You are currently viewing STARLIGHT – 18 & 19

STARLIGHT – 18 & 19

Spread the love

STARLIGHT – 18

JONSMELY BAWITLUNG

( TETEI POV )

Zing ka harh chuan ka mit kham lutuk ka hre hmasa ber….Ka lu a na bur bawk a,,Nizan thil thleng ka ngaihtuah a,,Zira khan min kuah anih kha motor pawnah dingin..Min kuah lai khan ka thla a muang a ka hahdam hle a ni tih ka hria,,A hmaa min kuah pawh khan khatiang khan ka awm tawh…. Khatianga hahdam taka min siam thin tu chu Nicky-a chauh kha a ni mahse Nizan lawka Ziran min kuah khan ka hahdam hle si anih kha….. Engmah a sawi ngailo a,,zawhna pawh min zawt ngai heklo mahse a taksa hmanga nghet taka min kuahna khan keimah ah thil a ti thei hle si anih kha……

Khum atang chuan ka tho them them a,, Bathroom-a ka luh ruala darthlalang hmaa ka thla lo lang chu ka en a,,Ka mit bui lak chuan ka mitmeng a ti zim san a,,Ka sam thur deuh chup chuan damlo min ti ang takzet….ka hmai chu ka phih a,, Bathroom atang chuan ka chhuak nghal a,,Ka chhuah ruala ka hmaa lo ding avang chuan ka phu zawk,, “Mawiek,, min ti phu lutuk” zawi si a ka tih hlak chuan engmah sawi lovin min kuah thlawp a,,Keimah vangin thinthi pawh in a muhil theilo a ni tih ka hria,,ka inthiamlo viau bawk….

Min kuahna atanga min thlah hnu chuan,, engmah sawi lovin ka lehkhabu dahna lam chu a pan a,,Keiin ka hmai ka hru thung… Ka dawhkan chunga ka Album dah chu la thla in chhuatah chuan a thu a,,”Lokal rawh kan pahnih in en dun ang….” a tih chuan lu bu nghauh in,,A hmaah chuan ka thu ve nghal a,, Album kan en lai chuan a changin kan nui a,,a changin kan mittui kan hru leh zeuh thin…

“Te theihngilh turin ka ti lo che,,mahse Khawngaih in hmalam pan ve tawh hram rawh,, Hetianga i awm hi Nicky-an hmu che sela a na dawn lutuk,,Kum10 a ral tawh,, Hma lam pan ve hram la ka duh takzet a ni….” tap aw tiau a atih chuan ka ngawi ngal a,,A mittui luang ka hmuh chuan mahni inthiamlohna in ka khat nghal,,Ka kun daih a,,Ka dara rawn chelhtu avang chuan ka hawi chhuak a,, Agnes-i leh Asawmi ka bula rawn thu ve ka hmuh chuan ka mittui chu ka dang zo lo….A far thla zung zung a,,hruk pawh ka tum chuanglo,,Anni lehzel an tahna ka thlen erawh pawi ka ti …..

“Te Mawitei sawi hi a dik chiah ania,, Mihring kan nih chuan hmalam kan pan a ngai asin… Nicky-a khan a tha ber ber nei turin a duh thin che,,A hmangaih tluk zetin i hmangaih a ni tih kan hre vek,,mahse enteh tuna i awmdan hi chuan Nicky-a rilru chauh i ti na tih i hrethiam lo a mi??” Asawmin a tih ve chuan chhanna ka la pe thei chuanglo…..Ni e chhan ka duh,, Ka duh ber chu Nicky-a hnena kal a ni…. Hnutchhiah bik nih hi ka duh tawh lo…. A bula kal a,,Kuah a fawh leh te ka duh ka ngaih thu te hrilh a,,min kalsan rei lutuk avanga thinrim khum te ka duh chuan min thlem leh se a hma a min runluih ang te khan ka bulah awm leh sela ka duh mahse ka thei silo….

“Te Nicky-a hi i hmangaih anih chuan kan thusawi hi zawm hram rawh,,hetianga i awm reng chuan in inhmuh leh hunah a lung a awi dawnlo lutuk asin…..” Agnes-i meuh in a tih chuan ka insut ri nghal hraih a…..

“Ka duh chu maw…A bula kal ka duh ber,, Elephant duhawm te tia min koh a,,tu mit mah veng lova min tlan kualpui leh te ka chak a,,Inkai rial a kal dun te ka duh leh asin ….. Ka hmangaih che min tih ruala ka chala fawp thin mipa bulah khan kal ka duh….. Engtin nge Amah nena tih chak tam tak ka nei chung hian hmalam ka pan theih a,,Ka suangtuahna leh ka ngaihtuahna zawng zawng a nei vek a,, Ka thisenah hian a bet tlat tawh a,,engtin nge chuti chung chuan hmalam ka pan theih tehlul ang ni…Ka tum alawm a lawmna turin tiin ka nui lui a,,midang bulah ka awm ve bawk thin mahse ka hawina lam apiangah hian khang kan nunhlui zawng zawng te kha Darthlalanga lang ang mai hian ka hmu thar leh zel thin…Ka Zirlai naupang bula ka awmlai takngial pawh in Amah nena kan nundan hlir ngaihtuah chung hian engtin nge hmalam ka pan theih ang….”

Ka mittui luang nasa lutuk chu hui kiangin ka thiante chu ka enkual a,,An mittui kar atangin ngawi rengin min en tlawk tlawk ringawt…..
“In hria em?? Noodles ka siam lai takngial pawh in Lalmuanzuala lo chu ngaihtuah tur ka hrelo…..Ka mumang lama min rawn tlawh chang te hian zing thangharh hlau reng reng hian ka chhing lui tlat thin…..Ni eng hi ka hua a,,Khaw eng hian Beiseina beidawnthlak bak min pe ngai silo…..Khawlaiah kal ila Amah hmuh inbeisei zetin ka hawikual a,, Pathian pawh hian nga ti nge a hmel ang tal pawh hi a siam ve loh ka ti thin …… Khuma ka mut lai te,, Chaw ka ei lai te leh College a ka kal lai te leh Bathroom chhung atanga ka chhuah lai chen hian Lalmuanzuala lo chuan Ka ngaihtuahna an luah thei silo hi ka tum tawk loh vang em ni??? Hepa ka hmangaihna dai thei lo hi ka thiamloh em ni??? Ngaihtuah loh te pawh ka tum ve thin mahse keimahah hian a bet tlat si a ni…..”

Sir Zuala Lehkhabu ziah The One and Only chu la kangin,,”He lehkhabuah nilo hian Nicky Lalmuanzuala chanchin hi ziah a ni asin,, Kumkhuaa hlimna min tiamtu leh Hmangaih taka a fate nen a kan nui lai thlir min tiamtu chanchin kha keimahah zawk hian ziah a ni asin….” Ka tap chhuak hawk a,,ka insum theihna kehchhia hi ka pawi ti lo…..Ka tah apianga a natna ngai reng hi ka hrethiam lo…. Hmana a nat ang tho khan a na reng a,,a zual zel zawk ni maiin ka hria….Ka awm ka dawm a,,A ri meuh in ka tap rawih rawih a,,Dam tur hian ka va han duh si em!!! Mahse Lalmuanzuala anih ngawt loh chuan ti dam tu an awm silo… Khawvel thiamna in a tih dam zawh loh natna ka vei a,,Ka thinlung hian hliampui a tuar a,,mahse a damdawi a awm mawlh silo…..Hetiang teh thlawt ai chuan tangdang belin Chhungkua din zawk se ka dam zawk mahna….Mahse min hmangaih leh min thlahlel ngawih ngawih in a ni min kalsan ni……

Ka pindan kawngkhar inkik ri chu ka hre teh meuh mai mahse ka tap bang thei silo a ni…. Agnes-i a thawh rualin Kawngkhar a hawng a,,Mipa ho lo lut pawh chu tumah ka en lo….. An vai chuan min en pawh nise ka tap bang thei silo a ni…..Ka kun ngawih ngawih a,,insum ka tum zoh poh leh ka bula awm te hian Nicky-a chauh min ngaihtuah tir tlat bawk si……” Mate” tisup a ka lu a awma phum bo vek khawp a min kuah bettu avang chuan ka ip nghal vak a,,ri lova ka tap ringawt pawh chu keimah pawh ka lawm em em tawh….. Hepa taksa hi ka vawithum nan ka dek a,,mahse ka hriat than tak ang maiin min khawih rualin ka hre em em si a ni…. Rei deuh tak min kuah hnu chuan ka tap bang thei hram a,, Khatiang taka Nicky-a awmloh hnua tah kha ka neilo,,Zira hi rawn kallo sela ka in tap hlum thei hialin nia ka rin…..

“I zia deuh tawh em??”A awm atanga min nawr sawn deuh in A aw min ngaihtuah naa khata a tih chuan lu ka bu nghauh a,,Ka sam chu dim zeta rawn hui mam in ka chalah a fawp vawng vawng a,,Ka chesawn lova ka tang heklo,,ka mit ka chhing sawk a,,Ka thaw nghal ham ham….Hepa min khawihna te ka taksa in a thlamuanpui viau na chhan hi ka hrethiam theilo a ni….. Ka hmui a laksawn rualin ka hawi kual a,,ka chhungte chu tumah an awm tawh lo tih ka hria lehlamah an kal vek a ni mahna,,Mahse Zira hi khawi atanga rawn kal nge anih le?? Tukverh lam ka hawi chuan khua a var tan ek ek chauh a ni sia….. Ka tap ri kha a hre pha mi niang le??

“I tho thei angem??” a tih chuan din kan mai ka tum a,,mahse ka ke mu churh churh avang chuan ka thu lehnghal hnawk…Rang taka a kuthniha min chelh nghal in min thut rem tir a,, Mawitei pindan chhunga rawn lut nghal ka hmuh chuan,,”Lo kal vat teh” ka ti nghal chul a,, “Eng nge ni ta??” Mawitein mangang hmel zeta a tih chuan,,”A ke kha a mu a,,ka khawih a duh vak lo anih hmel…” Ziran a tih sup chuan Mawitei chuan a beng nghal pawp,, “Ahhh…. Mawiek misualnu…” Ka ti nghal vak…. Tha deuh a ahmeh hnu chuan a zia ve mai bawk a….”I tho thei tawh angem??” Mawitei a tih chuan lu bu nghauh in,, ka in siamrem a,,ka tho chhuak ve nghal a,, “Bathroom-ah ka kal dawn..” tiin Zira chu ka en zeuh a,,mit ti zim suna min melh chuan,, “Ka tap tawh lovang” kan ti ngawt a,,phun hlukin pindan atang chuan a chhuak nghal daih a….

“Eng inzawmna nge in neih??” Bathroom ka chhuah rualin Mawitein a ti nghal thawr a,, Ka melh nghal hra bawk…. “Ringawt a che,, engtin nge a lokal tih zawh che ka tum zawk che asin” ka tih chuan mak ti hmel zetin min melh a,, Keipawh hian a rawn chetdan leh ka awmdan ziah hi ka hrethiam biklo em a tin ni….”Lodge atanga in haw khan kan ngaihtuah lutuk che a,,mahse In in rawn thlen khan muhil in a rawn pawm lut che a,,i chauh vang niin a sawi bawk a…” A tih chuan mak ti zetin ka melh a,,Ka unau te nilovin Amah in ka inah min pawm lut tihna ania chuan ka harh miah lo bawk a maw??? Thil thleng mak tak a ni….Pindan atangin kan chhuak a,,Ka u te nen Zira chu an lo titi a,,eng nge an sawi pawh ngaihven lovin Choka lamah kan phei nghal daih….An pathum chuan Zira chungchang hlir an khel leh char char nia…Thingpui te kan in zawh hnu chuan Zira haw tur chu ka thlah a,, kawngkhar pawnlama kan din lai chuan,, “Ka lawm e” ka ti sap engvang bera lawmthu sawi nge ka nih pawh ka hre chuanglo…”Um” ti nghutin min kalsan nghal daih…. Ka laka a khawsazia hi a mak tih loh chi pawh a nilo…. Tha deuh a kan awm ka beisei lai hian a in kharkhip leh daih zel a…..

( ZIRA POV )

Chhingkhat te mah chhing lovin ka awm a,, Puii ka ngaihtuah em avangin vartianah a inah ka chhuk ringawt…..A unau te an awm tih hre reng mah ila ka ngaihtuahna atangin ka dah chhuak thei silova,,Lehkhabu khan engkim a sawi a,,mahse Amah Puii ber hnaih a,,a bula awm a,,a mangangna chhawk tu tal nih ka duh a ni….A Kawngkhar zawn ka thlen a Inchhung thawm ka hriat chuan ka kik nghal vat a,, Joseph-an kawngkhar a rawn hawn rual chuan pen lut nghalin,,”Eng nge thleng??” ka ti thawr a,,Mak ti deuh a min en chu ngai pawimawh duh lovin pindan kawngkhar chu ka kik a,,Ka pen luh ruala ka thil hmuh avang chuan ka ding dat a,, Hmeichhe pathum in Puii chu an thut huala chhuak zeta aw rawl chhuah meuh a atap chu an en tawp,,ka kal hnaia a bula thu hniam in ka kuah a,, hetiang em em hian a na a,,Kum10 hnuah pawh a na ala dam lova,, Keimah ngei hian tih dam sak ka duh,, Nicky-a anga zaidam leh dawhthei ka nilo mahse tlem tala chhawk theih hi ka duh a ni…..

A duh tawka a tah hnu chuan inla hrangin a sam ka siam sak a,, Nicky-an a chunga a thil tih dan a ni miau a,,ngawi rengin a chalah ka fawh sak bawk….A taksa tang deuh tung a inthlah dul riai riai tih ka hriat chuan ka lawm ru veng veng,,tlem te tala hmasawnna ka neih miau avangin.. Pawnlamah ka chhuahsan hnu in a ULawman min lo be vat a,,,an farnu ka ngaihsak avangin lawmthu te an sawi luam a,,thingpui te ka in zawh hnu chuan ka haw ve nghal a,,Min thlah pah a kawngkhar bula Puii lawmthu sawina chu chhan mai ka tum a,,mahse hunlo ka tih leh zawk avangin ka kalsan a….

Inchhung ka lut ka nu lo tho in ka kalna min zawh chuan tha takin ka hrilh a,, “Tetei hi kan ngaihsak zual deuh angai dawn nih hi,, Nangnen pawh in thawk dun a hetiang khawpa lu a sun anih chuan khawngaih hle ang che…Kawm hlim hram tum ang che aw” Ka nu in a tih chuan,,”Awle” tiin ka pindan lamah ka kalsan a….Tukin zinga a awmdan khan a awm fo ka ring,, a hma pawh khan a inchhungah ngei khatiang khan ka hmu tawh tlat alawm…Ka phone la in UZuala ka call a,, A pickup ruala a la tho lo ni tih hriat taka thophang aw taka,,”Hello”a rawn tih chuan,, “Vawiin In dine out naah khan ka tel ve duh” ka tih chuan Amah anglo zetin,,”Engmaw??” a rawn ti vak….”Vawiin in dine out naah khan ka tel ve duh i ex students ho bulah khan” ka tih nawn leh sup chuan a rawn nui huk a,, “Teuh lo” tiin phone a dah nghal daih…Eng nge a hriat a??Tia phun hlukin ka phone chu ka melh ngawt ngawt a,,

Nileng a va rei duh em!! Puii in lama kal chen la ni mang bawk silo,,Ka hna tam tak in tiang ur te la ka rilruah a awm der bawk silo,, engtin nge vawiin ni ang hun hi ka lo hman thin tih pawh ka hre love….Khumah ka mu a,,Ka pindan kawngkhar in kik riah chuan tho in ka hawng a,,Uzuala nui sawng hmel ka hmuh chuan ka melh rum ul a,,”Meng raw raw suh… lo chhuk rawh,,Inhnuaiah ka kal dawn” tiin a kal nghal daih nia… Hepa tak hi chu khawi atanga chimawm hi zir nge anih pawh ka hrelo….

Inhnuai ka thlen chuan an chhungin an lo leng tih hriat takin Thutkhawmna pindan lamah an lo ri deuh laih laih a,,ka pa tawngri pawh ka hre thei,,hnaah a kallo a ni ngei ang…Kan inchhung a naupang awm hi chu a hun ve tawh khawp mai,,ka nu leh pa rengin naupang an lawm emai….UZuala nen kan inzui chhuak chu ka nu in min lo be vat a,,”Khawiah nge in kal dawn a??” a tih chuan UZualan,,”Inhnuiah kan zu leng lawk ange…” tia chhang in kan chhuak dun nghal a,,”Nang hi star i nei a mi?? Dine out naa rawn kal ve te i sawi” a tih chuan ka chhanglo,,Ka jogger pants hak ipte zen in ka pen thla hmawk hmawk a,,a hma zawkah ka kal avangin ka hnunglam a anui ri huk pawh ka hrelo der hmiah…..Door bell ka hmet tur chu min pawtsawn vatin,,”Eng nge??” ka ti thum sup a,,ka hmaah rawn ding Kawngkhar chu a kik ngat a….

“Lo lut rawh kan kalh lo” chhunglam atanga an rawn tih chuan kawngkhar chu hawngin “Kan lo leng thei angem??” aw ti sin lui tih hriat zeta a tih chuan a hnunglam atangin ka lo nui hawk…. Atthlak lutuk…. An thiannu Agnes-i a tih kha rawn kalin Uzuala a hmuh rual chuan,,”Awiii Sir mai mai chu…Lo lut ru” a ti chul reuh a,,Kan pen luh rual chuan ka hawi kual thuak a,,Mipa ho hmel ka hmu miah lo khawiah emaw an chhuak te pawh a ni mahna….

“Nes-i khawiah nge midang??” UZualan a zawh chuan Agnes-i chu ner sawng hian,, “Sir chuu pasal nei rual ka ni tawh hi nes-i min ti ziah a….” a tih nang nang chuan Uzuala chu a nui hawk hawk a,, “Joseph,,Uchhana leh Asawmi te bazar in an chhuak a,,Ulawma chu a inbual a,,Mawitei leh Tetei chu pindanah an awm an rawn chhuak tep ang….Khawiah nge Miss leh Bawihtea??” a ti nghal zat a,,an tawngkam hi a felfai hlawm takzet….

“Inchungah an awm a,,Tetei a tha em??” UZualan a tih chuan,,”Tha vak lo” ti sap in a hmel a ngui nghal raih a…. Pindan kawngkhar a rawn inhawng a,,Mawitei a rawn chhuak a,, a hnunglam ka en chuan kawngkhar a khar daih nga ti nge le??

“Sir in lo leng elaw,,Tetei a muhil harh ka awmpui lawk alawm le,,a rawn chhuak ve tep ang…” a ti nghal zung zung a,,A thalo viau a mi le….Awmpui ngai khawp a an awm mai chu….Mawitei kan bula a rawn thut hnu lawkah Lawma inbual zo tih hriat takin Bathroom atangin a rawn chhuak a,,” Sir chu in lo leng elaw,,Zira pawh lo thu ru ka in thlak lawk ange” tiin mikhual pindan lamah a lut ve nghal a,,Mawitei leh Uzuala titi bawrh bawrh chuan eng nge an sawi ka hrelo,,ka rilru chuan pindan lehlama awm chauh hi ni a ngaihtuah lehpek chu….Thil tla keh ri burah chuan rang zeta tho in Puii pindan kawngkhar chu ka hawng nghal a,,Amah ka hmuh mai loh avangin Bathroom lam ka pan chuan chhunglam atangin a inkalh avangin a Kawngkhar chu ka chum nghal dawt dawt….

“Puii lo hawng teh khatah khan eng nge thleng a??” ka tih chuan Mawitein “keiman ka lo bia ang”…tiin ka hmaah a rawn ding a,,thaw hawk in ka tawlh hnung hrut,, UZualan chiang zeta min melhna chuan ka rum nghal nghut bawk…..

“Te lo hawng teh,,min ti hlauthawng ania,,” Mawitein a tih chuan chhanna a awmlo,, “Te…Hawng rawh….” a tih rual chuan “Ngati nge” tiin Lawma leh Agnes-i an rawn lut a,, an lo luh ruala Bathroom Kawngkhar inhawng ve nghal lam chu kan hawi thap…..

“Ka tih dera…” tia Mawitei kawk a,,”I hmel a i hlauh zia kha” tia a nuih hak hak chuan Mawitei hlauthawng zeta ka bula ding chuan a banah a beng nghal pawp a,, a hau nghal mawlh mawlh,,,”Chimawm ila bansan lo tih hre tur kan ni asin” tisuptu Uzuala chu a en nghal vat a,,”Sir i awm ve tih ka hre lova” tia inthlahrung taka a tih chuan Uzuala chuan a sama tuai sakin “kal ang u” a tih chuan pindan atang chuan an chhuak nghal dam dam a,,kei erawh ka chesawn lo…..Puii inthlahrung hmel taka ka bula ding chu ka melh run a,,”A chhungah khan eng nge thleng??” ka tih chuan a thaw halh a,, “Engmah” chil lem dawka a tih chuan a hmaah dingin a mit en turin ka kun hniam a,,min melh ve ran bawk,, “I ka chuan dawt i sawi thei mahse mitmeng in dawt a sawi ve ngalo….” ka tih chuan kunin a ngawi ngal a,,A kut tang a khalh niap niap bawk a,, “Tum tawh suh ang che…” ti hmukin a banah chelh in pindan atang chuan ka chhuahpui nghal a… Sitting room-ah chuan ka thlah lehnghal mai bawk….

Tlai lama an dine out na hmun tur vel sawiin an titi luam a,,kei erawh Puii ka melh ngur a,,a tawng ve mang miah lo,,Ka en reng vang nge. a thil tih tum vang kha ka hrelo nuamlo ti hmel zetin an titi karah lem zetin a nui ve a,, Bathroom chhungah khan eng chiah nge thleng ka hrelo mahse thil tha erawh a thleng lo tih ka chiang,,Henu hian mahni intih hlum duhna khawp rilru a pu em ni?? Nge ni a tihpalh vang liau liau a darthlalang kha tikeh a ni zawk….

“Zira Tetei nen hian in thawk dun a maw??” Mawitein phawk fe a atih chuan ka ngaihtuahna atangin ka harh chhuak zawk,, “A sawi na nge Amah hian??” tiin chimawm zet hian ka melh a,,”Ahh sawina chhan tur awmlo em alawm bakah ka thiante hi an ler kawh hlawm lutuk a,,an….” tia Agnes-i a melh chiah Agnes-in a ka rawn hup sakin,, Ka khawng khawlo dawn che…” tiin a kuah bet a,, Mawitei a che ve nghal phat…..Choka lama an kalpui dawr dawr chu en in ka khi ve suk suk bawk…..

“Zira anni ho hi Kindergarten an kal atanga in kawm deuh vek annia,,Nizana i hmuh te ho nen khan an inngaina in an infiam dan pawh hi a na asin…” Lawman a tih chu ka khi suk a,, Lehkhabuah khan a ziak lang alawm….

“Mi harh rual awmkhawm annih hi,,,Hrem dawn a lehkha thiam fu si,,Hrem loh dawn a class Nghal ber ni bawk si annia an hahthlak hlawm ania,,Thu an awi lah hian an awi em em a,,mahse an kawlh hra hlawm bawk sia,, an nui khek tuar tuar a,,mahse Zirna leh activity hrang hrangah a ber an ni hlawm zel bawk a,,Tumah hlawhtling lo an awm heklo… Mi mak rual awmkhawm ka ti mai….” Uzualan nui huk huk a atih chuan ka ngaihtuah zawm neuh neuh a,,an harh ve tawk ang tih chu nizana an awmkhawm a an awmdan khan a hril mahse Nicky-a erawh an sun a ni tih an mitah a lang vek thung si….Heti khawp a an ngainat mipa chu engang tak ni ang maw?? Lehkhabu kha chu a ve mai chauh anih pawh ka ringhlelh love……

Tlailam a ni a,,Uzualan insiam tura min tih chuan ho lam zetin ka inthuam a,, T-Shirt var sar colar nei ha in,, jeans kekawr pawl duk ruih ka ha a,,mi 40 chuang kan ni a,,Motor neilo pawh an awm nawk anih kha,,Ka car ka keng mai aniang chu….. USangtei a kal ve dawn lova kan in lamah chaw an ei dawn thung…. Pawn kan chhuah chuan Puiin a bike chahbi a vawr vir lauh lauh chu Mawitei nen an lo in dinchilh leh ran tawh a,,eng nge an sawi ka hrelo….

“Lalhlupui min pe vat rawh….” Mawitein a tih chuan,,a sang zawk na na na chuan a chahbi chu a khai sang hmak a,, “Ka bike ania ka thu thu alawm i bialpa car-ah sawn chuang ve mai mai teh….” A ti deuh hmak….. A inchei dan ka enchiang a achhelo takzet,,ka hmuh hmasak ber ang mai khan,, Jeans kekawr tite zet ha in T-Shirt Var lian lam mah a ha a,,Boot tawite a bun bawk,,a t-shirt hak chungah chuan Kawr banbul chhing lam mah a ha bawk…. Street Girl te thawmhnaw diktak a ni a hak,,mahse a inhmeh viau bawk si…..

“Lalhlupui” ti that ri ah chuan an lam ka hawi a,,Puii nui chunga tlanchhe awr awr chu Mawitein a um bawk a,,lu ka thing nghut nghut bawk….. “Motor indaih loh a hlauhawm angreng sia,, I bike khalh la Chhana hi i Scropio hi khalh tir la,,Chuan lam tur ang ang kan lam khawm mai dawn a mi??” Uzualan a rawn tih chuan ka bu nghut a,,Chahbi chu Chhana ka pe nghal a,,Ka bike ka lakchhuah rualin Puii ka lama rawn tlan chu lo man chawt in a kuta chahbi chu ka laksak a,,Mawitei lamah chuan theh phei in,,”Ka bulah lo chhuang rawh” ka ti sup chu mitmeng ling hlar hian min melh a,,”Vatin” ka tih chuan min hnial ka rin tehreng nen a rawn lawnkai ve mai bawk a,, Mawitei nui var var chunga Puii bike ala chhuak chu ka hmu hman zuai bawk…..

“Thian ni tawh ang” ka tih chuan

“Ka duh lo i polite lo em!!” ka hnunglam atanga ring deuh taka a rawn tih chuan ka bike chu ka ti ding nghal thut a,,a in ring biklo tih hriat takin min rawn bawh rawk rawk nghal a,,Rang zeta ka bike atanga chhukin,,”Kha Polite lo liana” a ti hmuk a,,ka lo nui ri huk chu min melh nghal rawm rawm a,,Eng nge maw polite lo min tih em em nachhan chu ni ang le???

“Ka Polite lohna chhan chu sawi teh??” ka tih chuan a lei min chhuah khum vakin kut kuangkuah than in a hawisawn deuh hmak a…..

STARLIGHT – 19

( ZIRA POV )

“Ka Polite lohna chhan chu sawi teh??” ka tih chuan a lei min chhuah khum vakin kut kuangkuah than in a hawisawn deuh hmak a…..Ka nuih a za ru viau mahse min huat leh thut nachhan hi ka hriat ngei a ngai tlat….

“Puii zawhna ka zawt che??”Ka tih sup chuan,, ka lam rawn hawi vutin,,
“Ka thin i tirim thar lutuk…” a ti leh nghek a,,a inher leh hmak nia… nga ti nge maw a thinrim vak vak mai le a chungah eng nge ka tihsual pawh ka hre der silova,,A u ten min rawn tlanpel lai pawh chuan ala ngawi ngar a,,Bike atanga chhuk ve in a hmaah ka ding a,, Hmeichhe thinrim thlem hi ka thiam lo,, engtia han tawng tur nge pawh ka hre lo mahse Puii lungawilo erawh thlem ngei ka duh si chu anih hi…..

“Millennium Center Parking a lift i luh dawn a,,i hmeichhe sut her pawp ngaihdam pawh dil lova a lift chuanna tur i khar hnan daih kha keimah ka nih kha…..” a tih chuan hrethiam lo zetin ka melh haw a,, “Khatiang khawpa mihring polite lo kha ka la hre ngailo reng reng…Miss Maria-i ka hriat hma a ni a,,Ani nen khan in rawn kal dun bawk a engmah thlenglo ang maiin ila awm thei lehnghal” a tih chuan ka hre chhuak thut,, ka nui chhuak nghal hawk….Nula puitling tawh hriat reng atan chuan a ho deuh chu a ni…

“Eng nge i nuih a??” a ti vin leh nghal hlar a,,ka aw thian kharh in,, “Ok ka hmanhmawh luat vanga ka thil tih sualah ngaihdam ka dil e… Ka ngaihdam dilnan nakinah i duh ber ka la present ang che…” ka tih chuan min melh ralh a,,”Chuan i laka theih tawp a polite ka tum bawk ang…A tha em??” ka tih chuan a khabe dawm in a ngawi vang vang a,,A unaute kal liam na a rei ve tawh angreng sia,,An rilru a lo buai tawh viau mai thei hial a ni…..

“I thutiam hi hlen ang che ka duh ka sawi velah min pe ang che…” a tih chuan lu ka bu nghut a,,”Anih chuan Thian kan ni tihna??” ka tih chuan naupang fel zet ang mai hian a lu a bu nghauh nghauh a,,a nui sen sen bawk a,, a nui hmeltha tak hi hmuh fo ka duh reng a ni….
“Kal tawh ang le midangin min lo nghak vek tawh ang…” ka tih chuan a ding leh tlat pek…. “Eng nge ni leh ta??” ka tih chuan ka bike chu a melh zeuh a,,henu te hi eng nge a ngaihtuah leh tak ni…. “I bike ang hi ka khalh chak ve lutuk a,, zanin chiah min lo khalh tir ve….” Naupang chhia zeta a tih chuan kawng dawm meuh in ka melh a,,a awmdan hi ruih a nei hial te a ni zawk a mi le?? A landan duhawm ru zet chu ka en vawng vawng a,, “Mawh Please…” a tih leh chuan Keimah anglo zetin ka chahbi ka pe a,, Hmeichhe bike khalhah ka la chuang ngailo,,Tin ka bike ah hian Betty tih loh hmeichhe ka phur ngai heklo,,a vawikhatna atan Puii ka phur a,,chuan ka la khalh tir dawn bawk ania….Huh!!!! Kei hi ka a tak tak tawh anih hi!!!!

Ka rin aiin a khalh chak zek lehnghal a,,Kan dinner ei na hmun tur Heritage kan thlen chuan an lo lut vek tawh a,,Waiter pakhat hian pawnlamah min lo nghak reng tawh bawk…. A chhung an lo siam rem vek avangin dawhkan lian tak kilin an thu tlar thap a,,Keini pahnih kan luh chuan an ri nghal hak,, Puii awmdan over deuh lek lek chu mak ka tih viau rualin a harh ve thin tho tih ka hriat tawh tlat avangin engmah ka sawi lova,, Ka veilama thu Mawitei pawh ka zawt chuang lo… Rinloh deuh in Beer leh A sen chi an rawn chhawp a,,mahse In tam tumah an awm hauh lo,,No chan ve te te bak tumah in an In lo ka dinglama thu Lalhlupuii tih loh hi chuan Beer No lianah A sen chi a pawlh nual mai….

Ei tur tui hnai tak tak an rawn chawp a,,an titi nak nak a,,Ka bula thu erawh tumah in an be lova tumah a be heklo….Mak ka ti viau mahse keipawh thil ei laia tawng ka duh lo,, midang awm ho chuan nuam lo ka tih an hlau nge min be luam a,,a tu te pawh mai chuan min U loh leh Sir min ti thlap lehnghal a,,Chhana leh Lawma tih loh chuan… A awm ve tho mai kan kum a inthlau ve hlawm em bawk a ni…. “Puii tawng ve la…” midang hriat lohva ka tih sup chuan,,min melh zeuh in,,”Thil ei laiin ka tawng ngailo…” a ti deuh hmak a mitmeng a phi chiai reuh a,,a rui chiang a ni….

Arsa bawp chu a ei mial mial a,,a mit a chhing diar diar a,,A bula thu mipa hmaifang tha zet leh fel hmel zet chuan en leh zeuh in a chetdan chu a nuih leh suk zel a,,ka chhungrilah thikna a awm tlat nia…An thian ho bulah hian ka rilru puthmang hi ka ti lang tur a nilo tiin ka inhrilh ru hial…. Lecturer meeting ni a ahmuh pa pawh kha a rawn kal ve tak e….A thian hmeichhe ho chu hmeichhe thawmhnaw mawi tak tak an ha a,,an landan pawh a ni zaih hlawm mahse ka bula thu ve hi chu Street Girl dik tak angin a inthuam a mahse ka mitah erawh a thawmhnaw te chu a inhmeh hliah hliah tho si…..

“Te Guitar ka lo keng asin,,I zai dawn em??” Puii bula thu in a tih sup chuan ka hawi nghal vat a,,Zai turin a ti a maw!! A zaithiam ngawt a mi….Lu ka thing nghut a,,Puii chu ka melh leh zeuh,,Aw kha lehkhabuah khan a zai thin tak e,,engtiang taka zaithiam nge anih pawh hriat a chakawm alawm le… an tawng ngaithla lo angin awm mah ila eng nge an sawi ka ngaihven ru kar thung…..

“Sangte nangman i play dawn a mi??” Puiin a tih chuan,,”Umm i tan ka play leh ang a hma ang tho khan,,Mahse i mittui ka hmu duh lo… A hma anga hlim taka i nui hmel chauh kha ka hmu duh ania,,Helai awm zawng zawng te hian chu chu kan duh vek….” Sangtea chuan ti sup in a biang a dawm sak a,,Nge maw ka thinrim ruk tun mai le,,”Awle,,Mahse Zanin hian Starlight kan sa lovang..” tiin a chhang deuh hmak a,,an inrem ta anih hmel a bula thu Sangtea chu tho nalh in pawnlamah a chhuak a,,mi pahnih in an zui bawk….An rawn luh leh chuan Guitar pahnih leh Phaiphuleng an rawn keng lut a,,midang chuan an tih tur hre lawk ang maiin an thil ei lai dah in kut an lo beng nghal dar dar bawk….

“Ka zai ve dawn ania,,Ka thiam ber” Hmeichhe pakhat inchei nasa ve deuh in a rawn tih chuan kawk laih laihin an nuih ham ham a,,”Uzir Ani saw Aruati anih saw,,a zaithiam lo lutuk,,mahse a rilru a tha tawp” Mawitein nui hak hak a arawn tih chuan,,ka nui ve tawp….pakhat a rawn ding leh a,,Mawitein Msi a tiin ka hria chu chuan zai turin min sawm rawn ve ringawt a,,mahse Mawitein min phatsak thei hram,,Ka bula thu chu a rawn ding chhuak vut,,Arsa bawp ala keng zui….An fiam luai luai ka rin laiin mak deuh maiin an ngawi thap a,,Mawitei bawk chuan “Uluk deuh in a chetdan hi lo en rawh aw” rawn ti sap in a nui nghal var var a….

“Ka ril a tam in bengchheng si….” a tih nang nang chuan ka mithmul ka kan ak a,,a ei hnem tawh tehreng nen ala puar lo a maw,, hmeichhe mak tak a ni….Midang zawng erawh an nui dar dar a,, “I puar khawp a tam eee Nangchu…” Mipa pakhatin a rawn tih chuan a arsa bawp ken chu keih hlawkin a thial niap niap a,,”In ei ve chak a mi?? In hmaa a mi kha ei ve mai ula…” a tih leh pawh chuan an nui vek,,nuihna tur ka hre ve hauh lo,,zu rui a ang ka ti…Mahse Uzuala thleng thlengin zu han nui hlawm a mawle….

“Te kan hman” kan thutna hnung atanga mipa aw in a rawn tih sup chuan lehhawi zawkin a lu a bu nghauh a,,A hmaa tui no chu banin a in khalh bawk a,,A arsa pawh thlengah a dah fel than a,,a kut tissue paper a hru faiin a thutna atang pen chhuakin a thutna hnungah chuan a ding a,,A mit a chhing sawk bawk…..

Music a rawn ri a thenkhat an in sawi dalh dalh a,,a thenin thil an la ei bawk….An mit erawh Puii chungah a fu thap hlawm a,,an Music ri atang chuan tunlai hla a sa dawn lo tih ka hre nghal… Engtik laiin nge a hla sak tur a hrilh hman pawh ka hrelo….An tawng kha ka ngaithla ve reng sia…

“If tomorrow never Comes” Ronan Keating a hla chu mawi lutuk tak hian a rawn sa a,, Hetiang taka a zaithiam hi ka ringlo mahse artist tam tak aiin a thiam miau si a…. Hmeichhe special tak anihna ka hmu thar ni maiin ka hria…A zai zova a chawl mai dawn emaw ka tih laiin,,an hla duhzawng an sawi a,,a sa thei zel mai bawk a,,mak ka ti an awmdan ho hi,,an inkawmngeih hlawm takzet a ni tih tupawh in an hmu thei ang….Hla pali zet a sak zawh chuan a ning deuh aniang,,”Ka ei leh phawt aw” a tih chuan kut an beng dar dar a,, tumah in be buai zui tawh lovin Anmahni an in kawm lehnghal a….”Zaithiam ve a” a thutfel ruala ka tih chuan a nui sak a,, “I va ei tlem ve..”ka thleng en in a ti nghal sap bawk….”Mushroom hi tui ka ti,, Ka rice a mi pawh hi ka thlang fai vek…” tiin a rawn nui var var a,,Ka thlengah hian a tam viau dawn tih ka hria ngawi renga ka thleng a mi chu thlan sakin a thlengah chuan ka dah phei a,,min melh zawkin,A thlenga Ka mushroom dah chu a hmawm nghal mial mial a…. Lawmawm thei reuh lutuk…,.

“Nang eng nge tui i tih ve??” a tih chuan sawi mai tur ka hrelo…. “Kei chu a chana kha tui ka ti” ka tih chuan a thleng a rice zinga chana chu a thlang a min rawn pe ve a,,ka ei duhlo tih chi ni tawh heklo ka ei leh ta nghe nghe a,,Soup bowl kan inkarah rawn dah in,,”Inhawp tawm mai ang,,mi pawh an inhawp tawm vek tho” tiin a thiante chu a kawk zeuh a ka nui suk….Egg salad tui a ti hle a,,Cheese a ngaina viaulo,,Alu telna erawh tui ti takin a ei thei zel a,,chuan lui sa a eilo bawk… Arsa erawh a duh viau mai… Ei tur changkang tak tak aiin ho lam te te a duh zawk tih a thil ei dan atangin ka hrethiam mai…..Paratha a duh dan atang hian a hriat mai e….Hmarcha tam deuh roll in a ei thin anih kha maw….. Hmeichhe dangte angin lan mawi loh hlauh avangin a ei diam diam ve lo,,a hmaa awm a ei duhzawng chu ngawi reng in a ei mai zel,,a ril a tam chuan a ei teuh zel tih zanin hian ka hre thar leh bawk…

A thleng a ei ruah rual chuan,,”I puar em??” ka ti vat a,,a lu a bu nghauh bawk….Beer kha a in ve ngai reng em ni le,,Engtin mah a awmlo chu ania….Zu ala pawlh lehnghal…. In sawiselna a neilo bawk a,,ka zawt lem lo,, haw lamah erawh ka bike khalh tir tumna ka nei tawh lo thung….. Intur an chah sap sap lai chuan Coffee a lam leh tlat pek a,,eng nge maw a ngaihtuah lehpek ni!? An coffee rawn dah chu tui tih hmel zet hian a in a,, Ka en rei a ti deuh nge,,”I in ve duh a mi??” a tih chuan ka nui chhuak hawk a,,a nui ve tho….

“Te Ka dawr en sak min tiam kha…” Sangtean a rawn tih chuan,,”Ni tak ka rawn kal angai,, Recording pawh min tih sak ang che….” Nui var varin a chhang a,,Eng recording nge. a sawi ve ngawt ni… “Zir Sangtea hian Aizawlah hian Music Zirna,,Music Instrument zawrhna leh Recording studio lian deuh deuh in a nei asin….”Naupang chhe thil sawi hi ava han ang thin tak….Kan pathum chuan kan titi ve luam mai…..

Heritage atanga kan chhuah chuan thenkhat an haw nghal a,,Thenkhat ti ila a tlem zawk chuan Folkland a kal an rawt leh tlat a,,Uzuala pawh a mi phurh thenkhat nen an haw tawh bawk….Kei erawh ka passenger te hian awm ala duh miau sia ka la awmpui mai aniang chu….Lawma leh Chhana te pawh an haw a,, Mawitei,, Joseph,,Agnes,,Asawmi,,Sangtea,, Msi,,Aruati,,David-a,,Ruatdika leh keini pahnih kan awm a,,Nuam an tih ang hian han awm phawt mai teh se…. Fiamthu sawiin an nui leh dar dar a,,Puii a naupang chhia ber a,, Hmelah leh kum thu hlaah pawh a naupan ber ka ring bawk… A chezia engkim hi a lawmawm em em a,,Sangtea nen hian an inkawmngeih hmel ber bawk…Chutih rualin Davida hian duh hmel zet hian a en leh vung vung thin….

A thiante nena awm an nih rualin nuam loh ka tih an hlau nge min be bawrh bawrh a,, Joseph-a nen kan inkawm deuh chawt a,, Mawitei pawh kan bulah a awm ve ran a… Puii,,,Sangtea leh Ruadika te erawh an in umkual zak zak hi a ni ringawt hetiang taka Puii hlim hmel hi ka la hmu ngailo….A nuih a a hmelthat zia hi hrilh tu a nei ngai angem le??

Dinner kan kil ho atang khan Puii nen kan inkar a tha viau a,,kan inkawmngeih thar in kan titi pawh a rual sawt viau mai,,han inhnial bawrh bawrh chang chu kan la nei tho,,a naupang zawk si in ti thu thei lutuk hi a buaithlak lek lek thin chu a ni….A chhungte leh thiante pawh awm reng thei annih loh avangin an hawsan a,,an haw tlai chuan Miss Esi nen a inah chaw kan ei nghe nghe… Inhnuailam naupang leh Betty an len reng thin avang hian ka tlawh khat hle a,,Josh-a hian a ngaina hle tih ka hria,,a inah hian a kal.deuh reng bawk a,,Tin midang awm ve hian an ngaina hlawm a,,an intlawh pawh hlawm viau tih ka hriat avang hian kei tak hi chu a inah ka lang khat thin viau a,,mahse whatapp vela kan inbiak changa a khuahar deuh a ka hriat hian ka leng ve leh zeuh thin…

Kan inzui tam sawtin College-ah pawh kan inkawmngeih viau tawh a,, Tlangval sinior nih tawh lama hetianga thian hmeichhia bialnu pawh nilo han neih thar leh chu lehlam zawng taka ngaihtuah chuan a ho duh viau lehnghal… Uzuala te haw tur khan Puii ngaihsak turin min chah ngun viau a,,min chah lo pawh nise ka ngaihsak dawn lutuk a ni tih an hrelo mai pawh a….

( TETEI POV )

A hma zawng aiin ka mumal lova,,ka thinlung a na a,, Nicky-a lo chu ngaihtuah ka nei thei lova ka nat em avangin ka tap a,,mahse a dam lo a na zual sauh zawk a ni….Ka thiante keimah avanga an hrehawm hmel ka hmuh hian ka awmdan chu inthunun hram hram ka tum a,,Mahse a harsa lam hret a ni….Tlai lama dinner ei chhuak tur mah ni ila ka nun a nguai em avangin khum lamah muhil turin Mawitei leh Agnes-i ka kalsan a,,Keimah chauh a tah hawk hawk ka chak viau rualin ka taksa pawh hian a tlin bik ngang silova,,mittui bianga luang zawih zawih in ka khumah chuan ka mu a,,Ka taksa a chauh em avangin mit ka chhing riai bawk…..

“Elephant….Tahbelhnu….” rawn ti tu avang chuan ka hawi kual ruai a,,Min ko tu aw chu ka hriatchian em avangin ka zawng nghal ruai bawk….Ka hnunglam atanga rawn nui ri hawr hawr ri chu leh hawiin ka en nghal a,, Za taka min nuihtu chu ngeiawm zetin ka melh rum al a,,Ka bul hnaiah rawn kalin ka biangah a piai zeuh a,,a kut chu ka beng sak nghal pawp…

“Ana Kawlhi….” a tih chuan ka ngaih zia hrechhuak thut in ka kuah nghal thlawp a,,A lungphu ri dawt dawt ka hriat rualin ka hahdam nghal sawng sawng thei…

“Ka ngai tawh lutuk che Giraffe,,I bulah ka awm duh tawh tunah chuan harhchhuah a i tellova khawvel hman ka duh tawh lo… Ka ngai che a ni….Ka ngai ngawih ngawih che….” Ka thusawi avang chuan ka mittui a luang ngiai ngiai a,, Nicky-a mood thazet ka tih chhiat sak chu pawi tihna pawh ka nei tawhlo…A bula awm chauh hi a ni ka duh chu….

“Thil tha deuh hrilh tur che ka nei a,,” ka thusawi hrelo ang hmaka a tih chuan ka kuahna atanga awm hrang in,,, thinrim zetin ka melh nghal ran a,,Nidangah pawh heti hian a ti ve ziah,,a bula awm ka.dil apiang in thu dang sawiin keimah chauh in hrihhai takin ka.harh.leh ziah….

“Khatin min melh lo la mate….” Dam thlap a tiin ka sam rawn khawih a tum chu duh lovin a kut chu ka ben sawn sak a,engti zawng pawh a abula cham hlen hi ka duh a ni….

“Ka hmel ang pu hian i tan ka rawn kir thei tawh lo tih i hriat kha….” Hrehawm ti hmel taka a tih chuan ka tah a chhuak takzet…
“Chuvang chuan i bulah ka awm duh tawh…”A ngenngawl zeta ka tih chuan a lu a thing nar nar a,,a awmdan hian ka thin a tirim takzet,, min ngai ve miah lo ni ten ka hria a,,ka haw hlur tawh….

“Nilo ala hunlo alawm,,Mahse keimah aia nangmah hmangaih a enkawl tu tur che an awm…Nangmah kha zau deuh hlekin meng la i hre mai ang…..”A hmela min lainatna lang chhuak in,,hrehawm a ti tih hriat tak hian a thaw deuh hrawk a…..
“Nangmah lo chu tumah ka duh lo”ka tap.leh pur tawh….Kalsan ka duh tawh lo takzet a ni…A bulah hian ka awm ve duh tawh…Midang chanchin min hrilh ngai lova tuna a thusawi awmzia pawh hi ka hrelo mahse ka hriat zawng chu kir leh ka duh tawh tih hi a ni……

“Hlim takin a siam ngei ang che tih ka hria,,Tun bak hi chu ka rawn tlawh thei tawh lovang che Ka hmangaih Hlim takin i nun hmang tawh rawh aw….I hlim hian ka hlim a,,i tah chuan ka thinlung hi a na thin…..” A thusawi avang chuan mittui kar atangin ka melh ngawt ngawt a,,tun bak hi min rawn tlawh tawh dawn lova maw!!!

“Mimawlpa tuna i thusawi kha sut lehnghal rawh,,min hmu thei lovin i awm thei em ni??” lu ka thing nghek a,,”Aih keichu ka thei ve lo hmulo che in ka awm ve theilo… Khawvelah kan inhmu thei tawh lova tunah lehzel ka theilo ka thi ve zawk mai ang,,Nilo i bulah ka awm ve tawh mai ang…..” A bula awm tur hian ka ngen fo a mahse tun thlengin rem ala tilo fan anih hi…..Ka kut chu la in nghet zeta vuan in a fawp vawng vawng a,,ka tap hawm hawm a,,min kuah betin ka chalah a fawp vang vang a,,Ka tap nasa zual sauh….

“Mate ka tihpalh min ngaidam rawh aw,,ka hmangaih che….” A thusawi hi ka duhlo khawvel atanga min kalsan dawn khan hetiang chiah hian ngaihdam min dil anih kha….. “Lalmuanzual engvanga ngaihdam min dil nge i nih??Nga ti nge??” ka sawi zawh hma in ka hmuiah duhthaw zetin a rawn fawp a,,ka chhan let ve hma hauh a inla hrang in mawi lutuk hian a nui a,,Nilo kal suh min kalsan suh…..

“Te harh rawh….” ka bula mangan hmel zeta thu Mawitei leh Agnes-i chu ka melh a ruai a,,
“Te i tap nasa lutuk kan kaitho theilo che a,, hahdam rawh…” titu Mawitei chu melh in,, “Min kalsan tak tak tawh” tia kuah in ka tap nghal hlawp hlawp a,, Lalmuanzuala khan min kalsan hlen tawh tak tak a ni….. A kal tawh a rawn kir tawh ngai dawn lo…..

“Engkim a tha leh vek mai ang….” tiin Mawitei chuan ka lu ah a chul hliau hliau a,, Engkim hi a tha theilo a ni….Ani khan mumang lamah pawh min kalsan hlen tur thu a sawi anih kha….A kal theilo a tellovin ka dam chhuak zo lovang….Vawikhatmah hmu leh tawh ngailo tura ka ngaihtuah ringawt pawh in ka a thei mai dawn chu anih hi maw…..Min kalsan hlen thei lovang……

“Te Inleng kan neiin ka hria,,lo intifai la ka chhuak ange….Tap tawh suh aw….” tiin hreh hmel zetin min kalsan a… Bathroom ka luh chuan ka ngaihtuahna buai zet avang chuan tih mai tur ka hrelo….”Ka bulah a rawn kal thei tawh lo anih chuan a bulah tal ka kal mai tur a ni dawn lawm ni….”ti chhuak sap in,, Darthlalang hnung chu ka hawng a,,Damdawi chi hrang hrang mamawh hun a ka hman theih tur ho chu ka la chhuak teuh a,,nachhawkna,,pumna damdawi,, hritlang damdawi tih vel a ni nuai mai…A mum chu la chhuakin tam tak ka bar a,,ka luak a chhuak takzet….Ka lem zawngin ka pumin a hua nge ka luak leh nghek a,,tam tak ka luak chhuak leh bawk…. Ka thil tih hnawk nuai chu tihfai tumin ka ban a,,Ka bula glass bottle chu ka ti tla ta,,pawi lutuk a,,a keh darh nuai a,,chumi rual deuh thaw in Bathroom Kawngkhar chu pawnlam atangin an rawn chum ri nghal bur bur a,,Min ko tu Zira a ni tih ka hre nghal bawk…..

Ka la tifai bawk silo nen engtin nge ka tih ang…. Mawitei mangang zeta a rawn tawng chuan ka kawr banin ka mit ka nuai fai vat a… Boruak hip kawk in ka thaw chhuak ham ham bawk….Pawnlama ka chhuah a ka awmdan chu mak an ti tih ka hria,,mahse pawilo,,ka awmdan hi ka thup angai a ni…..

Zira te haw hnu chuan inbual turin Bathroom ah ka lut a,,nichin ka damdawi bar avang khan ka awmdan pawh a ni nghulh mai…. Ka che buai mai dawn a ka hriat avanga Bathroom lam pan leh pawh ka ni….ka thil tih hnawk ka tifai zung zung a,,ka in kawm luak leh hram…. Hetiang tak hian damdawi ruih hi a hrehawm ang tih ka ringlo mahse tuna ka awmdan hi chu a hrehawm takzet…..

Kan inbual zo chu ka harh deuh kawk in ka hria,,a rei telh telh a ka awmdan a danglam tulh tulh thung,,ka che reng reng chu ka ni deuh haih a,,ka thlawk delh delh ni berin ka hria…. Ngaihtuahna hman viau ka tum erawh a theih loh engpawh ngaihtuah ila a tawi turh vek a ni mai….

“Hei in siam rawh kan insiam dawn,,khumah ngawt hian awm suh” Asawmin a tih chuan ka kuah bet thut a khumah chuan ka buan lui nghek a,,a rak teng tung chu ring zet hian ka nuih a,,Midang rawn luh rual chuan kan bengchheng nghal nghek a,,kan nui nasa hle bawk…. Joseph-an “Insiam tawh ru” rawn tilo phei sela chuan insiam nachhang kan hre tawp lovang…..

Kan insiam zo a,, Mawitein ka bike khalh min dil chu ka phallo nasa,,mahse henu hian min chhuhsak lui leh tho mai thei a ni….Tactic hman tur hi a ngah ve sia….In atangin kan in um chhuak a,,U te an awm bawk a,,zanin na na na chu nuam deuh in awm law law teh ang…. Ka kut khai a chahbi ka keng chu a haw ngang mai….Ziran ka chahbi min chhuhsak chu huat ka duh viau mahse Zanin zet chu ka haw theilo a landan chhelo zet leh a incheina simple lutuk hian ka mit a la lo ka tih chuan dawt ka sawi a ni ang…..

A bike hnunga ka chhuang hi nuam ka ti takzet,,thian atan min sawm hma kha chuan….A polite lo ti a ka sawi chuan a haw ve kher mai….Dawt ka sawi pawh a ni tawp silova….Kan inhnial hrep hnuah kan insawi rem thei hram,,Zing ka harh leh hunah pawh a thusawi hi ka theihngilh tur a nilo tawp…..Hetiang thil pawimawh lutuk te ka theihngilh phal nang….. A bike khalh sak ka dil erawh a ui hmel viau lehnghal a,, Ka awmdan hi hre ngat sela chuan min khalh tir pawh ka ringlo….Tlaiah khan Damdawi ka rui tih ka hria,,ka rui hi ala reh fel lo tih ka hre bawk…. Ka rin ang chiah in bike khalh nuam tak zawng a va ni si em,,ka hnungah chuang a awm ve a ni tih ka theihngilh tep zawk…..

Zing ka harh chuan eng nge zan lama thleng tih ka hrechhuak zo mang miah lo,, Midang hi zawh ka duh viau na in ka zawt ngam lo bawk nen,,an titi karah ka hre awm ve ta hmiah hmiah ringawt anih hi… A van chiloh tak em!! Nimin tlai ka awmdan erawh ka ngaihtuah thei….Ka thaw halh a,, Bathroom ah lutin ka intifai a,, Volleyball khel turin ka insiam a,,Pekan min lo sawm leh ngei pawh ka ring….

Ka rin ang ngeiin min lo sawm bawk a,,Kei aiin naupang in ka zirlai mah nise kawm a nuam in a fel em em a,,tawngkam a nei dangdai thei in a bulah hi chuan nuihna tur te hi a tam viau zel….Kan inkawm tir ang a mizia tawng tlem deuh kha chu a ni reng biklo…Mifel tak a ni tih nitin hian ka hre thar zel anih hi…..

Zira nen pawh kan inkawmngeih chho tan viau a,,Dinner zana ka thil sawi te a sawi chhuak leh zeuh zeuh thin,,a sawi chang hian Mumang ang deuh hian ka ngaihtuah chhuak leh ruai ruai thin bawk mahse engkim erawh chiang taka hriat ka neilo… Ka hriat chian em em erawh Ngaihdam dilnan ka duh hunah ka duh duh ka dil dawn tih kha a ni….Chuan a bike ka khalh sak tih ka hrechiang viau bawk…..

Conti…….

Leave a Reply