You are currently viewing RAUTHLA KIR LEHNA – 10-13

RAUTHLA KIR LEHNA – 10-13

Spread the love

RAUTHLA KIR LEHNA-10

JONSMELY BAWITLUNG

Ruatsaka thu rawn sawi avang chuan hlauhthawnna in min luah a, engvang nge ni ang? Natna avanga thi nise a sawi ngei ka ring a, mahse rawn thleng phawt la a tih avangin thil thleng a awm a ni tih ka hrethiam ve mai, ka awmdanin a zir viau nge ka patea chuan eng nge thleng tiin min zawt vata, damdawi inah tih bak sawi tur ka hrelo. Damdawiin kan thleng a, Pu Ruatkima an dahna panin kan kal nghal vat a, Ruatsaka leh Ngurnunmawia ka hmuh rualin thil awmzia ka zawt nghal a, mahse tumah in min chhanglo. “Eng nge thleng a?” tiin ka zawt nawn leh a, “Misual kan inah lutin ka pa an vit a.” Ruatsaka chuan bul hmukin min chhang a. Engtin nge chutiang a thlen theih? An in awmdan ka ngaihtuah a, tum lawk vang renga thleng anih ka ring ve nghal tawp, mahse engvang nge?

“Siamtei pawhin hliam a tuar a, mahse Pu Ruatkima ang en chu a ni love.” Ngura’n a tih chuan ka lu ka bu nghat ringawt a, Ruatsaka nupui a telve lehzêl chu pawi ka tihpui takzet. Ka patea chuan Ruatsaka chu ṭhutpui in eng eng emaw a sawipui a, kei leh Ngurnunmawia erawh an ṭawng hre pha lo tur chinah kan awm thung. “Khawiah nge tlangval kha, an fapa kha?” ka tih chuan a lu a thing a, “Ka hrelo, Ruatsaka sawi dan chuan an nupa hian fa an neilo a ni awm e, Zuala kha an fa lak ni awm tak a ni, mahse zirna vangin pawnlamah a chhuak a, ala haw lo a ni awm e, a nupui hliam tuar in a rawn hrilh a, chuan kan thlen chuan nikhaw hrelo in an lo awm ve ve tawh a.” tiin a kutah hian lehkha them a hum chu min pe nghal zat a.

‘Nunna in hlut anih chuan rawn zawng tawh suh u.’ tih a in ziak a, a awmzia ka hrelo viau mai. “Eng nge a sawi?” a tih rual chuan chhiar ri nghal in, ka melh nghal ran a, “Kan lunghlu vang bawk a ni maw, Pu Ruatkima khan kha thil kha a hmanna a hria a, hriat tumin an pan a, mahse a hrilh duh loh avangin hetiang hian a chungah a thleng a ni thei mai angem?” Min zawt pawh a anglo, amah leh amah a inbia ni berin ka hria. A teikual vut vut a, a khabe a dawm leh ngawt ṭhin. “Parmawii a hria a, kha lunghlu pawh kha a hmanna a hre ngei ang, mahse engtin nge a hria a ni tih an hriat theih?” ti leh in, kan bula ṭhutna awmah chuan a ṭhu thla hnawk a. Chutianga a sawi takah chuan keipawh in tu nge kha lunghlu chungchang kha hria tiin ka ngaihtuah nghal vang vang a, Ruati lo hre tur an awmin ka hrelo.

“Zorin, Pu Ruatkima chhui tel theihna tur hi a awm ngei ang, keini min zui ru tu an awm ti dawn ila, tumah in min zui ru an awm ka hre silo.” tiin a ding hluai a, A chetdan chu ka en mawl tawp ringawt. ‘ ‘Lasi te leh Huai te’ kha lehkhabu kha Pu Ruatkima ziah hi a ni. A lehkhabu vanga he Project pawh hi thlang ka ni a, khatiang khawpa lehkha lar leh mite chhiar duhzawng chu tam takin an chhiar ve ngei ang, he thil titu pawh hi a lehkhabu atchilh tute zinga mi a ni thei mai angem? Mahse heng te chu tupawh in thawnthu ang lek chauhin an ngai si a. Ka hna min ṭawmpuitu chu Pu Remliana chiah a ni. Ani hian kha lehkhabu kha a chhiar ve angem?

“Zorin, Pu Ruatkima’n a hmu duh che.” Ngura’n atih chuan dingchhuakin pindan lam chu ka pan a, a harh ruala ka hming alam nghal chu mak pawh ka ti viau mai. Doctor in a dinhmun diktak a sawi phei chuan hmuh loh mai ka thlang zawk hial a. A hliam tawrh chu a nat em avangin rei a daih dawnlo a, inbuatsaih turin Ruatsaka pawh a hrilh anih kha. ICU chhunglama ka luh chuan harsa tih hmel zeta rawn mengin min melh ṭawk ṭawk a, panhnai nghal vatin a kutah ka chelh a, a hmui phun sup supah chuan ka beng ka dawh hnai nghal vat bawk a, “Bawihi, kha lehkhabu kha map anih kha tibo lo la, zawng hmu ngei ang che.” tia a sawi zawh chuan a khuh nghal bawrh bawrh a, Nurse chuan midang ko lutin, Ruatsaka chuan a pa chu a hnaih nghal vata, minute tlem te an in buaipui hnu chuan Pu Ruatkima chu a chatthla zui a.

Pu Ruatkima kan thlah liam a, keini pathum chu pindan khatah ngawi rengin kan ṭhu a, Ruatsaka nupui Siamtei erawh nikhaw hrelo a, a awm avangin damdawiin ah ala awm a, Ruatsaka thinrim erawh a chetchhuah theih hunah meuh chuan a tawrhhlelh awm khawp ang. “Ngura ka ngaihtuah ang hi i ngaihtuah ve em?” zawi deuh taka a tih chuan, an pahnih chuan ka melh tawn sek ringawt a. “Ka ngaihtuah in ka hria. Mahse engtianga hmalak chi nge niang?” tia Ngura’n atih chuan, ṭawng tum awm pawhin an awm leh tawh lo.

Pu Ruatkima thih aṭangin ni hnih ngawt a liam leh tawh a, Ruatsaka leh Ngurnunmawia te erawh ka hmu tlem khawp mai. Rim taka hna kanthawh a ngai a, hna a tamin Hotel leh resort hetiang taka fellova, ka nu in hah taka alo enkawl tawh ṭhin ka hmuh meuh chuan ka thin a rim thar a, ka nu thlarau pawh ka zah thar takzet. “Vawiin atan chuan kan duhtawk mai dawn a mi?” Ka patea aw ka hriat rual chuan ka hawichhuak vata, ka hna khawih lai ka ngaihtuah nasa lutuk a, dar zat ka lo en miah lova, sana ka en chuan dar6 alo ri der tawh. “A ṭha lawm, ka ril a ṭam tawh lutuk” ti nghal vatin ka insiam nghal zung zung a. A unau dangte anglo taka ka patea rilru ṭha bik lutuk leh ka pa ro ringawt duh lova, chhungkaw tan theihtawp a chhuah te leh a fanu ang tak taka min ngaihsak hi ka lawm a ni.

Hnathawk dang an ban tawh avângin hmanhmawh lemlo takin kan chhuak a, kan hna khawih lai leh ruahmanna te kan sawi dun bawk a. Garrage bula dinga kan inbiak mawlh mawlh lai chuan bike chak zeta rawn lim puatin, min su ṭhleh a, min sut ngei tum erawh a ang hle a, mahse ka Patea’n min pawtsawn hman hlauh a. Min pawhsawnna lamah leiah kan tlu a, khua a thim tawh avang leh garrage bula eng a awm ṭhat loh avangin engmah chiang taka hmuh erawh kan neilo. “I ṭha em?” ka patea’n a tih chuan lu bu nghauh in ka bag ka thlauh chu ka chhar nghal a, a bul lawka bawm lian lemlo tak lo let ngat chu chharin ka en a, a chungah eng nge awm tih en ka tum lai chuan ka patea rum hawk avang chuan ka pan lehnghal vata, kan tlukna lamah khan a ban alo tih hliam avangin a kawrbanah chuan thisen alo hnam ṭiam ṭiam a, duhlo viau mahse damdawiin lam panin ka kalpui ta nghal a.

Kan tluknaah khan lung hriam a delh anih hmel a, chu chuan a at thuk deuh a, tin, a ban ka delhna kut a ulh a, a vun nghal bur bawk. Chumi tih loh hliam na lutuk erawh a neilo. “A hma zawng aia i fimkhur a ngai anih kha.” Damdawiin kawta kan awm lai chuan a ti a, ka chhan hma in ka phone a rawn ri a, ka en chuan Ruatsaka a ni. Vawiin ni hian vawikhatmah Anni pahnih hi ka be lo, an hna an thawk a, keiin ka hna ka thawk bawk si a, inbiakna hun kan nei meuh lo a ni. “Zorin, pawisa lo ngaihtuah rawh, lunghlu lem kha ka siam tir a, a bak chu inah kan inbe dawn ania.” tiin call a dah lehnghal a, buaina eng emaw tak an nei animahna. Ani zawng Police Officer ṭha tak a ni a, a pa ang chiaha fing niin engkim a ngaihtuah chhuak zung zung a, kan thil ngaihvenah erawh a hming lan a thiangloh avangin a rukin chet min lakpui a, thil tam takah kan rilru seng ve mah ila, tuna kan buainaah erawh a pawimawh ber a ni a, kan bula a rawn tel hi kan tan chuan vanneihna a ni.

“Pate, ka hna bik hian buaina tam tak min thlen dawn a, Hotel leh Resort avang pawh hian buaina kan nei leh tho ang, Nangpawh i inven ṭhat angai ania. Nunna dang chan ka duh tawh lo.” ka tih chuan hriatthiam loh hmel zetin min en a, sawi vek erawh ka tum lo, ka ngawih zui daih avangin chuan, a lu a bu ve ta nghut a. In ka thleng a, tumah an awm lo nge a reh ruih a, Ruati thawm takngial pawh ka hrelo chu mak ka ti takzet. Ṭawng tuma ka kâ ka ang hman zuai tihah chuan tu emaw hian ka kâ rawn hupin bangah min nawr bet a, talchiam ka tum chu, “Keimah” zawi zet hian Ngura’n a rawn ti sap a. Thawm dim taka min pen sawn puiin, Ruati pindan zawnah chuan kan ding a, pindan chhung aṭanga thawm rawn chhuak chu kan ngaithla dun a. Ruati’n tu emaw a be thawm a ni, a ṭawng a dim em avangin chiang tak erawh chuan ka hre theilo.

Phone a dah rual chuan kalsawn mah ila kawngkhar a rawn in hawng hman miau avângin Ngurnunmawia chuan min pawt let vatin a awmah min kuah bet hmak a, keipawh che lovin ka awm ve tawp ringawt. Aw thian kharh ri kan hriat rual chuan inthlah vatin Ruati lam chu kan hawi a, lai zeta a ding ka hmuh chuan, “Kan rawn tlai deuh a, ilo buai em?” ka ti nghal vat a, “Buai love chaw ei ka peih na a rei deuh tawh a,” tiin choka lam a pan chuan ka thaw nghal hak a. “Zanah kan chhuah a ngai dawn ania, va intifai la ril ṭam a hun.” tiin Ngura chu a nui vur vur a. Zanriah kan eikham a, eng nge kan tih dawn hre lawk lovin Ngura rualin ka chhuak ve tawp ringawt, Ber thla kan chuangkai tawh bawk a, zanlam boruak pawh a nuam tawh viau a, arsi a eng pe tuar a, khawi maw laia awm a, thlir voh voh atana itawm khawpa mawi leh tam a ni.

“Khawiah nge kan kal dawn, scooty chahbi chiah ka keng ania.” Ka tih chuan, Van lam hawiin a thlir chho vung vung a, “In khawvel chuan leilung leh vana arsi te mawina hi in hre ve tawh lo chu anih hi tiraw?” tiin a nui suk a, “Kal ang.” ti leh in ka zawhna pawh chhanglo chuan ka Scooty dahna lam chu a pan nghal vut a. A ngai te bawkin, kan tlankual leh mai mai dawn anih hmel. Zarkawt kan thleng phei a, “Ding rawh” a tih thut chuan ka lo inringlo nen ka tlanpel thui viau lehnghal a, inherin ding tura min tihna zâwnah chuan kan let leh a.

“Eng nge kan tih dawn?” ka tih leh chuan, “Zawhna ngah reuh lutuk. Kan thlen hunah i hre mai ang.” tia min nuih vur vur in, zanlama in hawng ṭhin restaurant-ah chuan a lut nulh a, heng lai hmun te engtin nge a hriat a? A chhung kan lut chu rinloh deuh in Ruatsaka alo awm reng a, he mite pahnih hian ruahmanna an lo siam reng a ni maw?
“Zorin, pawisa chu i kutah kan dah tawp ania.” tiin waiter chu a ko nghal zat a, zanin a landan chu a thawveng hmel hle a, an hnaah an tluang tih a hriat reng mai. Ngurnunmawia ve hi chu a landan hi a ngai reng a, tawi tak taka a nuih bak hi amahah hian danglam tak a awmlo anih hi.

“In thil zawn engmah min hrilh ve lo.” naupang chhia zeta ka tih chuan in melh zawkin, “Ka ril a ṭam ni thum chhung hian engmah mumal takin ka ei lo. Ngura kha sawi tir rawh.” Ruatsaka chuan tiin a eitur chu a ei zawm mial mial a. “Engtianga sawi nge i duh a, i tellovin ral rel kan ṭan daih tawh a, nangchu kan awl zel mai che asin, a nuam chinah chiah tel che kan tum a.” Nui ruh ruh chunga Ngura’n a tih chuan ka melh rum vak a, “A ṭha lawm, ka tello chuan khi tlangah khan in lawn thei tawp lovang.” ka tih chuan Ruatsaka nen chuan min la nuih vur vur zui a. “Nula sinior hi an thinchhe lutuk an tia, ka hmuh che khan ka awi lova mahse hei alo dik anih dawn hi.” Ruatsaka’n a tih chuan ka nui nghal hak hak a, dawtsawi miau heklo.

A thil ei kan ṭhutpui a ni ringawt mai, “Ka thil ei hi hmuhnawm an ti thei ania.” tiin fiamthu a thawh a, a chah tam bawk em a ni. “Vawk chi ṭha mi atan i awhawm mange.” Ngura’n a tih chuan ka nuih a za fak leh tawh. Ka nuih nasat luatah ka mittui a tla phung a, “I nui hnang palh ang chhuak teh ang u.” Ruatsaka’n nui duh miah lova a tih chuan ka nuih a za tulh tulh lehnghal. Zanin zet chu mipa pahnih thawveng hmel lutuk vang nge zantir boruak theihnghilh vek khawp in ka nui a, mahse ka zang hawkin ka hre thung.

Zantira thil thleng ka sawi chuan an muk leh run tawh a, fimkhur tura min chahin, an mi man te chungchang an sawi a, hnamdang pathum te chuan pawisa vang chauh a ti an nih thu an sawi laiin Mizo pahnih te erawh an ngawi tlat a. Pu Remliana ringhlel viau mah ila a thawm a reh in Ani erawh Ṭan tlang lamah a mite a tir daih si a, a chungchang ka sawi khan an ngaihven viau a mahse engmah an sawi miau loh avangin hriat an neih chuan min hrilh hun ka nghak tawp a ni.

“Kan lo chhuah hmaa Ruati biak kha tu nge?” Zawh bik pawh neilo in an pahnih chuan ka melh tawn a. Ruatsaka pawh hian Ruati room a thawm engpawh a ngaithla thei a ni tih ka hriat avanga an pahnih a zawt ka ni. “Tu nge a biak fo hi ka hrelo, Ginie tiin a ko a, a ṭawngkam hman velah hi chuan hmeichhia a bia chuan ka hria.” Ruatsaka’n a tih chuan, “Ginie maw?” ka ti nghal vat a, a lu bu nghauh nghauh a. Sangtei ngaihtuahnaah a rawn lang nghal zawk a, a pa hi Ginie tiin a sawi ṭhin anih kha, anih chuan ka ringhlelh ruk ang ngeiin, Pu Remliana thiltih vek a ni thei mai angem le?

“Tlaiah chuan engmaw thleng?” Kan in kawt engin a en phak chinah kan ding dun a, nichin lawka ka thilsawi kha alo la ngaihtuah zawm reng tih hriat takin ka sawi leh hun nghak ni awm takin min melh run a. Thil thleng ka sawi leh thuak hnu chuan a thaw hawk a, “I hliam ve em?” a ti zawi sap a, lu thingin, “Ka ṭha lawm, ka ngaihtuah awm love.” ka tih chuan a kekawr ipte zenin ka scooty-ah chuan a ṭhu a.
“In khawvel mak tak ka rawn dai lut a, heng thawmhnaw te hi keini chuan kan hre lo mai nilovin kan hmu ngailo. Mahse min han enteh helai hmuna cheng ve ang maiin, kekawr ipte te ka zen a, i lirtheiah te ti ṭhang tak angin ka chuang ve chu ania.” tiin a nui suk a, eng chiah nge a ngaihtuah hrelo mah ila ka khi ve sak tho.

Bar thla a ni tawh a, boruak pawh a nawm hunlai ber a ni a, thlifim thaw heuh heuh te leh vana arsi lang pe uar te chu a mawi danglam takzet bawk. Ngura bulah chuan ṭhu ve in, “Kir leh ta la, engkim a fel hnuah i rawn let leh thei angem?” tia ka zawh chuan min en zawkin van lam bawk chu a en leh a, “Ka hrelo, mahse theih nise i kianga cham hlen turin ka rawn kir leh ngei ang.” min chhanna avang chuan sawi tur hre lovin ka ngawi reng a, “Kan khawvel a in anglo chunga hringmi kan chan chhunga kan intawng hian chhan a nei ngei ang tiraw? Kei hian ka hmangaih che asin.” Min en chuang hauh lova a sawi leh chuan a hmaah dingin ka kuah a, a awm ka sik rualin, “Keipawn ka hmangaih che.” a bak sawi tur ka hrelo, midangte anga kan inhmangaihna puitling ve lo tur kan hrechiang hle in, kan khawvel hrang mahse kan thinlung erawh a hrang silova.

Ka pindan kawngka in kik riah chuan harh in sana ka en nghal vat a, zinglam dar1 chauh ala ni a, tu nge le? tia thawm dim zeta kawngkhar lam ka pan chuan, “Keimah” titu Ngura aw ka hre nghal zat, hepa hi chuan zawhte kal thawm pawh a hriat theih vek ka ring. Kawngkhâr ka hawn ruala rawn pen lut vatin, eng emaw sawi tum hian a ang zuau a, mahse engmah sawi lovin a chip leh hmak a, a awmdan chu ka hrethiam lo, “Eng nge ni ta?” ka tih pawn sawi tur a hrelo nge a sawi leh duhlo tih pawh hriat lovin a ngawi ngul a, ka mutchhuak bawk si nen, “Hetah hian i riak ve duh em ni?” ka ti ta ngawt a, a nui leh suk tawh. A lo luh te khan sawi ve mai awm ania. A zak aniang ti dawn in mipa anih bakah a zak hmel ka la hmulo hrim hrim, mahni inringtawk tak leh zahawm tak hian a awm ziah a, chhuanlam tur a hre leh silo ngawi mai mai anih ka ring.

Zing khua a var meuh chuan keimah chauh in ka lo mu leh tawh.Tho chhuak mai lovin ka ngaihtuahna ka kawm a, nizan khan ka bulah a riak a, nghet taka min kuahin insi rialin kan mu dun anih kha. A bula ka thlamuan zia ka ngaihtuah a, cham hlen tura ka chelh theih ni se ka ti takzet. Mahse chu erawh engtikah mah a thleng ngai dawn silova. Ka ngaihtuahna hlimawm tak aṭanga min ti nguai rawih thei ka ngaihtuah thleng chu duh lovin ka tho vat a. Choka lama ka phei chu phun sep sep ri avang chuan ding chawtin Ruati ṭawng chu ka ngaihthla ru nghal vat a.

“Ginie ka hlau a ni, UZorini te hian min hrechhuak in ka hria.” zawi sapa a tih chuan phone a bia tih ka hrethiam nghal vat a. “Lunghlu tak ka hmu zo lo. Aw le, mahse Lunghlu ka hmuh hunah ka chhuak nghal ang.” tia a sawi lai chuan a hlauhthawn hmel takzet.
“A lem khan ka thleng tal phal la.” fan raiha a sawi chuan thleng hram se ka ti rilru nghal mawlh mawlh a, mahse a biak chuan a remti lo nge “Aw anih leh.” tiin call a dah a, ka hriat theih loh turin a phun nghal hlak bawk a. A lakah hian tihsual ka nei em ni? Ka be tam ngailo tih ka hria, mahse khawiah mah ka in aia hlawh a hmuh ṭhatna tur a neilo, a duhdana awm ka phalsak a ka in chahbi spare thlengin ka kawl tir ania, mamawh a sawiin a sawi aia tam pawisa ka pe fo a, min ngaina lo anih pawh in a laka ka thil phalna tal hi chu hrethiam tur a ni asin. Mahse min phatsanin ka hnunglam aṭangin tiang hian min bei a, Amah ruaitu pawh hriat ka chak. Ginie atih hi Sangtei nilo hram se ka ti takzet bawk.

Ngura rawn lut chu ka lo en deuh ha a, zingkarah eng nge a tih le? Ruati a awm avangin engmah ka zawt lem lova, tukṭhuan kan ei zo a, ka insiam sawk sawk a, pawnlamah ka chhuak nghal a. Scooty ka lawn ruala Ngurnunmawia hmel ka hmuh chuan ka nui ta ringawt a. Kan inbe manglo kha ania, kan rilru erawh a inhrethiam tawn hle a ni. Ngawi rengin ka in piah lawk kawngbulah chuan ka ding lehnghal a. Inchhungah engmah sawi ngam ni tawh miau heklo.

“Eng ruahmanna nge in siam tak?” ka tih chuan kan hmaa Aizawl khawpui lang uar chu a thlir vung vung a. “Tu berin nge Lunghlu hi kawl ang?” a tih chuan chhan ngaihna ka hrelo. Mahse tukin zing lama Ruati phone biak dan erawh ka sawi a. Eng emaw ngaihtuah in a ngawi leh vung vung tawh. “Khi tlangah khian i hna vang hian kal thei ta la, eng ber nge hmuh i inbeisei?” a tih chuan, ka ngawi deuh vang vang a. “Ro hlu” ka ti chhuak sap a. Eng emaw thil hlu tak hmuh ka in beisei vang a ni ngei alawm, Project atan pawh ka thlan, mahse uluk taka bihchianna hun pawh ka la nei miah lova. Ka hna la tunah chawlh tir ka ni a, Sorkar lamin min chhui mek a, hêng zawng zawng thlen chhan erawh ka pa duhdana ka awm loh vang a ni.

Tunah la ka pa ber damdawi inah a awm a, min haw hle emaw ka tih laiin a ro zawng zawng ka kutah a dah leh bawk si hi a ni ka hriatthiam theihloh chu. Ka nuhrawn leh a fanu in engmah ka thu lovin an khawih theilo, hei vang hian min huat a zual hle dawn tih ka hria, nizan lawka min sut tumtu te pawh kha an thil tih anih ngei ka ring. Hetiang hi ka chunga an ti duh anih chuan Ruati pawh hi an chhawr a ni mai thei asin, chuan Ani hian sum a duh luat avangin Lunghlu chungchang kha a sawi pawh a ni thei a. A ru chhuak tu pawh hi Ruati a ni ngei e tiin finfiahna neilo mah ila, a rinhlelh awm ber tlat a ni.

“Ngura, Ruatsaka kan biak a ngai.” ka ti chhuak hluai a, ka awmdan chu mak a ti tih ka hria, mahse sawifiahna hun a awmlo. Police Station lam kan pan nghal vat a, Ruatsaka alo la awm lo nen kan nghak ren rawn a, alo thlen ruala min hmuh chuan a pindanah min luhpui nghal vat a, ka thil ngaihtuah ang ang te ka sawi hnu chuan a lu bu nghauh nghauh in, “Case ziak lut ila, Pi Hminghluti te nufa chu thu zawhfiah turin kan hruai dawn nia.” a tih chuan, a sawi angin Case chu ka file ta nghal a.

“Ngaihtuahna ṭha tak a ni” Pawn kan chhuah rualin Ngura chuan a ti sap a, ka nui nghal var var. Ka nuih chhan erawh a dang thung. Tunah chuan tlemin hma kan sawn dawn tawh a, Ṭan tlang lama kan hna pawh thawh ka chak zek zek tawh, mahse chutiang ka ngaihtuah ruala Ngurnunmawia min kalsan hun tur ka ngaihtuah thlen chuan hrehawm tihna in min luah leh ziah. Lungawi a, alo kal chhan a tih a ngai alawm tia ka ngaihtuah hian min hnem ve ṭhin. Mahse he mipa hi ka duh a ni.

“Eng nge i ngaihtuah a?” Hnai zeta min en tu in a tih chuan ka mit ka khap nghal fak fak a, ka thil ngaihtuah chu tihreh tumin ka mit ka chhing nghal vang vang a, thawk la halh a ka men leh rual chuan ka phu zawk, Ngurnunmawia min en hnai lutuk chu kan hmai a insi lo chauh a ni. Ka phu tih a hriat chuan a nui hawk hawk a, a nuih za lutuk ka hmuh chuan ka nui ve tawp. “Nge khatia mi en vak a?” ka tih chuan ala nui vur vut tho, “I â ta thut emaw ka tia.” atih chuan keipawh ka nuih a za ve tho.

Zanriah kan eikham chuan ka phone a rawn ri ral ral a, ka patea call a ni. “Eng thil nge i tih hi Bawihi?” ka pickup rualin a rawn ti nghal a, a thusawi awmzia ka hre hauh lo. “Eng nge thil awmzia?” ka tih chuan Ka nuhrawn leh Roṭhuami chanchin a rawn sawi nghal a, Police in ringhlelh vangin an hruai tih a rawn sawi a, Ruatsaka chuan hma a la chak hle mai ka ti rilru a, “Pate Bike min sut tumtu an awm kha, nangpawn i hria lawm, an ko mai mai aniang, an rawn chhuak leh vat ang, kan himnan ka tih a ngai alawm, Police ka ruai ngamlo anih chuan misual hian a hre vat a nga buaina kan tawk tam mai mai ang.” ka tih chuan, a ngawi vung vung a, “A ṭha e, engpawh nise Hminghluti te nufa hi chu chhuah tir vat la a ṭha ang, mualphona a tam hma hian.” a tih chuan, “Aw le” tiin call ka dah a, mahse chhuah tir mai mai tumna erawh ka nei hauh lo, Police custody aṭang hian eng
thu mah kan hrelo anih chuan In an thleng ngai dawn lo. Anni nufa hi eng emaw kawng tala inrawlhna an neih ka ring nghet tlat a, ka rin sual la ka ring heklo.

Zanlam ka mut ṭhat loh avangin ka mit a na ur a, Ruatsaka pawh hian min rawn be har ka ti viau tawh. Ngura’n tui in tur min pek chuan ka melh zeuh a, a mitmenga zawhna hi ka hrethiam mahse Ruatsaka’n min la rawn be miah lova, ka lu ka thing ringawt. Ka phone a rawn rik chuan hmanhmawh zetin ka pickup a, “Aw sawi rawh.” ka tih rual chuan rang zeta rawn la in a ngaithla nghal a, “Aw kan lokal ang.” tiin a off nghal daih a, eng nge a sawi ka hre ve hman silova Ngura chu ka melh ha a, “Insiam rawh, chhuah kan ngai.” tiin a pindan lamah a lut nghal daih a. Eng tin Hminghluti te nufa chu an awm? tih takngial pawh ka hrelo. Hmanhmawh angreng takin ka pindan ka pan a, intifai thuakin ka insiam ve nghal vat. Ka che hmanhmawh ve viau emaw ka tih laiin Ngura’n min lo nghak reng tawh.

“Engmah an sawi duh lova, ruahmanna dang zawk ang khan chet an la a, Ruatsaka te in lamah kal tur anih chu.” Scooty kan chuan rual chuan a ti a, ka thaw nghal hak. Hetiang hian khawsa lo in, ka kawng dal lo sela chuan an tawrh a ngai kher lo tur. Tunah hian Anni nilovin kei hian thuneihna ka nei tih la an hai awm tawp silo. Mahse an lakah khawngaihna lantir ka tum lo, ka duh ka hriat ngei ngei hi tunah chuan a pawimawh ber tlat a ni.

Ruatsaka te building kan thleng a, inhnuai ber, tumah luah loh thawm kawng aṭanga thawm hriat lohna lamah chuan kan chhuk nghal a, kan kal hmasak ber khan sang ka ti tawh viau ania mahse inhnuai ruk, in sir lam aṭanga luh ngaihna alo awm reng a. Inchhung kan lut chu a thim angreng hle a, bulb pawh a eng chang chang an chi pheuh pheuh ringawt. A chhung tak tak kan thleng hma in mi pakhat hian min lo ti ding a, kan hmel a hmuh chian chuan mask min pe in min luh tir ve ta nghal a. Pindan a awm nual avangin min hruaitu chu kan zui zel a, pindan pakhatah min luhpui chuan Hminghluti chu chair-ah a kut leh ke ṭawn betin light zawnah an lo ṭhuttir a, a dang erawh a thim vek thung. Ngawi rengin Ngura nen chuan kan en a, mi pakhat chuan thim chinah dingin zawhna a zawt a, hmeichhia mah nise a luhlul ngang ngang hle mai.

“Khawiah nge Lunghlu hring kha a awm?” zawhna zawt tu in a tih chuan, nui lui sakin, “Hremhmunah kal rawh” a ti tuar a. Henu hian thih pawh a hlau lo em ni zawk le. Phuarbeh a ni chung pawh in ala ṭawng huai hle chu ania. “Vawikhat chiah ka zawt leh ang che anih loh chuan i fanu hi i hmu leh tawh ngai lovang,” tiin, kan piah deuh a light pakhat chu a On a. Hminghluti ang tho in Roṭhuami chu phuarbeh a ni a, mahse Ani erawh a ka an char bet thung. A fanu mittui tling pam a hmuh chuan a thin a rim zual tih hriat takin a rak chiam a, hetiang hmeichhia hi a ni tih ka hre ngailo reng reng. A nasa ve hle a ni tih hre mah ila, chanchhe zawk leh man a tawk chung pawn ala nasa mah mah chu a ni. A chhan duh miau loh avangin Ruatsaka chu a ngawi vung vung a, dawp dan tur dang a ngaihtuah pawh a ni mahna. Zawhna zawttu chu a hrilh ru zeuh in, kan bulah a rawn ding ve a, Hminghluti khawsa zia chuan a ti chau viau nge a thaw hak a, a hmel ka hmuh theih miau loh avangin a landan ka hrelo, mahse a lang pawr ve fap tawh in ka ring.

“A fanu kha that rawh u.” zawhna zawt tu in a tih tuar chuan Hminghluti mita manganna chu ka hmu nghal. Roṭhuami la hlau tih hriat takin a mittui a tla pur a, mi pakhatin Roṭhuami chemte nen a pan phei meuh chuan Hminghluti chu rawn au nghal ṭhatin, “Ka sawi ang engkim ka sawi vek ang, khawngaihin min that suh u.” a ti nghal chul a, sawi hram se ka ti ve takzet. Hetianga tawrhtir kher hi ka duhlo mahse a ṭul miau si a.

“Sawi rawh le.” pakhatin a tih chuan a thaw halh a, “Kha lunghlu kha ka ruahmanna a kan ruk chhuah anih kha. Ruati kha ti lungawi in pawisa tam tham tak ka pe ṭhin a, chuan Ani khan remchang a hmuh rualin a rawn ru chhuak a, ka fanu nen hian engkim an ti dun ta a ni.” a ti chuai raih a. “Anih leh engtin nge kha lunghlu kha a awm tih in hriat?” zawhna zawttu bawkin a tih leh chuan a hawi buai deuh nak a, “Ka hrelo ka fanu hian a sawi a, ka ngaihtuah zui ngut ngut a ni ber mai, mahse khati khawpa ka vei chung khan a takah ka la hmu hauh lo, a chhanchu Ruati’n a ruk chhuah zan khan inhmu tur kan ni a, mahse tu emaw in min thlen khalh avangin ka hmu thei ta lo a ni.” atih chuan Roṭhuami lam chu ka melh nghal vung vung a. Henu hian a hre ngei ang, mahse engtin nge kan zawh chhuah ang.

Conti…

RAUTHLA KIR LEHNA-11

JONSMELY BAWITLUNG

“Ani khan a hre ngei ang.” Pawn kan chhuah rualin Ruatsaka chuan a ti zawi sup a. Keipawh in chu chu ka ngaidan chiah a ni. Eng nge kan la tawn dawn hrelo mah ila, kha lunghlu kha kan hmuh let phawt a ngai a ni. “Engtia hmalak zel nge i tum?” tia ka zawh chuan, min chhang lo mahse engtiang pawh in a zawt chhuak ang tih ka ring. Tlangval pakhat rawn chhuakin Ruatsaka a rawn koh chuan kan lut lehnghal vat a. Roṭhuami chuan engkim sawi a duh thu an sawi chuan ka thaw ta huai mai. “Ka hrilh vek ang che u mahse min that lovin min kal tir rawh u.” Atih chuan tlangval Anmahni thu zawt tu chuan, “Awle, mahse dawt i sawi anih erawh chuan i thi ngei ang.” a ti chang fak a.

“Zorini ka huat em avangin a awmpui a rin em em, Ruati kha ka kawm nel a pawisa te pe in, Zorini chu ka enthlak tir a. Ka huatna chhan pawh ka pa fa anih vang leh ka pa in ro khawmtu tura Amah chauh a dah avangin. Ani chuan a pa a do a, kan bulah pawh awm duh lovin In a nei hrang a, engtik lai pawh in ka nu leh a pa te an inneih avangin ka nu leh pa te chu a dem a, khatiang taka mi rilru chhia kha ka hua a ni. Mi fel tak ka nilo, chuti chung chuan ka nu leh a pate inneihna ah hian engmah sel leh sawi ka nei lova ka pawm thlap mahse Zorinpuii erawh in an rosum tlemte min sem ṭhen a phalloh avangin min haw em em a, a neih zawng zawng laksak duhna ka nei ngailo, mahse khati khawpa min huphurh tu kha ka haw em a, engkim neih sak ka duh ta a ni.” A sawi zawnga a thinrim hmel chu ka hmuh fo ṭhin ni mahse a entu nih erawh a nuam viau lo.

“Chuvang chuan lunghlu chu i ru chhuak ta a?” Tlangvalin a tih leh chuan a lu a thing a, “Ka nu hmangin lunghlu neih dan chu ka zawng a, ka sawipui a, ka rin ang ngeiin ka nu chuan ka thusawi alo awi ngei bawk a. Ruati chu pawisa tam zawk pe in, ru chhuak turin ka tir ta a ni. Mahse ka nu khan a kut ngeia hlan a beisei tlat avang khan Ruati be ru in, ka nu hmu lo tur khan ka ti a, engkim kha ruahman angin a kal, mahse lunghlu kan inhlan chhawn hnu khan tu tih hriat lovin min bei in min chhuhsak ta a ni.”

“Tu kutah nge Lunghlu chu pek i tum?” Tlangvala zawhna chu a chhan hun ka nghakhlel takzet, mahse a ngawi ngal a, chhan a hreh hle a nimahna, a zawt nawn leh a, “Pu Remliana” a tih chuan ka thaw huai in ka hria, Pu Remliana chu engkimah ka ringhlel sa alawm, Sangtei a inrawlh ve erawh ka hlau takzet. Ka ṭhiannu hi chuan rilru diktak a put ka la ring fan a, tunah pawh ka rin ang ngeiin ala awm anih hi. Mahse Pu Remliana kut a thlen siloh chuan tu kutah nge a awm tak ang.

Chulai hmun kan chhuahsan hnu chuan Ngura nen chuan haw mai lovin pawnlam boruak hipin kan tlan kual a, kan ngaihtuahna ve ve kan kawm a, kan inbe tam lo khawp mai. Hmun pakhat reh ve deuh hlekah chuan ka dinpui a, a thaw leh halh ṭhin hian a rilru a buai ve hle tih ka hre thei. A tana pawimawh em em a hloh si a, zawn hmuh vat a duh ngei dawn keipawh in hmu let vat se ka duh laiin, kan hlat tulh tulh chu a ni si a.

“I tan ka ṭangkai tlem lutuk hi chu a pawi ka ti.” ka ti sap a, ka inthiamlo em a ni. Aizawl khawpui lang pe un lam chu kan thlir a, ka thusawi chu hria awm pawhin a langlo. Kan buaina ngaiah kan tang rei ta hle mai, mahse hma lak dan tur la ka hre mai silo. “Kha lunghlu kha hmu let lo mah ila, naktukah chuan Ṭan tlang lam kan pan a ṭul tawh.” Ngura’n a tih chuan mak ti zetin ka en a, a thusawi erawh eng emaw kawng zawng takin a dik tihna chin ka nei. Risk kan la tawp anih loh chuan Remliana te lamin min hmakhalh nasa tawh si a, ka Project pawh buaipui a hun tawh takzet a ni.

“Aw le, engkim peih sa a ni tawh a, i duh hunah kan chhuak thei ang.” ka tih chuan ka lam rawn hawi in, thla engin a hmel a ên avangin chianglo ruai in a nui hmel chu ka hmu thei a, a kut min pek rual chuan vuan nghal vatin a hum vang vang a, kan hna hautak tak thawk tur hian ka inpeih thlap em tih ka hrelo, mahse ka thawh ngei angai a ni, tiin ka rilru ka tipaukhauh sauh sauh a.

Ka patea kutah engkim dah felin, tunah chuan kan hna kan thawk thei dawn ta, kawng a awm mai ang tia Ngurnunmawia sawi angin, a pawimawh ber a thil zawn leh keiin a awm ngeia ka rin zawng turin kan chhuak a ni a, engtak tawng ang maw. Kan kal dawnah khan Ruatsaka engkim kan hrilh a, Ani pawhin kan kal phawt a ṭul niin a hre bawk a, khaw kar kawng a thui deuh avângin kawng lakah zanhnih riah kan tum bawk.

Kan hma lawka Ṭan tlang ngaw dur khup chu ka melh chho vang vang a, vawihnih chu he ngaw dur takah hian thuk vak lovin ka lut tawh a, ka Project vang hian a chhung zawng zawng hi ka la zirchiang ang tiin ka ngaihtuah fo ṭhin anih kha, mahse tunah erawh ka Project ai pawh a pawimawh zawk mi tam tak nunna chhan nan helai hmunah hian kan kal dawn a ni a, ka phur rualin hlawhchham erawh ka hlau takzet a ni.
“I inpeih em?” ka bengbula ti sap tu chu melh in, ka lu ka bu nghauh a, nui sukin, “Anih chuan kal dawn ang hmiang engmah hlau lo la, i bulah ka awm zel dawn ania.” a tih chuan ka bana Ruatkima ngun min pek chu ka en zeuh a, “Awle” tiin Ngurnunmawia hnungah chuan ka zui ve nghal a, Rannung hram leh sava hram ri a ring telh telh a, thawm awm hlekah beng a thleng rang ṭan tawh viau mai, ka hmaa ngawirenga kal Ngura chu a ding a, “Chhunchaw fâk a hun tawh, chawl lova kan kalna chin a rei tawh bawk a, helai hmun rem laiah hian innghat teh ang,” atih chuan, ka sana ka bih nghal vat a, dar12:03p.m a ni. Hepa hi chuan sana hi a mamawh ve vaklo anih hi.

Ka bag ah ka nghat a, ka tui pai chu ka in nghal khawlh khawlh a, Ani in mei a chhem nghal vat a, lungmam ṭha zet chu la in mei chungah chuan a dah a, eng nge a tih dawn ka hriatloh em avang chuan a chetdan chu ka en tawp ringawt. “Heti hian lo awm la, khulai lawkah khuan ka zu kal lawk ange, engmah hlauh tur a awm lo ania aw.” a tih chuan hreh ru deuh tak hian ka lu ka bu nghauh ringawt. Hmeichhe dawizep tak ni lemlo mah ila hetia ramhnuaia mahnia han awm tawp chu nuam ka ti viau lo. Ngurnunmawia a liam rual erawh in, ka bag a ka map ṭhenkhat chu ka la chhuak a, ka note ah ziakin ka compase chu ka en a, kan awmna hmun chu ka mapah chuan thaikualin, Ngurnunmawia sawi a tlang sang ber lai erawh kan la hlat hle thung.

Ka awmna thlanglam aṭanga thawm a rawn awm chuan hawichhuak vatin reilo ah Ngura a rawn lang chawpchilh nghal a, a kuta Ramar leh artui pum3 ngawt a rawn keng ka hmuh chuan sawi mai tur hrelo in ka nuih ri hak a, a lung chhuan chu khawih zeuh in, mei a chhawm ṭha nghal vat a, a bula thing chu a suih nghal vat bawk a, “Tui a awm silova engtin nge i puah dawn?” ka tih chuan min melh zawkin a nui a, a thil suih lai chu a suih zawm leh a, a suih zo a rawn lek chhuah rual chuan mak ti zetin ka melh reng ringawt. A fian suih mawi zet chu mak ka ti em alawm, “Kha i chaw ei na tur,” tia inlama ka fian hman fo ang zeta a suih chu min pe a, ka enkual a, a themthiam zia ka hmu chiang hle mai. Ka fian ang deuh tura a mawng lama a suih kir te chu ka thlek uluk hle a.

Kan eina a tihfel zawh chuan ka Compass chu la chhuak in kan kalna lam tur chu ka en kual a, Compass hnathawh dan te kan inhrilh leh hnu chuan kan kal leh ta ngat ngat a,

“Lung kha eng nga tan nge i chhuan a?” ka tih rual chuan Lung chungah chuan Artui chu a chhukeh a, a kang nghal a, chu erawh ka ngaihtuah loh dan lutuk anih avangin ka nui zui hak hak a, “I chawhmeh pai tihlum nan ka tia, mahse artui hi ka chhar ta sia heti hian a tui deuh ang, Zanriah erawh Sa ka hmehpui dawn che anih hi,” tiin a nui ve vur vur a, Ramhnuaiah zet zawng Pasalṭha anihna a lang zel dawn anih hi. Chhun chaw kan ei zawh chuan kan eina chu sengfel tumin ka che nghal vat a, mahse Ngurnunmawia hian ka chet ve a phal hauh lo nia. Ama’n kan eina a tifai vek a, “Nang chu lo awm mai mai rawh, in lamah i che vek a, ramah erawh keiman le.” a tih chuan sawi ve tur hrelo in ka en ringawt.

Inlam hna ka thawk ngailo tih a hria, mahse hei hi Mizo mipa te nundan ṭhin anih sawilo mahse ka hailo, mipa chuan ram lamah chet an la a, hmeichhia chuan in lamah hna an thawk thung. Tunlai angin Office kal leh hnadang thawh tur te ala awm bawk lo nen, sawi lo mahse fel takin an hna an rel a, kan tunlai khawvelah erawh hmeichhia hna leh mipa hna a hrang tawh lova, hmeichhia te hlei hlei hi hna sang chelh leh pawisa hlawh chhuak tam thei kan ni mah tawh zawk a. Kan mipa te pawh hi fel tak leh taima tak tak awm mahse hnathawh tum lemlo a, chhungte thawhchhuah sa a nuam taka khawsa mai mai te hi kan tam tawh lutuk a, hmanlai hun anga tupawh in hna a thawh a, an thawh mila nung nghalna khawvel anih tawh miau loh vang te pawh a ni mahna.

“Zorin, Hringmi te khawvelah hian Duhthusam pakhat chauh nei thei dawn ta la eng duhthu nge i sam ang?” Kan kal paha Ngurnunmawia zawhna chu naupang chhia ti viau mah ila, ka rilruah chuan ka nu a rawn lang hmasa ber. Thil theih loh tur mah nise ka nu kianga awm erawh ka chak ber a ni a, a ni kumkhua tawh in ka ring. “Ka nu bula awm.” ka tih chuan a bu nghauh nghauh a, “Anih nang?” tia ia zawh let chuan, ding meuh in min en a, “Ka thil hmuh tawh a zawng a ṭha ber nena damchhung hun hman.” a tih chuan hrethiam lo zetin ka melh kiau a, a nui nghal vur vur chuan, “Chu chu eng nge?” ka lo ti hu a, ” Nakinah ka la hrilh ang che.” tiin a kal lehnghal vut a, lu thing nak nakin, ka umzui ve nghal vat a.

Ngaw pik zualna kan thlen hma hauh in khua a thim dawn ta reng mai, ramhnuaiah hian zan hun ka hmang ngai lova ka tim ru viau mai. Engtiang chiah a hlauhawm nge anih a, ralmuanglo kan nih la ka hre heklo, hetia zana riah pawh hi ka hlau tih dawt hreh siin, ka awm erawh a nuam viau lo. Chutih rualin kan thil tih turin a zir bawk nen kan riah ngei erawh a ṭul si a. Ka hmelah ka hlau a ni tih a hrethiam nge Ngurnunmawia chuan, “Hlau duh suh, ka venghim ang che.” a tih chuan, za lo zet hian ka nui a, hmun rem lai kan thlen chuan mei chhem vatin zanriah tur a buatsaih vat a, “A thim tak tak hma in Zanriah kan ei dawn nia aw, helai hmunah hian kan riak dawn nia.” atih chuan ka lu bu nghauh in, mutna tur atana ka ken chu ka phah nghal a. A che leh zung zung tawh, reilo teah mutna tur buk a peih fel thuai a, a siam awlsam danah a vawikhat tihna chauh a nilo tih a hriat hle bawk.

“A chhungah hian i mutna tur kha phah la, pawn thawlenga mut ngawt ai chuan a zia zawkin ka ring.” atih chuan thuawi zetin ka mutbu chu ka pha lut a.
Khua a thim fel hma in Zanriah pawh kan ei fel vek a, muthilh erawh a har khawp ang. Rannung hram noh noh a tam in, zan lam thawm chu chhunlam aiin a bengchheng zawk daih, chutih rualin Ngurnunmawia chuan eng eng emaw min sawipui in kan nui leh hak hak ṭhin a. “I kal chau si a muhil tawh rawh, naktukah vawiin ai thui hi kan la kal dawn ania.” atih chuan kan sir vel chu ka melh hrak hrak a, “Hlau suh ka tih che kha, ka veng tlat dawn che alawm.” a tih chuan, “Lo mu ve zawk la.” ka ti khaw mawi ve a, nui sukin, “I muthilh hnuah ka lo mu ve dawn nia.” a tih chuan mu tur chuan bukah chuan ka luhsan ta a.

Ti harh tu awm ang maiin tho phang awm miah lovin ka harh zawk a, Buk pawnlam ka en chuan, mei eng bula ṭhu Ngurnunmawia ka hmuh rualin a chempui hum a, Zanin tlaia a siam mau zum taka a suih chu ban mai theih turin a bulah a dah bawk a, Mei engah chuan a hmel landan ka hmu chiang theilo na in, thil thleng eng emaw a awm nih ringin ka tho chhuak nghal a, buk aṭanga ka chhuah ruala chhum dum chah takin min thlawh pelh fua rualin leiah ka tlu nghal thlawp a, ka banbun Pu Ruatkima min pek chu a eng nghal va va bawk.

Engtik laiin nge Ngurnunmawia ka bul a rawn thlen ka hrelo, a kut lehlamah a chempui hum in lehlamah a mau fei a keng bawk a, a hmalam melh ran in, “I ṭha em?” a ti sup a, Tho nghal vatin, “Ka ṭha,” tiin ka in vennana ka ken ka Pistol chu ka phawrh ve nghal zat a, Ngurnunmawia chuan ka silai ken chu melh zeuh in a kiai suk a, ka hmalam chu ka tin ve nghal ran a. Kan chak lam aṭanga thli tleh na zet ni awm taka thawm a rawn awm rualin kan bul vela thingkung te chu an che nghal luih luih a, hmeichhe dawizep leh nû taka khawsa ṭhin ka nilo mahse tuna thil thleng zet hi zawng ka hlau ru ve takzet. Ka bula mipa ding erawh hi chu hlau hmel pawh a pu ve lo. Mei eng ringawt kan neih avang chuan engthil nge kan bul velah awm tih chiang takin ka hmu thei lova, mahse Ngurnunmawia melhna lam ka en chuan hla tak a hmu tih hriat takin a ner sawk a, “Lokal hnai ta che u, in ngam anih chuan.” a ti bul hmuk a. Chutianga eng nge an nih pawh hriat loh a cho mai chu ṭul ka tilo takzet. Ka hlau ru a ni tih te tal hi a hre ve lo a mi le?

“Engpawh thleng se hlau suh ang che, an khawih theilo che ania.” a tih chuan ka thaw haka ka chhang lo. Thli thaw vuk vuk chu a reh a, Ngurnunmawia an hlauh avanga reh ta duakah ka ngai hman mahse a inṭan dawn chauh alo ni. Rim na zet ka hriat rualin ka inrin hma in ka uak nghal tuar a, hetiang reng reng a rimchhia tih ka la neilo, sa ṭawih uih thang huam huam rim ni berin ka hria, ka uak ṭhawt ṭhawt lai chuan khawi lam aṭangin nge tih hriat lohvin an nui khek tuar tuar a, a hma aia na zawkin thli a rawn thaw a, kawlphe leh ṭek tla in a rual nghal a, ka dingchhuak a, Ngurnunmawia taksa si chet chuan ka ding a, hlau hmel a pu ve hauh lo chu mak ka ti hial zawk. Thli na lutuk tak mai in kan pahnih chuan boruakah min rawn vawrh kang lawp a, lei ka thlen rualin ka banbun chu a rawn eng leh nghal va va a, Ngurnunmawia chuan a chem ken chu a vai nghal fua fua a, ka bul velah chuan tu nge an nih hmuh theih siloh hian an phun bul bul a, mahse ka banbun eng avang chuan min hnaih ngam lo niin ka hria.

Ngurnunmawia ṭhingṭhi hnawk ka hmuh rual chuan tho chhuak vatin a bulah ka tlan a, ka banbun vanga min khawih ve ngam lo ni a ka hriat avangin ka lu zawnah ka ban chu ka ti kang a, a hma zawng aiin a rawn eng a, thawkleh khatah boruak chu a reh nghal duak a, thli thaw leh ṭek tla te, kawlphe te chenin a reh nghal vek. Mak ti zetin ka hawikual a, mahse tumah hmuh tur an awm lova thawm la, rannung hram neuh neuh bak hriat tur a awm lo. Ngurnunmawia bulah chuan ka ṭhingṭhi ve a, ” An hliam hman che em ni?” ka tih chuan a nui suk a, “Aih mahse khatiang tak khan an chak hman ang tih ka hrelo, tunah chuan an lo chak hman ta hle mai, rawn kal lo ni la ka thi ngei dawn anih kha.” tiin leiah chuan a ṭhu thluang nghal duai a.

” Kan mei pawh a thi ṭep anih hi,” tia mei kan tuahna lam a pan chuan rang zet hian a banah chelh in ka zui ve nghal a, mei chu chhem alh belh in, “Khua ala var har deuh dawn a, i duh chuan muhil leh rawh zaninah chuan an rawn kal tawh lovang.” tiin kan awmna hnaih te te a, thing ṭang ho chu a chhar khawm a. “Zawhna ka nei?” tiin thil thleng dan engkim ka hriatthiam loh thu ka sawi chuan, ka thutna bulah chuan rawn ṭhu in min hrilhfiah a. “Khang ho kha an nih kha huai ho chu, Nang chuan mitin i hmu theilo a, kei chuan ka ṭhian hnen ata thilpek ka dawn avângin ka mitin ka hmu thei vek. Mahse pawi ti suh mita i hmu ve lo kha.” tiin a nui suk a.

“Engvangin nge min tihbuai an ram chinah kan awm em ni?” Hrethiam lo zetin ka zawt a, a lu a thing a, “An tawpna siam tu tur ka nih avangin min rawn umzui anih kha, an thuam famkim nen an rawn thawk a, an chak mah mah tawh a ni, ka ṭhian te min puitu tur an awm tawh bawk silo nen, mahse ka bulah Nang i awm hmeichhe huaisen tak, i huaisenna avangin an tlan darh ta a ni.” atih chuan mak ka ti hle a, ka banbun eng de vat vat chu ka melh a, “He thil hi Pu Ruatkima khan i mamawh hunah a pui ang che a ti reng a ni.” ka tih chuan, “Um, a dikchiah anih kha, kha thil kha a Lasi ṭhian hnên atanga a neih a ni ngei ang.” a ti ve sup a.

“Hre reng rawh, Huai Lal hian min bansan dawn lova, ka chem ka neih let leh hi a thil hlauh ber a ni, chuvang chuan zanlam hun thlamuang a kan mut loh pawh a tam dawn ania, mahse Nang chu an ti na thei lo che a, eng dinhmunah pawh i hlauh ber lai pawh in rilru fim tak pu hram hram turin ka duh che a ni. Kei chuan ka khawih thei a, ka hliam theih miau avangin ka bei fo ang, chutih hunah chuan tlan angaih pawh in min tlansan hreh hauh suh ang che. A ṭul anih chuan tlanchhia la, ilokal na lamah kir leh ang che.” a tih chuan ka chhang lo.

A sawi ang hian harsatna leh buaina chu kan la tawk dawn chauh anih hmel a, mahse engtiang taka nasa leh tam nge ka hrelo, chutiang hun lo thleng mai hmachhawn tur erawh chuan ka intih paukhauh sauh sauh a ngai tih hria in, ka rilru chuan ka infuih ve mawlh mawlh a. Ka ngaihtuahna ka kawm emaw ka tih laiin ka muhil tih ka mit ka men ruala, ni eng lang uar tawhah chuan ka hre thei. Ka awmna chu ka hai ṭhelh a ni. Sava leh rannung chi hrang hrang hram te chu an ri noh noh a, mahse Ngurnunmawia hmel erawh ka hmu hauh lo. Ka mutbu vel chu tel felin kal leh mai thei turin ka insiam a, ka insiam zo reilo ah Ngura pawh mau ut ruam kengin a rawn lang hlol a, “Kha i tho thei maw, i muttui si a tiin chawhmeh ka zawn san che a, i duhzawng anih ka ring tiin hnah a phah a, a mauthei a eng sa nge tih ka hriat loh chu a bun a, a sirah kan pahnih ei tur chaw bun nghalin, “A hma tawh lem lova ei nghal mai ang vawiin lam hna a thui si a,” a tih chuan chaw chu ka kil ve nghal a.

A chawhmeh siam chu a hang hle a, eng nge anih zawt lem lo chuan ka ei ve mial mial a, ka puar dawn hnaihah chuan Ngura chu en in, “Eng sa nge ni a, a hang em em lehnghal?” ka ti tih chuan, “Thehlei sa anih kha,” atih chuan ka chaw ei a tawp chiang hle mai. Nga ti nge ka ei hma khan ka zawh loh tih ka ngaihtuah nghal zat a, rilṭam vang ni tawh miah lovin ka pum a ri ruih ruih a, ka chaw ei lai pawh ka thawhsan nghal zat. Sa ngaina tak ka ni lova, Sazu leh a khaihhnawih zawng zawng phei chu ka ngaina lo a ni tawp, chutih lai kara thlehlei sa ka ei a ni tih ka hriat rualin hmeichhia ka nih zia rawn langin ka duhloh chu ka pe na ve takzet.

Uak chiah lo mah ila ka chil ka chak sek leh ka kam ka ṭhuah sekah chuan Ngurnunmawia chuan a hrethiam anih ka ring, a nui leh suk suk ṭhin a ka ngei ru viau lehnghal a. “I ngainat zawng a nilo tih ka hria, mahse chawhmeh tur dang ka hmu mai silova ka man ta mai a ni. I hmuh loh laia ka tih hmin vek nachhan pawh,” a sawi zawh hma in ka kut ka vai khum a, ” Tawk tawk ka tha,” ka tih rual chuan keipawh ka nuih a za ve tho. Ka hriat hma zawngin tui ti takin ka ei a ,ka hriat vela ka luak a chhuak nghal hlui mai hi chu ka rilru in min hruai tih ka hria, mahse in thunun erawh a harsa a ni e.

Kan awmna kan tihfel hnu chuan kan inzui chhuak leh ta a, ni a sa in bag lian angreng tak ka ak bawk nen thlan a tla nasa in hah a na viau a, chawlh ka rawt chuan Ngura pawhin min hrethiam takin thingkung hnuai daihlim laiah chuan min chawlhpui a. Ka bottle a ka tui in ka in khawlh khawlh zo, Ngura pek tuma ka ban rual chuan ka kâ rawn hup vatin a zungṭang a hmuia dah in ṭawng lo turin min ti nghal a. Eng thawm emaw ni a hria tih ka hria, mahse kei erawh in ka ngaihthlak viau pawn ka hre mang tlat lo. Ka hriat ve zawng sava leh thli thaw ri bak engmah a awm lo.

“An ke pen danah an awmna a hla lo,” ti sapin, “Heng lai velah mihring an kal tam ṭhin em ni?” atih chuan, ka lu ka thing a, chiang takin ka sawi ngam lo mahse mihring erawh chuti maia hnaia hmuh ka in ring lo. An thawm ka hre phalo na in, Ngura erawhin an awmna chin tur awm ang lo an thawm a hre pha tlat si a. “Mihring awm thei chu researcher dang an ni thei, kan zawn ang zawng ve te kha. I lunghlu la tua kan ringhlel te kha.” ka tih chuan a lu a bu nghut a, “Kan fimkhur hle a ngai dawn anih chu.” tiin kan piah hnim buk lam chu kawkin, “Kawng pangngai nilo kan zawh mai a ngai a ni. I bag kha ka ah chhawk ang che. Nangin hei ak rawh.” tiin atana iptepui ṭha tak ka leisak chu min pe a. Hnim buk karah chuan ka lut ta nghal a.

A tana thil eng emaw tak tih ka duh vanga ipte pui ka leisak khan a lawm thiam viau a, thawmhnaw kan hak ang ha lova ramhnuaia kal mai a duhthu a sawi erawh kha chuan ka remti lova Ani pawh in thuawi takin bungrua ka siam ang angin a kal ve mai a, mahse mamawh tam tak zingah mutbu ho te leh kan hmanrua tlemte bak Tlangah hian kan lawnpui lo. Ngaw dur khup karah zankhat kan riak fel der tawh a, kan tum ram erawh ala hlat hmel viau mai. Ngurnunmawia erawh in engmah a sawi lova, ngawi rengin hmalam panin a kal mawp mawp a, keipawh in ka zui ve tawp bawk.

Ka research chungchanga ka lo zawn ruk leh ka lo ngaihven em em ṭhin hmu mai tura ka inngaihna hian min ti phur a, chutih rualin Lunghlu erawh hmuh let ala ni silo, chu thil ngaihtuah chuan rilru chu a buai ve hlek ṭhin. Ka hmaa ngawirenga kal a din tak thutah chuan keipawh ka ding ve chawt a, “Eng nge a?” ka tih deuh hu chuan, a kutzung ṭang a hmuia dahin ṭawnglo turin min ti a, a hawi kual zak zak chu ngawirengin ka lo en tawp, eng thawm emaw ber a ngaithla a ni mahna. “Kal ang.” ti thutin ka kutah rawn vuanin kawng pangngai nilo lamah chuan hmanhmawh takin min kalpui nghal vat a. A hmanhmawh em em nachhan hrelo mah ila, eng emaw thil diklo a awm tih erawh ka hrethiam ve tlat. Hla ve tawk tak kan thlen hnu chuan dingin min chawlh pui a, ka thaw hlawp hlawp hman nia.

“Eng nga ti nge, Ramhuai ho kha an rawn kal leh em ni, Nge Ram zawk?” thaw hlawp hlawp chunga ka tih chuan, “Mihring, min zawngtu an awm.” a ti zawi sup a, kei erawh mak ti zeta mengin Ngurnunmawia chu ka melh nghal hu mai. Tu chuan nge helai hmunah min zawng ang? Sangtei leh a pa ṭhuih hruai te rawn tel ve pawh nise, keini chu min zawng lo tawp ang, Ngura hian a hresual zawk em ni le? Chubakah eng thawm mah ka hre ve der lo, engtin nge mihring thawm kha a hriat bik?

“Hnu ka thup lemlo a, min zawngtu te hian hnu an chhui thiam anih chuan min rawn hmu ngei ang, mahse tunah erawh kan tih tur kan tih phawt a ngai, an hlatah kan awm rih angai.” atih chuan hrethiam lo viau mah ila, zawhna ka zawt lo. A thiltihah a chiang a, ka ring tawk a ni. Heti taka Ngurnunmawia laka feelings ka nei hi keimah pawh ka inhrethiam lo, chutih rualin keini erawh engtikah mah kan rem ve ngai dawn silova.

“Zorin, harsatna tawkin emaw eng emaw palhah ka hnenah rawn kal ve thei dawn la i duh angem?” Ngura’n a tih chuan ka melh reng ringawt a. “I duh vaklo a ni maw? A awm tho mai kan nundan engkim hi a in anglo em a ni.” a tih chuan ka nui ta ringawt. A chenna hmun hmuh chu ka chak ngei alawm engtiangin nge an khawsak a, hun an hman tih te pawh hriat ka chak, thu mai nilo a mit ngeia hmutu nih ka duh rualin a bulah hian kal ta ila ka tan let lehna a awm leh angem? Harsatna siamtu mai ka nilo ang maw? Ninawm chutiang mai mai ngaihtuah a buai hman pawh ka ni love.

“Engpawh thleng se ka phatsan dawn lo che.” ka tih chuan min enin a nui suk a, hma a hruai leh ta a. Zan lam ka huphurh rualin, Ngurnunmawia ka bulah a awm avângin hlauh avânga awm hrehawm kawpin ka awm lo, Zanriah a bawl leh vek a, tin, mutna tur puj rem tak kan hmuhah kan riak dawn bawk a, zanin chu harsatna dang a awm tawh em lovang chu. Zanriah kan eikham hnu chuan mei eng vaklo hnuaiah chuan kan titi a, zanin chu eng nge a hriat ni sawi tur a hre takzet. An ram chhuahnaa an thil tawn te, a sa kah tawh zat leh a ṭhiante chungchang te sawiin a titi luam a, kei la in ngaihthlak nuam ka tiin zawhna la ka ngah viau lehnghal a. Kan mut meuh chuan kan mei chhem pawh a alh chang chang tawh.

A bula mu mai tura min tih tlat avangin a mutna hnaih teah mutna ka siam a, palh a thleng pawha inven awlsam nan a ti a ni. Phun ri sup ri avângin ka muhil tui lai ka harh zawk a, ka hmui huptu an awm avângin ka tal nghal vak a, mahse Ngura aw in ka beng bula, “Keimah” a tih sup chuan che lovin ka awm ngaiin ka awm nghal a, kan riahna puk pawnlama mihring ṭawng thawm chu keipawn ka hriat phak avangin mak ti zetin Ngura chu ka melh a, keini awmna erawh mei kan chhem kha a thi vek a, Ngura chuan ka melh tih pawh a hre kherin ka ringlo.
Pawnlama thawm chuan Mipa aw hian “helamah hian an kal tih a chiang a, mahse hei zan a rei tawh si a, chawl ve phawt ila” a tih chuan, “A ṭha alawm, mahse kan hmanhmawh a ngai tih erawh kan hriat kha,” hmeichhe aw tliang ralhin a tih chuan ka mengphawk nghal hra mai, Sangtei aw ngei a ni, ka ringhlelh sa mah nise, ka ringhlelhna tih ngheta a awm erawh mak ka ti em a ni.

Conti…

RAUTHLA KIR LEHNA-12

Jonsmely Bawitlung

Kan bul hnaih maia chawlh an tum avangin Ngurnunmawia chu a hawi ruai a, eng emaw a ngaihtuah tih ka hria, ka kutah chelhin, thawm dim leh biru chunga min kalsawn puiin, kan awmna piah deuh thingkung bulah chuan min biruk pui a, mei an hal avangin an che vel kan hmu thei vek a, fimkhur takin an awmdan chu kan en reng a, Sangtei leh a bula mipa ding pawh chiang takin kan hmu thei. Sangtei’n,” Kan hlawhtlin hunah chuan ka pa kan dahṭha hmasa ber tur a ni.” tia a bula ding palian zet a biak chuan mak tiin ka meng awk awk thei, a bag zen rak rakin Ngurnunmawia lunghlu hring ngei mai chu a rawn phawrh ta a, thil thlen dan mak lutuk leh Sangtei ka rin phak baka a che chuan eng ber nge ngaihtuah hmasak tur min ti hrelo.

“Zorini pa i tih ang khan i pa pawh ti leh la ni mai lawm, thi silovin khiti khian a thi hun a nghak tawp mai si a, a nupui leh a fa bik la i dawi kual thiam nasa mai si a,” tiin a bula mipa chu a nui hawk hawk a, Sangtei erawh a nui sak a, a chetdan maksak lutuk chuan ka hriat ṭhin Sangtei kha anna reng reng a nei tawh lo.

Ka phone rawn ri thut avang chuan ka phu zawk a, tih zawihna hman awm tawh heklo, kan hmalama mite pawh chuan ka phone rikna lam nia an hriat chu an melh kual nghal vat a, Ngurnunmawia chuan min kaiin min kalsawn pui nghal a, mahse Sangtei hote zinga pakhatin min rawn hmu tih hriat takin, “Sawta saw,” tia a au rualin theih tawpa chakin kan tlan nghal a, ramhnuai thim zinga tlan erawh ka tan chuan a harsa lam hret a ni.

Thui tak kan tlan hnu pawh in kan inhlat thei meuh loh avangin Ngura chu a hawikual vut vut a, “Inṭhen ang, chhak lamah hian thawm neiin ka tlan anga nang thlanglamah hian kal ang che khawvar hnuah chhim hawi zawngin i rawn kal dawn nia dawn nia, ka lo zawng hmu leh ang che,” tiin min chelhna chu a thlah a, eng hmel nge a put ka hrelo mahse a aw erawh min ngaihtuah tih ka hria, kal hran pawh ka ngam chuanglo mahse kan dinhmunah hian hlauh sawi theih a ni miau silova.

Ngurnunmawia sawina lamah chuan ka theih tawka chakin ka tlan a, ka hnunglamah erawh thawm ala awm reng avângin khawi lam nge ka pan pawh hre lovin ka tlan mawp mawp tawp. A thim bawk si, engmah hmu thei bawk silo nen eng emaw ka chhuih a, ka lum ta a, ka thawm chu a hretu tan a na viau ang, ka dam chhuah pawh ka ring tawh lo. Thingah ka in tauh dawp a, ka luhai muai muai leh ka hmaa eng de vet vet chu ka hriat hnuhnung ber a ni.

Ka bula mipa ṭawng lawng lawng chuan min ti harh zawk a, Ni sa zet avang chuan harsa ti zetin ka meng a, ka awmna chu khawilai nge ka hrelo. Ka bula ṭawng te chu tu te an nih hriat tumin ka en a, mahse tu mihring mah ka hmu lo. ka chal ka tauhna chu dawm vang vangin nizan thil thleng kha ka ngaihtuah let a, khang mipa rualin min um lai khan ka lum a, thingah intauh in engmah ka hre zui lo anih kha. Mahse hei tunah ka harh a, ka bul vela mite ṭawng chu ka hria a, Anmahni erawh ka hmu lo, tin, min la zawng reng a ni tih an ṭawng danah ka hre thei.

Ka hnunglam aṭanga mipa lian zet rawn lang thut avang chuan ka phu zawk a, ka rak nghal ṭhat bawk mahse a awmdan chuan ka rak ri chu hria awm pawhin a lang lova, tin, keimah pawh min hmu in ka hrelo. Mipa dang a rawn lang leh a, “Helai hmunah ngei hian a hnu a tawp si a, eng nge a awmzia le?” tiin a rawn lang hnuhnung zawk chuan mak ti leh hrilhhai zetin a lu thak lo pui chu noh noh a. Eng nge thil awmzia hi, an awmdan engkim ka hmu in, an ṭawng la ka hre vek a mahse Anni erawhin min hmu thei lova, ka aw pawh an hre theilo anih chuan kei hi ka thi tihna em ni? Nilo, nilo ka thi theilo ang, Ngura nen kan inhmu leh dawn alawm. Tuna ka awmdan zet chuan min ti mangang takzet a ni.

Thi hman ka la nilo asin, mahse ka thlarau chauhin heng mite hi a hmu si a, anih chuan khawiah nge ka taksa a awm ang, Anni hian ka ruang an hmuh chuan hlau in an tlansan emaw tuma hriatloh turin an phumbo a ni awm si a, Ngurnunmawia mangang tur hmel ka ngaihtuah zui a, ka rilru tawt lutuk avang chuan ka thaw leh hak hak ṭhin. Engtin nge hetiang mai hian ka nunna a tawp a, ka tawpna ka hmuh theih? Puk kan zawng anih kha, khawilamah nge puk pawh chu a awm reng reng le?

Mangang leh hrehawm ti taka ka awm lai chuan ka bracelet chu an rawn eng va va a, chhun ni sat vanglai ni mahse ka kuta eng erawh a eng fiah takzet, a phe zeuh zeuh a, mak ti zetin ka en reng a. ka rilru a hmalam pan duhna rawn awm avang chuan inngaihtuah nawn hauh lovin ka hmalam chu ka pan nghal mawp mawp a, min zawngtu te thawm pawh ka hre pha tawh lo. ka hah lutuk chu ka ṭhu hnawk a, nizan ka tlanna leh ka chetsual dan ka ngaihtuah a, keimah a phun sapin, “Hah hle tur chu ka ni,” tiin ka nui hak a, mahse ka ngaihtuahna a vir nghal zawk. Hah ka la hria a, tui hal pawh ka hria, anih chuan ka la thi lo tihna mi? Nge ni a mitthi tawh te pawh hi an hah in an tui a hal ve ṭhin tho zawk?

Ka bag ah lai ka en chuan a ṭet phung a, tin, lei a kai nasa viau bawk. Ka hai rak rak a, ka bungraw tam zawk chu a baw zo chu a ni e, vanneih thlak takin ka tui in tura ka dah erawh a baw lo hlauh, la chhuakin ka in nghal khawlh khawlh a, ka harh hawkin ka hria. Ka hawikuala ka awmna chu ka hre hauh lo, endik tur takngial pawhin engmah hmanrua ka nei tawh lova, helai ramngaw chhah zetah hian ka bo chu a ni der mai. Engtin nge Ngurnunmawia awmna ka thlen theih ang, mitthi ka ni a, ka thlarau chauh anih pawh in Ani kha ka zawn hmuh ngei ngei a ngai tho si a.

Kalna lam tur hrelo in ka duhna lam lam ka pan hmiah hmiah a, ka bana mi chu a eng reng bawk a, ka kalna hi a dik chiah em hrelo mah ila, ka pen diklo dawn apiangin ka bana mi hi a thim riai riai zel a, ka kalna ka thlak leh ṭhin, mak ti viau mah ila ka la kal ve zel chu ania. Ka thi nge ka dam tih pawh hrelo leh ka kalna lam pawh hrechiang lova ka kal mawp mawp lai chuan thawm ka hre leh ta a, mihring thawm bawk a ni. ka bul hmin buk laiah chuan biru in ka hmalama thawm awm chu ka ngaithla kar a. Mipa pathum niin Ngurnunmawia zawngtu te an ni tih an ṭawng dan aṭangin ka hre thei.

Ka pum ri ruk rukah chuan ka ril ṭam tawh zia ka hria mahse ka bag-ah laiah hian eng ei tur mah a awm lo, Ngurnunmawia awm ni sela ril ṭamin ka awmlo tur helai velah hian eng ei tur mah a awm awm silova. Ka thawhaka chutih ruala hla lo tea mipa ṭawng lawng lawng thawm avang chuan ka tawmna hnim bukah chuan lut thuk deuhin ka biru sauh sauh a, ka pum la chu a ri ring tulh tulh lehnghal. ka kuthniha dawmin ka kun ngal a, Anni hian min hmu thei nge theilo pawh ka hre tawhlo mahse an lak aṭang hian ka biru tho si a.

Ka bul maia mipa vei thuak thuak avang chuan thawk ring hlau in ka kâ ka hup a, a hmaa ka hmuh te khan ka thawm hrelo in min hmu theilo mahse ka thi tih erawh pawm harsa ka tih tluk zetin, fimkhur lo taka awm pawh ka thei chuanglo. A kalpui in, helamah a tih rual chuan ka bul hnaih taka tei vut vut chu a kalsawn nghal a, ka thawchhuak nghal ham ham. Ka hnunglam aṭanga ka kâ rawn hup thuttu avang chuan ka phu zawk a, ka tal vak rual chuan ka beng bul a Ngurnunmawia aw ngeiin, “Keimah” a rawn tih sup chuan ka inthlah zal riai riai a, chutia Ngura aw ka hre leh min khawih a, min hmu thei tih ka hriat rual chuan ka mittui a hnam nghal ṭiam ṭiam a.

Ka hmel a hmuh ruala Ngura mangang hmel leh min ngaihtuah tih hriat taka min melhna te avang erawh chuan ka hahdam huai thung. Ni e, mitthi nia inngaihna kha a hahthlâk in a hrilhhai thlak em a ni. Ka thi emaw tiin hrehawm ti takin ka awm a, mahse ka thlarau talin Ngurnunmawia a pui thei dah lawng maw tiin ka zawng zui zel kha a ni a, kan intawng leh ta a, tin, helai ramngaw pilril zetah hian Ani chauh hian ka thi lo tih a finfiah thei si a. Ka chal a khawih zeuh ruala a thip sekah chuan ka ner nghal nang a, “I chungah eng nge thleng?” a tih chuan melh zui vawng vawngin ka khi sak a. Ni e, ka thi lo tih ka hriat hian ka lawm em a ni.

Kan Inṭhen hran hnua ka kaldan leh ka chunga thil thleng zawng zawng ka sawi chuan Ngura pawh chuan mak a tiin ka bana ka bracelet chu a melh vung vung a, “Ani chuan ka tih theihloh thlengin a tihsak zel che anih hi, i pawimawh hle si a.” tiin ka mitah chiang zetin min melh a, keipawhin a hmelṭha tak hi en reng mai ka duh. Hmeltha ka ti na in, mipa hmeltha hluak erawh a ni hauh lo, a ngo hluak lova, mahse a vun thim lam hret leh pa ru zet hi ka tan erawh a tluktu an awm miau lo alawm.

“Nizan aṭang khan engmah ila eilo tih ka hria,” tia a nuih vur vur rual chuan ka pum ka dawm vat a, ka kutah bawk kai lehin min zawngtu te kallohna lamah chuan min kalpui ta a. Sa alo hem hmin diam tih ka hmuh chuan ka ei chak takzet, ei tuma ka ban ruali a hma nia a sa min pek kha ka ngaihtuah chhuak thut a, “Eng sa nge?” ka tih chuan, “Thehlei a ni tawh lo ei rawh.” tiin Amah chuan a ei nghal a, eng thei nge tih ka hriatloh chu rawn phawrh in a hmeh nghal avang chuan ka ei ve mai bawk. A thlum thui phian lehnghal a, ka ril a ṭam tawh bawk nen ka ei leh ṭeuh mai. Kan ei zawh chuan kan thu chawl a, “Sawlaia chhum dumin a hliah chin saw ngun takin enteh,” a tih chuan a kawhna tlang pang lehlam chu uluk takin ka en a, en mai chuan hnai tê angin a lang tawh a, mahse kawng pangngai tak anih loh avangin thui tak kal ngai pawh a ni mai thei.

“Chhum dum awmna hnuailamah sawn puk chu a awm tawh a, hetianga umzui tu kan neih reng chuan thui tak pawh kan kal a ngai mai thei a ni,” atih chuan ka lu ka bu nghauh a, “Thleng ta ila engtin nge kan let leh ang?” ât hmel zetin ka zawt a, a nui suk thung. “Kan lokalna lam aṭangin kan let leh mai dawn lawm,” tiin a nui vur vur a, keipawh ka nui ve tho. “Engpawh nise kan puar tawh bawk a, kal dawn ang hmiang, kan thlen meuh chuan Ruatsaka te pawh an rawn thleng hman ve mai thei asin. Anni zawng umzui tu an neilo bawk a, kan awmna chin an rawn chhui chhuak thei em em ang.” a tih chuan mak ti zetin ka melh a, Ruatsaka te’n kan hnungah min zui tih reng ka hrelo.

Kan tlan dan Ngurnunmawia’n a sawi chuan ka nui hak hak ringawt. Min umtu te bumnan kawng nilo ah kan tlankual vak ni awm tak a ni, mahse kei chuan kawng dik leh diklo pawh ka hre lo, ka bo emaw tiin ka kal kual vak vak a, tihian Ngura nen kan in pawh leh hlol kha ania, a sawi danin, kan inṭhenna atanga ngil taka kal tlangin tuna ral lehlama kan hmuh tlang lam hi a thlen theih alo ni. Mahse heng mite hian kan zawn ang an zawng ve a, a kawng diktak an hriat miau loh avanga min umzui an ni. Sangtei erawh kha chuan Ro leh thildang hria apiang erawh thah vek a duh thu a sawi tak kha, a pa pawh engkim zawh huna tihhlum a tum thu a sawi ngei alawm.

Sangtei rilru diktak ka hriat hnu hian mak ka ti a, engvangin nge hetiang taka a danglam theih tiin ka ngaihtuah zui neuh neuh a. He Project ka buaipui dawn khan a bulah eng eng emaw ka sawi fo a, a tak tak nise tiin duhthu min sam pui fo ṭhin anih kha. A pa te Ṭan tlang an dap tih min hrilh ngawt nachhan te kha ka ngaihtuah let hian eng emaw thil tum alo nei reng tihna ania, Ka project thleng hian alo hre ru vek zawk em ni? Hetiang taka thil hre tur a nilo asin, mahse a hre miau si a. Apa phenah hian Sangtei alo awm reng si a. “Kal ila” Ngurnunmawia ṭawng riah chuan ka ngaihtuahna ata harh chhuakin ka thaw hak a, ka thutna aṭanga tho chhuak vatin Ngura hnungah chuan ka kal ve leh ta hnak hnak a.

Thui tak erawh kan kal hman lo, kan awmna bul velah chuan chhum a rawn zing chiai chiai a, Ngura’n ka banah kai vatin min kal chak pui sawt mahse chhum chu a zing tam tulh tulh a, ruahpui vanawn sur tur ang maiin Van lamah te chuan chhum dum a inzial tup tup a, kan awmna vel chu zan ang maiin a thim phui nghal hmuk mai, chutah zet zawng ṭhut chawlhna hun a ni tawh lo, Ngura chuan min tlanpui nghal dawr dawr a, hah leh chauh pawh a sawi theih tawh meuh lo. Kan bul velah te chuan thil vawt zet hian min chhem thuak thuak a, kan hnunglamah la umtu awm ang maiin tlan thawmin a zui bawk.

Ngura’n a kut lehlama a chem ken hum nget sauh sauh a, theihtawp chhuah a min tlanpui chung pawhin min umtu te chu ka bul maiah an thaw ri hlawi hlawi tawh tih ka hria, Ngura chuan min virpui zawkin boruakah chuan a chem ken chu a vai nawk nawk a, thaw ri pawh kha a hla sawtin ka hria. Mahse min tlanpui leh ruala kan hnunglama tlan thawm a awm leh rualin ka ke ka chhep sual a, ka bawk nghal thlawp.

Ka tluk ruala ka ke pahniha mantu kut vawt tak chu en a, mahse tumah ka hmu theilo, Ngura’n min kaithawh tuma ka kut a vawn leh rualin min chelhtu chuan min hnuk let nghal dawr dawr a, chu zet zawng ka thauah manin hlauh avangin ka rak nghal chiam a, Ngurnunmawia rawn tlan let chu kut phar chhuakin ka au lawm lawm a, min pawttu tha la a chakin tal chhuah ngaihna a awm silo, Boruakah ka vir nawk a, min theh tih ka hriat ruala ka banbun eng va va chuan eng emaw tak a rawn ti leh dawn tih ka hrethiam, eng emaw ka tauh ri bur a lei ka ka thlen ruala Ngura thinrim inhrosa ri leh na tuar au rawng rawng chu ka hriat hnuhnung ber a ni.

“Zorin, i harh em?” Mangang aw zeta min ko tu chu ka hre ruai ruai a, ka hmaia tui min theh ṭhat ṭhat avang chuan harh chhuak thutin ka hawi ruai a, “Khawiah nge?” ka ti chhuak hlol. Ngura chu thaw huaiin, “An kalbo tawh, i harh tawh dawn lo emaw ka ti a,” tiin min ṭhut ṭhat tir a, ka taksa na ṭhum chu tawrh a har lam hret a ni.

“Eng thil nge thleng a?” ka tih chuan min melh vung vung a, thawk la hakin, “An hotupa hovin an lo thawk chhuak anih kha, ka sawi tawh kha, kha chem kha ka neih let loh nan hian an theihtawp an chhuah dawn a, tun lo pawh hi buaina dang tawk thei reng kan ni, engpawh nise i kal thei angem?” tiin ka taksa chu a thlek kual a, ka hnungzang na tih loh chu tawrh har khawp hliam ka tuar lo, “Ka hnung hi a na tawp,” tiin ka nui lui a, a lu a bu nghauh. “A na mai thei khatia boruaka vawrh i nih khan helai thingah hian i intauh a, nikhua i hrelo zui a.” tiin a kut min pe in min kaitho a. “I kal thei angem?” a ti zawm zat. Ka lu bu nghauhin, “Kal thei ang, ka ṭha ania.” ka tih chuan ka kutah rawn chelhin kan kal ta nghal a.

Tun thla tlemte chhunga ka hun tawn bawk a ni ka ngaihtuah leh tawh, harsatna hlir ka chungah a thleng a, mak taka ṭanpui ka nei zel a. Thil thleng engmah hi ka hrethiam lo a ni. Hetiang taka harsatna hi ka pa in ka chhuahsan hnuah hian ka tawn awm ka hrelo, heng zawng zawng bul erawh ka Project vang chauh a ni. He Project hian engtiang taka thil ṭha leh ṭhalo min thlen ang maw. A tawpna chianglo tak nisi hian, harsatna lo thleng tur lungkham aiin a tawp thlen erawh ka chakin ka phur viau si a, a chhan bul ber erawh Ngurnunmawia vang ka tilo theilo. Ani bula awm nuam ka tih tluk zetin a bulah hian ka thla a muang tlat si a ni.

“Zorin, i nu i chhun em?” Ngura’n a tih thut chuan mak ti zetin ka en a, ka insiamrem lehnghal vat. “Ka pa chuan i chhun lutuk min ti, ka chhun chuan ka hria mahse a boralna a rei ve tawh bawk nen chiang takin ka hrelo, ka hriat chin erawh ka nu an tumin hun ka hmang anih hi,” tiin ka nui ri hak a. Ni e, ka nu ka kha a zawng zawngin hre hmanlo mah ila ka hriatchinah erawh Amah ang chakna ka nei ṭhin, hmeichhe ṭha nunnem leh zaidam kha a ni miau a.

“I nu hian a ngaihtuah hle che anih ka ring. I ngai em?” a tih lehzel chuan ding meuhin ka melh vung vung a, a nui suk a ka kutah chelhin min kalpui lehnghal a, “Nga ti nge tiang thil hi i sawi thut a?” ka tih chuan min chhanglo, a kal ngaiin a kal reng a, a hnung zawka kal ka nih avangin a hmel landan ka hmu theilo, thil thleng erawh a awm ka ring ve tawp.

Kan hmaa lunpui lian zet chu kan en chho duh ha a, feet 10 emaw a ai sang chu a ni hrim hrim. Awmze nei taka chutia lungpui lian tak ding to lurh chu mak tia thlir tham a ni ve hrim hrim. Ngurnunmawia chuan a enkual vel a, ka hriat theih silo hian a phun leh sup ṭhin, Puk luhna tur kawngkhar a ti anih kha. Keipawh chuan Puk chhung luhna tur awm chu ka enkual ve a, mahse vang tak a ni. Ngurnunmawia hian a hresual anih hial ka ring rum rum. Ralkhat aṭang kha chuan tlang bawk hrang lian tak anih ka ring kha ania, mahse a bul kan thleng a tlang nilovin lung lian tak rualrem zeta awm alo ni reng a. A bul kan thlen rualin Ngura’n,” Hei ngei hi anih hi Puk kawngkhar chu,” atih khan mak ka ti hle a, a chhan pawh kawngkhar ni se khawi aṭanga luh tur nge ni ang? Nawr sawn ngai ta se engtin mah keini pahnih ringawt hi chuan kan nawr kal zo dawn heklo.

Chutia luhna tur kan zawn buai lai chuan ni pawh a tla ṭep tawh, khua a thim anih chuan kan buai a zual dawn tih hrethiam takin Ngura chu a che pawh a hmanhmawh zual sauh a, mahse beidawnna tur hlir a ni mai. Lung la a lian si a, enfiah chhung a reiin akn zawn ber la Vana rah ang mai a ni, ní tlak thleng pawhin luhna tur kan la hmu chuanglo a. Beidawng zetin Ka dinaah chuan rawn kalin leiah chuan a ṭhu thla hnawk a, “Zanriah kan ei phawt a ngai a ni. Tin, heta zan hun hman hi a rem lo.” tiin tui a in nghal khawlh khawlh a. Keipawh in a rawtna chu ṭha ka ti, mahse eng nge zanriah atan kan ei ang, buhfai takngial pawh kan nei tawh silova.

Lungpui chhak lamah chuan min kalpuiin hmun rem zawl nuam angreng tak lo awmah chuan mei a chhem vat a, mei lum bula ka awm lai chuan Ngura erawh ei tur zawngin a chhuak a, khua a thim ṭan tawh a, kan hun tawn tawh nen mahni chauha awm chu nuam ka tilo ṭan viau, ri hlek awmna lamah chuan ka hawi phawk leh hra ṭhin a. Minute sawm dawn keimaha ka awm hnu chuan ka dinglam sir hnimbuk che luih luih avang chuan ding mar awtin, Ngura thing fawm sa pakhat chu la kangin nghet zetin ka hum a, hmin chetna lam chu ka melh ta ran a.

Hnim a rawn inkeu hawn rualin au chhuak thutin, ka thing ken lekin ka pan nghal thawr a, ramsa emaw thildang anih tak hlauhin ka thawma umbo ka tum a ni, “Keimah, keimah” titu hmel ka hmuh chuan ding vatin ka thaw chhuak nghal hawk. Ka hmaa nuih za insum tih hriat zeta ding Ngura chu melhin, “I rei, khua a thim hman hi.” ka ti nghal hlak a. Ka awmdan chu hrethiam takin, “Ei tur ka hmu mai lo a, chubakah kawng diklo a kan hruai tak te khan rin aiin min hnaih chak leh sia, naktuk thlenga min rawn hmuh mai loh nan ka tibuai leh lawk alawm.” tiin a iptepui ah chu leiah nghatin, mei chu a chhawm ṭha nghak vat a.

Thei tlem a zawng leh Ṭangṭial leh rannung eng eng emaw a rawn hawn chu ka enkual dan dan a, Ngura chuan thing ṭang lian vaklo chu a suih a, a thil hawn rap ru zeta ka melh zuk zuk chu min rawn en in a nui leh suk zel a, a thingsuih chu zo vatin ṭangṭial leh rannung dang chu thil nghauh nghauh in, meiah chuan a rawh ta a, a rawh zawh chuan thei chu la chhuakin a thil rawh tul khat nen chuan min pek a tum a, mahse mi rap em avangin ka tawlh hnung dawr a, maimawm ka hlauh zia a hriatloh vang a ni, ka hlauh em avangin ei chu sawiloh hetia a thi tawh ka hmuh ringawt pawn ka za chuai chuai thei.

Thei chauh chu la in ka ei nghal a, ril a ṭam si, ei tur kan nei chaurau bawk si chu thawhalh in, “Kan buhfai kha ka van ngai.” ka tih chuan Ngurnunmawia a nui chhuak huk a, “Rilṭam i tuar theilo tih ka lo hre miah lova,” atih chuan inthiamlo leh deuhin, “Chutiang pawh nilo,” tih bah nakin a thil ei chu ka melh zauh a, a ei tui hmel phian bawk si. Ka thei ei chuan ka rilṭam a phuhruk zo lo, tui ka in a Ngura bawk ka melh leh a, a thil ei tui hmel zet chu ka ei ve chak ta tlat pek a.
Ka rilru hria ni awm takin a rannung tawh tul khat chu ka lama rawn lel vutin, “Kha a tenawm miah loh ania, a thianghlim ber an ni zawk ang, zingah pawh zupawl sa i ei tho kha,” a tih chuan, mei engah chuan na zetin ka melh nghal rawm rawm a, zinga kan sa ei kha sazu sa maw ni a, hepa hian ei duhloh pawh a neilo anih hi.

Ka tenchhiatna chu dah ṭha in phun nang nang chung chuan ka kuta rannung kak far a inthil tlar chu ka melh ran a, mit chhing vang vangin, ka ei va ta. ka rinaiin a tuiin a hmui hiam lehnghal a, ril a ṭam tawh bawk nen ka tui nen chuan ka ei ta bawrh bawrh a, thei nen ṭangkawpin ka ei zawh meuh chuan ka puar ta hle mai “Sa chu sa nge nge alo ni e.” ka tih chuan Ngura pawh a nui ve suk mai.

Zan a rei tak tak hmain Ngura bulah chuan ka mu a, ka chau ve nge reilo teah ka muhil nghal mai. Ngura erawh ka lo veng ang che a tih tlat avangin ka muthilh san ta a. Ṭawng thum bul bul ka hriat rual chuan ka tho nghal vat a, ka hmaa mipa rang taka thamral nghal ka hmuh rual chuan hlauh avanga au chhuah ka tum lai takin tu emaw hian ka kâ a rawn hup a, ka tal zui chiam bawk, “Keimah,” tia Ngurnunmawia aw ka hriat rualin ka inthlah dul nghal riai riai a. Ka hahdam ta deuh a ahriat chuan min thlahin, ka hmalamah chuan rawn kalin ka hmaah chuan a rawn ṭhingṭhi a. “Ka ṭhian kha i hmuhah a inlan ve a rem lo a ni e, ka hrilhfiah ang che, mahse tunah erawh mu leh rih rawh, khawvar ala hla ania,” tiin min en ran a.

Zawhna pawh siam lovin ka mu ve leh mai a mahse muthilh erawh a har tawh hle mai, ka let ka let a Ngurnunmawia mu ve pawh ka hrereng, ka mit erawh ka meng lo. Min rawn kuahtu avang chuan ka phu uih a, “I muhil lo tih ka hria alawm, muhil rawh.” dam thlup hian a rawn ti a, min kuahna avang chuan ka thla a muang sawt animahna ka muthilh lai reng ka hrelo.

Nikhaw hrelo a ka kalsan ka pa nena inhmachhawn in kan inmelh ran a, nikhaw hrelo in rei tak a awm tih pawh hriatloh khawpin a taksa a ṭha a, chutih rualin thip zeta min melhna chu a chhan ka hrelo. Ka haw viau emaw ka intih laiin damdawiin khuma a mut meuh chuan ka lo la hmangaih zia ka hrechhuak anih kha. Mahse tunah a dam a thinrim mitmeng alh phatin min melh run a, a chhan la ka hre der silo.
“Ka pa, engtik khan nge i rawn harhchhuah ka tih chuan?” lawm ru leh a thinrim vanga bangbo zetin ka zawt a, “I lunghlu hring kha min pe rawh anih loh zawngin,” tia sawi zawm duh lovin a rum nghut a, mak ka ti takzet. Engtin nge lunghlu hring chungchang a hriat le?

“Ka pa engtin nge chu thil chu i hriat?” ka tih rual chuan min rawn hnaih thutin ka hrawkah a rawn rek thut a, a kut chu laksawn sak tumin ka tal ve nghal phat a. Mahse a chak em avangin ka talchhuak theilo chu ka thaw kawk kawk a, ka sir ka melh a ka nuhrawn Hminghluti leh a fanu Roṭhuami nui sawng a ding ka hmuh chuan ka melh ṭawk ṭawk a, ka chunga thil thleng mek chu hrethiam lo hle mah ila, min rektu tha chak lutuk avang chuan ka thaw a sak tial tial a, ṭang tur pawn tha ka nei ta meuh lo. Ka tan awm ve ngailo mahse ka nunna em la duh tura ka ngaih loh in min rek hlum mai dawn tih ka hriatna chuan min ti na a, ṭang pawh ṭang duh tawh lovin ka mihring hmuh tawp ber tur tiin ka melh phe ruai a, ka mittui a luang nghal zaih zaih bawk.

“Heti ringawt chuan min kalsan theilo, Zorinpuii tho rawh, ka hmangaih che Zorinpui harh teh.” titu aw chu chianglo ruaiin ka hria. Ka mit ka chhing ta riai riai a, “Zorinpui, ka fanu beidawng mah ta che harh chhuak rawh.” Ka nu aw ka hre thut chu mak tiin ka hawi nghal ruai a, “I harh a ngai,” a rawn tih leh rual chuan ka lungphu ri ka hre thei. “Zorin, Zorinpui,” mangang aw tih hriat taka min kotu aw chu tu nge anih ka hre mai theilo, ka ngaihtuahna hman tumin ka chhing vang vang a, ka hmingpum ngata min koh leh rual chuan harh chhuak thutin ka ṭhu chhuak ta hlol mai, ka thaw nghal kawk kawk a, Ngurnunmawia mit sen ruma ka hmuh rual chuan min kuah nghal thlawp. “Ka chan ta che emaw ka ti a,” a aw a lawmna ri chu ka hre thei.

“Eng nge thleng?” ka tih chuan, “I muhil tal nasa lutuk khan min ti harh a, i thaw pangngai lo zui nghal a, tu emaw in i hrawkah an rek tih ka hria mahse tumah ka khawih in ka hmu theilo a, huai ho kha an rawn let ta mai em ni ka tih laiin an thawm leh rim takngial pawh ka hre bawk silo, i nghawnga kut thla a rawn lang hnu phei chuan ka mang a angin i thi ngei dawnin ka hre tawh. Huai lam hian manglamah an tibuai che nih ka ring a, chu erawh ka tihtheih phak bak a ni si, tikhan ka ko ngat ngat ta che anih kha.” a tih chuan ka lu ka bu nghauh ringawt. Ka nghawng chu ka hmu chak mahse darthlalang a awm silova. “I ṭha tawh em?” a tih leh chuan, “Um mahse ka tui a hal,” ka tih rualin tui bottle chu min rawn pe a, ka in nghal khawlh khawlh a.

Khua la var chianglo mahse mut leh erawh ka tum tawh loh bur avangin mei chhu chhep belhin insi rialin kan ṭhudun a. Kan induhna hi inhrethiam tawnlo kan nilo, mahse kan khawvel kan chian dun em vanga sawilo ve ve kan ni. Chupawh kan pahnih tho a ni a hrechiang tu. Ka mumang ka sawi chuan a rindan ang chiah anih thu te a sawi ve luam a, Tin, zanlai thlen hmaa ka ṭhian a tih pawh min hrilh ve bawk. A ṭhian Zamana’n a rawn tlawh thu leh hmanhmawh a ngaih tawh thu a sawi a, a chhan pawh. a let leh huna puitu tur Lasi te an tlem tial tial thu a rawn hrilh a, khua a var a nga thleng tur zawng zawng a thlen a hun tawh, a ti anih kha.

Conti..

RAUTHLA KIRLEHNA – 13

(Jonsmely Bawitlung)

Zing ni chhuak chuan beiseina thar min pe a, kan hna thawh turah hian hlawhtlinna kan chan ngei ka ring a, chutih rualin eng nge kan hmachhawn dawn tih erawh kan hre silo. Ka thawh hma in Ngura a chhuak tawh a, ei tur a zawng leh dawn tih ka hria. Kan mei erawh a thi vek tawh a, eng nge alo hawn dawn ka hriatloh avangin mei nun ṭhat pawh ka tum chuanglo.
Rin ang ngeiin Ngura chuan kan pum puarna tur a lo hawn leh thlap e. Khawi aṭanga a hmuh zozai nge tih pawh ka hrelo, ka puar chuan ka duhtawk mai.

Kan ei zo a, puk lamah bawk kan inzui thla leh ta a, Ngura chuan ka banbun chu min lakthlak sakin a kutah a bun a, lung chu a khawih vela mahse awmzia a neilo. Diktak chuan ka beidawng tawh, Ngurnunmawia pawh hi a beidawng ve tho in ka hria. A ngaihna hrelo zeta kan ṭhut reng lai chuan, hnunglam aṭang hian, “A tawpah chuan kan inhmu ta maw,” hmeichhe aw tliang ralh, ka hriat ṭhan em em in a rawn tih chuan kan ding kang nghal awt a. Sangtei leh a mipa rawih te hmel chu kan hmu nghal zat.

“Kan rual khan kal ve mai ula hetia beidawng tak hian in awm kher lovang mawle.” tia nui lui har harin kan lam an rawn pan a, keierawhin ngawirengin ka lo melh ngat ngat thung. “Kan lo nghak che u alawm,” titu Ngurnunmawia chu mak ti zetin ka melh nghal ha a, Ani erawhin min en ve lo, Sangtei chu nuih sukin a melh ngar a, Sangtei chuan Ngura thusawi vang nge mak ti hmel a pu ve zawk, mahse a reilo. Ngura chu rawn panin a nui ta var var a. An awmdan chu avâng chuan mak tiin ka melh tawn sek ringawt.

Naupang tet ata ka ṭhianṭha ber hetiang taka a danglam thei hi mak ka ti a, a chhan ka hre heklo. Rohlu vang ringawta hetianga awm anih chuan mak ka ti lehzual ang, a chhanchu Lalsangkimi hian ka hriatchinah rosum leh pai it taka a awm ka hre ngailo a, tu thil mah a awt ngailo miau a ni. A neih chinah a lung a awi hle ṭhin a, tin, an dinhmunin a zir bawk nen mipangai chunglam a leng chu a ni ve hrim hrim, chutih laiin dawr hlawk leh lian tak Aizawl khawpui laili takah a nei a, a duh leh mamawh ai tam sum leh thildang a nei miau alawm.

“Anih chuan inbumna tel suh se,” ti riah chuan ka ngaihtuahna aṭangin ka harh zawk a, Ngura leh Sangtei lo in dinchilh ran chu ka melh nghal vat a, eng nge an sawi ka lo hre miahlo. Sangtei chuan Lunghlu hring mawi em em mai Ngurnunmawia ta ngei kha rawn phawrh in nui sangin Ngura chu a pe a, Ngura’n khi suka min rawn melh rualin ka bula ding chu a che nghal phatin ka nghawnga chemtea min rawn tinin min man bet nghal a,
“Chet la hauh suh, anih loh chuan Ani hi a thi ang.” chemtea min tin rantu in a tih rual chuan Ngura pawh a ding nghal chawt a, Sangtei chu nui ri hakin, “Mawl viau turah min ngai em?” rawn ti ve in, “Hmahruai la ka rawn zui ang che, tin, Anni pawh hian min rawn zui ang,” tiin kei leh min chelhtu bakah mipa pahnih te chu kawk zauhin Ngura chu kal turin a hrilh nghal zat a.

Ngura lawmlo hmel chu chiang takin ka hmu, mahse man beh ka nih miau avângin Sangtei kawhna lam, Puk kawngkhar a hma nia kan buaipui hrep lam chu a pan a, Lungpui lian zet hmaa ding chuan lunghlu hring chu a keng kang a, chumi rual chiah chuan Lungpui zawnah chuan mihring leng tur chu a kaw nghal dawk a, Ngura a luh rualin, Sangtei leh keini bakah mipa pahnih te chu kan lut ve ta nghal a.

Puk chhung chu a rimchhia in a thang ngur a, ka uak lo chauh a ni e. Kawngkhar chu ala inhawng reng a, mahse hnunglam kan hawi anih loh chuan pawnlam aṭang chuan eng êng mah a lut lo tih hriat zetin hmalam chu a thim chah mup a, Ngura bawk chuan bang chu a dap kual dan dan a, meichher ni awm tak hi a rawn la ta vut a, Ka hnunga mipa chuan liter rawn ti alh vatin Ngura meichher chu a hal nghal a, bang lehlama meichher pakhat chu la leh in a hnung bera kal chuan a keng ve thung a, chutianga puk chhung thui ve angreng tak kan kal hnu chuan Hmun hnawng leh a lei pawh chiar dup chu kan pawh hlol a, chu hmun kan thlen rual chuan mei eng hnuaiah chuan mihring nge ramsa tih hriatloh hlimthla chu a tlankual zuk zuk a, keini ho chu kan dingkhawm nghal zat bawk.

Thli na tak thaw fua fua ang mai hian chu ramsa tlan chuan thawm a nei a, min rawn bei ngei dawn nia kan hriat laiin, thawm chu a reh ta daih a, mak tiin kan hawi kual zuk zuk ringawt. Keini in thawm kan siam miau loh avangin boruak chu a reh tlawj tlawk a ni ber mai. Kan thaw ri pawh a hriat theih hial mai. Chutia kan din reng lai chuan, Ngurnunmawia’n ka banah rawn man thutin min tlanpui nghal vut a, ka hamhaih nen thil awmzia zawh nachang pawh ka hrelo. Kan tlan rual chuan kan hnungah Sangtei leh midang pawh an rawn tlan ve a, ramsa thawm rapawm tak kan hriat rualin a hnung bera tlan mipa au rawng rawng ri kan hre zawm nghal zat.

Ngura chu a din miau loh avangin min kaih ang ang chuan tha tawp tak meuhin ka tlan ve a, mahse hnunglam ka hawi zeuh erawh ka inchhir rum rum. Kan hnungah chuan eng ramsa nge tih hriat loh lian zet hmulin a bawm khah vek hian min rawn um a, a mitmeng rapawm lutuk mawlh khan ka tha a ti khur hial thei, min that vek dawn anih hi ka tih rilruk laiin “Zorin zuang ang.” Ngura’n atih rual chuan ngaihtuah miah lovin ka zuang ve thawr a, Ngura awmlo sela zawng puk inṭhenna khuar thuk takah chuan ka tla hlum ngei ang le.

Puk lehlam ni awm tak aṭang chuan kan luhna lam chu thaw dep dep in ka en a, tumah hmuh tur an awmloh rualin thawm pawh a reh nghal duk a. Sangtei leh mipa min mantu kha an rawn zuang kai ve hman a, mahse mipa pahnih te erawh khawiah nge an bo tak kan hrelo, kha ramsa hlauhawm tak khan a ei zo tawh te pawh a ni mahna.

Kan dinchhuah rualin Ngura chuan lunghlu chu a keng kang lehnghal a, a eng leh vet vet tawh, puk chu a thimin kal ngaihna a awm miau loh avangin meichher dang dapin bang lam chu a enkual zung zung a, a hma ang bawkin meichher chu a hmu leh mai bawk. A hal vat a, puk chhungril lam pan chuan kan kal leh ta nghal a.

Mahse thui kan kal hma in puk chu a tawp ta tlat a, kan hawi buai ta nak mai. Ka hawikual vak vak, a thimin hmuh phak chin a tawi bawk si, bei a dawng takzet. Luhna tur zawnga kan buai kan buai lai chuan Pu Ruatkima lehkha bu chhung a thu awm kha ka hrechhuak zawk, “Tui fim tak leh thianghlim tak a ni, engtikah mah a bawlhhlawh ngai lovang.’ kan bul vela tui tling awm leh ṭhin chu uluk takin alo chhuahna bul hriat tumin ka enkual a, puk chhunga tui a tling anih chuan luhna a nei ngei tur a ni.

Chutia ka ngaihdan ka sawi hnu chuan kan kalsan tawh lamah chuan Ngura chuan tui kawng chu a chhui kir a, kan kal thuilo bawk nen, tui luhna ni ngei tur chu bang bulah a hmu ta mai reng a. Hmanrua engmah kan ken veloh avangin Sangtei ṭhianpa chem pai chu a bul kar nan a hmang ta a, kan hmanraw neih a bei tham bawk nen Lung lian lemlo tak kar phawn pawh a buaithlak lam hret a ni. Mipa pahnih ten tui tlingna bula Lung an kar chhuah meuh chuan darkar khat dawn hun an hmang a, Tui chu a rawn luang chhuak huk a, mahse rei erawh a nilo, tui luang a zawh hnu chuan bang kaw zim angreng tak chu uluk takin Ngurnunmawia bawk chuan a enfiah a, awmze nei taka lung a lakthlak chu kan lo thlir ṭhap ringawt.

Mihring leng a lakthlak hnu chuan a kut min rawn pe in, hma a hruai a, kan lut ta nghal a. Tumah ṭawng tum reng reng kan awm lo. Meichher pakhat ringin hmun thim tak chu kan zawh zel a, kan pen thawm bak hriat tur reng reng a awm lo. Kan lut thuk telh telh a, boruak chu a vawt tual tual ni mai in ka hria. Ka khur ru dar dar a, Ngura kut chu ka hum nghet sauh bawk a, ka awmdan chu a hrethiam anih ka ring a rawn hawi let vut a, a kut lehlama ka dara kuahin lehlamin meichher a keng a, ngawirengin min kalpui leh ta a. Kan hnunga kal te pawh hian vawt an ti tih hriat takin an ha inkhak ri chu a ri leh bawp ṭhin.

“Ngati nge boruak hi?” ka ti khur dar dar a, “Ka hrethiam chiah biklo mahse helai hmun hi kan chhuahsan ṭep tawh ang,” Ngura chuan vawt a ti ve hle tih hriat takin a aw pawh a khur ve hial a, hetiang taka boruak vawt hi ka la tawrh awm ka hrelo, tuna kan awmdan ka sawi thiam dan ber chuan refridgerator-ah min dah sia, a sang berah herh baw se chutiang vela vawt chu ni maiin ka hria, ka ruh zawng zawng te hi a na ṭhum thei. Sangtei aiah thawmah chuan kan hawi vat a, vawt atih luat avangin a kal thei tawh lo tih hriat takin a ṭhu khur hlawk hlawk a, a ṭhianpa chuan chawi tho lawpin, “Kan hmanhmawh a ngai,” a rawn tih chuan Ngura chu bu nghatin, “Tlan ang,” atih rual chuan min tlanpui vut a, mahse tlan chu a sawt chuang hauh lo nia. Tlan tura tha kan pek tam leh kan muang tulh tulh ni maiin ka hria.

“Ngura tlan in awmzia a awmlo,” ka ti sap rual chuan a ding thut a, bang leh bang zim tak chu melh tawn sekin, meichher chu min pe a, ka kut a rawn lakkan rual chuan, “Eng rawh” an ti ngawt a. Ka bracelet erawh en tum awm pawhin a langlo. “Tun hi a hun asin le, Zorin eng tir rawh.” atih chuan a ngaihna hrelo zetin ka en ringawt. Ka rilru erawh chuan ṭanpuitu kan mamawh thu ka sawi mawlh mawlh thung. Ka manganna hria ni awm takin ka bracelet chu reilo teah a rawn eng ta va va mai, kan awmna hmun zim leh sei zet chu a rawn en ta pup mai, chumi rual chuan Ngura chuan a ngai te bawkin ka banah vuanin min tlanpui leh ta hlawk hlawk a, kan hnunga mi pahnih te pawh an rawn tlan ve tho, mahse a hma ang ni tawh lovin kan tlan sawt thei ta.

Hah hnawpa kan tlan hnu chuan Ngura chu rak deuh ṭhawtin a tlu bawk thlawp a, keipawh ka bang chuang lo, Amah ka la delh zui. Mahse ka hawichhuah rual chuan kha kawng zim leh hahthlâk zet, vawt bawk si kha kan lo chhuahsan fel der tawh. Kan chhuah ruala ka thil hmuh avang chuan ṭawng nachang pawh hre lovin ka kâ hau ringawt. Midang pawh ka awm ang tho hian an awm ve in ka hria.

Hmanlaia thil hlu an sawi zawng zawng bakah rangkachak, silver leh lunghlu duhthusama tam kan awmna puk lai takah chuan a awm a, tin chu hmun chu lui tui fim ṭha zet hian a hual vek a, rangkachak te chuan chulai hmun chu chhun engin tui chu alang tle siau a, a mawi takzet. Bangah te chuan eng pangpar nge tih hriatloh a par vul chuk a, an rawng te la chu a tâk in, a mawi lutuk chu mit laksawn nachang pawh ka hrelo. Hetiang taka tam rohlu hi khawi aṭanga rawn awm nge ni ta ang? Chu thil hlu tam tak awmna chhipah chuan Mizo chempui lian leh hrawl tak chu a in sat bur vu bawk a, chu ngei chu a ni a khua leh tui chhan nana a nunna thapa, Ngurnunmawia rawn kal chhan chu.

“Tunah chuan ka hmu ta,” Sangtei’n a rawn tih hluai chuan, an awm ve a ni tih ka hrechhuak chiah. Min kalpelin tui awmna bulah chuan dingin, “Heng zawng zawng hi ka ta an ni a, hetiang taka hausakna ka neih hnuah chuan engpawh ka ti thei tawh ang,” tia nui sangin tui chu dai a tum a, mahse Ngura’n alo pawt sawn vat. Sangtei pawh a ṭeu nghal hlar a, mahse chumi rual vek chuan banga pangpar te chu a rawn vuai zo a, rim na tak thang huam a rawn chhuah a, lui tui fim tak leh tle siau te chu thisenah rawn in thlakin, kan awmna puk nuam leh dangdai tak kha puk rapawm takah a rawn chang a, khawi aṭanga rawn kal nge tih pawh hriat lovin Bak an rawn thlawk ta sup sup a, kan lu chung lawk a thlawk an nih avangin min tih nat hlauin kan kun ta vat a, mahse reilo ah an thlawk bo ta vek a. Kan awmna chu a reh leh ta ṭhuap mai.

Kan vai chuan kan hamhaih tih hriat takin tumah kan chesawn lo, mahse kan hamhaih chhung a reilo, Puk bang chu meialhah changin a kang phei zuai zuai a, chu chuan eng rawn siam in, keimahni pawh kan inhmu thei leh tawh. chutih rual erawh chuan ramhnuaia kan boruak tawn ang chiah khan, Anmahni hmuh theih silovin kan bul velah te chuan an phun ri leh ta sup sup a, eng emaw hmul thur hian min kalpel leh fua fua ṭhin bawk a, hetiang ang tawn leh hi ka duh hauh lo.

Ngura chu a che thut a, Puk lai lamah chuan a zuang phei nghal zawk a, a chem lak tuma a chevel chu ka hmu chianglo nghal riai, thli a rawn thaw fua fua a, a na tulh tulh a, hun reilo te chhungin kan awmlo puk lian lemlo takah chuan thli na tak a tleh ta a. Keini ho chu min len sawn dawr dawr a, Sangtei nen chuan kan mipa te ve ve lamin kan au nghal chul a, thawm a bengchheng in mahni aw pawh ka hre chang chang a ni.

Lung pakhatah ka in ham bet a, Ngura kalna lam chu fiah lo ruai in ka hmu a, Amah chauh nilo in midang ka hmuh tel miau avangin ka au chiam a, mahse ka theihtawpa ka auhna pawh a hre theilo a ni ngei ang. Ka lam a rawn hawi miah lo. A chem a phawi dawk ruala rapthlâk taka au ri ka hre zawm nghal zat a, engtik laiin nge ka bul a rawn thlen a, engtin nge thlipui na zet hi awlsam taka a rawn kal tlang ka hrelo, “Kan chhuah a ngai,” tiin ka kutah a chelh a, min pen pui hlawk hlawk a, thawm rapthlak tak tak avângin kan kal dan pawh ka hre mumal lo, khawi aṭangin nge kan chhuah tih la ka hre heklo, um tu kan nei tih ka hria chu takngial pawh chu eng nge an nih ka hrelo. Pawnlamah kan chhuak hlol a, puk chhungah khan kan awmrei bawk nen boruak duh khawp ka hmuh rualin ka thaw kawk kawk a, kan awmna chu ka en kual nghal bawk a.

Tlang sang laiah kan awm tih hriat takin thlifim a thaw heuh heuh a, puk chhung boruak a tlem bawk nen chutia boruak duhkhawp hip theia kan awm chu nui var var in, ka ṭhu hnawk a. Mahse Ngura ka en rual chuan ka nui hmel a tawp nghal riai riai a. A kutah a chem a hum a, a kut lehlamah a lunghlu a hum bawk a, a hna a zo tawh a, a let a hun tih hrilh nawn ka ngailo. Min kalsan mai tura ka ngaihtuah chuan ka na nghal vawng vawng mai. Ani pawh hian a chak lo tih a hmelah ka hmu thei.

“I kal a hun ta,” ka tih chuai raih rual chuan, min rawn melh zawk a, ka ṭhutna aṭangin ka ding chhuak nghal vat. “Ni e, a hun tawh,” a ti ve sup a, ngawirengin kan in melh tawp. “I Khua i thlen hun chuan min hre ve reng rawh aw,” ka tih chuan, ka hnuk a ulh ringawt. Ka damchhung huna ka mipa duh ve hi ka ta a nilo tur hi ka ui a, ka na bawk. Ka rinloh deuhin min rawn kuah thut a, “Khawvel khata piang kan nilo hi a pawi ka ti, mahse hei hi hria la ka duh,” a chawl dat a, ka mitah chiang taka min melhin, “Ka hmangaih che,” a ti sup a, min kuah nghal thlawp a, a awm nghenga min kuah meuh chuan ka insuam thei ta biklo. Ka mittui a luang nghal zung zung a, ka hmangaih ve a ni tih hi hrilh ve ka duh mahse ka ṭahna avangin ka sawi chhuak thei lo.

Min kuahna a thlah a, Ani pawh a mit a sen ve ram tho. Keimah ang tho in inkalsan chu a hreh ve tih ka hria, ka thaw halh a, “Kal tawh rawh, chuan keipawn,” ka ti rualin, “Ngurnunmawi engtikah mah kha thil khan Zopui khua i thlenpui lovang,” kan sir lam aṭanga rawn ti ṭeng chhuai tu avang chuan kan hawi phei zawk a, A taksa chu Sangtei a ni ngei mai, mahse a aw a danglam vek a, a mitmeng pawh a sen rum bawk. Pistol a rawn keng erawh ka hlauthawng a ni. Kan pahnih chuan min tin ran a, a nui suk suk hmel rapawm zia chu ka sawi thiam lo, Amah Sangtei tak tak a nilo tih ka chiang viau si a.

Min rawn pan zel avangin kan tawlh hnung dat a, a silai chu a hmet per dawn a ni tih ka chiang. Ngura chu kal mai se ka duh a, mahse Ani la ngawirengin ka bulah a ding a, Sangtei lam chu a melh run a. “Engtikah mah hnehna i chang ngai dawnlo,” a tih rual chuan Sangtei lamah a tlan thut a, a chem chu a vai nghal thuak a, mahse mak tih khawp leh awihawm loh khawpin Sangtei chu a che rang a, Ngurnunmawia chu a hnunglam aṭangin a man lawk a, a theh ta ṭhuai mai. Ka tehkhin dan ber chuan Lungte chhar ila duhtawkin vawm vel ila, chutiang chiah chuan Sangtei pawhin Ngura chu a vawm kual vel ni maiin ka hria. Chutiang taka chak chuan theh kual mahse Ngurnunmawia chuan a chem leh lunghlu chu a thlauh duh hauh lo. A taksa erawh a khem nual tawh a, Sangtei’n a hnaih apiang chuan a chem chuan vai ve bawk ṭhin mahse a vai fuh thei meuh lo.

Tlang hmawr lamah Ngura chu a ding a, a hma pen sawm vel awmah Sangtei a ding bawk, a mitko kak aṭanga thisen rawn luang zai zai chu hui kiang thuakin, Ngura chuan Sangtei melh lovin min rawn melh daih a, Nui sukin a lu a bu nghauh a. Eng nge tih a tum ka hriatthiam loh em avang chua mak ti zetin ka melh ha ringawt. Mahse Ngura chu Tlang hmawrah chuan a zuangthla thut a, kei ai mahin Sangtei a au ring zawk, a tlanphei vat a, Ngurnunmawia a hmuh tak loh vang nge rapthlâk zetin a au ṭial ruai a, Sangtei kâ aṭanga meikhu dum ngut ang mai a chhuah rual chuan a tlu nghal hnawk a, chulai boruak chu a reh nghal tlawk tlawk. Rannung leh sava hram ri emaw, thli thaw ri takngial pawh hriat tur a awm lo.

Leiah chuan ka Thu thla Hank a,ka mittui far chu hrukhul ka tum lo, ka dara rawn khawih tu chu ka en a, boruak pawh a pangngai leh vek tawh tih thli thaw heuh heuhah chuan ka hre thei. Ruatsaka chu ka en a, “Engkim a tha vek tawh ania” a ti sup a. Ka dara beng thek thekin Sangtei tlukna lamah chuan min kalsan nghal a. Engkim a tha tawh a ti a,mahse kei erawh ka tha lo ka kik lova,ka ruak ngawih ngawih chu anih hi.

Ngurnunmawia kha engtin nge a awm tak ang le? An khuaah chuan a let ngei angem tih la ka hre heklo, ka rilru chhungril takah erawh thlamuan rukna a awm a, engkim a chingfel vek ang tih ka hria, chu chuan thlamuang takin min awmtir thung a ni.

Ni a ral a, kar a liam a, thla hial a vei leh tawh a. Kha puk avang khan India ramah hial ka hming a lang a, record buah hial ka hming a chuang ta. Diklo taka ka hna aṭanga suspend ka nihnaah pawh sorkar lamah buaina neuh neuh a awm a, chu erawh ka ngaihven vak lo. Kan thil hlu hmuhchhuah erawh sorkar nen ṭangdunin sorkar kutah a lut a. Zirchiang turin mi thiam zawk an chah chhuak a, kei erawh engkimah rawn leh a bul tumtu ka ni ta zel a. Heng zawng zawng ka thlen theihna chhan hi Ngurnunmawia zar vek a ni a, mahse ka hlawhtlinna a min lawmpui turin Amah a awm tawh silo.

Sangtei leh a pa Remliana te pawh police lamin a dap a, an hnaah mihring tana ṭhalo tam tak an hmuh avangin an industry khar sak an ni a, tin, Sangtei pawh in helpawl ruai a, keini min umzui bakah min thah a tum avang te, Pu Ruatkima a thah tir avang te in Jail-ah khung a ni a, court zawh ni a, a inchhir miah lo hmel leh a chhuah huna min tihbuai zel tur thu a sawi khan mak ka ti. Rosum nilovin kei min itsik vanga ti vek anih thu a sawi te kha ka mak ti zualtu a ni a, ka unau ang chiaha ka en leh engkimah ka duhsak em em ṭhin kha ania, mahse Ani chu ka dinhmun ka chelh duh avang te khan chapo min tiin min lo itsik ṭhin hle a lo ni si a. Ni e, chapo tia min sawi duhtu tan chuan ka chapo a ni mai ang chu, ka pa ro engmah mamawh lova ka awm te, ka ṭawngtlem luat avanga nelawm ka nih lohna te leh ka ngaihdan nilo a, tumah zah lem lova ka ri nghal pawp ṭhin te hi a haw tu tan a huatawm hle dawn tih ka chiang tlat a, mahse ka mizia hi ka duh, harsatna tawpah pawh dam khaw chhuah duhna min pe tu a ni miau a, midangte sawi vang ngawtin tih danglam ka tum hauh lo.

Engtin nge a hna kha a thawh ve tak ang le? tih ka ngaihtuah fo a, a hlawhtling ring mah ila, a hlawhtlinna ka hmuh ve miau loh avangin engtin nge a awm zel ang tih la ka hre heklo. Mahse ka thinlung neitu a ni a, engpawh ti ila hriatrengna chauh neitu hian ka theihnghilh ngailo chu anih hi. Ka inchhung mawlh hian Amah ka ngaihna a ti zual ṭhin. Zing ka thawh a, ka chokaa hmuh leh mai te ka inbeisei fo a, filter zawnah la Amah ngaihtuahin ka ding leh reng ṭhin. Eng chen nge Ngurnunmawia hlimthla hian ka nun a tihbuai dawn le?

Tunah chuan awmpui pawh mi thar ka la tawh a, mahse a hma ang tho in min nel leh chuang miah lo. Mahse pawi ka tilo, ka inchhung fel taka a enkawl chuan ka lung a awi zawk. Ka pa pawh damdawiin aṭangin a chhuak a, Hminghluti te nufa vanga damdawiin awm a ni tih a sawi chhuah ni khan Police man tir nghal a tum a, mahse ka phal ta lo. Duhâmna hian mihring a tih chhiat theih zia chiang taka hmutu ka ni a, ka pa tihsual rah anihna chen a awm bawk nen, ka pa remti lo chhungin an chanpual tur ka pe thlap a, tin, ka pa pawhin a politics hna a bansan bawk. Min ban chhanah kha Ama tih ngei a ni tih a sawi ni khan na ka ti a, mahse hun kal tawh avangin engmah buaina dang ka duhlo tiin ka ngawih pui ta a ni. Ka pa pawh nupui ṭha tak nei leh turin ka ti hial zawk a, tin, a nun duhamna ringawt a hmang lova, nun pangngai tak nei a, a pawisa neih sa nen hlim takin awm se tih hi ka duh thu ka sawi khan dik a ti ve in ka hria.

Kum khat a ral leh meuh chuan ka pa pawhin nupui a nei leh tawh a, ka lawmpui khawp mai. Amah anga upa ve tawh tak, nu fel leh zaidam tak a ni a, Amah a zo nu in ka pa nen an inah an khawsa a, kei erawh a ngai tê in keimahin ka la awm ta rak rak anih hi. Tin, Sorkar lam leh ka zirlai naupang te ngenna angin University-ah ka kal leh tawh a, ka hming ka lo chherna nen University danga lut tura sawmna ka dawng chu erawh ka hnawl, ka ram ngeia thawh hi ka duh ber a ni miau a. Ruatfela nen pawh kan la inkawmngeih tluang zel a, ka pa ruahmanna ni miah lovin kan inkar pawh ṭhian ang ngawt chu a ni ta reng biklo. Amah a fel a, tin, naupang zawk zawk alo ni tawh biklo nen, min ngaihsakin min duat thiam a, a bula awm a hahdam thlak viau bawk.

Ruatfela nen inzui mah ila, thinlungah erawh Ngurnunmawia a thi ngailo, engtik niah emaw chuan min rawn tlawh leh emaw a rawn kir leh mai te ka beisei ṭhin mahse chu erawh vana rah lak tum ang mai a ni si. Kum khat leh a chanve a ral leh meuh chuan Ruatfela nen pawh inneih kan tum ve ta reng mai. Pasal neih ka tum tak si avangin ka pa te in lamah ka awm phei ve a, man inhlan zanah erawh a ngai tê bawkin ka lung a leng leh hle tawh. Ngurnunmawia ni zawk se ka tihna chuan ka mittui hial a luan tir a, ṭap chungin ka muhil a ni mahna mumang nge a tak tih ka hriatthiam miah loh ka chungah a thleng a.

Mizo khua diktak kawtchhuahah hian ka lo ding vang a, an khua chu a nuam in an kawtchhuah lungdawh aṭang chuan ka thlir reng a, naupang khawlai tualchai te, Buh deng thawm leh an ran hram ri te pitar leh putar inkawm te chu an bul mai a awm angin ka hre pha vek a, tin, an che tla zawng zawng pawh hnai takin ka hmu pha vek bawk. Tu emaw hian ka darah min rawn khawih zeuh a, ka hawi chuan kha nula hmelṭha zet, Parmawii tia Ngurnunmawia sawi ngei kha a ni tih hai rual lovin ka hre thei. Ka enchiang deuh hnu chu chuan keimah nen in ang riau in ka hre bawk.

Ka sira ding ve in a nui sen sen a, “Kan hmel hi a in ang i ti ve em?” a rawn chuan lu ka bu nghat a, Ani erawh in kan hmaa khaw awm chu a en leh daih. “Hei hi anih hi Zopui khaw ropui chu, engtik niah emaw chuan in khawvel hian ala ngaihven tur khawp a khaw ropui la ni tur anih hi.” a tih chuan mak ti zetin ka hmaa khaw lian tak chu ka en ngawih ngawih a, ‘Hei ngei hi maw Ngurnunmawia khua chu ni a.’ ka ti zawi sap. Parmawii bawk chuan, “Ngurnunmawia nen in inkar kha ka hria asin, mahse Ani tan in khawvel rawn kal leh kha thil theih anih tawh miau loh avangin Nangmah hi ka rawn hruai che anih hi.” atih chuan mak ti zetin ka en a, “I thlarau chauh alawm ka hruai, i taksa erawh tui takin a muhil ang.” atih leh chuan a ngaihna hrelo zetin ka hmaa khua leh Parmawii chu ka melh tawn a ni mai e.

“Khuaah khian lut pawh ni la tumah in an hmu thei dawn lo che, mahse Ngurnunmawia erawh i hmu thei ang, a tawp nan.” atih chuan ka lawm luat vang nge a tawpna tur anih dawn vang pawh hriatloh in nui chungin ka mittui a tla a, ka bana a rawn chelh rualin ram ngaw dur khup a hmun hahdamthlak tak ni bawk si ah hian kan lo awm der tawh. Chulai hmuna awm hahdamthlak zia chu a hmuna awm tan lo chuan sawifiah dan ka thiam lo. Rilru hahna leh natna thleng hian a bo vek thei hialin ka ring. Chutia kan din reng lai chuan kan hmalam aṭang chuan Ngura leh a ṭhiante pahnih an rawn lang thut a, an ramvak dawn a ni tih hriat takin silai nen an rawn inzui a, an nui leh hawk ṭhin. Eng nge an sawi hrelo mah ila an hlim hle tih ka hre thei. Ngura chu a ding dawt a, kan lam chu a rawn melh ta reng a, mahse a lu thing ngutin a kal leh ta a.

“Ngurnunmawia hian a thu tiam ang ngeiin thang a chhuah hnuah nupui neih a tum ve a,” Parmawiin a tih chuan ka na nghal vawng vawng thei. Mahse ka nui lui a, ka rilru erawh ka sawi thiam miah lovin a na a ni. Kan pahnih hian khawvel kan din ve thei dawn lo tih ka chian leh zualna hian min ti na em a ni. Ngura te buk sual te, na ṭhian ho titi te chu ngaithla in an bulah chuan ngawirengin kan ṭhu a, keini in hmu vek mah ila Anni erawh in min hmu ve thei miau silova. Ka hmangaih hi kuah a, fawh vang vang ka chak, a nupui neihnaa lawmpuina hrilh te pawh ka chak mahse ka biak theih miau loh avangin a che vel chu hmuh hmaih neih hlau takin ka thlir a, hun tam ka neilo tih ka inhriatchianna hian ka theihnghilh tawh miah loh tura en ka duh.

“Kan chunga i thil tih te kha kan tan a hlu in engtikah mah kan theihnghilh tawh loh tur a ni a, i awmdan ka en hian ka natpui che.” Parmawii’n a tih chuan a lam hawiin ka mit a mittui tling pam avang chuan ka hmu phe ruai a, “Reilo te ka biak tir ang che, mahse a rei dawn lo ania, chumi tihsak tur che a tih nilo mah ila, inhmangaih tak te tana ka tih theih hnunhnung ber anih dawn avangin ka chungah engpawh thleng dawn se ka ti ang,” a tih rual chuan mak deuhin boruak chu a reh duk a, Ngura te awmna lam ka hawi rualin Ngura chuan mak ti hmel zetin min rawn melh a, a ṭhiante pahnih erawh tui takin leiah an muhil thung.

“Zorin,” a rawn tih sup rual chuan ka mittui a tla ringawt. Min rawn pan hnaiin min kuah thlawp a, a taksa deka a lungphu ri ka hriat leh meuh chuan insum thei lovin ka ṭap nghal hlap hlap a, ka sama duat taka min chulna te chuan ka ṭah a ti chhuak zual. Ka ṭah chhuak zualpui a reh hnu chuan, Amah en thei turin ka dak chhuak a, “Ka ngai lutuk che.” ka tih rual chuan min rawn fawp ta ngawih ngawih a.

Kan inhmu leh chu kan hlim tih bakin kan hlimna ka sawifiah thiamlo, a hun tawn te a thiltih te chu tawi fel takin min hrilh a, keipawhin ka chanchin ka hrilh ve bawk a, helai hmuna ka awmdan thlengin, a nupui neihna tura duhsakna ka hlan lai erawh chuan thikna in min tuam a, a hrethiam a ni ngei ang, “Nang leh kei chu khawvel khata awm kan ni silova,” a ti ve sup anih kha. Inthlahlel viau mah ila ka kir a hun leh tih Parmawii’n min rawn hrilh leh meuh chuan ka kutah chelhin, “Khawvel khatah awmdun theilo mah ila Pialralah tal intawng leh ang aw,” a tih chuan nui lui hram hram in ka lu ka bu nghauh a. “Ka hmangaih che,” ka tih rual chuan a ral riai riai a, engkim chu a bo ta vek a.

Ruatfela nen kan inneihna pawh kum hnih a tling leh ta reng mai, fanu duhawm tak kan nei tawh a, ka hna pawh ai kal lak min phalsak avangin ka chawl ta rih. Ka fanu nen bazara chhuah kan tum thu Ruatfela ka hrilh chuan Amah ngeiin min thlah tur thu a sawi a, ka pasal hi ka hrechiang tulh tulh a, ka tana a ṭhatna leh inpekna te ka rul seng hian ka ringlo, ka tana Pathian ruat diktak a ni. MC chhunga restaurant-ah kan nufa chuan kan ṭhu a, ka fanu ṭawng zir ve tawh chuan eng eng emaw a sawi chu ka nuihpui leh ṭhin. Dawr an lun avangin nufa chauha ṭhu kan ni bawk a, tiin chhungkaw pakhat hian kan dawhkan chu min rawn zawm ve a, chuta a pasal chu ka melh leh zeuh zeuh ṭhin.

Ngurnunmawia nen an in ang riau a ka hriat tlat vang pawh a ni mahna. Fapa Kum 4 emaw kum 5 bawr vel chu an rawn chawlh pui ve a, a nupui a ṭawng duh bawk a, kan inbe ve luam mai. Chutia kan titi laia an fapa hming ka zawh chuan mak ti zetin ka en tlawk tlawk ringawt. A pa zawk khan, An thlahtu hming chawiin Ngurnunmawia anih thu a sawi anih kha. Anih chuan hemi te hi Ngurnunmawia thlah te an lo ni reng a. Kan kalsan dawn chuan Ngurnunmawia chu ka en leh a, a hmaah ṭhingṭhi in, “In thlahtu Ngurnunmawia anga Pasalṭha, zaidam leh innghahna tlingin lo ṭhanglian ang che.” ka tih chuan mak ti hmel zetin An nupa chuan min en a, kei erawh ka fanu pawm in nui sangin chulai hmun chu ka chhuahsan ta a.

A Tawp Ta …

Leave a Reply