You are currently viewing STARLIGHT – 30 & 31

STARLIGHT – 30 & 31

Spread the love

STARLIGHT – 30

( TETEI POV )

.”Sir Miss khan engmah a tisual lo keima thiamloh a ni…” ka hnung atanga Pekan a tih chuan Zira thinrim la reh bawk silo Peka khawih leh a tum chu ka kut a thip nghal vek,,Tunah khan Midang zawng zawng hmuh in Lalnunzira ka beng a ni….Ka hawi chhuak a,,ka benna tih hriat zeta a biang veilam sen vek ka hmuh rual chuan ka na nghal zawk….A mitmeng a natna leh thinrimna ka hmuh rual chuan mahni inthiamlohna in ka khat a,,ka tah a chhuak tun lehnghal…..Zira a chhuah rual chuan Peka chuan,,”Miss umzui rawh” a tih chuan ngawi rengin ka ding a,,ka chesawn lo…. Eng thil pawi nge kei hian ka tih tak….

Peka hmai a hliam chu Nunu leh Matein an tifai a,, Albert-a erawh a thu ngawi reng thung,, Betty a inhnit hlap hlap a,, Josh-an a thlem in ka hria kei erawh ka ding ngawi reng a,,Peka buaipui ka duh rual in Amah la chuan ka khawih a duh bawk silo,, Lalnunzira ka ngaihtuah chhuak a,, engvanga min ringhlel reng nge anih tih hi ka hrethiam lo a ni…. Khatiang tak khan chet la lo sela ka beng hauh lo tur,,kut ka thawh kha pawi ka tih rualin Amah pawh ka dem tho…. Puitling ber tur anih laiin atthlak taka a rawn che mai kha ka hrethiam theilo a ni…..

Peka hliam an tihfai mawlh mawlh lai chuan ka hmaah rawn ding thut in ka dar tawn tawnah a vuan a,, chiang zet hian min melh khui bawk…. “Te Sir kha umzui rawh,, I thu ka awi ziah a,,ka thuawi ve la vawikhat chauh chu…” awka zaidam taka a tih chuan ka thawhak a,,Betty erawh tap aw tiau in a ngailo alo ti ve thung….Betty lo tawng ve vang chuan Peka nen an inhnial a,,tawng ngaihna ka hrelo,, Albert-a lam ka hawi a,,puihna ka mamawh a ni….. Betty-in a u chetdan a huat vangin kal min phal lova Peka la in engmah in hrelo tiin kal turin min ti thung a,,ka zirlai naupang te an ni meuh mai mahse in lamah chuan ka thiante an ni miau a…..

“Duhtawk rawh u” Albert-an vin ni miah lo mahse thupe aw taka a tih chuan an ngawi nghal thap a,,”Chaw ei phawt teh ang u,,Peka leh Tetei tih loh khan va siam ru” tiin keini pathum erawh Sofa-ah kan thu a,,Peka chuan duh lo viau mahse a hliamah chuan damdawi ka hnawih sak tho…. Thil awmzia Albert-an min zawh chuan sawi dan pawh ka thiam lo,,Peka zawk chuan a hriat sual palh a ni,,”Miss tlu tur hian tihpalh in min pawt a ka inringlo nen ka bawh tlu a chulai chu min rawn hmu alawm…Engmah min zawt lova thusawi a ngaithla duh bawk silova,,ka thiamloh a ni U,,,pawi ka ti keimah vang vek a ni” Peka inthiamlo taka a tawng chuan ka thin a rim thar thut….

“I thiamlohna a awmlo,, Khatiang a rawn che tur a nilo hrim hrim,,engmah hrechiang lova khatiang a ti duh ania….” Ka thinrim em vang chuan ka ngawi daih a,,Ka rilru in engtikah mah Ani nen khan kan inzawm leh tawh ngai lovang a ti mawlh mawlh thung…
Albert-a chuan a thiam ang tawkin mipa rilru tur te chu a sawifiah a,,a bula kal a thil awmzia tal sawi turin min ti bawk,,ka chhang lo na in ka tum lo bur thung….. Chaw ei an siam peih hnu chuan chaw chu kan kil a,,Peka chuan a ei manglo,,A kamsir a thi a,,a mit ko a kak bawk a,, mahni zirlai naupang mai hetiang taka na a akhawih duh hrim hrim pawh hi ka haw takzet…. Naktuk mai kan zin hun a ni tawh si…. Midang hmuhah pawh a kal ngam dawn a mi?? Hetiang hun hi asin an nghahhlel ve em em,,nuam pawn a awm dawnlo anih hi….

Kan mood a chhe hlawm bawk a,, Matei pawh Albert-an a thlah vat a,,Ngawi rengin kan thu thap a,,Nunuin Peka a en leh zeuh thin pawh ka hmu reng,,a nau ania a khawngaih ve hle anih ka rin,,Josh leh Betty erawh choka lamah an awm reng a,, Ka thawmhnaw pawh ka la siam zo lo ania,, Kalloh tum ngawt ila a buaithlak vek dawn mahse Peka a kalloh chuan kal ka tum biklo,,keimah avanga na a tawrh laia kal bik nih ka tum hauh lo…..

“Nunu Peka thawmhnaw ken tur in pack zo tawh em??kan chhuak zing dawn mai sia…” tiin kan boruak thlak tum zet chuan ka ti a,, “Um a thawmhnaw ken tur ang chu ka pack tawh a,,a mutbu hi ni mai pack tur dang chu…” a tih chuan Peka chuan,,”Ka kal dawn lo a ti hmuk a” ka rindan chiah a ni…. “I kallo anih chuan keipawh ka kal bik lovang…” ka tih chuan min huat hmel zet hian min melh a,,a thu ka awiloh avangin Ka lakah a lungawilo tih ka hria…”Miss” a tih vak chuan ngeiawm zetin ka nui sak a,,ka duhdanin ka kal tlang dawn a ni tih hre turin ka duh….A thaw hak a,,Choka lamah a kal nghal daih….Rei awm lovin a rawn chhuak a,,kan lam pawh hawi lovin pawnlamah a chhuak nghal daih….

“Tete i thin ala rim pawh a ni mai thei a,,Peka pawh a lung a awilo pawh a ni mahna,,mahse UZira hian a hmangaih hle che tih ka hria,,Ka nau nen hian in in kawmngeih tih ka hre tho a,,thik loh tur asin ti ngawt mah ila Uzira lam atanga ka thlir chuan a thik pawh hi awm ka ti viau ania,,Uzira lakah insawifiah la ka duh a,, Peka ber pawh in umzui a hrilhfiah tur che in a ti che a,, keipawh in Peka ngaihdan hi ka tawm ania,,” a tih chuan ka thaw hak a,, Peka hian kan inkar tihchhiat a tum ngailo tih hre ber tu tur ania,,mahse atthlak takin a rawn che duh kha mak ka ti hle…..

Betty pawh phurlo zetin a haw a,,Abert-a a rawn let meuh chuan a tlai tawh angreng hle… An unau thumin an haw a,,Peka erawh ala haw lo….Ka call ngat ngat a,,call a pickup duh bawk silo,, A unaute pawn an ngaihtuah tih ka hria…Thil thalo a thleng em lovang chu maw!?

Ka mu lo hrim hrim a,,ka lu a na deuh bur mai….Ka Album chu ka keu leh ta miah lo kha ania,,Ka thawmhnaw leh mutbu tur pawh ka pack fel thlap tawh a,,ka insiam mek a,,ka phurlo khawp mai,,Peka haw thawm ka ngaithla reng a mahse a haw lo nge engmah thawm ka hrelo kha ania,, ka insiam zawh chuan thingpui in in ka thu a,, ka Kawngkhar kik ri ka hriat rualin hawng turin ka kal vat a,, Albert-a a ni….

“I muhil na nge??” ka hmel a hmuh rualin a ti nghal ngawt a,,Ka nuih zeuh ringawt…. “Peka kawtah a inthiar chho tawh aw,,I hman dawn tawh em??”a tih chuan “Um ka hman ni mai….Chahbi hi hawn thla nghal rawh aw,,chuan ei tur vel ka dahna i hriat kha….” tiin ka pindan lamah ka lut nghal a,,Ani pawh rawn lut in ka bedding leh airbag lian ve tak chu a khai chhuak nghal a,,Ka racksack-ah chuan ka mamawh tur chu ka dah lut mawlh mawlh a,,ka chhuak nghal a,,kan bungrua chu Zira Scropio-ah an hlang lut vek chu niin,,Ka duhlo viau na in engmah ka sawilo Anu leh pa te an awm ve tlat a….Peka pawh Lukhum hma thlawk(Cap) khumin a ding run a,,Lalnunzira erawh ka chhoh lai tak chuan a awmlo….Peka mitmeng a min huatna leh a thinrimna saw ka hmuh hmaih lo mahse Lalnunzira laka insawifiah erawh ka tum hauh lo….

Mipa pahnih te chu ka be lo ve ve a,,Ka bungraw load sa lakthlak tumna ka nei lemlo na in a motorah erawh chuan tumna ka neilo,,Josh an an bike pakhat a la chhuak chu an en thap a,,Tawng pawh an tum lo,,A hnungah chuan ka lawn vat a,,tumah in engmah an sawi hmain kan tlanchhuak daih a,,an hrilhhai ve mai mai ang….Thinrim bulah ka chuang dawnlo hi a ni tawp mai…..

College kan thleng a,,Josh chuan nui var var in,,”Miss ka kal ve dawn silova ka haw nghal dawn,,Miss Esi a awm tho” a tih chuan ka bye bye a,,”thil ka lo hawn ang che i duh lo sawi rawh aw” ka tih chuan a lu a bu nghauh a,,a haw lehnghal a,,Esi leh Naupang ho awmna lamah chuan ka kal a,, Bus-ah bungrua an hlang mek a,, Bungrua ka neih loh avangin Esi chuan min zawt sek lehnghal,,ka thlen atanga minute 10 dawnah Zira leh Peka te an lo thleng a,, Naupang pakhat chu tirin ka bungrua la a load ve turin ka ti a,,a bak ka ngaihsak lo….

Bus-ah chuan Esi bulah ka thu a,,thutpui ta che a tih chuan ka hnial ve tlat chhuanlam tur te hi chu awm zel mai,,Peka pawh Emily amah startu Amah ngeiin min hrilh nen chuan an thu tlang a,,en pawh ka en peih lo,,a aiin Lalnunzira ka la haw zawk?? Bus chhungah chuan Zira hriattur pawimawh a sawi a,,A thut hma in Peka chu en zeuh in,,”I awm a nawm loh chuan damdawi ka kawl aw” a tih chuan ka meng awk a,,an lo inbe bik tihna a mi?? Mipa ho mizia hi ka hrethiam lo….Keimah chiah hi a mi lungawilo awm leh tawh zawk,,An pahnih hian hnaih tawh miah lo zawk ila ni mai!

STARLIGHT – 31

( TETEI POV )

Kawng lakah chawlh kan nei zeuh zeuh a,, Chaw ei a ka chhuk bak Bus atangin ka chhuak khat khawp mai…..Peka leh Emily-i te chu kan sirah an thu a,, Tukverh lamah ka thut avangin ka hmu thei lemlo,,Mahse Amah kan lam hnaihah a thu thung… Kan hmaah Zira leh Sir Mawia an thu a,, College naupang kalpui kan ni bawk a kan felfai angreng khawp mai… Chaw kan ei hma te kha chuan Esi nen kan titi ve bawrh bawrh a,,Sangtea chanchin te kan sawi dun a,,kan nui dun leh hak thin,,Sangtea a naupang zawk a,,a zakzum hle bawk,, Esi a zeilo chi alo ni ve bawk nen an awmdan eng eng emaw ka zawt a,,ka nuihpui nasa viau mahse chaw eikham hnuah erawh kan mut a chhuak tlang bawk aniang kan muhil zui a,, Tlailam chaw kan ei dawnah Esin min lo kaitho a,,Reilo te kan titi leh a,,a hma zan lam ka mut that loh vang nge ka lu na ve bawk nen ka muhil lehnghal,,Khua a vawt tawh bawk nen mut a nuam viau a,,Taksa lum nuam zet nghengin ka muhil tih ka hria,,ka harh thei thlawt lo…. Kan bul vela tawng ri nuai nuai avang chuan ka harh hlol a,,pawmlamah chuan ni a chhuak uar tawh tih ka hre mai,, Tukverh zawnah puan an zar tlat avangin ka hmaiah ni in mi em lo mai mai a ni….Ka zi mar talh talh a,,ka bula thu Esi biak tuma ka hawi chu Zira ka hmu thut,,mak ti zet hian ka en a… Biak nachhang pawh ka hrelo,,ka hawikuala,, A tam zawk chu pawnlamah an chhuk tawh tih hriat zetin Bus chhung chu a ruak huai a,,ka hrilhhai.zawk lek lek mai….

Zira pawh chuan min en kur a,,min be bik chuanglo,,eng nge a ngaihtuah tih la hi hriat a har thei si,,en rei duh lovin ka hawisawn hmak a,,Es-in seat hmalam atanga ding meuh a min rawn en in,,”I tho thei maw Sleeping beauty,,i mu tui lutuk a min delh nasa bawk sia ka insawn daih anih kha,,,I tawngvai nasa si….” tiin a nui hak hak a,,a tawng hre pha ho chu an rawn nui dar dar hlawm bawk a,,Chutia min fiam chu keimah anglo zetin ka zak ru chem chem,,Chhang lovin pawnlam ka hawi chhuak a Rail station hnaihah kan awm reng alo ni…..Kum tam tak hnua Damdawi tel lova ka mut hnem ber a ni hial in ka hria…..

Rail-in Goa kan pan a,,a nuam viau mai kan ri ve deuh nak nak a,,Zira nen kan la inbe chuanglo….Zira a ni emaw Peka pawh nise biak tumna ka nei lemlo….Anni ka tawn hmaa ka nundan anga nun leh kha ka duh zawk…..Ka rilru ti na tu mai mai tur lek,, Vanlalpeka pawh ka zirlai naupang mai a ni a,, Nicky-a nen an mizia tam tak a in ang em avanga ngaina ka ni tih pawh phat ka tum lo,,chutih rualin ka zirlai naupang anihna theihngilh khawp in alakah ka lo in ti tlangnel anih ka ring,,Tin,,ka nun dan tih danglam duh in Zira nen a inngaizawng kan ni,,A laka thuk taka luh ka tum apiangin harsatna a thleng ziah bawk,,Tin,,ka thinlungah Nicky a thi tak tak ngai dawn chuang lova chuvang chuan tu lakah mah intat lut lo ila,,tin ka nunah pawh tumah lo lut tawh lo sela tih hi ka duhdan a ni tawh,, bul tan that tih vel hian ka nunah harsatna min siam zawk niin ka hre ta mai….

Buaina leh harsatna em em awm lovin Goa kan thleng a,,Goa leilung ka rah rualin ka mittui a parawl teuh a,,midang min hmuh ka duh loh avangin a rukin ka hru zeuh a,,he hmun ngei hi a ni ka hmangaih em em Nicky Lalmuanzuala nen a hun hnuhnung hlimawm tak kan hman dunna kha …Thil tam tak a danglam tawh tih a khawpui landan mawi zetah chuan ka hre thei,, Naupang hovin thla an la a,,an phul hlut a,,Kei erawh kil khatah dingin Chulai hmun awmdan chu hawikual in ka enkual a,,ka lung a leng thar takzet….

Thla la ve ila kan pali hian Es-in tih chuan nui sakin an lam chu ka hawi a,, Kan pali chuan thla kan la ve a,, naupang ho zawng zawng nen pawh ka la bawk….Kan cham chunga kan kal duhna apianga min hruiatu tur Bus a rawn thlen chuan thawmhnaw chu dah lut in kan thu lut lehnghal a,, Hetianga kal hi chuan hotel changkang takah kan thleng ngai lemlo tih ka hria,,mahse ka kal hmasakah erawh Sir Nitesh-a zarah 3star hotel-ah kan thleng anih kha….Es-i tukverh lamah a thu a,,Naupang ho wow dul avang chuan ka hawi chhuak a,,mak ti zetin ka ang huau ve tho,,, Mizoram chhuahsan hian ka zin ngai em em lo,,exam a ka kal te nih loh chuan ka zin sawi tur ka neilo chuan hetiang taka Hotel ropuiah hian ka la thleng lo bawk,,kan chhuk chuan naupang ho chuan nuam an ti ngei mai,,Khual tha thlen in min lo thleng a,,min hmuaktu pawh hotel hnathawk pawh paruk ngawt an ni…. 5star hotel-a kan thleng tur hi mak ka ti,, Es-i pawn makna ti viau tih ka hria,,hetiang hmuna thleng tur hian kan budget in a pha lo tih kan hrechiang em bawk a ni…..

“Welcome to my hotel” rawn ti tu lam chu kan hawi thap a,,pa sang tha zet khabe hmul zuah buk luih Suit mawi tak inbel kan lama rawn kal chu chik zet hian ka en a,,tu nge anih ka hre lo,, hnathawk ho chuan chibai an buk nghal sap sap bawk….Kan hmazawn a rawn thlen chuan midang ho chu chibai bukin kan cham chhunga nuam ti taka hun hmang turin a ti hlawm a,, Zirtirtu zawng a chibai bawk a,,Ka hmazawn a rawn ding chuan,, “My dear i chau viau nge min hre tawh lo” English mawi zeta tiin a kut chu a kak zawngin a phar chhuak a,,Sir Nitesh-a a ni tih hrilh nawn ka ngailo chiang kher mai… “Sir” ti sapin ka kuah let ve nghal a,,a fanu ang maia min kuah hlu hlu in ka lu ah a fawp zeuh a,,ka hnuk a ulh lek lek…..

Hnathawk ho hnenah chuan kan pindan tura hruai turin a ti a,,Kei erawh min biak a duh thuna sawi thung,,Midang an kal hnu chuan Sir nen chuan a office lamah kan kal thung a,,A office chu a lian takzet a,, kawngkhar kan luhna bulah chuan frame lian tak hi a intar a,,a nupui leh a fate an ni tih ka hrethiam nghal,,fa pawh naupang te te pahnih a nei ve tawh bawk…. Sofa ah chuan tlangnel takin ka thu a,,In tur eng emaw a order a,,ka chauh leh chauh loh min zawt luam bawk a,,

“Sir Zualan min lo call a,,in rawn kal tur thu hi a sawi a” a tih chuan mak ti zetin ka en a,,Sir Zuala daih in engtin nge ka zin tur a hriat a,, ” Nicky-a chanchin ka hriat khan pawi ka ti lutuk a…Heta in awm chhung kha chuan dam taka inhmuh leh kha min tiam a” a ti zawm a,,Sir hian Nicky kha a ngaina tak tak a,,Kan kal hmasak pawh in a duhsak hle anih kha…. “Hetiang taka puitling a ka hmu che hi ka lawm takzet,,chu pawh Nicky tello lehnghal in” a tih chuan nui lui sakin ka lu ka bu nghauh nghauh a,,”Bialpa tha tak i neih avangin ka lawmpui a che” a ti ta daih a,,mak ti angreng taka ka en chuan nelawm zet hian min lo nuih vur vur a,, “Sir engtin nge??” ka tih bah nawk nawk chuan a nui ta huah huah a,,,”Ka nupui nen kan inneih anniversary kan lawm dawn a,,in awm lai anih dawn avangin min telpui ngei ka beisei tlat dawn ania aw…” ti leh in ka pindan ve tur lamah min thlah ta a,,Pindan ka luh rualin Es-in thil awmzia min zawt sek lehnghal……

Zanriah kan ei chuan kan ril a tam tawh hlawm bawk aniang tawng tur pawh kan awm lo,,kei pawh ka ei hnem hle,,kan chaw ei a tui hnai bawk nen,,tumah inhrilh ngai leh hauh ngai kan awmlo bawk a,mahni ei tur ei mial mial a ni mai…. Zirtirtu hovin dawhkan khat kan kil a,, Lalnunzira nen in hma tawnin kan thu a,,ka thil ei erawh vawikhatmah ka hawi chhuak lo,, “Tuman an ei khalh lovang che” nuihza insum aw zeta Ziran a tih chuan ka hawi chhuak a,,an pathum chuan min lo nuih vur vur anih chu…Ka ril a tam ve ni mai a,,bakah thil.ei lai in ka tawng ngai lo tih te chu an hre ve awm tho sia…

“Eng nge??” ka tih chuan Esi chuan nui hak hak in,,”Kha hei in rawh,,i tawng ve miah lova kan titi char char sia…” a tih chuan ka nui zeuh a,,ka chhang lemlo… Ka ei tur ka en leh rual chuan Sa ti chan sa chu ka thlengah Ziran a rawn dah a,,Ka melh zeuh a,, lawmthu sawi loh ka tum zet a mahse ka sawi ta tho…

Zanriah kan ei kham a,, Naupang ho chuan hotel fan an duh avangin hnathawk pakhat chu kan bia a,,Anin min fanpui dawn a,,Ka thawmhnaw ka thlak hnu chuan Esi chuan plan dang a nei tlat a eng nge a hriat ni?? Pindanah chuan ka thu ngawi reng a,,Esi khan pindana awma Alo let hun nghak turin min ti kha ania,,a rei phian lehnghal a,, naupang ho an hmanhmawh awm tehlul nen…..Pindan bang Darthlalang vek atang chuan pawnlam ka en a,, Kawngkhar in hawng ri ka hriat rualin lungawilo zet hian,, “I va rei ve??” tiin ka inhera mahse Esi nilovin Zira alo ding reng a,,Nga ti nge hepa thlah tur a ka rilru ka siam fel apiang hian Amah nena hun eng emaw hman dun tur hi kan neih ziah le????

“Kalpui duhna che ka nei a” a tih chuan ka thaw hak a,, naupang ho an kal vek tawh tih ka hrethiam mai….Ngawi rengin Zira lamah chuan ka kal a,,A incheina chu a inhmeh takzet,, Jacket uk kharh a ha a,,a hnuaiah t-shirt dum a ha a,,cotton jeans dum a ha bawk….A thawmhnaw chu thim viau mahse a ti lang pa viau si a,, Keipawh High waist dum ha in,,Boot ka khup thlengin ka bun a,, Highneck dum ha in a chungah erawh Long coat ka mawng thleng ka ha thung….

Pawnlamah chuan kan inzui chhuak a,,khawiah nge min kalpui a tum ka hrelo mahse ngawi rengin ka zui ve tho….Thu tawp ka sawi ang nge sawi lovang tih erawh ka inngaihtuah nasa viau thung… Lalnunzira hi ka rilru tak takin ka duh tih ka hria,,mahse Nicky-a ka theihngilh lo chunga a bula awm hi dikin ka hrelo a ni… Ka bula a awm a ka thinlung taka hlimna ka neih te hi ka hrelo a nilo mahse ka hlimna duh luat avangin na takin ka siam thei tih ka hre ve tlat si a ni…..Kan inkara ka thu tlukna tur ka hrelo a,,mahse atana tha ber erawh ka hlatsan hi niin ka hre si a,, Kumkhuaa kalsan tura ka ngaihtuah chuan ka ui ru veng veng a,,mahse atana mi tha ber ka nilo tih ka inhriat avangin ka kal tir ngei angai dawn si a,, thinlunga midang dah reng chunga a bula awm tur hian dikna ka neilo a ni…..

A kalna lamah chuan ka kal ve zel a,,a hnung zela ka kal chu a lawm vak lo nge ni a ding thut a,,a rawn hawi let a,,a din avang chuan ka ding ve nghal tho,,ka kutah rawn vuanin,,”Ka rualin kal rawh” a ti sup a,,ka kutah min kai nghal a,,Hotel pawnlamah kan chhuak a,,khua a vawt nghal vur bawk…. “I chau awm sia no kan dawm dun dawn a mi??” tiin a nui vur vur,,a hmaa ka ruih laia ka awmdan ka ngaihtuah chhuak a,,ka zak nghal chem chem nia…..

In kai chung zelin kan kal dun a,,kan thlenna hotel a len em avangin a compound chhung ringawt pawh zau tak a ni…..Ka rin aiin kan kal thui bawk….Bar lian vaklo pakhatah min luhpui a,,Kan thu dun a Intur a lam nghal bawk a,,Beer chauh ka in dawn anih hmel…. “Chaw kan ei tawh sia in vak lovang o” tiin a nui suk a,,A nui hmeltha tak chu hmuh a nuam takzet…. A awmdan hrim hrim hi a mood a that hmel tawp a,,he a mood tha zet hi tih chhiatsak tu nih ka duh biklo…..Zaninah chuan sawi lo mai teh ang….

Beer pawh chu ka in tam lo,,Zira nen chuan buaina neilo ang mai in kan titi a,,thil.tam tak kan sawi dun a,,Goa ka kal tawh thu.ka sawi chuan mak a ti lemlo,,Goa kan kal hmasak a kan awmdan leh kan kalna hmun vel te pawh ka sawi ve nual a,,Zing lamah thawh hma kan ngaih avangin kan haw ta vat a,,Haw lamah erawh Car in min lo lam a,,Car chhunga ka kut a chelh tlat chu laksawn ka tum bik lo…..

“Lalnunzir ka tan hian i sang mah mah a ni tih hi a hma daih khan lo hre tur ka ni asin,,ka laka i thikthu chhiat zia hre reng chung hian Nicky-a ka thiklo i ti tlat hi ka awi i ring em ni??? Ka tihpalh aw,,keima vangin i thinrim in i na thin si a….Keimah hian ka kalsan ang che….Ka vanga thinrim tawh ngailo turin ka duh che,,,Ka duh che mahse Nicky-a kha ka hmangaih a ni miau si a,,Ka theihngilh theilo a ni…..”

Ka rilru chuan ka ti a,,ka tawt up up mahse chu erawh tih lan ka tum lo…..Kan zin chhung na na na chuan a thinrimna hi thlen loh hram ka duh a ni…..

Kan pindan ka thlen chuan a tlai tawh angreng viau,,Kan Kawngkhar zawnah kan ding dun a”Tui deuh in mu rawh aw” tiin ka chalah a fawp vang vang a,,a hmui in ka chal a deh chhung zawng chuan ka thaw lo hialin ka hria…. “Nangpawh le” tiin kan pindan chhungah chuan ka lut nghal a,,Ka lungphu ri dup dup chu dawm vang vangin,, Zira ka duhna leh keimah ka inthiamlohna avang chuan ka mittui chu a rawn luang thla nghal ngiai ngiai a…..

Conti….

Leave a Reply