You are currently viewing STARLIGHT 40-42 LAST

STARLIGHT 40-42 LAST

Spread the love

S

STARLIGHT – 40

Zan khua in chawl lovin kan tlan a,,,Mahse chu ti chung chuan chhunlai takah kan thleng zo chuanglo,,Kan thlen in dar12:15p.m a ni tawh a,,motor atanga ka chhuk rualin hmanhmawh takin Zira te in lamah ka tlan nghal hlawk hlawk a,,kawngkhar pawh kik lovang ka pawp hawng nghal pawp a,,mahse ka thil hriat avang chuan tap lo turin ka insum nasa takzet….. Inchhung lama awm te chu an rawn hawi phei vek a,,tawng miah lovin Zira nen chuan kan inmelh tlawk tlawk a ni mai….

“Tete ehe nangni pawh chu,,lo lut ru” NuLiani chu harh chhuak thut ni awm in min rawn be nghal vat a,,tunah khan inneihna an zo chiah tih ka hre hman,,ka kut ka hum ngawt ngawt a,,ka tawt up up a,,keimahah hian na lo lai a awmlo emaw tih tur khawp in ka na ngawih ngawih chu a ni si a,NuLiani lam chu hawiin,,”Programme in nei tih ka lo hre lova,,in an kalh sia Jeff a awm ringin kan rawn lut rawih a ni”tiin dawt ka sawi ringawt a,, mahse ka dawtsawi hi a hriatthiam ngei ka ring,,,chik zetin min en a,,mahse engmah a sawilo…A hawi let zeuh a,,a nui tawi tak a,,chutih lai chuan Jeff chu a rawn chhuak nghal vat a,,Peka leh Alberta pawh in ka hmel an hmu chuan sawi tur an hrelo….Betty erawh in mittui tling piau in min melh a,,ka nui lui sak thung…..

Programme a zo tawh tho a,,tiin mipa pathum te chuan min zui chhuak nghal a,,zan khuaa kan rawn tlan hnu in tunah kan rawn thleng chiah a,,mahse kan tlai deuh hret a ni….Pawn ka thlen rualin ka tha a zawi hnawk a,,Pekan ka darah a rawn kuah vat a,,”Te i tha em??” a tih chuan za lo zet hian ka nui tawi tak a,,”Te tiin min ko ania” ka tih chuan chik zet hian min melh a,,”I rawn thleng chiah tih ka hria mahse inhnuaiah chhuk lovin khawiah emaw ka hruai ang che i duh em??” a tih chuan ka lu ka bu nghauh a,,Midang zawngin min chhuksan a,,Peka chuan an bike la chhuak in a hnungah chuan ka lawn ve nghal a,,ka tha zawi lutuk avanga ka tlak mai loh nan a hnung chu ngheng in a kawngah Amah si ratin ka kuah a,,Zira pawnlama rawn chhuak chu khap hauh lovin ka melh a,, a mita natna nena min melhna chu en rei duh lovin lehlam ka hawi a..Ka en reng anih chuan ka tap ngei dawn tih ka hre miau alawm…

Pekan chak zeta min tlanpui lai chuan nghet zeta kuah in ka kun lap a,,Ani khan min hmangaih ngei a,,min then pawh harsa a ti,, mahse a chhungkaw tan a ti a ni,,chu chu ka hnenah nilovin ka nu leh pate hnena a sawi ngei a ni….Dawt anih pawh ka ringlo mahse ka ta nilova midang ta a ni mai hi na ka va’n ti si em!!! Kei hian Nicky ka hmangaih em avangin Ani kha kalsan ka tum a,,a chhan pawh midang hmangaih nei reng chunga a thlazar hnuaia a hmangaihna rin kha ka inthiam theih loh vang a ni,,Mahse khang hunlai zawng zawng pawh khan Lalnunzira hi a ni ka lo ngaihtuah em em a,,a tana tha tur nia ka hriat chauh ka lo ngaihtuah thin…..

Ka hriat hauh lovin ka duh a,,ka hriatthiam phak bak in a hlimna kha ka lo dah pawimawh a,,a tana ka tlinlohna te hmu tharin ka insit a,,chung zawng zawng chu min hmangaihna vang veka thleng a ni si,,,ka hlimna a ngai pawimawh ang bawkin ka lungngaih Niah pawh ka tan a awm reng thin a,,khang zawng zawng kha a hlutna ka hrethiam lo mahse tunah midang ta anih chiah hian ka va han hrechiang si em!!!! Ka tan hian a hlu lutuk a ni tih tal pawh hrilh hman lo leh,,a nuna thu tlukna a siamah hian lungawi ve lo mah ila a hlim dawn phawt chuan ka hlim ang tih tal ka lo hrilh lo kha ka in haw takzet….. Hlim takin awm se ka tih rualin a hlimna ka ni tawh ngailo tura ka inngaihtuah ringawt pawh in na ka ti ngawih ngawih…..Bike a ding dawt rualin ka hawi chhuak a,,kan awmna hmun ka enkual chuan ka mittui a luang thla zawih a,,hepa pawh hian engvanga Muthi Park ah kher hian nge maw min hruai le!??

Peka chu a hma aia ngheta kuah in ka inhnit nghal hlawp hlawp a,,helai hmunah ngei hian a ni lawm ni a bialnu min nih tir kha,,he hmunah hian bul kan tan a he hmunah ngei hian a tawpna pawh kan khar angai dawn anih hi…Rei ngial ka tah hnu chuan Peka phone a rawn ri a,,a chhang vat a,,keipawh in thawm chhuah lo turin ka hmui ka pet fan fan a,,Tu emaw berin kan awmna a zawt a ni mahna….Phone a dah rual chuan ka kuahna chu hrechhuak zawkin ka kut ka la sawn nghal vat a,,a nui nghawr dawt a,,bike atanga ka chhuk chuan rawn chhuk ve nghal in,, thutna awmna lam chu a pan a,,ka zui ve nghal dat dat a,,engmah a sawi lova keipawh ka ngawi ngar thung,,minute 15 dawn chu kan thu hman ang…. “Peka Ihh…..” ka sawi zo hman lo kan piah lawka Zira a bike nena rawn ding ka hmuh rual chuan ka mengphawk nghal hra a,,Peka ka melh chuan nuih sukin,, “Te a tawp nan inbe rawh u,, ka lo nghak ang che”tiin a tho nulh a,,a kal nghal daih a…..

Ka lam pana Zira rawn kal chu ka en reng a,, Ani hi engtiang taka thukin nge a lakah hian ka rilru ka lo pek hman ka hrelo,,mahse ka ta a nilo tur tih ka hriat rual erawh in ka na si a ni….Ka hma zawn a rawn thlen chuan kan kalsan dawn a a mitmeng ngai bawk natna chauh in min melh a,,keipawh hian tuna a mitmeng ang tho hi ka mitah hian a hmu ve ngei ang…. Rei ka en leh ngam ta lo,,ka kun daih a,,mahse a kuta inneih zungbun tih hriat tak mai a bun ka hmuh rual chuan ka na zual takzet,,ka mit ka khap fak a,,ka tap tur a nilo tiin ka inhrilh nghal mawlh mawlh…..Ka bulah chuan a rawn thu a,,sawi tur kan hrelo nge sawi tur kan ngah lutuk a,,sawi.ber tur kan hrelo zawk tih pawh hriat lohvin kan ngawi ngar a……

“Ka tihpalh aw” a rawn tih sup chuan chhan mai ka tum a,,mahse ka hrawka hnawhtu awm ang mai hian a tawt up up a,,chhang lovin ka lu ka bu nghauh a,,

“Thlenglo tur hian ka theihna zawng zawng ka hmang a ni tih tal hi min hriat sak rawh aw” a tih leh chuan ka lu bawk ka bu leh nghauh a,,chhan ka duh mahse ka tawngchhuak theilo,,Ani erawh mipa ngang ania,,harsa takin a sawi chhuak tih a awki hniam zetah chuan ka hre thei…..

“Ka hmangaih che ka tih kha dawt a nilova kei hian ka damchhung in ka hmangaih ang che” a tih leh rual chuan ka tap chhuak hawk a,,ka hmalamah kunin ka hmai ka hup a,,chutih rual chuan ka sir lam atangin min rawn kuah nghal a,,a taksa in ka taksa a deh rual chuan nasa takin ka tap nghal hlawp hlawp a,,kei hian Lalnunzira hi ka hmangaih a ni,,ka hmangaih takzet avnaga tunah pawh hian tap ka ni,,mahse chu erawh ka sawi a rem tawh silo,,ka ta a ni ngai dawn lova,,engtikah mah Ani hi ka hmangaih thu ka hrilh thei dawn tawh lo a ni…..

Ka duhtawka ka tah hnu chuan Muangchang hian min thlah riai riai a,,Ani pawh a tap ve a ni ngei ang a mit a sen rum a,, “Puii ka tihpalh” a ti leh sup a,,”A pawilo i thiamloh a nilo,,Engkim hi kan duhdanin a thleng theilo i tih kha,,I hria em khawvel anih hi Nun hi a fair lova,,Mi tha te aiin mi diklo dinchhuahna khawvel,,Misual ten hnehna an chhanna hmun leh inhmangaih tak te inthenna ram anih hi,,chuvang chuan i thiamlohna a awmlo” la insut hlap hlap chunga ka tih chuan,,tawt hmel zet hian a thaw hawk a,,sawi tur chu kan ngah mahse sawi chhuah dan kan thiam silo anih hi…….

“Ka hrilh loh che avangin min ngaidam rawh aw” a tih leh chuan lu ka bu nghauh a,,A phone vibrate chur chur chu phawrh in a off nghal daih a,, “Ka tura ka duh leh khawvel ka hmeichhe tawn tawh a ka thinlung thleng phak i ni ka tih kha ila hre reng em??” a tih chuan,,”Ka hria lawm,,dawt i sawi lo tih pawh ka hria….” ka tih sap chuan a nui suk a,, “Ka damchhung hi chuan nang chauh hi i ni zel ang,,I Starlight ni theilo mah ila,,ka hmangaih reng ang che” tiin a hmangaihna a khatin min melh a,, Ka hmangaih ve thu ka sawi chhuah loh nan ka inhum ruh ngat ngat a…..

Kan bula Peka inthlahrung zeta rawn kal chu kan en a,,”Kan haw mai a ngaih tawh hmel” a rawn tih sup chuan Muangchangin ka ding a,, ka bana min rawn chelh tu chu en in,,hreh hmel zeta rawn dingchhuak ve in,,chiang zeta min en chung hian,,”Kan haw hma vawikhat chiah a tawp nan ka fawp thei che angem??” a tih chuan ka mittui bawk a tling leh nghal pam a,,tunah hian ka thinlung a thu awm zawng zawng te hi sawi chhuak thei ila ka tap kher biklo tur…… Peka chu inher vuta a kalsawn rual chuan ka biang tawn tawna rawn vuan in min rawn fawp nghal chawt a,, keipawh in mittui tla chungin ka chhang let ve nghal a,,ka hmangaih hi fawp chung bawkin maw ka kal tir leh dawn,,ka chhungril na ngut ngut hi la bo tel thei se ka va ti si em!!!!

Min thlah rual chuan “Puii Mangtha aw” harsa tih hmel zet hian a sawi chhuak hlol a,, keipawh in sawichhuah harsa ka ti mahse ka sawi ngei tulin ka hre si,,”Mangtha le” ka tih rual chuan min chelhna kut chu thlah in vawikhatmah rawn hawi let leh tawh lovin min kalsan nghal a,,a bike nena a tlan liam thleng chuan ka thlir zui vawng vawng a…. A tlan liam rual chuan leiah chuan ka thu hnawk a,,tap leh chuang tur ka awm tawh lo…. ka na a ni ka na ngawih ngawih….Ka awmchhung na lutuk chu ka chum dat dat a,,ring taka au chhuah a tah a ni ka duh chu…mahse ka thei silo……

“Te i tha em??” Pekan ka dar tawn tawna a chelh rual chuan,,”A kal tawh kumkhua atan min kalsan tawh” ka ti zawi sap a,,rang zeta a awma min kuah betin,,ka samah a chul hliau hliau a,,ka mit ka chhing riai riai a,, nat hmel zeta Lalmuanzuala hmel ka hmuh rual chuan ka mittui a luang thla a,,”Nicky tunah chuan min hruai tawh mai ta che” tiin ka phun sap a…..

( AFTER THREE MONTHS )

Mawitei leh Joseph-a te inneih dawn avangin kan buai hle a,,Kei a best tur hian engmah thiam ka neilo zawng anih hi,,keia thiam ve zawng hei hi a tha em an tih ruala lu lo buk nghat kha a ni mai…..A thin la hi a rim thei em em lehnghal a,,ka nui tawp zel…..

An inneih kawr tur amah ngei in a design a,,ka kawr tur nen lam a design a,,a dawra puanthan tha ber ber in a thui tir a,,kan nalh khawp ang,,ka duh angin kawrfual pawlduk ruih zahawm taka thui ka ha dawn a,,ka kawr ang chiah a design ang var tha zet a ni in a ha dawn thung a,,an inneihna atana pawimawh tur Aizawl lama bazar an tih tlat avangin Aizawla kal turin ka insiam a,,Khang thla thum liam ta chhung khan vawikhatmah ka let leh ta lo kha ania……

Khami ni khan engtin nge in lamah ka haw pawh ka hrelo Peka zarah mualpho lovin ka awm a ni ber mai,, Transfer ka dil nghal a,,khawpui awm duh an lo tam bawk aniang min transfer nghal reng bawk a,,ka bungrua pawh Ulawma leh UChhana te vekin an buaipui a,,Taka Mawitei leh Esi te pawn an lo puih vek Peka te unau telin,, Aizawl lam tumah ka be pawp duh tawh lova Media lam hawi reng reng ka ngaihven lova ka phone ah pawh ka khawih tawh ngai heklo,, Zira ka hriatchhuah theihna tur lam hawi chu ka paih fai vek a ni mai….. Ka chhungte hian min ngaihtuah em em a,,mal leh khawharin ka awm hman lo,,Ka hman chang apiangin Nicky-a thlanah ka kal awl lova,,Ka kal chang apiangin a bula min hruai turin ka ngen ziah thung……Min hruai ve duh loh avangin ka hau hrep a,,a hnuah ka tap a naupang in an duh an ngen a,, an tap ang mai hian ka ngen ngawng ngawng thin mahse vawiin ni thleng pawh in min la hruai duh chuanglo chu anih hi!!! Misual lutuk pa hian……..

Ka banga ka duh dan thlapa Nicky-a thlalak lian zet ka tar kulh chu en in,,”Misualpa i bulah min hruai duh lo vel a,,ka zin san daih dawn che” tiin lei ka chhuah vak a,,hei hi ka nitin dan a ni,,a naupang chhiat thlak tih ka hria mahse ka bula Nicky-a a awm ang mai hian ka nuih phah thei tlat si a ni….. Aizawl kal chu ka huphurh ru hle a,,a chhan pawh ka thinlung natna te kha a ngai te bawkin a thar leh ang tih ka hlau a ni,,Ani kha hmulo hram ila ka ti takzet si a……

Taka Sir Zuala leh Miss Sangtei te pawh an la awm a,,mahse kan thawhna a in ang miau lova kan inhmu khat khawp mai….School leh College chawlh lai alo ni bawk nen veng khat nilo ta chu kan inhmu ngailo tluk a ni mai….

Joseph-a motor in kan kal dawn a,,Ani pawh in thianah Sangtea a hmang dawn a,, Esi erawh ka hmuh ngei ka ring,, Aizawlah min lo hmuak dawn a,,Sangtea in a lian bawk a chutah chuan kan thleng vek dawn a,,Ramhlun lamah a ni dawn a a zia phian ang……

Ka kal dawn chuan ka vah te hovin thil min chah nak nak hlawm a,,kan rual ve tawh bawk a,,a nuam ve khawp mai,, UChhana pawh in bialnu a nei ve tawh bawk a,, Tin,,Ulawma te pawh Mawitei te inneih zawh lamah an tih ve tak tak hmel tawh…..Mo an mamawh tawh bawk a,,ti vat sela ka duh ka nutei a mal ve emai…… Kawngah chuan Joseph ka khalh chhawk zeuh zeuh a,,thiam tir license pawh la nei fello ka ni bawk nen Mawitein a hlau thei khawp mai…. Sawi hmaih theih miah loh Asawmi leh Agnes-i pawh kawr thar an thui thlap tak e,,Aizawla kal ve tura kan sawmna erawh inlamah kan lo tangkai ang tiin an hnar kha ania,,an lo tangkai tak tak tih pawh a chiang…..Thiantha hi an hlu takzet……

Motor ka khalh a,, Joseph-an min enpui pah avangin a hmaah a chuang a,,a hnungah Mawitei a ang char char kan nuih mai mai a,, “Te nizan news i hria em??” Mawitei a tih chuan ngaihven lo deuh hian engmaw ka ti hu a,,, Joseph-a pawh chuan hnunglam hawiin a melh ve hu tho,,kei erawh ka hawisawn thei chuanglo…… “Jenny leh apa kha police in an man asin” a tih rual chuan motor brake chu ka rap nghal vak a,,car pawh a ding ri tuar bawk,,Mawitei chu Car hmalamah chuan a rawn in bing phei lo chauh,, Joseph-an alo dang hman hram……

“Lalhlupui mi mawlnu….” tiin a rak nghal that a,, mitmeng ling hlar hian min melh nghal rawm rawm bawk….”I a mi min thah i tum em ni hmelchhe nu” a tih zawm leh zat a,,a thusawi chuan engmah keimahah hna a thawk lo,,,”Eng nge i thusawi awmzia chu???” tia ka zawh chuan,,lei min chhuah khum vakin a kut a kuangkuah hmak nia,,henu hi sawp deuh a duh a nih hi……Ka seat atang chuan chhuak in a hnunglamah ka kal a,, kawngkhar ka hawn rual chuan ka pawt chhuak ve nghal,, khawchhungah kan dinglo bawk a,,khawih deuh a ngai a ni….. “Te i khawih na lutuk ange Inneih zanah ka chetpui theihloh tur khawp khan khawih sil awng suh aw” Joseph-an a rawn tih zeuh chuan,,”Hmela” Mawitei chuan a ti leh hram,,a tawng hi chu a duhtuilo ve thin ania,,kan naupang lai zia hi a paih thei lo,, sawi hreh a neihloh ang chiah in zahbah a nei lemlo mahse a rilru erawh a tha thlawt……

“Sawi vat rawh Anih loh chuan i sam kha i chan nasa ngawt ang,,inneihni ah bawrchhawr deuh a i lan theih nan ka tan sak ang che” ka tih chuan,,”Sam lem a tam emai” tiin lehlam a hawi hmak…..a samah ka man thut a,,a te ring teh e,,”Sawi vat rawh” ka tih leh rual chuan,,”Aw ka sawi ang min thlah phawt rawh”a ti nghal chul a,,kan thian ho infiamna ti tawh mai ang anih tlat avangin Joseph-a hian a hrechiang a,,tihian dawhthei takin min lo nghak mai…..

“Engmah thuchiang ka hre bik lo,,An pafa khan mi an vo avang leh blackmail avangin an man a,,chuan an company sawn thil sual an ti nasa niang chiang takin ka hrelo vawiin lamah update a awm ka ring mahse signal ka neih loh avangin engmah ka en thei lova” a tih chuan mak deuh ka lungphu a rang nghal dawt dawt a,,ka rilruah Zira chiah a rawn lang,, a nupui a ni a,,engtin nge a awm ang, hrehawm takin a awm angem le??? tiin ka ngaihtuah nghal a,, Aizawl kal ka hreh chhan kha Amah hmuh palh ka hlauh vang a ni a mahse tunah erawh vawikhat tal hmuh theih ka duh takzet si a…

Joseph-an motor a khalh a,, Mawitei a bulah a thu a kei a hnung seatah ka thu thung,, “Mi te pawh chhan ve tur alawm” Mawitei a vui nang nang a,, Joseph-a la chuan min rawn melh zeuh in,”Te khatiang kha em ni ngam loh chala chil hnawm an tih chu??” a rawn tih chuan Mawitei pawh a insum thei tawh lo,, a nui nghek a,,a nui la hi midang hian an hrelo ang tih hlau ni awm tak hian a nui ring thei mai siah. Naupang lai atanga inkawm vek kan nia inzah vak ngai heklo,, hetiang mizia a nei chung hian Joseph hian a hmangaih hliah hliah tho em a ni…..A nun a tlang a,,a rilru a tha a,,a fel em em tho si…..

“Thil pakhat i tih sual tawh avang khan,khawvelah hian indah hniam bik reng reng suh,,Mahse i tih sual tawhnaah khan tisual nawn tawh lo turin fimkhur takin ke pen ang che.”

STARLIGHT – 41

Ka nun atangin a kal tawh,,engtikah mah a rawn let tawh dawn lo,,ka hmangaih a kal tawh,,hetiang tak hian a beidawn theih ang tih ka ring ngai lova,, mihring rilru hi hmangaihna avang hian a na thei tih ka hre ve ta lawm……Kan chhungkaw boruak a danglam a,,tumah kan tawng in kan inbe bawrh bawrh tawh heklo,, ka nu erawh nu nih tlin takin a khawsa a,, mahse Betty takngial pawn min be duhlo…. Sangi Delhi lamah a chhuk leh tawh a,, College kan tan ni a ka hrilhhai zia mawlh kha…..Ka ngai a ni,,ka hmangaih Puii kha ka ngai takzet…..Kan College zawng zawngah a sulhnu a awm a,,a hmel hmu lova ka awm tak chinah chuan engmah hian min tihlim zo tawh lo…..

Esi hnenah a chanchin ka zawt fo a,,mahse Esi takngial pawh a be pawp ngai lo a ni tih ka hriat hian hrehawm ka ti takzet….Jenny-i nena khum intawm ka duh miau loh avangin pindan awlah ka mu a,, Thawmhnaw em ka dahchhuak lo hi lawm viau tur a ni….A duh a sawi a,,nuam a tih danin a khawsa a,,tlai tak takah a haw a,,a duh duh a sawisel a,,engah mah ka ngailo,, kan chhungkuaah ro a rel a,,a duh duh danin a khawsa a ka ngaipawimawh tehchiam lo,,tumah hian kan ngai pawimawh lo a ni ber ang…..A thin a rim tam zoh poh leh Amah a hrehawm a ni mai….

“Betty vawiin chu Bazar ila” Jenny a ni…. Engtin tak chhang ang maw,,tia ka thil ei lai ka bih run lai chuan,,”Ka hman lo hna ka nei” Betty-in a tih hmak chuan ka bula thu Jenny chu a thinrim leh tawh a ni mahna a inhum ruh ngat ngat hle….”Ka sawm che a nilova thupek anih chu” Jenny-in a tih chuan ka pa a rum nghut a,,”He inchhungah hian mo i ni a,,thupek i pek tur Chhiahhlawlh kan awmlo ti hmukin”dawhkan a thawhsan a,,tumah in an ngaina lo,,kei pasal atana a neih ngei mai pawh hian eng nga tan mah ka tilo tih hi a hre reng si a,,engvanga hetia awm tlat hi nge maw anih le?? A peih hi ka tia…. khawnghaih thla la zet hian mi rawn melh a,,ka thawhsan nghal hmak…..

Pindan ka luh rualin ka hnungah a rawn lut ve nghal a,,”In chhungkaw rosum engkim hi ka kutah ala awm tih hi in theihngilh ta em ni??” ngeiawm zeta a tih chuan chhang lovin ka closet lam chu ka pan a,,Kan inneih dawn khan fa neih hmaa min pek let vek tur thu a pa khan min tiam a,,mahse Amah hian min then anih loh chuan ka then loh tur thu ka intiam thung,,chu chu a pa nen kan inrem siamna a ni….Mahse thlakhat ai rei kan innei tawh a engmah pek let kan la nilo,,a rukin ka chhui reng a,,kha seal pawh kha ka la zawng ru reng mahse khawiah nge a awm hriat ala ni miau silova……

Ka chhan loh avanga thinrim zeta ka bula rawn kal leh in”Naktuk atangin Showroom saw ka enkawl tawh ang….” a tih leh hmak chuan ka insum theihna ka hloh hman,,a hrawkah rek in closet lamah chuan ka nawr bet a,,”Min vau leh emaw ka nu leh pa te zah lo taka i khawsa leh anih chuan ka that ang che” ka ti hmuk a,,a mit sen rum leh mittui tling piau ka hmuh chuan ka thlah a,,pindan ka chhuahsan nghal hmak….. Ka duh vang ni hauh lo mahse nupuiah ka nei tawh a,,a lakah tha lo mah ila khatiang tak khan ka khawsa ngailo….Sual ka tum viau pawh in ka nu leh pa te vangin engtin mah ka ti ngailo kha ania,,a chho chhuah liau liau a ni……

Ka helmet nena ka chhuak chu ka nu chuan min rawn pan vatin ka kalna tur min zawt a,,ka sawilo mahse ka haw har tur thu erawh ka sawi thung,,Rsa te in lamah ka kal a,,engmah ka sawilo zu ka duh thu sawiin an room ruak pakhatah chuan ka lut a,, Dar10:00am vel chauh ala ni…..Zu ka in a,, ka chatthlak thleng rawt a in ka duh… Hmalam pana kal zel duh mah ila Puii awm ve lohna khawvelah hian hmalam pan chakna pawh ka neilo,,mahse ka chhungte ka hmangaihna avang chuan pangngai takin ka la nung thei chu ania,,Anni vanga ka thutlukna siamah hian hrehawm taka an awm hi ka duh reng reng lo…..

College chawlh anih hma chu nitin College ka kal a,,Exam a hnai tawh a,,hna lamah pawh kan buai tawh angreng viau a,,Ka hnathawhna hmuna buai taka ka awm hian ka tan a nuam zawk….Peka nen kan inbe zeuh zeuh a,,Ani pawh Puii a be ngai chuanglo engtin nge a awm ve ang,,Eng nge a tih ve ang?? Na tak tuar hian a tap reng angem??Keiin ka ngaih ang hian min ngai ve angem??Nikhata darkar sawmhnih pali ka rilru luahtu hi hmuh ka chak a,, mahse Keichu midang pasal ka ni tawh chu chu keiin theihngilh mah ila Ani chuan a theihngilh ngai dawn silo,,ka thutiam bawhchhe tur khawp ka nilo….

Naupang an exam zo a,,kan chawl a,,kum dang ang chu nise chawlh hmangin hmun dangah ka zin ngei ang,,mahse engtik lai pawh a min zui kual tu hian kal ve zel a tum dawn si a ka peih lo,,Khami ni atang khan Jenny-i nen pangngai taka inbiak kan la nei leh lova,,Kan inneih atangin pangngai takin kan inbe ngailo hrim hrim zawk….. Zu a rui reng a,,a party reng ni mai in ka hria…Ka nu leh pa ten an zilh ngai lova diktak chuan an mo atan hian an pawm pawh in ka hrelo,, mahse khawtlang leh midang hmuhah an mo,,ka nupui a ni miau a sawi a kai rualin keini pawh kan telve zel tho…..

College exam zawh tuk atangin dawrah ka kal a,, nilengin chutah chuan ka awm thin,, Dawr lam hna ka khawih chuan buai alo na ve thin khawp mai,,Nuni la ka awm vang nge a rawn kal ngai meuh lo,,sumdawnna lam pawh nitin khawih ve takah chuan nuam ka ti viau zel…Jenny hmel tal ka hmuh tlem phah a a zia,,tia ka ngaihtuah laiin Zu rui tih hriat zeta Jenny rawn lut chu ka melh run a,,engmah sawi lovin sofa inhungah chuan a thu a,,inhauh hi a chak thin mahse min hlau nge engmah a sawi lo,,a tah erawh a chhuah hmel takzet….Ka ngaihsak peih vel love…..A awm ve chu hrelo ang hmakin hna ka thawk a,,ka dawhkan bul a a rawn pen pai khut khut pawh ka hmulo der hmiah…..

“Lalnunzir a hma ang khan kan awm leh thei mai lo a mi??” tap aw tiau a atih chuan ka hawi chho a,,a zurui mitmeng phi chiai te hi ka hua a ni tih a hrelo nge min tilui zawk pawh ka hre love…..

“Mawh ka zawh che chu,,,a hma pawn vawi tam tak kan mu dun a kan awmdun tho a,, khatiang khan kan awm leh thei mai lo em ni??” a tih nawn leh sap chuan,,”Theilo” ka ti hmuk….A inhnit nghal hlap hlap a,,ka ngaihsak peih lo…..Ka thutna atangin ka tho hluai a,,a phu zawk nghe nghe…..

“I chhuak dawn nge ka chhuak dawn” ka tih hmuk chuan thinrim insehruh teuh hian a rawn ding ngil a,,a mita natna pawh hi ka hmuh hmaih lo mahse a duhthlanna a na alawm ka khawngaih nachhan tur ka hrelo…..

“I sual takzet”

“Ka sual zia chu i hriat kha hei ai pawn ka la sual thei” ka tih chuan a heh a pet fan fan a,, kawngkhar lam ka kawk a,,thinrim tau nghawng nghawng in a chhuak nghal a,, Beiseina ka siam ngailo chung pawh hian ka lakah beiseina ala neinve ziah tho chu ania,,a peih ve khawp mai….A duhdan hi Chatuan pawh in a thleng dawn chuanglo tih te hriat ve tur ania……

Zanah pawh Jenny a rawn haw lo ka ngaihsak tehchiamlo mahse a tuk hnaa ka kal erawh apa a rawn leng a,,kan property min pek let a tum pawh a fanu duhdan anga fa kan neih hunah chauh min pek tur thu a sawi a,,thinrim viau mah ila engmah ka sawilo,,min pe lo mah la,,nang man tir theihna tur che hi ka zawng tho ang,,kei hian ka la tichhe vek dawn che u……

Jenny a rawn haw zeuh zeuh a,,ka pa erawh chuan min kamkhat hlak thung,,Kan duh emaw duhlo emaw kan chhungkaw mi leh sa a ni a,,a pasal ka nih avanga tha taka awm turin min ti a,,mahse chu erawh ka theilo ka thei ngai dawnlo……Chutih rualin ka nu leh pa te ka farnu te lungngaihna thlen sak erawh ka duhlo….Mahse Puii nen kan inkar an hriatchian em avangin ka hlimlo a ni tih erawh an hre tho anih hi……

Dawrah ka awm a,,inleng ka neih thu hnathawk pakhat in a sawi chuan rawn luh tir rawh ka tih hnu reilo teah ka inleng tur te an rawn lut nghal a,, Doctor Maruata leh a nupui chhelo zet Professor Veronica-i (Best Friend star te) te an lo ni a,,

“Nangni nupa teh hlol chu lo thu ru” ka tih chuan Veronica-i chuan nui sang hian,, “I dam maw??A ruk tea nupui neipa” min tih chuan ka lo nui suk a,,Ani hi chuan a hmelthat ang chiah hian a lu a zo vah vah a,,ngam pawh kan in ngam tlak viau,,mahse anpa nena in thian hi kan ni daih thung…..

“Car thar kan duh ve deuh a,,Bike ringawt hi chu a fuh tawh lo deuh a” Maruata zawk chuan nui sukin a ti a,,Ni tak he mite nupa hi chuan bike an ngaina hle tak,,An nupa in a hrang an nei ve ve alawm…Puii ka ngaihtuah zawm zata Ani pawh Veronica-i ang mai in Bike a ngaina a,, hmeichhia mahni lu zo tak a ni a,,innei ila Maruata te nupa ang mai hian bike in kan ride dun vel thin awm si a……

“Hello Zira….” Veronica-i aw ka hriat chuan harhchhuak thutin an lam ka hawi nghal a,, inthiamlo ru zetin ka nuih nghal suk a,, an car duhzawng te zawtin kan titi luam a,,ka office atang chuan chhuakin showroom chhungah kan lut a,,an car duhzawng te an thlan fel hnu chuan lehkha te tifelin min kalsan zui nghal a…..Nupa awhawm tak an ni,,,Naupang te an nih atangin thian an ni a,, chutah anla innei zui a….An inhmeh viau lehnghal….

Ka office lama ka luh leh dawn lai tak chuan Jenny nu a rawn lut hlol a,,Ani nen hian inneih ni bak kha kan la inhmu leh lo,, a hmel a ngui ngiai a,,ka Office lamah ka luhpui nghal a…..

“Jenny nen hian Delhi-a in awm laiin in in hre tawh tih ka lo hria a”. atih chuan ka lu ka bu nghauh a,,

“Inlo inngaizawng ve thin tawh tih te pawh…” a tih leh chuan eng nge sawi a tum tih hriat tumin ka en a,,chik zet hian min li melh ve ran a….

“Ka fanu tak a nilo chung hian ka thinlung tak hian ka hmangaih asin,,mahse a hrethiam duh silo,kei min huatna in a khat a,,a chhan pawh a nu luahlantu ka ni miau a,,mahse a pa ka hmangaih em avangin a ni pawh ka hmangaih tho mahse engah mah min ngai ve lo,,chuti chung chuan atana tha tur pawh hrethiam lo khawpa hmeichhe â a ni tih pawh ka hria,,nangnena inneih a duh thu a sawi khan dan ka tum nasa a,,mahse a duh apiang pek tum.tlat tu a pa nen an tang dun miau a,,ka dang theilo anih kha….” tiin a thawhak a,,

“Nizanah khan tap chungin a rawn kal a,,a hlimloh thu a sawi leh a,,nidangah chuan apa bulah zel a sawi thin avang hian engmah ka sawi ngailo….Nizan khan a vawikhatna atan ka nu tia min ko in ka bulah a tap asin,,chuthil chu ka tan a lawmawm rualin ka fanu tap chu ka nat dan tur i hrethiam em…..” tia a in sut feih feih chuan,,sawi mai tur ka hrelo viau,,

“Ka thiamloh a ni” ka ti sup a,,

“Thiamlohna i neilo ania,, In hmangaih tak then hrangtu chuan malsawmna a dawng theilo alawm,,Engpawh nise he thil hian i rilru a tidanglam ngei ang tih ka hria,,mahse ka fanu erawh ngaidam hram rawh aw” tiin lehkha tam vaklo leh seal hi min pe a,,mak ti zetin ka en reng ringawt a,,

“Jenny te pafa hi ka hmangaih lutuk mahse an thilsual tih tawh te hi sim duh silova,,ka siam that ngei a ngai a ni…Jenny hi rilru chhe tak chu a ni biklo ania….” ti leh in a chhuak zui nghal a,,Jenny nu thusawi ka ngaihtuah a,,mak ka ti viau eng nge siamthat a tih awmzia kha,, A lehkha min pek chu kan property diklo taka min laksakna kha a ni tih ka hre nghal a,,seal ka en rual chuan ka thaw hawk a,,eng nge ka rilruah awm ka hrelo chutih lai tak chuan ka phone a rawn ri a,,ka nu a ni…

“Bawiha news i hre tawh em??” Ka nu in hrehawm ti hmel zeta a tih chuan ngaihtha lo zetin,,”Eng nge thleng a??” tiin ka zawt let a,, “Jenny leh a pa an man a ni awm e,, i pa in lo haw hma rawh a ti che a ka lo bia che” a tih chuan mak ka ti takzet… Phone kan dah rual chuan hmanhmawh angreng takin ka hnathawhna ka tifel a,,ka haw ve nghal a…..

“He thil hi i tih a ni em??”Ka pa in a tih chuan,,”Ka tih a nilo” ka ti sup,,ka tih a nilo chutih rualin Tu tih nge tih ka hre hauhlo…..

“Bawiha i nupui a ni a,,engvang pawhin Police chuan man mahse bail chhuah dan tal ngaihtuah ang che” ka pa in a tih chuan a ngaihna ka hrelo hle mai…..

“Mahse ka pa”

“Ka sawi ang chuan ti ang che”ka sawi zawh hma chuan a ti hmuk a,,a thutna atanga tho in an pindan lamah a kal nghal daih a,,

Jenny bail chhuah chu eng nge a tulna,, khanu khan ka nun a tichhe vek a,,a phu tawk a hmu a ni mai lawm,,an man chhan chu engpawh nise a phu hliah hliah,,ka pa hian eng chiah nge a ngaihtuah…..Misual chhanhim a duh ta mai ania….He thil hi tu tih nge ni reng reng le???

Ka pa thu zawm loh ngawt ka tum rualin ka nu lehzel pawn ka pa a thlawp tlat avangin Ukil ruai in Police Station lamah ka kal a,, An company in dan phalloh thil an lo tih nasat avangin Apa an man a,,Jenny alo tel ve a ni a,,Jenny nu pawh police station ah alo awm ve reng a,,Jenny bail chhuahna lehkha ka pek laia Anu mak ti hmel kha ka hre reng,,mahse he thil hi ka ti.duh biklo tih hi a hriat ve tho ka ring….

Jenny hmel pawr deuh fap a rawn chhuak in Anu nen min hmuh rualin min rawn pan a,,ka rin loh deuh in a nu a kuah a,,a tap nghal hlap hlap a,,engmah ka sawi lo….

“Ka lawm e aw” a tih chuan ka melh run a,, mahse engmah ka la sawi chuanglo,, Anu nen chuan station atanga Anu in kuah chunga Jenny station atanga a hruai chhuah chu ka en reng a,,an ding a an rawn hawi leh a,,

“Ka tihbuaina zawng zawngah che khan min ngaidam dawn nia,,engkim a fel vek tawh ang” Jenny-in a tih leh chuan ka thaw hawk a,, Station chu ka chhuahsan ta nghal a……

Kan inah ka hruai haw lo,,mahse ka nu leh pa te erawh thil awmzia ka hrilh a,,engmah an sawi lo….Ka mut hmunah ka inngaihtuah a,,thlathum chhung khan nun pangngai ka neih tak pawh ka hre love,, Puii ka ngai em em a,,a rukin ka ngaihven reng thin,,mahse a reh vung vung si a….Ka nun ruak ta lutuk te hi a chhan hre mah ila tih theih ka nei bawk silo,,hetiang mai hi a ni dawn em ni Hringnun hi!

Khua a var a,,dawr lamah bawk ka kal lehnghal a,,mahse dawr a awm pawh ka peih chuanglo,,Nuni a rawn kal tho avangin tei harh tumin Bazar lamah ka inkhalh chhuak a,,Bike ka ken avangin awlsam takin Bazar ka thleng a,,Mc lamah bawk ka kal leh a,,khang thlathum chhung khan helai hmun hi ka kal tamna ber a ni hial ang,, Puii ka hmuh hmasak berna hmun a ni miau alawm,,Mahnia sulhnu chhui a,, khawharna nena kan in thianthatna pawh thlathum hial a ni ve ta,,Mc-ah ka tei kual a Puii ka hmuh hmasak ber tum ka ngaihtuah a,,Durtlang lama kal ka rilruk zawk avangin inhnuai lam pana ka chhuk tur chu ka mi hmuh avang chuan ka ding dawt a,,Puii maw,,hetah eng nge a tih?? Ka ngaihtuah nasat thin em avangin ka hmuh sual mai anih ringin ka mit ka chhing vang vang a,,ka meng leh pawh chuan Amah tho a ni,,a hma zawng aiin a taksa a cher a,,mahse a hmelthatna leh duhawmna te erawh ala bo hauh silo……

Ka en reng lai chuan min rawn hmu ve chiah a ni tih hriat zetin a thil khawih lai nen chuan min rawn en vawng vawng a,,ka pan nghal vut a a bul ka thlen dawn chuan a inher vut a ka hrilhhai lek lek zawk mahse a bul ka thleng tawh a,,ka biak ngei angai…..

“Puii” ka tih chuan abulah an awm tih pawh ka hriat loh Mawitei zawk chuan min rawn be vat a,, Joseph-a leh Sangtea pawh ka hmu zawm nghal,,Mahse Puii erawh chuan min en tawh hauh lo,,thildang sawiin Sangtea nen an in be char char a,, ka thaw hak a,,”Tete” ka tih rual chuan rawn hawi in a nui nghal sang a,,” Ehe Sir Zira chu…” a ti nghal hluai a,,ka hrilhhai lek lek….

“Inbia ang” ka tih chuan,,”Sawi la” tiin ala nui reng a,,”Hetah lo” ka tih chuan a thian te a melh kual a,,”Ah kan buai deuh a,,min hrethiam mai rawh”tiin Sangtea lam chu a hawi lehnghal daih a,,ka dawhtheihna in a tlin tawh lo,,a banah chelh in,,ka kai chhuak dawr dawr a,,a tal ve phat phat a,,”Min thlah vat rawh,,miin min en ania” tih leh thil dang a sawi nawk mai,,Mc rooftop ka thlenpui rualin ka thlah ve chiah thung….

A lam ka hawi a mitmeng ling hlara min melhna chu ka en reng a,,”Eng nge i hriat a??” a tih vin hlar chuan ka chhang lo,,kut a kuangkuah at a,,”Eng nge i sawi duh chu?”ti nghal hlakin a sir lam chu a hawi nghal hmak,, “Ka ngai che” a bak sawi tur ka hrelo,,a rawn hawi nghal zat,,”Nupui nei i nih kha theihngilh suh” a ti hmak a,,Zawh duh leh sawi tur tam tak ka nei mahse engmah ka ngaihtuah chhuak zo silo anih hi!!!!

Rei tawk fang kan din hnu chuan a thaw hak a,,”In chanchin ka lo hria a” a tih chuan ka rum nghut a,,ni e media lamah a darh nasa khawp ang,,ka hming pawh a ri tel ngei ang tih ka hre bawk,, “Jenny a tha maw??” a ti zawm lehnghal a,,”Umm” tih chiah in ka chhang,,”Anih i chhungte an tha em??” a ti leh a,,”Umm” ka ti leh hmuk,, “A that chu,,thian nei ka ni sia,,ka kal ange” a tih chuan ka rum nghut a,,” Lalhlupui min zawt ve dawn lo em ni??” ka tih chuan a mit ko a san ak a,,”Engmaw??” a ti deuh ha a,,ka kut pahnih a ka kawnga dawm in ka nui chhuak hawk a,,”Ka that leh thatloh min zawt ve ta che” ka tih chuan,,,”Ahh kha nang te chu i that hmel em kha…” a ti hmak nia,,a va han chimawm si em!!!!

Inhnuai pana a chhuk chuan ka zui zel a,, “Eng nge??” a rawn tih vin hlar chuan ka nui mai a,,Thlathum hnua ka hlim ni ber a ni ta hial ang,,kan inbe tam lo mahse ka hmu ringawt pawh hi ka hlim em a ni… “Puii” ka tih chuan min chhang lovin a kal lui zel a,,mahse a nui ru sak kha ka hmu hman,,chutia kan inzui zel laia kan hma lama Jenny leh Anu ka hmuh chuan Ka hmaa kal chu a ding dat a,,ka ding ve nghal…..

Anni pawh chuan min hmu ve tih hriat takin kan hmaah chuan an rawn ding a,, Jenny chu a ngui ngiai a,,Anu erawh a nui sang thung,,”Bawiha hetah eng nge i tih ve a??” Jenny nu in a tih chuan ka chhang lo,, Puii chuan “ka kal ange”a tih rualin min kalsan nghal a,,

“Amah kha a mi??” Jenny-in rilru nat hmel zeta a Puii kal liam hnua a tih chuan ka lu ka bu nghauh a,,”Ka tihpalh aw,,ka hma ka sial vang in hrehawm takin ka siam che a,,zaninah ka rawn kal ang,,” tiin min kalsan a,,Puii pawh ka umzui tawh lo…..Jenny thusawi kha eng nge a awmzia ni ang…..

Zanriah kan ei a,,tumah kan tawng lo,, Chaw kan ei kham chuan ka pa in thutkhawmna lamah min ko khawm a,,engmah a sawi lo,,rei kan thut hma in doorbell a ri a,,ka nu in a chhawn vat a,, Jenny leh anu ka hmuh rualin vawiina ka rawn kal dawn ania a tih kha ka hrechhuak leh chiah,,

“In chhungkaw chunga ka chetdan avang khan khawngaih in min ngaidam hram rawh u” Jenny-in a tih chuan ka pa chu a rum nghut a,,

“Thil kal tawh chu kal tawh ania hun in liampui tawh rawh se” ka pa in a tih chuan a Jenny chuan lehkha a rawn phawrh a,,

“Zira hei hi sign la,,kan inthenna tur anih kha,,i nun ka tihbuai naah khan min ngaidam leh dawn ania” a tih chuan lehkha chu ka la kang vat a,,Jenny ka en chuan a nui sak a,,lehkha chu ka sign ve ta nghal a,, “Kan kal nghal mai ange” Jenny nu in a tih chuan an ding nghal a,,keipawh dingin ka zui chhuak ve nghal a,,

“Nangma vangin ka fanu nen kan inkar a that phah a,,ka lawm lutuk aw” Jenny nu in nui var var a tiin an car lam pan chuan a kal a,, “Khatiang ka tihna chhan kha ka duh em vang che ania mahse hmangaih na tel lo inneihna hi hlimna a awm lo tih ka hrethiam tawh” tiin Jenny chuan nui sak in ka biangah a rawn fawp zeuh a,,min kalsan ve nghal a,,An kal liam rual chuan Inchhungah chuan ka lut zui nghal a….

“Ngaihzawng neih fimkhur tawh ang che” ka pa in thutkhawmna ka thlen rualin a ti nghal hmuk,,ka zak ru viau lehnghal,, “Nupui neih lehnghal tum miah suh” Betty-in a tih chuan kan nui ta hak hak a,,a chhan pawh ka hlim a ni,,tunah chuan Puii bulah zalen takin buaina awm tawh hauh lovin ka awm thei ta,,Ka nu pawh in ka chhungril hlimna chu a hmu thiam tih hriat takin,, “I muhil theilo ange,,bialpa pawh alo nei mai thei tawh ania” a ti sap chuan ka lu ka thing a,,ka nui vur vur a.

STARLIGHT – 42 (Last Chapter)

Last chapter kan ti ta vang mai,, Chhiartu te vang liau liau a,,Hei chen he story bik hi ziak thei ka ni a ka lawm takzet a ni. STARLIGHT lo chhiar a lo tuipui ve tu te min hlutsak tu te zawng zawng chungah thinlung takin Lawmthu ka sawi tak meuh² a, ka thawnthu ziah lehzel turah pawh min lo chhiar sak leh zel turin ka ngen in ka sawm che u ania,,infel si😘😘😘😘

( TETEI POV )

Ka beisei aia hmaa Lalnunzira nena kan inhmu chu awmdan ka thiamlo,,be tha viau dawn ila,,midang pasal a ni tawh a,,mahse ka be lo phal bik silo….Ka theih tawp tak meuh meuh a Amah theihngilh tuma ka beihna zawng zawng te kha engmah lo mai anih zia Amah ka hmuh leh rual chiah hian ka hrechiang takzet,,Kuah thlawp a,,ka ngaih thu hi hrilh mawlh mawlh ka chak,, mahse chu erawh engtikah mah ka tih leh theih tawh ngailoh tur a ni si…..

A that leh thatloh ka zawh ve loh avanga a landan naupang chhia zet hi a nupui neih hma kha ni sela chuan ka piai nawk nawk duh hial ang,,Mite chuan val sinior tiin sawi thin mahse ka mize mil tawk leh ka kum zatin min kawm in ka bulah khan a awm thin a,,ka hlimna leh ka duhdan min zah sak em em a ngaipawimawh tu anih hi ka hailo,, chutiang khawpa ka laka thatna leh min hmangaihna lantirtu mipa hi keipawn ka hriat hma hauh in ka hmangaih chu a ni si a,,mahse ka hmangaih thu takngial pawh ka sawi ve thei ta silo,,ka hmangaih ve a ni tih ka hre har lutuk te kha ka indem thin…..

Jenny-i leh anu ka hmuh rualin ka kalsan nghal a,,mahse ka chhungril erawh a na vawng vawng thung,,kei nilo hmeichhe dang nena inzawmna an neih avanga ka natna te,,Jenny ka thik zia te hian awmzia a nei mawlh silo,,Ani kha thik viau mah ila a nupui a ni tawh miau a,,ka thik phak rual a ni tawh silo….Ka mittui rawn hnam sawk chu duh lovin ka hui thuak a,,Mawitei te bul ka thlen leh rual chuan ka nui lui suk a,, mahse min hrechiang tu te ngang an ni hlawm bawk a,,i tha em??tiin min zawt nghal vat a,,Kan duh ang tam zawk kan bazar tawh a,,a tuk lama bazar zawm turin kan haw ta zawk a….

Zanah pawh Lalnunzira bawk ka ngaihtuah a,,a hma zawng aiin a cher a,,mutmu a hmu tha lo tih hriat takin a mit hnuai a dum kual ruih a,,Ka hmel a hmuh ruala a hlim hmel thleng khan ka inkhawngaih tluk zetin ka khawngaih takzet,,mahse he thu Lalmuanzuala min hrilh fo leh Amah Zira ngei pawh in a sawi fo thin,,”Kan duhdan in engkim a thleng thei lova,,kan duh loh dan pawh in a thleng vek kher lo,,engkim rel thin tu Pathian hian kan thatna tur zelin ni a rel thin” tih bawk hian ka inhnem leh thin……

Khua a var a,,thil tam tak lei ngai kan nei tawh lo bawk nen chhuah pawh kan hmanhmawh tawh lemlo….. Tukthuan kan kil laiin Joseph-a chuan,,”Tete nimin khan kan tawng kha i ngaihven ta lem lova,,Zira kha kan inneih tur thu hrilh in kal ve turin ka sawm ania” a tih chuan ka melh zawk a,, “A rawn kal awm lo emai” ti lia puatin ka chaw ei lai ka ei malh malh a,,an sawi zawm tawh lo….

Chhunah pawh bazar lamah kan chhuak a,, Bungrua mamawh zualpui kan en hnu in,,a tuk hma taka chhuak tur kan nih avangin kan duhzawng eng eng emaw kan lei nual hnu in kan haw nghal a,,Esi chaw eia kan sawm avangin a rawn tel ve tawh bawk a,, Mawitein a phut tlat avangin kan rualin inneih hmangin a rawn kal ve nghal dawn bawk a,,Zan lam pawh riak nghal mai turin a rawn kal a,,kan ri ve laih laih a,,thil ho mai mai sawiin kan nui nasa hlawm viau bawk….Hlim takin thiante bulah nui mah ila rilru khawi maw laiah hian Lalnunzira hi a thi thei bawk silo…..

Zingkar hma takah kan chhuak a,,Esi bike chuan a duh tlat loh avangin Sangtea nen kan inphur a,,Kawng chanveah erawh Bike ka khalh a,,Anni pali car-ah an chuang thung,,Ka khalh chak leh tawh nge ka hrelo kan khua ka luh atanga darkar chanve velah an rawn thleng ve chiah a,,helamah engkim peih sa vek a ni tawh a,, Mawitei te inah kan lut a,,chuta tang chuan mahni in lamah kan haw theuh a,,Esi erawh kan in lama thleng turin ka hruai a,,In kan thleng a,,Ka nu te pawh an lo ri leh laih laih a,, Esi pawh in nuam a tih hmel viau mai,, Esi hi chuan ka chanchin tam zawk Sangtea hnen atanga a hriat miau avangin min zawt hran ngailo….

“Te saw saw mi Nicky-a room??” ka tukverh atanga kawk a tih chuan,,”Umm” tih chiah in ka chhang a,,”Zira nen in inbe tawh em??” a tih leh chuan Aizawla kan inhmuh thu ka sawi chuan a mit ko a san zeuh a,,a nui hak hak a,,a ngaihna hrelo zetin ka melh a,, “Eng nge” ka ti hu bawk,, “In inhmuh lai tak chuan Di hlui tih Lalnunsanga sak kha lo play se ka va ti ve” a tih chuan,,”Hmeli leh” ti hlakin ka kalsan nghal daih a…..

Innei turin kan buai tawh a,,thildang ngaihsak pawh kan thei tawh meuh lo,,Zan lama man inhlan tur anih avangin Mawitei te in lamah chaw kan ei tur a ni a,,kan buai nak nak hlawm khawp mai,,kan thiante an rawn tel tha tawp bawk a,, Chaw kan ei hma chuan Joseph-an Nicky-a thlana kal a rawt tlat a,,Kan thiante rawn tel ang ang te nen chuan kan kal ta hlawm a,, Joseph-a hian a thianpa hi a ngai ve tawk anih tih ka hria,, Nupui a neih dawn meuh chuan a ngaihtuahna a luah ve pawh a ni mahna kei meuh pawh in ka ngai si a…..

Thlan hmaah chuan kan ding a,,Tumah an tawnglo,,ka kun ngal avangin eng nge tih tur ka hrelo,,ka hnunga Mawitei min rawn khawih zeuh chuan ka hawi chhuak zawk a,,min lo en vek chu niin,,Ka aw ka thian kharh a,, kan kal ho chang pawh a ka tih fo dan in,,”Hey Giraffe kan lokal a,,” ka ti sap a,, Joseph-a zawk in awm ve ang mai in a be nghal a,,midang pawh in a in dawtin an be tliar tliar a,,”Lalmuanzual ka ngai che” ka ti h sap chuan Joseph-an ka darah a rawn kuah vat a,,ka mittui a far fap a…..

Zanah man an inhlan a,,kan ri nak nak a,,tunah hian Lalmuanzuala ka ngaih tluk zetin Lalnunzira pawh ka ngai,,kan hlimni ah hian tel ve ka tihna chu a inzat chiah bawkin ka ring,,Nicky ka natna leh lungngaihna zawng zawng ka thlenna leh ka hmangaih em em mahse he khawvel a engtikah mah ka tawng tawh dawn lo mahse Lalnunzira erawh hmangaih viau mah ila engtikah mah kan awmdun theilo mahse kan la intawng leh fo dawn si a….. Hringnun hi a fair lo tia vui duh ngailo mahse tunah zet zawng ka vui a ni,, ka tan hian nun hi a fair hlollo Ka hmangaih lak ata lak hran ka ni a,,kum10 hnuah min hmangaih tu pek leh ka ni a,,mahse chupawh ka ta a ni thei chuang silo….Ka duhloh avanga ka neih theih loh ve ve an nihna hian na min tih zual tira ka hmangaih ngawih ngawih te ve ve an ni asin……

Inneih Ni a ni a,,Mawitei mo kawrfual nalh zet chu ka siam that sak mawlh mawlh a,, Keipawh in kawrfual Purple nalh zet a nghawng zau lam lek lek chu ka ha a,, Darthlalanga ka inen chuan nalh ka inti ve takzet,, “I nalh takzet Monu i khum” Sangtean a tih chuan chimawm zetin Ka hmaa Mawitei ding chu kan nuih nghal a,,a huat tawk a tling leh viau…

Biak Inchhung lenglo khawpin mihring an tam a,,Inneih thutiam an tiam laite,,inneih thuchah an sawi lai te chuan uluk takin ka lo en in ka ngaithla a,,ka tan hian hetiang hun hi a awm ve pawh ka ringlo… Inneih inkhawm zawh chuan,,pawnlamah thla kan la a,,kan thiante ho pawh an kim viau mai…. Sangtean min kheuh zeuh chuan ka en a,,a kawh zeuhna lam ka hawi chuan ka mak ti lutuk chu tawng nachang ka hre lo,,Ka landan chu ka mawl hmel viau in ka ring,,ka ding mawl tawp a,,ka lam pana mipa suit Grey color ha rawn kal chu mit khap lek lovin ka melh a,,ka bula awm te pawh hi ka hrechang tawhlo……

“I nalh lutuk” ka zawn a rawn thleng rualin a ti sup a,,mawi zetin a nui suk bawk a,,mahse chhan nachang ka hrelo…Ka mumang ni hialin ka hria…..

“Bawihi i mit tal kha khap ve la” nuih za insum zeta a tih chuan harhchhuak thutin ka lu ka thing nawk a,,ka bula mite lo nui ri hawk ka hriat rual chuan ka hawi kual nghal a,,ka thiante ho chuan min lo nuih vur vur hlawm a,,ka zak viau na in zaklo angin ka awm hmak…..

“Eng nga ti nge hetah ilokal ve??” ka zawhna atthlak zia chu ka hriatchhuah meuh chuan ka sawi zo vek tawh si,,min chhang lovin a nui vur vur a,, Mawitei lam enin,,”Mawite i thiannu hi thla ka lakpui ve duh sia ka hruai dawn nia,, Biak In chhungah hian” a tih chuan Mawitei chuan nui var var in,,”A man a ngai ang aw” alo ti zeuh a,,Nui sukin Biak In chhunglamah chuan min kai lut ta a,,mi pakhat hian ka hnungah min zui tih pawh ka hria tu nge anih ka hrelo….

Thla kan lak chuan ka hnunga lokal chu UChhana a ni tih ka hre ve chiah UChhana a chhuah rual chuan ngawi renga chhuah ve nghal mai ka tum a,,mahse ka banah chelh in dim zet hian a lam hawiin min din tir a,, ka ngaih vanga ka mualpho mai hlau in Amah pawh en duh tawh lovin ka kun ngal a,,

“Puii khawngaih in ka mitah hian min en teh” a tih chuan hreh zetin ka hawi chhuak a,,ka mittui erawl a tling pam a,,

“Puii min hmangaih em??” a tih chuan mak ti zetin ka melh a,,Biak In chhungah hetiang thu hi min zawt a eng nge a ngaihtuah ang le????”Ihh nang….” ka sawi zo hman lo,,”Puii engkim a tha tawh a,,ka la hrilh vek ang che mahse ka zawhna chauh khi chhang rawh” a tih leh chuan chiang zetin ka melh a,,a mitmengah hian dawt a sawi lo tih chiang takin ka hmu,,helai hmun a rawn thleng anih chuan ka hnenah hian sawi tur aneih ngei pawh ka ring….Chuan a zawhna pawh ka chhan ngei a ngai bawk….

“Puii??”beisei nei zeta min koh nawn leh chuan a mitah en kal in,,”Ka hmangaih che” ka ti sap a,,a hmela hlimna chuan mak takin ka thinlung chhungril berah hian hlimna min pe a,,a nui hmel aia hmuh nuam hi a awm leh thei pawh in ka ringlo…..

“Anih nangin min la hmangaih reng em??” ka tih chuan ka chalah a fawp zeuh a,,inla hrang lehnghal in min en run a,, “Vawikhat ka hmangaih tawh che a,,a tawp thlengin ka hmangaih ang che,, Engthil mah in a tidanglam ngai lovang”nghet charh in a ti a,, Tuna a thusawi hi engmah daltu awm hauh lovin ka ringnghet hmiah bawk…. Min kuah a,,keipawh in ka kuah let a,,ka hlim a ni ka hlim takzet,,ka hlim em avangin ka biangah hlimna mittui a rawn luang a,,ka ngaih em em mipa nen kan inhmangaih thu sawiin kan inkuah mek chu a ni a,,min kuah reng chung chuan min chawi kang a,,inthlah kan tum lo ve ve pawh a ni mahna,, Kawngkhar lam ka hawi a Nicky-a mawi zeta rawn nui ka hmuh chuan ka mittui kar atang chuan ka nui ve ta var var a……

A TAWP TA…….

😘😘😘😘😘❤️❤️❤️❤️❤️❤️❤️❤️

Leave a Reply