You are currently viewing STARLIGHT – 3

STARLIGHT – 3

Spread the love

STARLIGHT – 3

JONSMELY BAWITLUNG

Ka zawn a rawn thleng a, ka kawr nghâwngah a kut hnihin a rawn ṭham chawt a, khap hauh lovin ka melh let khai thung. Ka kut ka hum ruh a chet pawh ka tum chuanglo, a thin tih rim reng hi lawm ni ka chak em em. Ni e, thinrim a awmtir a, rilru nuamlo a siam hi lawm ka tum ber chu, chu thil chu ka ti ngei alawm. Inthiamlohna ka nei ve tur pawh mahni infuihin, huat ka tum lui ngar ngar chu anih hi. “Hetiang khawp hian em ni min tih nat i duh a?” Thinrimna aw nilovin na tak tuar ang maiin a ti chhuak sup a, a hmel lan ang ni miah lova a aw a natna lo lang chuan ka huatna zawng zawng a thai bo vek hial in ka hria mahse chu erawh tih lan ka tum hauh lo. Ka mit ka vang vang a, ka men leh rual chuan rúm zetin ka melh a, “Min tih nat dan ngaihtuah chuan ala nep viau lo maw?” ngeiawm zetin ka ti let a. Engmah sawi lovin ka kawrnghawng a chelhna chu pawt sawkin hnai zetah mit khap hauh lovin min melh a, ka kawrnghawng a hum tlat avangin ka dingdihlip ti tih a, min melh rúm em avang chuan zam duh biklo in ka melh let ve khalh a.

Ka kawr chu thlah thut in pen hnih velin a tawlh hnung hrut a. A chetdan avang chuan taksa ṭang ṭungin ka ding khawng at a, inthlah dul duh viau mah ila engtin nge chet a lak dawn tih ka hriat loh avangin ka la inhum ruh viau thung. Ka rin loh lutuk in leiah chuan a ṭhingṭhi a, a ṭhingṭhit ruala a mittui far fap chu ka hmu chiang hle bawk. Chumi rual deuh thaw chuan ka thaw hak a, ka taksa pawh a inthlah dul nghal riai riai. He mipa thinlung sak lutuk leh luhlul ru zet mittui tla khawp a siamtu chu tudang nilovin keimah ka ni, a best friend leh a unaunu. Engmah sawi lo mahse a mittui far avang chuan ka na nghal em em a, a hmaa thinrimna avanga min tih nat aiin tuna a mittui tla in min tih natna hi a na zawk daih tih keimah ngei hian ka hrechiang hle bawk.

“Pui min ngaidam rawh, hetiang khawpa huatna i rilru a ka tuh sak che avang hian pawi ka ti lutuk.” Harsa ti zeta a rawn ṭawng chhuah chuan chhan ka duh ka awmdan avanga pawi ka tih thu tal sawi ka duh mahse ka hrawkah hian hnawhtu awm ang mai hian ka ṭawng chhuak theilo. Ka hmui ka pet fan fan a, chhanna ka pe theilo. “Pui khawngaihin a hma ang khan awm leh ang, kan khawvelah khan kan pahnih chauh pawh a hlim taka kan awm ang khan awm leh ang aw.” A thusawi laia min melh rengtu chu ka en ngam lo, anih loh chuan heng naupang zawng zawng hmaah hian ka ṭap vak duh hial ang. Amah ka enna aṭanga hawisawnin ka inher a,b”Puii” ngenngawl zeta a rawn tih leh chuan ka ṭap tak tak dawn in ka hria, mualpho taka ṭah ka duh lo,bka pen sawn tur chiah chu ka kutah chelh in,bmin kuai her lawp a, a lam ka hawi rual chuan ka mittui a luang thla nghal zawi a. Ka mittui tla chu a hmu hman nge a awmah min kuah bét nghal thlawp a, ka sam a duat taka a chul rual chuan chhuak lutuk in ka ṭap nghal hliam hliam a, midang awm ve te ka ngaihtuah thei tawh lo, min kuah nghet sauh a, ka ṭap ring tulh tulh thung a.

Ka ṭap ring bawk si, ka ṭap rei bawk si chuan a ti mangang leh si nge, “Mate Zirtirtu te an lokal ange bâng tawh la.” a tih chuan, “Ṭah ka duh bik lo, ka mittui hi a tla zel alawm,” ṭap aw ṭuau a ka tih chuan midang chu an nui nghal dar dar a, keimah min nuih tih hre reng chungin ka la ṭap tho anih chu, ka in zahpui viau rualin ka tawp thei bawk silo a ni.

“I tap bâng thei bawk silova lokal rawh thinghmunah khan kal ang,” tiin min kai hrang a, midang ho ka hmuh chuan an lo la nui ṭhaw hlawm, ngeiawm hlawm hian. Thinghmun kan thlen chuan hmun remchang laiah min ṭhutpui a, ka ṭap tawh bik lo. “Tikhan ṭap leh la,” nui var var chunga atih chuan rúm zetin ka melh a, a kekawr ipte aṭanga a rawmawl var ṭha zet chu rawn phawrh in ka mittui luanna chu dim zet hian a hru nghal bawk a. Ka hmai huh hliam te pawh a hru mawlh mawlh a, kei erawh in mit khap hauh lovin ka en thung. “Ka tihpalh” a rawmawl a lak thlak rual chuan ka ti sap a, a nui suk a, ka sam chu a rawn tuai mam thuak thuak a, “Ana viau em?” ka tih leh chuan ka ball ben perna kha hrechhuak thut ni awm zetin a er ṭha leh vel a, phun hlakin a banah ka beng nghal thlawp a, “Ana, hmeichhia zawk si hi kut thawh tu zawkah hian i ṭang ziah mai, i bulah hi chuan engtik lai pawh in hriamhrei pai angai anih hi.” atih chuan ka nui a, min fiam fo dana atih chuan min ti hlim tlat alawm. “Eng hriamhrei ber nge i ken dawn sawi rawh?” Ka ti hlak hlak a, ka chhanna avang chuan chimawm zeta min melh in a nui nghal hawk hawk a, keimah avanga a nui lai hmuh reng ka duhna pawh alo la ngai reng tih ka hrechhuak leh ta.

A mittui tla ni lovin hetia ka bul ngei a hlim taka a nui hmel hi a ni engtik lai pawh a ka hmuh duh chu. “Muan.” ka tih sep chuan min en vat a, “Engvang mah in ṭap tawh suh aw.” ka tih chuan, min melh vang vang a, “Ka ṭap lo bawk Elephant” nui suka tiin min piai nghal a, ṭap nih chu a duhlo ve hle mai maw. “Anih i mittui ti tla tawh suh.” ka ti leh hram a, a nui hmel a reh riai riai a, min melh leh vung vung tawh. “Min ti na tawh lo la ka ṭap tawh lovang.” a tih chuan chhan tumin ka ang zuau hman, ” Ka hria i sawi tur, ka thiamloh a ni, ka tihpalh takzet chuan keipawh in ka ti na leh tawh ngai lovang che, ṭap tawh bik suh,” tiin min duat tih hriat zet hian ka luah a rawn chul zeuh a. Reilo te tak tak ngawirenga kan ṭhut dun hnu chuan kal a rawt a, ka ṭhutna aṭanga tho in, kan ṭhiante awmna lam kan pan ve ta a. Ban a hun ṭep tawh avangin kan hmanhmawh vak tawh lo.

“David-a nen a hlim deuh a ka hmuh che u khan ka thik a.” ngawirenga kan kal dun lai chuan a rawn ti chhuak phawng a, mak ti zetin ka melh ringawt. Hepa hian David-a ka kawm a phallo tih chu ka hria mahse thik tih zawng chuan a sawi ngai miah lo, “Mahse Ani te chu.” ka ti bah nuai a, “Ka hmangaih vang che in.” a ti leh a, min hmangaih tih hi sawi kherlo mahse ka hria a, nga ti nge tun ataka a sawi leh kher. Mak ti hmel zeta ding meuh a ka en chuan, “Ṭhian chauh nih ka duh tawh lo, vawiin aṭangin ka bialnu i ni tawh, mipa dang i bula an awm ka duh lo bawk.” a ti lehnghal zat a, fiam ka chak tlat, “Hmm, i bialnu ka ni duh ka ti ngawt a mi?” ka tih chuan a hamhaih ve deuh tih a hmel aṭangin ka hria, ka nui duh miah lova, a awmdan lai lutuk avang chuan ka nui chhuak ṭhelh a ni. Ka biangah a rawn fawp thut a, ka phu zawk nge nge, “Tikhan ka nem nghet chiah, ka bialnu i nih duh loh pawn min neih i tum tho a, chuvang chuan ka thu awi mai rawh.” intithu zeta a tih chuan ka nui chhuak ta hak hak a. Ka tih dan ngai te in, “Ka kut ka chal zawnah dah in Yes Boss,” ka tih chuan Ani pawh a nui ve var var a. Ni 15 zet kan intihthiamloh hnu a hlim taka kan nui dun leh thei hi ka lawm takzet, huatna aiin ngaihdamna a hlu zawk tih ka zir chhuak chiah bawk a ni.

Ani ka hriat theih tir aṭanga ka ṭhian leh ka unaupa hi tunah chuan ka bialpa a ni tawh, chu pawh ka duhthusam ang ngeiin, thinlung takin tunah hian ka hlim a ni. Kan chhungten hria se engtin nge an ngaih ve ang le? He khawvelah hian engpawh nei mah ila hlimna a tel siloh chuan engmah hi a hlu zo tak tak lo tih ka hrechiang tawh a, ka hmangaih nen a hlim tak leh damchhung hun hmang tur hian theih tawp ka chhuah zel ang. Tleirawl inngaizawng mai ni mah ila hmangaihna hlutna hi kum a nilo tih fiahtu kan ni ngei ang.

Kan intih thiamloh chhung zawnga Lehkha zir peih lo em em kha lehkha zir ka phur sauh a, tunah chuan official taka Nicky-a bialnu ka nih tawh avangin lehkha ka zir ṭhat angai, lehkha a thiam bik si a nupui ṭha tak leh zahpuiawm lo tak ni tur chuan theihtawp chhuah a ka zir angai tih ka hria, ka nuna thil thleng engkim hi Nicky vang zel a ni a, ka hlimna, lawmna leh ka lungngaihna pawh Amah vang chauh a thleng ṭhin a ni. Ka taksa peng pakhat ang mai hian ka nunah a bét tlata a tello chuan ka famkim loh zia ka hrechiang hle bawk.

Ni a ral a, hun pawh tuma chelh din theih anih loh avangin a liam ve zel a, lehkha ka zir nasa bawk a, exam naah pawh ka ti ṭha viau zel Nicky-a erawh pakhatna a ni ziah thung. Thlasik a in ṭan a, final exam hmabak kan la nih avangin lehkha pawh kan zir nasa ṭhin hle a, Nicky-a nen kan inngaizawn thu pawh kan chhungte ve ve in an hria a, ka pa chuan “ala hma deuh asin le,” tih a sawi a, midangin engmah an sawi lo thung. Inngaizawng dang te ang tho in a fal a awm te pawh nuam kan ti ve ṭhin hle a, mahse Ka hmui a a fawp zeuh ṭhin bak engmah kan ti ngailo kan la naupang bakah zak rual kan nia ka zak thei hle hi a ni ringawt. Ani chu mipa zawk ania zaklo ang hian a awm thiam viau a mahse a ruk chuan a zak ve hle tho tih ka hria. A hma ang tho in Lehkha kan zir dun fo a, ka thiamloh min hrilh in, note ka by heart chang hian min hau fo, a chhan chu amah ang chiah a a bu zawng zawng hria a mahni a chhanna ziak thei turin min duh miau alawm, chu erawh ka thei ve hlawllo a ni. Lehkha kan zir dun chang chuan vawikhat tal kan inhnial ngei ngei a, min hnial hneh loh apiangin ka nu a pun ziah lehnghal. A tawpah erawh zirtirtu te note min pek sa ka by heart leh nghe nghe zel. By heart hi chu ka chak phian a, amah ai pawh hian ka by heart chak zawk fo mai, mahse Ani erawh a thiamna leh a in zir peihna hmanga thiam a ni miau a el pawh ka el peih lo.

Krismas dawn hnai teah school kan chawl a, ṭhiante nena chaw eikhawm leh inhmuhkhawm te chu nuam kan ti viau a, Nicky-a erawh chhuah vel hi a peih lo hle ringawt. Chhuah ka sawi apiangin a thinrim ziah a mahse ka duhnaah erawh Ani aia ka luhlul miau avangin kan chhuak dun leh nghe nghe zel. Mawitei leh Joseph-a te nen kan inkawm deuh chawt a, Nicky-a te inah emaw kan inah kan riak ho reng zel a, nuam kan ti viau zel. Lehkha pawh kan zir zeuh zeuh a, 24 December zanah kawn chei enin kan chhuak ve a, kan pali chauh nilo kan class ho a remchang apiang kan kal khawm a, David-a te pawh an rawn kal ve a, Nicky-an a thik tih ka hriat tawh tlat avangin kan inbe tam lem lo, chutianga ṭhian ho a lenchhuah erawh nuam kan ti viau kan thlen chin apiangah thawm kan nei huk zel. Kan nui ring viau zel bawk a, Camera keng in kan hmet de zawr zawr reng bawk a, hun nuam tak chu a ni.

Krismas kan hmang zo a, kumhlui thlah zanah erawh kan inah kan awm a, Nicky-an kan inchung zawla Dar12 a rik ruala min fawp erawh ka damchhunga ka hriatreng tawh tur a ni. Dim tak anga lang si duhtawh ru tak sia min fawhna chuan ka taksa thlengin a danglam vek nia mawle. Halmawi chi hrang hrang vana a eng zuai zuai rualin ka beng bulah “Happy New Year” ti supin ka hnunglam aṭangin ka kawngah chelhin halmawi chi hrang hrang chu kan thlir dun a, kan awmdan romantic lutuk chu a nuam veng veng. Joseph-a leh Mawitei te pawh an inngaihzawng ve bawk tih kan sawi tel hram, an awmdanah nuam an ti ve hle tih a hriat hle bawk.

Kum a thar a school pawh kan ṭan leh tawh a. Final exam hmabak kan nih avangin zirna lamah ṭan kan la hle a, class-ah pawh kan serious ve takzet tawh, kum bul kan ṭan ang ngawt a ni tawh lo, hetiang taka lehkha zir ṭhahnem ka ngaih pawh hi ka hrelo. Nicky nen zir dun ziah mah ila ka thatchhe hle ṭhin a, ka thiamloh lai min hrilh a, ka zir ṭha peih ngai chuang lo chuti chung chuan ka pass chhe em em ngailo a, top 5 ah hi chuan ka lang ve ziah tho, a chhan ni bera lang chu ka by heart chak a,bnote ka nei ṭha a, chuvang chauh chu a ni. By-heart tawp erawh zirna kawnga thil ṭha ber a nilo tih tuma min hrilh ngai lovin ka hria, ka taimakna hian a tlin hlawl silova. Tunah erawh tih takzetin he ka bialpa vang liau liau hian ka zir a, lehkha a thiam thei a, hna sang tak ala chelh ngei dawn tih ka hria chuvang chuan nupui nep leh zahpuiawm deuh a neih ka duh loh avanga zir ṭha em em pawh ka ni. Ka suangtuahna zawng zawng hi Amahah a innghat miau a, kan pahnih hi chuan lak hran theih kan ni ngailo ang.

“Giraffe,vkan inneih hunah chuan Kawrfual puk tawk ka ha duh ania.” Ka tih chuan a nui suk a, Lehkha kan zir dun leh a,,chawl ang a tih ve teh mial avangin ka pindan balcony ah ṭhu dunin Arsi kan thlir a chumi pah chuan a hla duh ber Starlight- Ronan Keating ang mawi em em a a sak kan ngaithla a. A hla ngaihthlak duhzawng hi cool thei viau mahse Amah nen hian a inhmeh ngawih ngawih zel si a. Ka music duhzawng erawh a ning ṭhin viau a, Rock music hlir ka ngaithla ṭhin miau a, ning viau chung hian ka play chang chuan a ngaithla ve ziah tho.

“I fel viau loh chuan kan inneih hma in ka tlanbo daih ang.” a tih chuan rûm zet hian ka melh a, A nui nghal vur vur thung. “Khawiah pawh awm la ka zawng zel tho ang che, min ṭhen pawh tum mah la i thei chuang lovang min neih loh ai chuan ka kidnap zawk mai ang che.” ti tau aw zeta ka tih chuan a nui chhuak hawk a, ka biangah piai zeuh in, engmah sawi lovin a lu a thing nar nar a. “Ka Elephant hi a ti tau a ni maw.” a tih chuan lei ka chhuah khum vak a, Ani erawh a nuih a za tulh tulh thung. Kut kuangkuah at a ṭhu in ka hawisawn nghal hmak a, chu chuan a nuih a ti za ting tih hriat takin a nui ri hawk hawk a, “Awle, anih leh khawvela kawr puk ber i ha dawn nia,” nuihza insum zeta tiin a kut chu a kak zawngin a phar hluai a, “Lokal teh ka lo kuah ang che ka hmangaih em em nu.” tiin min kuah ta hlu hlu a, keipawh ka nui leh thei ta.

Engtik lai pawh in ka tan a awm ṭhin a, ka tana a hlutna hi engmah in ka teh thiam lo. Hmeichhia zawng zawng thik khawp in min duat a, ka bialpa ka hmangaih leh ka ṭhianṭha ber hi ka tan hian ava han hlu hleuh hleuh tak em. Ani anih chhung hi chuan engtikah mah min ṭah tir leh tawh ngai dawnlo tih hi ka chiang a ni. Vawikhat kha a tawk em em chuan keipawh in keimah avang hian ka ṭah tir ngai dawn lo, na in ka siam hek lovang ka hmangaih a, atan chauh ka awm reng ang.

Exam kan zo a, exam zawh niah restaurant-ah chawlh an ti a, kan class ho zawng zawng kan kal khawm a, restaurant pakhat kan tikhat vek. Kan bengchheng leh hle bawk. A tu pawh mai chu kan exam zawh tak khan kan rilru chu a luah lo ve chiang tih hriat zetin fiamthu sawiin kan nui chiam a, zakzum zual inngaizawng te pawn fiam an hlawh leh laih laih tawh. Karkhat hnuah result a chhuak a, school hall-ah result puan a ni a, Nicky-a pakhatna a ni leh chu thinlung takin ka lawmpui mahse kan Principal in pakhatna pahnih an awm thu a sawi chuan mak kan ti hlawm hle a, a chhan pawh Nicky-a pha tur hi Class9 zirlaiah an awm kan hrelo tlang vek aniang kan phun deuh nghal mur mur a, Nicky-a chu pakhatna anih avangin dawhsan lamah Pahnihna leh pathumna te nen an la ding a,, Naupang 150 lai Class9 zirlai kara pakhatna ni thei tur chuan zir ve viau zel a ngai tih kan hrechiang em a ni.

Principal in pakhatna dang a puang leh chuan kut an beng dur dur a,veng nge a sawi ka hre leh hman pek lo a chhan pawh Mawitei nen kan lo inbe lehpek a. Tumah chhuak an awm loh avang chuan thawm a reh deuh ṭhap a, kan ṭhutna lam chu an lo hawi deuh ṭhap bawk, “Nga ti nge le?” Ka rilru chuan ka ti a, kan ṭhian dun chuan kan hawi buai viau a ni. Ka hnunglam atanga, “Tete kal ta che” an rawn tih chuan phawk zetin ka hawi hû a, ka kut zungchala inkawk vu in, “Keimah maw?” ka la ti hluai zui. Ka bula ṭhute chu an nui dar dar a, dawhsan lam aṭang chuan “Lalhlupuii class9 section A Roll no-7,” tia a rawn puan leh chuan mak ti bawk si lawm bawk si chuan dingchhuak in Principal dinna lamah chuan ka kal chet chet a,bka mak tih lutuk vang nge kal pawh ka kal chak thei lo.

Dawhsan ka lawn kai chuan step tawp berah ka inchhuih a ka petek dawr lehnghal a, Nicky-an min lo dawm hman lo sela chuan ka tla daih dawn tih ka chiang. Lawmman ka lak lai chuan lawmthu ka sawi leh sawiloh pawh ka hrelo, nidanga an tih ziah danin kan pali leh class teacher leh Principal telin thla an rawn la a,bkan chhuk thla leh ta. Nicky-a chuan a ruk thei ang ber tur hian min kai a,bka kut a thlan vek tih ka hria, ka nervous vang ni ta berin ka hria. Engkim hian min ti zám vek miau a ni. Ka hriat theih chinah sport vanga lawmman ka dawng anih loh chuan dawhsan hi ka rap ngailo, a vawikhatna a ni a, ka hlim nge hlim lo pawh ka hrelo. Nicky-a lam ka en chuan a nui var var reng thung. He a nui hmelṭha lutuk hi chu khawi hmunah pawh, engtik lai pawha hmuh fo ka duh kha a ni reng a ni.

Kan ban hnu chuan Nicky-a aiin lawmpuina ka dawng tam zawk, a chhan pawh a vawikhatna a ni miau a, mite pawh hian mak an ti, kei ngei pawh in mak ka ti si a, ka answer paper an check diklo aniang ka tih chuan Mawitei’n min beng pawp a, na tih vanga ka eu ngawng ngawng erawh a ngai pawimawh lo teh e.
“Ka elephant te hi ilo ropui takzet, Class10 kan nih hunah chuan tun ai hian i zir nasa nga keiai pawh in i sang zawk dawn ania aw.” Kan haw kawnga Nicky-an a tih chuan ka nui hak hak a. Ka PR chu ka lek vang vang a, ka la awi thei chuanglo a ni.

“Giraffe ka mumang anih te hi ka ring rûm rûm mai, ka paper an check sual tak tak aniang.” ringhlel zeta ka tih chuan a nui suk a, “Lokal teh,” tiin kan in thlen hma kawng kawi thingkung lian zet awmna bulah chuan min ṭhutpui a, kan tih fo dan a ni a, helai hmun hi chu a nuam in haw ti nuam tu a ni, mi veivak an awm lo bawk nen ka ṭhu nghal sat sat a.

“I mumang a ni lova, I chhan naah khan engmah tihsual a awm hek lo. Hman aṭang khan ka thu hi awi viau la chuan ka pha ngai lovang che ka tih kha. I thiamna liau liau a pakhatna ni i nih kha, tun ai hian ila zir ṭha nga nakinah kan pahnih in lecturer kan la ni dun dawn nia aw,” atih chuan ka lu ka bu nghauh a. Tum mumal tak ka neih loh avang hian a hna ang thawk ve tawp turah hian min dah tawp a, keipawhin a nih ang apiang nih ve ka duh.

“Zirtirtu nih hi tinge i duh viau a?” Amah en reng chungin ka zawt a. Ani erawh kan hma lam a thil awm te chu a melh vung vung thung, “Ka thiamna hmanga ka zirlai naupang te ka zirtir vel tur leh zawhna min zawh chang te a chhanna ka pe tur te ka ngaihtuah hian zirtirtu nih hi ka chak, naupang tam tak ka kutah an awm tih hre reng chunga ka enkawlna hnuaia an awm tur te hi.” a ngaihtuah zui tih hriat takin, kûn in a nui var var a. Ka lam rawn hawi leh in, “I chak ve lo em ni?” a tih chuan ka lo nui ringawt. Chak a chaklo tur pawhin ka hmalam hun tur hi pangngai takin ka la ngaihtuah lo hrim hrim.

“Anih tihian zir zel ta ila Nakinah tum dang nei leh ta daih si ila, ka zir i phal tho angem?” ka tih chuan, nui sang a min en in, “Ka elephant hmelṭhai hian tum a nei anih phawt chuan a zir chhuah hma loh chu ka thlawp char char ang.” tiin ka sam a rawn tuai thur a, duhlo zetin ka lo thlek sawn vak thung.

“Lecturer i nih ve ka duhna chhan chu thawk dun zel ila, awmdun zel ila ka tih vang ania mahse maw Doctor, Nurse thildang engpawh i thawk duh anih chuan ka thlawp zel ang che. Class10 kan pass hma ngei in chu thil chu ngaihtuah bawk rawh aw,” a tih leh chuan, “Yes Boss,” tiin ka nuih let ta var var a.

“Haw tawh ila, kan u leh nau te an haw tawh si a, Chhungten min lo nghakhlel tawh ang kan tlai lutuk chuan an lo mangang palh ang. Restaurant-ah khan kan awm rei tawh bawk sia.” a tih chuan, “Awle” tiin ka tho nghal hluai a. Ka kal tur chu ka banah chelhin min rawn fawp thut a, ka inringlo bawk nen ka meng bial nghal kawk mai. Rei min fawp lovin min thlah vat a, ka lo meng reng a hmuh chuan a nui ta hawk hawk a, “Kal ang, pakhatna i lak lawmpuina anih kha.” ti sapin Amah chu a kal nghal daih a.

In kan thlen chuan kan chhungte chu an lawm thiam hle a kei ngat phei chu a vawikhatna anih avangin an lawm em em vek. Nakin lawkah Ulawma leh Uchhana ten Class10 an exam dawn a, midang zawng erawh tunah hrih chuan kan chawl a, nuam pawh kan ti viau. Ka pa in ka pass lawm nan ka duh ber min lei tur thu a sawi chuan Bicycle ka duh thu ka sawi a, patea pawn ka duhzawng lei min tiam bawk. Nicky-a pawn Bicycle thar a nei ve leh ngei ang. Kan pahniha khalh dun vel hi alawm ka suangtuahna a ka nuihpui fo ṭhin chu.

Joseph an Jam a rawt avangin Nicky-a nen kan kal ve a, instrument neiin ken an tih avangin Nicky-a pawn a electric Guitar roh em em a keng chhuak a. A t-shirts dum leh a jeans kekawr hak nen chuan a lang chhelo leh hle tawh. A thawmhnaw rawng ang kher ka inbel chuan min ti confi zual a, nuam ka ti tih hian ka nuam tihna a sawifiah zo pawhin ka hre lo.

“Pui vawiin chu zai rawh aw.” a tih chuan ka nuih var var a, zai suh pawh ti se ka zai nasa leh ber dawn chutih rualin ka bengcheng leh ber dawn tih a chiang. Ka hla thlan reng reng a bengchheng leh hle dawn tih a hrereng chung hian zai rawh hi a ti ve ziah a, mahse a guitar nen hi chuan bengchheng a tih thu a sawi ngai miah lo thung. “Zai dawn chiang, vawiin chu ka hla duhzawng hlir ka sa dawn ania.” khi hai chunga ka tih chuan, ka sam a rawn tuai thur leh tawh. A kut lehlam chuan a kekawr ipte a zen ruk ruk a, lehkha hi a rawn phawrh a. Ka en chuan hla copy a ni tih ka hre nghal. STARLIGHT a ni tih ka hriat chuan ka ner nghal nang a. “Giraffe a cool e.” ka ti nang nang a, a nui suk ringawt.

“He hla hi kan pahnih hla ni rawh se, I laka ka thutiam anih hi.” a tih chuan a hla ziah chhuah sa chu ka en a,
“Hetiang te chu i ṭhian hnena i sawi tur alawm kei te chu i bialnu ka nia.” hmui ti pawrh tara ka tih chuan, a hmui hnuai seh zeuhin, a ha ngho lang va in a nui a, “Ka tan chuan ka engkim i ni tih hi theihngilh ngai suh, kan inngaihzawnna ka dah hniam nilovin ka best friend i nihna hi ka tan a pawimawh ber, I ngaihtuah ve ngai em? Kan fate’n Best friend kan nih an hriat a an rilru tur te? Khawvela mipa vannei ber ka ni. I damchhung hunah inṭhen hi ngaihtuah ngai suh ang che. Min nei duh lo mah la ka nei dawn tho tho che.” tiin ka darah a rawh kuah a, “Boss ka la ti ve reng awm si a,” atih leh chuan kan nui dun ta hak hak a.

Jam-na tur hmun kan thlen chuan ṭhiante pawh an lo awm vek tawh. Keimah leh Mawitei chiah hmeichhia kan ni a, Mawitei hi chu zai lamah hi chuan tihngaihna awm lo ang chi kha ania zai ve rawh pawh ti mah ila a duh dawn chuang lo tih ka hria, chuvang chuan Microphone chu ka ban nghal nalh a, hla kan thlang kual a, Perfect-Simple Plan aṭangin kan ṭan leh a, ri bur bur chi hlir kan sa a, darkar hnih kan book avangin hla pawh kan thlang kual nasa. Kan jam chhung zawngin Mawitein Video camera in alo la char char a, a tawp hla turah Nicky-a duh angin Starlight ngei chu ka thlang a, Nicky-a hian a duh em avangin helaia awm ho hi chuan a hla hi chu kan thiam vek. Ka zai lai chuan ka sa uluk hle a, thinlung taka ka sak takah chuan, Nicky-a nen kan hun tawn zawng zawng ngaihtuahin ka mittui a hnam hial thei. In hau in, in ti thinrim ve ṭhin mah ila kan inṭhianṭhatna leh kan inhmangaihna hian min phuarkhawm zel se tih hi ka duhthusam a ni a, a ni reng bawk ang.

Kan zai zo a, kut kan beng dar dar a kan tih ziah dan a ni. Mawitein, “Rising Star Tetei chungah kan lawm e,” a tih chuan kan nui dar dar a. Heihi a ni kan ṭhian ho inkawm dan leh Nicky-a nen kan inkungkaihna thuk tak chu. Tleirawl nun kan tem ṭan aṭanga inngaizawng kan ni a, chutih rualin min hretu apiangin kan inzawmna thûk tak inṭhianṭhatna leh hmangaihna hi an hre zel bawk. Nicky-a hming dawtah Tetei tih hi a ri tel ngei ngei ṭhin. Kan khawvel hi a kim hliah hliah a, tumah kan ngai bik lo. Kan hlim a, inhauh chang leh inhnial buai ve rak rak te chu kan nei ve ṭhin mahse kan buaina te hian rei a daih ngailo. Mipa luck tak a ni a, kan rualpui leh keini aia u deuh thlengin an ngaizawng a, tumah hi a be chhe ngailo chungin ka thik tur leh ka thinrimna turin a awm ngai lova kan nitin nunah hian atana ka pawimawh zia hi a tilang mawlh mawlh zawk ṭhin chu anih hi.

Mipa harh zawk zawk a ni ngailo hrim hrim a chutih rualin kei erawh hmeichhe harh lutuk tia sawi ka ni ziah thung. Hlauh em em neilo leh nû hnap ka ni ngailo bawk a, ka ṭawng duhin ka nui ring ṭhin hle a, tleirawl nuih duh hun lai hmang chho mek ka ni ve bawk nen ka nuihna te hi a ho tham thei si a, ka nui nasa ṭhin lutuk hi Nicky-a hian min nuih ve leh chhawng ṭhin. Ka bulah hi chuan a nui nasa ve ṭhin in a hlei ve ṭhin viau a, mahse midang an awm hi chuan a nungchang ngai te bawk hi a pu leh a, kan ṭhian li a kan awm erawh chuan mi ṭawng duh ve tak kan tih ang kha a ni leh tho zel.

Session thar kan tan a, tunah chuan Class10 kan ni ve ta reng mai. Kum tir aṭangin zirtirtu an ṭang nghal em em a, hei chu school zawng zawng tih dan a ni, Matric result hi school hmel pakhat a ni miau a, naupang pawh inthlahdah thei kan nilo. Nitin Period tawpah test a awm ziah a, báng tlai nih duh loh chuan test kan thiam ngei ngei a ngai bawk mahse kartluanin hah mah ila zirtawp ni chawhnu erawh Activities awm ang angah kan tel ve ziah ṭhin a, a nuam pawh kan ti ṭhin hle bawk. Tupawh hi kumtir aṭanga lehkha zir ṭhat ngai kan ni bawk nen Class9 ang ngawt chuan kan harh zawk zawk thei tawh lo. Mahse Break lai erawh chuan kan section chu kan bengchheng ṭhin hle tho.

First term kan exam zo a, second term kan ṭan leh tawh a. Fur pawh a inṭan leh tawh, tlaikhat kan school báng chu Nicky-a ban rawn duk thluah avang chuan ding meuh in ka en sak a, “Giraffe hetiang hian i awm ṭhin em ni? A va’n duk nasa em em?” ka tih chuan, “Umm awm zeuh zeuh mahse a na ngai lova ka ngaipawimawh hran lo,” tiin a kawr ban chu a siamṭha sawk sawk a. Khua a dur deuh avangin kawrlum a bag aṭanga la chhuak in a ha a,
“Pui ruah a sur hmain In thlen tum teh ang.” atih chuan ka bag ah chu ka siam rem a, ka nihliap pawh phawrh awlsam turin ka dah bawk. Kan inpeng lamah hian kan ṭhiante tumah kan school a lut an awm ve loh avangin kan pahnih hian kan haw mai zel a, Ulawma leh Uchhana te pawh ṭha takin Class10 an pass tawh avangin Aizawl lamah school an chhunzawm tawh a, kan test avangin kan báng har a, khua a dur chakin, a lang tlai ruih tawh bawk.

Ruah min nan kan hlauh vang chuan a hma aiin kan kal chak a, mahse in kan thlen hma kawng kualah chuan Nicky chu a ding thut a, ka en chuan a hnar thi zawih zawih chu ka hmu nghal a. Awlsam taka hnar thi ṭhin anih ka hria mahse khawn vang pawh nilova hetianga tam hian a thi ka hre ngai hauhlo. Ka rawmawl chu ka phawrh vat a, a hnarah chu ka hup sak a. A kut lehlamin a rawmawl chu a hum ran a, mit khap miah lovin min melh reng a, nidangah pawh kan in melh fo a mahse tuna a mitmeng hi ka hrethiam lo. Min hmangaihna thuk tak a mitah chuan ka hmu a chutih rualin rilru natna ka hmu tel tlat si a ni. Ka hmuh sual pawh a ni mahna, a mitmeng tluka chhiar theih ka neih ka hrelo a, a mitmenga a thusawi hi ka hre sual ngai heklo, chuvanga mi zingah pawh mitmei ringawt pawh a inbe char char thei kan ni ṭhin. Mahse eng emaw aṭang khan hetiang mitmeng hi min hmuh ta fo a, engvanga rilru nat hmel zeta min melh fo hi nge a nih ka hre lo a ni.

“Pui ka lu a hai.” atih chuan a banah chelh vatin thingkung lamah chuan ka kalpui a, helai hmunah hian kan ṭhu dun fo a, helai hmun ngeiah hian ka pass lawmnan khan min fawp bawk anih kha. Chutia ka ṭhutpui deuh vang vang hnu chuan a zia deuh aniang, “Kal ang le, a reh tawh,” atih chuan kal tur chuan ka tho tharh a, “Thi suk i nei dawn aniang,” tia ka fiam chuan a duh lo ngei mai. Ka banah a piai vak a, a na tia ka au vak chuan min la nuih chiam zui.

Conti…

Leave a Reply