You are currently viewing PHUBA S2 – 17

PHUBA S2 – 17

Spread the love

JONSMELY BAWITLUNG

“Maggie, i harh a ngai ania aw,” Damdawiin kan pan lai chuan ka ti mawlh mawlh a, Silai mu pahnih a kah fuh a ni a, tui aṭanga kan lakchhuah pawh khan nikhua a hre tawh lo. Damdawiin kan thleng a, Operation Theater-ah an nawr lut nghal a, Rsa pawh a rawn thleng chawpchilh ve nghal. “Rs, eng nge chanchin?” tiin ka zawt vat a, diktak chuan engmah ka rilruah a awm lo, Ka hmangaih a, a tello a awm tak tak tur hian vawikhat mah ngaihtuahna pawh ka la seng chhin lo, ka thinrima hmalam ka huat ber lai pawhin ka lungphu hi a tana phu a ni tlat si a. Kan fapa vang tal pawhin a rawn harh a ngai a ni.

Mizoram lamah chanchin ka thlen tawh a, a chhungte pawh an mangang hle in ka ring. Kei mipa engtik lai maha che buai ngailo pawh hi ka kianga awm te hmu chiang theilo leh an thusawi pawh hrechiang thei hauh lo khawp in ka talbuai chu a ni a. OT pawna light chu a rawn thim a, ka dara lo khawihtu chu ka en nghal vat. Sangkimi rawn thlen lai reng reng ka hrelo. Ka ṭawng lova, Doctor rawn chhuak chu Rsa chuan alo be vat a, Rengpuia leh Sanjay bakah midang ka hriat ve loh pawh an awm nual mai.

“Hlauhthawn awm a awm tawh rih love, a harh chhuah hun chiah nghah a ni mai,” Doctor-in atih chuan ka thaw huai thei. “A ṭha leh vek mai ang,” Sangkimi’n atih chuan, ka lu bu nghauhin, “Nang eng nge i an?” ka ti a nui sakin, “Ka ṭha e,” a ti sap a. Maggie an rawn nawr chhuak a, Cabin-ah kan dah nghal a. Min kian san pheuh pheuh a, keimah chiahin ka awm tawh. Maggie engmah hrelo a mu chu ka en a, “Bawihi, lo harh vat teh aw, kan fapa pawhin a ngai tawh takzet che ania,” tiin ka melh ran a, “I lakah hian ka lungawiloh zia hria la, i muhil reng lo tawp ang.” tiin ka nui lui a, a harh hma chu thlamuangin ka awm thei dawn silo.

A nakah leh a awmah kah a ni a, a lung a fuh lo erawh a vanneih pui ta a ni, mahse darkar tam a liam leh tawh a, ala harh lo chu ania. “Nicky han intifai ve la,” titu Sangkimi chu ka melh zeuh a, alo luh lai ka hre hauh lo. Maggie kut vuanin ka lo muhil a ni ngei ang. “Intifai la, in ei puar bawk la, ka lo awmpui ange, pawnlamah duty an awm bawk a, engmah hlauhthawn tur a awmlo ania,” ka chhan mai loh avang chuan a ti leh a, a thusawi hi a dik a ni, engmah hlauhthawn tur a awm tawh hleinem.

Ranveer Malhotra a hmunah a thi nghal a, ni e, a nupui a thah sak a, engvangin nge kan Lalrengpuia hian phuba a lak loh teh lul ang ni. Silaia kaptu pawh mi nawlpuiin an hriatlohin a that daih tawh alawm, Ani khan a dawp chhuak vek chu anih kha. Khatiang taka dawhtheihna tlachham leh che nunrawng thiam a ni ang tih ka ring ngai hauh lo. Ka hriat chinah pa ṭha leh chhungkaw hmangaih tak, a ram tana a thluak hmang thiam tak a ni bawk a, detective ṭha ber a ni hialin ka ring. Mahse a nupui kaptu erawh dim lo tak a ni, mipa a thinrim miau alawm le.

Cabin ka chhuahsan a, duty hnenah an mi leh sa nilo tumah luh tir lo turin ka ti a, Sangkimi chauh a awm dawn a, palh thleng thei a ni tlat a ni. Inhnuai lama ka chhuk lai te chuan Maggie chauh lo chuan ka ngaihtuahna an luah thei mawlh lo. Kan intawn hmasak ber ni aṭangin ka chhui kir a, inngeih taka kan awm aiin kan inhnial leh kan in sual a tam zawk a, min thah mai pawh hreh lo hmel a pu fo a, mahse a tak takah erawh ka hlimna nia a hriat min tih sak a huam leh em em tho a. Sangkimi hi ka nupui hual nilo se a him chinah thluak chauh sengin hna a thawk thei tih ka chiang, mahse keima vangin engkim a ti chu a ni si a.

Hotel ka thleng a, ka inti fai sawk sawk a, damdawiin hnaih deuha insawn ka duh avangin ka thawmhnaw ka pack nghal thlap bawk a. Pindan ka chhuahsan dawn chuan ka phone a rawn ri a, Rsa a ni. “Nicky, Sangkimi’n engmah ila eilo a ti che a, lokal la thil ei ang hmiang,” atih chuan, “Damdawi inah ei mai ka tum a.” ka ti a, “A ngailo ang Rengpuia leh Sanjay-a te an awm a,” tiin address a rawn sawi a, phone a dah nghal daih chu ka khi ve suk mai.

Ka bill ka tifel a, Taxi phar in Rsa sawina lamah chuan ka kal nghal a, Restaurant a thlang thiam hle mai. Ka luh rualin bân alo vai zauh a, a bulah ka ṭhu ve nghal zat. “News i en tawh em?” atih chuan, “Aih,” tih chauhin ka chhang. Lu bu nghauh nghauh in, “Avasthi i hre ngai em?” a ti leh daih a. He thumal hi khawiah emaw hriat ka nei tawh a ni. Ka ngaihtuah neuh neuh hnuah, “Ka hre ngailo, mahse Maggie hian min zawt tawh a.” ka tih chuan, “Um, keipawh Ama hnen aṭanga ka hriat ania.” tiin, Avasthi building an dap dan a sawi a, formula pawh sawrkar kuta a luh tawh thu te, Ranveer-a rualin Ruatmawia pawh man anih thu te a sawi ve bawk a.

“Ruatmawia kha engtia lo tel ve nge maw anih le?” ka tih chuan, “Maggie khan Mizoram a in awm laiin Sangmuana in bia niin a sawi a, an unau thuma zin si khan Sangkimi bo chauh a sawi a, tichuan a ringhlel mai anih hmel. Chuta a sawi zel naah chuan Sangmuana hian a thuneihna duh luatah Sangkimi hi a Kïdnäp tir anih a ring ber a, Ruatmawia erawh vawikhatmah a sawi ri leh tawh lo.” atih chuan, “Ani pawhin Ruatmawia chetdan chu a beisei phak lo a ni mai thei.” ka tih chuan, a bu ve nghut nghut a.

“Avasthi chu a pawimawhna i hre tawh em?” ka ti leh chuan, lu thingin, “Aih hrelo, Maggie kha chuan damdawi siamna hmunpui ber ni turah a ngai a, mahse tunah an hmunpui chu hriatchhuah a ni tawh a, pôlice te pawhin an dap chhuak vek tawhin ka ring. News beisei phawt ang.” thawven hmel zeta atih chuan, ka lo nui ve suk tho. “Maggie khan a ngaih pawimawh hmel si a, hriat chu a chakawm khawp mai, eng emaw tak a ni ngei ang.” kan ei tur an rawn dah ruala atih leh chuan keipawhin ka ngaihtuah zui ve tho. Ka bulah a sawi a, a hre tura a rin Rsa bulah a sawi bawk a, tin, Rengpuia pawh hian a hriat ngei ka ring mahse tumahin kan hre ngailo chu ania.

“Sangkimi dam takin a awm a, i hahdam huai tawh lo maw?” atih chuan, “Ni e, engkim hi Maggie vang a ni a, Amah la tihian harh lovin a awm chu a ni si a.” ka ti sup a. “Ni e,” a ti ve ringawt a, a bak sawi tur a hre bik em em lo a ni mahna. Kan ei zo a, damdawi inah kan let a, a zankhatna a ni bawk a, kan pali in kan awmpui a, zing khua a var a, chanchin engmah a awm theih loh avang leh hna nei kan nih avangin Rsa te an haw a, kei leh Sangkimi chiah kan awm leh tawh.

Ka awmdanin a zirlo nge Sangkimi ti ti siam siam te chu ka hre mang lo. “Nicky, engkim a ṭha leh dawn alawm,” atih chuan thaw hakin, “Ni e, hmeichhe huaisen leh chak tak a ni alawm, a rawn harhchhuak vat mai ang.” ka tih chuan ka darah a rawn khawih a, “Heti taka i hmangaih anih si chuan engtin nge i lak aṭangin i kal tir theih?” atih chuan ka melh zawk a, mahni inthiamlohna in ka khat nghal. Ani zawk hi a ni lawm ni ka nupui ni mai tur, mahse Maggie vangin tihian ka buai a, Sangkimi pawh ka buaipui thei meuh lo chu a ni si a.

“Min hrethiam rawh, ka hmuh lai ngei a silaia kah a ni a, ka venghim theilo a, vawikhatna mai a nilo.” tiin ka thaw hawk a, ni e, Rodingliana nen harsatna an paltlang a, mahse tikhan Rda’n a kalsan a, Kum 10 a ral hnuah pawh thinlung ser nen hun a hmang a, a dinhmunin a zirloh avangin Amah chauhin fa a nei bawk a, tunah heti hi a ni leh bawk si a.

“I hmangaih hle si a,” atih leh chuan, “Min hrethiam rawh aw, ka hmangaih a ni, a theih chuan ka ta ni se, ka kiangah chauh awm se ka duh.” ka tih chuan a nui var var a, “Alo harhchhuak vat dawn a, engmah ala tlailo ania, diktak chuan kan dinhmunin a zir vang alawm keini te chu,” tiin a nui hak hak a. Ani pawh hian kan inneihna hi a pawm vak bikin ka ringlo. A dinhmun derthawng kha apa fing zet khan a hrethiam a ni mahna le, kan chhungkaw ṭhian an ni a, ka nu leh pate’n an duhsak zia ka la hailo, a unau pianpui tluk zet anga a en a ni a, venghim theitu anga a ngaih ka ni a, ruahmanna an siam tih ka hrethiam a, kha vanga hniallo pawh ka ni. Hmuh lawk leh rin lawk ang chiahin tun hi kan thleng a, tunah chuan kan him rih chu ania, mahse keimah zawk hi ka inngaihtuah a ngai a ni.

Ni 4 kan awm hnuah pawh Maggie ala harh lova, a nu leh pa bakah Ka nu a rawn kal a, Tin, Sangkimi pawh a chhungte an rawn kal bawk. Maggie dinhmun erawh a ṭha tih ni mahse vawiin ni thlenga ala harh hi mak ka ti a ni. “Bawiha engtia awm nge i tum?” ka nu in atih chuan, “Ka pa i be tawh em?” ka lo ti let vat a. “Um, engtikah nge i fapa chungchang hi min hrilh i tum?” atih leh chuan, ka nu chu ka en a, “Airport-ah khan ka hre daih tawh,” a ti leh a, ni dawn tak, an lo thlawk ho tak anih kha.

“Ka nu, Sangkimi hian a remtih chuan Maggie hi nupuia neih ka duh, ka hmangaih bawk a.” ka tih chuan a lu a bu nghat nghat a, min chhan hma in kawngkhar a rawn inhawng a, “In inneihna tur ka buatsaih vek ang,” Sangkimi chuan a rawn ti lut sang a, he hmeichhia hi ka hriat ai daihin a fing fel anih dawn hi.

Ka duhdan ka sawi a, a nu leh pate pawhin min hnial hauh lo. Mizoram lama sawn ka duh a, ka inah a enkawlna tur ṭha tak buatsaihin haw pui ka duh a ni. Mizoram kan thleng a, ka duhdanin ka inah doctor leh nurse telin kan lut a, Anu leh pa bakah ka chhungte kan kim a, Sangkimi leh a nu leh pate pawh an lo awm ṭhap mai.

Kei ai mahin Sangkimi hi a phur a, kan inneihna tur a buaipui vek ti mai teh ang. Midang sawm lovin Rengpuia, Rsa leh Sanjay te erawh tel ngei ngei tura ka sawm te an ni. Kan ṭhian pali in kan kim a, ka chhungte leh ka ni tê-i a awm ve bawk a, Kan inneihni a thlen meuh chuan mi tlemte ni mah ila ka hlim a ni.

Maggie mo kawr nena khuma mu chu ka en a, “Harh ta la, heti mai chuan inneih hi i pawm leh awm tawp silova,” tiin ka nui hawk a, pastor leh midang an rawn lut a, ka duh ang ngeiin thu ka tiam a, inneih zungbun ka buntir lai te chuan, alo harhchhuah huna a awmdan tur ngaihtuah in ka hlim em em hi a ni tawp mai. Zanriah kan kil ho a, ṭhiante pawhin min hlimpui viau chu anih hi. Kan fapa pawhin ka tak a kalsan duh lova, kan inpawm reng chu ania, bul ṭan thatna hlimawm tak chu ava ni em.

“Maggie harh tawh teh, i fapa kum 2 tlin lawm dan tur pawh ka hrelo ania, i tello chuan engkim hi a harsa em em si a.” tiin ka khum, kan khum ni ta zau zeta Maggie-i engmah hreloa mu chu ka bia a, kan inneih aṭanga karkhatna chiah a ni. A chalah fawpin ka tih ziah danin ka en vawng vawng a, he hmeichhia hi eng dinhmunah pawh awm se ka hmangaih a, ka hmangaih reng bawk ang.

Zing ni chhuakin ka hmaia a rawn chhun eng ser ser chuan harh zawkin, ka mumangah Maggie nen kan lo inhnial hrep anih kha, ka inlet a, Maggie ka hmuh rualin ka nui suk a. “Mang lamah lehzel pawh kan inhnial buai chu ania,” tia tho in bathroom-ah ka intifai a, ka chhuah leh ruala Maggie kut chesawn ka hmu erawh ka hmu sual emaw tiin ka pan vat a. A bulah ṭhu in, “Maggie i harh em ni?” ka tih chuan a che leh tawh hauh lo.” thawhaka endik tu tur nurse kan awmpui ko tura thawh ka tum erawh ka kutah a rawn dawm a, rang takin ka hawi let nghal. “I harh chiang alawm,” tiin, “Nurse,” tiin ka au a. Maggie rawn meng chu en in lawm avangin ka mittui a luang hial nia.

“I harh tawh tak tak tiraw?” tiin ka chebuai lo chauh chu anih hi, Nurse a rawn lut a, doctor pawh reilo teah a rawn thleng a, “Engkim a ṭha tawh e,” doctor in atih te chuan ka lawm takzet a ni. “Nicky,” tia Maggie rawn phun sap chu, hnaih vatin, “Sawi rawh,” tiin ka beng ka dawh hnai a, “Khawiah nge chahbi kha.” atih chuan, ka phun nghal hluk mai. Maggie a harh tih kan inhrilh kual chuan midang pawh an rawn lang ṭak ṭak a, a fapa a hmu leh meuh erawh a ṭap ve hial mai.

(MAGGIE’S POV)

Nikhaw hreloa ka awm chin ka zawh chuan mak ka ti a, ka thi lo pawh hi a lawmawm tawh hrim hrim. Chutih rualin ka harh lo chhung khan eng nge thleng tih tumahin min hrilh lova, tin, ka awmna hi damdawi in a ni miah lo bawk. Mahse ka fapa hmelṭha zet nen kan inhmu leh a, a aia hlimpui tur ka nei tawh chuang lo. Nilengin mi hrang hrang an lo kal a, mak ti deuh mah ila, ka nu leh pa bakah UNghaktei a awm ve bawk a, UNghaktei hi ka harh thu an hrilh rualin a rawn kal ve nghal ni awm tak a ni. Ka fapa hian a duh hle a, kei ai mahin tun dinhmunah chuan a ngaina in ka hria.

“Maggie, i taksa ala chaklo si a, Bawiha hi chu kan mutpui rih mai ang aw,” Ka nu in atih chuan ka bula tui taka mu ka fapa chu ka en a. “A ṭha alawm,” ka tih chuan, UNghaktei zawk chuan nui var varin a pawm kang a, “UNghakte, engvangin nge heihi ka bûn a?” tiin ka veilam zungû a ka zungbun chu ka hmuh a. Min chhan mai ka rin laiin a nui ringawt a, ka nu leh ka pate pawh hian eng emaw tal sawi ve awm ania, nui vur vurin min chhuahsan nghal daih nia.

Hun rei tak ka mut avangin chet vel ala hrehawm hle a, mahni pawha zûn takngial pawh ala harsa chu anih hi. Khumah ka ṭhu a, ka nu te awm laia ka lo zûng lo chu pawi ka ti ve hlek a ni. Din tumin khum bân vuana ka ṭan lai chuan, engtik laiin nge alo luh tih pawh ka hriatloh in Nicky-a chuan min lo vuan vat a, rûm zetin ka melh nghal zat. A huat a min thlah ka rin nen ala nui suk zui. “Eng nge i tih dawn?” atih chuan, “Ka zun a chhuak,” ka tih hmuk chuan nui vur vurin, “Lokal rawh,” tiin zo zetin min pawm nghal a. Ka hnial peih rih lo kal ala har em alawm. Ka zûn zawha min chawi chhuak pawh chu ṭha takin ka awm ve mai a, mahse ngati nge hetah hian a awm ve reng le?

Ka awmna pindan chu ka hawikual a, ka en chik hnuah erawh, “I pindanah ka awm lehpek tawh tih sawi lo hram teh.” ka tih chuan, “I awm miau sia alawm, Maggie duhtak.” a ti kher a, “Engvangin, damdawiinah ngati nge ka awm loh?” ka tih chuan, “Damdawi In te chu i ning si a, i harhlo chhung pawh khan i ning ka ring a.” atih chuan ka ner nang a. “Mu tawh la,” tiin min duat hmel zetin ka samah alo chul a, hepa hi nupui nei mai tur kha a ni si a, a ina ka awm chuan fello ala awm zawk em ni ang?

“Heta ka awm chhan chu?” ka tih deuh hlar chuan, a nui leh pek tawh. Min chhan a tumlo nge ni, a nui vur vur chu en in, ka mut dan ka siam rem a, ka phun bal bal chu a ngai pawimawh vak lo tih hriat takin, bathroom-ah a lut ve daih lehnghal.

Ka kawnga min kuahtu an awm tih ka hriat rualin ka mengkawk a, ka hawi phei ruala tui zeta muhil Nicky-a ka hmuh chuan, keh dak awr tum a ka bân chu, “Ka muthilh lohna a rei tawh teh ania.” meng chuang hauh lova a rawn tih chuan, ka kut pawh ka la let leh zal zal a. A che lova, tui takin a muhil ni maiin ka hria, ka be lo bawk a, mahse ka melh reng thung. A mithnuai dum kalh te, a khabe a hmul ṭo siar siar te chu kim lo ruai in ka hmu a, a sam pawh Amah anglo zetin a buk lam lek lek chu anih hi. A awmdanah a chau ve hle tih ka hrethiam a, kan boruak paltlang ta te ka ngaihtuah a, Sangkimi erawh alo la lang miah lo nen a him ta em tih pawh ka la zawt leh lo. “Min en reng lo khan muhil rawh, keipawh hahdam ka mamawh takzet tawh ania.” atih leh chuan, rang zetin ka mit ka a, mahse ka inngaihtuah chiang erawh ka meng leh vat a, hnai set sawta min lo melhin a nui nghal huk mai.

“Sangkimi kha a him em?” ka tih chuan, “Um, kan him vek e, Ranveer erawh in silai mu a dawng a, Ruatmawia pawh a tang tawh e.” atih chuan, “Sangmuana kha le?” ka tih chuan kang uai in min melh nghal rún a, “Ani kha Sangkimi bo naa ruahman vek tu anih kha, finfiahna ka nei.” ka tih chuan, “Man a ni ve hauh lo.” a ti hmuk a, mahse a awmdan siamrem in, “Engpawh nise kha thlakhat tling ṭepah khan mut pangngai in ka mu miah lo, nizan thleng pawh khan,” tia min melhna erawh hmana min hmangaih tak ṭhin tu Lalmuanzuala mitmeng ngei kha a ni. “Awle, muhil ang hmiang.” ka tih chuan nui var varin, a in siamrem nghal a. Zawh duh ka la ngah mahse keima vangin mut pawh mu ṭha lovin hun alo hmang reng chu a ni si a.

Ka harh leh ruala ka bula tui taka muhil thaw suk suk chu ka en a, a landan pa lutuk hi ka mit aṭang hian engtikah nge a reh ve ang le? A mawina ka hmuh ang hi midang te hian an hmu ve tho angem, an hmu ngei ang, Sangkimi pawh khan a ṭanin a hmangaih hle tak anih kha. Ani kha a him si chuan ngati nge Nicky-a nen hian an inneih mai loh le? A chuzawng ka buaina tur pawh anih chiah loh hi, tunah la a pasal hual ber bulah ka awm a, kei chauh nilo in ka chhungte leh ka fapa telin. Ka fapa ka ngaihtuah chhuah rualin Nicky-a chu ka melh leh a, Ani hian fa ka nei tih a hre tawh ngei a nga, ka fapa pa hi min la zawt ngei ang. Ka thawhaka, engmah a sawiloh danah hian a hre tawh zawk em ni ang?

Mahse Sangkimi hian engtin nge a ngaih ve ang le? Ukil ṭha tak a ni a, Prôsecütór a ni bawk a, Ani hian ka harh loh chhung khan ka chhungte hminin ka fapa hi min neih sak a tum a ni mai lo maw? Ka ngaihtuahna avang chuan inthunun hman lovin min kuah chial a mu Nicky-a chu a samah ka kek dak awr a, a harh chiang teh e, “Bawihi na i nei em ni, nge ka ti na zawk che?” min ngaihtuah hmel zeta atih chuan, “Ka harhchhuah aṭangin ni hnih a liam tawh a, ka chhungte an awm chuan pawnlamah i awm daih a,” ka thinrim luat vang nge ka hmui a khur dar dar thei hial a ni. “Chuan,” alo ti sup a, “Rodingliana hi ka fapa a ni tih i hre tawh tiraw?” ka tih chuan a lu a bu leh nghut a, “Chuan,” alo ti leh erawh, “Nang hian ka lak ata lak hran i tum anih vaih chuan khawvel tawp thleng pawhin ka umzui ang che nga, a ṭul anih phawt chuan ṭhelh awm miah lovin hetah hian ka kap ang che.” tiin a lung awmna zawn chu ka kawk siah siah a, a mitmeng danglam chawpchilh nghal pawh chiang takin ka hmu.

“I hlauh ang thil chu ka ti daih tawh, ka fapa i thukru a, kum 2 dawn ka lakah i zep a, chuan nang hian tunah khan min kaptu i nih a vawi hnih nan i inpuang leh chiah bawk, Jàïl bäng zut ta la min umzui thei tho angem, ka fapa dah hran a, lakhran leh lek phei chu ngaihtuah pawh ngaituah buai duh suh.” tia khum a thawhsan rual chuan, “Hmela,” ti vin ṭhat in, ka khum bula tui bottle chuan ka vawm nghal a, lo bumin chhuatah chuan a tla ri bawl a, “Thinawrh leh,” tia chek hlukin, “Kan fapa in min ngai tawh ang,” tiin a chhuak zui daih a, ka duh dan dana ka la che theilo nen ka ṭah a chhuak takzet a ni. A thusawi zawng zawng kha diklo pakhatmah a awm lo, a dam a ni tih ka hriat hnuah pawh ka biru a, a fapa a hmuh fo hnuah pawh a fapa a ni tih ka hriattir lo mai nilovin keimah ngei pawh ka biru tlat a ni si a. A ruka a fapa a pawm ka hmuh ṭhin laia ka hlim ru veng veng ṭhin te kha, tunah ka fapa chu a bulah a awm ta a, mahse ngati nge ka thin a rim leh si. Pa nei se ka duh em em laiin ngati nge a neih velah ka nat tlat.

Ka fapa pa hi nupui dang nei mai tur a nih vang pawh a ni mahna, ka lak aṭanga a awm hrang daih tur ka ngaihtuah pawhin na ka ti hle si a. UNghaktei a rawn lut a, ka mittui luang ngiai ngiai a ka ṭhu min hmuh chuan ka bulah rawn ṭhu hniam vatin, “Maggie eng nge thleng, nga ti nge a?” mangang hmel zeta atih chuan, “UNghakte, haw ang, ka fapa nen min haw pui rawh,” keimah anglo zetin ṭah aw ṭiau a ka tih chuan, “Nga ti nge a, eng nge thleng a?” atih leh chuan, ka lu thingin chhan pawh ka chhang thei tawhlo. Ka rilru na a puakchhuak a, hmeichhia ka nih ang takin hmeichhia takin ka natna ka lantir a ni ti mai teh ang. Hetiang hmeichhia hi ka ni ngai lo a, ka mittui a tlak pawhin ring takin ka ṭap ngailo. Ka nat chang pawhin mahmi ka inhnem a, ka tawmim a, ka biru ṭhin. Mahse tuna ka awmdan hi chu keimaha ka nat ber leh a tawpkhawk a ni ngei ang, ka inthunun thei hauh lo chu anih hi.

“Maggie ṭap i duh tawkin ṭap phawt la, i sawi dawn nia.” atih te hlei hlei chuan ka ṭah chhuak a ti zual a, ka chau tawh em bawk a ni. Kum 15 zet a liam tawh, Rodingliana ka nun aṭanga a kalbo kha, mahse khami ni aṭang khan natna leh thinrimna hlirin min bawhbet a, ka na a, ka na nawn fo a, hahdam ni aiin hrehawmna leh natna ten min bawh buai leh fo.ṭhin chu a ni si a. Ka hah a ni, ka hah hluah hluah. Ka duhtawka UNghaktei kuah chunga ka ṭah hnu chuan, in sut deuh hlap hlapin ka inla hrang a, “Nakin lawkah a nupui hual a neih a ngai dawn a, chuan ka fapa ka neihchhun min laksak leh mai emaw a ni ang, chu chu ka tuar zo lovang, ka chak tawk tawh lo a ni.” tia ka ngaihdan leh ngaihruatna zâwng zawng ka sawi hnu chuan, “Chuvang chuan maw khati taka i ṭah a?” mak ti hmel lek lek chuan zawt a.

“Um, ka hlauthawng, ka hrelo kei hian eng nge ka hlauh viau pawh ka hrelo.” tia ṭawng nawk nawkin ka thaw leh hak ṭhin, Ka dar tawn tawna min vuanin, “I hmangaih em ni?” atih thut chuan melh zawkin, “Ka hrelo, aniang.” zawi zeta ka tih chuan, a thaw hak a, “I hmangaih leh hmangaih loh pawh i chiang lova, tin, i hlauhthawn chhan la nise i fapa lakhran ania, la hrang duh nise i awm loh laia kan kuta a rawn hmuh khan a ti daih tawh ang, tin, nangpawh he hmunah hian enkawlna pek i ni miah lo bawk ang. Nupui a nei anih pawhin a fapa tan a in hi a pêk tur thu ala sawi cheu a,” atih chuan, “Engmaw? He in hi maw?” ka ti bah leh nuai tawh. “Aw ni e, chuvang alawm kan ve zel ni.” atih chuan, ka mit ka chhing a, Ani khan inneih zungbün a bün ve tak e, ka kut chu ka en leh a, ka zungbun chu a phelh thei miah lo lehnghal a.

“Nupui a nei tawh tiraw?” ka tih sap chuan, “Nei tawh e, i harh hun a nghak hman ta lo che anih kha. I chungah a lawm zia te, i vanga mi zawng zawng an him thu leh sang taka dah tu che hi Amah hi a ni. Doctor in a remtih hunah, in main branch lam aṭang pawhin call i dawng ngei ang, taka President chawimawina pawh i dawng dawn ni te in ka hria.” a ti duah a, a nui var var a. A thusawi dang zawng zawng ai chuan, nupui a nei tawh a tih khan ka thluak a luh a, a thusawi dang erawh ka ngaithla liam vel mai mai anih hi.

Kawngkhar a rawn inhawng a, Nicky-a leh ka fapa Rodingliana rawn inpawm lut chu ka lo melh reng a, “Mama,” tia ka fapa in min bân rualin, ka bân ka lo phar ve vak a, UNghaktei pawh a in sawn ve nghal vat mai. “Mama, hi a damlo a tibuai vak suh aw.” tiin dim zetin ka fapa ṭawng zir ve ṭan tawh chu ka malah a rawn ṭhuttir a, “Fapa fel tak a ni.” atih rual chuan, “Ni e, Anu in hna a thawh lai pawhin, a pi te a pu te bulah alo awm thei a,” nui lui sanga tiin ka fapa chu ka chhaih daih a. “I natna ka thlen zawng zawng tawh che ah khan min ngaidam rawh aw.” a rawn ti erawh ka beisei loh lutuk anih avangin ka en zawk mai.

“I rilru ka ti na fo a, ka hrethiam lo che a, mahni hmasial takin i lakah ka awm fo bawk a, mahse Rodingliana ka hmuh ruala i tawrhna tur zawng zawng ka ngaihtuah hian ngaihdam dil hi ka ba che a ni.” a ti leh a, chhanna pek a, eng emaw sawi ve duh viau mah ila, ka hrawk a ro a, ka dang a awk vek a, engmah ka sawi thei lo.

“Chuan buaina tam tak chingfelin, vawiin niah chuan mi zawng zawng ngaihsan i ni ta a, silai mu pahnih dawngin, i dam chhuak bawk a, ka chhuang lutuk che ania.” tiin a nui hawk a, “I dam chhuah leh avangin ka lawm e,” tia ka chala a rawn fawp zeuh erawh kan fapa ber hian a hrethiam ve nge a kut beng tarh tarhin, a nui hak hak a, keipawh mittui tling pamin ka nui ve suk suk tho.

“I fapa hi khawiah mah ka la bo dawn lo tih hria la, mahse i rawn harh hun nghak hman lova nupui ka neih chhan erawh ka lak aṭanga ka fapa awm hlat tir ka duh tawh lo vang zawk ania.” atih chuan ka hrethiam lo, ni e, a nupui neih leh ka fapa hian eng inzawmna nge an neih ka hre miau lo a ni. Ka biang rawn chul zeuhin, “Ka hmangaih che ka tih tawh kha, ka oa thu kha ala ngai reng a, ka hmangaihna che erawh a zual tulh tulh thung si a,” tiin a nui sang a, “ka hmangaih che ka nupui duhtak.” a ti leh kher erawh mak ti zetin ka melh a, ka kuta zungbun ka en leh rualin, a zungbun bunna lama rawh vawn hnanin, “Ka nupui hi ka hmangaih, chuan ka fapa pawh.” tiin ka hmuiah a rawn fawp zeuh a, chhan letna chhang pawh ka hrelo chu a ni e.

A inlak hran hnua, ka fapa chu chawi in, “Mama, hi mu rawh se, nangpawh i mut a hun tawh a,” tiin min melh tawh hauh lovin pawnlamah an chhuak nghal daih a. Ka ngaihtuahna chu a buai ve map mai. Engtiklaiin nge ka inneih? Ka remtihna a ngai pawimawh vak lo erawh thinrim tum viau mah ila ka thinrim hleitheilo chu anih hi maw. Tunah rih chuan engmah ngaihtuah ka peih tawh lo, ka hmangaih te pahnih hi ka ta an nih chhung chuan keichu ka ṭha a ni zel mai e.

Conti…

This Post Has One Comment

  1. Robertnon

    Все трендовые события часового мира – актуальные новинки культовых часовых марок.
    Абсолютно все варианты часов от бюджетных до ультра люксовых.
    https://watchco.ru/

Leave a Reply