chu rit keih keih tak a ni e.

Principal chuan zaidam zawk hian tawngkam a rawn nei leh tan ta . An ngawi țhap. Rosangkimi chu melh pah hian,

‘’ Pi Sangkim, ka lo sawi tawh ang khan hei vawiin chu thilmak leh awihawm loh kutuk mai a thleng palh hlauh pek a, ‘palh’ chu ka ti tak na a, tihluih te pawh a ang thei zawk awm e a. um, Pi Tlangmawii fanu kum 12 mi leh I fanu te hi classroomah lo insual buaiin buaina an siam a, zirtirtute awm loh lai tak a nih angin keini ho chuan engmah mita hmuh kan va nei ve lem lo, mahse, naupangho sawi dan chuan khatia an insual buai kha pumruaah pawh te zawk na na na chuan I fanu chu a tlawm zawkah a lo  țang ta hlauh mai a, chumi thinrim kal zel chuan thil tha lo tak a thlen nghal in, hmanrua kan dahna roomah a lo va lut zui a, chutah chuan tuboh kg 4 zeta rit chu la chhuakin classah a let leh a, tichuan, Pi Tlangmawii fanu chu a tuboh ken hmang ngei chuan a dar leh a lu ah te a lo chhutsak nual niin an sawi a, mahse, vanneihthlak takin, a khawihnat zual lutuk hma khan kan va thleng ve hman a, tunah hian ani chu damdawiin lamah phurh chhoh a ni tawh nghe nghe. Heihi I fanu thiltih a ni tih I awih loh chuan evidence atan hmanraw dahna hmuna a lut lai chu camera atang hian a lo hmuhtheih hlauh mai a, hi a ni e ‘’ tih pahin a hmaa Laptop inhung reng chu Sangkimi lamah chuan a han kuaiher chhunzawm nghal a, karei leh! A fanu Ramsangi ngei mai chu hmanraw dahna rooma a lut lai leh, tuboh lian ve pangngai tak keng chunga a rawn chhuak leh lai chu lo cover in a lang chiang nasa mai si a, phatbo theih rual hi a ni awm lo hial e. Rapthlak ti zeta chek zui tlawk tlawkin, a tho thut. Chutah, bangkil lama lo ding ngawi reng a fanu hmai chu ava beng ta siah siah mai a le! Tap hlawp hlawp pah hian

‘’ Hetiang hi ka zirtir che emni? Mawh. Tu in nge hetiang hian ti rawh ti che, sawi rawh. Misual tak chu ilo nih hi mawle, ngaihdam va dil nghal rawh ‘’ ti tuarh tuarhin a fanu chu ala beng sawk sawk reng a, Miss Sangtei thung chuan  țhelh tum hian a lo buaipui zui ve char char bawk.

‘’ Ka tih a ni lo, eng thilmah ka ti lo. Chuan, ngaihdam pawh ka dil bawk hek lo vang!’’ tiin Ramsangi chu a rawn țe chhuak ve ta nghek mai. A nu pawh chu a ding khawng zui awt thei nia. Chutihrual vekin, principal kha a rawn inrawlh ve leh vat bawk.

‘’ Ngaihdam chu I dil emaw, dil lo emaw , eng hremna pawhnise I hmachhawn dawn tho tho. Ka rinai daih in I lo chaltlai daih mai ka ti nang hi. Inchhirin I tap zawih zawih tawh ang chu tihlaia khatiang thu te I rawn sawi ngam zawk ni’’ rawn ti ve hmak hmakin a hmel atang reng pawh chuan a ngaihdan chu a nih loh hmel takzet a, chutah, Pi Tlangmawii lam hawi pah chuan,

‘’ Ka Pi, eng anga hremna pek nge I duh chu sawi la, I duh dan kan zahsak bawk ang che ‘’ a tih tak ah chuan Rosangkimi chu a rawn hawi phawk nghal hra mai a, a hlauthawng hluah hluah tawh. Kutsuih meuh hian mittui tla zawih zawihin,

‘’ Pi Mawi, khawngaihin min ngaidam la, ka fanu leh kei hi I zahngaihna leh khawngaihna sang ber kha min hmuhtir lul rawh. Ka fanu hi a thiamlo nasa tih ka hriaa, keipawhin a na thei ang bera lo hrem ngei pawh ka tum bawk ang. Khawngaih takin  ‘’ a rawn tih ngawih ngawih lai chuan Pi Mawii  thung chu ngaihdan nghet siam harsa tih hmel tak hian a lo khap deuh fak fak reng a, a hmelah chuan thinrimna ang chi pawh kha hmuh tur reng a lo awm tawh lo. Chutah, zawi supin ani chuan,

‘’ umm, nu ka nihna ang in I nu nihna kha ka zahsak che a, tin, fate enkawl harsat dan leh pa tello a enkawl hahthlak zia chu ka hre ve bawk. Chuvang chuan, a tira ka lo rilruk dan, kan fanu enkawlna senso zawng zawng tum tir vek che u ka tumna hi chu dahtha in, I fanu hi he school atang hian suspend nise ka duh ta zawk a ni. A rei hun chhung erawh kha chu hotute thu thu ah dah ta zawk ila, I fanu ngei pawhin nungchang mawi leh nun dan phung pangngai zir nan te hun thawl lo nei se a tha zawk ang’’ tih pah chuan a thochhuak nghal a, principal hnenah,

‘’ Sir, a bak chu han sawi vak tur pawh ka hr ta lo, damdawiin lamah ngawt rilru a awm tawh bawk si a, ka kal phawt a nge ‘’ tiin a chhuak zui a. Rosamgkimi chu a lo thaw zui hawk thung. Suspend, pawisa chawi, a eng hremna pawh chu hmu mahse, an phutawk chiah tih a hria. Mahse, hun rei lutuk lo ni thei se a duh thung a, a chhan chu, a fanu hma hun hi chhe lo hram se a duh miau a ni. Tichuan, Principal thuchhuak ang in, Lalramsangi chu thla khat chhung school kal thei lo tura hrem niin, school leh a chhehvelah pawh hian hmuh tur awm lo tura hrem a lo ni ta. Tin, a chawlh chhung hian awm mai mai tir an tum lo hle a, lehkhazir tur țhahnem tham fe mai an pe zui bawk. A nuamsa lo ve viau ang le.

‘’ I roomah chho la inthlak nghal ang che’’ ti hluk chung hian ani chu thutkhawmna lamah a phei zui nal nal a, a fanu pawhin a thu chu zawmin ngawi reng hian a chho ve hnak hnak bawk. Țhutthlengseia thut thlak hnawk pah chuan a phone phawrh in a bialpa a call a, chanchin engkim te chu zep nei hauh lo hian a hrilh fai ve ta leng. A tap pah bawrh bawrh bawk. Ni e, tunah hian nu thinlung a kehchhiaa, a na tawpkhawk a ni. A pasal ni mai tawh tur bula an chanchin chhe lai tlem azawng va sawi chu a pawina a awm em em dawn emni? A mi rintlak ngei laka inbunruah ve kha a chak em atin ni. 

Thlamuana tihtakah, a bialnu chu a lo țawng thlamuan ve mawlh mawlh a, len harhpui atan a duh a nih phawt chuan, hun a neih reng thu a lo sawi ve luam bawk. Tichuan, zan lam hna pawh kal chhunzawm peih lo in ama thu chuan chawlh a inpe ve ta hmak a, a chau tawngkhawng ve bawk em a ni. A fanu upa zawk rawn haw pawh chuan hahdamna reng thlen lo in a chauhna tizualtu zawk ni mai te hian a hria. Thih  chak et et a, a fate vang bawkin a ngam leh thin si lo. Ani hi thi se, engkim hi an that phah vek a ngem? A teuh lo. Khawvel hi chu a kal ngai reng in an la kal dawn chauh. Ani intihhlum vang ngawt khan eng thilmah hi a danglam phah dawn lo a, tute mahin nunthar an neih hlen phah bawk hek lo vang. Chuvang chuan a hmangaihte tan hian ala dam ve hram hram a ngai a, nun hi a fight chhuah ngei pawh a țul bawk tih a hria. 

‘’ Zanin chu in unau chiahin inah fel takin lo awm leh ula, Remremi kha arawn kal thei dawn bawk si lo a, chuvang chuan fel deuha in lo awm a, in te hi inlo enkawl a ngai dawn aw. Naktuk khawvar hunah kan inhmu leh dawn a nia ‘’ tih pahin a fate chal chu a han fawhsak zeuh a, hnathawk tur bawk chuan a chhuahsan leh ta a ni. A fate hi ngaihtuah thin hle mahse, hei hi a tih kha a ngai miau a, ani hian a thawk lo a nih chuan khawi atang mah sum hi a rawn lut ngawt dawn lo a, tu mihring mahin ‘kha le’ an rawn ti ngawt dawn bawk hek lo. Chuvang chuan,a chhungkaw tan hian thi leh thau pawlha a beih takmeuh meuh a țul tih pawh a hria.

An nu a chhuak fel ta maw tih ah anni unau pawh chu thawmhnaw lum te ha ve nghal sawk sawk in an chhuak zui ve nghal zat. Eng tak chu ti leh dawn ni maw?

In pakhat kawngkhar chu kik karh karhin, reivakloah an nu bialpa ngei mai khan a rawn hawnsak ta ruau mai a. chutia a zan a zana a bialnu fate pahnih, a ina rawn kal ta mai chu mak a tiin, a hamhaih ve hlek bawk. Mahse, chu chu tilang lem lo chuan nui var var chung hian,

‘’ Ekhai! Hmeichhiate u, lo lut rawh u. Eng thil nge in duh ve tak aw?’’ lo ti luamin a nui sun sun reng a.  Ramthansangi zawk chuan hawihhawm chhuaha nui var var pah hian,

‘’ Kan inah I rawn kal lawk a ngai a, eng lo a nia, ka nu saw a damlo nasa lutuk a, nangmah rawn ko tur che hian min tir a ni ‘’ rawn tiin Thlamuana chuan a mitko a lo san ak thung a, a ngaihna ahre lo hle. 

‘’ Ehee,,in nu chu hnathawk turin a chhuak daih tawh ang chu ka lo tia’’

‘’ Aw chhuak e, kawnglakah a damlo thut a, a rawn haw leh a lawm. A phone a chiang lo bawk si a, nangmah ko tur che hian min rawn tir ringawt’’

Ramsangi zawk chuan a lo ti ve leh zat mai a. chuveleh, Thlamuana pawh chu a ngaihna hrelo tih hriat tak hian a han hawikual deuh vut vut phawt a, mahse, reilote hnuah rawn thawhchhuah thurh pah hian a car chahbi a ban leh zoh.

‘’ Ti r’u le, kal ila, chutianga min mamawh tlat si te chuan’’ tiin an inzuichhuak ta dial. Phir unau te chu inmelh de zawkin, ngeiawm tak leh awmze nei fe mai hian an nui dun ta vur vur mai a.

Carah lutin, Ramsangi zawk chu seat hnunglamah a lut deuh tharh. Ramthani erawh chu Thlamuana seat bulah a thu lut ve thung. Tlan zar zar pah te chuan an titi vei luam a, Thlamuana ber chu a titi tui berah țangin a nui leh huah huah thin bawk a, a nihna takah chuan naupangte chu innel tir a, inngainat tir leh tihhlim a tum ni ber in a hriat. Chutihlaiin anni unau pawh za lo fahran chuan an lo nui der ve leh sak sak thin bawk a, a rukin an inmitmei zauh zauh reng thung. Chutah le, kawngreh lai tlan thleng in hnunglama thu, Ramsangi chuan Thlamuana hrawkah tak a hruihrual ken chu a rawn bat tang ta chat mai a, a seat hma chu intlawhkhalh nana hmangin theihpatawp hian a pawt zui ta ngar ngar mai. Thlamuana phu nasa lutuk leh hamhaih bawk si chuan steering chu thlah a, beih let nachang a hre hauh lo a, a break zawk chu a rap ta vak vak ringawt. Chutianga a chet bai fe lai chuan a bula thu Ramthani zawk pawh khan a chemte pai hmang chuan a pum leh thin bawr velah te a lo vit ve sawk sawk bawk a, thisen chu chhuak nasa tak hi a ni ringawt e. hetihlai hian Thlamuana pawhin a nunna atan chuan beih let ve ngial a tum tak naa, steering chu a thlah ngam ta hauh lo mai. A thlah a nih vaih chuan accident an hmabak nghal a, a thi tho tho dawn niin a hria. Emaw, hliam nasa tak a tuar tawh a, hmanraw dang nei bawk si lo chu, hmun reh lai a lo ni vei chhap nen, hemite unau hian an tihlum hman dawn tho tho tih a hre ve kar. A mangang tak zet a ni e. 

Motor tlan dan chu a buai a, a mumallo chho sawt ta riau a, kawngpui zau leh reh ruih maiah chuan pan lam bik pawh nei lo hian a tlankual ta zuk zuk mai. A tawpah zawng, tha thlah loa bei ta reng na na na chuan an that chu a ni ta der a. A thlarau a thlah rualin motor pawh chuan kawngsira thing lo ding pakhat chu ava su ta lawih mai le, an ni unau pawh chu na zetin hmalam ah an bu zui lawp thei. An lu te chu hai ve chhap bawk mahsela, an awmna hmun hi tlanchhuahsan vat an ngai tih an inhriaa, rang taka chhuk zawt zawt in hmanrua te pawh chu kawngthlang hnimpik karah thehthla leh tawp tawpin an tlan tawhna lamah bawk chuan an let leh ta vang vang  a ni. Bus stand ah lo ding in, bus hmag chuan an tla haw zui ta vang vang a, hetah hian an vanneihna a kaltluang nge, bus chuan a kalkawng thlakin kawng dangah a tlanoui ta hlauh mai a, an him phah ni ta berin a hriat. Ruang chhar a nih thu chu zing khawvar hnuah an hre ve chauh a, chu pawh, an nu hnen atang niin an nu chuan a tuarthiam lo ngang mai a, a na takzet tih chu an hmu thei. Mahse, phir unaute hian an thiltih ah khan inchhirna chhetemah an nei hauh lo a, an nu pawh chu khawngaihna pakhatmah hi an nei hauh lo bawk. A chantawk a hmu ve nimai ah an la ngai tlat. An rapthlak dun em em asin.

A thuhriat zozaite avang hian Rosangkimi chu a mangang chhe hneh hle a, a chiai lutuk tlat bawk. Hetiang thil rapthlak hi amah mai ni lo, a hmangaihte chungah hian a thleng ve ang tih rin ngaihna a hre hlawllo a, a ring phal bawk hek lo. Station atanga a rawn hnuah pawh a fate chu a ngaihsak hleithei meuh lo a, khumah mu zui thlawpin, a tap char char ringawt mai a ni. 

A lan dan ah chuan Thlamuana kha an In lama rawn kal tur niawm tak a ni a, mahse, khatiang hunah te chuan eng thil nge a rawn tih ang. Ani hi chu hnathawk turin khatiang hunah khan a chhuak daih tawh thin tih chu a hre ve reng si a, chubakah, rawn kal dawn ta pawhnise, amah hi rawn hrilh hre hmasa tur ni ah a ngai bawk. Chutiang chu nidanga a tih fo thin dan pawh kha ani reng a ni. Um,, a ngaihtuah nasat poh leh rilru natna tur a tam a, thaw a ipik bawk a, mittui a seng ral hnem mai mai tih lah a hre narawh.

A hmangaih em em vuiliama a awm  ni ah te pawh chuan tuarthiam lo in a ruang chu a bawh thlawp a, a țahpui vawng vawng mai. Chutihlaiin, kan mi nunrawng unaute erawh kha chu kilkhatah lo ding ngawi ve reng in, an nu lungchhe vankaia tap lai chu khawngaiihna tel map lo hian an lo thlir ve reng ringawt. An mitmengah chuan lainatna leh khawngaihna reng reng hmuh tur a awm miah lo a, nunrawnna hlir hian a khat zawk kan ti thei ang chu. A mak ani, hetiang kum rual lek hmeichhe naupang ve mai siin, hetiang tih nachang hi an hriat a, an rilru ngaihutahnaah pawh an dah theih zwk le ka ti. Mahse le, khawvel ala ni miau a, ku, 10 mi lekin tual a thah thu te pawh hriattur a awm tawh a nih si hi le. Mahse, a turu in a rapthlak chu ka a ti fan tho mai nia. Heng naupang tualthattu te rilruah hian eng thil chiah nge awm anga, eng thil ti angah nge an inngaih ve ang aw ka ti. Tual an that a ni tih hi an inhre takmeuh angem , nge, anmahni ah natna, chhungril natna nasa tak lo inphumru nualin, hetiang thil ti lo theilo hian a siam ta zawk ni ang. A mak a ni. A mak thlawt.

Ni a ral a, chawlhkar meuh pawh a lo ral ve leh ta. Rosangkimi chuan a lusunna te, a khawharna leh engkim a hrehawm tawrh zawng zawng te chu la nei kim biai mahsela, nitina a hnathawh erawh chu țhulh thiang a ni ve tlat lo. Thawk chho leh bek bek in a ngui thei em em a, a nun hi a hlim lo takzet tawh e. chutihlaiin, in lamah lah han thlakhlelh tur leh beisei tur, hlimna siamsak theitu pakhatmah a nei chuang bawk si lo a, a fate pawhnise, a tumloh deuh deuh hian a hrawk phar nasa thin mai a, mahse, a fate zawk hian engatanmah ngai lo in an nu thusawi engpawh mai chu an beng kawrawng ah an thun lo thin hle.

Ni khat chu a pasal hlui kha a rawn inlan ve leh hlawl. A fate chu chhuah thawvenpuia zanriah te buatsaih sak a duh thu a rawn sawi a, hetia a pasal hual a boral ruala a hmel a rawn lan veleh tak ah chuan Rosangkimi hian ngaihdan tha lo pui pui aneih phah nasa a, a rinhlelh phah ta rum rum mai bawk. Mahse, chumi a nih vang ngawt chuan fiahna pawh awmlo a midang han hnuhluh ve tawp chu a duh bik si lo. Chubakah,a pasal hlui hian nupui dangte pawh a nei leh tawh tih a hre vek a, khatiang thil rapthlak kha chu a ti duh turah pawh a ngai leh duh ta chiah lo. Tichuan,a duh dan pawh chu lo hnialsak lem lo in a fate chu an pa bulah chuan a kaltir ve ta nge nge a, a ruk tak erawh chuan a ngaihtuah viau. A chhan chu, an pa hi ruihtheihthil ti thin leh duh ve tak kha a ni miau mai a, a,, eng em a thleng lo turah ngai phawt ang, ti leh ta zawkin ngaihtha lutuk lo chuan a thlah liam ve ta phawt mai a ni. An kal liam hnuah ani pawh hna kal turin a chhuak ve leh nghal zat a, hemi ni hi chuan an nula kha a chawlhtir ve bawk.

A hnathawhna tur hmun a thleng tep ang tih ah call dawng in, a ham chhan nak chuan police station atang hian a lo ni daih mai a. A hamhaih angreng hle. 

‘’ Pi Sangkim, a rang lamin kan stationah lo kal ta che. Thu pawimawh tak mai sawitur kan nei tlat’’ tiin thu an rawn chah a, mak pawh a lo ti hman viau. Mahse, an thu chu hnial thei a ni lo. Rang taka inher lehnghalin station lam pan chuan motor a phar leh ta phawt a, thil tamtak a ngaihtuah kual nasa hle bawk. Engvang bera ani chu rawn ko ta nge an nih ang tih ringawt pawh chuan a thluak luhin, a manganpui hman lo chauh hi a ni ber tawh.

Station a thleng a, inspector pakhat nen chuan an inthutchilh ta ran mai le. Eng thu hla pawhnise, chu inspector tan pawh chuan han sawi nuam thil kha a ni lo tih chu a hriat mai a, a hmaa țhu reng, nu retheih hmel ve tak , hna a thawk rim  a ni tih hriat taka sam pawr fap mai chu melh leh run run thin in a han khap leh fuk fuk phawt a. chutah, Rosangkimi zawk chuan aw tham chhil chhel chung hian,

‘’ Ka pu, eng chungchang nge ni ta a? A va han pawimawh awm em aw ‘’ a rawn tih sap takah chuan Inspector pawhin a awm dan chu a lo siamtha ve thuai a, a khuh ta kharh kharh phawt. 

‘’ Eng lo a nia maw ka pi, tunah hian I fate pahnih khawiah nge an awm? Eng thil nge antih mek?’’ 

Rosangkimi chu a lo hawi buai nasa hman ngang mai. A ngaihna a hre lo takzet a ni.

‘’ Ka fate chuan eng nge helai hmunah hian pawimawhna an neih ve a. Min ti hrilhhai hle mai ka pu’’ ti ram hmakin a ngaihdan chu a nih hmel lemloh hle. Mahse, police pa erawh chuan a hma aia thutak zawk hian,

‘’ A,,I thenawmte nupa thihna case kha kan chingfel hnai tih thu chhuah kha I lo hmu ve tawh ngeiin ka ring a, tunah chuan a hmawr kan bawk thei ta bawk. Um,, kha case ah khan mak tak maiin inchhung hmuntin maiah khan fingerprint leh DNA  chhar a ni nual mai a kan forensic te thawhrimna zarah a nih bawk chu. Tin, chung evidence te chu tu nge, khawi atanga lo awm nge tih pawh kan hre thei ta bawk. Tin, hmanni lawka I thianpa boralnaah pawh khan car chhungleh a taksa hmuntin maiah pawh khan hnuhma tamtak hmuh tur a lo awm leh bawk a, chung zozaite chu Pu Thara te inchhunga kan DNA hmuh te nen khan a lo inrem thlap bawk! Tichuan, I hrethiam thei ruai tawh em aw, ka sawi tum tak chu ‘’ tiin Sangkimi mitah chuan chiang zet hian a rawn melh ta kuau mai a, Sangkimi thung chy a lo zam chhe lek lek thei mai. Mahse, aw ngaihnobei lo zet hian,

‘’ Chung thil velah chuan ka fate kum 11 mi lek hi an inrawlh a, an inhnamhnawih I tihna a ni ang maw? Huh. Thu lawilo leh awmze nei lo lutuk sawi mai mai tur chuan ka pu, I nihna hi a sang deuh mah mah lo maw aw ka ti. Heng naupang, hmeichhia mai lehnghal te hian puitling pathum ngawt te kha engtinnge that thei se intih zawk le. A awihawm em em loh em mai a!’’ tiin , awih ngam si lo rilru buai tih hriat tak chuan a han nui lui leh sak thin a, a kehchhe nawn leh dawn ta emni le.

Chutah, police pa thung chuan zaidam dup hian,

‘’ I awih dawn lo tih ka hria. Tin, I awih tura thilsawi lah ka ni bawk hek lo. He thil hi thudik a ni tih fiahna kan nei vek tawh a, tin, a fiah lehzual nan pawh hei hi en ta la, kha kawngpui reh leh zau takah khan cctv an dah reng tih hi I fate hian an lo hriat hmaih palh tlat a, a pawi ka tihpui lutuk tlat ‘’ tih sak pahin laptop chu a en theih tur hian a rawn kawihhersak nghal a, tihuan, khami zana motor chhung atanga an rawn tlanchhuah dan leh, an hmanruate pawh kawngthlang lama an paihbo dan zawng zawng chu chiang takin a rawn lang ta uarh mai. A fate ngei an ni tih chu phat theih rual a ni ta lo va, a fiah em em zawk a ni. Nu thinlung hi a vawi engemawzat nan a kehchhe nawn leh ta a ni e. A hmai hupin a tap a, a au chhuak rawih rawih a, sawi tur reng hi a hre tawh lo. Zahthlak a tiin a na ati vawng vawng a, eng thilmah hi han thlakhlelh tur pawh awm theiin a hre tawh lo hial. A fate hian tual an that a, tualthah hrat fa a lo nei reng a ni maw!? Nu zawng zawng te hian he thil hi an chunga thleng turah  han suangtuah ve chhin ta se la, an tuardam thei ngut bik a ngem?

Inspector bawk chuan zaidam tak hian,

‘’ Hei hii hriat angin kum tling lo pawikhawihna case a ni tlat mai si a, dan leh dan lo pawh sawilo in tihian nangmah , an nu I nihna ang pawhin biak hmasak che hi a tha kan ti a, eng lo, a,, tlanbopui,thuhruk tih vel kha chu lo ngaihtuah buai duh tingtang lo ta la, I tum kher pawhin ka ring chuang bawk hek lo. I fate hi court chhunga inlan rual an la nih loh bakah, jaila tang thei pawh an la ni lo tih chu I hre vek anga, chuvang chuan, naupang pawikhawih thinho awmkhawmna lamah kum an tlin hma zawng chu an awm ve phawt a  țul dawn a ni mai a, chutah chuan dan khauh tak hmanga enkawl chhoh niin, an rilru sukthlek danglam dawrh thei tur khawpa enkawl an ni dawn a ni. Chuvang chuan nangpawh hian I rilru lo siamfel thuai thuai la, thil tha lo liantham zawk a thlen loh nana ko hmasa che hi kan ni bawk. Tin, I fate an nihna vang tak pawh hian itan hian a hlauhawm thei bawk a, lo inveng fimkhur hle ang che. Tun atan chuan haw phawt mai la, naktuk ral hma ngeia min rawn be leh turin kan duh che aw, a nih loh chuan , nang emaw, I fate hi kan rawn hruaichhuak ngei ang che u. Tin, tun atang chuan enthlak reng inni tawh tih hria la, eng thiltha lo mah tih lo tum buai duh suh ang che. Kal tawh rawh le’’ ti zung zungin, Sangkimi pawh chu a tho ve țial țial a, tha reng reng hi a nei tawh hlawllo. A tliak hnawp a ni ber e.

A lehlamah, a fate ngei chu an ni si a, han mantir ngawt dawn se la a ngaingam thei thlawt bawk si lo. Thununna khauh tak hnuaia an awm loh thung erawh chuan nakin zelaj a tan tak pawh hian an la hlauhawm thei tih a hre ve reng mai si a, a ngaihtuahna chu a chavai takzet zet a ni ta ber.

In a thleng a, a lo reh thap. A fate chu an pa kiangah chuan hlim tak leh fel takin an va khawsa ngei ang chu maw, tiin an roomah a lut tlang nghal a, alo felfai thlarh mai. An khum tereuhte ah te chuan thu kual vel in, an nakin hun tur a suangtuah pah mial mial mai a, a mittui chu a lo hnai leh vat thin thung. Chutia, ngaihtuahna vahkualtir paha a lo hawi veng veng lai  chuan drawer chhunglam atanga lehkhaphek var rawn lawr tat chu hmu in, a tho hluai a, chu thil chu ava bihchiang nghal vat. Lehkha phek pakhat mai pawh ni lo hian lemziak tamtak a lo awm țeuh mai a, phek hrang hrang ah chuan milem inang lo hlir hi a lo awm nuaih mai bawk. A zavai chuan lachhuak nghal vekin chhuatah chuan a han rem ta diat diat phawt a, khai le! Khai le! A fate pahnih, hmeichhe naupang anga hun kha leh chen khawsa ve mai mai thin emaw a tihte khan naupang thil reng reng an lo buaipui ngai lo a, chu chu hnai lo tak hi a ni e. lemziah pakhat chu ngun tak hian a han thlek vang vang phawt a, Ramsangi’n a ziah ngei , putara te nupa thah dan tur vel a ruahmanna kha lo niin! Milem lu chungah chuan, thenawm putar leh pitar, tih hi a lo inziak kuau bawk. Chutah, a dang ho pawh chu enkual lehin chutah pawh chuan milem rapthlak tak tak leh tualthahna kaihhnawih hlir a ni lo awm ni. Milemho lu chungah te chuan 

‘ka nu bialpa’ tih te, ‘ka nu’ tihte,  ‘URemremi’ tih te chu a lo chuang fer fur mai a, an milem ziah lah chu inthahna nena inkaihhnawih leh mihring thi lai lem vek te hi an ni rauh lehnghal. Rapthlak tak a ni. Tunah chuan a fate hi thil tisualtu a rinhlelh loh rual an ni ta lo tlat. Heng thil zawng zawng a en zawh hnu phei hi chuan thinrim leh rilru puakkeh tih hriat takin lehkha phek ho te chu a chil darh ta chum chum mai a, tap hawm hawm chung hian a pawtthler nual bawk. Hetiang thil te hi engvangin nge an tih? Engvangin nge a fate kher kher hian an tih bik? 

Zan a mu tha thei lo zui a, thin thiin a awm thei chuang bawk hek lo. Khumah te chuan han mu ve tak bawk mahsela, a muhil thei hlawllo. Ni e, hahdam taka mut theihna tur thil kha thleng kha miau hek lo le. A tuka thil awm dan tur chu ngaihtuah in a tap leh thin a, a chau takzet tawh a ni. Aw le, he thil hi a tawp a thlenpui ngei tur a ni. Lungdam takin ani pawh hian a pawm tur a ni bawk a nga, thil engkim mai hi tawp tawh rawh se. A tha leh vek tur a ni bawk.

A tuk khua lo varin, hma takah a thochhuak a, a pasal hlui chu bia in, a fate chu rawn hruai haw nghal turin thu a va pe hmiah mai. Khua lah chu ala var chiang lo bawk nen, naupangte chu an la mu tui hle ang tih pawh a hria, mahse, chu chu ngai pawimawh thei a ni tawh lo. He thil hi a rang thei ang bera chinfel thuai a duh a, a engthawl thei ang bera awm chu a duh tawh tlat a ni. 

A pasal hlui nen an inbiak zawh hnu chuan police call leh in, an Ina rawn kal tur leh, misual chu rawn rekchhuak nghal turin a ti bawk. 

Khua pawh rawn var chiang tan in, ni pawh a rawn chhuak ve ta hial. Ani chu thil thleng tur nghak hian sofa chungah fel atin a lo  țhu diam tawh a. a ngaihtuahna a mang zo va, mumal takin eng thilmah hi a suangtuah thei tawh lo bawk. Mahse, a hmel lan dan erawh chu a lungawi hliah hliah thung si. 

A fate chu rawn thleng ve tawh in, a lo ngen tlat avang chuan a pasal hlui pawh chu a haw let lehnghal ta mai lo va. A hnu reivak loah police ho pawh an rawn thleng ve leh a, a pasal hlui chuan thil awmzia chu a hriat loh hmel kher. Thudang thudang sawi tawh lo in police ho lah chuan naupang pahihte chu lak mai an han tum ngawt a, mahse, nu ber Sangkimi thung chuan a lo remti awzawng lo mai.

‘’ Ka fate kha tawh pawh tawk hlek suh u! Anni ni lo in keimah hi a ni man tur dik ber zawk chu. An kut hmang khan pawi chu an lo khawih a ni thei e, mahse, a bul ber erawh chu keimah, ka enkawl thatloh rah liau liau an ni e, ka tihpalh a ni. Khawngaihin anni kha chu thlah zalen ula, an hma hun eng takte hi tihchhiatsak lul suh u. kei hi min man thei ang. A nihloh chuan, a hma aia tha lo thil kh a thleng ngei ang tih ka tiam a che u ‘’ nui sang chung leh mittui tling piau hian a rawn ti ta mai a, midangho zawng chuan a ngaihna hrelo in amah chu an lo en deuh thap. Hei lo hi chu a fate tan hian thiltha dang tihtheih a nei tawhin a hre ngang si lo a, tihian ani chu jailah an khung a nga, hrehawm pawh tuar rawh se a pawiti tawh lo. A faten hrehawm tamtak an tuar dawn a ni tih hriat ai chuan a awm pawh a nuam zawk ngei ang chu. 

Tichuan, engdang mah sawi buai tawh lo in a kutah kutkawl an buntir a, an chhuahpui hma lawkin a pasal hlui hnenah chuan,

‘’ I fate hi lo enkawl tha la, tikhan, nu dinhmun harsatzia lo hre ve tawh ang che. I kutah an nun pumpui kha a innghat tawh a nia ‘’ a ti leh sup a, an kalpui ta. Tichuan, a hmasa ber leh a tawpna ni turin a fate mittui chu a tla ve ta hial. Mahse , ka hre lo, hei hi, nun zalen an neih vanga lawmna mittui nge a nih a, an nu chu an ui ve em avanga lungngaihna mittui  ni zawk ang tih hi ka hre lo tak tak!

*****       *******      ********       *******       **************       ****

Leave a Reply