FB_IMG_1701887702949
Revenge S2

RÊVENGE S2- CHAPTER -15

Spread the love

FB_IMG_1701887702949

 

 

PHUBA S2 -15

 

JONSMELY BAWITLUNG

 

(MAGGIE’S POV)

 

Buaina pakhat a fel a, buaina nasa zawkah kan lut leh a, he kawng ka thlan lai khan hetiang hun hi ka tawngah tih ka ngaihtuah pha ngailo a, kei chuan Rda tana phuba lak a, kan chhungkaw dikna hailan chauh ka ngaihtuah avanga he dinhmuna ding hi ka ni. Mahse ka thiltih pakhat lek vangin ka duh hunah pawh ka kalsan theilo chu anih ber hi. Ka fapa vanga chak taka awma, nghet taka ding ṭhin ka ni a, ka fapa ka ngaihtuah chhuah apiangin, Amah ka hmuh leh hun tur ka ngaihtuah changin ka chak leh zual ṭhin.

 

“Rengpui, Msi chu?” Delhi ka thlen aṭangin ni 1 chauh ala ni, mahse hah sawi hman a nilo a, buai sawi theih la a ni hek lo. Hun rei tak Mizoram lama ka hman chhungin thil tam tak alo danglam hman chu a ni si a. Engkim bul ṭanna hi khawiah nge tih hrelo mah ila, neitu nihna chang tam tak an awm tih leh, formula hralhchhuah anih tur thu te kan dawng a, tin, chung zingah chuan enthlak langsar zual zingah Ranveer Malhotra leh ram dang aṭanga rawn kal mi pahnih hming an lang a, chu erawh India an rawn luh loh nan vênhimna ṭha tak dah a ni tawh a ni.

 

Finfiahna ṭha zawk awm rih lo mahse Agra’s food Industry erawh darkar 24 chhung enthlak a ni a, Chaudhary’s Industry lam erawh sawi rik a ni ve lo. Ka rinhlelh ṭhinna tam zawk hi ka laka Mark awmdan hian a ti reh tial tial tih hre mah ila, ka en kan ngawt lo. Tin, Narayanan Industry pawh Nikhit-a kutah a awm avangin lïst-ah ka telh lo theilo a ni.

 

“A awmna chin nia kan hriat kan dap hian alo bo leh hman zel a, Sanjay pawhin theihtawp chhuah in trâck mahse engmah hi a dik theilo a ni.” Beidawn hmel zeta atih chuan, “Lïst kha ennawn leh ang hmiang,” tiin midangin an hna thawka min rawn ngaihven loh lai chuan ka dawhkanah chuan kan lehkha pawimawh ho chu ka pharh a, “Lïst -ah hian, Nikhit leh Lalrinzuali zawn hmuh dan kan ngaihtuah tel a ngai a ni.” ka tih sap chuan, Rsa chuan, “Rinzuali kha chu kan zawng reng mahse tu nge Nikhit?” atih chuan, ka sawifiah nghal vat a, tunah hian centrâl lamah hian buaina tam viau lo sela chuan South India lamah ka kal ngei ang, a ṭul anih phawt chuan ka unau pa leh Rda hnua ka kawmngeih em em Narayanan fapa hi ka kap hreh hauh lovang le.

 

“Naktuk zan anih kha aw, Conference kha?” kan thusawi laklawh laia kan Director-in a rawn tih chuan, “Ma’am, card eng emaw zat a awm nia sawi a ni a, kei leh Rsa hian card pakhat kan duh ve ania.” ka tih chuan, a lu bu nghat nghatin, “A ṭha alawm, mak in ti ve em?” ti deuh hluai in Rengpuia chu a melh daih a, “Hêll Prôject kha a rawn let leh ni maiin ka hria, mahse tun ṭum erawh taksa peng suasamna a thleng lo mai mai zawk a.” atih chuan, Rsa nen kan in melh zawk a, kan director thusawi hi engmah diklo a awm miau lo a ni. Rengpuia nen an inbiak lai chuan lehkha pawimawh kan neihsa chu ka remkhawm a, thlalâk te pawh ka en kual a, building pakhat thlalâk fiah vak lo lang ve chu ka en a, uluk taka ka en chuan fiah lo ruaia inziak Avasthi tih chu ka hmu nghal a, he thumal hi Jacky khan a thih hma in min hrilh anih kha. Avasthi tih hian awmzia thui tak a nei ngeiin ka ring a, building pawna langsar taka in ziak satliah ngawt anih la ka ring heklo.

 

Office chhûnglama hna a neih avangin Rengpuia leh Sanjay-a kalsan in Rsa nen chuan kan in zui chhuak a, lirthei ka nei tawh lova, office lirthei erawh hman mai tur a awm thung. “Eng nge a pawimawhna?” tia min zawh lai chuan chhanna chiang tak pe theilo mah ila, a pawimawh hle a ka rin vang chauh a he hmun kal pawh hi kan ni.

 

Chanchinthar leh channel dang ten ram chhunga thil thleng an puanb reng a, chutih laia Conferênce an buatsaih hi mak ka tih rualin, formula chungchang anga lantir a ni leh miah silo. Engkim hi ei leh in siam thar launch chungchang vek a ni a, reporter ten report an pe thiam in mipui tam tak an kal tel ngei dawn tih hriat a ni bawk. India in ei tur a siam chhuah tawh zinga fak hlawh ber tur anih zia leh ram pawna thawn chhuah hnem ber tur anih dan tur te chu chanchin thar leh tv channel tinah tih chhuah a ni a. Bollywood a lar ber berin an fak bawk a, mahse keini lam chuan a phena thil awm kan hriat miau avangin zanin lawka thil thleng tur hi ka ngaihven reng chu anih hi.

 

Buai a zual a man chhuah annih hma ngei a engkim kal tlangpui an duh tih hriat taka an thil buatsaih tur lam ngaihtuah chuan tuna an ruahmanna hi a fing fel fai thlap lawi a, kei erawh chuan an sawina hmunah hian engmah an hmuh chhuah ka ring ve lo thung. Car a din rualin ka hawi chhuak nghal a, building pawna Avasthi tih inziahna chu uluk takin ka en a, mi hausa ho bazarna hmun mall pakhat a ni tih ka hre nghal. A building a lian viau a, a chhunga lut thei nih ringawt pawh thil nuam tak tia sawi ṭhin a ni. Kha hun chhung zawng khan he hmun hi anih ka beisei loh lutuk vang nge ka hrechhuak ngai hauh lo chu ania. Tin, tunah pawh he hmun ngei hi a ni angem tih ka la hre chuang lo chu anih hi.

 

“Kan lut chhin dawn em ni ang?” Rsa’n atih chuan, pawi ka tih loh thu a chhangin, motor hung ṭha in kan lut ta a. A building a lian a, a ropui hle bawk. India rama shopping mall ka hmuh a zawngah chuan ala changkang ber hial in ka ring. A chhûnga bazar te pawh an nalh in, an landanah pawh mi hausa te fuan khawmna tih a hriat hliah hliah. “Eng ber nge kan tih?” ngawirenga kan teikual.fê hnu chuan Rsa chuan a ti chhuak hawl a, elevator bulah dinpui in, a zawhna pawh chhang lova a inhawn ruala ka luh chuan min rawn in zui lut ve nghal vat a.

 

“Eng ber nge kan tih dawn pawh ka hrelo,” tia ka nuih chuan hrilhhai hmel zet hian hian min en a, “A building pawna in ziak khan ka mit a la a, enfiah mai mai ka duh a.” ka tih leh chuan a thaw haka engmah a sawi chuang lova. Chhawng ruk lai a ni a, ka kalna apiangah min zui a, ka teikual pui rei ta aniang, “Lokal teh,” tiin restaurant pakhatah min luh pui a, menu a keu nghal zat chu ka nuih ta ringawt a.

 

Hetia a landan maia en chuan mall lian tak pakhat thil changkang ber ber zawrhna hmun a ni a, mahse he building kher Jacky-an a sawi chhan kha hriat ka duh takzet a ni. Amah thattu laka phuba la mah ila, Ranveer Malhotra ka man hma loh hi chu chawlh mai ka tum lo. Ani vanga ka chan leh ka natna te hi a vaiin ka rul ngei ngei ang tih hi ka thutiam a ni. Kan thil chah kan nghah lai pawha ka hawikual reng chuan Rsa rilru chu a ti hah viau pawh a ni mahna, “Maggie zawn chu i nei alawm,” atih chuan khi sakin, “Um, mahse ka zawn ber hi ka hrelo alawm.” tiin Jacky boral hma thil leh a computer a bo.tak avanga information tam tak a bo tak thu te ka sawi a, tin, a thih dawna a thu hnuhnung bawhzui ve tawp ka nih dan te thlengin ka hrilh a, he building hian pawimawhna a neih ngei beiseia he hmuna hruai ka nih thu te pawh ka sawi ta vek a.

 

A lu bu nghat nghatin, “Mahse hetia en mai hi chuan kan ngaihven hi chu a vang ve ngawt ta ve ang.” nui suka atih chuan keipawhin dik ka ti. Ei tur kan ei zo a, haw mai ka rawt avangin garrage lam panin kan in zui chhuak a, ka kal lai tawp chawt khawpa min pawttu avang chuan hawi letin a kawhna lam chu ka en ve nghal vat a, “Saw kawngkhar saw a chhuahna tur awm ka hmu hauh lo.” atih chuan, a hnunglam nia kan hriatah chuan kan en ṭhin a mahse a tawp hmak chu anih si hi.

 

“Rs, helai hi a hmunpui chu a ni mai lo maw?” ka tih chuan, a lu bu nghut nghutin, “Zaninah mi tam zawk nen kan kal ve dawn nia.” tiin kan office lamah kan let leh ta a. Ruahmanna felfai tak kan siam a, kan rindan leh ngaihdan te pawh kan sawi a, duty tur in siam felin, kan ṭin darh ta a.

 

Keini pali, Rengpuia, Rsa, Sanjay leh kei restaurant-ah zanriah kan kil a. Kei leh Rengpuia’n conference kan chhim dawn a, Rsa leh Sanjay-a ten Avasthi lam an lo enthla dawn thung a ni. Kan pali awm dan tûr chauh ka han sawi na in, kan rualin kan lam ho leh pôlice ṭhahnem tak an awm ve dawn a, he thil hi ram hnuk khawih thil a ni miau a, chuvang chuan station tinah uluk taka duty tur pawh kan indah vek a ni.

 

Ka kawrfual nalh danglam zet chu thlek kualin, ka hmaa darthlalanga ka thla lo lang chu en in, “Nicky, kawng tam tak kan zawh dun a, i natna tur tam tak pawh ka siam ṭhin che, mahse heng zawng zawng hi ka hmangaih loh vang che a nilo a, ka hmangaih em vang zawk che a, ti na ṭhin che ka ni tih hi i hre ngei ang. I tan vek anih hi.” tiin darthlalang chu ka kalsan ta a.

 

Step tawpa Rengpuia lo ding ka hmuh chuan thawhakin, a bul ka thlen ruala cònstable lo ding hnenah chuan ka bag khai chu pe in, a kal nghal a. “I inpeih em?” tia a kut ka vawn theih tura a kut min pe tu chu en in, “Ka inpeih e.” tiin a banah chuan ka kut rawlh lutin kan chhuak dun ta nghal a.

 

Conference hall kan thleng a, mihring kan tam a, thawmhnaw nalh tak taka inthuam tam tak karah kan mi leh sa te pawh ka hmu nual mai. “Khi lamah khian kal ila,” Rengpuia’n tia a kawhna lam ka en chuan lu bu nghauh in, mi tlemte luhna lam chu a kawk zeuh a, kan inzui ta nghal a.

 

Pindan chhung kan lut a, sécuríty pawh a ṭha tawh hle mai, Rengpuia zawk alo inbuatsaih ṭha a, awlsam takin kan lut a, hriamhrei leh hmanrua engmah keng lo kan ni a, chet la thut tur erawh chuan kan in ring ran thung. Dawhkan tlemte zinga pakhatah chuan kan ṭhu ve a, mi sawmthum vel kan ni ang. Dawhkan kan luah khat ta maw tihah chuan stage an siam kan ṭhutna aṭang chuan a hla ve tawk viau ang tihah chuan mi pahnih leh anmahni vengtu te rawn chhuak lam chu chiang zetin ka lo en a, legturn an dahna zawna hmeichhe rawn ding ka hmuh chian rual chuan Rengpuia zawk chu ka melh zawk a, a mita natna leh thinrimna rawn lang chhuak chu chiang takin ka hmu.

 

Hmalam chu en lehin, ka rindan sual lo lutuk leh Msi bula Ranveer Malhotra ka hmuh chuan ka thinlung hi a nui var var ni maiin ka hria. Ka rilru in, ‘Ranveer Malhotra, in ring rawh, ka thutiam ang ngeiin i lu a silai mu thun tûrin ka rawn let ania,” tiin, an thusawi ai mah chuan an chevel chu ka en uluk zawk.

 

“Ka ring tho a, mahse hei erawh ka beisei lo asin.” rilru na tih hriat taka Rengpuia ti chhuak sup chu enin, “Ka rindan hi alo dik a.” ka tih chuan, “I finna hian ala chhui chhuak dawn tih ka hriat avanga, ka kuta dah tura ngen che ka ni.” atih rualin, ding chhuakin, “I formula chu keimah hian ka lo lei dawn em ni ang.” a ti chhuak ta a. Midang awm ve zawng zawng chu a lamah an mit a fu a, keipawhin chutianga chet ala mai chu mak ka ti a ni.

 

Rengpuia chu a kal hma zel a, Msi te dinna hmaah chuan a ding ta chat a, Anmahnia midang mit a fut ṭhap laiin ka awmna aṭanga tho chhuak ve in an lam ka pan ve a, Rengpuia’n, “Bawihi, lo let rawh, kei leh i fapa hian kan ngai tawh che asin.” atih chuan Msi chuan thinrim hmel zet hian a melh a. “I vanga vawiin ni hi thleng theilo ka ni asin, ka nu leh pa leh ka unaupa te sulhnu pawh chhui theilo a, i khuahkhirhna hnuaia awm reng tur ka ni love.” tiin, “Hepa hi man rawn u,” tiin a au nghal ṭhat a, mipa eng emaw zat rawn chhuak ten kan lam an rawn pan lai chuan, Msi bawk chuan, “Rengpui min ngaidam ngai suh ang che, ka chhungkua in an thisen an hlanna hi ka kalsan theilo a ni e.” atih leh chuan Rengpuia mitah mittui a luang a, chutih lai tak chuan silai a rawn puak ṭhuai a, midang chu an phu nghal nuai nuai a, silai puahna lam ka zawn rualin Rengpuia’n nilo, tia Msi a dawm bet chu ka hmu nghal zat bawk.

 

Pan ve mai ka tum laiin Ranveer Malhotra tlanchhuak chu ka hmu a, rang takin ka umzui ta zawk a. Ka thawmhnaw nalh tak hnuaiah hian pheikhawk sang nilovin boot ka bun miau alawm, boot hlang chauh pawh ala ni lo cheu, a karah hian silai leh chemte ka dah thlap bawk a, rang takin ka silai chu phawrh chhuakin, garrage lam pana tlan te chu chak zetin ka um a, Ranveer-a car-a alut tur chu silai chuan ka kap a, mahse silai an rawn kah ve tho avangin inphenna ka zawng lo thei lova, car chak zeta a rawn tlanchhuah lai chuan ka silai chuan ka kap pawp pawp a, mahse pawi ka khawih lo tih hriat takin garrage an chhuahsan a, mi pahnih thum vel ka lam pana rawn tlan ka hmuh rualin, “In tlai,” ti hlakin mipakhatin chahbi a rawn lek chu la vatin ka hmet a, “Bike maw ṭha lutuk,” tiin ka pistol chu ka pheikhawkah dah lut lehin, “Min lo zui rawh u,” tiin ka tlanchhuak ta nghal a.

 

Sangkimi an dahna hmun ka hriat ngei ngei a ngai a, Ranveer Malhotra hian chu hmun chu min hruai thleng ngei ang. Building lian zet fal ve takah an tlan lut a, keipawhin ka zui ve zel bawk. Ka sana phe zeuh zeuh chu en in, call a lo lut tih ka hriatin, “Rs, gps lo chhui rawh u,” tiin ka silai la chhuakin Ranveer-a te kalna lamah chuan ka kal ve ta zel a, an fimkhur a, tin, umzui an ni em tih an en reng a, an hnu ka hloh emaw an ti a ni mai thei, chak zetin hmalam an pan mawp mawp a, elevator-ah an lut ta a, kei erawh step lamah tlan chho nghalin, duh aia ka kawr zui hian min tibuai hret chu a ni. Step tawp ka thlen rualin ka chemte pai chu phawrh in ka kawr chu ka mal zawnah ka zei thler hlawk a, ti hi chuan chet pawh a nuam zawk ngei ang.

 

Ka luhna tur floôr ka thlen rualin rang taka kawngkhâr hawngin ka silai pawh hmalamah ka lek nghal a, kawi zawn ka thlen ruala silai rawn puak avangin ka let leh rang hle. Silai a puak ṭeuh a, chumi rual chiah chuan, “That rawh u,” tih ri ka hre zawm nghal. Ṭhingṭhi a corridor ka en zawk chuan mipa pahnih lian zet zet an rawn kal a, silai an keng tawh lo tih hria in ka pan ve nghal hmiah. Ka hneh emaw hneh lo emaw anni hi ka paltlang anih chuan Sangkimi ka lakchhuah theih ngei ka ring a, he Ranveer Malhotra hian kawng diklo min zawhpui anih ngat chuan a nuam sa hauh lovang le.

 

Mipa pakhat zawkin min hnek tuma ka lama a kut tum a rawn thlawh chhuah lai rual chuan kun zeuhin na zetin a ngalah chuan ka pet a, ka boot bunin a zir bawk a, a tawlh hnung dawr a, rang zeta tho lehnghalin min rawn hnaih leh rualin a khabeah na zetin ka pet lehnghal a, a dak awrh rual deuh thaw a kuttum rawn thlawk erawh ka bum hman lo. Mipa satliah pawh nilo hnek chu na tak a ni. Ka tluk ruala min rawn rah a tum erawh inlet vatin ka boot-a ka silai chu phawrh chhuakin a chalah tak ka kap nghal siah a, a tluk ruala pakhat chet la pawh a hnunglam aṭangin ka kap lehnghal a, ka thawh rualin kap nawn leh sak in pindan chhunglamah chuan ka lut ta nghal a.

 

Pindan chhung ka lut rualin Ranveer-a nen silai in kan intin nghal ran a, “I briefcase kha ka lo kawl chhawk ang che chu.” tia ka pan phei chuan, “Oh, Maggie, ilo let leh hi ka ring reng a,” tiin a khi suk a, nung damin mamawh lo ila chuan tunah hian a lu ah hian silai mu ka thun tawh ngei ang. “Maggie, nangnen hian thawk dun ila chuan engkim hi a dik thluam zawk ang mawle.” atih chuan, ka silai dahthla in, “Hlawkna tur ka nei ve dawn em ni?” ka tih chuan, khi sukin, a silai a dahthla ve nghal a. “Hlawkna 20 percent share ka pe ang che.” tiin a briefcase chu a melh zeuh a, keipawh ka nui ve ta var var nghal mai.

 

“In remna kan siam hma in thil pahnih min tih sak teh.” ka tih chuan, a mit ko san ak in, “Sawi la?” atih chuan, “Khawiah nge Ruatmawia a awm?” ka tih chuan, min melh vang vang a, “I hria elaw?” atih chuan, lu bu nghat nghatin, “Sangkimi i Kïdnäp emaw tiin Mizoram sôrkar hian a zawng che, mahse kei chuan Ruatmawia tih anih ka hria,” ka tih chuan, “Chuvang chuan maw min umzui?” atih chuan, “Ni chiah e, tuna formula vanga hlawkna lam a nilo,” atih chuan phun hlukin, “Kha Msi vang vek kha a ni.” atih chuan, “Msi chuan eng nge a tih?” ka tih chuan rúm zet hian min melh a, “I him theih dan ka zawnpui che anih chu,” vin lek lekin ka ti a.

 

“Ka hna bansan ka tum laiin tihian ka banna pawh pawm lovin in thil tih vangin koh let ka ni a, kan thawk dun dawn anih chuan, fing taka chet lak ka duh, Sangkimi a bo chhung chuan engmah hi a fel lovang,” ka tih chuan a inngaihtuah tih hriat takin a ngawi rûn a, ka sana bawk a rawn ri leh a, Ranveer-a chu melh zawkin, “Ka chhang dawn lova, mahse a rawn rik nawn hma in thu tlukna siam fel ang che.” ka tih chuan, chik zet hian min melh a, “CBI hi chhuahsan ka duh, a hma pawhin kan thawk dun a, ka thutlukna siama ka fâir sia hretu pawh i ni.” ka tih leh chuan, “A ṭha e, he hmun aṭang hian him damin min hruai chhuak la, Ruatmawia chu ka pe ang che, Sangkimi pawh i hmu thei nghal ang,” atih chuan, “I silai kha la kang rawh,” ka tih rualin ke pen thawm kan hria a, rang taka panhnaiin a silai chuan in tin tirin, “I tih tur chu i hria alawm,” ka tih zawh rualin, Rengpuia leh midang an lo lang nghal a.

 

“Min kal tir rawh u,” ka tih chuan, an silai an dahthla mai lo, an inhnial a, keimah bawk chuan, “Min kal tir a ngai, Sangkimi min pek a tiam alawm,” Mizo ṭawng a ka tih chuan, Rsa zawk chuan ringhlel hmel zet hian, “A ti ngei dawn em ni?” atih chuan, “Eng nge in sawi.” Ranveer-a chuan a ti a, “Ka nunna aiah midang i pek tur thu ka sawi,” ka tih chuan, “Ni e, ka thutiam ang ngeiin ka awm ang, tin, Maggie pawh hi ka him hunah ka rawn chhuah ang,” atih chuan. “Awle, a ṭha e, mahse nunna chan an awm anih chuan i lu kha a darh vek ang,” Rengpuia chuan ti hrawkin, an silai te an dahthla a, keini pawh muangchanga chhuakin, kawngkhar kan khar phui rualin rang zetin kan chhuak ta a.

 

Min rawn umzui ngei dawn tih ka hriat avangin Rengpuia te zawk bumnan silai ka hmet puak a, Ranveer-a chu ka tlan tir a, kei erawh step lamah ka chhuk a, garrage a inhmu turin ka ti a. Ka hnunglam aṭanga min rawn umzui tu te thawm pawh ka hre thei, an hriat zel theihnan thawm ka nei thla zel a, mahse first floor-ah lutin, kan inbo theih nan kawng dangah ka pensan ta a.

 

Garrage ka luh rualin, silaia min lo tinin, “Che tawh hauh suh,” titu avang chuan ka ding chawt a, tu nge anih ka hriat mai loh avanga inher ka tum lai takin silai a puak a, ka hawi ruala min tintu kâ aṭanga thisen rawn chhuak ka hmuh rualin, “Lokal rawh,” Ranveer-an atih chuan, Lalrinzuali tlu chu dawm hman lovin, Ranveer-a lamah chuan kalin car-in chu hmun chu kan chhuahsan ta nghal a.

 

(RSA POV)

Building hnuai bera Maggie te hnu kan zawn laiin, silai puak ri kan hriat chuan rang takin kan tlan thla nghal a, car chak taka tlanchhuah kan hmu hman zuai chauh a ni. ka kalsawn deuh a, hmeichhe pakhat tlu ka hmuh rualin kan pan nghal vat a, midang pawh insem darhin Rengpuia nen chuan kan buaipui a, Rinzuali maw? “Hei, harh teh,” tia chetsawn pui ka tum chu rawn meng diar diar in, a nui sak a. “Rengpui, min ngaidam ang che.” tih chiah a sawi a chatthla fel der mai. Henu hi vawihnih ngawt thi a ngaih a ni tawh a, tunah erawh ka kutah ngei a thi chu a ni a, a thil lo tih tawh tam tak ngaihtuah aiin misual kuta hetia a thi hi pawi ka ti.

 

Maggie khan a mitmengin a in ven theih thu min hrilh ngei a, mahse tunah erawh misual hmunpui a lut dawn a, Amah chauhin a ni a, Sangkimi hi chhuah zalen nilo sela a nunna hial a chan thei dawn tih hrilhnawm kher ka ngailo. Ämbulancë leh pôlice siren ri ruai ruai te chuan ka ngaihtuahna a tibuai takzet a, Msi pawh nunna chan thei reng dinhmunah a ding bawk. Chung zawng zawng a thlen hnuah kan hlawhchham a, Avasthi building pawh kan rin ang a ni hauh silo hian ka thin a ti rim takzet a ni.

 

Msi dinhmun a ṭhatloh thu kan dawn avangin, office aṭangin Rengpuia leh Sanjay-a telin damdawiin lam kan pan nghal a, nizan aṭanga ka ṭhianpa la ṭawng miah lo hian ka ngaih a ti ṭha tawh lo. Msi a hmangaih zia leh, a neih theih nana a thil thupbo tam tak ka hria a, tin, a bo vawihnihnaah pawh ngaihdan a nei lawk daih tawh kha a ni a. Chhanhim theih hram in beisei a, keimah nen chauha Delhi pan rüm rüm pawh kha kan ni a, mahse Msi zawk hian a tum em a, kan hnaih theilo kha a ni.

 

Rengpuia nena kan thusawi tam tak a hre ru ṭhin tih Rengpuia ngeiin a sawi laia mak ka tih zia ka ngaihtuah let a, Maggie-i kan zui ruk la a tam. A chhan pawh Ani hian formula leh chahbi hlu tak a kawl a, chahbi erawh a hlutna an hre ve lo nge, a in an dâp zanah pawh lak a ni ve lo a, formula erawh an tum em a, an hmu ta reng kha a ni.

 

Formula siam chhuah anihna kawngah sum leh pai leh thluak sengin Msi hian engkim a ruahman a ni tih pawh Rengpuia bawkin hrechhuak lehin khami ṭuma a natna kha chiang takin ka hmu, tichuan mi hrang hrang thawhpui neiin a thawhpui te kan enzui zelna lamah a awmna chin kan hre thei ta a, mahse kan hnaih thei reng reng lo chu ania.

 

Information kan lakna aṭangin Ranveer Malhotra te chanchin kan hre leh a, Ani berkher a thawhpui erawh pawi kan ti. A chhanchu phatsan emaw a tawk thuai dawn tih kan hre tlat a ni. Tichuan, Lalrinzuali nen kan intawng fuh ta a, min hlau viau mahse harsatna tawpah zawng Rengpuia bawk a rawn zawng chhuak chu anih hi. Lalrinzuali erawh an damdawi testnan hman ṭhin anih thu a sawi a, a hmel dawldang zet leh tla riap te chuan a thusawi a nemnghet a, a thil lo tih tawh te aiin tuna a landan khawngaih thla la zet avang hian Rengpuia bawk hian pui a in tiam a. Ani zarah thil tam tak kan hriatchhuah theih phah ta a ni.

 

Mahse tunah erawh a nunna hialin a tawrh phah ta chu ania, Msi la thih ngamin a na a, silaia kaptu te lam erawh man an la nilo thung. Maggie an hruai a, Ani ai mah chuan Sangkimi a ngaihtuah awm zawk tlat bawk. Ranveer Malhotra khan Maggie kha thatin Sangkimi pawh chhuah ta silo sela, engkim a buai zo vek dawn chu anih hi. Ka hriat sual loh chuan tunah hian Ranveer-a do zawnga chet la an awm a, pôlice pawh an thawhpui ṭha viau a ni awm e. Nasa taka puitu nei ni mah ila, nunna chan an pun belh zel si chuan eng nge sawt ang?

 

“Rs, Msi a harh ania,” Sanjay-an atih chuan, kan pathumin an dahna pindanah chuan kan lut a, Rengpuia chuan a kut vawn sak vatin, “Bawihi,” tiin a kut chu a fawp vang vang a, “Rengpui min ngaidam rawh aw,” Msi chuan tiin a biangah mittui a luang ngiai ngiai a, “Chutiang sawi suh,” tiin Rengpuia chuan hnem ve mahse, Ani pawh a hnuk a ulh ve ṭeuh tho. “Mangchhia ten min tih buai leh aṭang chiah khan heng zawng zawng hi alo in ṭan tawh asin.” tiin, man a tawh laia thil thleng leh a nu leh pa bakah a u malsawma thlengin an tihbuai dan chu harsa ti zetin a sawi a, “Ka fapa hnenah khan ka tih dikloh hi min thupsak hram la, a nu hian ka hmangaih lutuk a ni tih min lo hrilh sak rawh aw.” atih chuan, Rengpuia chuan lu bu nghauh nghauh in, a kutah chuan a fawp vang vang a, “Keini pawhin kan hmangaih lutuk che,” tia Rengpuia chhanna avang chuan a hmelah hlim.hmel a rawn lang a, a mit a chhing a, a zawi ta riai riai a.

 

Rang taka hnaihin, “Msi nilo,” ka tih rualin Sanjay-a zawk a tlanchhuak a, reilo teah doctor leh nurse an rawn lut a, Rengpuia erawh a chesawn hauh lo. Doctor-in Msi thih thu a repôrt lai te chuan a ngawi reng a, a dara Sanjay-an a khawihna te pawh chu hrelo angin a awm hmiah a, mipa vek kan ni a, inhnem tur pawhin sawi tur reng reng ka hrelo. A ruala kan mihring hnaih tak pahnih han chan meuh chu rilru a tawt up up thei. An inneih lai te, an hlimni te ka ngaihtuah a, ka ṭhianpa hian a nuna a hmeichhe tawn ve pahnih te a rualin a chan a ni a, Lalrinzuali kha theihnghilh angin awm mahse khatianga kan hmuh leh meuh kha chuan a hma ang bawkin alo khawngaih leh hle anih kha. A tlukna ngaia a tluk ka hlauh em avanga ka venpuina thu ka sawi lai te khan, Msi a hmangaih thu leh tih nat a tum tawh loh thu a sawi ve hial a, tunah erawh Lalrinzuali rualin Msi a boral chu a ni si a.

 

Mizoram hawna tur ka buaipui a, kan Director te an bengvar a, ruang pahnih phurh hawna tur kan buaipui nghal a, Sanjay-a hi hetiang nikhua hian a ṭangkai hle ṭhin. Tunah pawh ka chhuah chuan Rengpuia bulah a awm chawt a, kei ai mahin a ngaihtuah zawkin ka hria, kan inpeih meuh chuan zuitu pawh kan nei nual ta mai.

 

“Engkim peih fel a ni tawh,” Sanjay-an tiin thlawhna chhungah min luhsan a, ka lam pana hmanhmawh taka rawn kal ka hmuh rualin ding leh datin, “Chanchin ka hriat rualin ka rawn thlawk nghal a,” atih chuan nizan khan Rengpuia khan a call tih ka hrechhuak hnuhnawh. “A pawi hle mai,” atih leh chuan, “Sanjay nen hian kan rawn let vat ang, heihi keng la kan headquarters lamah pawimawh dang chu ilo zawtfiah mai dawn nia. Heti hi kan dinhmun a ni rih si a, incharge an awm kha.” tiin keipawh chuan ka kalsan ve ta a.

 

Sanjay-a tal hi awm se tia ka duh laiin Msi a ngaih pawimawh zia hretu ka ni a, Nicky-a chu a in buaipui thei em em tho ang tiin ka hmaa ngawirenga ṭhu chu ka melh ta tlawk tlawk a. Tunah zet chuan a tawp khar a hun tawh hle a ni. Nicky engkim chingfel ang che, i hmangaihte venghim tur chuan nangmah i ṭha ber tiin ka phun chhuak sap a.

 

“Formula kha lo tichhia ila he hun hi kan tawng lo tur ania,” Msi kan vui liam aṭangin ni hnih a liam tawh a, thlan kalsan harsa atih avangin phûm anih aṭangin he hmunah hian ni hnih ngawt a awm tawh chu anih hi. A ṭawng lova, a ei lova, tui erawh ka chhawp ang ang a in ve ziah a, mahse heti ringawt chuan a chau vat dawn tih ka chiang a ni. “Rengpui, hun kal tawh avanga inchhir hian sawtna a nei tlem em asin, chu ai chuan i fapa hi i ngaihtuah zawk a ngai a ni.” ka tih chuan a lu a bu nghut nghut a, “Ni e, mahni chauha awm tur chuan min phal hleinem, fapa tal min la pe a,” atih chuan, “A dik alawm,” tiin ka thiam ang angin ka hnem ve a. A chaw ei mumal lohna a rei tawh a, a chauh dan tur ka hriatpui miau avangin hruai haw hram ka duh.

 

“Ka fapa bulah chuan i haw ang hmiang,” atih chuan lawm ru zetin ka in her rema mahse Rengpuia awn ruai ruai ka hmuh rualin dawm vatin, nikhua a hrelo nghal tih ka hria. Ni e, a eiloh ngaihtuah chuan a fei.ngawt zawkin ka hria. Damdawiina Rengpuia kan dah fel hnu in, Nicky-a call ka chhang leh a, Maggie nen an inbiak thu leh, Sangkimi chhuah anih tur thu a hrilh te pawh a rawn sawi a, “I nunna aiah Sangkimi chu i thleng dawn tak tak em ni?” tiin ka phun sap a.

 

Conti…

This Post Has One Comment

Leave a Reply