You are currently viewing REVENGE S1

REVENGE S1

Spread the love

CHAPTER – 1

JONSMELY BAWITLUNG

“Mawla khatiangin thil ei tuam tuam zel suh, hmeichhia ve si,” titu ka Best Friend Rodingliana chu melh zeuhin, “A ho mai mai, min zahpui leh haw daih rawh,” ti let hmakin ka Burger ei chu ka keih leh tawn tawn a, thaw hawkin, min melh runin “Parsitriki bulah ka sawi dawn.” a ti leh ngat. Ka nu a sawina a ni, ka nu hi nu zawng zawng a nu strick ber a ni a, chuti chung chuan kei anga fanu Man lutuk leh che pawlawh ve tak min nei hi chu a vanduai a ni. A vanduai ka ti na hian ka u te pahnih erawh an fel lutuk, kan upa ber Lalrempuia hi khawtlang leh kohhrana mi fel leh hmantlak tak tia mite sawi a ni a, MA a zir zawh khan UDC hna hmu ve in tunah hian chu chu a thawk mek a ni. Tin, ka U tho Lalmalsawmi hi kei ang lo takin ka nu duhdan thlap in hmeichhe nû leh zahawm taka awm ṭhin, ṭawng tam ni miah lo mahse mi biang biak thiam tak a ni a, Ani erawh zirtirtu a ni thung. A mizia leh a hna hi inrem tak a ni bawk. Kei erawh ka piang tlai deuh a, U Malsawmi nen hian kum 6 ngawtin kan inthlau a, tunah hian B.A first sem ka zir ve mek a ni. “Tualvung a mak,” tia ka kuta hmarcha chu a rawn la a, hepa min ngaihtuah lutuk hi chu ka haw ṭhin. Margareth Lalengmawii ka ni a, mi zawng zawng hian Maggie tia min koh laiin Rodingliana ve hi chuan Tualvung min ti daih a, keipawhin Rotuibur tih bakin ka ko ngai bik lova. “Hmarcha i ei vak vak a, nakinah ka mawng a thip i ti leh nga, i hrawk a na leh bawk ang, ninawm buaithlak zawng hian khawsa reng lo teh,” tia rum zeta min melh leh chuan, “Inah pawh ei an phallo a, hetah lehzel ninawm e,” tia ka phun nui nui chu, a hmela min khawngaihna ka hmu nghal. “Ei zo vat la ice-cream kan ei dawn nia, class ṭan hma kan ei hman,” a tih leh chuan nui var varin, “Rotuibur i ṭha ber,” ka tih chuan a nui suk a. He mipa chhelo lutuk ka Bestfriend a ni hi nuam ka ti, High School kan kal lai aṭangin kan inkawm tawh a, a hmelṭha in mahni invawng tak a ni a, ka hriat tir ata vawiin ni thlengin mipa luck tak a ni bawk. Mahse bialnu a nei ngai miah lo hi mak ka ti ṭhin. Ka peih lo hi a ti mai zel a, kei hmeichhe nû zawk zawk nilo bawk nen, harh em em lutuk ka ni lehzel nen min vengtu tura hetia a awm hi ṭhatna lai a tam, Tonsil na vangin harsatna ka tawk fo a, hmarcha leh uih ei phalsak ka nilo a, ei leh in uluk a ngai si, vengtu neilo chuan ka tan a buaithlak. Mahse vengtu ka nei chung hian a ruka ei hi nuam ka ti viau lawi a. “Ka bodyguard hlawh neilo,” tia ka fiam chuan, “Tualvung taka, kawrfual hi ha ve chhin teh,” tia kan hmaa hmeichhe panga kal kawrfual ha chu a melh vung vung a, kei erawh ka ner nghal nawng thung. College -ah Hmeichhe thawmhnaw ka inbel ngailo tih a hre ve reng sia, a fiamthuah ngai mai ang. Chhang lovin Ice-cream zawrhna lamah ka kal nghal hmak a, mahse kawta mipa rual awmkhawm avang chuan ka ding nghal chawt. Kan sinior te an ni a, an zinga ka hmuh chak lo ber Nicky Lalmuanzuala a awm avanga lut duhlo ka ni bawk.  Ani hi kan college principal fapa a ni a, A nu pawh hi lecturer a ni ve ṭhin, mahse a bang tawh. An chhungkaw sumdawnna nen an hausa hle tih he college-a kal te hi chuan kan hre vek. Mipa hmelṭha leh chhelo tak a ni a, College hmeichhia te zawng zawng deuh thaw star rawn a ni. A ṭhian niha a hmelhriat nih duh hlir an kat nuk a ni mai, kei tih loh. Keichuan he a nungchang midang te hnuaichhiahna leh a aia hniam zawk laka a inluling fo ṭhinna te, a chapo na leh a ngeng lutuk te hi ka ngaithei der lo. A hnaiha awm pawh hi ka thil duhloh ber a ni bawk. Buaina nei reng ang an ni a, College pawnlama an buaina hi mi ṭhenkhat te thupui a ni. “Tualvung nga ti nge?” ka din reng avanga Rodingliana’n mak ti hmel zeta min zawh ruala kan hmaa awmte a hmuh chuan, “Hmundangah lei mai ila,” a ti nghal a, ‘Um,” tiin, inherin ka kal nghal a, mahse ka kal thui lo, “Saw nu saw lawm ka sawi, ka mutpui chak ania,” titu avang chuan ka ding chawt a, ka hawi let leh ngat, “Wow, ka ṭawng i hre pha ni maw, Engzat nge pay ila,” tawn ti lang lang tu chu Nicky-a ṭhianpa Lawmpuia a ni. Rd-a’n ka banah chelhin, “Magg kalsan ang.” a tih chuan, ka hmalam melhin, min chelhna chu ka thing thla a, an awmna lampan chuan ka let leh ngat. Lawmpuia hmaah chuan dingin, “Eng maw i sawi kha?” ka tih chuan, “Pay ila, engzat nge i duh?” tia hur hmel zeta min melh kual vel chu, a hmaiah ka beng nghal pawp, a ṭhiante nen chuan an ding nghal hluai a, min ben let tuma min tin erawh rinloh deuhin Nicky-an a ban a man sak a. “I duh chuan Ks tam tak an awm, khatiang khan vawikhat mah min be leh tawh suh ang che, a lehpekah chuan Jail-ah a ni tawh ang,” ti hmakin ka kalsan nghal a. Kan kal hnua an ri hluai pawh chu hre pha mah ila ka hawi let eih lo. An ṭhian ho mai nilo midang pawhin min hmu ṭeuh tih ka hria, naktukah chuan College titi ka ni ngei ang. Mahse a pawi ka tilo. Ni e, Mi hausa fa inkawm khawm an ni a, College en bik an ni, mahse an nungchang chhe tak avang hian tupawh an tibuai in an duh dan danin an chhaih nawmnah theilo, a bikin kei Inspector Lalrinpuia fanu hi. Ka kut sen rum chu melhin, a aia na khan ka lo beng leh lo a ni tiin ka phun sap a. “Magg, khatiang ṭawngkam mai mai te kha chu en liam ve la, i thin hi a chhe mah mah a ni.” Rda’n a tih chuan, “An duh duh danin an ṭawng a nga ka lo tuar mai mai dawn i tihna a mi?” thinrim zeta ka tih chuan, min chhanglo. “College hi an ta a nilo, tin, tupawh khatianga chhaih nawmnah theihna dan kha an neilo, a lehpekah chuan ka kut nilo in ka ke in a ni tawh ang,” ka tih chuan, “I ke in i beng dawn a mi?” a ti nghal sup. Thinrim lai mah nise a thusawi avang chuan ka nui chhuak hawk a, “Mawla tu nge ke in beng ngai, a thuhrimah nang hi chuan min pawngsual pawh tum se min chhan ngam lovang,” ti nghatin class lam panin ka kal nghal daih. Ka bana na zeta min pawt let dawr chu a ngaihna hrelo zetin ka melh ha a, ” Lalengmawi kha thil kha sawi tawh miah suh, i chungah hian tupawh in tihluihna a ni emaw tenawm taka an khawsa anih chuan a ṭul anih phawt chuan ka thih thlengin ka sual let ang,” nghet charha Rda’n a tih chuan ka thusawi tak avanga inthiamlo ru zetin lu ka bu nghat a. Class kan lut erawh a nuam tehchiam lo, mi zawng zawng hian min melh hrek hrek ni berin ka hria. College kan bang a, Ka bike chhuanvawr ka nu phallo chunga ka pa min leisak KTM chuan Rda nen kan inphur haw leh a, hepa hian scooty a nei ve a, petrol a uihawm a tih avangin ka bike hnung seat hi a ta a ni ringawt. Rda hi Aizawl khua an ni ve lova, Aizawla lehkha zira awm an ni. Lawngtlai khua niin, kan inkawm tir a, Amaha ka lawm em em pakhat chu a ṭawng awn lutuk hi a ni. Tin, Mizo ṭawng a hmang diklo nasa ṭhin lutuk kha, ka nuihpui nasa ṭhin. Mahse kan inkawm rei a, a rilru ṭhat zia te, a uikawm loh zia leh ka nu leh pate a vawikhat hmuhna aṭanga ka nu ka pa a ti ve mai te kha ka tan hian a special. Ṭhian ṭha tak anih zawm zel a, ka nu leh pate rin ber pawh a ni. Umali hian min chhaih fo a, mahse hei chen kan inkawm a, ngaihzawng buaipui lo ve ve kan ni bawk nen inngaihzawnna lam hi a lang miah lo chu ania. Ka sawi tawh ang khan ka nungchang hi a pa viau a, tin, ka harh hle bawk. Ka pa hian a fatea a hnung zui tu tur a duh viau rual hian ka u te pahnih hi chuan Police lam hna an tui ve miau loh avangin keimah hi ni leh mai. Police nih ka chak a, ka tum bawk. Fitness ka ngai pawimawh in, ka nu hian keimaha min fak awmchhun chu kan chhungkuaah tumahin zing min thawh khalh ngailo. Zingtin ka walk a, ka piannalh ti fo tu te hian ka tih ang hi ti ve se an nalhpui ve tho ang mahse keichuan nalh aiin fit ka care zawk. Insual zir ka ngen nasat em avangin High School leh Higher kal lai khan Karate ka zir ṭhin a, mahse College ka rap a, ka nu hian chhunzawm a phal ta lo kha ania, tihian skill ka hriat ang ang hi zing ka tlan pah hian ka ti chhunzawm ve zel a, heng te vang pawh hi aniang duh aia ka huaisen mah mah ṭhin. Mahse tumah ka tibuai hmasa ngailo, a bikin hmeichhe lakah buaina neih ka duhlo bur, a chhan sawi tam lo mai ang. Rodingliana hi chu hostel-ah nuam deuhin a awm a, zing tlan vel hi chu a ngai pawimawh lo. Mahse a thau ngai miahlo hi a vanneihna a ni. Ruihtheihthil a ti lova, zuk leh hmuam a tilo bawk a, Supari a heh em em a ni mai. Hetiang kawngah chuan kan in ang chiah, zuk leh hmuam tih loh hi taksa hriselna atan a pawimawh miau alawm. “Vawiin video viral hi eng nge awmzia?” Inchhung ka luh rualin ka nu in min dinchilh nghal ran a, nidang ang lo zetin ka u te leh ka pa an lo awm bawk. “Eng video maw?” ka tih chuan ka hmaah phone rawn lek kangin vawiin a Lawmpuia ka benna chu chiang takin a lang a, voice erawh dah lovin Inspector fanu tih erawh a in ziak lang kuau thung. “Sawifiah rawh,” thinrim awki hniam zet si a a tih leh chuan, “Min chhaih nawmnah vang anih kha,” ka ti sap a. Ka nu hi a strick ang chiahin a thinrim a hlauhawm a, ka u te pahnih hian an hnial ngai miah loh avang hian keipawhin a thinrim ka hnial ngam ngailo. “Bawihi, kan mualpho hle ania, eng nge thil awmzia?” Ka pa in a tih ve leh chuan, thil thleng zawng zawng chu ka sawi ta vek a, ka nu chu thaw hakin, “Malsawm Dinga kha phone teh,” tia inher hmakin chokaah a lut a, min rinloh vanga khatianga awm kha a ni em? “Ka pa min ring tiraw?” ka tih chuan, a lu bu nghatin, “Mahse ka fanu a landan hi chuan thiamlo zawk kan ni miau a, ngaihdam kan dil mai angai in ka hria,” atih chuan, ka sa leh phat tawh. “Engvangin maw ka pa?” kut hum ruh ṭeuha ka tih chuan, min chhan hma in Rda a rawn lut a. “I ṭha em?” a ti nghal vat. “Ka ṭha, mahse ka chhungte hian ngaihdam dil an tum anih chu,” ka ti nghat a, chair-ah ka ṭhu tum nghal bur a, Rda thawm hria in ka nu a rawn lang leh a, “Dinga eng nge thil awmzia hi?” nelawm loh zeta ka nu in a tih chuan a chhan hma chuan, “Min rinloh vangin Rodingliana hi i koh tir tihna ni maw?” ngeiawm zeta ka tih chuan, “Margareth,” URempuia’n a ti nghal ṭhawt. “Eng nge? Ka thusawi ringlo turin engvangin nge min zawh,” ka thinrim em avangin ka aw ki pawh a zaidam bik hauh lo. Hetiang hian ka u te ka be ngai miah lo, mahse ka nu in min rinloh vanga Rda a ko kher hi ka hua, dawt ka sawi ngailo a, dawtsawi ai chuan ka tihsuala tuar ngam tura zirtir ka ni, min hrechiang em em tu in hetia min ti hi ka la na a ni. Ka vin em avang chuan tumah an ṭawng zawm lo, thinrim zetin inchungah ka chho nghal hmak a, duh leh ngaihdam chu va dil rawh se, mahni fanu te zahawmna pawh hum ngam lo tihna an ni mai, ngaihdam an dil anih ngat chuan kei hi ka sual tawh viau ang, ti rilru in ka pindanah chuan ka in sawh tau nghawng nghawng a, ka thinrimna chu mei angin a alh pup pup a ni mai. Ka pindan kawngkhar kik ri chu hre mah ila hawn ka tum lo. Ka vei kual sek a, video thehdarh a, mualpho a min siam tu hi hriat ka chak hluah hluah. “Bawihi kawngka hi hawng teh,” ka nu in a tih chuan thinrim ṭun chung si in ka nui chhuak hak. A fate hi tumah min ko duat ngailo, Kan hmingpum deuh thaw hian min ko lawl lawl zel, kohna atana phuah alawm ti hmiah zel mahse min enkawl danah hian sawisel tur ka hre miah lo. Hetia min ko pawh hi a inthiamloh vang a ni tih ka hria, mahse ka thin a rim laklawh. “Bawihi lo hawng teh,” a tih leh chuan, lungawilo zetin ka hawng a, ka pindanah rawn lutin ka khumah a ṭhu a, kei erawh ka tih dan pangngai in ka tei kual sek tho. Ka thinrima ka awmdan ve ania, ka nu hian hmeichhia hetia awm kual chiam hi ching tam suh a ti fo a, ka sim theilo chu anih hi. Mipa ang mai hian tha za te hi ka nei reuh a, ka thinrim tawh hi chuan rik bur mai hi ka duh ṭhin, chu erawh ka la ti em lo chu ania. “Ka rinloh vang che a Dinga hi ko ka nilo, kha thil ka hmuh khan ka fanu hian chhan neilo in a ti dawn lo tih ka hriatchian em avanga a hnen aṭanga hriatnawn ka duh vanga ti ka ni lawm.” zaidam taka a tih chuan ding chawtin ka nu chu ka en a,” I ben kha tu nge kha a hming?” tia min zawh chuan, “Lawmpuia” ka ti vat. “Um Ani kha i pa te pu fapa ania, i pa a rawn haw khan thil ṭha tak a thlenglo tih ka hria, tin, ngaihdam dil mai a finthlak a ti anih kha, mahse ka fanu hi ka hrechiang che a, dikna lamah i ṭang dawn tih ka hria a, tin, mahni diknaa tlawm turin ka zirtir ngailo bawk che,” tiin a nui lui a, “I pa hnenah eng nge ka sawi i hria em?” a tih leh chuan, “Eng nge?” ka ti vat. “Thu ka zawtfiah phawt ang, chhan neilo in ka fanu hian engmah a ti dawn lo ka ti a, chhan ṭha tak chu alo nei ngei alawm, ka rin ang chiah in.” a tih chuan sawi mai tur ka hrelo. “Chuan ngaihdam chu dil in tum tho em?” ka tih chuan, “Ngati nge kan dil ang, ka fanu hian huaisen takin a zahawmna a hum alawm, tumah hian duhdah tak leh mawilo takin an chhaih nawmnah theilo che. Mahse buaina dang ka duhlo ania, tuna kan buaina hi engtiang in nge a kal thui dawn tih hrelo mah ila, tun buaina bak hi chu buaina lak ata inthiarfihlim hram turin ka duh che, i ti thei ang tiraw?” a tih leh chuan, ka nu bulah chuan ṭhu in, “Ka tum dawn nia,” ka ti ve sap a. “Inthlak la chhuk ang, Dinga pawh chaw ei rawh se, chaw ei a hun ania reilo la,” tiin min chhuahsan a, ka nu a chhuah chuan Bathroom lutin ka inbual nghal a, hetiang taka nu leh pa ṭha kan nei hi kan vannei a ni, piannawn leh mah ila Anni ang tho hi nu leh pa atana ka duh an ni reng dawn. Ka inbual zo inhnuaia ka chhuk chuan ka pa leh URempuia ṭhutkhawmnaa muk taka ṭhu ka hmu nghal a, ka u in min hmuh ve rualin, “Mate chokaa lamah chaw ei an siam,” a ti nghal vat a, anmahni pawh lo tura min duhna tih ka hriat avangin, chokaah ka lut ve nghal a. “Umalsawmi’n, “Ka nu hian i chawhmeh duhzawng a siam ve miah lo,” tia thleng a lakchhuah chuan, “Tu chawhmeh duhzawng nge a siam?” ka ti nghal vat a, “Ele a makpa hual Dingbawihtea tan hian mawle,” a tih rualin, “Naa, Henu hi ka nei duh teuhlo, kei ai pawn a pa zawk,” a tih chuan ka u leh ka nu chu an nui hak hak a, “Nu, Tualvungi vang hian bialnu pawh ka nei ngam lo, min ti zak thei lutuk,” a tih chuan fiana tin nghal uai in, “Rotuibur zak teh, keimah vang a ni thlawt lo,” ka tih chuan, “A ni awm emai khatianga i tih ziah te chuan nangmah hlau in an tlanchhe vek ang,” UMalsawmi bawkin a ti leh a, Anni pahnih ṭangrual hi chu engtikah mah ka hnial hneh dawn chuanglo tih ka hriat avangin ngawi hmakin chaw ka khawrh nghal a. Chaw ei chuan engmah thlenglo ang maiin an titi bawrh bawrh a, kei erawh ngawirengin ka ei leh mial mial tawh. “Tuma’n an ei khalh lovang che, ei muang deuh rawh,” ka pa in a tih chuan ka hawi chhuak vat a, an vai chuan min lo en ṭhap tih ka hriat chuan, mit ko kan zeuhin, “Ka ril a ṭam alawm,” ka tih chuan, ka nu in, “Mipa ang mai hian thil ei suh,a tihna che anih kha,” atih rualin midang an lo nui hak, hetiang hian min hau mahse kei angin tumah hi an in fit lova, taksa nalh an nei lo. Exercise la ve peih miau heklo. Rda a haw a, lehkha zir ka tum ve ngial a mahse a har, kan class whatapp ka hawng a, thu hrechiang lova sawi an tam, ka awm ve ni tih hrerenga min dem em em tu la an tam, ka lam ṭang ve deuha ṭawng erawh mi tlem te chauh an ni, ka chhiar zo vek peih lo, “Anihna tak hrechiang lova huaisen taka ṭawng hi kan hnam zia a ni em ni? Duhdah taka chhaih nawmnah tura hmeichhia hi siam kan ni em ni? Mahni zahawmna humhim zolo nih ai chuan, thih thlengin ka bei let ngei ang,” tih post in lungawilo zetin phone dahin ka mu a, hetiang buaina hi ka ning, tlaktlum tum ni awm taka hmeichhe ṭhenkhatin an lo ṭan vel te hian ka luak an ti chhuak. Ngati nge social media a buaina emaw, video post awm hlekah hian hria nih duh leh dik nih duha thusawi te hi kan tam tak em em mai le. Hmeichhe tam tak aiin kan mipa te hi an kam tam zawk emaw tih tur hian, mipa leh mipa an inhnial luai luai a, a bikin sex video leak out awm hlek se, a sawi peih leh sel zui peih peih an ni a, hmeichhe ṭhenkhat la in, hmeichhe mualpho na tih hrerengin a mualpho a te an dem in an diriam a, ka nilo tih avanga midang dem chiam chiam a, post kual zuk zuk ṭhin te hi eng nge an nih chiah bik ang tih hi ka ngaihtuah ṭhin. Midangte mualpho naa hlim tlat thei nun neitu hi, a nun a khawngaihthlak ka ti mai, ngaihtuah zawm tawh lo teh ang. Ka muhil dawn chauh a, ka phone a rawn ri a, Rda call a ni. “Hello” ka tih rualin, “I ṭha em?” a ti nghal vat a, “Ka ṭha lo ngai reng reng em ni?” ka tih chuan, “Group kha i en ve lo a mi?” a tih chuan, “En vek ka mut a chhuak,” tiin ka ham bai bai a, phone a dah leh dah loh pawh ka hre zawm tawh lo. Ka harh chuan khua a eng ṭan tawh a, ka mumang ngaihtuah zawmin Bathroom-ah ka lut a, Lalmuanzuala ka hmu ve ngawt anih kha. Engtin nge kan awm hrechiang lo mah ila, chiang takin ka hmu tih erawh ka hria, eng nge khapa kher kha ka hmuh, mang lam pawha ka hmuh chak loh ber anih kha. Pawn ka thleng a, engkim theihngilh a chak taka tlan ka duh, ka earphone siam ṭha sauh sauh in, chak takin ka tlan a, nidang zawng aiin ka tlan reiin ka tlan chak zawk. In ka thlen chuan ka hah avanga thaw hlawi hlawi in, tui ka in nghal khawlh khawlh a, thawm a la reh ṭhiap avangin tumah an la tho lo anih ka ring, dar 6:30am a ri tawh a, ka nu leh pate chu tho tawh tur an ni asin le. Ka thlan hru faiin rice cooker ka on a, ka nu thawh huna a hman turin tui ka chhuang a, inchunglamah kalin UMalsawmi pindan kawngkhar chu ring zetin vawi thum ka beng a, k nia fiam ve dan ania, ka pindanah ka lut nghal daih. Ka beng thawmah URempuia pawh a tho ngei ang, an phun leh nang nang dawn tih ka hriatna chuan mahni in min ti nui var var a. Ka inbualfai zawhah inhnuaiah chhukin ṭhutkhawmna lama ka pa leh URempuia ṭhu chu an bulah ka ṭhu a, Ka u leh ka nu erawh eirawng an bawl anih ka ring. “Magg, rawngbawl hi zir ve rawh,” URempuia’n a tih chuan, “Ka thiam sa vek alawm.” tiin ka nui var var a, ni e thiam lo ka ni hauh lo, ka nu strick khat tlat hian buh thlei thlengin min thiam tîr miau a, mahse ka u a awm a, ka ring thei bawk a, ka nu awm bawk a, choka lam hi chu keima thu in ka indah awl hmiah. Ka nu pawh hian ka u in a pui chuan min phut ngai lo. Naupang ber nih man a ni ve a. “Engmawi, I pa ho khan thingpui lo in ru,” ka nu rawn au lang lang chu nui hakin, “Pa kal ang u thingpui sial kan in dawn,” ka tih rualin ka pa chu tho in choka lamah chuan kan lut ta dial a. Mite chu awmhmunah thingpui an inpe mai a, mahse inleng kan nei anih loh chuan keini chhungkua erawh chokaah kan in mai zel, ka pa hian chhungkaw inkawmna hun atih avangin thingpui ka in chakloh chang pawhin ka awm ve ziah tho, ka pa duhdan a ni miau a. Chaw ei lai erawh chuan thil pawimawh an sawi fo avângin thingpui in laia kan titi hi kan chhungkaw boruak a, a nuam ber a ni. College kal turin ka insiam a, ka nu hian tiffin pai rawh a ti ziah a, he thil kher hi chu ka zawm ngailo, tumah hian college a tiffin pai hi an peih bikin ka ringlo. Rda ka sawm a, hostel kawtah a lo ding leh ran tawh, “Vawiin chu ka lo khalh,” a tih lei chhuak vakin, “I duh leh o scooty khalh ve mai rawh,” ka tih chuan, “Uikawm viau suh,” tiin a hnunga tawlh turin min vai nghal zuk a, keipawh ka tawlh hnung ve mai. “Rotuibur kumin chu Christmas ka rawn hmang phei teh ang,” college kan thlen ruala ka tih chuan, “Ala hla emai, a dawnah kan sawi ṭha dawn nia,” tiin class lam pan chuan a kal nghal nul nul a. Tunah nipui vanglai kan hmang chauh a, Christmas sawi daih chu ka ngaihtuah let a, keipawh ka nuih a za. Class kan lut chu an lo phun mur mur a, min hmuh rualin an ngawi nghal ṭhap. Kan ṭhutna kan pan a, “I ṭha em?” ka bula ṭhu, Mapuii’n a tih chuan lu bu nghatin, “Eng nge thleng?” ka ti nghal a, “Nizan whatapp kha an inhnial zui anih hi, tupawh hian kan ṭan vek che Anni tih loh,” tia tlar hmalama ṭhu, Mercy-i te ṭhian thum chu a melh zeuh a, “Ka lawm e, Anni saw chu Nicky-a fans alawm an nih,” nui hak a tiin, ka ṭhu a, ka ṭhut ruala ka hnunga ṭhu in, “Eng boruak pawh awm se, buaina a thleng tawh tur a nilo.” ti hmuk tu chu in hrein rum zet hian ka melh a, “Parsitriki ka hrilh a ni mai,” tiin a kiai suk a, lungawilo zet siin ka nui sang a,”Ka hria lawm,” tiin ka inher leh hmak. Par strick-i tih ve mai tur hi Parsitriki ti kher zel bawk a, a duhnaah hi chuan a ngeiawm in a chimawm thiam si, a thu hi awi phawt mai ang. “Maggie masala, engvangin nge nimin khan min lo sawm ve loh,” kan class a pawr ber Papuia’n a tih chuan, “Kal mai teh,” tiin kan nui dar dar a, class ṭan hma kan titi hlawm a, zirtirtu a rawb lut a, Roll a call zawh chuan, “Maggie, principal Office a kal tura tih i nia,” a tih chuan mithmul kan akin, rin aiin thil a kal thui dawn a ni maw? ka ti rilru neuh neuh a, ka chhuah dawn a, Rda min ngaihtuah hmel pawh chiang takin ka hmu. Principal Office kawtah ka ding a, kawngkhar ka ban ruala a rawn inhawn thut avang chuan ka phu zuk a, Nicky-a nen chuan chiang zetin kan in melh ta ran a, phun hlukin min kalpel a, Principal-in, “Rawn lut rawh,” a tih chuan, ka lut ve nghal a, principal office meuha luh chu a zam awm ve viau mai. “Ṭhu rawh,” a tih chuan a dawhkan hmaa ṭhutna awmah chuan ka ṭhu thla vat, nelawm loh in ṭawng tlem viau mahse a fapa aiin ala hmelṭha daih zawk. Ka ngaihtuahna chu duhlo zetin ka kut ka mala ka dah chu ka sik vak a, “Thil thleng hi i kâ aṭanga hriat ka duh a,” a tih chuan, ka aw thiankharh in, nimin lama thil thleng chu ka sawi a, “Anih Lalmuanzuala kha engvangin nge a lan ve?” a tih chuan, “Ani kha chuan Lawmpuia kut min thlak tum kha a dawm bet a, chu zawng chu a ni mai,” ka tih chuan, a ngawi vung vung a, “A ṭha e kal tawh rawh,” a tih rual chuan ka ding a, ka chhuak vat a, pawn ka thlen rual chuan ka thaw nghal hak, mahse ka hmaa mipa rawn ding thut avang chuan ding khawng atin dak vahin ka melh ta ran a. Mizo hmeichhe zingah chuan sang ve tak, ft5.7 ngawt ka ni ve a, mahse he mipa lakah hi chuan ka san tawk viau lo chu ania. “Nangnu avanga ka buaina hi a man i pek a ngai,” a tih chuan, hrethiam lo zetin ka melh ran a, “I hria em ka sawi chu,” fiah si zawi taka a tih leh chuan, ” I engmah ka ba lova, pek tur che ka neih ka hrelo.” ka ti let hmak. A nui lui suk a, “Ila hre mai ang, buaina siamtu hi chuan buaina dang pawh in siam belh zel alawm,” a tih chuan, “Eng buaina dang nge i sawi,” ka ti vat a, a thusawi awmzia hi ka hre miau lo a ni. A lu thing nghut in, “Hmeichhe mawl lutuk,” ti supin min kalsan nghal daih a, a ṭawngkam ka huat em avanga thinrim pen sawk sawkin class ka thleng a, zirtirtu an awm lova ka ṭhutna ka thlen rualin ka kal chhan min lo zawt sap sap a, mahse tumah ka chhang lo. Lalmuanzuala thusawi ngeiawm lutuk kha ka ngaihtuah zawm a, buaina siamtu min ti anih kha. Eng buaina mah niminah khan ka siam lo, tin, hmeichhe mawl min ti bawk a, engvangin nge mawl min tih ve ngawt, mawl min ti tur pawhin ka ṭhian a nilo a, ka hmelhriat satliah kan college principal fapa anih vang chauh a hria ka ni, an ṭhianho hi misual rual an ni ve hrim hrim a, hriat an hlawh bawk alawm. Khatianga min tih theihna dan kha a neilo, chuan a sawi angin engmah man pek tur ka nei heklo. Video viral avangin college hming a lang lo theilo a, sawi a tam in, ṭawngkam mawilo leh mak tak tak post la a tam, ka ti leh ṭhin ang, ngati nge Mizo te hi thu kan peih em em le, ni hnih khat a liam a nga an hre zui reng dawn lo tih hre mah ila a hunlai erawh a tuartu nih a hrehawm mah mah a ni. Kan buainaah khan kan pa te hnathawh thlengin sawi luh a ni a, mahse Anni hna vanga khatiang kha thleng a ni hek lo. “Ninawm ka ngaithla peih tawh lo,” vin zeta ka tih chuan Mapuii leh Siamtei bakah Rda leh midang chu an ngawi nghal hmak a, “An duh duh sawi rawh se, ka ngaithla peih tawh lo.” ti leh hmakin garrage lamah ka kal nghal nal nal a, Rda min kohna pawh ka chhang lo. Bike-ah lawnin kalna tur pawh hre chuang lovin ka tlanchhuak a, kha thil a thleng aṭanga a ni li na chiah a ni, mite hian theihnghilh tawh se, sawi chiam tawh lo se ka ti takzet, mahse boruak hian reh lam aiin zual lam a pan zel chu a ni si a. Bike ka tih din meuh chuan Hlimen park-ah ka ding vang tawh. Thawhakin bike aṭanga chhukin thingkung hnuaia ṭhutna awmah chuan ka ṭhu a, ka hmaa naupang infiamna tur atana an siam ni awm tak pipu leh inbukna te chu en in, ngaihtuahna ruak tak ni siin ka nui hak a, a hmun reh ruih leh dai ruih te hian nipui boruak lum zet leh ka hun tawn hneawm zet te chu min theihnghilh tir a, ka ṭhutnaah chuan in siamrem sauh sauh in dak ar ar mitchhing meuh in thli thaw heuh heuh min chhemtu chu ka dawng a, harsatna emaw buaina a thlen chang chuan hetiang hmuna awm hi a nuam ṭhin reng a ni. “Nang bawk maw?” titu avang chuan ka boruak nuam lutuk aṭanga harhchhuak in aw ka hriatna lam chu ka hawi vat a, Lalmuanzuala bawk ka hun ṭha ve tichhe turin a rawn lang leh tawh. Lawmpuia erawh a reh viau a, buaina min thlen zui lo na in, Amah avanga ka buaina erawh. aawm reng chu ania. “Nang hi mi zui ruk ching em ni i nih?” Nicky-a’n a tih chuan, nui hakin, “Misual awmṭha duh lo zui ru turin ka nep a mi?” ka ti let ngat chu rum zet hian min melh nghal khui a.

Conti…

Leave a Reply