You are currently viewing STARLIGHT – 2

STARLIGHT – 2

Spread the love

STARLIGHT -2

JONSMELY BAWITLUNG

“Te, a lungawilo nih kha va thlem rawh.” David-an a tih chuan lu ka thing nak nak a, umzui tumna ka neilo. Tihsual engmah ka neilo, nichin lawka David-a nen kan thusawi kha hria se a thinrim hauh lovang, Nicky-a nen a inrem taka awm a tum tawh thu leh fel a tih ve thu thlengin nih kha a sawi ni. A duh hun huna a tih tauh khum a, a thinrim khum tur ka nilo. Ka rilru chuan ka ti mawlh mawlh a, a awmdan avang khan ka thin a rim takzet a ni.

Midang lo awmkhawmna lam kan thleng a, an bengchheng leh viau mai, Nicky erawh ka hmu leh ta chuang lo.Joseph-a ka zawng ru deuh a chupawh ka hmu chuang chu anih hi. Primary section in chaw an ei a, middle section in an dawt leh a, tlailam dar3:00p.m a rik chuan High School lamin kan ei ve ṭan a, a pawl hniam aṭanga dawh zelin kan class ho in kan dawh ve dawn chuan Nicky, Joseph leh Jacinta Class9 tho mahse section dang a mi te chu class room pakhat aṭangin an rawn chhuak a, kei chu David-a nen inkawm zui zelin chaw pawh kan dawh tlang a, ka hnungah David-a dingin ka hmaah Joseph a ding a, a hmaah Nicky chuan Jacinta-i a ding. Kan bul khera an lo dawh ve pawh chu a rukin ka ngaithei lo viau a ni. Sawi thiam siloh hian ka thin a rim ru ṭun a, ka awmdan chu ka duhlo takzet mahse ka hma lawka mipa vang hi a ni miau a, Amah la hian en takngial pawh min en duh silo.

Jacinta-i hi hmeichhe chhelo ve tak, ngo ving veng leh ler kan tih ang chi hi a ni reuh a, a duhna ah hi chuan a zak lo thei viau bawk. Nicky-a hi Class8 kan nih lai aṭangin a ngaizawng tawh a, ngaihzawng ngaihsak lo tak nia ka hriat hian inngaihzawnna lam hawiin a biak ka hre ngailo. Tun ataka a be ṭha pawh hi a chhan hrelo mah ila a ruk takin ka haw takzet, Lalmuanzuala pawh hi ka ngei a ni tawp mai.

Chaw kan dawh lai chuan Nicky-a chuan a care hle a, chawhmeh suah sakin a fiam vel a, Jacinta-i la in nuam a ti viau aniang a nui har har a, kan class dangte pawh in mak an ti deuh nge an en leh ha ṭhin. Nicky-a nen chuan min melh tawn sek a, Mawitei la hi, zawhna mitmeng tih hriat tak hian min melh a, a mit ko san ak akin a meng kual vel a, Ka lu ka thing ringawt. An inngaizawng em? tih an hre duh anih ka ring, mahse ka hriatpui lo miau si a.

Chaw kan dawh zawh chuan High school ho pual liau liau a chaw eina hmun tura an siam dinning hall, Hostel ho chaw eina ah chuan kan lut a, dawhkan a lian a, mi sawm lai a ṭhut theih bawk. A ngai te bawkin kan class ho kan ṭhukhawm leh thap tawh. Hei chu kan tih ve ziah dan ania. Nicky-a chuan Jacinta-i ṭhutpui lovin kan class ho bulah chuan a rawn ṭhut ka ring a, ka ring sual lo bawk. Kei, David, Joseph leh Mawitei te ṭhutna ah chuan a rawn ṭhu a mahse Jacinta-i a rawn hruai ve chu kan lo melh ṭhap a, “Lo ṭhu ve rawh se” a tih chuan, tumahin kan chhang lo, a rawn ṭhu tho a, tumah kan ṭawng lova, Joseph-a takngial pawh a ngawi hmak a, David-a nen kan ṭhu tlang erawh Nicky-an rûm zetin min lo melh a, ka melh let rualin a hawisawn hmak thung.

Jacinta-i hi school hmeichhe tam zawk ngei leh huat rawn a ni ve hrim hrim a, a nungchang nekneih leh a hmelṭhatna a chhuang lutuk hi an ngei a ni ber mai. Hetia Nicky-a bula a awm vel hrim hrim pawh keimah tak pawh hian ka ngaitheilo mahse Lalmuanzuala awmdan in a zir em avang hian engmah ka sawilo thung.

Kan dawhkan a lian a mi pali lenna ala awl a, kan class hmeichhia pahnih leh mipa pahnih an lo ṭhutbelh a, kan class-a ngeiawm thiam ber leh Jacinta-i haw tu ber Aruati leh a ṭhian kawm ber Msi an rawn tel ve bawk. A rawn ṭhut dawn khan awmze nei zetin min rawn melh ralh a, eng emaw tak tih a tum tih ka hrethiam mahse ti lo turin ka duh, ka ṭawng chhuak ngam bawk silo, Mawitei pawh chuan Aruati mitmeng chu a hrethiam tih ka hria, mahse tumah kan ṭawng chhuak lo.

Aruati leh Msi chu an ti ti siam siam a, an ṭawng kara Jacinta-i tana hriat nuam lo leh ngeiawm zeta thu an zep leh zeuh ṭhin pawh chu ka hre reng mahse hrelo ang hmak in ka chaw chu ka ei mial mial a, a tui leh tuiloh pawh ka hre lo. Tu te pawh chu an ti ti a, bengchheng ni silovin an ri ve mar mar a, chutia ka chaw chauh melh a ka ei malh malh lai chuan kan dawhkan chu tu emaw hian a rawn beng ri bur a, ka ngaihtuahna ka lo kawm, inringlo bawk nen ka phu nasa lutuk chu ka hawi phawk hra a. Ka hawi chhuah ruala Nicky-an mit sen rûm a min melh rûn ka hmuh chuan a ngaihna hrelo zetin Mawitei chu ka melh zeuh a, hall chhunga awm zawng zawng chu kan lamah an mit a la fu ṭhup zui. Zirtirtu an awmlo erawh a tih zia viau mai. Nicky-a chu ding hluai in, min rawn kawk a, a mitmenga thinrimna rawn lang ka hmuh chian em avang chuan engmah sawi lovin ka ding ve nghal zat, “Hetiang taka nep leh tenawm hi i nih ka ringlo asin. I chet dan ṭhing zet hi i hman tawh loh hram ka beisei.” thinrim sehchilh nawk nawka a rawn tih chuan ka chhungril a fan a, a sawi zawh rual chuan ka nghing lawih a, ka na nghal vawng vawng mai.

Khatiang taka ṭawngkam dengkhawng kha ka tih ni miah lovah tunah khan Lalmuanzualan ka hnenah a sawi zo chiah, engtin nge a sawi theih? Ka chhunglam na lutuk leh midang ho chuan an hre pha vek a ni tih hriat taka min en ṭhap ka hmuh chuan zahna leh natna in min luah khata tih mai tur ka hrelo in ka ding zum zal ringawt. Ka tawt up up a, ka awm chhung na lutuk avang chuan ka ni muai muai in ka hria. Kan table a ṭhu thu ho zawng chu an ding nghal vek a, Jacinta-i tih loh chu. Mawitei leh Joseph-a chuan eng emaw hi an sawi a, mahse chupawh eng nge an sawi ka hrelo. David-an ka dara a rawn dawm rual chuan talsawn in, kan dawhkan chu ka kalsan a, dinning hall pawnlama kut silna ah chuan ngawi rengin ka kut ka sil hmawk hmawk a, “Nep leh Tenawm” tih ringawt chu ka lu ah hian a ri nawn tlûk tlûk a, ka tawt lutuk chu ka thaw leh hawk ṭhin. Ka nat lutuk vang nge ka mittui erawh far khat te mah a far lo. Hetiang khawp hian a ni maw Nicky-a hian min lo rin chhiat a? Engtin nge khatiang rilru kha a put theih a, ka lakah khatiang khan a khawsak theih. Khatiang kha min hmuh dan a ni sa reng em ni, ni e, tunah min ngaihdan dik tak a sawi chhuak ta lawm mi nep leh tenawm min ti anih kha.

Kut silna aṭanga ka kalsawn chu thui pawh ka kal hman lo tu emaw hian ka banah a rawn chelh a, ka hawi let chuan Nicky-a a ni, “Pui ka tihpalh” a hmela hrehawm tihna, in thiamlohna leh natna te chu ka hmu nghal vek mahse tui baw hnu a ruh leh theih tawh loh chutiang bawk in ṭawng tawh hnu a lak let theih tawh heklo. Ka khi sak a, chu erawh Nicky-a hian a hrethiam lutuk tlat. Ka kut a chelhna chu ka kut lehlamin ka dahthlak sak a, ka inher lehnghal hmak a, tunah hi chuan biak ka duh lo. Ke ka pen leh tur chu ka hmaah a rawn ding a, “Pui Khawngaih in” a bak sawi tur a hre biklo tih hriat takin a thaw hak a, ṭawng tumna ka la nei chuang lo. “Min hau la min ankhum la i duh leh kut min thlak leh rawh mahse khawngaih in min haw suh,bPui min huat ka duh lo ka tihpalh tak tak, I thinrim anih pawh in min haw suh.” a ngenin min ngen a ni tawh.

Ka mizia hrechiang em em tu a ni a, ka awmdan tur tam tak thlengin a ngaihtuah kim vekin ka ring. Ka hua anih chuan ka haw hlen thei hial ang tih pawh a hrechiang hle. A hmel awmdan chu ka melh zeuh a, engmah sawi lova kalsan ka tum chu ṭhulh leh in a zawnah chuan ka ding leh dat a, “Mangṭha.” ka ti sap a. He thu thumal tawite hi mite chuan inthlahna atan te, awlsam takin an sawi mai ṭhin mahse kei chuan sawi ve ka duh ngailo a chhan chu he thu hian thu tawp a sawi a ka hriat tlat ṭhin avangin. Ka ngaihdan hi Nicky-a pawh hian a hrechiang viau bawk.

Chu thu ka sawi zawh ruala a mit aṭanga mittui hnam sawk pawh ka hmuh hmaih lo. Thu tam sawi a in thinrim khum chiam aiin chu thumal khat lekin kan nun a nghawng dan tur chu sawi ngai lovin kan hre ve ve tlat a ni. Min dan a tum tawh lova a dinna ngaiah chuan a ding reng a, keipawh vawikhatmah hawi let leh tawh lovin ka kal nghal nal nal. Ngawirengin school compound ka chhuahsan a, Taxi lo tlan hmasa ber chu pharin ka chuang a, In ka thlen chuan tumah ka hmu lo. Ka room lam pan in ka chho nghal vat bawk.

Ka awm tawt lutuk avang chuan ka awm chu ka chum dat dat a, ṭah vak vak ka chak a mahse ka ṭap thei bawk silo. Hetiang taka rilru natna hi ka la tawng ngai lova, zak tak leh thinrim taka min siam a ṭawngkhum tu la ka tawng ngai hek lo. Tawrh dan ka thiam hlawllo a ni. Ka thawmhnaw chu phelh in bathroom-ah ka lut a, shower ka on nghal a, tui in ka taksa a rawn tih huh rual chuan ka ṭap chhuak nghal hawk bawk. Ka tawp thei tawh dawnlo emaw ti hial in ka ṭap a, inhnuai lamah ka thawm an hriat ka hlauh avang chuan ka kâ ka hup ṭang ṭang thung. Ka zawi hnawk a bathroom chhuatah chuan ka mu tawp a, Shower pawh ka off chuang lo. Ka chauh ngawih ngawih a ni ti ila ka sawi sual lovang.

Chutiang chuan engtiang a rei nge ka awm ka hre lo. Bathroom Kawngkhar inkik ruala ka nu aw ka hriat chuan peih lo zetin ka ṭhu chhuak a, tui vawtin ka inchiah rei hle tih hriat takin ka taksa chu a na khawng thum lehnghal a. Ka duh ang pawh in ka chesawn theilo. Shower ka off a, Bathroom pawnlama ka nu awm chu chhangin, “ka ṭha ka inbual zo ṭep” ka tih chuan ka room a chhuahsan ve mai anih ka ring. Kawngkhar inkhar ri rak thawm ka hre zawm nghal a. Bathrope ha in ka lu ka tuam a, harsa ti angreng takin Bathroom chu ka chhuahsan a, vawtin min ṭham a, ka khur der der bawk a, ka thawmhnaw chu la chhuak in ka inha sawk sawk a, Ka kekawr ka ha tur chu a hma zawng ai nasa in ka khur a, ka ha in khawng ri bap bap leh ka lu hai muai muai chu ka hria, ka mit sulh a, ka tluk pawh ka hria, a thim nghal vek a, engmah ka hre zui tawh lo.

Ka harhchhuah chuan ka dang ro zet chu ka hriat hmasak ber a ni. Ka bula awm te chuan ka harh tih hria in ka ṭhat leh ṭhatloh min rawn zawt nghal a, mahse tumah ka hmu chiang theilo, ka meng hleithei miau lova. Tui ka lam rual chuan ka hriat ṭhan zet kut hian ka lu ah dawm in tui min in tir a, ka in zawh rual chuan min mut ṭhat tir lehnghal a, ka mit ka chhing leh vang vang hnuah ka meng chhuak a, Nicky-a ka hmu hmasa ber. A mitmeng a hrehawm tihna leh natna chu chiang takin ka hmu mahse biak tumna ka neilo.

Ka nu chuan min ngaihtuah tih hriat zetin, “Bawihi i ṭha em? I khawsik a sang lutuk a, nikhaw hre lovin i tlu a. Doctor ten i hah lutuk an ti che a.” Ka bula rawn kal pah chuan a ti a, ka ṭawng chak miau loh avangin vangin ka chhang lo. Ka melh kual a, Nutei leh Patea ka pa Nicky-a leh Joseph-a te an lo awm a, kan ngawih deuh vang vang hnu chuan min biakna pawh a rul tawk lekin ka chhang ve a. Ka nu bawk chuan, “Bawihi zanin chu damdawi Inah hian i riah a ngai dawn a, ka riahpui ang che ka ti na in Nicky-a hian riah a tum tlat si a, I duh zawk pawh ka ring leh deuh a.” a tih chuan ka melh zawk a, Ka pa zawk chuan, “Ni e zan a tlai tawh angreng si, I harh hun chiah nghah kan dil avangin kan la awm a, Nicky-a nen chauh a riah chu i huphurh em?” dam thluam a ka pa in a tih chuan ka inngaihtuah nasa hman hle.

Riahpui ka duhloh thu ka sawi chuan kan buaina an hre nghal vek dawn si a, a tu emaw berin an tuar ngei bawk ang. Ka nu leh pa te, nutei leh patea te rilru hahna hi belhchhah ka duh rih lo. Ka pa chu en in “pawi love” ka ti sap a, Patea’n ei tur a lei sa paper bag a mi chu ka khum bulah chuan Nutei chuan a rem ṭha mawlh mawlh a, a rem zawh chuan ka pa te nen chuan an chhuak ta nghal a. Joseph-a pawhin in enkawl ṭha tha tura min hrilh in kan cabin chu a chhuahsan ve nghal a. Joseph-a a chhuah rual chuan boruak chu a reh nghal tlawk tlawk a, hriau pawh tla se a ring khawp ang tih khawp a reh a ni. Nicky-a chu ka khum bulah a ṭhu a, ka melh duhlo lui tlat thung. Min en reng tih pawh ka hria mahse vawikhat mah ka en lova ka be lo hrim hrim bawk. Min biak tum mahse ka chhang dawn chuanglo tih a hriat vang nge ngawirengin a ṭhu ve tawp a, drip ka khai avangin a en zeuh zeuh tih loh a chesawn eih lo. Mutchhuak in min rawn zem chiai chiai a, ka muhil ta anih ka ring.

Phul hring dup hmunah ka awm a, ka awmna hmun chu a nawm em avang chuan ka nui var var reng a, phul a pangpar mawi tak tak te chu a rimtui takzet, hetiang reng a ka pian a hnu lama pangpar mawi tih ka neilo. Pangpar ngaina lemlo ni mah ila helai hmuna pangpar te erawh mawi lo pawh tih tum ila a mawi dan hi tawngka a sawifiah thiam chi a nilo. Mahse a hmun reh lutuk hi mak ka ti a, ka hawi kual a, hetiang khawpa mawi leh nuam te chu sava emaw rannung dang tal awm âwm ania emaw phengphehlep tal pawh,vmahse thil nung pakhatmah ka hmu lo Pakhat tal hmuh in beisei in Ka awmna atang chuan kal sawn in ka hawi kual ruai ruai a, chuti chung chuan engmah ka hmu chuang lo. Chutianga rei deuh tak ka awm hnu chuan ka hma hla deuh tak aṭang chuan tu emaw hian ka hmingin min rawn ko a, ka hriatsual anih ringin ka hma lam chu uluk takin ka en a,bka beng ka dawh uluk zual sauh bawk. “Puii” tia min ko tia ko ri ka hre leh a, a vawi thumna atana min kohna chu ka hrechiang tawh hle mai,Nicky-a a ni mahse khawiah nge Amah hi a awm? Amah hmuh tum chuan ka hawi kual ruai a mahse hmuh tur reng reng a awm lo. Chawp leh chilh in ka awm chhung hi a na nghal vawng vawng a, engvanga na nge tih erawh ka hre lo. A na chu a zual zel a, thawk a harsa hial a, zawi te te in Nicky-a hming chu ka lam a, ka awm chhung na vang chuan ka thi ngei dawn ni pawh in ka hre bawk. Chutianga buai taka ka awm lai chuan Nicky-a aw bawk hian “Mangṭha” a rawn ti sap a, a aw a natna, tawrhna, hrehawm tihna lo lang te chu ka hre kim vek a, mahse Amah ka hmu theilo leh hrehawm ti bawk si chuan ka mittui chuan dan rual lovin a tla a, Hrilh nawn leh ka ngai miah lo, min kalsan dawn tih chiang takin ka hria. Ka hmuh theih miau loh avangin ka chelh thei bawk silo. Mangangna in min rawn luahkhat a, ka tih ngaihna hrelo leh ka thaw ṭha thei bawk silo chu ka tal chiam a, ring zeta min ko tu avang chuan ka harh nghal nghal kawk, ka meng chiang kher mai. Tu nge min kuahtu hi ka hre mai lo mahse khatiang teh hrepa hrehawm a ka awm khan ka ṭah a tih chhuah em avangin ka ṭap nghal hlawp hlawp a, ka nat em avangin ban tumna pawh ka neilo.

Ka duhtawka ka ṭah hnu chuan min kuahtu chuan a awm aṭangin min nem sawn hlek a, Nicky-a hmel ka hmuh rual chuan, ka na nawn awn awn ni mai in ka hria. Hepa hian engtin nge a tak ramah leh mumang ram thlenga na taka min siam theih zawk? Ka natna te chu thinrimnaah a chang a, vawiin lama min tih dan teh hrep avanga ka mang lam thlenga min ti na tu hi ka haw thar takzet bawk. “Pui i tha em? mangchhia i nei a, i harh thei bawk silova, ka mangang hman lutuk alawm.” Zaidam taka tiin ka samah a rawn chul a, ka ṭahna avanga ka bianga mittui luang te chu a hru fai nghal mawlh mawlh a, chu chuan ka thinrimna a belhchhah sauh thung.

Ka mittui hruk leh tuma a kut rawn phar chhuak chu a kut ka vai thlak sak a, mak ti hmel leh hrilhhai hmel zet hian min en a, “Vawiin aṭang hian kan in ṭhian ṭhatna hi tawp rawh se, ka nun aṭang hian kalbo rawh.” Sehchilh zet leh aw khur dar dar a ka tih chuan a ṭhawng hle tih hriat takin sawi mai tur hre lovin a ngawi ngul a, min melh tlawk tlawk ringawt. “Pui ka chungah thinrim la, ka lakah sual chhuah rawh a pawilo mahse kan in ṭhian ṭhatna hi ti chhe suh, khawngaih takin.” atih chuan, “Tihpalh tih hian engmah a siam ṭha lo, chuvang chuan tihpalh tih ngailo tura nun hi hman tur ti tu kha nangmah i ni lawm ni? Ka tihpalh i tih hma khan khatiang thil kha ti lo tur i ni asin. Kei chu hmeichhe nep tak leh tenawm ka ni a lawm. Nangni ang mi perfect nena inzawmna neih hi ka duh tawh lo. Khang kum 15 chhung a i ṭhian ka nihna chu nangmah ngeiin i ti chhe tawh, tunah chuan min kalsan tawh rawh.” Ka aw khur nasa zet chu ka haw takzet a, ka thusawi in min tih nat em avang chuan ka bedsheet chu ka ṭham ngawt ngawt bawk, “Lalhlupui i thu tluknaah chuan i chiang chiah a maw?” a ti chang fak a, a mit sen rûm chuan min melh khui bawk a. Ka thusawi avanga a nat tur zia ka hria, a nat ka duh vang reng a he thu hi sawi ka ni. “Ka chiang, Mangṭha tih ka sawi khan ka sawi mai mai lo tih i hrechiang alawm.” Ka ti let hmak. A phun hluk a, engmah sawi tawh lovin room aṭang chuan a chhuak ta nghal a.

Nicky-a a chhuah rual chuan chhuak zetin ka ṭap lehnghal hlawp hlawp a, ka na a, ka thin a rim bawk. Khatiang khawpa zak a min siam tu kha ka hua a mahse ka nun aṭanga kal hrang tura ka dah chhin ringawt pawh in na ka ti em em bawk si. “Lalmuanzual engtin nge hetiang em em hian min tih nat theih zawk?” tiin ka phun sap a, ka ṭap muhil leh a ni ngei ang ka harh leh chuan khua a var uai tawh a. Ka mutna bulah chuan ka nu leh Nutei an lo awm reng tawh a, an ṭawng sar sar ri avanga harh ka ni. Ka harh tih an hriat rual chuan ka nu chuan min be vat a, na ka neih leh neihloh min zawt a, ka neih loh thu a chhang in ka ṭah nasat avanga ka mit vun chhah luk leh kham lutuk avang chuan ka mit ka chhing lehnghal daih. Nutei chuan ka samah lo chul in “I khawsik pawh a awm tawh lo anih hi,” tiin ka nu chu a be zawm daih a, ka nu nena an mitmenga zawhna awm kha ka hmuh hmaihlo chuvang a mitchhing lehnghal daih pawh ka ni reng a. Tun dinhmunah chuan min zawt pawh nise engmah hrilh tumna ka nei miau lo a ni.

Damdawiin aṭangin kan chhuak a, weekend anih avangin school kal angailo hlauh bawk a, ka room-ah ka mu daih chaw pawh ka ei peih lo mahse ka nu in theitui leh eng eng emaw eitur min rawn pek erawh tlem te tak tak ka ei thung. Nilengin ka mu a, Uchhana leh Ulawma, Jeff leh Nathan-a te an rawn kal zuai a, tumah ka biak peih loh avangin rei erawh an awm lo. Zanriah ei hun dawnah Uchhana a rawn lut leh a, a hma ni a thil thleng kha engkim an hmu in an hre ve vek Class10 ho zawng zawng an awm miau a. “Te Nicky hi ngaidam tawh mai la.” a tih chuan rûm zet hian ka melh a, Uchhana nen hi chuan in chhangbung tih takah kan inkawmngeih bik a, thil pawh kan sawi dun nasa bik a.

“Nizan alo haw khan a room a suasam vak a. Nangmah ang chiah in engmah a ei duh lo bawk nen nutei leh patea te pawh an mangang lutuk ania.” a ti leh hram a. “Engkim in hmu a in hre vek, school pawh ka kal ngam tawh dawn em ni?” ṭah chhuak zeta tiin, a hma nia thil thleng te chu ka mitthlaah an lo lang nghal zut zut a. “Nia mahse hetiang taka Nicky-a hrehawm a siam thei tu leh hlimna tak tak pe theitu chu Nangmah chiah i ni tih i hre reng alawm. A thinrim anih pawh in Nangmah vang chiah in a ni ang, tuma tih thinrim theih loh mipa hi i vang chauh a thinrim ṭhin a ni tih i hria.” a tih chuan ka chhang tawh lo. Keipawh hetiang taka na a min siam thei tu chu Amah Nicky-a chiah hi a ni. Abvawikhatna a ni a chuan hetiang taka na a min siamtu hi tih takzetin ka haw bawk. Ka hmangaihna hrethiam lo tu mipa hi ka mamawh lo. Min ti na ngawih ngawihtu kalsan theilo khawp a chaklo ka ni heklo.

Thawhṭanni a ni a, Pathian Ni pawh ka inkhawm lo. Ka ṭap tawh lova, Nicky-a laka phuba lak dan tur ringawt ka ngaihtuah thung. Min ti na tu hi a aia na a ka siam hma loh chu ka chawlhsan lovang. Ka nu leh pa te rem tilo chung school kal turin ka insiam a, kha zan, damdawi In aṭanga a chhuah hnu khan kan la inhmu leh miah lo. Vawiin pawh min rawn sawm ka ringlo, min rawn sawm ngam tur a nilo reng a ni. School ka thlen chuan naupang dangte chuan min en hrek hrek tih ka hre reng mahse ka haider hmiah thung. Ka nih dan pangngai in class-room ka lut chiah thawveng zetin ka awm lehnghal a, a hmasa berin ka ṭhutna sawn ka duh. “Agnes” ka tih chuan David-a hnung chiaha ṭhu hmeichhia ngawichawi ve deuh chu a rawn hawi nghal zawk a. Mawitei chu mit siai zeuh in ka bag chu la in Agnes-i chu “inṭhut thleng ang” ka ti nghal thawr a. Kan boruak an hre vek a chutia ka ti pawh chu tuman mak an tilo ang. David-a pawh chuan ka chetdan chu ngawirengin min lo en ve tawp.

David-a chauh nilo class a awm zawng zawng te chuan min en ṭhap a. Agnes-i chuan duhloh a tum zet na in, Mawitei zawk chuan a rawn koh takah chuan kan awmdan hrethiam takin a insawn ve ta a. Ka ṭhut fel rual chuan David-a chu rawn hawi in, “Hei nangnu hi Nicky tihluih nan min hman i tum chiang.” nui vur vura a tih chuan ner khum sak in, “Lo ni ta se, I hlau em ni?” ka ti ngat a, a lu thing in, “A ṭha lawm, mahse fel deuh in awm ngawr zir lova thiam thil eng emaw tal nei tura in zirtir hi kan school tum ber pawh a ni.

Nicky a rawn lut a ,kan ṭhutnaah kan ṭhu nghal sang sang a, a lehkha ken chu bih ngur in, “Vawiin a Class 8 Volleyball practice pui tura ruat kan ni a,” atih chuan kan phun nghal mur mur a, a chhan pawh Class8 team hi pawl10 hovin an practice pui ṭhin vang a ni. Nicky chuan a kut a vai zauh a, kan ngawi leh ṭhiap tawh. Kan zirtirtu te nen hian an danglamna hi a tlem ve khawp mai. Ani chu ala naupang a uniform a ha tih zawng hi a ni mai, a bak hi chu a classmate leh class dangte pawh hian kan chhung en vekin ka hria. Hetiang taka Leadership nei ṭha hi chu an awm anih pawhin Amah ang hi chu an vang ve viau in ka ring.

“Kan vaiin kan ni dawn lo a, mi pali chauh in kan practice pui dawn. Midang zawng chu mahni duhna hmunah kan infiam thei ang,” a tih leh chuan kan au dur dur a, kan rilru tak erawh chuan practice puitu nih chu kan duh lo theuh. “Lalmawizuali, Joseph, Lalhlupuii leh keimah telin, midang zawng in duhna hmunah in kal thei ang,” a tih rual chuan ṭhenkhat chimawm falin an kut zungpui ti pir vahin min chhuahsan hlawm a kei erawh ka tûm nghal bur mai. Mawitei chu ka bulah rawn kalin peih lo tih hriat zet hian a phun nang nang a, Joseph-a pawh kan bulah a rawn kal ve a, keini pali tih loh chu an chhuak vek tawh a. Nicky-an kan lam rawn hawi a, “Kal ila” tia ngeiawm zeta min nuih zui chu ka huat tawk a tling leh viau tawh. “Hei Mawi, vawiin chu mi tenawm tactic kha kan apply zuai dawn mi niang?” Kan pali hriat atana ring mah mah a ka tih chuan, Nicky-a kawngkhar bul thleng tawh pawh a ding nghal chawt a, rúm zet hian min rawn melh nghal a, ngai pawimawh lo zetin Mawitei chu ka siai zeuh. Ani pawh a khi ve sak tho. Keini pahnih hian chimawm kan chhuah chuan Aruati te chu nep te an ni ang. Nicky-a chuan ka ṭawngkam tenawm tih ka hmang kher kha a hua tih ka hria. Hei hi kan intihthiamloh aṭanga nitina ka sual ka chhuah dan a ni. Tenawm leh Nep tih ṭawngkam hi vawikhat tal a hriat turin ka hmang ngei ngei ṭhin.

Class8 Volleyball khel tura awm zawng zawng te chu team hnihah siam in mipa leh hmeichhe inkar thlakin a kuala dingin ball kan ben pui a, kan in pass kual zel a. Kei leh Joseph-a team khatah awm in Mawitei leh Nicky an awm dun thung. Tuna Volleyball practice hmeichhe ṭhenkhat hi chu nuam an tih vang leh thiam tum vanga rawn tel pawh niin ka hrelo Nicky-a leh Joseph-a an star vang bak a ni lo, a ṭha ve reng reng e. Kan ball ben ti nuam turin ball leia a tlak apiangin kan dinna kan sawn zel a, hmeichhia in ball a tih tlak chuan hmeichhia zawng mahni bula ding te kalpelin an sir lehlamah kan dinga mipa pawh chuti tho. Kan bula ding te an ngai renglo tihna anih chu. Nicky-a te pawh kan tih ang tho in an ti ve a, ka rules siam chu an hlimpui hlawm phian lehnghal.

Nicky pawh Ni 15 a ral hnua a nui hmel ka hmuh lehna hmasa ber a ni. In hnaih takin kan ding dun a, min melh leh zawk ṭhin tih ka hria, ka en duhlo der tlat a, kan game-ah chiah rilru ka pe lui ngar ngar a. ka rin ai taka nuam ka tih avangin ka nui leh var var ṭhin. Kei chu a kual laiah ka ding a, Nicky-a erawh in min hnungchhawn thung, chu chu ka sual chhuahna tura ka duhthusam chiah a ni. Mawitei ka melh zawk a Ani pawh in min lo en ve reng, a rilru alo thlak leh tawh nge a mitmeng a ti lo tura min duhna chu chiang takin ka hmu mahse ka tih tur ṭhulh ka tum reng reng lo.

Ball chu kan in pass kual zel a, Nicky-a te side pawh an nui leh ham ham ṭhin. Ka hmaa ding mipa Volleyball khel thiam ve pangngai tak chu sang deuh a min pe tura ka tih chuan a awmna sawn hlekin sang deuh takah a rawn beng a, na lo te a ball chu la in ka bula mi ball lak tum chu nem sawn zeuhin zuang chungin Nicky-a lamah chuan ka hlap pawp a, a dinna hmun ka hriatchian em avangin a hnungah na zetin a fuh a, a din danin a zirlo bawk nen leiah a bawk nghal thlawp. A vawihnihna atan ball ka hlap per lui leh a, helaia awm zawng zawng te hian ka tum reng vanga ti ka ni tih an hre vek. Ball a tlak ruala ka mitmeng rúm zet an hmuh avangin engmah an sawi lo anih ka ring an ngawi thap a, Nicky a tluk rualin Joseph-an rúm zeta min melh in Nicky-a lamah a kal nghal a,ban inbuaipui danah a hnang anih ka ring. Hnang pawh nise a awm hliah hliah kan indin hlat viau lova ka hlap na thawkhat bawk alawm.

Mawitei pawh in lawm lo hmel zetin min melh ve tho a, tumah ngaipawimawh duh lovin ka dinnaah kut kuangkuah at in ka ding hmak thung. An in buaipui zawh hnu chuan Nicky-a chu mitmeng sen rûma rawn dingin min melh rûn chungin min rawn pan hmawk hmawk a, a kut a hum ruh danah kut min thlak loh reng ka ringlo. A mitmeng ka hmuh rual chuan zâmna in min luahkhat a, engtia hmachhawn tur nge ka hre mai lo. Ka duh reng vanga ti ka ni mahse engtia hmachhawn tur nge tih ka ruahman tel hauh lo. Tunah hian engtin pawn min ti se mahni thiam in chan in, ka bei let zel ang ka theih ang angin tih chiah ka ngaihtuah.

Conti…

Leave a Reply