You are currently viewing Rinsangpuia

Rinsangpuia

Spread the love

“Mate hei lo en ve teh” ka thiannu in a tih Chuan a mut na ah in thawlh ve nghal sawt sawt in a phone en lai chu ka en pui ve a, ‘hmeltha i tih tur chi tak a nih hi,a nui mawi si” tih pah in Instagram lam a mipa pakhat profile chu min hmuh a, keipawh in uluk deuh in ka lo en, a sawi ang tak tak in a mi sawi pa chu ka duh chi tak a ni,a mah a sang tha in a taksa a inphut mawi tawk em em a, a sam dum hlap, buk lam lek lek te chu a inhmeh viau bawk ,”a va hmeltha ve” ka tih Chuan ” ka sawi kha I duh dawn tih ka hria ” tih pah in a nui var var, keipawh chuan chupa Sangpuia Hmar in ti chu ka follow ve nghal bawk.

Kei hi Lawmsangkimi ka ni a mahni tawk a lu zo ve tak,harhvang leh ri ve bawrh bawrh chi ka ni,mizo nula ah chuan a hleitling pawl chu ka ni ve ang,chuvang a nia ka thian kawm te zing ah pawh ka len ber avang hian thenkhat chuan upa ber tur ah min ngai nghal ngawt zel a, a nihna tak ah chuan kan thian zing ah ro ro pawh a naupang pawl ka ni,hmun hrang hrang ah hna leh zirna avang ten kan awm darh hlawm a, tun ah tak phei chuan kei leh Mahriati chiah hi hmun khat a awm chu kan ni rih mai,a ni nen hi Chuan eng tik lai deuh thaw in Kan inbia a tih theih ang chu.

“Mipa chhelo hi chu Kan hrethei, mahse tinge heng chhelo ho hian min hriat ve theih Miah loh ni,ninawm tlem a chhelo ve deuh hlek hi Chuan rinawmna thu tiampui hi an lo nei hman ve ziah” Mahriati chuan a ti bai bai a, Kan nui pah hak hak bawk, keini thian dun hi ngaihzawng nei peih tak tak silo hian a hrul ah Kan eng emaw lerh ve phian reuh a,Kan hahthlak a nia,”khawi maw khapa kha chhui Chiang teh ang, ka hrechiang chak a nia” tihpah in kan mi hriat thar profile chu uluk zawk in Kan check tha leh a, hriatbelh erawh Kan nei lem lo “nakin ah a chanchin hriat dan chu a awm mai ang, followers a ngah dan atang hian duh tu a ngah hle dawn tih a hriat reng, chuvang chuan a chanchin hriat chu thil har tak a nilo ang” Mahriat in a tih Chuan ka lo bu ve nghat nghat. Chuta tang chuan kan mi hriat thar pa chu ka vei ta lutuk, a ig post zawng zawng ka like Kim vek ,nitin a video ka en a a story up thar apiang view hmasa tu nih loh hlau in ka hmuh veleh ka view vat vat thin,social media atang a ka hriat mah nise  vei tak te in ka vei tawh, a chanchin nitin zantin a ngaihven ta chuan hriat a mual mual pawh ka nei ve ta zel a ,Kan duh na ah hi Chuan hmeichhia pawh hi Kan lo che chak in,Kan zahzum na pawh Kan lo thupbo thei khawp mai, Sangpuia chu hmeltha in duh tu ngah viau mahse a single tih ka hriat chuan lawm loh in ka nui vur vur reng mai, Kan duh ruk deuh te an single tih hriat hi chu a nuam ve hrim hrim Kan ngaihzawng nilo mahse.

“Lawmsangkim” tih ringawt hi Mahriati hnen atang ka dawng a, hei hi chu a tih fo dan a ni, “e nge, sawi rawh” tiin ka reply ve leh mai, naktuk ah lengchhuak ila, Kan star te zawng teh ang kawngkawi ah Kan tawh nawlh tak hlauh in” tiin nui lai emawji uar zet in a rawn dah tel bawk,”i ti mak thei e” ka tih Chuan “ti mak lo, leng ve mai mai teh ang tunlai chu Kan chhuakdun khat hrim hrim” a tih deuh tlat avangin chhuahdun   chu ka rem ti ve leh hram, ka mut hma in Sangpuia’n story a nei em tih leh post thar te a nei em tih ka en hmasa leh te te phawt, ka status ah a video pakhat chu caption Siam Miah lo in ka hmang zui nghal a, just now rual chuan ka hmelhriat pakhat hnen atang “a number ka nei a nia aw” tih hi a lo thleng nghal, ka mu tawh chu ka thukang leh uai, “khawi minpe nghal rawh” ka tih Chuan awlsam deuh in minpe ve mai bawk a, chutia a number ka han nei ta mai chu ka lawm bawk si chu ka rizai sin lai tham tawm tawk tawk in ka in thing pah nawk nawk, a dp te chu uluk deuh in ka en a a changin ka zoom thul nuam chu ka van ti tak, biak nghal erawh ka tum lo , Mahriati ka rawn leh phawt loh chuan va biak dan tur ka hrelo,hetiang lam ah hi Chuan ka laktlak hlawl loh.

A tuk zing ah te chuan kan tho hma em em khawp a, ka thawh veleh  Sangpuia dp chu zoom in Kan chuks hmasa leh te te, ka che reng reng te chu ka phur sarh vek mai, biak pawh ka biak hma hauh atang a number ringawt pawn keimah ah danglamna min thlen nghal der chu a nia,a zahthlak lek lek zawk a lawm le.

Mahriati nen Kan inhmu chu Kan ri leh bawrh bawrh tawh, nitin zantin phone kaltlang in inbe thin mah ila sawitur hi Kan hre dun em em zel reng tho,pahnih lek mah ni ila tawng inchuh in Kan bengchheng dun thei hle, “Keichu ka star pa ve hi a chut deuh tlat in ka hria, sang thlawn a a nih hi” a ti a ka nui hak hak “e nge ni leh tawh” ka tih Chuan “nizan ah ig ah Kan inbe ve ngei a vawihnih vel chu tha deuh in min chhang ve ,a bak chu min chhan chhunzawm a tum lo reng reng,a mah biak chak vangin chhuanlam tur ka zawng ve hram hram zel a, naupang lutuk star hi chu buaithlak” a ti deuh hlak hlak, a star a sawi hi a mah aiin Kum 6 nge Kum 7 zawk, chutiang vel lai chuan a naupang a ,a mah lah chuan ‘a pumrua in a tlin vek,a hleitling bawk a, hmel ah te chuan kei aiin aLang upa zawk tho star ringawt chu a pawi lo’ a ti deuh tlat a, eng emaw hlek ah a phun reng tho bawk sia,henu pawh hi keimah ang chiah a hahthlak a nia.

“Keichu thil thar ka nei a  nia aw” ka tih Chuan “eng maw,a number chu I nei ta em ni” tiin a crush vanga a thinrim lai mah nise min  phur pui nghal hurh tho,nui var var chung a ka buk nghat chuan,a kut pahnih a dawhkan beng ri dawt in “tha lutuk! engtin nge I neih theih, I be tawh em”ti nghal zung zung in,kei ai mah chuan a phur zawk in ka hria “be nang,ka be ngam rihlo nakin ah ka la be zawk ang ka tia” ka tih Chuan a chek hlak a,”nakin,nakin tih a ngailo,tun ah khan be rawh” min ti leh tlat tawh,”a nih ka sawi tur min lo hrilh zel ang che” ka ti a ,uar zet in a lo bu nghat ‘tun ah e nge ka va sawi a nga” ka tih Chuan “hii,tih kha thawn phawt la,, a chhan dan che a zir in chhan dan tur chu Kan ngaihtuah chawp leh dawn nia” a lo ti zung zung, hmeltha hre thei viau e ti lo hian a va han zeiloh theih ngai em, “mahni crush takngial te hnen ah pawh in sawikaw thei lo hnen atang hian thurawn ka la veleh chhawng chu a nia, ram ropui kan thleng har awm” ka tih Chuan a lo nui duaih a,”ka tawngkam thiam na leh zei na hi ka crush hnen ah ka hmang ngai hleinem,hmang duh ni ila ka chhai tlu tawh ang” mahni in rintawk hmel zet a a tih Chuan ka lo ner nang nang ringawt,a in sawi kaw dawn lo tih hi ka Chiang e mai.

Sangpuia chu ka be ta ngei a mahse chhan na erawh ka dawng lem lo, zan lam ah pawh ka message chu a en em tih ka thli thlai reng a, a reply na chu ka beisei ru ve ran na in ka beidawng lek lek tawh, ka mutchhuak rawn kal in sana ka han en chuan zan dar 11 a lo ri tawh, ka message lah reply chu sawi loh en tak ngial pawh a la en lo a nia, lunghnur ru deuh chung in ka phone ka dah a ka in let tau deuh hmak,ka chhing diar diar tawh tih ah message tone a rawn ri a, enloh ka tum zet na in ka ban leh ta tho,chuta message ka han hmu chiah chu ka meng zau kawk thei, Sangpuia min reply na hi a lo ni,  Sangpuia pawh chu chhang lo in Mahriati zawk chu ka va text leh hmasa te te,a ni hi chu a mengrei thin a a la muhil dawn lo tih ka hria, “Sangpuia’n min reply a nia engtin nge ka chhan dawn?” Ka tih chu a seen rang ngei mai, “nangmah kha insawi la,I number save tir dan ngaihtuah rawh” a tih chu bawhzui in keimah te chu ka han insawi a, ka number min save sak tur in ka ti ta bawk,ka rin ai daih in biak a lo nuam a,fel ka van ti reuh tak,mahse keimah chu zaktheilo ka in ti lutuk,chutia mipa han pawng biak ve ngawt mai chu ,maherawh chu  zah sawi hman ka nilo ka biak loh pawn mi fa ten an be dawn tho tho,mi fate hi an che chak si Kan ta ni thei reng pawh Kan chet muan avang hian mi fate ta an ni fo hian ka ring.

Ka mutchhuat pawh a bo vek,ka then nasa lutuk a ka biang ki pawh a kham vek thei, mahni in zanrei ah tu hriatpui loh hlimna ka chhar hi a ni ringawt, a message en in ka hlim lutuk chu ka tal leh nawk nawk thin,aww!! Ka khawvel hi a sentence khat lek pawh hian a va rawn ti nuam vawng vawng tak em!!.

Chumi zan atang Chuan Sangpuia nen chuan Kan inbe ve ta zeuh zeuh, inbia ti ila,ka bia a ni zawk mah,ka biak loh chuan min biak tumna a nei lem lo,mahse ka biak chang a tha tak a min lo chhang ve thin ringawt pawh ka tan chuan a lawmawm in,ka hlim phah lutuk tlat tho,ka number te pawh a save ve tha ngei a, biak reng kha ka inthlahrung in, min lo Ning mai ang tih ka hlau ve tho bawk nen,chuvang chuan be chak viau mah ila be lo tur in ka insum hram hram thin, vei erawh ka vei na tulh tulh thung, ka status a lo view ve thin te chu ka hlimna a tling tawk  em em a, ka status viewers te zing a a hming a lo lan tawh hi chuan ka nui ver ver thin, private lam ah in be tam lutuk lo mah ila heng thil hi te te hi Kan inbiak ve na ah ngai in ka lo hlimpui thin, a chang chuan a ka in ti ve fo, a ruk in ka vei lutuk a ni tih leh a chanchin ka ngaihven reng thin a ni tih hi hre ta nise engtin tak min ngai ang maw!.

Tum khat Mahriati nen a Kan chhuak dun chu thingpui dawr pakhat Kan chawl a,Kan chawlh na dawr hi a Lian lutuk lo na in a chhung a felfai a,an ei Siam a tui in a tlawm bawk, “nizan ah i bia em?’ ti a mahriati’n min zawh chuan lu ka lo thing ringawt “a mak e! Zantin be rawh ka tih kha,i biak tam loh in engtin nge in in pawh theih a nga” a ti deuh hlak,kei ai mah hian a lo tang zawk thin hi a chang chuan ka nuih a za lek lek thin, “zantin biak kha chu ka inthlahrung ve a,bak ah min lo Ning palh ang a khat tawk in ka be zeuh zeuh tho a lawm” ka tih Chuan “ni ve tho mai,zei la biak dan tawk kha thiam ang che” a ti leh ringawt,zei hi a har ve tehlul nen zei rawh in tih ngawt pawh a nilo,a mah pawh hian a star pa tun thleng in a la bem ngam tawp bik silo a,a tih ngam loh loh ti tur hian min ti thin a henu tak hi chu(h).

Chutia kan thian dun a Kan ti ti mawlh mawlh lai chuan mipa pa Li vel hi Kan chawlh na thingpui dawr ah chuan an rawn ri lut bawrh bawrh a ,ka ngaihven lutuk hran lo,mahse Mahriati chuan min rawn kheuh zeuh in “saw saw Sangpuia a ni lawm ni,, a ni tiraw” a ti sar sar,keipawn chung mipa ho chu en ve vat in, a sir ber a thu chu ka va hmu ve ta, imm.. Sangpuia ngei a lo ni,mi thenkhat hi chu social media a an lan dan leh a tak a an landan hi a in thlau thei viau a,a ni Sangpuia erawh Social media lam a a in pholan na ho ai mah in ka hmu tha zawk, mit lasawn thei lo khawp a Sangpuia ka en ngawih ngawih lai chuan “mawli khatia en ngawih ngawih lo khan thla laksak ta che” tih pah in Mahriati chuan min chum tawlh, ka harhchhuak zawk,ka phone phawrh sawk sawk in Sangpuia thla laksak ngei tum chuan camera in ka tin vang vang,vawikhat ka click a ,click leh ka tum lai chuan Sangpuia chuan kan lam rawn hawi thut in keilah in camera in ka lo la tin reng bawk si, a ni chu a nui suk a chutah a thutna siamrem hret in a rawn in post a nihchu ,ka zak lutuk chu Bo daih chak tak ka ni, Mahriati mal a tham nawk nawk pah in “ka zak lutuk” zawi te in ka ti mawlh mawlh, “kal daih ang min hmu Chiang lutuk ka zak” ka ti, chuta kar ah Sangpuia chuan a thutna thawhsan in Kan lam chu a rawn la pan leh ta nghal, awm ngaihna ka hre tawh lo ka zak leh lai bawk si chu ka taksa hi a chawmawlh vek ni mai in ka hria,hawi pawh ka hawichhuak tha ngam tawh lo, Sangpuia chu Kan bul ah  chuan rawn ding in “kan in hria tiraw” a rawn ti a a nui pah bawk ,”maw..maw keimah hi maw!” Ka lo ti bah nawk, a nui hawk a “aw nangmah kha,Kan inhria tiraw” a tih  leh Chuan lu ka thing nak nak, “aih inhre lo,min hai a niang” ka ti tlat ,ka insawi a nih chuan phone kaltlang ringawt pawn ka biak ngam tawh loh ka hlau.

‘Kan inhre lo’ ti a ka phat ngial pawh in a ni chu kalsawn ta mai lo chuan min han thlek vang vang a,ka lai leh awm ngaihna hrelo chuan ka hma a tui inchhawp chu ka in ringawt,chutah “ka hre ta Lawmsangkim”a rawn tih hlut chuan ka tui in lai ka phuhchhuak lo Chauh,”i ni tiraw” a rawn ti leh a, a mah lah chu a nui sang bawk si, chhan ngaihna hrelo zet in lu ka thing mat mat ringawt,mahse ka thusawi chu a ringlo viau nge ni a phone phawr in a hmet mual mual a,chutah ka phone chu a rawn ri ta ral ral mai, a mah Sangpuia ngei chu a lo ni ,min man chhuak Chiang lutuk chu ka zak ngawih ngawih, a va han chet thin theih tak em,”ti kha chuan I pha thei tawh lo” tih pah a a phone chu lek deuh valh in a nui sang bawk, lai chhe zet in ka nui ve ta ringawt tihngaihna vak a awm tawh tlat lo a ni,phat rual loh a Chiang tak a min man chhuah tak si ah chuan lai ru zet in Sangpuia chu ka be ve ta a,chutia duhtu leh be tu tam tak a neih thin lai kar a, kei ve tehlul a vawikhat min hmuh na a min hre thei nghal mai chu zak viau mah ila ka lawm in nuam ka ti ru veng veng tho, phone ah Kan inbe tam lutuk lo na in a tak ah biak a lo nuam in a polite reuh em em a,ka duhna a zual sawt nghe nghe in ka hria,ka vei leh Tut Tut dawn a nih hi. Sangpuia chu a thiante nen an nih avangin kan bul ah chuan rei tak a awm lem lo,keini pawh thil Kan ei zawh ah Kan chhuak veleh mai a,Kan chhuah dawn in Sangpuia chu ka va melh hram a nui sang chung in a ban min lo vai zauh a,ka zak leh si chu lai zet a nui in  ka chhuak nghal daih.

In ka thlen thleng chuan Sangpuia ngawt ka ngaihtuah a, mahni in ka khi vur vur reng mai,nuam chu ka van ti tak,a thla ka lak sak te chu en in ka wallpaper ah ka hmang hmak, theih nise chuan a mah tawp hi ringtone ah hial hman a nia ka chak ni,chutia a mah ngawt ka ngaihtuah lai chuan a mah Sangpuia message chu a la rawn thleng zui a,ka au nghal chiam chiam ringawt, min hmu tu awm se chuan mawl min ti viau ang, phur leh helhhawlh ru zet in a message chu ka open a “karleh khi ka birthday a ni tawh a,thian ho a lawm Kan rel a picnic spot vel ah,lo tel ve ta che” tih hi a ni,ka chhiar zo chuan ka kut zungchal ka seh vak a,na ka ti leh si chu ka ner nang mai, a birthday lawm na a min sawm ve ringawt chu mak ka ti em a ni, “thian ho in ni dawn sia,thian pawh Kan ni ve bawk si lo” tiin ka chhang a,kal chak viau mah ila ka sawi ang khan an thian ho a lawm tum an ni a ,kei nen lah thian ti a sawi theih Kan ni chiah bawk silo nen,kal ve ta ringawt ila hmelhriat ka nei dawn silo a nuam ka tih ka ring chiah lo, ka message chu a seen ngei a mahse chhanna ka dawng leh ta lo,hei hi chu a tihfo dan a ni, a message ka reply na hi chhanloh a nei fo, lungawi chiah lo thin mah ila ka lungawi lohna ti lang ve ngawt tur in Kan inkar ah eng inzawmna mah a awmlo tih ka hriatna hian min in thunun tir hram hram thin a ni. Min reply leh dawn chuanglo ni a ka hriat avangin phone chu khum ah ka dah a ka inbual san ta daih, ka inbual zo room a ka luh leh chuan ka phone a lo ri tawp chiah,mahse a rawn ri nawn lehnghal a ka beisei loh deuh in Sangpuia a lo ni, call ka chhan hma in thawk Kan la vak phawt a chumi zawh ah call chu ka chhang ta Chauh,

“Ka buai lawk a, karthar ah chuan rawn tel ve rawh aw,keiman ka rawn hruai ang che” a rawn ti nghal mawlh mawlh a, tawng pawh ka tawng ve hman hleinem le, “I lo kal ang tiraw” a tih leh chuan “ka hrelo,nuam ka ti chiah lo a” tiin pangai tak in ka chhang “nuam tih loh na tur a awm lo,ka rual in I kal a nga birthday boy ka ni dawn a,I lo kal ngei ngei ka phut a nia,” a ti deuh tlat a,keipawn ka hnial thei ta bik lo karthar lam a a birthday lawm na a kal ve tur chuan aw ka pawh ve ta a, tun ah Friday a ni tawh a Monday mai hi a birthday chu a nih tawh a vangin naktuk lam ah a gift tur pawh lei mai a ngaih hmel.

Mahriati hneh a Sangpuia nen Kan inbiak dan ka sawi chuan ,”a duh ve che a ni hrim hrim,a tihdan hi in inbe zen zen pawh nilo,vawikhat chiah a tak ah in la in hmu lehnghal ,hope a sang a nia a birthday ah pawh chuan kal ve ngei ngei ang che,a man a rawn hruai dawn lehnghal che a” tiin a rawn phul lehnghal hlut tawh,beisei te hi Kan nei sang ve sia maw,Kan beisei ang a thleng lo a nih si chuan khutah Kan tla vawn vawn ang.

“Min duh vang pawh a nilo ang,a mah a polite ve hrim hrim a nihkha,a ni ang te chuan keini ang te chu min duh ve nang”ka lo ti thung,hei hi ka ngaihdan diktak a ni bawk an ni Sangpuia te ang chhelo leh hmeichhe lam ah pawh tla na ve tak hi Chuan keini ang mipangai ve mai hi chu eng ah teh vak min ngai in ka ringlo, “keini ang i tih chu e nge awmzia,in dah hniam lutuk Suh,mi aia hmelchhe fal pawh I nilo a,bak ah heng chhelo tak tak ho hi an mak ve reuh lutuk an mit hi a sang vak lo ka ti dawn nge an ngaihzawng te hi an hmeltha vul chuk kher ngailo a nia” a ti leh zung zung a ,ngaihdan pawh keichuan ka siamthiam ve lo, e nge gift ah ka pek ang tih ngaihtuah ila a tha ber in ka ring.

Sangpuia nen pawh Kan inbe ve ta reng a,a hma ai ngawt chuan kan inpawh in keipawh ka lai chhe lutuk ta biklo ,Sunday tlai ah pawh a thianpa pakhat nen Kan in ah lo kal in ka chhungte hriat laiin a birthday a kal ve tur chuan min sawm tha leh a, ka kalloh a hlau lutuk chuan ka nuih a ti za lek lek, ig lam ah pawh Kan in follow ve ve ta bawk a a ig story a hmeichhe dang in an mention na te chu ka lo thik lek lek thin, followers ngah viau mahse follow erawh a ngah lem lo a, a follow ho zing a hmeichhia zawng zawng chu tu te nge an nih tih hriat tum in an profile ka en Kim vek,a over thlak pawh a ni maithei,mahse Kan duh ngawih ngawih te lak ah hi Chuan eng a mah hma in thikthu hi a chhe ve duh em a ni, follow thar a nei em tih thleng in ka Chik em em a, kei aia a mah Chik tu hi chu an awm kher in ka ring lo.

A birthday pawh a lo thleng a wish hmasa tu nih loh hlau in ka menrei phah hle dar 12 ah chiah chiah ka va wish bawk, ka thawmhnaw hak tur pawh thlak ngun tak ka ni,thawmhnaw ngah viau e ti lo chuuan ka lungdum tak ka hmu mai theilo, ka in hai darh nasa mai,hmeichhia hi Chuan thawmhnaw hak tur ka neilo ti reng chuang hian hak tur Kan zawnna lam ah Kan thehkhawm leh hnuk thin,Kan duh te lak a lanmawi loh Kan hlauh luat ah Kan thawmhnaw neih te hi Kan hmu tlinglo zawk thin niin ka hria,rei fe hnu ah duh ka thlangfel thei Chauh, dar 10 bawr vel ah Sangpuia’n min lo lam a zanriah pawh Kan eichhuak nghal dawn ni awm tak a ni, picnic spot Kan thlen chuan a thiante chu an lo awm tawh,an tam em em hran lo hmeichhia pathum awm ve in a dang zawng panga te chu mipa an ni, Sunday tlai a a rawn kalpui pa bak kha chu hmelhriat pawh ka neilo, hmeichhe ho lah chuan min en duh riau In ka hre lehnghal nuam chu ka ti chiah lo, “lo kal teh ka thiante ka hmelhriat tir ang che” tiin Sangpuia chuan ka kut ah a rawn Kai a, ka kut a vawn na lai chu en in ka lungphu chu a diklo he mipa lak ah hian ka luangliam hneh lutuk ni ber in ka hria, a thian te bul ah chuan min in hmelhriat na min neih sak in,ka rin ai daih in an lo fel hlawm a hmeichhe ho pawh chuan min be ve bawrh bawrh mai, mi hi an pawnlam landan atang ringawt a Kan teh chuan kan tehsual fo dawn a nih hi ka ti rilru nauh nauh, keipawh ka inthlahrung rei lo cake te zai in present Kan pe Liam Liam a Sangpuia pawh a lawm thiam vur vur hle, tui chen an rawt erawh chuan ka Cheng ve duh lo tui chen ka thiam loh mai bak ah in tihhuh kha ka peihlo hrim hrim bawk, juice in in pool kotlang ah ka lo thu ve mai mai ringawt, Sangpuia tuicheng lai chu ka en reng a a ni pawh in min rawn en ve zeuh zeuh tih chu ka hria,min rawn en chang chuan ka mit ka lasawn duh bik Miah lo,a chang chuan ka duhzia hi ka hrilh mai dawn em ni tiin ka ngaihtuah fo a,ka insum zo lo lek lek thin,mahse keimah ka in dahhniam na leh min duh ka rinloh em avang chuan hrilh loh chu ka thlang leh zawk thin, chutia Sangpuia te tuicheng lai en chung a ka lo thut mai mai lai chuan ka hnung lam a tu emaw pen thawn hi ka hria,ka ngaihven lem lo,mahse ka hnunglam a mi chuan min rawn nam thut in kei a in ring bawk silo chu tui ah chuan ka juice in lai nen ka tla ri bawrh a,midang ho chu an lo nui hak hak hlawm ,kei erawh ka in hai buai nghal chu a ni der,tui hleuh ka thiam lo ka tih tawh kha, ka awm ah rawn hnawh nghal in ka thawk a chham nghal ti tih,mahse rei ka in hai buai lo ka taksa chu a Kang nawlh a tu emaw in min pawm tih chu ka hria ka mit ka meng ngam lo,ka hlau lutuk chu khur nasa tak ka ni,ka tha a zawi vek thei,

“Sangkim I tha em?” Hlauthawng tak a Sangpuia tih ri chu ka hria,tui kha tlem ka lo lem hman avang in ka hrawk a na vek a ka khuh deuh bawrh bawrh, ka mit ka men chuan Sangpuia ka hmu hmasa ber,min pawmchhuak tu kha a mah a ni ngei ang, “tui ka Cheng thiam lo” ka ti chhuak tiau a,ka hlauthawng lutuk kha a la reh fel thei lo, “a tha vek tawh a nia,” tih mawlh mawlh pah in ka sam ah a chul thuak thuak a, “Laldinsang ka Cheng ve duh lo a tih mawlh mawlh kha,tinge i nam thlak kher a” ti hlur in  a thianpa chu a melh khui khui a, a thinrim hmel viau lehnghal “ka fiam a,tui a hleuh thiamlo tih ka hre lo a,ka tihpalh lutuk Sangkim” inthiamlo deuh chung a tiin keichu min rawn en a,Sangpuia chu ala lawm ve thei lo nge ni ,a ding hluai a Dinsanga chu dinchilh in “Infiamna chi leh chi lo a awm aw” a ti hriam hraih a,”tui a hleuh thiam lo tih ka hrelo ka tih chu mawle,midang pawh tiang hi Chuan Kan infiam fo alawm” Dinsanga pawh chuan lo ti ve in an awki pawh an san Tan viau,chutia keimah vang a thian dun an in ti thiamlo ta chu nuam ka ti lo, “a ho lutuk,keimah pawn sawina chang ka lo hrelo a lawm,Sangpui a tawk Dinsanga thiamloh a nih loh kha” tiin ka inrawlh ve ta a ,Sangpuia pawh a in bengdai ve thei hram, Dinsanga pawh in min rawn buaipui in ngaihdan min Dil mawlh mawlh a a in thiamlo lutuk chu ka khawngaih letling zawk.

Ka tui tlak vangin Kan boruak a nuam ta chiah lo bawk nen, midang ho lak ah chuan ka inthlahrung khawp mai, mahse an mahni an fel hlauh a min hrethiam in min ngaihtuah tlang a, keimah vanga Dinsanga leh Sangpuia te in be hleithei lo erawh in awm a ti nuamlo , ka thawmhnaw kha a huh ta vek si a tih ro chhung in Sangpuia shirt leh a thiannu pakhat kekawrbul ka ha ta tawp a, tui chen in ring sa a kal an ni bawk a thawmhnaw hakthlak an lo keng chu ka vanneih pui ta hlauh a ni, Kan in thleng Sangpuia chuan min thlah leh thlap in “Dinsanga kha keimah vang ringawt chuan khatin be tha duhlo Suh,ka tan pawh a nuam lo a nia, thian chu Kan infiam bawrh bawrh a ,a ni pawn min rawn fiam ve satliah a nih kha, tui ka Cheng thiamlo tih hria se chuan tiang khan a ti kher lo ang” inchhung ka luh hma in ka ti hram a ,a ni erawh a lo nui mai a “lut tawh rawh’ min ti daih , ka thaw hak ringawt, tha tak chuan in thlah in a ni pawh a haw zui ve nghal, ka ngaihtuahna chu a kalthui leh tawh lutuk ,khati khawp a keimah vang a a thianpa lak a a lungawi lo thei kha mak ka ti in,a mah ah beiseina ka neihsan phah a,ka beiseina hi a sual ang tih erawh ka hlau viau tho.

A ni tel in Sangpuia nen chuan Kan inhnaih ve zel a, maherawh chu a changin beiseina han nei ve thin mah ila,thian ang bak in min enlo ni in ka hria ,thil tam tak ah in an na Kan nei a,Kan duhzawng leh ngainat zawng pawh a thuhmun khawp mai ,chutih rual in kei erawh in a ruk a lo duh em em reng chu hreawm ka ti telh telh thung,ka duh zia hrilh tur in huaisenna ka nei hlawl bawk silo Mahriati phei chuan “I chan a nge aw,I chan hma in I duh thu hrilh rawh,” min ti fo mai,keipawn inpuan mai chu ka duh rum rum thin mahse  ka ngam leh chuang lo, thian te bul ah chuan ka duh thu ka hrilh ngei ngei tawh ang tiin ka pawr ve thei khawp mai,mahse a bul a ka awm a Kan inbiak erawh chuan, ka sawi ang ti a ka lo ngaihtuah  zawng zawng te kha vawmbo ang duak an ni leh lawi si, thiante zing a pawr em em kha a bul ah chuan  ka tawngkam leh che vel pawh ka uluk in ka zawi awi khawp mai, tiang khawp chuan a bul ah chuan ka danglam thin, tum khat erawh a thianpa ,ka thian lo ni ve ta hnen atang Sangpuia chuan hmeichhe biak a neihthu ka hre ta a,a bialnu chu a nilo,mahse ka thik a ni,keilo ngaihzawng a nei tur ang a ka suangtuah chuan ka awm zawn hi a na vawng vawng, engkim ka hrilh thin leh Sangpuia ka duh zia min hriatpui tu awm chhun ka thiannu Mahriati bul ah bawk ka in hrilthla leh a, “bialnu a la ni chuang hleinem,a ni te chu a hmeltha a,be tu a ngah dawn tih I hriat kha,mipa a nia biak te chu a nei ve ang mahse bialnu a la neilo tih i Chiang a, nangmah pawh kha han tang sauh teh” a ti luam a,han tan sauh ngaihna lah ka hre der bawk silo “nang chu I vannei zawk a lawm I duh em em nen number in in nei tawn a, in inbia a,thian ah hial in insiam thei a nia ,kei ve chu a number takngial pawh ka neih loh hi” a ti leh a,ka khawngaih veleh chhawng lutuk, a ni pawh hian a star pa hi a duh ve hliah hliah em a,kei ang tho in an hriatphak loh chin ah a in hrosa ve nasa thin ,an thil tih ho te te hi Kan lo notice chat chat a ,a then Kan nuihpui lai in a then ah erawh Kan lo thinrim ve em em ringawt, a ruk a duh neih chu a ruk bawk hian a hahthlak.

“Ka bansan tawh mai dawn,keichu ka beidawng tawh ka duhthu ka hrilh ngam bawk silo,hetia a ruk a ka duh reng chuan nakin ah ka la na thuai ang” ka ti hap a,”i van beidawng hma tak bul I tan hma hauh in beidawng nghal a maw” a lo ti thung ,”min duh ve nise chuan maw ,mipa a nia, a sawi tawh ang,ka awmdan leh tawngkam thenkhat atang hian ka duh a ni tih a hrethiam tawh ang mipangai a lawm a nih,a ni chuan thian ang in min en chuzawng chu” ti chuai raih in tukverh lam ka hawi vang vang, hei ka ngaihdan diktak a ni, tawngka in hrilh ngam lo mah ila ka chetzia tam tak in ka tilang ve chuan ka hria,”tlang tak a nangman I hrilh hun a nghak te pawh a ni maithei a sin, ngaihtuah ve la a zahzum ve ang reng em hi, thiante zing ah chuan a lo ri bawrh bawrh pawh a ni thei mahse hmeichhe lam ah a lerh lo a ,hmeltha viau e ti lo in ngaihzawng pawh a neih vak ngailoh hi,hetiang mipa hi chu hmeichhia zawk in hmalak hmasak a ngaih chang te a awm alawm,hmeichhia an zei a an tih thiam chuan kaihhruai an awlsam lutuk an tia lawm” a ti leh duah, dikna chen a awm Maithei mahse hmeichhe zei tak ka ni lo tlat.

“A nih loh pawn, ti hian ti teh, a status leh story te kha en sak duh lo la,han reh deuh hmak teh,a lo notice che em tih Kan ngaichang dawn nia, a lo biak che chuan a ngaihven ve tho che tihna a ni mai” a ti leh ta a ,keipawn Mahriati thurawn chu ka lo pawm leh thliam tawh, chuta tang chuan Mahriati thurawn ang chuan ka awm ta a, han reh deuh thut mai chu harsa tak a ni,a status leh story ka hmuh chang in ka view chak ngawih ngawih,e nge a hman ang tih hriatchak na in ka khat,mahse harsa ti deuh chung in ka inthunun hram hram , kharkhat a Liam a, Sangpuia a reh vang vang, ka be lo a,min be hek lo,ka status takngial pawh a view ta ngailo,Kan inkar kha thian ang mah nise a tha viau emaw ka ti a,chutia ka reh rual a a reh ve hmak mai chuan ka awm a ti nuam theilo, mahse a thian te hnen atang a zin thu leh a zin na lam a signal a thatloh thu te chu ka hre leh ta a, ka awm nuam huai mahse thian satliah ang Chauh a min ngai ni a ka hriatna Chuan min ti na leh vawng vawng, rilru Siam fel chu ka tum ta a, tun atang Chuan keipawh in thian ang Chauh a en ka tum ve tawh ang tiin.

Sangpuia pawh a rawn haw leh tawh tih a thiante hnen atang ka hre ve leh, duh tawh loh tum viau mah ila, vawi leh khat ah ka thinlung hi a danglam thut thei bik silo ,a chanchin erawh zawng ka la ngaihven ru reng tho ,Kan inbe khat ta bawk a keipawh tlem tlem in ka zia chho ve hret hret,”hmalam pan zel ang” tih chu status ah ka hmang a, mahse ka beisei loh deuh in Sangpuia message ka dawng hlawl,  “eng atan chuan nge hmalam chu I pan a nga” tiin ka status a rawn reply hi a lo ni, ka chhing deuh vang vang ‘engkim hi nangmah vang a ni tih hi hria la min haw ngei awm si’ tiin ka ngaihtuah a, a mah hlat ka tum veleh  a rawn lang leh hlawl mai chu lawm tur nge lawm loh tur tih pawh ka hrethiam lo, “mihring chu hmalam pan zel tur a duan a lawm Kan nih” tiin ka chhang a ,a seen a reply na erawh ka dawng leh tawh lo, ka phone chu ka hum vang vang, hepa mizia hi ka hrethiam thei ngai dawn lo a nih hi.

Ka nu nen bazar ah kal tum in Kan chhuak a, chei pawh ka inchei lo awm hmun thawmhnaw mai mai ka inbel, chawhmeh vel Kan enkual lai chuan “Biaki” tiin nu pakhat hian ka nu a ban ah a rawn beng thak a, Chunu lam chu Kan hawi dun vat, “e he Ruati inhmuh a va khat ve,i bazar ve em ni” tiin ka nu chu a phul hlut a a hmelhriat a nih hmel, “aw hei ka fapa nen Kan bazar ve e Kan tia, hei hi I fanu em ni” tiin keichu min rawn en a,a nui sang bawk “aw a nih ve hi,keini pawh hei Kan bazar e Kan tia,khawnge I fapa chu a awm a hmuh ve te pawh a chakawm a lawm” ka nu pawh chuan a lo ti veleh “tah sawn a thiante a hmu a a Peng lawk a nihkha, e, saw a lo kal a lawm, Zothan, Zothanhrang hetah lo kal teh” tiin a au zui nghal lung lung, a fapa ni awm tak chu zah hmel deuh in a ner nang mai, Kan bul a rawn thlen chuan “khatin mizing ah min au vak zel Suh, Zothanhranga pawh ka nilo” tiin a phun nghal nui nui, ka nuih a lo za ru hle, tlangval a pumpa mizing a hming diklo a in auh ul ul kha chu a lawm chiah lo a nih hmel, a nu lah chuan a ngaipawimawh vak lo nge a thusawi chu a bengkhawn lo hrim hrim “hei I nu Biaki tur a nih hi ka thiannu” tiin ka nu nen chuan a in hmelhriat tir a, kei nen pawh Kan in chibai ve, ka nu te chu an ti ti tui dun mai sia,khawlai a awm Kan ni tih an in hre tawh lo reng reng,a chang in an nui dun leh hak hak thin,an inhmu khat bawk a niang sawi tur an ngah dun ngang mai,keini an fate pahnih pawh in Kan nu te chu tih ngaihna vak hrelo in an sir atang Kan lo en deuh tawp.

“Ka nu hi chu a hmelhriat a hmuh hi Chuan a ti ti pui nghal char char thei,a tawng duh ve a,Kan haw lawk thei ngai lo” Zothana chuan a ti a, “ka nu pawh a ni ve tho” ka lo tih Chuan Kan nui dun hak hak, keini pahnih pawh Kan nu te ve ve an la tawng tui dun si a, Kan lo ti ti ve Liam,a ni Zothana pawh ti ti pui a nuam phian,Kan zia chu a in mil riau, number pawh Kan inpek nghe nghe kha.

Zanlam ah ka chhuah vah ngai vak loh avang hian khua a thim tawh hi chuan ka room lam ah ka tawm nghal chawt mai thin, zanin pawh ka dan ngai te in ka room ah ka tawm leh chawt tawh , “rawn len I phal em” tih message ka chhiar lai chuan ka nui sak “I peih phawt te chuan phal e” tiin ka chhanglet vat, sana ka en a dar 7 Chauh a la ni, tho chhuak leh in Zothana chu Kan in awm na lai vel ka hrilh a, keipawh chu darthlalang hma ah te chuan ding in ponds te chu Kan in chulh leh thuak thuak phawt, phur ruk na riau ka nei tlat a lawm, Zothana hi a hmelchhe lo a, a pian lah nise Sangpuia aiin a hleitling zawk bawk, a tir a ka sawi tawh ang khan tlangval chhelo ka hrethei lutuk ka tih tawh kha, Zothana pawh darkar chanve hnu vel ah rawn thleng in “in thenawm zawk ah sawn ka rawn lut hmasa a,ka zak lutuk” tiin a nui huk huk a, Kan in a hai a nih hmel , “khawnge i nu te hi” tih leh pah in a hawi kual a,”thenawm te in ah an leng lawk a nihkha” ka tih Chuan “awmloh hun an hre hle mai”ti sup in a nui pah sak a , keipawh ka nui ve tawp.

“Vawiin ah Kan inhre Chauh a, ka rawn leng nghal a nia zaklo min ti awm” a tih Chuan “a ho e,zaklo tih chhan tur awm hleinem,ti hian Kan inkawm zel dawn a lawm” tiin ka lo chhang vat a ,a awm a nawm hmel sawt in ka hria, eng eng emaw sawi in Kan in mil phian a, kawm pawh a nuam hle, thingpui lum in dawr ah chips Kan lei bawk, chutia thingpui in pah ah Kan ti ti bawrh bawrh lai chuan “in awm em?” Tih pah in Sangpuia leh Dinsanga an rawn lut hlawl , chutia an ni thiandun rawn lang hlawl chu ka lo en reng, an ni pawh kawngka bul ah ding chawt in kei leh Zothana chu min rawn en ve ta reng, “in leng i nei elaw” Dinsanga zawk chuan tiin Sangpuia chu a kheuh zeuh a,a ni pawh a in min en reng na atang Chuan a mit lasawn in kan piah ah chuan an rawn thu ve a,”imm, hei hi Zothana ,chuan Zothan hemi te hi ka thiante, Sangpuia leh Dinsanga te an nih hi” tiin in hmelhriat na ka nei zung zung a,a ruk tak chuan nuam lo ka ti hle, Sangpuia chu ka melh zeuh zeuh reng a, a ni pawn ka en apiang in min lo en ve reng zel, nidang a tawng ve bawrh bawrh thin kha a ngawi reng a, Zothana chu Chik zet in a en tih pawh ka hria,Zothana pawh chuan nuam a ti chiah tawh lo a ni tih ka hrethei,Dinsanga Chauh chu a tawng a,a khat tawk in za lo deuh in a thusawi chu ka lo nuihpui ve thin,Kan boruak chu nuamlo ru tak a ni, “Ka lengrei tawh emai ka va haw a nge” tiin Zothana chu a tho a ,kawngka bul thleng ka va thlah , Zothana a haw chiah chu ka thaw huai thei, Sangpuia bul a awm erawh ka huphurh viau tho, Zothana a awm ve khan nuamlo tih na ka nei Sangpuia a awm ve bawk si a,nuamlo ka tih ve ngawt chhan pawh ka hre chuang lo,Sangpuia mitmei ka veng ru deuh ni ber in ka hria, theihnghilh ka tum lai tak hian a rawn lang zel a, tiang te chuan engtin nge ka duhna te hi ka Thai bo theih ang.

“Khapa kha I bialpa em ni” nui put put chung in Dinsanga chuan a lo ti a,”nilo e,ka thianpa a nihkha” tiin ka lo chhang ve mai, Sangpuia erawh a la ngawi reng a tawng ve a tum lo zawk em maw ni,”tinge in rawn len teh thut a” ti a ka zawh chuan “rawn len I phallo nge Kan lo tibuai cheu em ni” awmze nei deuh Dinsang an a tih Chuan ka nui hak hak a “tih buai chhan tur a awm lo, in rawn lang ngailo em a ,chuvang mawle” tiin ka lo chhang leh thuai, “tinge Sangpuia chu a va tawng duh lo ve a” tiin Sangpuia chu ka melh zeuh a, pangai tak ang a lan chu ka duh, a ni erawh lo nui suk in “Kan rawn tibuai cheu sia min ngei ngawt ang a” tiin ka lam a rawn hawi a,keipawn ka lo en ve lai a nih avangin Kan mit leh mit chu intawng in Kan in en ta reng , chutah ka chhan mai loh vang nge a nui leh suk a “ka ti dik a ni maw” ti leh sup in a mit a lasawn ve ta nge nge ,”a,a awihawm loh e” ka ti deuh vak, hepa hi ka ngei lek lek tawh, Zothana a thik ti dawn ila a thik ka ring silo ,a awmdan hi ka hrethiam hlawl lo,ka ngaihtuahna tibuai tawk lek a awm a thiam lutuk hi a chang chuan ka haw thin, Dinsanga awm lo se chuan kan boruak chu a nuam lo lehzual ngawt in ka ring a ni.

Zan lam boruak chu dan pangai te in Mahriati ka hrilh leh malh malh tawh, “awi Zothana chu duh zawk daih rawh,Sangpuia hi chu ka ngei lek lek tawh, a mawl si, a mizia hi ka hrethiam lo reng reng” a ti barh barh ,”chutin  a duh zawk ngawt theih loh alawm, Sangpuia hi chu ka vei na a rei tawh a, ka thinlung ah hian duhna aia thuk in hmun a luah tawh , midang a pakai san leh thuai tur chuan zung a kaih nghet tawh lutuk” tiin ka thaw halh ,”ni ve tho bawk sia,mahse bansan I tum tho tho a nihchuan Zothana chu be tha rawh,lunglen hnem ah pawh,a mah a fel in a polite i ti bawk a I la duh tak tak thei maithei asin” a ti leh siam Siam a, kei erawh in Sangpuia chiah ka ngaihtuah thung mipa dang tun Tut Tut a biak that chu ka theih ka ring chiah lo, diktak a sawi chuan Zothana hi a hmelchhe lo a,keipawn ka iai hran lo, Sangpuia aiin tawng hmasa zawk ni ila chuan a lak a rilru put hmang Siam pawh a awl zawk ngei ang,mahse a mah Zothana nilo in Sangpuia zawk hi ka nun a Lang hmasa a ni miau si a.

Mahse Mahriati thurawn ang chuan Zothana chu ka be chhe lem lo,ka va be hmasa ngai hauh lo na in Sangpuia ang lo tak in a ni chuan min care em em a,min duh thu sawi lo mahse ngaihbel tur ting erawh chuan tawngkam vawikhat a nei tawh thung,keipawh tlem tlem in ka nem ve tellh telh a ,ka thinlung ah erawh Sangpuia a la Lian hle thung, a ni erawh a reh vang vang a,ka ngai thin,ka zep lo,vawi tam a dp leh last seen ka en a, a status pawh en hmasa pawl nih tum in ka view rang viau thin,ka ngaih em avangin biak tum in a message tur ka type a,mahse ka clear leh vek zel,chutiang chuan vawi tam ka ti a, ka mittui pawh a far tam malh malh hle,ka duh a ni tih hi a hria a nga min be duh tawh lo a nih chu ka ring hial tawh.

Zothana nen zanriah eichhuah tum in Kan inphur chhuak a, kan kalna hmun chu a nuam in a view pawh a nuam hle, “Sawina hun a ni em ka hrelo a,mahse ka awmdan ah hian I hriatthiam vek tho chu ka ring” thil eizawh Kan thut muan lai in Zothana chuan a ti a,”eng maw ka hriatthiam chu” ka lo ti thung,”I hria” tiin a nui suk, ni e a sawi awmzia hi ka hria,ka hre lutuk a ka hrelo der mai mai zawk a ni,a chhan chu ka thinlung ah hian mipa dang a la len em vang a ni “ka hrelo tak tak a lawm” ka la ti ve tlat, chutah Zothana chuan “ka duh che,ka fank mah mah em” a rawn ti ta a,ka tum loh deuh in ka nui chhuak hawk “teh tawp a” ka ti a, a ni erawh a lo ner nang “nui tawh lo la” a tih Chuan nuihza insum fe hian “imm ka nui tawh lo” ka ti a, a ni pawh a nui ve put put tho, “chhanna min pek nghal kher a ngailo a nia, in ngaihtuahna hun i mamawh ang,mahse hnawlna lam kha chu chhanna atan min pe Suh aw” a ti a, chhanna pek nghal kher a phutlo chu ka lawm hle,chutih rual in a thusawi dan chuan ka nuih a ti za ru viau a,ka nui chhuak tawh lem lo, chutih lai chuan kan piah deuh ah hian thawm a rawn ri hat a,hmeichhe rak that thawm pawh a awm nghal zat ,thawm chhuahna lam Kan en ve nak chuan ka khawng nghal awt thei, Kil khat a hmeichhe kawr huh lo ding hma ah chuan Sangpuia hi a lo ding vang a, a hma a mipa waiter chu a lo melh ran bawk, “tun chin ah chuan fimkhur rawh ang che” a ti vawt raih a a mitmeng chu a nelawm hranpa loh hle bawk, “ka tihpalh lutuk ka ke ka bilh palh a” waiter pa chuan a ti a, Sangpuia hnung a hmeichhia chuan,
“A pawilo ka tha alawm,ka kawr erawh tih ro vat a ngai ang”a lo ti mai a,  Sangpuia chuan min rawn hmu ve ta ka lo en reng, ” nangpawh I hna va thawk leh tawh rawh i thiamloh a nilo nia” ti leh in Sangpuia chu a pawt thu zui a ,Kan hnung deuh lawk ah an lo awm reng hi a lo ni “e nge I hriat a Kan luh tirh atang khan I hmel a dik tawh lo,lungawiloh na nei I ang” hmeichhia chuan a ti mawlh mawlh a Sangpuia erawh a ngawi reng, a ni hian an rawn luhtirh khan min lo hmu tawh reng zawk a nga,Zothana hi a thik em maw ni le tiin ka ngaihtuah a,mahse ka in thing harh leh vat,hetiang a beiseina nei zawng a ngaihtuahna seng leh tur ka nilo tiin ka in hrilh mawlh mawlh.

Mahse Sangpuia ngawt ka ngaihtuahna ah chuan a awm zui leh ta reng, hmalam pan ve ka tum apiang in a rawn lang a,hmalam ka pan tak tak theilo, Zothana pawn ka chhanna a nghak reng a mahse chhanna ka la pe thei lo,”min lo nghak rih rawh,tun ah chuan ka la in peih lo a ni”tih bak sawi theih ka nei lo, a ni erawh a beidawng mai lo a,min nghak a tum thu sawiin min care dan a la ngai reng bawk, Sangpuia erawh a hla telh telh a,ka ngai tulh tulh thung, ka awmdan hi hahthlak ka tiin ka in hrethiam lo ,Zothana hi duhlo hlawm tawp chu ka ni bik lo mahse Sangpuia ka thinlung atang a paihthlak chu harsa ka la ti takzet, thla hial a vei leh a ka nundan erawh a la ngai reng, tumkhat Sangpuia status ka en chu ka nghing dawt thei, a status a hmeichhia leh mipa kut in vuan lai an hmel lang lo a thla an lak chu a rawn hmang a, mipa kut chu tu kut nge a nih ka hai mawlh lo, ka awmzawn chu a tawt nghal up up a,ka tah a chhuak nghal tun bawk caption engmah Siam lo mahse hrethiam tur khawp chuan ka Kum bih a tlem chhe zawk zawk tawh bik lo, rang deuh in ig ah ka lut a hmeichhia follow thar a nei em tih ka en nghal vat, hmeichhe pakhat chuan ka mit a la nghal chat bawk,Dinsanga hnen ah “Sangpuia hian bialnu a nei em ni?” Tiin ka va zawt ta tawp, “imm kar kalta atang khan” tiin min lo chhang a nihchu na ka van ti tak,ka mittui a rawn luang nghal ngiai ngiai a phone screen pawh ka hmu phei vek tawh, “Zorintluangi a ni em”  tih chu ka thawn leh hram “aw ni e” ti a min rawn chhan leh chuan ka tap chhuak hawk,theihnghilh tum in bei mek mah ila, a mah ka duhna leh hmangaihna a la kian miau loh avangin ka tuar na lo thei lo, Dingsanga message pawh chu ka chhanglet tawh lo,mahse Dinsanga chuan heti hian a rawn sawi ta a, “Sangkim thil hi i hrethiam  lo tak tak nge i hrethiam lo der zawk, diktak chuan Sangpuia hian a duh lutuk che,  hmeichhe lam ah zakzum chi a ni tih nangpawn I hriat kha,tichung khan a duhthu che hrilh a tum a,mahse i hawi ve lo niin a hre bawk si, khatia mipa dang nen in in hnaih tak si ah khan a beidawng leh rilru na kha kawp tur remchang tak a lo awm nen tiang hian bialnu a nei ta mai a nih hi, Zothana nen in awm dun lai restaurant a a hmuh cheu pawh khan a rilru a na teh asin,i hriat loh khan nangmah vangin a rum ve tlawk tlawk thin,mahse tun ah chuan midang nen bul intan ve ve tawh a,a ni pawh in hmalam a pan  ve zel a,in nun hmanlai ve ve ah hlim in tum dawn nia”tih chu mittui nen ka chhiar ,”mi mawlpa keipawn ka hmangaih che asin Zothana hi ka bialpa a la ni reng reng lo,mawla”tiin ka tap chhuak hawk hawk,na ka va han ti lehzual tak em, thil pawh ka ei thei lo,thawh pawh ka tho chhuak peih meuh lo, a hunlai khan keimah tak hian ka duh a ni tih kha lo hrilh ni ila tun hun hi Kan thleng Miah lo ang ti ten ka ngaihtuah a,keimah leh keimah chu ka indem ngawih ngawih, a chang leh mipa a nia min hrilh kha thil har tak a nilo ,min duh na a nasa tawk lo a ni mai tiin ka ngaihtuah thul ka ngaihtuahna a vakkual nasa in ka mittui lah a tla tam bawk, chutia ka awm reng chu tha tilo in Mahriati chuan ka peihlo chung min vahchhuah pui a, cafe pakhat a Kan chawlh laiin ka hmuh duhloh ber thil ka hmu ta, cafe a Sangpuia leh  hmeichhe rawn inzui lut te chu hmuh duh lo viau mah ila an lak atang mit ka lasawn thei lo, an ni pawh chuan min rawn hmu ve in Kan lam chu an rawn pan a ,Mahriati kut ka hmer na ngat ngat hle, “Kan va inhmu khat ve”Sangpuia chuan a ti sup a”nia tiraw”ti in ka nui lui hram hram,a va han harsa tehlul em, “e,hei hi Rintluangi a nih hi,chuan Tluang hei hi Sangkimi ka thiantha deuh a nih hi” tiin a nui var var a, imm ni e,kei leh a ni hi chu thian ni tur a Khuanu duan Kan lo ni a nih dawn hi, Kan pahnih chanchin hi thian atang bul Kan tan a ,thian ah bawk a tawp leh dawn a nih hi, “tah sawn Kan va thu a nge”tiin Sangpuia leh Rintluangi te chu Kan piah deuh chu an pan a, ka thaw hawk thei , a khat tawk in an ni pahnih chu ka en leh thin, Sangpuia nui hmel chu a der ni lo in a tak ngei a ni,Dinsanga sawi ang khan a ni chuan hmalam a pan tawh tak tak a nih hmel,kei erawh ka la na dawn Chauh niin ka hria, a nui hmel mawi tak te saw ka tan a ni ve lo a, a mi ngaihsakna lah ka dawng ve ngai dawn lo,Kan thawnthu Kan tan ve hma hauh in a tawp Kan thleng nghal a,thinlung ah hliam na tak tuar mah ila ‘ka tha e’ tih a tul si, ka na a ni ka na, “mate”Mahriati chuan a ti sep a,kei erawh in Sangpuia te lam ngawt ka la en,chutah Sangpuia chuan min rawn en ve in Kan mit leh mit chu a intawng leh ta,a ni chu a rawn nui sang a, ni e,a ni pawn hmalam a pan a nihchuan keipawh in hmalam chu ka pan ve tur a ni,tiin harsa ti zet in ka lo nuih let ve a,thinlung erawh a rum vawng vawng thung, Kan dawihzep dun em avanga Kan thawnthu tawp dan ah hian lungawi erawh a va har si em,a tu emaw zawk zawk khan huaisen tak in Kan feelings te kha lo sawichhuak ni ila tun ah hian Rintluangi thutna ah sawn keimah zawk hi ka thu maithei a ni, Kan pahnih dawihzepna atang hian thil pakhat erawh ka hrechhuak,a chang chuan kan feelings te hi huaisen tak a Kan lan chhuah tir atul chang a awm thin a ni tih hi.

“Lo hruaichhuak lui lo che ila tha tur keimah vangin I duhloh ber thil i hmu bawk sia” in thiamlo deuh in Mahriati chuan a ti a,”nangmah vang a ni hleinem,hei hi chu ka la hmachhawn tur tho tho a nia,ka pehhel reng thei dawn lo,a ho lutuk” tiin ka thiannu inthiamlo lutuk chu ka lo hnen veleh chhawng,Mahriati hi awmlo se chuan tun a ka hreawm tawrhna hi tun ai hian a nasa ang,thiantha chuan lungngaihna leh hlimna Kan intawm thin a, hlawhtlinna kan chan in Kan inlawmpui thin, Kan hlawhtlinna min lawmpui theilo tu chu thiantha ti a chhiar tlak an nilo, hlawhtlinna kan chan chiah hian kan tan a mitha leh mitha lo hi chu an hrang nalh thin, Kan lungngaihni a min kiansan tu te pawh hi thiantha an ni ngailo,hei vang tak hian Mahriati ang thian ka nei hi ka lawm a,ka lungngaih leh ka hlimni a ka kiang a a awm reng thin avang hian ka tan mi hlu tak pakhat a ni, thil tam tak ka ngaihtuah a ,khawvel ah hian kan tan a ruat ni ve Miah lo thil hi a lo awm a nih hi, ka hmangaih nei thei lo mahla,thiantha tak erawh ka nei thung,ka chung a Khuanu ruat hi harsa hle mahse pawm thiam ka zir a ngai tih ka hria, Sangpuia te lam chu ka hawi leh a,a tan a ruat dik tak a tawn meuh chuan a let tam tak in a nui hmel a mawi zual ni in ka hria,a tha vek e,hei hi ka tan a Khuanu ruat a nih chuan ka pawm e, ka mittui lo tla mai tur chu hru zeuh in ,ka phone vibrate char char chu ka en a screen a Zothana tih in ziak ka hmuh chuan ka nui sak a.

Tawp ta.

Leave a Reply