You are currently viewing STARLIGHT – 24&25

STARLIGHT – 24&25

Spread the love

STARLIGHT – 24

( TETEI POV )

Muthi Park a kan len ni atang khan ka pawmpuina tel miah lovin Zira bialnu ka ni ringawt a,,Ka duh lo tih ngawt la naupang chhiatthlak ka ti viau,, mahse mak deuh in Kum10 hmalama ka hlimna tluk pha mah suh se ka hlim ru ve viau tho.. College Week kan hman zawh takah la khan kan Volleyball player pakhat inhliam avangin pawl remtihna thlap in ka khel lehpek a,,rei tak chu ka chawlhsan tawh kha mak tak maiin keimahah a rawn kir leh vek ni maiin ka hria,,ka nuna thil thar rawn thleng hi Nicky hian min pawmpui ve a ngem tih ka ngaihtuah thin???

Mangtha tia min thlah zan atang khan a rawn inlan tawh ngai lova mahse ka ngaihna erawh keimahah a reh ngailo,, ka tana hmalam pan hi a harsa takzet chuti chung chuan ka tum ve tho a ngai si a,, Lalnunzira nen kan inngaihzawn na pawh thlahnih a tling ve ta reng mai,,min ngaihsak em em a,,khawhara ka awm a hlau in Amah nen a inhmeh lo khawp ka tan a ti fo a,,ka bialpa anihna aiin ka tan thian tha tak angin a awm tam zawk….Ka nunhlui a ka tawrhna te min hriatpui tu anih avangin ka sawi chhuah duh changin hmaih neih hlau takin ka chanchin ka sawi te a ngaithla thin….

Tawngka in ka hmangaih che,,ka duh che a ti duah ngai lova mahse a chetzia erawh in a tilang fo thin,,midang aia ka pawimawh na lantirtu leh hlutna nei ka nih zia min hrilh nawn tu a ni a,, hetiang hian ka hlim leh theih hi ka ring ngailo…. Kan inngaihzawn atangin thlahnih ngawt a liam leh ta reng mai….Zanin tlaiah hian kan colony ho chaw eikhawm an rawt a,,Zira te inah eirawngbawl in kan awm deuh laih a,, kan hlim tlang hle bawk….

Zira nu leh pa te an fel em em a,,A nau Nuni te pawh an chhungkua in an rawn tel bawk a,,kan colony ho hi kan inkawmngeih a,, hetiang a mahni in luahtu te nena relationship nei tha hi an awm ve pawh in ka ringlo,,keini erawh a remchan ang zelin kan intlawh pawh a,,keipawh mahni a awm mah ni ila ka khua a har hman meuh lo….

Tlailam alo ni a,,Chaw ei a hun meuh chuan kan kim thap tawh,,Pa Mawian hunserh hmangin fuihna thu a sawi a,,a tawngtai zawh chuan pawnlamah chaw ei turin kan chhuak a,,kei leh Zira Nuni pasal Rsa tih loh chuan an chaw an la vek tawh,,Ka inchungte U Rema te nupa leh Pa Mawia te Nuni te nufa inchhung lamah an lut a,,keini ho erawh pawnlamah kan awm thung….

“Bawihi ei ve nghal ila” Ziran a tih sup chuan lu ka bu nghauh a,,ka pensawn tur chu ka banah chelh in ka hmai zawnah chuan a rawn kun hniam a,,ka mita a rawn en rual chuan ka melh ve nghal a,, “Ka la sawilo anih ka ring,,tawngka ngei hian min chhang thin turin ka duh che” a tih sup chuan Nicky-a ka rilruah a rawn lang nghal,,”Awle” ka tih chuan min chelhna thlah in a nui suk a,,,mahse kei erawh rilru nuam in ka awm tawh lo… Nicky-a anga a awm fo hi ka hrethiam lo,,a thusawi te a thil tih tam tak te hian Nicky min hriatchhuah tir a,,mahse ka khawharna erawh a hnawhkhat hneh hle si,,ka hrethiam lo a awmdan hi,,A awmdan tam zawk hian min hnaih tir ni berin ka hria…..

“Ehe chaw in eikhawm elaw,,ka rawn kal fuh viau a ni maw!?” Rawn ti lang lang tu lam chu kan hawi thap a,,Tumah kan tawng lo…. Hmeichhe chhelo tak a ni,,a incheina atang rengin an hausa hle ang tih a hriattheih bawk tin hmeichhe na mai a nih ka ringlo nghal tawp bawk….Ka bula thu Zira chu ka melh zeuh a,,a kut a hum ruh nghal tlat tih ka hria…. He hmeichhia nen hian in zawmna an lo nei tawh thin a ni ngei ang!!

“Ehe Jenny nang maw!?” Kawngkharpui atanga Nuni tawng kan hriat rual chuan Jenny tia a biaknu chu a nui nghal var var a,, Inchhung lam a an inhruai luh hnu pawh chuan Zira chu a awmdan a dik vak tawh lo tih ka hria,,Rsa erawh a tawng bawrh bawrh tho,,mahse Ani pawh a mitmengah hian a thusawi anglo zetin inchhung lam a ngaihven tih ka hria,,An awmdan chuan ka ngaih an ti tha meuh lo….Nga ti nge le??

“Te lokal lawk teh” Albert-an min rawn koh chuan ka thutna atanga tho in ka bula thu mi pahnih te chu ka kalsan a,,chawhmeh bang vel kan tihfel pah chuan Albert-a leh Nunui te nen kan titi a,,Nunui nen hian kan in rual khat a khawm a nuam in titi pui pawh a nuam viau mahse mipa pathum enkawl tu tih takah Ani hi chu a rawn lang tam viau lo,,an inchhung fai danah erawh hmeichhe fel tak a ni tih ka hria…. Udintei pawh hi a fel tawk tih ka hria,,helai a chengte hi tumah fello an awm lo,,an tawngkam a zang si,,midang an ngaihtuah zia la a hriat heng zawng zawng hi Pa Mawia te chhungkaw fel zar kan zo ni berin ka hre ta mai…..

Kan thil tihfel laia kan bula Zira lokal chu ka melh zeuh a,, “Te in ni tiraw??” Nunuin nui var var a atih chuan ka biang a sa nghal hat hat a,,Alberta nen chuan an nui nghal char char nia….”Eng nge in nuih kher a?? ka tih chuan an nuih a za zual sauh emaw ni,, an va nghal ve tak!!!

“Bawihi lokal lawk mai teh a….” Ziran a tih rual chuan Alberta chu a khuh lui nghek a,,ka va han beng chak tak em….

“Eng nge??” tia Zira lam ka hawi chuan chik zet hian min lo melh a,,hepa pawh chu engvanga hetia min melh nge maw anih hrep ni,,rang zeta ka pen tur chu dawhkana bai bel chu ka khawng fuh a a baw ta vek chutah zet zawng Nunui leh Albert-a te insum theilo chu an nui chhuak dun ta vak a,,Zira pawh a nui ve nghal vur vur tho….An va han sual tak em!!!

“Bawihi hemite pahnih hian an lo fiam che ni maw!?” Nui var vara a Ziran a tih chuan lei chhuah vak in ka chawhmeh bel tih tlak chu ka chhar nghal a,, naupang pawh ka ni tawh lo asin nge maw ka han zah thar viau mai chu le…..”Nangni pahnih kha chimawm chhuah lovin lo tifai lawk mai ru aw,,Kan hruai hrang lawk ange….” Ziran a tih rualin ka kuta kaiin an in lam pan chuan min kai a,,an inchhung hi ka la lut zing viaulo na in nuam ka ti,,inchung phei chu ka la chho lo hrim hrim….

Inchhung kan luh chuan Nu Lianin min lo be vat a,,”Naupang ho bulah ngawt i awm a lokal ve rawh” a tih chuan sitting room lam pan tum chuan ka inher a,,mahse Zira chuan min chelh nghal vatin,,”Nu Puii hi thil tihpui lawk ka duh a,,kan rei lovang”tiin inchung lamah chuan min kai chho nghal a,,ka zak tawh sa nen chutianga a chhungte hmuh laia min kai chu duh lovin ka kut laksawn tum chuan ka tang ve tang tang a,, Ani la chuan engah mah ngailo tih hriat zet hian min kai kal hmiah hmaih thung….

Inchunga thutkhawmna hmun kan thlen chuan ka kut chu ka pawt vak a,,phun hlukin min thlahin a rawn hawi a,,min melh nghal run chu,,”Nge min kaih kher?” ka tih nghal ngawt chuan a nui suk a,,”I biang a sen vek anih kha,,duhawm reuh lutuk” tiin min rawn piai zeuh anih chu…..Hepa hian naupang ka ni emaw a ti em ni….

“Lokal rawh….” a tih rual chuan kut kuangkuah ata dingin,,”khawiah nge min hruai i tum??” ka tih chuan “lokal vat mai teh” tia nui ri hawkin ka dar tawn tawnah vuanin pindan pakhatah chuan min nam lut dawr dawr a,,A chhung ka hmuh rual chuan ka mengphawk nghal hra mai…..Mipa pindan tih hriat zet hian bang chu rawng uk tak lam an hnawih a,,a khum pawh rawng thim lam tho a khuh mawi a ni…..A room a felfai danah mipa invawng tak a ni tih a hriat hliah hliah,,a pindan zau zetah chuan engvakmah a dah lo,,Ka pen hlek a,,ka veilam bang tluan chuan darthlalang a awm tih ka hre nghal,,Couch lian tak Tv leh mini fridge a dah bak lo engvakmah a awm lo mahse pindan thawveng leh nuam tak a ni tho si….

“A nuam i ti em??” ka hnunglam atanga rawn ti supin ka kawngah a kut rawn rawlhin ka pum zawnah a kut chu a suih bet a,, hmeichhe hniam zawk zawk ka nilo,,mahse ka hnunga ding hi a sang em avang hian ka lang hniam vek zelin ka hria…

“Bawihi nuam i ti lo em ni min chhang miah lo?” ka hmaa rawn ding paha a tih chuan “Ah Oh…. nilo a nuam lutuk a tawng nachhang ka lo hrelo anih kha…” ka tih bah nuai chuan mitko san akin “lokal rawh” ti leh in a khum awmna lam sirah chuan min kalpui a,, Kawngkhar a hawn chuan mak ti hmel zetin ka melh a,,a nui suk hmel ka hmuh chuan ka lut ve nghal a,,ka ang huau in ka hawi kual a,, Library lian tak ang mai a ni,, Bang kil li zawng zawngah chuan bookshelf a tlar dul a,,room lai takah Thutna pathum leh dawhkan pakhat a inhung a,,a sir kil deuhah Ama dawhkan bik leh Thutthleng a awm bawk….A lehkhabu chu enkual dan dan in ka chhiar nuam tih zawng pawh ka hmu teuh mai….

“Heng hi i chhiar vek tawh a mi??” tia ka zawh chuan a nui suk a,,ka zawh dan teh tawp chu naupang chhia min ti leh ang chu.. “Hei hi ka duh ber” tiin lehkhabu pakhat hi a rawn lek chhuak a,,ka en chian chuan ‘The One and Only’ Nicky-a hriatreng nana Sir Zuala ziah ngei kha a ni tih ka hria,,mak ti zeta Zira ka en chuan,,”Ka unaupa ziah anih vang ni lovin a bu chhung a achangtunu vang hian…” a tih leh sup chuan a mitah ka melh kar a,,ka mittui a parawl nghal teuh bawk….

“Bawihi tap turin ka duh lo che,, Nicky-a angin ka hmangaih zo ve lovang che tih ka hria mahse kumkhua a ka bula awm tur hian ka duh che,,i tawrhna te ka hriatthiam pui lo che anih pawh in i lungngaih laia i bula awm a i hlimna tawmpuitu che nih ka duh,,” a tih rual chuan kun in ka mittui a far nghal fap a,,ka khabe a dawnin min kuai dak a,,ka mitah chiang zeta min melh leh in “Eng emaw tal sawi ve rawh” a tih sup chuan,,”Ka lawm e” ka ti nghal sap…. Sawi teuh tur pawn min ti mahse sawi tur dang ka hre miau lo a ni…..

Ka khabe a dawmna chu la sawn in ka biangah a dawm a,,rawn kun hniam in ka hmuiah chuan dim deuh takin min rawn fawp a,,a kut lehlama ka kawnga a rawn vawn rualin min fawhna hmui a tih chet rual chuan ka chhang ve nghal a,,duhthaw zeta kan in fawh lai chuan pawnlamah kawngkhar an rawn kik avang chuan kham loh hmel zet hian min thlah ve hram…A phun hluk a ka kawnga a vawnna erawh min la thlah lo….Ka awmdan danglam nasa lutuk avang hian min thlah mai ka hlau zawk….Ka ke sai dar dar chu a hriat hlau deuh in ka ke chu ka siam rem a,,a nui ri hawk ka hriat chuan ka melh chho nghal ha a,,”Lokal rawh” tiin thutna awmah chuan min thut tir a,,Ani erawh kawngkhar hawng turin a pensawn nghal a,,

Pawnlama A nau Nuni leh Jenny ding chu Kawngkhar a hawn ruala ka hmuh chuan ka thaw hak a,,an rawn lut ve nghal a,, “U in rei deuh sia Jenny hian nangmah nen kher he deal hi en nawn a duh sia kan rawn chho ta mai,,Te min hrethiam mai ru aw” a ti nghal zat a,,”Um keini pawh kan sawi zo tawh a,,lo chhuk kan tum mek a”Pangngai taka ka tih chuan Zira chuan mak ti hmel zetin min rawn melh a,,keipawn chutia ka chhang nghal mai thei chu mak ka inti…kal lo turin min duh tih ka hria mahse hetia awm reng thu awm heklo,,Nuni ka zui chhuah ruala Zira mitmeng chu ka hrethiam lo,,a lungawilo a ang ka ti….Kal suh min ti ni mai in ka hria mahse An chhungkaw thil pawimawh a ka awm ve reng na chhan tur ka hre lo a ni….

Inhnuai kan chhuk chuan kan ri deuh laih laih a,,Zan dar7 a rik pawh chuan Zira leh Jenny te chu an lo la chhuk lo,,kan vai chuan haw kan tum a,,Albert-an pawn kan thlen rual chuan len a rawt tlat a,Bike inthleng a la rawt tlat zui…. Ktm pakhat chuan Albert-an min phur a,,ka bike Pekan khalhin Betty a phur a,,Josh an Nunui a phur thung chu chu Alberta duh dan a ni… Midang ho chuan nuihzat deuh in min bye bye hlawm a,,zan anih tawh avangin Nu Liani chuan leng rei lo turin min chah a,,Ka mitin Zira ka zawng ru a mahse a pawimawh viau aniang an thil sawi lai kha an la rawn chhuk miah lo nia…Pindan pakhata hmeichhe chhelo deuh nena an awm rei lutuk erawh ka ngaihtuah in ka tawt tun mai,, ngaihtuah na thalo nei duh lovin ka lu ka thing nak nak a,,ka thaw nghal hak bawk a…

Kan lengrei lo kan khalh kual ringawt a,,Dawr pakhatah Ice-cream kan ei a,,kan haw leh tawp,,Haw lamah Albert-a bike khalh ka dil avangin ka phur ve thung a,,ka rilruah chuan Zira leh Jenny ngawt an awm a ka bike speed lam ka lo ngaihtuah lo,,kan thlen ruala ka hawi let chuan tumah an lo la thleng lo…Gate kan luh rual chuan Alberta chuan min fiam nghal hluk a,,Zira te kawngkhar a rawn inhawn rual chuan Zira leh Jenny te chu inhnaih zetin an lo chhuak a,, Jenny chuan a beng bulah eng emaw hi a hrilh ru zeuh a,,Ka lo en reng a an awmdan avang chuan ka awm chhung a rawn na zawk,,Ziran min rawn en rual chuan ka hawisawn nghal a,, ka bike khalh chu Garrage-ah chuan ka dah lut a,, Albert-a chuan,,”Khatiang in khalh tawh miah suh mipa pawn kan hlau aw” tia a nuih vur vur chuan,,Awihawm loh tiin ka hnial chiam a,, Midang ho an rawn thleng chawpchilh ve nghal a,,ka khalh chak an tih thu an rawn sawi laih laih a,,ka khalh chak pawh ka hre der silo….

Nui har har ri avang chuan keini ho awmkhawm chu kan hawi phei vek a,,Jenny-in Zira hmuia fawp zeuh a acar-a lut chu kei mai nilo kan vaiin kan hmu vek….Ka thil hmuh avang chuan ka nat ruk tawh nen ka chhungril hi a na nghal veng veng,, Engvanga hawi phei ve kher nge ka nih le?? Nunuin ka ban a vawn rual chuan,,thaw la hakin ka nui lui sak a,,”Chhuk ila Bet i rawn chhuk….” ka ti hman tawk….”Aw ka rawn riak dawn” a ti nghal hlak a,,Betty hi chu ka hrechiang ve tawh a u te awmdan avang chuan a thinrim ve a ni tih ka hrethiam mai,,Kan vai chuan kan chhuk ta dal a… Zira te lam chu ka hawi tawh lo hrim hrim,, kan boruak vang nge ka inah ka lut dal a,, Josh-a chuan boruak dang siam tum takin eng eng emaw a sawi a,,keipawh in an awmdan chu hrethiam takin ka rilru nat rukna thupin ka titi.ve bawrh bawrh a,,Dar8:30pm a pelh chuan kawngkhar inhawng ri rak lam chu kan hawi phei thap a,,Zira hmel ka hmuh rual chuan kan ngawi nghal thap….

“Betty haw rawh…” a tih hmuk chuan Ani la in “ka riak dawn” a ti ve nghal hlar a,,Mahse a U chu a hnial vak ngamlo tih hriat takin thinrim zetin a haw tau a,,Albert-an haw a rawt ve nghal erawh ka haw ru viau…. Peka chuan min ngaihtuah hmel zeta min melhin a chhuak mai lo mahse ka nuih sak avang chuan thaw hawkin hreh ru zetin a chhuak ve nghal a…Zira la ding run avang leh min melh run avang chuan Keipawh dawhkan bula dingin Amah chu ka melh let ve ran a….

STARLIGHT – 25

( TETEI POV )

“Eng nge i rawn tih??” ka tawngkam chu a nelawm tehchiam lo,,hawihhawm taka ka biakna chhan tur ka hre miau lo alawm… Khatiang a mahni bialnu te hmaa midang fawh theih mipa kha ka mamawh hauh lo,,kawp kual mai mai tura nep la ka ni heklo….

“Puii ka sawifiah thei…” a tih rual chuan ka kut ka hum ruh nghal teuh a,, “Insawifiahna….” ti sap in ka nuih zat vang reng nilovin ka nui ri hak thung….Tunah hian ka na lo ka tih chuan dawt ka sawi ngei ang mahse chumi rual chiah chuan tih takzetin ka thin a rim bawk….

“Puii ka thusawi ngaithla rawh…” a tih deuh hmuk chuan ka melh rum al a,, “Kha hminga min koh ve sek kha i phulo…” ka ti chhuak hrawk….A mitmeng danglam nghal vek chu ka hmuh hmaih lo ka tawngkam hman chu a haw hle tih hriat takin a hmel a dur nghal khup a,,mahse Ani ai hian ka thinrim daih zawk… Hmeichhe dang te ang chu ni ila tunah hian ka ankhum emaw ka thinrimna te tilang in eng emaw tak ka ti ngei ang mahse ka thei lo chutiang hmeichhia chu ka ni ve lo,,ka thinrim chuan ka hrawkah min hnawh a ka tawngchhuak theilo…..

“Nicky-a chauh in a kohna thin che a ka ko che chu ilo haw thin viau a ni maw…” Elhsen rawng kai lek lek a atih chuan na zetin ka melh a,, Nicky-a hming a lam rik avang chuan a hma zawng aiin ka rilru a na bawk… “I nunhlui i pai reng chu a lang chiang hle mai,,Ka kohna ringawt che pawh i hua chu ania…”a tih zawm leh zat a,, Ka nunhlui tia a sawi avanga ka nat dan tur hi a hrethiam pha lo nge a hrelo der zawk….

“Nang chuan i nunah mi pakhat chu pawh hmana mi la dah reng chungin min kawp a,, keichuan tumah hi ka dah lo asin,,Zanin a i thil hmuh kha….” a sawi lai mekin ka kut pakhat chu alamah ka phar chhuak a,,a ngawi nghal dawt….

“Insawifiahna a ngailo khawngaih in haw phawt rawh….” Awka zaidam taka ka sawi chhuak thei chu keimah pawn mak ka ti.. Khatianga sawi tura ka inthunun nasat zia hi hrethiam se ka duh takzet bawk…A rum chhuak nghut a,,”Ka haw dawnlo…” a ti hmuk,,Chutah zet zawng ka insum thei tawh lo,,”Nicky-a hi ka nunhlui tih sawi tur hian tu nge i nih?? Ani kha ka hmangaih a,,ka hmangaih kumkhua bawk ang….” Ka aw pawh a zawilo hle,,ka thusawi avanga ka nat leh thinrim inkawp bawk si chu ka thaw nghal hlawp hlawp a,, ka awmchhung na lutuk avang chuan ka awm chu ka dawm nghal vawng vawng a,,tunah tak hi chuan hepa hi chhuak sela ka duh ber….

Mahse ka duh dan ni lo zetin a ding run bawk si,,pindan lamah ka kal mai angai anih loh chuan hepa hmaah hian ka tap mualpho leh ngei ang… Hmanhmawh zeta kalpel ka tum chu ka kawngah rawn man in ka hnunglam atangin min kuah bet a,,ka tal nghal nghek bawk….”Bawihi ka tihpalh” a tih sup chuan ka tap chhuak nghal hawk a,, Eng chena rei nge ka tah pawh ka hrelo,, Darkar tlemte liam taah khan ka tahna thlentu nih a duh loh thu a sawi a,,Ka lungngaihna min tawmpui a duhthu a sawi bawk anih kha mahse darkar tam pawh a liam hma in Ama tihsual ngeiah thiam loh min chantirin,,ka natna tawp a sawi a ni si…Engtia rei nge ka tah a,,min kuahbet ka hrelo mahse ka awmchhung na lutuk avang chuan thawk pawh ka thaw tha theilo…. Ka tha a zawi hnawk a,,min pawm kang lawp a ni tih pawh ka hria mahse tal tur leh tawng chhuak turin chakna ka neilo….

Ka khuma min muttir chuan a awmlohna lamah ka inher nghal hmak a,,ka mittui far pawh chu hrukfai ka tum hauh lo…Ka tah nasat tawh teh reng nen ka mittui chu a luang zel bawk si,,Hepa hian min chhuahsan se tih duh hle mah ila,,ka khum bulah a ding run bawk si…A awm ve hian ka hah hluah hluah zawk,,Rilru chhe lutuk mai…Ka awmdan avang nge pawnlamah a chhuak a,,tah rik leh ka hlauh em avangin ka puansin tlang chuan ka hmui hup betin ka tap nghal ngawt ngawt a….”Nicky…. Lalmuanzual min puih rawh ka thinlung hi a na takzet a ni…”

“Elephant” Chu aw ka hriat rual chuan a lam ka hawi nghal a,,kan inhmuh lohna rei tawh zia ka ngaihtuah chhuak a,,ka tah a chhuak chumi rual chiah chuan min kalsan daih avangin ka thinrim hle bawk….

“Hmela lokal teh” tiin a samah ka kek nghal a,,Ani la chu na ti awm pawn a awm leh duh miah lo nia…A nui lui vak vak a,,a tawpah chuan thinrim inseh ru tunin ka thlah ve hram….A hmel chu chiang takin ka en a,,a hma zawng aiin a hlim hmel a,,tin a taksa mawi zet thin pawh kha a nei leh vek tawh,,a hmelthatna chu a zual tulh tulh emaw tih tur a ni a,,a nui sen sen a,a landan chu ka sawi thiam dan ber chuan naupang duhawm zet hi a ang…..

“Min en nasa lutuk i mit kha a tla ange” a tih rual chuan lei ka chhuah nghal vak a,,Ani erawh in ka samah a chul thung…

“Giraffe i bulah ka rawn kal thei tawh dawn a mi??” Beisei nei zeta ka zawh chuan a nui hmel chu a chuai nghal riai riai a,, ka biang tawn tawnah chuan a kut pahnih a vuanin ka hmai zawnah a rawn kun hniam a,,min melh reng avang chuan Keipawh in tawng lovin ka melh let ve ran a….

“Ka naute hian khawvel a dai tan ve dawn chauh a thil hriatthiam loh tam tak a nei nghal der ania…Thu ang” ti nghal in phul hring dup hmunah chuan min thutpui nghal a,,a kap karah thu in ka ngheng rial a,,ka awmdan hahdam zet hi nuam ka ti takzet….

“Ka zawhna che ila chhang lo,,” ka tih chuan a khabe chu ka luah nghatin,, “Ka bulah i rawn kal dawn lo,” a ti sup a,,a sawi zawh rual chuan inla hrang nghalin Amah hmachhawn zawngin ka inher a,,”Engvangin maw??” ka ti nghal vak….

“Mate….” beidawn hmel zeta a tih rual chuan kan inthen leh ngei dawn a ni tih ka chiang a,,ka mittui a tling nghal teuh bawk…

“Mate Zira insawifiahna kha ngaithla turin ka duh che….” Chu thu harsa tih hmel zeta a sawi rual chuan Lalnunzira ka hrechhuak nghal zawk….Kan intih thiamloh dan te,,a tawngkam te ka hrechhuak nghal uai uai a,,ka awm chhung tawt nghal up up avang chuan ka thaw chhuak kawk a,, Nicky-a chuan ka dar tawn tawnah min rawn vuan in,,”Mate ka thu i awi thin kha,,Ani khan a duh takzet che a ni….” a tih chuan na zetin a kut min vawnna chu ka vai thla pawp a,, “Dawt nang hian engmah i hrelo….Ka tan hian nang lo chu tumah an awmlo…. Phatsantu ka mamawh lo….Ani kha ka mamawh lo….” ka ti nghal nghek a,,Ka tap nghal tiau bawk…Beidawn hmel zeta min melh in a mit atangin mittui a rawn far a,, “Ka naute ka tihpalh a ni…ka tihpalh takzet…” tiin a awmah min kuah bet a,,ka tap nghal hlawp hlawp bawk…..

“Min kalsan tawh suh,,min hruai ve tawh mai rawh aw… Khawngaihin ka ngen che anih chu…. Giraffe khawngaih in….” ka ti nghal mawlh mawlh a,,ka tap nasa zual sauh bawk….

“Puii harh teh… Khawngaihin…” tia min sawi dawt dawt tu an awm avang chuan ka meng chhuak nghal kawk a,,mangang hmel zeta Lalnunziran hnai taka min lo en ka hmuh rual chuan mittui kar atang chuan ka melh rum nghal vak bawk….Ka harhchiang a ni tih a hriat rual chuan a dingchhuak vut a,, Ka hawi kual a pawnlama khaw eng tan ka hmuh chuan ka tap muhil a ni tih ka hrethiam mahse Ani hi nizana a thawmhnaw inbel ngai vek ala inbel,, anih chuan a haw lo tihna a mi niang??

“Inbia ang…” a tih zawi sup chuan a awmlohna lam atang chuan khum chu ka thawhsan a,, Bathroom-ah ka lut nghal daih….ka be peih hlollo min ti na a,, zak miah lovin ka inah a riak bawk a,,chuan tunah inbiak a duh thu a sawi a maw!! Huh!! Bialnu nei reng chungin ka hmuh lai ngeiin hmeichhe dangin a fawp a,,chuan Nicky-a chungchang a duh dan dan in a sawi chhuak bawk a,,Insawifiah ala tum tho a,, Engtiang takin insawifiah ang maw!!! Mifel tak ka nilo mahse midang te bula insawifiah ngai khawp in thil ka tihsual ka hrelo… Nicky-a te a sawi chhuak a Nicky-an khatiang in min ti na ve ngailo tih te hi hre ve reng reng sela a that ka ring…..

Ka mitthlaah Nizan lawka a Lehkha chhiarna room a athusawi kha a rawn lang uai uai a,, darkar tam pawh a liam hma in kan hmuh lai ngeiin an infawp leh a,,Eng ang mipa nge maw anih le?? Bialnu te awm ve reng laia hmeichhe dang fawp thei mipa hi ka hrethiam theilo….. Lalmuanzual nangpawh kha kei min tan lovin Ani saw ngaithla tur ten min ti vel a,,i bulah min hruai ve rawh tia ka ngen mawlh mawlh lai che in hepa bulah hian min kal tir leh hram a….
Ka rilru natna zawng zawng chu thinrimna in a rawn thlak a,,Tunah tak hi chuan Lalnunzira leh Lalmuanzuala chungah hian ka thinrim takzet a ni…An duhdan chauh a awm tur hian an toys ka ni lo…..

Bathroom atanga ka chhuah chuan Zira chu a din ngai a lo la ding reng in ka chhuak chu min lo en reng a,,a kut pahnih in a kekawr ipte zenin a ding run a,,en pawh en duh lovin pawn lamah ka chhuahsan daih….Thingpui ka chhuang a,,fridge atangin Cake ka la chhuak a,,dawhkana ka dah thlak ruala ka bul hnaiha a rawn kal avang chuan ka thil tih lai chu ka ding nghal chawt…Ka melh nghal ran a,,”Inbia ang ka tih chu…” awka vin lek lek hian a ti leh a,,a aw atang chuan a chauh hmel ve takzet,,”Inbiakna chhan tur kan neilo…Kan inkar a tawp tawh…. Engkim a tawp…” ka ti hmak,,a hmela thinrimna lo lang chhuak chu ngaipawimawh lo lui zetin ka thingpui bel lam chu ban tumin ka inher a,,rang zeta ka kutah man beta alam min pawt hnai vak a,, min pawmbetin min rawn fawp ta a….

Min fawh dan te la chu a thinrimna zawng zawng hrikthlak tum ni awm zetin min fawp buan buan a,,ka duhlo tal vel chuan a thin a ti rim zual sauh emaw tih turin min kuah nghet tulh tulh lehnghal….Min fawh dan chu thlak thutin dam zet hian min rawn fawp a,,ka hmui ka tih chet rual chuan ka kâ chhungah a lei rawn luh tir nghalin duhthaw leh uar zetin min fawp nghal buan buan a,,keipawh in ka chhang let ve nghal…. Kan infawh lai chuan harh chhuak thutin ka inla hrang nghal vat a,,ka awmdan chu mak ti hmel zet leh hmel phelh deuh phang hian min melh a,,A tawng hma chuan rang zetin tui khawihna lamah chuan ka phei a,,Ka hmui chu a hmuh lai ngei chuan sahbawn in ka sil a ka nuai nghal nawk nawk a,,ka chetdan avang chu a ni mahna a nui chhuak hawk a,,”Chimawm” a ti chhuak hluk bawk…..

A nui chu ka melh nghek a,,ka thingpui chhuan chu a off a,,engmah sawi lovin thingpui no chu la in a siam nghal mawlh mawlh a,,Kei erawh ka thinrim ru tun mai,, engvanga min fawhna kha chhang let kher nge ka nih pawh ka hrelo….”Khanu i fawhna a min fawh vang khan i hmui kha pan rawh se…” sehchilh zeta ka tih chuan a nuih a za tulh tulh emaw tih turin a kun a anui char char lehnghal…Ka thinrimna chu ngaipawimawh lo tih hriat zet hian Dawhkan bul chair-ah chuan thu in thingpui leh cake chu a ei mial mial a,,Chutih lai tak chuan doorbell a rawn ri a,,hawng turin ka kal nghal daih….

NuLiani leh Betty hmel ka hmuh rual chuan Nu Liani chuan,,”Tete i tha tawh em?? Bawiha khan nizan i khawsik thu kha a rawn sawi a…Kan ngaihtuah lutuk che a” a tih chuan ka rilru in “Zirdawheha” lo ti hmanhmawh….”Ka tha tawh lutuk thingpui kan lo in a,,lokal ru lo in ve nghal rawh u…” tiin choka lamah kan lut a,,Nu Liani hian kan inngaihzawng a ni tih hi hria angin langlo mahse a hria a ni tih ka hria…Kan colony ho hi chuan an hre vek tih zan lama chaw kan eikhawm khan ka hria….

“Nu thingpui in ve ru hei Cake hi a tui lutuk,, Betty….” Ziran a tih chuan Nulianin a chhan hma hauh in Betty chuan,,”Kan in tawh” a ti deuh hmak a,,Betty awmdan atang chuan ala lungawilo hle tih ka hrethiam mai…. Anu chuan inenkawl tha tura min chah mawlh mawlh pahin min hawsan a,,hepa hi haw ve nghal a tum lo em ni?? Zaktheilo si…

Pathian Ni a ni a,,ka damlo chhuanlamin a inkhawmlo ringawt lehnghal a,,Nunui te unau in an inkhawm kal hma in min rawn tlawh zuai a,,ka hmel landan a diklo tih an hre ve nge min ngaihtuah viau a,,mahse Zira a awm dawn tih an hriat vangin min kalsan ve hram a,,He building pumah hian kan pahnih chiah in kan awm chu ania…Hneawm viau ang le…. Eirawng a bawl leh thlap a,, chawhmeh simple deuh deuh a siam a mahse ka ei tui leh viau tho… Min be bawrh bawrh a,,engmah thleng lo ang mai in a awm a mahse kei chuan chutiang a awm chu ka thei ve der lo….Ka tawng duh miah lova,,chaw ei lai erawh kan inbe lo tawp,,kan ei na thleng sil ka tum lai chuan “lo hahdam rawh” inla fel zeta atih chuan ka pindanah ka lut daih tak tak a,,a phun hluk ri pawh ka hre pha reng ka nui sak thung… Nge ka tir pawh ni hleilo Aman ka lo ti ang a ti alawm……

Ka phone chu la chhuakin Fb ka khawih a,, Friend request tam tham zet lo awm chu ka en thla dan dan a,,ka hmelhriat ho zawng chu ka Confirm a,,Usawmzuala te classmate thin Joshua Friend request ka hmuh chuan nui sakin ka confirm nghal a,,ka hawi chhuah ruala Ziran rum zeta minlo melh run ka hmu thut chuan ka phu zawk a,,”Hmela” ka ti vin nghal vak bawk… Engtin nge thawm nei miah loh hian a kal theih thin ni…

“Eng nge i nuih a??” a tih hmuk chuan,,ner khum vakin,,”I hriat a ngailo…” ka tih chuan,, “Tawngkam duh tuilo nu” tih leh ka phone rawn pawhthlak a rual nghal a,,thinrim zet hian ka lo chuhpui ve nghal a,, chutih lai tak chuan messenger tone a rawn ri tleng a,,”Khawi min pe rawh” Ka ti vak a,, ngaipawimawh lo zet hian ka message chu a hawngin,,”Hepa hi tu nge??” a rawn ti nghal hmuk…..A thinrim a ni tih ka hrethiam nghal,, Zaktheilo lutuk…. Kei te chuan a hmuh laiin ka fawp em hleinem…..

“Khawi min rawn pe rawh…” Ka tih leh chuan,, “Tu nge ka tih chu??” a rawn ti vin nghal thawt…Ka phu nasa bawk si thinrim bawk si chuan ka awm ka dawm a,,min melh run tu chu ka melh let ve a,, hetiang boruak hi ka kham takzet a hma ni atang reng khan ka duh ai tam ka tawng tawh…

” A tupawh ni rawh se,,nang ang em in i hmuh laiin ka fawp ve hleinem” ka tawng zawh rualin ka phone chu chhuatah a paih darh nghal chuai a,,ka thinrim lutuk khum atanga ka tho chhuak chu ka samah man betin min kuai her lawp a,,hnai zeta rawn kun hniamin,, “Ka hrilh lawk ang che mipa dang hnaihah i awm anih chuan ka that duh hial ang che u…” ti hrawkin min man behna chu thlah thutin pindan atang chuan a chhuak nghal a…

A chhuah hnu chuan ka phone chu chhar khawm in ka en tlawk tlawk a,,Pathian Ni a nih avangin a thar pawh lei dawn ila ka lei thei chuang lo,, engvanga paih ve ngawt nge anih misual lutuk…A phone pawh a nilova,,a lei pawh a ni tawp silova…Ka ngaihtuah a ka thin a rim tulh tulh….

Thawhtan Ni a ni a,,a ngai te bawkin Peka nen Zingkarah Volleyball kan beng leh a,,kan haw lamah phone thar lei ka ngaih thu hrilh in,,hman hma turin ka ti a,, Lalnunziran min chhuahsan hnu khan kan la inhmu leh miah lo bawk… Rawng ka bawl a,,Ka inbual fai a,,ka tih dan ni miah lovin ka insiam a,,chaw ka ei chauh bawk…Smartpant uk tak zet ka ha a,,Top par simple zet ha leh in flat shoe ka bun tawp a,,Peka ka hruai anih chuan bike ka khalh leh thei dawn chuanglo….Nidang anglo zetin Shoulder bag lian lam ka ak a,, darthlalang a ka thla lo lang chu ka en a,,ka sam sei tha zet leh ka kekawr rawng in ang lutuk avang chuan ka nui suk a,,ka doorbell a rik rualin pawnlamah ka chhuak nghal a…

Ka kawngkhar bula Peka lo nui var var ka hmuh chuan bike chahbi chu pe in ka inzui chhuak nghal a,,hepa hian T-Shirt var hi eng zat nge a neih ang le?? A hma lam in ziak in ang miah lo mahse a var vek hi chi hrang hrang hi a nei a,, Jeans pawlduk a hak loh chuan cotton jeans dum ngawt hi a ha bawk a,, Sneakers la hi a nei nalh thei phian lehnghal….Rawng dang hi chu a ngaina tam lo tih ka hria…. T-shirt color dang hi a ha leh zeuh thin tih loh chu engtik lai mai pawh hian A var,,a dum a pawlduk hi a ni deuh reng mai….Amah ngaihtuah chhuah apiangin a thawmhnaw rawng tur hi mitthlaah a lang nghal…..

Dar8:00am chauh ala ni na in tih tur neuh neuh ka neih bakah phone lei ka ngai miau a kan kal hma pawh a ni reng a,,Bike a ka lawn fel rualin Zira te kawngkhar a rawn inhawng a,, Betty-i a rawn chhuak a,,kal hma min ti deuh nge kan inbe luam a,,kan inbiak lai chuan Zira a rawn chhuak ve leh a,,”Betty” tih chiah a sawi hman kan hmel a hmuh chuan a mit a kan zeuh a,,kal hma min ti ve tho a ni mahna,,”Kan kal ange kan inhmu dawn ania” tiin Betty kan bula ding chu kan kalsan nghal a…..

Phone dawr kan thleng a,,lei tur pawh ka hre chuanglo….Peka zawk chuan a tha tur leh a tunlai ho chu a thlang nual a,,”A eng nge i duh ang” a tih chuan a thlanchhuah zinga Vivo V19 chu kan la a,,kan intih fel hnu chuan stationary dawrah eng eng emaw leiin kan kal leh a,, College lamah kan kal zui a…..

“Peka ka phone hi ka khawih thiam lovang aw,,a hmasa kha MI ania tunah Company dang ka hmang leh daih a,,” ka tih chuan a nui nghawr dawt a,,

“Ka zirtir dawn che nia nakinah,,thlalak thawn tur che pawh ka nei….” a tih chuan min hmu thei dawn lo tih hre reng chungin lu ka bu nghauh a….. College kan thleng a mahni room lam ve ve kan pan a,,kan thil leina lamah kan rei deuh bawk a,, Staff room ka luh chuan Dar9:00am a ri der tawh….. Zirtirtu dang pawh an lo awm deuh vek tawh….Zira tih loh chu…..

Class la tura ka chhuak tur leh Lalnunzira Staff room a rawn lut chu kan intawk chiah a,,en duh lo luia kalpel ka tum chu ka hmaah tak a rawn ding a,,hel tuma ka kal leh chiah ka hmaah a rawn ding leh a,,ning zetin ka melh chho nghal haw a,,Ani pawh chuan rum zetin min rawn melh ve tho,,”ka kalna dal khan awm tawh suh..” ka tih hmak chuan ngeiawm zeta ner sakin,,”Ka kalna i dal zawkin ka hria…”a ti deuh hmuk a,,melh nghekin Amah nek lui ngatin ka kalpel a,,a phun hluk ri pawh ka hre thei…Class ka thleng a,,mahse khapa teh hrep avang khan ka class lak pawh a nuam lo….

Class a zo a,,Staff room ka lut a,,ka thutnaah pawh ka thut hma in Zira chuan min rawn ko a,,”Miss Tete lokal lawk mai teh…” a tih chuan ka en ha a,,tun hi a vawikhatna atan Tete tia min kohna a ni…. Lu thing nakin a dawhkan bulah chuan ka kal a,,Paper pakhat hi min pe a,, “Principal in he thil hi buaipui turin a duh che a,,” tiin min melh run a,,Paper ka en chuan mak ti zetin ka melh let ha a,,”Mahse Sir hei te chu ka subject concern pawh a ni lova ngati nge keiman ka buaipui a ngaih,,” ka tih chuan,,”Um kha subject zirtirtu kha tunah leave la lai ania nang kan zirtirtu a ti thei ber tura ka ngaih i nia keiman i hming ka sawi anih kha…..” a tih chuan thinrim zet hian ka melh a,,”Mahse heng te chu Zirtirtu dangin an ti thei reng alawm,,nga ti nge kei kher??” ka thinrim tawh em avang chuan zirtirtu dang awm pawh ka ngai pawimawh thei tawh lo…Min en vekin ka ring bawk…..Ngeiawm zeta min melh in a thutna atang a rawn ding a,,ka beng bulah rawn kun hnai in,,”Keimah nen kan ni dawn alawm…” ti supin a chhuak nghal daih…..

Tunah khan engmaw a sawi a,,Ani nen class ban hnuah extra period neiin naupang in an subject harsatna bik an sawi tam ber kan zirtir thin ang maw!? he thil hi a fair hlollo,, Zirtirtu zawng zawng in naupang hnufual chu an puih tur a ni lawm ni,, College chin tawhah lehnghal naupang chhia ang mai a extra period neih hi thil tul ber pawh a ni tawp lovang,, naupang pawn an peih lovang…..Ka thinrim bawk si chu ka dawhkan lam panin ka kal tau sawk sawk a,,a sawt tam lo viau bawk…. Es-in thil awmzia min zawh chuan chhan pawh ka chhang peih lo lehkha chu pe in dawhkan bawh in ka kun nghal daih….Hmela mai mai chuh!

Conti…

Leave a Reply