You are currently viewing RAUTHLA KIR LEHNA 7-9

RAUTHLA KIR LEHNA 7-9

Spread the love

RAUTHLA KIR LEHNA-7

JONSMELY BAWITLUNG

Ka pa hmu tura ka Patea’n min tih kha zawm loh ka tum zeta, mahse zawm lo thei lovin tukin lama min rawn biak leh avângin tunah hian ka pa office lam pan mek ka ni. Ngurnunmawia’n min zui duh viau mahse chawhnu lama kan hna thawk tura zinchhuah tum kan nih avângin In lama min lo nghak tura hrilhin keimahin ka kal a, nimin lamah Cellphone ka leisak a, tihdan tur kan in zirtir nasa leh viau bawk. A tan heng thil te hi thil thar vek a ni a, mak a ti in ropui a ti thei viau lehnghal a. Thiamna lamah tunlai mi te ang nilo mahse a fingin thluak ṭha lutuk tak a nei a, chu a thluak hmang vek chuan tunlai thil Tv, phone leh thil hrang hrang a zir nasa viau a, a khawih dan thiam kilkel lo mahse a hmanna erawh a hre hneh ve viau tawh a ni. Kan khawvela cheng ni ngat sela chuan engtiang taka sangah nge a awm ang tih ka ngaihtuah phah fo reng a.

Ka pa office ka thlen chuan a dan ngai tein a secretary in min lo dawngsawng vat a. Mahse Office chhung ka lut erawh boruak a dang nghal vek. Ka pa mita thinrimna chu hmuh hmaih pawh tum ila ka hmuh hmaih hauh lo. Min huat hmel takin min melh a, a chhan tur awm tam tak hre mah ila, ka patea’n ka chungchang thua a biak vang anih ka ring ber. A chungte laka kei min ngaihsaklo anga langah a inngai leh tawh a ni mahna. Mahse a hne aṭang hian ngaihsakna ka dawng ngailo a ni tih erawh thudik awm sa a ni miau a, chu thil erawh midang hriat a duh lo, keipawh in hria se ka ti bik chuang lo.

“Ṭhu rawh.” a bul ka thlen ruala a tih hmuk chuan a hmaa ṭhutna awmah chuan ka ṭhu thla ve nghal a. “Engthil pawh sawi in, engang chhuanlam pawh siam la, ka thuzawm hi i tih tur a ni tih i hria em?” a tih rum ul chuan chhan ka duh mahse hetah hian inhau tura kal ka nilo. “Ruatfela hi pasalah nei la, i hna leh i nun engkim kha ka pe let ang che.” a tih leh chuan ka nui ri hak a, mahse ka nuihzat vang erawh a ni hauh lo. Ka ringhelhna nem ngettu ka tawn avanga ka thinrimna ka lanchhuah tir a ni mah zawk. Ka awmdan chu mak a ti tih ka hria, ka thinrim em avanga ka melh let khai chuan a thin a ti rim thar leh a ni mahna rum nghutin, “Zorinpui, ka thusawi hi i zawm dawn nge, ka hmaa bawkkhup turin ka siam dawn che.” a tih leh chuan ka kut ka hum ruh ngat ngat a, ka pa en reng chung a, “Nilove ka pa, kei hi i fanu nangmah ang, nilo Nang aia luhlul leh Chapo ka ni tih i hria alawm, hetah hian pasal chungchang sawipui tur che a rawn kal ka nilo a, ka patea’n hmu tur che a min tih vâng chauh a lokal ka ni. I tih ang chiaha chhungkaw hmaa thiamchanna turin.” ka tih chuan ka rinloh deuhin chhanna min pe a, mak pawh ka ti viau bawk.

“A dik e, ka fanu i ni a ka mizia ang aia nasa mize danglam i nei tih hi theihnghilh ngailo tur ka ni asin. I hna kha keima ruahmanna a ni tih chu i rinthiam mai ka ring a, mahse i hna chan thei dinhmuna ding reng chung pawh in ka hnena lokal ai chuan chapo taka engmah neilo a awm pawh i la thlang ta fan a, tlawm duh ngailo fanu ka nei tih ka lo theinghilh leh ṭhin.” tiin a nui huah huah a, a nui hmel erawh a hlauhawm takzet thung. “Ka fanu ka thlah zalen rei mah mah che a ni, ka thu i hnial reng a, ka duhdana nun aiin i duhdan zel i dah lal a, hriatthiamna nen ka enkawl ve bawk che alawm, tunah chuan hriatthiamna a tel tawh lovang. Ka thu i zawm hma loh chu Nang hian thununna i dawng ngei ang.” chang faka a tih zawm leh chuan ka ṭhutna aṭangin ka ding nghal awt a. Engmah sawi lova pawnlam pana tlanchhuah ka tum chu kawngkhar zawnah an awm ve tih ka hriat hauh lo mipa pahnih an lo ding a, ka pa lam ka hawi ruala mipa pahnih a bula ding ka hmuh leh chuan hlauhthawnna in min tuam nghalin ka tha a khur ru nghal der der a.

“Engthil nge tih i tum?” ka tih vin ṭhat chuan ka pa bula ding mipa pahnih leh ka pa te chuan ka lam an rawn pan a, chetsawn nachang pawh hrelo in ka lo melh tlawk tlawk ringawt. “Ka fanu, Nang hian ka thu i zawm hma loh zawng ka hrem ang che. Kei hi i pa ka ni a, ka thu chauh hi i zawm tur a ni. Tin, hei hi hre rawh, ka thu ngaipawimawh lova kawhmawh i bawl reng chuan I tana hlu em em i in leh i neih zawng zawng ka tiral vek ang.” tiin a nui suk a. A nui hmel rapawm zet te chuan ka pa ka huat em em a ka do ngar ngar hmel kha a ang tawh lo. Tuna a landan hi chu Misual rualpawl zinga an hotu misual tak hmel a ni.

Ka ban tawn tawn a mipa pahnih in min rawn vawn rual chuan ka tal nghek a, mahse pakhat chauh tha pawh ka hneh dawnlo tih hriat takin min vuan nghet a, huatna nena ka pa melh khai in, “Engvang nge?” ka ti vin ṭhawt a, ka au chhuak a ni mah zawk. Engvanga Ruatfela nei tura min duh em em nge maw anih le?
“Sumdawnna, Nang nilo in Roṭhuami hi thlan ni zawk sela hetiang em em hian buaina ka ngah lo tur ania, Nang kher Lalruatfela’n a thlang che hi ka lawm vak ring suh, Ka chanpual tur, saw an sumdawnna aṭang sawn ka neih har phah dawn si a.” a tih chuan ka na nghal vawng vawng mai. Ka laka a awmdanah ka thin a rim a, ka haw hle ṭhin. Min ti na ve tawka ka hriat avangin a thu pawh ka zawm ngailo. Mahse hetiang em em hi chu ka chungah a tih duh ka ring lo. Sumdawnna hmanrua leka min hmang duh tur khawpa a tana ka pawimawh loh zia ka hriatna hian min ti na tawk tawh emaw ka tihna kha ala na tawklo animahna. Ka pa lakah hian beisei leh duh ka neilo emaw ka inti a, engah mah ka ngailo emaw ka tih laiin, ka laka a khawsak dan erawh in a hma zawng aiin min ti na si a.

Mipa lian zet zet pali te’n min chhuahpui dawn chuan ding datin ka pa chu chiang zetin ka melh a, Ani pawh in hawisawn hauh lovin min melh ve run tho. “Minister zahawm tak, ka nunna hi ila lo anih chuan I thihna turin ka rawn kir leh ang he hmunah ngei hian. Mite chuan an fate sualna vang leh thildang vangin an inzawmna an chhu chat ṭhin a, mahse kei chuan ka pa nena inzawmna neih hi ka duh tawh love.” ka nat em avanga ka aw lawi rata ka tih chuan, rum hawkin a lu a bu nghut a. “Ilo chhuah hunah chuan chutiang chuan i sawi tawh lo ngei ang.” tia min chhangin, a kut a vai rual chuan min chhuahpui ta nghal a.

Pawn kan thlen dawn chuan a hma zawng aia min chelh nghetin, ka au vaih chuan ka tana a pawi tur thu in min vo zui a, Scropio dum kan hmaa an rawn hung rual chuan, kawngpui lehlama Ngurnunmawia ding ka hmu zawm a, Amah ko a ring taka ka au rual chuan ka kâah puanin an rawn hup a engmah ka hre zui tawh lo.

(Ngurnunmawia pov)

Ahma ni lawka thil thleng avangin min kalpui suh ti mahsela Zorini chu ka ngaihtuah takzet a. Ka nghah rei tawh em avangin in aṭanga chhuakin a pa hnathawhna hmun lam panin ka chhuak a. Phone a tih chuan vawi tam biak ka tum a, mahse min chhangtu erawh Zorini anih miau loh avângin harsatna a tawk anih ringa kal ka ni bawk. A pa hnathawhna In sang zet ka hmuh ruala kawng lehlama Zorini rawn au ka hriat chuan hmanhmawh takin kawngpui chu ka kan a, mahse an lirthei dumah chuan phurin an tlanpui ta daih a, ka theih anga chakin umzui mah ila ka umpha meuh lo a ni e.

Beidawng duh lovin an kalna kawng chu ka zawh zel a, mahse an lirthei erawh umphak rual anih loh avangin an hnu ka hloh a, ka mangang takzet. Zorini hmel ka ngaihtuah a, a mangang hmel lutuk mawlh khan ka ngaihtuahna a luah ngut ngut a, Ka thlen tlai avangin pawi ka ti a, mahse inchhir a sawt silo. Min ṭanpuitu tur ka ngaihtuah a, Sangtei beisei ngawt dawn ila min pui duhin ka ring silo, mang a ang takzet a ni. Inlamah hmanhmawh zetin ka let leh a, ka chhuah dawn khan engthil pawh thleng thei tiin Ruati ina awm turin ka ti a, in ka thlen a alo la awm chu ka lawm viau mai. Tunah rih chuan Ruati chauh chu min pui theitu tur nia ka hriat vang a ni.

“UNgur, nga ti nge i va mangan hmel ve?” Inchhung ka luh rualin min be nghal vat a, thil thlen dan ka hrilh chuan Ani pawh a buai ve hle a, a chhungte hrilh a ti zeta mahse tu nge rin tura rinloh tur ka hriat tlat loh avangin ka remti lo a. Mahse keimah chauh chuan mikhual mai ka nihna hmunah hi chuan ka zawng hmu thei dawn hauh silo. Inngaihtuah muk taka ka ṭhut lai chuan he hmun ka thlen aṭanga min puitu aw ka hriat fo ṭhin chuan fiah tak hian “Lungmawi kha.” a rawn ti sap a. Ka pindan chhungah lut vatin ka lungmawi chu ka la chhuak a, ka mitchhing vang vangin ka men rual chuan chiang zetin Zorini a rawn lang a, mahse a awmna hmun chu ka hre theilo… Thawk la hakin, “Khawngaihin min pui rawh.” tiin ka phun sap a, chumi rual chuan Pu Ruatkimi, Parmawii ṭhian ngei mai ka hmuh rual chuan ka dingchhuak nghal zawk a. ka lungmawi chu ka kekawr ipte ah chuan khungin, pawnlamah chuan ka chhuak lehnghal a.

Pawnlama ka chhuak nghal chu Ruati chuan min rawn zui ve nghal vatin, “UNgur khawilamah nge kal i tum?” hlauthawng aw taka tih chuan, dingin Ruati chu ka melh zawk a, Zorini lirthei chu kawk in, “Saw saw i khalh thiam em?” ka tih chuan, “Scooty saw maw?” a ti nghal ha a. Lu ka buk zeuh rual chuan, “Im thiam e, mahse chahbi a ngai alawm, bakah Uzorini..” a tih chuan a ṭawng pawh ngaithla tawh lovin inchhunglamah ka lut lehnghal a, Zorini thil khaina chu kawkin, “Khawi hi nge?” ka tih rualin chahbi a tih chu la nghal vatin pawnlamah in chu a kalh leh a, hetianga in kalh a ngai fo hi mak ka ti a, mahse an khawvelah chuan suamhmang leh rukru tam tak an awm avangin a venna atana kalh nghet mai an ni tih kha Zorini ngeiin a sawi tawh.

Ruati chuan min phur in zan thim mah nise kan kalna tur chu ka sawi zel a, kan ding ruala chhuk vatin ka hawikual a, Pu Ruatkima te in chu ka hresual ta emaw ka ti hial zawk. Mahse kan hma lawka kawngkhar lian zet rawn in hawng riah chuan a hmaa Zorini nena kan kalna in sang ngei kha a ni tih hria in ka pan vata Ruati pawh in min rawn zui ve zel bawk. A chûng ber kan thlen chuan Kawngkhar chu ka kik nghal dawt dawt a, A hmaa min hruaitu rawlthar khan kawngka a rawn hawn rualin, “Pu Ruatkima hmu turin ka lokal.” ka ti nghal tawng a. Ani pawh in min luh tir ve nghal vat bawk. Pu Ruatkima chu ṭhutkhawmna pindanah lo ṭhu in ka hmel a hmuh rualin, “I lo kal dawn tih ka hria a, ka lo nghak che a ni e.” tiin ṭhutna tur min kawhhmuh a, ka bula ding hmeichhia a melh zeuh chuan, Zorini ina hnathawk anih thu hrilhin kan ṭhu ve nghal a.

Kan kal chhan min zawh chuan kan hna leh Zorini hrenbeh anih thleng chuan ka sawi ta vek a, ngawi renga ṭhu in a inngaihtuah muk hle tih ka hria. Helai hmuna kan kal hmasak khan mumang lamah Lasi nula a hmuh ṭhin thu a sawi anih kha, a chanchin a sawi aṭang leh ka chanchin alo hriat mai theih dan tur ka ngaihtuah khan, a Lasi nula hmuh a sawi kha Parmawii ngei a ni tih ka hrethiam. Kan inṭhianṭhatna vawng nung zel min tiamtu leh pialral ka kal hunah pawh ka chanchin midangte’n an hriat zel tawh tur thu min tiam anih kha. Pu Ruatkima’n min hria tih ka hriat rual khan Parmawii chauh lo chu ka chanchin sawi tu tur neiin ka inhre miau lo a ni.

“Ngura i hrethiam dawn lova, tin, inhrilhfiah nan la hun a awm heklo, mahse helai hmuna sualna tu dai tu chu Police te an ni a, ka fapa hi chung zinga hotu chu a ni, Ani ho hian Zorini chu in chhan theih ka beisei.” tiin a fapa Ruatsaka chu a ko nghal a, Ruatsaka’n a pa zah taka a biak chuan ka pa ka hre chhuak vawng vawng a. Ka pa in a khua leh tui vênhim tura ka laka rinna a nghah nasat zia te ka ngaihtuah a, ka pa khua neih let leh ngei turin ka infuih thar hial a.

Ruatsaka chuan min biak fal a duh avangin Ruati leh Pu Ruatkima chu kalsan in pindan pakhatah kan lut a, Zorini ka hmun hnuhnun bera thil thlen dan ka sawi chuan midang pun mai ṭha a tih laiin keiin kan pahnih a zawn hna thawh mai a, an tam dan a zira midang pun tura ka duh zawk thu ka sawi chuan a lu a bu ta nghut a. Zanriah kan la ei miau loh avangin Ruati ka ngaihtuah deuh nen Zorini inlamah kan let leh ta rih a. Zanriah kan eikham chuan insiam in Ruatsaka nen chuan kan chhuak dun ta a, ka kal tawpna thleng chu reilo teah kan thleng a, mahni ramchhung alo ni nen an kalna awm tur pawh a hre hle a, khawpawn lam zel kan pan a ni tih hrilh hran ka ngailo.

Zorininte chhungkaw chungchang a sawi chuan engang mi nge annih ngaihtuah thiamlo mah ila mi hausa leh thiltithei tak anni tih chu ka hrethiam ve mai a, in pakhat mal ding kan hmuh rual chuan a lirthei chu thim chinah dahin, ke in fimkhur takin kan chhuk dun ta a. “Ka rin ang chiah a ni, helai hi Zorini pa te In a ni a, vengtu a dah hnem danah Zorini chu an hruai ngei ang.” a tih chuan lu ka bu nghauh a. Ruahhmanna a siam a, kei inhnunglam aṭangin ka kal a nga, Ani in chumi chhung chuan in hmalamah alo tibuai ve thung dawn a ni. Midang a pun tur thu sawiin reilo te kan nghak dun a, inchhung aṭanga hmeichhia na tuar thawm alo chhuah rual chuan ka ding nghal phat a, mahse Ruatsaka’n nghak rih tura min tih chuan hreh zetin kan birukna hmunah chuan ka ṭhu thla leh a.

“Ka kal ange, ka hnungah nang leh i ṭhiante chu rawn kal mai rawh u.” tiin min chhan hma in inhnunglam pan chuan ka bi bo nghal a, thingkung tam takin a hual a hual vela, zan thim alo ni tawh nen min hmu mai bik lo. In hnaih tak athingkung phenah chuan dingin mi pahnih in vengtu chu ka en reng a, Anmahni hnaih zawng chuan tawlh hriau hriau in, an inrinhma pakhat chu man thutin ka hnek thlu nghal der a, pakhatin min hmuh rual chuan pet pawp in Ani pawh awlsam takin nikhaw hrelo in ka siam a, chet an la ve hman miah lo chu nep ka ti ru viau bawk. Hetiang mahni hmanrua pawh hmang thiamlo vêngtu a an dah chu mak ka ti angreng viau. In kailawn hnunglam rapin thawm dim taka ka pen luh rual chuan thawn ka hriat avangin ka biru lehnghal vat a. Mipa inbe thawm a ni, an ṭawng danah mipa pali ngawt an ni a. Hriamhrei keng zawk an nih miau avangin fimkhur a ngai viau.

Pawnlama thawm a rawn awm rual chuan vengtu awm te an chhuak nghal suau a, pawnlama an buai chhung chuh in pindan tin chu ka hawng kual a, mahse Zorini hmuh tur a awm hauh lo. Pindan tawp na ka hawn dawn chuan a inkalh tlat a, thawm neilo chuan engti mahin ka hawng thei dawn lo tih ka hria. ka theih tawp chhuah a ka beih hnu pawh in a harsa lam hret chu a ni. Ka bulhnai vel chu melh kual in Kawngkhar hawn theihna tur ka dap vela, pindan dangah te lut kualin ka enkual a, bangkila thir tawi te ka hmuh rual chuan la vatin inchhung ka enfiah leh hnu chuan kawngkhar inkalh zawnah chuan dingin ka kar ngat ngat a. kawngkhâr ka kar hawn ruala nikhaw hrelo tih hriat taka Zorini let reng ka hmuh chuan pawmkang nghal lawpin ka chhuahpui nghal a. Mahse ka hnunglam aṭanga ka lu a min chhutna avang chuan ka ṭhingṭhi hnawk a, ka lu aṭanga thisen rawn luang nghalin, ka lu a hai muai thei hial a.

Zorini dim zeta chhuata ka nghah thlak rual chuan ding leh nghal vatin min chhutu mai nilo mipa dang pahnih an rawn lang ve nghal a, pakhat chu in hrosa nasa in an hnaa ka tihbuai avanga min thah a duh thu a sawi chiam a. Pahnih in min rawn bawh rawn rual chuan rang taka chet la in, pakhat chu ka tlawh let nghal tawp a, mi pathumin min bawh rawn miau a, kut pawh ka tuar ve nual bawk. Kan insual rei hnuah erawh an chau viau tawh a, keipawh ka lu a thisen chhuak nasa tawh nen ka chau tawh takzet. Mi pahnih te tho chhuak tur an awm tawh loh laiin a ṭawngtam ber erawh rawn dingchhuak leh in, silai a chuh rual chuan ka bula lung lian ve tak chuan ka vawm nghal a, chumi rual chiah chuan silai puak ri ve nghalin, ka darah fuhin keipawh leiah ka tlu nghal tawp a, ka hmaa tlu pawh a hmaia lunga ka vawmna vanga thi hnuangin, che leh tur a awm tawh biklo.

Ka dar na ut ut chu haider pawh tum mah ila, haider a harsa lam hret chu a ni. Mahse Zorini ka buaipui a ngai tih hriain a lamah chuan harsa ti zetin ka tawlh a, ala harh miau loh avangin, ka malah a lu nghatin ka ko mawlh mawlh a. Ka mitthlaah Parmawii ka chhan hman loh avanga ka kut ngeia ka dawmhlum kha a rawn lang a, ka nuna a vawikhatna atan ka hlauthawng ve hial bawk, chupawh ka tan nilovin ka hmangaih Zorinpuii vangin. Hmeichhia vanga hlauthawnga ka awm hi ka ring ngailo, mahse Zorinpuii chan erawh ka hlau a ni.

“Zorin, harh teh khawngaihin.” a biangah beng thek thek a ka kohna chu hrelo tih hriat zetin, engin a chhun chin a hmai chu a lang dang var deuh pap a, a mittui a luang zai zai a, a harh mai ringin ka thiam ang angin ka buaipui a, mahse a taksa erawh a zawi ngiai si a. Midang lo thlen pawh ka nghak thei tawh lo, ka awmdan siam remin, ka tha zawng zawng sawm khawmin Zorinpuii chu ka pawm kang a, ka dar na ngut ngut leh ka lu hai muai muai vang chuan ka ke pen erawh a chak theilo. In hmalam ka thlenpui rual chuan Ruatsaka leh a naute chuan min rawn hmu vatin ka lam an rawn pan meuh chuan ka tlu awn ruai ruai a. Ka kut aṭanga Zorini an la sawn leh min ko tu aw chu a hla riai riai a, engmah ka hre zawm ta lo.

Ka harh ruala thil eng lutuk avang chuan ka mit chu ka chhing lehnghal vang vang a. Ka men leh chuan Ruatsaka leh a nupui ka bulah an lo awm reng a, he khawpui ka thlen tira ka awmna Zorini ngeiin Damdawiin tia a sawi hmunah bawk ka kir leh a ni tih ka hrethiam nghal mai. “I ṭha em? Doctor ka’n ko ange.” ti nghalin Ruatsaka nupui chu a chhuak nghal vat a. “Khawiah nge Zorini?” ka tih chuan Ruatsaka hmela hrehawm tihna ka hmuh chuan a hma ang bawkin hlauhthawnna chuan min fan a, zawhna ngai bawk zawt leh in Ruatsaka chu ka melh run a.

“Damdawi hmanga nikhaw hrelo a siam a ni a, mahse ala harhchhuak ve lova. Doctor chuan a hlauhthawn awm tawh love chu a ti a. Kan tlai ṭhleh a ni.” a tih chuan ka mutna aṭanga tho chhuakin, “A bulah min hruai rawh.” ka ti hmuk a. Kawngkhâr a rawn inhawn rualin mi pathum an rawn lut a, Ruatsaka nupui pawh a rawn telve a. Pakhat chuan min en zung zungin, “A mak hle mai i hliam pawh a hil chak khawp mai.” tiin lehkha a ziak a, Ruatsaka chu a pe a. Mi pahnih te an chhuah rual chuan khuma aṭang chuan ka chhuk ve nghal a. Ka tan harsa mahse Zorini hmuh ka duh miau si a, Ruatsaka chuan min melh vung vungin ka hriatthiam lohvin a phun hluk a, a nupui erawh a nui sak thung.

Pindan lehlama min luhpui chuan khumah Zorini chu patling pakhat hian alo awmpui a, Zorini pa nen pawh khan an in ang hle. Kan hmel a hmuh rual chuan ding vutin, “Nangmah hi maw ka fanu nunna chhan tu chu.” a tih chuan Ruatsaka chuan a chhang vat a, chanchin te a zawt luam nghal a. Kei erawh khuma engmah hrelo a mu chu ka melh tlawk tlawk a. Ka hmuh hmasak ber ang tho kha a hmel ala ṭha reng a, hmeichhe harh leh ṭawng tam zawk zawk nilo mahse a ngainat hle a. A hnathawh turah a phur thei in, eng zawhna pawh zawt ila min hrilhfiah peih hle ṭhin. Mahse a mitmenga malna leh khawharna erawh he hmun ka thlen aṭangin thup tum mahse nitina ka hmuh ṭhin a ni a, Anu thlana ka hmuh nia a mittui tla khan ka chhungril a fan a, a tana awm theih a, damchhung leh pialral thlenga a kianga awm ka duh a ni.

“Ngura thil thlen dan leh i ngaihdan min han hrilh teh?” Zorini Patea’n a tih chuan, a pa hmu tura a patea’n a tih thu a sawi lai ka mitthlaah alo lang a, a kal dawna a huphurh hmel mawlh kha. Mahse a ruala ka kal ve a phallo anih kha. “Engvanga Zorini kha a pa hmu tura tir lui nge i nih?” ka tih chuan a kun lap a, a kut a hum ruh ngawt ngawt thung. A ṭawng dawn tawh lo emaw tia kan en ṭhap lai chuan, “Hêng zawng zawng hi ka u tih anih takzet chuan keimah ngei hian ka tichhe vek a.” a rawn ti chang ta fak a. A fanu ang chiah a a en thu kha Zorini hian a sawi tawh, tunah hian Zorini thusawi kha a dik ngei a ni tih Lawmsanga hmelah hian chiang takin ka hre thei.

Zorini rawn chet hrut ka hmuh chuan a bulah kal vatin ka be nghal a, mahse a mit ala meng lo. Amah enkawltu ten an buaipui lai chuan a hmel hmu thei turin a bulah ka ding reng a, a mit rawn mengin a melh kual a, ka hmel a hmuh rual chuan a mittui a parawl kiang a, Lawmsanga’n a kut chelha ngaihdam a dil rual chuan Zorini chu a ṭap chhuak hawk a. Biak duh viau mah ila an pafa a inbiak an duh ringin midang ho chu kan chhuak ta dial a.

Ruatsaka ho a chuan ka mutna lamah kan lut a, kan hna tura kan ruahmanna min zawh chuan a pa vanga tel ve a duh thu a sawi a, mahse ka hliam hi chu a dam leh mai dawn tih ka hria, Zorini erawh a taksaa tûr hnathawh avangin chet kan lak mai theih ka ringlo. Ruatsaka te nupa an haw hnu chuan ka ngaihtuahna ka kawm a, kan hun liam taa thil thleng tam tak ka paltlang ang kha helai hmunah ngei hian ka paltlang leh a ngai dawn anih hi ka ti rilru a, Zorinpuii chan erawh ka duh hauh lovang.

He hmun ka thlen aṭanga min buaipui tu mai nilo, ka hmeichhe hmuh tawh a zawnga ṭha ber leh ka lungdumtu ka tawn awmchhun a ni hial ang. Chutiang khawpa ka duh mah nise, kan khawvel hrang daih avang hian eng thu mah ka sawi ngailo mahse man anih a, hrenbeh anih chiah khan ka tana a pawimawh zia ka hrechhuak a, kan khawvel hrang mahse Ani hi ka hmangaih a, Hringmi te khawvelah hian ka ta ni thei dawnlo mahse Pialralah erawh ka ta anih ngei ka beisei a, kan hun tlemte neih pawh hlah ka tum tawh lo.

Ka pindanah chuan hmeichhe pakhat lo lutin damdawi tia a sawi chu min pe a, Zorini’n min hmuh duh thu a sawi nghal a. Damdawi ka ei zawh chuan Zorini pindan lam chu ka pan ve nghal a, a patea pawh alo awm tawh lo. Ka hmel a hmuh rual chuan a nui var var a, damlo chung pawh in a hmelṭha em em chu a ni si a. A ṭhut avangin a khumah chuan ṭhu ve nghalin a kutah vuanin, ka kut lehlamin a biang ka dawm sak a, ka kut rawn vawnhnan vatin min melh vang vang a, “I ṭha em?” ka tih chuan lu bu nghauhin, “Ka nunna i chhan a ni.” a ti sap a. Ka ban ka dahthlak ruala ka dar rawn khawih vatin, “A na viau em? Ka chan tawh che emaw ka ti hman a.” a tih chuan ka mit ka kân zeuh a, a chhan pawh nikhaw hrelo in a awm a, tin, ka harh hnuah chiah a harh bawk.

“Thil thleng engkim kha ka hre vek alawm, chuan mak deuh in ka hmu vek. Mahse ka taksa kha ka che thei miau silo a ni. Hmeichhe hmelṭha tak pakhatin a pui che pawh kha ka hmu bawk, silaia an kah lai che khan ka chan dawn che emaw tiin ka helai hi a na vawng vawng asin.” tiin a awm zawn chu a khawih a, a mittui a tling leh pam tawh a, “A na lutuk a mahse ka ṭap chhuak thei silo leh ka ṭawng thei bawk silo kha ka hun tawn tawhah chuan a hrehawm ber hial ang.” a tih chuan thaw hawkin ka awmah ka kuah a, a hun tawn hrehawm zet avang hriatthiampui lo mah ila ka vanga a na erawh pawi ka tiin hrehawm ka ti takzet.

“Ka ṭha alawm, mipa ka nih hi silai mu pakhat vang mai mai in famkhua ka lawi hlei lawng e.” tia ka nuih chuan thinrim hmel zetin min melh rum al a, mahse a thinrim hmel pawh a duhawm tho si a.
“Tunlai khawvelah chuan thiamna a sang tawh a, silai mu pawh a ṭha tawh, i thi thei asin, hmeichhia kha awm lo sela i thi ang.” tiin a ang hlak hlak a, tu hmeichhia nge maw a sawi ve ziah le? “Tu hmeichhia nge i sawi le, khalai hmunah khan nang lo tu hmeichhia mah an awm lo.” ka tih chuan mak tih hmel zetin min melh ran a, eng emaw ngaihtuah hmel a pu a. Mak ti hmel zetin min rawn melh leh ṭhin a,. keipawh in a awmdan mak ka tih em avang chuan ngawi rengin a ṭawng hun ka nghak ta ringawt a.

“Ihh… Kha hmeichhia kha i rawn thleng hma khan ka bulah a awm tawh, ka thlarau chhuahsan lo turin min fuih a, ka tana i rawn thlen vat tur thu a sawi alawm. Ka mumang a nilo kha thil kha a tak tak alawm, hmeichhe hmelṭha tak a ni alawm.” A thusawi buai niai chu en in a thilsawi engkim chu ka ringhlel lo, Ka ṭhian Lasi te’n an rawn awmpui anih ka ringnghet hmiah a, mahse a hnênah hian sawi ila a awi kher angem ka hrelo, ngawi renga ka melh reng vang chuan a ṭawng lai chu chawl datin, “Mi mawlah min ngai in ka hria.” tiin a awmdan chu siamremin min hnungchhawn in a mu deuh hmak a. A hriatthiam loh hi hrilhfiah duh mah ila engtianga hrilhfiah tur nge ka hriatloh avangin ngawi rengin a bulah ka ṭhu ta ngawt a.

Ni tam a liam a, Zorini pawh a ṭha chak in keipawh ka ṭha chak viau a, vawi tam Sangtei leh a patea te chhungkua an rawn lang a, tin, Ruatsaka te nupa pawh an rawn lang awl lova, helai damdawiin hmun inrelbawl dan tam tak min hrilhfiah a, ka tana zawm erawh a harsa, ka ṭhiante’n tuna ka awmdan hi min hmu se mak an tiin an nuih a za ngei ang, mahse helaiah chuan eng hmunah pawh hian dan a awm a, chu erawh ka zawm ngei tur a ni.

“Ngura.” Zorini aw tham chala a rawn tih chuan ka ṭhutna aṭanga tho vatin a khum bulah chuan ka kal nghal a. Ka pindan lamah riak lovin ka awmpui a, mutna an rawn hung lut belh bawk chu chu Zorini’n a dil vanga ti an ni. “Ngura keimah vangin i hun tam tak kan khawh ral si a, pawi ka ti.” Tunah chuan a harh chiang tawh a, engkim fel fai takin a sawi tawh a.
Mahse a thusawi avang chuan a harh chianglo emaw ka ti hman ṭhelh. “Heta ṭang hian kan chhuak vat a nga, kan hna kan thawk vat dawn nia.” tiin a nui seih a. “Ni e, engkim a ṭha vek dawn alawm, i dam a pawimawh hmasa ania.” ka tih chuan, “Heta ilo kal aṭangin i hun a liam nasa tawh si a…” tia a tawp daih chuan, “Khatin thil ngaihtuah vak vak rih suh.” tiin harsatna a tawh dan chu ka zawt ta zawk a, a sawi laia a rilru na hmel mawlh hi ni hmuh hrehawm chu, hetiang taka mahni hringtu pa in a chunga rawng taka chet a la mai thei hi mak ka ti viau bawk. Hmeichhe tawrhchhel tak angin lang mahse a nu thlan a ka hmuh ni aṭang khan a mittui a tla ta fo a, engtiang taka rei nge he natna hi a tawrh hrelo mah ila, a na chhawktu erawh nih ka duh a ni.

RAUTHLA KIR LEHNA-8

JONSMELY BAWITLUNG

Damdawiina karkhat zet kan awm hnuah in lamah kan haw a, ka patea chhungkua leh Sangtei an rawn lang ngunin min ngaihtuah hle a, Ruatsaka te nupa pawh an fel takzet. Ka patea nen ka thil tawn dan kan sawi khan engmah zep nei lovin ka sawi fai vek a, a tirah awilo viau dawn mahse ka awmhranna chhan nen lam ka sawi hnu khan a thin a rim ve hle a, engtiang takin nge ka pa lakah a thinrimna a tih lan dawn hrelo mah ila, ngawih mai erawh a tumlo tih ka chiang. Ngurnunmawia nen kan inkungkaihna min zawh khan ka hnaa min puitu tur anga sawi ka ni a, dawt ka sawi vek chuanglo bawk tiin mahni ka inthiam chawp a, thudik erawh ka chhungte bul mai nilo tu bulah mah sawi ka tum lo.

Damdawiin ka awm chhung zawngin Ngurnunmawia’n min ngaihsak em em a, ka thil tawn mak danglam zet ka sawi erawh a awi chiah lo anih hmel mahse kha thil kha keipawh in mak ka tiin a ngaihna ka hrelo, ka hmu lo ti dawn ila engkim kha ka mitmenga ka hmuh ang thlapin a chiang si a. A ṭhian Parmawii anih ka ring a, mahse Ngura erawh chuan Ani chanchin engmah a sawi leh bawk silo. Ka ngun chu ka en a, Pu Ruatkima khan he ngun mawi danglam zet hian min ven tur thu a sawi anih kha. Silaia Ngura an kah lai khan hmeichhia khan silai mu kha a beng per ni mai in ka hria, thi ngei tura ka rin laiin a pawilo tur ber a darah a fuh a, Ngurnunmawia hian vengtu a nei a, chu a vêngtu chuan Amah ṭanpui tu tur ka nih ve avangin min vêng ve zel pawh animahna.

Ruatsaka pun nachang a hria kha mak ka tiin engtin nge an in kha ala hriat ka zawt leh kher kha ania. Mahse a finna bawk a hmang leh tih ka hria, vawikhat a kalna reng reng a hre ṭhin anih kha. Ruati nen ka Scooty in an kal tih a sawi lai khan ka nuih za hle a, mahse Ani erawh a nui ve hauh lo. A rilru hah leh mangang tur zia ka hriathiampui lova mahse a sawi danin, ‘Ka pian a hnu lamah ka rilru la buai ber ṭum a ni hial ang.’ a ti anih kha. Keima vanga buai taka a awm avangin pawi ka ti a, chutih rualin tih takzeta min ngaihtuah tu ka tawn avangin ka lawm tho si a. Ani hi awm lo se engtianga rei nge hrenbeh ka nih ang tih ka ngaihtuah ngamlo. Ka nunna hial a chhan si a.

“In kan haw leh chu nuam i ti em?” Nui suka Ngura’n a tih chuan ka lu ka bu nghauh a, damdawiin zawng a ninawm em a ni. Ka ngaina lova, ka ngaina ngai pawh in ka ringlo. Ruati’n min lo hmuak a, Sangtei leh Patea pawh an rawn lang bawk. Kan chhuah lawmnan tiin chaw ei nghal an tum a, Nutei leh an fate pawh an rawn kal dawn anih hmel, chu pawh patea ruahmanna a ni. Sangtei pawh ka laka ṭhat achhuah tlat avangin ka thinrimna pawh ka hrereng duh biklo.

Damdawiin kan awm chhung zawngin ka pa te tumah an rawn lang lova, chumi avang ngawt pawh chuan ka patea a thimrim in midang a phone kual hial a, ka ni erawh ka pa lamah a ṭang tlat thung. An hausakna engkim pe tu hi ka pa anih miau avangin a ṭan em em ringawt a ni. Ka chunga thil thlengah pawh keima thiamloh anih ringin ṭawngkam a thlah leh hial a, ka patea nen pawh an inhau nasa tiin ka nutei’n a sawi anih kha. Chhungkaw tibuaitu ni duh lo mah ila ka pa erawh ka thutiam ang ngei in ka laka a thiltih erawh ngawihbo san tumna ka neilo, ka nu leh ka tan ka dinchhuah hi a hun tawh a ni.

Chaw rawn ei tur an awm ve lo thung. Ruatsaka’n kan hnaa min pui a duh thu Ngura’n a sawi khan engtia chhan tur nge ka hrelo a, engmah kan la sawi ho leh heklo, chutih rualin a pa Pu Ruatkima tana ti anih thu a sawi erawh a zahawm in, a inhuam phawt chuan min zui ve mahse keichuan ka hniallo, engang buaina nge kan la hmachhawn leh dawn hriat a ni tlat silova.

Eng eng emaw sawia kan titi lai chuan door bell a rawn ri a, Sangtei chu tho tharh in kawngkhar a hawng a, ka pa hmel ka hmuh rual chuan thinrimna in min luahkhatin, ka kut ka hum ruh nghal ṭung a. Engvanga heta rawn kal nge anih? A rawn pen luh rual chuan ka insangmar nghal ṭeuh a, ka bula ṭhu Ngura chuan ka awmdan hria in ka kut a rawn hum nghal vat bawk. Sangtei chuan a hma ang bawkin a be nghal sawk sawk a, chu erawh ka huat tawk a tling leh viau tawh.

Ngawirenga rawn lutin kan hmaa ṭhutna awmah chuan ṭhu in min melh ngur a, keipawh in zamna tel hauh lovin ka melh ve ran a. “Engtin nge i awm?”a ti hmuk a. Ka hriat theih chin ata min biak dan a ni. A mizia ve reng a ni tiin en liam ka tum ṭhin a, mahse midang laka a khawsak dan leh ṭawngdan nen chuan danglam tak a ni. Mite chuan ka pa anga pa ṭha hi an awm lovang tiin ka bulah an sawi fo ṭhin mahse chu chu ka laka a khawsak dan a ni miau silova.

“A pawi ka ti, I duh ang nilovin ka la dam ve chu anih hi.” tham lo hmel zeta ka ṭawng chuan a rum nghut a, a bul lawka ṭhu ka patea erawh thinrim insum tih hriat takin a kut a hum ngawt ngawt a, a thaw leh hawk ṭhin a. “Eng nge i rawn tih, ka in min chhuhsak tur chuan em ni i rawn kal?” ka tih leh chuan ka patea chu ding nghal hluai in, “Chutiang chuan i fanu neihchhun hi i vo a maw?” a ti vin nghal ṭhawt a. Ka patea pa zaidam tak thinrim chu a hlauhawm takzet. Ka patea thinrim ka hlauh tluk zetin ka bula ṭhu ka kut chelh reng tu Ngurnunmawia chu ka en a, a mitmeng sen rumah chuan engpawh a tih ngai se a hreh dawn hauh lo tih ka hria.

“I fanu neihchhun pawh i tana hnawksak anih si chuan tu chu nge i tan hian awm ve duh tawh ang. I nupui leh a fanu tu nge a pa tih pawh hriatloh saw maw awm ang?” Ka patea’n a tih chuan ka pa chuan a chhan ka rin nen a chhang hauh lo nia, thil mak tak pawh a ni. Unau zinga upa ber a ni a, anihna nen an zah em em a, ṭawngkam vin leh mawilo taka an biak ka hre ngailo, mahse tunah erawh ka patea thinrim luatin a ṭawngkhum chu ania. Ka nutei rawn kal vatin ka patea thinrim ṭawng zawm zel tum pawh a rawn khap vat a. Ka pa pawh dingchhuakin engmah sawi lovin kawngkhar lam a pan nghal vut a. “Ka thutiam hlenna hun min pe a ka lawm e.” ka tih chuan ding chawtin a rawn hawi let a.

“I duh anga mitthi ka nih tak siloah chuan Minister, lo in veng ṭha hle ang che, kei hian ka laka i tih tum ang chiah kha thlen tir turin kiltin aṭangin ka bei ang che. Ka kal hmaa ka thutiam kha ila hriatreng ka ring. Khawvel hian min hnungchhawn vek mahse ka nu fanu ka nih chhung chuan ka tlawm ngai lovang.” ka tih chuan min melh vung vung a, a mita natna rawn lang zawk chu a reiloh em avangin ka hmuhsual anih ka ring, inher vutin a pen sawn lehnghal a, mahse kawngkhar a thlen chuan rawn hawi let lehin, “Ka inpeih e.” tiin a chhuak zui nghal a. Ka pa a chhuah hnu pawh chuan ka la insangmar ṭung a, ka patea thinrim lutuk hmel la reh lo ka hmuh rual erawh chu inbengdaih tumin thawk ka la halh a. Thudik a hre tawh a, eng nge a tih ang tih hrelo mah ila ka hahdam phah in ka thlamuan viau si a.

Damdawiin kan chhuah aṭangin nihnih lai a liam leh tawh a, Ngurnunmawia berin pawnlama chhuah ala remtih miau loh avangin in aṭangin hna ka thawk a, ruahmanna hrang hrang siam in, ka zirchhuah ang ang te ziakin ka dahṭha zel bawk a. Hmanlai kan pi leh pute nundan tam tak Ngurnunmawia min hrilh te chu ziak zelin, History pawh a kan la hriat ngailoh thil tam tak ka zir tel bawk a. Ngurnunmawia pasalṭha a khua leh tui te tana innghahna tlak leh tlâwmngaihna kawngah midangte aia chungnung zawk anihna ka hmu thar zel a, a huaisen zia leh a tih theih chinah min kalsan ngailo a, thil te ber nia ka ngaih aṭangin a lian ber thlengin tih hreh a neilo in min tihsak zel ṭhin na te hian thinlung ṭha tak a nei tih chiang takin ka hre tel bawk.

“Naktukah chuan chhuah tum tawh ila a ṭha lawng maw?” Tukṭhuan kan ei laia ka tih chuan Ngura chuan mak ti zetin min en a, min ngai damlo lutuk leh min dimdawi lutuk hi nuam ti mah ila, keimah chauh ka nih leh hunah ka awm thiamloh ka hlau tawh zawk. “Khatin min en vaklo la, ka dam ṭha tawh lutuk a lawm.” ka tih chuan, “I ṭha tak tak maw?” ringhlel hmel zeta min zawh chuan ka lu ka bu nghauh a. “Thlakhat lai a liam tawh a, heta i cham chhung hian eng nge thleng pawh i hre bawk silo, ka buaina leh harsatna te chu theihnghilh ila kan hna, i hna thawk tawh zawk ang chumi tur chuan ka inpeih tawh e.” ka tih chuan, “Um” tih chauh in min chhang a mahse a ngaihtuahna erawh a kal thui viau in ka ring. Ṭukṭhuan kan eikham hnu chuan ṭhutkhawmna lamah kan ṭhu dun a, “I inpeih tawh takzet a maw?” Min ngaihtuah hmel zeta a tih leh chuan, “Aw, i cham rei tawh a, ilo kal chhan tih hlawhtling a hun tawh a ni.” tiin chhang mah ila, min kalsan hun tur ka ngaihtuah chuan ka huphurh ru takzet si a.

“I sawi dik viau mai, mahse Nangmah i ṭhat a i dam chian hma chu chhuah hrih loh a ṭha,” a tih chuan lu thingin in, “Ka ṭha tawh lutuk alawm.” tiin ka nui var var a, min ngaihtuah lutuk hi ka no zo vek tawh in ka hria, mahse hetianga duat taka min enkawl hian nuam ka ti viau lawi a, min kalsan hun tur erawh ka ngaihtuah ngam tawh meuh lo, a chhan pawh Ngurnunmawia hi ka ngaina mah mah tawh a ni. “A ṭha alawm i dam hi a pawimawh ber, i inhuam phawt chuan keichu ka ṭha.” tiin min en leh vung vung tawh a. Hetia min melh vung vung hian ka lai ru tlat zel, mahse zaklo anga lan hram hram erawh ka tum ve tlat.

“Hliam i nei ve tho si a, kei aiin i na daih zawk bawk Nangmah hi i inpeih tawh hrim hrim em?” ka tih chuan, “Keichu ka ṭha,” ti hmukin, “Nangmah kha ṭha phawt la, a ṭha vek mai ang.” tiin a pindan lamah a lut ta daih a, a awmdan teh thut chu mak ka tih avangin a kalna lam chu ka melh vung vung ringawt a. Eng nge a ngaihtuah ang le? Engvanga lungawi lo thut nge maw anih le?

Door Bell a rawn ri a, Ruati’n a hawnsak chuan Sangtei a rawn lut nghal a, ei tur eng eng emaw a rawn khai bawr ṭun bawk a. Sangtei a awm tawh hi chuan kan ri nghal hluai zel zawng anih hi. Ka lung a tiawilo ṭhin in, ka thin te hi tirim fo mahse a ṭawng duhin thu ho te te sawi hian a ṭawng renga a tawpah zawng ka thinrimna te pawh ka hre reng lo leh nghe nghe zel ṭhin.Sangtei nen kan titi laiin Ngura a chhuak a, Ruatsaka nen tih tur an nei niin a sawi a, ṭhian mipa a nei chu lawmawm ka ti viau bawk.

Sangtei’n ka lehkhabu en a duh thu a sawi chuan pindanah ka zawng leh hrep a, nilengin min awmpui a, Ngura alo let leh rual erawh chuan a haw ta vat a, Ngura’n khawpui an fan thu leh Ruatsaka nena an kalna min hrilh ve luam a, ka phone a rawn rik a ka en chuan ka nuhrawn call a ni. Chhan loh ka tum zet na in, ka pa thuchah a ken leh ringin ka pick up a, ka hello rualin ka nuhrawn nui ri hak ka hre nghal. Engmah a sawi leh bawk silo avangin chuan dah leh mai ka tum zeta mahse ka pa aw ngeiin, ‘Ka that dawn’ a tih ri ka hriat chuan ka ṭhu mar nghal awt thei. A aw aṭangin a harhfim lo tih ka hria, mahse tu chanchin nge a sawi ka hrelo. Mifel tak tiin ka sawi ngailo mahse a awmdan phung hloh khawpin zu a in ngailo tih chiang takin ka hria. Engvanga rui khawpa zu in nge anih? Keima chanchin a sawi em chu a nilo maw? Ka ngaihtuahna ka kalpui thui lutuk nge ka phone ngaihthlak leh ka tum erawh alo in off daih tawh.

“I ṭha em? Thil thleng a awm em ni?” Ngura ṭawngah chuan harhchhuak zawkin lu ka thing a, mahse ka hmelah hian engkim a chhiar thiam leh vek dawn tih ka chiang. “Hahdam i mamawh in ka hria.” a tih chuan chhang lovin ka lu ka buk khum ringawt a, ka pindan pana ka kal pawh chuan a ngaih a ṭhalo tih ka hria, kawngkhar ka thlen ruala rawn thleng ve nghalin, “Ka lo awmpui hrih ang che.” atih pawh chuan ka hnial hranlo. Ka pa ṭawngkam kha rapthlak ka ti, ka vawihnih hriatna ni mahse min den dan erawh ala ngai reng thung. Midang tina duh khawpa mahni hmasial nimahse tual em that duh tur khawp chu a niin ka hrelo, tualthattu a puh pawh nise alam ka la ṭang fan ang mahse a vawihnihna atan ka hriat duh loh ber ka hre leh si a..

“Zanin chu hetah i riak ve thei mai angem?” chhuah tuma a inher tawh chu a banah chelhin ka ngen a, hetiang tehhrep a thlen hnuah pawh, hlauthawng anga lan duh ngai miah lo hi mahni inkhawngaihna leh hlauhthawnna in ka khat a, ka nu kha la dam se hetiang em em hi ka chungah a thleng bik lovang tih bawk a ni ka ngaihtuah leh tawh. Ngurnunmawia chuan min en vung vungin a lu a bu nghut a. Hetianga mipa riahpui ngawt hi thil dik ber a nilo tih ka hria mahse ka hma ka sial lo thei lo a ni.

Ka sira mu chu a ngawi ngur a, nuam lo tiru viau mah ila ka thlamuanpui tho si a. “Muhil la, ka kalsan dawn lo che.” a tih chuan Amah hnungchhawn zawngin mu mah ila a nui leh suk dawn tih ka hriatna chuan min ti nui ru var var a. “Khatin nui reng suh, hmelṭhat hun a ni tawh lo, zan a tlai tawh. Zan lalnu in a thik lutuk ang che.” tia a nuih rik hawk chuan ka mit ka chhing nghal vat a, min hmu dawn lo tih hre mah ila ka ner lui vak a.

Ka awma delhtu avang chuan ka tal chiam a, “Zorin, keimah” tia min kuahtu aw ka hriat rual chuan ka meng nghal kawk a, mumang ṭha lo ka nei tih hrethiam in ka thaw nghal halh a. “Muhil leh rawh zanlai a pel fel deuh chiah ania.” Ngura’n mutchhuak aw taka a tih chuan ka mitchhing in, ka mang ka ngaihtuah let a, ka nghawnga min rek tu vanga tal vak ka ni. Mangchhia mai mai a ni tiin ka inhrilh mawlh mawlh a.Zinga ka harh chuan Ngurnunmawia mutna lam ruak huai ka hmuh rualin banga sana chu ka en nghal vat a, alo tlai leh tawh viau mai. Vawiin lamah zin kan tum bawk nen khum chu ka thawhsan ve ta nghal vat a.

Ṭhutkhawmna pindan ka luh ruala Ngurnunmawia rilru buai hmel zet chu hmu in ka pan nghal vat a. “Thil thleng a awm em ni?” ka tih chuan, min chhang lovin a ngawi ngur a, ka din reng hnu pawh a min chhang mai loh avangin choka lamah ka lut ta daih a.
Ruati hmel ka hmuh Ngurnunmawia aia hmel hmuh nuamlo a put avangin zingkarah thil thleng a awm ngei anih ringin, “Thil thleng a awm em ni?” tiin ka zawt leh a, Ruati a kut sik niap niap a dawhkan bula ding ka hmuh chuan kal hnaih in, “Ka hriat chi a ni em? I chungah harsatna a thleng anih chuan min hrilh rawh.” ka ti nawn leh a. Mitsen rama min melh in, “UZorin ka tihpalh.” a ti zawi sap a. A thusawi avang chuan mak tiin ka en reng a, engvanga ngaihdam min dil ngawt nge anih le?

“Tihsual i nei em ni?” Ka zawhna avâng chuan a hawi buai nghal vek a, a hmela hlauhthawnna leh hrehawm tihna rawn lang chu ka hmuh hmaih lo. “I chungah eng nge thleng min hrilh rawh?” ka aw a nelawmna tel miah lova ka tih chuan hlauthawng hmel taka min en in, “Ih, niminah khan sawi tawh tur ka ni a,” tiin a mittui a tling nghal pam a, kei erawh in a thusawi hun ngaichangin ka melh ngar thung.

“Chaw kan eikhawm kan haw kha, kawng lakah mipa pahnih in min ti dingin, min vo a. An zawhna te ka chhang lo nih chuan ka chungah thil ṭhalo tak an thlen tir tur thu an sawi a.” aw khur dar dar a atih chuan, “Eng nge an zawh che ka lo ti vat a.” ka zawhna chu a chhang hreh tih hriat takin a kun nghal lap a, kei erawh in sawi vat vat se ka ti takzet. “He inchhung awmdan leh Ungura nena in inkar leh in thusawi engpawh ka hriat ang ang sawi turin min ti a.” a tih chuan mak ka tih avangin ka meng deuh awk a, “Eng nge i sawi?” ka tih bul hmuk chuan a mitmeng hlauhthawnna chu a nasa zual sauh a, mahni inthiamlo ru zetin ka thiam ang tawka zaidamin ka zawt nawn leh a. “In awmdan ka hrilh a, chuan hna i thawh thu leh ih ih kha Lunghlu hring kha ka sawi a.” a tih chuan ka phu zawk thei hial a, engtin nge Lunghlu chanchin a hriat. Ngurnunmawia’n min hmuh hmasak ber ni khan a hmu hman tihna a nia.

“Thil tam tak min zawt vak vak a, chhanna an duh ang ka neih loh avangin pawngsualah leh ka chhungte min thah sak vek tur thu an sawi a, chuan ka rilru a lang hmasa apiang ka sawi tawp a ni. Khami ni khan i kuta i ken kha ka hmu hman a mahse min zawt lo bawk a tu bulah mah ka sawi ngailo mahse Anni pahnih min vo na erawh ka hlau lutuk a, an hriat duh ni awma lang apiang ka sawi ta a ni. Ka tihpalh lutuk keimah avângin dinhmun hlauhawmah i ding leh si a.” tiin a ṭap chhuak hawk a, sawi tur reng ka hrelo a hnem ngaihna la ka hre heklo.

Kan thawm hria in Ngurnunmawia a rawn kal ve a, a hmel ka en rual chuan ka thaw nghal hak a, “An hmel ila hre thei angem?” Min en hauh lovin Ruati chu a zawt a, Ruati’n a lu a thing rual chuan, “Lungmawi kha a bo.” a ti zawi sup a. A thusawi chu ka hresual maw tiin ka zawt nawn leh ngat a. “A bo, kir lehna tur a awm tawh lo. He in khawpui lian zetah hian ka thil neih la let tur takngial pawhin chet ka la thei silova.” a ti rum ul a. A aw zaidam tak ṭhin a thinrimna rawn lang chhuak chu hriat loh pawh tum ila a theihloh. Engtianga zawn hna thawh tur nge ka hre mai silo nen ka ngawi reng ringawt a.

“Ruatsaka bia la eng emaw tal tih theih a awm ang. In siam rawh, Sangtei dawrah leng teh ang.” tiinl a pindanah a lut nghal daih a. Eng nge a ngaihtuah ka hriatpui hauh lova, mahse a awmdan erawh a danglam vek a, mipa nelawm leh zaidam hmel zet ṭhin kha ni tawh lovin mi tawhkhirh leh luhlul hmel zet a pu a, a kir leh theihna tur atana a pawimawh zia ka hriatpui a, heti maia midang kuta awmtir hi a tum hauh lovang tih ka hria mahse khawi aṭanga zawn ṭan tur nge ka hre miah lo hi a khirh lai ber a ni. Kan hmuh leh ngei erawh a ṭul takzet a ni tih ka hria. Heng thil ti tu hi ringhlel tur hrelo mah ila, ka pa bawk a ni ka ngaihtuah chhuah leh tak chu. Nizan khan ka laka a lungawilohna min hriattir ngei tumin ka nuhrawn khan min rawn bia a, ka hre ngei bawk e. Mang lam thlenga min tibuaitu a ni hial anih kha. Ka pa thiltih a ni leh anih chuan atthlak taka chet lak pawh ka hnial tawh hauh lovang.

Kan chhuah dawnah chuan Ruati chu haw lo mai turin leh kawngka khar tlat turin ka ti a, harsatna emaw buaina a thleng anih pawh a min rawn be vat turin ka hrilh bawk a, ala hlauthawng reng a ni tih hre mah ila tun dinhmunah chuan hetah hian awm se a him ber ang. Ngawi rengin kan in zui chhuak a, dahna a buaithlak ṭhin avangin Scooty kan keng a. Ka bo laia ka scooty Ruati nen an la chhuak leh an buai dan vel tur ka ngaihtuah a, Ruati a tê ve sia a hnunga mipa lianpui ṭhu tur ka ngaihtuah chuan ka nui var var a, mahse Ngurnunmawia hmel ka en rual chuan ka nui tawp nghal hmak. “Eng nge?” a tih hmuk chuan rang zet hian, “Engmah a nilo.” tiin ka scooty-ah chuan ka ṭhu nghal vat a. Rilru hah laia chutiang ka lo ngaihtuah daih chu ka inthiam chiah biklo.

Sangtei dawr kan thleng a, a pindan bika ṭhu hovin nidang ang bawkin a titi leh bawrh bawrh tawh a, mahse Ngurnunmawia erawh a ngawi ngur a, eng emaw a ngaihtuah tih a hriat takzet. Sangtei pawh a ngaih a ṭhalo tih hriat zetin min mitmei leh ṭhin a mahse engmah ka hrelo tih bakin ka chhang lo. Sangtei dawr lama a kal chuan Ngura lam chu hawiin, “Ngati nge heta len hi i tih a?” ka tih chuan, “Ka hrelo.” a ti leh hmuk a, vawiin chu zing aṭangin a mood a chhe char char dawn anih hmel hle mai. Hetianga a awm chuan nuamlo ka ti ru takzet, mahse tihdan vak ka hre bawk silo, a pawimawh ber erawh kha Lunghlu kha tu lak pawh ni rawh se kan lak let ngei angai a ni.

Sangtei a rawn lut a, Ngura chu ding vutin, “Kalna tur kan nei sia kan chhuak mai ange.” tiin Sangtei ṭawng hun pawh nghak lovin a chhuak nulh a, hetiang ringawt chuan a dik dawn hauh lo, eng thil pawh ti dawn ila ka biak phawt a ngai a ni. Chhuah ve tuma kawngkhar lam ka pan ve nghal a, Sangtei chuan, “Nga ti nge Ngura?” a tih chuan, “Ka hre bik chiah lo,” tiin pawnlam ka pan ve ta nghal a. Scooty bula Ngura lo ding ka hmuh chuan pan vatin, “Eng nge i ngaihtuah? hetiang hian awm lo teh.” a awmdan ti hmuk hmuk hian a bula awm a tihrehawm a, a rilru hahna chhawk theilo mah ila, hetianga rilru buai hmel zeta awm tur hian ka duh lo.

“Ruatsaka kha i be ta em?” ka zawhna chhang lova a tih chuan ka thaw halh a, “Sawi dun phawt teh ang, rilru fim i pu lo in ka hria.” tia a hmaa ka din chuan a ngawi reng a, kan awmna bula midang veivak awm ten min en leh zawk ṭhin tih ka hmuh chuan a banah kaiin kan piaha restaurant-ah chuan ka luhpui ta ngawt a.

“Rilru fim tak kan hmang lo anih chuan tunai hian buaina lian kan tawk thei a ni, chu chu i hria tiraw?” Kan ṭhut fel ruala ka tih chuan a kuthniha a hmai hup in, thawk a la hawk a. “Engkim a ṭha leh em em ang, kan zawn hmuh theihna kawng a inhawng leh mai ang.” ti leh in a kut dawhkana a dahah chuan ka vawn sak a. Inbengdaih a tum nasa hle tih a awmdanah chuan a hriat theih. Boruak a hip lut a, a thaw chhuak leh ham ham ṭhin a. Ka phone a rawn rik chuan ka en nghal vat a, Ruatsaka call a a ni.

“Hello” ka tih ruala Ruatsaka’n a pa in min hmuh duh thu leh an ina min lo nghah tur thu sawiin call kan ti tawp zui a. Kan ei tur chah a rawn thlen rualin ka hmaa ṭhu Ngurnunmawia chu melhin, “Ei tur tui tak ei hian hnathawh a nuam in, ngaihtuahna pawh a fim duh an tih i hre tawh em?” ka tih chuan a lu a thing a, “Ka la hre ngai miah lo.” a ti zawi sap a. “Tunah chuan i hre ta lawm, heng ei tur tam tak te hi kan ei zawh meuh chuan kan kawng tur kan zawh thei tawh ang.” tia ka nuih var var chuan Ani pawh a khi ve suk tho.

Pu Ruatkima nena kan inhmu leh chu mak deuh maiin ka hlim veng veng nia. Ka bana ka ngun bun chu enin, “A venghim ngei ang che tih ka hria.” tiin a nui var var a, keipawh in ka ngun chu en in, “Um, min venghim ngei e” tiin ka nuih let ve a. Ani hi chu pa upa tawh tak ni mahse engtik laipawh hian hmuh nuam tak hi a ni reng anih hi. Ruatsaka leh Ngurnunmawia ṭhutkhawmna lamah an awm a, kei leh Pu Ruatkima erawh a pindanah kan titi dun a. “Ka pu buaina ka tawh lai khan harh miah lovin mumang ang deuh in thil thleng kha ka hre vek a, chutah chuan nula pakhat ka hmu asin. Ani chuan kei mai nilo in Ngurnunmawia thlengin a veng a.” ka tih chuan a lu a bu nghut nghut a. “Amah ngei anih chu, kha ngun khan keipawh ka nunna a chhan a, mahse ka ke erawh ka hmang thei ta lo anih hi.” a tih chuan hriat chak hmel deuh in ka melh a.

A ram riahnaa a chetsual dan te, keimah ang tho a mumang anga engkim a hmua a hriat thu leh a harh leh chuan an ina a awm tawh thu te chu sawiin keiin ngaihnawm ti zetin ka lo ngaithla a. A thusawi tih tawp nana, “Bawihi khawvelah hian mak kan tih leh kan hriatloh hi thil tam tak a awm a, thawnthu pawh hi a taka chan chang a awm fo ania.” a tih chuan ka rilru a hneh hle a. Lasi te leh huai te khawvel hi thawnthu mai a nilo tiin ka inhrilh nawn leh hial a. Thu dang dang sawiin bul ṭan hma hauh a, beiseina chuai mai tur min chhem alh sak a, Ṭan tlang leh a chhe vel thil awm te min sawipui in, a hunlaia cheng ang maiin ngaihnawm ka ti hle a. Ngura te an hman meuh chuan khua a tlai tawh viau bawk.

In lam pana kan tlan lai chuan kawngsirah din a tih tlat avangin khawpui lang thei lam chu thlirin kan ding a. “Kan tum dana kaltlang a ṭha kan ti a.” a tih chuan a ngaihna hrelo zetin Ngura chu ka melh a, “Ṭan tlang kan pan ang.” a ti zawm leh a. “Mahse Lunghlu tello chuan chem chu lo zawng hmu ta pawh ni la i let thei dawn chuang hleinem.” tia ka chhanna chu hria ang pawh in a langlo. “In khawpui hi a mawi takzet a ni, hetianga mawi hi Ngurn hmu ve se engtin tak awm ang maw. Nangni zawng in vannei hle a ni. Khawvel thiamna heti tak hian a sang ang tih kan ngaihtuah phak silova.” a ṭawng zawi hle mahse a bula ding ka nih miau avangin ka hre thei chauh a ni.

“Nangni chuan i kuta thil tereuhte kengin hmun hranga awm in be pawp thei a, buaina leh harsatna te awlsam takin in chingfel zung zung a, keini chuan buaina kan neih in Lal te’n sawifel ṭhin mahse tam takah chem hmanga chinfel a ni ṭhin a, nunna hi a hlu a, ṭha taka hman tur anih laiin mi tam takin chem an cho chhuak ṭhin, chu erawh at vang anih hauh lo, Hnehtu leh huaisen zawk nihna hi midang te laka himna a ni tlat si a. Mi huaisen awmna hmun chu a zalena, a nuam ṭhin. Mahse Nangni erawh mi dawizep leh mi hnunglam aṭanga bei ṭhin tam tak kat nuk mahse zalen leh nuam ti takin in awm si a. Mahse mi tam tak ka thlir che u hian ka awt lo che u, diktaka nun hmang an vang hle si a, tupawh mai hian lem in chang hlawm vek si a, Ka pu tih loh kha chu.” tiin a nui ri hak a, a thusawi tum hre lo mah ila a thusawi awmzia erawh ka hre si a. Kan hnam nihna bo khawpa kan nun zalen leh ramdang mi ngaihsan luat avanga nihna lo thleng thleng a kan landan te, Kristian ram inti si a, rinawmna leh dikna kan thlakchham zia te, huaisen taka mahni ṭan hmun a nghet taka ding ngam kan tlem tawh zia te ka ngaihtuah a, Ngurnunmawia’n ka awt lo che u a ti hi dik ka ti takzet.

“Engtik niah emaw chuan in thlahtu te nundan hi tu emaw chuan ala rawn zir ngei ang, thisen chhuah hmang chauh nilovin remna leh muanna duh avanga Lal te’n an beihna te, tlawmngaihna nun kan vawn dan leh hmeichhia te zahawmna leh rinawmna leh dikna kan vawn dan te, Mipui te’n Lal te an zah dan te hi an la rawn zirin an hre ve ngei ang chutih hunah chuan he in khawpui lian tak hi midangte hmuha awhawm tak ala ni ve mahna.” a ti chuai raih a.

RAUTHLA KIR LEHNA-9

JONSMELY BAWITLUNG

“Engkim peih fel a ni tawh e.” tiin choka ka chhuahsan a, Ngura erawh chokaah Ruati bia in ala awm thung a. Eng ruahmanna nge an siam ka hre lova, mahse kan zin hlanin Inah Ruati awm turin a ti a, hmanlo a inti viau ṭhin kha ania Ngurnunmawia sawmna erawh a sawibuai hauh lo kha mak ka ti a ni. Ka thawmhnaw kara ka chemte mawi zet, inven nan tia ka kawl ruk chu enin ka nui sak a, hman ngai ta se ka hmang thiam viaulo mai thei a ni. Ruatsaka a rawn thleng a, Ngura nen a pindan lamah an inbe leh daih tawh. He mite pahnih hian eng ruahmanna nge an neih ka hre lova, ka zawt heklo. Ka hriattur a awm anih erawh chuan min hrilh mai pawh ka ring.

“I inpeih em?” Ngurnunmawia’n a tih chuan lu ka bu nghat a, Ruati ka ina awm tura a tihna chhan hi ka hrelo a, hei erawh ka zawh ngei a ngai a ni. Nimin lam aṭang khan a ṭawng tlem hle a, a thusawi ve chhun pawh kan nundan mak a tih thu chauh a ni. Ngawirengin a ngaihtuahna a kawm a, Amahin a awm deuh chawt a, a rilru a buaiin a hah hle ang tih ka hriatthiam avanga be tam lo pawh ka ni, mahse hetianga kal a rawt leh ta mai hi ka hrethiam lo khawp mai, a rawtna erawh hnial tumna ka neilo. Kan tum dan chuan Champhai kan pan phawt anga, chumi hnuah Vaphai lam kan pan leh ang.

Aizawl kan chhuahsanna pawh darkar li ngawt a ni tawh a, mahse tumah kan ṭawng lova, kan boruak rit zet chu ka ning takzet tawh. Ka motor khalh takngial pawh ka ngaihtuah theih loh avangin engmah sawi lova kawngsir rem laia ka din chuan ngawirengin min en tawp a. “Engmah min hrilh i tum lo em ni?” ka tih chuan pawnlam chu a melh zui daih a. “A ṭha e, engmah min hrilh dawn lo mah la, hei erawh i sawi ngei a ṭul ang, engvanga Ruati kha ka in a lo awm tura ti nge i nih?” ka lawmlo a ni tih ka ṭawngkam aṭang hian a hre ngei ang. “Chhuk ang le, chuan i chem pai ruk kha phawrh chhuak la.” tiin a khi sak a. Chemte ka pai ru tih engtin nge a hriat!? Car seat hnunglam aṭang chuan kan keng a ni tih pawh ka hriat hauh lo tiang sei angreng tak pahnih phawrh chhuakin pawnlamah a chhuak nghal a, a chetdan mak zet avang chuan a thusawi ang chuan ka racksack chu zen rawk rawkin ka chemte pai ruk chu phawrh ve nghal zatin pawnlamah chuan ka chhuak ve nghal vat a.

A tiangken a zawm mawlh mawlh lai chuan a hmaah dingin ka melh ran a, “Eng nge thil awmzia hi Ngurnunmawi?” ka tih chuan kan tlanpelh tawhna lam kawng chu a melh vung vung ringawt a, kei erawh ka thin a rim hlur tawh. Engmah sawi lova a ngawih reng avang leh a chetdan maksak zet hian min ti hrilhhai in, ka lungawilohna a ti zual em a ni. “Ngun takin ka thusawi hi lo ngaithla rawh, atthlak taka chet hun a nilo.” tiin ka ngun bun chu a rawn hum hnan a, “Tunah hian min beih tumtu te an rawn thleng dawn tawh a, Ruatsaka te rawn thlen hma chu theihtawp chhuah a kan sual let a ngai a ni. I hrethiam em?” tiin min melh ran a, engmah zawt let lovin ka lu ka bu ta nghat a. A thusawi chu a ti mai mai lo tih a hmelah a lang a, tin, a tiang zawm ka enchian chuan fei sei tak a ni tih ka hria, ka chemte mawi zeta cher chu phawrhin a hmandan thiam tak nilo mah ila ka hum ve ran bawk.

Eng thil chiah nge thleng dawn tih hrelo mah ila, Ngurnunmawia awmdan leh a thusawi aṭang hian thilṭha a thleng dawn lo tih chiang takin ka hria, mahse engvang nge ni ta ang? Kan piah lawka Bolero dum a rawn ding rual chuan ka ngaihtuahna aṭanga harhchhuakin, a chhung aṭang chuan mipa panga ngawt rawn chhukin, kan lam an rawn pan nghal a. Ka bula dingin min dinhliah rual chuan awmhmun ka siam rem ve nghal vat bawk.

An zingah mizo pahnih an awm a, a tê zawk chuan, “Kan lunghlu in kawl tlat.” thamlo zeta a tih chuan mak ti zetin ka melh ha a, “In lunghlu chu engtin nge kan kawl daih thei a?” Amah aia thamlo a Ngura’n a chhan let rual chuan chet rawn la nghalin hnamdang pathum te chuan min rawn kal hual nghal a, hlauthawng hman ka nilo tih hria in, ka chemte ken chu ka hum rem nghal vata, “Min ring em?” ti zawi sap tu Ngura chu ka thlek zeuh a, ka lu ka bu nghat a.
Ngurnunmawia te in sual chu ka en a, hetiang taka mipa insual thiam leh fei hmang thiam hi a takah an awm theih ka ring ngailo. Mipa pathum te chuan vawikhat mah min khawih hmanlo, ka bula mipa in min veng hneh lutuk leh a che rang lutuk chu mak ka ti zawk hial a, Hliam tuar a mipa pathum te an let rum chu en in, “Ka lungmawi kha min pe kir leh lo anih chuan in tana a pawi theih dan tur inhmu tawh bawk a, khawiah nge a awm?” Rum al a atih chuan pakhat chuan silai rawn phawrh in Ngura chu a tin ta ran a.

“I nula bulah chuan i inla pa ve hle mai maw, mahse hei hi hre rawh tunah hian min pe lo anih chuan ka kap ang che.” A ti ṭeng nghal chuai a, Ngura’n min ven a tumna lama min pawhsawnna vang kha a ni mai thei, ka lu a rawn hai muai muai a. Ka hmaa mipa ṭawng leh pawh chu ka hrechiang tawh lo. Silai puak ri ka hriat rualin leiah Ngura’n min bawhthlu nghal a, engmah ka hre zui tawh lo.

“Zorin harh teh.” ti tu aw chu ka hre ruai ruai a, ka hmaia tuia min theh ṭhet ṭhetah chuan meng riai riai in ka khap deuh fak fak a, tun maiah khan nikhaw hrelo in ka awm tihna em ni? Ka che hrut a, Ngurnunmawia’n nen hnai zetah kan in melh nghal ran a, “I rawn harh thei maw?” kan sir aṭanga Ruatsaka’n a rawn tih rual chuan, Ngura chu insiam remin, “I tho thei angem?” tiin min vawnna chu a ti thawl a, ka dinchhuah rual chuan kan awmna hmunah khan kan lo la awm reng a, ka hriat ngailo mipa pahnih an awm ve bawk a, nichin lawka min rawn tibuai tute pawh kan piah deuhah chuan kuthnung khirhin mipa pahnih te chuan an dinchilh ran a, an zinga pakhat chu a kut an tuam sak luk a, silai kha a puak tak e.

“Eng nge thleng a?” zawh bik nei lova ka tih chuan Ruatsaka zawk chu a kalsawn nghal daih a, “I taksa ala chak tawk lo chungin kal i rawt chu ania.” tiin a nui suk a. “Mahse,” ka tih hluai chuan, “Nikhaw hreloa i tlu kha kan tan vanneihna a ni, i tlu ka hmuh rual che khan dan che ka tum a, mahse i rit lutuk a leiah kan tlu a, silai mu kan dawn loh phah a,” min fiam tih hriat zeta a nuih vur vur a, atih chuan, “Awihawm loh lutuk.” tiin ka ner nghal nang a. “Ruatsaka te an rawn thleng zui bawk nen kan him phah ta a ni e, mahse kan zin rih lovang kan let leh a ngai, kha lunghlu tello chuan engmah kan ti thei chuang hleinem.” tiin an mi man te lam chu a pan nghal daih a.

Engtik laiin nge Ruatsaka te an rawn thlen ka hre lova, heng thil hi an hre lawk vek tih a hriat bawk. Anni pahnih hian ka hriat lovin an lo chhuiin an lo zawng ru reng anih hi. “Zorin i ṭha tawh em?” Ruatsaka ka bula rawn dinga a tih chuan, “Um ṭha tawh e, eng nge thil awmzia hi?” tiin zawhna ka zawt let nghal a. “Ngura ruahmanna vek anih hi. I awmpui Ruati kha an hmanrua pakhat anih kha.” tiin Ngura chu a melh nghal vung vung a. A thusawi chu mak ka ti takzet. “Ruati khan lunghlu kha a ru chhuak a, a tirah chuan Sangtei kha a ringhlel ber a, Ani pawh kan enthla tho. Tichuan ruahmanna a siam ta a, khatia zin in tum khan, Ruati ngaih ṭhalo khan Ngura kha thil awmzia a zawt a, chu chu kan tum a ni bawk. Ani in a lem zawk a bo tiin a sawi a, keini in kal hlan in Ruati leh Sangtei te kan lo enthla thung a. Tichuan thil awmzia i hrethiam tawh em” a tih chuan ka lu ka bu nghat nghat a.

An mi man te chu engtin nge an tih dawn ka hrelo na in, Ruatsaka chuan ka car chu khalhin kan pathum chuan Aizawl lamah bawk kan let leh ta a. In kan thlen chuan Ruati pawh inah alo la awm a, kan hmel a hmuh chuan phawk zetin min melh kual hlawm a. “Ngati nge khatia i men vak a.” tiin inchhungah ka lut nghal daih a. “Ah… Ngati nge in lo let inchungah eng nge thleng a?” a ti nghal luam a, ka chhang lo. “Zorini hi a lu hai a, kan rawn let leh ta mai anih hi.” Ngura zawk chuan a chhang a. Motor-ah khan an thil tih dan min hrilhfiah a. Ruati’n thildang a tih leh na tur venna’n tiin ka inah awm tir rih turin min ti a, ka hrethiam lo viau na in an ruahhman dan erawh ka sawi buai lo, a harsa ber tur zawk erawh engmah thleng lo anga Ruati leh Sangtei te bula awm a ni. Kei chuan engtikah mah ka theihngilh dawn lova, a titu nia kan rinhlelh te hriatloh der pawh harsa ka ti viau.

“UZorin in zin siloh chuan rawng ka bawl zo tawh a ka haw mai dawn asin.” Ruati’n a tih chuan nui lui sakin, “Aw le, a ṭha lawm, ka dam silova naktuk aṭangin karkhat lek hetah riak in i rawn awm thei angem?” ka tih chuan a hamhaih tih a hmelah a lang a, mahse inngaihtuah harh thut ni awm takin, “Ah Aw ka chhungte ka lo ve chhin a nga.” a tih bah nak a, “Um, i theih chuan ka lawm ngawt ang, i hriat kha tumah han pun tur ka neilo nen, Ngura rin ngawt theih a ni silova.Ilo awm theih chuan ka lawm ngawt ang.” tiin awm tura ka duhzia ka sawi chuan a hnar in ka ringlo, “Ah… Aw le naktukah ka thawmhnaw nen ka rawn kal dawn nia.” tiin nui var varin a chhuak zui nghal a.

“Ka thiam lo tiin i ṭang ṭung a kha i thiam viau kha.” Ngura’n nui vur vur a atih chuan, “A rawn riak duh angem le?” ka ti sap a, diktak chuan lemchan kawngah chuan ka hlawhchham ve chiang em a, khatianga Ruati ka ina awm tura ka sawm pawh kha ka theih tawp ka chhuah ve bawk a, mahse naktuk a thlena a thawmhnaw nen a rawn kal hma loh chu lo hlim viau theih pawh a nilo, ka lemchan kha min ringhlel zawk thei tlat si a.

“I hlauthawng mai mai anih kha, a rawn awm ngei ang. Engpawh nise naktukah Sangtei te dawrah kan kal angaih kha aw.” ka bula rawn ding paha a tih chuan, “Ka tello pawn i kal thei awm tho si a.” ti nang nangin choka lamah ka luhsan ta daih a. Diktak chuan lemchhan ka thiamlo, Anni ringhlel chunga engmah thlenglo anga lander pawh harsa ka tih zawng tak a ni. Mahse Lunghlu kan hmuh letna tur anih phawt chuan ka tih ngei angai si a. “Engkim bul ṭanna i ni a, Nangmahah a tawp angai” Ngurnunmawia ṭawngkam kha a dik a ni. He hna hi ka duh a ka thlan a ni a, a bul ka ṭan tawh ni mahse a kaldan erawh ka duang sa ang a nilo, mahse a tawpna erawh ka siam tur a ni a, Ngurnunmawia rawn kal chhan leh ka hna kharna tur anih miau avangin ka telve a ngai tlat a ni.

Mualpho taka ka hna aṭanga suspend ka ni a, tunah hian University lamah pawh buaina tam tak a awm tih ka hria, min laklet leh duh in zirlai tam takin nawrh an huaihawt a, kei mipui lamin chhan an hriat siloh in damdawi Inah hial ka lo awm ve nen, mipui titi ka siam a, ṭhenkhat erawh chuan ka harsatna tawhah ka pa in min pui loh avângin Politics infaknan an lo hmang bawk a, Mizo mipui te hian heng zawng zawng hi ka pa tih a ni tih hi hre ta se, ka pa hi an fak kher angem? Kei thleng hian dem kan hlawh zawk hial thei si a. Khang thil zawng zawng a thlen hnu khan ka patea’n min lo be deuh reng a, ka pa lakah a lungawilo viau tih ka hria, ka pa in harsatna min siam sak em tih min zawt reng bawk a, mahse tun dinhmunah chuan a la rawn lang leh hauh lo. Mahse ka rilru erawh ala ngai reng, Kei hian eng harsatna pawh tawk dawn mah ila ka pa nihna diktak phochhuah erawh ka la tum ruh fan, chumi atan erawh hun ka la mamawh mai chauh a ni.

Zanriah kan eikham hnu chuan thildang tih tur a awm lo bawk nen, Tv kan en dun a, chanchin thara ka pa nikhaw hrelo a atluk avanga damdawi ina an dah thu a puan rual chuan ka ding nghal zawk a. A office chhungah nikhaw hrelo in a tlu a, a bulah ka nuhrawn Hminghluti a awm ve tih sawi lan a ni bawk. Tunah ICU-ah a awm mek an tih chuan tih ber tur hre lovin ka ding reng a, ka phone a rawn rik chuan hmanhmawh zetin ka chhang nghal vat bawk.
“Zorin Bawihi, damdawi Inah i pa a awm i hre tawh em?” ka nutei’n rilru hah hmel zeta a rawn tih chuan, “Aih hrelo” ka ti zawi sap a. Ka hre chiah tia chhan ka duh mahse ka aw a chhuak theilo. Hetiang khawpa ka huat nisi, a damloh thu ka hriatna chuan min ṭhawng tho si a. Haw viah mah ila thi tur em chuan ka duh lo pawh a ni mahna. “I patea’n i theih chuan kal turin a duh che a.” a tih leh chuan, chhang lovin phone ka dah a, ka rilru erawh a kal nasa viau thung.

“Eng nge thil awmzia hi?” tia min zawh chuan ka melh zawk ringawt. Damdawiin kalloh chu ka duh, mahse ka kallo anih chuan engtin nge mite’n min sawi leh ang, tun dinhmunah hian mipuite dem rawn nih hi ka inpeih chiah em ka hrelo a ni. Mahse khatiang taka ka nu naa siamtu leh kei thleng pawh a min tichhe duhtu hmu tura kal erawh khawvêla ka thil chakloh ber a ni lawi si a. “Damdawiin lama kal chu i duh em?” Ngura’n ka bula rawn ṭhut thlak paha a tih chuan, “Ka hrelo.” ka tih chiah in ka chhang. Ngura pawhin ka awmdan chu a hrethiam animahna engmah min zawt zui tawh lo. Vawiin lam kan boruak tawn nen ka hah tawh viau chu a ni.

Darkar zen zawn ngawi renga kan ṭhut hnu chuan, “Ka rualin lokal ve ta che.” thaw nghal halha ka tih chuan a lu a bu ve nghut a, damdawiin lampan chuan kan inzui chhuak nghal a. Damdawiin kan thlen chuan zan ala tlai lutuk lo nen mi pawh an la awm nual mai. Ngawirenga inzuiin, ICU lam kan pan a, ICU pawnlamah chuan Aizawla kan chhungte ho chu chanchin ngaichang ni awm takin an lo awn deuh ṭhap a, kei leh Ngura min hmuh chuan mak an ti hmel zawk hialin ka hria. Ka rinlo deuh in ka Ni alo awm ve reng a, ka hmel a hmuh rual chuan thinrim zeta min rawn pan nghalin min ben tumin a kut a lek zuai a, ka bula ding Ngurnunmawia a che rang leh zawk tlat. Thil thleng tur hrelawk ang maiin min pawtsawn nghalin, a ban puam erawh a ri nghal thlawp.

Ka Ni in min ben a tumna a ṭhelh avangin Ngurnunmawia banah a beng zawk mai a ni. Midang ho chu an ri nghal hluai a, Ngura a dinsawn rual chuan ka Ni chuan mitmeng ling hlarin min melh ram ram a, a pasal in a vawn beh tlatna chu talchhuah tum ni awm takin a tal nghal nawk nawk a Patea leh Pa Liana rawn in rawlh vatin, ka ni chu an khak dai thei ta hram a, mahse a ṭawngkam erawh na ka ti viau mai. “I vangin ka u hi Damdawiina awm a ni, a chungah thil ṭhalo engpawh a thleng anih chuan i nuamsa hauh lovang.” thinrim insum sehchilh nawka a tih chuan ka insum hman ta biklo, “A damdawiin awm chhanah min puhna tihna em ni?” ka ti chang ta fak a, Ka Patea’n ngawi turin min rawn khak nghal zeuh, mahse Ka Ni Ropuii, a hming pu zo em em mai erawh a ngawi dawn hauh lo tih a thinrim hmel zet leh min rawn pan lehnghalah danah chuan ka hre thei.

“Nang mi tenawmnu, heti khawpa i pa Nangmah ngaihsak a, i nat ai chuan tia vawiin ni thlentirtu che, na leh hliamin i siam a, Nanga hna chhe tê, i felloh luat vanga buaina i tawhah pawh a zahawmna hralh duh khawpin a buaipui che a, i vanga a rilru hah luata hetianga awm hi a ni tih ila haider dawn cheu a maw, eng ang fanu nge maw i nih le? Vaw harh che ila, i sim mahna.” tiin a ang tawn tawn a, a thusawi erawh in ka nuih a ti za zawk. Hetiang khawpa min dema ka chungchang thu sawi tur hian ka nuhrawn te nufa chuan an lo hneh leh viau tawh a nih hi. “I nu aṭang reng kha mi rilru ṭha in nilo tih a chiang a, i nu chiah chiah i ni e.” tiin min melh rawm rawm a. Ka nu a sawi chhuak erawh ngawih ka tumlo. Ka laka a lungawiloh leh eng emaw hlek a, ka nu chhe tak taka a sawichhuah fo vang hi ania ka huat em em nachhan.

“I damchhung pawh a i tluk ngailoh leh i tluk loh tur ka nu i huat hi chu a reh theilo anih hi tiraw?” tiin ka nuih lui sak a, chu erawh a huat tawk a tling leh viau mai. Ka Ni ṭawng leh hmain ka pa Lawma a rawn in rawlh a, “Zorinpui duhtawk rawh, Nangpawh ngawi tawh rawh a tawk.” tiin ka Ni chu a melh run a, Patea pawh rawn inrawlh vatin, “Damdawiin anih hi in duhtawk rawh u.” a rawn ti ve nghal vat a. Ka pa Ukil leh a secretary an rawn lang ve rual chuan Doctor ka pa enkawl tu a rawn lang ve chiah bawk a. Ṭawng tawh suh u tih kan ngai tawh lo chiangin tupawh mai chuan Doctor leh Ukil thusawi hun kan nghak a ni ber e.

Doctor chuan,” Pu Siama hi a harh mai in kan ring lova, a taksa ah hian a ngeih loh thil tam tak, nikhaw hre lova siam thei tu a awm vang a ni. Hetiang hian eng chen nge a awm dawn hriat a nih loh avangin a duh ang ngeiin a Ukil Pu Mawia hi ka be ta a ni.” a tih chuan ka nuhrawn chu a rawn in rawlh nghal vat a.
“Engvangin maw ka pasal chu hetianga a awm?” tiin a inhnit nghal hlap hlap a, a fanu Roṭhuami’n a rawn dinpui nghal vat bawk a. “A taksa ah hian a tana pawi tur thil a tam avanga hetianga awm hi a ni, bp sang leh zunthlum a nei bawk a.” ti leh in Pu Mawia chu a mitmei zeuh a.

“Ka u chuan eng nge sawi a duh a, hetia a damloh chhung chu a hna tam zawk pawh kan pui angaih hmel a.” Pa Liana’n a tih chuan Pu Mawia chuan a file ken chu keu in, ka pa a ṭhat laia a ziah, eng dinhmunah pawh ding se a thu anga kal tur a nih thu a sawi chuan ka nuhrawn te nufa hmela hlimna chu ka hmu nghal zat. “Ka chungah engpawh thleng se, damlohna leh thihna hial a thleng anih pawh in ka hminga awm zawng zawng ka neih engkim, ka in, resort leh hotel chenin ka fanu Zorinpuii kutah ka dah e, Ani in ṭha a tih angin a enkawl thei ang.” a tih chuan tupawh mai chu kan mengphawk hra hlawm a, Ka nuhrawn te nufa chauh nilo ka ni hmel danglam nghal vek leh an hmela thinrimna rawn lang chhuak chu ka hmuh hmaih lo chiang kher mai. Mahse Pa Liana landan danglam ve kher erawh mak ka ti takzet.

“Pu Mawi, chu chu ka u ziah ngei maw ni a?” Pa Liana chuan a zawt nawn leh ngat a, Aw tia chhangin ka kutah file min rawn pe a, “Property zawng zawng i hminga awm anih angin Naktukah i duhna hmun sawi la engkim kan sawifel dawn nia.” tiin a chhuak zui nghal a. Ka melh kuala tumah ṭawng tum an awm lo tih ka hriat chuan ka pa Doctor lam chu hawiin, “Doctor khawngaihin enkawl ṭha ang che, a theih chuan Cabinah dah in, ka thu lo chuan tumah hmuh tir suh ang che, a nupui leh a nupui fanu lamin tumah in an hmu tur a nilo.” ka tih chuan ka Ni bawk a rawn inrawlh lehnghal a.

“Ka u ania nanga thu a awm hlollo heng zawng zawng pawh hi i tih chawp vek a ni ang, engkim hi i ruahmanna anih hi, Nang hian vawikhatmah i pa hi i ngaihven lo chutiang chunga i kuta engkim a dahna chhan tur a awm lo. Nang te chuan i pa tihchhiat a, do bak engmah tih i neilo.” tiin a ang zui nghal bawrh bawrh a. “I sawi dik, Kei hian ka pa tih chhiat vek bak lo duh ka neilo, chuvang chuan ka tihchhiat a ka tih nat anih loh tumahin in tichhe lovang.” ti let ngatin ka nuhrawn chu ka melh ka melh zawk a, min huatna mitmenga min melhin, theih ni ngat se kut hial min thlak duh ang. “Ka pa enkawl turin Doctor leh nurse thiam tak tak an awm a, pawnlama engmah ti thei silova awm hi a ṭangkai love, in duh chuan haw tawh rawh u,” tiin pawnlamah ka chhuak zui nghal a.

Kan thlen aṭang khan boruak mamawh khawp ka la hip miah lo anih ka ring, pawn boruak ka hip rualin ka thaw nghal kawk kawk a, ka hnunglam aṭanga ka dara rawn vuantu chu melh in, ka mittui a tling nghal pam a. a awma min kuahin, ka samah chulin, “I ti ṭha lutuk ania.” zaidam taka a tih chuan ka in sut nghal hraih a. Ṭah loh duh mahse thil thleng engkim vang khan ka hahin ka chau hluah hluah a, ka nu lehzel sawi tel a ni leh khan min ti na nawn leh takzet si a.

Zanlam boruak ṭha lo nen zing hma takah ka tho a, ka pa thiltih dan chu ka hrethiam lo hle a, min haw viau emaw ka tih laiin a Ro engkim ka kutah a dah a, engvang nge ni ang tih ka ngaihtuah thiamlo a ni. A hotel leh resort pawh vawikhatmah ka la hmu lova, Roṭhuami leh a nu Hminghluti vekin an enkawl a ni tih ka hria, an ta ni hiala ka ngaih thlenga ka hminga a dah chhan hi ka hrelo a ni. Hmelma ena ka en, kan inkar pawtchata ka hna ka zawh huna Amah tihchhiat vek ka tum thlenga sawichhuak tu ka ni a, hetiang thil alo ruahman lawk anih pawh in a duh chuan sut leh thei a ni mahse a tilo. A nunna a derthawng tih hre lawk ang hrima hetianga thu a dah pawh hi mak ka ti hle a ni. Ka patea bia in ka pindan ka chhuahsan nghal a. Ṭhutkhawmna lama bag lian lemlo tak ka hmuh chuan mak ti zetin choka lamah ka lut nghal a.

“Bag saw tu ta nge?” ka tih rual chuan, Ruati’n min chhang vatin, “Keimah.” atih chuan ka kâ ka ang hman zuai Ngura zawk chuan min ṭawng khalhin, “A fel khawp mai, I dam silova a rawn awm thei dawn a.” a tih chuan kan ruahmanna ka hrechhuak nghal zawk a, ka ṭawng sual hman lek lek a ni e. “A lawmawm lutuk e, saw pindan ruak a awm a, sawtah sawn i mu mai dawn nia aw.” ka tih chuan, “I pa chanchin ka lo hria a, a pawi hle mai.” a ti ve ve nghal vata, a landan rilru thianghlim hmel tak hi a rilru ni tel se a ṭha tur. “Ni e, a ṭha leh mai ang.” tiin a thingpui min pek chu ka in a. Ka ei siam tu ber a ni a, ka inchhunga thil a ru duh anih chuan ka ei turah hian tûr a pawlh duh hial lovang maw! Ka ngaihtuahna avangin chuan ka thingpui in chu ka hak nghal bawrh bawrh a, Ngura’n tui min rawn pek rual chuan ka in nghal vat a.

“Nga ti nge a?” a tih chuan, “Ngaihtuahna atthlak” ka ti hmukin pawnlamah ka chhuak nghal daih a. Balcony a ṭhutna awmah chuan Aizawl khawpui chu ka thlir a, tunhnaia ka chunga thil thleng tam lutuk ka ngaihtuah rual chuan ka hah nghal vek thei. Ka pa bawk ka ngaihtuah leh a, Engvang nge? tih bawkin ka tawp leh a, a rawn harhchhuah leh erawh ka duh, ka huatna reh lo mahse thi tur chuan ka duh bik hauh silova. “Zorin, i patea alo kal asin.” ka hnunglam aṭanga titu chu ka en a, Ani hi awmlo sela a ruala ka harsatna thleng zo zai te hi ka paltlang thei kher angem? Inngaizawng nilo mah ila, kan thinlung erawh a thuhmun a ni tih kan hre ve ve si a. Min hnar lova keipawn ka hnar heklo mahse kan khawvel a hrang si a. A tello a awmtheilo ni ngailo kha tunah chuan a tello a ka awm hun tur takngial pawh ka ngaihtuah ngamlo chu a ni tawh si a.

Inchungah kan lut a, ka patea’n min hmuh rual chuan thaw hawkin, “I ṭha em?” a ti vat a. Ka ṭha e tia chhan ka duh mahse ka theilo, ka ṭha lo em bawk a ni. “Pate , ka kohna chhan che u engkim i hria a, Nanglo tumah rinngam leh rin tur ka neih miau loh avang a ni.” ka tih chuan a ngaihna hriatloh hmel zetin min en a, “Hna ka nei a, ka hna ka thawh a ngai i hria, i theih chuan ka pa hna hi i enkawl thei mai angem? Fel fai tak leh khauh takin.” ka tih chuan ka sawi awmzia a hrethiam tih ka hria. Hotel leh resort bik Hminghluti leh Roṭhuami te kut anih miau vangin enkawlna a felfai lova, sum leh thildang pawh engkim ṭha leh felfai taka siam a ngai a, ka pa khan ti tura min duh thu a sawi lai khan ka hnial a, kan inhauh phah hial tawh a, tunah erawh loh theih lovin ka kutah a tla a, eng emaw tal ka tih a ngai a ni.

“Bawihi, Hotel-ah kalin file leh engkim ka enfiah a ngai dawn a, tin i pa Office-ah pawh kan luh a ngai ang, engtin nge heng zâwng zawng hi i pa in a chinfel ṭhin tih hriat a pawimawh chutih rualin Hminghluti te nufa pawh kan thlahthlam ngawt thei lovang.” a tih chuan, ka ngawi ngal a, “Bawihi i rilru tur ka hria, i lakah ṭhat an chhuah ngailo tih pawh ka hria mahse kut benga i chhuah tir emaw i awm ngawt kha thil tih dan tur a nilo.” ti leh in ka ngaihdan hriat tumin min min en reng a, “A ṭha lawm” tiin chhang mah ila, Anni erawh an ngawi mai mai dawn lo tih chiang takin ka hria.

Ruatsaka a rawn thlen hnuin Ngura nen an inzui chhuak a, keini pawhin hna kan neih avangin kan chhuak ve nghal a, ka inchhungah camera leh ṭawng ngaihthlak na tur dah a ni a, tuna Ruati pindan hmanah pawh an dah bawk. Chung erawh Ruatsaka’n alo ngaihven tur thu a sawi a, Lunghlu zawn hnaah chuan engmah ka inrawlh ve a ngaih loh thu a sawi bawk a, chuvâng chuan ka pa in a damloh san thil te ka theih tawka buaipui hrih phawt chu ka hna a ni. Hotel meeting room-ah ka pa ukil Pu Mawi leh a secretary Ramfela hovin kan pali in kan inhmu khawm a, ka pa secretary hian engkim a enpui a, Minister anih hnuah pawh a chhawr zui zel avangin a rinawm tawk ang tih ka ring.

“Pu Mawi ka pa chuan ka hmingin a dah takzet a maw?” lehkha engkim ka kutah a hlan tawh hnuah pawh ka rinhlelhna a reh theih meuhloh avangin ka zawt leh ngat a, lu bu nghauh nghauhin, “Keipawn hetianga thu tlukna a siam hi a chhan ka hrelo, i nuhrawn hi a fello viau anih pawh in, Hotel leh resort te hi ṭha takin a enkawl a, i pa pawh khan a ring khawp khan ka hria a, mahse kar hmasa lawk khan a thu a rawn thlak a, a chhan erawh ka hre hauhlo, a chhan ka zawh khan a ṭul tih bakin a sawi silova.” a tih chuan thaw hakin ka ngawi vang vanga. A secretary Ramfela erawh engmah sawi lovin a ngawi reng thung.

“Ka pa awmloh hlanin a hna i khawih tho a ngaih hmel a, engtin nge rorel tu lamin an tih dawn la ka hre heklo engpawh nise tuna kan buaina hi engtianga kalpui nge i ngaihtuah dan deuh?” Tia Ramfela ka zawh chuan ka patea leh Pu Mawia chuan mak ti hmel zetin min en a, mahse hei erawh ka chiang, ka pa hna zawng zawng hrechiang bertu chu a secretary hi a ni tlat. Ramfela’n a ngaihdan a sawi hnu chuan rawtna dang a awm loh avangin, thu kan ti tlu ta a, Hotel leh Resort te chu a kaldan ngaiin a kal tawh dawn a, mahse Hminghluti’n enkawl tawh lovin ka patea’n a enkawl tawh dawn a ni. Hminghluti te erawh an sum neih dan a ruka enfel anih hnuah chauh an mamawh dan a zira pawisa hman ve phalsak an ni, chupawh ka remtihna chauhin.

Ka patea’n motor a khalh a, keierawh in ka pa thiltih dan Pu Mawia sawi kha ka ngaihtuah zui neuh neuh a, min kidnap tir hnu lawka a thiltih anih duh hmel tiin ka ngaihtuah a, ka lakah a inthiamlo ti dawn ila, ka ina a rawn kal khan inthiamlo hmel a pu lo, ka patea’n a hnua a biak pawh in engmah heng lam a sawi heklo, engvangin tunah buaina tam zawk nei turin heng thil hi ka chungah a tih?

“Bawihi i phone a ri ania.” Ka patea ṭawngah chuan ka ngaihtuahna aṭanga harh zawkin, ka phone chu ka en nghal vata, Ruatsaka call a ni. “Hello” ka chhan rualin, “Ka pa Damdawi inah kan kalpui, ilo kal theih chuan.” a tih chuan hlauhthawnna in min tuam nghal vek a.

Conti…

Leave a Reply