You are currently viewing PHUBA S2- 22

PHUBA S2- 22

Spread the love

PHUBA S2 – 22

JONSMELY BAWITLUNG

“Pindan lehlam hi a ni leh a, mahse awlsam takin kan hawng dawn lo.” ka tih chuan a kiai suk a, Kawngkhar chu a thlek vung vung a, “Khawiah nge hawn tur?” atih chuan, “Bang hi her a ngai, chumi zawhah Chamber tak tak chu a ni ang.” ka tih chuan, nuihza insuam deuh hian, “I lut tawh em ni?” a ti sup a, a zawhna zet chu ka beisei loh lutuk anih vang nge ka nui ve hak tho. “Security camera off vek ni mahse luh dan erawh kan zawn hmanhmawh angai.” a tih chuan ka nui lai tawp hmakin, ka hawikual a. Engkim chu kan dap vêl vek ni maiin ka hria. Ka earphone vuah aṭang chuan, “In hmu em?” alo ti ve sek bawk a, theih ni ngat se ka hrawk hrep duh hial ang, ṭawng rin ngam la a ni der silova.

“Magg,” atih rualin dawhkana milem chu a kuai her a, bang deka ding ka nih avangin ka inher nghal a, pindan chhung chu sorkar thil pawimawh tam tak dahkhawmna tih hriat takin chhuar a awm thluah a, khawiah ber nge a awm ang. Nicky-a pawh ngaihsak zui lovin list awmna tur chu ka zawng kual a, “Maggie, i ṭha em?” Nicky-a aw ka hriat rualin, “Um ka ṭha e,” ka ti hman awrh, line a in cut a, ka earphone a reh nghal hmak. Ka lut tawh a ka hmu ngei tur a ni.

Rang takin chhuar ho chu ka enkual a, mahse pindan chhung zawng zawngah hian a awmlo aniang, chhuar pawh ka enkual nasa tawh a, darkar khat ai rei hun ka hmang tawh. Pindan lehlam aṭangin thawm a rawn awm a, birukna tur la khawiah mah a awm lo chu ania. Bang chu a rawn inher thut a, India President ni mek a rawn lan rualin ka ding nghal chawt ringawt. “Margareth nang maw?” atih chuan, chhang lovin ka en reng ringawt a. “A ṭha e, heihi em ni in zawn?” ti leh in file pakhat a rawn lek kang a, “Aw Sir ni e.” ka ti erawh min melh vang vang a, a nui chhuak ta hawk mai. Nuihzat tur engmah ka hre ve lo.

“A ṭha e, he thil avang hian nunna derthawngin ka awm ngun tawh, ka hmaa mite tih dikloh siam ṭhat hi duh viau mah ila midang ka tir ngawt thei silova. Nang i rawn lan takah chuan i kutah ka dah ngam e.” tiin min pe , rang takin ka la nghal vat. “I zawn chhuah hunah erawh sorkar tho in an chang ang mahse diktakin a kal tawh ang tih ka tiam nghal law law ang che,” atih chuan, chhan mai ngaihna ka hrelo.

“Awle, tiin i chhang thei ang.” ka benga ka vuah aṭanga Mark aw ka hre leh erawh ka hahdam phah sawtin ka hria. “Awle Sir,” tiin salute ka pe a, “Helamah chuan i chhuak thei tawh lovang, kha laiah khan kawngkhar a awm a, ngil takin kal la tual i chuang chhuak mai ang.” atih chuan, “Ka pasal kha,” ka ti hman ṭawk, “I pasal pawh ka lo chhuah vat ang, mahse Ani nen khan sawi tur kan nei a, kal tawh rawh, ka rei lutuk chuan min rawn zawng palh ange.” tiin a kawngkhar lam chu a kawk leh zeuh a, ngaihṭha vak lovin building chu ka chhuahsan ta nghal a.

Gate pawna Van biru taka dah chhungah chuan ka lut a, “Nicky-a alo la chhuak ve lo.” ka tih chuan, “Kan kal angai Nicky-a chu him damin alo chhuak ngei ang.” tia motor a tinung erawh duhlo in a stearing chu ka herh pui ve nghal a, motor pawh a tlan kawi zawk zawk mai. “Maggie buaina nasa zawkah kan lut thei inbengdai rawh,” Mark an atih ṭhawt rualin ka nghâwng a thip zawka, ka zawi nghal nguai nia mawle. Mark-a thinrim ṭawng ri leh eng emaw ri chawrh ka hriat chu ka thil hriat hnuhnung ber a ni.

“Lalhruaitlung, i thiltih pawi zia hi i hria em?” ti ri chu hla deuh aṭangin ka hria a, ka mitmeng ka tum erawh a inchar ta emaw tih tur khawpin ka chhing nghet a, ka lu na ut ut chu ka hre zawm nghal. “Maggie, harh tawh teh.” ti ri ka hre leh a, Mark-a aw a ni. Ka samah a rawn tuai zeuh a, ka chalah a fawp zui vawng vawng a. Kei hi engtia rei nge ka harh tawh loh ka hre miah lo harhchhuah ka duh takzet.

Phun sur sur ri ka hre leh a, mahse eng nge an sawi ka.hre thei lo. “Bawihi i harh angai ania, ni thum ngawt i mu tawh ania aw.” titu chu Nicky-a a ni. Theih tawp tak meuh a ṭangin ka mit chu ka meng nghal kawk a.”Bawihi, Magg i harh maw, Doctor,” a ti nghal chul a, Doctor-in min enfiah lai te chuan ṭawng chhuah ka duh mahse ka dang a ro a, engmah ka sawi theilo. Eng damdawi takin min chiu ang maw, heti taka ka taksa in a tuar mai le?

Ka harhchhuah tlailamah chuan zawi te te in ka ṭawng thei tawh a, “Thu lawmawm, kan fapa pawh a ṭha tawh lutuk ania, chuan Mizoram lamah ka nu leh paten an hruai haw thei tawh dawn a,” atih chuan, “Ka nu leh pate an awm ve em?” ka ti a, min melh vung vungin, “Aih, i pu a boral a, chuan in chhungkaw sumdawnna neitu inchuh in a buai mek a ni.” atih chuan, “Eng nge awmzia?” ka ti sap a. “Nikhit-a kha i pu khan Industry enkawl tu turin a dah tak tak lo a ni mai thei, tunah hian Adhitya kutah a lut vek a, chuan Nikhit-a erawh khawiah emaw khung bo a ni. A chin hriat anih loh avangin Mark-an a zawn tir mek a.” a ti a, a ngawi daih a.

“Engkim ka hriat vek angai a ni, ka nu leh pa leh ka unaute an him em?” ka tih rualin ka mittui a rawn luang nghal a, chu erawh ka thil duhloh ber leh min ti chaklo fo tu a ni. Ka biang tawn tawna rawn vuanin, “Rempuia te chhungkua chu Mizoram lam an thleng fel chiah a, mahse i nu leh pa te erawh Tamil-ah an awm tih ka hria,” tiin min rawn kuah a, ka dinhmun hian min ti chau takzet tawh a ni.

“Nikhaw hreloa ka awm chhan hi min hrilh teh?” kan thusawi millo zeta ka tih chuan, min kuahna aṭanga min thlah in, “Damdawi diklo an pe che a.” a ti sup a, a thusawi avang chuan ka kut ka hum ruh a, “Kha damdawi kha ilo haw hle nen tikhan nikhaw hrelo in i awm ta a ni.” a ti lehzel chuan ka thin a ti rim tulh tulh mai. Ka ṭawng leh hma in Mark a rawn lut a, “I harh tih min lo hrilh a, engkim hi a buai nuai vek anih hi.” a rawn tih chuan ka bula no chuan ka vawm nghal pawp a, tha ka la neilo bawk nen fuh lovin chhuatah chuan a tla keh darh nghal a, rum zetin ka lo melh ngar bawk. Mahse Mark chuan kei min en lovin Nicky-a a en daih a, “Ka sawi zo hman lo.” alo ti sup erawh, “Engmaw?” ka ti chang fak a.

“A mi rawih kha, midang an lokal a, a hmel a hre bik lo nen khati khan kan bulah tu emaw tirh niin alo awm ve a, List i neih ruala that tur che a tih a ni.” Nicky-a chuan aw dam thluam a atih chuan, sawi mai tur hrelo in ka ngawi ngal a. Engvanga ka thih chu duh em em nge an nih? A chhan ka hre duh takzet a ni.

“I hmuh duh ringin nungdamin kan la dah e.” Mark-an atih chuan, Nicky-a kut vuanin, “Min hmuh pui ta che,” ka ti sap a, muangchanga min dinpui te chuan ka ke a khur ru dar dar a, ka taksa ala chaklo hle tih ka hria, enkawl nghal nilo ila ka thi ngei dawn tih pawh tuma hrilh hran ka ngailo. Mark-an hma hruai in Nicky-a nen chuan kan zui ve zel a, a hma zawng aiin a inchungah chuan vengtu an tam zawk tih pawh kan kalpelh te ah ka hre thei. Inhnuaiah min chhukpui a, pindan pakhat hawngin min luhpui a, a thim deuh khup a, light an rawn On rual chuan mit a vai ruai thei hial a ni.

Mi pakhat a ban chunglama phuarbeh chauh hmel zet ka hmuh rualin, computer thiam kan rawih kha a ni tih ka hre nghal. Mak ti viau mah ila Amah ngei hi a ni injection min pe a min thah tum tu kha. A hmaa ka din rualin, mak ti zetin min en a. “Ka thi mai silo chu i em va lawmloh hmel ve,” Tamil ṭawnga ka tih chuan Mark hian mak ti hmel zetin min en a. “Min thah tumtu hi tu chiah nge hrelo mah ila a bul chu Tamil zel an ni.” ka tih leh chuan, a meng bial kawk a, “Tu nge i nih?” chang faka ka ti leh erawh, “Engmah ka hrilh lovang che.” tiin a phun hluk a, ka nui nghal hak.

“Damdawi vanga buaina kan neihna karah kei min that tura tirh bik a awm a, chuan tunah tu chiah hian nge min thah hi duh em em a, ka dam ve avanga buai ta hi tih ka hre duh. Ka chhui theih loh tur hian kaqng a ping ziah lehnghal.” tia chair awm pawt a ka ṭhut chuan, chupa chuan min melh kur a, “Mahni hmelma te hnai taka an awm laia hla tak i thlir ṭhin vang a nilo maw?” atih chuan, “Ka sawi chhin, Mr Paul maw?” ka tih chuan a nui suk a, “Adhitya nge Nikhit?” ka ti leh a, chutah pawh ala nui nia mawle.

“Kei thi tura min duh tur hi hriat ka nei lo mahse mi pakhat kan call chhin,” tiin a phone an laksak chuan Umalsawmi no ka dial ta a, a no a neilo mahse engvang chiah nge ka hre bik lo, ka thinlung hian be turin min nawr tlat si anih hi. Phone a rawn pick up rualin, “Min rawn tibuai tawh lo turin ka ti che in ka hria.” Umalsawmi aw ngeiin chang faka a rawn tih chuan ka chhungril hi a na veng veng thei nia mawle. Hepa hi a hria tihna a ni. Ani hi a hria anih chuan ka thih duh em em tu pawh Amah a ni thei.

Ka chil lem khalh in, “Eng nge a chhan?” tih chiah ka sawi. UMalsawmi chu a ngawi vang vang a, “Maggie,” a rawn tih sap chuan, “Aw keimah Margareth,” ka ti ve nghat a. Tuna ka na lutuk hi sawi dan ka thiam lo, puakdarh vek se chutiang ai pawh chuan ka na zawk hial ang. Ka harsatna engkim hretu leh ka thuruk tawo vawngtu hian ka thihna turin thang a kam tihna maw ni a?

“Magg, ka la hrilhfiah ang che.” atih chuan, “Tunah sawi rawh,” ka ti chang fak a, “Hmaichhanah kan inhmu anih ngai chuan, ka u i nihna ka theihnghilh ngei ang, min hria alawm.” ka ti zawm zat a. “Ka thih i duh chhan chu sawi rawh.” a ngawih reng avang dawhtheilo zetin ka ti lehnghal tuar a, “A chhan i hre duh anih chuan, ka hnenah List kha rawn keng la, engkim i hre vek mai ang.” tiin call a dah nghal hmak a, ka phone ken chu ka melh nghal ngawt ngawt tawp.

Ka laizawn neihchhun leh ka entawn em em, ngilnei tia mite sawi leh kei ngei pawhin ka chhuan ruk leh ka zah a ka entawn ber ṭhin, min hmangaihtu leh ka thuruk zep hauh lova ka hrilhna ṭhin hian ka thihna turin thang a kam a maw? Ka thih ngei theih nan midang hial a ruai chu a ni si a. Eng nge ka tih sual a, a eng pawi ber nge ka khawih tak mai le? Ka laka ka U hel tir tur hian a eng pawi nge ka sawi. Ka mittui luang nasa lutuk avang chuan ka hmu phe ruai a, kalsawn mai tuma ka ding pawh ka chau ngawih ngawih a ni ber e. Nicky-a chuan min chawi kang lawpin min kalpui zui a, khuma min mut tir thleng chuan engmah ka sawi zui lo.

“Bawihi,” tia ka bula a rawn in thawlh ve rual chuan ka ṭap chhuak hawk a, a lama min kuai herin ka samah a chul hliau hliau a, ka ṭah a chhuak tulh tulh a ni mai. Heng zawng zawng hi ka nu leh pate’n an hre ve angem le? Hre ve ta se an na ve tho dawn si a, ngati nge hetiang hian ka chungah a thlen bik? Thil tam tak ka ngaihtuah a, Rodingliana ka ngaihtuah chhuak a, ka ngai a ni. A tana theih tawp chhuah a huatna leh khakna nena ke ka pen lai khan ka chhungkua chu ka lamah an ṭang vek a ni si a. Mihrang do nih ai chuan ka chhungkaw do nih a hrehawm zawk hle si a.

Ka in ṭap muhil a ni mahna ka harh leh chuan ni a lang tawh a, sana ka en erawh alo la hma viau mai. Ka bula mu ka en chuan a lo la muttui viau a, a chau tih hriat zetin a mithnuai a dum kalh a, a cher ve deuh tih la hai rual anilo. “Keimah vang hian i buai ve zel chu a ni si a.” tia phun sapin toilet-ah ka luh san a, mahse hmanhmawh zeta che thawm ka hriat chuan ka chhuak nghal vat a. Nicky-a thawmhnaw inbel sawk sawk ka hmuh chuan, “Thil thleng a awm em ni?” ka tih rualin ka lam rawn hawi vatin min rawn pan a, ka hma zawn a rawn thlen rualin nghet zetin min kuah a, “I kalbo daih emaw ka ti alawm.” tiin a thaw nghal ham ham a. “Tamil-ah kal ka duh a, ka rualin i kal ve thei angem?” ka tih chuan, “Awle.” a ti a, thudang a sawi lo.

Mark bula ka ngaihdan tlang taka ka sawi erawh a rilru a buai viau a ni, List kha ka dil miau si a. “Maggie, mi diklo kuta a awm leh anih chuan eng nge thleng dawn i hria alawm,” atih chuan, “Um, chuvang chuan a copy i siam tur a ni. Tun hi i nu leh pa thiamna i hman ṭangkai hun a ni. I zawng tih an hre tho ang,” ka tih chuan a lu a bu nghat a, mahse a pa hmuh chu a phur hmel tehchiam lo. “Ka be thei ania, i duh chuan,” ka ti erawh, “Kan be vek mai ang chu,” tiin a nui lui a. Nicky-a nen pawh kan insiam a, a chhungte hmu tur chuan kan chhuak ta nghal a.

A hmaa kan kal tawhna building-ah bawk chuan kan lut a, Amelia-i leh Jonathan-a ten keini pathum min hmuh chuan mak an ti tih an hmelah a hriat, “Maggie, bawihi hetah, ka fapa nang pawh maw?” tiin Amelia-i chuan ṭhu turin min ti a, Jonathan-a erawh ngawirengin a ṭhu a, keini ho chu min melh chik viau thung. “Heihi List a ni a, map erawh ka la neilo, min pui kan ngai a ni.” tiin Amelia-i zawk chu ka list chu ka pe a, bih thuakin a pasal chu entir ve vatin, “A mak hle mai, hmanlai hun min ti hrechhuak rúm rûm mai,” atih chuan Jonathan-a chuan uluk takin ka lehkha pek chu a en a, “List awm mahse Map ber in neih loh chuan awmzia a awm chuang lo asin.” a rawn tih chuan, “Mahse he list hi midangin min dil a, eng nge a ṭangkaina ka hre duh a ni.” ka tih chuan khabe dawm meuhin a ngaihtuah a.

“Avasthi hi eng ang tak nge ka hrelo mahse List leh Map hi a kalkawp tlat a ngai a ni. Chuan kha i chahbi tel khan.” tia ka chahbi awrh chu rawn kawk va in, “Bawihi chahbi kha ila hria em?” a ti zawm zat a, “Ka theihnghilh ngailo ang,” tiin Amelia-in a ṭhi awrh a rawn tih lan ve chuan, “A hunlaia khawvêla kawr man tam ber ka design theina anih hi.” tiin a nui sang a, an thusawi awmzia hi hre vaklo mah ila, an thil lo zawn tawhna lamah he a awrh lai chahbi hi a ṭangkai ve viau a ni tih a hriat.

“Lunghlu leh rangkachak mai bakah thil hlu tam tak kha kan hmu ngei ang, kan intiam ang ngeiin sorkar kutah a lut bawk, mahse he chahbi erawhin thil pakhat chiah a hawng thei kha ania.” tiin a chahbi ṭangkaina chu a sawi a. “Mahse engtin nge kha i chahbi kha Dr.Johnson-a te kutah a luh dan ka hre hauh lo.” Jonathan-a zawkin atih chuan ka harhchhuak zawk, Rengpuia ka biak ngei ngei a ngai tih hrilh nawn ka ngailo.

“Aw he chahbi leh formula kha ka kutah dah a ni a, tichuan formula erawh ka humhim zo lo anih kha, mahse engkim tih chhiat a ni tawh thung. Mahse chahbi hian hlutna ala nei a, he chahbi duh hian mi tam takin min umzui bawk, ro phumruk zingah chuan sum leh pa, rohlu tam tak karah formula dang a awm pawh a ni mai thei asin.” ka tih chuan Jonathan-a chuan a lu a bu ngat nghat a, “Chu erawh a zawn hmuh chu i tih tur a ni.” tiin List chu min pe let a, “Nang kha i tel ve ringawt em ni?” tiin Mark chu a melh daih a, a lu alo bu nghat chu, “A ṭha e, i zawng ka hlau tehlul nen i ti ta tho si a, engpawh nise in hmuh ngei ka duhsak pui che u, in nunna erawh veng ṭha ang che u.” a ti a, kan chhuak zui ta a.

“Engpawh nise chahbi chu a hunah a hmanna tur kan hre mai ang, map hi kan zawn phawt a ngai dawn anih hmel.” Nicky-an atih chuan, “Rengpuia emaw Rsa kan koh a ngai a ni.” ka ti a, Mark pawn a hnial lo bawk a, Rengpuia chu ka be ta nghal a. “Chahbi hi a hmanna tur i hre hrim hrim em?” tiin bul ka ṭan thawr chu, Nicky-a zawk chuan ka phone rawn la vatin, a fapa chanchin a zawt hmasa te te a, ka inthiamlo nghal nia. A pawimawh tura a rin zawng zawng a zawt vek a, hriat erawh a ngah vak biklo anih hmel. Rsa a call leh a, thil engkim a hrilh hnuah tel ve a duh thu a rawn sawi nghal a, Ani hi chu thil eng emaw thlengah hi chuan phur tak hian a tel ve thei zel mai a, nuam hi a ti thei phian bawk.

List copy chu Mark-a kutah dahin Rsa nen map lo zawng turin ka ti a, kan fapa pawhin Mizoram a thleng tawh a, tunah chuan Tamil-a kal tumin kan inbuatsaih mek a ni. Ka phone rawn ral ral chu pick up in, “Magg,” rawn ti tu URempuia aw ka hriat chuan ka hnuk a ulh ngawt nia. “Mate, ka nu leh pa an himlo,” tih chiah a sawi, Ani pawh ṭawng harsa a ti ve tih hriat takin a ngawi leh rih a, “Kan inbiak pawh theih loh hnu khan, ka pu boral avangin Tamil an rawn pan a, mahse mi tang an nih phah ta anih hi, Nikhit, nutei leh patea te pawh. Adhitya leh Malsawmi hian eng nge an ruahman ka hrelo, mahse engkim neih vek hi an duh ni berin ka hria.” thinrim aw tih hriat zeta atih chang fak fak chuan, ka thaw hak a, “An duh ka nei alawm, Nicky nen Tamil kan pan dawn chiah e, airport-ah kan awm mek.” ka tih chuan, “Pe ta ula, midang an him ngei ang maw?” hlauh thawn hmel zet a atih leh chuan, “Ka hrelo,” ka ti zawi sap a. Kan ngawih deuh vang vang hnu chuan, “Um, engkim a ṭha leh vat turah ngai ang, i fapa pawh a hmelṭha khawp mai, ka awm chhung chuan ngaihtuah awm a nilo aw.” a rawn ti erawh ka thla a muan phah viau a ni.

Tamil kan thleng a, Taxi in kan In tia kum tam tak chhung ka lo sawi ve ṭhin ngei chu kan pan nghal a, “Ka pi, i pu thihna avangin ka tawrhpui khawp mai che.” kan taxi khalhtu in a tih chuan ka chhang lo. Nicky-a hian eng nge a ngaihtuah ka hrelo, mahse Tamil kan thlen aṭangin ala ṭawng miah lo chu ania. Tin, Hindi kan hmanglo bawk a, kan thusawi hi a hrethiam hauh dawn lo tih ka hria, chuvang a ngawi pawh a ni mahna.

Building lian zet kawtah kan ding a, gate ringawt pawh pui tak a ni. “Hetah hian maw, khang kum chhung zawng khan i chen a?” Nicky-an atih chuan, “Anih hi, Narayanan chhungkaw In,” tiin gate chu ka pan a, vêngtu silai kengin min rawn dang ka hmuh rual chuan rûm zeta melhin, “Margareth Narayanan hi min dang ngam dawn a maw?” ka ti erawh rang taka insiam ṭha in, “Kan tihpalh a ni ka pi,” tiin gate chu an hawng nghal vat vat a, a chhungah chuan kan lut ta nghal a.

“Building lehlam saw kan chenna zawk tak chu ania, mahse ka pu damlai kha chuan he hmun hi kan kalpel ngailo chibai kan buk phawt loh chuan,” tiin kan chenna lam chu ka kawk zeuh a, Kawngkhar pui a rawn inhawng a, Umalsawmi ngei chu a rawn chhuak a, a incheina te avang leh a landan te avang chuan ka thaw halh mai. Ni e, Mizo chuan Vainu thuam kan tih diktak a ni a inbel. Hetiang hian a inchei ngailo tawp chu anilo mahse rangkachak tam zet hi a inbel ngailo tlat. Tunah erawh saree kaihin, rangkachak tam tham zet inbelin a mit a dum ṭha in, a hmui pawh sen ṭha tak a ni. Nalh tih zawnga thlir tu tan chuan a nalh thlawt alawm le.

“Lehkha in zir lai bak kha ka hmu lo che a, chibai le” tia Nicky-a chibai a tum erawh an inkarah ding salhin, “Khawiah nge kan chhungte?” ka tih chang fak chuan, “I chhungte chu ila hmu em em ang,” tiin inchhung lamah a lut nghal a, kan zui ve nghal tho.

“Ka nau duhtak, helaia in rawn kal tur te chu sawi lawk ni la, ka lo hmuak tur che u ania.” tia nui har har a sofa a, a ṭhu chu ding chungin, “Ka nu leh pate ka hmu duh,” ka ti vin leh ṭhak a, a nui lai chu a tawp chiang kher mai. “List kha min pe la, i chhungte chu an zalen mai ang.” a tih chuan ka thinin a tuar lo, ka che nghal phat a, “Vanlalmalsawm, i nu leh pa an ni ve tho asin,” tih ṭhat a ban ka tum erawh Nicky-a chuan min rawn vuanin, “At a hunlo,” tiin a phun sap a, Umalsawmi din rualin silai keng mi tam takin min hual tih ka hre nghal.

“Mikhual kan nei elaw,” rawn ti lut lang lang tu chu lam chu kan hawi nghal ṭhap a, Adhitya chu anih dan ngai in suit nen a rawn lut a, Umalsawmi zawn a rawn thlenin a chalah a fawp zeuh a, “Maggie nangni maw?” tiin a nui sang reng a, chupawh ka huat tawk a tling viau a ni. “Ṭha takin in dawr ang u, tharum thawh a ngai lo,” tiin Umsi chu a ṭhutpui a, an hmaa sofa chu kawk zeuhin, “Nicky ka in i rawn thleng ve tawh a, ding reng mah ta che innu nen kha ṭhu ru,” ati vei thluam a, a lemchan ka ten lutuk chu hnek pawp mai ka duh tawh.

Heng kan buaina zawng zawng bul hi Adhitya a ni ang tih rin ngaihna hi ka nei ngai miah lo, Nikhit zawk kha ka rinhlelh a, ka haw ṭhin hle anih kha. Adhitya te nupa erawh ka rin em em te an ni asin mahse rosum avang hian mihring mit hi a del thei hle chu anih hi. Tunah chuan a bul chu kan hre ta alawm, mahse engmah tih theih ka neilo hian min ti thinrim a ni. Ka silai hi phawrh a, thih vek law law te hial a ni ka ngaihtuah.

“List chu min pe ta che.” Adhitya an atih chuan hnial tumin ka kâ ka ang zuau hman a, Nicky-a chuan ka kuta rawn chelhin, “Maggie chhungte hmuh tir phawt rawh.” a tih chuan, boruak chu a reh dup a. “A harsa zawng hlir hian eng nga ti nge ka nau te hi in chet ṭhin,” atih rualin mi pali hian silai in hnai takah min rawn tin a, Ka din chhuah ruala ka hmaia rawn beng nghal sawk tu chu rum zetin ka melh nghal, UMsi’n, “Khawiah nge List chu i dah?” a rawn tih vin ṭhat chuan, ka nui sak a, pistol chu load in ka chala min rawn tin takah chuan, Nicky-a zawk chuan, “Engtin mah ti suh,” tiin List chu a pe a, “Khati mai tur kha alawm, a chhungte bulah chuan va dah rawh u.” Umsi chuan a ti nghal zat a. “I inchhir ang,” ka tih sap rual chuan hrelo ang hmakin a kalsawn a keini pawh min kai hrang ve nghal.

Kan In lamah hruai kan ni a, ka nu leh pa bakah Aarati leh Paul te pawh an awm ve mahse khawiah nge Nikhit-a hi a awm? “Bawihi nga ti nge in lo kal?” ka nu, nu zawng zawng a sehhel leh chhel ṭhin in mittui tling pama atih chuan, “Kan ṭha alawm. Khawiah nge Nikhit-a?” ka tih chuan, “Kan hrelo, kan haw khan an buai a, mahse a u hian a dah bo daih a,” Paul chuan a ti a, “Nicky engtin nge ni ang.” ka tih chuan, “I dah tiraw?” tiin a phun sap a, lu ka bu nghat thung. Ni e, ruahmanna felfai tak neiin kan kal alawm, kha file ah khan chip kan dah a, tin, UMsi thawmhnawah khan ka dah bawk.

Earphone kan vuah rualin, “Hmun tinah CCTV a awm a,” atih chuan, “Kan khawih a ngai tihna anih chu, Nikhit-a an dahna tur chu ka hria, Pate Narayanan bungrua hi an thuhnun vek em ni?” ka tih chuan, “Ka ring chiah lo, ka pu khan engkim Nikhit-a hmingin a dah ngei a ni tih fiahna kha a awm a,” atih chuan lu ka bu nghat a, pindan hrang hrang ka lut a, CCTV in a hmuh phaklohna chu a awm ngei e. Ruahmanna siamin Nikhit-a lakchhuah hmasak ber hi ka tum a ni, Ani hian engkimah min pui thei dawn a, tunah chuan thildang ngaihtuah thei ka ni rih lo.

Ni a liam a, ka ngaihtuahna ka hmang nasa a, ka bulah Nicky a awm bawk a, engkim hi a kaw duak duak ni berin ka hria. CCTV tih tawp dan tur pawh kan ngaihtuah chhuak tawh a, min hriatchhuah hma in engkim ka tih fel erawh a ngai thung. “I inpeih em?” Nicky-an atih chuan ka lu ka bu ngat a, wire lian ber a cheh chah rualin, tumahin an hriatloh, Kei leh Pu Narayanan chiahin kan hriat kawng ruk lam chu ka zawh ta nghal a. Kan inhnuai pindan aṭanga siam a ni. He kawng hian Factory hnuaia basement a pawh a, chu chu an mi tang te an dahna a ni.

Ka hmanhmawh bawk a, rei tak ka kal lo. Pindan chhung ka thlen chuan ka chemte pai tereuhte chu ka phawrh a, mi ṭhenkhat tuk zal nan chuan a tawk viau a ni. Silai keng duty ka hmuh chu rang zetin a nghawngah ka vit a, a au hma in a kâ hupin ka awmna lamah chuan ka hnuk nghal a, a hmel ka enchiang chuan ka hriat ngai a nilo. Adhitya hian mi thar tam tak a ruai ngei dawn a, Amah kalh zawnga awm pawh a zuah dawn lo. A kal tawhna lama a ber nih tum ṭhin a ni tih ka hria, tunah pawh Ama chhungkua ngei a lalna chang tur chuan engmah pawisak a nei dawn lo tih ka chiang tlat a ni.

Corridor-ah chuan ka phei zel a, mi pahnih ka hmuh leh rual chuan rang zetin ka chemte chu ka vawm a, ka vawm ruala tlan pheiin, a fuh lo zawk ngalah chuan zuangkaiin a darah ka bawp a kherin a ring ruh ka herh tliak pawp a, chemtea ka vawm fuh zawk chu pan nghalin, “Khawiah nge Nikhit?” ka tih chuan min hlauh hmel zeta min en in, kan hmalam chu a kawk a, thah kher a ṭullo tiin ka chemte chu phawiin ka kalsan a, pindan chhung ka lut a, duty an lo awm leh erawh chu thaw halhin, eng eng emaw remkhawm phenah chuan ka biru a, mahse light a rawn in On a, a eng pup rualin kut beng thawm ka hre nghal.

“Ka nau lo chhuak rawh, heta hi i unau pa chu a awm ania.” Adhitya ngeiin a rawn tih chuan, chhuak duh lovin, “Kan vai hian min kal tir la, engkim hi nei rawh u.” ka tih chuan a nui hawk hawk a, “Lalengmawi, min kalh zawnga chet lak hi nuam i ti tiraw?” UMsi ngeiin a rawn tih chuan, ka thaw nghal ham ham a, ka ṭhutdan siamremin mi engzat nge an nih ka en nghal. Mihring la chu an tam phian bawk sia, engtin nge silai keng saw ti zat saw ka hneh theih ang tiin ka ngaihtuah neuh neuh a, kawng la a vang phian a ni.

Silai chu pahnih lai ka hum ve tawh a, mahse kap ngawt ila, ka mi beih ber pahnih te bakah Nikhit hi ka kap fuh ve thei tlat si a, ka silai ken hi hmet puak lo mai ka ni. “A chhan pakhat tal.min hrilh teh, ngati nge?” ka natna hi ka aw aṭang pawh hian an hre thei ngei ang. “Keiin ka hmangaih nei turin kum 3 ka nghah laiin, nang chuan i duh ang apiang i ti a, ka fate an bula an cheng reng laiin URempuia leh i fa tan an in pumpek a, keiin an mamawh engkim ka tih sak laiin an thinlung erawh i hnenah a awm a, tu fanu hi nge lawm a hlim ang?” Umsi’n atih chuan, ka birukna aṭanga dingchhuakin, “Kan dinhmuh hretu berin chutiang chuan i ti a maw?” ka ti a, “Tualthattu an fanu hi an lo hmangaih hle si a, i thiltih engkim hi hrilh lo ka nilo mahse Anni chuan kei aiin nang an thlang che a, i fapa ve tan kha Mizoram an rawn kal vang vang ania,” tiin a nui hak a, “Mi ṭha ber angin an cheibawl che a, mahse kei ve hi ka fate hi ka nu leh pate hian an hmangaih ve lo.” atih leh chuan, “Dawt,” ka ti vak a, sawi zawm tur pawh ka hre tawh lo. Hetiang rilru a pu thei hi mak ka ti em a ni.

Conti….

Leave a Reply