You are currently viewing RAUTHLA KIR LEHNA 1-3 Compile

RAUTHLA KIR LEHNA 1-3 Compile

Spread the love

RAUTHLA KIR LEHNA – 1

JONSMELY BAWITLUNG

“Lalfapa, kan kal a ngai ania” titu Zamana chu en zawkin Ngurnunmawia chuan thawk a la halh a. Midangte khawngaih a, midangte tana a nun zawng zawng hlantu Pasalṭha huaisen, A vanga a khua leh tui muangleia an awm laia bumna thang a awkin, englai pawha a mamawhna kawng tinrenga pui ṭhintu, a Lasi ṭhian Parmawii, Huai ho nen an inbeihna avanga Nunna nei tawh lo tih hriat taka a hmaa mu dang bem chu melh vawng vawngin, Parmawii Nuṭa Zamana chu en leh in, ” Mana Ka tlan dawn lo, a tawp thlengin ka ṭang ral ṭhak ang, ka ṭhian thisen hi a thlawnin a luang lovang” a ti rum al a.

A ṭhian thihna chuan ti na hle mahse kha tleirawl ram palailenga a tawnin a bum tak avanga a Chem a Lasi ṭhianin a pek tello chuan Huai Lalpa chu a hneh thei dawn lo tih chiang takin hre mahse a ṭhian tan chuan thih thlenga beih erawh ala tum fan a,, mahse eng nge thleng ta hi. A chempui hum a huai ho awmna lam pana ke a pen lai tak chuan a hnunglam aṭanga rawn dawmtu an awm rual chuan vir zawkin an awmna hlat zawng chuan chak zetin boruakah chuan an thlawk ta nghal vawn vawn a, Ngurnunmawia’n thil awmzia a hriatthiam meuh chuan Huai leh Lasi te inbeihna mual chu a hmu pha tawh meuh lo,, tal ve phat phat mahse Amah vuantu chuan a thil tih theihna nena vuan anih miau avangin a talchhuak thei bik lo.

Inbeihna mual aṭanga hla tak an thlen chuan Zamana chuan Ngura chu leiah nghat thla hnawkin Amah pawh hah luat avang leh an inbeihna lama a hliam tawrh avang chuan leiah chuan a tlu ve nghal hnawk a. Thinrim zeta Ngura’n Zamana leia tlu a ṭham thawh nawk rual chuan an piah hla deuh taka khaw kang tih hriat taka mei khû van lama chho tup tup chu a hmu zawm nghal zat bawk a, an khaw ramvalh chinah an awm tih a hriat chhuah rualin chak zetin an khaw lampan chuan a tlan ta nghal a.

An khaw runtu ngaihtuahna nen an khaw hal a ni mai chu a titu tur awm reng reng a hrelo. Khawchhung a lut a, kang bang leh a kanna vanga meikhu zam chuk tih loh chu thil che reng reng hmuh tur a awmlo. Mahni inthiamlohna leh pawi tih luatna avang chuan a ṭhingṭhi hnawk a,,a khua ti a alo chhal ve ṭhin ngei, A pa lalna vangkhua Zawlpui, kang bang khu rum rum chu a thlir ngawt ngawt a,chutia a ṭhingṭhit lai chuan harhchhuak deuh thutin hmuntinah chuan a mit a lenkual a, damchhuak tu emaw tal a hmuh a inbeisei a ni, mahse tumah an awmlo,, thil nung che vel hmuh tur reng reng an awmlo.

A chhungte leh a ṭhiante,,an Pasalṭha tu emaw ber mihring pakhat tal hmuh inbeisei zeta dingchhuakin Lal mual lam pan chuan a kal leh nghal vat a,,naupang, pitar leh putar, hmeichhia te ruang chu khawlaiah chuan a let rem rum a, Lal mual a thlen chuan an Pasalṭha te leh upa te,an tlangval ṭhenkhat te ruang chu a let phung bawk a,mahse a chhungte ruang reng reng a hmu ve hauh lo. An In kang bang dum ruam chu en in, thinrim luat avangin a ha chang a ṭhial ri bap bap a. Heng zawng zawng hi tu tih nge, tia a ngaihtuah ngial pawh in Hmelma an neih awm a hre si lova, hetiang taka rawnga an khaw chunga chet la duh hi a hre lo a ni. A pa Ngurhlira, Lal zaidam leh rorel thiam niin, Indo aia remna siam duh mi a ni a,an khaw ṭhenawm ram te nen inremlohna leh thubuai an neih a hrelo, Anih chuan engvanga an khua hi run a,,hetianga chet la ta mai nge an nih le?

An khua Zawlpui ropuina leh an lal finna chuan Lusei fate dengchhuakin, khaw ṭhenawm ram lahin an pawisawi ai chuan remna an duh zawk ṭhin, chutiang taka muangleia an awm laia run an tawk mai leh hetiang taka rawnga an laka chet la a,, naupang leh tar chaklo zawk te leh an hmeichhia chena zuah lova that a, sala hruaitute chetdan chu a ngaituah ngial pawh in tu te tih nge a hrelo, hrehawm taka a awm lai pawh a Pasalṭha anihna rawn langin an kalna lam tal tia chhui zui tum mahse engmah hnu an hnutchhiah tlat lo mai te chuan mak a tihna ti a zualin a hrilhhai takzet a ni.

“Lal fapa” pawi tih luat avanga zuai raiha titu Zamana chu melhin,, Ngurnunmawia chuan,”Keima thiamloh vek a ni”a ti chuai raih a.

“Mana enkual teh ang hetiang taka hmanhmawh a chet an la anih chuan, tihsual leh hmaih an nei ngei ang. Damchhuak emaw, ral laka tlanchhe ta tal hmuh tur an awm lawm ni, mihring hnu eng emaw tal kan hmuh hlauh chuan kan tan a ṭha dawn em asin” tiin Beiseina insiam chawp in,, Ruang let phung te chu a enkual zung zung a.

A rilru chuan a nu leh a pa, a unaute leh a farnu neihchhun chu ngaihtuah in, a ṭhian te tal pawh damin hmuh leh hram a beisei a, Mahse Nung damin an awm ang nge ral kutah an awm zawk tih a hre silo, a farnu neihchhun ral kuta sala awm mai tur a ngaihtuah chuan a thin a rim zual in a thaw leh hawk ṭhin. A ṭhianṭha em em Lasi nula Parmawii hmelma lam kuta a tlu a dawmhlum zo chiah a,a thinrimna la reh lo nen, tunah Apa lalna khua ral laka tlawm a,a bo a bang awm lova an laksak leh an khua hial halsak a,sal atana an man tak te, an khaw kang khu rem rum leh an khua leh tui ruang tam tak let phung te hmuh a engmah ti thei lova a han awm leh meuh chuan Pasalṭha pawh in rilru fim a pu thei meuh lo a ni e.

A u Ngursanga,nakin lawka a pa lalna changtu tur leh a nupui leh a fa la naupang tê tê a ngaihtuah chhuak a,,Anni tal kha chu damin hmuh a inbeisei takzet, A farnu Ngurliani khual thang khawpa nula hmelṭha, an duat luat avanga pasal neihna chang hrelo chu ngaihtuah chhuak leh in, sal ni mai tur anga a dah chhin pawhin Ngurnunmawia thinrim lutuk chu a au chhuak ṭhawt thei hial a.

“Lal fapa i chhûngte” tia rawn kotu Zamana awmna lamah chuan rang takin a tlan a,a bul a thlen ruala a thil hmuh avang chuan a ding chawt thung. A nu leh pa leh a u nupui te inhnaih taka let ngat te chu a melh ngawt ngawt a,,a u fate pahnih ruang bula a u ngei Ngursanga lu bunga let ngut nen a hmuh leh meuh chuan a thinrim insum zo lo chuan a chempui chuan a bula thing chu a sat nghek nghek a, “Hetiang taka rawnga kan khua a chet la tu te hi tu nge an nih?” tiin ring zet zetin a au chhuak chiam a, Zamana pawh chuan Ngura chetdan chu dan pawh tum lovin a melh tlawk tlawk ringawt a.

Zamana chuan “Heng zawng zawng hi chinfel dan kawng khat chauh a awm,mahse ka farnu khan i nunna a ngaipawimawh ber a, Nangmah venghim turin min ti miau si a,mahse hetiang taka hrehawmna i tuar anih chuan i tan leh i nunna tan pawh hian a pawi thei zawk si a” a ti rilru a, a thil ngaihtuah avang chuan harh chhuak thutin,, Thinrim inhrosa mek Ngura chu a hming meuh a ko in a chelh ding a. Hreh hle mahse a ngaihtuah ang hian a kalpui ngei a ngai a ni tih a hria. An khaw beitu te hi Huai ho an laka hnehna chang ta te puihna a chet la a, an hnu takngial pawh chhui theih lova awm an nih a hai lo,,chu erawh Ngurnunmawia hian a hrethiam lova,hria pawh nise tih ngaihna a awmlo,a pawimawh ber chu, kha a chem a farnu in an lalnu hnen aṭanga a thilpek dawn Lasi te thiltihtheihna a thuam kha,,Amah Ngurnunmawia ngei a pek tak kha a hmuh let leh a ngai a ni.Chu chem chu a hmuh let phawt loh chuan engtikah mah Lasi te ram leh Zawlpui khua hi dinthar leh ngaihna a awmlo a ni.

“Pasalṭha engkim hi a bul aṭanga thlen tir a,hnehna chan dan chu kawng khat chiah a awm” Ngura thinrim luat avânga mit sen rum chu melh in Lal fapa tih aiah Pasalṭha tiin a ko bawk.. Ngura chuan a thil sawi chu a bengkhawn a ni tih a hriat rual chuan a aw chu thian kharh in,a farnu thi ta chu zah viau mahse a sawi a ngai tia infuih nawn leh in, ral hla taka tlang ding to lurh lam chu kawkin, “Khimi tlang khi i hmu em,, khimi tlang khi Lasi khawpui awmna Ṭan tlang anih khi, khitah khian kalin Keimahni ang Lasi pakhat tal pawh hmuh belh ila kan thil tih theihna hmangin engkim chinfel dan chu a awm,, Mahse i hriat angin kha inbeihna avang khan tam takin nunna an chan a, an tlan darh bawk a,,Dam hmuh tur an vang dawn in, keilah ka hliam bawk nen, ka thil tih theihna hmangin ka hruai thei dawnlo che a,,hmanhmawh takin chet kan la thei lovang” a tih chuan Ngurnunmawia thinrim rilru nû but pawh chuan inbeng daih tumin thawk a la hawk hawk a.

“Aw le a ṭha lawm, heng thil zawng zawng ti tu te chunga phuba ka lak ngei theih nan hian min pui ka ngai a ni. Parmawii Phuba la tura ka lo kir leh ngei theihna turin.” tiin a chhungte ruang let rum lam chu melh leh zawkin lei charah chuan a ṭhu ta hnawk a.

An theih ang anga ruang awm chu buaipui in, an khua tia inchhuang taka alo chhal ve ṭhin Zawlpui chu thlir let vang vangin, an tum lam pan chuan Zamana leh Ngura te chu an chhuak ta a. Ni hnih leh zanhnih ngawt Lasi khawpui thleng turin an kal tawh a,, Zamana hliam pawh an thiam ang tawkin enkawl mahse a hliam tawrh a nasat em avangin an duh ang pawh in an kal chak thei lo.

“Lal fapa,heti ringawt chuan ka ti khawtlai mai mai che a ni,ka chipui te chu nangman va zawng ta la, he thil hi i pe dawn nia,Anni in an tih tur an hre mai ang” tiin Lungmawi zet hi a kutah chuan a hmehbel chawt a, Ngurnunmawia erawh chuan a ṭhian chu kalsan a tum hauh lo,,a zakah lain,,a kawngah chuan vuan in kuah chung chuan a kalpui leh ta a.

A ngaihtuahna erawh in an khaw râm ta a chhui kir a, an chhungkua in hlim taka an hun hman dan te a ngaihtuah a. A farnu nui hmel ngaihtuah chhuakin, Ngurliani’n chhuang taka a hnena a sawi fo ṭhin, “Keizawng engmah in min ti na ve thei lovang, ka u Ngurnunmawia a awm chhung chuan,” tia a nui ar ar lai te, a nu in an unau a zilh fo na, an chhungkaw chauh nilo an khaw tana entawn tlak ni tura nun hmang tura a tih te, A pa zilhna, “Ka fapa I u chu Lal ni tura piang a ni a, mahse nang erawh ka khua leh tui venghim tu tur i ni, Ngurnunmawia a tlawm ta tih ai chuan huaisen takin a bei a, a nunna in a tuar ta tih hriat ka duh fo ang.” a tih te chuan a ngaihtuahna rawn luah thar in, a chhungkua leh an khua humhim zo lo mahse phuba erawh lak ngei a tum ruh tlat thung.

Ngurnunmawian thawm a hriat rual chuan fimkhur takin Zamana chu an dinna bula lungpui ngheng chuan a ṭhut tir a,,a chempui chu phawrh in an awmna bul vel chu a melh kual nghal vat vat a. an hmalam phe zawk a hmuh rual chuan a awmhmunah chuan in ring zetin alo ding nghal ran a. A thil hmuh chu rawn hnai zelin a zawn a rawn thleng chuan tleirawl hmelṭha zet hi alo ding ta ran a,,engtik laia rawn thleng nge tih Ngurnunmawia chuan a hre hauh lo mahse chu nula in chik zeta a melh ran takah chuan “Tu nge i nih?” ti rum alin a chempui chu a hum nghet sauh sauh a.

“Hlauhawm ka nilo e,,Indo na avangin kan mite tam tak kan chan a, a ṭhen an bo bawk a, Kan khawpui ber Ṭan tlang la Huai in an luah ta si a,hmun dang dapa kan kal hma in,kan chipui tlem tal damchhuak an awm leh awmloh hre tûrin kan Lalnu in min tir a ni,” Nula in a tih rual chuan a lungmawi ken chu a rawn tilang nghal a,,”Pasalṭha he thil hian helamah kan unau a awm a ni tih min hrilh a” a tih leh rual chuan Ngurnunmawia chuan Zamana awmna lam chu a kawk nghal zeuh a. Zamana chau tih hriat tak leh a mit takngial pawh meng ṭha hlei thei tawh lova awm chu Nula chuan pan vatin, “Uzamana ni rengin, UParmawii la kan chan ta si a,” ti niah niah in,,a tuium tereuhte ken chu Zamana a tulh ta mawlh mawlh a,, rem taka a mut tir leh hnu chuan Ngurnunmawia chu en in, “Vulthangi ka nia,” tiin a nui nghal sen sen a.

Tuibur hmuam da vel an ṭhut hnu chuan Zamana chu a rawn khuh kharh kharh a,,a rawn ṭhu chhuak ta hlol mai a,, “I ṭha em?” Ngura’n a tih rual chuan Zamana chu a nui nghal vur vur a,,a hliam a han en chuan alo hil duak reng a. “Vulthang, ila dam maw?” Zamana’n a tih chuan Vulthangi pawh chuan Aw tia chhang vatin a nui leh sen sen a, Chanchin an inzawh hnu chuan Zamana chuan Vulthangi hnenah chuan thil awmzia sawiin a ruahmanna chu a hrilhfiah nghal zung zung a. A sawi zawh meuh chuan Vulthangi chuan Ngurnunmawia chu a melh nghal vung vung a.

“UNgur buma i awm chu ka demlo che, Huai Lal fanu hi a hmelṭha em la taka, huai an nih vanga hmelchhe viau tura ngaih ngawt hi thil awl tak a ni, mahse an landan te an tih danglam ve theih miau avangin an Lal fanu landan kher hi chuan mi a bum fo tih rual u zawk te’n an sawi ka hre fo asin.” a tih chuan Ngura pawh in a lu a bu ve nghauh nghauh a. Kha tleirawl hmel duhawm lutuk kha a mitthlaah a cham a, Huai Lal fanu atan chuan a ṭha mah mah a ni, a ti rilru neuh neuh a.

Huai Lal fanu nen an intawn dan a ngaihtuah a, Tumah tel lo a, a ram vahna lamah kha hmeichhe tleirawl duhawm tak kha a tawng a, a taksa hmun ṭhenkhatah hliam nei nual in thawmhnaw ṭet hneng hnuang a inbel anih kha. Ngurnunmawia mi khawngaih ṭhin em em leh, harsatna tawk te pui hram duh ṭhin in a hmuh khan a khawngaih ta em em a, a ṭanpui dawn a ni tih thu a sawi lai a, kha hmeichhe hmel lawmna a khat a mitthla chungin an inbiak dan a ngaihtuah a.

“Tu nge i hming?” Ngura’n a tih chuan, “Remmawii ka nia, ka pu khawngaih in min ti na suh.” tiin a ṭap nghal hlap hlap a, Ngura chuan pan hnai hrutin, “Ka ti na dawn reng reng lo che, I chungah eng nge thleng min han hrilh teh?” zaidam zawka a tih chuan Remmawii chuan Ngura chu melh vang vangin, “Kan khua an run a, chuan ka rawn tlanchhuak a,” ti bah nawk nawkin a ṭap chhuak ta hawm hawm a, Ngurnunmawia chuan a koki a kut nghatin, “Hlauh tur engmah a awm tawh lo ania.” tiin a thlamuan nghal vat a.

Riahbuk sualin a sakhi kah chu hem hmin in zanriah atan an ei ta ngawt a, Remmawii chauh dan tur hrethiam in mut a rawt ta vat a, anihna takah chuan riah tuma kal a nilo, mahse an khua thlenpui turin kawng a thui tham deuh nen khua a tlai tawh si a Remmawii chau hmel lutuk khan chawlh hahdam a mamawh tih hria in riahbuk sual ta pawh a ni. Remmawii a muthilh hnu pawh chuan muhil ve mai lovin an mei chhem bulah chuan a ṭhu ta reng a, Remmawii muhil chu a en leh zawk ṭhin, chutiang taka tleirawl duhawm leh hmelṭha chu a hmu ngai lova, a thawmhnaw ṭet hniang leh a hmai bal deuh niai te chuan a duhawmna a hliahkhuh zo meuh lo a ni.

“Min ṭanpui rawh” tia Remmawii a ṭawngvaih niah niah chuan a chal chu khawih sak vatin a khawsik avangin a sa vur lehnghal a, a rawn meng diar diar chuan tui lamin a tui dah sa chu a tulh ta vat a, Remmawii vawt ti khur dar dar avang chuan mei chu chhawm alh ṭha in puan sin tur a awm miau loh avangin Remmawii chu a kap karah ṭhut tirin a awmah a pawmbet ta ngawt a. An taksa lum innek chuan a khawsik pawh ti ziaawm in zan lamah chuan harsatna dang nei lovin an muhil theil ta a.

Zing khua a var a, Remmawii pawh tho harh tawh in, Ngura chuan an khaw lama hruai a tum thu a sawi chuan hlim hmel zetin Ngura chu a zui a, kawng lakah chawlin Remmawii pawh a titi ve siam siam tawh a, Ngura pawh a nel tawh viau a, Ngura la mi nelawm tak leh mi ṭha tak a lo ni nen kawng lakah pawh an in chhaih nui ta ar ar a, Tawitaw kung bul an din laia a rah ei a chak thu Remmawii’n a sawi avang chuan a ipte pui dah in Tawitaw kungah chuan Ngura chu a lawn ta a, chu erawh a tih sual lian ber a ni ta.

A benga chiang zeta Parmawii’n a hminga a rawn ko ri a hriat rual chuan mak ti zetin a hawi kual nghal ruai a, mahse Parmawii hmel reng a hmu lo, harsatna a tawk anih ringin a tawitaw lawh sa tlem nen chuan hmanhmawh deuh takin a chhuk vat a, mahse lei a thlen rual chuan a hawihai takzet. Remmawii reng reng hmuh tur a awm lova a koh ngial pawh in chhang tu tumah an awmlo. An kalna hnu a enkual a, mahse Ama hniak chauh lo chu hniak dang reng reng a hmu lo chuan a mak tihna a zual a, leia a ipte pui a lak kan rual chuan Ngura chu a buai zual sauh a, a chempui Parmawii’n a pek ngei chu a awm ta hauh lo. Thil thlen dan zawng zawng a ngaihtuah a, buma a awm avang chuan a thinrim takzet a, hawi kual rualin Remmawii kalna lam tura a rin chu a kal kual a, mahse hnu pakhatmah a hmu lo.

A chem zawng a ahawi kual ruai laiin Parmawii’n a hminga a ko ri a hriat avangin, aw lo chhuahna lamah chuan a tlan ta nghal a, thui pawh a thlen hma in Lasi leh huai ho inbeihna mualah a lut a, theih tawp chhuah in pui mahse Huai lalpa chu a chak em avangin Lasi te chu an tawlh ta reng a, Parmawii pawh in hliam a tuar bawk. Ngura’n a chem pek a keng lo tih Parmawi’n a hmuh rualin a beiseina te chu beidawnna ah changin, a tawpna ni tur a herchhuak tih a hriat rualin a unaupa Zamana hnenah chuan Ngura hruai chhuak turin a tir a, mahse Ngura chuan hliampui tuara awm mek a ṭhiannu chu phatsan a tum hauh lo. Mahse Zamana chuan a intiam ang ngeiin inbeihna mual aṭangin Ngura a tlanchhiatpui a, tun hun hi an lo thleng ta a ni.

“Ngura i inpeih takzet em?” Zamana zawhna avang chuan Ngurnunmawia chu a ngaihtuahna aṭanga harh zawkin, a thaw hawk a. “I kalna lamah chuan engkim a danglam anih pawh in I khua leh kan tan hna pawimawh tak i thawk dawn tih hria la, chhel taka awm a, dam taka rawn let leh turin ka duh che ania aw.” Zamana chuan a ti a.

“Ni e, Ungur i chem kha i lak let ngei a ngai tih hria la, kha chem tello kha chuan engtikah mah hnehna i chang thei ngai dawn lo, engkim ṭhat lehna turin kha chem kha ilo la kir leh ngei dawn nia.” Vulthangi’n a tih chuan Ngura chuan, “Aw le.” a ti sap a. A kutah lungmawi hring nalh zet chu pe in, “He thil hmang hian ilo kir leh thei ang, khawiah mah tibo suh ang che, i chem i lak let rualin he lungmawi hnenah hian kir leh i duhthu sawi ang che, tin, i zinna ramah pawh he thil hian kawng a kawhhmuh ang che.” atih chuan a kuta Lungmawi Vulthangi’n a pek chu a en vung vung a, thil mawi tam tak zingah hetiang taka mawi hi a hmuh pawh a hre lova, chu lung chuan engtiangin a pui dawn la a hrethiam heklo.

“Vuli hun kan nei tawh lo, I thiltihtheihna leh ka thiltihtheihna hmang hian Lal Fapa hi kan kaltir mai a ngai a ni.” Zamana’n a tih chuan “Awle” tia chhang vatin a awmdan chu a siamṭha sat sat a.

Zamana chuan lei chu thing ṭang hmang chuan rin bialin thu a chham kual a, meipui rawn alh hluah in, “Lal fapa rin bial chhungah khan lut rawh.” a tih rual chuan Ngura chu meipuiah chuan a zuang lut ve nghal a, thli nasa taka rawn thaw in an bul vela lei nawi leh hnahthel ro te chu a chhem leng sung sung a, thli in a chhem darh lei te chuan Ngura mit chu a ti mim sung sung a,a kuta inhliah ṭawk ṭawkin mei karah chuan a ding a, Zamana leh Vulthangi chuan eng eng emaw sawiin a hriat ngailoh ṭawng hmangin thu an chham mial mial bawk a. Chutih lai chuan a lam panin ṭhawnga livir rawn insiam in Ngura chuan chu chu alo chu a en reng a,,vawi leh khatah kang dawr in boruakah chuan a vir chho nghal nawk a, a hriatdan chuan Van sang lam a pan ni mai in a hria a, Zamana leh Vuli ṭawng te pawh chu an hla tial tial a,a thim mup a, eng nge thleng a hre zawm ta lo.

A bul vela hmeichhe aw tliang ralh a inbe thawm a hriat chuan Ngura chuan a mit men a han tum a, mahse a mit vun chu thil sak taka charh ang mai in a meng thei hauh lo.A bula hmeichhia pakhat chuan, “Thil mak tak a ni,a in thuam dan leh a landan hrim hrim,,Engpawh nise a harh hun nghak tawp mai ang, hetia ram-palai-lenga kalsan ngawt chu a diklo.” a tih chuan pakhat chuan, “Ni e,tawhsual a tawk pawh a ni thei tho a,han zawn ngawt dawn ila kan pahnih chauh chuan kan zo awm der silo,” tiin alo chhang thuai a.

A ngaihtuahna buai tak avang chuan men tum lui viau mahse a meng thei hauh silo, a rilruah Zamana leh Vulthangi an lo lang a, Anni khan hmun hla taka kal turin an tir anih kha, mahse a thlenna chin hria a hmu tur pawh in a mit a meng thei miau silo, mi tu te emaw ni in an chawisawn lai te chuan chet tumin ṭan a khawh a, mahse a taksa takngial pawh a ti chhe thei bawk silo. Chutiang a engmah ti theilo leh hmu thei lova a awm chu hrehawm a ti hle a, a chunga thil thleng chu mak pawh a ti viau bawk.

Hmun nuam takah an muttir tih a hriat rual in a bul vela thawm bengchheng tak, ala hriat ngailoh thawm tam tak te chu a hre zawm nghal a, eng thawm nge ni ta ang tia a ngaihtuah lai chuan tu emaw ni hian a taksa chu khawih in a endik vel a ni tih a hria, a hriat ngai hauhlo ṭawng hmangin eng eng emaw a sawi nual bawk a, chutianga a chheh vela thil thleng engmah hrethiam lo leh buai ru taka a awm lai chuan a ban thip zawk chu a hre nghal a. A zawi riai riai ni mai in a hria. Engmah hre lovin a muhil ta nghal a.

Ngurnunmawia a harh ruala a thil hmuh te chu mak ti em em in a en kual a, inchhung var pup leh eng em em te chu eng nge ni ta ang le? tiin a ngaihtuah a. Mei eng leh ni eng bak hmu ngailo a ni a, a tan chuan a chunga eng var pup awm chu mak tih loh rual a nilo. A huai kual a bang chhah zet zetin a hual vel tih leh a piah lawka hmeichhe ding te chu a hmu nghal zat a. Pakhat zawk chuan an awmna hmun chu chhuahsan vatin pakhat erawh chuan a rawn pan hnai a. A bula hmeichhe lokal chu chiang taka en in a mitthlaah Parmawii a rawn lang nghal a. A hmaa ding chu mit khap hauh lovin a melh ta reng a…

RAUTHLA KIR LEHNA – 2

“Zor a harh ania” Sangtein a tih chuan,,a bulah kal hnai vatin, kan zin haw kawngsira tlangval lo let reng Sangtein a hmuh avanga rilru nuam vak lova motor ka tih din tak hnua Damdawi Ina kan kalpui tak tlangval danglam tak chu ka melh ran a, tlangval in a mit a men rual chuan Sangtei chuan “Doctor ka’n ko ange,” tiin pindan chu a chhuahsan nghal a. Tlangvala chuan a awmna chu hrelo tih hriat takin a hawi kual ruai a, hmelhriatloh biak dan hre viau lo mah ila kan hruai anih miau avangin a chunga thil thleng tal hi ka hrilhhriat a ngai tih hria in “Ah.. Ṭhianpa kawngsirah nikhaw hrelo in kan hmu che a, Damdawi Inah kan hruai ringawt che anih hi..” min melh reng avang chuan ka ṭawng a bah nak a, mahse ka thusawi avang chuan mak tih hmel zeta min en in “Damdawiin maw” a ti zawi sap a.

Sangtei leh Doctor te rawn lut in, Doctor chuan a en nghal zung zung a, hliam na lutuk leh pawi tham a neih loh thu leh eng emaw vanga nikhaw hrelo a awm anih a rin thu a sawi chuan Sangtei zawk chuan lawmthu a hrilh vat a. Doctor vek chuan kan duh chuan admit lova kan chhuah theih thu sawi leh in min chhuahsan ta nghal a. Doctor leh nurse an chhuah hnu chuan sawi mai tur hrelo in ka ngawi ran a, tlangval zawk chuan “Khawiah nge ka awm?” a rawn tih chuan mak ti zetin Sangtei nen chuan kan en deuh ha a, “Aizawl Hospital-ah i awm a,” Sangtei zawk chuan a chhang a, tlangvala chu a hawi buai tulh tulh ni mai in ka hria.

“Tu nge i hming?” ka tih chuan “Ngurnunmawia ka ni e. Ka awmna in sawi hi ka hre ngai hauh lo ania,” a ti zawm zat a. A thusawi avang chuan ṭawng mai nachang ka hre lo, Mizoram khawpui Aizawl hrelo tlangval Mizo ṭawng ngei hmang kan tawng chu a ni si a, Ani hi mi a anglo emaw a hriatna a hloh a ni thei mai angem?

“Mizoram khawpuiah i awm mek a” Sangtei’n a tih leh chuan “In sawi awmzia hi ka hre chuang hauhlo, min hrilhfiah thei angem?” Ngurnunmawia chuan a ti leh a, a hmelah fiamthu na reng a lang lo, chumi a hnekin a hmela mak tihna leh hrilhhaina chauh ka hmu a, sawi tur reng reng ka hre lova hrilhfiah ngaihna ka hre heklo. A awmdan chu mak ka ti zawk em em si a. Sangtei ka en a, Ani pawh in mak ti hmel zetin Ngura chu a lo en ve tawp ringawt a. Sangtei meuh pawh ṭawng tur hrelo in a siam a, kei zawk hian eng nge ka sawi teh lul ang ni. Damdawiin hi ka ngaina hlol silo nen “Engpawh nise helai hmun hi ka ngaina lo chhuak phawt mai teh ang u, ka in lamah kan kal phawt dawn nia.” Ka tih chuan Sangtei chuan a lu bu nghatin, “Ngura i awmna i hre miau silova Zorinite in lamah hian kal phawt mai ang u, chutah chuan kan sawi ho leh zawk dawn nia.” a ti nghal vat a, Kei erawh an insiam pawh nghak tawh lovin pawnlamah ka chhuak zui nghal daih thung.

Ka motor a kal kan ni a, pawnlamah chuan Sangtei leh Ngura te chu ka lo nghak a, rin ai daih in an rei phian lehnghal, in thlen vat vat ka duh tawh asin le. Sangtei leh Ngura te pawnlam an rawn chhuah rual chuan motor chhungah ka lut nghal a, mi vei vak ṭhenkhatin Sangtei leh Ngura te lam an en deuh leh ha ṭhin pawh chu ka motor chhung aṭang chuan ka hmu reng, chutianga en bik an ni chu Sangtei pawh chu a zak ve a ni mahna hmanhmawh deuh takin a rawn kalpui a, ka motor kawngkhar hnunglam ri deuh nawk nawkah chuan hawi phei in, Ngurnunmawia kawngkhar hawng thiam lo, Sangtein a buaipui vel chu ka en reng a, kei dawhtheihna tlachham ve tak hi ka lo phun leh hman ṭhelh a ni.

An rawn luh fel ruala tlanchhuak nghalin, Vawiin ka hna lama ka thil tih fello ten ka rilru zawng zawng a luahkhat a, mahse he ka hnathawh mek hi ka ṭhian ṭha ber Sangtei bulah pawh ka zep a ngai miau si a. A chhan pawh ka hna hi a pa in a buaipui ve miau vang a ni. Tunah pawh a pa te hnathawhna a kal satliah angin kan lang na a, kei erawh in ka hna ka thawk ru char char zawk si a. Ka nuna zep leh ngawih bopui ka ngah lutuk hian ka nun khua a ti chau in hmeichhe ṭhenkhat anga ri ve bawrh bawrh ṭhin ka nih lohna hian min ti hah zawk fo ṭhin zawng anih hi.

In kan thleng a, Sangtei leh Ngura chu pindan lamah ka kalsan nghal a, Ani ṭawngduh leh ṭawngkam thiam a ni bawk a, a kawm thei em ang chu, tun dinhmunah chuan ka buaipui peih meuh lo a ni e. Bualin lamah lutin ka in tifai nghal a, ka zawh meuh chuan ka ril pawh a ṭam ve ta hle mai. Pawnlam ka chhuah chuan Sangtei chuan min rawn pan vatin, “Zor i va rei ve, ka nu in min rawn call ngun tawh lutuk, ka haw phawt ang.” ti nghal zung zungin ka chhan hma hauh in a chhuak zui nghal daih a, Eng nge a hriat teh hrep ni. A kal liam tur chu kawngkhar aṭang chuan ka en zui vung vung ringawt.

Choka lam ka lut tur chuan ṭhutkhawmna pindan lama ṭhu ka hmuh leh rual chuan Ngurnunmawia kan hruai haw tih ka hrechhuak leh chiah, Sangthankimi hian a kalsan ngawt a, engtia buaipui tur nge ka hre reng reng lo, a thuhrimin ka inah hian keimah chauh in ka cheng a, mikhual ka nei ngai lo, mipa leh lek phei chu a hranpa takin ka hruai lut ngailo hrim hrim mahse Sangtei la a haw daih si, engtin nge ka buaipui tak ang!?

Ṭhutkhawmna lama ka phei chuan ka pum a ri nghal rak rak a, ka haw hma khan ka ei siam hnenah ka haw tur thu hrilhin rawng ka bawl tir sa thlap a, thil ei phawt ila duh leh Ngurnunmawia chu ka be zawk mai ang ti rilru in “Aa… Ngura Zanriah ei phawt ila.” zawi deuh taka ka tih chuan “Aw le” tiin a ipte pui chu a ṭhutna bulah chuan rem zet hian a hung ṭha a, min zui nghal vat a. Chaw ei ka siam lai chuan mit khap hauh lovin ka che leh kan chaw eina tur hmanrua dawhkana ka dahkhawm chu a melh ngar a, a awmdan chu mak ti viau mah ila mahse engmah sawi lovin chaw chu kan kil dun a, ka chezia chu min chik em avang chuan ka chaw ei pawh a tui thei lo. Tu in nge chaw ei lai chik taka en a, vil tu nei reng ang mai bulah ei tui thei bik ang?

Kan eikham a, kan eina te ka tihfel zawh hnu chuan Ngurnunmawia nen chuan ṭhutkhawmna lamah chuan kan ṭhu dun ta ran a. A tir khan ka lo enchiang lo viau nge, ka hmaa ṭhu chu mipa nalh tak leh pianthiam tak a ni tih ka hmu ve chiah, a sam sei thur deuh hnuang kara a hmel pa ru zet te chu nichin khan ka hmu miah lo tihna ania, a hmel leh chezia awmdan engkim hian tunlai mi a nilo tih min hrilh a, mahse hmanlai Pasalṭha inthuam dan leh awmdan a awm anih vang ringawtin hmanlai mi a ni ngawt thei silo. A hriatna a hloh anih pawh in ka biak phawt a ṭul a ni, eng emaw tal hriatchhuah a nei mahna.

“Ngura in khua tal i sawi thei em? Khalai hmunah khan eng nge I tih reng reng?” Amah melh deuh rana ka zawh chuan “Zawlpui khua ka ni e,helai hmunah hian ka tana thil pawimawh tak la tûrin ka rawn kal a ni” ka mita en kalh in felfai taka min chhanna avâng chuan sawi leh mai tur hrelo in ka melh reng ringawt a. Mizoram chhungah hian Zawlpui khua a awm em tia ka ngaihtuahna ka hman lai chuan harhchhuak zawkin ka hna khawih lai ka hrechhuak nghal zawk. “Engtin nge anih theih?” ka ti zawi sap a.

Zorinpuii ka ni a, Mizoram University a History Proffessor niin, Project pakhat buaipui in tunah hian Mizoram leilung zirchian ka duh avangin kan ram ngei thlangin, Mizo history chhui in ka ngaihven mek a, Hmanlai thil hlui leh Lal awm hunlai a hlui ber ber thlenga chhui kirin thawnthu a an sawi fo ṭhin Lasi te tuallenna khawpui Ṭan tlang lamah hian thil eng emaw awma ka rin ngheh tlat na hian ka thil chhui leh zirchian te hriatchian chakna min pe a, chutih rualin Mizo thil hlui eng emaw tal hmuh ka inbeisei bawk a. Mahse kum khat ngawt ka zir tawh hnuah pawh engvakmah hmuhchhuah ka neih tak siloh avangin ka beidawnsan lek lek tawh a, mahse chutia rilru dang put tuma ka zirna lam sawhsawn ka tum mek lai chuan mak takin Mizoram Food Industry neitu Pu Remliana, Sangtei pa in ka thil zirchian ruk chu a rawn buaipui ta chat mai. Chu chuan keimahah phurna thar rawn siam leh in, ka thil ngaihven hi rinthu satliah mai a nilo tih rinna nghet tak min neih tir leh a. Ani chuan phailam Archaeologist te ruai in sorkar hriatpuina tello in Ṭan tlang leh a chheh vel chu an dap ta fo a, chutiang avang te chuan ka theih tawkin zawn leh chhui hna chu thawk ṭha leh in, ka lo thawh hrep tawh zirchhian hna chu ka thawk leh ta zel a ni.

Ngurnunmawia thil sawi chu rinloh ngawt ka tum a, mahse Amah ka en a rinloh ngawt theih niin ka hre bawk silo, a sawi hi dik ta se engtin nge helai hmunah hian a rawn kal theih, Anni hunlai chu tam tak ka zirchiang tawh Hun rawn kal kan tur khawpa thiamna nei la he khawvelah hian tumah hriat an la awm heklo, mahse Ngurnunmawia hi hmanlai hun aṭangin a rawn kal miau si a, mahse engtin nge anih theih?

Mak ka tih em avanga ka ngaihtuahna ka hman vak lai chuan Ngurnunmawia nui ri hawk riah chuan ka harh zawk a, sofa a ke hlang meuh in ka khabe dawmin ka lo ṭhu reng anih chu. Ka awmdan ka hriatchhuah rual chuan in siam rem vatin ka ṭhu ṭha nghal vat vat a. Sana ka en chuan Dar10 p.m alo ri der tawh. Zawhna ka la ngah viau na in, zanin atan chuan mu phawt ila naktuk lamah ka la zawt leh zawk mai ang tiin a mutna tur pindan ka hrilh a, pindan chhunga a awmdan ka en chuan a theih ang ang ka hrilhfiah a, Bathroom hman dan mawlh chuan a rilru a tibuai nge a en vung vung lehnghal, a hmandan tur a hrethiam em ang chu maw.

Ka mut hmunah chuan Ngurnunmawia kan tawn dan ka ngaihtuah a, rukru leh mi thah ching lemchan kual mai mai anih mawlh ka hlau a ni, mahse a awmdan leh hawiher te ka ngaihtuah chiang a, chutiang niin ka hre bawk silo. Hmanlai hun âṭanga rawn kal ni ta se a tana thil pawimawh a rawn lak tur a sawi kha eng nge niang le? Hmm… Engvanga Ngurnunmawia ngawt chu ngaihtuah ta mai nge ka nih, ka ngaihtuah na chu duh lovin ka mit chhing vang vangin thawk ka la hak a, ka mutdan siam remin Ani lam chu ka ngaihtuah zawm duh lo.

Vawiin lama kan haw nachhan ka ngaihtuah chhuak a, Ka pa in min rawn ko anih kha. Engvanga min hmu duh nge a nih ang? Sangtei Pa Pu Remliana hovin Ṭan tlang lamah kan kal a, kei leh Sangtei erawh a landan chuan kan kal ve chak vang hrim hrim a kal kan nih laiin, ka rilru erawh a dang daih thung. Hun rei tak ata tawh ka hna ka thawh duh vanga kal ka ni. Ṭhasiama se no neihna aṭanga Ṭan tlang lam ka thlir a ka suangtuahna zawng zawng chu hmun chuan luahkhat in ramngaw pilril taka luh a, hmanlai nun phak dawn lo mahse a tak ngei a hmasang kan pi leh pu te nun zir a, ka Project min pui thei thil buaipui kha ka duh ber a ni a, mahse ka pa in hmanhmawh taka haw tura min tih avangin Sangtei nen kan let leh ta zawk a, kawng lakah khati khan Ngurnunmawia kan hmu a, tunah lah ka inah a awm ve mai chu ania, ka inchhunga mipa ka hriatchian hauh lo ka riah tir thei mai chu keimah pawh mak ka inti hial zawk…

Ka pindan pawnlama thawm awm avang chuan fimkhur ru zetin pawnlamah chuan ka chhuak a, thawm ka ngaithlak chian chuan tui baw ri ka ri nghal. Hmanhmawh deuh takin Choka lam ka pan nghal vat a,ka thil hmuh avang chuan ka ding nghal chawt. Ngurnunmawia’n Filter kuaah a kutṭang hnawh in tui bua chu dan a tum anih chu… A buai mangang hmel chuan ka nuih a ti za viau mahse ka nui em biklo, ka hmel a hmuh rualin ṭanpui beisei zetin min lo melh a, keipawh in pan hnai ve vatin Filter chu ka off sak a, thawveng huai hmel a pu thei hial a, “Tui in ka tum a.” a tih chuan a tih dan hrilh in khaw lum lai a ni nen Fridge lam chu kawk in tui vawt a awm thu te nen lam ka hrilh chuan mak ti hmel zetin min en a, a awmdan chik taka entu tan chuan a sawi danin Hmanlai hun aṭanga rawn kal anih chu ka ring nghet deuh der tawh mai. A tan ka inchhung chu a danglamin hriatthiam a harsa dawn tih ka hria, chung thil zawng zawng hriatthiam chu tum viau mahse ala dai ngai loh ram a ni miau a, atan engkim chu ala harsa hle ang. Choka a amamawh tur ang thil ka hrilh lai chuan ngawi rengin uluk takin ka thusawi a ngaithla a, sinior hri tia ṭhianten min fiam fo na ka mutchhuak la chu a reh daih lehnghal a.

A ṭul tur kan inhrilh hnu chuan mut tumin a pindan lam a pan a, “Engtin nge i rawn kalna lamah an koh che?” ka zawhna vang chuan rawn hawi letin “Ngûra tiin min ko mai,” atih chuan ka lu ka bu nghauh a, a inher leh tur chu “Zawhna dang ka la nei,” ka tih leh chuan rawn hawi lehnghal in a nui suk a, ” Pasalṭha i ni em?” ka zawh dan teh tawp chu mawl ka in ti viau, a lu a bu nghauh nghauh a, “I landan chuan zawhna tam tak nei hmel i pu, ka mu hnem tawh alawm, I mut a chhuak lo emaw i mu dawn rih lo anih chuan i duh duh min zawt thei ang.” a tih chuan phur zet hian ṭhutkhawmna lam ka pan a, Ani pawh rawn phei ve in sofa a ka ṭhut laiin chhuatah rem zet hian ṭhutthlêng nghengin a ṭhu thung a.

“Min zawt rawh le?” kan ṭhut fel ruala a tih chuan, “Ahh…. Pasalṭha an ti kher che em?” ka tih chuan a nui ri hawk a, kei erawh in hriat chak in ka melh ran thung, “Im ti ve tho, mahse ṭhiante nen chuan hmingin kan in ko mai,” ala nui sang reng a, a nuih a a hmelṭhat dan hi a inhre ve angem le tih ka ngaihtuah hmanhmawh. Zawhna tam tak ka zawt a, ṭha tak leh fel tak vekin min chhang a, ning hmel lah a pu hauh lo, kei ang tho hian helai hmun chanchin min zawh ve duh a neih pawh ka ring mahse hriat duh leh hriat chak ka ngah em avangin min zawh ve hun ka nghak hman meuh lo a ni e.

Hmanlai nundan leh an ramchhuah dan te, Lal in rel bawl dan leh an khaw awmdan te ka hriat chak zawng zawng ka zawt a, an khaw chanchin a sawi laia a hmela hlim hmel rawn lang chhuak chu ka hmuh hmaih lo. A chhungkaw chanchin a sawi lai te chuan a hlim tih hriat takin a nui leh suk ṭhin a, a u fate nen lam an chanchin min hrilh a. Nula an rim a a ṭhiante nena an chet chhiatna a sawi lai te chuan keipawh ka nui ve var var tho.

Zinglam dar2a.m a rik chuan keipawh mutchhuak in mi zem a ka ham bai bai a, chu thil chu hrethiam takin, “Zorin i mut a chhuak anih kha, zu mu tawh zingah kan inkawm leh dawn nia” tiin min nuih var var a, a nui hmel hmuh nuam lutuk hi en loh pawh tum ila a en loh theih miah lovang. A thusawi chu pawmpui takin ka pindan lam ka pan a, khum ka thlen rualin ka muhil nghal a ni mahna ka harh leh meuh chuan ka pindan chhungah ni a rawn lut uar tawh a, sana ka en chuan a lo tlai tawh viau mai. Nimin lama ka pa min kohna ka ngaihtuah chhuak leh a, vawiin lama ka hmuh tur thu engmah ka la hrilh lo, ka phone chu la in message chuan tlai lama a Office-a ka hmuh tur thu sawiin khum chu ka thawhsan ta nghal a.

Zan lama ka mut ṭhat loh em avangin ka lu a na deuh bur lehnghal, choka lam ka phei chuan ka ei siam Ruati nui har har leh Ngura ṭawng ri ka hre nghal a, hepa hi a tho hma viau a mi le? Kan mut hun a in rual reng sia… Ruatin ka hmel a hmuh rual in a nui lai chu tawp chawt in, a thil tih lai chu a tih zawm nghal vat a, ni e ka nelawm lohvin ka ṭawngkam a chhum bung a,ka ṭawngtam lo lehzel nen min nel vaklo, tin nelawm tak pawh in ka awm ngai heklo.

“I mu tui maw?” Tui in tur ka thlit lai chuan Ngura’n a tih chuan “Im” tih chiah in ka chhang. Ka chhang tawi a ti deuh nge min en zui vung vung a, kei erawh vawiin lama ka awmdan tur ka ngaihtuah daih thung. Ka pa hmu tura kal ka ngaih chhan hi ka la hrelo a, mahse min ko anih chuan ka kal ngei a ṭul si.

Ka phone a rawn rik ruala rawn call tu ka hmuh chuan ka thaw hak, ka pick up rualin, “Hello” ka ti hmuk a,”Zorin, vawiinah i pa in a hmu duh che a.” Inti zaidam lui tih hriat zeta ka nuhrawnin a rawn tih rual chuan ka ngawi ngar a, ka chhang dawn lo tih a hrethiam a ni mahna, “I hna banah a office ah kal turin a ti che anih chu.” ti leh in phone a dah nghal hmak a, rawn sawi kher lo pawh nise chu chu ka tum sa ve reng a ni.

Kum 15 chauh ka nih in ka nu lungphu chawlin a boral a, a boral chhanah erawh ka pa ka puh lo theilo. Midang lakah a uire a, ka nu rilru na reng rengin a siam bawk. Ka nu kha rilru nat luat vanga boral ka ti lo theilo. Khata ṭang khan ka pa ka dodal a, a thu ka zawm ngai heklo. A laka ka hel tlat avângin Hostelah min dahin kum khat a ral meuh chuan a uire na ngei nupuiah a nei a, kei erawh Hostelah ka awm zawm ta zel a. Ka chhuah chang pawh in ka nuhrawn Hminghluti leh a fanu Roṭhuami inla class zet nen kan in mil ngai lo. Anni in nuam thei ang bera khawsak an duh laiin kei erawh in ka nu phuba chauh ka duh thung. Mi pasal ngaizawng tu leh ka pa nupui nei reng chunga ngaihzawng neia khawsa hi engtikah mah ka ngaidam thei ngai dawn lo.

Ka pa Zosiamliana Mizoram Minister leh Mizo mipui ten politician ṭha ram hmangaih tu tia an sawi hi ka tan erawh khawvela ka huat ber a ni hial awm e. Pawnlamah lemchang in mahni inchhungah erawh a nupui leh Ama fanu ngei nun tichhe tu a ni a, khawlo tak khan khawsa lo sela vawiin niah hian ka nu kha ala dam ngei ang. Engtik lai pawh a hnial reng ṭhin ka nih avangin ka pa nen pawh kan inbiak tlem phah hle a, kan karah khi zau tak a awm a, chu khi chu hnawh pin tum mahse engtikah mah a ping leh thei tawh pawh in ka ring heklo.

Ka thinrimna leh natna te avangin lehkha ka zir nasa hle a, college ka zawh rualin Delhi-ah Master Degree ka zo leh a, Phd leh Net ka zawh hnuin ka nu in ka tan liau liau a adah pawisa in Chanmari veng tuna ka awmna hi lei in ka insawn chhuak nghal a, College lama hnathawh ka tum laiin vanneih thlak takin University-ah zawk ka lut thei a, ka kum a naupang tawh lo inti mah ila ka thawhpui te lakah chuan ka la naupang ve viau tho. Kan in tia ka lo sawi ṭhin ka pa in ka chhuahsan dawn khan nasa takin ka pa nen kan inhau a, khatah chiah khan a ni ka pa hlauhawm zia ka hriatchhuah tak. A duhdana thil a kal lo anih chuan min thah hial pawh pawi a tih loh thu a sawi chhuak anih kha. Ka pa do let zel tur khan ka ngaihtuahna ka hmang nasa a, a hlauh em em a nun thuruk mite hriata ka puanzar tur thu a ka vo let meuh chuan ka lakah engmah tih a tum loh thu a sawi ta hial a, mahse midangte hmuhah erawh lem kan chan zel tur thu sawiin ka chhuahsan ta a ni.

Thla hnih ngawt kan inbiak tawh loh hnuah nimin ka zinna aṭangin min hmuh duh thu sawi in min ko haw a, mahse Ngurnunmawia kan ṭanpui vang khan ka hmu hman ta lo kha ania, eng thuah nge min hmuh duh tih zawh ka duh rualin kan inhmuh dawn tho avanga zawt ta lo zawk ka ni. Ka thawh veleh aṭanga ka ngaihtuahna ka hman vak chuan ka lu na a tizual takzet.

“Zorin” titu avang chuan ka hawi let a, Ngurnunmawian nui suk a ka no ken lai la in, “Eng nge i ngaihtuah em em a, i mang a ṭha deuh a mi?” a tih chuan ka harh thut ni mai in ka hria. ka tui in lai ka in zo tawh tih pawh hrelo in dawhkan bulah ka lo la ding reng ania. “Vawiin lam ka hna tur ka lo ngaihtuah a” ka tih rual chuan kawr ha lo leh puan chauh venga ka hmaa ding chu en vung vungin, thawmhnaw eng emaw tal ka ngaihtuah sak a ngai a ni.

Dawr a ka kal lawk tur thu sawi in, ka chhuak nghal a, Scooty ka ken chhuah avangin Bazar lamah ka in khalh phei nghal a, thawmhnaw dawr inhawng a la awm mang lo lehnghal, ka duh aiin ka kal hla. Ngurnunmawia thawmhnaw hak tur awm chu ka lei nual hnu in, Chapal a bun tawk ngei tura ka rin chu lei leh in ka inkhalh haw leh ta nghal a, sana ka en chuan ka tho tlai bawk nen tukṭhuan ei hun a pel thuak tawh a.

Inchhung ka luh chuan ka thil lei chu Ngurnunmawia pe in, a pindan lamah chuan ka luh pui rawk rawk a. Bathroom lamah hruai in tui herh haw sakin inbualna hmanrua ka hrilh zung zung a, Ani erawh naupang thuawi zet ang mai in ka thusawi chu ngun taka ngaithla in a lu a bu nghauh a. A ṭul tur awm ka hrilh zawh hnuah chhuahsan in kan hman huna tukṭhuan kan ei tur thu ka sawi chuan a nui leh ringawt tawh. A nui hmel avâng chuan lai zetin a pindan chu ka chhuahsan ve ta nghal a.

Ka pindanah kalin keipawh intifai in hmanhmawh takin ka insiam ve nghal a. Ka che reng reng chu a hmanhmawh vel vek a ni mai. First period ka neih loh ni a ni erawh tlem chuan ka hahdam phah deuh. Insiam peih sa at a pindan aṭanga ka chhuak, ka mi hmuh avang chuan ka ding chawt a, ka hmaa Ruati bia a nui var var Ngurnunmawia nichin lawka a thawmhnaw ka leisak inbel a ding chu ka en vung vung a, mipa nalh tak zawng a ni chiang a ni. A sam sei zet saw tunlai mi te lumeh angin met ta se, a chhelo zual sawt ngei ang. Ka ngaihtuahna vang chuan ka lu ka thing vak ringawt, Mipa lam reng reng vawikhatmah la ngaihtuah chhin ngailo ka ni a, engvanga Ngurnunmawia hetiang zawnga ngaihtuah ve ngawt nge ka nih ka hrelo, Sangtein hria se engtin tak ngai ang maw!?

Tukṭhuan kan eikham a, kan intih fel hnu in Ngura nen chuan kan inzui chhuak ta a. Sangtei dawr chanchin leh ka haw huna a hna thawh tur a sawi pawh tha thara ka ngaihtuah pui tur thu ka sawi chuan Aw le a ti ve mai a. Hepa hi mi fing tak a ni ngei ang tih ka ring nghet hmiah tawh. A dai loh ramah Amah ṭanpui tu tur ka nih a hrechiang a, Aman ruahmanna a nei anih pawh in Amah pui thei tu tur ka nih avangin ka thusawi a ngaithla ulukin ka thu a zawm zel thei a. Tin, ka sawi engkim min zawt nawn lovin a hre nghal thei zel bawk a, alo kalna lamah chuan Pasalṭha fing tak anih ka ringhlel hauh lo.

Sangtei dawr kan thleng a, thil awmzia phone a ka hrilh lawk tawh avangin Sangtei pawh dawrah a lo awm diam tawh a, ka tlai deuh tawh avangin University lam panin ka kalsan ta nghal a. Rei pawh ṭhu hman lovin class ka la zawm nghal a. Chawhnu lamah erawh office-ah ka awm ve thei tawh e.

“Hello Miss” titu avang chuan ka phu zawk a, ka hawichhuah rual chuan ka thawhpui nu upa ve lam tawh Numapuii chuan min lo nuih nghal var var a.

“I ngaihtuahna i kawm nasa mah mah anih kha ka nau.” a tih leh chuan ka nui ve ringawt.

“Tunlai i Project buaipui eng nge i an?” Numapui’n atih chuan, ka thaw halh a, he ka Project buaipui mek hian eng nge min thlen dawn tih ka hre lo, tuna Sangtei pa Remliana’n phai lama mi thiam rual meuh chah a angaihven hi keiin ka zirchiana Project atana ka thlan anih miau avangin ka duh ang pawh in hma ka sawn thei meuh lo, hetiang teh nuai anih avangin Sangtei bulah pawh ka hna khawih lai chu sawi pawh ka sawi lang hauhlo.

“Nu Mapui a harsa ka ti, thlak leh dawn in ka kal thui tawh angreng si a, midangin an ngaihven ve niin ka hria. Mahse hetia midangin an ngaihven nia ka hriat hian ka phur tulh tulh bawk si, engtak hmu chhuak ang i maw!” ka tih chuan, “A dik chiah ban san reng reng suh, Anni aiin penkhat zelin hmasawn erawh tum la. I ti thei tih hre reng rawh aw.” Numapui’n a tih leh chuan ka nui var var a. Ka Project hautak zet chu ka ngaihtuah a, Mizoran chhungah pawh hian zirtur a awm a ni tih leh hmanlai kan pi leh pu te chanchin an sawi tam tak hi a takin a awm ngei a, he leilungah hian ro tam tak hnutchhiah a nih ngei ka ring tlat a ni. Mizo history mahse thawnthu anga an sawi tak Ṭan tlang ngaw dur khup chu ngaihtuah kai in, Lasi te leh Huai ho te chu thil awm tak tak, thawnthu mai mai an ni lo tih hi ka ring nghet hmiah tawh a, hmanlai nuna bet tel tlat hi thawnthu nilovin, a awm a ni tih, engti kawng zawng pawh a hmuhchhuah ngei hi ka inbeisei tlat a ni.

RAUTHLA KIR LEHNA-3

Class ban a hun chuan hmanhmawh lemlo takin ka insiam a, Sangtei dawr lam ka pan a. Ka luh lai chuan Sangtei leh Ngura an awm lo, a dawr nghak nula pakhat hnenah chuan an kalna ka zawh la in a hriatloh thu in min chhang mai bawk si, ka pa hmuh ka la ngaih avangin ka rilru chu a hmanhmawh ru tawh angreng viau mai. Dawr kawngkhar lama Sangtei ṭawng lang lang ri ka hriat rual chuan ka hawi phei vat a, ṭawng tuma ka kâ ka ang zuai hman tihah chuan ka thil hmuh avang chuan ka chip lehnghal hmak. Ngurnunmawia lumet fai vanga rawn lut leh Sangtei hlim zeta rawn pen lut chu ka lo en hau ringawt.

“Bawih, Ngura hi a chhelo viau lo maw?” Sangtei’n hlim hmel zeta atih chuan ka lu ka bu nghat a, thawk la halh in, “Ka pa hmu tura ka kal a ngai a, Ngura hi ka rawn lam hmasa a.” ka tih chuan Sangtei nui hmel chu tawp riai riai in, “Kalpui i duh em?” min ngaihtuah tih hriat zetin a ti nghal vat a, lu thing nar nar in, “Ngailo” tiin ka nui lui sak. Kan chhungkua chanchin min hriatpui tu a ni a, High School ka kal aṭanga ka kawm awmchhun leh Ṭhianṭha ber ti hiala ka chhal awmchhun a ni, kan mizia in anglo tak ni mahse kan inkawmngeih in thu chhia ṭha kan sawi dun fo ṭhin a. Tuna ka pa in min koh chhan hi ka hre lo a, mahse Ani pawn min ngaihtuah vanga nimin lam pawh a ka ruala rawn haw ve a ni.

“Thil thleng a awm anih chuan min rawn hrilh rawh aw.” a tih chuan, “Aw le” tiin dawr aṭang chuan kan chhuak ta nghal a. Motor chhung ka luh chuan ka ṭawngtam lemlo, Ngura’n kan kalna lam chin min zawh zeuh bak engmah ka sawi lo. Ka pa Office kan thleng a, building pawna ṭhutna awmah chuan Ngura chu ṭhut tirin, min lo nghak turin ka ti a, hepa tak hi chu naupang thuawi ang mai hian ‘Aw le’ ti sup in a nui var var thei zel a. Ka kalsan zet tawh chu let lehin a hmaah dingin, “I lumeh kha i duh ka ringlo a, mahse i inhmeh lutuk.” ka tih chuan a nui ri nghal hawk, lai zetin ka pa office lam chu ka pan leh ta nghal a.

Office chhung ka luh chuan ka pa secretary in min lo be vatin min nghah reng thu a sawi chuan pindan chhunglamah chuan ka lut ta nghal a. Ka thil hmuh avâng chuan ka ding chawt thung. Ka pa chauh nilo in a nupui leh a fanu inla chhelo zet chu ka pa office-ah chuan an lo awm ve a, ka lut an hmuh rualin ka lam an rawn hawi nghal ṭhap. Muangchangin an lam panin ka pen chet chet a, Anni nufa an tel chuan thil ṭha engmah a thleng dawn lo tih ka beng awmna ka hriatchian tluk zet hian ka hrechiang a ni.

“Ṭhu rawh, i tlai,” ka pa in a tih hmuk chuan a Office chhunga ṭhutna inhungah chuan ka ṭhu thla ve nghal a, ka hmaah ka nuhrawn leh Roṭhuami ṭhu in ka pa erawh single sofa-ah a ṭhu thung a, engtak sawi ang maw ti a ka melh reng hnu chuan a aw thian kharh in,
“Zanin tlai hian Hmingliana te chhungkua nen zanriah kilho kan rawt a, i rawn tel a ngai.” ka pa in a tih chuan ka chhang lo, Anmahni nena chawhlui kil pawh ka peihloh laia midang chhungkua nena chaw eikhawm a lemchan vel kha vawiin ni atan chuan ka peih ngang lo a ni.

“Hmingliana fapa Ruatfela nen hian in inpawh riau in ka lo hria a, chung te pawh chu sawifel pui an ngai a ni, Nula mahni chauha awm reng zawng thil ṭha ber pawh a nilo e.” a tih zawm leh chuan ka in hum ruh nghal ṭeuh thei. Ka nundan tura thuneih tumlo tu khan tunah ka pasal tur sawi rem pui min tum tihna ania, chupawh kei min rawn hauh lo lehnghal in.

“I sawi zo tawh em?” ka pa melh ngar a ka tih chuan, “Sawi tur i nei em ni?” mak ti hmel deuh in min zawt let a. Ni e, ka ṭawngkam chhuak zaidam lo leh bul hmuk a hriat chuan mak a tireng ang. Hetianga ka chungchang thu, ka thu lova thu tawp a siam ringawt leh Ruatfela nen inkawp anga min sawi hi ka lung a awi lo em a ni.”Ka nundan, ka khawsak dan leh ka pasal turah thu rawn neih tum lo la ka lawm khawp ang… tia ka sawi lai khan Aw tia min chhangtu kha Nangmah i nih kha ka pa, chuan tunah ka hriat miah lovin pasal neih tir mi tum a maw, chu chu lawm taka ka pawm i ring em ni?” ka thusawi avâng chuan ka pa pawh in min chhan mai na tur hrelo in min melh vung vung a. Heng thu dawt phuahchawp lutuk hi a nupui leh a fanu hnen aṭang bakin a hre leh tawp lovang.

“Ngaihzawng i nei a, i inchhung ngeiah in khawsa fo a,i mualpho hmaa i mualpho dalna tur hun ṭha ka siam sak che chu lawm aiah ila thinrim zui a maw!?” tia ka pa in sehchilh deuh nawk nawk a a tih chuan thinrim zetin ka pa chu ka melh ringawt. Hminghluti chu rawn in rawlh vatin, tlangkam aṭanga an hriat dan anih thu a rawn sawi leh lek phei chuan ka rindan ang chiah a Anni nufa ruahmanna anih leh avâng chuan ka ter ve nghal at a.

“Khawi aṭanga chutiang dawt phuahchawp tak hria nge i nih ka hrelo chungin, ka rindanin ka pa i thu hriatna chuan dawt a sawi thei ve hle anih dawn chu, Ruatfela nen chuan kan in hre meuh mai mahse i hriat ang nilo in Ani chu ka thawhpui a ni tlat, chuan i intiam angin ka mimal nunah lo buai suh.” ti hmakin office chu ka chhuahsan nghal nal nal a, engvanga hetiang zawng khera ka nu hrawn hian ruahmanna siam leh nge anih ka hre lo.

Ka thinrim em avang chuan engmah ka ngaihtuah theilo, motor lam panin ka inkhalh haw nghal a, inchhung ka lut a, ka hun tawn hahthlâk zet avang chuan ṭhutkhawmna lamah chuan kalin sofa-ah chuan ka ṭhu thla hnak a, “Vawiin zet chu ka tana ni ṭha tak zawng a va nilo chiang em!” tia ka phun sap rual chuan ka ngaihtuah chu a vir nghal.nawk, “Pawi lutuk” ti chhuak ṭhat in, In aṭang chuan hmanhmawh zetin ka tlanchhuak nghal a. Ngurnunmawia ka theihngilh thei mai chu ka rilru in ka in hau nghal mawlh mawlh. Khua a thim ṭan tawh a, Scooty la chhuak vatin ka pa office lampan chuan ka inkhalh chhuak nghal a, min lo nghak reng angem nge ni a Ani kha alo kal bo tawh zawk ang… Ka ngaihtuah na buai ru tak avang chuan thaw halhin, Lokal sawn lo hram rawh ka ti rilru mawlh mawlh a. Kawngsira mipa sang zet rawn kal ka hmuh rual chuan ka hnunglamah motor an awm em tih pawh ka ngaihtuah hman lo, ka ding dawt a vanneih thlak takin tumah an awm lo hlauh.

“Ngura” ka kohna hria in ka lam a rawn hawi vat a, a lampanin ka scooty pawh ka siam rem ve nghal vat. A hmaa ka din chuan ka thaw huai thei. “I ṭha em?” a hmaa ka din rualin a ti nghal vat a, ka zawh tur zawk ni awm tak a ni. “Um, nang i ṭha em?” ka tih rual chuan a nui nghal var var a. “Ka tihpalh aw” inthiamlo hmel zeta ka tih chuan, “Engvangin?” a ti deuh hmuk a. “Haw phawt ila kan sawi dawn a nia.” ka tih chuan ka hnungah a rawn ṭhu ve mai a, mahse ka thawmhnaw hakah erawh a ṭham nghet viau mai. A awmdan ka hriat avângin ka khal muang takzet a, ka khalh muang lutuk erawh keimah pawh ka nuih a za zawk.

“Thil thleng a awm em ni?” In kan thlen rualin a ti nghal a, sawi ka duh lo, kan chhungkaw chanchin hi midang bula sawi hi ka thil duhlo ber a ni, mahse Ngurnunmawia erawh hrilh ve ngei ṭha in ka hre si a.
“In awmna hmunah hian ka rawn kalna ala reilo tih I hria, tin in nundan engmah ka hriatpui lo che chuti chung chuan ka theih zawng anih chuan ṭanpui che ka inpeih reng ania.” ka chhan mai loh avang chuan a ti leh a. “Kan chhungkua nundan avang hian ka chau zo tawh a ni.” thaw haka ka tih chuan, “Min hrilh duh em?” min melh reng chung chuan a ti zawi sap a. Sawi a inbunruah te pawh ka duh ve ṭhin ngei alawm mahse kan chhungkaw nundan chhungril ber thlenga sawi chhuak tur chuan ka huaisenna in a ngam ngang lo a ni. Sangtei pawh in engkim min hriatpui ka tih rualin kan nundan tam zawk erawh a hre lo. Langsar taka a hmuh baklo engmah ka sawi ngai tlat lo a ni.

Ka pa in ka hriatpuina tel miah lova ka pasal tur alo ruat chungchangah ka nuhrawn leh a fanu an inrawlh tih chiang takin ka hria a, ka lungawiloh zia hi engmah in ka sawichhuak thiam heklo. Ka hmaa mipa ding chu melh in, thawk ka la leh hak a, “Zanriah ei phawt ila, chawhmeh vel a dai vek tawh in ka ring.” ka tih chuan a lu a bu nghauh a, ka thawmhnaw pawh thlak lovin choka lamah ka lut nghal a, kan haw tlai deuh avangin Ruati’n message in a haw tur thu a sawi a,ka chhan loh pawh in a haw mai zel bawk. Kan inbe tam tehchiam lo na in, ka eirawngbawl a ka inchhung enkawl tu atan chuan ka duh ber mai. Zing hma takah rawn kalin inhnunglam kawngkhar hawngin a haw dawnah a kalh leh mai ṭhin a, ka awmhran aṭanga ka bula hnathawk a ni a, a rinawm tawk tih ka hre bawk.

Ruati rawngbawl sa ka tih lum zawh chuan Ngura pawh a pindan aṭanga rawn chhuak in zanriah kan kil dun a. Ka pa in khatianga min tih hnuah khan keimah chauha awm ni ila chaw ka ei kher pawh ka ringlo. Ka haw viau ni a ka hriat pawh in ka pa a ni miau a, ka laka a khawsak dana lungawilohna ka neih apiangin ka nu ka hrechhuak ziah a, ka chhungril hi a na vawng vawng ṭhin. Chu chuan ka nun vaw chau in, ka hna thawh nuam ka ti lovin, engmah tih ka peih lo fo. Hmeichhe luhlul tak leh khirh tak angin lang ṭhin mah ila chhungrilah erawh hmeichhe tihnat awlsam tak ka ni fo bawk. Ka pa ka huat em em ruala a thusawi tam tak leh ka nuhrawn Hminghluti lam ṭang taka a ṭawng a ka thusawi a pawm loh laia Anni thusawi dawt nge thudik tih hre lo a azawm tawp ṭhin te hian min ti na vawng vawng si ṭhin anih hi.

Zaninah erawh ka natna ngaihtuah hman lek lovin Ngurnunmawia vangin ka che buai a, tunah pawh Amah avang bawkin dawhkan kilin chaw ka ei a, Ni hnihna atan chauh a ka hmelhriat hian ka tan thil ropui tak min tihsak der chu ania. Amah hi chuan a hrethiam awm der silova, ka ngaihtuahna vang chuan ka khi var var a, ka hawichhuah rual erawh chua ka nui hmel a tawp chat. Nizan ang bawkin ka chaw ei min lo en leh reng tawh a nia.

“Min hrethiam teh, eng chawhmeh nge kan ei hi?” Min en reng vanga inthiamlo nge thildang vang tih pawh ka hre lo, inthiamlo hmel takin min zawt a. Kan chawhmeh hrang hrang ka sawi chuan, “Kutin engmah i ei ngailo a mi?” a ti zawm lehnghal zat a, ka nui ri nghal hak a, Ni e, Mizote hian kutin chaw kan ei ngei alawm, mahse kei erawh fian a ei ka chin ṭhan miau avangin mahnia ka awm hnuah pawh fian ka hmang zawm zel a, nizan lama Zanriah kan kila thiam lo zeta Ngurnunmawia fian hmang kha mak ka ti zawk reng a ni.

“Kutin ka ei lo mahse midang chuan an ei a, i duh danin i ei thei alawm.” ka tih chuan a ngawi vung vung a, “Sangtei khan helai awmdan ka hriat duh chuan ngawi rengin i tihdan zir mai turin min tia,” a sawi zawh ruala a nuih suk avang chuan ka nui ve ringawt a, ka tihdan a zir vang a ni maw fian khan alo ei ve kher tih ka ngaihtuah phei chuan ka nuih a za takzet, mahse a awm nawmloh na tur khawp em chuan ka nui bik love. Chaw kan ei dan te, kan nun dan ṭhenkhat te sawi in, an chawhmeh ṭhin te zawt pahin kan titi a, kan titi nasa mah mah nge ka ei puar chiah em tih pawh ka hrelo. Kan eina ka tihfel hnuah erawh intifai tûrin ka pindan lam ka pansan ta a. Naupang thil zir ṭantir awmpui nen eng nge kan danglamna. Ka ngaihtuahna avâng chuan keimahin ka nui leh vur vur tawh. Mahse ka ngaihtuahna chuan tlaia Ngura ka hmuhna hmun kha ngaihtuah chhuakin, ka pa office leh ka in chu inhlat tak a ni a, Ani kha ka in aṭanga hla lo teah ka hmu bawk, nikhat chauh hetah a awm a,kawng a hre nghal deuh thaw a, ziak leh chhiar a thiam dawn hauh lo, mahse engtin nge ka in kawng a hriat theih? Ka ngaihtuahna avang chuan hlauhthawnna keimahah awm thutin, thawm dim zetin ṭhutkhawmna lamah ka chhuak phei ṭham ṭham a, thawm ka dimna chhan pawh eng emaw palh a thlen thut ka hlauh vang a ni. Ngura sofa a inngaihtuah muk hmel zeta lo ṭhu ka hmuh chuan ding meuh in ka melh vung vung a, min en miah lovin,” Lo ṭhu ve la.” atih chuan mak ka ti takzet, a chhan pawh thawm ka neilo emaw ka tih laiin ka kal thawm a lo hre miau a.

Ka chhungrila hlauthawnna lo awm sa nen ka bula pangpar khawina chu ka ban nghal vat a, ka chet ruala rawn hawi chhuakin ka thil ken te nen chuan mak ti hmel zetin min en vung vung a, engvanga hetianga awm thut nge ka nih ka hre biklo. Awlsam takin a thusawi ka awi a, a hmelṭha tak leh pawisawi lo hmel tak phenah hian ka tana hlauhawm a awm ka ring thut a, min tihnat ka hlauh avanga ka pangpar bawm pawh chuh vat reng ka ni. “Zorin I ṭha em?” ngaihṭhalo hmel zeta tiin a ṭhutna aṭang chuan a tho chhuak nghal a, “Che suh.” ka tih nghal ṭhat chuan chesawn lovin min en reng ringawt. A hrilhhai hmel leh mak a ti tih a hmela ka hmuh rual chuan mahni inthiamlohna tlem min neih tir, mahse Ani hian ka lakah fiahna pakhat tal a nei anih loh chuan ka In a awmtîr reng tumna ka nei hauh lo.

“Zorin eng nge thleng?” a tih leh chuan thawk ka la halh a, “Hmanlai hun aṭanga rawn kal i ni tih finfiahna min pe rawh.” ka tih chuan sawi tur a hre mai lo nge a ding ngawi reng a. “I thusawi zawng zawng te kha finfiahna min pe anih ngawt loh chuan hetah hian i awm ve reng ka rem ti tawh lo.” ka tih nawn leh chuan, a mitmeng chu hriatthiam tum zetin ka melh nghal ran a, mahse a hmelah leh a mitmengah eng nge a ngaihtuah ka hrethiam lo. “Hmeichhe hnen ata ṭanpuina dawn hi ka tan tlawmthlak teh mahse helai hmuna ka hmuh hmasak ber i ni miau si a, thudik ka sawi a ni tih ka finfiah hnuah min pui turin intiam zet rawh.” a tih chuan ka rilru a buai ta map mai. A chhan pawh hna tam tak nei ka ni a, ka chhungkaw buaina nen midang hnaa inrawlh tur chuan ka buai lutuk a ni. Ngurnunmawia hian a hnathawh tur diktak engmah a sawi bawk silova, engtin nge ka hriatchian loh leh ka hriat miah loh hna chu ka thawhpui theih teh lul ang.

“Zorin, min pui theilo anih pawh in a pawilo mahse kawng tal min khawhmuh turin ka duh che a ni.” Beisei nei zeta min melh in a ti nawn leh a. “Aw le.” ka chhanna chu a tawi viau mai, ka pui ngei ang tiin intiam ngam lo mah ila kawng tal ka kawhhmuh thei mahna. Ka chhanna a hriat rualin a pindan lamah a lut nghal daih a, kei erawh ka din ngai in ka la ding reng thung. Ngurnunmawia rawn let leh chuan a kutah eng emaw hi a rawn hum a, ka hma zawna a kut ti pharh a min hmuh meuh chuan mak tih luat avangin ka meng phawk hra mai. Lunghlu ka hmuh tawh a zawngah chuan a la lian ber ang, Lunghlu hring mawi leh lian tak a ni. “Khawih rawh.” tia ka pangpar khawina ken la a ka kuta min pek chuan ka chesawn eih lo, ka kuta khawvel sum tam tak man tur ka ken chu mak tiin ka melh reng a, sawi tur ka hre miah lo bawk.

“Uzorin” Ruati’n kawngkhar a rawn hawn ruala a tih chuan rang zetin ka thil ken chu ka hup a, chutia kawngkhar pawh kik lova a rawn lut mai chu ka lawm lo tih a hriat ngei theih nan ngawi rengin ka melh nghal ran a, inthiamlo hmel zeta min en in, “Ah, ka phone ka theihnghilh a, chokaah.” a tih bah niai a, ka lu ka buk nghauh takah chuan rang zeta choka panin a rawn let leh thuai a, “Mangṭha ule.” atih chuan Ngura zawk chuan alo chhawn thuai a, Ruati a chhuah hnu chuan hmanhmawh zetin kawngkhar ka kalh nghal hmak.

“Hei hi engtin nge i neih?” Dawhkan laiah Lunghlu hring mawi zet chu dahin, Ngura nen inhma tawnin kan ṭhu a. “Kei hi Zawlpui khua Sailo Lal Ngurhlira fapa naupang zawk ka ni, Ka u chu Ngursanga niin ka farnu khualthang khawp a hmelṭha chu Ngurliani a ni. Ka pa aiawhin ka U Ngursanga hian Lalna a chang dawn a, kei erawh ka pa tana Pasalṭha ka ni.” tia a sawi chuan Ngurhlira hming chuan ka beng a verh nghal zar maia. “I pa chu Lal Ngurhlira maw?” tiin ka zawt nawn leh ngat a. Ṭawngkaa min chhang lovin a lu a bu nghut ringawt. Lal Ngurhlira chu Hmanlai Lal chanchinah chuan ka hmu ngei a, mahse a chanchin tam tak hriat tur a awm lo, Lal fing tak anih thu bak hriat tur ka nei meuh lo a ni.

“Pasalṭha ka nih hma in Lasi ṭhian ka nei a, Zamana a ni, Ani chu Huai ho lak aṭanga ka chhan avangin vawiin ni thlengin ka ṭhian a ni a, heta ka awm chhan pawh Amah a ni.” a tih leh chuan Lasi leh Huai ho chu an awm ngei a ni tih ka ring nghet hmiah tawh, a chhanchu a sawi tu hi Ngurnunmawia a ni miau alawm. Zawlpui khaw ropui zia te, Khaw lian tak anih leh Apa chanchin a sawi laia a ngaihsan zia te, a U leh nau a hmangaih zia te a ṭawngkam mal tinah chuan ka hre nawn leh a, a farnu hmelṭhat thu a sawi lai te chuan ka ringhlel mawlh lo, Amah pawh mipa hmelṭha tak a ni a, a farnu pawh hmeichhe hmelṭha tak a ni ngei ang.

“Eng ti tur berin nge hetah i lokal?” ka zawhna avang chuan nge, a landan a danglam nghal vek a, a hmela thinrimna rawn lang chhuak chu ka hmuh hmaih lo chiang kher mai. Pasalṭha te chanchin tam tak ka hre tawh a, an khua leh tui tana innghahna an nih zia te, ral leh sa laka an khaw chhanhimtu an nih te lamin ka hria in ka zir chiang ve thawkhat tawh a, an tlawmngaih zia te, midang tana entawn tlak an nih zia te lamin ka chhiar nasa ve hle a, chutiang mizia chu Ngurnunmawia hian a nei reng em ka hrelo mahse a in phah hniam thiam in, finna kawngah erawh a fin zia tun nihnih chhung ringawt pawh in ka hre hman a, a khua in harsatna a tawk anih pawh in a tlanchhe kher in ka ringlo, mahse heta a rawn kal chhan hi ala sawi hauh lova hriat pawh ka chak takzet a ni.

“Ka khua in harsatna a tawk a, Ka ṭhian Parmawii leh a mite’n harsatna an tawk bawk a, ka tih tur chu heta lokal a, ka tana thil pawimawh tak zawn chhuah a ni. Chu thil chu min zawnpui tura ka duh che chu a ni.” a ti rum al a. A tana thil pawimawh tak chu zawh leh duh viau mah ila tuna a landan hlauhawm ru zet avang hian ka zawt ngam tawh lo. A thusawi ka pawmpui a ni tih hriat nan ka lu ka bu nghauh ringawt a, Ani pawh inbengdaih tum zetin thawk a la hawk bawka, chik zeta en tu ka nih miau avangin, mahni inthunun thei tak anih ka ringhlel lo. Tho vatin choka lamah chuan lutin no ah tui ka thli chhuak a, Ngurnunmawia chu ka pe ta ringawt a, heti bak chuan Amah ṭanpui dan ka hre hrih miau lova, ka tui no chu la in a in nghal khawlh khawlh a, a in zawh chuan min en in a nui ta var var a, keipawh ka nui ve tho.

“Lal fapa” ka tih rual chuan, “Um..” a ti hman zuai mahse kei erawh ka lo nui hak hak thung, “Zorin keipawh in i chungchangah hian zawhna ka ngah viau ania.” a tih chuan ka nui lai tawp riai riai in, thutak run hmel lo pu leh daih tawh Ngura chu ka en a, “Aw le, min zawt ta che.” ka ti ve nghal vat a. Aizawl chanchin a hriat duh thu a sawi chuan, Lal ban anih aṭanga ka hriat ang ang te sawi in, Hnam bil te tea awm tawh lova, Mizoram a cheng zawng zawng sawi nana Mizo tih ṭawngkam hman anih tak thu te, Ram dang mi awpna hnuaia kan awm dan te, British ho in min chhuahsan hnua India laka Mizo in zalenna a sual dan te ka sawi kai zel a, zalenna sual anih laia Mizo te tawrh nasat zia te sawiin, ka thiam ang tawk leh ka hriat ang ang tak tak a ni ka sawi, mahse ka hriatchin chauh pawn a ram, a khua leh tui hmangaih em em tu Pasalṭha huaisen biangah mittui a luang ta hial a.

“Mizo te hi hrehawm nasa tak tuar a, zalenna sual chhuak kan ni a, ram hmangaih tu pasalṭha te’n ramhnuaiah awmhmun khuarin hah leh hrehawm pawh sawi lovin, mizo ten an duh dana an nun an hman a, zalen kan nih theih nan leh midangte sal ni lo tur leh kan hnam a boral mai loh nan theih tawp chhuah in nunna tam tak an chan bawk asin. Khang mi huaisen tak tak te kha chawimawi tlak an ni a, kan ram tana thisen chhuah a, fam hial chang ta te kha, kei chuan ka zah em em a ni.” ka tih chuan, “Ni e, zah a chawimawi tur an ni reng a ni.” a ti ve sap a.

“Mahse zalenna kan nei ta cheng a, mahni ro in relin kan lo ṭhang ta zel a…” ka thusawi lai chawl meuh in midang zawng aia ka hriatchian ka pa ka mitthlaah alo lang a, Mizoram mipui te hmaah lemchang in, a ram nilovin Amah chauh a in hmangaih a, midangte pawh hian hetiang zel hian an ti chu a ni si a. Kan ram hmangaih taka tungding theitu tur hi tu nge awm ang le? Hnamdang te hmusit ram nilova, hmangaihna nena enkawl tu tur Hruaitu pakhat tal hi an awm lawm ni? Mi hausa ten mi rethei te an ei zawhna khawvelah hian mi rethei zawk te tan hian nun a harsat tawh zia te hi tu nge ngaihtuah pha ang le? Ril ṭam luat vangin a thi ta tih thawm a awm loh avang ringawt a, ram retheih zia haider a ram hausakna kan neihchhun ang ang eiral tu Politician te leh mi ṭhenkhat te hian vawikhat chiah a ram hi tih takzetin ngaihtuah ve se hei aia ram nuam leh ṭha zawk hi kan nei thei a ni mai tur. Ka ngaihtuahna avang chuan keipawh ka mittui a hnam ṭiam ṭiam a, Ngurnunmawia’n min en reng tih ka hriat rual chuan ka thusawi chu ka chhunzawm leh ta a.

“Lal lal lai chuan Lal in ro a rel a, mipui in an zawm ṭhin Lal chuan a khaw mi leh sa a nei ber aṭanga harsa ber thlengin an chungah angkhat vekin ro a rel ṭhin a, a khaw mipui ten an Lal lakah rinna nghatin an ring em em ṭhin, mahse tunah chuan Ram hruaitu berin mipui rinna a hlawh chhuak zo lova, an rorel dan la mipui te tan nilovin mahni hmasialna vek a ni tawh si, a thei thei in an theihna kawng tinrengah an ei ru a, hnathawktu la in rinawmna aiin Ama ṭanghma chauh hai ran in hna a thawk a, kan ramah sualna a pungin i ngaihtuah phak loh thlengin he ram i hmangaih ramah hian thil a thleng tawh asin.” hnukulh ṭeuha ka thusawi chu a hrethiam em ka hrelo, mahse ka ram chanchin ka sawi avangin tunah hian ka na mek a ni si a. Mi zawng zawng hian sualna kawng zawh in, diklo takin nun hmang mahse Ka pa tal hi chuan ti lo thei se ka duh takzet, mahse ka pa ber hian a ni, mite bum a lemchhang ṭhin chu, chu thil ka ngaihtuahna chuan ka hmaa ṭhu a ram hmangaih em em tu lakah hian nasa taka inthlahrunna nei thar in, hrehawm ka ti em a ni.

“Lal zawng zawng an in anglo a, an ṭha vek heklo. Lal duham leh pamham tak te leh a khua leh tui te tana harsatna thlen tam tak pawh an awm ve tho asin. Mi zawng zawng kan thuhmun thei lova, innghahna tlak lo Lal tam tak sawi tur leh Chapona in a lem zawh tak sawi tur pawh tam tak an awm ve bawk asin.” Ngura thusawi chuan ka in thiamlohna te chu tlemin min chhawk ve mahse ka chhungkua te bawk hian ni min ti na leh ṭhin chu.

“Thil dang hriat duh ila nei em?” ka mit hru zeuh a ka tih chuan, “Um, engvangin nge nangmah chiah a i khawsak?” tiin chik zetin min en a, chu zawhna erawh ka tan chhan har ber a ni hial ang. He zawhna hi ka dawng ve fo mahse tumah chhanna ka pe ngailo, tunah erawh ka hmaa ṭhu Lal fapa leh Pasalṭha hmaah hian dawtsawi ai chuan sawi mai a ṭha zawk in ka hre miau a, mahse engtin nge bul ka ṭan ang.

“Ka pa chu Zosiamliana niin, Aizawl khawpui mai nilo Mizoram mipui aiawhtu atana Hruaitu a ni a, Ka nu chu Zolianpuii niin kum 15 chauh ka nih in a boral tawh a. Ka nu boral hnuah ka pa chuan Hminghluti nupuiah neiin a nupui chuan Roṭhuami fanu a nei bawk a, keima in tung nung na tur ka neih hnuah ka pa in chu ka chhuahsan ta a ni. Ih… ka pa in ka chhuahsan chhan nachang hi thil tam tak a awm.” tiin ka thusawi lai chu sawi zawm lovin ka chawl dat a, ka ngaihtuahna chuan hun kal tawh a chhui kir a. Ka nu in min hmangaih luat vanga ka pa awmdan ṭha lo te haider a, ka tana a nun a hman ral tak dan te ka ngaihtuah kir a, ka mittui a hnam lehnghal ṭiam ṭiam a.

“Ka nu kha khawvela nu ṭha ber chu a nilo mai thei, mahse ka tan chuan nu ṭha ber a ni a. Nu ropui ber tia mite sawi pawh a ni kher lo thei mahse ka tan chuan Nu ropui ber, a taksa natna in a ei chhiat lai pawh a, a fanu neihchhun a hmangaih em em tana a nun a hmang ral ṭhak a ni asin. Ka hmangaih a, mahse a tan khan engmah tih theih ka nei silo. Ka chak ber i hre duh em? Ka nu kha lo dam leh sela, he ka inchhung ngeiah ka theih na zawng zawng a duat a, ka pa vanga a natna te kha tuam dam sak vek ka chak ber asin.” ka sawi zawh rual chuan ka ṭap chhuak nghal hawk. Hetiang taka ka nu in min kalsan hnua ka ṭah nasat hi ka hrelo. Ngurnunmawia chu ka bula rawn kal hnai vatin a awmah min pawmin min kuah ta hlu hlu a.

Conti….

Leave a Reply