You are currently viewing RAUTHLA KIR LEHNA 4-6

RAUTHLA KIR LEHNA 4-6

Spread the love

RAUTHLA KIR LEHNA – 4

JONSMELY BAWITLUNG

Chhungkaw hlim thei tak niin, Zarkawtah kan khawsa a, ka nu leh pa fa neihchhun ka nih avangin duat pawh ka hlawh ṭhin, ka nu hi a hriselna a ṭhat tawk loh avangin fa dang a nei thei tawh lova, mahse ka hriatchinah erawh chhungkaw hlim ber kan ni ka ti hial ang, ka pa in kawng dang a zawh hma zawng kha chuan. Ka nu te hi Aizawl khawchhunga awm an nih loh avângin Aizawlah hi chuan ṭhian pawh a ngah tehchiam lo, chutih rualin ka pa te erawh mi hausa tak chhungkua niin, Unau pali an ni a, midang kâ aṭanga ka hriat danin ka nu leh pa te inneihnaah hian ka pa te chhungkaw lam an lawm vak lo anih hmel. Keipawh ka pa unau te nen kan inpawh viau lo a, vawiin ni thleng in ka ni neihchhun Lalropuii hi ka nu boral aṭangin ka la ko hauh lo. Ka nu a boral a, ka nu chhungte an haw hnua ka pa chhungte lam ṭawng duh dan tam tak te kha ka theihnghilh lo, ka tana hriat nuamlo tak tak an sawi fo a, Ka pi (Ka pa nu) leh Ka pate Lawmsanga tih loh chuan ka pa kha nupui nei leh vat turin an ti anih kha.

Ka pi leh pu te an boral tawh a, Ka ni te chhungkua Kolasib lamah awm in, ka pa chhang chiah Lalsiampuia te’n inpui an nghak a. Ka pate Lawmsanga erawh Delhi-ah a hna avangin a awm thung. Mite hriat leh hmuhah chuan chhungkaw hlim ber ang ni mah ila, In hranga ka khawsak avang hrim hrim pawh hian tam tak chuan min sawi ru ve fo chuan ka ring. Chutih rualin kan inchhunga ka nu sulhnu midangin ta neih taka an cheibawl vel leh inremna awm ngailohna hmuna lemchan reng ngai te, dawta inpuh leh inhek reng te hi ka ning tawh takzet a, kan in tia ka sawi ve ṭhin pawnlam ropui tak mahse a chhunga chêngte ropuina reng reng neilo leh thinlungin nghet taka a vawn theih loh chhungkua neih ai chuan awmhran a mal taka mahnia khawsak hi ka thlang a, ka thlang zawk fo bawk ang.

Zan lama ka ṭah nasat avangin ka thawh vel aṭangin ka lu a na bur a, ka mit la a bui luk lehnghal. Peih lo zetin ka khum thawsanin bathroom-ah ka intifai sawk sawk a, vawiin lam chu ka Project buaipui tura ka chhuah dawn avangin Ngura hruai tel ve rilrukin ka hun hman dan tur te ka ngaihtuah lawk neuh neuh a, mahse ka ṭhutkhawmna pindan lama ṭawng ri avangin chuan ka ngaihtuahna aṭangin ka harh chiang hle mai. Ka nuhrawn Hminghluti leh a fanu Roṭhuami te an lo ṭhu ran a, an hmaah Ngurnunmawia pawh alo ṭhu ve reng bawk. Choka lama thawm erawh Ruati a ni tih ka hrethiam mai.

Thawh fuh loh nen chumi te nufa hmel ka hmu chu ka lung a awilo kher mai. Ka inchhung hi an rah atan pawh ka duh hauh lo tih ka luah tira an lokal khan chiang takin ka sawi tawh. Vawikhatmah ka in rap tawh lo turin ka ti anih kha, mahse hei an rawn kal leh ta tho a. Buaina bak ka lak aṭang hian hemi te nufa hian duh an neilo.

“Ka inchhung hial rawn thlen ngai khawpa pawimawh chu eng nge?” Nelawm lo zeta ka tih chuan an pathum chuan an rawn hawi nghal ṭhap a, ka nuhrawn chuan min ngaihnep hmel zeta min melh in, “I pa bulah chuan fel ber anga lan tumin, ngaihzawng nei lo angin i awm der kual vel a mahse tuna ka thil hmuh hi eng nge ti ngai le?” tia a nuih sawng rual chuan, “I inchhunga mipa i chenpui hi ka pa hian rawn hmu ve se engtin tak ngai ang maw?” Roṭhuami chuan nui lui har harin a ti zawm ve nghal zat a, a chhun em em a nu pawh in ka pa hming a fanu in a lam rual chuan alo nuih pui ve bawk a, kei erawh Ngurnunmawia vang tal pawh a inbengdaih tumin ka in sehruh nasa hle thung.

“Nimin lamah i pa lung i ti awi silova, Vawiin lamah chuan ilo ti lungawi ve aniang chu,” ka nuhrawn bawk chuan ti leh in, envelope hi dawhkanah dahin a ding nghal zat a “Bawihi kal teh ang helai hmun rimchhe zeta kan awm reng zawngin kan rimchhe zo dah ange, Bawlhhlawh paih bo hun tur ka nghakhlel bawk nen i haw teh ang…” a tih zawm leh chuan ka insum theihna a pel takzet tawh.

“Ruatfela nen khan eng in zawmna mah kan neilo tih hrereng chunga khatianga ilo sawi kual vel avang khan eng hlawkna nge i neih?” Ka tih chuan, a nui zui hak a, “Sum, I hria em nang hi chu hralh tham lek i ni ve hrim hrim lawm.” ka hmaa rawn dinga ner nawnga a tih chuan, kut ka thlak mai loh nan ka kut ka hum ruh ngat ngat a, “I inchhir na ni alo thlen hunah chuan pawi ila ti ve khawp ang.” sehchilh nawk a ka tih chuan, “Immmm…. Mahse i tisual aw, kei hi ka inchhir ve ngailo tih i hria ni lawm ni, I pa thu ania i zawm lo ngam anih leh i thu lawm,” Nui lui huau huau in a chhuak zui nghal a.

Roṭhuami chhuak turin ṭawngkam a nei leh erawh Ngurnunmawia ka zah zo tawh lo “Nupui atana duhtu che i hmu zo ve te chu lawm a pan ruak ruak mai tur asin,Hmu zo lo ve sia(h)…” tia min kalpel rual chuan rang zeta a samah man in chhuatah chuan ka kek thlu nghal pawp a, Roṭhuami na ti chu a rak nghal chul bawk. A samah bawk man leh in ka phih tho nghal lawp a, ka chetdan chu a in ring hman biklo nen chhutah chuan ṭhingṭhi nghal hnawk in, a ṭap nghal pur a, A nu pawh in kan thawm hria in rang zetin inchhung lamah chuan a rawn tlan let a, a fanu chhuata ṭhingṭhi a ṭap pur a hmuh rual chuan thinrim zeta min rawn pan nghalin ka hmaia ben tum chuan a kut a phar hman zuai a mahse Ani hian engtikah mah kut min thlak tawh ngailo ang. A kut chu man sakin ka pawt hnai dawr a, hnai zeta melh rum al in, “Ka pa In a ka awm lai khan kut min thlak a ni thei, hei erawh ka In a ni tlat, hrereng ang che ka kawng dal zawng emaw ka pawisawi zawnga vawikhat chiah in nufa a in khawsa leh anih chuan kei aia sual hi in tawng tawh lovang.” ti vin ṭhat in ka nem kat nghal dawr a, ka chetdan chu mak a tih luat avang nge, ka nuhrawn chuan chetsawn nachang reng a hrelo. “Chhuak rawh u.” ka tih vin leh ṭhat rual chuan Hminghluti te nufa chu hlau hlawpin an tlanchhuak ta nghal dawr dawr a. Kei erawh khatiang em em a ka thin a rim vang nge ka kut a khur der der a, ka lungphu a rang takzet bawk.

Ka awm chu dawm vang vangin ka pindan lamah ka let lehnghal a, khumah chuan ṭhu thla hnawkin ka thaw nghal hlawp hlawp a, nichin lawk a thil thleng kha kum tam liam ta a ka tih chak em em mahse ka tih theih ngailoh a ni. Tunah chuan Anni nufa laka ka thinrimna zawng zawng ka lanchhuah tir thei kha ka lawm takzet, mahse ka lungphu erawh a rang takzet anih hi. Khatiang taka huaisenna kha khawi aṭanga ka neih nge? Ka huat em em ka pa hmaah pawh khatiang tak khan chet ka la ngam ngailo, a chhan pawh ka pa hi chu a ruk takin ka hlau miau a.

Roṭhuami nen buaina kan nei fo a, insual erawh kan insual ngai hauh lo, ka nuhrawn pawh chhangin hnial fo mah ila, khatiang takin alakah ka khawsa ngailo, a chhan pawh ka pa vang bawk a ni. Ka pa in a thiltih theihna hmanga chet a lak leh ka hlau tlat si a ni. Mahse tunah chuan khang boruak zawng zawng kha ka ning tawh takzet a ni e. Ka pa pawh in ka chungah engpawh ti dawn se ka hlauh ka tum tawh lo, a hma anga ngawih mai mai pawh ka tum tawh hek lo.

“Tui hi in rawh” Zawi deuh sapa tia no min pe tu chu ka en nghal vat a, nichin lawka a hmuh lai ngeia Khatiang thil ka thlentir mai kha ka zak ru viau bawk. Mahse ka dawhthei ta bik ngang silo a ni. “Tui hi in phawt la” ti nawn leh sap in a tui rawn ken chu ka kutah a hmeh bel chawt a, ka in zawh rual chuan no chu la let lehnghal in, “Filter tui, keimah ngeiin ka thlit anih kha.” tia a nuih vur vur chuan, a hma zana kan buaina kha hrechhuakin ka nui ve ta ringawt a.

“A pawi ka ti khatiang thil i hmu kha.” inthiamlo zeta ka tih chuan a lu a bu nghauh a, vawiin chu eng tih mah pawh ka peih love. “Ruati’n rawngbawl a peih tawh asin.” a tih chuan, phur lo zeta tho chhuakin choka lam kan pan dun ta a. Tukṭhuan kan ei lai te chuan ka ngaihtuahna a kal kual nasa in, engtin tak ka pa hnenah min hek kual leh ang maw! ka ti rilru neuh neuh a, ka hlau a nilo mahse hetiang reng reng a buai a, harsatna tawh reng hi ka ning ve tawh em a ni. Anni nufa in min tihbuai loh pawn ka hna vang ringawt pawh in hah pui leh buaina tur ka ngah vei nen, an rawn lang ve sek ṭhin hian min ti hah zual anih ber mai hi.

Chaw kan eikham a, tukin chu Ruati a awm avangin kan ei na tihfel pawh pui lovin ka pindanah ka lut lehnghal a, ka hnathawhna lama ka lehkhabu la chhuakin sitting room lam ka pan rual chuan dawhkana envelope lo let ngat chu melh in, nichin lawka ka nuhrawn dah kha a ni tih ka hria, engthil tak ni ang maw? ti rilrua ka hawn rual chuan ka thaw nghal hak a. Ka pa hian engvanga mi hausa ho intih hlimna hmuna kal tura mi ti ve ziah nge anih le? Ka kal ngailo tih a hre chungin sawmna min la rawn pek tir tho chu ania. Ka lehkha ken chu dawhkanah dah in ka hna chu ka en zui ta daih a.

“Ruati’n i tan thingpui a siam a” tia ka hma dawhkana thingpui no Ngura’n a dah rual chuan melh zawkin “Ruati tirhkahah i ṭang elo?” ka tih chuan a apron bah arh zet chu bih vutin, “I buai sia eng eng emaw ka lo zawt a.” a tih chuan ka mit ko ka san ak a, “Heng hi eng kawr nge a?” tiin a apron bawk chu a pawt pharh a, a thlek deuh vung vung a, a awmdan naupang chhia zet chu inhmu ve se a nuih a za viau in ka ring. “Kawr pawh a ni chiah lo, i thawmhnaw a balh loh nan a bah tir che nih kha. Kha i inhmeh khawp alawm..” ka tih chuan ner sukin, “Hmeichhe thawmhnaw a nilo em ni?” a tih leh rual chuan ka nui nghal hak hak a.

Ka ṭhutna sofa nghenga chhuata ke thluang duai a arawn ṭhut thlak chuan keipawh in ka lehkhabu te dah ṭha in, chhuatah chuan ka ṭhu thla ve a. A thingpui in chu tui a ti ve hle a ni tih hriat takin a hmui chu liak in a tep chap chap a. “Kar thar anih hunah harsatna dang a awm loh chuan ka lo intiam ang ngeiin zawn hna kan thawk dawn nia.” ka tih chuan a lu a bu nghauh nghauh a. “Helaia tirh ka nih chhan hre tho mah ila, helai hmun zirchian a hriatchian chakna hian ka khat a ni.” a ti sap a, a sawi zawih em avang chuan ka en reng a, thaw hluai in, “Mahse hna nei ka ni a, min puitu tur i inpeih chuan ka lawm viau ang.” a sawi zawh rual chuan a nui suk a, a hna erawh engtianga harsa nge anih ang tih a ngaihtuah thiam bikin ka ringlo, keipawh in ka ngaihtuah thiam hauh silova.

“Vawiin ka ruahmanna a fuh ta silova, khawi khawiah emaw kan chhuak dun dawn em ni ang?” ka tih chuan min melh zawkin, “Aw le” a ti nghut a. Ka Project avânga chawlh la ka ni a, mahse ka nuhrawn te nufa avangin ka mood a chhe zo ta vek si a, naktuk lamah emaw nidangah pawh ala tih theih zawk ang chu. Pindanah ka insiam mawlh mawlh a, ka hnaa min puitu tur ka duh takzet a, he ka hna ka ngaihven na bul ber, phurna min pe tu ni bawk, ka khum bula dawhkan chunga lehkhabu let ngat chu ka melh zeuh a. ‘LASI LEH HUAI TE’ tih lehkhabu chhah ve tak chu ka chhiar chhuah fo tawh a ni. He lehkhabu hian Mizoram chhung ngeia ka hna thlan, thawh chakna min pe anih kha. A ziaktu hming T.Lalruatkima tih chu en nawn leh in, a chhunga lehkhaphek a a address inziak chu la chhuakin ka bagah chuan ka khung a, ka hnaah hian puitu tur ka dap mai a ngai dawn a ni tih ka hria chuvanga he lehkhabu ziaktu hi hmuh tum ka ni.

Pawnlam ka chhuah chuan Ngura pawh inchei fai vangin a pindan lam aṭangin alo chhuak ve a. A thawmhnaw hak chu melh vung vungin a chapel bawk chu alo bun leh a, kei hian saw chapal chauh saw ka leisak a, a bun ve ta ngat ngat chu ania, pheikhawk an bun ve ngai silova hrehawm a ti viau angem le? tiin ka ngaihtuah zui vang vang a. “Eng nge i ngaihtuah leh tak?” ka hmai zawna rawn kun hniama a rawn tih chuan ka phu zawk a, “I chapal bun kha a hrehawm em?” ka’n ti thla ngawt a, ka kutzungpir in a kawhna lam chu melh zukin a ke chu an ti che vel a, “Hrehawm hran love, a ṭha ka ti khawp mai.” a tih chuan muangchang hian, “Imm” tichungin ka lu ka bu nghauh nghauh a. “Ka bun ang hi ka lei ve ang che aw.” ka tih rual chuan ka sneaker chu a rawn thlek nghal vung vung a, “A tuam bo vek thei maw, ka hrelo le.” tia rawn hawi chhuakin, “Kal ila.” tiin kawngkhar lam a pan nghal nalh a.

Helmet leh chahbi la in, Ruati bulah kan chhuah tur thu leh kan tlai deuh anih chuan haw mai tura hrilh in Ngura chhuahna lamah chuan ka chhuak ve ta vat a.
Parking a two wheeler in tlar dul kara ka scooty zawnah chuan Ngura chu alo ding ran a, hepa hian ka scooty a hre hrang nghal tihna em ni? A hrelo a, a ding palh anih ringin, Amah fiah nan kalpel luiin a bula ka Vespa ang bulah chuan ka kal a mahse mak ti zeta min en tu Ngura chu en letin, “A vai hian i ta vek a mi?” a ti ka hau a, “Aih pakhat chiah hi ka ta, nga ti nge? Lokal rawh heta hi ka Scooty chu.” ka tih chuan a lu dawm vung vungin, “Zorin hei hi lawm i ta.” tiin chik zetin min melh nghal ran a, mak ka ti tih bak sawi dan tur ka hrelo. Tuna min melh ang khi chuan dawt pawh sawi ila a hre dawn tih ka chian em avangin, ” Ahh.. ka scooty ka hai ni maw!” tiin dawt ka sawi ta ngawt a. Ngurnunmawia fin zia leh a hriatna ṭhat zia ka hmuk chuan mak ka tiin, mipa satliah anih loh zia ka hrechiang ta khawp mai. Nui var vârin a dinna bulah chuan kal ve nghalin, Parking aṭanga kan lakchhuah hnu chuan kan inphur chhuak ta nghal a.

“Ṭang ṭun lo la, kan tlu miah lovang.” ka hnunga chuangin min vawn ngheh em avang chuan ka ti lang lang a, ka tan khalh hrehawm khawpin min vuan miau alawm. “Aw le” ti zawi sap in min vawnna chu a thlah dul riai riai a, keipawh ka thaw nghal huai thei. T. Lalruatkima te gate pawnlamah chuan dingin Ngura nen chuan kan hmaa building sang ve tak chu kan thlir chho vung vung a. An address chu ka tidik a mahse an house number erawh ka hre hauh lo. “Khi building khawi emaw berah khian an khawsa a.” ka tih chuan Ngura chuan ka thusawi awmzia a hrelo tih a hmel landanah chuan ka hre thei.

“Ka hna, i hna ni bawk a ṭanpuina kan dil tur.” ka tih leh chuan a lu bu nghutin gate chhunglamah chuan a lut nghal a, rang takin a hnunglamah chuan ka zui ve nghal vat a. Chhawng lina kan thlen chuan ka hah lutuk avangin step-ah chuan ka ṭhu thla hnak a. Kawngkhâr tinah in neitu hming kan en a, mahse T.Lalruatkima tih hming reng reng kan hmu lo. Chhâwng ruk lai a ni a, chhawng tinah Block hnih zel a awm a, a chhung ber thlen a ngai kher dawn tihna em ni le? ka rilru in ka in zawt a, ka huphurh ru viau mai. Step kal hi ka theih loh zawng tak a ni ve hrim hrim a, chuvang ania ka in pawh step kal ngailo ka neih. “I hah awm hle mai.” nui huk huka Ngura’n a tih chuan, “Im hetiang hi ka ning.” tiin step ka kalsan tawhna lam chu ka kawk zeuh a. “Lokal rawh.” tiin ka vawn theih turin a kut min pe a, ka lo vuan ve nghal vat bawk. Min kaihthawh rual chuan, “I lirthei in a thlen theih loh chinah engtin nge i awm ang aw.” tia min nuih vur vur chuan ka nui ve tawp. A dik a ni, ka hna vangin inah ka awm tam a, ka chhuah ve chhunah lirthei ka keng ngei ngei ṭhin. Ṭan tlang lawn a zirchian tumtu hi ke hian ka kal hleithei lo chu ania.

Kan hnunga tlangval la naupang tak rawn chho chu kawng kianin min kalpel rual chuan chiang zet hian ka lo en a, harh thutin kan min kalpeltu chu ka ko ding a, “Ṭhianpa min lo hrethiam la, helai hmunah hian T.Lalruatkima kan lo zawng a, i hre mial em?” ka zawhna a vang chuan ngawi deuh vang vangin, “Hria e, ka pu ania.” muang bancharh hian min chhang a, kei erawh lawm avangin ka nui chhuak lo chauh. “Kan hmu thei angem, a lehkhabu chungchangah ania.” ka tih chuan kan pahnih chuan min melh tawn zak zakin, “Lokal ru” tiin a kal nghal a, keini pawh in kan zui ve nghal vat. Ka lawm ruk tehreng nen, chhâwng chung ber thlengin kan kal a, In neitu te an nih ngei pawh ka ring. Inhnuai angin Block hran ni ve tawh lovin In lian tak pakhat a ni a, a chhûng kan lut chu a pawnlam landan aiin a ropui hle bawk. Building lian tak a ni bawk a, an inchhung pawh a zau ṭha takzet.

Tlangval min hruaitu chuan nula, an awmpui ni ngei tur hi bia in, “Lokal rawh u” tiin pindan lam min panpui a, pindan chhungah chuan ka rin lo leh beiseilo zetin Putar kum70-80 bawr wheelchair a ṭhu ka hmuh chuan, mak ka ti angreng viau mai. Ka rindan chuan Kum40-50 inkar hmuh tum rilru ka ni a, tin, ka hna pawh min puih theih ka beisei a, tuna ka hmuh erawh a hmel en pawh in a chak tawh lo a ni tih ka hrethiam a, min pui thei kher pawh in ka ringlo. Tarmit lian ṭha ve tak vuah in a lu ṭuak var vo te,a thawmhnaw smart tak te chuan engti zawng emaw takin a ti lang zahawm hle a, mahse kan hna a min ṭanpui theih erawh ka ring lo. Kan hmel a hmuh rual chuan min en vung vungin, a tupa hnenah chuan tu nge kan nih a zawt nghal vat a. “Kei hi Proffessor Zorinpuii ka ni a, ka ṭhianpa hi Ngurnunmawia a ni e.” tia ka lo chhan chuan a tarmit chu siam ṭha in, ṭhutna lam chu kawkin, “Ṭhu rawh u khai, eng nge min hmuh duhna chhan chu han sawi teh u.” tiin ṭhutna lampan chuan a wheelchair chu a nawr kal a. A tupa hnenah chuan kan tan in tur keng turin a ti bawk a. A ṭawng a muang ve tawh viau a, mahse a mitmeng fiah zetah chuan pa fing tak a ni tih a hriat theih. Kan ṭhutfel rual chuan, “Nula eng nge in duh le?” a ti lehnghal a, sawi ṭan dan tur ka hre mai lo lehnghal.

“I mitmengah chuan i tum loh deuh hmu i ang hle mai?” a tih leh chuan ka mit kan nghal akin “Engtin nge?” ti hliai in ka nui ta ringawt a. “Ka kum alo upa tawh anih pawh in mihring mitmeng chhiar dan chu ka la hre ve alawm, mahse kha i ṭhianpa erawh a ngaihtuahna a buai viau anih kha, Vala eng chuanin nge i ngaihtuahna chu tibuai em em a?” Ngura en a atih chuan, Ngura chuan, “Ka pu ka khua leh tui harsatna tawk te leh ka chhungkaw chhanhimna tur ngaihtuah in ka buai a ni.” a chhanna felfai tak avâng chuan Ngurnunmawia chu ka melh zawk a, kei erawh chuan a hmel landanah engmah ka chhiar theilo, mahse a vawikhat hmuhna atanga mi rilru chhiar thei khawp chu Pu Ruatkima melh leh in mi fing tak anih

Pu Ruatkima chuan eng khua nge anih a zawh ka rin tehlul nen a zawt hauh lo. “Im, a pawi ka ti Lal fapa.” Pawi tih hmel zeta a tih zawm leh chuan ka ding kang nghal at a, Ngura erawh a chesawn hauh lo. Engtin nge Ngura hi Lal fapa a ni tih a hriat? “Bawihi ṭhu teh khai, mak ti lutuk duh suh. In lokal tur hi ka mang lamah ka hmu lawk vek alawm.” atih chuan Ngura chu melh in a lu a bu nghat a. Keipawh ka ṭhu thla ve leh riai riai a.

“Min lo hrethiam la i thusawi kha mak ka ti em a ni, tunah hian i lehkhabu Lasi leh Huai te tih avanga min pui theih beiseia rawn kal kan nia.” ka tih chuan a lu a bu nghut nghut a, chutih lai chuan pindan kawngkhar chu rawn in hawngin a tupa chuan theitui tray-in a rawn chawi a, kan hmaa a dah rual chuan, “Pu thildang mamawh i nei em?” a ti zawm nghal zat a. A pu a ngaihsak zia ka hmuh chuan mak ka ti viau bawk, tlangval tuaitir te a ni a, mahse hmeichhia tam tak pawhin an tih peih ṭhat loh a pu chu a endan aṭang ngawt pawh in a duat tih ka hre thei. “Ngai love Bawiha, inleng ka nei si a, i nu leh pa te pawh hrilh la, min lo tibuai rih suh u aw.” a tih chuan “Aw le” tiin a chhuak zui ta nghal a.

“Kha lehkhabu khan thawnthu sei tak a nei reng asin.” A tupa a chhuah rual chuan a ti zawm zat a. Kei erawh in hriat hmaih neih hlau takin ka ngaithla kar a. “Lusei Lal ropui tak Lal Kaihranga Khaw nga lai awptu, Lal zaidam leh fing tak tia sawi khaw ṭhenawm ram nena inremna thlag ṭhin lal chuan Pasalṭha Sailianhranga, Pasalṭha huaisen tak a nei a, a huaisen leh sa a lak theih em avanga Lasi zawl tia sawi a ni. Ani chu kan thlahtu kal zel a ni bawk.” tiin Ngura chu a melh leh vung vung a. Sawi zawm lehin, ” Ani khan Lasi ṭhian chu alo nei ngei nge ni, kei a thlah kal zel chhuan sarihna hian ka mang lamah ka hmu ta fo reng a, mahse he thu hi khawiah mah ka sawichhuak ngailo. Hetia ka hriselna te a lo ṭhat loh tak hnu leh ka nupui in min boralsan hnu thleng hian ka Lasi ṭhian, mangram chauha ka tawn ṭhin chuan mi la rawn kan fo chu anih hi.” atih leh chuan a sawi leh tur chu hriat ka chak zek zek a ni tawh ber mai. A theitui in chhung te chu rei ka lo ti hman viau a.

Ka bula ṭhu ka melh zawk chuan, a ṭhut ngaiin alo la ṭhu reng a, mipa inthunun thei leh in vawng tak a ni tih a hriat hle a, kan hmaa ṭhu chu a theihna zawng zawngin a zahna a lantir tih a hriat hle bawk. Pu Ruatkima ṭawng karah vawikhatmah zawhna a siam lova, a thusawi erawh dawhthei leh uluk takin a ngaithla bawk a. Tunlaiah chuan mifing tak tak leh zirna kawnga mi thiam tam tak kan nei tawh a, miin thu a sawi in hre zawk leh thiam zawk nih inchuh in inhnialna a chhuak fo bawk. Upa zâwk te’n thu an sawi changa ngaihthlak aia lo hnial leh an ṭawng ti tui lo tura zawhna siam thiam la kan kat nawk a, mahse chutiang nungchang chu Ngurnunmawia nunah a lang ve lo. Pu Ruatkima hi zawhna tam tak zawh duh a nei pawh in ka ring mahse engmah zawt lovin dawhthei takin a sawi zawh hun a nghak chu ania, hetiang taka aia upa zahthiam hi la ni vek ila chuan kan Mizo nundan hi a va han mawi leh zual dawn em!!

“Nizanah khan ka mang lamah rawn kal leh in Lal fapa in min rawn tlawh tur thu a sawi a, ka puina a mamawh tih min hrilh bawk, mahse engtin nge ka ṭanpui dawn che u tih a sawi miau loh avangin vawiin nileng hun ka lo hmang tawh a, tunah in rawn lang a, in sawi dan hmangin Ngura te khua in harsatna lian tak an tawk a ni awm a, in harsatna chu kimchang takin min han hrilh teh u, kei hian tih theih ka nei anih phawt chuan ka tlansan hauh lovang che u.” Pu Ruatkima’n a tih chuan Ngura nen chuan in melh tawnin a lu a buk nghut takah chuan ka aw ka thian kharh a, a lehkhabu ka chhiar aṭanga Project ka siam dan te, Lasi khawpui tia an sawi Ṭan tlanga eng emaw tak thil hmuh ka in beisei thu te, ka ngaihven anga ngaihven tu dang an awm thu te leh keimah maia chet lak a harsatna em avânga pan kan nih thu ka sawi a, tin, Ngura nena kan intawn dan te sawi kai leh in an khaw buaina erawh Ngura sawiah ka dah a. Ngura pawhin an khua in harsatna a tawh dan leh a Lasi ṭhian te’n buaina an tawh dan zawng zawng chu kim takin a sawi a, ka hnena a sawi loh a tam zawk anih miau avangin ka ngaithla uluk in ngaihnawm ka ti lehpek kher mai. Kan ṭawng zawh chuan boruak chu a reh tlawk tlawk a, Pu Ruatkima chu inngaituah muk tih hriat zetin banglaia milem intar lam chu a melh vung vung a.

Minute nga dawn a ngawih vang vang hnu chuan rawn rum chhuak hawk in, a wheelchair chu a nawr sawn a, Ngura a din rual chuan ka ding ve nghal vat bawk. A khum bul pawhdawh chu hai rak rakin lehkhabu tereuh leh silver ngun mawi danglam zet hi min pe a, “Bawihi he ngun hi bun tlat ang che, i tan ala ṭangkai dawn a, a venghim ang che. Tin, he lehkhabu hian i hna tam takin a pui ngei che ka beisei, Lal fapa” tiin Ngura chu a melh leh reng a.” He nula hi ṭanpui angaihna apiangah ṭanpui la, tichuan i tum ram i thleng thei ang.” a tih chuan Ngura chuan, “Aw le ka pu.” a ti nghal vat a.

Kan haw dawna Ngura thusawi chu mak ka ti leh hle tawh, “Ka Pu, Parmawii’n a rawn tlawh leh che anih ngai chuan ka tihsualah ngaihdam min dilsak ta la, engkim siamṭha turin a ṭhian hian ka theihtawp ka chhuah tih min han hrilh sak dawn nia.” a ti nih kha. Kha thu a sawi zet zawng Pu Ruatkima pawh in mak a ti ve hle anih kha.

Conti..

RAUTHLA KIR LEHNA-5

“In pahnih a in inhriatpawhna mak danglam lutuk kha ka hrethiam lo.” Ngura melh ralh a ka tih chuan a nui vur vur a, min chhang hlei lova. Pu Ruatkima in kan kal aṭangin ni hnih a liam leh tawh a, khatianga an in hriatpawhna mak lutuk kha ka hrethiam lova, ka ngaihtuah viau pawh in ka hrethiam chuanglo a ni e. Ngura la hian ka zawh apiangin ka ṭawngkam la in Magic a ti ziah lehnghâl. Kan haw khan mak ka ti em a magic ropui lutuk ka ti anih kha, magic kan sawifiah hnu fe ah Amah hian a uar uarah a ṭang a.

“Zorin, vawiin chu i hna lamah i kal a ngai si a, Sangtei dawrah ka lo awm dawn em ni ang. Ka la hmu leh miah lova.” a tih chuan, kan hna chungchang hi a sawi mai ka hlau ru a. Sangtei chu ka ṭhian kawm ve chhun a ni tih a hre tawh a, eng eng emaw a sawipui chuan ring ve mai in alo hrilh mai ka hlauh avangin hrilh hriat ngei ṭul ka ti a, Ruati eirawngbawl a awm miau avangin a banah kai in a pindan lamah ka luhpui ta vat a.

Ka thlah ruala a lam hawia ka ṭawng tur chu min melh reng avang chuan ka ang zuai tawh chu ka chip leh hmak a. A hmelṭha tak chu en rei duh lovin ka kun nghal daih bawk. A aw thian in, “Ah.. Eng nge ni ta?” a tih chuan kei ang tho in a awmdan a dik biklo tih ka hria. Ni nga ngawt kan chengdun tawh a, kan inpawh tawh viau na in, ka la zah viau tho. Tin, Amah la mipa zahawm tak alo ni nen, nelawm takin awm mahse a chetdan zahawm ru tak te, a hmelṭhatna te hian min ti lai leh ṭhin. “Thil hrilh duh che ka nei a.” ka ti zawi sap a. “Um ka ngaithla e.” ka thusawi tur ka ngaihtuah chiang a, engtin nge min ngaih ang? Mahse Sangtei’n a hriat ka duhloh miau avangin ka sawi ngei a ngai a ni.

“Sangtei bulah kan hna hi i zep thei angem?” ka tih chuan mithmul kan zeuhin, min melh ran a, “Ka hna ngaihven tu dang ka sawi kha, Sangtei pa hi ania, chuvang chuan ka hrilh theilo a ni.” ka ti zawm leh a. “Aw le, ka hrethiam e.” a tih chuan, eng emaw tal min zawh belh ka rin nen a ngawi leh daih a. “Thildang min zawt dawn lo em ni?” ti leh in, a ṭawng hun ka nghak a, “Zawh a ngai em ni? Keipawh in mi ka ṭanpui avângin ka tisual a, nangnen in anglo mahse i fimkhurna kha a ṭha, engmah ka sawi dawn lo a chuvang chuan tukṭhuan kan ei thei tawh angem?” tiin a nui suk a. Ka sana ka en chuan muanchanna hun a ni tawh lo tih hria in pawnlamah kan chhuak ta nghal vat a. Chaw kan eikham a, insiam sa ka nih avangin rei ṭhu lovin kan chhuak ta nghal a.

Motor ka khalh lai chuan ka bana Pu Ruatkima min pek ngun chu a rawn khawih a, Amah pawh en lemlo chuan, “Ngun mawi tak a ni, i ti ve em?” ka tih rual chuan a thawk hawk ri ka hre zawm a. A lam ka hawi zeuh ruala rilru buai hmel zet leh inngaituah muk tih hriat zeta a ṭhu ka hmuh chuan “I ṭha em?” ka ti ta ringawt a, mahse min chhang lo. Sangtei dawr kawta kan din rual chuan, “Ni ṭha tak hmang ang che.” tiin ka biak leh hun pawh nghak lovin a chhuk nghal vat a. Chhuk ve hman ka nih tawh loh avângin University lam ka pan nghal a.

Class ka lak loh apiangin Pu Ruatkima lehkhabu min hnutchhiah chu ka chhiar a, a thuziak a tawi in a famkim lo hle a, a lehkhabu a tet ang chiah in phek tinah thumal sawmhnih in ziahna a awm manglo. ‘Tui fim tak leh thianghlim tak a ni, engtikah mah a bawlhhlawh ngai lovang.’ eng tui tak sawi ang maw ti rilru in a lehlam chu ka keu leh a, ‘pangpar sen mawi tak a ni, ka tehkhin ka duhlai hmui sen vam hiam kha.’ chu thu ka chhiar chuan ka nui ri hak a, NuMapuii rawn lut chuan ka nui ri a hre hman a ni mahna min fiam hlut a. Ka lehkhabu pawh chhiar zawm lovin kan hna chungchang leh thildang eng eng emaw kan sawi dun a, hetianga titi na hun kan neih hian nileng a reilo ve phah ṭhin a, nuam pawh ka ti viau zel.

Last period ka neih loh avangin staff room ah bawk ka ṭhu leh tawh a, ka phone a rik rual chuan ka chhang nghal vat a, “Hello.” ka tih ruala, Sangtei hlauthawng aw ka hriat chuan thilṭhalo a thleng a nih ka ring ve nghal tawp. “I pa kohna che hnialin i kal lo em ni? Min rawn call a, a thinrim lutuk ania aw.” a tih chuan a hma ni hnih liam ta a, ka nuhrawn leh a fanu Roṭhuami te nen a kan buaina ka hrechhuak thut a, a thu ka hnial avanga party naa an ruala kal ve tura min kohna a ni, mahse ngai pawimawh duh lovin ka kallo anih kha. “Eng nge a sawi?” Kei min call lova ka ṭhiannu daih a call chu ka lawmlo ru viau a, mahse ṭul tawpah lo chuan min be mai mai dawn lo a ni tih ka hriatchian em na hian min ti na lo mai zawk a ni. “Tlaiah Amah hmu turin a ti che a, a bak chu lo thleng phawt teh.” a tih rual chuan call a dah nghal a.

Class ka neih tawh loh avangin hnadang pawh khawi tawh lovin ka haw nghal a. Sangtei dawr ka thlen rualin Ama office bikah Ngura nen chuan min pawt lut nghal rawk rawk a. “Engvangin nge pasal neih tir che an tum tih min hrilh loh?” kawngkhâr a khar fel ruala tiin, min melh rum al a. A thinrim mitmeng erawh min khawngaih vang emaw, ka hrilh loh vanga lungawilo mai a ni tih ka hrethiam, chhang lovin ka ngawi ran a.”Tu nge?” a ti leh hmuk. “Proffessor Lalruatfela.” ka tih rual chuan a au nghal ṭhat a, a thinrim nge duh tura min duh vang tih pawh hriatloh in a ang nghal char char a, a chang leh a inhrosa a, a chang leh Amah leh amah a inbia a, kei leh Ngura erawh in a awmdan chu kan en mawl tawp ringawt.

Hmeichhe harh ve tak a ni a, a tawng duh ang chiah in ṭawngkam a thiam a, ṭhian kawm a thiam in ama zarah hmelhriat ka ngah phah hle bawk. A dawr pawh a ṭawngkam thiam luatah dawrtu pawh a ngah in a lun viau a, chutiang chiah chuan a thinrima a awmdan hi a mak in a lawmawm ka ti ṭhin hle a, a ang vak a, a i hrosa kuala hetianga a awm chuan ngawi hmak ila a finthlak ber bawk. A duhtawka a an hnuah erawh a inbengdai tawh a ni mahna, “Engpawh nise nula sinior i ni tawh a, ni leh lo sinior tawh lutuk zawk, pasal i neilo anih chuan neih la ka tum silo, i pa rawtna hi pawm mai a ṭha in ka hria.” a tih chuan sawi tur hrelo in ka en tawp ringawt, Ngura awm laia chutiang a sawi mai chu nuam lo ka ti ru viau bawk a, Ngura lam ka en chuan kan thusawi chu hre awm pawh in a lang lo. Zinglam aṭang khan a awmdan hi a mak in, a ngaihtuahna hmun dangah a awm tih hriat takin a ngawi reng a. Hna neia helai hmuna rawn kal a ni a, a hna duh anga a thawk hmanhmawh theilo hian a rilru a luah a ni mahna. “Ngura hi ka be lawk thei angem?” ka tih chuan an pahnih chuan min en zawkin, Sangtei chu a chhuak nghal a. Kan chhungkaw harsatna hi engtianga sawifiah tur nge ka hrelo mahse tunah erawh ka sawi ngei a ṭul a ni.

“Ka pa hian pasal nei turin min duh a, chung zawng zawng ruahmanna siamtu chu ka nuhrawn a ni, mahse kei chuan ka duhthlan ngei pasala neih ka duh a, ka hmangaih ngei neih ka duh a ni.” ka tih chuan, “Um” tih chauh in min chhang a, “I hriat kha kei leh ka nuhrawn te inkar chu, khatianga ruahmanna siam tu leh mipa chenpui a, hmeichhia nikhua lo tak anga ka pa bula min sawitu chu anni nufa hi an ni tih ka chiang a, ka lakah sual viau mahse hetiang zawng khera chet an lak chhan erawh ka hrelo a ni. Rosum vang chuan vawitam hek ka ni a, Anni chuan ka pa ro an duh tih ka hria, ka pa, hmingṭhatna duh em em tu hian a fanu neihchhun hi a ro a khawm tir tel ngei dawn a, chupawh hmangaihna vang nilo in mite’n an hmuh a, an fak theih nana ti a ni ngei ang, mahse chung ro te chu anni chan lakah chuan engmah anih ka ringlo, an hmingin resort, hotel leh showroom changkang tak tak an nei a, tin, an chenna in lian tak an nei lehzel nen, keia chanai chu engti kawng maha an it ka ring silo.” ka ti zuai raih a.

Ka hna vanga ka hahna hi tun dinhmunah chuan a tawk viau asin, ka chhungte laka buaina hi ka peih rih lo, mahse ka pa in ka ṭhiannu meuh a biak chuan ka lakah a lungawilo tawp tihna ania, buaina leh harsatna chuan bul a inṭan chiah tihna a ni si a. A chang chuan ka hringnun hahthlak zet avang hian awrawl tawp a ṭah ka chak ṭhin, mahse ka ṭap anih chuan ka chaklo tihna a ni dawn si a, min hmangaih lo tu vanga ka mittui tih tlak la ka duh heklo. “Engtin nge ka ṭanpui theih ang che?” atih chuan sawi tur ka hrechuang hauh silo. Thaw la hakin, “Ka hrelo mahse ka pa duhdan hi tih puitlin loh ka duh ber. Pasal neih hi ka duh lo.” ka tih rual chuan ka mittui a tling nghal pam a, engvanga pasal neih duh loh nge ka nih tih hi tumah hian min zawt lo se ka ti a, tin, sawichhuah la ka duh heklo.

Ka pa ang pasal neih hi ka hlau a ni, mite min sawina tur pawh ngai pawimawh lovin, ngaihzawng la ka nri ngai heklo. Ka pa anga chhungkua aia mahni inhmangaih zawk a, pawmlama nuam tawl a, a uire na hliahkhuh nana ka nu leh kei a fanu ngei min hmanga, ka nu in a nunna hial a chan phahna chhan ang mipa hi tawn ka hlau em a ni. Heng thu zawng zawng sawi chhuah hi ka duh lova, sawichhuak pawh ni ila eng nge sawt chuang ang.

“Ka hrethiam e. Lungngai lo la, ṭap tawh suh aw, i ṭah khan phungpuinu i ang ania.” a sawi zawh rual chuan, “Maw?” tiin ka melh rum nghal a, Ani erawh a nui hawk hawk a, keipawh ka nui ve leh ta tho. Kan awmdan naupang chhia zet chu eng emaw kawng zawng tak chuan a nuam ru veng veng si a. “Ehem, in hman tawh em?” rawn ti tu lam chu hawi vatin Sangtei chu alo nui var var a, Keini pawh insiam ṭha vatin kan chhuak ve nghal a. Thil kan ei zawh hnu chuan Sangtei chuan kal ve a tum tlat avângin kan pathum chuan ka pa office lam pan chuan kan chhuak ta a. Huphurh tur ka nilo tia infuih ru mawlh mawlh in, nidangah pawh ka do fo a, a thu ka hnial ziah a mahse talchhuahna tur kawng ka hmu ziah alawm, ka nunna la duh tur khawpa sualah ngai mah ila, a fanu nunna em chu a la lovang tiin ka inhrilh nawn bawk a, mahse eng thil nge a tih ang? Kei min nawrhluih nan hian.

Office kawta motor ka hung fel rualin Sangtei a chhuk nghal nalh a, Ngura bula kalin a banah a kai nghal vat a, a awmdan avang chuan Ngura nen chuan mak ti zetin kan en a, Ani la chuan engmah thlenglo ang maiin, “Lut vat teh ang u.” a ti sam et lehnghal, Sangtei’n Ngura a vawnna chu melh leh zawkin, ngawi rengin Office lam pan chuan ka kal nghal hlawk hlawk a, eng nge a chhan ka hrelo, ka lungphu a rang in, hrehawm tih rukna ka nei a, mahse chu thil thleng chu ka pa hmuh ka huhphurh vang a nilo tih ka chiang. Ka hnunga kal te inkai ngawt alawm ka ngaihtuah, hawi let a en leh kher erawh ka tum hauh lo.

Office kan thleng a, ka pa secretary in lut tura min tih rualin room chhungah ka lut nghal a, mahse thil thleng rang lutuk avang chuan chetsawn nachang reng ka hrelo. Ka pa in ka hmel a hmuh rualin min rawn pan hnaiin ka hmaiah na zetin min beng anih chu. Ka lo inring lo bawk nen ka hnunglama rang taka min chelhtu avang chuan tlu lo mai chauh ka ni. Ka pa in rum zeta min melh a, a kut a lek chhuah leh rual chu ka bula ka tawlhhnung dawr, mahse ka pai’n vin zeta, “Tu phiangsen nge i nih?” a tih ṭhawt rual chuan an lam ka en nghal a. Ngura’n ka pa kuta nghet zeta chelh a, an indinchilh ran ka hmuh rual chuan Ngura banah chuan chelh nghal vatin, ka pa thinrim hmel pawh en duh lovin Ngura chu ka melh ran a. A thinrim a insum nasa takzet a ni tih a mitmeng dur khupah chuan ka hrethei, ka pa pawh in Ngura hmel chu a hmuthiam ve a ni mahna, a ban a thlah rualin ngawi hmakin a office ṭhutna lam a pan nghal a. Kei erawh ka pa kut min thlakna sa vung vung chu dawm in, ka bula thaw hawk hawk ri chu ka ngaithla kar a. Chetsawn duh viau mah ila, Ngurnunmawia thinrim insum zo lo hian chet a lak mai ka hlau a ni.

Ngawirenga minute nga dawn kan awm hnu chuan, “Pa Siam i duh angin Zorini ka rawn hruai a, mahse thu ṭha pawh sawi lova khatianga chet i lak mai le?” Sangtei’n a tih chuan ka melh nghal zawk. Ka pa in min koh vanga kal chu ka ni meuh mai, mahse Sangtei chu heta kal a duh tlat vanga hruai mai ka ni, mahse tuna a ṭawngkam hman kha eng nge awmzia, ka pa in min ko lova hruai turin min ti tihna a ni a. Nilo, Sangtei ṭawngkam ka la kawi mai mai a ni. ka ngaihtuahna ṭha lo ka tih em avang chuan ka hawisan vat a. Ka pa in ṭhutna lama ṭhu tura min tih chuan ṭhut loh mai ka tum zet a, mahse Sangtei bawk a ṭhut takah chuan Ngura nen chuan kan ṭhu ve a. Ka pa a rawm ṭhut thlak ve rual chuan Sangtei chuan be vatin engmah thlenglo ang maia awmin a titi pui chiam a, keini pahnih erawh kan ngawi reng thung.

“I ṭhiannu sawi ang khan pasal nei rual i ni tawh a, ka rokhawm tu tur tupa ka duh ka tih kha.” nui huau huau a ka pa in a tih chuan, “Aih” ka ti vin nghal ṭhat. Sangtei leh ka pa awmdan chu a danglam nghal vek a, Sangtei hmela hlauhthawnna leh ka pa hmela thinrimna rawn lang chhuak nghal chu ka hmuh hmaih lo. “Engvang chuan maw ka thu i hnial dawn a hepa phiangsen vang hian maw?” ti vin nghal tuar in, Ngura chu a melh nghal run a, “Nilo Pa Siam i hresual anih kha, Ani chu ka bialpa ania, Zorini nen inkungkaihna an neilo.” Sangtei’n a tih chuan sawi tur hrelo in ka melh ngawt ngawt ringawt. Ngura pawh in chutianga a ṭawng chu a ring biklo nge Anni pahnih hi an lo inngaizawng tak tak zawk, chhang lovin a en ve tawp a, mahse Ngura awmdan chuan ka chhungril a ti na veng veng thei hial a ni. A ti dawn lo tih hre mah ila tun dinhmunah chuan ka ngaihzawng angin awm se, ka pa hmaah hian kan inngaizawng tia sawiin, he buaina hi chinfel ka duh takzet. Mahse Sangtei zawkin ka duhthusam chu a sawi miau si a.

“Anih chuan ngaihzawng i neilo chungin min hnial i duh vang hrim hrimin I tana ṭha tura ka ruat chu hnarin ka mualphona i thlen dawn a.” tiin a nui hul hak a. “Ka mimal nuna i inrawlh loh tur thu i sawi a, mahni thusawi em a ding theilo pa i ni dawn em ni?” ka ti let ve sak a. Sawi mai tur a hrelo nge a ngawih deuh vang vang hnu chuan, “Tih luihna i laka hman kher hi ka duhlo ania.” a ti chang ta fak a. A thusawi avâng chuan ka thinrimna leh rilru natna hman aṭanga ka lo pai tawh sawichhuak lo tura ka up beh ṭang ṭang a puah chhuah mai lohna’n ka ding hluai a. “I theih a thu le, pasal ka nei dawn anih chuan ka duhzawng ka nei ve mai ang.” tiin kawngkhar lam ka pan nghal a, mahse ka chhuah hmaa ka pa thusawi avang chuan ka ding nghal chawt. “I nu anga mi mawl i nih ve kher hi chu ka ringlo asin.” a tih chuan, ka insum thei tawh biklo, a lam hawi leh in, “Ni e, ka nilo ka nu chuan hmangaihna avangin a nunna a chan a, a pasal uire ngaidama a fanu enkawl nana a nunna hlantu nih ve ka duhlo, I hria em ka pa, ka pa tia koh che pawh hi ka zak ngawih ngawih asin, nang ang mahni chauh inhmangaih a, nupui te hriat loha hmeichhe kawp kual ṭhin mipa hi ka tawn ka hlau em a, chuvang chuan i thu chu ka hnial ni rawh se.” a ṭawngka chhuak ang chiah a khâa ka thusawi chuan a ti thinrim nge a ti na pawh ka hrelo, kut hum ruhin a ding ngawi run a. Kawngkhâr hawngin ka chhuak nghal hmak bawk.

“I ṭha em?” Ngura’n ka hmel a hmuh rualin a ti nghal vat a, ka lu ka bu nghat ringawt, khatiang taka ka pa hmachhawn tura huaisenna kha khawi aṭanga ka neih nge ka hrelo, mahse tunah chuan ngawireng lovin ka ṭawngchhuak a, ka chhungrilah hian ka zang hawka hriatna ka nei bawk. Ka nu kha la dam sela chuan vawiin nia ka awmdan avâng hian engtin nge min tih ang le? Diklo taka kan chunga ti tu ka pa ngei lakah huaisen takin ka ding chu ania. Eng nga ti nge i ât tlat zel a?” Sangtei aw vin ni hauh silo pai dam harsa zet chu hriat a nuam lo kher mai. “Ka ṭhian i ni emaw ka tia.” ti leh hmakin ka kalsan nghal a, pawn ka thlen rualin car-ah ka lut nghal a, Ngurnunmawia’n ka kawngkhar beng dat dat a, kawngkhar hawn sak tura min tihna pawh ngaithla duh lovin, ka tlanchhuah san a, duh leh a bialnu khan buaipui ve ang hmiang.

Ka khawhar changa ka kal fo na ṭhin, restaurant kawtah chuan ka ding a, helai hmunah hian ka nu nen khan kan kal ṭhin a, khatih lai kha chuan restaurant tereuhte chauh a ni mahse tunah chuan kum tam a liam tawh a, a dawr a lian tawh in, veng dangah pawh dawr dang an nei nual tawh bawk a, helaia an dawr pawh a lian tawh in customer pawh an ngah thei viau a. ka car ka hun rem hnu chuan lutin ka tih fo dan in cabin an siamna lamah chuan ka ṭhu ta ran a. Ngaihtuahna hman ka tum a mahse ka hmang theilo ka rilru ruak lutuk chuan khawharna min siam a, mahse ngaih erawh ka nei hauh silo. Ka chau hle a ni tih ka hria mahse ka dinhmun hian chau taka awm a, hahdam min phalsak silova.

“Ka nu ka ngai hle mai che.” tia ka phunchhuah sap rual chuan ka mittui a far nghal fap a. Ka nu kha la dam ve sela chuan hetiang teh hrepa khawhar hian ka awm bik lo tur. Mahse mal taka awm turin min kalsan a, keimah chauha khawvel hmachhawn turin min kalsan bik si a, hringnun hi a fair lo ti mah ila, kan rel a ni hauh silo. Ka tleirawl lai chuan â takin ka pa ka do a, ka puitling a mahni ke ngeiin ka ding ve tawh ka tih rualin ka pa thil tihtheihzia ka hre tulh tulh a, ka dawizep zo ta animahna ngawi rengin a duhdan ka kalpui ta zel zawk chu anih hi. Waiter rawn kalin ka ril ṭam loh avângin in tur ka chah a, ka tih ngai hauh lovin zu ka lam a, tunah hian engmah ngaihtuah lova awm ka duh ber. Kan chhungkaw buaina, ka pa nena kan inkar leh ka hna te pawh theihnghilh vek theih ka duh.

Ka harh ruala ka lu na bur leh ka tui hal huam huam chu ka hriat hmasak ber a ni. Thawh mai ka tum chu ka puma min delhtu an awm avang chuan ka puan sin chu hlimin ka en a, mipa kut ka hmuh rual chuan ka rak chhuak nghal ṭhat a, ka bula mu pawh rang taka rawn tho in, “Eng nge ni ta?” fiah zeta a rawn tih rual chuan Ngurnunmawia a ni tih ka hre nghal. Khum aṭanga chhuk vatin light ka on nghal thuai a, Ngurnunmawia kawr ha lova ka bula mu ka hmuh chuan eng nge thleng ka ngaihtuah a, mahse engmah ka hrechhuak theilo. ka lu chu dawm vang vangin, “Eng thil nge thleng a?” ka tih chuan min en reng ringawt a.

“Engtin nge hetah ka awm?” ka in a ni tih hre mah ila ka hriat theih hnuhnung ber erawh kha restaurant a zu ka in kha a ni tlat. Engtin mah Ngura hian min zawn hmuh theih ka ringlo. “Ka rawn zawng hmu che alawm.” tiin khum aṭang chuan a rawn tho ve nghal a, kawngkhar hawnga ka pindan a chhuahsan rual chuan zui ve nghal vatin, thil thlen dan zawh ka duh mahse zawh dan tur pawh ka hre chuanglo. Tui chu dawh in min rawn pe vat a, ka dangro zet avangin chuan in zo nghal vekin no ka pek let rual chuan ka duh leh ka ti nghal zat a. Tui ka in zo a, banga sana intar ka en chuan dar 1 a pel deuh awr a, thawhna’n la hma mahse pindan pan mai ka tumlo.

“Min zawn hmuh dan ka hre duh?” A lakah ka lung a la awi miau loh avângin ka ṭawngkam pawh a zaidam tehchiam lo, Amah la hi ngawi reng hian a awm a, ka thinrimna pawh hrelo ang hmakin a awm thei a, ka ṭawng a chhan ve la a ngai reng a, dam thlup hian engtik lai mai pawh hian min chhang chu ania, engtin nge hetiang em em hian a in thunun theih bik ṭhin ni. A mitmenga min ngaihtuah a ni tih ka hmuh chang hian ka thla a muang ṭhin tih te hi a hre ve awm tawp silo. Ani zawng kan khawvelah hian mikhual mai a ni a, chuti chung chuan reilo te atana ka hriat vang hian ka lungphu hi a danglamin, ka rilru puthmang a inthlak fo si chu ania.

“In khawvêlah hian hmeichhia in zu in rui ṭhin em ni?” ka zawhna pawh chhang lova zawhna min zawt chu ka huat tawk a tling leh viau tawh. “Ka zawhna i chhang lo.” ka tih leh ngat rual chuan min chhang lovin a thaw hawk a, “Va mu leh rawh, khua ala var loh hi.” ti hmukin a pindan lampana a kal chu min hmu theilo tih hrereng mah ila ka melh nghek a, a sawt lo viau mai. Ṭhutna chu pawt chhuakin ka ṭhu a, ka pa nena kan tlailam boruak kha ngaihtuah chhuak in engtin nge ka lakah chet a lak ang tih ka ngaihtuah a, engtiang pawn ka chungah sual mahse kei hian a tawp thlengin ka do let ang. Mi zawng zawng hian min do dawn mahse chak taka ka awm a ngai tho si a, ka hneh thei em em ang. Ka nun zawng zawng tichhe vek tur khawpa khawngaihna neilo em zawng a ni bik kher nang.

“Luhlul em em nu.” ti hluk tu avang chuan ka dakchhuak nghal zawk a, kei hi ka lo muthlu a ni maw, ka din chhuah hluai rual chuan rang zet hian Ngurnunmawia chuan min rawn chawi kang lawp a. “Engthil nge i tih?” ka tih pawh ngai pawimawh lovin ka pindanah min luhpui in,ka khumah min nghat a, “Nang hi…” ti khur dar dar a, a awmlohna lama ka tawlh chuan ka banah manin min pawt let nghal vak a, ka ṭang nasa lutuk chu a hua ni ngei turin ka kut pahnih chu chelh betin, “Zorinpui” a ti vin nghal ṭhawt a, ka che lai pawh ka tawp chian ka che lai pawh ka tawp chiang hle, a mitmenga thinrimna leh natna chu chiang takin ka hmu a, keipawh ka thinrim nge ka hlau tih hriat lohvin ka khur ru der der tho. “Engtinmah ka ti lovang che, muhil la ka duh mai a ni.” Inbengdaih tum zeta a tiin, ka ban chu siam ṭha in ka khumah chuan min hnungchhawn zawngin a ding a. “Naktukah kan inbe dawn nia.” tiin a chhuak nghal daih a.
A chhuah hnu chuan a chetdan chu ngaihtuah letin â ka inti takzet, Ani chuan min pui a tum mai ania kei la in ka lo hlau a, a thinrim anih pawh in dem thei ka ni hauh lo ang.

Zing khua a var a, Ngurnunmawia hmel hmuh hreh zetin ka tho chhuak a, a laka ka rilru puthmang hi ka hrethiam lo, mahse ka bulhnaia a awm changa ka thlamuanna leh ka hlim ruk veng vengna erawh haider pawh tum ila ka haider thei hauh silova. “Vawiin chu inah hian ka lo awm ange.” ka hnunglam aṭanga Ngura’n a tih chuan ka hawi let zawk a, nimin ka awmdan vang kha a ni thei mai angem tia ka ngaihtuahna chu hria ni awm takin, “Nimin vang a nilo ania.” tiin ka bula tui no chu banin filter tui chu a dawh a, “Ka thiam tawh viau lo maw?” tia nui vur vurin tui chu a inkhawlh khawlh a, a hrawk bawk che ralh ralh chu melh in ka tui hal ve vang ni hauh lovin ka chil ka lem khalh a. “I in ve duh em ni?” a tih rual chuan ka hawisan nghal vat a. Engvanga zak thar ta viau nge maw ka nih le?

“Nizan ang khan awm tawh suh ang che, i rilru a na emaw, i thin a rim anih pawh in rui haw theilo a i awm chuan ka buaipui tawh miah lovang che.” Nui suka a tih chuan nidang nise ka haw ngei ang mahse keimah ang lo zetin naupang thuawi ang mai in ka lu ka bu nghat a. “Insiam tawh rawh, chuan i nuih khan i hmelṭha zawk daih ania.” ti leh in a pindan lam panin a kal nghal daih a, a thusawi avâng chuan ka khi var var nia. Hmelṭha tia infak chu a dawngtu tan a nuam dangdai ve em asin.

University ka thleng a, Ngura thusawi pakhat lek avângin ka nui var var reng chu ania. Mahse Staff room ka luh ruala ka thawhpui te hmel ka en chuan ka nui hmel a tawp nghal riai riai a. An hmelah buaina a thleng a ni tih hai rual a nilo. “NuMapui eng thil nge thleng a?” ka tih chuan, min melh kar in, “Bawihte a pawi ka ti, heng hekna zawng zawng te hi tu tih nge anih kan hrelo, mahse kan complain theh luh a ni a, chumia mawhphurhtu chu ban a ni dawn.” tiin lehkha kan dawn chu min pe nghal a. Mi pakhat mualphona mai nilo, Department leh University pum mualphona tur anih miau avangin keipawh chuthil chuan min nghawng ve hle a. Engvanga hetianga hekna hi lut mai nge anih tih ka ngaihtuah ngial pawh in ka hre bik hauh silo. Vice Chancellor te nena meeting koh nghal rum rum a ni a, kan department chauh nilo in Proffessor zawng zawng bakah Office staff thlenga koh kan ni a. Hnathawk ṭha lo leh eirukna lam hawi thlenga sawichhuah a ni chu, tu tan pawh a hmingchhiat thlakin, an puh ber chu an ban ngei dawn a ni tih chiang takin a lang a.

Meeting kan neihnaah pawh, kan University inrelbawlna lamah fello a awm a ni, Sorkar beng thleng khawp thil diklo thleng nise Campus chhung hian a hre ngei tur anih laiin engmah hriat a awmloh mai bakah kan Vice Chancellor meuh pawn tumah hlauthawng leh thlaphang lo tura min tiin, tu chungah pawh eng action pawh rawn la mahse theihtawp chhuah a, hnathawk zawng zawng te dikna hailan sak a tum thu a sawi ve hial a. Mahse hekna lut te chu tute pawh chuan mi pakhat emaw pahnih lek kutah a tlu a ni tih kan hrethiam vek a, mahse tu chungah nge tla dawn hriat anih miau loh avângin tumah hian thil thlen dan hi kan ngaihtuah thiam meuh lo chu a ni e.

Kan boruak fuh lo zet leh hahthlâk ru zet chu theih nise tlansan vang vang a chakawm hle a, mahse chutiang chu thil tih theih ngawt a ni bawk silo, Campus chhung chu buai nuai nuai angin langlo mahse kan chhungril erawh a buai nuai nuai ni berin a lang, tumah hian class pangngai pawh kan pe thei lova, zirlai lahin zawhna an ngah ve bawk si. Hekna hi a landan chuan zirlai thiltih niin a alang a, mahse hetianga hekna ziak duh tur an awmin kan hriat loh rualin Zirtirtu inthlahdah leh buaithlak tak tumah kan awm hauh silo lai hi a hahthlâk leh ngaihtuahna min ti hmang theilo tu anih ve ṭheuh pawh ka ring. Tupawh mai chuan Vice Chancellor Office lama koh nih kan hlau ru ṭheuh a, kei ngei pawh in ka hming an lam chu he University ka thawh chhunga ka hlauh ber ṭum a ni hial ang.

Kan boruak ṭha lo zet avang chuan lunch ei pawh a tui thei meuh lo, ka thawhpui ṭhenkhat te chuan an sawi zui neuh neuh a, kei erawh ngawi rengin pawnlamah ka chhuak a, Numapui’n min lo zui vatin kan pahnih chuan kan ding dun a, “A mak hle a ni, mimal inbeihna te pawh a ang rum rum mai.” tia a phun sap rual chuan ka pa ka hrechhuak zawk. A thu ka hnial vanga hetianga ka laka khawsa hi a ni thei mai angem? Chung thil vel ka ngaihtuah lai chuan peon lokal in Vice Chancellor Office lama kal tura min tih thu an rawn sawi chuan min ṭhawngin ka rilru takin hrehawm ka ti ru ngawih ngawih a. Thil thleng engkim ka ngaihtuah chiang a, ka pa thiltih anih loh reng ka ringlo. Hetiang taka na leh zak hian a fanu hi min siam duh anih chuan engvang kherin nge ka ngawih bik tehlul ang ni. Numapui’n ka dara a rawn khawih chuan ka lo insangmar ṭung a, “Engkim a ṭha leh vek ang, i thawhpui te leh i zirlai te hian an theihtawp an chhuah dawn alawm.” tiin lainat hmel zetin min melh a.

RAUTHLA KIR LEHNA-6

JONSMELY BAWITLUNG

Ka hna aṭanga suspend ka ni a, ruihtheihthil a fihlim lo anga ziah tel ka ni bawk. Ka pa ngeiin chu thil chu a finfiahna atan a hming a ziah hnan bawk. Tin, nizan lawka rui chunga Ngura’n restaurant aṭanga min pawm chhuak leh Sangtei nena min buaipui lai thlalak te neiin, Tin, ban hun hmaa haw ṭhin leh class ka lak ṭhatloh avanga zirlai te’n tuar anga min lantirin suspend ka nih chhunga min thlaktu tur pawh dah nghal anih thu thlengin ka hre vek a, ka pa in ka chunga a thiltih hi ka natpui lo ka ti anih chuan dawt ka sawi a ni ngei ang. Ni e, min hringtu ka pa ngeiin ka chungah hetiang thil hi a ti a ni a, ka nun chhiat vek pawh pawi tilo leh ka hnena a thutiam i mimal nun leh nundanah ka inrawlh ngai lo ang, atih te pawh chu engmah lo mai anih zia ka hrechiang a, tunah hian tih takzeta ṭah ka chak ber.

Campus ka chhuahsan dawn chuan ka car chu kawngsirah din tirin hnunglam chu ka hawi let a, kha chen rim tak leh hah taka ka lo thawh ve na ṭhin chu mualpho thei ang berin ka chhuahsan a, heng min puhna te lakah hian fihlim mah ila ka tan chuan kumkhaw hmingchhiatna a ni reng tawh dawn si a. Chu thil ka ngaihtuah chuan ka mittui a parawl nghal kiang a, ka ṭah chhuah mai ka hlauh avangin car chu ti nung vatin ka tlanchhuak ta nghal a. Ka in lam pan lovin thlanmual lam ka pan a, ka nu ka ngai a ni.

Thlanmual ka thlen rual chuan chhuk vatin ka nu thlanlung zawnah chuan ka ṭhingṭhi thla hnawk a, dan rual lohvin ka mittui rawn far in ka theihtawp a ring chuan ka ṭap a, “Ka nu khawngaih in min ṭanpui rawh.” A bak ka sawi theilo, ka ṭah nasat em avangin ka chau zo a, ka taksa hah lutuk avangin ka zawi riai riai a, theihnise ka taksa hi chhuahsan a thlarau khawvela ka nu bula kal ka chak takzet.

“Bawihte, huaisen takin awm ta che.” titu ka nu chu en in, ka mittui te chu a luang leh zung zung tawh a, “I harh angai ania.” atih leh chuan ṭawngkaa chhan tumin ka ang zuai a, mahse ka dang ro lutuk avang chuan engmah ka sawi theilo. “Zorin i harh angai ania.” rawn ti leh tu chu ka nu kha a ni tawh hauh lo, mipa aw daih a ni, “Zorin, i thi theilo ania.” atih leh rual chuan mengkawk in thim zinga ka taksa kuah a, min sawi dat dat avâng chuan ka tal nghek a, mahse min kuah nghet sauh in, “Hlau suh keimah, Ngura.” tiin ka hnung a chhul hauh hauh a, Ngurnunmawia aw ka hriatfiah rual chuan ka thla a muang leh huai tawh. Ka nu emaw min be tu ka tih kha Ngura hi a ni tih ka hrethiam nghal thuai a, kei hi engchena rei nge helaiah hian engmah hrelo a ka awm le?

“I ṭha deuh tawh em?” tia min kuahna a phelh rual chuan, “Im, engtin nge hetah ka awm tih i hriat?” ka ti let vat a, “Kan haw hunah kan sawi dawn nia, i ding thei angem?” a tih chuan lu bu nghatin dinchhuah ka tum a, mahse ka ke na ṭhum avang chuan ka ṭhu thla lehnghal hnawk a, Ngura chuan min pui nghal vatin, a ban rinchhan tak meuh meuh chuan ka kal a, car zawn kan thlen rual chuan dingin, “I khalh thei angem, nge naktuk lama lak i duh zawk?” a tih chuan ke a kal ka zuam loh zawk miau avangin a chhungah chuan kan lut a. Mahse tlanchhuah mai pawh harsa ka tih avangin ngawirengin kan ṭhu dun a. Minute sawm dawn kan ṭhut hnu chuan, ” Eng nge i an?” min ngaihtuah tih hriat zeta a tih chuan ka ṭah a chhuak ru leh takzet tawh. Khang kum chhung zawng khan ngaihsakna ṭawngkam hi ka dawng ngai lova, ka nihna ang ni miah lovin huaisen taka awm in chak taka awm ka tum ve ṭhin a, mahse tunah erawh ka chau ve takzet tawh a ni.

In kan thleng a, Ruati alo la awm bawk a, zanriah kan kil nghal a, mahse engmah ei chakna ka neilo, zan a la tlai em em loh avangin Ruati pawh a haw man tur pe in a haw ve nghal a. Ka pindan a ka luh chuan ngawi rengin Ngura’n min zui lut a, ka laka rilru diklo a put ngailoh avangin ka pindan chhunga a rawn lut pawh chu sawiselna ka nei hran lo. Khuma ka ṭhut thlak rualin ka hma chhuata a rawn ṭhut chuan keipawh chu ka insawn thla ve vat a. Hepa vang hian chhuata bang nghenga rem zeta ṭhut pawh nuam ka ti leh hle tawh, “Eng nge thleng?” a tih rual chuan harsa ti zetin ka hnaa chawlh tir ka nih thu sawiin, thil thlen dan chu hnukulh ṭeuh in ka sawi a, ka pa thiltih anih ngei ka rin thu lamin ka hrilhfai kel a. Uluk taka ngaithla in, ka mittui ka hruk zeuh chuan min en nghal vat a.

“Thlan lung kha.” a tih leh rual chuan, ka mittui bawk a far leh tawh. “Vawiin ni zet chu ka ṭahbelh hle mai” tiin ka nui lui hak a, mahse keimah pawh in hetiang taka ṭap nasa ve thei leh mittui ngah ka nih ka inhre ngai miau lova, ka ṭah nasat em avang ringawt pawh hian ka inkhawngaih zawk. “Ka nu thlan anih kha.” ka tih chuan “Min hrilh duh em?” a ti sap a. Ka nu nen kan chungchang ka sawi lai te chuan ka nui leh var var ṭhin a, ka pa ka huatna chhan te, kan chhungkaw khawsak dan leh ka pa chhûngte leh ka nu te lam thlengin ka sawi ta vek a, pasal ka neih duh loh chhan thlenga ka sawi te chuan a thaw leh hak ṭhin.

“A pawi ka ti, khawvelah hi chuan hetiang mi te hi Siamtu hian a siam ve vek si a tiraw? Mahse lungngai lo la, Engkim ala ṭha leh vek ang ka tiam a che, ka khawvel leh ka khua chauh nilo in, Nang leh i khawvel venghim tur hian Khuanu ruat lawk ka ni a ni mahna, i hnen khera tirh ka nihna chhan. Tunah chuan i mal tawh lo tih hria la, i kiangah awmin pui i ngaihna apiangah ka puih zel tawh ang che.” a tih chuan, a lam hawiin ka melh ran a, a thusawi chu a ti mai mai lo a ni tih ka hria. Thawnthua ka hriat fo ṭhin Pasalṭha meuhin thu min tiam a, a sawi tu hian a ti mai mai dawn lo tih ka hriatna nen a thusawi chu ka ringnghet nghal hmiah bawk.

“Engtin nge min rawn zawn hmuh theih?” ka tih rual chuan, khi sukin, “Nizan ang tho khan.” tiin a awm zawnah chuan a kut a dah a, mak ti zetin ka melh ha a, nui hawk hawk in, “Magic” a ti zui lehnghal a, keipawh chu thu a sawi rual chuan ka nui ve hak hak tho. Magic tih a sawi rual chuan ka kut ka en nghal vat a, kei hi ka ngun ka bun hauh lo… “Khawiah nge ka ngun?” ka tih chhuah thut chuan a ngaihna hrelo zetin min en reng ringawt a, dingchhuak nghal vatin Bathroom lamah chuan ka tlan lut a, ka ngun ka hmuh rual chuan ka nghal vatin ka thaw nghal hluai a. Ka tan he ngun hi tihbo thianglo a ni tlat. Ka hna aṭanga chawlh tir mah ni ila, ka Project erawh bansan tumna ka neilo. Ngura ka pui theihna tur awmchhun alo ni leh zel nen a tawp thlenga kal ka tum nghet hle a ni.

” I hmu em?” ka hnunglam aṭanga titu chu en in ka ban chu ka hmuh nghal vata, kan ṭhutna ngaiah bawk chuan ṭhu leh in, min rawn zawn hmuh mai dan chu ka zawt lehnghal a. Pindan aṭanga chhuak in a rawn let leh chuan a lunghlu hring mawi zet kha a rawn keng a, “He thil hian ka ngaihtuahna a hria a, mahse a hnathawh dan hi ka hrethiam chiah lo, mihringah chauh hian a thawk a ni mai thei, ka thil zawn ber ka ngaihtuah chang hian a awmna min hrilh thei hauh lova.” a tih chuan mak ti zetin a lunghlu ken chu la in ka enkual vel a. “Thiltihtheihna ropui tak a nei reng a, I sawi danin i ṭhian Lasi nula pek che anih chuan Lasi thiltihtheihna a keng tel aniang.” ka tih chuan a lu a bu nghat nghat a. “I ti dik mai thei, he lung hmang hian Vuli khan Zamana nen khan min rawn zawng chhuak miau alawm.” a ti ve nghal zat a.

Lunghlu danglam tak a ni tih hre mah ila, a thiltihtheihna ka hriat hnu chuan mak ka tiin a danglamna a belhchhah hle a, hetiang taka lian Lasi ten an keng ṭhin anih chuan malsawmna chu an lo ni ngei dawn anih hi ka ti rilru a. “He lunghlu mawi tak hmang hian min rawn zawng hmu tak tak em ni?” Ka ringhlel a nilo a, mak ka tih em zawk vanga zawt nawn ngat ka ni. Alam ka hawi chuan ” Um ni e, a hnathawh dan i hre duh em?” tiin ka kut aṭang chuan la in, ngun takin chu lunghlu chu a en a, ka lama a rawn en vet vet chuan mak ka tih em avangin ka nui chhuak hial a. Magic trick tih te hi a awm ngei a, intihhlimna pakhat a ni ve mai. Mahse magic kan tih ang tak tak hi chu ka ring ngailo, mahse tuna ka hmuh mel hi magic anih loh chuan eng nge ni chuang ang.

Kan chen mekna khawvel changkang tak leh technology lama hmasawn chak tak pawh in hetiang khawpa thiltihtheihna ropui hi chu an siam chhuak thei kher lovang. Rilru in a ngaihtuahna a sawichhuak a, smartphone changkang tak tak te leh computer changkang tak tak te pawh in mihring rilru hi chu a chhiar thei hauh dawn silova. Mahse kum tam tak liam ta, Lasi te leh huai te Lalna khawvel chuan heng thiltihtheihna te hi an lo kawl daih tawh chu a ni si a. Ka mit ngeia ka hmuhah chuan a aia ropui tehkhin tur reng ka hrelo. Ngurnunmawia hna ka thawhpui zawh hunah hian eng thil tak tawng ang i maw? Ka chak in ka phur tawh takzet. Ka hna aṭanga ban pawh ni mah ila Mizo mipui te’n kan nei tih pawh kan hriat reng reng loh, Khawvel pawh in mak a tih tur khawp kan hmuchhuak lovang tih tu nge sawi thei chuang ang?

“Ngura, ka phur tawh takzet.” ka tih hluai chuan a ngaihna hrelo in min en reng ringawt a. “I ngunhnam chu zawng vat vat ang. Engkim hian hun ruat a nei tih anih kha.” ti leh in keimah in ka nui var var a. Ka chetdan atthlak zet chu mak a ti viau anih pawh in pawilo, tun dinhmunah chuan ka phur em bawk a ni. “Engthilin nge ti phur thar em em che a?” a tih chuan chhang lovin ka ngaihtuahna chu ka nuihpui a.

“Min hrilh teh, Sangtei nen hian in inngaizawng em ni?” ka tih thut chuan, mak ti hmel zetin min en a, chhun lama thil thleng kha a hrechhuak a nimahna, “Pawi ka ti.” a ti nghal sap a, a thusawi avang chuan ka hlim rukna te chu lak bo nghal duak ang niin, ka nui hmel pawh a bo riai riai a. “I thik em ni?” Chu zawhna min zawt chu sual ka ti takzet, ka thik lo pawh ti ila ka awmdanah hian a hre ve tho awm si a. “Thik duh suh, ka ngaihzawng a nilo. Mahse chuti chunga khatianga i pa hmaa a sawi kher erawh pawi ka ti, Amah kha chuan kan pahnih tana ti anih thu a sawi miau si a.” atih leh chuan, mak ka ti hle a. Kan pahnih tan anih theihna tur kawng ka dap a, ka pa laka dawtsawi a pawi zia hre ve tu tho a ni a, dawtsawi mai a thlang tihna em ni? Nilo, a ni thei lovang, Ngurnunmawia chu a hum duh anih pawh in Ani chu kan hnenah a awm reng dawnlo a, kei erawh Ruatfela nei turin min duh tihna tho a ni.

A tir aṭang rengin Ngura a melh dan ka hai lo, mahse chung zawng zawng ai chuan engvangin nge ka thu hmulo leh ka duhdan ni hauh lova khatianga ka chunga chet a lak mai le, kan inṭhianṭhatna a phatsan a ni. Vawiin ka hna chungchanga harsatna ka tawhte hi hre ve se engtin tak ngai ang maw? “Eng nge ruahmanna i neih? Tunah chuan hna ka nei tawh lova heta ilo kal chhan ang ngeiin I hna kan thawk dun thei tawh ang.” Ka tih chuan Ngurnunmawia hmelah phurna alo lang a. Mipa dawhthei tak leh a duhdan chauh zawm bur mi anih loh zia a lang a. Ṭanpuitu tur ka nih hre rengin a hnaa ka pui theih hun a nghak tawp a, Amah ṭanpuinana hun ka nei thei dawn chu a lawm hle a ni tih a hmelah a lang chhuak hial a, ka lo pui vatlo te kha ka inthiamlo thar leh rum rum zawk. Chutihrualin helai alo thlen aṭangin karkhat chauh ala liam a, mahse thil tam tak a thleng hman a, ka ngaihvenpui ka tih rualin engmah tak tak kan la thawk lo nen tunah chuan tih takzetin engthil dang mah ngaihtuah lovin ka pui thei dawn tawh a, tin, keipawh ka Project chauh buaipui tura ka awm thei tur leh ka hna aṭanga suspend ka ni pawh chu pawi tihna ka neilo.

“Zorin kan hna hi a awlsam dawn hauh lova, he hna thawk tur hian min pui duh ta lo anih pawh in ka dem dawn reng reng lo che ania.” Ngura’n min melh rana a tih chuan ka lu thingin ka pui tur thu ka sawi chhuak nghal sap a. Ka Project chungchang te sawipui leh in, ka hnathawh leh a thil zawn inkaihhnawih dan ka sawi chuan mak a ti ve hle a ni tih a hmelah a hriat theih. “Intawng tur diktak kan intawng a ni tiraw?” tiin a nui var var a. A ngai te bawkin an khaw chanchin ka zawt leh a, a sawi lai chuan mutchhuak in min zem chiai chiai a, min pawm kang lawp tu avang chuan men ka tum a mahse ka meng hleitheilo chu a ni e.

Zing hma takah tho in ka intifai a, choka lama ka luh chuan Ruati pawh a lo che leh vat vat tawh a, ka hmel a hmuh rualin thingpui min pe vatin ka lehkha tur min pek chuan ka hawng nghal vata, chutih rual chuan pawnlam aṭangin Ngura alo lut ve chiah bawk. “Eng nge i tih a?” Ka lehkha dawn pawh en hmasa lovin ka lo be nghal vat a, ka bula rawn ṭhuin, a teikual mai mai thu a sawi chuan ka lehkha dawn chu ka ensan ve leh mai a. Ka lehkha chhunga thu inziak ka hmuh rual chuan mak ka tiin ka thin a rim takzet. Ka Project bansan tura min vo na a ni miau a. Ka hmel danglam chu Ngura chuan hmuin a chhan min zawt nghal a. Ka sawi zawng ringawt pawh in ka aw a khur thei hial. “Ruati he lehkha hi tu pek che nge?” ka tih chuan, letter box aṭanga a lak anih thu a sawi a. He vona min thawntu hi Sangtei pa Pu Remliana tih anih loh reng ka ringlo.

“Vawiin lamah kan mamawh te lam khawm ila, kan tum lam kan pan dawn nia.” Ngura pawh en lem lova tiin pindan lamah ka kalsan zui a, ka hna hmuh let leh beiseina ka neilo, mahse he thilah hian hlawhtlingna ka chang anih erawh chuan ka tan hna dang beisei leh chuang a ngai tawh in ka ringlo. Mahse ka hna ka thawh tir aṭangin buaina hlir ka tawng chu a ni sia. Tukṭhuan kan eikham a, kan mamawh lamkhawm turin kan chhuak dun ta a.

Puan in leh tlang lawnna a kan mamawh tur kan lamkhawm chu rin ai takin a tam tham a, motorah chuan dah zelin Sangtei tlawh atih tlat avângin Sangtei dawrah kan lut a. Sangtei’n kan hmel a hmuh rual chuan mak ti hmel zetin min en a, mahse insiam rem leh thuai in, a ze ngai tê in engmah thlenglo ang mai in min lo be nghal bawrh bawrh a, keipawh in ka pa bula a awmdan ka hriat duh vangin a awm angin lungawilo hmel ka hmuh duh bik hauhlo.

“I hna chungchang ka lo hria a, pawi ka ti. Khatiang thil ka hlauhthawnpui vang che ania i pa Office-ah pawh khatianga chet ka lak, i neih kher ngailo in ruahmanna dang a siam theih tho si a.” Min khawngaih hmel zeta atih chuan ka lo nui var var a, ka hmel landan chu mak a ti nge mak ti hmel zetin min melh reng ringawt. Thudik erawh tunah hian hlimna ka pai anih chuan Ngurnunmawia vang chauh hi a ni ang. Ka hlim vanga nui hmel nilo in, ka nat vanga nui hmel pawh a hrehrang lo ania. Hetiang taka min tawrhpui anih chuan vawikhat tal phone talin min be thei, mahse vawikhat tê mah a missed call takngial pawh ka hmulo anih kha. A lakah hian lungawilohna zawng ka ni lo, mahse keichuan ṭhianṭhaa ka pawm ka unaunu ang maia ka en ṭhin hi a landan aṭangin a chhungril tam tak ka hria in ka hmu thei ṭhin miau si a. Engvanga kan inṭhianṭhatna ti chhe ta mai nge anih la ka hre silo hian min tibuai ru viau bawk.

“Sangte, ka lo leng.” titu aw kan hriat rual chuan kawngkhar lam chu kan hawi nghal ṭhap a, Roṭhuami inchei nalh zeta a rawn luh ruala ka hmel a hmu chu a ring bik lo a ni tih hriat tak a ding chawtin Ngura nen chuan min melh tawn zak zak a. Sangtei chuan polite taka lo chhangin thawmhnaw thar a duhzawng tur a neih thu a lo sawi nghal luam a. Roṭhuami pawhin kan awm ve tih hre lo ang hmak a lang leh tawhin, Sangtei bula ṭhuin titi in a nui nghal har har a. A mitsira Ngura a melh leh zawk ṭhin erawh ka hmuh hmaih lo chiang kher mai. Henu zet hi zawng mipa a ban phak leh a hmuh phak a awm, a duhtawh chu chhuah a tum ngai hauh lo chu a nih hi. Ngaihzawng kawp mai a hreh loh tluk zetin, a duhzawngah zah a nei ngai lo. A bialpa te zawng zawng a hmangaih thei vek bawk a, inṭhen la na ber anga awmin Social Media-ah lamṭang siamin buaina neuh neuh hi a nei ve reng zel bawk si hi a hahthlâkna a ni.

A nu hian zilh ve nise hetiang taka khawsak ṭha lo hian a khawsa bik awm si lova. Mahse Model anihna te hi a nu hian a chhuan pui tlat si a, atan chuan a fanu chu mi famkim, Angel hawlhthlak ang mai a ni nen, mite’n an chungchang an sawina la engah an ngai der si lo. Kan inchhung an rawn luh hnu pawha mihausa ho titi a ni a, hmaichhanah fakderna ṭawngkam thlum tak an dawn te lah atak emaw an ti zel si, an hnunglam aṭanga reltu te vek an ni si te hi inhmuchhuak thei sela, an lakah ṭha ngai lo mah ila harsatna ka siam ngai lo chunga ka thil neih engkim an awt em em te hi an va han khawngaihthlak nufa tak em!

“Zorin” Ngura min kohna avâng chuan ka thil ngaihtuah chu ngaihtuah zawm duh lovin nui lui sângin Ngura lam chu ka hawi a, min duat hmel zeta ka sam ka benga a rawn zeh chuan mak ka ti hman lek lek, mahse Roṭhuami mitmeng danglam nghal vek ka hmuh rual chuan Ngura chetdan pawh chu hrethiam ve nghal vatin, hmundang melh duh lo luiin, ka nui var var reng a, ka beng bula rawn kun hniama “Haw tawh mai ila.” atih sup chuan lu ka bu nghat a, Sangtei te lam ka hawi chuan rin ang ngeiin an titi lai tawp meuh in min lo melh dun a, Ngurnunmawia a din ruala ka vawn theih tura a kut min pek chuan ban vatin, ka ding ve nghal a. “Kan haw phawt ange.” ka tih rual chuan Sangtei chu ding ve nghal vatin bah deuh nak hian, min chelh ve a mahse kan chhuak ta tho a. Inkai chungin ka car awmna thleng kalin car chhunga kan luh rual chuan za lutuk in kan nui dun a, dawr kawt aṭanga min lo hmutu Sangtei leh Roṭhuami hawisan nachang hrelo pawh ka hmuh hmaih lo.

Sangtei mita mak tihna kha ka hmulo a nilo, zawhna tam tak pawh a nei leh ngei ang, mahse Roṭhuami laka khatianga awm vel kha ka chakna a rei tawh em a ni. Ka hnaa harsatna ka tawh pawh an hre vek tawh in ka ring, mahse kei hian engtikah mah ka pa lakah hian tlawm tumna ka neilo. Ka nu nun a tihchhiat tawh bak kha ka nun lehzel tihchhiat tir hi ka phal dawn reng reng lo. “Lemchan i thiam hle mai.” Nui chunga Ngura lamhawia ka tih chuan Ani erawh a nui ve hauh lo. A landan tak run leh min melh rengna avang chuan hawisawn leh mai ka tum chu ka biangah dawm vatin kan in melh ran a. “Lemchanna a nilo,” a tih chuan a ngaihna ka hrelo takzet, khangthil kha lemchanna anih siloh chuan eng nge ni ta ang?

“Engthilah mah khan lem ka chang lo, Zorinpuii hi ka hmeichhe hmuh tawh a zawnga ṭha ka tih ber leh ka duh ber a ni. Mahse reilo te atana a mikhual mai chauh ka ni si a.” Min melh reng chunga a tih chuan sawi ve tur reng ka hrelo. Keipawh hian ka duh tih ka pawm thlap, mahse Ani nen chuan Khawvel khata chengdun kan ni miau silova. Kan khawvel a in an miau loh avang leh kir leh tur anih miau avangin engmah alakah hian ka sawi theilo, mahse kan thinlung erawh hmangaihna avangin a inzawm mek chu a ni si a. “Hringmi te khawvelah hian Nang leh kei hi intawng tura duan mahse awmdun tura ruat kan nilo a ni mahna le…” ti leh a, hreh hmel. zeta a hawisawn chuan ka chhungril khawi maw lai hi ka hriatthiam siloh in a na ru veng veng a, eng emaw tal sawi ve ka duh rualin ka lei chu phuar ang mai in, engmah ka sawi chhuak theilo. “Haw tawh ila.” atih chuan ngawi rengin in lam panin ka inkhalh haw ta a.

In kan thleng a, khua pawh a tlai tawh viau nilenga bazara kan teikual chuan min ti chau ve ruih thei nia. Ka intihfai tur thu sawiin ka pindan ka pana, ka inbualfai zo chu pawnlamah pawh chhuak lovin nichin lawka Ngurnunmawia thusawi kha ka ngaihtuah leta, ka na thar leh ni ber mai. Mipa duhzawng ka tawng ve a, mahse Ani erawh ka ta ni tura ruat a ni lo nghal ngawt a, ka hriat hauh lova ka lo ngainat hman zia leh kar tam pawh a liam hmaa chutiang taka ka lo ngainat avang chuan ka inhaw thar in, mahni ka indem mahse Ngurnunmawia ka ta a nilo tur chu ka ui a, mahni inkhawngaihna ka nei leh tho si a. Ka bianga mittui luang ngiai chu hru in, khumah chuan ka mu a. Ka hringnun hahthlak tak ka hmandan ka ngaihtuah a, ka thlakhlelh em em ka nu ka ngai thar a, min venghimtu tura ka ngaih ṭhin, mahse ka nun hremhmuna chantirtu ka haw thar a, Ngura lehzel pawh ka ta a ni ve thei dawn lova. He khawvelah hian mal taka nun hmang tura duan hi an awm ve hrim hrim animahna, mahse chung zinga ka telve erawh na ka ti ru vawng vawng si a.

Ka phone ri avang chuan ka harh zawk a, engtianga rei nge ka lo muthilh hman le? tia inngaituah chungin Ka phone chu ka ban vat a. Ka pate Lawmsanga call ka hmuh rual chuan ka chhang nghal vat a. Ka chanchin a hre ve tawh te pawh animahna. “Hello” ka tih ruala lehlam aṭanga, “Bawihi i ṭha em?” titu aw ka hriat rual chuan mittui tla lo turin ka inthunun hram hram a. Ka patea bulah chuan ka pangchang ve ṭhin reng a ni, a chhan pawh Ani chauh hi min ngaihsaktu a ni miau si a. “Ka ṭha lawm Pate.” ka tih rual chuan a thaw ri hawk chu ka hre zawm nghal a. “I hna chungchang news aṭangin ka lo hre ve chauh a, a pawi ka ti takzet, i pa in eng emaw tal a ti thei lawm ni?” tia beiseina nena a sawi chuan ka pa tih anih ka rin thu engkim sawi vek ka chak takzet.

“Ka pa te pawn an hre tawh ngei ang.” tia ka chhanna chu sawi zawm chak viau mah ila ngawih ka chuh ta zawk a. Ka patea hian min duat in min ngaihsak a, ka pa te nen pawh inrem taka awm turin min duh a, chutih rualin ka nuhrawn te khawsa zia a hriat thawi ve tho avangin ka in dang dawn pawh khan min hnial lo a min ṭantu a ni a, chutih rualin ka pa duh anga kan lemchanna hian tupawh mai hi a bum miau avangin kan inkar ṭhalo erawh tumah in an hrelo. Chhungkaw inhmuh khawm chang pawh in engmah sawi rik a ni ngailo. Ka nuhrawn te nufa la ṭawngkam an thiamin ka pa chhûngte an ti lawm thiam hle a, an awmlai na na na chuan kei takngial pawh in kan chhungkaw chhungril nun tilang duh lovin ngawih ka chuh ṭhin. Mahse heng ni alo thlen chang hian ka nu ka ngai zualin, ka thinrimna a tharin ka natna te hi a zual phah ziah ṭhin. Ani erawh tuma biak leh lawm a hlawh ngailo anih kha. Ka pa te nena dinhmun in anglo lutuk innei an nihna khan ka pa chhungte lung a tiawi ve hlollo animahna. Ka pi leh pute erawh chuan ka nu kha an ngaina ve tak takin ka hre ṭhin.

A unau te pahnih Ka ni Ka Siama leh Ka niropuii erawh in ka nu kha ṭawngkam ṭhaa an biak ka hre ngailo. Keipawh hian khatiang avang khan ka ngaina ngai heklo a, ka be tam ngailo. Roṭhuami te an rawn awm hnu hian ka ni nen an ngainat zawng alo in ang nen an inngaina phian a, kei erawh Chhungkaw inhmuhkhawm niah pawh ka patea fate nen bak kan inbe ngai meuh lo.

“Naktukah i pa be turin kal la ka duh a ni.” Ka patea ṭawng ri ka hriat rual chuan, Aih tih vak ka chak lutuk. Mahse ka chhang lo, ka ṭawng chhuah chuan ka thinrimna ka sawi chhuah mai ka hlauh vang leh bawk in. Mi fate hi an huaisen bik ka ti ṭhin, an duh an sawi in, an ngaihdan nilo an puakchhuah pui ngam ṭhin a, mahse kei erawh ka kum a tam tulh tulh a ka dawizep telh telh thung a, a chhan ber pawh lamṭang ka nei lo in, fing taka ka khawsa lo anih chuan ka thiamna ngei ngeiah pawh dem rawna khin rawn ka nih dawn miau avangin ka hlau ṭhin. Chutih rualin ka duhdan nilo chuan engmah tih ka tum chuang hauhlo. Ka ṭawng lo a, ka chhanglo anih pawh in tu thuhnuaiah mah awm erawh ka tum hauh lo thung.

“Bawihi ka thusawi i ngaithla tiraw?” ka chhanloh avâng chuan a rawn ti leh a. “Um, ka ngaithla e.” a bak chhanna ka nei miau lo alawm. “Keipawh in ka lo bia ang, i pa hnena thil dil i hreh tih ka hria, mahse keimah vang chauh in ti hram ang che. Ka ngaihtuah lutuk che avanga rawn bia che ka ni tih i hriatthiam ka ring.” A thusawi chu dawt a nilo tih ka hria, mahse ka pa hnena ka hna dil erawh ka duh chuanglo. “Pate, an chhui dawn a, engkim a ṭha leh vek mai ang, ka pa hnena kal kher a ngai hleinem.” ka tih chuan, “Aih Bawihi kal ngei ngei rawh. Hetiang buaina i tawk a, i chhungkaw bula khawsa i nilo nen ka ngaihtuah che, i pa ala dam a, i tan eng emaw tal a ti thei ang, ka lo bia ang. I pa chu a dik tih ka hria mahse a fanu neihchhun i nia lawm.” a thusawi tawp lamin min tih nat dan chu ka patea hian a hrethiam ve hauh lovang. Midangte hmuhah chuan mi dik leh rinawm, mi ṭha tak a ni a, mahse ka tan hi chuan ka nun ti harsa a ti hrehawmtu chauh a ni si a. In enkawl ṭha tura min chah lawm lawm in phone a dah ta nghal a. Keipawh peih lo zetin ka tho chhuak ve nghal a.

Choka ka thlen chuan Ngurnunmawia chu rilru hah hmel zetin a lo ṭhu kun lap a, ka hmel a hmuh rual chuan min ngaihtuah hmel zeta min rawn panin ka biang tawn tawnah vuanin ka ṭhat leh ṭhatloh thu min zawt nghal vat a. Chutianga a awm ka hmu chu sawi mai tur hre lovin ka lu ka bu nghat a. ” Vawi li ngawt kan rawn ko tawh che, pindan i kalh si a, i muhil anih ka ring mahse ka ngaihtuah che, Zanriah ei a hun daih tawh si a.” a tiin min vawnna chu a la thla a, mahse a mit erawh ka lak atangin a la sawn hauh lo thung. “Ka tihpalh, vawiin ka kal kual nasa ve deuh nen ka chau ve deuh hlek a, ka lo muhil alawm le.” ka tih chuan lu bu nghutin ka darah vuanin chair chu pawtchhuak in min ṭhut tir a. Nitin hian a chetdan danglam leh mak ka tih hi ka tawng fo chu anih hi.

“Ruati thil dahna min hrilh vek a, chaw ei ka’n siam ange.” atih chuan ka nui chhuak lo chauh. Hmanlai mizo mipa te nundan tam tak an sawi hi a diklo ta mai em ni? He mipa tapchhakzawl aṭanga bai liam thlir a, nupui te ko tura ka ngaih hian tunah ka tan chaw ei tur a siam mek chu ania. Ram lamah chuan mipa a ni ngei ang mahse inchhungah chuan engmah a tih bik hi ka ring silo. “Ngura.” ka tih chuan rawn hawi vatin ka thusawi tur ngaichang ni awm takin min en nghal a, “Mizo mipa in zanriah in siam ngai em ni?” Ni e, ka zawt lo theilo a ni. “Aih, Bai bel takngial pawh an khawih ngailo.” tiin zeilo zetin chawhmeh chu a suak zui nghal a.

“Mahse nang chuan i ti. Pasalṭha leh Lal fapa ngatin hmeichhe tan chaw ei tur i siam ania. Eng nge a chhan?” Dawhkan a rawn kil ve rualin ka ti nghal a, a chetdan mak ka tih em avânga zawt ka ni. “Ka lo thlen aṭang hian ka awm mai mai biklo a, helai aṭang hian thil tam tak hriat duh ka nei ve tho a, Sangtei a ni emaw Ruati pawh nise ka hriat duh apiang ka zawt mai ṭhin alawm. Chuan Ruati kha a chhungte’n an lo ko a, a haw dawn khan i damlo anih a rin thu leh i tana ei tur buatsaih sak tur che in min ngen alawm, engkim min zirtir hnuin a haw ta anih kha.” a tih chuan min ngaihtuah avangin ka lawm takzet a, lawmthu ka hrilh hial a. ka thusawi khat ber a ni hial ang… Lawmthu sawina tur hi ka nei tlem ve bawk em a ni…..

Conti…..

This Post Has One Comment

  1. Brendansmopy

    Полностью важные события мировых подиумов.
    Актуальные мероприятия всемирных подуимов.
    Модные дома, лейблы, haute couture.
    Свежее место для стильныех хайпбистов.
    https://malemoda.ru/

Leave a Reply