You are currently viewing PHUBA S2- 23 LAST

PHUBA S2- 23 LAST

Spread the love

PHUBA S2 – 23

JONSMELY BAWITLUNG

“Engtin nge chutiang rilru chu i put theih?” tiin ka pan hnai a, Nikhit-a thi hnuanga an bula a kut phuara an ṭhingṭhit tir chu ka melh zeuh a, ka thinrimna leh natna hi a in zat rengin ka ring. “Ka fapa i sawi takah chuan, kidnap tu kha…” tiin ka chawl dat a, “Ni e, that tura ka tih lai khan he i unaupa ve hian alo la chhuak hman a, i vannei khawp mai.” a ti leh erawh ka kut ka humruh a, silai keng mi eng emaw zat chu kalpelin an hmaah chuan ka ding a, “Ka fapa tih nat pawh i pawi ti ta lo a maw?” ka tih chuan, “I fapa chauh nilo, nang leh i chhungkua hi ka ti chhe vek ang,” UMsi’n a tih leh rual chuan na zetin a hnarah chuan ka tauh a, Adhitya pawh a che ve nghal vat a, mahse min khawih hman hma in, Nikhit-a chuan rawn su pawp in Paul-a aw ri kan hre nghal zat a.

Mi tam tham tak an rawn lut a, Adhitya ṭan tu awm mahse an pawlah Nikhit-a lam ṭang tam tak an awm tih hriat takin an in sual nuai nuai a, keipawhin Adhitya chemte nena min rawn pan chu ka pan ve nghal a. Narayanan chhungkua aṭanga seilian tan insual chu thiam ngei ngei tur tih ka chiang, Nikhit zawk pawh khati khawpa insual thiam anih chuan Adhitya chu thiam tak a ni, ka hmaia na zeta a rawn hnek leh ruala na zeta rawn tlawh tu ka hmuh rual chuan ka khi saka, Nicky-an ka tlu min kaihthawh rualin, “I ṭha em?” ati nghal zat a, lu bu nghatin Adhitya rawn phei leh chu a kut rinchhanin na zetin ka pet a, leia min nghah leh rualin ka khi nghal sak mai.

 

 

Adhitya tlu tawh chu a khabeah petin, “A tawk, Adhitya,” ka ti ṭhat a, chet pawh a tum tawh lo. Nicky-a chu melh zeuhin kalsan kan tum erawh, “Khatah khan ding rawh u,” titu avang chuan ka ding dat a, heti taka ka u in min haw thei hi mak ka ti a ni. Inherin a lam kan hawi a, “A tawk viau tawh lo maw, U,” ka tih chuan, “Aih, thi la ka duh,” a tih rualin silai a puak nghal a, mahse ka hmaa a awmdawma ding ka pa ka hmuh rualin ka dawm nghal vat. “Pa nilo, min kalsan suh aw.” ka ti a, Umsi hawi buai lai taka ka nu in a hmaia a beng leh kan lam pana ka pa alo dawm ve rual chuan, “Damdawiin kan thlen pui vat angai a ni.” Nicky-a chuan tiin, kan in pawm chhuak nghal a.

Paul leh Aarati an awm a, engkim an chingfel thei tawhin ka ring. Nicky-an car a khalh a, Nikhit-a pawh thisen kai hnuang in kan bulah a rawn kal ve a, ka nu bawk hi ni chhel leh ta chu. A ṭap lova a che buai hauh lo bawk. Damdawi in kan thlenga, OT ah an nawr lut nghal a, pawnlamah keini kan lo awm bawk. “Nikhit, i hliam kha tihfai tir ve la,” ka tih chuan a lu a bu nghauh a, kalpui mai ka tum erawh Nicky-a zawkin, “Ka lokal pui ang che,” a ti a, ṭang ve deuh mahse a kalpui ta tho a.

Ka nu nen chuah kan awm a, ka nu hmel upa ve tawh tak chu ka en reng a, a rilru puthmang tur awm ka ngaihtuah thiam lo. Nu invawng tak leh fate laka strick tak ṭhin a ni a. Mahse mi zawng zawng in nu fel an tih a ni leh lawi a, a hunah chuan a fate tana ding a hreh ngailo in, kan unau puitling takin min enkawl seilian vek a, kan dinhmun a danglam lai pawhin a chebuai ngailo a, kan harsat a kan nat lai ber pawha min fuih kal tu a ni. Tunah kei ai maha a rin leh a ngaihsak UMalsawmi ngeiin hetiang rilru pu hian sual chhuahin a khung hrang a, a huatna zawng zawng nen a hmachhawn chu a ni si a.

“Nu,” ka tih chuan rawn hawi zawkin, a nui lui sak a, “Ka thiamloh vek a ni.” a ti chhuak sap erawh a bulah ṭhu vatin, “Nu nilo e, engmah i thiamloh a awm lo ania, ka pa pawh a ṭha leh vat dawn alawm.” ka tih chuan, a lu a bu nghat nghat a, “Ni e, i pa chu mi chak tak a ni a, a chhel em em bawk, mahse Malsawmi erawh chutiang a ni ve lovang. Ka fate hi ka hmangaih em em vek che u asin. Engtin nge kan chungah i u hian hetiang rilru hi a put theih,” tiin a ṭap chhuak hawk a, a nat dan tur ka hrethiam ve chiah a ni.

Ka kuah a, sawi tur erawh ka hre hauh silo. Ka nu tan hian a na dawn tih hre mah ila a nat dan tur ka chhutpui thiam lo a ni. “Ka duh ngai miah lo pasalah a nei a, i pa in pawm ang a tih vang chauhin ka pawmpui a ni a, mahse ka lungawilohna takngial pawh ka lantir ngailo, A fate an lo piang a, ka kut ngei hian ka pawmin ka bual a, ka enkawl ṭhin asin. Mahse engtin nge nangin harsatna i tawk a, ka hawisan theih ang che. Nau i pai a, i kalbo a ngai a, i dinhmun hre vek lo mah ila, i tana bikbo harsat tur zia te ka ngaihtuah a, ka ngaihtuah lo theilo che a ni. Ka fa naupang ber i ni a, ka thinlungah i thi ngailo, mahse i chhel a, keimah ang tho a sehhel leh i hna tlin tak i ni a, President hnen aṭanga chawimawi na dawng hial khawpa ram tana hnathawk ni mah la, fa enkawl dan ka zirtir ngailo che. Chuvang ringawt pawh chuan i nu hian ka ngaihtuah hle che a ni.” tiin a insut hraih a.

 

 

“Min mamawh thu i Pa Roa’n alo sawi khan engmah daltu awm lovin Mizoram kan rawn pan nghal anih kha. Khami ni khan i u ṭawngkam kha pai dam harsa ka ti. Tualthattu i nih thu leh i fa pa pawh i hriatloh thu a sawi miau alawm. Mahse ka chhang lo, Rempuia zawk khan kal turin min ti a kan rawn thleng a, engmah sawi a inzawhna hman hi a awm lo, a thleng pawp pawp a, thi chhawngin i awm leh a, damdawi in khuma i awm apiang hian mahni ka inthiamlo ṭhin. I pa leh i unau te dikna hailang tura ka fanu pang ber ka lo tir hi ka inthiamlo ṭhin asin.” tiin a thusawi pawh a mumal vaklo. A sawi nuai a, mahse min ngaihsak lo nia a inhriat avângin a inthiamlo tih ka hria.

“Nu i theihna apiangah min ngaihsak a, ka fapa pawh in kei aiin a duh daih zawk che alawm.” ka tih chuan, a nui a, “Hetiang taka i u in i laka rilru a pu hi ka ring theilo a ni, an tana kum tam ka hman hi a tam tawk lo em ni.” tia a mittui a hruk zeuh rualin, Umsi kan hmaah a rawn ding a, a rawn kal lai reng reng ka hre lo.

“Eng nge i rawn tih?” chhang faka ka nu in ka ṭawng hmaa a rawn tih chuan, UMsi chu ka melh reng a, mahse chhang lovin kan hmaa ṭhutna awmah chuan a ṭhu a. Ngawirenga kan ṭhut vang vang hnu chuan doctor a rawn chhuak a, kan lo be vat a. Ka pa a ṭhat thu an sawi chuan kan thaw huai thei.

Hmuh theih a ni vat dawn tih an sawi chuan ka nu chuan a sam a tuai thuak a. Ngawirengin ka u chu a kalpel a, keipawhin ka zui ve vat. Mahse ka bana a rawn chelh takah chuan ding khawmuangin, amah pawh ka en lo. “Maggie, a pawi ka ti,” tiin a ṭap a, ka chhang lo, sawi tur ka hre tlat lo a ni. Ka chhungkua that vek duh a, ka fapa dinhmun derthawnga dahtu anih vang hrim hrim pawh hian ngaihdam mai harsa ka ti rih tlat.

Ka pa chu cabin-ah an dah a, Nicky leh Nikhit-a te pawh an rawn let tawh a, ala harh miau loh avangin ka pa chu kan awmpui a. “Nikhit, let la in lam a felfai tawh em tih zu ngaihven rawh, i nu leh pate an ṭha em tih hriat a ṭha, naupang ho pawh.” Ka nu in a tih chuan, “Awle nute,” tiin chhuah a tum chu, ka nu bawk chuan, “Nicky, innu nen khan kal ve ula ka duh. ka awm tho a, in lam kha chingfel a ngai zawkin ka hria. Chanchin chu kan inhrilh leh zawk dawn nia, phone kan keng hlawm silova, Margreth kan mamawh tur min lo pe dawn nia.” a ti zawm zat a, hnial duh viau mah ila, Nicky-a chuan hnial lo tura min mitmei avangin kan pathum chuan kan inzui chhuak ta nghal a.

Pawn kan chhuak a, UMalsawmi pawna a ṭhu chu tumahin kan be lo. Kan kalpel laia ka na ru veng veng erawh ka bula kal hian a hrethiam tih hriat takin ka darah a rawn kuah a, “A ṭha leh vat dawn alawm,” atih chuan chhang lovin ka lu ka bu nghat mai. Kan buaina a zo dawn emaw tiin buaina lian takah kan inbarh lut a, tun thla ral ta zawng zawng nen kan hun tawn ka chhut let a ka thaw nghal hak mai. Ka fapa kidnap anih chhan hi ka la hrelo mahse Umsi kha chuan thi se a duh vangin a sawi a, mahse kha chu ka laka a thinrim vangah ka ngai a, a nilo thei bawk. Ka fapa kidnap chu lakchhawn a ni zel a, Mark-a bula ka tan tak dan zawng zawng nen ka ngaihtuah a, Ani khan ka fapa a chhanchhuak a mahse min hmang ṭangkai leh a, chahbi erawh a hmanna tur kan la hrechhuak lo fo chu anih hi.

Motor a ding dawt rualin kan in tia ka lo sawi ve fo ṭhin kawta mihring awm nuai nuai leh pôlice te chu ka enkual a, ka hah ngawih ngawih tawh a ni ber mai. Heng buaina tam tak hi ka hmachhawn dawn tih inhria ila Lawngtlaiah khan ka awm reng zawk tur hi ania. Nicky-a min kaih ang ang chuan tual chu ka paltlang ve zel a, inchhungah kan lut ta a, kan luh ruala Nikhit-a lama naupang pathum rawn tlan te chu ka en a, UMalsawmi fate an ni tih ka hria. Mipa pakhat leh hmeichhia pahnih an ni a, a té ber pawh kum 3 chauh ala ni. A fate hi hmangaih takin enkawl zawk se, a hna kha bansan mai se hetiang rilru hi a pu kher angem tih ka ngaihtuah a, a fate dinhmun tur ka ngaihtuah hi ka lainat takzet.

A tê ber, Maria-i chuan min rawn melh karin, “Apate heihi tu nge a?” atih chuan, Nikhit-a chuan ṭha taka hrilhin, “I rawn hmu har em a an hre ve meuh lo che anih hi.” tiin naupang ho hmuhah chuan a nui sang a, naupang ngaina tak ka ni biklo nen biak dan pawh ka thiam chuang lo. Ṭhutkhawmna lamah kan kal a, pôlice pahnih leh Paul te nupa bakah Adhitya te an lo awm a, Nikhit chuan nau awmtu ko in naupang ho chu a kalsawn tir a, An bulah chuan kal hnai in, an thusawi kan ngaithla a. An Police officer pahnih chu ka hre ngailo na in min lo hre viau lehnghal a, ka awm tak vang nge an ṭawng huai viau thung. Heng laia pôlice tam zawk hi chu an corrupt ve a, an dawi bawk. Narayanan chhungkua an hrechiang hle tih a hriat hle bawk.

“Engvangin nge ka fapa kha in kidnap?” ka tih chuan, Adhitya chu a thawhalh a, “List leh map zawng tura ka duh vang che a ka ruahmanna a ni. I ṭha tawk tih ka hre miau a.” atih chuan, “Ka u i ni a, i duh chuan min hrilh thei reng alawm, nang pui lo che a ka tlanchhiat i ring hi ka hrethiam theilo.” ka tih chuan, “Maggie ka hrelo engin nge min mawlh a, kan nupaa hetiang kan lo nih tak. Ka hriatchian tak erawh duhamna hian khua min hmuh tir theilo anih hi. Nikhit-an ro a khawm dawn tih ka hriat khan ka nihna pangngai a chhuak a, ka thinrimna kha ka thunun theilo a ni. Ka duh nei tura ka ke pen a diklo tih ka hriat kha chua a tlai tawh em a ni.” a tih leh chuan, sawi tur ka hrelo.

Nicky-a pawh hian sawi tur a nei ṭeuhin ka ring mahse ngawih a chuh tlat a, a thinrim hle a ni tih a mitmengah hian ka hre thei. “Hruai bo teh u, I pu kha la dam sela chuan i nunna hi a la tawh ngei ang. Mahse i pa ka nih vang erawh chuan chutiang em chu ka tilo ang. Ka hmuh phakah erawh awm tawh suh, mahni nau te pawh thah tum mihring, hetiang rilru i pu tih a hriat vang alawm i pu khan i nau sumdawnna ngaihsak ngai reng reng lo kutah engkim a dah.” Paul chuan ti hmukin, Pôlice te chuan an thawhpui nghal a, “I fate chu ka lo enkawl ang che, court in i chhungthu a rel hunah erawh i tan ka ding theilo ang,” Nikhit-an atih chuan, Adhitya chu ngawirengin a en a, “Ka pu nunna i lak vang pawhin ngaihdam i ni dawn lo.” a ti leh erawh Aarati a ṭhu hnawka, a ṭap chu a pasalin a dawm vat a, keipawhin ka thu hriat hi mak ka ti a ni.

Adhitya an hruai chhuak a, Nikhit-a chuan, “Ka nu ka pa, ka sawiloh avangin min ngaidam ru, mahse an bula ka sawi a, inlam let tura ka tih khan kei min thah an tum zawk si a. Maggie thil engkim kha helai hmun ka thlen hma hian ka hre vek tawh, ka pu erawh ka venghim hman ta lo a ni.” atih chuan, “Mahse engmah i sawi lo.” ka ti sap a, alu bu nghat nghatin, “Ka hriat avang alawm i fapa venghim turin Mizoram ka rawn kal, Mark erawh a rawn tel ve chhan ka hrelo. Mahse i fapa erawh a him phah tho a.” atih chuan ka mittui a hnam ve sawk nia. Ka fapa venhim a duh luatah ka pu in a nunna a chan a ni si a.

“UMsi erawh i thu thu ni tawh rawh se, i tan tir ve anih pawhin an fate hi chu ka awm chhung chuan an rethei ngailo ang. Mahse an pa ber a tang tawh a, a nu lehzel tan tir erawh hrehawm chu kan ti ngawt ang, URempuia te chhungkua an awm tawh lova, Mizorama in In in nei let leh tawh tih ka hre bawk a, Nutei leh Patea te pawh an rawn haw tawh ngei ang. I thu thu a ni.” tiin a mit tuai zeuhin, “naupang ka va ngaihven ange,” ti zawmin a kalsawn a, Paul te nupa pawh tibuai rih lo a ṭha a ti a ni mahna, Nicky-a chuan pawnlamah min hruai chhuak a, sawi tur hi a vang takzet a ni.

“Chhungkaw inrem takin Kum 15 zet kan awm tawh asin. Hetiang hi kan ni ngai miah lo.” Thawhalha ka tih chuan, “Um ka ring alawm.” a ti ve sup a. “Engpawh nise UMsi chu i kutah ka dah aw, keichuan engmah ka sawi theilo a ni. Ngaihdam pawh min dil se ka ngaidam theilo ang, chutih rualin an fate ka ngaihtuah lo thei bik silova.” tiin min chhan hma in kan in lamah ka kal a, ka nu khan an mamawh tur min chah anih kha. Nicky-a chuan min zui ve zel a, Air bagah an mamawh tur anga ka rin ho ka khung khawm a, ka ngaihtuahna hi a buai nuai vek mai a ni.

“Bawihi i U in a be duh che a,” Nicky-an a rawn tih chuan hawi zawkin a phone min pek chu ka la nghal a, “Um,” ka tih ringawt ruala URempuian, “I ṭha em?” atih rual chuan ka ṭap chhuak hawk a, Ani pawhin sawi tur a hrelo nge a ngawi ve reng a. “Mate, mihring te hian kan tisual fo a, I U pawh mi famkim a nilo a, harsatna tam tak a nei ve ngeiin ka ring, i ngaidam theilo anih pawhin ka dem reng reng lo che ania.” Kan ngawih vang vang hnua atih chuan, “Ngaihdam chu ka duh mahse ka u kei leh ka pasal hi min lo hua anih pawhin ka fapa lehzel tihnat a duhna hi ka ngaidam theilo.” tiin ka ṭap hawk hawk a, “I U i hmangaih zia chu ka hria lawm, a tina che a, i tan ngaihdam kha a har ang. Eng thu tlukna pawh siam la ka pawmpui vek ang che, ngaihtuahna fim tak hmang chauhin i siam dawn tih ka chiang a.” a tih te hlei hlei chuan ka ṭah a ti chhuak zual a ni.

Ni e, ka u hi ka hmangaih a keimaha min huatna hi engtik aṭanga piang nge tih ka hrelo, mahse ka hmangaih avangin a zahawmna ka lak let sak a, ka tana innghahna anih miau avangin engkim, thil engkim tak tak ka thlen a, ka ṭah chang pawha ka ṭah fo na leh ka lungngaih chang pawha ka tluk luhna ber a ni ṭhin asin. Ka tan hian Amah anga min hmangaih a, min hrethiam tu hi an awm ngai lovang ka tih hial ṭhin a ni asin, mahse tuna a chetdan hi chuan min vit nawn awn awn chu a ni si a. A duh ang hi thlengin ka fapa nunna hi la ta se, tia ka ngaihtuah chuan ka thaw a chham thei mai dawnin ka hria.

Min rawn kuahtu chu en pawh ka en lo, Nicky-a a ni tih ka chiang em a ni. Chhutah chuan ka ṭhu sawp nuai a, duhtawka ṭah ka duh ber. Ka hnungah a chul hliau hliau a, ka duh tawka ka ṭah meuh chuan ka chau hnawk thei. Min chawi kang lawp a, khumah chuan min mut tirin, “Bawihi tihian lo mu rawh aw, Nikhit-a ka be tawh a, awmpui an rawn kal ang, mamawh pe hian damdawi in lamah chuan ka han kal ange.” a ti a, mahse a thusawi hi ka chhang em pawh ka hrelo. Ka chau lutuk chu ka muhil nghal ni mai in ka hria.

 

 

Ka harh leh chuan khua a thim vek tawh a. Pawnlama zi nuai nuai pawh an lo reh ṭhiap tawh. Chhunah kha chuan Police nen chanchinbu mi nen mi tam tak an pungkhawm kha ania. Ina kan luh leh thleng khan mihring an la tam viau a, reporter ṭhenkhat te la in thu min zawh tumin an au nuai nuai bawk anih kha. Mahse tunah chuan tumah an awmlo tih hriat takin a reh ṭhiap a, khumah chuan ka mu meng kar a, ka ngaihtuah bawk a vak kual a, ka fapa kha engtin nge a awm zel ang, a nu leh pa te hi min ngai ve ngawt ang.

Damdawi In lam ka ngaihtuah chhuah chuan, ka pa a harh tawh leh tawh loh ka hre miah lo. Ka tho hluai a, ka thawmhnaw hak ka en chuan a ngaihna hrelo zetin, ka puan chuan ka intuam a, chutih mek lai chuan Nicky-a chu inbual fai tawh tih hriat zetin a rawn lut a, “I lo harh tawh a ni maw?” tiin ka bulah rawn kalin ka chalah a fawp zeuh a. “I nu leh pate pindana mut kha chu a dikin ka hrelo a ka sawn che a.” atih chuan ka hawikual nghal ruai a, ka pindan ṭhin a ni tih ka hre ve chiah. “Ka pindan i hria a maw?” ka tih chuan, “Ah Nikhit-an min hrilh a, hliam neuh neuh te kha i nei ve sia, i harh hma in injection pe che in, i hliam pawh enkawl vek a ni tawh e,” tiin a nui sang a, Ka kawr hak chu zen zeuhin, “Anih heihi?” tia ka melh ralh chuan, “Ka thlak che, i thawmhnaw ho hi hak tir mai tur che ka hrelo a,” atih chuan, “Mut kawr sexy deuh ka ha ngailo.” ka ti hmak a, a nui hawk chu melh in, “Kawr dang ka duh.” ka ti nghal zat a. He mut kawr tuna min haktir hi chu hmana ka u min leisak a ni, a sexy em vanga min tilui lei sak vel kha ania, ka ha ngailo hrim hrim, engti tiha Nicky-a hian min hak tir mai nge pawh ka hrelo.

Ka thawmhnaw bawm chu haikualin T-shirt lian zet hi a rawn phawrh a, “Kha kha ka lo ha mai ang, a fual tho a.” ka tih chuan thuawi takin min pe ve mai a, ka inthlak tur min en tlat erawh ka lai deuh ṭut mai. “I hawisawn thei em?” ka tih chuan, nui sukin, “Ka nupui i ni alawm, hawisawn kher a ngai em ni?” chimawm zeta min melh hian a ti a, “Hawisawn mai teh.” ka ti leh halh erawh nui ruh ruh hian a hawisawn a, rang zetin ka inthlak nghal. Ka zawh fel ruala a rawn hawi rualin min rawn fawp nghal a, min fawh dan uar lutuk chuan ka ngaihtuah kal ding mek chu a tibuai vek thei.

A duhtawk mai dawn emaw ka tih laiin ka kawr a hlim a, tun dinhmunah hian a hun berlo ti mah ila ka ngaihtuahna a tibuai vek a, a nupui ka nihna hlen duh ngawih ngawih in min siam chu anih hi. Khuma inkuah riala kan mut hnu chuan, “I ril a ṭam tawh em?” a rawn ti sup a, thatchhe zetin ka samah a hmai a phum daih thung. “Um, eirawngbawl sa a awm em?” ka tih chuan, “Awm e, Nikhit-a khan nula pahnih a rawn tir a, i muhil ka ven bak che hna ka nei hleinem, Inti fai ve la, zanriah ei ang. I pa pawh kan tlawh dawn nia.” atih chuan, ka chal ka beng nghal dat a, mak ti zetin min lo melh run thung. “Ngaihtuahna i hruai bo daih alawm,” tiin khum ka thawhsan nghal a, bathroom ka khar hmaa a nui hawk chu ka hre hman. Nicky-a hi awmlo ta se tuna ka harsatna leh buaina tawh mek hi engtin nge ka paltlang ang le.

Zanriah kan kil zo a, damdawi in lamah kan kal a, ka pa pawh alo harh tawh bawk. UMalsawmi a bulah alo ṭhu a, ka nu erawh ka hmu lo. “Ka pa ilo harh laia ka awm lo chu min hrethiam dawn nia.” ka tih chuan, “A pawilo, ka ṭha viau ania.” a ti a, mahse a taksa a chaklo ve tawh a, silaimu a dawng bawk si a, a chau hle ang tih hria in ka be zawm lo. Ka nu lo luh hma chu kan ngawi ṭhap a, ka nu bakah Paul te nupa an rawn lut a, “Bawihi in lokal thei elaw.” tiin Aarati chuan min be nghal a, “Um, riahpui a ngaih ka ring a.” ka tih chuan, “A ngai ve ngei ang, mahse inpa hian a phallo ang.” tiin a nui hak hak a, Tamil a hmang miau a, nui ve bawk mah ila Nicky-a hawihai hmel ka hmuh chuan, “Nute, Nicky hian Tamil ṭawng a thiam ve lo ania.” ka ti a, a chal beng thekin, “Ni tak,” tiin Hindi in a sawi ṭha leh a, Nicky-a pawh a nui ve suk suk mai.

An haw dawn chuan Paul chuan, “Bawihi haw ang hmiang, naupang ho pawh an khua a har tawh ngawt ang.” tiin UMsi chu a sawm a, UMsi’n kun chhal a, “Ka pa, min ngaidam theilo anih pawhin min haw hlen suh aw.” atih ruala a mittui far fap chu ka hmu reng. “Ka fanu i ni alawm.” tia ka pa chhanna chuan thil tam tak a sawi tih ka hria. Ni e, an fanu an hmangaih em em a ni a, thil pawi lian tham tak tisual mahse ka pa mahni fate hmangaih em em hi chuan ngaihdam hun a nei ngei ang. An pathuma an inzui chhuak chu ka en ṭhap a, an chhuah hnuah chuan ka pa chuan Nicky-a chu a kuta vai zeuhin a bul ṭhutnaa ṭhu tur chuan a ti a.

“Nicky, ka fanu Lalmalsawmi thiltih te kha ngaihdam rual a nilo tih ka hria mahse a pa ka nihna angin a aiawhin ngaihdam ka dil a che.” atih chuan, “Ka pu,” a ti hman chauh a, ka pa bawk chuan sawi zawm leh in, “A lakah khan tihsual neilo emaw ka inti a, mahse a harsatna tam tak kan lo hriatpui tawk lo a, keini a nu leh pate hian tihsual tam tak kan lo nei reng a ni tih ka hria, thilṭha thleng tur hian a chhia kan tawrh kher erawh ngailo mahse keini chuan kan tuar vek a ni a, mahse Pathian zarah in fapa pawh a him a, tin keipawh nung damin ka la awm bawk a, in rilru natna te kha a dam kim hauh lo ang tih hre mah ila, insiamṭhat theihna hun ṭha vawikhat tal pe leh ula ka duh takzet a ni.” atih chuan, Nicky-a chu a thawhalh a, sawi tur a hrelo nge harsa a ti tih ka hrethiam lo.

“A chungah engmah tih ka tum lo ania, harsa mahse a fate enkawl tu nu ṭha tak anih zawm ngei ka beisei a ni.” tia a chhan chuan ka hahdam huaiin ka hria. Keima vang pawh hian ka U chungah khan engmah a thlen tir dawn lo tih ka hrethiam ve tlat a ni. “Bawihi, i nu anga sehhel leh tuarchhel i ni a, i luhlulna rah pawh vawiin niah kan hmu bawk, i tan hian i U ngaihdam hi a harsa ngawt ang tih ka hria, ngaidam rawh ka tilo a, innupa hian hun ṭha pe leh rawh u ka ti mai a ni.” tia a thusawi a nawn chuan lu bu nghatin, “Awle, ka pa.” ka ti ve sap a, a bak chhanna ka neilo. Ka pa ngaihdan erawh thilṭha ber a ni rih tlat si a.

Karkhat zet Tamil-a kan cham hnuin ka pa pawh In lamah haw pui a ni a, a ṭha sawt viau a ni. Adhitya erawh court in thiamloh chhantirin Kum 15 jail tang tura tih a ni a, Nikhit-a pawhin charge hrang hrang la kir mahse a tualthahna video a awm miau a, chuvanga tang tur a ni. UMsi pawhin a fate a enkawl a, a hma angin kan inkar ṭha lo mahse engtik niah emaw chuan ka U bik em em kha a ni leh ngeiin ka ring. Adhitya pawhin a chunga hremna chu a pawm thlap a, Nikhit-a pawhin a tlawh deuh reng bawk.

Industry pawh a ngai angin a kal leh tawh a, Nikhit-a,leh Paulan an enkawl tawh thung. Kaldan phung thar zawh mahse an misual rualpawl kan tih mai an pawl erawh a hma zawng aia thuam chakin, Anmahni laka hel te hremna tur dan pawh an zam kur duah mai. Hei hian phatsantu awm tawh lo turin a veng ngei ang. UMsi pawh Doctor-in a enkawl a, ka pa pawh Home nurse ruaiin a hma pha tawh lo mah ila kan pangngai leh tawh viau thung.

“Nicky, Delhi kan let hma in khua chu ka fanpui ang che, i duh em?” kan pahnihin kan pindanah kan awm a, a ngawi leh vung vung ṭhin hian min ti awm nuam lo em a, chuvanga hetia ti ngawt pawh hi ka ni. “A pawilo, mahse Mizoram ka ngai.” a tih nui nui chuan insum hman lovin ka nui chhuak hawk a, a awmdan lawmawm lutuk hi a inhmeh lo ve em bawk a ni.
“I ngai ve lo em ni, kan fapa ka ngai tawh alawm.” atih leh chuan, a ngai tak tak a ni tih ka hrethiam, a ṭawng zir ve hi a be reng zel anih hi maw.

“Ka ngai lutuk alawm, kan haw thei ṭep tawh alawm, ka pa pawh an zaina an phelh tawh a, Industry ngaihtuah ngai a nilo bawk a, kan haw vat dawn alawm.” tiin khuma a ṭhu chu ka pumah ka kuah a, a thaw lum ham ham a, a hahdam ve ta nge, “Anih chuan khua chu fang ang hmiang, honeymoon pawh kan hmang silova, kan honeymoon a ni mai lawm.” a ti a, a nui vur vur chu en in ka nuih ve sang mai.

Garage-a ka luhpui chuan a mitko a san ak a, “Bike hi khalh mai ila,” ka tih chuan, “A pawi miah lovang, bike duhnu,” a ti kher chu ka melh rum viau a ni. Kan tlanchhuah hma in Nikhit-a a rawn lut a, “Nangni pahnih chu eng nge in tih dawn a?” tiin car-ah a bag a dah a, hetia suit nena a induang vel ap zel hi ka nuih ala ti za ṭhin. “Kan khua hi ka fanpui dawn, honeymoon kan hmang pah dawn a,” ka tih chuan, “In tenawm,” tiin a inher vut a, mahse Car-a a luh hma chuan a hnunglam aṭangin a kut telin ka kuah a, a ding ngil awtin ka hria. “Ka lawm e,” ka tih rualin ka thlah a, rawn inherin, “Engvangin maw?” atih chuan, “Ka unaupa ṭha ber i nih avangin, ka fapa tan putea ṭha ber i ni bawk a, i thu ka awiloh lai ber pawha min venhimnan theihtawp i chhuah ṭhin bawk a, kan chhungkua i venghim bawk a.” ka tih duah chuan a nui suk a, “A tawpah chuan lawmthu i sawi ve ta alawm,” tiin a nui suk a, “I lawm bawk sia,” tiin a bag chu a hai nghal rawk rawk a, lehkha min lo pek rual chuan en in, “Eng nge a?” ka ti hu a, ka keu rual chuan, “Ilo kawl reng a maw?” ka ti nghal vak.

Nicky-a chu ka bulah rawn kalin, ka map ken chu a rawn ve nghal a, a nui ve suk mai. Nikhit-a chu pe let lehin, “Kan honeymoon chu kan han hmang ve ohawt ange aw.” ka tih chuan, “I va tenawm tak e o, kal vat ru,” a ti hluk a, nuih hak hakin kan kalsan ta a. Nilengin eng eng emaw kan tikual a, mahse ka lu a na nget nget nia. Thil ei ka rawt a, engtik lai pawha ka ei duh em em chilli chiken ka chah a, mahse a rim ka hriat rualin insum hman lovin washroom-ah ka tlan lut nghal. Chau hnap khawpa ka uak hnu chuan, mittui tla phungin ka chhuak a. Nicky-an min ngaihtuah taka min rawn chelh nghalin, “I ṭha em?” a ti a, lu bu nghat nghatin, “Um mahse ka lu a hai.” ka ti erawh, “I ṭha miah lo,” tiin damdawi Inah min hruai nghal a.

“Damdawi In kal angailo asin, ka ṭha viau ania.” ka tih pawn min chhang duh ṭhak lo. Ka hming an rawn lam a, kan luh chuan, ka awmdan kan sawi a, doctor chuan ka thi neih hnuhnung ber min zawt a, mak ti deuha enin, ka ngaihtuah a, “Ka hrechiang lo.” ka ti ta ringawt a. Ni e, kan buai nei nuai reng avangin ka period hun ka chhiar thei tlat lo a ni. Min en zung zung a, test kit min pe a, ka zun test a toilet-a ka ṭhu chu mit siai chungin ka test kit chu ka melh a rin pahnih, kei hi ka rai a maw. Lawm tur nge lawmloh tur tih pawh ka hrelo.

Pawn ka chhuah rualin Nicky-a chuan min lo zawt vat a, ka rai thu ka sawi ruala a hlim hmel mawlh hi ka theihnghilh tawh ngaiin ka ringlo. Damdawi min pe a, kan haw ta a. Nicky-a hlim lutuk hian a chhungte a phone nghal vek a, ka chhungte pawh an lawm thiam.khawp mai. Nikhit-a a rawn haw a, a rawn faifuk hlarh hlarh chu kan lo en ṭhap a. “Ngati nge in awm khawm ṭhap a?” atih chuan, tumahin kan chhang lo.

Hrilhhai deuhin Nicky-a nen chuan ka pu office ṭhin, Nikhit-an a luah takah chuan kan inzui lut a, “Vawiinah Mark-an a rawn call a,” tiin map bawk chu min pe leh a. “Sorkar hian in chungah rinna nasa tak a nghat ania.” atih chuan, Nicky-a chuan, “Kan pui thei tawh lovang,” tiin ka kuta map chu a pe let a, Nikhit-a ṭawng tum chu khap in, chahbi chu a kutah ka dah ve leh a, mak a tih hmel tulh tulh. Ka test kit a kuta ka dah leh rual chuan, melh zawkin, “Min kuah nghal thlawp a, malsawmna tam tak dawng ang che. I pasal bulah i awm tawh a, ka hlim tawh.” a ti ringawt a, a thusawi erawh ka hrethiam viau a ni.

A TAWP TA.

Leave a Reply