You are currently viewing PHUBA S2 – 18

PHUBA S2 – 18

Spread the love

PHUBA S2 – CHAPTER-18

JONSMELY BAWITLUNG

“Bawihi, i dam a ṭha tawh bawk a, in hna in zo tawh bawk nen i u te kan ngaihtuah deuh hlek a, i pu a ṭha vak bawk silova Tamil lama let leh kan rêl a,” ka pa in atih chuan, Nikhit-a khan inchhungah ro a rêl vek a ni tih ka hre tawh a, a nu leh pate vang erawh chuan chhungkaw lakah thil pawi tak a tih erawh ka ringlo. Mahse tunah hian eng emaw buaipui a nei a, damdawi khaihhnawiha man a ni ve ringawt pawh kha endik deuh chu a ngai a ni.

“Ka pa, kan In pek let leh kan ni tawh tho a, Mizoramah hian awm daih ula, URempuia pawhin a duh zawk daih ang.” ka tih chuan, “Nilo e, ka fanu i u te chuan an duh zawk anih pawhin, Chhungkuaah buaina a awm laiin kan tlansan thei ngawt bik hleinem. Nizan lamah Adhitya te nen pawh kan inbia a, engkim siam ṭhat a ni vat mai ang.” atih chuan, “Puih theih che u ka chak,” ka ti sap a.

Nicky-an ka dara rawn vuanin, “Kan la pui vat dawn alawm,” atih chuan ka khi ve sak mai. “Engpawh nise, Dingbawiha Birthday zawh lamah kan haw ang kan ti a, Mizoram ngeia lu nghah duh i pa avang hian chhungkaw buaina a fel huna, i pu pawh a harhchhuah hunah kan rawn kir leh ngei ang.” ka nu chuan a ti ve bawk a.

Tun nihnih thum liam ta anga hlim hi ka neih ngai pawh ka hrelo a, ka hmangaih, ka pasal ni ta Lalmuanzuala bulah hi chuan engkim hi a fel thlup zel mai anih hi. Kan ṭhatlai hun misual man nan kan hmang zo vek ṭep anih hi maw. Mahse heti hian ka remtihna tel miah lovin chhungkua kan insiam chu a ni reng a, hlimawm loh a ni hauh silo.

UNghaktei pawh an pa a lungleng tawh bawk aniang a rawn chah ngun bawk si a, tukin zing lamah a haw a ve tawh a, Rodingliana Birthday-ah erawh a chhungte nena rawn kal a tum ruh hle a ni. Kum naupang a ni tawh bik lova an inneihna pawh kum a liam ve tawh, nau pai ve vat sela tih ka duhsak hle a ni.

Ka nu leh pate hi tunah kan bulah cheng lovin kan in lamah an awm deuh tlat a, ka pa in a duh zawk miau si a, mahse kan fapa avangin kan in lamah an rawn tal tam zawk chu ania. Tin, Nicky-a te naupang ber Didiki pawh kan Inah a rawn awm tam viau mai. “Nau awmtu kan nei ṭha sia, a dang hi siam belh vat ila,” ka dara kuaha, ka beng bula phun sur sûr a Nicky-an atih chuan ka mengrûm teh e. “Khatia i men khan min tiphur ṭhin,” tia a nui suk chu a, a pumah ka nghawk sawk a, a nat awm nen na ti awm pawhin a awm duh miah lo nia.

“Bawihi, zaninah chaw ei kan nei dawn ania,” atih chuan, “Eng zat?” ka lo ti vat a, “Pasarih an ni ang, chuan zanah inleng i nei dawn bawk aw.” a ti leh a, tu nge pawh ka ti chuanglo. “Um, engpawh nise choka kan check ange, eirawng ka bawl ange zanin chu, mikhual kan nei dawn sia.” ka ti vel chu min eilo tih hriat zet hian a ner suk a, ka ei rawngbawl thatchhiat zia kha a hrechiang ve bawk em a ni. Chutih rualin ka nu leh Nunutei hrual zal ka nih hi ala hre ve miah lo thung a. Fridge chu hawngin chawhmeh chu ka enkual dan dan a, ka duh ang thlai a awm lo chu ner nang in, “Bazar ila ala hma tho a.” ka tih chuan, nui vur vur hian, “Awle Boss,” tiin ka darah bawk min kuah in min chhuahpui nghal a, keipawh khiang rah tla an sawi ang maiin ka khi reng mai anih hi.

“Didik in lo in awm thei ang tiraw, kan bazar lawk dawn a,” ka tih chuan, “Tehreng mai, kan Ice-cream ei tur min lo hawn ula,” a ti ve bawk a. Ei siam leh in tifai tu atana Nicky-a rawih sa te an awm ve bawk a, ngaihtuah em em lovin kan kalsan ta nghal a. Kan fapa felna em em chu chhuak tur ngena ṭap tih vel a nei ngai miah lo hi a ni. Pawm tu leh awm sak tu kan ngah bawk a, tupawh mai hi a duhin a awmna apiangah a tlei a, a nui khek reng thei hi kan tan chuan a lawmawm tih loh rual a nilo.

“Maggie, Sangmuana an man kha ka hrilh ta miah lo che a.” atih chuan, “Chuan,” ka ti a, ka melh zawk bawk. Sangkimi hi ka harhchhuah hnu hian ka la hmu miah lova, a chanchin hriat duh viau mah ila, ka zawt hreh ve a ni. Min haw viau angem, khati khawpa a duh a pasal ni mai tur ka neih sak chu a ni reng si a. “Court-ah ka ding ta lo mai. Finfiahna a ṭha tawk a, a tang ngei dawn bawk a, Prôsecütór ni mah ila court pawhin min hrethiam takin midang ka din tir a.” atih chuan, “Nia, i tan pawh a harsa ve ang.” ka ti a, a sawi zawm ta biklo. Ka kutah a hum leh rûn tawh a, ka harhchhuah aṭanga a tih fo dan a ni a, mahse ala reilo ve bawk nen ka la ngaih neih thei meuh lo chu anih hi.

Bazar kan thleng a, motor a dahfel rualin chawhmeh zawrhna lamah kan chhuk thla nghal a, bazar bag lian zet a ak a, ah ka tum lahin a phal der bawk silo, ka nuih ka nuih ringawt. Ka duh ang tawk kan bazar meuh chuan keipawh ka inkhai bawr ṭun mai. “Nupui neih man a awm hle mai.” a ti erawh, ka kut hi ruak lo se ka ti hle a ni. Motor-ah kan thil lei ho kan dah a, Mc hnuaia park kan ni a, thawmhnaw ka mamawh tih chhuanlamin a chhunga luh a rawt leh tlat tawh. Diktak chuan ka nu leh pa an awm lova , UNghaktei la a haw tawh bawk si a, ka fapa ka ngaihtuah ve deuh hlek tawh, A ni leh awmpui te ringawt chu a tlei ti mah ila alo ṭah te ka hlau rüm rüm tawh. A pian aṭanga ka hmangaih nghal, ka thinlung chhung ril ber luahkhat nghal tu ka fapa hi, midang a awm lai leh ka hna vanga hmun hla taka ka kalsan lai pawhin ka thinlung hian ka hrereng ṭhin miau a ni.

Silaia kah ka nih lai pawh khan, ka fapa ka hmangaihna hian min chhan ka tilo theilo. A tan ka nun a ngai tiin nikhaw hrelo a ka awm lai pawh kha, ka ngaihtuahna chawl ve ngailo khan ka fapa tana harhchhuah kha ka tum ber a ni fo ṭhin. Ṭawng ri ka hriat hmasak ber ni te khan ka thinlung hi a lawm veng veng a, ka fapa ka hmu leh dawn tih leh engkim chinfel a ni tawh dawn a, kan awmdun thei ang tia ka inhnemna khan min kai harh a ni. Ka harh hnuah erawh ka beisei ngam ngailoh a pa, ka hmangaih ni bawk Nicky Lalmuanzuala hovin chhungkua ṭha ber din tumin hma kan la ve mek chu anih hi maw.

“Lokal vat teh Maggie, Bawiha ka ngaihtuah riau ania.” Nicky-an atih chuan ka ngaihtuahna aṭanga harh zawkin, Nicky-an ka vawn theih tura a kut min pekah chuan ka chelh vat a, nui sangin, “Nikhaw hrelo a ka awm lai khan, i hmel ka hmu ngai miah lo, i aw chiah ka hre ṭhin.” ka ti thut erawh mak ti deuh hian min melh zawk a, “A ni lawm,” ka ti nghal hliai chu ka ṭawng dan avangin kan nui leh rih a. Ni e, kan sinior tawh a, hetia no taka awm rual hi kan ni tawh meuh lo, mahse he mipa chhelo leh hmelṭha bawk si bula han pangchang vel aia nuam hi a awm heklo. Khang kum chhung zawng te khan ngati nge ka lo pangchang ve zeuh zeuh lo aw ka ti rüm rüm zel chu anih hi.

“Bawihi, heihi ha chhin teh?” atih chuan mak ti zetin ka en a, a thawmhnaw kan lei dawn emaw ka tih laiin ka thawmhnaw tur a en daih a, mi hmuha hnial ka duh loh vang chauhin ka ha chhin mek chu anih hi. Ka chhuah rualin, “Business suit ngawt i ha hi ka ning a,” nui suka atih chuan, “Tehkher che chuan,” ka ti hlak a, kha heipawh tiin thawmhnaw la chu a thlang ṭeuh a, “Ka duh ṭeuh ṭeuh lo, pawnfen phei chu,” tiin sawi zawm duh lovin ka nui hak hak a, “A ngai tlat,” tiin a la pack tir hram zui.

Dawr pali kan luh hnu chuan, kan bawr leh tawh teh e, pawisa pek ka tum la in, “Sinior nupui i nih kha phawrh phawrh ve suh,” tiin min hnial zel bawk si a, “A tawk tawh, kal phawt teh ang, thlakhat daih kan lei tawh hi.” ka tih chuan, “Kum 10 daih lei sak che ka tum asin.” atih chuan ka nuih pawh a za tawh lo. Ka kal hmawk hmawk chu min zui ve tih ka hria, “Taka Ice-cream kan lei miah lo,” tiin kan thil lei sa ka khai chu ka pe a, “Ka lei lawk ang, duh leh gate pawn lamah ka lo hmu mai ang che.” tiin min chhan hma in ka kalsan a, Ka lei zo ka let leh ruala ka piah lawka Car vara lut ka hmuh chuan hmuh chian tumin ka kal hnai a, mahse a tlan zui daih en zui vawng vawngin, “Nikhit,” ka ti chhuak sap a.

Ani kha Mizoramah a rawn kal em ni? Rawn kal ta se eng nge a rawn tih ang? Steel Industry lian ber kan neih Chu Varte an ni. Lawmpuia’n a enkawl mek a, Ani hi ka zawt duh angem? Nge ni a thildang vanga rawn kal zawk. “Maggie, eng nge i ngaihtuah, vawi tam tak ka ko che a,” ka hmaa Nicky-a rawn ding chuan tiin, chik zet hian min en a. “Nikhit-a Mizoramah a awm.” ka tih chuan, “A hna avangin a rawn kal em ni?” hriatthiamloh hmel zetin a ti a. Ni e, Ani hriat dan kha chuan India rama doctor kan neih ṭhat ber te zinga mi kha a ni tlat a, hetia min zawt pawh hi a awm viau a ni.

“Ka hrelo, mahse Industry buaipui ngai reng reng lo khan, Adhitya chanpual thlengin a chhuhsak vek a, ka pu la damdawi Inah a awm bawk si a. Chuvang ania ka nu leh pate pawh haw an tum.” ka tih chuan, “Eng nge awmzia?” a ti nghal reng a. Thil thlen dan leh man anih ve dan te, mahse ka pu puina zarah fihlima ngaih niin a chhuak a, ka pu nen an inbiak laiin nikhaw hrelo a tlu anih thu leh Adhitya lungawilo Nikhit-a laka a lungawilohna a lantir laiin Industry zawng zawng a kuta a awm tak dan te ka sawi a. Tin, damdawi vanga buaina a thlen hmaa Msi kidnàp anih laia kan boruak leh ka ringhleh dan zawng zawng te zep awm miah lovin ka hrilh bawk a. A tawp kharnan, “Nikhit-a hian eng ber nge a buaipui ka hrelo, mahse ka unaupa, kum 10 aia rei ka hriat mipa rilru thianghlim leh rilru ṭha hi Amahah hian ka hmu tawh lo. A danglam tawh a ni.” ka tih chuan, Muangchanga min rawn kuah bêtin, ka samah a chul hliau hliau a, “Hmanni lawkah dinhmun derthawng takin i awm a, tunah la, enkawl mek angin i thawhpui te chuan an hria che a, heng lam nilovin hahdam takin awm la ka duh.” atih chuan thawk la hakin, a kawngah kut rawlhin ka kuah let ve a.

“Keiman Nikhit-a a ni ngei em ka lo enfiah dawn nia,” tiin ka chalah a fawp zui vang vang a. Ka ngaihtuahna kal vel avangin ka lo inhum ruh hman viau tih hriat takin, ka chala a fawh rual chuan ka hahdam huai huai thei nia mawle. Min kuahna a thlah hnu in, “Eirawng i bawl nasa si a, tam deuhin chaw ei ang che.” atih chuan nui var varin, “Tehreng,” ka ti ve a, ka thawmhnaw chu thlek zeuhin, “I nalh lutuk, kawrfual ngawt hi ha la a ṭha ang.” atih chuan, “A teuh lo,” ka lo ti hlar chu a nui zui hawk hawk a.

“Kan chaw ei tur te pawh an lo thleng dawn tawh ang, taka ka koh lai che khan min chhang silova, i laklawh anih ringin Bawiha kha A ni in a hruai haw daih ania, ka nu khan a rawn sawi nasa ve sia.” atih chuan, “A riak lovang tiraw?” ka lo ti sap a. Diktak chuan ka hna avangin hnute takngial pawh ka pe rei hman lova, ka dinhmun ngaihtuah chuan ka thlakhlelh hun lai ber a ni mahna, mahse ka pawm ve hman meuh lo chu ania. “I ngaih viau leh kan lam dawn nia,” atih chuan a kutah chelhin inhnuailamah kan chhuk thla dun ta a.

Rei pawh ṭhu lovin chaw rawn ei tur te an lokal chuan kan ri hluai a, a ṭhian thum te leh an kawppui te ho an ni miau a, mahse pasarih kha a ti ve si a tu nge pakhat lokal tur ni ang le, tia ka ngaihtuah laiin kan in kawtah motor in hung thawm a ri a, hmeichhe pheikhawk sang pen thawm ka hriat ruala ka mihring hmuh avang chuan nuam lo ka ti thar thut a ni ber mai, Sangkimi a ni miau a. A hmaa ka hriat ṭhin Sangkimi ang chiah kha a ni leh tawh a, thawmhnaw zahawm takin a inthuam a, a inhmeh leh hle bawk. Ka hmel a hmuh rualin a nui sang a, a nui hmelah erawh tih derna a lang hauh lo.

“In inneih ni khan a nachang ka hrelo a, ka rawn kan leh hman ta bawk silo che a,” tiin thilpek fun lian zet hi min pe a, a nui var var reng chuan mak takin ka inthlahrungna a ti reh a, ka ngaina thar thutin ka hria. “Ka lawm e, eng nge i an zel?” ka tih chuan, “Ka ṭha tawh lutuk alawm, ka nunna min chhansak avangin a vawihnih nan ka lawm e, kan ti nawn leh hram teh ang,” tia a nui hak hak erawh hrethiam lo takin ka en a, “Nakinah ka la hrilhfiah dawn che nia.” tiin nui var var chungin midang ho chu a be nghal siam siam a, keimah zawk hian midang biangbiak dan vel hi ka thiam hlawllo. Mipa ho an ti ti a, Keini hmeichhe rual pawhin eng eng emaw sawiin kan ti ti hrang ve bawk a. Sana ka en a, zanriah ei mai a hun tawh viau a ni.

Chokaa ka kal tur chu Sangkimi chuan, “Nula awmchhun nih manah ka lo enpui ang che.” tiin min zui lut ve a, Kan awmpui te an fel a, ka sawi nawn ngai hauh lovin chawhmeh an lo ti lum a, siam mai an inpeih thlap tawh. “I rawn kal ve duh a, ei tawp a theih reng asin.” ka tih chuan, “Maggie, ka lawm tak tak ania aw, engkim vangin.” atih chuan, “Ka hna ka thawk mai alawm.” tiin ka nuih let a, ka rilrua awm reng erawh sawina hun niin ka hria. “Ka lo harhchhuah khan heti hi kan ni ta si a, pawi ka ti, midang ta laksak tu nih hi ka duh ngailo asin.” inthiamlo zeta ka tih chuan a nui zui hak hak a, “Diktak chuan in pa hi chu a chhelo chiang alawm,”. atih chuan za lo zet hian ka nui ve a, “Mahse ka dinhmun derthawng vang leh a pa in nupui nei vat se a duh luat vang khan min venghim thei tu ber anga a ngaih kha ka pa khan min neih tir a tum mai ania. Kan inkar kan hrechiang a, i chungchang thu la hriat ka nei tam narawh e.” atih chuan, “Min hria maw?” ka lo ti ha a, “Hria e, mahse i sual ka ti ṭhin che a, i awm ve laia runluih che kha nuam ka ti, ka unaupa i kalsan avangin.” tia a hmui a ti pawrh tar chu ka en a, sawi tur pawh ka hrelo. Khang ka hmuh dun fo a, Sangkimi awmdan vel te kha min runluih vang mai mai maw lo ni a.

“Diktak chuan chhungte vangin kan inhnaih em em vek a, keipawhin u angin ka en ṭhin. Innei tura min tih pawh khan Amah ang chiahin ka hnial nasa viau a ni. Mahse thil awmdan kan hre dun a, nang la i bo daih si, zawn hmuh har takin,” a ti leh kher a. “Engkim kha ka pa leh Pazira ruahmanna vek a ni. Mahse ka pa hi chu ka ngaisang ve takzet a ni, a rindan leh ngaihdan ruk te pakhat tê mah diklo a awm lo, Ka nau Sangmuana chungchang tih loh kha chu.” a ti chuai raih a, zawh duh viau mah ila a hun nia ka hriatloh avangin, “A pawi ka ti hle mai.” ka tih chuan, a kûn ngiai chu rawn hawi chhuakin a nui lui a, “Ka ril a ṭam tawh, chaw ei chu siam tawh ila.” a ti daih chu keimah zawk pawh hi ka lawm viau a ni.

Zanriah kan kil lai te chuan a ti ti reng emaw ka tih laiin ka thlengah eng eng emaw alo suak leh zeuh ṭhin a, kan mikhual te tan ei rawng ka bâwl ve bawk a, keimah hian ka ei tam leh ber chu ania. Midang te chuan min fak ve liam liam a, Sangkimi pawhin min fak uar takzet. “Heti hi chuan chaw ka rawn ei ziah ang, ULawmpuia hi chu sawm ve tawh miah suh aw Maggie.” atih chuan kan nui hak hak, diktak chuan kan chaw kil aṭang khan Lawmpuia hian a fiam sek a, a ti tau lo chauh chu anih hi. Nula naupang tak ni mahse a fing fel khap a, inla no tak anih loh avang te hian a tau bar bar peih teuhin ka ringlo.

Chaw kan eikham a, Anni pawh an haw a, kan pahnih chauh kan ni leh ta. “Bawiha chu hruai ṭal i duh em?” Nicky-an atih chuan sana ka en vut a, Dar 10 alo ri ṭep tawh nia. “I nu phone la chanchin zawt hrim hrim teh?” ka tih chuan, “Awle boss,” a ti zui sup a. A phone hmang zo chu, “A muhil tawh a, ka nu chuan naktukah i pa nen kan rawn hawpui mai ang chu a ti a, ka aw ta mai asin.” atih chuan hnial buai ka tum biklo. An fapa nupui neihna chang hrelo leh an mangang pui ve lek lek hian fapa leh nupui a nei thut a, an lawm em bawk a ni.

Ka intifai leh te te a, ka mut rualin ka kham.thei turin a bân alo phar duai a, “Bawihi, min hmangaih thu hi sawi ve tawh la.” atih chuan, nui hakin, “Ka hmangaih leh hmangaih loh che pawh ka hrelo.” ti zui hlaka ka hnungchhawn rual chuan, “Mahni phone a voice record dah ṭeuh kha i niin ka hria, khatah kha chuan min hmangaih thu kha i chham kur duah si a.” a tih chuan ka inher rang teh e. “Ehe nang hi ka phone bo emaw ka tih kha i lo ruk vang a ni maw?” ka ti hluai chu, “Ru â? ka ru awzawng love. Ruk hi ka ru dawn anih chuan nang chiah hi ka ru ang che.” lawmlo zeta a ti chu ka nuih a za tlat nia. A bân chu la sawn vutin, “Phone ru tu tiin min man duh hial ta ve ang.” tia a inher hmak erawh ka nuih a za tulh tulh. Ka ṭawngkam hawihawm lo zet a tih tauh pui chu ania.

Amah hnungchhawn zawnga ka mutdan ka siamrem chiah chu, “Pasal ka thinrim a, ka lungawilo bawk a, nupui i nihna angin min thlem ve ta che.” a rawn tih hluk chuan, ner nangin ka chal ka beng a, diktak chuan bialpa pawh nei ngailo, kum 15 chhunga ka bialpa vawihnih chauh nei ka ni a, chutah ka bialpa te pahnih pawh amah ve ve a ni bawk a, thil tam tak ka hriat rualin tam tak hi ka hrethiam chiah bik lo chu anih hi. Ka mut dan inher remin, a kawngah ka kut ka rawlh a, a bengbulah, “Ka hmangaihpa hi a titau maw?” ka tih chuan rang zet hian a rawn inher a, “Engmaw i sawi?” atih chuan, nui hak hakin, “Ka hmangaih che Lalmuanzual.” ka tih chuan min chhang dawn emaw ka tih laiin ka tukhum rawn man thutin min fawp nghawng ngawng a, min kuai thutin ka chung aṭanga uluk taka min melhin, “Vawikhat sawi leh teh.” atih chuan, “Ka hmangaih che.” ka ti nawn leh chu, “Keipawhin,” tiin dim zet hian min fawp.zui lehnghal a.

Nupa tena an tih ve tur reng chu, a vawikhat nan ka harhchhuah aṭangin kan hmang dun ve ta. Ka taksa chak hun a nghak tih hriat takin a uar narawh e. “Chawbel bula ril ṭama min dah rei man anih kha.” tia min rawn fawp leh erawh nui hakin, vawi tam nupa nun kan hmang a. Ka tana mipa awmchhun a ni a, tunah chuan a nupui ka ni tawh bawk. A bulah hian ka hlim a, keimaha kim lo te hi a bulah chuan an famkim ṭhin si a.

Hun a liam ve bek bek a, kan chhungkua bik pawh kan la hlim ve viau a. Ka taksa chak tawh ti mah ila, nau awmtu lak a duh tlat avangin nau awmtu kan nei thar a, Maremi niin a kum pawh a naupang chhia tawh viau biklo. Nicky-a hnaah a kal a, a nu leh pa leh ka nu leh pate inkawmna hlimna a ni a, nau awmtu nei mah ila pi leh pute an kim ṭhin vang nge kan khua pawh a har hman meuh lo. Ka hna lamah erawh Nicky-a duhdanin chawlh ka dil ve ta nge nge a, min ui der ve in President hnen aṭangin chawimawina hial ka dawn avangin bâng tawp lovin pension anga kal tir ka ni a, ka lawm viau bawk. Diktak chuan ka hna ka zawm chhan ka chiang a, ka chingfel tawh bawk, a aia nasa pawh a ni ang chu, kum tam tak thawk lo mah ila record ka nei ṭha a, min ui der ve viau bawk. Chhungkua ka din tawh miau avangin bansan kha pawi tihna ka nei hauh lo. Ka nu anga chhungkaw zahawm tak, pasal te phena awm ṭhin hmeichhe huaisen, pasal te ropuina nih ve ka duh a ni.

“Bawihi, Duatpuia Birthday lawm dan tur hi ruahman teh ang, kum 1 na kan lawm silova, kim taka sawm ka duh ania.” Nicky-a office bâng inthlak mawlh mawlhin a tih chuan, “Nia, ruai kan siam ve dawn em ni ang,” ka tih chuan, “Chiang sa, a hmun zawk hi khawiah nge i duh?” atih chuan, “Ka hre miah lo.” tiin ka melh a, min rawn en ve ruala a phun hluk rualin min rawn panin min rawn fawp vawng vawng a. “A chhang tur pai vat vat la ka ti.” atih chuan, “Uar sauh sauh la ka pai ve mai ang.” nui hak haka tlanchhe paha ka ti erawh, a nui ve hawk tho.

Chhungkua in kan sawi a, picnic pah a ni mai lawm tiin birthday lawm an rel a, ruai tur la keiman ka tum ang an ti liam liam a, a pu te pahnihin in tum sem an tum a, A ni te ho la an phur bawk si. Sawm zau an tum hmel bawk si nen spot aiah Hall hawh an ti leh ta zawk a, kei a nu ber hian sawi tur reng reng ka hre ve lo chu anih hi.

“Ka thusawi kha ila hrereng em? Min pe ngei tur a ni, anih loh chuan i chhungte zawng zawng ka that vek ang,” ti tu Nikhit-a chuan rüm zetin min melh a, a mitmenga tualthah chakna lo lang pawh ka hmuh hmaih lo. “Ka hre lo eng nge?” tia ka zawh rualin hnai zeta min dinchilh nghal in, ka hrawkah a rawn zai hrawk rualin, “Maggie,” ti ṭhawt tu avang chuan ka harh kawk a, min kuah vattu avang chuan ka lungphu rang lutuk chu a zawi tial.tial a, “Kha tui in rawh, mangchhia i nei anih kha.” atih chuan tui chu ka lem khawlh khawlh a, ka thlafimin min bual huh vek chu puana min rawn hruk sakin, “Eng nge i hmuh a?” atih chuan, “Ka hrelo,” ka ti sap ringawt. “Muthilh tum leh la atih chuan min kuahin, ka bân chu a chul heuh heuh a, mangchhia erawh ka nei ta lo.

Ka mumang avanga ka rilru nawmlohna tih lan duh lo viau mah ila ngaih ṭha in ka awm thei hauh lo. Ka chhungte he hmuna awm mai nilo, ka unau te chanchin ka ngaihven ru reng a, URempuia leh Adhitya hnen aṭangin chanchin eng eng emaw pawh ka hre nual a, mahse Mizorama Nikhit-a a rawn kal leh kalloh ka zawt erawh a rawn kal an hriatloh thu an sawi ve mai a, chu chuan ka rilru chu tlêm chuan a ti hahdam ve deuh, mahse Amah Nikhit-a hi ka hmuh phawt loh chuan hahdam tak tak ka nei theiin ka ringlo.

Ni a liam a, Kan fapa Rodingliana piancham pawh alo thleng ve ta reng mai. Kan va hlim si em. Lawngtlai lam chhungte pawh a tam thei ang berin an rawn lang a, UNghaktei pawhin a in sawi ang ngeiin a pasal.bakah a nu leh pa te a rawn hruai a, Sangpuia pawh rinloh deuh a rawn lang ve alawm. Nicky-a chhungte pawh an ṭhahnem viau a ni. Tin, a ṭhiante bawk an fel leh tawh, a lawmna hmuna kalna tur motor thlengin an lo ngaihtuah vek a, resort pakhat lian ve takah an buatsaih a, a tupawh kan hlim tlang vek a ni ber mai.

Kan fapa ṭawng zir ve tawh la lawm a hlawh in an pawm kual zuk zuk reng a, Amahin an awm tir hman meuh lo chu a ni e. Sangkimi te chhungkaw bik pawh an fel takzet a, kan inneihna zawng zawng buaipui anih ka hriat hnu phei chuan he hmeichhe hmelṭha zet hi ka ngaina viau tawh a ni. Tunah pawh programme a rawn duang fel leh thlap.tawh a, a nuamlo hauh lovang.

Pindana ka insiam mawlh mawlh lai chuan, “I nalh takzet,” tia Nicky-an ka nghawnga a rawn fawp zeuh chu ka lo nuih hak a. “Engtikah nge i rilru nawmlohna hi min hrilh i tum?” tiin ka hmaah a rawn ding a. He mipa hian ka awmdan engkim hi a hmuh hmaih ngailo anih hi maw. Thawk la hakin, “Ka ṭha mahse ka hrelo mawlh tu ka nei a, eng nge a chhan ka hre silo.” ka tih chuan, “I mangchhia vang hi em ni?” atih chuan, “A ni mahna,” tih chauhin ka chhang a. Zan thum ngawt he mangchhia hi ka hmu tawh a, hetiang hian ka awm ngailo ka mangchhia chiang zet zeta ka hmuh fo hian min ti hah in ngai ṭha in min siam ngai miah lo chu anih ber hi maw.

“Ti reh theih sak che ila ka ti.” tia ka chala a rawn fawp zeuh erawh a thawk ṭha viau chu anih hi. Ka insiam zawh rualin a kut min pe in, “I nalh takzet,” atih chuan, ka nuih var var a, Step tawpa kan fapa A nì tê-in a pawm chu en in ka nui var var a, kum hnih alo tling ve ta reng mai. A pian lai khan he hun hi ka suangtuah phak ngailo a, a pa min huat tur ngaihtuahin ngai em em chungin ka biru kha a ni si a, khatih hunlai khan ka fapa hi awmlo sela ka damchhuah zawh ka ringlo hial zawk, Nicky-a thi nia ka hriat vang te, a dam leh avanga ka lawm ruala ka hlauhthawnna, min hua angem? tih chauh ngaihtuaha hun ka hman lai zawng zawng khan ka fapa avangin ka inhnem a chak tak leh huaisen takin ka ding ṭhin anih kha.

Ka fapa ka mal chunga ṭhu chu ka lawm nui awr awr a, “Papa anga hmelṭha i ni,” ka tih te chuan a lawm lutuk chu a pa motor khalh chu a biangah a va fawp vel a. A pa pawh a nui ve hawk hawk mai. “Mama pawh hmelṭha, papa pawh hmelṭha,” tiin min chhaih a, a pa zawk erawh motor khalh anih miau avangin a tihbuai lutuk hlau in ka veng hram hram a ni e.

Resort kan thleng a, ka ngaihtuah aiin a ropui daih nia, a hawh man ringawt pawh a tlawm tehchiamin ka ring lo. Keini aia thleng hmasa an lo tam tawh in, Inchhung kan luh rualin present a dawn chu a lawm tih hriatin ka kut aṭanga chhukin a pan nghal a, naupang dang an tam a, awmtu an nei fur bawk a, keini pawh Maremia awm a ka ngaihtuah vaklo, a tlei viau alawm.

Programme kan ṭan a, Sangkimi ruahmanna nge nge a felfai thlap mai. Hunserh a zo a, cake kan zai a, ruai in a zawm nghal bawm a, Nicky-a fa meuh chu tia lawmpuitu kan ngah viau a ni. An sawm zau bawk a, chaw ei na na pawh kan ṭhahnem khawp a, a buatsaih tu nih manah Nicky-a rualin tupawh nui chungin kan chhawn a, ka bengbula, “Tuna i awmdan vel hi nangmah lo tawp,” nui huk huk chung a Nicky-an a rawn ti erawh, lei ka chhuah zeuh a, a nuih leh var var tawh.

Mi nawlpuiin chaw an ei hnu in, Didiki ko in, “Didik, Bawiha chu tu bulah nge a awm, a ril a ṭam tawh lo maw?” ka.tih chuan a tho vut a, a va zawng a ni ngei ang a rawn let leh erawh a, a mita hlauhthawnna chu ka hmu hmasa ber. “Nga ti nge?” ka.tih chuan, “Bawiha a bo,” a ti a, “Maremi pawh a awmlo, Dingtea pawh a awm lo, khawiah mah an awm lo.” tiin a mittui a luang nghal ngiai.ngiai a.

Conti….

Leave a Reply