You are currently viewing STARLIGHT – 4

STARLIGHT – 4

Spread the love

STARLIGHT -4

JONSMELY BAWITLUNG

Lehkha zir turin zanah an inah ka kal a, a chhan pawh vawiin lama a awmdan a avang khan ka ngaihtuah ve deuh bawk a. Dar9:00p.m a rik chuan chhunlama kan zir sa chu kan thiam bel viau tawh. Keiin ka chhiar rin laiin Ani erawh Khumah ṭhuin a ke a thluang a, ngawirengin a text bu a chhiar a, note te hi a by heart ve ngailo nge ni, a note hi a chhiar ngai pawh ka hrelo. Note zir ve rawh ka tih chang hian a text-ah a aia chiang in a awm alawm a ti ziah lehnghal a, a zir pawh ka hre ngai lo. Class 10 em emah te hi chuan note hi zir ve se ka ti ṭhin, tun ai hian a tih ṭhat phah daih awm si a.

“Pui, nang ai hian thi hmasa ta ila engtin nge i awm ang?” Lehkha kan zir laklawh laia Nicky-an min zawh thut avang chuan ka ngawi chiang kher mai, a zawhna ber kher chu ka huat zawng tak a ni. Vawiin lama thil thleng kha ka rilruah rawn lang nghal zat bawk a, “Lalmuanzual khatiang kha vawikhat mah min zawt tawh suh,” ka ti vin hlar a. Ka rilruah hian eng nge awm ber pawh ka hrelo mahse ka ṭah a chhuak em em ringawt. Ka hmel awmdan in a zir viau aniang a nui suk a, khum bul chhuatah ka ṭhu a, dawhkan hniam teah chuan ka zirlai bu a awm nuai bawk a. Khum aṭang chuan rawn chhukin, a awmah min kuah bêt a, ka luah a chul hliau hliau a, ka mittui a rawn far ringawt nia. “Vawikhatmah thih thu sawi tawh suh, I thi nih chuan ka thi ve nghal ang.” ṭah insum zet chuan ka ti chhuak ṭiau a, ngawirengin min kuah a, a insawi dalh dalh bawk a. Chu chuan ka mut a ti chhuak leh daih tawh.

Zing ni chhuak chuan ka hmai a rawn chhun chiang em avangin ka meng siar siar a, ka hawi kual chuan ka awmna chu ka room a nilo tih ka hre nghal. Nizan khan Nicky-an min awi mu ringawt anih ka ring. Ka bulah a mu ve em tih hriat tumin ka inlet tharh a, lukham khuar duk ka hmuh chuan ka khi sak a, mipat hmeichhiatna lam hawi in kan in en ngai lova, chutiang chuan ti tur chuan kan chhungte pawh in min ring heklo. Kei aiin Nicky hi an ring zawk tih ka hria,vchuvang chuan hetia hun fal kan neih emaw a rawn riah chang pawh in ringhlelna ṭawngkam kan dawng ngai lova, mitmeng hmuh hrehawm la kan hmu ngai heklo. Tin, kan kum ala nau bawk a, kan chhungte hian min la ring tawk viau a ni. Kan puitling hunah erawh nupa kan nih hma chu khum khat kan inṭawm tawh bik kher nang.

Inhnuai lamah ka chhuk a, nutei’in thingpui a siam chu banin chhang nen chuan ka in a, “Bawihi i mu tui em?” atih chuan nui var var in, ka lu ka bu nghauh a, Nicky-a chu sawi ngai lovin a walk tih ka hria. Patea pawh rawn tho ve in Nutei nen chuan an ti ti a, an nuihna karah chuan ka lo nui ve var var zel a. Hetianga nupa hlim tak nih hi ka duhthusam a ni a, Nicky-a nen kan nih phawt chuan hei ai pawh hian kan hlim dawn tih ka chiang.

Kan pathum a kan ṭhut lai chuan Nicky-a chu a rawn lut a, ka lo nuih nghal var var bawk. Nathan-a a rawn lut ve nghal a mahse engmah sawi lovin a pindan lamah a lut nghal daih. A awmdan chu kei chauh nilo nutei leh patea te pawh a ti hrilhhai viau a ni. Khatiang khan a awm ngai miau lova. Nicky-a nen an inhau aniang ti dawn ila an inhauh ka hre ngai silo, Nicky-a chu kan en ṭhap a, Ani la chuan thingpui a in a, kan en a ni tih a hrelo der hmak thung.

School kal angaih avangin in lamah ka haw a, mahse zing kara Nathan-a awmdan khan ka rilru a luah reng mai. Khatianga hmel hlim lova a awm kha ka hmu ngai miau lo a ni. Nicky-a nen an inkarah eng emaw tak a thleng anih ka ring ve ringawt. Amah phei chu engmah ka zawt lova, mahse ka ngaih erawh a ṭha tehchiam lo. Cycle keng ang a tih tlat avangin cycle nen class kan kal a. A vun eng thar riau hian a ti lang ṭha phian lehnghal a, amah ngo vur chi a nilova, mahse tuna a landan hi chu a var lek lek. Vitamin te hi a tlachham reuh zawk em ni le?

“Giraffe tunlai chu i ngo e, i var mah mah ania aw.” kan class báng ka tih chuan, a nui ringawt a, min chhan pawh a tùm lehpek lo aniang, min kalsan nghal nul nul nia. A ban vel a duk leh thluah tawh a, hetianga a duk ringawt zel hi engtik aṭanga in ṭan nge ka hrelo na in tun hnai hian a zual nge ni, ka hmu zing tawp.

“Hmelṭha min tih vang anih chiah chu.” rawn hawi let miah lova a tih chuan min hmu miah lo mahse ka ner khum chiam a, “Khatin ner vak vak ṭhin suh,” tia a nui ri hawk ka hriat rualin rang takin ka umzui a, a nui hmel ka hmuh hian ka hlimna hi a zual ṭhin reng a ni.

“Enteh hei i kut a duk leh tawh, i ban pawh a duk leh hrim hrim ang,” tia a bân ka vawnna ka lek kang sak chuan, “A ho emai.” tih chiah in min chhang a, a ngaih la hi a säm si, sawi chiam dawn mah ila a sawi zawm duh der silo a, ka en liam ve tawp anih hi. In kan thlen chuan kan inah lut hmasa lovin an inah kan lut a. Nutei ka hmuh chuan Nicky-a ban duk ṭhin chu ka sawi a, Nicky-a chu a melh deuh vang vang a, min chhan mai loh avangin, ngaihṭha vaklo hian, “Ka haw dawn.” tiin ka chhuak nghal daih a, an awmdan kha ni dang a ang lo em a awm ve reng pawh nuam ka tih chiah loh vang a ni.

Angai te bawka lehkha zir leh tlawk tlawk a ni mai. November thlaah school in a tih ziah angin Class10 ho excursion in min kalpui dawn a, kan phur viau rualin, Board Exam hmachhawn tur kan nih avangin zirna lamah kan ṭang hle a. Zin dawn hnaihah Nicky-a la hi nuamsam lo hi a ti deuh reng a, Nathan leh Jeff la an hmel ka hmuh ve hian an ngui thei em em a, ka bulah hian an awm duh miah lo bawk a. Kan chhungte pawh hi tunhnai bik hi chu eng nge an hriat ni Chaw hi kan eikhawm mawlh mawlh reng zel lehnghal a, a nawm viau rualin, kan chhungte awmdan hi a mak tih bak loh chuan sawi dan ka thiam lo. Nicky-a bula ka sawi la hian i ngaihbel mai mai aniang a ti zel bawk si a, sawi pawh ka sawi peih tawh lo. Usawmzuala leh U Robert-a te pawh chawlh an neih hlek chuan an lo haw ziah lehnghal a, an lo haw tawh chuan Nicky-a nen an awm ho reng zel a, kei erawh nidang anglo zetin Nutei emaw ka nu in min ko hrang ziah lehnghal.

Tun hma kha an anglo an nui hmel te hi a lem vek ni mai a hriat chang la ka ngah. A chang chuan Nicky-a sawi angin ka zeldin kual vel mai mai ni te in ka ngai ve ṭhin a, mahse Nutei nu hlim thei tak a lungngai hmel ka hmuh ngailoh hi a hmel hlim lo leh na hmel hi a rukin ka hmu fo tlat a ni. Chutiang bawk in ka nu pawh, Nutei hlimlo nia ka hriatna te ka hrilh chang hian ngaihven duh lovin i hriat sual aniang a ti tlat zel a, min biak rei hlau in min pehhel fo zel hi ka hrethiam lo takzet.

November a ni a, excursion kal lamin kan rilru a luah viau tawh a ni. South India lama kal tur a ni a, Nicky-an kalloh a rawt zet a mahse ka chak em avangin kan kal dawn a, ka phur lutuk hi awm dan ka thiam leh tawh lo. Ka thil tih tur ka suangtuah lawk in ka sawi lawk chiam chiam a, Nicky-a hi chuan min nuih mai mai zel, “I duh apiang ka tih pui ang che, i nui hmel ka hmuhna tur anih phawt chuan,” a ti a, chu ringawt pawh chuan ka thinlung chhungril hlimna a thlen si a. Ka nui hmel hmu reng duhtu ka nei hi mi vannei tak ka ni a, ka vanneih zia hi nitin thiltih hmanga hriat nawn tir ka ni fo ṭhin si a.

Inrini zing a ni a, tukṭhuan kan kil a, kan zinnan Ni 2 chiah a awm tawh. Excursion kan kalna turin deposite thlengin kan tifel tawh a, Thawhṭan ni zinga chhuak tawh tur kan nih avangin ka thawmhnaw siam tur vel ka ngaihtuah lai a ka pa thusawi chuan ka thin a ti rim takzet. “Khua a vawt tawh si a, damloh te a hlauhawm emai in zin tur chu ṭhulh leh mai rawh.” a tih chuan ka chaw ei ṭhulh meuh in ka pa chu ka en a, ka nu ka en leh chuan engmah sawi a tumlo tih ka hria. Ka pa in a sawi anih chuan ka kal theilo tihna a ni.

Ka thinrim bawk si chu mittui tling piau in ka chaw thleng nen ka tho nghal hmak a. Ka pindanah ka lut nghal a, ka airbag ka dah chhuah sa leh ka thawmhnaw tlem ka dah tawh chu thinrim zetin ka la lawk a ka paih darh nghal a, tunah tak hi chuan tih takzetin ka rilru a na a, ka rilru na leh thinrimna inmûng khawm tup tup hi tireh dan ka thiam lo, eng emaw tala hrikthlak ka duh ber. Ka thawmhnaw darh nuai chu melh ngawt ngawtin ka ṭah chhuak lutuk chu khumah ka mu nghal hmak. Ka kawngkhar inkik ri pawh hrelo ang hmakin ka mu kawm ngal a, tupawh nise ka hmu peih lo.

Kawngkhar a rawn in hawng a, rang takin ka puan sin lai chuan ka lu ka khuh nghal hmiah a, a phun hluk ri ka hriat chuan Nicky-a a ni tih ka hria, a che ri rak rak a, eng nge a tih? tih hriat tumin ka puan chu ka keu ru a, ka thawmhnaw eng eng emaw chu airbag-ah chuan a rem mawlh mawlh a, eng nge a hriat lehpek ni. Ka inkhuhna chu ka hawng a, khum aṭang chuan tho in Nicky-a ken lai ka kekawr chu ka pawtthla nghal pawp a, ka chetdan avang chuan min melh zawk a, a nui nghal var var a, tun dinhmunah hi chuan a nui hmel pawh hi ka haw vek. “Engvangin nge ka thawmhnaw i khawih?” vin zeta tiin ka thawmhnaw a khung fel sa chu ka la chhuak leh hmawk hmawk a, chutia ka chet buan buan lai chuan ka kutah chelh in, “Pui duhtawk rawh,” a ti zawi sup a, a ṭawng chhuak zaidam lutuk chuan ka hnuk a ti ulh a, ka mittui a far fap rualin, a awmah min kuah bët a, ka ṭap chu a ni leh reng tawh. Ka samah a chul hliau hliau a engmah a sawi lo thung.

Ka duhtawka ka ṭah hnu chuan inla hrang in khum lamah chuan zawi zetin ka pen hnak hnak a, thatchhe zetin khumah chuan ka mu lehnghal thlawp a, ka bulah chuan rawn ṭhingṭhiin a lam hawi turin min ti a, “Mate ṭap tawh suh ka tih che kha, I ṭah chuan helai hi a na ṭhin?” tiin a lung awmna zawn chu a kawk zeuh a. Ka kut chu la in, a awmah chuan a dah a, “Nupuii’n min hrilh a, Pa puia pawh ka dil vek tawh kan kal dawn chuvang chuan ṭap tawh lo la aw, insiam ang. Ka thawmhnaw pawh min siam pui ve angai dawn nia, mut bu erawh kan tel ho dawn a, Mawitei leh Joseph-a te rawn kal hunah kan siam dawn nia um.” min thlem ti tiha a tih chuan mit khap miah lovin ka en tawp ringawt. Eng emaw tal sawi ka duh mahse ka ṭawng chhuak theilo, ka lawm viau rualin ka pa chungah ka la lungawi miau lo a ni.

Engvanga hun tep ter lutuk tawh a kal phallo thut nge anih? Ka rilru a na dawn tih pawh a ngaihtuah ve lo zawk nge? Ka thawmhnaw kan siam zawh chuan ngawirengin ka pindan aṭang chuan kan inzui chhuak a, Mawitei te an rawn kal hnu chuan keini kan bedding te siam in Nicky-a te inah kan awm ta reng a. Ka tih tauh avangin zanah pawh ka haw lo, ka riak lehnghal tawp ringawt. A pindanah hla ngaithla pah in kan hmalam hun atana ka duhthusam ka sawi siam siam leh tawh. Nicky-a pawh a tih dan ngai te in a khumah a ṭhu thluang leh zar tawh a, Kei erawh a khum bula chhuatah ka ṭhu a, ka kal apianga ka hman ṭhin dawhkan tê chu ka hmaah dah in ka bawh ar ar bawk. Zanin chu Starlight ngaithla lovin Westlife hla Unbreakable ka play a, a pass lawmnana kum hmasa lama apa in Computer a leisak hi keini pahnih hla ngaihthlàk na hi a ni ringawt. A hma kha chuan DVD player a kawl ṭhin a, woofers a fit a, hla ngah viau mah ila a disc lei zel a ngaih ṭhin avang khan a buaithlâk ve ṭhin viau a, tunah erawh Ama room ngeiah computer a hung tawh a, nuam pawh kan ti viau zel a ni. Apa Aizawl kalin a rawn hawn sak zana kan hlim zia te kha. Zankhua deuh thaw in kan ṭhutchilh anih kha. Midangin min peih loh san hnuah pawh eng eng emaw en kual in kan buaipui a nuam kan ti hle a, Nuteiin mu turin min rawn hrilh a ngai hial reng a.

Westlife hla hi ngaina lo chu a nilo mahse a aia ngainat a ngah avang leh kan awm tlan a ka hla duhzawng hlir ka play avang hian a hla duhzawng ka thlan tir ve fo a, a ngaihtuah nasa ve ṭhin hle a, tunah pawh a ning vat ka rin avangin, “Muan eng hla nge i duh?” tia ka hawi chu Nicky-a chu khumah a saisir zawnga mu in, thlan in a bual huh vek a, a kut a hum ruh a, a hmui a seh ngar ngar bawk, na a nei tih sawi ngai lovin ka hrethiam nghal. Engtia rei nge hetiang hian a lo awm tawh? Engtin nge ka hriat miah loh theih zawk? Ka ṭhutna aṭang chuan ding vatin, “Muana, Nicky, i eng nge na?” tiin ka zawt a, ka hlauhthâwn em avang chuan eng ber nge tih tur ka hrelo, min chhang thei bawk lo, ka mangang lutuk chu pindan atang chuan tlan chhuak vatin Nutei te pindan lam chu ka pan a, an kawngkhar chu ka beng nghal dawt dawt a, rang takin Patea zawk chuan Kawngkhar a rawn hawng a, ka hmel a hmuh rual chuan ka sawi hma in Nicky-a pindan lamah chuan a tlan nghal vat a, Nutei chuan min rawn dawm vatin, Nicky-a pindan lamah chuan min luhpui ve nghal a.

Kan thawm hria in Nathan pawh a pindan aṭangin hmanhmawh zetin a rawn chhuak ve a, Nicky-a room kan luh chuan Patea chu kawng dawmin alo ding a, Nutein thil awmzia a zawh chuan min melh zawk a, “A pum a na nih kha, damdawi ka pe a Toilet-ah a kal a,” awki hniam ruih a, a tih chuan ka thaw deuh huai a, a awmdan teh hrep khan min ti hlauthawng em bawk a ni. Toilet aṭanga Nicky-a rawn chhuak chu Nutei chuan a be vat a, “Nu ka ṭha tawh alawm. Ka pum a nuam lo a, Puii kha a hlauthawng mai mai anih kha.” a ti zawi sap a. Keipawh chuan a ṭhat tak tak leh tak tak loh ka lo zawt ve bawk a. Amah Nicky-a berin ka ṭha tawh a tih miau avangin Nutei chuan rilru nawm loh hmel zeta Nicky-a chu melhin Nathana nen chuan pindan aṭang chuan an chhuak ta a. Patea chhuak ve tur chuan ka kutah damdawi mum hi min pe in, “Tete pumna a nei leh anih chuan hei hi i ei tir dawn nia aw.” atih chuan, “Awle,” tiin lu ka bu nghauh a, Ani pawh pindan aṭang chuan a chhuak zui ve ta a.

“Giraffe khatiang a pumna i neih te chuan min hrilh vat tur che lawm.” tiin khumah chuan ka lawn ve a, ka kham theih turin a ban alo siam rem nghal vat bawk.
“Ka ko reng che a i ṭawng tui lutuk a i hrelo anih kha.” tiin a nui lui a. A hmel ka en chian chuan a dang deuh bai in ka hria. “Toilet ah khan eng nge i tih a?” melh chho ha a ka tih leh chuan, “Toilet-ah hian eng nge an tih ṭhin?” tia min chhan chuan ka nui nghal hak hak a, Ani pawh a nui ve tho. “Muhil tawh ang le ka naute,” tia insiam remin ka samah a hmai a phum a, ka rilru in min koh dan thar a nei leh ta ka lo ti hmanhmawh. “Naute ka nilo aw.” ka tih hmuk chuan a nui nghawr dawt a, “Ka naute duat, ka hauh phalloh ka ṭhiannu em em leh ka Hmangaih nu i nih hi. Ka mate, ka elephant duhawm te, ka a pui duat.” a ti leh duah a. A thusawi avang chuan Amah pawh a nuih a za ve tih ka hria keipawh ka nui var var tho. “Ka hmangaih che Ka naute.” a tih zawm leh a, ka ngawi kur thung. Kan inngaihzawn hnu hian ka hmangaih thu hi ka sawi ta ngai miah lo, ka zak thar tlat a.

“Min hmangaih thu hi sawi ve ṭhin rawh, a hma pawn i sawi ziah a tunah hian i sawi duh tawh miah lo.” Vui aw zeta a tih chuan nui var var chungin ka aw ka thian a, “Ka best friend leh ka unaupa, ka Muan Hmelṭhaa leh ka giraffe sang em em pa ka hmangaih tep che.” ka tih chuan a lu kân vutin hnai set sawtah min melh ran a, ka lo nui hak hak thung. “Misualnu,” ti hmukin a awmdan ngai chiah in a awm lehnghal a, ka nuih a za tulh tulh thung. Ka nuih ring deuh chuan, “Zan a tlai tawh muhil rawh, I bengchheng,” a ti leh hmuk a, nui khur dar dar chungin a awm lohna lamah saisirin ka mit ka chhing zui nghal daih.

Chaw kan ei khawm dawn avangin kan buai laih laih a, ka pa nen pawh kan inbe nui leh var var tawh. Ka nu leh nutei’n eirawng an bawl a, Nathan-a leh Jeff erawh pindanah Chess an khel a. Ka pa leh Patea pawh in Tv en in eng eng emaw an sawi a, mahse khawiah nge Nicky-a hi a awm le ka la hmu ve miah lo. Chokaah kalin zawh bik pawh nei lovin, “Khawiah nge Muaneka hi a awm?” ka tih chuan nutei chuan, “A awm reng lo em ni? Nichin chuan a tei a tei kha,” tiin min chhang a. Choka chu chhuahsan in Ka pa te awmna ṭhutkhawmna pindan lamah chuan ka kal leh a, mahse ka hmu chuang lo. Pindan lamah a awm ve ringin inchung lamah ka chho a, Jeff-a pindana ka luh pawh chuan a awm chuang lo, ka pindan lamah a awm nih ringin ka en leh a, mahse ka hmu chuang silo chu chawp leh chilhin manganna in min tuam nghal a, “khawiah tak kal ang maw?” tia phun bai baiin in hnuai lama chhukin pawn lamah ka chhuak a, chuta ka thil hmuh avang chuan hmanhmawh takin ka tlan nghal a, Nicky-a chu kan tual zawl zau laiah chuan bawkkhup zawng hian alo tlu anih chu.

A bul ka thlen chuan ka au vak vak a, a hmai vel chu thisenin a bual khat vek a, inchhung lama ka chhungte chu ka au chul bawk. Hmanhmawh zeta an rawn tlanchhuah lai te chuan ka ṭap pur a, ka mittui tla nasa lutuk avang chuan engkim chu ka hmu phe vek. Ka bul an lo thlen chuan an ding tawp a, kan chhungte chuan engmah ti lovin khawngaih hmel zet hian min lo en ringawt anih chu. “Damdawiin ah kal ang u,” tia ka ṭah chiam lai chuan patea chuan ka darah a kut a nghat in, a mitmeng a tawrhna nasa tak chu chiang zetin ka hmu thei A sawi tum pawh chiang takin ka hria, “Aih nilo, ka phal lo, a ni thei lo, min kalsan suh, ka phallo, kal suh,” tia ka ṭah vak vak lai chuan tu emaw ni hian min rawn sawi vak vak a,bka meng nghal kawk a, ka hawi â nghal ruai mai. Nicky-an mangang hmel zeta min en ka hmuh chuan kha thil thleng kha ka mumang a ni tih ka hrethiam ve chiah, ka mumang a ni tih hre tho mah ila ka rilru natna leh ka awm tawt up up kha keimahah ala cham a, engmah sawi lovin Nicky-a chu pawm thlawp in ka ṭap nghal hlawp hlawp ringawt. Ani hian min thihsan ka duhlo a, ka duh ngai hek lovang.

“Mate mangchhia i nei nih kha, ṭap tawh suh le.” a aw zaidam zet chuan tiin ka samah chuan a chul hliau hliau a, ka ṭap zo theilo, ka mittui luang nasa lutuk te chu tih tawp duh mah ila ka theilo. Ka hmangaih hi chan ka duh reng reng lo. Duhtawka ka ṭah hnu chuan khumah min mut ṭhat tir a, saisir zawng a ka mu chu ka hnunglam aṭangin min kuah a, “Nicky” ka tih sap chuan, “Um eng nge i mumangah chuan i hmuh a?” tiin min zawt nghal vat a. Ka sawi hreh a ni, a chhan pawh ka chhungrilah hi min ti na tlat a.

“Ka mumangah min thihsan a,” ka tih chuan ka hnuk a ulh leh nghal ringawt tawh. “Umm” tih chiah in min chhang, “Ka ṭap nasa lutuk a,” ka tih leh chuan, “Anih kha, i ṭap chhuak a, ka sawi vak vak che a i harh thei lawk silova ka mangang hman alawm,” a tih chuan, ka ngawi reng a, sawi zawm ka chak tawh lo. Ka rilru ka kawm a, in thihsan lam chu ka ngaihtuah zawm duh tawh lo, kan la naupang a rei tak kan dam dun dawn alawm tiin ka ngaihtuah a, mutchhuak in min rawn zem chiai chiai a, Nicky-an, “Mate tia min ko ri te chu ka mang hriat rei ruai chauh a ni.

Zing ka harh chuan ni alo lang uar tawh, ka mit a kham rüm a, ka mitmeng tawh chu ka chhing ṭha leh a, ka mit chu chhing deuh vang vang in ka meng ṭha leh a, thawh tuma puan ka hlim rual chuan ka pum zawna min delh tu chu ka hre nghal. Ehe! hepa hi thawh a hai ve em ni? Nge ni a alo mu ṭha leh zawk? Bawkkhupa a muhil hmel chu ka en vang vang a, hetiang taka hmelṭhaa Pathian in a siam bik hi ava han vannei tak, a bialnu ka ni thei hi Ani aiin ka la vannei zawk si a. Ka ngaihtuahna avang chuan ka nui nghal var var a, “Thawh hlima hmuh atan chuan duhthusam i ni” ka ti nghal sap a.

“Tuna i sawi tak kha han sawi nawn leh teh?” Meng chuang miah lo hian a rawn ti a, ka phu zawk nghe nghe, “Hmela i muhil der a ni maw?” ka tih chuan a mit chu rawn meng diar diar in min rawn nuih suk a, khumah chuan rang zetin min kuai tlu lehnghal. “Hey” ring zeta ka tih chuan ka kâ hup in, “I bengchheng thei lutuk.” a ti zawm nghal zat a, ka kâ a hupna kut chu a la sawn nghal bawk. “Nge mi pawh tluk kher?” ka ti nghal hlak a, ka awmdan ka siamrem nghal sat sat bawk.

“Nang hi lawm thawh hlima hmuh atana ṭha ber zawk chu, hmelṭha nu. Khawvel mi zawng zawng hian hmelchhia pawh ti che mahse ka tan chuan nang aia ṭha an awm lo.” tiin a mit min siai zeuh a, a awmdan avang chuan nui ri hakin ka ner kual vel a, hawisawn tuma ka chesawn chu rang zeta ka lu lo dawm in min rawn fawp a, chhan let tuma ka hmui ka tih chet rualin ha ka la nawt lo tih hrechhuak zawk in, ka nem nghal dawt, ka chetdan avang chuan inla hrang vatin mak ti zetin min en a, ka hmui hup chung hian, “Ha ka la nawt hleinem,” ka tih chuan a nui nghal var var a, a ha ui ngho zum zet chu chiang zetin a rawn lang a, vampire a ang takzet mahse a inhmeh takzet si a.

Khum aṭanga ka thawh chuan, ‘A ho e, ka fawh fai vek tawh kha.” a tih chuan ten hmel zet hian ka uak der nghal zat a, bathroom-ah ka lut nghal daih. Ka ngaihtuah chiang a ka uak hrep lo chauh a ni. Ṭawp lutuk mai ti a phun nang nangin toothbrush chu ka la chhuak a. Nicky-a bathroom-ah hian ha nawhna ka dah thlap a, Ani pawn a dah ve tho a. Ani phei chuan a spare thlengin a dah vek. Ka ha chu uluk tawkin rei zet ka nawt a, ka hmai phihin bathroom aṭang chuan ka chhuak a, Nicky-a alo awm tawh hauh lo.

Inhnuai a ka chhuk chuan chaw eina dawhkan bawhin alo ṭhu a, nutein eirawngbawl mawlh mawlh chung chuan zawi deuh sap hian Nicky-a chu thu a hrilh mawlh mawlh a, an bul ka thlen chuan Nicky-a chuan thingpui leh chhang min lo chhawp vat a, ngawi rengin ka in a, nutei erawh an bul ka thlen khan a thusawi a thlak daih. “Muan inah ka thawmhnaw min va lak?” Thingpui no seng paha ka tih chuan, a ner sawk a, hetia a awm chuan a lungawi vaklo tihna a ni. “Haw rawh, inkhawm turin ka lo sawm ang che, naktukah kan kal dawn a, hetia tih tauh hi a ṭangkai lo, i duh chuan keiman ka lo haw pui ang che.” zaidam zeta atih chuan, ka tüm nghal bur ringawt.

Nutei pawh in haw tura min tih ve avang chuan hreh zet chuan kan in lam kan pan a, Inchhung kan luh chuan ka nu in rawng a lo bawl mek a, Nicky-a chuan a be nghal bawrh bawrh a kei erawh ka pindan lamah ka kal nghal daih. Chawlhni zingah hi chuan in tihfel vel hi a ngai em em lova, nidangah erawh nula a langa kal kan nei a ka nu nen in chhungah an che mai ṭhin,ba chang chuan ka puih ve ṭhin tho a, mahse mipa awm hian ka awm ve bawk a, inchhung chet leh rawngbawl vel hi chu ka tui tehchiam lo, ka ti vak ngailo, thiamlo erawh ka ni miah lo.

Bathroom-ah lutin ka inbual a, Ka inbual zo towel chauh venga ka chhuak chu Nicky-a ka khumah a lo ṭhu thluang leh zarh tawh. Ka towel ven a chhing bawk nen ka lai ru deuh ṭut lehnghal a. Ka lai tih a hria a min tilui leh zawk nge, mit khap miah lovin min en a, “Chhuak teh ka inthlak duh.” ka tih pawh chuan a chesawn duh hauh lo nia. “Lalmuanzual i mit kha ka kher chhuah i duh loh chuan hmun dang melh rawh,” vin deuh hlara ka tih chuan a nui suk a, khum aṭang chuan rawn tho chhuak in ka lamah a rawn kal a, a chetdan chuan min ti buai zo vek nia. “Hei rawn kal suh eng nge i hriat a, thawmhnaw ka ha lo tih i hmu ve reng lo em ni? I mit kha chhing rawh, I hur lutuk,” Ka ti nghal chul a, ka ṭawng ring lutuk ngam bawk silo,bmin melh dan ka ngei bawk si chuan tlanchhiat tuma ka in her chu chhuatah mawng hung meuhin ka ṭhu nghal hnawk. Ka mawng chu ka dawm nghal vat a, ka ngum ka sawh tih ka hria, ka nuih a za lova ka ṭah a chhuak zawk. Ka mawng na zet avang chuan thawh pawh tum ila ka tho thei teuh lo.

“Mate i ṭha em?” Min ngaihtuah hmel zet leh nuih insum tak hmel pu a ka bula a rawn ṭhut chuan ka lo melh rüm al a, “Nangmah vang vek,” tiin ka nem sawn dawr a, min nuih chak tih hriat lutuk a ahmui a hup vel chu ka haw lutuk. “Lalmuanzual i chak dawn lo.” ṭhingṭhi chunga ti leh in, ban tuma ka kut ka lek chhuak chu a tawlh sawn zeuh a, tum loh deuh in chhuatah chuan ka bawk lehnghal thlawp a, ka âwm in chhuat a deh rual chuan ka hnute zawn na lutuk avang chuan ka au chhuak ṭhawt a, ka au chhuah ruala nui ri hawk hawk chu thinrim lutuk hian ka melh chho a, “Lalmuanzual mi chimawmpa,” tia ka tho chu lei min rawn chhuah zuk nia, hepa nghal dan em em hi chu.

Dingchhuak in ka melh khai khai a, phawk fe hian mit khap hauh lovin min melh thung. A mitmeng danglam ka hmuh chuan ka kún zawk a, kekawrte nen ka lo ding chauh ka lo ding chu niin, ‘Awi’ tih bak ka sawi tawh lo ka zak lutuk chu ka inher vat a ka hnungchhawn tawp. Chetsawn nachhang pawh ka hrelo, ngati nge vawiin ni hi ka chet chhiat em em le? Ka hnunga pen ri pawh chu ka hria mahse ka chesawn ngam tawh lo ka zak takzet khatiang a chiang a in hmuh chu zah lohna chi pawh ni nghal lo chuan, kekawrte tal ka lo ha hman chu a tih zia viau a ni.

Ka hnunglam atang chuan towel hian min rawn khuh a, ka darah a kut pakhata min rawn kuah in lehlamin ka ban zawnah min rawn pawm bawk, “Inalh zia hi ka hrilh tawh che em?” ka beng bulah a rawn ti sap a, a ṭawngkam hman tlem te chuan ka chhungril min fan raih raih thei nia. “Inthlak rawh, inhnuaiah chaw ei turin kan nghak che ania,” tiin ka taksa aṭang chuan inla hrangin pindan chu a chhuahsan nghal a. Kawngkhar a khar riah chuan ka thaw nghal hawk thei. Inbual zo chiah mah ila lüm tih avângin ka thlan a sa bat bat thei, kan awmdan kha ngaihtuah zawm duh lovin ka in hru hul mawlh mawlh a, inkhawm tura in siam leh tur ka nih avangin thawmhnaw awm hmasa chu ka phawrh nghal mawlh mawlh a. Inhnuaia ka thlen thlak rualin Chhung inkhawm kan hmang nghal a, ka pa in hun hmangin, kan zinna vela fimkhur turin min chah mawlh mawlh a, a thusawi erawh hriat ka nei manglo, Nicky-a ka hma zawnah a ṭhu a, ka awm zawn a melh leh zeuh ṭhin chuan min ti âwm nuamlo vek.

Tukṭhuan kan kil lai chuan ka kún ngal a, diktak chuan ka hma chiah a ṭhu Nicky-a hmel hi ka hmu ngam rih thlawt lo, eng ngah nge ka hmaah zel a ṭhut luih tlat le, a va han sual thiam tak. Kan ei kham a, kan ei na kan tihfel laiin inkhawm tura insiam a duh avangin a haw ta a, ka thaw nghal hawk thei.bThleng ka sil mawlh mawlh lai chuan, “Bawihi thil thleng a awm em ni?” ka nu in a tih chuan, ât hmel zet hian “Maw” ka lo ti hu a, ka nu chu nui hakin, “Ilo chhuk khan i biang a sen vek a, chaw ei chhung la khan i hawi chhuak lo reng reng a.” atih chuan ka biang ka dawm vat a, ka au ring leh ngang mai, a chhan pawh ka thleng silna phuan ka biangah ka tat vek alawm. Hahthlak ṭhin hian tinge maw ka chetsual reng bik mai le.

Inkhawm tura ka insiam chuan kawrfual ka ha a, ka sam pawh sang zetin ka ṭawn leh tawh. Nidang ang tho in Nicky-an ka sam ṭawnna a phelh leh dawn tho tih hre mah ila ka ṭawn tho. Ka hmaiah cream hnawih in, lipgloss ka in hnawih rual in ka hman leh der mai. Inhnuai ka chhuk rual chuan ka nu chuan,, “Bawihi kawr i ngah teh lul nen hian nga ti nge maw kha hlir kha i hak le?” a rawn tih chuan ka nuih khum vur vur a, he kawr hi hak a nawm bakah nikum ka birthday a Nicky-a min leisak a ni miau a, ka hak theih chhung chu hak char char ka duh. Pawn ka chhuah rualin Nicky-a’n ka sam ṭawnna chu a phelh lehnghal tak tak. Sam thlah i inhmeh a ti ziah a mahse sam thlah hi ka peih lo, hnim tam tak hian min khuh hlup se min zar nuai nuai bawk se chutiang ang vel chuan ka in ngai tlat. Ka hla bu chu min kensak in Biak In lam pan chuan kan kal dun hnak hnak a, senior department kan ni ve tawh a, kum a thar chuan puitling lamah kan awm ve tawh ngei ang.

“Pui inkhawmnaah hlei tawh miah suh.” atih chuan ka nui ringawt, diktak chuan ṭawng miah lo mah ila ka kut hi a hlei thlawt em a, khawih tur a neih loh chuan a za mer mer a min tur et et hian ka hre ṭhin. Kan pawl inkhawmna kan thlen chuan kan lut nghal a, Mawitei bulah ka ṭhu lehnghal chat, Nicky-a pawh Joseph-a te bulah a ṭhu a, Mawieki bula ka ṭhut chuan ka hlei leh dawn chiang sa tih a chiang.

“Mawiek, vawiin chu Boss in hlei a phallo ania,” ka ṭhut fel rual chuan kan ti nghal a, “Biak In luh vela ṭawngṭai tur hi i naupan lai aṭangin ka hrilh tawh che.” nui miah lova min chhanna avanga chuan, “E ni tak,” tiin ka kün a ka ṭawngṭai nghal. Ṭawngtai thiam tak rual ni lo mah ila chham tur hre lo chi ve hrim hrim ka ni bawk nen ka Amen lehnghal vat a, ka Amen ruala Mawtei’n min nghawk zeuh in inchunglam a kawk, ka hawi chho nghal hu, “Khi i thu chham kha an bët vek” a tih chuan nui vur vur chung hian a malah ka chhum sak a, na a ti viau aniang a dawm nghal vawng vawng a.

“Biak Inah em hi chuan insum ve rawh,” ka tih chuan a ner nghal nang a. Ka thusawi chu keimah pawh in ka zawm tawp silova. Inkhawm laia ka awmdan hi ka nu leh pa te hian hria se min vaw er zawt zawt duh hial in ka ring. Ka nu leh pa te hian nun dan ṭha leh awmdan tur hi min hrilh in kan unau hi min zilh fo a, ka unau te, mipa zawk hi chuan an zawm ṭha viau a, an nungchang pawh a mawi viau, mipa rual si an fel tia an hmai hmaa ka nu leh pa te fak nawlh nawlh tu pawh an tam, mahse kei ve hi chu fakna lam aiin a harh mah mah a ni tih leh in fanu hian a unau te zawng zawng a awl vek anih hi tiin miten ka nu leh pa te bula an sawi ṭhin, diktak chuan kei hi chu min han zilh ve deuh mahse duat rawn ka nih miau avang hian min hau tak tak ngailo, an sawi ve chang pawh in, “Ka harh lutuk hi chu ka la naupan vang mai mai lawm kum30 ka tlin hun chuan ka harh peih tawh lovang” tiin ka chang ziah, ka pa la hian a dikchiah lo ti ve vat zel. Harh viau mah ila chhungkaw hnih hlimna thlentu ka ni miau a, keimah avangin an nui a ka fiamthu sawi leh ka chetchhiat theih em avang hian an nui reng zel chu anih hi maw.

conti…

Leave a Reply