You are currently viewing PHUBA S2 – 21

PHUBA S2 – 21

Spread the love

PHUBA S2 – 21

JONSMELY BAWITLUNG

“Heihi blueprint anih hi,” tiin Mark chuan lehkha var hlai zet chu ka hmaah a rawn dah a. Uluk taka ka en hnu chuan, “President Chamber a ni tih i hria tiraw?” tia alam ka hawi chuan, a lu a bu nghut a. “Secret Room ve hi le?” ka tih leh chuan, “A awm mai turah ngai ang.” a ti leh sup a, vawiin chu a mood a chhia a ni mahna, keipawh hian biak tam vak ka tum bik lo.

Blueprint kan en lai chuan ka phone a rawn ri a, ka pe let tawh lova ka kuta a awm hian a ṭangkai tlat, an track vek tho a, hman ruk tih vel ka ngaihtuah duh lo law law. “Hello, Nicky,” ka tih chuan, “Ka la tawh e.” a ti a, “A ṭha e, tikhan lo kawl la, ka la rawn lam ang, a hunah.” ka tih chuan, Mark chuan min lo melh nghal rûn a, engmah sawi tawh lovin phone ka dah nghal daih. Phone ka dah fel rualin ka nghawngah rawn rekin, “Min bûm tum hlek suh ang che.” a ti rum ul a, melh let karin a kut a laksawn hma chu chhan ka tum lo. A kut la sawnin a phun nghal hluk a, ka khuh nghal bawrh bawrh min rawn pe a, ka in nghal khawlh khawlh a, no chanve chu ka in a, a bâng zawng chuan Mark-a hmaiah chuan ka theh nghal ṭhawt a, a thle nghal sawk mai. A rawn hawi leh ruala na zeta ka hnek erawh a rinloh dana che ka nih vang nge a tawlh dawr a, a thaw ri hrawk a.

Min rawn en leh ruala a kamsir thi chu tuai zeuhin, “Hmeichhe kawlh lutuk, tia a bân sei zeta min rawn ban erawh man betin ka seh sak a, a kut lehlama ka sama a kek pawh ka ngaipawimawh lo, hepa hian a duh hun huna kut min thlâk hi ka ngai theilo bur. Ka chhungkaw hmanga min vauna hi ka hlauh phah viau in a ring emaw ni?

Ka rinloh deuhin ka hnung aṭangin nghet zetin min kuahbet a, “Maggie a tawk,” awki zaidam ruiha atih chuan Nicky-a ka hrechhuak zawk mai. Ka sehna pawh ka thlah nghal vat reng a. “Nicky-a hmaa ka tawng lo che hi ka vanduaina a ni,” atih chuan ka chhang lo. Zuai muanga min thlah riai riai in, a nui ri hawk a, pindan chu a chhuahsan nghal daih a. Ka seh na tawk tih hriat takin ka ha ka tuai zeuh a, thisen alo kai niai nia. “Mark, ka zawt nawn fo ṭhin ang che hmeichhe tam tak zingah ngati nge kei kher? Kei chuan Nicky chauh ka hmangaih asin, kan fapa nen.” tiin ka phun nghal sap a. Tuna min hrenbeh chhan te hi ka theihnghilh a nilo, mahse Mark nen karkhat zet hna kan thawk dun ta a, a inah kan inhmu reng bawk. Misual min man tu ka tawng tawh, kha Ranveer Malhotra kha, Ani chuan kut min thlak a, ka chet ve phalsak ka nilo, a ṭul anih chuan midang ruaiin nikhaw hrelo in min siam fo anih kha. Mahse he mipa ve thung hi chuan min hruai chhuah nana a hman bak engmah tih a neilo a, kut a thawh pawn a aia na zelin ka thungrul zel chu ania.

Mit chhingin ka lu ka thing nawk nawk a, “Ngaihtuah tawh lo teh.” ka ti chhuak zui halh a, “Engmaw i ngaihtuah loh ang?” titu avang chuan meng kawk in, a kut bandage a intuam chu ka hmu hmasa ber. A hmelah thinrimna ka hmu lova, lungawilo hmel pawh a pu leh tawh lo. “Ka zawhna chu,” ka hma zawna a rawn din chuan a ti leh a, min melh chhuk rûn chu dak vah hian, “Engmah,” ka ti nghal hlar a, a nui suk a, “Lokal teh, i thiltih lai kha dah la.” atih chuan, a kalna lamah chuan ka zui ve nghal a. A office zau puiah kan awm a, ṭhutna lam a pan miau avangin a ṭhut rualin a sira sofa dangah chuan ka ṭhu ve nghal a.

“Thudik hrilh che ila min ring dawn lova, mahse tunah hian i pui na ka mamawh takzet a ni.” atih chuan, “Hetiang zawng lo hian ka puihna min dil ni la, ka ṭanpui duh hial zawk ang che, ka chunga i ṭhat tawhna te leh ka tana i thil lo tih tawh te avang pawhin ka hnial hauh lovang che.” ka tih chuan, a lu a bu nghauh nghauh a, a ṭawng leh hma in nula pakhat a rawn lut a, ei tur ṭhahnem tak a rawn keng lut a, a chhuah leh rualin, “Ka ti diklo tih ka hria, Nikhit-a Jâïl a tan avanga hmanhmawh taka ka haw kha i la.hriat ka ring.” tiin thingpui a thli a, “Ka la hria e,” ka tih chuan, “Nangmah ka hriat hma daih aṭangin Avasthi chungchang hi ka zir tawh mahse kawng hi a ping em a, ka ngaihven hi ka chhungte’n an hlau viau bawk si a, tin, mi hrang hrangin an lo zawng ve bawk si nen vawiin ni thlengin a tak ka la zawng hmu lo chu ania.” tiin ei tur chu ka lamah rawn dah hnai in a thingpui chu a in nghal khalh a, a thusawi leh tur erawh ka ngaichang ran thung.

 

“Nikhit-a hnenah khan chahbi chungchang ka sawi a, ka dil bawk a, tichuan hmelma anga en zui ka ni ta a, keipawhin thawhpui duhna thinlung ka pu lo. Tu nge a thawhpui a, tu nen nge an nih tih ka hrelo, mahse chahbi a zawng ve tih in inbiakna ka hriat ruk aṭangin ka hria a, chuan Mizoramah kha i chahbi engtik lai pawha i pai ṭhin kha ka hmu bawk.” atih leh chuan, a thingpui bawk a in leh a, ka ril alo ṭam ve tawh bawk nen, “Ei phawt teh ang, laklawh viau mah la.” ka ti erawh a nui hawk hawk a, ngai pawimawh lo zetin ka hmaa ei tur tuihnai zet chu ka duh ka ei nghal mial mial a. “Ei leh Inah ka tlanchhe ngailo i ti tawh tak e,” a ti kher erawh ka ner nang thung.

Kan ei zawh hnu chuan ka puar bawk a, ka mood a ṭha leh viau tawh a ni. “Ka in hi fang tlak chu a ni miah lova, mahse lokal rawh kan ti ti pah thei dawn a,” atih ruala a ding chu ka zui ve vat a, “Mizoramah khan i chahbi kha chhuhsak mai che ka duh rûm rûm a, mahse i hna vanga i buaina tam tak ka hriat ve avang khan min la pui theih beiseiin buaina ka siam sak lo che a ni.” atih chuan, “Mahse tunah heti hi kan ni a,” ka ti hlak chu ding datin min melh zawk a, “Ni e, hei erawh ka tih dikloh a ni. I bo thut a, tu hnenah mah i awmna i sawilo, ka zawng che a, ka zawng reng che, Nikhit-a takngial pawhin i awmna a hriatloh avanga Mizoram a rawn kal kha ka ni, Lawmpuia te nen kan inhmu a, tikhan tum loh takin thawh hona te kan sawi a, ka duh ai rei ka cham ta a, mahse nang ka tawn leh phah ta che a.” tiin pindan pakhatah min luhpui a, thil hlu dahkhawmna tih hriat takin hmanlai thil hlu tak tak awmze nei tak taka inrem chu ka enkual nghal a.

“Ngaihzawng nei suh aw, tia ka rilru ka sawi tlang loh chhan erawh i hna vangin i buai em a, i buaina belhchhah tu nih kha ka duhlo mai ania, tikhan ka kalsan che a, ka buai zia chu i hria a, tin, nangpawh. Damdawi vangin ka hming a ri tel ve tih ka hria a, mahse ka fihlim tak avanga nang hian min umzui lo i ni tih ka hria. I thuchhah ka ken lai te khan umzui che a hruaichhuah mai ka duhna che khan min tur nasa mahse i hna i thawk a, damin i rawn let leh ang tih kha ka ring tlat.” tiin eng emaw hi min pe a, uluk taka ka lo en chuan, “Kha marble kha Kum sangkhat a upa a ni an ti asin,” a ti leh daih a. A thusawi avang chuan marble chu ka en uluk lehzual a, “Sawi zawm ta che.” ka ti daih chu a aw thian kharh in, silaia kah i ni a, vawikhat chiah ka rawn hmu che, Sangkimi awm lai khan, mahse tu hnenah mah sawilo turin ka ti bawk a, i hre kher lovang.” atih chuan, ka marble ken lai chu la sawnin, “Um ka hrelo,” tia ka melh zawk chuan, “Venhimna tiin Mizoramah an hruai haw che a, ka rawn umzui che a, fapa i neih ka hriat rualin Nicky-a nen in innei tih ka hre leh a, khatiang tak khan hmeichhe pakhat avangin ka nat theih ka ring ngailo.” atih chuan Amah en duh lovin Pot in tlar dul lam chu ka hawi nghal daih a. Ni e, he mipa a ruka min lo duh ve em em tu hi ka khawngaih lo ka tih chuan dawt ka sawi a ni ngei ang, tunah pawh hrehawm ka ti hle si a.

“Ka thinrimna i laka lantir ka duh laiin chahbi kawltu i ni tih hretu dang an awm a, i fapa hmanga danchep che an tum tih ka hriat rualin Mizorama kal tur ka rawn tir a, i fapa ru chhuak tu ka hriat meuh chuan Nikhit-a kutah i fapa a awm tawh. Mahse ka sawi tawh kha, Nikhit-a ka ring lova, ka umzui nghal a, engkim ka thuhnuaiah ka dah ta a, i laka ka natna leh thinrimna te hi thunun la ka tum heklo, tin, Nikhit-a pawh kha ka kah tir ngei anih kha.” atih chuan, “Engkim i thuhnuaiah i dah a, ka fapa leh ka chhungkaw hmangin min hmang ṭangkai ta tho a tiraw?” ka tih chuan, “Chu lai tak chu alawm, I fapa kan ti na lo ve ve a, Nikhit-an damdawi inah a thukru a, keiin venhimna khauh zawk ka pe bawk a.” atih chuan ka nui lui hak a, “Ka kutah hian a him tawkin i hrelo em ni?” ka tih chuan, “A him tawk lo chu anih hi hetiang hi i nih?” tih elna tel miah lova a ti erawh ka thinrim ru leh viau tawh. “Midangin min chet khalh ngei alawm, mahse keichuan i fapa hi tihnat duhna thinlung ka la pu ngai miah lo, nang erawh thei ni ngat ila ka ti na ngei ang che, ka nat ang tal khan.” a ti nghat a, “Phuba maw!” ka lo ti sap ringawt.

“Ka fapa ru chhuak tu chu nang i nilo a, Nikhit anih bawk siloh chuan tu nge ni ta ang?” ka tih chuan a lu thingin, “Ka elpui hnai ber chu Nikhit a ni, mahse Ani hian a farnu hi alo hmangaih tak tak che anih dawn hi. I fapa venhimnan chuan keipawh min vau cher cher chu ania.” atih leh chuan, “Chutiang chuan a ti a maw?” ka ti hu a, a lu bu nghauhin, “Ti e, mahse hriat tam tak a nei tih ka hria, ka nu hmu tur che in a rawn tir che a, chu erawh tumah ka tih nat loh tur thu ka tiam hnuah, ka nu nilovin ka hnenah a rawn tir che tihna anih chu.” atih chuan, “Tichuan in pahnih chuan in thawk dun ta tihna em ni?” ka ti let leh fak erawh, ”Thinawrh tih hi i inhmeh takzet anih hi. Nicky-a nen hian in insual zing tawh hle tih Lawmpuia khan vawikhat min hrilh tawh asin. Tu nge chak zawk?” a ti daih erawh ka melh rûm hle ringawt.

“Kan thawk dun lo, a chhungkua a sawi miah lo, i fapa leh nangma himna ka tiam vanga, min pui turin a rawn kal tir mai che ania. Mi tam takin an mamawh che tih ka hriat vanga, vengtu che dah ka ni tih erawh i hrelo in ka hria.” a ti zawm zat erawh ka hrelo tak tak. Tuna a thusawi tam zawk hi awi tur nge awiloh tur tih takngial pawh ka hrelo, mahse a mitmeng leh awmdanah erawh dawt sawi a ang mawlh silova.

“I chhungkua ka venhim sak ang che, i fapa telin mahse min thawhpui rawh.” a tih chuan, “Aw tia ka chhan che avang a ni lawm ni hetah hian ka awm.” ka ti a. “Khatih lai kha chuan i chhungte vangin alawm min thawhpui, mahse tunah erawh ka sawmna che hi thawh dûn lam daih a ni.” tia nui sanga min en chuan, “Nui ziah rawh, i hmelṭha,” ka tih daih chuan a tum nghal hmak a, “I rualpui ngaihzawng tur pawh i hmu ve vat mai ang.” ka ti zawm zat erawh a mengrum teh e. Ka nui hak hak a, “Kan thawk dun dawn chuan ka cham rei leh awm si a, in ka mamawh dawn anih chu.” ka tih chuan, rang deuh hian Chahbi hi dawhkanah a rawn dah a, “In awm thei ang.” ati erawh mak ka ti a, a hrethiam tih hriat takin, “I pasal nen.” a tih leh chuan, “Um ilo leng ṭhin dawn nia,” nui var var a tiin chahbi chu ka la a, ka kalsan ta a. Mark-a In ka chhuahsan dawn khan min thlah tir a tum zet na in, a bike pakhat kawk va in ka hmang ṭangkai zawk ang ka tih khan ui hmel zetin chahbi min pe a. Ka kal dawn pawhin ka duhlai anih kha dim ang che a ti hram anih kha.

Nicky-a awmna hotel lam ka pan vat a, kawngkhar kik dat datin a rawn hawn ruala ka hmel a hmuh chuan min kuah nghal vawng vawng a. Min kuahna a phelh hnuah, “I ṭha tiraw?” atih chuan lu bu nghat nghatin, “Dinner ei chhuak ila,” nui sanga ka tih chuan, mak ti hmel deuh hian min melh a, “Um, mahse inbual ka lo tum chiah a,” a tih chuan, “Kan pahnihin inbual ila.” ka ti leh ta zel a, ka ngaih a ṭhat tak vang nge ka pasal bulah hian reilo tê tal hahdam taka awm ka duh rih tlat a ni. Ka awmdan vel mak ti hmel deuh a min en ṭhin chu ka nuih ringawt a.

Kan inbual dun a, bathtub-ah rei deuh tak kan in chiah hnuin, kan in tleuh nghal a. “Rei tawk kan inhmu lova, inhmuh leh lawmnan chuan a ṭhat viau kha.” tia ka hnunglam aṭanga ka dara a rawn fawh zeuh chuan, “Kan la buai dawn chauh a ni. Engkim kan la sawi dun ang, chutih rualin kan fapa a him a, tunah erawh i bula hahdam taka awm rih hi ka duh a.” tia ka thawmhnaw ka ha ṭha mawlh mawlh chu min kuai herin, “Hahdam taka chhungkaw a awm a chakawm tawh viau a ni.” a ti sup a, chhang lo mah ila ka thlakhlelh ber a ni.

Zanriah kan kil dun a, thil thleng dan leh awmdan vel ka sawi vek a, a ngawi vung vung chu en in, “Rengpuia fapa chu eng nge a an?” ka ti ta daih a. “Kan ṭha chu atia, ICU-ah an awm a,” a ti ve mai a. Khatia ka bo hnu khan Rengpuia khan min zawng zui a, mahse ka bo aṭanga ni hnih naah a fapa motor-in a sut avangin a thlawk haw ta kha ania. Rsa leh Sanjay erawh Mumbai lamah an la cham a, tuna kan hna erawh kei leh Nicky-a hian kan thawh zawh mai angai dawn anih hmel.

Mark-a Inah kan nupa chauhin kan cheng dun a, engkim ka hrilh ve hnuah ngaihtuahna a seng leh nasa tih ka hria. “Bawihi, naktuk hi ni ṭha ber a niin ka hria, Minister inhmuhkhawm a awm dawn a, chumi hun remchang chu kan hmang thei ang.” atih chuan, lu bu nghauh nghauh in, “Keimah ka lut ang.” ka ti nghat vat erawh a mengrûm leh viau a ni. “Ka ti tak tak,” ka tih leh chuan ka hmaah rawn dingin, ka chalah a rawn fawp vawng vawng a, a awmdan teh thut chuan chetsawn nachang min ti hrelo.

Doorbell a rawn ri a, min hlat hrutin kawngkhar lam a pan nghal daih a, ka thaw hak a, ka hmaa blueprint chu ka en nghal daih. Nicky-a chu Mark nen an rawn lut a, ei tur an rawn khai lut leh ṭeuh tawh. “Zanriah rawn ei ka tum a,” Mark-an atih chuan, “I bawl peih te chuan,” Amah pawh en lemlo in ka ti hmak a. Nicky-a nen hi chuan a hma in an inhre tawh a, Nicky-a khan kan junior a ti anih kha, inhmelhriat ṭha tak an ni bawk.

Ngawirengin ka ṭhu a, ka ngaihtuahna ka hmangin ka mamawh tur ka dap a, ka luh dan tur nen suangtuahna in ka tichhin a, he thilah hi chuan ka ṭha ber miau si a. Nicky leh Mark inbe thawm chu ka hria a, mahse eng nge an sawi erawh ka hrelo, CBI batch ka nei tak alawm le. Ka ding hluai chu an ṭawng tawp meuhin min lo en a, ka blazer ipte chu zen rak rakin ka batch thar chu ka phawrh a, Nicky-an a hmuh rualin, “Bawihi nang hi chu i bân hi an phal tak tak lo anih hi.” tiin a nui hawk a. Plan ka nei tawh ania, ka tih chuan, “Kan thusawi kha engmah i hre ve lo em ni?” Mark zawk chuan alo ti ve a, ka melh tawn sek chu hrethiam in, “Mi ka ruai mai ang ka lo ti a,” Mark-an atih chuan lu thingin, “A risky lutuk, keimah ngei ka lut dawn a ni.” tiin ka ruahmanna ka sawi a, “Kan pathum hian a hmun kan thlen vek angai dawn a, midang rawih tih vel kha chu ngaihtuah duh suh. Tu te nge i hmelma tih pawh i hriat loh hi.” ka tih chuan, “Mahse Bawihi i tan a hlauhawm asin.” a lo ti vat a.

“Keimah lo tumah ka ring silo anih hi.” ka tih chuan, “I nun derthawnga dah leh ka ngam tawh lo.” a ti leh hmuk erawh, “Nang min veng turin i awm dawn alawm.” tiin ka batch chu Mark pe in, “Pathum lo siam tir rawh, chuan suit dum kan mamawh bawk tiin kan mamawh tur dang pawh ka sawi zung zung a, “List leh map kan neih chuan engkim hi a kal zung zung tawh mai ang.” ka tih chuan, “Fimkhur ang che,” a ti sup a, choka lamah a lut nghal daih.

“Keipawhin midang rawih mai chu a finthlak ka ti,” Mark-an atih chuan, “Min umzui tu te umzui tur chuan i ruai thei ang, mahse a chhungah erawh keimah ka lut ang. Computer thiam tak kan mamawh ka tih kha aw,” tiin choka lam ka pan ve nghal daih. Computer thiam tak ka sawi rik avang khan Jacky ka ngaihtuah chhuak lo theilo. Avasthi chungchang kha a hnen aṭangin tam tak ka hriat phah a, a awmna tur nia a rin te pawh kha pendrive-ah khan a ziak lang nual bawk. Ro phum ruk haichhuah anih dan leh a, a hnua rorelna inthlak kual dan te a ziak vek a, chung zinga tu te emaw chu tuna kan thil zawn buaipui tu leh chepral a, dah ru tu te an ni mahse tam takin an ngaihven laiin a tam zawk hian an hre kherlo ang. Tuna buaipui ve tu langsar zingah Narayanan chhungkaw hming a lang ve erawh Jacky hian a chhan a sawifiah thei ngei in ka ring a, mahse Amah la a awm tawh silo.

Pendrive-a list a dah tam tak hi Amelia khan a ziak tello a, chung zawng zawng lakkawp erawh chuan he sum leh rohlu thuruk hi zawng an tlem lo hle a ni. Rajasthan thlaler aṭanga hmuh chhuah anih lai leh lakchhuah anih pawh khan a hlutna kha tam tak a ni tawh a, tuna a hlutna phei chu a let tam tak a ni tawh tih a hriat takzet. Sorkar kutah a lut a, mahse vanduai thlâk takin mi diklo kutah a lut ta a, sorkar in a ti ri ral tia sawi ni mahse mi pahnih khat thil tih hmanga ral a ni. Mahse anihna takah chuan thuhruk a ni a, chu thil thuruk hretu chu Minister hlui tu te emaw an ni leh a, chumi kal zelah chuan mi hausa tam takin an hre ta a, neih tumin a rukin an zawng ṭheuh chu ania. Hmuh chhuah a harsat chhan erawh List leh Map hi khawia thuhruk nge hriat a ni miau silova, keini pawhin ka rinthu in tunah hian chet kan la mai dawn a ni.

Nicky-a rice-cooker khawi mek chu panin, “Chaw i chhum em ni a?” ka tih chuan, “Um, Sawpa saw kan bula chaw ei a duh chhan te chu Mizo chaw ei a duh vang ania, hriat reng alawm.” atih chuan, ka nui hak hak a, “Amah kha bawl tir ta che.” ka tih chuan, “Um, heng zawng zawng a zawh hunah hian ka la khawih sil awng dawn alawm, a melh ve ziah che avang pawh hian,” a ti erawh ka nui tawp riai riai in, “I hria maw?” ka ti sap a. Ka lam lo hawiin, “Engah nge ka hriatloh tehlul ang, kei awm lo ni ila i nei daih duh ang chu mawle.” tiin a nui a, sawi tur reng reng ka hrelo. Ni e, ka kalsan hnua kan inhmuh leh pawha a thik em em mipa kha a ni tlat si a.

“Ka nupui ni hman lo la chuan a na ve ang, mahse ka nupui i ni tawh tlat.” ti lehin ka kun chhal chu ka biang tawn tawnah rawn vuanin Amah en thei turin min kuai dak a, “Khatin inthlahrung hmel deuh khan awm suh, ni e, ka thik ṭhin ka pha lo, tunah pawh a melh dan che hi ka hailo, mahse ka nupui hi ka ring tawk che tih hria la, Ani hi ka ngai pawimawh lo aw.” atih chuan, ka melh ralh a, min rawn fawh tuma a rawn kunhniam lai takin khuh ri kharh thawm a rawn awm a, a ding ngil nghal vut a, kawngkhar lam chu rum zetin a melh nghal a.

“Sorry, mahse a pawimawh lutuk a.” Mark-an a rawn tih chuan, kan awmdan siamremin a Laptop rawn ken luh chu kan lo enpui nghal vat a. “Hei chu, Narayanan Industry te zawmpui anih hi.” tiin hmanhmawh zetin ka phone ka phawrh a, Nikhit-a call ka tum erawh busy a in ti char char a, vawi tam ka dial hnuah pawh a call thei hauh lo nia. Chanchin thar chuan Industry pakhata kangmei chhuak chu a puang dum dum a, engmah chuh hman loh anihna te chu a rapthlâk in, chhun vanglaia thil thleng anih avangin hnathawk tam tak an thih thu report a ni a. Ala kang zo miau lova chuvanga thuchiang report theuh anih loh laiin India a Industry lian ve pawl tak anih avangin hnathawk nunna chan tam tak an awm dawn tih a chiang a ni.

Ka phone a rawn ri a, Nikhit-a a ni. “Hello,” tiin choka ka chhuahsan a, “Eng nge a chhan?” ka tih chuan, “Magg, buaina a in ṭan chiah a ni. A chhan hriat a nilo, tin, kha Industry kha Narayanan ta anih kha, Shareholder meeting te duhthlanna ngeiin kha Industry kha kan lei chhâwng a, kan ram zauhna a ni ber ang chu mahse tunah buaina kan tawk der a, rang taka Tamil-a ka haw a ngai a ni. Ka nu leh pate telin.” atih chuan, “Chuan engtik nge in kal ang?” ka tih chuan, “Ka hrelo mahse ka nu leh pate hi chhuah se ka duh.” atih chuan, Mark khan in pakhatah a dah tak anih kha. Tin, Nikhit pawh hi chhuah phalsak a ni em ka hrechiah lo. “Anni chu chhuah an ni ang, thil thlen dan hi ka hrethiam lo a ni Nikhit, heng zawng zawng hi engtia thleng nge anih a, engvang nge? tih hi hriat ka duh takzet a ni.” tiin ka thaw hak a, buaina dang a kiam a, buaina dangin min rawn luah zel mai chu a ni a.

“Ka hre bik lo, a hmunah ngei ka en angai a ni, ka pu tal hi rawn harhchhuak tawh se ka duh emai Maggie, ka pu hi.” a ti a, a ngawi zui daih a. Ni e, he mipa puitling leh tawhkhirh zet anga lang hi hmana ka hriat mipa, pangchang leh no ve thei deuh kha ala ni reng tih ka hre leh chiah. A hun tawn in a zir em a, mahni inveng thei niha a pu duhdan puitlin a tum em a, a mizia zawng zawng a danglam ka ti a, mahse chung zawng zawng phenah chuan fapa naupang zawk, chhungkaw duat rawn leh doctor a ni chunga inchhungkhura naupang chhe rilru kha alo la paih vek bik lo. “Nikhit, tun hi mittui tih tlakna hun a nilo ania aw, chhel tak leh chak taka i awm angai ania, tute nge kan hmelma tih takngial pawh kan la hrelo chu a ni si a.” ka tih chuan, “A dik alawm, mahse ka hah tawh em a ni Margreth.” tiin a thaw hawk a.

Mark-a bula ka sawi angin Paul te nupa an chhuah a, kan fapa erawh eng ang pawhin min dil mah ula a him e ka tih hma loh ka kal tir dawn lo a ti ve tlat a, ka lungawilo dawn viau a, Nicky-a zawk hian Awle a ti thei tlat si a. Ni e, he kan thil buaipui lai avang hian hmelma tam tak kan nei tih ka chiang tawh a, Nicky-a pawh hian chu thil chu a chiang viau a ni. Heti hian Doctor leh Nurse bakah vengtu ṭha tak hmangin hmun himah dah a ni a, tumahin kan buaina kiam hma chuan hmuh pawh an hmu mai mai thei lovang tih ka chiang a, Mark-an venghimna leh enkawlna a pek ang hi tun dinhmunah chuan tumahin an pe thei dawnlo tih ka chian avangin engmah sawilo ka ni thung.

Zanriah kan kil dawn a, dawhkan min kil tirin mipa pahnih te chuan chaw ei an siam mawlh mawlh a, an rawn ṭhut ve hnu chuan mipa pahnih eirawngbawl chu ka en kual a, a landan tui hmel zet zet te chuan min ti ei chak. Chaw an han khawrh dawn erawh, “Ehe,” Nicky-a chuan a rawn ti hluai a, “Nga ti nge a?” tia a lam ka hawi chu, kan chaw chu a tui pur a, buhhawp hi a ni ringawt mai. Ka ril a ṭam tawh avangin sawisel duh lovin, “Chawhmeh nen kan ei puar mai dawn nia,” tiin ka bowl-ah chuan ka suak a, an arsa kan chu suakin chawhmeh dang te pawh ka suak kim vek a, mahse ka ei ṭan chiah erawh ka chhak chhuak leh chiang hle mai.

 

“Nga ti nge?” an ti rual ṭhawt chu melh dunin, “Ei ru, a sat vang anih kha,” tiin tui ka in a, ngaihṭha lo deuha an chawhmeh siam an ei erawh kei aiin tui an in nasa zawk. Engkim chu a al em em vek a, an hmarchha siam tâkngial pawh a al puat a, engmah hi a ei tlak zawng chu a ni e. Ka tho nalh a, mipa pahnih te chuan min zui ve vat a, Chahbi la in Mark-a car-a ka inkhalh chhuak tur chu an rawn lut ve vat a, ka ril a ṭam tawh takzet a ni. Restaurant pakhatah lutin ei tur ka lam ṭeuh a, “Tu zawk in nge Arsa lei dawn che u.” ka tih chuan Mark chuan chahbi chu la vatin a chhuak nghal a, “Bawihi i rilṭam hmel i pe.chhe thei mah mah.” atih chuan, “A ṭam lo hmel pawh a ṭha chuang lo.” ka tih hmuk chuan a nui hawk hawk a, reilo teah Mark-a chu KFC rawn khai bawr ṭunin a rawn lut a, kan ei tur chah tam tham zet pawh an rawn chhawp nghal a, “Puar heavy metal in ei teh ang u, naktukah eng nge thleng dawn tih tumahin kan hriat loh hi.” ka tih chuan mipa pahnih te pawh an nui ve suk suk tho.

An ti ti laiin kei erawh ka ei malh malh a, Mark-a thil rawn lei pawh ka keih leh mial mial tawh. “Zaninah batch kha an rawn dah ang aw,” Mark-an atih chuan ka hawi chhuak a, “Kan pathum tan ka tih kha aw,” ka tih chuan, “Um ka hria alawm, chuan hacker pawh ka hmu tawh e, min pui thei dawn a, thawmhnaw leh i sawi ang thil te kha chu a kim thawkhatin ka hria. Ka. let hunah a enfiah theih tawhin ka ring.” a ti duah a, chhan pawh ka chhang tawh lo. Kan han ei zawh meuh chuan puar tak ka ni.

In kan thleng a, kan bungraw mamawh te kan enfiah nghal a, ka thawmhnaw hak tur ka en a, duty tur angin kan lut dawn miau avangin suit dum nalh zet en chuan ka nui sang a. Convention lian tak a ni dawn a, midangin min hmuh loh laiin kei leh Nicky-a Chamber lamah kan lut dawn a. Pawnlam aṭangin Mark leh midangin min lo pui thung dawn a ni. Kan computer operator tur pawh a thiam tawk a, ka ringtawk viau chutih rualin engpawh thleng palh thei tiin silai leh hmanraw dang pawh kan in ring thlap tho.

Building lian zet hmaah chuan kan ding a, khua a thim ṭan tawh a, duty tur pawh an awm nawk tawh, an fimkhur hle a, checking an uluk viau bawk. Keini pawh ka id hming lem ni si hmang chuan kan lut ve a, inchhunglamah lut tlangin gate ṭhenkhat hawn hun kan nghak a, tun aṭanga reilo teah Mark te pawh pawnlamah an awm tawh ngei ang. Gate a rawn inhawng a, convention chhim tur ramhruaitu te leh mi ṭhenkhat an rawn lut khawm a, keipawhin ka hna ka ṭan ve thei chiah e.

Chamber lama chho in Nicky-an ka hnung a rawn dawl zel a, kawngkhar pakhat chu ka rin ang ngeiin code a ngai ta, Mark ka be vat a, a pâwna seal awmdan hrilhin an rawn hawn hun kan nghak a, chutih lai tak chuan duty dangin thawm an rawn nei a, pindan kawngkhar a rawn ri khep a, rang taka hawngin Nicky-a pawh ka pawt lut nghal vat a, min man chhuah teuh zia hria in kan thaw nghak ham ham mai.

Conti….

Leave a Reply