You are currently viewing Thihna Kawngkhar (Completed)

Thihna Kawngkhar (Completed)

Spread the love

THIHNA KAWNGKHAR

JONSMELY BAWITLUNG

“Bawihte i muhil theilo leh em ni?” titu ka ṭhiannu leh U anga ka en leh ka chenpui Sangpuii chu ka en a, mut ka kham tawk loh avanga ka mit thip zet chu nuai nak nakin, ka lu ka bu nghat a. “I chawlh a zo tawh sia ka khawngaih che e,” tiin ka mut ṭhat ngailoh avanga min khawngaih hmel zeta min en in, ka khumah chuan a rawn ṭhu thla nghal a. Amah bawk chuan, “In phih fai rawh Duty kan neih kha”a tih leh chuan, “Awle” tiin ka nui lui a, khum chu ka thawhsan ve ta a.

Malsawmsangi ka ni a, Kum28 niin Blessed Hospital, Aizawla Nurse ka ni. Kum thum liam ta khan ka nu leh pa te car accident avangin an boral a.Nurse ka thawh ṭan kum a ni nghe nghe, kha thil a thlen aṭang khan zantin mangṭha lo avangin ka buai a, muthilhna damdawi ka ei a ngaih phah fo a, unau pahnih chauh kan ni a, Phir niin ka u hi kei aiin darkar khat chauh in a upa a, Malsawmdawngzuala a ni. Ani chu Gynecologist niin Mizoramah chuan a ṭha ber tia an sawi a tling hial a. Ka nu leh pate an boral khan ka ṭhiannu Sangpuii nen quater kan inṭawm a, Durtlang lamah In kan nei tho a Malsawma Mizoram a rawn awmin Amah in a khawsa zui a, kei erawh quater-ah ka awm zui ta zel anih hi.

Kan in siam zo a, hmanhmawh deuh takin Damdawiin lam kan pan a, Malsawma nen hian kan thawhna a in ang a,mahse kan duty na a in an loh avângin kan inhmu khat viau thung. Unau inngaina tak kan ni a, Amah aia hna ka neih hmasak vang leh ka nu leh pa te boral avang khan Quater a awm laklawh ka ni a, kumin a ral chuan a bulah ka awm ve tawh ang. Sangpuii chuan a phallo viau a mahse ka u nena kan awm chu min duhpui ve tho a,kum a laklawh em avanga la insawn lo mai chauh ka ni. Nilengin kan buai leh a, Doctor ward fan ka zui a, Ward lamah ka duty avangin buai a na duh vet vet kher mai. Sangpuii nen pawh kan inhmu meuh lo. Kan damdawiin a lian a, damlo pawh kan ngah thei viau a, Damdawiin thlen tawh chuan awl hi kan nei hman meuh lo a ni.

Tlailam anih chuan Bazar kal kan duh avangin Sangpuii nen bawk kan in zui haw leh ta a, Anni pawh an buai ve thawkhat aniang a mitmeng a dul ruih mai. Kei aiin Kum5 ngawtin a upa a, Nula sinior a ni tawh bawk a, engkimah ka ring em em tawp mai. Ka ngainat ang chiah in Ani pawh hian min ngaina in min duat a, hnalama ka sinior alo ni ve zel, ka nu leh pa te aiawh tu tak tak ang hi a ni mai a, a bula ka awm hi vannei ka inti hle bawk. Mamawh eng eng emaw kan lei hnu chuan in lam kan pan a,kan titi mial mial laiin Motor horn rawn ri tuar avang chuan Sangpuii chu a au chhuak ṭhawt a, keipawh kawngsirah chuan kan petek nghal dawr bawk. Leia ka tluk ruala kan hmaa Bike tlu leh a khalhtu ni awm tak kawngpuia let reng ka hmuh rual chuan rang taka tho lehnghalin, buaipui tur chuan ka pan nghal vat a, Sangpuii che sawn chuan kan piaha mi pakhat Bike hnunglama chuang zawk ni awm tak inhliam chu a buaipui ve nghal a.

“Ṭhianpa, i harh em?” tiin a fullface helmet chu ka phelsak nghal vat a, a hmel ka hmuh rual chuan hmanhmawh zetin a awm ka nem nghal vak a, nikhua a hre miau lova. Ka theih ang angin CPR ka pe vat a, ka hmanhmawh bawk nen ka thlan a tla nghal hluam a. Chutia kan inbuaipui lai chuan tlangval chu a rawn thaw kawk a, keipawh ka thaw huai thei. A thawk dan ala pangngai lo hle a, Damdawiin rang taka kan thlen a ngai tih ka hria, Sangpuii leh tlangval pakhat zawkin kan bul an rawn thlen rualin Damdawiin lam kan pan nghal a ngaih thu ka sawi chuan, tlangval chuan tu emaw a call vat a, motor a rawn thlen fel hnu chuan Damdawiin lam chu kan pan leh ta nghal a, ka mal chunga mipa mu chu ka melh leh vang vang a, mipa hmelṭha tak a ni. A thawk dan mumal lo zet avang erawh chuan ka rilru a ti hmanhmawh takzet.

Kan thawhna damdawiin Blessed Hospital a hnai ber avangin kan in nawr lut nghal thuai a, Duty ho in min hmuh rual chuan min rawn buaipui vatin, kan hruai ber pawh Emergency room-ah kan nawr lut nghal bawk a, Doctor in a buaipui zawh chuan ICU lamah an dah lut zui a, a ṭhianpa Sangpuii buaipui zawk erawh hliam na lutuk a neilo hlauh thung.

Casualty a kan awmlai chuan Doctor Reuben-a chuan thil thlen dan min zawt a,ka hmuh chin chin ka sawi hnu chuan, “CPR i pe vat kha a ṭha lutuk, nilo sela chuan a thi ngei ang, Police case a ni tlat mai tlangval.” tih zawmin, tlangval hliam nurse dangin an buaipui mek lam chu a melh a, “Lalrinsanga ka ni e” ar lo ti vat a, “Im..Rinsang, i ṭhianpa hi damdawi chak tak pek a ni a, chu chuan a thawkna lam tibuai in kha accident kha a thlen phah ta a ni.” a tih leh chuan mak ti zetin ka lo en a, CPR kha pe lo ta ila a thi ngei ngei dawn tih chiang takin ka hrethiam ve nghal bawk. Rinsanga hliam an tuam zawh hnu chuan keini pawh in kan kalsan zui ve ta a.

Damdawiin kawtah chuan ngawi rengin Sangpuii nen chuan kan ding dun a, khua a thim tawh a, kan haw lehna tur ka ngaihtuah a ka peih lo kher mai. Kan Damdawiin leh nurse Quater hi a inhlat angreng viau a, Damdawiin bulah hian Quater ṭhenkhat awm mahse Sinior deuh vek awm tirin, keini erawh Damdawiin aṭanga hla deuh takah kan awm thung a, mahse a hmun a nuam in Aizawl khawpui chhungah chuan a hmun a reh a, nuam pawh kan ti viau mai. “Taxi la mai ila,” kan thil leisa ak bawr deuh ṭeuh a Sangpui’n atih chuan ka aw rang viau mai. Ke chuan ka haw peih tawh bik miau lova.

Taxi melh a kan ding lai chuan kan hmaah Car Pawl a rawn ding nawlh a mahse tu car nge tih ka chiang khawp mai. Kawngkhâr a rawn inhawn rualin kan ṭhian dun chuan kan lut nghal vat a. “Mate ti nge in va tlai ve a?” Malsawma’n a tih chuan chhang lovin ka nui ringawt a, “Accident kan buaipui a,kan rawn let leh” Sangpuii zawkin a tih chuan a motor khalh pah chuan min rawn melh zeuh a. Ka hah hmel a hmuh hian min khawngaih leh tawh tih ka hre mai. Sangpuii nen eng eng emaw sawiin an titi a, kei erawh ICU a kan dah tak a hming pawh ka hriat loh tlangval hmelṭha zet kha ka lo ngaihtuah a, In kan thlen lai pawh ka hre hauh lo.

“Mate i chau ve tak tak anih kha,” min duat taka ka lua a rawn chul chuan ka lo nui leh ringawt tawh. Kan unau hi ṭawng tam zawk zawk kan nilo a, kei phei chu biak ka chhan bak hi ka hna thil anih loh chuan ngawi renga awm a, suangtuahna khawvela chen hi ka nuam tih zawk a ni. Sangpuii hi a fel a, min be peih in, a titi ngaihthlak te hi nuam ka ti viau a, Ani lo chu kan thawhpui te ho pawh hi ka kawm tehchiam ngailo.

Malsawma pawh kan inah zanriah a ei ve nghal a, Sangpuii nen hian an inbe thei viau a, kei erawh Tv hmaah ṭhu in, Turkish Serial Mizo a lehlin chu ka en a, nidanga ka tih fo danin Chanchinthar hunah DDK channel ka hmet chhuak a, Sangpuii leh Malsawma titi pawh an reh ve nghal a, Chanchinthar a zo a, sawi zawm tur an ngah lehpek hle. Malsawma a haw dawn chuan inenkawl ṭha tura min chah mawlh mawlh in a chhuak zui nghal a. Ka mut a chhuak ve deuh nen pindan panin ka khumah ka mu nghal a.”Zanin chu i chau ve tak tak anih hi.” tia Sangpuii’n puan min sin ṭhat tir lai pawh chu ka mang hriat ruai ringawt.

“Malsawmsang.” ti vin ṭhat tu avang chuan ka meng nghal kawk a, ka awmna chu ka hrelo reng reng. In pahnih inkara hmun chep takah ka lo ding a, ka hawi kual ruai a, ka bangbo takzet a ni. Kei te chu ka khumah ka mu a ni reng si a, tiin ka ngaihtuah a, tu nge min ko tu kha le? ti rilru in ka hma leh hnung chu ka hawi tawn zak zak a. “Malsawmsang min pui rawh.” ka hnuglam aṭanga hmeichhia au ri avang chuan hawi let vatin aw lo chhuahna lam nia ka hriatah chuan hmanhmawh zetin ka tlan nghal dawr dawr a, mahse ka awmna hmun chu ka tlansan thei reng reng lo, ka tlan thui viau a ka hriat pawh in bang pahnih inkar chep zetah chuan ka la awm reng a, ka hmanhmawh tehlul nen ka tlanchhuak thei reng reng lo chuan min ti hah zual a, aw ka hriat ngai bawk chuan ka hmingpuma min ko leh in, “Khawngaihin ti suh.” a ti zuai raih raih a, “Khawiah nge i awm?” tiin au let ve mah ila, min chhang tu tur tumah an awmlo. Ka tlanna lam chu melh zui vung vungin a tawpnan tiin theihtawp chhuah tak meuh meuh in ka tlan leh a, kawngpui kam zau lai ka pawh hlawl mai. Ka hawi kual nghal zak zak a, ka hmalam piah deuh a, hmeichhia ni awm tak kawngpui sira mu ka hmuh chuan hmanhmawh tak chuan ka pan nghal vat a, mahse chu hmeichhe hmel ka hmuh meuh chuan ka rak chhuak nghal ṭhawt a.

“Bawihi harh rawh, keimah” Sangpuii chuan tiin min kuah bet a, Sangpuii aw ka hriat rual chuan ka rilru no chhuakin ka mittui a luang nghal zung zung a. Ka mumang vek a ni tih hre mah ila kha hmeichhe ruang dâng var pupin chiang zeta min melh run leh a pum a thisen hlira khat khan ka thau ah man in, khatiang taka mitthi ruang rapawm leh hmuh hrehawm kha a takah pawh ka la hmu ngailo. Damdawiina thawk ni mah ila khatiang kha chu a takah hmuh theih in a awm ka ringlo, awm tehreng pawh nise ka hmuh duh hauh lo tur a ni. Hlauhna in min tuam tlat a, ka tha khur la a reh thei lo. “I ṭha em? Mangchhia bawk em ni?” Sangpuii’n a tih chuan ka lu ka bu nghauh a, “Mahse a dang daih.” ṭah la chhuak taka ka tih chuan, min kuah leh in, “A ṭha vek tawh e.” tiin ka samah a chul hauh hauh a, boruak ka hip nghal vang vang a, Ani hi awm lo se la vawiin ni hi ka thleng tawh lovang, ka ti rilru neuh neuh a.

Kan buai a reh a, chhun chawlh kan neih lai chuan Inchhung berah thli dawng turin ka chho a, ka mumang bawk chuan ka ngaihtuahna a rawn luah leh a, ngaihtuah loh ka duh avangin tih tur ka zawng ngar ngar tawh a, mahse ka ngaihtuahna erawh a kalsan thei meuh silo. “Nga ti nge?” tiin ka phun chhuak sap a, ka hmalama Aizawl khawpui lang uar chu ka thlir a, mangchhia avanga ka buaina hi reh tawh se ka ti ngawih ngawih.

“I va mal ve a?” ka hnunglam aṭanga rawn ti thum dûttu avang chuan ka hawi let nghal vat a, mipa hleitling tak leh hmelṭha tak lo ding chu nimin lawka accident tawk Sangpuii nen kan buaipui kha a ni tih ka hre nghal, a hmel ka hmuh leh rual chuan ka lai ru nghal hle ringawt a, min biakna pawh chhang lovin ka nui sak a, ka lam pana a rawn kal zel avangin ka hawina lam chu ka en san lehnghal daih, a ke a bai sulh sulh a, tûr pek anih vang nge a hmel a dawldang reuh hle a. Ka bulah chuan ngawirenga rawn ṭhu ve in mahni ngaihtuahna ve ve kan kawm a, Ani pawh hian ṭawng vak ai chuan a suangtuahna khawvela chen nuam a ti zawk aniang.

“Eng nge i an?” Ngawirenga kan ṭhu deuh vang vang hnu chuan Amah pawh en lem lovin ka zawt a. “Doctor kha chuan ka ṭhat vat tur thu a sawi alawm, ward-ah i duty ve lo em ni, ka la hmu ve miah lo che?” a tih chuan nui var varin, “In building lamah ka duty lova, ka kal a hun tawh a,” ti nghal in ka ding nghal hluai a, “Malsawmsangi maw, hming mawi tak anih kha,” atih chuan ka batch tarna chu melh zawkin, “Ka lawm e, dam vat rawh aw.” tiin ka kalsan ta nghal a. Inhnuai ka thlen hnu chuan ngaihtuah chhuak thutin a hming ka zawt ve lo tih ka hriatchhuah rual chua â ka inti takzet. Mipa lamah hian ka lerhlo mai nilovin ngaihzâwng hi ka buaipui ngailo hrim hrim, Higher kan kal lai khan ngaihzawng ka nei ve a, mahse Nurse ka zir laiin ngaihzawng dang min neihsan hnu khan ngaihzawng hi ka nei leh ta miah lo.

Zeilo tih ka hlawh fo a, mahse zei tur pawn tawn hriat ngah ve angai anih ka ring, kum lamah pawh naupang chhia zawk zawk ka ni tawh lo chung hian mipa han biak dan vel hi ka thiam thei hlawll o a ni e. Ka ngaihzawng neih ve chhun ka ngaihtuah a, rinawm takin a tan khan ka awm tawp a, ka zeilo tih hrereng chungin ngaihzawng min neihsan ruala a bialnu leh a ṭhiante’n ka zeiloh luat vanga min kalsan anga an sawina te leh ka thawhna hmuna rawn kal a buaina min siamsak zawng zawng te ka ngaihtuah let chang hian mipa hnaih leh chakna hi ka nei ngailo. Chuvang pawh chuan hmeichhe zei tak nih ka tum ngai lo a, keimah ka nih theihna hmuna mahnia nun hman hi ka la lawm tawk viau. Mangchhia in min bawhbuai chang erawh chuan ka nu leh pa te ka ngai ngawih ngawih thung ṭhin.

“MS patient pakhat Cabin no3 a mi saw ilo hmu em?” Nurse Remremi’n a tih chuan, “Hmu miah lo,” tiin ka en deuh ha a, a mangang hmel ka hmuh chuan, “Tu nge a? Bathroom i check em?” ka ti nghal vat a. “Lalrengpuia, Check vek e, injection a lak a hun a.” tiin a hawikual ruai a. “Lalrengpuia” ti sap in, kalsan mai ka tum chu ka ngaihtuah chhuak thut. “Remrem, a ni em ka hrelo a, mahse patient pakhat chu Rooftop-ah a awm.” ka tih chuan hmanhmawh zet hian a tlanchho nghal a, a tlanna lam chu ka melh nghal vung vung a, a chhuak lawk a ni thei a, eng ngati nge khati taka a hmanhmawh kher le? A tlanbo dawn pawh a ni awm tawp silova.

Ka duty na tur hmun ka thleng a, kan buai lehnghal char char tawh. Damdawi sem, damlo enfel leh mamawh an rawn lam ang te chu kan pe nghal zung zung a, thlathar aṭang phei chuan ka Night dawn lehnghal a, peihawm vak lo kher mai. Kan hna anih miau avangin kan thawh a ngai miau a, chutih rualin a chang hi chuan ka peih tawh lo tia bansan mai hi ka chak rum rum ṭhin. Kan damchhung hunah hna kan thawh a ngai miau si a, hnathawh loh chuan ei hmuhna tur a awm lo tih chiang taka hretu ka nih miau avangin ka hah ber lai pawhin theihtawp chhuah a ngai leh ṭhin si a. Ka nu leh pate kha la dam sela chuan hetianga rim taka ka thawh kher a ngai bik lo tur. Malsawma’n hnathawk ve tho mahse hmalam hun thui tak a nei ve tho a, nupui fanau a neih hunah pawh atan hnawksak mai ka nih loh nan ka hna hi chu ṭha takin ka thawh a ngai tih ka hriatrnegna te hian ka peih loh chang pawh in ṭha takin ka thawk leh ṭhin anih hi.

“MS Naktuk Duty inthlak ang,” Kan nurse sinior UAtei’n a tih chuan ka nui ringawt a, “Ka nu a damlo a, ka night a ngai sia,” atih leh chuan a hmel ka en a, a rilru a hah ve hmel takzet. “Um, lo sawi la,” ka tih chuan lawm hmel zetin min en a, “Mate, ka lawm viau ang, midang ka sawm a, mahse harsatna nei vek kan ni bawk nen remchang an awmlo, diktak chuan Nangpawn i duh ka ring chiah lova.” a ti duah a, a hmelah a hlim tih a hriat a nui var var a. “Min mamawh hunah ka tlanchhe ngailo ang. E chuan, Cabinah nia aw duty tur.” a tih leh chuan tlem chuan ka peih lo leh deuh. Mi nawlpui awmna Ward pangngai a duty hi chu a nuam phian zel a, kan thu an awi in, min zah thiam viau zel a. Cabin erawh mi hausa damlo ho awmna a ni a, duty tan a hahthlâk duh viau zel. Kan thu aiin an thu a lal hmasa in eng emaw palh thleng a awm changin mi hausa ho hi chu an in hre kual vek zel si a, Private Hospital kan ni nen a buaithlak thei viau mai.

Zanah chu a tuk zan ka night tur thu ka sawi a, Sangpuii chuan min ngaihtuah leh viau mai, a chhan pawh a rual lovin zanah ka duty ngai miah loh vang a ni. Ani chu hna ah pawh a sinior tawh a, hotu lam pawn an dah pawimawh a, ka dinhmun hria in min ngaihsak hle a, eng emaw palh thilah tiin hotu lam a dil kha ania. Mahse hetiang anih vang hian ka kum theihnghilh ṭhak khawp a pangchangin a bulah ka khawsa leh ṭhin. “Atei i thlak thei chu a lawmawm hle mai, a nu kha a thi ṭep alawm, Damdawi in dangah a awm a, a lung a ṭha lo a. Mahse Nangmaha i duty tur chu ka ngaihtuah che.” a tih chuan ka nuih var var a. “Atei nu chanchin chu ka lo hre miah lova, a van pawi. A thuhrimah Nula Sinior ka ni ve tawh a, min ngaihtuah lutuk suh aw, chu ai chuan Pasal nei tawh rawh.” ka tih chuan a ner nasa ngang mai. Naupang zawk zawk a ni tawh bik lova, pasal nei tur hian ka nawr fo, a chhungte pawh in an ti tho, an khuaah ngaihzawng chu a nei ve chuan a sawi a, mahse vawikhat mah ka la hmu lova. Biak te pawh an inbe ve ziah tho a, a chanchin sawi hi a duh vaklo nen a sawi anih loh chuan ka sawipui ngai lo.

“Pasal nei rawh min ti ziah a aw, nakumah i U bula i insawn hunah ka nei tak tak ang, mahse kan inneih chuan ka hna hi ka bansan a ngai dawn si a, ka hreh a ni.” a ti hnual raih a, keiin ka hna nuam ka tih vakloh laiin Ani erawh hi chu a tui a, nuam a ti hle tih ka hria, midangte ṭanpui nuam ti mi tak a ni nen, Nurse hna hi chu a thawh tur awm ngawih ngawih a ni reng a ni. “Ngati nge i hna chu bansan a ngaih kher, i bialpa sial deuh hian eng hna nge a thawh reng reng a, engmah la hi i sawi duh ngai silova?” Vui aw zeta ka tih chuan a nui chhuak hak hak a. Ka ṭawng dan avang hian a nuih a za niang.

“Naupang duhawm deuh i ang lutuk.” tiin ka biangah a rawn piai zeuh a, duh lo a ka hawisawn vat chu a nui zui hak hak a, a bialpa chanchin sawi a duh loh vanga thudang sawi a ni tih ka hrethiam mai. Zanriah kan ei a, kan eina kan tihfel hnu chuan phone a hmang a, keipawh in Fb ka khawih a, kan doorbell a rik rual chuan kal vatin ka hawng nghal a, ka u leh Dr.Reubena te an rawn lang hlol a, ei tur leh in tur an rawn khai nual bawk, Sangpuii pawh a phone dah in kan bulah a rawn ṭhu ve a, an pathum titi ka ngaithla leh tawp tawh. Sawi tur hre ve lo mah ila an titi erawh ngaihnawm ti zetin ka ngaithla kar a, ka muhil a ni mahna min pawm kang lawp tu an awm rualin Sangpuii ṭawng lang lang chu ka mang hriat riai ruai a.

Ka au chhuah ṭhat rualin ka mumang rapthlâk zet avâng chuan ka thaw nghal kawk kawk a, ka pindan chhung chu ka en kual nghal ruai bawk. Ka thawm hria in Sangpuii a rawn phei nghal vat bawk. Ka hmel a hmuh rualin no ah tui thli chhuakin min pe vat a, “Mate i ṭha em?” a tih chuan ka chhang thei lo. Tui min pek chu ka in nghal khawlh khawlh a, ka in zawh rualin ka sam huh phang chu ka tuai nghal puat a. “Angai ang chiah kha a ni.” ka ti zawi sap a, Sangpuii chuan mak ti zetin min en a, “Nizana ka mang ang bawk kha a ni, kha hmeichhe ruang pawh kha ala ngai reng.” ka tih leh chuan a thaw hak a, mak a ti ve nge, ṭawng mai nachang a hre biklo.

“A ngai ang chiah hi ka hmu ngailo reng reng. Mang rapthlâk tak tak ka hmu fo a, mahse tuna mi hi chu a dang daih.” ka tih leh chuan, “Min hrilh duh em?” a ti sap a. Ka mumang chu aw kur dar darin ka sawi a, mak pawh a ti ve viau mai. Nidangah chuan accident leh kham sang tak takah te zuangthla in emaw ka nu leh pa te accident lai ka hmu ṭhin a, mahse tun ṭum erawh tu nge anih pawh ka hriat miah loh tualthi lai ka hmu a, vawikhat mai nilo a vawihnihna a ni tawh. A ngaihna ka hriatloh tluk zetin a taka thleng ang maiin ka feel ṭhin a, nidanga ka mang ṭhalo tak tak nena tehkhin chuan a danglam mai bakah a rapthlâk zawk ziah. Ka hminga min ko tu aw lah ka bêngah cham zuiin, kha mitthi ruang kha mitthlaah a cham reng a, min ti hah takzet a ni.

Chhunlamah keima mimal eng eng emaw ka buaipui a, zanlam mu ṭha lo mah ila, muthilh erawh ka duhlo, keimah chauha awm ka nih vang pawh in muthilh ka ngamlo a ni ber e. Chaw ka ei peih rih loh avângin tiffin in zan ka rilṭam huna ka ei tur ka keng nual a, Sangpuii’n hria se min hau nasa leh teh ang chu. Damdawiin ka thleng a, Sangpuii ka hmuh hnuah duty inthlak a hun avângin ka duty na tur lamah ka kal nghal a, Cabin lama ka duty tur chu ka peih lo ru viau mai. Nurse Zirtei nen kan duty dawn a, Ani pawh chaw alo fun ve leh tho mai. Kan tih tur kan ti zung zung a, damdawi sem a hun chuan ka sem tur chin la a chhuah ka tum chu min ko dingin, “Hawh in sem thleng ang,” tiin ka tray ken chu a rawn la a, a kal nghal nal nal a. A chetdan naupang chhia ka tih êm avâng chuan ka nuih ta ringawt a.

Room 1 leh 2 ka pek zawh chuan Room no3 ah chuan ka lut a, Lalrengpuia room a nih ka hria, ka luh ruala keimaha danglam nghal awm hi ka hriatthiam loh tluk zetin mak ka ti. A khum bul ka panlaia ngawi renga min lo melh kur avâng chuan ka chebuai leh teuh hle mai. A damdawi ka pek chu a ei nghal a, Oxymeter vuah sak nghalin, ka hawikual zeuh a, tumah awmpui tu a neilo anih ka ring, damdawi ka pek zawh chuan Oxymeter ka vuah sak chu enin, ka note kenah chuan ka ziak nghal mawlh mawlh a, “I bp check a ngai a.” ka tih leh chuan ngawirengin a ban a dawh a, biak vak ngaihna ka hriatloh tluk zetin Ani pawh hian sawi tur a hre biklo aniang.

“Ka zo e, mamawh na min neih chuan duty room ah kan awm dawn a, i bula pluck kha i hmet mai dawn nia aw.” ka tih chuan a lu a bu nghut a, keipawh ka tray chawiin kawngkhar lam ka pan ve nghal a, kawngka zawn ka thlen chuan kawngkhar chunga light chu a eng de zeuh a, ka hawi let nghal vat “Mamawh i nei em ni?” ka tih chuan a nui suk a, “A ṭha em tih ka enchhin anih kha.” atih chuan ka nui ve tawp. Inhera ka chhuah dawn chuan, a rawn hmet leh a, hawilet lehin “I enchhinna chu a ni tawh em lovang chu tiraw?” ka ti nghat a, a nuih dan chuan a hmelṭha tak tih hmelṭhat zual aiin a sual hmel ka ti zawk daih.

“Zanriah min ei pui la?” tiin a tiffin awmna lam chu a kawk zeuh a, a mizia chu ka haw ru ṭan riau. Nui lui sangin, “Damlo tam tak an awm a, damdawi pek ka ngai tlat, nangmahin lo ei mai ta che.” ka tih chuan a hmui a pet zeuh a, “Damdawi Inah te chuan damlo chu an awm ang chu, Zanriah min kilpui rawh ka ti mai che nia.” atih leh chuan ka melh rum nghal al a, ka chhang anih chuan keimah zawk hi ka thinrim ngei ang, ngawirenga inherin ka chhuak nghal hmak a.

Damdawi ka sem zawh rual chuan duty room-ah lutin tih tur awm ang ang ka ti nghal zung zung a, damdawi Inah hi chuan zan a rei tulh tulh a, buai hi a zual tawlh tawlh ṭhin a, Training mek Atei leh Puipuii te pawh an lo thleng tawh a, Anni pawh an ṭhu hman bik hauh lo. Zirtei a rawn luh rual chuan a rawn phun nang nang a, ka lo nuih var var thung. “Heti khawpa Damdawi In lianah hian duh ai chuan thawktu hi kan tlem deuh chu a ni tiraw?” a tih chuan ka lu ka bu nghauh a, “Kumthar lamah an lakbelh ṭeuh dawn an tih kha.” tiin ka chhang nghal vat a. Kan titi zawm lo zetin ” Tiffin ei ang.” a tih chuan thil tih lai ka neih avângin ei hmasa mai tura tiin ka hna ka thawh zawm a, Ani pawh a ril a ṭam tawh tih hriat takin a tiffin chu phawrh in ṭawng zawm lovin a ei nghal mial mial a.

“UMs, Room – 3 a mi saw engmah kan tihpui theilo Nangmah kher a phut a engtin nge kan tih dawn?” Atei’n a tih chuan ka thiltihlai chu dah in ka thaw hak a, “Sawpa khirh lutuk vang saw lawm a pindanah ka luh peih miah lo. Hotu te lam lah hian an ngaipawimawh em em zui a.” Zirtei chuan a ti hlak hlak a. Ka tiffin chu la in, “Ka kal ange hei hi lo zo lawk mai ru aw.” tiin duty room chu ka chhuahsan a. Private Hospital hi chu a buaithlâk ve ṭhin khawp mai, Sorkar Damdawi In ang ngawt a, inthlahdah theih hauh loh a ni a, kan Patient te kan ngaihsak a ngaiin, complain awm hi kan hlauh ber a ni ṭheuh a, chutih rualin kan hospital aia Mizoram a hlawh hmu ṭha hi chu an tam hian ka ring biklo, chutiang anih avang chuan hnathawk tupawh hian ban nih kan hlau vek a, Sorkar Damdawi Ina insawn tih loh hi chu bang sawi tur pawh kan awm ngai meuh lo bawk.

Room-3 a ka luh rual chuan Khum lu lam nghenga ṭhu Lalrengpuia lo nui suk ka hmu nghal, melh rum nghek ka chak viau rualin ka ti em lo, mahse a khawsa zia chimawm zet avang hian ka haw ru tho mai. “Tiffin ilo ken danah Zanriah min kilpui chu i duh leh si a ni maw?” tiin a tiffin awmna lam chu a melh zeuh a. Ngati nge a ṭawngdan leh chezia hi a ngeiawm thiam em em le? A tiffin chu la in, chaw a ei theih nan a khum chu ka siam rem a. Ka ngawihreng vang nge Ani pawh a ṭawng tawh lo. A tiffin ka phawrh sak mawlh mawlh a, Chawhmeh lah chu a ngah phian lehnghal a, heng zawng zawng hi a ei zo vek dawn tihna a mi le?

“Ka ei zo vek dawn.” ka ngaihtuahna hria ni awm taka a tih chuan ka melh zawk a, mahse ka la ngawi ngal tho. “Ei ṭeuh ang che.” tiin ka tiffin chu hawngin ka ei nghal a, ka chetdan chu mak min ti nge min en ngur lehnghal a. Ngai pawimawh duhlo luiin ka ei zawm malh malh a, “Khati khan min en reng dawn nge i ei dawn?” Amah pawh en lem lova ka tih chuan a nui chhuak hawk a. “Hmeichhia ka bula zanriah kil hreh zet ka vawikhat tawnna ania mak ka ti em alawm.” ala ti zui. Ka tiffin a rem leh remlo a chawhmeh min lo pek chuan, “Ka lawm e.” ka ti sap a, ka chetdan chu mak a ti viau tak tak aniang, “Min haw viau em ni?” atih chuan en vatin, “Thil ei laiin ka ṭawng vak ngai lova, chuan min hmuh ang hian ka ril a ṭam tawh lutuk a, ei zo ila kan inbe dawn nia.” ka tih chuan a mit ko a san âk a, ngeiawm taka khawsa ṭhin bula Polite taka awm kher hi ṭul berin ka hre miau lo alawm.

Kan ei zo a, chawhmeh lah chu ka duh ai tam ka thlengah a rawn dah a, nidang aiin ka ei tam daih lehnghal. Kan eina ka tifel zung zung a, eng eng emaw zawhna min zawt a, a rul tawkin ka chhang zel a, ka tihfel zawh chuan, “I phut ang ngeiin Zanriah ka kilpui tawh che a, duty ka ni a ka kal ange. Midangin an hna an thawh lo phalsak tawh rawh.” ka tih chuan a lu a bu nghut a, “Hmeichhia hi hetiang hian in induh thiam tih hi ka lo hre ngai miah lo.” tiin a ngawi nghal vung vung a, chhang lova kalsan mai ka tum chu, “I chhuah hma in TV kha min On sak la, News awm apiang kha hmet tawp mai rawh.” atih chuan hnial lovin ka tihsak a, mahse News a an thilpuan mek avang chuan chetsawn nachang reng ka hrelo.

Durtlang road-ah Hmeichhe ruang chhar a ni a, tu nge anih hriat anih loh thu an sawi a, a thlalak an rawn tih lan chuan ka mumang a hmeichhia kha ka mitthlaah a rawn lang nghal zut zut a, “A nilo.” ti mah ila Amah ngei a ni tih ka chiang em em si a.

2

“I ṭha em?” ti riah chuan hawi let zawkin, khuma Rengpuia ṭhu chu ka melh reng ringawt a, “I ṭha miah lo,” tih ri chu a hla tawh hle, ka mitsulh a engmah ka hre zawm tawh lo. Ka harh rual chuan phu dawrin, eng nge ka sawi tum pawh ka hrelo, mangang zetin ka riat nawk nawk a, tu emaw niin min kuah thlawp rual chuan mak deuhin ka hahdam huai thei nia. Ka samah a chul heuh heuh a, a kut lehlamin min kuahbet tlat avang chuan tu nge anih ka hrelo, kawngkhar inhawng riah chuan min thlah ve chiah. Min kuahtu Rengpuia hmel ka hmuh chuan lai ru zetin kawngkhar lam chu ka melh vat a, Sangpuii rawn lut ka hmuh rual chuan mak ti zetin ka lo en ha ringawt.

“Bawihte, ilo harh tawh maw?” tiin min lo pan vat a, ka chhanna pawh nghak lo chuan Rengpuia lam chu hawiin, ” Ilo awmpuia ka lawm lutuk ania, a u pawh a rawn thleng ṭep ang,” a ti zawm nghal zat a. “A pawilo,” ti supin, min thlek vung vung a, ka lai leh ringawt tawh. Hepa bula ka awm a ka chebuai leh ngawt ṭhin hi a chhan ka hrelo, Amahah ka mit la tak thil engmah ka hmulo chung hian a boruak uap nat zia erawh ka hrechiang a, mahse Sangtei hi chuan engah vak angailo nge a danglam ve pawh in ka hre lo.

Ka bula mi pahnih te an in biak mawlh mawlh lai chuan, “Eng nge thleng?” ka ti hu a, min melh nghal zawkin, ka tluk dan a hriat ang ang chu Sangtei chuan a sawi nghal mawlh mawlh a, mahse chu chu ka hriat duh a nilo. “Hmeichhia an thah kha,” ka tih leh chuan Sangtei chu a hawi buai nak a, Rengpuia zawk chuan, “Tu nge anih an la hrelo, a taksa peng eng emaw ber lakchhuah a ni tih an sawi a, a bak News ala awmlo.” tiin chik zetin min melh a, “I hriat zawng a ni em ni?” a ti zawm nghal zat. Ṭawngka a chhang lovin muangchangin ka lu ka thing a, tukverh lam melhin ka ngaihtuahna erawh in ka mumang kha a hrechhuak leh tawh. Amah ngei kha a ni tih ka mit awmna ka hriat tluk zetin ka hria a, chu chuan min tibuai ru takzet si a, mahse heng thil te hi sawi chhuak ta ila tumahin an awi dawn silo.

“Mate” ti suptu an awm avang chuan ka hawi phawk leh hra tawh, ni e, ka ngaihtuahna kal ding lutuk vangin ka phu chiang em a ni. “Sorry, tih phut che ka tum miah lo asin.” a tih leh rual a, nui var var ka u chu ka en a, ka ṭah a chhuak ringawt nia. Ka mittui tling pam avang chuan min hrethiam takin min rawn kuah a, hetiang taka mipa zaidam leh min hrethiam tu u ka nei hi ka vannei takzet a ni.

Mi pathum te an titi luam hnuah chuan drip an khai pawh a zo ve a, dar1 a rik tawh avangin Rengpuia pawh a room lamah a let leh tawh a, ka u Malsawma erawh OPD duty a neih loh ni alo ni lehzel nen damdawiinah chuan a awm ve a, Sangpuii pawh ka chet theih tak siloh avangin duty a pui ve ta ringawt a. Nu leh pa nei tawh lo mah ni ila min ngaihsak a min ngaihtuah em em tu U leh ṭhian ka la nei hi vannei ka inti takzet a ni.

Ngaihtuah loh ka tum a, mahse kha hmeichhia kha ka hriat ngai a nilo, chuti chung chuan manglamah a thih tur hi ka hmu lawk miau si a, eng nge a chhan tih ka hriatloh tluk zetin, engvang nge tih pawh ka hrelo. Hmeichhe ruang an chhar aṭangin ni hnih ngawt a liam leh tawh a, ngaihven angin langlo mah ila rilru erawh Amah hriatchian duhna hlirin ka khat a, Social media lama post awm ang ang chu ka enkual hneh viau mai. Fb lamah pawh post a tam in, a chanchin an sawi tlangpui chu hetiang hi a ni. Lallawmawmi niin kum23 a upa a ni a. Unau pathum niin, a upa ber a ni, nu leh pa an neih tawh loh avangin a chhungkaw chawmnan a inzuar ṭhin a ni. A thih chhan hriat ala nih loh avangin ṭhenkhatin kan Police an dem leh em em tawh a, tin, a taksa peng an lakchhuah kha a chhul leh a chi kawng te a ni a, chu chuan Zoram mipui te mak tih leh rap a hlawh a, a taksa peng dang la chhuak lova chutiang chauh an la chhuak chuan Police leh hotu te lam lu a ti hai hle in, Media-ah titi a siam nasa hle bawk.

Kan hospital-ah pawh Lallawmawmi thih dan mak an tih thu hlir a ni an sawi. Ka bengchhi duh lo mah ila, keimaha ka awm chuan ka lo ngaihtuah leh neuh neuh zel a, chu thil chu ka duhloh ber a ni. A theih hram chuan theihnghilh thei ila ka ti takzet.

Hospital chungah inti thawveng turin ka chho a, tun ni thum liam taa ka awmdan mumal lo zet ka ngaihtuah a, kha hmeichhia bawk kha a ni ka ngaihtuah leh tak chu. Hetiang tak hian ka mangchhia hian min tibuai rei ngailo asin le! Tun ṭum zet erawh a danglam a ni. Nga ti nge Ani kha a rawn inlan ve ngawt le?

“Hetah i awm ka ring rengah,” ka hnunglam aṭanga rawn titu avang chuan ka hawi let zawk a, Rengpuia hmel tak rûna lo ding ka hmuh chuan, ka awmdan a lai leh ringawt tawh. “Ka chhuah hma in ka rawn hmu che,” tiin ka ṭhutna lam chu a rawn pan nghal a. Ka awmdan siam remin ka bula a rawn ṭhut rual chuan ka hmalama Aizawl khawpui lang uar chu ka melh san daih a.

“Zawhna ka nei,” ngawirenga kan ṭhut deuh vang vang hnu chuan a rawn ti a, “Um” tih chiahin ka chhang. “Bialpa i nei em?” a tih chuan ka melh nghal vat a, min en ve lemloh avangin ka hmalam chu en leh in, “Aih” ka ti zawi sap. Ni e, ka mangchhia avang te, ka hna avang te hian ngaihzawng nei hman leh nei thei pawh in ka awm lo. “Awle, lo nei suh aw.” a tih leh chuan naupang thuawi ber angin, “Awle,” ka ti ve ringawt. A nui huk a, keipawh ka nui ve tho. Inngaizawnna lamah chuan a zei bik tehchiamin ka ringlo, chutih rualin a awmdan hi a lâwmawm ka ti. A sana a bih zeuh a, “I chawlh a zo dawn a, chuan keipawh min rawn hruai a hun dawn, chhuk ila,” a tih chuan ka ding vat a, ka ding rang lutuk avang chuan a khi suk a, a rawn din ve rual chuan ngawirengin kan inzui thla ta hnak hnak a.

An chhuah hnua, a pindan tifel tura ka lut chu mak deuhin ka lung a leng ve ringawt. Inchunga kan thusawi tlemte kha ka ngaihtuah let a, ka ngai ru veng veng mai. Hetianga mipa ngainat a, vei zui ka neih ngai miau loh avangin, a nawm ruk veng veng aiin hrehawm ka ti daih zawk. Mahse ni a liam a ,kar ralin thla hial a rawn thar leh tawh a, Rengpuia pawh chuti takin ka ngaihtuah zui ngut ngut tawh lo, chutih rualin mak deuhin ka mangchhia te’n min kiansan ta daih a, hei karhnih ngawt chu mumang neilo in tui takin ka muhil ve thei ta. Kei ai mahin Sangpuii a lawm a, min kiansan ve tak tak anih hi tiin kan hlim dun viau mai. Thla a thar rualin Hospital lama kan routine a rawn chhuak a, Sangpuii nen kan duty hun erawh a in ang ta lo, zan lamah ka duty dawn a, tin, Ani chhunlamah a ni thung. Mumang vanga buaina ka neih tawh loh avângin pawi tihna em em ka neilo a, Sangpuii hi chuan tlem chuan min la ngaihtuah tih ka hria. Mahse naupang chhia ka ni tawh lo bawk a, ka paltlang thei mai ang.

Zanlam duty hi peihloh deuh chang nei ve ṭhin mah ila, a hmaa ka dinhmun nen nuam ka ti deuh zawk mah a, tunah pawh chhunlama duty aiin ka duh zawk tho mai. Nurse pakhat nen hmeichhe ward-ah kan duty a, tin zirlai pathum an rawn tel bawk. Sawi tawh angin kan damdawiin a lian a, chuti chung chuan khum awl hi kan nei vak hmanlo. Zanin pawh zan tir lam chuan kan buai leh viau a, kan damlo te pawh an muhil ta aniang dar8 a rik chuan kan reh ṭhiap mai. Midang an mutchhuah deuh avangin Zirlai a mi Tetei nen kan meng a, kan titi a kan nui leh hak hak ṭhin, ngaihzawng chungchang kan sawi chuan ka rilruah Rengpuia a rawn lang ve ringawt. Ani nen khan damdawiin a chhuah aṭangin kan inbe leh ta miah lo kha ania, a chhuahtira ka ngaih nen a reh zui tak daih vang nge ka ngaihtuah zui vaklo, tin, ka hnaah ka buai ve nen ngaihtuah hman pawhin ka awm meuh lo a ni e.

Khum no 4 a mu, Nu la valai tak au tuarah chuan Tetei nen chuan rang takin kan tlanphei nghal a, midang pawh an lo harh vek a, ngati nge tiin an zawt liam liam a, an bul kan thlen chuan a hmel awmdan chu hlauh nei a ni tih ka hrethiam nghal, mangchhia a nei emaw tiin, “Ka pi hahdam rawh, eng nge thleng ka tih chuan,” min melh reng ringawt a, a ngawih tak hmak avang leh a mitmeng hriam hraih chuan min ti hamhaih a, sawi tur ka hre miah lo. Harhchhuak thutin, Tetei chu Injection pe turin ka ti a, a fanu tleirawl Amah awmpuitu chu thil awmzia ka zawt vat. “Kan muhil kha a tal atal a, ka harh khan a thlan vek a, chuan a phun nuah nuah bawk a, a ṭawngvai anih hi ka tia, a lukham ka siamrem sak hnuah muthilh leh tuma ka mit ka chhing fel chiah a rawn au chhuak a, inhmuh ang hi a ni mai.” thlaphang aw taka a tih chuan, “Hlauthawng suh aw, damloh lai hi chuan mangchhia te hi kan nei fo ania.” tiin ka hnem a, damlo ber erawh ka melh en tawh miah lo, khati taka min melhna khan engtin emaw min ti zam tlat nia. Midang ho an mutnaa an kir leh tawh in, Tetei’n a jection fel hnu chuan, an mutna ka siamrem sak a, Amah pawh en lo chuan, “Ka pi engmah hlau suh aw, mangchhia mai mai anih kha, duty room-ah kan awm reng ania,” tia kalsan nghal mai ka tum chu ka banah a rawn vuan chawt a, “I tan an rawn kir dawn.” tia min melh run chuan a ngaihna hrelo zetin ka melh let a, a ṭhen suk rual chuan ka hnungtawlh dawr thei. Ka tha khur ru dar dar chu haider pawh tum ila ka thei hauh lo. Khatiang em em a, mihring damlai nui ni si a, hmel rapawm kha ka la hmu miau lova. Ngaihṭha vaklo chuan duty room chu ka pan ta a.

Eng nge a thusawi awmzia kha ni ang? Ka tan tu maw rawn kal dawn a. A mangchhiaah chuan kei hi min hmu em ni? Engvanga khatiang sawi kha nge anih ang le? “UMs” ti riah chuan ka phu zawk a, Tetei’n damdawi a chhawp sak tur min rawn zawt alo ni. Nichin lawka thil thleng avang khan ka awmdan ala mumal vak lo nen ka hrilh zawh hnu chuan kan room hnunglama balcony-ah chuan ka chhuak harh ta daih a.

Ka phone a rawn rik chuan ka en vat a, number hlang ringawt a ni. “Hello” ka tih ruala lehlam aṭanga mipa aw thum lam lamin hello a rawn tih ve chuan, ka phone chu la thla in ka melh vang vang a, ka hello ṭha leh a. “Keimah Rengpuia” a rawn tih chuan, “Um” tih chiahin ka chhang. Engtin nge ka no a neih theih?

“In inah kan rawn leng a, i awm silova Sangpuii i no ka dil a,” tia a nuih hawk chuan, ka nui ve ringawt. Hmeichhe zei tak ka nilo, ka kum a naupan loh aiin tawn hriat ka neilo bawk nen, hetianga min rawn bia pawh hi phone aṭang ni mahse ka lai ve em em ringawt mai a ni. “Ka no hi lo save ve la, i duty lai ni bawk sia, ka dah ange” a tih chuan, “Awle” ka ti ve ringawt. Ani pawh hi nula lamah chuan zei tia sawi tur a ni bik tawpin ka ringlo. Min be tawi thei hle ringawta ni mai.

Harsatna em em awm tawh lovin zan kan hmang ral a, harsatna awmlo mahse ka ngaihtuahna vakvel avangin ka muhil miah lo, zing a min thlaktu tur a rawn thlen rualin chawlh vat vat ka duh avângin khawiah mah peng lovin ka haw tlang nghal. Sangpui’n ka hmel a hmuh rualin, “I muhil miah lo a ni maw?” a ti nghal a, Lu bu nghauh in, ka pindan ka pansan nghal daih, thil thleng kha hre ve lo se ka duh vang a ni. Ka inthlak a, mut ka tum meuh chuan Sangpuii pawh damdawiin lamah duty turin a kal leh tawh. A chhuak ve tawh bawk a, khum ka thlen rualin ka muhil nghal.

“Malsawmsang min puih rawh Khawngaihin.” ti riah chuan ka harh zawk a, mahse ka lu na lutuk avang chuan ka khum aṭang chuan ka tho chhuak mai theilo. Ka hmingpum ngata min ko tu chu tu nge anih ka hrelo mahse Ani erawh in min hre ngei tih ka chiang. “Malsawmsang” ka beng bul lawka vin tuara a rawn tih leh chuan khum aṭang chuan ka inperh tho zawt a, ka hawi kual nghal a, khati taka vin leh hnaia min ko tu chu ka zawng a mahse tumah ka hmu lo.

Ka thauah manin ka tha a khur ru dar dar a, khum aṭanga thawh a, pawnlama chhuah ka duh mahse ka ke chuan zung a khaih ta emaw tih turin ka chesawn thei hauh silo. Chutia hlau leh thlabar taka ka ṭhut lai chuan ka khum mawnglam aṭang chuan hmeichhe sam thlah hnuang a hmel thisenin a bual khah vek chu ka hmu thut a, a hmel rapawm lutuk avang chuan au chhuah tumin ka kâ ka ang a mahse ka aw a chhuak thei reng reng lo.

Ka au chhuak thei silo beidawng lutuk chuan ka khum mawnga hmeichhia chu ka melh ngawt ngawt ringawt a, ka tha khur nasa lutuk leh ka thinphu rang lutuk chuan ka taksa chu a ti chau vek thei hialin ka hre tawh. A hmel rapawm lutuk ti rapawm zual tur chuan rapthlâk zet hian a nui vak vak a, ka hlau lutuk chu min nuihzat ni berin ka hria. Min rawn kawkin, ” Nang hian i tuar ve tur a ni.” a tih ruala rang zeta ka hmai zawna mitmeng rapawm lutuk a min melh rual chuan engmah ka hre zui tawh lo.

Lu na bur a bang nghenga ṭhu awn duaia ka harh chuan a hma lawka ka chunga thil thleng kha ka ngaihtuah chhuak a, khum mawnglam chu en vatin ka pindan chu ka melh kual nghal vat a, mahse engmah ka hmu tawh lo. Rang zetin pawnlamah ka tlan chhuak a, thawm a reh ṭhiap mai. Sangpuii alo la haw lo tih ka hriat rualin, sana ka en vat a, zan lam duty ka neih leh avangin eirawng ka bawl a, kha thil thleng kha ka mumang nge a tak tak ni ta ang tih ka hrethiamlo. Kha hmeichhe hmel rapawm lutuk ka ngaihtuah chhuah leh rual chuan ka tha a khur lehnghal dar dar a, ka eirawng bawl pawh ka vil ṭha thei meuhlo. Pawnlam thawm vang ringawt pawhin ka phu zawk zawk a, mumang ni zawk se ka ti. Mahse mumang pawh nise khati taka chianga ka hmuh avang khan hlauh loh pawh tumin a theih meuh loh.

Thil ut rim nam rum rum chuan ka ngaihtuahna aṭangin min ti harh zawk a, ka chawhmeh kan alo ut vek chu niin, rang takin ka suan a, tui khawihnaa dahin ka thaw halh a, “Ka ngaihtuahna vang vek.” ka ti chhuak sap. Ka phone rawn ri thut erawh ka phu nasa kher mai. Ka phone dawhkana ka dah chu ban vatin min rawn call tu chu ka en a, number hlang chauh a ni. Ka pick up rualin,” Hello” ka tih chuan lehlama mi chu a ngawireng a, ka hello leh ruala a lehlama miin aw ṭeng chhuai khawp a, ” Nang hian i tuar ve tur a ni.” a rawn tih rual chuan ka phone chu ka paih nghal a. Ka hlauh luat avanga tha khur leh mittui tling pam chuan pawnlamah chuan ka tlanchhuak nghal rawk rawk.

Thil eng emaw ka su pawp a, leiah chuan ka tlu nghal nawk a, kutin ka bana a rawn man rual chuan, “Khawngaihin min kal tir rawh, khawngaih takin,” tiin ka ṭap nghal hlawp hlawp a. Mahse min vuantu chuan, min thlah lovin min kuah bet thlawp a, tu nge anih hrelo mah ila, chutia kuahtu ka nei chu mak takin ka thla a muang nghal ringawt. Thlamuantu ka neih vang chuan nge ka hlau bawk si tah chhuak bawk si chu ka ṭap nghal hlawp hlawp a, ka hnunga a chul hliau hliau na te chuan ka hlauhna te chu a tibo hret hret ni maiin ka hria. Ka duhtawka ka ṭah hnu chuan min kuahna aṭang chuan min thlahin a hmel ka en rual chuan Rengpuia nen chuan chiang zetin kan in melh tawn ta ran a.

“Eng nge i rawn tih dawn?” aw lawi rata ka tih chuan, “Ka rawn leng ang ka tia,” tiin min kaitho nghal a. Kan in lam melh chuan, “Eng nge thleng?” a ti lehnghal zat a. Kan in lam chu melh ve in, “Ih englo ania…” tiin ka kun daih a, diktak chuan ka sawi hreh a ni. Midang pawh nise mahni star te bula ramhuai ka hmu a tih chu an hreh ve vekin ka ring. A hmuh laia hetiang thil a thleng hi zahthlak ka ti ru takzet. A thil min zawh pawh chhan ngaihna ka hre lo. Ka sawi hreh tih a hria nge, “Lokal rawh lut ang. I night dawn sia, reilo tê ka lo leng duh ania.” a tih chuan, “Um” ti ringawtin inlam pan chuan kan inzui nghal a, mahse inchhung luh leh chu ka hreh takzet. Thil thleng a awm a ni tih ka awmdan aṭang a hrethiam tih hriat takin, a lut hmasa a, kawngkhar aṭang chuan hawi kualin min lo melh zawkin a lut tlang nghal a, keipawn hreh zetin ka zui lut hna hna a.

Dawhkan bula ka phone tla chu a chhar nghal vat a, tui khawihnaa ka chawhmeh kan ut dum ruam chu melh zeuhin a nui zui suk a, a in neitu kei erawh nichin lawka thil thleng zawng zawng avang khan ka tim ru viau a, mahse Rengpuia a awm ve avang chuan tlem chuan ka hlauhna a zia deuh.

“Ka chawhmeh kan ka ti ut vek a,” tiin ka nui lui a, Ani pawh nuih za insum zet hian, “Anih hi a rim pawh ala nam rum rum alawm.” a tih chuan ka hnar ka lenkual a, a sawi dik, ala nam rum rum mai. Vawkchaw belah paih vatin, a dang siam tur ka enkual a, “Chaw ei ve rawh.” tia chaw chhum tuma chaw bel ka hawn rual chuan rak nghal ṭhawtin ka hnung tawlh dawr a. Ka cooker ken chu ka thlauh ri nghal bawl. Rengpuia’n ka bul a rawn thlen rual chuan, “Eng nge a?” a tih chuan ka thinphu rang lutuk avanga ka awm dawmin, “Maimawm,” ka ti ṭial ruan a. “Um,” tiin ka cooker thlauh chu chharin, “I mikhual ni mah ila rawng ka bawl sak mai ang che.” tiin buhfai chu a suak chhuak nghal a. Kei erawh hlauh avangin a bulah ka ding ngawi reng ringawt.

Chaw chhum zat tur hrilhin, dawhkan bulah chuan ka ṭhu a, zah pawh ka dawn theilo. Engtin nge kha maimawm lian zet kha Buhfai bel phui zet chhungah khan a awm theih. Vawiin ka thil tawn zet chu mak ka ti takzet. Mak ti mai nilovin min ti hlau a, ka tha hial a khur chu ania. Nurse ka ni a, mitthi tam tak ka hmu tawh a, miten an sawi neuh neuh hrang tam tak pawh ka hre ve ṭhin. Mahse hetiang taka hlau a min siam thei thil erawh ka la tawn ngailoh avangin dawnsawn dan ka thiamlo, ka hlauh luat avangin ka tha a khur a, ka aw hial chhuak theilo leh nikhaw hrelo khawpin ka awm anih kha. Mahse nga ti nge ka chungah hetiang hi a thlen? Engvang nge?

Khuh kharh riah chuan ka ngaihtuahna ata ka harh zawk a, Rengpuia’n chik zeta min lo melh reng ka hmuh chuan nuamlo ti ru zetin, “Ka chawhmeh kân a ut vek sia, Alu hmeh mai ang aw, nidangah sa ka la hmeh pui dawn che nia,” tiin inthiamlo ru zetin ka nui a, engmah sawi lovin chawhmeh bawma Alu chu la chhuakin, chemte pahnih a rawn la nghal a. Alu vel pah chuan thu ho deuh deuh min sawipui a, rawng kan bawl zawh meuh chuan insiam a hun leh reng tawh.

“Insiam la, i zawh hunah chaw kan ei dawn nia.” atih chuan “Awle” tiin ka pindan ka pan a, kawngkhar zawnah chuan dingin a chhungah engin nge minlo hmuak leh ang tih ka ngaihtuah nghal zat. “I pindan ka hmu ve chak,” ka hnunglama miin a tih rual chuan Amah chu a lut nghal a, ka lut ve nghal vat. Ka hawi kual a, engmah hmu lo mah ila ka pindan chhung chu ka ngaina tawh hlollo. “Pindan i nei nuam hle mai.” a tih chuan ka nui a, mahse ka chhungrila hlauhna hi a reh thei tak tak lo. “Inbual la, pawnlamah ka lo awm ang,” a tih chuan, a banah vuanin, “Ih mangchhia ka nei a, ka inbual chhung hetah hian i awm thei angem?” ka ti thawr a. Min ngaihdan tur pawh ka ngaihtuah theilo. Ka pindan hi vawiin atan chuan ka hlau tlat si a ni.

Min melh vung vungin, “Awle, i khumah hian ka mu dawn ania. Ka chau tlat.” tiin a mu nghal zat a Damdawiina chimawm deuh kha a ni tih hriatloh khawpin vawiin hian ka lakah a ṭha a, mak takin ka thla a ti muang em em bawk. Ka inbual a rei erawh ka inbual lo, Bathroom chhungah ka inthlak nghal vek erawh a buaithlak. Mahse ka pindan chhunga awm hian ka taksa a hmuh ka duh miau loh avangin ka tih a ngai si a. Ka chhuah chuan a muhil nge ni, a banin a mit a hliah a, a che miah lo. Darthlalang hmaah chuan ṭhu in, lotion ka inhnawih mawlh mawlh a, ka hmaia cream ka hnawih mawlh mawlh lai chuan, Rengpuia chu a rawn rum hak a, a harh nia ka hriat chuan tho chhuak vatin khum bulah chuan kalin “Chaw kan ei mai dawn a mi?” ka ti a. A ban la sawn chuang hauh lo chuan, “Um” ti ringawtin min chhang a, a mut ngaiin a mu reng thung.

Pawnlamah chhuansanin, chaw ei ka siam nghal mawlh mawlh a, Ani pawh reilo teah a rawn chhuak ve nghal. Inbe miah lovin zanriah kan kil dun a, kan ei rei lemlo. Min tih felpui leh thlap a, thleng sil a tum erawh ka phallo. Uniform i hak kha atih pawn Apron ha vatin thleng ka sil a, dahkan bulah ṭhu in, nichina a mizia kha a bo leh daih tawh tih hriat zetin, a ngawi run a, thil eng emaw tak chu a ngaihtuah tih ka hria, mahse a chhan zawh erawh ka tum lo. Ina awm ka hlauh tluk zetin zanin duty pawh ka huphurh ru takzet. Damdawiin ni mah se, a hma zan lawka thil thleng leh kan inchhung ngeia thil thleng te hian engkim min tih tir hreh zo vek. Ka thil ngaihtuah chu ṭullo ti zetin keimah leh keimah ka infuih ru mawlh mawlh a. Hetianga dawizep taka ka awm anih chuan ka hna hi ka thawk ṭha thei dawnlo, chuvang chuan ka hlauhna te hi ka paih bo angai a ni.
Thleng ka sil zo, apron ka dah ruala Rengpuia ka en chuan min lo melh leh reng tawh. Mahse tuna min melh dan erawh ka sawi thiam lo, a ril ruih ti ila ka sawi dik ber ang. Min melh reng avang chuan ka lai ringawt nia. Chetsawn nachang pawh hrelo in kut hrukna towel chu chelhin, lai deuh chuan ka ding zum reng a, a hmel erawh ka en nawn ngam tawh lo.

“Bialpa i neilo tak tak maw?” a rawn tih thut chuan rang zet hian, “Aih” ka ti vat a, ka chhang rang lutuk chu ka zak leh hnuhnawh. “Um, I hman chuan kan kal dawn mi?” a tih leh chuan harhchhuak thutin, “Ah, aw, awle” tiin ṭhuthleng a ka bag leh kawrlum dah chu la nghal vatin, kan chhuak dun ta a.

Kan inbul lawkah Bike alo dah reng a, a vawikhat nan kan inphur a, uniform ka ha bawk nen chuang zeilo tak ka ni. Ka ṭang ṭung a, tlak ka hlau takzet. Bike-ah hian chuang ngailo tawp chu ka nilo, mahse hmeichhe ṭhut kher hi chuan a harsa lam hret chu a ni. Traffic zamah kan ding a, ka ban chu rawn la in a kawngah min kuah tirin, “Min ring rawh” a ti sup a, chutianga atih chhan chu sawi hran a ngailo phurh hrehawm min ti tih ka hria, ka demlo ka chuang thiam hlollo a ni.

Damdawiin kan thleng a, Sangpuii haw tur nen kan in tawk a, Rengpuia nena min hmuh chuan nui nghal var varin, kan inbe luam a, taxi la in a haw zui a. Rengpuia erawhin ka duty na tur hmun thleng hian min zui a tum emaw a ni, ka rualin a rawn kal ve zel a, kan mi tawh apiang te chuan min enzui zel ni berin ka hria. Ka bula mipa kal hi nge an en a, keimahah hian diklo a awm zawk pawh ka hrelo e.

Duty room ka thleng a, thil ṭul ka ti nghal mawlh mawlh a, Rengpuia kha ka bulah a awm reng emaw ka tih laiin khawiah nge a kal ka hrelo, alo bo leh hman daih tawh. Damdawi sem leh damlo check a hun mai dawn avangin kan tih tur ang ang tiin ka buai zawm char char a, a haw nghal anih ka ring.

Nizan lam boruak ang kha kan tawn leh hlau rilru takin hmeichhe ward lam chu ka melh leh zeuh zeuh ṭhin. Zantir a ni bawk a, engmah thil danglam thleng a awm lo bawk a, tiin lehkha enfel ngai ka enfel thuak thuak a, ka thiltih lamah ka rilru ka lo hmang deuh a ni mahna, “Zan reiah ka rawn leng mai thei ania,” rawn ti thuttu avang chuan ka phu zawk a, a haw daih tawh emaw ka tia, khawiah nge alo kal kual ka hre miahlo, tunah alo lang leh thut a. “Nurse leh phut dawr zel kha a inhmeh lo.” ti leh in, chhan pawh ka chhan hma in a chhuak zui nghal daih a. A chetdan hi a mak ṭhin ania. Damdawiina a awm chhung rêng khan a hahthlak lam hret chu anih kha maw!

Zan dang aiin kan buai loh avangin dar10:30p.m chuan chhunlam ka mu ṭha lo nen ka duty pui te bulah chuan reilotê chhin lawk ka duhthu ka sawi a, ka mitmeng dul zet hi an hrethiam a ni mahna, muhil a harsatna a awm chuan min kaihthawh tur thu an sawi chuan mutna tura siamah chuan rem zet hian ka mu nghal a. Ka chau deuh bawk a ni ang thawm awm ve rak rak ṭhin pawh chu an hla tial tial a, a reh ta duak mai. Mahse chutia vawi leh khata thawm reh lutuk avang chuan ka ngaihṭha lovin ka mengchhuak leh hlawl a, duty room ka hawikual chu tumah an lo awm tawh hauh lo. Chutia keimah chauha ka awm chu mak ka tih deuh avangin leh eng thawm mah ka hriatloh avâng chuan ngaihṭha vaklo hian ka tho chhuak a, pawnlam thawm ka ngaithla a, mahse khuavang kallai an sawi ang maiin engkim mai hi an reh vek niin ka hria.

Ka awmna aṭang chuan tho chhuakin duty room pawnlamah chuan ka chhuak a, security takngial pawh ka hmu lo chu ka ngaih a ṭha tehchiam lo, eng thil nge thleng le? Midang ko a au chhuah mai ka duh rum rum tawh mahse damdawiin anih miau avangin zanlaia thawm bengchheng siam phal a nilo tih ka chian em avangin au chhuak lovin hmeichhe awmna ward lam kawngkhar inkhar khap lam chu ka pan ta zawk a. Mahse pen hnih thum awrh ka pen hman tihah chuan, ka hnunglam aṭanga “Malsawmsang,” rawn ti tham ṭiaktu avang chuan ding chawtin, ka inher nghal vat a. Tu emaw hmuh ka inbeisei tehlul nen tumah ka hmu lo chu ka hawihai takzet.

Chutia ka hawikual vak vak lai chuan building pawnlam chhuahna aṭang chuan zawi si, fiah zet hian min kotu bawk chuan min rawn koh leh takah chuan hmanhmawh angreng tak hian pawnlamah chuan ka tlan chhuak ta zawk a, min kotu chu ka zawng kual a, ka hmu mai silo mangang ru zet hian, “Tu nge min ko?” tiin ring lutuk lo hian ka au let ve a, “Hetah Malsawmsang,” ti ri lo chhuahna lam nia ka hriat chu ka pan lehnghal a, Building dinglama forget-me-not buk laih bula hmeichhe kawrvar ha, tlu niai leh thisenin a bual zuih bul lawka mipa kawr dum ha hmanhmawh zeta kal pawk pawk chu ka hmu nghal zat a, chupa kuta thisen kai hnuang leh a chemte kena thisen far fap chu chiang takin ka hmu hman bawk, mahse Ani umzui ai chuan hmeichhia chu buaipui tumin a lam chu ka pan ta zawk a, a bul ka thlen chuan harsa tih hmel zet hian min lo melh ṭawk ṭawk a, “Min pui rawh,” tia phun sapin a mit a chhing ta riai riai a.

Ka bula ruang let reng leh thisen leia luang baw zuih chu thinphu dup dupin ka melh reng a, tualthahna a thleng a, a thattu pawh a hnunglam ka hmu hman ngei anih kha, mahse ka chhan hman silo. Ka ngaihtuahna avang chuan mahni inthiamlohna in ka khat a, tihtur ber pawh hrelo in ka ding khawng reng ringawt. “Malsawmsang” rawn ti ṭeng chhuai tu avang chuan phu dawrhin damdawiin kawngkharpui lam chu ka hawi let nghal vat a, chuta ka thil hmuh zet chuan min va tihlau tak em! Ka bul lawka ruang let reng kha kawngkhar bulah chuan a kawrvar fuala thisen kai nuaih leh a hmel rapawm zeta min en in, a kutṭanga min rawn kawkin kawngkhar bulah chuan a ding a, ka thil hmuh avanga tha khur dar dara ka din lai chuan, “Ka thisen mawh hi i phur tur a ni.” tia a kâa thisen rawn phuh chhuak ṭhawtin rang lutuk hian ka hmaah a rawn ding thut a, hnai zeta min melhin ka hrawka a rawn rek thut chu, ka inring hman lo. Ka thaw hrawih a, ka mittui a far nghal zawih bawk a, ka kê boruaka kang tial tial chu ka hriat hnuhnung ber a ni.

3

“Ms harh teh,” ti ri chu hla tak aṭangin ka hre reiruai a, harh tura min titu aw chu ka hre hnai tial tial a, ka awm chhung na lutuk leh thawk harsa ti zet hian ka meng chhuak hlawl a, ka harh rual erawh chuan ka thaw nghal kawk kawk a, a harh tih leh Oxygen kha pe rawh, an ti ri te chu ka mang hriat ruai tho. Ka hnara Oxygen an rawn vuah rual chuan reilo têah ka thawk dan a rawn dik ṭan a, ka harh chiang tulh tulh bawk.

“UMs i harh tiraw,” titu chu ka melh zeuh a, ka awmdan mak zet chu ka hrethiamlo a ni. Ka ban ka en a, thisen chaw an lo khai va bawk. Ka thil tawn rapthlâk zet kha ka ngaihtuah let a, hmeichhia ka hriat ngai ni miah lo thi ka hmu anih kha, mahse ka bul lawka a ruang awm reng laiin Amah vekin min thah tumin min bei leh kha ania, ka thi ngei dawn a ka hriat laiin tunah duty room-ah heti hian ka harh leh a, khang thil kha mumang mai mai ti dawn ila a tak ang chiahin a chiangin a fiah si a, keimahah hian diklo a awm nge, sister sawi ang khan ka taksa a chaklo lutuk a, harsatna ka nei mai mai zawk?

“Msi hi ward lamah em ni a awm?” ka mutna puanin a zarhliah lo lama ti thum duttu chu tu nge anih ka hrechiang kher mai. Zanlaiah ka lo leng mai thei a ti anih kha. Ka bana sana chu ka melh zeuh a, dar11 alo pel der tawh. Heta ka awm hmaa ka awmdan bawk kha ka ngaihtuah let leh a, ka mut tlem avang leh kan buailoh avangin reilo tê muthilh lawk tumin ka mu anih kha, mahse rei pawh ka mut hma in thawm reh thut avangin ka harh a, khang thil kha ka tawng ta kha ania.

Rengpuia a rawn lan chuan mak ti zetin min melh a, a tan chuan a mak ve viau mai thei, ṭha takin kan inthlah a, tunah Oxygen mask leh drip nen damlo na tak angin ka lo mu si a. “Bawihi i chungah eng nge thleng a?” tiin min ngaihtuah tih hriat zet hian ka bulah a rawn ṭhu nghal a. Ka mask chu la sawn zeuhin, “Ka ṭha lawm, ka taksa chakloh vang mai mai anih hi.” ka tih chuan a lu a thing nghut a, eng nge a ngaihtuah erawh ka hrelo. In biak reng theih ni bik heklo, Rengpuia chu ngawirengin ka khum bul ṭhutna awmah chuan a ṭhu ve a, ka oxygen mask chu phelh duh tawh viau mah ila ka awmchhung na avang chuan thawk lamah harsatna ka neih leh mai ka hlauh avangin la lakthlak tirlo ka ni. Nurse dangin min rawn vil deuh reng bawk a, ka inthlahrung takzet. Duty tur ka nih laia hetia buaipui ngai a ka awm hi ka duhdan nilo mahse ka dinhmunin a zir miau silova.

Ka drip zawh dawn hnaih chuan lehlam aṭang bawk chuan, “Khawiah nge?” titu aw ka hriat rual chuan Malsawma a ni tih ka hre nghal. A hmel ka hmuh rual chuan min ngaihtuahna mitmeng ka hmu hmasa ber. Nu leh pa kan nei tawh lova kan unau chauh kan nih ve avang leh hmeichhia zawk ka nih avang hian min duatin min ngaihsak hle tih ka hria, hetia ka awm pawh hi hrehawm a ti hle in ka ring bawk.

Ka bula Rengpuia chu melh zeuhin, “Ṭhian i nei elo?” a ti sup a, Rengpuia pawh chu be zui lovin khum sirah chuan rawn kalin ka mar a rawn endik nghal zat a. Nurse Tei’n Stethoscope a rawn pek rual chuan ka awm chu a rawn endik nghal bawk a, a mitmeng nur deuh nang chu a chhan ka hrelo. A duh ang thlapa min enfiah hnu chuan, Tei hnenah chuan Oximeter teh turin a hrilh nghal a. Tei’n min endik hnu chuan an inbe nghal luam a, Tei kalsawn hnu chuan ka bulah ṭhu in, “Minute 5 vel vuah leh la i mask kha chu a phelh theih tawh dawn kha.” a ti nghal sup a. Keimah pawh min be tawh lovin Rengpuia zawk chu a be zawm nghal daih a.

Ka sawi ngai miah lovin ka U anih thu Rengpuia chu a hrilh a, Rengpuia zawk chuan ala hriat thu sawiin a hmaa hetiang chiaha min buaipui thu a sawi chuan mak ka ti zawk hle. A chhan pawh keimah zawk hian ka lo hre tawh miah lova. Malsawma hmel chu chiang deuha ka en chuan a chauh hmel takzet. Doctor ania, damdawiinah nilengin a duty a, a ban rualin clinic lamah damlo 100 aṭanga 200 inkar a en leh ziah bawk a, a chau ve viau ang tih ka hria. Tunah lah keimah avangin rang takin mut pawh kham hman lovin tihian a rawn tlan leh a. Tihbuai loh hram ka duh nen, tu emaw berin ka dinhmun an hrilh tih hrilh hran ka ngailo, hrilh lo mahse Amah ka khawngaihna vang hian pawi ka tilo zawk si a.

Oxygen mask chu a rawn phawi a, ka drip pawh a zo ṭep tawh bawk. “Naktukah OPD ah in check up rawh aw,” tiin ka sam chu a rawn chul thuak a, “Awle” ka lo ti vat. Duty nei tur anih avangin a remti lo chung ka haw luih tîr a, a kal dawn thleng a min ngaihtuah hmel chu ka khawngaih zawk. Ka unaupa neihchhun leh he khawvela ka chhungkaw neihchhun kha a ni miau a, min ngaihtuah viau ang tih ka hria, mahse a hna a chawl thei bik lova, keipawn min ngaihtuah tluk zetin ka ngaihtuah ve tho si a.

A kal liam hnu chuan Rengpuia chuan, “I u nen khan in va in ang em em.” a ti chhuak phawng a. Ka lo nui hak thung. Phir kan nih thu te, kei aia darkar khat chauha a pian hma thu te, mipa zawk anih bakah ka nu leh pate bula a awm tam ve loh avanga puitling bik tak anga lang anih thu te ka sawi chuan mak ti hmel leh nuihza hmel a pu kawp deuh reng mai. Khawvar lam hnaihah chuan Ani pawh a haw ve ta a. Ka damdawi hnathawh nge ka mut a chhuak viau a, mahse ka muhil ngam tawh lo, Rengpuia pawh khan muhil turin min ti na in ka muhil ngam tawh miau silova, ka ngamlo tih erawh ka sawi duh hauh lo.

Khua a var a, drip ka khai tawh loh avangin ka ṭhu chhuak ve tawh a, ka awmdan kha ka ngaihtuah let a, mak ka ti tulh tulh a ni. Nurse Tei bula ka danglam tih an hriat dan ka zawh khan ti hian a sawi anih kha. “I muhil kha i rum nasa lutuk a, ka lo en ṭhin che a, i tal nasa bawk sia, ka ngaih ṭha vaklo a, ka chhuah pawn midang ka vil tir deuh chawt che a, mahse hlauh neih ang mai in i rawn au chhuak a, i rum nasa bawk sia ka awmpui chawt che a, kaihthawh che ka tum la khan i tho thei silova, i thawk a rawn buai hnu phei chuan sister nen kan buaipui char char che a, i rawn harh hma khan i U kha sister in a call a, a chhan pawh Doctor dang a call mai theih loh vang ania. Tikhan i rawn harh a, i mangang hmel bawk nen Oxygen pek i ngai zui a,” a ti anih kha. Ka mumang kha a takah ka feel vek tih ka hrethiam mahse ka tan thil thar a ni tlat si.

Mangchhia ka nei fo a, ka mu buai fo tih ka hria. Sangpuii pawn min buaipui hle ṭhin, mahse tunhnaia ka mangchhia leh thil thlen dan hi chu a taka thleng ang mai in ka feel zel si hi min tibuaitu a ni. Malsawma sawi ang khan ka taksa hi a chaklo viau pawh a ni mahna, vawiin lamah te chuan ka inentir ve mai a ngai dawn anih hi, a ṭul anih chuan chawlh pawh ka la rih mai ang.
Sangpuii hma taka rawn thleng chu a ngaihna hrelo zetin ka melh a, ka hmel a hmuh rualin, “I ṭha em?” a ti nghal zat. Ani hian ka awmdan kha alo hre leh hman tawh a mi le? ti rilru in, “Um, nga ti nge i va hma ve?” ka ti nghal zat a. “Nizan ka mangah buaina ilo tawk a, ka ngaihtuah lutuk che a, nimin la kha kan inbe mumal silova,” atih chuan chiang zet hian ka en a, min ngaihtuah zia a hmelah ka hmu thei. Chhan tuma ka an zuai lai chuan, Tei chuan zanlama ka awmdan chu alo hrilh nghal bawrh bawrh a, Sangpuii hmela hlauhthawnna chu ka hmu chiang hle, Tei ṭawng chhung zawng chuan min melh tawn sek a, henu hi chuan a nau ang tak tak hian min ngaihtuah a ni tih phat rual lovin ka hre thei.

“Nga ti nge chutiang thil a thlen chuan min rawn call lohva?” biak zawk pawh neilo a atih chuan Tei nen chuan kan inmelh tawn sek a, kan chhang lo. “Hotu te hnena sawi a ngai a ni, ka tello chuan Night tawh suh.” a ti leh hmak a. Ani hian a sawi anih phawt chuan a thusawi a tlang leh dawn tih ka chiang. Senior ania, a thu hi an ngaipawimawh hle tih he laia awm te chuan kan hre miau alawm.

Ka duty a zo tawh a, haw a insiam a inentir ka tum thu ka sawi tak na in kan quater ve pawh kha ka hlauh ruk tlat tawh avangin haw pawh ka hreh takzet, mahse Sangpuii bula sawi pawh ka duh chuanglo. Sister a rawn chhuak a, Sangpuii chuan be hrang vatin eng nge a sawipui ka hrelo, an lo chhuah leh chuan, “Lokal rawh le,” tiin min kai a, pawnlamah min chhuahpui zui a, mak ti zetin a che vel chu ka en hau ringawt. Taxi a phar a, kan quater lam chu kan pan dun ta a, kawng tluanin engmah a sawilo.

Inchhung kan lut a, ṭhutnaah chuan min ṭhut puiin, “Nimin aṭanga nizan thlenga i thil tawn min hrilh teh,” atih chuan a ngaihna hrelo zetin ka melh a, “Mumang i nei leh tiraw?” a tih leh chuan ka lu ka bu nghauh a, ka thil tawn danglam ta lutuk chu ka hrilh nghal mawlh mawlh a, ngun zet hian a ngaithla a, ka sawi zawh ruala ngawirenga min melh chuan a ngaihna hrelo zetin ka en let ve reng ringawt. “Ih keipawn mang mak deuh ka nei asin, mahse khawmaw,” ti zuiin ka nghawng chu hnai zet hian a rawn en a, “Khai a,” a ti chhuak hlawl ringawt.

“Nga ti nge?” ka tih chuan, tho vatin a pindan aṭanga darthlalang lian vaklo alo lak chu ka hmaah rawn dah in, “I nghawng kha en teh?” a ti nghal zat a. Uluk taka ka nghawng ka en chu mak ka ti takzet. Rehna hnu tih hriat zet hian kutthla a lang val kalh a, mahse chik taka entu tan lo chuan hmuh chu a har deuh ang. Kan pahnih chuan mak ti zetin kan in en a, a ngaihna kan hre lo ve ve tih Sangpuii hmel awmdanah chuan ka hria, keipawn hetiang hmel hi ka pu ve tho ang.

“Engpawh nise nizanah ka mangah ṭanpui ngai tih hriat zet hian vawi thum ngawt min lo ko a, ka harh khan ka hmu silo che a, khawvar ṭan tirah tho in, rawng ka bawl sawk sawk a, ka rawn kal anih kha.” a tih chuan, thil thleng dang zawng aiin mak ka ti zawk. Ani hian ka talbuai kha mumangah a mangphan ve tihna ania, thil thleng zozai hi eng nge awmzia ni ta ang le? Sangpuii bawk chuan, “Mate, inbual fai phawt teh, la hma viau mahse insiam la, chawlh ka dil tho a, Damdawiinah chuan keimah nen inentir chuan kal mai teh ang,” atih chuan thuawi zet hian ka pindan lamah ka kal nghal a. Ka inbual fai a, ka insiam peih meuh chuan dar7 alo ri der tawh.

Damdawiin pan nan ala hma deuh kan tih avangin Tv kan en dun a, mumang leh thil thleng dang kan sawi dun tawh lo. Zingkar chanchin thar ala zo lo tiin News an puanna chu a hmetchhuak a, kan pahnih a news kan en laia, ruang an chhar thu an rawn puan a, thlalak an rawn dah rual chuan, ka tha a khur nghal dar dar a, ka awmdan diklo chu Sangpuii chuan a hria tih hriat zetin ka bulah rawn kalin, min rawn kuah nghal vat a, Tv pawh chu a off nghal hmak bawk. Ṭah insum tak hian, “A mak e,” tih chiah ka sawi chhuak, kawngkhar an rawn kik chuan kan phu deuh zawk a, nidang nise kan nui ngei ang mahse tukin kan boruak zet chu nuih a har. Sangpuii zawk chuan “lo lut rawh,”. atih rual chuan kan ṭhut dan chu kan siam rem nghal vat a.

Kawngkhâr a Rinsanga rawn nui lut deuh vur vur chu ka lo en reng a, Sangpuii zawk chuan a be nghal vat vat a, mahse eng nge an sawi pawh ka hrechiang lo. Ka ngaithla liam ve tawp a ni ber mai. Hemite ṭhian dun hian eng hna nge an thawh le? tih te ka lo ngaihtuah daih a, chutiang ka ngaihtuah chhuah ruala Rinsanga lam ka hawi chu nui var var hian min lo en ve reng a, eng nge a sawi pawh hrelo in ka nuih ve ringawt. Rinsanga pawh hi a ṭhianpa ang tho a, hleitling leh pian thiam tak a ni a, Rengpuia aiin tlem te tak takin a hniam ang, taksaah chuan an intiat viau mai. Mahse a ṭhianpa ngawt ai chuan a nelawm in kawm a nuam daih zawk.

Tih tur nei kan nih avangin kan pathum chuan Damdawiin lam pan chuan kan inzui chhuak ta a, a hnua Rinsanga sawi danin, Rengpuia’n min ngaihtuah avangin a rawn tir a ni awm e. A thusawi ka hriat chuan lawmawm ka tih rualin ka inthiamlo viau mai. Khatiang khan min lo hmu kherlo sela chuan midang tibuai khawpin a awm miah lo tur ania, keimah vang liau liau a a ṭhianpa alo tir pawh hi nakinah lawmthu ka la hrilh ngei ang.

Sangpuii chawlh la pawh Rinsanga a awm tak avângin tlai deuh tawh mahse damdawiin lamah let leh zawk turin leh chhunlama ka tlawh tur thu sawiin kan inthlah a, mahni thawhna alo ni bawk nen inentir tur pawn midang angin nghah ve ka ngai hran lo. Doctor-in min en chuan vitamins chi hrang hrang min pe a, ka taksa enkawl ṭha turin min chah uluk hle bawk. Rinsanga phone ri deuh reng chu melhin, “Tih tur i neih chuan min kalsan tawh mai la, Doctor pawn vitamins ka tlakchham vang mai mai a ni a tih kha,” ka tih chuan min melh vung vung hian, kan sira ṭhutna awmah chuan min ṭhutpui a.

“Ka ṭhiana nen hian in inngaizawng tawh em?” a tih chuan, mak ti angreng takin ka melh reng ringawt. Min zawh nawn leh takah chuan lu ka thing a, “Aih,” ka ti zawi raih a. Kan inngaizawng miau lova chhan vak dan a vang. A lu bu nghut nghut hian, “Um, hmeichhia hi a buaipui vaklo a. Engpawh nise hmeichhe ruang Zemabawk-ah chhar a ni a, ka kal a ngai a,” a tih chuan tukin zinga news a rawn lang kha ka mitthlaah a rawn lang nghal a, ka mumanga hmeichhia ngei kha a ni tih chiang takin ka hre bawk. Ngaihven tura a kal dawn anih chuan Police a ni tihna a ni ngei ang, Rengpuia pawh hi a ni ve tho angem le?

“Ah, Rinsang engtia thi nge?” tia ka zawh chuan ngawi deuh vang vangin, “Ka hrelo le, thah erawh a ni tih ka chiang,” a ti zawi raih a. Ka lu ka lo bu ve nghut tho. Rinsanga’n min kalsan hnu chuan Malsawma duty na lamah ka chho ve nghal a. Tukin zing avang khan min ngaihtuah hle tih ka hria, message pawh vawi li ngawt ania min lo thawn tawh. A buai em avang hian a ṭul tawpah lo chuan call pawh hi a hmang zen zen lova, message hian min be mai zel.

A pindan ka luh chuan min lo nuih var var a, a damlo en lai chu a en lehnghal daih a, keipawh ngawirengin a bulah ka ṭhu a. Damlo a en mek chuan min entawn sek a, in ang min ti tih ka hre mai, ka lo nuih ringawt. A chhuah dawn chuan, “Phir in ni em?” a ti chhuak hlol a, nui sang hian Aw ka tih chuan a nui ve nghal var var a. Damlo dang a en leh hma chuan, chanchin min zawt vat a, keipawhin a damlo en tibuai lo tawkin, vitamins ka tlakchham vanga harsatna nei satliah ka nih thu ka hrilh ve mial mial a, pawnlam ka melh zeuh chuan, en tur ala ngah lutuk chu ka huphurh pui. Doctor paruk lai an awm a, chuti chung chuan nileng daih inentir tur an awm tho nia.

Lo lut apiang la chuan min en duh em em zel a, an demawm hran lo, hmeichhia leh mipa phir hi keini aia in ang hi an tam lo khawp ang, kan hnar, kan mitmeng leh hmui, a mithmul buk dan leh kan sam rawng thlengin a in ang em a ni. Mahse Ka hmel ang lutuk Malsawma’n a pu hi a Man lo tih chang ka ngah ṭhin, a chhan pawh ka hmel ang a put vang chauhin. Hmelṭha tia sawi ka ni ve fo a, kei chuan ka unaupa mah nise a hmeichhe hmel ka ti tlat a, Ani lah hian ka hmelṭha ti tu an tam emai tiin a ṭang a, kan nui leh nge nge zel. Kan naupan lai pawh khan ka chhaih fo reng bawk a, upa zawk leh mipa zawk anih vang hian engtiang pawn ti ila min khing ngai hleilo a. Mahni invawng tak alo ni ve kher nen, a hmaiah hmul engmah a nei silo a, heti hian hmelṭha tia sawi a ni ve tho si hi ka nuih a za ṭhin. Sangpuii hian thutak deuh hian, “In unau hmel hi mipa leh hmeichhiaah hian alo ṭha anih hi, keini hmel ang chiah te hi mipa ah awm se a mak ngawt ang,” a ti ṭhin a, ka pawm ve tho mai.

“Malsawm en tur ila ngah si, Sangpuii bulah ka kal dawn.” ka tih chuan min melh zawk a, “Chhunah thil min treat thei ania,” ka ti zawm zat. Hetia a duty naa lo awm ve reng hi a ninawm ve em alawm, tih tur ka nei ve bawk silo. Sangpuii te duty na lama ka kal lai chuan ka phone a rawn ri a, ka en chuan Rengpuia call a ni. Aw thian kharhin ka pick up nghal vat a, lehlam aṭanga, “I inentir chu eng nge chanchin?” a rawn tih chuan, ka ṭhat thu leh tlakchham eng emaw ka neih vang mai mai anih thu ka sawi chuan a thawhawk ri ka hre zawm nghal. Hna a neih avanga zinga a rawn kal theih loh thu te a sawi ve luam a, phone kan dah chuan Sangpuii duty na pawh ka thleng fel der. Mipa ṭawngtam tak a nilo tih ka hriat avang hian a lak aṭang hian thu tam tak hi ka beisei lemlo chutih rualin a ṭawngtam loh tluk zetin a nghal leh lawi si hian amah ka nel phah viau chu ania.

Sangpui’n ka hmel a hmuh rualin chanchin min zawt nghal a, an buai lutuk loh avangin kan ṭhu dun ta reng bawk. A kal hnua hotu lama ka duty dan thlak min dil sak thu te, duty inthlak dan tur an rawn dah vat tur te a sawi chuan ka inthlahrung viau a, mahse ka dinhmunin a zir miau silova zahah pawh ka la duh biklo.

Chhun chawlh a hun chuan Sangpui’n dawra ei tur lei a rawt a, chhuah tuma kan ding chu kawngkhar zawnah Rengpuia a rawn lang hlawl mai. A rawn kal tur thu a sawi lawk bawk silo nen ka lo hamhaih lehpek a, biak mai dan tur ka hre lo, Sangpuii zawkin alo be vat a, mahse khawiah emaw min hruai a duhthu a sawi chuan Sangpuiin inla hrethiam zeta, “Kal rawh u, lo haw hma vak pawh a ngailo ania,” a tih te chuan ka lai lutuk chu ka biang a sa hat hat thei nia.
Rengpuia nen chuan kan inzui dat dat a, Bike bawkin min phurh ka rin nen vawiin chu car a rawn keng teh tlat a, kan inphurh hmasa ber leh a tawpna kha ka mittlaah alo lang nghal a, ka zak thar leh viau tawh. Motor chhungah chuan ka ṭhu ngawi reng a, Ani pawh hian sawi tur a hre lehpek lo nge ni a ngawi ve leh reng tho. Restaurant pakhat kawtah a ding a, thil min ei chhuahpui a tum tih sawi hran ngailo in ka hre ve nghal mai a, mahse ngawireng lo hian mi te be ve se ka tih rualin kei a hmeichhia zawk pawn sawi tur engmah ka hrelo chu ania.

“Lut ang le,” motor a dah fel hnua a tih sup chuan ka zui ve nghal vat a, dawhkan awlah chuan kan ṭhu ve ta ran a. Ka rinloh deuhin ka ṭhutna tur min pawhchhuah thlap a, a ṭhut ruala min nuih suk chuan ka lai leh em em ringawt tawh. “Hrilh lawk lo che in ka rawn hruai ringawt che a, a pawi i ti viau em?” atih chuan pawi ka tih loh thu in ka chhang ve vat a, kan ngawi leh reng tawh. Waitress a rawn kal chuan ka ei duh zawng thlang turin min ti vat a, Ani pawhin ei tur a chah ve a, heti tak hian mipa pawh hi an lai ve thei a ni tih ka hre chiah. Kei ang tho a lai ve ṭhin a ni tih ka hriatna hian tlem tê tak takin min ti Confi ve deuh.

Keimah zawk chuan sawi tur ka dap chawp a, kan titi ve thei ta phian mai. Ani pawh chutia sawi tur ka zawn takah chuan eng eng emaw a sawi ve ṭeuh tho. Ka hriatchhuah tak chu hmelhriat thar siam tur hian mahni hi lo inhawn ve deuh a ngai anih hi. Chuti anih loh chuan tumah hian min nel ngawt theilo anih hi. Ka mangchhia avang te, ka hnalama ka buai lutuk avang te hian tumah hi ka kawm hman lova, ka thawhpui te hi an ni tawp mai. Chutih rualin damlo leh damlo chhungte mi tam tak kan dawr reng a, nel tak hian min be ve mai zel a, mahse chung chu min mamawh tu te an nih avangin min be ṭhin tu te an ni mai a, mahni kan inhawn ve loh chuan kan hna piah lamah hi chuan tupawh hian min lo en liam mai mai anih dawn hi.

Kan ei tur chah a rawn thleng a, kan titi pah ve reng a, an eitur tui ka tih thu te ka sawi ve luam bawk a. Chutih lai chuan a phone a rawn ri a. A chhang chhung zawng chuan ngaihsak anga lang silovin ka ngaihven ru reng a. A hna lamah thil hmanhmawh thlak a awm anih ka ring ve tawp. A biak zawh chuan nichin maia a hmel landan kha a dang ta daih a. Tuna a landan hi chuan thinrim hmel a pu. A nelawm leh tawh lovin kan damdawiin a rawn awm laia a landan chiah kha a ni. “Thil thleng a awm em ni?” ka tih chuan a lu a bu nghauh a, min chhang lo. A hnathawh ka zawt miah lova, mahse a hna lamah harsatna emaw buaina a tawk anih ka ringnghet hmiah thung.

“Nizana ruang an chhar kha postmortem result a chhuak tawh a,” atih chuan mak ti zetin ka melh a, Ani hi Police a ni ve tak tak a mi? Postmortem result daih a rawn sawi le? “A, ka hna chungchang ka hrilh lo tak che, Detective ka nia.” a ti leh sup a. Chhan mai dan tur ka hre lehpek lo. “I ei zawh tawh chuan kan kal mai dawn a mi? Rsa’n min nghak a.” atih leh chuan, “Awle,” tiin tissue chuan ka hmui ka hru vat a, ka tho chhuak nghal a. Kan ei man a pek fel hnu chuan a motor la chhuak chu kawtah chuan ka lo nghak a, mahse Restaurant opposite aṭanga min rawn en reng tu hmeichhia ka hmuh rual chuan ka phu nghal dawr a, kha hmeichhia ka mumanga ka hmuh leh tukin zinga a ruang an chhar ngei kha a ni tih ka chiang. Ka hmuh sual anih ringin ka melh ve reng a, Ani pawhin hmun dang en miah lovin min melh ve reng tho. Ka tha khur ru der der chu hriatloh der pawh tum ila a theih loh.

Ka hmaa motor rawn ding chuan ka en lai a rawn hliah a, mahse ka chesawn thei chuanglo. “Motor dang park an lo tam deuh a,” tia Rengpuia rawn ṭawng chu hre mah ila ka mit erawh ka la sawn theilo. “Ms i ṭha em?” tia Rengpuia’n ka dara a rawn khawih rual chuan harhchhuak thutin, a car hmalamah chuan ka kal vat a, kawngpui lehlam chu ka enkual nghal ruai a, mahse tumah ka hmulo. Khawiah nge a kalsawn hman, nge ni a Rengpuia thusawi avang te khan kei hian ka hmu sual mai mai zawk?

“I ṭha em, thil hmuh i nei em ni?” Min ngaihtuah hmel taka Rengpuia’n a tih chuan, thaw chhuak hakin lu ka thing a, “Ka ṭha alawm,” ka ti zawi sap a. Car kawngkhar min hawnsak rual chuan ka lut nghal vat a, Car hmalam kalpel in a rawn lut leh rual chuan min melh zawk a, “Ka thlah haw phawt ang che,” a tih rual chuan rang zet hian, “Aih nilo, ih a pawi i tih loh chuan min hruai ve mai rawh i kalna turah chuan,” ka ti bah deuh niai a, chutia haw ka duhlo chu mak a ti deuh nge min melh vung vungin, “Awle,” tiin a tlanchhuak ta nghal a.

Ka tha khur dar dar pawh chu a reh hlei theilo a, ka bula mi hian a hriat ka hlauh avangin ka kut pahnih chu suih zawmin ka ṭhu ngawireng a, ka awmdan chu duhlo viau mah ila ka in thunun thei meuh lo chu a ni. Nga ti nge tunhnai hian ka dawi tak em em mai le? Eng emaw hlekah ka phu nasa ṭhin in, ka hlauthawng hma em em chu a ni sia. Hmeichhe dawizep tak ka ni ngailo, ka mangchhia te hian min ti chau viau in mut harsa khawpin min siam ṭhin mahse mitthi tur hmu lawk zawng hian mumang ka nei ngai miau lova, tunhnaia ka chunga thil thleng hi mak ka ti a ni. Hmeichhe pahnih ngawt thi tur ka hmu lawk a, a hnu lawkah an thih dan rapthlak tak ka hmuh angin an thi ve ve a, chumai a nilo an thla in min umzui bawk a. Chung zawng zawng ai chuan Chhun leh zan a dang lo ber hi ka tan a hrehawm zual a ni.

Damdawiin ruang dahna bula Rinsanga lo ding ka hmuh rual chuan mak ti hmel zetin keini pahnih inzui chu min melh tawn sek a, min hruai ve a rinloh lutuk vanga mak ti hmel pu a ni tih ka hria, mahse engmah sawi lovin a lehkha ken chu Rengpuia a pe a, “Chhungte neilo bawk anih hmel.” a ti zui zat a. An thusawi awmzia chu hre ve lo mah ila tukin zinglama an ruang chhar vel kha anih ka ring ve tawp.

Rengpuia chuan a lehkha chu a bih thuak thuak a, “Doctor-in sawi a nei em?” atih chuan, “Um, a hma ang tho khan, a thih hma in apple leh thei ṭhenkhat pek a ni. A dang chu report-ah khan a inziah kha.” Rsa chuan a ti ve nghut a, lu bu nghauh nghauhin, “Kal phawt teh ang u, ka in lamah,” tia min melh zeuhin pawnlam a pan nghal daih a, keipawhin ngawirengin ka zui ve vat a. Hetia a hnathawhna hmuna zui hi ka duhdan nilo mahse nichin lawka thil thleng avang leh a hmaa thil thleng zawng zawng te avang khan kan ina haw hi ka ngam meuh lo chu a ni.

Rengpuia In kan thlen chuan mak tih avangin ka meng kawk thei hial nia. Keimahin ka cheng a ti a, a sitting room leh kan quater pum hi a intia hialin nia ka rin. Mipa mahnia awm anih thu a sawi khan in lian lemlo taka a chen vel mai mai ka ring kha ania, mahse chhungkaw rual ve tak pawh awm dawn se an leng vek ang tih tur khawpa in lianah a khawsa a, chupawh Amah chauh lehnghal in, khua a har duh ngawt ang, a hlauhawm zawnga ngaihtuah phei chuan a hlauhawm ngawt ta ve ang.

Rsa chu tlangnel takin a awm a, kei erawh inthlahrung ru zetin Sofa a hunah chuan ka ṭhu a, Rsa’n theitui in rawh tia ka hmaa theitui a rawn chhawp chuan ka lo ban vat a, “I hmel kha hlauh i nei tiraw?” atih chuan za lo zetin ka nui lui a, ka chhang lo. Aw tia chhan ka duh mahse ka hlauh min zawt ta se, ka chhanna hian a nuih a ti za mai mai dawna ka hriat vang a ni. Nula puitling tawh chhuna thlahrang hmu nih pawh zahah ka la miau si a.

“Min hrilh teh eng nge i hmuh?” ka sira ṭhu thla paha Rengpuia’n a rawn tih thut chuan ka phu leh chiam tawh, Rsa nen kan inbiak khan pindan lamah khan a lut daih sia a rawn chhuah lai ka hre lo reng reng. “Tihpalh tih phut che ka tum miah lo,” ka phu nasa lutuk a hmuh chuan a ti nghal vat a, a zawhna ngai bawk min zawt leh a, mahse engtin nge ka sawi ang. Sawi ta ila min nuihzat mai angem? Dawizep tak anga lan la ka hreh ve viau sia.

4

(Rengpuia Pov)

Ka hmaa hmeichhe ṭhu chu chik zetin ka melh a, Restaurant aṭanga kan chhuah khan hlauh a nei leh tawh tih ka hria, eng emaw hmuh a nei tih hai rual lohvin a hmelah khan a lang chhuak anih kha. A thil hmuh ka zawh avanga a phu nasa lutuk kha ka inthiamlo zawk viau lehnghal a. He hmeichhia hi ka hriat tirh a, a awmdan leh vawiin nia a awmdan danglam lutuk hi Amah hre ve tu deuh tan chuan a hriatthiam vek ngei ang, mahse engvanga hetianga awm hi nge anih?

“I sawi hreh viau a mi?” vawihnih ngawt ka zawh hnu pawha chhanna min pek mai loh avang chuan ka ti tawp a, eng thilin nge ti hlau tih hi hre duh viau mah ila, Amah la hian a sawi hreh viau si a. Rsa zawk chuan thil dang a sawipui hnu pawh chuan a awmdan hahdam thlak loh zet chu ka melh ru leh zauh ṭhin. Ka inah ka hruai a, mahse sawi tur pawh ka hre ve leh der lo chu ania.

Mipa ṭawngtam zawk zawk ka nilo a, kâ aia thluak lam hmang tam ka nih vang hi aniang, ka thawhpuite ah pawh nel taka min be tu chu Inspector Ruatpuia leh ka ṭhianpa em em Rinsanga hi an ni mai. Ka pu In kan chhungkaw tana a pek, he In lian zetah hian keimahin ka cheng chu a, chhungte neilo erawh ka ni hauh lo. Ka hna avang hian ka chhungte nen kan awm ho thei rihlo mai a ni.

Msi nen kan intawn dan ka ngaihtuah a, an ṭhiandun khan kan nunna an chhan anih kha. Kha mi ni khan tûra hrai ka ni a, Anni pahnih kha awm lo ta se, vawiin niah hian helaiah hian ka ṭhu tawh hauhin ka ringlo. Central Service ka nih avangin koh ka nihna hmun apiangah kalin hna ka thawh a ngai a, South India lam buaina avangin Mizoram pawnah hun rei tak hna ka thawh hnuah Mizoram a rawn let leh chiah ka ni, mahse helai thleng thleng min umzui ngam ang tih ka ring miah lo. Kan buaina chinfel a nilo chungin ka chunga thil thleng avangin Sokar thuneitu te zawkin min thukru a, helaiah umzui a tûra hrai ka nih kha engmah report ka pe lo, a chhanchu kan ramah ka himlo tih hotu te lamin an hriat chuan Mizoram pawnah kal tir ka ni leh dawn a, chu chu ka duh lemlo. Ka awmna hmun erawh ka sawn leh ta anih hi.

Min umzuitu te ka zawn ruk mek laiin beisei loh leh rinloh takin Mizoramah tualthahna a thleng a, Ruatpuia’n min koh tel ve avangin langlo lam aṭangin Case chhuinaah ka tel ve leh chu ania. Telloh pawh tum ila Rsa avang hian ka tel leh dawn tho tih ka hria, Ani hi Mizoram sorkar hnuaia Investigation lama thawk a ni miau a, Mizorama ka awm tawh hi chuan case lian deuhah hi chuan ka tel ve loh pawhin min hrilh ve zel a.

Ani nen hian kum eng emaw zat kan inhre tawh a, kan inhriat dan pawh hi sawi tham fe a awm, vawiin niah erawh ṭhian inkawmngeih tak kan ni ta chu ania. Ka inah hian kei ai pawhin a thu tawh zawk chu anih hi. “Vanlal, eng nge i ngaihtuah vung vung, ka rawtna chu eng nge i ngaihdan?” min koh fo dana a tih chuan ka hawi deuh hu a, Rsa ner nghal nawng ka hmuh rual chuan, “Hmela, kan thusawi kha pakhatmah ilo ngaithla lehpek lo a ni maw,” ti hlukin min melh khui a, lu ka thing ringawt a hmuh chuan hahthlâk tih hmel zet hian a phun nghal hluk a. Nula inleng ka hruai ve a, Rsa hi awmlo sela chuan a buaithlak viau ta ve ang.

Msi hmela nuam tihlohna la chambang ka hmuh chuan ka ngaihtuahna aṭanga chhuakin nui sukin, “Eng nge in rawt a?” zawh bik pawh nei lo in ka ti a, Ka nuih chhan pawh ka hrelo. Rsa zawk chuan, “Naktuk chu Sangpuii nen off day an nei a, picnic ang u kan ti anih chu, i tello pawn a nuam tho ang,” ti nghal zatin a nui vur vur a, ka peih a ringlo pawh a ni mahna. Msi chu en in, “I peih a mi? Hepa bula nileng hun i hman chuan i â vek ngei ang,” ka tih chuan Rsa ner nasa lutuk chu en duh lovin Msi chu ka melh reng a, Ani pawh alo nui ve sen sen mai. A nui hmel ṭhat zia hi a inhre ve angem le? Ka melh reng vang nge a lai hmel biang tai hlar te chuan a ti duhawm takzet.

Hmeichhe ngaihven tak ka nilo a, Ka nunah hian hmeichhe pakhat chiah a awm ṭhin, mahse Ani erawh ka venhim zawhloh avangin a nunna a chan a, vawiin ni thleng hian ka tan tumah an awm leh tawhlo. Malsawmsangi a rawn lang a, Ani erawh hmeichhe dang ang a ni ve lo, a engkim mai hian ka hmangaih Lalrinzuali kha min hriatchhuah tir ṭhin miau a ni.

Tlailam anih chuan Rsa rawtna angin ka inah chaw eikhawm a rawt a, Sangpuii a call nghal zat bawk a, hepa hi chu a che rang mah mah zel chu anih hi. A hnen aṭanga Sangpuii number nei pawh kha ka ni tak e, chuan Sangpuii aṭangin Msi no ka nei leh a. “Vanlal, mahnia nui vur vur lo khan chawhmeh leina tur min rawn pe teh.” Rsa’n a tih chuan, “Kei aiin i hausa zawk,” tia ka thawh vut rual chuan ka banah rawn vuan nghal vatin, “Fridge a awmsa hi siam mai ang,” a tih chuan lu thing nghutin choka lamah ka kalsan a. Msi nui ri hak hak pawh ka hre zawm nghal zat.

Ka Fridge khat ṭunin chawhmeh a awm a, siam ve mai se, a dang lei pawh a ngai tawp silova, a uikawm lutuk min tih leh duh vang bak a nilo ang. Rsa leh Msi’n rawng an bawl chu chaw ei dawhkan aṭang chuan ka en leh zeuh ṭhin, Msi hlim taka a nui ka hmuh chuan ka chhûnglamah hian engvang nge tih ka hriat thiam siloh hian ka lo hlim ve tawp a, khitianga a nui hmel saw hmuh reng ka duh, mahse keimah vanga a nui hmel ni thung rawh se.

Choka aṭanga no khu vat vat kenga ka lam lo pan tu chu ka melh reng a, a nui sang hmel hmuh nuam tak hi ka en kham theilo chu anih ber hi a. “Thingpui in rawh,” tia let leh mai a tum chu, “ṭhu ve rawh,” tiin ka bula chair chu ka pe vat a, Ani pawh a ṭhu ve mai bawk a. “Eng nge i an?” ka tih chuan, lu bu nghauhin, “Ka pangngai tawh e, khatianga ka awm avang khan min hrethiam rawh aw,” inthlahrung deuha a tih chuan, “Um, mahse min ring la a chhan min hrilh la ka duh a ni,” ka ti nghet charh a, a mitah ka melh ran bawk a, a kut khawih niap niapin a thaw haka a sawi hreh leh hle tawh tih ka hria.

Zingkara an quarters-a ka kal khan hetiang chiaha hlau hian a awm leh tawh a, chuan kan chhuahnaah a ni bawk, eng emaw hmuh a nei tih sawi lo mahse a awmdanah hian ka hria, mahse ngati nge a sawi duh loh tih hi ka hre duh a ni. “Min nuih ang,” a tih chuan mithmul ka san ak a, “Nga ti nge ka nuih ngawt ang che,” hrethiamlo zetin ka ti zui ve zat a. A sawi hreh hmel lutuk avang hian hriat ka chak zual sauh chu a ni si a.

“Ih, Thlahrang ka hmu ṭhin a,” a rawn ti chhuak hluai a, mahse min en lovin a kun nghal daih, a fiamthu nih ringin ka melh reng a, min en bawk siloh avang leh ka beisei loh lutuk thil a sawi avang chuan chhan ngaihna hrelo in ka ngawireng a, a rawn hawichhuak leh erawh a mit a sen râm a, a hnar a sen hlar bawk, a thil sawi hreh em em ka sawi tir vanga ṭap nge a hun tawn mek a hriatchhuah avanga ṭap tih ka hrelo, ka hriat zawng chu Ani hian thlamuantu a mamawh. Ka tho a, ka awmah ka pawm bet nghal thlawp a, a sama ka chul heuh heuh rual chuan a ṭap khur ta ngat ngat a, keipawhin ka kuah nghet ve sauh bawk.

Kan bul maia khuh ri kharh ri kan hriat chuan inthlah vatin kan hawi chhuak nghal thuai a, Sangpuii lo ding reng ka hmuh rualin, “Rinsanga chhuah lai ka hre miah lo,” ka ti zui zat a, a hruai lo anih chuan ka in a rawn hriat ngawtna chhan tur a awm miau lova. Choka aṭanga Rsa rawn chhuak chu ka lo melh deuh ha a, “Ka chhuak lo, rawn kal dan ka hrilh mai,” tiin Msi chu a ko zawm zat a, Msi pawh tho vatin choka lamah chuan an lut lehnghal daih chu hrilhhai angreng takin Sangpuii chu ka melh reng ringawt. A ṭahna mit sen ram pawh reh lova min melh miah lova Rsa kohna lama a kal daih kha mak ka ti em alawm.

“Inleng an lo luh te chuan ṭhu rawh te min ti ve la mawle, Anni la kha an inko hrang daih bawk sia,” nui var vara Sangpuii’n a tih chuan harhchhuak thutin, “Nia aw, ṭhu rawh,” te chu ka ti ve leh hnuhnawh a, midang han biak vak dan ka hriatloh mai bakah Msi awmdan khan min ti hamhaih ve deuh pawh a ni mahna.

“Engvangin maw Msi kha a ṭah a?” a ṭhut fel rualin a ti nghal zat a, kum lamah a naupang chhe tawh lo tih a hmelah a hriat a, ka hriat chinah mi tlang tak niin ka hre bawk. Ani nen hian quater khat luah an ni a, Msi chanchin min hrilh tur a hre ngei ang. “I ṭhiannu harsatna hi Nangmah hian min hrilh la ka duh, ka zawh lahin a sawi thei bawk silova, ilo hmuh ang khan.” Ka tih chuan, min melh vang vang a, rinngam ka ni em a fiah phawt te pawh a ni mahna.

“Mangchhia aṭanga inṭan ania,” tiin Msi chanchin chu a hriat theih chin leh tunhnaia a danglamna chu tawi fel tak hian a sawi a, mahse ka hriat duh chu ka hre kim viau in ka hria. “Zanriah kan peih asin,” Choka aṭanga Rsa’n apron nen ha chunga a rawn tih chuan Sangpuii chu alo nui hak hak a, Rsa apron hren a nuih tih hriat takin ri nghal hlutin Choka lamah chuan an inzui lut nghal a, kei erawh ka ṭhutnaah ka la ṭhu reng a, Sangpuii thusawi kha mak ka ti a ni.

Thla leh huai tih vel hi ka ring ngailo a, tin, hlauh tur a awm anih chuan mihring damlai ngei aia hlauh tur an awmin ka hrelo, mahse he hmeichhia hi chuan thlarau khawvel a ṭawm a, Anni lah chu nelawm takin an inlan ngai bawk silo, engtianga tih reh chi nge anih ka hre hauh lo bawk. Mahse engvanga mangchhia aṭanga mitthi tur hmu lawk kher nge anih le? Amah nen hian eng inzawmna nge an neih?

Zanriah kan eikham a, Rsa’n an ṭhian dunin a thlah thlap a, Ani pawh a haw ve nghal bawk. Study room-ah lutin ka hna ka enfel a. Thla hnih liam ta maia thil thleng chu ka chhui kir a, mihring hmanga sumdawnna lian lutuk kan man hlauh a, mahse a neitu lam kan chhui zel lamah mi hausa leh thil ti thei tak tak kan chhui lut a, tin, misual rual pawl lian tak tak te kan chhui zel a, kan hna ti tawp tura vau na tam tak kan tawk a, ka chawlh duh miau loh avangin thah hial min tum kha ania, kan mi leh sa pathum ngawt an that bawk a, kei erawh ruahman angin Mizoram lamah ka let rih a, mahse Hotel chhungah khatiang kha ka tawng leh a, min hraitu zinga pakhat erawh ka inchhungah hian ka dah tih tumah in an hrelo.

Ka study room chhunga lehkhabu in rem tlar dul chu ka melh kual dan dan a, zanin hian min thah tuma min vehtu te hi ka hriatchhuah ngei a ngai tawh tlat. Lehkhabu pakhat chu ka kuai zeuh a, bang chu a inhawng nghal ruah ruah a, a chhung eng nghal pupah chuan ka luh rualin bang pawh a inkhar fel lehnghal thlap. Hna ka thawhna diktak, ka pindan ruk ka luh rualin lang thei china vai palian zet chair a ka phuar hlawm chu ka hmu nghal a, ka chhuah dawn khan ka chiu muhil kha ania, mahse damdawi ka pek san loh avangin alo harh tawh tih hriat zetin a tal uih uih a, chhuah dan a dap tih ka hre mai.

Ka hmel a hmuh rual chuan a rum chur chur a, ka kal hnaih zel tih a hmuh chuan anchhe tinreng phuh chhuakin Amah chhuah turin min ti a, Hindi leh Tamil a hman pawlh nawk danah South India lama buaina aṭanga min umzui tu ngei a ni tih ka chiang. Hetah hian ni 5 ka dah tawh a, mahse ala ṭawng miah lo kha ania, zanin chu ka zawt chhuak tawh ngei ang.

“Ni nga dawn chaw leh tui mumal i dawng lo chung pawn kha ila ṭawng thei khawp alawm,” ka tih chuan min melh khui a, mahse a mitmeng dul ruih ah chuan a chauh tawh zia ka hre thei. “Zawhna ngai, Tu nge tir che?” ka tih chuan a hma ang bawkin sawi tum hmel a pu lo. Ka hmanraw hrang hrang dahna lamah kalin Ka bawm chhunga thil awm chu ka hai rak rak a, Pin zum sin tak ka hmuh rual chuan la chhuakin ka mi man pa lamah chuan ka lek va va a, ka thiltih tum chu hrethiam lo tih hriat zetin min melh deuh hu bawk.

“Mihring taksa ti na thei ber thil hi i hre tawh ngai em?” ka tih chuan a rum nghut a, a in rin hma hauhin a ṭhutna bana ka phuarbeh a kut ṭang hmawr ah chuan pin chu ka vit lut ta thawih a, a na ti rak ri chu pui tak a ni. A chau viau tawh emaw tih hnuah pawh ala au ring thei khawp alawm. Kan awmna hi pawnlama thawm hriat theih loh tura siam anih avangin ring taka a au anih pawhin tumah in an hre dawn lo. “Pin zawng zawng hi vit lut turin min duh em?” ka tih chuan a chil phuan baw nuai hian a lu a thing nghut nghut a, “Anih chuan ka hriat duh chu?” ka ti lehnghal hmuk.

“Nitesh, Nitesh Roy, Roy Industry neitu te fapa naupang zawk. Ani chuan nangmah that tur hian Assassin rual a ruai alawm, keichu enthlatu tur che a tirh ka ni, mahse lawmman tur ka ngaihtuahin i lakah khang thil kha ka ti ta a ni.” mittui tla purin a ti a. “Min enthla tur chuan mi engzat nge rawn kal?” ka tih leh chuan a kut hmawra thir zum chu a melh vung vung a, a nat dan tur ka hriat miau avangin thir chu ka khawih zeuh a rang zet hian, “Panga,” a rawn ti leh nghal hluk. A kut hmawra thir chu ka phawi nghal zawk a, a hma ang tho a ringin a au ruai ruai a, injection siam mawlh mawlhin, muthilhna chuan ka chiu ta nghal a. Min thah tuma min beitu ka hre tawh bawk a, zanin atan chuan ka duhtawk rih e.

Pawnlama ka chhuah rualin sana ka bih zeuh a, dar 11 alo pel thuak tawh, ka pindan lamah lut lehin thawmhnaw pangngai tak ka inbel a, jacket ha leh in, car chahbi la in ka chhuak zui nghal a. Zan a rei ve tawh bawk a, kawngpui dung pawh ṭhalai hawklak deuh bike chak deuh deuh a tlan tih loh chu mi an tlem tawh a, khawlai tlan pawh a nuam viau e.

Thil danglam thleng a awm leh awmloh hre turin Msi te quater lang thei chin kawngpui sirah chuan motor ka ti ding a, Light an off vek lo bawk a, inchhung pawh tukverh aṭang chuan a lang ruak mai, helai vel hi quater a tam avangin midangin min hmuh mai erawh ka hlau ve deuh, mahse Msi khan buaina a tawh leh palh takin heta ṭanga lo enzui hi ka duhdan a ni miau a.

Varṭianah ka in ka pan ve chiah a, thawm danglam engmah a awm loh avanga hawsan ta kha ka nia, harsatna an tawk tawh em lovang chu. Reilo te tal muthilh ka duh avangin ka pindan ka pan nghal a, ngaihtuahna dang nei duh tawh lovin ka mu nghal.

Ka phone riah chuan harhin min lo call tu ka hmuh rual chuan ka phun hluk a, ka reject nghal hmak. Hmeichhia hi an ninawm, Msi tih loh chu. Ani hi chu a danglam a ni. Ka nu missed call ka hmuh tel ve avangin ka call back vat a, rei tak erawh kan inbe lo, a fapa upa ber ka ni a, min ngaih zia ka hria, mahse ka hna vang bawkin kan awm ho thei silova. Keima vangin khawpuiah pawh awm theilo in Thingtlang lama kan chhungte inluahin an khawsa ve a, farnu pakhat leh nau mipa pakhat ka nei bawk, Anni erawh college zirlai ve ve an nih avangin hostel-ah awmin Aizawlah hian an awm thung.

Mahse an him zawk nan vawikhatmah ka tlawh ngailo. Kan buaina hi chinfel vat nise ka tih nachhan pawh a ni. Ka khum sir dawhkana Lalrinzuali nena kan thlalak frame a ka tar chu ka en reng a. Khami ni khan hruai ve kher lo ila, vawiin niah hian nung damin ala awm tur.

Silai tawlh ruk kan buaipui fel hnu lawkah Mizoramah ka haw a, kum3 chhung ka bialnu ni mai tur nen inneih kan tum avangin chawlh ka la nge nge. Kan inneihna tur engkim tihfel a ni tawh a, ka ṭhiante leh chhungte khaw danga awm pawh an rawn thleng kim tawh. Hna lama ka thawhpui tam ber Rajiv a rawn thlen dawn avangin Airport-a hmuak turin ka kal a, nidang zawng a ka thu hnial ngai miah lo khan, kal ve a chak thu a sawi sek avangin, tih tur dang kan nei tawh lo bawk a tiin ka hruai ve kha ania.

Khati taka hmeichhe hmelṭha leh rilru ṭha tia mite’n an sawi fo ṭhin ka ta a ni mai tur kha ka hlimpui hle ṭhin anih kha. Rajiv te nen hlim takin kan haw a, mahse kan haw kawngah erawh a thleng ang tih pawh ka rin phakloh leh ka duhloh kan tawng a, ka car brake a chhe thut a, kawngthlang lama liam aiin kawng chhak lam kopang ka su ta a. Mahse kan harh chhuah hma a, silai vawi thum ngawt puak khan, ka motor chianloh vang nilovin mi tu emaw in thah min lo tum lawk reng tih ka hrethiam.

Khami ni kha ka theihnghilh theilo a, ka theihnghilh ngai dawn heklo. Lalrinzuali boral hnu khan engmah hian ka hlimna tur a thlen thei tawh lova, ka tan Hlim tih ṭawngkam hian awmzia a nei tawh heklo. Rajiv kha vawi khat an kap a, Rinzuali erawh vawihnih kah a ni thung. Midangin min lo hmuh lai khan kan inkuah a, silaia an kah hnuah, min kap ve tur a indawh tihna a ni. A darah leh a lung a kah anih avangin ka pawh chhawn lova a thih nghal thu an sawi lai te khan keimah zawk ka thih loh avanga ka natna khan Pathian hial ka dem anih kha.

Khang kum te kha kum10 dawn a liam tawh mahse vawiin ni thlengin a hunlai ang mai khan ka ngaihtuahna leh ka thinlungah hian ala chiang si a. Ka hnaah rilru ka pe a, thildangin min tibuai ngai heklo, ka theih anga tam misual ka man hian Lalrinzuali laka ka ba ka tlakah ka ngai a, Ka hnaa thih hlaulo tia Gang tam takin min hriat nachhan pawh a ni reng bawk a. Kei chuan dam aiin thih ve a, ka hmangaih kianga kal ka chak miau si a.

Ka phone bawk alo ri leh a, Rsa call a ni. Ka pick up rualin kawngkhar lo hawng te tiin a dah lehnghal daih a, ka ngaihtuahna ka kawm nasa mah mah tih hria in, khum aṭang chuan tho in, ka boxer nen kawngkhar hawng tur chuan ka chhuak a. Kawngka ka hawn ruala, “Wow” titu Sangpuii chu en in ka nuih suk a, Msi erawh a zak tih hriat takin a kun daih a Rsa’n, “Ila insiam ve lehpek na nge?” tia Amah a luh rual chuan midang pawn an zui lut ve nghal a.

“Hetiangin in ti hma dawn tih ka hre hleinem mawle,” inchhung ka luh ruala ka tih chuan, “Inha phawt teh,” Rsa chuan tiin Msi chu chokaah a luhpui nghal daih a, Sangpuii nui rah rah chu en in, “Ka chhelo zawk tiraw?” fiamthu a ka tih chuan a nui ring kher mai. “Fiamthu i thawh thiam ve ni maw,” atih chuan kan mengrum leh vel a, a nuih a za tulh tulh emaw ni. A ṭha mi nel ve rawh se, nel taka be tu pawh ka neih loh hi. Ka insiam zawha sana ka en chuan dar10 alo pel der tawh, ka ṭhiante an hma ka tia, ka tho chhuak tlai tih ka hre chiah.

Ka thawhpui Sanjay ka call a, min umzui thu ka hrilh tawh a, man ka neih pawh ka hrilh tawh bawk. Hotu lama thlen lo tura ka tih avangin Ani pawhin min zep pui kha ania, vawiin lamah Mizoram a rawn thlen dawn avanga tunah pawh bia ka ni. Tih tur kan neih avangin ka ruahmanna ṭhenkhat hrilhin zan lama ka hmuh tur thu ka hrilh nghal a. Ani pawhin a rawn thlen hun tur a sawi hnuin call kan ti tawp zui ta a.

Rsa te huanah kan kal a, vawi tam ka kal ve tawh a, Hmeichhe pahnih hian nuam an ti khawp in ka ring. Car a rawn ken miau avangin ka bike pawh keng duh bik lovin car-ah kan chuang a, Sangpuii nen a hmaah an ṭhu a, kei leh Msi a hnungah kan ṭhu thung. Rsa leh Sangpuii titi kan ngaithla kawng tluan a, Msi nen pawh an titi ah kan nui ve vur vur alawm.

Kan thleng a, rin lawk ang ngei in hmeichhe pahnih te’n nuam an ti viau mai. An kal hran hnu chuan Rsa nen Thingkung hnuaia ṭhutna an siamah chuan kan ṭhu a, kan hna tura ka duan lawk hi hrilh ve ka duh, “Rs, zanin chu hna nei ila.” ka tih chuan min en vat a, “Tualthattu i hre tawh bik a mi?” a rawn ti vat, ka tum loh lam daih a rawn sawi avang chuan ka nui hawk a, a ngaihna hrelo zeta min melh reng chuan ka nuih a ti za tak tak, min ngai fing bik lutuk hi chu a nuam ve hrim hrim e.

Ka nui tawp a, thutak zawkin, “Smuggling chungchang ka buaipui ka tih kha ila hria em?” ka tih chuan a lu a bu nghut a, “Kha thil kha a fel mai dawnin a langlo. Umzui tu ka nei a.” ka tih chuan, mak ti hmel a pu, “Mizoram thleng hian maw?” a ti nghal reng bawk a. “Um, tunah pakhat ka kawl, ka inah,” ka tih te hlei hlei chuan mak a tihna a zual a, ni e, a demawm loh detective hming pu ṭheuh ṭheuh kan hna a in len hleih ve deuh bawk em a ni.

“Chuan eng nge hna chu?” atih chuan ka nuih leh suk a, “A hunah kan sawi dawn nia, chuan tualthattu leh Msi hian inzawmna an neih ka ring.” ka tih chuan, “Maw” a ti nghal hluai a, ka kut vai zauhin thawm chhuah vaklo turin ka ti nghal a, “I duh emaw ka tih vangin ka kawm nel a, ilo chhui duh vang zawk maw lo ni?” tiin a chek hluk a. “Ka duh alawm, mahse a hun tawn zawng zawng ka ngaihtuah hian eng emaw tak inzawmna an neih ka ring tlat a ni.” ka tih leh chuan a hrethiam lo hmel chu en in, “An bulah kal ve ila, i mak ti hmel kha paih teh. Khatiang te chuan an ngaih a ṭha lo ang. I thil chhui kha i sawr zim dawn tihna anih kha, tikhan i hna a awlsam deuh ang.” tiin ka thawhsan a, Ani erawh inngaihtuah nasa tih hriat takin a la ṭhu reng thung. Msi ringhlel tur khawpin a ngaihtuahna erawh a tawilo tih ka chiang a, chhui zui na tur pawh a hre ngei ang.

Hmeichhe pahnih te swimming pool bula thla la a awm chu an hma zawnah ṭhu in ka en a, an lo hawi changin ka kiai leh suk ṭhin. Rsa pawn a hna dahṭha in hmeichhe bulah a titi leh suam suam tawh a, an nui leh nasa hlawm tawh khawp mai. Rsa’n, “Ms Inah khian ei tur kan dah vek a, vawiin chu Vanlala nen hian siam ve thung teh u, ei siam lo zirtir pah la.” atih chuan nui nghal sen senin, ka ṭhutnaah chuan a rawn kal nghal vat a, tho ve nghal vutin In lamah chuan kan inzui ta nghal a.

“Nuam i ti em?” ka tih chuan, “Um” tiin a hmun vel nuam a tih thu leh hetiang hmuna kal a mamawh zia a sawi ve siam siam a, hmeichhe harhvang tak, ka hmuh hmasak bera min ṭanpui kha a ang leh tawh alawm. A thusawi a nuih pui hak hak lai chu en rengin, “I nuih khan i hmelṭha.” ka tih rual chuan a ṭawnglai tawp chawtin min melh nghal vat a, mahse rei min en lo, hnuailam a melh nghal daih a “Min enteh” ka tih chuan min melh leh zawk ringawt. Zak tih hriat taka a biang tai hlar te hi a duhawmna belhchhah tu a ni tih la a hre ve awm tawp silo.

“Bialpa lo nei suh ka tih che kha, ila hria em?” ka tih chuan a lu a bu nghauh a, min chhang lo. “I bialpa ka ni duh.” ka ti tawp ringawt. “Ah, ka bialpa maw?” a ti deuh ha a, “Um” ka ti leh tawp. Ngawirengin pawnlam a melh a, a bialpa ni turin min duhlo anih ka ring hman hial. “Ka chungchang Sangpuii’n a hrilh vek che tiraw?” a rawn tih chuan, “Um,” tiin ka melh lui ngar a, eng nge a ngaihtuah tih ka hrethiam lo. “Khang thil zawng zawng kha hun rei tak ata tawh ka tawn fo a ni a, khangte avang khan ngaihzawng pawh ka nei ngailo.” a ti zawi sap a, a ṭawng leh hun tur nghakin a bulah ka ding tawp. “Harsatna tam tak ka thlen phah che ka hlau a ni.” a rawn tih leh chuan, a biang tawn tawnah ka dawm a, ka fawp ringawt. A tan thil thar tih hriat takin min chhang let lo, mahse a hmui no chek a fawp hmasa ber tu ka ni hi ka lawm ru veng veng thei nia.

A vawikhatna tih rilru in a hriatreng avangin rei pawh ka fawp lo, a zak hmel duhawm thei lutuk mawlh hi a ni. Tleirawl ang maiin a lai in, a zak ṭhin chu a ni sia. I lawm awm ti ila a duh bik awm tawp silo. Ka ngaihtuahna chu ka nuih pui vur vur a, “Nga ti nge i nuih? Ih, in kiss ka thiam lova,” a tih bah niai chuan, “Ka bialnu i ni tawh ania,” ka tih chuan a nui ve tawp.

Ei tur kan siam zo a, Rsa leh Sangpuii te pawh an rawn lut ve tawh a, kan ei zawh meuh chuan a chawhnu leh ruih tawh. Zan lam hna kan neih miau avangin haw hma ka rawt a, midang pawh hian an sawisel lemlo. Haw lamah motor ka khalh a, Msi ka bulah ka ṭhu ve tawh thung. A hnunglama mi pahnih te hian engtik lai pawhin sawi tur an hria chu anih hi. Keini pahnih erawh kan in melh leh zawk tih loh chu sawi tur kan hrelo nge kan pahnih chauha kan awm hun atan kan khek zawk pawh ka hre lo, kan ngawireng leh tawh chu ania.

Sangpuii leh Msi kan drop thlap a, ka biak tur thu hrilhin kan tlansan leh ta nghal a, ka phone phawrhin Sanjay ka call nghal a, Ani pawh Hotel a thlen tawh thu a sawi chuan Amah lam turin a thlenna lam kan pan ta nghal a. Hna anih tawh chuan a tih dan ngai te in Rsa pawh a ṭawng leh tawh manglo. A ngawi ngul a, kan ngaihtuahna ve ve kan hmang a, kan ngaihtuah erawh a dang deuh mai thei. Sanjay-a thlenna Hotel kan thlen chuan pawnlama min lo nghah tawh avangin a rawn luh fel rualin ka in lam bawk kan panpui ta nghal a.

Ka in kan thleng a, hawikual thuakin inchhunglam kan pan nghal. Ngawirengin ka Lehkha chhiarna pindan ka pan a, Anni pawhin min lo zui ve zel bawk. Ka pindan thuhruk ka luhpui lai chuan Sanjay chuan, “Wow” a ti sup a, mahse ka chhang lo. Ka bula Rsa erawh chuan helai hmun hi ka nei tih a hriat tawh miau avangin a landanah Sanjay-a phur leh mak ti pawh chu hria angin a lang lo. A chhung kan luh fel ruala ka mi man injection ka pek avanga muhil bawrh bawrh chu Rsa zawk chuan a thlek vut a, Sanjay-a erawh chuan hnai zeta enin, “Eng nge plan?” a tih rual chuan, ka ruahmanna chu ka hrilh ta vek a. “A ṭha, helai thleng thlenga lo um ngam tu che chu kah a ṭul pawh in kah mai tur.” Rsa zawk chuan a ti nghal hmuk a. Zanin kan hna tur chu huphurh hmel an pu lo, zawn vata kan hna thawh fel vat an chak tih an hmelah a lang, keipawn Anmahni ang chiah hian Mizoram ka buaina hi chu chinfel vat ka duh, chumi hnuah Central lama let vata, tlan zawk nilova um tu ngei nih ka duh a ni.

5

(Msi Pov)

Ni hnih chhung mangchhia leh thlarau sual te’n min tibuai tawh lova, a mak tih bak sawi tur ka hrelo. Ni hnih lek ni mahse ka tan erawh rei tak ang a ni thung. Tibuaitu nei lova ni hnih lek awm pawh a hahdamthlak takzet. Sangpuii bula ka sawi chuan a reh tawh dawn anih a rin thu a sawi a, keipawh hian reh tawh se nunphung pangngai taka hman ka chak ve tawh. Tunah lah ngaihzawng nei ka ni ve tawh bawk nen.

Kan lenchhuah ni ka ngaihtuah let a, mipa ṭawngtam leh zei tia sawi tur a ni hauh lo, mahse a awmdan leh che vel engkim hi ka suangtuah ṭhin mipa a ni tlat. Min duhna a tilang khu chuk lova, mahse a thusawi a rinthlak hle thung. Kan inhriat chinah min ngaihsak huam angin a lang ngailo, mahse ka awmdan engkim a chik tih Restaurant-a kan kal ni khan ka hria. Inthup tum viau mah ila, ka chunga thil thleng a hrethiam tlat anih kha.

“Hey, nangnu kha lokal rawh ward round angai ania,” Sangpuii’n a tih chuan ka ngaihtuahna ata harh zawkin ka nui nghal var var a, “Eng nge ilo ngaihtuah a, ahhh kan ring chhin,” tia mitmeng chimawm zeta min melh chuan a kâ hup sak vatin, “Midang hriatah sawi suh a zahthlâk,” ka tih chuan nui rah rah hian, “Kan tleirawl thar leh tihna a mi?” tia min fiam leh zeuhin damdawi sem tur chu a siam nghal mawlh mawlh a, keipawh ka nui ve tawp. Hetia min fiam hian sawi ve tur ka hre ngai miau lo a tin ni.

Chhun awl laiin Malsawma a rawn lang hlawl a, thawhna hmunkhat leh unau mah ni ila kan buai dun em avang hian kan inhmu khat ṭhin viau a, mahse min hmu tura a rawn kal hi chuan ka hlim ṭhin hle thung. Ka chhungkaw neihchhun kha a ni miau a. “Mate, in chhuak hman em? Ka treat ang che u ka hman lai tak ania.” atih chuan phur zetin ka bag ka la nghal vat a, Sangpuii erawh in tih tur aneih thu a sawi tlat avangin kan kalsan ta a.

“Vawiin chu tlaiah Bazar ila, Sangpuii pawh sawm ve la,” a tih chuan nui var varin, “Eng nge min lei dawn?” ka ti nghal vat a. A nui ringawt a min chhang lemlo. Restaurant nuam takah min chawlh pui a, ka rilru hahdam ta nen nuam ka tiin ei tur pawh ka duhthawh takzet. Ka in entir chungchang te, ka hriselna te min zawt ve luam a, ka damloh hnu khan phone in eng nge ka an min zawt reng a, a buai em avanga kan quater lama a rawn kal theilo pawi a tih thu a sawi fo bawk anih kha. Mahse ni hnih chhung lekin ka ṭha tih a hmu a, a lawm thu a sawi ve luam bawk.

Malsawma hi keimah ang tho inthlahrung mi leh ṭawng tam zawk zawk a nilo a, phir kan ni bawk nen kan mizia hi in anna kan ngah khawp mai. Chhungkua kan kim lai pawh khan kan unau a kan awm chuan thawm kan nei ngailo tia ka nu in a sawi fo kha kan ni. Kan naupan laiin kan kawtah kan unau in kan infiam a, chutah chuan Malsawma hi thing dawh ah a tla hawlh a, a ke a tang a, a la chhuak thei silo kha ngawirengin tlai thlengin ka awmpui a, ka nu bazar haw in min lo hmu a, chumi ṭum chuan harsatna kan tawh a, ṭanpuitu tur zawn vat a ṭul thu min hrilh a, na kan neih pawha ngawih pui mai chi kan nih avang hian nu leh pate an awm loh hnu pawh hian damloh harsat kan neih pawhin a theih chin chinah mahnia chinfel kan duh ṭhin.

“Hetiang hian nui reng rawh aw,” atih chuan ka melh vang vang a, damlohna a nei anih ka ring hial. A mitmeng a dul ruih a, a mit hnuai a dum kalh a, ka hlim em avanga ka lo ngaihsak lo chu ka inthiamlo thar hle bawk. “I ṭha em?” ka tih chuan nui sukin, “Um ka ṭha e, tunlai chu ka hah deuh a, ka ngaihtuah bawk che nen.” atih chuan nui var var hian, “Ka ṭha tawh lutuk alawm, min en la, ka hah vang mai mai anih kha, i buai zia ka hria a, lokal reng pawh ka phut lo.” ka tih chuan a bu nghauh nghauh a, “In enkawl ṭha la, bakah awmpui nei teh, langa kal ringawt lak aiin a nuam zawk ang, kum tharah chauh rawn awm ka tum si.” ka tih leh chuan, “Ka nau hian min ngaihtuah ve tak tak ni maw, ilo awm hunah nangmah puitu tur awmpui pangngai kan zawng dawn nia chumi hma chu mahnia awm ka ni bawk a, engmah a ngailo.” a ti ṭha ve mai a. Kan ei tur kan ei zawh meuh chuan ka puar takzet, Sangpuii tana ei tur ka pack tir an rawn dah tawh bawk a, damdawiin lamah kan let leh ta a.

Buai em em kan nei tawh lova Sangpuii nen pawh Rengpuia te ṭhian dun chanchin kan sawi zing viau mai, ngaihzawng nei ngailo tih takah Sangpuii hian min fiam hi nuam a ti thei viau chu ania, kei lah hi ka lo lai hman ve ziah nen a phur viau chu anih hi. Chutia awl thawng taka kan lo titi khawm lai chuan Nurse Mimi-i a rawn lut a, “Emergency a awm silai kah hliam an awm a, an rawn thlenpui vat ang lo inbuatsaih ru.” a tih chuan kan ding nghal ṭhuau a, Damlo pahnih an rawn nawr luh laia ka mihring hmuh te avang chuan ka kâ hupin ka ding chawt a, damlo nikhaw hrelo a an nawr pahnih zinga pakhat chu Rengpuia a ni miau alawm.

OT ah an nawr lut nghal a, doctor leh nurse tlan kual sek karah chuan tih tur ber hrelo in ka ding khawng reng a. Tu emaw hian chair-ah min ṭhut tir a, ka mitthlaah erawh thisen vekin a bual Rengpuia hmel chiah kha ka ngaihtuah. An chungah khan eng nge thleng?

Inzai room light a thim rualin keipawh chulamah chuan ka kal nghal vat a, ka rilru a buai nuai avangin Sangpuii leh ka thawhpui midang te awmna leh thil thleng hre turin tumah ka zawt hman lo. Police uniform ha leh midang pali vel awm ve te pawh zah zo lovin, kan surgeon doctor ka hmuh rual chuan chanchin ka lo zawt vat a, mak ti hmel zeta min thlek vut te chu ka ngei zawk hial mai. Mahse ka hmela hlauhthawnna awm a hmuh vang nge, “A ṭha e, a harh har lovang.” tiin Police awm hnenah chuan, “A vannei hle mai, a lung a fuh lo hlauh a,” tiin a kalsawn nghal a.

Police ding run chu tu nge anih ka hrelo mahse Rengpuia hi silaia kah anih chhan erawh ka hriat duh miau avangin tim angreng takin a bulah kalin ka zawt ta tawp a, chupa erawh chuan chik zeta min melh run hian, “A eng nge i nih, eng inzawmna nge in neih?” atih chuan, chhang lovin ka ngawi ta daih a, a chhan pawh chhanna pek tur ka neilo. Kan inngaizawng a ni tih hria an awm manglo tih ka hriatna hian min ti tim bawk a ni.

“Miss zawhna ka zawt che in ka hria?” a tih leh chuan, “Ah ka hmelhriat ania,” ka ti bah nawk a, chutih lai taka, “Ms” rawn titu avang chuan ka hnunglama min kotu chu ka en nghal vat. Rsa hmel ka hmuh rual chuan ka hahdam huai thei. Kha chen Rengpuia an zai lai khan Ani hi khawiah nge alo awm daih?

“I ṭha em?” ka bul a rawn thlen rualin a ti nghal vat a, a kawr a thisen kai ro tawh ka hmuh rual chuan chu zawhna chu zawt tur zawk ka niin ka hria. Ka lu bu nghauhin, “Nangmah zawk hliam i nei ve em?” ka tih chuan, “Aih, keichu ka ṭha.” a ti nghal sup a. Rengpuia ruala an rawn hruai vaipa kha an rawn nawr chhuah ve chiah avangin kan bula police leh midang ho chu an kalsawn ta a. Rsa nen chauh kan nih hnu chuan thil awmzia ka zawt vat a, mahse ka zawhna hria ang pawhin a langlo. Zawt chiam mah ila min chhang dawn lo tih ka hriat avang chuan ngawirengin a bulah chuan ka ṭhu ve tawp.

Sangpuii a rawn lang hlawl a, khati khawpa buai phili a ka awm lai khan Ani hi khawiah nge alo awm daih ni, Emergency a awm tih thu kha kan hre rual reng si a, tunah alo lang chauh chu a ni sia. “Khawiah nge i lo awm daih?” vui aw deuha ka tih chuan ka darah rawn vuan in, “OT ah khan ka lut ve tih i hre miah lo a ni maw. I rilru alo hah viau em?” a ti nghal zat a, ni dawn tak, Ani chu inzaina lamah a duty tih ka lo theihnghilh daih a ni. In zai an awmloh chuan ka bulah a awm ve chauh a ni reng sia.

“Inthlak rawh, kan duty a zo ania.” a tih rualin Malsawma a rawn lang ve nghal zat a. Ka hmel a hmuh chuan, thil thleng min zawt vat a, Sangpuii zawkin a hrilh a, min en chik viau lehnghal. “Mate chhuah chu duh leh ni dangah kan ti mai dawn em ni?” a tih chuan chhuna chhuahpui min tum thu a sawi kha ka hre leh chiah. “Um, pawi i tih loh chuan nidang chu a pawilo,” ka ti nghal sap a. Ka ṭawng laia Rsa a melh zeuh tih ka hriat chuan, ka hmelhriat tir vat a, Rengpuia zawk kha chu a hmuh tawh avangin Rengpuia ṭhianpa tiin ka sawi kher bawk a. Mahse ka u hmel danglam zawk chu ka hmu hman. Engvanga ngaihṭha lo hmel zeta lang thut kha nge anih. A landan danglam zawk kha a reiloh em avangin ka hmuh sual anih hial ka ring.

Ka inthlak lai chuan Sangpuii chuan, “Bawihte, i nghawng kha,” tiin ka nghawng chu a rawn khawih zeuh a, “Nga ti nge?” ka lo ti nghal vat. “A hmaa i nghawng a kutthla lang ang chiah kha a awm leh tawh,” a tih chuan, “Maw” ka lo ti vak ringawt. Mumang ṭha lo tak neiin ka duty laiin ka chebuai a, Kha hmeichhe ruang an chhar hma ni chiaha thil thleng kha a ni bawk. Mahse ni alo liam ve deuh tawh vang leh ni2 ngawt mangchhia leh thil dangin min tihbuai tawh loh hnuah ka nghawnga mak taka kutthla awm a reh lai pawh ka hriatloh kha tunah a chhan hriat miah lovin a rawn lang leh chu ania, a chhan tur ka ngaihtuah thiamlo chungin ka tawt nghal up up thei. “Hlauthawng lo la, kal phawt teh ang.” a tih chuan inthlakna pindan chu kan chhuahsan ta a.

Kan haw hma in Rengpuia chu kan hmu zawk a, ala harh lo bawka tiin zana kal leh tumin Rsa te pawh kan hawsan zui a, mahse ka rilru erawh a nuam theilo. Thihna a thlenna kha kar khat a liam awr a, a hmasa zawk erawh thla a liam tawh, hmeichhe pahnih te kha, chhungte mumal neilo ve ve an ni a, pakhat inzuar ṭhin anih laiin pakhat erawh mi inhnuai luah a, inhlawh chawpa khawsa a ni a, an chanchin hre tam lo mah ila, an thihna avangin ka theih chen chen hriat tumin ka bei ve a, mahse an damlaiin ka hriat zawng an nilo ve ve tih ka chiang. Mahse nga ti nge ka hmelhriat ni miah lo thihna nena inzawmna ka neih tlat le?

A hnuhnung zawka thi, tuna ka nghawnga kutthla siamtu kha Zothanpari a ni a, Amah nula lian lam a ni bawk. A hmel kha Tv-a ka hmuh bak hmulo mah ila mang lama ka hmuh chian em avang khan hmu leh pawh ni ila ka hai ngaiin ka ringlo, Lallawmsangi pawh kha a hmel ka theihnghilh chuanglo, mahse Ani erawh vawikhatmah ka hmu zawm lo. Zothanpari erawh chhun leh zan pawh sawi lovin ka hmuh zawm fo si a, tunah la ka nghawngah a kutthla a lang leh kalh tawh bawk a. Kei hi ka nihna ngaiah hruai luh leh ka ni leh dawn tihna a ni thei mai angem? Mangchhia leh thlarau sual te umzui ka ni leh dawn tihna a mi?

“Lo ding teh u,” kan hnunglam aṭanga titu avang chuan dingin Rsa kan lam pana lokal chu kan lo nghak a, chhungte hnaiha khawsa lo vek kan ni a, kei nen erawh an danglam deuh, an hna avanga hmun danga awm mai an ni. “Heti hi kan ni si a, in rualin in inah ka lo kal ve mai teh ang,” atih chuan Sangpuii chuan thupha chawi vatin, “Ka lo ngaihtuah miah lova, chaw pawh rawn pe zawk tur che u kan nih nen,” a tih chuan Rsa chu nui sukin, a car awmna lamah chuan kan inzui ta a.

In kan thleng a, ei rawng kan bawl nghal sawk sawk a, kan bawl zawh dawn lamah Sangpuii’n intifai hmasa tura min tih avangin inbual turin ka pindan ka pan a, ka towel nen bathroom ka pan nghal a. Ka inbual zo bathrope ha a dingin, bathroom darthlalanga ka thla lo lang chu en in ka nghawng chu chik zetin ka en vang vang a, mahse chutia ka en laia ka nghawnga kutthla zawn vawt vur ah chuan darthlalang aṭang chuan ka hnung ka en ruala, Zothanpari ngeiin ka hnunglam aṭanga a kutthla zawna a kut a rawn dah chuan ka rak nghal tuar a, engtik laiin nge choka ka thlen phei ka hrelo.

Rsa leh Sangpuii chuan min buaipui vatin Rsa zawk chu pindan enfiah tur chuan a tlan lut nghal a. Ka hlauh em avanga tha khur dar darin, leiah chuan ka ṭhu niai a, Sangpuii chuan min kuah bet tlat bawk. Ka ṭap thei lova, ka ṭawng thei heklo. Ka tha a khur nasa in ka taksa a khur chhuak thei hial a. Ka pindan aṭanga Rsa rawn chhuak in a lu a thing nghut chu ka hmu, Sangpuii zawk chuan, “A ṭha leh vek mai ang, hahdam rawh,” a tih chuan harsa ti zet hian, “Zothanpari kha,” ka ti chhuak halh.

Zothanpari hming ka lam rik ruala Rsa hmel chu ka hrethiam lo, sawi duh nei hmel a pu a mahse engmah sawi lovin a ngawi tlat a, ka pindan ka pan leh ngam tawh miau loh avangin, Sangpuii chuan ka thawmhnaw ṭhenkhat la chhuakin a pindan lamah min hruai a, ka inthlak lai te chuan ka tha khur a reh lo nen ka ha sual nawk nawk a, ka ṭah a chhuak ngawih ngawih bawk.

Zanriah pawh tih tham ka ei lo, ka hlauhna te hian min kiansan tawh sela ka duh tawh takzet. Ni hnih chhung leka an reh pawh ka tan lawmna anih vai nen tunah a ngai te in a rawn inlar leh a, hlauh loh tumin mahni inseh ruh ve ṭhin mah ila a harsa lam hret chu a ni si a. Damdawiin lamah kan vaiin kan kal a, Rengpuia ala harh lova, cabin-ah kan ṭhu a, Police-a pawh kha a awm ve a, mahse uniform a ha tawh bik lo.

“Ruatpuia ka nia, tlailamah khan ka in sawi hman ta lova,” atih chuan Rengpuia OT aṭanga an rawn nawr chhuah laia min lo dawnsawn dan kha ka ngaihtuah let a, ka ngei thar riau, Sangpuii zawk chuan alo be vat a, henu hi chu ka tan hian a va hlu tak em. Ka tih ve ngailo hian engkim min tih sak ṭhin chu ania, Ani hi awm lo sela vawiin ni hi ka thlen theih pawh ka ringlo.

Rengpuia a rawn harh a, Doctor in a en vat a, a silai hliam tihloh chu na dang a neilo bawk a, Doctor pawn ṭha leh vat tura a ngaih thu sawiin min chhuahsan a. A chhuah hmaa min fiam zuk erawh ka zak leh viau tawh. Rengpuia nen kan inbe miah lova, midang chuan an be nghal bawrh bawrh a, kei erawh ka tawt leh ṭun tawh. Tun hi a nunna derthawng taka damdawiin a rawn luh vawihnihna a ni tawh a, ngaihtuahna ṭhalo te’n min luah a, chan mai tura ka inngaih hian ka ipik ṭun thei.

“Bawihi lo ṭhu hnai ve rawh,” Rengpuia’n atih rual chuan midang pawn min lo ko nghal sap sap a, a khum bula an ṭhu bial laih laiin kei erawh pindan chhunga ṭhutna awmah ka ṭhu daih a, a na hmel hmuh hi hrehawm ka ti miau alawm. A bul ka thlen rual chuan a nui suk a, mahse ka nui ve lo. Engtin nge hetiang dinhmuna a ding chung hian nui hmel ala put theih zawk le, thih te hi a hlau ve miah lo zawk emaw ni.

Zan a reia ka lo awmpui ang ka tih avangin midang zawng chu an haw ta hlawm a, kan pahnih chiaha kan awm erawh sawi tur a vang leh ṭalh tawh. Diktak chuan hetianga hmuh fo ka duhloh thu leh, ka ngaihtuah zia te sawi ve ka duh a, mahse ka hrawkah hian hnawh tu awm ang mai hian ka ṭawng chhuak theilo chu ania.

“Lokal rawh rawn mu ve rawh.” a tih chuan lu ka thing a, damdawiin khuma damlo tihloh mut phalloh tih hretu ka ni miau a. “Tuman an hmu dawn chuang hleinem, doctor pawn i awm tho a, injection pawh lo pe mai rawh a tih che kha,” a tih leh chuan ka nui ringawt. A tih luih tlat avangin a khumah chuan lawnin dim zet hian a bulah chuan ka mu ve a, zan tira thil thleng theihngilh vek khawpin a bulah hian ka hahdam miau alawm.

(Rengpuia Pov)

Ka bula tui taka muhil chu ka melh vang vang a, a hlauhthawn dan tur ka ngaihtuah in ka khawngaih, mahse kan hnaah hi chuan hetiang hi kan tawng fo a, thih ka hlau lo chu a nilo mahse tunah erawh damchhan la nei ve tawh a, thih mai ka tum lo.
Silai kah hliam ka nih dan ka ngaihtuah thleng a, ka mi man ka chhuah khan kan umzui nghal a, a ruka hnathawk kan nih miau avangin a tirah Ruatpuia pawh hrilh ve lo kan ni.

Tlan chhuak anga lang anih avangin kan mi tanga pawh a fimkhur a, kan in um thui viau bawk. Kan mi man leh min enthla tura a rawn kalpui bakah min that tura an mi rawih zinga pakhat chu kan dah ṭha a, pakhat tlanchhuak kan umna lamah silai kan dawng fuh ta a ni. Sanjay-a an kap phawt a, mahse beidawng duh lovin kan um zel a, ka mi man sawi aiin an tam tih hetia ram pil rila kan in um hian ka hre chiah. Tin, an fimkhur hle tih hriat takin silaiah silencer an vuah vek bawk a, um tu ni hmasa lo ila kan chan chhiat dan tur pawh a chiang viau a ni.

Sanjay-a an kah hliam tawh avangin min zuam deuh nge mi paruk ngawt an lo inlan a, kan insual chu a ni deuh nghal mai, keini pahnih chauh kan ni a, insual an thiam bawk nen kan hneh meuh lo chu a ni e. Mahse Rsa zawkin Ruatpuia alo hrilh hman erawh kan vanneih pui ta a ni, silaia kah hliam ka nih khan an tlanchhe leh ngei a, mahse kan tam hneh tawh miau avangin eng nge thleng hre chiah lo mah ila an man vek chuan ka ring.

Ka harh khan hmeichhe pahnih te an awm ve avang khan engmah ka zawt lova, mahse Rsa lu bu zeuh khan engkim a fel tih min hriattir a, tin, Sanjay pawh a nunna a chan lo anih ka ring engmah hrilh ka ni loh danah. Khatiang zat Mizoram chhunga min umzui tu an awm chuan helai hmun pawh ka tan a him chuang lova, khua var sela Report pek a, a tawp thlenpui mai ṭha in ka hre tawh. Hotu te lam thupek chiah a ni tawh mai.

Ka bula rum tiah tiah chu ka en reng a, harh chuang silovin a mut dan a siam rem sat sat a, min rawn kuah rual chuan keipawh ka lo in siamrem ve vat. A sam ka hui kian ruala a nghawnga kut thla lang kalh chu chik zetin ka en a, rehhlum tumna ni ngeiin ka ring, ka ring suallo bawk ang. Tu in nge hetiang thil hi a chungah ti ang le? Ka hriatpuinloh harsatna hi engzata tam nge a tawn ang? A mumang leh a thil tawn te bawk ka ngaihtuah a, ka tawn ve lo thil a ni a, mahse hlau hlawpa siamtu hi a na mai lovang tih ka chiang viau si. Ka hriat tir ata a hnaah a chebuai hmuh tur a awm ngai miah lova, chuti chung chuan a thil hmuh te avangin a tal buai hle chu a ni si a. Hmeichhe khawngaih thlak tak a ni, a duh vang ni hauh lovin umzui a ni a, chung a umzuitu te lah mihring nilovin thlarau sual an ni lehzel nen, tualthattu hi man vat a, engvanga Ani hi a tuartu anih daih tih zawh ka chak. Mahse chupawh chhanna a awm ngei dawn em tih la hriat a ni hauh silo. Hei erawh ka hria, he hmeichhia hi ka theih chin chinah venhim ka duh a ni tih hi.

Ka inngaihtuah muhil a ni ngei ang ka harh leh chuan tukverh aṭangin nizung alo lang uar tawh a, ka mu rei hle mai. Ka mutna bul pawh alo ruak huai tawh. A tho hma hle anih ka ring, chhunlam duty a nei ngei dawn a, min hawsan daih tawh zawk pawh a ni thei tho tia ka ngaihtuah lai takin kawngkhar a rawn ri rak a, Msi rawn lut ka hmuh chuan mit ko ka san ak a, a nui nghal sen sen a. “I tho har sia pawnlamah ei tur ka lam a, thingpui i in ve duh ka ring ringawt a.” a tih chuan thawh tumin ka insiamrem vat a, ka veilama kah hliam ka ni a, ka ban ka awrh ṭuk nen thawh mai a harsat avangin min lo pui thuai a.

Khawsik ka neih leh neihloh a en nghal vat a, “I pang a lum anih hi, in zo la injection ka pe dâwn che nia.” ti leh in ka thingpui in tur chu min rawn pe nghal vat a, chet a harsa ve deuh nen ka chhang ei tur min pek lai te chuan ka lo nui suk suk a, a lai hmel hmuh erawh a nuam takzet. Kan inbarh fel chuan ka zun a chhuah thu ka sawi a, Bathroom lama min zui tak zel avang chuan ka fiam hlak a, a let rang lutuk chu ka nui zui hawk hawk. Zingkar aṭanga hetiang taka min nuih tir theitu hmeichhia ka tawng leh hi vannei ka inti. Ni e, Lalrinzuali vanga ka natna te pawh a rei ta, theihngilh ni ngai dawn lo mahse hmalam pan erawh a hun ve tawh a ni.

Injection min pek vang nge ka mut a chhuak a, Msi min biakna pawh ka mang hriat ruai tawh. Ka muhil leh a ni ngei ang, pawnlama thawm na zet awm avang chuan ka harh chiang takzet. Au thawm leh ṭawng deuh mur mur ka hriat chuan, harsa ti zetin ka tho chhuak ve a, kawngkhar ka hawn chuan mihring hmuh tur an awm lo. Thawm awmna lam chu ka pan zel a, ka thil hmuh avang chuan ka ding chawt.

Damlo ni ngei tur, nu upa lam tih hriat tak hian chemte kengin a hmaa ding Msi chu a tin ran a, Msi pawh a chesawn ngam lo. Chunu chuan, “Kan thisen mawh hi nang hian i phur tur a ni.” tia a panhnai chuan Msi chuan chet nachang a hrelo, “I thi ve tur a ni.” a tih ruala midang au tuar ri ka hriat rualin Msi lamah ka tlan vat a, ka awmah pawmin ka kuah nghal vat. Kha pitar khan min vit ngei dawn nia ka hriat laiin a au zui chiam a, ka hawi let chu, Rsa leh security dangin pitar kha an lo man bet a, a duhlo tal vel chu pitar tih atana mak tih loh rual a nilo.

Mipa panga in an dawm bet chung pawh in chak tak a ni. Doctor in a chiu zawh reilo teah erawh a zawi tial tial a, security te chuan pindanah an luhpui ta a. Msi chu ka kuah ang angin ala awm a, a chesawn eih lo. A thil tawn khan a ṭhawng viau anih ka ring. Damlo pawnlama awm ho te an luh tir nak nak a, midang ho pawh an kalsawn sang sang a, Sangpuii leh Rsa hmel ka hmuh leh rual chuan Msi ka kuahna chu ka thla thawl ve ta chauh a. A mit a sen ram a, a ṭap pawh a ni mai thei.

Sangpuii’n, ” Bawihi i ṭha em?” tia a san chula a kuah rual chuan a mittui a baw zawih a, mahse a ṭap ring hauh lo. “A ṭha leh vek dawn alawm,” tiin, kan sira pindan lam chu a kawk zeuh a, chutah chuan kan pathum chuan kan luhpui ta vat a. Rsa leh Sangpuii te chu thildang sawiin an titi a, kei leh Msi erawh kan ngawi reng thung. Kawngkhâr a rawn inhawng a, Msi U mipa kha a rawn lut a, Msi’n a hmuh rual chuan ding vatin a kuah nghal vat a, a u in a kuah let ruala aw rawl chhuah meuha a ṭap chuan ka chhungril hi a ti na vawng vawng thei.

Nga ti nge ka kuah lai khan a ṭap duh anih chuan a ṭah mai loh? tia ka ngaihtuahna chu ṭullo ka ti takzet, mahse ka bulah ṭap ngamlo khawpin ka siam em ni tia ngaihtuah zawmin mahni ka inthiamlo hial a. Msi ṭap chu thlem thiam hauh lo mah ila ka awm ngheng a ṭap a, a hlim pawha ka vanga hlim turin ka duh. Sangpuii’n chhuah a rawt chuan phurlo zetin an unau chuan kan chhuahsan ta zawk a. Pawn ka thlen rualin ka thaw hak a, Anni pawh hian sawi tur an hre biklo anih ka ring an ngawi ve reng tho.

“Sir, Pu Sanjay-a kha a harh a, a lam che a.” Constable pakhatin a rawn tih chuan Sanjay-a an dahna lamah chuan Rsa nen chuan kan kal nghal vat a, Sangpuii erawh duty lai anih avangin a duty na tur lamah a kal leh tawh thung. Sanjay-a pindan kan luh chuan Doctor-in a lo endik mek a, a dinhmun hi ka la zawt miah lo tak. Doctor leh nurse an chhuah rual chuan an kahna chu Rsa zawk ka zawt a, A nakah leh a banah an kap fuh alo ni. A naka an kahna erawh a pawnlang deuh bawk nen awlsam takin silai mu pawh an phawrh a, a ban erawh a luh thuk avangin chet takngial pawh a chesawn thei rih lo.

Kei ka awmah min kap a, mahse ka lung a fuh lova ka vannei. Khawsik la nei reng mah ila, mipa nih chuan mutpui reng ka tum hauh lo. Mahse silai mu hnathawh erawh a nghawng a na hle tih hriat takin, tuna ka tho chhuak ringawt pawh hi min tur ut ut tho. Nachhawkna nen la mu tur ka ni meuh mai, mahse kan boruak te avang khan ka tho chhuak kha ania, khawsik ka nei leh tawh tih la hai rual a nilo.

“Rp Head Office kan hrilh a ngai a ni.” Harsa ti zeta Sanjay-an a rawn tih chuan, ka lu bu nghauh in, “Ka lo hrilh hre dawn ania.” ka ti nghut a. “Kan mihring hmuh ai khan Mizoramah hian an lokal tam mai thei.” tiin an zai hmaa a thawmhnaw hak, a mutna sira inthlep thlapa an dah chu a kawk zeuh a. “Ka kekawr tlangah khan chips a awm ang, chu chu i bo avang khan i kawlah an ngai a, an rawn ngaihven zui niin ka hria.” a tih chuan mak ti zetin Sanjay-a chu ka melh run a. “Headquaters lamah lamṭang an nei tih kan hriat rual khan, kan inchhui chhung thukru tura tih ka ni a, a ruka operation a kal laiin Nangin min lo be pawp leh si a, tichuan engkim hi ka ngaihruat ta a ni. Kha thil kha i kawl ringlo sela Anni hian an umzui ngawt che ka ringlo.” atih leh chuan a kekawr tlang chu ka dap kual dan dan a. Chips chu a awm ngei e.

“I ṭhianpa hi keimah ang tho a rinawm a ni tih tun ni2 lekah hian ka hria. Chuvanga in pahnih awm laia sawi ka ni. Mahse he chip chungchangah hi chuan tumah ring suh ang che u.” a tih chuan, “Ngati nge? Ka kawl an rin avangin helai thleng min umzui a, mahse ka kawl miau lova engtikah mah an hlawhtling dâwn lo tihna a ni dawn asin.” hrethiam lo zeta ka tih chuan, a lu a thing a, “Ka kuta a awm hi a him tawhlo zawk. Mizoramah chuan ila him ka ramah ka him tawh lo. Heta min hmuh rual khan ka chhungkua nen lamin kan him tawh lo.” atih leh chuan a sawi tum ka hrethiam ta viau.

Ka luhai deuh bawk nen chips chu la chhuakin Sanjay pawh venhimna hnuaia awm a ni bawk a tiin Rsa nen chuan kan chhuahsan ta a, Ka taksa rawn khur chhuak chuan ka khawsik nasat zia a tilang tawh. Nurse ko vatin injection min pe vat a, Ka blanket hnuaiah chuan ka tlung nghal titih der mai. Ka kuta chip tereuhte erawh ka hum nghet sauh thung. Rsa chuan, “Muhil rawh, ka lo awm reng ang” a tih te chu ka mang hriat leh ruai tawh.

6

“Malsawmsang ti tawp rawh, khawngaihin,” Hmeichhia ka hriat ngai miah lovin ṭap chunga min ngen chu a chhan hre lo zetin ka melh reng ringawt a. A sawi ngai bawk a rawn sawi leh chuan, “Eng nge ka tih ang?” ka tih ruala min kalpel fua tu avangin chuan ka inher sawk a, hmeichhe lam ka hawi leh meuh chuan leiah alo tlu fel der tawh, a bulah ka tlan vat a, a kut rawn phar ṭawk ṭawk chu ka vawn sak vat a, a phun sep sep chu ka beng ka dawh hnai vat a, “Ti tawp rawh.” a tih chuan, “Engtin?” tiin ka zawt vat a, mahse min chhang lovin a chatthla fel der. Eng nge ka tih tur chu?

“Bawihte eng nge ilo ngaihtuah vung vung a?” Sangpuii’n a tih chuan ka nui ringawt a, damdawi dahna plate min pek rualin ward lamah ka lut nghal. Ka mumang kha ka ngaihtuah zui lo theilo a ni. Damdawi ka sem zo a, tih tur ṭul ṭul ti leh in, chawlh hun dawnah chuan ei tur ka order nual a, chhun chawlh hunah Rengpuia ei pui ka tum vang ania. Ani pawh karkhat dawn damdawi inah a awm tawh a, tunah chuan a zia tawh viau chutih rualin ka riah pui reng thei lova, mahse a theih chin chinah a bulah ka awm ve a, a chhungte chanchin min hrilh ngailo a, keipawh in ka zawt ngai biklo. A inah khan Amah in a cheng a, a chhungte nen an cheng ho lo pawh a nimahna.

Ka ei tur keng a cabin lam ka pan lai chuan UMalsawma a rawn lang hlol a, “I ṭha em?” a tih chuan nui sen sen in, “Um eng nge i tih dawn?” ka tih chuan, ka ei tur ken chu a melh zeuh a, “I bialpa chauh leisak lo khan min lei ve la ka ti, bialnu ei tur min leisak thei zawn ve angai nih hi.” tiin a nui hawk hawk a, kei erawh ka lo tum nghak bur a. “I cute,” a tih chuan ka nui ve ta hak hak a. Kan inbe zo min kalpel tur chu a sana in ka kawrah a bat a, ka siam laia ka U kuta banbun ka hmuh rual chuan mak ti zetin Malsawma chu ka en nghal huau a, “Eng nga ti nge?” a ti nghal sup. “Ih, i ban ang chiah hi ka hmu tawh.” ka tih chuan a coat ban chu hlimin a banbun chu a melh zeuh a, “Thil man to a nilova a common viau tak ang, mawi i ti em?” tia a nuih var var chuan, “Um, ka kal ange a dai hman dawn.” tiin Amah pawh en tawh lo chuan ka kalsan ta nghal a.

Nilo a ni theilo, ka rilru chuan ka ti mawlh mawlh a kha banbun kha a ni chiang alawm, ka mang lama tualthattu in a bun kha. A hmel ka hmu lo mahse a kuta mi kha chiang takin ka hmu a ni. Ka Unaupa hi chutiang mi a nilo, a sawi ang khan thil man to lo tak anih avangin a common pawh aniang, Ani chu a ni theilo ang.

Cabin pawnlama duty ka hmuh chuan nuih sakin luh ka dil a, min hre ve tawh bawk a min luh tir ve mai. Khuma ṭhu chungin laptop alo khawih a, hna bawk anih leh ka ring. Min hmuh rualin a laptop chu a khup vat a, “Ilo kal a.” a tih chuan ner nang hian, “Ka lokal i duh vak lo a mi, ka chhuak leh mai dawn,” ka tih chuan nui hawkin, “Lokal vat teh,” tiin min hui zauh a, keipawn ka ei tur ken hmuh in a bul ka thleng ve nghal. Thla khat kan inngaizawng tling ve ṭep tawh a, mahse thil tam tak kan tawng dun cho mawlh mawlh chu a ni si a. Mahse chu chuan kan inkar a ti ṭha sawt a, keipawhin ka zah ṭung tawh lo.

Ka ei tur ken kan ei lai chuan, “Nizan i mu ṭha em?” a rawn ti hlol a, mumang ka nei leh em tih a hre duh anih ringin ka mumang kha ka hrilh ta vek a, ka rilruah erawh ka manga tualthattu banbun leh ka u banbun in ang kha ka hrechhuak zawk, chu erawh ka sawi langlo thung. “Ti hian i ngaihtuah ve ngai em? Mitthi tur te hian i pui na an dil ṭhin che a, chhan a awm angin.” a tih chuan mak ti zetin ka melh a, ka hlauhna te avangin chutiang chuan ka ngaihtuah ngailo nizan ka mang ka hmuh hma kha chu.

“Nizan aṭang khan ka ngaihtuah ve deuh a.” ka tih chuan a lu a bu nghut nghut a, “Hmeichhe pahnih an boral tawh a, thih dan in angin, chuan Anni chu i mangah an thih hma in i hmu vek bawk a, a awmzia chu i pui na an dil a ang ka ti.” a tih chuan chhan mai ngaihna ka hrelo. “Mahse ngati i pui na dil si, a hlauhawm zawng ngawta an in lan le?” atih lehnghal zat a. Keipawh ka ngaihdan chiah a ni. An thihna tura ka pui na an mamawh anih chuan ngati nge min tih ṭhaih vak kher a bikin Zothanpari kha, thinrim takin ka hmaah a inlan a, min ti na hial anih kha. A kuthnu pawh ser ang mai in ka nghawngah a awm reng tak alawm.

Ka nghawng a kut thla ka ngaihtuah chhuah rual chuan ka nghawng chu ka khawih zeuh a, Rengpuia chuan ka puan pan bah chu a rawn la sawn ve nghal vat. “Ala awm reng a ni maw?” a tih chuan mak ka ti leh hle tawh. Engtin nge ka nghawngah he kut hnu hi a awm tih a hriat?

“I rawn riah zan khan ka hmu alawm.” ka mak ti hmel a hmuh chuan a ti nghal vat a. “Ih news ah ka hmu bawk silova a pathumna kha tu nge a hming?” ka tih chuan ngaihtuah ni awm tak hian a ngawi vung vung a, “Lalhriatpuii,” a tih chuan lu ka lo bu nghauh. “Bawihi i dinhmun hi a khirh i ti ve em?” atih chuan, “Um, engvang nge tih hi ka ngaihtuah nasa ṭhin asin.” ka ti sap a.

“Misual hi man a ni ṭep tawh a, a reh ṭep tawh ang engkim hi a fel leh vek mai ang.” a tih chuan, “Nia fel vat rawh se,” tiin ka ding chhuak a, “Kal hma thei siah” tiin a phun nghal hluk. Hetianga min thlakhlelhna a tilang ṭhin hi ka lawm ṭhin. Chhun chawlh a zo miau a, duty lai ka nih avangin ka kalsan erawh a ngai. Ka kal tur ka banah chelh in hnai zetah min melh a, “Vawikhat” ti supin min fawp zeuh a, heipawh hi a nuam ka ti. “Chhuah ka duh tawh.” a tih chuan a a hliam awmna zawn chu ka melh zeuh a, “I chhuah har tawh dawn loh kha,” tiin ka kalsan ta a.

Duty room ka pan laia hmeichhia min tawk zawnga rawn kal chu ka tum vang reng nilovin chik zetin ka lo en a, ka zawn alo thlen chuan ka ding khawng nghal at thei. Khanu kha nizan maia ka manga ka hmuh kha a ni, ka hmu sual theilo hrim hrim. A kalna lamah chuan ka umzui nghal a, mahse khawiah nge a pen hman ka hrelo, ka hmu zui ta hauh lo. Hmuh leh tuma ka zawn kual lai chuan ka dara rawn khawih tu avang chuan ka phu zawk a, ka en chuan Rsa a ni.

“Eng nge a? I hmel kha a diklo.” a ti nghal a. Kei erawh in kha hmeichhe kalna lam kha ka la thlek ṭawk ṭawk a, “Ms, zawn i nei em ni?” a tih leh chuan, beidawng zet hian “A hma ang tho,” ka ti nghal sap a. “Ka hriatthiam turin sawi teh?” a tih chuan, ka sana ka bih zeuh a, “Nakinah ka hrilh dawn che nia Duty ka nei” tiin ka kalsan ta daih a, min koh zui na pawh ka chhang tawh lo.

Ka chunga thil thleng zozai te hi ka hrethiam lo takzet a ni. Mumang mak tak tak ka nei a, mi thihna tur ka hmu lawk ziah anih kha. Khang mi pathum te kha tumah an damlaiin ka hmu ngai lova ka hmelhriat la an ni heklo. Mahse an thi lai chiang tak vekin ka hmu thung, chuan tunah ka mumang a mi ngei a damlai ka hmu a, mahse Ani pawh kha midang te ang tho in thlarau ka hmu leh zawk nge ni a, midang ka hmuh sual zawk ni ang le?

“Ms i ṭha miah lo i hmai a dang vek ania,” Sangpuii’n atih chuan tui bottle dawhkana mi chu banin ka in nghal khawlh khawlh a, ka in zawh meuh chuan ka hah vek thei. “Eng nge thleng?” a tih leh chuan ka awmdan buai zet avang chuan chhan mai dan tur pawh ka hrelo. “Ih, thlarau i hmu leh em ni?” mangang aw zeta a tih chuan lu ka thing a, ka mittui a hnam nghal ṭiam ringawt.

Engkim hi hrilhin sawi mah ila an tawng ve lova an hrethiam zo tak tak silo. Ka hmuh thu pawh sawi mah ila min hnem a, min thlamuan a mahse ti tawp turin engmah an ti thei heklo. Keimah ngei hian ka chinfel angai tih hre mah ila, chinfel dan la ka hre der silova. Chu chuan min ti hah in, ka chhungril nun thleng hian min ti chau si a.

Hun harsa ber ka tawn laiin ka nunah Rengpuia a rawn lang a, Ani ka bul hnaiha a awm chang apiangin ka mangchhia te an reh ṭhin tih pawh ka hria, mahse a reh hlen phah chuanglo. Ani a awm vang nge tualthattu a chawlh ṭhin vanga mangchhia te leh thlarau te hi chawl an nih ka chianglo, mahse thlarau sual te’n min umzui chang pawhin Rengpuia alo lan chang hian an bo leh fo kha ania. He ka hun tawn hrehawm tak aṭang hian tu emaw tal hian min la chhuak thei se ka va ti tak em!

“Sangpui, hrehawm ka ti hetiang ringawt a awm hi a hrehawm ka ti.” ka ti chhuak sap a, “I hmu leh tawh em ni?” a ti lehnghal vat. Ka lu ka thing a, Zothanpari khan nasa takin chhun leh zan pawh sawi lovin min umzui a, mahse a reh leh ta hmiah a, a chhan ka hre lo. Ka nghawnga kutthla erawh a reh miah lo thung. Manglamah min ngawihsan mahse thil mak tak tak kan tawng reng a, Rengpuia damdawiin lo luh hnu lawka thil thleng ang te kha.

Kha pitar khan, “I tuar tur a ni,” tiin hriamhrei nen min bei anih kha, a chhan hrelo mah ila ka thluak ka hman tam poh leh heng mite hian min mamawh niin ka hria. Mahse engtin nge kei hian ka pui theih ang ka hrelo a ni. Ka hmeichhe hmuh te hi ka hmelhriat an nilova, zawng tawp dawn in an thlalak takngial pawh ka nei lova, mihring tam tak awmna khawpuiah hian ka tan zawn hmuh ngaihna a awm hlawl silo.

News zawng zawngah mitthi tawh thlalak an tar chuai chuai a, Mizoram police te’n an chhui chhuah theih miau loh avangin social media leh Chanchin buah te dem an hlawh em em a, tin, tupawh hi an ṭi vek ni maiin ka hria. Khua a thim hlek tawh chuan Aizawl khawpui pawh a reh ṭhiap a, mipui hlauthawng te ai mah hian kei hian tualthattu hi man se ka ti takzet. Ani hian tualthat lo sela, mangchhia hrehawm leh rapthlak tak ka hmuh tak fo hi a reh ve mai thei asin.

Kha hmeichhia lo chhuak lam kha ka ngaihven ru reng a, mahse ka hmu reng reng lo. A kalna lamah kha chuan building hnunglam chhuahnaa a chhuak anih loh chuan kan duty na hi a rawn paltlang ngei ngei a ngai, building hnunglam la Emergency Exit anih miau avangin an hawng ngai bawk silo. Tlailam thlenga ka hmuh tak loh avângin nidang ang tho in thlarau ka hmuah ka ngai tawh.

“Vawiin chu chawhmeh sial tawk siam ila, kan pay bawk sia,” Sangpuii’n a tih chuan nui var varin, “A tui ṭha ṭha ei ila ni mai lawm,” ka ti ve nghal zat a. Ani chawhmeh tui tih te chu a ho leh dawn lutuk Bawkbawn rawtkawi vel kha ni leh dawn a, vaipaden a ti ve ziah a, hmarchha a pawlh ngai bawk silo, sa a telh duh bawk silo hi bawkbawn rawt kawi ka tih sak a, a duhlo thei viau zel.

Kan titi mawlh mawlh lai chuan chhuna ka Hmeichhe hmuh ka mumang a mi kha a rawn lang hlawl a, kan dawhkan a kalpel rual chuan hmanhmawh zetin ka umzui nghal a, Sangpuii min ko ri pawh ka ngaihven hman lo. Damdawiin kawtah chuan nghah nei ni awm takin alo ding a, tu nge anih hrelo mah ila ka biak ngei a ngai, mahse biak dan tur pawh ka hre chuanglo.

“Ah, ṭhiannu ka be lawk thei che angem?” a hnunglam aṭanga ka tih chuan rawn hawi let vatin, “Keimah maw?” tiin min pan hnai hretin, “Eng nge ni ta?” a tih chuan sawi mai tur ka hrelo, i thi dawn ti ngawt ila min haw viau emaw a ni dawn si. “Hun tlem min pek theih chuan,” tiin pawna ṭhutna awm an siam chu ka kawl zeuh a, a sana bih zawkin “Awle” a ti ve mai a, kan ṭhut rual chuan a hmanhmawh thu a sawi nghal a, keipawhin tawi fel takin mumang ka neih dan chu ka sawi ve nghal vat a, “Heng ka mumang te hi mumang mai mai tiin en liam ka tum a, mahse nizan khan Nangmah hi ka hmu che a ni, ka puih na min dil a,” tia a hmel ka en chuan a ngaihtuah buai ve nge a ngawi reng a, a hnu lawkah chuan a rawn nui chhuak ta hak hak a, “Ah, min hrethiam teh,” tiin ka name plate chu a melh zeuh a, “Malsawm, kei chuan heng mumang te hi ka ring ve lova, tin, alo dik anih pawn tuna mitthi tawh te hi chhungkaw mumal neilo leh inzuar kan tih ang ve ve hi an nia, Keichu chhungte neiin hna ṭha tak ka nei bawk a, tawng ve lo turah ka inngai, chuan min warning a ka lawm tho e, ka kal phawt ange,” tiin chhan pawh ka chhan hman hma in a tho a, a kal zui ta daih a.

A kal liam chu ka thlir reng a, “A hming takngial pawh ka zawt lova,” tia phun sap in Damdawi in chhungah chuan ka lut leh ta zawk a. Ngaihtuah zui viau mah ila ka thusawi te a awi miau silova ka tan tih theih a awm miau lo a ni. Kan haw hma in Rengpuia kan tlawh leh a, kan hawsan ta a. Zana ka riah a beisei viau na in naktuk mai a a chhuah tawh dawn avangin riahpui loh pawh a pawi tawh lo.

Rsa chaw ei turin a lo kal a, Sa a lo lei leh ṭeuh mai. Sangpuii hian sa a ngaina lo tih te chu hre ve tawh tur asin le. Eilo tawp chu a nilo mahse a ei tam ngai lo, sa ai chu thlairah a ngaina daih zawk. Rsa nen chuan chawhmeh kan siam a, Rengpuia chaw pek a tum avângin ei rawng kan bawl zawh rualin chaw kan ei nghal a, Rsa pawh ṭhu khaw muang tawh lovin Damdawi in lamah a kal lehnghal.

Sangpuii nen chuan titi in tv ah serial kan en a, kan kawngkhar in kik dat dat chu ka hawng vat, Malsawma leh hmeichhe pakhat nalh ve tawk tak ka hmuh rual chuan nui var varin lut turin ka ti nghal a, hmeichhia a rawn hruai danah ngaihzawng a nei ve tihna a ni thei mai angem? Sangpuii chuan alo be nghal bawrh bawrh a, keipawh an bulah chuan ka ṭhu ve a, an titi ka zawm ve zeuh zeuh.

Thingpui lum turin ka kal a, Malsawma’n chanchinthar a hun tia tv a hmet sawn leh Sangpuii leh Malsawma ṭhiannu Tebawihi te titi chu ka en a ka nui leh sak ṭhin. A chhan pawh Malsawma hian hmeichhia a vawikhat min hmelhriat tirna a ni tlat. Rengpuia ka ngaihtuah thleng a, ka la be miah lo tak. Malsawma bulah hian pangngai takin ka la hmelhriat tir ve ang, ti rilru in ka phone chu ka en kual a, a message leh missed call alo tam ngei mai in thiamlo deuh a, ka call let chuan alo pick up nghal vat a.

“I ṭha em?” a tih chuan, ka nui ringawt. Min ngaihtuah leh hman tawh anih ka ring. Ka phone ka silent thu te, ka u te an lo len thu te ka sawi chuan nakinah kan inbe dawn nia, tiin a dah lehnghal daih a, ka nui leh ringawt tawh. “Mahnia nui vur vur lo khan, lo phei vat teh.” Sangpuii’n a tih rual chuan thingpui chu siam vatin tray in ka chawi phei a, chutih lai taka Tv a ruang char anih leh thu alo sawi chuan ka ding khawng nghal at. Thlalak an rawn tar chu ka melh ding ngar a, Ani pawh chuan min melh ve tho niin ka hria.

Ka kut a khur dar dar a, Sangpuii chu rawn che vatin ka tray ken chu alo la sawn a, ka tha khur nasa lutuk avang chuan ṭhutna awmah chuan ka ṭhu thla nghal hnawk. “Mate i ṭha em?” Malsawma ṭawng chu hre mah ila ka chhang theilo. Tv lam bawk chu ka melh leh a, ka tawt up up a, sawi tur ka hrelo, ka thaw leh halh ṭhin.

Amah ngei kha a ni, ka hrilh lawk asin le, Darkar tam pawh ala liam lova, mitthi a ni mai si a. Ka thusawi te kha awi sela a chungah hetiang hi a thleng kher lo tur, mahse ka mumang a ring ve silova, a pawi zo ta a ni. “Ka thiam loh vek a ni.” ka tih chhuah sap chuan, an pathum chuan min melh ṭhap a, ka mittui a tling nghal pam a, Malsawma’n Tv a off lai te chuan ka kut ka sik niap niap a, tih tur ber ka hrelo. Engin emaw min mawlh a, ka awmdan a buai vek. Tih tur ber hre silovin tih tur nei in ka in hre si.

“Mate, thil awmdan hi sawifiah teh?” min ngaihtuah hmel zeta a tih chuan lu ka thing ringawt. Sangpuii ka melh a, a ngawih tlat danah min ngai chang tih ka hria, mahse Malsawma lehzel tihbuai ka duh lo. “Ka ṭha lawm, ka damloh aṭang khan hetiang thu thin ṭhawng hi ka zo lova,” ka ti ṭha ve mai a, ka thusawi chu awi chiah lo mahse Tebawihi a awm ve miau avangin engmah min zawt zui lo.

Sangpuii chuan thudang sawiin a titi pui ta daih a, kei erawh ngawirengin an bulah ka ṭhu a, a ruk takin ka thla a muang thei miah lo bawk. Ka phone a rawn ri a, Rengpuia call ka hmuh chuan choka lamah kalin ka pick up nghal vat. “I ṭha em?” a tih chuan ka ṭah a chhuak ringawt. Ka ṭah chhuah ka hlauh avangin ka ngawirenga, “Ka rawn kal dawn.” ti nghutin call a dah nghal. Ka mit ka nuai zeuh a, ṭhutkhawmna lama ka phei leh chuan Malsawma leh Tebawihi te chu haw tum tih hriat tak hian an ding a, Malsawma mitmenga min ngaihtuahna pawh ka hmu reng, mahse Sangpuii zawk chuan, “Lo ngaihtuah lutuk suh aw, damdawi a ei a nga a zia leh mai ang, eng emaw a thlen chuan ka lo call vat ang che,” a tih chuan, “Nia, ka ṭha ania,” tiin ka nui lui ve sak a. An haw tur pawh pawn thlengin kan thlah a. Tebawihi pawh a tawngkam a zangin biak a nuam viau, mahse khatiang boruak a thlen tak avang khan kan in Mangṭha na bak ka be zawm lo.

Inchhung kan lut fel deuh chiah kawngkhar inkik leh nghal avang chuan ka phu zawk a, Sangpuii chuan, “Hahdam rawh,” ti zawi sapin kawngkhar chu a hawng a, Rengpuia hmel ka hmuh rual chuan ka hahdam hawk thei. “I ṭha em?” atih chuan lu ka bu nghauh a, min rawn kuah nghal vat a, rei erawh min kuah lo.

Kan ṭhut fel rual chuan, “Tun ṭum chu mumang i neih i sawi miah lo, mahse i awmdan kha,” Sangpuii’n a tih chuan ka thaw halh a, “Ani kha chuan ka ṭanpuina min dil a, ka tan hlauhawmin a inlan miah lo.” tiin Chhuna kan inhmuh dan te thleng chuan ka sawi ta vek a, mak an tih vang nge sawi tur hrelo in min melh reng ringawt.

(Rengpuia Pov)

Msi thusawi chu ka ngaihtuah zui rauh rauh a, a pathumna a thleng leh tawh a, heng mitthi te leh Ani hian inzawmna thuk tak an nei tih a chiang. Serial killer a ni tih a chiang tawh a, a mihring tum leh a taksa peng a lakchhuah ṭhenkhat te a in ang zel bawk. Hetianga taksa peng la chhuak tur chuan mi satliah nilo mi thiam tak an nih ngei a ngai tih chiang takin a hriat bawk a, kan misual zawn kawngah pawh kan in sawr zim hret hret tawh a, chutih rualin rinhlel tur takngial pawh kan la nei silo chu ania. Midang chuan hria se Msi hi dawp turin Police custody-ah an hruai duh tawh hial mai thei a ni. Mahse Sangpuii leh kan ṭhiandun chauhin a chungchang kan hre miau a, a himna hi ka duh ber bawk.

A mumang a danglam leh tawh a, tunah chuan mitthi turin ti hlau lovin a ṭanpuina a dil a, Ani pawhin a tum ngei alawm, mahse a hlawhtlinglo. A mumangah hian kan innghat thei angem ka hrelo a, mahse Ani hian min puih a huam anih phawt chuan, a mumangah zul zui hian kal tum chhin ila kan tifuh in ka ring.

“Bawihi, i mumangah chuan tualthattu hmel i hmu ngai miah lo tiraw?” ka tih chuan a lu a bu nghauh a, “Anih leh a langdan eng tin emaw tal i hmu ngai em?” ka tih leh chuan a ngawi deuh vang vang a, “Um, ka hmu fo alawm, Coat dum fual a ha ṭhin a, mahse a taksa, kut takngial pawh ka hmu ngailo, a pang dum vek zel. Ruang ka hnaih rualin a bo ve nghal zel bawk a.” a ti sap a, a ngaihtuah zui tih hriat takin a ngawi zui lehnghal daih.

A awmdan a mumal vaklo tih ka hriat avangin zawhna dang zawh tur nei mah ila, engmah ka sawi zawm duh ta biklo. “Sangpui ka nghawng hi a na,” a rawn ti chhuak sap a, a nghawng na a tihna zawn chu a dawm nghal vawng vawng a. Sangpuii chu che vatin a kawr nghawng a hlim sak chuan, kut thla awm kha a duk zual tih hriat takin chiang takin a lang kulh tawh a, “A na viau em? engtia tih chi nge niang le?” tiin Sangpuii chuan min mitmei nghal a, Msi ka en chuan chauh hmel tak hian a meng dul raih a, keipawh chuan tih ngaihna ka hre miah lo.

“Thawmhnaw tlem siam la, damdawiinah kal mai teh ang,” ka tih chuan Sangpui chu a che nghal vat vat a, Msi room a hawn rual chuan a rak nghal ṭhat. Msi chu ṭhutthlêngseiah chuan mut rem tirin Sangpuii dinna lamah chuan ka kal vat a, pindan chhung ka hmu chu keipawh ka thaw ve hawk tho. Engkim mai chu a hnawk nuai vek a ni mai, thawmhnaw a darh nuai a, mutphah leh thil dang pawh chhutah a let rum a, inah an awm char char a, thawm an hre miah lo tihna ania. Ka thlen chinah pawh chutiang hriat kan nei heklo. Pindan chhung chu ka enkual thuak thuak a, tumah an awm bawk silo.

Sangpuii chuan thawmhnaw ṭhenkhat chu char vatin bag lo awm hmasa ah chuan a khung mawlh mawlh a, ṭhutkhawmna lama Msi khuh bawrh bawrh kan hriat rualin kan chhuak lehnghal vat, a bul ka thlen rual chuan, “I ṭha em?” tiin a sam ka chul thuak a, min chhang lovin ka hnunglam chu a melh ding ngar a, ka hawi a engmah ka hmulo. Sangpuii rawn chhuah rual chuan ka pawm tho lawp a, pawnlamah ka kalpui nghal a. Damdawiin kal ka rawt na in, kan hamhaih luatah motor ka ngaihtuah miah lo tih ka hrechhuak.

“Taxi koh tur i hria em?” ka tih rual chuan, kawtah Car var a rawn ding a, “Hun lutuk,” tiin ka pan nghal vat, Car hnunglama Msi ka pawm luh rualin Rsa pawn zawhna min zawt lovin Damdawi In lam a pan nghal a, a hmaa ṭhu Sangpuii pawh a ngawireng tawp. Pindan chhunga thawmhnaw kan lak lai khan a mittui a tla tih ka hmu hman miau a. Keiin ka hriat hma daih aṭangin a ṭhiannu tawrhna hi alo hriatpui tawh a, tuna hetiang taka a tuar nasa zual hi a lainat viau pawh a ni mahna.

Msi chu ka en reng a, a meng siar siar a, damlo na tak chau hmel a pu a, hun reilo te chhungin a hmai a dang chak takzet bawk. Ka rilruah hlauhthawnna lian tak a rawn lut a, ka chan mai ang tih hlau takzet. “Bawihi, min kalsan suh aw,” ka tih chuan a nui sak a, min chhang lo. Ka thusawi avang chuan Rsa pawn motor a khalh chak sauh bawk. Msi phun sapah chuan ka beng ka dawh nghal vat a, “Ka kal duh lo.” atih chuan ka kuah nghet nghal sauh.

Damdawiin kan thlen rualin Msi U Malsawma a rawn lang ve nghal a, Sangpuii khan a hrilh hman anih ka ring, Oxygen pe in an buaipui nghal vat a, a nghawng a kut thla awmna chu a duk zual zel tih ka hria, Malsawma bulah chuan ka sawi vat a, a khawih vel chuan mak a tih hmel takzet. Msi chuan nikhua a hre tawh lo. Emergency Room-ah an nawr lut a, keini chu luh ve phalsak kan ni ta lo.

Sangpuii ka en chuan mittui tling pam hian alo ding a, hnem ngaihna pawh ka hrelo. Msi chunga thil thleng tam tak hi ka hriatthiam phak bak anih avangin chinfel sak dan tur ka hre mai theilo. Kan Misuala hi man ila a tawrhna te hi a reh phah angem? Nge ni a, mitthi tur hriat lawk theihna hi atan anchhia, a damchhunga a nunpui tur zawk?

Rs’an Coffee no khu vat vat a lo ken chuan, “Khawi a mi nge a?” ka lo ti vat. “Dawr a awm alawm,” tiin no khat chu min pe a, Msi an nawr luh aṭangin minute 15 a liam tawh, an khawih rei ka tih tluk zetin a harh chhuah tawh loh ka hlau ber. Nurse pakhat alo chhuak a, Sangpuii’n alo be vat, mahse a hmela hlauhthawnna nen a kalsawn ta daih a, Sangpuii ṭhu thla hnak chu a ngaihna hrelo zetin Rsa nen chuan kan en reng ringawt. A inhnit tak faih faihah chuan Rsa chuan ṭhutpui vatin a kuah a, a ṭap khur nghal ngawt ngawt tih pawh ka hria mahse engmah sawi tur ka hrelo.

Ka rilru chuan, “Ms i thi theilo ania aw, ka venhim theilo che anih pawh in i buaina erawh ka chingfel ngei ang,” ka ti mawlh mawlh a, a thih mawlh a ni ka hlauh. Kan inhriatna ala reilo, thla hnih awr chauh a ni, mahse ka tan a pawimawh a, ka bialnu a ni bawk. Ka hmangaih em ka hrelo a, mahse a bula hun tam zawk hman erawh ka duh a, ka thlahlel hle bawk.

Darkar chanve zet an buaipui hnu chuan, Malsawma chu a rawn chhuak ta a, “Eng nge a an?” ka lo ti vat, a hmela hrehawm tihna leh beidawnna hi ka hmu duhlo. Min chhan mai loh avang chuan ka insum theihna in a daih lo, a kawr nghawngah ṭham nawkin, “Malsawmsangi chungah eng nge thleng?” ka ti vin hrawk a, Rsa’n min lo dawm vat. Malsawma chu a thaw hawk a, keipawn ka chelhna ka thlah a, mahse nga ti nge hepa hian min chhan miah loh.

“Amahin a sual let anih loh chuan mihring thiamna chuan chhan theih a nilo.” a tih ruala a mittui far fap ka hmuh chuan mahni inthun tum takin ka thaw nghal hawk hawk a, Sangpuii lam en in, “In thuam la, ICU a dah turin ka ti a, i ṭhianpa nen hian in lut dawn nia, Harhchhuak turin in pui thei mahna,” tiin a kalsawn nghal daih a, Sangpuii erawh a ṭap tak tak tawh. Rs’an kuah a, kei erawh ka ngawi ngul thung. Heti ringawt chuan min kalsan thei lovang. A harsatna em pawh kan la chingfel lo a.

ICU-a an dah hnu chuan Sangpuii a lut hmasa a, a rawn chhuah chuan ka lut ve ta a. Msi Oxygen mask nen, khawl chi hrang hrang a taksa a an vuah te leh a thisen chaw khai zawng zawng te nen chuan hmuh a hrehawm takzet. A nghawng ka en a, bandage chah zet an bel a, a duk aṭang khan thi chhia an la chhuak tih nurse khan a sawi tak alawm. A hmel dang bai chu ka en reng a, “Ms thi suh aw, i thi theilo ania,” ka ti nghal sap. Ka ṭawng a hre thei em ka hrelo mahse lo let leh tih hi ka duh ber a ni.

A bulah chuan ngawirengin ka ṭhu a, ka ngaihtuahna erawh a kal thui hle thung, kan tualthattu ka man hun tur mawlh a ni ka ngaihtuahna luahkhat tu chu, heti taka ka bialnu ti hrehawm tu hi, hmelhmai him tak chuan ka chhuah hauh lovang. A nunna ka la ta anih pawh in ka indem hek lovang.

Awm reng theih anih loh avangin pawnlamah kan awm leh tawh a, Ka in lama Sangpuii nen haw rih mai tura ka tih chuan duh lo in an ṭang ve tlat a, puan sin tur leh mamawh tal lak a ngaih avangin tih theih a awm chuanglo tiin Rsa nen zawk chuan kan haw ta zawk a. Kawngah pawh kan inbe manglo, in kan thlen chuan mamawh tura nia ka hriat ka la khawm zung zung a, Rsa chuan phone a hmang deuh reng bawk. Tun ang zan tlai tawh lamah tu tak bia ang maw, ka tih ruk laiin ka phone a rawn ri ve a, ka en chuan Sangpuii a ni. Chanchin ṭha lo alo sawi mai hlau ru takzet. “Hello” ka tih rual chuan, Sangpuii aw lawi rat a rawn ṭawng chuan ka thil khawih lai a ti tawp chat.

7

(Rpa Pov)

Damdawiin ka thleng a, Msi a thi tia Sangpuii’n min lo hrilh avang khan hmanhmawh zetin kan let kha ania. ICU pawnlama Sangpuii inhnit feih feih ka hmuh rual chuan, “Khawiah nge Msi chu?” ka ti nghal thawr. Doctor leh nurse te’n an buaipui mek thu a sawi chuan luh mai ka duh, mahse Rsa zawkin, “Ṭhianpa nghak lawk ang.” atih chuan, ICU kawngkhar bulah chuan kan ding ta ran a. Eng nga ti teh thut nge a mar an hmuh loh mai. Natna dang engmah a neilo, a nghawng na bak kha, kha la a sawi danin a mumang lama Zothanpari khawihna a tak rama a chhawm luh a ni si. Mahse tunah a nunna in a tawrh phah dawn chu a ni si a.

Doctor a rawn chhuak a, Malsawma a ni lo. Thil awmzia kan lo zawt vat a, “A ṭha tia sawi tur chu nilo mahse A sual let ve nasa hle a ni. A mar a bo a, a lungphu a chawl a, mahse tunah erawh a pangngai leh vek tawh. Test kan neih ang ang te naktuk lamah a rawn chhuak a nga, engkim a chiang thei ang chu.” a ti duah a, min kalsan zui a. Nurse alo chhuak leh a, Sangpuii chuan hmuh a dil vat a, “Ala harh lova, mahse pakhat chu a luh theih ang.” a tih rual chuan a chapal a phelh sawk sawk a, pindanah chuan a lut nghal a. A ṭhiannu a ngaihtuah zia ka hria kan awm loh chhung reilo teah pawh khan a thla a phang hman khawp ang.

Malsawma a rawn lang leh hlawl a, a hmel a pawr fap mai. Ani tan pawh a farnu neihchhun leh a chhungkaw neihchhun a ni a, a rilru a hah hle dawn tih ka hria. Mahse ngun takin ka en a, kan mitthi hnuhnung ber postmortem result kan lam kha ka hrechhuak zawk. Post-mortem titu doctor khan, “Hetiang taka hmeichhe taksa hrechiang a, a taksa peng dang khawih miah lova a duh chauh la chhuak thei tur chuan Doctor thiam tak leh ṭha tak, inzai dan hre tak anih a ngai.” a ti anih kha.

Malsawma hi hmeichhe Doctor, Mizoram in a thiam bera kan neih a ni. Kan thil chhui mek kan insawr zim aṭang khan Doctor tam tak kan zirchiang a, Malsawma pawh kan hmaih chuanglo. Chumi anih avanga tunah pawh en chik viau ka ni reng a. A chetdan engkim chu a pangngai viau, a nau vangin a rilru a hah hle tih bak loh chu Amahah thildang hmuh tur a vang viau bawk.

“In la awm elaw, in ti lawmawm hle mai.” tiin pindan chhunga luh a tum zet tawh chu kan bulah a rawn ṭhu ve a. A hmai tuai in a hui leh pap ṭhin. “Engvanga hetianga awm hi nge maw anih le?” a ti leh sup a. Keini aiin a nau chungchang hi a hre tlem zawk a ang. Rsa chuan, “Mangchhia aṭanga inṭan anih hmel,” atih chuan mak ti zetin Rsa chu a melh a. Msi mangchhia chungchang engmah a hre ve lo tih ka hrethiam nghal.

“I hre ve lo em ni?” ka tih chuan a lu a bu nghut a, “Chutiang engmah Matei hian min hrilh ngailo, eng mangchhia nge?” a tih chuan Rsa nen kan inmelh zawk. Rsa chuan mitthi an awm dawn apiangin mangchhia a neih thu leh mitthi tur a hmuh lawk ṭhin thu a sawi lai chuan Malsawma mitmeng chu a buai nak mai. Mitthi tawh te’n an thlarau hmanga an tihbuai zui zel thu a sawi lai te chuan a kut pahnih chu suih zawmin a tuai a tuai a, a awmdan buai ru zet chu chik takin ka en a. Rsa ṭawng mawlh mawlh lai chuan a ding ta hluai a, “In zahawm viau na in, in thusawi awihawm loh tak chu Matei kâ aṭang pawn hria ila ka awi in ring em?” Mit sen ruma atih chuan Rsa chuan a melh nghal run a.

“Ṭhianpa, i farnu neihchhun, i chhungkaw neihchhun harsatna tawh mek pawh i hre meuh na nge, nge ni a Nangmah nen hian heng mitthi te hian inkungkaihna an neih vanga heng thil zozai te hi Msi hian a tuar ve zawk?” ka tih chuan Malsawma chu phawk zet hian a rawn hawi a, mahse a in siamrem lehnghal vat. “Eng maw i sawi a, kei leh mitthi te maw?” tiin a nui lui hawk hawk a, “I ngaihtuahna kha a diklo lamah i hmangin ka hria, uluk takin hmang leh zawk la,in sawi anga ka nau nena inkungkaihna an neih phei chuan man vat teh u,” tiin mahni inringtawk takin pindan chhungah chuan a lut ta hmak a.

Rsa nen chuan in enin engmah sawi zui lovin kan ṭhu leh a, mahse kan thil ngaihtuah erawh a thuhmun in ka ring. Surgeon leh gynecologist Doctor zawng zawng kan thlur bing miau a, khang Doctor Mizoram in kan neih zawng zawng zingah khan Msi khaihhnawih thei langsar ber chu a U Malsawmdawngzuala chauh a ni. Mahse Ani kha anih siloh chuan tu nge kan tualthattu hi ni ta ang.

Malsawma lakah finfiahna kan neih miau loh avangin Amah tiin ringhlel in kan umzui char char thei biklo, chutih rualin a chetdan engkim erawh kan enzui a ngai tih zanina a hmel buai danah ringawt pawh khan a hriat. Tunah chuan kan hna pawh kan sawr zim leh thei deuh tawh ang chu.

Sangpuii a rawn chhuak a, “E Malsawm ilo awm maw, Msi’n a hmu duh che a.” atih chuan keini pathum chu kan inmelh kual a, Malsawma inti thei hmel chu ngeiawm tak a ni. “A bialpa i ni emaw ka tia,” tia nui hukin, “In zahawm viau na in, a hmuh duh ka ni si a, ka lut mai ange,” tiin pindanah chuan a lutnghal hmak a. Rs’an kawng dawm meuh a, “Hmela mai mai chu,” a tih rual chuan, Sangpuii’n, “Eng nge thleng a?” a ti ve nghal zat.

Kan ngawih reng avangin Sangpuii chuan Msi a harh ruala a thusawi mak a tih thu a sawi niah niah a, Malsawma bula insawn a duh thu leh thi mai tur anih chuan a u bul leh an inchhung ngeia thih a duhthu a sawi a ti a, dikna lai awm mahse engvangin nge chu thil chu a harh velah a sawi kher le? Kei min hmu lova Malsawma a lam hmasa kha ka dem loh rualin lungawi chu ka ni hauh lo.

Malsawma a rawn chhuak a, Kei leh Rsa chu min melh tawnin, “In zahawm viau na in hawsan mah ula a pawilo, a chhanchu I hming ka sawi khan a hre lo che.” tia min melh ngur chuan awilo zet hian ka nui hul hak a, “Sangpui, a harh khan Anni pahnih hming hi a sawi em?” a ti leh ngat a, Sangpuii chuan a lu a thing a, “A chhanchu Ani hian a hriatna tam tak a hloh vang a ni, in ngai pawimawh ve anih chuan a rilru tibuai zawngin khawsa lo ang che u,” ti leh hmakin min kalsan nghal a, Malsawma khan dawt a sawi anih ka ring, engtin nge accident pawh ni miah silova a hriatna a hloh ngawt theih ang.

Pindan kawngkhar chu hawngin ka lut rawk rawk a, Rsa leh Sangpuii min biakna pawh ka ngaisak hmanlo, Msi khuma lo ṭhu awn diai ka hmuh rual chuan a bula nurse nen chuan min rawn melh ve nghal a. Ka koh ruala a hawi buai nak chu a ti der miah lo tih ka hria, mahse engtin nge anih theih? Hriatna hloh tur khawpin a chungah khan eng chiah nge thleng?

“Ṭhianpa, min lo hrethiam la, damlo hi a muthilh a hun tawh a,” Nurse in atih chuan, aw ka thian kharh a, “Ms, min hre miah lo tak tak em ni?” ka ti zawi sap, ka chhungrilah hian na a awm, ka ṭanpui theih loh vanga mahni inthiamlohna na nen. “Kan inhre ngai em ni?” tia min melh kiau tu chu melh ve reng ringawt, a awmdan avang chuan ka tawt up up thei nia. He hmeichhia nen hian kan kal thui lova, kan inhriatna la ala rei heklo mahse tuna a awmdan danglam lutuk hian min ti na chu anih si hi.

A zawhna pawh chhang tawh lovin ICU chu ka chhuahsan a, ka chhuah ruala Sangpuii zawhna pawh ka chhang lo, Pawnlamah ka chhuak tlang nghal a, Rsa pawn min lo zui ve vat. Car chhung ka luh rualin, “In hna thawk ula, keipawh in ka hna ka thawk tawh ang.” ka tih chuan hriatthiam loh hmel zet hian min melh a, ” Chip kha i hriat kha, reilo teah call ka dawng dawn a, Sanjay pawh headquaters lamah report a pe tawh ngei ang, kan mi man te pawh CBI kutah an lut tawhin ka ring bawk.” ka tih chuan a lu a bu nghut a, car chu ka khalh chhuak ta nghal a.

Helaia buaina hi ngaihven tawhlo ka tum a nilo, mahse keimahin ka kal angai, Malsawma chauh hi ka buaipui zui tawh ang, pen khat a pen anih chuan kei hian ka hma khalh zel tawh ang. Engtik niah emaw chuan ka man chhuak ngei ang. Ani ngei hi a ni, he buaina bul tumtu chu. Fiahna ka neih loh vang chauh a, la man lo mai ka ni.

(Msi Pov)

Eng thil pawh thleng dawn se ka tih angai ti rilru mawlh mawlh in Damdawi in thawmhnaw ka hak chu ka thlak mawlh mawlh a, kan in ngeiah ka haw dawn a, mahse ka thil tih tum te hian min ti phur hlawl silo.

Damdawiin ka luh dawna ka awmdan ka ngaihtuah let a, mumang ang ruai vekin ka hria. Ka awm chhung na lutuk erawh tun thleng hian ka la feel thei. Ka taksa pum hi mei in kang se, ral thei miah silo ila, chu nen chuan a danglam in ka ringlo. A nat em avanga nikhaw hrelo hial khawp a awmzui kha ka ni reng bawk a.

Mahse nikhua ka hriat loh rual khan mitthi te kalnaah ka kal ka ti mai, mumang nge a tak tih ka hrelo a, ka buai hle anih kha. Mahse mitthi hnuhnung ber Lalrinmawii nen khan phul nuam takah kan lo ding dun a, a awmna a nawm tehlul nen a hmel ngui zet avang chuan sawi tur hrelo in ka melh reng ringawt. A damlaia fimkhur tura ka chah lawm lawm te a ngaih pawimawh loh avanga a inchhir thu a sawi ka rin nen engmah a sawilo in min melh ve tlawk tlawk a, a mit a mittui tlin pam te chu ka khawngaih takzet, mahse atan khan engmah tih theih ka nei silova.

Kawng lo awmah chuan ngawirengin kan kal dun a, thui tak kan kal dun ni mai in ka hria. A ding chawt a, hmalam a melh ngar a, hmeichhe pathum hmel ka hmuh rual chuan, ka thin a phu nghal zaih zaih a, ka hlau a ni. Anni chu Lalrinmawii anglo zetin an landan a rapthlâk em bawk a. Min melh ngur hlawm a, an landanah chuan min tihnat an hreh hauh lovang. Mahse ka bula awm avâng chuan tumahin min khawih an tumlo a, min hnaih heklo.

“Hlau suh, an ti na lovang che.” hmui chet miah lova titu Rinmawii chu ka melh tawp. A ṭawng lo mahse a rilru a athusawi te kha ka hre vek si a. A thusawi avang chuan tlemte tak takin ka hlauhna te pawh a reh ve tawh. Kan kal ṭanna lamah chuan a inher leh a, keipawh a kalna lamah chuan ka kal ve nghal vat. Mahse ka thil rah avang chuan ka ding dat. Banbun danglam zet ka rah chu ka chhar a, Rinmawii hmaa lek kangin ka thlek kual ngial a, ka hriat hnu a ni tih ka hria, mahse ka hrechhuak zo lo.

“Kan tan leh i tan phuba min laksak rawh.” a tih chuan ka hawi buai hle ringawt. “Kha banbun neitu kha zawng chhuak rawh.” a tih ruala ka nghawng na vung vung chu ka khawih a, a hmel ngui zet chu melh lehin ka nghawng chu ka dawm vang vang a, “Tuman an tibuai tawh lovang che, mahse i hna erawh thawk ang che.” a tih leh chuan ka thaw kawk a, ka harh zui kha ania.

Ka harh tir khan ka buai em em a, Doctor khan i thi zawk tiin min fiam hial anih kha. Ka khawvela pangngaia ka let khan engmah ka hre lawk lo, mahse karkhat zet Damdawi inah ka awm a, tunah chuan heta ka kal hma thil thleng leh a hnu thlengin ka hre leh vek tawh. Ka harh khan Rengpuia kha ka hrelo ngei mai, mahse ka hna tur ka hriatchhuah rual khan Anni chu tello law law se ka duh avangin ka hrelo der tlang ta a ni. Chuan vawiinah Damdawiin ka chhuahsan dawn a, kan in Malsawma nen kan chenna hmunah ka haw tawh ang, ka hna thawk turin.

Duty a neihloh ni a ni a, Malsawma’n min lo lam a, a hmel hlim lutuk chu hmuh a nuam takzet. Sangpuii erawh duty a neih avangin message in ka chhuah thu leh Malsawma nen kan haw thu ka hrilh a, ka haw tur a phur hmel chu nui sangin ka melh a, mahse Amah aia ka en ngun erawh a bana banbun chu a ni.

“U I banbun hi nalh ka ti.” a car khalh laia ka tih chuan min melh zawk a, “Nakinah a dang ka lei sak ve dawn che nia,” tiin a nui suk a, mahse a kawrbana hliah nghal daihin a kut chu a siam ṭha nghal zeuh a. A thusawi vang ni miah lovin ka nui sak.

In kan thleng a, ka pindan ni ṭhin tunah pawh ka pindan ni leh tur thoah chuan ka lut a, ka nu leh pa te mitthlaah an rawn lang nghal zut zut. Kan in chhuahsana quater a ka awm aṭang khan tun hi ka haw leh vawikhatna a ni. Mi tam tak chuan mak an ti ngei ang mahse ka nu leh pate sulhnu chhui hi ka ngam ngang silo. Malsawma a awm lo nen, tin, a awm hnuah lah kalna hun pawh nei ila ka kal chaklo na khan chhuanlam min neih tir zel a, Sangpuii pawhin kan in hi ala hmu hauh lo. Min dem duh tan chuan mahni in tlawh lova kum tam awm chu ka dem awm ngawt ta ve ang.

Ka hreh ang chiah in ka mitthlaa lang te chuan ka mittui a ko chhuak a, ṭah loh hi a har. Ṭah rin ka hlauh avanga ka kâ hup a ka kun ngar laia ka dara beng thak thak tu avang chuan ka hawi chhuak vat a, Malsawma ka hmuh rualin kuah vatin ka inhnit nghal hlawp hlawp. “Ṭap bawrh bawrh rawh, hei vang hi ania rawn haw vat turin ka duh che. Min en la keipawhin ka pai dam vek tawh ania, Nang erawh a bul aṭangin i ṭan leh dawn si a.” atih chuan dik ka ti. Hmanah khan sulhnu chhuiin khuarei min hnem hun kha lo nghak ila tunah hian ka na thar leh kher awm silova.

“Ka ṭha mai ang, ka rawn let har em a ni.” ka tih chuan, “Um” a ti ve sup. Min tih hlim tum takin chhungkaw kima kan awm laia ka nghal theih zia a sawi a, ka ṭah nuih ve hawk hawk mai. “I nuih khan i hmelṭha daih zawk,” a tih chuan ka lei ka chhuak vak. Nui hawk hawkin, “Lokal rawh ei tur ka siam ania,” a tih chuan choka lamah kan inzui ta a.

Ka taksa ala chak tawk loh avangin chawlh ka la a, Malsawma’n min sawi pui ve nen karkhat ngawt ka chawl thei dawn bawk. Nitin hnaah min kalsan a, in ka lo nghak ṭhin. A kal rualin kan inchhung chu ka dap fo a, eng nge ka zawn hrelo mah ila, ka unaupa ngei ka chhui chu a ni sia. Tualthattu a ni ngei a ni tih finfiahna ka duh miau a ni. Mahse he in lian ve takah hian chutiang tur chu hmuh a har takzet si a.

Pindan tinah lutin engkim ka enkual a, hmuh hmaih ka nei ang tih hlau in engkim chu ka en uluk em em a, mahse karkhat zet ka zawn kual hnuah pawh engmah ka la hmu lo chu ania. Inchhung khawilai pawh chu a fel em em a, langa kal Pi Muani kum upa ve tawh in a tifai ziah a, nu fel tak anih avangin min be peih a, midang biak tur awm lo nen ka nel vat a. Pi Muani a awm ve avang chuan ka thil zawnna lamah erawh fimkhur a ngai viau, Ani hian min ringhlel anih chuan ka u bulah engkim a sawi dawn tih ka chiang.

Malsawma fel a tih zia te, mipa invawng leh Doctor hnathawk tur diktak anih zia te, khawtlangah leh kohhranah a sum zawnga ṭhahnem a ngaih thu te a sawi reng zel a, Amah ruaitu anih vanga fak anih loh thu a sawi ziah bawk. Ka awmloh chhunga a lunglen leh khawhar ṭhin zia a sawi chang te chuan Malsawma chu ka khawngaih hle ṭhin. Ka unaupa hi ka hmangaih a, ka chhungkaw neihchhun anih tawh avang te hian ka tan a pawimawh mahse Mizoram ti ralṭi a, hmeichhe pali ngawt nunna la tu banbun ang a nei tlat si hian min tibuai ṭhin.

Tuman a banbun vang hian an ringhlel ve dawnlo tih ka hria, mahse kei erawh chiang taka hmuh tir leh hriattir ka ni miau si a, ka unaupa hi ringhlelh duhlo in, Ani chu a nilo ang tiin tawpsan mai duh ve mah ila hrehawm taka min siamtu te kha ka hlau a ni. Ka hlauhna leh Anmahni thattu zawn sak ka duhna hi a in zat reng, chung zawng zawngah chuan ka unuapa ka hmangaihna ala tel ve zel nen, awmdan tur thiam har ka ti ṭan der tawh chu ania.

Min ngaihtuah taka khawiah mah peng lova a rawn haw nghal te, ka ei chak zawng tinreng a rawn khai bawr ṭun ka hmuh te hian, ka ringhlelhna tam tak hi a tibo tial tial a, ka sawi hmaih miah lo tur bawk chu, Damdawi Ina ka harh aṭang khan eng mangchhia mah ka hmu tawh ngailo a, eng thlarau sual mahin min umzui tawh ngai heklo.

Zanriah kan ei laia, fiamthu nuihzatthlâk loh tak tak a sawipui chu ka nuih pui hak hak a, a fiamthu sawi ve te hi a nuihzatthlâk loh lutuk hi ka nui ni berin ka hria.
“Tun Sunday chu Sangpuii chaw eiah ko ila,” a tih chuan phur zet hian ka lo aw vat a, a chawhmeh duhzawng ka sawi nghal siam siam bawk. “Anih Rengpuia leh Rsa kha koh tel ve i duh em?” atih chuan ka melh nghal vat a, ka hrelo der tluang zel a, Malsawma hian ka hrechhuak tawh em tih hriat a duh vanga min zawt nge thil dang vang ni ang?

“Anni chu ka ṭhiante an ni ve lo a, nga ti nge kan sawm ve ang?” ka ti deuh hu a, Malsawma khi ru sak chu ka hmu reng, eng nge Anni ho chungah hian thleng ang le? “Anih ka ṭhianpa Dr.Robert-a kha sawm tel ve ila.” atih leh chuan, “Kha chu i thu thu i ṭhianpa ania, mahse Sangpuii chu keimah ngei hian ka sawm duh ania,” ka tih chuan a lu a bu nghut a, min chhang tawh lovin a ei tur chu hlim hmel deuh hian a ei nghal daih.

Engvanga hlim hmel sawt nge anih ka hre lo, an inkara thil thleng a awm a ni ngei ang, hriat duh viau mah ila engtin nge ka hriatchhuah ang ka hrelo. Rengpuia ka hriat leh hriatloh Damdawi in ka chhuahsan aṭanga a vawihnih min zawhna chiah a ni. Damdawi Inah khan a sawi a, mahse ka hrelo tih a hriat khan min check nghal vat a, ka ṭhatlohna a hmulo tih hriat takin min kalsan a, mahse CT Scan thlengin min tih tir vek tho. Keimahah ṭhatlohna a awmlo tiin ka Doctor khan a sawi miau a, ni e, a dik engmah ṭhatlohna ka neilo, mahse mi zawng zawng hriatah ka hriatna ka hloh miau alawm, chupawh ka thil tih duh avanga lem ka chan duh avangin.

Inrinni a ni a, zing hma takah tho in Malsawma rawn thawh hma in kawmchhak lama phul zau vaklo awmah chuan ka tei chhuak a, a zau loh avangin kual chhuah erawh a har lemlo khawp mai, ka kual ka kual a, ka ngaihtuahna te chu hmun hrang hrangah kalin mahni in ka inkawm a, chutia ka tel kual pah chuan lei chu ka chhuih chhuih a, mak deuhin a lei chu dah thar a ang. Ka chhuih na leh deuh a, grass chu a zung chawpin ka chhuih chhuak ta mai. ka ngaihtuahna chu a vir nghal zawk a ka dinna chu ka melh nghal ngar a.

“Zingkarah khatah khan eng nge i tih?” Rum ula rawn titi avang chuan phu zawkin inchhung luhna kawngkhar bula Malsawma ding nen chuan kan inmelh nghal ran a, a mitmeng rum lutuk chu ka hlaulo ka tih chuan dawt ka sawi chiang hle ang. “Eng nge i tih ka tih chu?” a tih leh chuan, “Ah, ih i tho har lutuk a, tih tur ka hrelo a,” ka ti bah nak a, “Lo lut rawh,” a tih leh hmuk chuan, rang zetin inchhung lam chu ka pan nghal dawr dawr a, kawngkhar a khar riah chuan min hauh ngei ringin Amah hnungchhawn zawngin choka luhna bulah chuan ka ding tawp.

“Inthlak la thingpui in zawhah kan bazar dawn nia, tlailam chaw ei tur kan nei sia,” Aw dam thlupa a rawn tih chuan inher zawkin ka melh nghal vung vung a, “Ka sawi kha i hrelo em ni?” tia a nuih suk chuan ka kuah nghal thlawp, “Naupang chhia tak, ka bialnu a awm ve ang tih ka hlau,” a tih leh chuan ka kuahna thlah vatin,” Taka sawm ve ila,” ka ti nghal vat. “Ka sawm daih tawh, kal tawh rawh, rei lutuk lo la,” a tih leh chuan nui var varin ka pindan ka pan ta nghal a.

Ka pindan ka luh rual chuan ka thaw nghal hak a, khatiang taka Malsawma thinrim hmel kha ka la hmu ngai lo. Mahse nga ti nge a thinrim? Kan in chhaklamah hian tual zau vaklo kan nei a, kan chhuak khat viau bawk, phul zau lo te a ni a, chutih rualin a dam deuh avang hian in hmalamah kawt zawl nuam tak kan nei bawk nen kal ngailo mai kan nia, kei phei chuan ka ngaina ngailo hrim hrim.

Ka lu rawn na ngut ngut avang chuan ka chal chu ka dawm vang vang a, Damdawi In ka chhuah aṭang hian ka ngaihtuahna ka hmang nasa mah mah a ni mahna, hetia ka ngaihtuahna ka hman vak hian ka lu a na leh vak zel. Ka insiam lai te chuan, chhaklam lei nghetlo lutuk kha ka mitthlaah a lang leh ṭhin a, kha tual zimteah khan eng nge awm ang? En chuan kawt zim tê mai chauh a ni, mahse ka kal ngailohna a ni chungin ka kal chhunah Malsawma kha a thinrim hle chu anih kha.

“Mate i hman dawn tawh em?” ka kawngkhar pawnlam aṭanga titu avang chuan ka chhuak vat a, ka hmel a hmuh rualin ka lu ah chul vatin, “Chhaklam khi a dam a, i tan hmun hnawng leh dama awm a ṭhalo tih hria la,” a tih chuan nui var varin, “Awle” ka ti vat a, mahse ka rilru chuan, “Nangmah nilo hram rawh,” a ti vawng vawng.

Tlailamah chuan Malsawma nen rawng kan bawl a, Sangpuii pawh a rawn thlen rualin min pui ve nghal vat a, mahse Sangpuii awmdan chu a danglam. A ṭawng tlem em em a, be hlek ila a phu leh zawk zel chu mak ka ti hle a, a chhan zawh duh viau mah ila Malsawma a awm ve tlat avang chuan engmah ka sawi lo. Tebawihi leh Dr. Robert -a te an rawn thlen chuan ei rawng pawh kan bawl zo vek tawh. Malsawma chu ṭhutkhawmna lamah a phei a, chulai remchang chu chuhin Sangpuii chu ka be hrang ta a.

“I ṭha em? I diklo ania.” ka tih chuan min melh reng ringawt a, “Sangpui,” tia a bana ka chelh chu phu zawkin, “Maw?” a ti deuh hu a, a awmdan chu ka hrethiam lo, nga ti nge hetianga a awm? “Thil thleng a awm em, i ṭha em, i danglam lutuk ania.” ka ti leh zung zung a, min melh leh vung vung hian, “Um” a ti ringawt. “Rinsangpui, eng nge thleng?” ka ngaihṭha lo em avang chuan vin lek leka tiin a banah chuan ka sawi nawk a, harhchhuak thut hmel a pu leh tawh, a awmdan mak lutuk avanga ka ngaih ṭha lo hmel chu min melh zawkin, “Ka ṭha, ka ṭha lawm,” tih bah nawk nawkin Fridge lam a pan ta daih a, a bula ka kal laiin Malsawma a rawn lut a, Chaw ei mai ṭha a tih thu a sawi chuan, Sangpuii pawh be zawm lovin, chaw ei chu ka siam zui a, min lo pui ve nghal vat, mahse Amah anglo zetin a ngawireng thung.

An haw dawn chuan khua a thim tawh a, Sangpuii chu thlah a thil awmzia zawh ka duh viau rualin a ngailo tiin a ṭang tlat si a, kar tharah chuan keipawh hnaah ka kal leh tawh dawn alawm ti rilru in ngaiṭha vak lovin ka thlah a, a mimal harsatna a ni ang tih erawh ka hlauthawng, a chhan chu Ani hian mimal chanchin min hrilh lutuk lo. An chhungkaw member zat leh a unau te chanchin ka hria a, a pianpui te leh a nu leh pa, a cousin ṭhenkhat pawh ka hmu ve nual tawh, chutih rualin vawiin ni thlengin a ngaihzawng ka la hmu lova, tu nge tih pawh ka hrelo, a sawi duh miau silova zawh reng ka tum biklo.

Pathian ni a ni a, Malsawma zawkin inkhawm a rawt tlat avangin kan inkhawm a, banah leng ang u atih chuan Sangpuii ka sawm ve dawn tiin ka call a, mahse vawi tam ka call hnu pawhin phone a la thei miah lo. Zan lama a awmdan avanga ka ngaih a ṭhat loh em avangin Malsawma bulah quater lama sawm ka tum thu ka sawi chuan Awle a ti ve mai a. Ka thawmhnaw thlak sawk sawkin, Sangpuii in lam pan chuan Scooty nen ka kal a, mahse a in ka thlen chuan tala in a kawngkhar a in kalh ṭhap a, chahbi spare lah ka ak chhuak miah silo.

Ka phone ri sek chu en in Malsawma call ka hmuh chuan ka pick up vat, Tebawihi leh Dr.Robert-a te an tel ve dawn tih ka hre ve chiah bawk. Dr.Roberta hi a hma zawngin ka hmu mawh ngai hauh lo, ka u ṭhian ve ber ania tiin ka be ṭha hle ṭhin zawk, mahse nizan chaw kan ei laia a ṭawngkama min fiam zeuh zeuh erawh min ngaizawng niin ka hria. Kei hian ka ngai diklo pawh a ni mai thei bawk.

Sangpuii chu call ka tum leh a, a phone a switch off a intih lehzel avângin ngaiṭha vaklo in, In chu ka kalsan a, Rsa emaw Rpa call mai ka duh, mahse ka call chuan ka thil tum hi ka hlawhchham phah thei tih ka ngaihtuah chhuak vat a, ka phone pawh ka ipteah ka ak ṭha nghal vat. In ka thlen chuan keimah chiah min lo nghak tawh tih hriat zetin pawn ṭhutnaah an lo ṭhu a, Malsawma’n bike ken a tum chu ṭullo ka ti ru takzet, a chhan pawh Robert-a nen kan inphurh angaih phah a. Malsawma hnaiha awm tam ngai inti lo ila chuan ka kal kher lovang.

Thui tak kan tlan hnu in huan pakhat fai leh nuam zet kan thleng a, Robert-an,”kan huan anih hi,” tia gate a hawn rual chuan ka lut ve nghal. A hmun a nuam in a thawveng a, Thlam lian tak kan thlen rualin nu upa lam hian min lo lawm vat a, an pa ni ngei tur pawh a rawn lang ve bawk. Thlam ka ti na in, In pangngai tak zawk a ang. A chhung kan lut a, mi hausa ho tak hi chu ka ti rilru neuh neuh. Ṭhutna a nuamin, Fridge tui ngat kan in a, choka a awm hrang thlap bawk. Thlanglam varanda-ah chuan chhuakin Thei chi hrang hrang awm chu ka thlir nghal vauh vauh a, Sangpuii kal ve se nuam a ti viau dawn asin le, ka ti rilru neuh neuh.

“Kha thei tui in rawh,” titu chu ka melh vat a, Robert-a a ni, a no min pek chu ban vatin, inchhunglam chu ka melh zeuh a, Malsawma leh Tebawihi hmel ka hmu hauh lo. Inngaizawng an nia chance an zawng ve te pawh animahna. “An chhuak lawk anih kha,” atih chu lu ka bu nghat a, “Chhuah ve i duh em?” a ti nghal zat. “Aih tihian a nuam,” ka tih chuan a nui suk a, Rengpuia ka hre chhuak zawk. Khang karkhat chhung khan ka ngailo ka tih chuan dawt ka sawi ngei ang.

Vawi tam tak biak ka tum a, mahse be lo tura min turtu hi a lian em a, be lo bawkin ka awm leh ṭhin. Engkim hrilh ve law law ka duh a, mahse thudik ka hrechhuak anih phawt loh chuan ka thusawi a awih in ka ring silo. Ka phone chu phawrhin ka bih zeuh a, tunah te hian Amah nen ni ila a nuam dawn em asin. Rsa te huana kan kal ṭum kha ka ngaihtuah a, ka ngai thar vawng vawng.

“Ṭawng ve la,” ti zawi sup tu chu ka melh zeuh a, “Tu nge i ngaihtuah?” a tih leh chuan ka nui ringawt. Ka bula hnaih taka a awm vel hi ka ning ṭan chu anih ber hi. Robert-a chuan eng eng emaw a sawi a, chhan loh aiah ka aw liam vel mai mai a ni. Ngati nge hetia ka nin tak em em ka hrelo, ka ngaina em em hranlo a, ka haw hranlo, mahse Rengpuia nena kan inṭhen nia a hriat aṭang khan kan inah a rawn lawr zut a, a ṭawngkamah hriatthiam tur a sawi leh zeuh ṭhin, ka ngaihven duh loh vang nge a huangtau em em hran lo.

Mahse nimin aṭang khan a zia a dang riau a, Sangpuii vang khan tu thusawi mah kha ka ngaisak tehchiam lova, vawiinah erawh ka duh aiin a huangtau ta mah mah. Inchhunga luh tuma ka ding chu ka banah a rawn chelh a, “Ka duh che Ms,” a rawn tih chuan ka melh ngar a, ka kut erawh ka hum ruh viau. A sawi nawn leh chuan, “Min hrethiam rawh ngaihzawng neih ka duhlo.” ka ti tawl ringawt. Ka ban thing thlaa kalsawn ka tum chuan, “I u in min hriatpui thlap a, ka ta i ni ngei ang.” a tih chuan ka nui chhuak hak a, “Ka u hriatpui nih chu a pawimawh viau a mi?” ka ti chhuak hak.

A thusawi avanga lungawilo zetin ka phone phawrhin Malsawma chu ka call a, haw ka duh thu leh ka awm a nawm loh thu ka sawi chuan min ngaihtuah zetin an rawn chhoh nghal thu a sawi a, Malsawma ṭawng lai chuan loudspeaker ka On kher. “A nau duhdan hi a pawimawh ber dawn tih tal hre tur i ni asin.” ka tih chuan rum zet hian min melh nghal khui a.

8

“Bawihte, ka tihpalh.” Sangpuii’n mittui tling pama a tih chuan a kutah chelhin, “Aih nilo, nang chu ni ve lo,” tiin ka ṭap zui hlawp hlawp a. A mit chhing riai riai chu duh lovin ka sawi nghal nawk nawk. “Rinsangpui min kalsan suh, khawngaihin,” tiin awrawl chhuah meuhin ka ṭap a. Ka ṭhu chhuak nghal hlawl bawk. Ka hawikuala ka pindan chu ka melh kual chiam a. Ka mumang vanga ka ṭahna cham bang ka mittui chu hru hulin, ka tho chhuak vat a.

Bathroom a ka awm lai leh ka thawmhnaw ka thlak lai te chuan ka rilru a chiai lo theilo. Sangpuii’n harsatna a tawk tih ka chiang a, Rengpuia ka biak a ngai. Ka phone chu la kangin Rengpuia number chu ka dial nghal a, a ring ral ṭhak avang chuan ka sana ka en zeuh. Zing dar5 a pel awr a, ala tho lo pawh a ni mahna. Ka call leh a, a tawp dawnah a la ve ta hram. “Hello,” a tih rual chuan ka ngawi dat a, a aw ka hre leh meuh chu ka mittui a tla leh hial mai. “Bawihi i ṭha em?” a tih rual chuan in sut ri hraih in, “Sangpuii’n buaina a tawk.” ka tih rual chuan ka ṭah chhuak lutuk chu ka mittui a luang leh zung zung a.

“Bawihi thil awmdan sawi teh.” min nghah deuh vang vang hnuah a rawn ti chauh. Inrinni zan kan ina chaw eia a rawn kal a awmdan aṭanga sawi ṭanin ka mumanga ka hmuh dan thlenga ka sawi zawh meuh chuan ka thaw a cham lo chauh. “Quater lamah ka lo ngaihven dawn ania, hnaah rawn kal la ka lo hmu bawk ang che.” a tih chuan, “Awle,” tiin call chu dah mai ka tum a, “Ka ngai che,” a rawn tih leh chuan, “Keipawn ka ngai che,” tiin call kan dah ta a.

Insiam peih at tawh ni mah ila ala hma em avangin ka khumah chuan ka mu leh a, Sangpuii nena kan inhriat dan te ka ngaihtuah a, ka nu leh pa awmloh hnua ka tana ka engkim anih dan te ka ngaihtuah zel a, ka hlauhthawnna leh ka kalsan avanga hrehawm ka tihna te chuan ka mittui a ko chhuak leh tawh. Inrinni zana zanriah an rawn ei khan nga ti nge ka lo zui haw mai loh tiin mahni ka indem a, a hma ni lawka a inkawta ka awm lai te khan Rengpuia hi lo hrilh tawh tur ka ni asin.

Ka ngaihtuahna kal kual nasa lutuk chuan mahni indemna chauh min pe a, hrehawm ka tih lutuk vanga awmngaihna hrelo khawpin ka awm a ni ber mai. Ka pindan chu zim ka ti a, pawnlamah ka chhuak ta ringawt a. Malsawma ala tho lova, ei rawngbawl tur la alo la kal heklo. Ka in lian takah chuan ka tei kual ka tei kual a, kawmchhak lei nghetlo zet kha ka rilruah a rawn lang zawk. Chu lam pan chuan ka kal ṭham ṭham a, a bul lawka pindan pawh chu engtik laia siam nge ka hre miah lo. Pawnlama chhuak lovin, pindan tharah chuan ka lut a, mikhual pindan tura Malsawma siam thar a ni ngei ang.

Karkhat chhung khan ka hmu ngai miah lo tihna ania, mak ka ti takzet. Inchhung zawng zawng ka dap a, Malsawma ka rinhlehna, fiahna ka zawng kha a ni si a, mahse engtin nge helai hi ka hriat miah loh theih le? Kan in hi inlian ve tak anih bakah inchung leh inhnuai kan nei ve bawk nen, helai daih daih a pindan alo awm hi ka hmu lo palh mai anih ka ring ta deuh. Pindan chungah chuan engvakmah a awmlo, khum pakhat a awm a, dawhkan tê a bulah a awm tawp a, Bathroom ni awm tak a awm bawk a, mahse chu erawh tala lianin a inkalh tlat thung. Ka kal hnai dawn chiah ka hnunglam aṭanga “Mate,” titu avang chuan ka phu zawk.

Malsawma thinrim hmel inhmuh ring takin ka hawi let a mahse a hmel ka hmuh rual chuan ka thaw nghal huai thei. “U helaiah hian pindan alo awm reng a,” ka tih chuan, “A awmna a rei tawh, i hre miah na nge?” tiin ka bulah a rawn kal a, lu thing nak nakin, “Ka hre lo reng reng,” ka tih chuan nui sukin, “Eng nge i tih reng reng a?” a ti nghal daih. Ka mut theihloh thu leh ka tei kualna lamah pindan hi ka hmuh thu ka sawi chuan min chhuahpuiin ka muttheih loh chhan min zawt a, ka mumang erawh ka hrilh duhlo thung.

Damdawiin ka thleng a, Sangpuii alo la thlenglo tih ka hriat chuan ka call leh a switch off a inti tlat. Rengpuia ka call leh a, “Ka lo thleng,” tiin a phone a dah nghal. Duty room pawn lamah chuan alo ding reng tawh. Ka pan nghal vat a, a hmel tla dak leh a mithnuai dum kalhah chuan zan a mut ṭhat loh zia a hriat theih. “Engtin?” ka aw a hlauhthawnna ka thup theilo. “A inah ka kal a, mahse a awm chuanglo. A chhungte i be tawh em?” atih chuan lu ka thing a, thuchiang hrelo a tih hlauhthawng ka hreh vanga be lo mai ka ni.

“Lokal teh,” tiin Bathroom lamah min kai phei dawr dawr a, “Sangpuii chu thi ang chauh in maw i hmuh?” a tih chuan ka ngawi rauh rauh a, “Aw mahse pindan var vek chhungah ania, chuan midang ang nilo in thisen pawh ka hmu ve chiam lo,” tiin ka thaw halh a. “Rsa ka call tawh a, Ani in alo bawhzui ang, report ziak turin station lamah kan kal dawn em ni ang?” a tih chuan ka meng buai deuh nak a, mahse ka zui ve ta nghal a.

Sister hnenah chuan thil awmdan sawiin tunlai boruak nen Police lama kal ka tum thu ka sawi a, Ani pawn min hnial lo. Rengpuia nen chuan kan inzui chhuak ta nghal a. Station kan thlen chuan min kalpui hmawk hmawk avang chuan ka um ve zel a, Inspector Ruatpuia nen kan inhmu leh ta chu ania. Pa nelawm loh ber niin hre mah ila tunah erawh kan mamawh ber a ni miau a. Rsa pawh alo ṭhu run tawh a, mahse Rsa ka hriat ṭhin hmel kha a pu hauh lo. A hmel a tak run a, Sangpuii nen khan an inkawmngeih hle tih ka hria, a ngaihtuah ve hle dawn tih ka hrethiam.

Report kan ziak lut a, a awmlo tih ka hriat dan leh a hma nia kan chaw eikhawm naa a mize danglam thu te ka sawi luam a, duty ka neih avangin Rengpuia bawk chuan min Damdawi inah min thlah leh ta a. Ka awmdan avangin min ngaihtuah viau mahse awm ve reng thei anih loh avangin a chhuak ta vat a. Buaina tur awm reng mahse ka rilru in Sangpuii a zawn reng avangin chhun chawlh a nih hma hauh chuan Sister bulah chuan ka ngaihtuah em vanga ka remhriat dana zawn ve ka duh ka sawi chuan min hrethiam hle a, sawi darh rih lo turin kan inchah uluk viau.

Ka inthlak sawk sawk a, Malsawma OPD duty ni a nih loh avangin a office lam ka pan a, kawngkhar kik mai ka tum chu, tlem inhawng ka hmuh chuan ka hnaih hrut a, a chhûnglama Malsawma phone be ri pawh ka hre thei. “A pangnga na chiah a ni, kei hi mi thilti thei ber ni turin ke ka pen thei tawh ang.” tiin a nui huk huk a, lehlama a biak chu tu nge anih ka hrelo. “Ala thi lo, zaninah a thleng ang.” Malsawma’n a tih chuan ka meng buai nghal nak. Ka ngaihtuah kual a, kan in leh pawnlam thlengin, Malsawma hi khawiah mah a chhuak ngailo, hna a kal anih loh chuan. Tualthattu a ni ngei anih chuan kan inchhungah a thlentir ngei ang.

Ke pen thawm ka hriat rualin hmangmawh takin ka let vat a, kawngkhar a hawng thawm ka hre hman mahse min hmu hmanin ka ringlo. Rang zetin pawnlamah chhuakin Taxi ka phar a, kan in address ka sawi a, hmanhmawh turin ka tur sek. Malsawma khan ala thi lo a ti anih kha. Sangpuii anih ka ring nghet hmiah. “Rinsangpui thi suh aw,” ka ti rilru mawlh mawlh a, in ka thlen rual chuan nidang anglo zetin in tifaitu alo kal lo nge a haw tawh kawngkhar a inkalh ṭhap a, chahbi spare ka kawl ve hauhlo tih ka hrechhuak.

In sir lamah chuan ka kal kual a, luhna tur emaw tukverh inkhalh lo tal a awm ka beisei a, mahse a vang phian bawk si. Ka hawikual ruai a, tih dan tur mai ka hrelo, beidawng bawk si chu thingbun lian ve tak awmah chuan ka ṭhu hnawk a, ka thaw nghal hak.

Reilo tê ka ṭhu hnu chuan tho thutin ka ṭhutna chu ka la kang a, Sitting room zawna tukverh chu melh vang vangin Ka thing bung ken chuan ka hlap nghal pawp, darthlalang chah chi alo ni nen a khi ṭhawk ringawt, ka hlap nawn lehna erawh a dawl ta bik lo a ni ang a keh nghal vek a, a them tang chu tifai vak vakin inchhunglamah chuan ka lut ta a. Darthlalang kehna buaipui hman ka nilo, chhaklamah kawngkhar chu ka hawng rawk rawk a, lei awmdan chu ka en a, a thar leh riau tawh. Inchhunglamah lut lehin hmanraw dahna lamah ka kal a, tuboh la in mikhual room thar lamah khan ka lut ta a.

Sangpuii chauh ka ngaihtuah a, ka rilrua awm hmasa leh ka ringhleh apiang tih vek ka duh. Bathroom lam nia ka hriat inkalh tlat chu melhin tala chu tuboh chuan ka chhu bur bur a, chhut chhiat a har phian lehnghal. A chhe mai silo thinrim leh hmangmawh tawh nen na zeta ka chhut leh vak rual chuan tala chu a tla ta hram a, ka lakthlak ruala kawngkhar ka hawng chu, ka rinhleh ruk ni mahse a tak nilo tura ka duh luat vang nge mak tiin ka ding khawng reng ringawt. Inhnuai chhukna tih hriat takin step a awm a, a thim vek avangin engtin nge a awm tih erawh ka hmu thei lo.

Ka phone flashlight ti eng vatin inhnuaiah chuan ka chhuk a, step tawp ber ka thlen rualin light dim zetin a eng bawk, ka hmalam kawngkhar awm chu chiang lo ruai in ka hmu a, Ka phone flashlight nen ṭangkawp in kawngkhar chu ka pan vat a, a inkalh lo na in hawn a har takzet. A sak ṭung a, ka theih tawka na in a hawnna chu ka kuai a, a ri rawk a, tlem te in kawngkhar chu a rawn in hawng a, rim thang nghur rawn chhuak avang chuan ka in rin hma in ka uak nghal tuar. Ka hnar hup chungin kawngkhar chu ka pawt leh vak a, ka lenna tur ka pawt hawng thei ta.

Pindan chhung chu a thim ruih a, bulb awm ve te pawh a eng chang chang a ni mai. Ka flashlight chuan ka en kual a, bang a hmanrua eng eng emaw awm te chu ka hmu pheuh pheuh a, chutia ka enkual lai chuan hmeichhe na tuar leh chau aw zeta rum hak ri ka hriat chuan a awmna nia ka hriatna lam chu ka pan nghal rawk rawk a, ka flashlight in a en phak chin chhuata Sangpuii tlu hlawm reng ka hmuh chuan ṭhu hniam vatin, “Sangpui, nilo thi suh aw,” ti mawlh mawlhin ka theih ang angin ka kaitho a, ka phone ken nen ka tha ringawt chuan dinpui ringawt pawh a harsa lam hret a ni. Din pui tuma ka buaipui lai chuan ka lu a ri chawrh a, engmah ka hre zui tawh lo

Ka harh leh chuan ka chung zawna thil eng tak avang chuan ka mit a vai ruai a. Ka taksa chet ka tum a, ka thei der lo. Ka chunga eng chu a thim zawk a, pindan pum chu a rawn eng nghal uar a, ka awmna hriat tumin ka hawikual a, a hma lawka ka luhna kan inhnuai pindan ruk kha a ni tih ka hre nghal. Chetsawn tuma tal aih aih paha min ṭanpuitu tur ko a ka au chiam chu, “A tawk,” ka aw hriat ṭhan em em in vin ṭhaka a rawn tih chuan ka ngawi nghal hmak, ka taksa chu inzaina dawhkanah phuar beh vek a ni a, ka sir tawn tawn bak ka hmuh theih miau loh avangin, khawilamah nge a awm ka hrelo.

Ka dinglama a ke pen ri ka hriat rualin Amah hmuh tumin ka melh kual a, ka sira a rawn din rual erawh chuan ka au chhuak lo chauh. A kawr hma, a khabe leh a hmui velah thisen a kai luai a, a mitmeng la a sen rum bawk. Ka zawn a rawn thleng chuan, “Malsawmsang, mi mawlnu,” a ti ro hak a, Keiin rap lutukin Ka u chu ka melh thung. “Heng thil te hi hre miah lo tur i ni asin, Nang leh Kha Rinsangpuii khan,” thinrim sehchilh nawk nawka a tih chuan, Sangpuii ka hrechhuak zawk.

“Khawiah nge Sangpuii?” ka ti vin ṭhak a, a nui zui hawk hawk a, a kâ chhung sen luai nen ka thusawi avanga a nui vak vak chuan mi rap lutuk. Ka mumang tam zawk ka hrechhuak nghal uai uai a, Malsawmdawngzuala hian eng thil chiah nge a tih hi? “Rinsangpuii khan a mawl man a tuar tawh.” ti rum ulin ka dawhkan chu a kuai ding lawp a, ka mutna mawnglama inzaina dawhkana Sangpuii nunna nei tawh lo tih hriat taka thisenin a bual zui ka hmuh rual chuan, ka theih tawkin ka au a, ṭanpuitu ka au lo, Sangpuii ka chhan theih loh avanga natna zawk a ni.

“I duhtawkin ṭap rawh, i ṭah zawh hunah nangpawh i thi dawn,” tia inzaina chemte nen chair a aṭhu thla chu ka melh ngawt ngawt a, Nat lutuk avang hian mittui pawh a tla theilo anih hi. “Nga ti Sangpuii kher?” zawi zeta ka tih chuan, min melh ngur a, “Ani khan min enthla a, ka hmeichhe hnuhnung ber tura ka thlan a tlanchhuahpui miau alawm.” atih chuan mak ti zetin ka en a. “Ni e, i mumang mai mai vangin Ani hian min ringhlelin min enthla a, chuvang ania chaw ei kha sawm tura ka tih che. Keiin ka daikhalh a, ka chaw anih theih phah ta anih hi.” a tih leh chuan râp zetin ka melh a, ka mittui a far nghal fap bawk.

“Chaw maw?” ka tih chuan a lu a bu nghut nghut a, a kawr ban hlimin a banbun, ka mumangah pawh ka lo hmuh tawh ngei, keipawhin Amah ka enthlak zuina chhan ngei kha a rawn ti lang va va a. “He thil hi banbun satliah a ni reng reng lo, hmanlaia dawi pakhat anih hi. Doctor ka zir lai khan puithiam pakhatin min pek anih hi.” tiin uluk zet hian a banbun chu a thlek kual a, a nui suk suk a.

“He banbun hian malsawmna tam tak a keng asin, chu malsawmna dawng tur chuan keiin thisena ka thleng a ngai a,” tiin a tho vut a, ka bul lawkah a rawn ding a. “Gynecologist ka ni a, hlawhtling tak ni tur chuan hmeichhe taksa peng ka ei a, hmeichhe thisena ka inthawi a ngai, he banbun hi midangin nei se mihring taksa an mamawh dan a danglam thung ang,” a ti leh a, kei erawh sawi tur reng ka hrelo. Mihring sa ei ṭhin unaupa ka nei a, chumai nilo tualthattu anih pawh inhre lo khawp in puithuna atthlâk in a tibuai chu a ni si a. Mipa zaidam leh mite pawhin fel tia an sawi ṭhin kha a ni asin, mahse vawiin niah chuan Ramhuai ai pawha rapawm leh hlauhawm a ni si a.

“Ka nau duhtak, i hria em he khawvelah hian ka hmangaih awmchhun i ni asin, mahse he ngun hian i thih a ngai a ti miau si a,” a tih chuan a ngun chu ka melh a, “I ngun khan tih tur a hrilh che maw?” mak ti zeta ka tih chuan, “Aw hmeichhia ka mamawh hunah pawh a rawn tir mai zel,” a tih chuan Malsawma hmel chu ka en a, ka na vawng vawng tih bak ka nat dan hi ka sawithiam lo. Ka chhungkaw neihchhun a ni asin, Sangpuii ruang ka en a, chupawh ka tan natna tho a ni. Malsawma hian min ti hlum ve mahse ka tan dam thlakhlelh nachhan tur awmin ka hre tawh lo.

“U, dam ka chak lo, i duh chuan tunah min ti hlum ve thei reng e.” ti sap a, ka mit ka chhin rualin ka mittui a nghal luang ngiai ngiai a, nasa taka ṭah a, awrawl tawpa ṭah chhuah ka chak mahse ka ṭap theilo, ka chau lutuk tawh a ni. Malsawma pen sawn ri ka hriat chuan ka meng a, dawhkan lian vakloa hmanraw chi hrang hrang chu a khawih kual neuh neuh a, a rawn hawichhuak mitmeng chu a dik hlollo, a meng sen rum a, thunun tu eng emaw chu a nei chiang alawm. Ka hriat ṭhin ka unaupa Malsawma kha chuan hetiang hi a ti thei in ka la ring phal chuanglo, mahse ka hmaah a ding a, Malsawma ngei kha a ni si.

“Hmeichhe na tuar au thawm hian min ti hlim asin, Mate” tiin Blade hriam hmel zet chu la kangin ka lam a rawn pan a, ka ban puam lai a rawn zai kak nghal duai a, mahse ka ban a zai na na aiin ka thinlung a nat zawk miau avangin thawm engmah chhuah lovin Malsawma chu ka melh ngar a, engtin nge hetiang tak hian a danglam theih?

Thawm ka chhuah lo avanga thinrim tih hriat zet hian, “Ka nau luhlul zet kha ilo la ni reng anih hi, i au khawp ang,” tiin ka khabe ah na zetin a dawm a, hnai set sawtah min melh khui in ka hmai chu a enkual a, eng nge tih a tum ka hrelo. “Engvangin nge ka hmel ang hi i neih ve?” tia ka khabe a rawn hmer vak chuan ka rum chhuak nghal hak. Ka khabe ruh chu thei ngat se a hmet sawm vek duh ngeiin ka ring.

A dawhkan lamah chuan kal lehin a hmanrua chu a khawih kual den den a, a hma aia lian deuh chemte dang a rawn lek chhuak a, “Malsawmsang, ka hmel ang i nei ve hi i vanduai phah dawn anih hi,” a ti cher cher a, a aw danglam chu chiang takin ka hria, Malsawma ka phirpui kha Amahah hmuh tur a awm tawh lo.

A chemte ken nena ka bul a rawn thlen chuan aw khur dar dar in, ” Eng nge i tih dawn?” ka ti chhuak thei hram. Ka hlau a ni, ka hlau takzet. Hetianga min chhaih kual lo hian min ti hlum nghal mai se ka lawm zawk ang. Ṭanpuitu ka beisei lova, tumah an awm ka ring heklo, heta ka kal tih tumah in an hre miau lova, mahse hetianga ngaisak tawk a thih erawh ka hlau takzet.

“I hmai vun kha ka hik dawn,” a tih rual chuan, “Aih nilo, khawngaihin ti suh,” ka ti nghal chul a, hetiang em em chu ka beisei lo. “I duh chuan min that mai rawh mahse khawngaihin hei chu ti suh,” tiin ka ngen a, ka hlau hmel a hmuh chuan a phur sawt emaw tih turin, a nui huk huk a. Ka mittui bawk a tla leh tawh. Ka unaupa awmdan hi ka nu leh pa te khan hmu ve se na an va ti dawn em. A khawsak dan rapthlak lutuk avanga ka natna pawh hi tawrh har tak a ni tawh si a.

Ka hmai zawna a chemte a lek kang rual chuan khur ru dar darin ka mit ka chhing a, Sangpuii te, ka nu leh pa te leh ka mumang tam tak te kha ka ngaihtuah let zut zut a, min tihnat hlau em em tu, ka chhungkaw neihchhun, ka unaupa kutah ngei nasa taka ngaisak a, tihhlum ka ni tur te ka ngaihtuah thlen chuan ka rilru na lutuk avanga ka awm chhung tawt ut ut chuan tihhlum ka nih hma hauh in ka thawk a tawp riai riai ni mai in ka hria. Silai a puak ri ṭhuai a, ka nghawng thip zawk leh silai ri khawk rum rum te, Bawihi ti ri te, Mipa in hrosa thawm leh tlan khup khup ri te, ṭawng nuai nuai thawm te chu ka mang hriat ruai chauh a ni.

Ka harh leh chuan ka awmna hmun chu ka hre hauh lo, ka lu rit bur avang chuan ka meng tawh chu ka chhing leh vang vang phawt a, ke pen thawm ka hriat rual chuan ka meng nghal kawk, hmeichhe pakhat rawn lut chu chiang zetin ka melh a, mahse ka hmu fiah thei miah lo. Min rawn pan zel a, “Ilo harh tawh maw?” atih ri chu ka hria mahse a hmel ka hmu thei chuanglo. Ka meng vai ruai ringawt a, min biakna te chu chhan ka duh mahse ka hrawkah hian hnawhtu awm ang maiin ka ṭawng chhuak thei bawk silo, ka tal vak a, hmeichhia chuan min rawn dawm vatin, “Hlau suh, engkim a ṭha vek tawh e,” atih chuan tlem chuan ka thla a muang ve deuh. Mahse ngati nge ka ṭawng theih lova, ka mit a fiah miah loh tih erawh ka hrelo.

Mut chhuakin min zem chiai chiai a, ka muhil lehnghal a nih ka ring, ka harh leh chuan ka bulah tumah an awmlo. Bang chu ka melh kual a, a hmaa ka harh a ka khawhmuh fiahlo kha a bo tawh anih ka ring, Banga sana intar te pawh fiah takin ka hmu thei tawh alawm. Ka ban mu churh churh chu chetsawn ka tum a, a na ka hriat rualin chesawn lovin ka puan sin hlimin en ta zawk a. Bandage var in an tuam luk a, thisen chaw min khai bawk.

Ka ban an tuamna ka hmuh rual chuan thil thleng te kha ka ngaihtuah let a, engkim kha mangchhia a ang takzet. Mangchhiaah pawh a rapthlâk ber a ni ngei ang. Malsawma kha engtin nge a awm ang, tia ka ngaihtuah rualin ka nghawng chu khawihin an tuamna chu ka dawm vang vang a. Ka ngaihtuahna kal zel chuan Sangpuii ka ngaihtuah thleng a, ka chhan hman lo leh a ruang em pawh khawih thei lova ka awm kha ka na thar vawng vawng.

Kawngkhar a ri khap a, a inhawn rualin Rengpuia a rawn lut a, ka khum bul a rawn thlen rualin, “Ilo harh a ni maw?” tiin ka samah a chul zeuh a, ka mittui a tling nghal pam a, ṭah loh ka duh mahse engkim chan tu hian ka natna te hi mittui hmang bawkin ka ti lang leh ṭhin si a. “Bawihi engkim a ṭha vek tawh alawm,” a tih ruala ka kuta a hmer vawng vawng chuan ka insut nghal hraih a, ka mittui pawh a luang nghal ngiai ngiai a, ka dang thei nganglo a ni, a na em a ni.

Mutna damdawi pek reng ka nih avangin ka harh rei ngailo, ka nghawng hliam anih avang chuan ka la ṭawng chhuak miah lo bawk. Damdawi In ka awm aṭangin ni li na chiah a ni. Ka ngaihtuahna hmang tak tak theilo a, muthilh tir ka ni reng chu ka ning ve nen ka harh pawh chuan meng duh lovin ka chhing tlat a, Nurse in drip a rawn siam vel te chu ka hre reng mahse ka muhil der anih ber mai chu. Kawngkhar a rawn in hawng a, pen thawm a rawn hnai zel a, ka khum bulah a tawp chat. Rengpuia anih ka ring a, mahse min be hauh lo.

“Hmeichhe khawngaih thlak.” atih chuan, Rengpuia a nilo tih ka hria, ka meng ang nge meng lovang tiin ka inngaihtuah a, ka lukham sir hniam deuh awk avang chuan meng lovin a thusawi tur chu ka nghak tawp. “I unaupa hmel ang i neih vang hrim hrim pawhin Nang hi i dam reng hauh lovang.” atih chuan ka hmul thi a ding nghal ur ur a, hlauhawm hlir hian min hual vel a ni maiin ka hria. Mahse Ani hi tu nge ni ta ang? Malsawma hmel ang ka neih vanga min thah duhtu chu tu nge ni ta ang?

“Ka hmangaih Rinsangpuii phuba hi ka la rawn la ang, I unaupa ka dahṭhat hunah.” atih leh chuan ka khawng awt thei. Ani hi Sangpuii bialpa ruk a ni tihna, mahse a hmel hmu ve turin ka meng ngam tawh bawk silo, a pen sawn a, kawngkhar a khar riah chuan ka meng nghal vat a, ka thaw nghal hawk. A awm chhung zawng khan ka thaw lo in ka hria. A hmel hmuh a, a tawrh ang tho a tuar ve ka nih tal hi hria se ka tih nen, engvanga chhing lui tlat nge ka nih ka hre biklo. Chuan Ani khan Malsawma dahṭhat a sawi a, a awmzia chu Malsawmdawngzuala ala thi lo tihna. Khawiah nge a awm?

Rengpuia a rawn lut a, a hnuangah Rsa pawh a rawn tel ve, “Ilo harh tawh maw?” Rengpuia chuan tiin ka khum bul dawhkanah chuan thei tui leh thil dang a hung nghal mawlh mawlh a, “I ṭhu chhuak duh em?” a tih chuan ka lu ka bu nghat a, Ani pawhin ṭhu turin min pui vat. Rsa chuan lehkha puan leh pen min pek chuan ka melh deuh ha a, “I hrawka chemte hnu avang khan i ṭawng har dawn a, i duh chu hetah hian ziak la, keini emaw nurse te i hrilh zel dawn nia,” a tih chuan ka nui a, a thil min pek chu banin, Malsawma awmna hriat ka duh vangin ziak chuan ka zawt vat a.

Rengpuia chuan a en zawk a, Rsa chu a pe nghal daih. “Tunah chuan damdawiinah a awm ve a, silaia kah ania,” Rsa’n a tih chuan ka lu ka bu nghat a, nga ti nge a thih zawk law law loh le, pawisawilo nunna tam tak la a, a farnu neihchhun, a phirpui pawh min thah hial duhtu hian dam a phu reng em ni? Sangpuii nunna la tu anih vang hrim hrim pawn huat a, thi ve se tih ka duh. Mahse chutianga ka ngaihtuah lai mek pawhin, ka unaupa a ni asin tiin ka ngaihtuahna kil khat aṭang hian ala chhan fo a, ka hmangaihna bo silo hian keimah pawh min inhuat tir anih hi.

Ka mittui a luang ngiai ngiai a, nga ti nge tihhlum ka nih ve loh? Hetiang taka natna ka tawrh ai chuan Ani khan min ti hlum ve mai se, a chungah engpawh thleng se ka hrelo zawk law law tur. “Bawihi i ṭha em? Inngaihtuah vak thei ila nilo ania,” Rengpuia’n ka mittui tla a hmuh chuan a ti vatin min kuah a. “Engkim a ṭha leh dawn alawm, ṭap suh,” ti lehin ka hnungah a chul a, Nurse leh Rsa an rawn lut a, Rsa chhuah lai ka hre miah lo. Nurse chuan injection a siam a, mutna damdawi a ni tih ka hria, ka mamawh ber pawh a ni. Mu ila muhil hlen daih mai ila pawi ka ti hauh lo. Min mut ṭhat tirin, “Ka awmpui reng dawn che ania, muhil rawh,” atih chuan ka mit ka chhing nghal a, Rsa leh Rengpuia titi thawm chu a hla tial tial a, engmah ka hre zui ta lo.

Karkhat zet damdawi Ina ka awm hnu chuan ka aw pawh a chhuak ve thei ṭan tawh a, Rengpuia leh Rsa te’n min vil deuh chawt a, ka rilru kawmna hun pawh ka nei meuh lo. Ka rilru natna tur lam engmah min sawipui ngailo a, pawnlamah eng nge thleng tih la ka hre heklo. Zing hma takah Rsa a rawn kal a, Rengpuia’n zanah min riahpui avangin pawnlamah a chhuak thung a. “Vawiinah i chhuak thei tawh ang an ti a, a lawmawm khawp mai,” nui var vara a tih chuan ka lo nuih let ve a. Rengpuia a awmlo bawk a tiin, “Malsawma ka hmu thei angem?” ka tih chuan min melh vung vung a, ka ngaihtuahna hriat a tum a ni mahna. “Ih, venhimna hnuaiah a awm tlat a,” a tih chuan, “A tawpna turin,” ka ti leh hram, eng nge a ngaihtuah ka hrelo a ngawi vung vung a, min chhang dawn tawh lo emaw tia, ka bungrua ka siam lai chuan, “Hun ka lo zawng ang,” a ti chhuak sup a, ka chhang tawh lo.

Eng chiah hi nge ka ngaihtuah pawh ka tawh hrelo, ka rilru hi a buai nuai nuai ti ila a dik ber ang. Tuna Malsawma ka hmuh duh chhan pawh hi ka hre chuanglo, mahse thil thleng zawng zawng hi a chhan hriat vek ka duh a ni. Kha zan khan a harhfim pawhin ka hrelo, Malsawma ka unaupa kha a danglam miau si a, khatiang mihring kha a ni reng em tih chian ka duh ni ta berin ka hria.

Rengpuia’n tih tur a neih thu sawiin a haw lawk tur thu a sawi a, Rsa a awm ve thung dawn a, ka chhuak tawh dawn a tihfel tur a tam avanga min awmpui tur thu sawi a ni. Rengpuia a chhuak a, Rsa chuan, “Lokal rawh le,” tiin kawngkhar lam a pan nghal a, Cabin pakhat bulah chuan min dinpui in, “Recorder min pe a, Malsawma hian engmah a sawi duh lova, a hma aṭanga biak tir che ka tum tawh, mahse Rpa’n a remti miau silova, i duhthlanna in i be dawn a, engpawh sawi ula hetah hian record ka ka duh a ni,” a tih chuan ka thaw halh a, “Kan pahnih inkar tur a ni a, a pawi tur engpawh a awm anih chuan ka thai bo ang, a inpuanna ka mamawh si a.” atih leh chuan, “Awle,” tiin pindan chhungah chuan ka lut ta a.

9

Damdawiin ka chhuah aṭanga ni thumna chiah a ni. Rengpuia ruahmanna in a inah ka awm ve tawp a, kan Ina let leh kha ka duh lova, tin, quater lama let pawh tun dinhmunah chuan ka duh heklo. Rengpuia min hrilh danin Sangpuii kha a chhungte’n a ruang an rawn la a, ka thlah ve miau loh avangin Rengpuia ruahmanna bawkin tlailamah Lungleia kal tum kan ni a, ka mamawh zual tur siamin Rengpuia lo haw hun ka nghak a. Mahni chauha ka awm chang hian ngaihtuahna ka kawm nasa ṭhin, hetia chhiat kan tawh a, engkim a thlen hnuah phei chuan keimah pawhin ka awmdan hi ka hrethiam lo fo. Ngaihtuahna hman vak vak ka duh lo mahse ka thei meuh silo.

Tunah pawh Malsawma nen kan inbiakna ka ngaihtuah let a, a darah silaia kah a ni a, a kut lehlam khumah an handcuff bawk a, ka hmel a hmuh rualin a mittui hnam sawk chu ka hmu nghal. A bul ka thleng a, ka thinrimna leh natna te chu a bul ka thlen rualin a hunlai ang chiahin keimahah a thar kut hum ruh ngat ngatin, “Sangpuii khan i eng pawi nge a sawi?” ka tih chuan mit khap miah lova min melh in, “I ṭha em?” ka zawhna hrelo ang maia min biakna chuan ka thin a ti rim hlur a, rum taka melh bak tih theih ka nei chuang silo.

A kut an thlunna lam chu a melh vung vung a, min rawn en leh in, “Min hlau viau ang tiraw, mahse engkim ka hrilh ang che. Min ngaidam turin ka phut lo che a, engkim hriat erawh i phu,” a tih chuan ka thinrimna te chu mak tihna in a thlak hlawk a, a khum bula ṭhutna awm chu a mitmei zeuh chuan, tim zet hian a bulah chuan ka ṭhu ta a, “Eng thiamthu mah sawi ka tum lo, mahse i hriat ngei ngei tur thil erawh ka hrilh dawn che.” atih chuan chang lovin ka melh ngar a. “Ka nu leh pate kha accident a thi an nilo,” a tih chuan ka ṭhutna aṭanga ka tho nghal hluai in, “Maw?” ka ti nghek. “Ṭhu rawh,” a ti leh hmuk a, ka hmela zawhna tam tak te hi a chhiar thiam tih ka hria, “Thah an ni, Mizoram ka rawn thlen hma daih tawh khan chu thil chu ka hre tawh a, ka nu leh pate pawh ka hrilh lawk a, mahse accident anga lantirin an that ta a ni.” atih chuan, “Tu te’n?” ka lo ti nghal vat. Engtin nge Malsawma hian hetiang hi a sawi theih. Ka nu leh pate kha thah an ni ang maw? Mahse engvangin nge? Tu te nge that?

“Khatiang zawng zawng ka hriat khan an lakah phuba lak ka tum ta a, mahse doctor satliah ve mai mai khan engti mahin ka hneh thei dawn lo tih ka hriat khan, ka ṭhianpa puihna in puithiam pakhat thlarau sual te hnena inthawi ṭhin hnenah kalin a puihna ka dil ta a ni.” a tih chuan, “I banbun kha?” ka lo ti vat. Ni e, min thah a tum lai khan a banbun in ti tura a tih thu a sawi kha ania, “Hmeichhe pangnga ka thah a ngai a, an taksa peng ṭhenkhat te kha ka ei a, an thisen ka in a ngai ka tih kha. Ka ṭhianpa khan ka buaina a hriat ve bakah harsatna a neih ve avangin kan pahnih in ka rawn haw hma khan hmeichhe pakhat kan that ta a, mahse khami ṭumah kha chuan engmah ka ti ve theilo. Ka hlawhchham niin ka inhre bawk. Mizoram ka rawn haw a, ka thiamna te kha mite hriat a hlawh mai biklo nen, ka ṭhianpa bawk chu ka be leh ta a, Ani chu a hlawhtling tawh in an khuaah pawh a lar tawh hle tih ka hria, keipawhin hlawhtlingna chana phuba lak ka duh miau avangin a vawikhatna atan hmeichhia chu ka kut ngeiin ka that ta a ni. Mihring taksa peng ei a, thisen in kha a harsa ka ti, ka chhia leh ṭha hriatna hian vawi tam tilo tura min duh laiin, ka thinrimna te khan min hneh zel a, a pathumna thleng khan mi thah leh rapthlak taka an taksa ei kha harsa ka la ti. Tichuan kha banbun kha thilpek angin ka dawng ta a, tu min pek nge ka hrelo. Ka hming a rawn thleng anih avang leh a danglam em avangin ka bun ta a, a tirah keimahah engmah a thawk lo, mahse ni hnih ka bunna aṭang khan thisenin ka tui hal ka ti mai, ka nihna hian min phuarlo se langsar leh rapthlak takin chet ka la duh hial ang.” tiin a kun lap a, a thusawi avang chuan ṭawng nachang pawh ka hrelo.

“Ka chetdan rawva tak kha ka ngai pawimawh lova, tin, thi lova an ruang zai ka chakna khan min hneh tlat a, a pali ka thah khan, a nunna la lovin a pum ka zai hawng reng bawk a. Hlau taka an rak thawm khan ka awm a ti nuam veng veng tlat a ni. Thihna kawngkhara nawr liam tu ka ni kha chawimawinaah ka ngai a, ka hriat hauh lovin ramhuai te vobik ka lo ni reng a.” a mittui a far fap a, mipa inla pa ve tak leh ṭap duh ngailo ni ṭhin ka unaupa chu khawngaih hmel zetin ka melh tlawk tlawk ringawt.

“Mahse Fimkhurna ka tlachham ta nge, ka banbun in ka rilrua hna a thawh dan apiang khan chet ka la tawp a, thisenin ka tuihal ta ka ti mai, ka awmdan kha kei ngei pawh hian ka hrethiam lova ka thunun thei heklo. I mumang chungchang kha ka hre thawi ta a, ka farnu satliah nilo ka phirpui i nih miau avangin ka thil ṭhalo tih te chuan nasa takin a nghawng che tih ka hriat khan bansan ka duh a, ka banbunin min hruainaa pawh kal lovin a pindanah ka inkhung asin. Malsawmsangi hi khawvela ka hmangaih neihchhun i ni miau a, tih nat che ka duh ngailo.” a chawl dat a, a thaw leh hak ṭhin, a thiltih sual a te’n an vaw let mek a ni tih ka hailo.

“Mahse, ka dang thei lova, ka thunun thei heklo, tichuan ka bialnu anga i hriat Tebawihi kha thlan a ni leh ta a, Ani khan min lo duh viau bawk nen ka tan chuan chaw tui ber tur a ni. A tawpna tur nia ka ngaihna khan i lakah pawh thiam ka in chan a, a tawpna tur anih hi tiin. Mahse Sangpuii khan engtin nge min ringhleh ka hrelo, min zui ru ta fo a, man chhuah ka nih mai ka hlau bawk nen ka daikhalh ta anih kha. Chaw a rawn ei tlai khan haw lovin Tebawihi nen khan min zui ru leh a, tichuan Tebawihi laka ka tih tum chu ti lovin Ani kha ka man ta a, keimah khan midang an awm ni ta berin ka hria, thah ka duh loh avanga khalai hmuna dama la dah pawh ka ni, mahse ka thunun theih loh min chenchilh tu avang bawkin engkim kha a thleng, Sangpuii laka ka khawsak dan te, i laka ka khawsak dan te kha engkim ka hre vek mahse ka ti tawp thei silo. Ka phirpui kha keimaha awm ve khan a thik tlat a, a chhan pawh nangmah vanga ka tih tur ka hlen chhuah theihloh kha min hriatpui vek si a,” a sawi zo chu a thaw hak a, a rawn hawi chhuah ruala a mittui vanga a mit sen ram chu ka lo melh reng ringawt, sawi tur reng ka hre silova.

“Ka thihna tur lam ka pan dawn a, dan hian min tihlum lo anih pawhin, tu emaw chuan min that dawn tih ka hria.” ti leh in ka kawr iptea ka kut dah luh chu a melh ngar a, ka kut la chhuakin a hmui phun hian, “Off rawh.” a tih chuan ka kâ hau ringawt. Recorder ka keng tih engtin nge a hriat? Ka ipte chu zen leh in a hmuh lai chuan ka off a. “Ka thi emaw ka tang anih pawhin ka pindanah khan i tan thil ka hnutchhiah a, engkim kha tunah chuan i ta a ni tawh. Phuba ka lak theih tak loh erawh ilo la ngei dawn nia.” atih chuan, “Tu lakah?” ka ti chhuak thei hram. “Ka hrelo, mahse fimkhur takin nung ang che.” tiin ka chhuahsan ta kha ania.

“Ka lo haw i hre miah lo,” titu Rengpuia chu ka en chho ha a, alo haw ka hrelo tak tak, ka lo inngaihtuah nasa em a ni. “Eng nge i ngaihtuah?” a ti nghut a, “Eng emaw mai mai,” tiin ka nui lui a, min en chik lutuk chu ka lai ringawt nia. “Dar engzatah nge kan kal dawn?” ka tih chuan a sana a bih vut a, “Ka hman reng tawh i hman chuan.” a tih chuan ka hman thu sawiin kan inzui chhuak ta nghal a. Lunglei kal chu huphurh viau mah ila ka tih ngei ngei tur anih miau avangin a sar hu laia kal a ṭha zawk atih avanga vawiina kal kan ni, min kalpui thei hi ka lawm hle bawk. Mahni chuan ka zuam lo em a ni.

Kawngah thil eiin vawikhat kan chawl tih loh kan ding miah lo, kan ṭawng tam lo dun bawk nen sawi tur kan hre tam lo viau. Tlailamah Lunglei kan lut a, Hotel-a kan thlen ka rin laiin an chhungte inah min thlenpui a, cham rei kan tum lo bawk a, ka hnial bik lo. Thil dang vanga kal kan nih avangin kan intihfai hnuah zanriah kan ei a, lengchhuak turin kan insiam ta nghal a.

Sangpuii te in lan theihna kawngpuiah chuan kan ding dun a, kawng thlanglama awm a ni a, Concrete niin chhawng hnih a ni a, mihrangin an luah lo tih ka hre tawh. A chung berah an upa ber te chhungkua awmin, a dawtah Inpui a awm a, a hnuai ber erawh Sangpuii nau te’n an luah ve a, unau pathum chauh an ni a, Sangpuii hi hmeichhe awmchhun a ni bawk.

Inchhungah chuan kan lut a, inleng neuh neuh te pawh an lo awm ve a, Sangpuii Christmas hmanga a haw ṭumin chawlh ka nei ve thei nen a bulah ka zin ve tawh a, an chhungkua chu ka hre kim ve viau tawh.

A u nupuiin min lo hmuh chuan min lo be vat a, ṭhutna min kawhhmuh nghal vat bawk. Rei kan ṭhut hma in Sangpuii U Dinpuia kan bulah a rawn kal ve a, a titi velah ka damdawi In awm te pawh a hre ve anih hmel, ni e, kan buaina tawh hre tan chuan a tuartu ka ni ve a ni tih kha an hre ve ngei ang mahse chu zawng aia ka awm ti nuamlo a, helai hmuna inthlahrung taka min awmtirtu chu khang thil thleng zawng zawng kha Malsawma ka unaupa tih anih vang a ni.

Rei mawi tawk kan ṭhut hnu chuan a tuk lama thlan kal kan duh thu ka sawi a, Dinpuia chuan min kalpui tur thu a sawi chuan lawmthu sawiin kan chhuak ta a. Pawn kan thlen rualin Rengpuia’n ka kut a rawn kai in, “I ṭha em?” a ti sup a, lu ka bu ngauh, chhan tuma ka kâ ka ang zuau chu, “Malsawmsang,” rawn ti tu avang chuan kan hawi let vat a, Sangpuii nu a ni, “Engtin nge lan pawh ilo lan ngam zawk?” tiin ka hma zawn a rawn thlen rualin ka biang a ri nghal pawp. A thusawi leh a chetdan chuan min ti hrilhhai in chetsawn nachang pawh hre lovin ka ding khawng reng ringawt a. Thinrim tak leh rilru na taka min melh in, “Ka fanu thattu i nih hi,” tia min ban leh mai a tum erawh Rengpuia’n alo dang vat.

Inchhung aṭangin Dinpuia leh Sangpuii pa an lo chhuak a, Sangpuii pa chuan annu chu kai sawn vatin, “Nu-i insum hram hram teh khai,” tiin inchhungah chuan a luh pui a, Dinpuia chuan, “Hrethiam hram rawh u, ala tuarthiam lo ve bawk em a ni, naktukah kan inhmu dawn nia,” tiin inchhunglamah a lut ve nghal daih a, Rengpuia nen chuan ngawirengin kan ding dun a, Sangpuii nu thusawi ngawt kha ka lo ngaihtuah, a fanu thattuah min ngai anih kha. Ni e, kei hi awm lo ila emaw Sangpuii bulah ka mumang zawng zawng kha hrilh lo ni ila vawiin niah hiah Sangpuii hi ala dam tur, ka thiamloh vek a ni.

Min rawn kuah tu awmah chuan ka hmai phumin ka mittui luang chu hruk pawh tum lovin insum zet hian ka inhnit faih faih a, “Ka thiamloh vek a ni.” ka tih chuan ka hnungah a rawn chul nghal hliau hliau a, rei ding tawh lovin kan thlenna kan pan ta a. Engkim kha siam ṭhat theih nise ka ti a, mahse engmah hi ka siam ṭhat theih a ni bawk silo.

Tlailama haw lehnghal mai kan tum avangin thlan kal turin kan insiam a, Dinpuia’n kan thlen inah min rawn sawm a, kan pathumin kan inzui chhuak a, motor-a an titi te chu ka bengah a lut meuh lo. Thlan kan thleng a, Sangpuii thlan zawnah chuan ngawirengin kan ding a, ka ngaihtuahna chuan kan chaw eikhawm zan kha a chhui kir a, thil theih tawh hauh lo tur mah nise theih se, ni ta se tiin ka ngaihtuah let a, dawhkan chunga a ruang ka hmuh laia ka thinlung chhung na ngut ngut te khan min luhchilh leh in ka na thar vawng vawng a. Ṭah hawm hawm ka duh a mahse ka awmah hian hnawhtu awm ang mai hian ka tawt up up a, thlan ko tlangah chuan ka ṭhu thla hnawk a, ka awm chum dat datin kraws intar chunga Rinsangpuii hming leh thlalak vel in tar chu ka melh ngawt ngawt.

“Ṭap rawh,” titu chu en pawh ka en lo, ṭah ka duh alawm mahse min hnawttu avang hian ka ṭap thei miau silova. Kum tam tak chhunga ka hlim ni leh lungngaih ni ka ṭawmpui ṭhin rawng taka thah a, a titu lah ka unaupa ngei a ni si a. Malsawma ka ngaihtuah thleng a, thinrimna in min tuam a, ka haw thar takzet. Ka nu leh pate tan a ti a, mahse nunna hlu takin a tawrh phah ta si a. “Ms,” titu chu mittui kar aṭang chuan ka melh a, “Sangpuii chu ui in ngai viau mah ila intih chhiat nan hmang suh, nang leh zelin i chhiat phah chuan ka nau thihna hian awmzia a nei dawn lo asin.” Dinpuia’n atih chuan, “Ka thiamloh vek a ni,” ka ti zawi sap a. Heng zawng zawng hi mumang vek ni zawk se ka ti takzet mahse a tak ngeia thil thleng vek a ni si a.

(Rengpuia Pov)

Aizawl kan thleng a, Msi awmdan danglam hi ka hailo, nitin hian a danglam tulh tulh ni mai in ka hria, biaka min chhanloh a chingin, a chang chuan hlauh nei ang mai hian a meng buai in a au chiam zel a, a awmdan danglam tial tial hi a thil tawn vang a ni tih ka hria, doctor kan rawn reng a, ka hna pawh thawk hleitheilo in Amah ka buaipui a, Rsa pawh a rawn lang ve fo. Malsawma inpuanna kha min ngaihthlâk tir ve a, mak ka ti, chuan a nu leh pa te chu engvangin nge an thah sak ang, tute that ang?

Msi chhungte chu ka tum vang reng nilovin ka chhui ta a, Durtlang lama an inah pawh midang hriatpui lohvin vawi hnih ngawt ka lut tawh, mahse Malsawmdawngzuala hi mi fimkhur tak a ni tih a hriat, ringhlelh tur lam engmah a dah lang lova, a pindan chhung lah a felfai thlup bawk a, a tualthahna hmun lah chutiang dahna tur reng rêng a awm lo. Nithum chhung Malsawma In leh Office dapin ka buai tawh a, mahse a sawi anga misual hnu emaw a mi zawn te hriat theihna tur engmah ka hmu lo. A nau bumnan leh a nau talin a ngaihdam theihnan a ti mai mai niin ka hre tawh. Beidawn nan tiin Central Jail lamah hmuh turin ka kal ta zawk a.

Ka hmel hmuh a inbeisei lo tih hriat zetin, ” Eng nge hetah i rawn tih?” a ti hmuk a, Ani hian min lawmlo tih ka hria, a nau damdawi ina a awm zan aṭang khan kan kar a fel tawh lo hrim hrim a. “Rinsangpuii kha min enthla tura rawn tirtu kha Nangmah i ni tih Ka nau hian a hre tawh em?” a tih chuan, thinrim zetin ka melh a, a nui nghal suk. “Thihna kawngkhar lam pantirtu i ni tih hi Malsawmsangi hian hre ta se engtin nge a ngaih ang le?” a tih leh chuan, insum hman lovin a kawr awmah ka ṭham a, ka hnek nghal pawp a, leia a tlu tawh hnek leh tuma ka kun chu guard hovin min rawn dawm bet vat a, Malsawma pawh an kaitho nghal a.

“Hetianga chet ila dawn anih chuan hmuh phalsak i ni tawh lovang,” Vengtu zinga miin a tih chuan thaw hawkin, “Min hrethiam rawh u,” tiin ṭhutna awmah chuan ka ṭhu nghal hmuk a, insum tumin boruak ka hip nghal vang vang a, Malsawma a rawn ṭhut leh rual chuan, “Msi hian i thiltih avangin rilru lamah natna a neih phah tih tal hi hre ve phawt la,” ka tih chuan a meng buai nak a, mahse a awmdan a siamrem lehnghal vat.

“I nu leh pate thattu tia i sawi kha thudik a ni em?” ka tih leh chuan, “Dawt a nilo, Detective i ni a, i hrechhuak har lovang,” tiin a tho thut a, an awmna lam panin a kal nghal hmuk, kawngkhar a thlen chuan rawn hawi lehin, “Malsawmsangi chu a ṭhalo viau em?” a tih chuan, ka lu ka bu nghauh a, a mitmengah tawrhna rawn langin, a chal a tuai zeuh a, kawngkharah chuan a lut ta a. A farnu neichhun chu a ngaihtuah tak tak tih ka hre thei.

A inpuanna tam zawk kha a dik ngei pawh ka ring, mahse dan hian khawngaihna nilovin dikna in ro a rel ṭhin zawk si a. Tualthattu a ni miau a, a phutawk hremna pawh a hmu ngei ang. Central jail ka tlawh aṭangin ni hnih a liam leh tawh a, Msi check up turin damdawi in lamah ka kalpui a, psychiatrist doctor thiam takin a enkawl bawk a, a chang chuan pangngai takin a awm ṭhin, mahse a ngaihtuahna leh mangchhia te avangin zan kan mutloh a tam zawk. Karhnih chauh ni mahse a taksa a cher kuang a, a hmel a dang bai bawk a, a rilru pangngai taka a awm hi chuan ka lakah a inthlahrung ṭhin tih ka hria, mahse he hmeichhia hian ka hmangaih a ni tih hi a hrethiam lo a ni.

A hun tawn avang te in engthilah mah nawr ka duhlo a, tin, ka inah a awm avangin ka bialnu anga en aiin ka ṭhian angin ka kawm tam zawk. Hun harsa a paltlang theih nana ṭanpui hi ka tih hmasak ber tur niin ka hre miau a, tunah chuan chu chu a mamawh ber bawk. Doctor-in a en zawh chuan thil eiin Restaurant-ah ka chawlh pui a, vawiin chu a hmel hmuh a nuam riau bawk.

“Rp, i zahawm, mahni bialnu te i inah min chentir ngawt chu a ni sia,” tiin nui sen senin, lai ru zet hian hnuailam a melh daih a, “Khatin ti ziah suh, tihian innei nghal daih ila,” ka tih chuan a nui lai a tawp chat a, a lu a thing a, “Tunah chuan ka theilo,” a ti sap a. A theihloh chhan zawh duh viau mah ila, a buaina vang anih ringin ka zawt duh biklo. “I dam hunah kan innei ang, min hnial miah suh,” tia ka melh ngur chuan, a hmel ngui bar chu danglamin, “Nia, mahse nga ti nge chhungte kan neih miah loh le?” a ti chhuak hlol a, keipawhin ka lo ngaihtuah ve ruk tho a ni.

“I nu leh pa te’n unau an neilo em ni?” ka tih chuan, “Ka hrelo, engmah min hrilh ngailo. Kan naupan lai pawh in Malsawma nen khan kan inkawm tawp a, inleng takngial pawh kan nei ngailo.” a tih chuan a hmel a ngui leh nghal ngiai a, a chhungte chanchin sawi chu tun dinhmunah chuan atan a hrehawm hle ang tih ka hria. Thildang ka sawipui ta daih a. Kan haw kawngah pawh a ṭawng tlem leh tawh hle. In kan thlen chuan ka melh zeuh a, a muhil tih ka hriat chuan tih harh hlau takin ka chhuak a, a ṭhutna kawngkhar hawngin ka pawm chhuak a, a phu uih a, a harh dawn emaw ka tih laiin ka awm nghengin a muhil zui leh mai chu ka nuih suk a.

Khumah muttir in ka chhuahsan a, eirawng ka bawl a, tlailam anih chuan Rsa a rawn lang hlawl. Msi hmel a hmuh loh avang chuan mitmeiin min zawt a, a muthilh thu ka hrilh ve mai bawk. Eirawngbawl min pui pahin, “Msi te chhungkaw chanchin hi khawi aṭang maha hriattur a awm miah lo hi a mak takzet.” a ti chhuak hak a, ni e, durtlang lama an ṭhenawm hnai tak te takngial pawhin an chhungkaw chanchin hriat sawi tur an hre miah lo. A hre hnai berin Doctor an ni tih an hria a, mahse an thawhna takngial pawh an hrechuanglo.

“Ka zawng nasa a, Doctor an nih chuan an thawhna tal hria an awm ang tia ka ngaihven pawhin Dr. Lalsawmpuia leh Dr. Lalliansangi te thawhna hi hriattur a awm miah lo nia. Thil mak tak chu a ni i ti ve em?” Rsa’n a tih leh chuan lu bu nghauh in, “A dik chiah eng ang doctor pawh ni se, thawhna hmun an nei ngei ngei ang, nge ni a damdawi in ngawr ngawr kan en avang hian kan zawng diklo ni ang, Anni hi doctorate degree pek avanga Doctor tih ni zawk ta se,” ka tih chuan Rsa chu a ngawi vung vung a, “Doctorate degree vanga Doctor tih an nih pawhin thawhna hmun an nei ngei ang.” atih chuan, ka chhang tawh lo.

Msi a rawn tho a, eirawng kan bawl a rawn hmuh chuan a nui sen sen a, Rsa chuan a fiam hluk a, mahse thildang a ngaihtuah tih hriat takin a hmel a ngui ngiai a, Rsa bawk a ṭangkai leh tawh. Zanriah kan peih hnu chuan chaw kan ei ta nghal a. Rsa a awm hi chuan kan ri hluai zel a, a nuam phian zel. Ṭhutkhawmna pindanah ṭhu in Tv en pahin kan titi a, kawngkhar kik ri ka hriat rualin ka hawng nghal vat, Ruatpuia hmel ka hmuh chuan mit ko san akin, “Eng nge?” ka ti hu a, “Ka lo leng dawn,” tiin inchhunglamah a lut nghal daih. Min hrilh hmasa lovin ka inah a rawn kal ngai silova, pawimawh a awm anih ringin ka lut ve nghal vat.

Ṭhutkhawmna ka thlen chuan an pathum chuan an lo titi bawrh bawrh a, keipawh an bulah ṭhu in an titi ka zawm ve a, Msi pawh nidang anglo zetin a titi ve bawrh bawrh a, a nui hmelṭha tak ka hmu leh thei hi ka lawm. He hmeichhia hi ka hmangaih a ni. Lalrinzuali ka chan aṭang khan hmeichhe lam ka ngaihsak ta ngai miah lo kha ania, mahse Ani erawh a danglam miau a, ka vawikhat hmuhna aṭangin keimahah danglamna a nei a, ka bialnu a ni tawh a, engtik niah emaw chuan ka ta a ni ve ngei ang.

Dar9:00p.m a ri a, Msi a pindan lamah a kal a, keini erawh kan la ṭhukhawm a, “Eng nge thleng?” Rs’an alo ti vat, Ani hi chu engkimah a nghak theilo a, Msi pawh kha mu har a ti rilru viau tawhin ka ring. “Innei ve mai ula,” Ruatpuia’n a tih chuan ka nui hawk a, ka chhan hma in Rsa bawk chuan, “Eng nge thleng chu sawi mai teh?” ati leh hluk a. Ruatpuia erawh ka chhanna a nghak nge min melh run a, “Nia, hun hi liam leh deuh se, boruak zia hunah kan la ti huk dawn nia,” nui vur vur a ka tih chuan, “In ninawm, i thusawi tur chu sawi vat mai teh, senior tih hi in hriat lutuk,” atih leh chuan Ruatpuia zawk a nui hawk hawk a, Rsa hi a naupang ber a, a dawhtheilo ber bawk. Ruatpuia lah hian a huat tawka fiam lah a thiam, an han inhnial leh bap bap phawt a, ka nuih ka nuih ringawt.

“Email leh phone call, message nen lam engmah a tlang theilo a, eng nge awmzia?” tia Ruatpuia’n min melh chuan, “Keimahah maw?” tiin ka phone ka check nghal vat a, a sawi ang chu engmah a awmlo, ka signal ka check a engkim a ṭha vek bawk si a. “Eng nge a awmzia?” ka ti deuh hu a, Rsa chuan ka phone chu la in settings a enkual a diklo engmah a awm silo, kan ngawi vung vung a, “Hack” kan ti chhuak ṭhawt, mahse engtin nge engtik lai pawha ka hnaiha ka dah a ni si a, ka no leh email hack tur chuan ka engkim an neih a ngai.

“Engpawh nise Sanjay-an min lo bia a, a be tlang theilo che a, email takngial pawh a thawn theih loh che avângin,” a tih leh a, Sanjay-a call anih chuan a pawimawh ang tih ka hria. “Headquaters lama let tura tih i ni awm e, lehkha pawh a rawn thleng vat ang. Be vat tur che a aduh thu che a sawi a, a bak a sawi lo,” a tih chuan ka phone chu ka melh vung vung a, engtin nge hetiang hi a thlen theih?

Rsa phone chu la in Sanjay chu ka call nghal vat a, zan ala tlai lutuk lova hna ala thawh ka ring. A rawn chhan rual chuan thil awmzia ka sawi vat a, Ani pawn ka phone awmdan ka sawi chuan hack anih a ring ve hmiah. Min lo biakna chhan Nitesh Roy an man thu leh, a aia thuneitu an la awm thu a sawi tel bawk a, mahse Nitesh a ngawih tlat thu leh thuneitu zawk a sawi duh loh thu leh, hotu lam aṭanga a tawp kharna nei tura beipui thlak tawh tura an tih thu te a sawi chuan lehkha ka hmuh ruala ka kal nghal tur thu sawiin phone kan dah ta a.

Ka dinhmun ṭhenkhat ka ṭhiante bula ka sawi chuan Rsa alo phur leh hle tawh. Tharum lamah pawh hian a phur thei sia, Central Service lam hi rawn ti ve daih se ka ti ṭhin, mahse Mizoram-a thawh hi atan chuan a hahdamthlak viau bawk si. Vairam anga buaina chinfel tur tih tham awm ve reng heklo, hahdam kawngah chuan kan inhahdam hleih viau mai.

“Msi hi Amaha kalsan chi a ni dawn lova,” ka tih chuan kan ngawi roh roh a, “I chhungte rawn haw tir a chi tawh mai loh em ni?” Ruatpuia’n atih chuan bu nghut nghutin, “Ni e, naktukah chah a, engkim hrilh phawt an ngai a ni. Hmanhmawh lutuk lovin rawn haw se, Msi pawh hrilh ila pawi a ti em lovang chu.” tiin ka rawtna ka sawi a, Anni pawhin Msi an lo buaipui zui ve tur thu leh, ka chhungte himna pawh an kuta dah tura min tiin an haw ta a.

Ka hna lama buaina a awm avanga ka pu te khuaa awm rih an ni a, Rsa leh Ruatpuia te an rintlak a, ka nu leh pa chauh an ni dawn a, Msi a awm tawh dawn bawk a, helam chu ngaihtuah zui ngaiin ka hrelo. Msi pindanah ka lut a, ka pindan bul chiah pindan ruak ka hman tir a, a muhil chu ka en reng a, a sam hnawk niai chu ka hui kiang a, puan sin ṭhat tirin a chalah ka fawp zeuh a, a rawn meng diar diar chu nuih sukin, “Muttui aw,” tia kalsan ka tum chuan ka banah rawn chelhin, “Lo riak ve mai rawh,” nui sen sena a tih chuan sawm nawn ka ngai miah lo. A sirah chuan mu ve in ka kuah a, a nui ri hak a, a sam rimtui tak hnim veng veng chung chuan ka muhil ve nghal a.

Ka mutna ni in a rawn en chuan ka mutna sir chu ka dap a, alo ruak vek tawh. Ka harhchiang a, Msi a tho tawh tih ka hriat chuan ka tho chhuak ve vat a, choka ka luh ruala a eitur siam rimtui zet chuan ka ril a ti ṭam nghal rawih thei. Min hmuh rualin, “Good Morning, Breakfast ka siam peih ṭep,” tiin a ei tur siam a buaipui nghal a. Chair la chhuakin a buai lai chu en in, ka nupui niin ka fate nu se tia ka ngaihtuah chuan mahni in ka nui vur vur a.

“Tho fuh awm ve” tia ka bula tray chawia a rawn kal chu nuih sukin, “Hmuh ṭha ka hmu che a,” ka tih chuan a biang a sen nghal tan tan a, thingpui, chhangthawp, artui kan tih vel a rawn chhawp ṭeuh a, hetiang te chuan chaw kan ei theilo mai ang tih a hlauhawm zawk e. “Thawh i hai ania,” a tih chuan, “Nia, i bula ka riah vang aniang ka mu tui lutuk tlat,” ka tih chuan nui sen sen hian, “Vawiin hna i nei em?” a ti sap a.

Ka hun hman dan tur tlem hrilhin Delhi lama ka let a ngaih thu te ka sawi a, ka nu leh pate chanchin ka hrilh bawk a. Kan ei tur kan ei zawh hnu chuan a seng fel nghal a, a rawn let leh chuan, “Kan inah khan kal an phal angem?” inthlahrung deuha atih chuan eng nge a ngaihtuah hriat tumin ka melh ran a, “Ih ka thawmhnaw bakah ka nu leh pa te thil lak ka duh a,” a ti leh a, “Kalpui i duh em?” ka tih chuan, “Keimahin ka kal thei angem, ka haw dawnah erawh ka lo call ang che,” atih chu, “A ṭha lawm,” tiin an in chahbi ka kawl zawk chu ka pe a, ka pek laia a mak ti hmel kha ka hmu mahse sawifiah kher erawh a ngaiin ka hrelo.

Chaw kan eikham a, Ani Durtlang lamah Taxi in a kal, kei erawh Ruatpuia te Office-ah kalin ka phone buaipui ngai buaipui turin ka chhuak ve nghal a.

10

(MSI POV)

Malsawma thusawi te kha rin duhlo viau mah ila, hriatchian erawh ka duh. Ka nu leh pa te kha doctor ve ve an ni a, mahse medical lam erawh an nilo, scientist an ni a, company lian takah damdawi siam chhuahna hmunah an thawk ṭhin a. Engmah kha chiang taka zawh ka nei ngailo. An hna an bansan hnuah Mizoram lamah awmin keipawh Mizoramah nurse ka zir a, chhungkhat kan neih ka hrelo a, kan chhungkua chauh kha kan ni mai.

Malsawma pindanah lutin, a sawi angin a khum lu lama milem intar chu uluk zetin ka la thla a, mahse a hnung hawnna tur ka hmu hauh lo, ka hresual anih ringin bang te chu ka enchiang leh a, mahse hawn tur engmah a awm lo, Malsawma thusawi tam tak kha a diklo tih ka hriat chuan thaw hakin khumah chuan ka ṭhu a, a thiltih avanga ka tawrhna zawng zawng te hian vawiin ni thlengin ngai min awh tîr theilo a, mangchhia te min kiansan ngai heklo. Ka mu tlemin, ka ei ṭha lova, hetianga awm reng thei ka nilo tih hre mah ila, a harsa hle si a. Ka ṭhiannu ka sûn a, ka unaupa thiltih avangin ka na bawk a, ka tawrh tam tawh teh lul nen ka nu leh pate thih danah thil fello a awm tiin min hrilh leh a, midang tawrh ni ta se engtin nge an tawrh ang? Kei ang hian an chauhpui ve tho angem?

Ka ngaihtuahna te chuan min ti chau zual a, ina ka kal chhan engmah ka hmuh loh avang erawh chuan tlem chuan ka hahdam deuh, a chhanchu ka nu leh pate kha thah an nilo tih tal ka hriat phah a. Ka milem ken chu la kangin tar leh tuma ka inher chu khum tlangah chuan ka inkhawng a, chhuatah chuan ka thlauh keh chuai a, chuti taka awlsama a keh chu mak ti zetin kun hniamin a keh them chu tihfai tumin ka ban a, mahse thlalak ka tihsawn ruala envelope hlai tak ka hmuh chuan la vatin, ka en nghal vat. Malsawma thusawi te kha a dik tih fiahna a ni tih erawh ka hailo chiang hle.

Envelope chu ka hawng a, a chhunga lehkha tam vaklo chu ka enkual a, mak tiin ka meng kawk kawk a ni mai. Ka nu leh pa hna te, Mizorama kan awm dan te, tin, pawisa tam lutuk ka hminga dah anih thu te, passbook leh thlalak pakhat te a ni. Lehkha chu ka ennawn leh ṭhin a, ka tawt up up ni maiin ka hria. Eng ber nge kei hian ka tih ang, heng zawng zawng hi a tak anih chuan ngawirengin ka awm tawp thei dawn em ni?

Thlalak chu ka ennawn leh a, awi har ka ti, ka nu leh pa leh tlangval la naupang tak pathum hlim taka an nuihna thlalak a ni a, mahse mipa pathum te hmai chu pen tui senin thai bial a ni a, chung zawng zawng ai chuan a sir bera ding chu Rengpuia a ni. A hmel ala naupang viau a, mahse a thawmhnaw hak smart tak avang chuan tuna a hna hi a thawk tawh anih ka ring. Mahse ngati nge he thlalakah hian a lan ve a, pen sena thaibial hi anih ve? Chung zawng zawng hre tur chuan Malsawma ka hmuh a ngai a ni.

Ka phone a rawn ri a, Rengpuia call ka hmuh chuan thawk la vang vangin ka chhang a, “Ka hman tawh a,” ka chhan ruala a rawn tih chuan, “Um, keipawh ka hman tawh alawm.” ka ti ve sap. Min rawn hruai tur thu sawiin call a dah ta a. Lehkha leh thil dang chu la vatin ka pindan lamah ka kal a, ka chhuanlam ber ka thawmhnaw ka la lakhawm miau lova. Suitcase lo awm hmasa berah chuan ka thawmhnaw ka hmuh hmasak ang ang chu ka vawm lut hmawk hmawk a, ka lehkha ken zawng zawng te nen chuan dah lutin, Rengpuia rawn thlen hma in, in ka lo kalh fel leh vek a, pawn ṭhutna aṭang chuan ka lo nghak ta a.

A rawn thlen chuan a hlim hmel lutuk chu ka melh reng a, mipa ṭha tak a ni a, ka bialpa anih vang chauh nilo in vawiin ni thlengin ka tan awmin min enkawl a, Ani ka tawng hi vannei ka inti, mahse, thlalak kha. Ka zawt ang nge tihian ngawirengin ka u hna zawh loh hi ka thawk ang? Nidang ang lo zetin Rengpuia a titi luam a, mahse ka ngaihtuahna buai zet avang chuan eng nge a sawi tih ka hrelo ka um e liam mai mai a ni. In kan thleng a, intifai a, muangchanga insiam tura min tih chuan ka meng deuh hu a, eng nge kan tih dawn ka hre miau lova.

“Eng ti turin nge ka insiam dawn?” ka tih chuan min nuih suk a, “Zanriah kan ei chhuak dawn alawm,” atih chuan, “Um nia,” ka ti ve ringawt. Ka pindanah lutin khumah ka ṭhu hnawk a, Malsawma ka hmuh a ngai a ni. Engmah hi ka hrethiam lo, khati zat pawisa leh documents te kha a awmzia ka hriat loh tluk zetin ka nu leh pa thattu te thlalak a dah hi ka hrethiam lo. Keimaha zawn hna thawk tur pawhin bul ṭan dan tal ka hriat a ngai a ni.

Ka intifai a, ka inthlak hnu chuan pawnlamah ka chhuak a, Rengpuia insiam peih âta ṭhutkhawmnaa a ṭhu ka hmuh chuan nuih var varin ka pan a, min hmuh ruala a awmdan chuan min ti hlim veng veng thei. A bul ka thlen rualin ka thawmhnaw inbel chu thlek vutin, “Kawrfual ha ziah rawh, i nalh lutuk,” tiin, a ṭhutna aṭangin a ding nghal vut a, “I inpeih chuan kal ila,” ti zawmin a kut min pe vat a, ka lo chelh ve nghal vat.

Aizawl Khawpawn lamah kan tlan a, khawiah nge min kalpui dawn tih hrelo mah ila, a bula ka awm hi chuan nuam ka ti em em zel anih hi. Kan intawn hmasak ber ka ngaihtuah thleng a, mipa ngeng leh luhlul ve tak niin ka ngai a, mahse ka hrechiang tulh tulh a, min ngaihsakna ringawt pawh ka tan hian a hlu takzet. Mangchhia ten min tibuai in, harsatna te’n min hual vel mahse Lalrengpuia ka kianga a awm chuan engkim hi a ṭha leh vek ṭhin anih hi.

Restaurant kan chawlhna ni ngei tur kan thleng chuan chhuk vatin ka ṭhutna lamah rawn kalin kawngkhâr min hawnsak a, zanin a chetdan danglam lutuk hi mak ka tih rualin min tihlim viau chu a ni sia. Ka chelh theih turin a kut min pe a, nui var varin ka chelh nghal vat. Pawn light dim ruih chuan kan awmna hmun chu a ti romantic hle a, boruak a nuamin, zanriah ei tura kan pahniha kan chhuah dun hmasa ber a ni bawk a, engkim hi a danglam em em vek bawk.

Restaurant chhung chu a thim deuh ruih a, hetiang hmun romantic lutuk, zanriah min kilpui nana a thlang hrim hrim hi Amah nen inhmeh lo ti viau mah ila a nuam hle si a. “A nuam i ti em?” kan ṭhutfel ruala a tih chuan lu bu nghauh in, ka hnunglam darthlalang vek lam chu en in, Aizawl khawpui lang pe un chu ka melh vang vang a, “A nuam, chuan a mawi bawk,” ka ti sap a. Waiter rawn kalin tui in tur a rawn chhawp a, a kalsawn leh rual chuan dawhkana ka kut chu a rawn vuan a, ka en nghal vat.

“Bawihi, i thil tawn tam tak kha i tan theihngilh a har dawn tih ka hria, mahse hmalam pan tur mihring kan ni a, nangpawhin hmalam i pan ve a ngai tih i hria tiraw?” atih chuan, “Um,” tih chiahin ka chhang a, mahse mitthlaah ka hun tawn tam zawk a rawn lang zut zut a, “Hmalam i panna kawngah harsatna leh buaina ila tawng leh ang tih ka hria, hlim ni leh lawmna te nen, Malsawmsang, i hlim emaw i ṭap anih pawhin, i hun hman zawng zawngah tel ve zel ka duh a, i nunah hian tel ve ka duh a ni.” a tih leh chuan mit khap miah lovin ka melh ran a, sawi ve tur ka hrelo. A ṭhutna aṭanga tho in ka hmaah a ṭhingṭhi a, a awmdan zawng zawng chuan min ti hrilhhai in ka kâ hau ringawt.

“I hlimni leh lawmni ah pawh, harsatna leh lungngaihna i tawn chang pawhin i nuna tel ve zel ka duh, ka hmangaih che a, hmangaih reng che ka duh bawk.” tiin a kekawr ipte a zen rawk rawk a, keierawh ka mittui a tling pam a, heng te chu Tv velah chauh ka hmu ṭhin. Tin, Rengpuia mizia leh hetiang ti duh chi nia ka hriatloh na hian ka hlimna piah lamah ka ṭah a ti chhuak tlat. A kekawr ipte aṭanga zungbun bawm nalh zet rawn phawrhin, “Malsawmsang min nei duh angem?” a tih chuan ka mittui ka dang hman lo a, ka hmui hupa in sut hraih in, ka ṭah nuih hawk a, ka kut pe in, “Aw, ka nei ang che,” ka tih rual chuan ka kut chu vuanin min rawn kuah a, keipawn ka kuah let vat.

Light a rawn eng thut a, kut beng thawm a ri nghal a, kan inkuahna phelh a ka hawi chhuak chu, Rsa, Ruatpuia leh Rengpuia chhungte ni ngei tur pali an lo ding a, ka lai leh zak chu ka biang a sa nghal hat hat thei. Rengpuia’n zungbun min bun tir a, kut beng an beng leh a, a nu chu ka bulah rawn kalin ka kut chu en in, “I hming a ri zing bawk a ,a takah ka hmu ta che chu ania, i hmel a ṭha hle mai,” a tih chuan ka nui var var a. Ka chhungte leh Sangpuii awm ve se ka tihna chuan ka ṭah a ti chhuak zual mahse ṭahna hun a nilo tih hria in ka nui lui hram hram a.

Zanriah kan ei a, kan boruak chu a nuam in, Rengpuia chhungte pawh an fel takzet. A nau te pahnih pawhin min ngaina in hostel-a awm an nin thu an sawi ve luam a, Rsa leh Ruatpuia te’n sawi tur an hre bawk a, kan nui kan nui mai.

In kan thleng a, kan pahnih chiahin kan haw tawh lo a nu leh pa leh a nau te pahnih telin kan haw a, Rintei chu a fel hle a, a kum ngaihtuah in a nu leh pa a ngaihsak dan te chu hmuh a nuam ngawih ngawih. Jeremy-a erawh a u ang maia ngawi chawi a ni thung.

Kan haw tlai avangin midang an mu tawh a, Rengpuia nen erawh varanda-ah ṭhu in kan titi a, naktukah Delhi-ah a kal tawh dawn a, ka ngai ve veng veng mai. A rawn haw vela inneih a duh thu te sawi in, a hmela hlimna awm chu hmuh nuam ka ti. “Ka ngai ngawt ang che,” a tih chuan, “Keipawn,” ka ti ve sap a, min en reng chunga min rawn hnaihin min fawp ta vawng vawng a.

Khua a var a, Rintei leh Jeremy-a te class kalin an chhuak a, Rengpuia’n min pui rawh a tih avângin a insiam ka pui a, a nu leh pa erawh Tv enin an inkawm thung. Inbe lovin a thawmhnaw kan siam mawlh mawlh a, ka ngai ve takzet, chelh theih nise chelh ka duh chutih rualin a kal liam huna ka thil tih tur erawh hreh hle mah ila ka tih ngei angai si a.

“Ka rei dawn lo ka tih kha, innei nilo mah ila i him zawk nan hetah hian lo awm tlat rawh aw, ka lo haw hunah erawh engkim a fel tawh ang,” a tih chuan, “Ni e, fimkhur la aw,” ka ti ve bawk a. An hnathawh ṭhin ka hriatpui lova mahse misual tak tak man in an umzui fo ang tih ka ring, dam taka alo haw leh ka duh ber.

Chawhnuah Rsa rawn kalin Airport kan pan a, Rsa titi kan ngaithla a ni deuh mai. Ka ngaihtuahna ka kawm a, thlalak ka ngaihtuah let a, ka nu leh pa thattu ni tur hian ka phal hlawllo, mahse ka unaupa ang tho khan ka hmangaihna vangin ka mitdelin hmuh tur tam tak ka hmuh kan ka hlau tawh bawk si. Ka rilru hah leh tawt lutuk hi sawi thawl ka chak mahse Rinsangpuii ka engkim a engkim ni ṭhin a awm tawh miau silo. Ka rilru chuan, “Sangpui, ka va’n ngai tak che,” a ti vawng vawng a. Motor a ding dat a, ka ngaihtuahna aṭanga harhchhuakin ka mittui tling pam chu ka hru nghal zeuh a, Rengpuia pawh reilo te ah Airport chhungah a lut a, Rsa nena kan haw chuan, harsatna engpawh ka neih chuan hrilh turin min ti a, hetiang taka ṭhian ṭha Rengpuia’n a nei hi ka lawmpui takzet.

Rengpuia chhungte an felin hrehawm ka tih an hlau em em a, zanlam boruak pawh a nuam viau mai. Mu tura kan pindan ṭheuh kan pan hnuah erawh ka lehkha te phawrhin ka enchiang leh a, thlalak bawk chu a ni ka en leh tawh. Engvanga ka nu leh pate nena thla la ho hi nge an nih? Ka nu leh pate hna hi hria in an chhui zui tihna a ni thei angem? Ṭhian anga kawm phawt chumi hnuah an thatzui tihna a ni thei mai angem?

Khua a var a, vawiin lamah Malsawma hmu tura kal ka tum. Tuk ṭhuan ei laia chhuah harh ka tum thu ka sawi chuan, “Ni e, Bawiha lah a awm silova chhuak harh ve rawh.” Rengpuia nu, Nu Kimtei’n a tih chuan an pa pawhin alo thlawp vat a. Kan eikham kan intihfel zawhah ka insiam nghal. Thlalak chu ak in, ka zawhna tam tak ka neih te nen Jail lam panin ka kal ta a. Malsawma hian eng chen chiah nge a hriat tawh tih tal hriat ka duh.

Jail ka thleng a, hmuh dil lah a harsa mahse engtin tin emaw ka sawi kaw thei hram a. Inhmuhna hmunah chuan ka nghak ta a. Duty ho an ri nak nak a, eng thil nge thleng hrechiah lo mah ila, an thusawi danah tang zingah intihlum an awm anih ka ring. An buai nak nak karah chuan duty pakhat hian, “Ka pi vawiinah chuan tumah a hmuh theih lovang, buaina kan tawk a,” tiin min kalsan nghal a. Keipawhin an buaina tak hrelo mah ila, nidanga kal leh mai tumin pawnlamah ka chhuak ta zawk a. Vawiinah hmu lo mah ila naktukah tal ka hmuh ngei ngei a ngai a ni.

Pawn ka thlen ruala Scropio dum rawn ding chu ka hriatchian em em anih avangin Rsa rawn chhuah hun nghakin ka ding tawp a, a rawn chhuah ruala a beisei lo lutuk a min hmuh vang nge a hamhaih ve deuh. “Eng nge i tih?” atih chuan, “Malsawma hmu turin ka kal a, mahse buaina awm avangin ka hmu theilo a,” ka ti ṭha ve mai a, a hmel buai nak chu enin, “Buaina vanga rawn kal chu in ni ang tiraw?” ka tih chuan a lu bu nghutin, “Motor-ah hian lo awm la, kan haw rual dawn nia.” a tih chuan thuawih deuhin ka lut ve nghal a.

Rsa te chu an rei angreng hle a, ka nghah pahin tiin ka phone ka khawih a, Rengpuia message pahnih ka hmuh rual chuan ka hawng nghal vat. A thlen chin a sawina leh I ṭha em? tih a ni. Ka ṭhat thu a chhang in, phone chu ka ak lehnghal a. Rsa leh a rawn hruai constable pakhat te pawh an rawn chhuak tawh a. Motor a rawn luh rualin, “Eng nge thleng a?” ka lo ti vat. A ngawireng a, hma lam a melh ngur a, a awmdan chuan min ti hrilhhai viau bawk.

“Inawkhlum an awm a.” Min chhang dawn tawh lo emaw ka tih hnuah a rawn ti chhuak sup a. “A van pawi,” ka tih rualin kan motor bul lawkah Ambulance a rawn ding a. “Malsawma ania.” atih chuan Rsa chu ka melh nghal zawk. Fiamthu a nilo tih a hmel landan chuan a tichiang a, mahse engvangin nge Malsawma chu a in awhhlum ngawt ang. “Rs,” beidawng hmel zeta ka tih chuan, “A pawi ka ti,” a ti leh sup ringawt.

Jail kawngkhar an rawn hawng a, mitthi ruang an rawn zawn chhuah ka hmuh rualin motor aṭanga chhukin ka tlan phei vat a, ruang an khuhna puan var ka hlim ruala Malsawma nunna nei tawh lo tih hriat taka mu ka hmuh chuan ka hmui hupin, “Malsâwm,” ka ti chhuak sap. A thi tur a nilo asin, tualthattu misual ber pawh ni mahse he khawvela ka chhungkaw neihchhun a ni a, thi tur chuan ka duhlo. Mahse ngati nge a nunna a lak, mahni nunna la duh tur khawpin a thilsual tih te’n a ṭhing em ni.

“Ms, kan kal phawt a ngai ania,” Rsa’n ka hnung aṭanga a rawn tih chuan, Malsawma chu en vawng vawng in a puan var chuan ka khuh leh a, Ambulance-ah chuan an luhpui ta nghal a. Keini pawh Rsa motor-in kan haw ve a, mahse engmah sawi tur ka hrelo. Rsa min biakna pawh engmah ka chhang lo. Ka mumang ka ngaihtuah let leh a, “I tan, kan tan phuba min laksak rawh,” titu te khan Malsawma hi an tibuai zui ta tihna a ni thei angem? Nge ni a, Ani pawh ka nu leh pate ang tho a, thah a ni ve zawk?

Inah min thlah a, Rsa’n chanchin a sawi lai te chuan ngawirengin an bulah ka ṭhu ve tawp. Nu Kimtei’n min khawngaih hmel taka ka pindan lama awm hahdam tura min tih chuan, chhang lovin ka pindan ka pan a, ka rilru buai lutuk avang hian ka â thei hial dawnin ka hria. Buaina a zo a, buaina dangin min tlak leh a, mite’n misual tiin sawi mahse ka unaupa a ni miau si a. A thiltih avanga a inchhir na te kha dawt tiin ka en liam vek thei bik miau silova. Theih nise ṭah hawm hawm ka chak mahse ka tawt up up a, ṭah takngial pawh ka ṭap theilo chu ania.

Malsawma kan vui zo a, mihring kan tam lova awmchhun te pawh an haw nghal vek a. A thiltih rapthlâk tak ngaihtuah chuan ṭhenawm mi tam vak lo, lo kal khawm pawh ka tan chuan an hlu em em si a. Rsa’n jail a luh hmaa a thawmhnaw an kawl te ka kutah min pe a, chung zinga a note bu chu ka chhiar uluk hle a. Phone number ṭhenkhat bakah address ṭhenkhat te a in ziak a. Ka tana ṭangkai tur a tlem viau.

Zanriah kan ei a, Rsa leh Ruatpuia te’n min telpui a, Rintei leh Nu Kimtei te an felin ka rilru hrehawm hlau in min kawm reng bawk a, mahse ka dinhmunah hi chuan Sangpuii bawk ka ngai leh ṭhin. Rengpuia’n pawn kan vui zawh khan min lo bia a, an buai avangin min lo be zawm thei bik lo. Chhun lam kan chauh deuh avangin mut hma an rawt a, Rsa te pawh an awm rei lo. Ka lehkha te chu ka ennawn leh a, thil tam tak zawh tur ka nei asin ti rilru in ka mu meng kar a, ka ngaihtuahna bawk kawma ka mut lai chuan ka phone a rawn ri a, Rengpuia anih ringin ka en nghal vat mahse number hlang chauh a ni.

Ka pick up ruala, “Malsawmsang,” hmeichhe aw tliang fiah zeta rawn titu chu tu nge anih ka hrelo, ka hming bawkin min ko leh a, “Um keimah, Malsawmsangi ka ni e,” ka tih chuan, “I u ṭhiannu ka ni a, i chhungte thattu ka hria, address ka lo thawn ang che, naktukah min lo hmu rawh, chuan kan inbiak hi tumah in an hre tur a nilo” tiin phone a dah ta daih a. Mak ti zeta ka phone ka melh tlawk tlawk lai chuan message tone a rawn ri a, ka hawn chuan “Hotel Plaza, Room No. 112, Dar 10:00a.m” tih a ni. Ka chhang lova, ka message dawn chu ka melh tawp ringawt.

Eng thil chiah hi nge thleng ka hrethiam lova, engvangin nge ka u ṭhiannu anga insawi hian min lo biak ka hrethiam lo. Mahse ka chhungte thattu a hriatthu a sawi a, ka u pawh a tel tihna a ni thei ang. Ka U ṭhianteah Dr. Reuben-a bak hriat ka neilo a, tin, a bialnu Tebawihi kha a ni leh mai. Ani la ka u man anih aṭang khan a reh hmak a, vawiin a ruang niah pawh a rawn lang hauh lo anih kha. He hmeichhia hi ka tan a hlauhawm thei angem?

Malsawma buainaah khan tumah ka hrilh loh avangin ka nunna ka chan ṭhelh a, tunah hian khatiang kha tawng leh ta ila, ka nunna hian a tawrh phah thei tih ka hria, Rengpuia a awm lova, Rsa hi ka hrilh mai dawn em ni ang, mahse tumah in an hre tur a nilo a ti si a, midangin an hria tih a hriat chuan min hmuh duh loh phah thei, tin, ka u a hria a, min ṭanpui tumtu lo ni ta se thudik ka hriatloh phah thei bawk.

Dar 10 rik nan minute nga chiah a awm tawh a, Hotel Plaza reception counter-ah dingin Room 112 a kal ka duh thu ka sawi a, ka zam lutuk vangin ka kut a khur ru dar dar thei. Hmeichhia khan min bum ta se, vawiin niah hian ka nunna chan thei ka ni, mahse ka chhungte chunga thil thleng hriat ka duhna hian a nawrin min nawr a ni ber mai. Pindan kawngkhar thleng Hotel thawktu in min hruai a, kawngkhar kikin a chhung aṭanga ke pen thawm ka hriat awmah chuan a ṭhu nghal a, keipawh a hmazawnah chuan ka ṭhu ve nghal vat.

“I rawn kal chu ka lawm hle mai,” atih chuan, “Ka chhungte i hria a…” ka ti hul hak a, a lu bu nghat ngatin, “Ka hre mai a nilo, i nu leh pate khan min ṭanpui tawh alawm, Vawiin ni a ka la dam ve nachhan pawh hi a ni.” tiin thildang a ngaihtuah tih hriat takin tukverh lam chu a melh nghal daih a, a thusawi leh hun tur chu ngawirengin ka lo nghak tawp.

“I nu leh pate an boral khan, I u kha ka zawng chhuak a, chutih lai chuan I u specialist a zirlai kha a ni.” a tih chuan a thusawi chu ka ngaihtuah a, a sawi dik, keiin nurse hna ka zawm kum anih kha. “Chuan ka u hnênah chuan eng nge i sawi.” ka tih chuan, “I U khan kei ang tho in i nu leh pa hna avangin thah an nih a ring ve a, i nu leh pate’n min ṭanpuina vang liau liau a damchhuak ka nih avangin keipawhin i u chu puih ka duh thu ka sawi a, tichuan thil tam tak kan hmuchhuak ta a ni.” tiin file min pe a. “I u khan dawi hmangin hnehna neih a tum tih hre hma ila, tun ai hian ka lo lang hma ang, Man anih khan ka hre ve chiah. Mizoram ka rawn thleng a, mahse ka hmuh theih hma hauhin heti hi a ni ta si a.” atih leh chuan a file min pek chu ka keu a, Malsawma thlalak min pek mai bakah thlalak hrang hrang a lang ṭeuh a, chung zingah chuan Rengpuia thlalak a tam ber.

“Hei hi,” tia Rengpuia’n mi pakhat bag lian vaklo a pekna thlalak chu ka lek kang a, “Ani kha detective a ni a, Mizo a ni nge nge.” atih chuan, “Ka hria tu nge anih chu, engvangin nge he thlalakah hian a lan ve?” ka ti nghal hluk a, “A tirah chuan rinhlelh te zinga mi a ni a, mahse kha thlalak khan, i nu leh pate thihnaa bul tumtu a ni tih a finfiah. I nu leh pate ngaina awm taka langin hnaih takah a awm a, mahse an thihnaa mawhphurtu ngei a ni.” a tih chuan, sawi tur ka hrelo, Rengpuia erawh ka nu leh pa thattu ah ka ngai theilo.

“I nu leh pate kha vanduai thlak takin tihluihna hmangin Drugs siamna hmunah chhawr an ni a, mi thiam tak an nih avangin hlawh ṭha tak an pe ngei mai, mahse ka hnenah ngei i nu in a sawi ka theihnghilh theih loh chu, kha hmuna thawk tur khan in unau hmang khan an vau bet tlat si a, mahse mak tak chu maw, chu hmun chu tumah in an hrechhuak theilo, a chhan i hria em?” a tih leh chuan ka lu ka thing a, “A chhan chu maw, sorkar milian tak tak leh thil ti thei tak tak, i rin phak bak hian chu hmunah chuan neitu nihna an neih vang a ni. Rengpuia pawh an zinga mi chu a ni.” a tih leh chuan, “A ni thei dawn em ni?” hnukulh ru ṭeuhin ka ti zawi sap a, ka kut a melh zuk chuan, “Kha kha,” tiin a kawk zeuh, ka zungbun chu khawihin, “Ani kha ka pasal hual a ni.” ka tih chuan mak ti hmel zetin min en a, “I u khan a hria em?” a ti nghal zat.

“Malsawma nen khan an inrem vaklo, chuan a hrelo,” ka tih chuan a lu bu nghauh nghauh in, “In thlen thui hma in a hria a, na takin a dang duhlo che anih ka ring.” ti sapin ka kutah a rawn chelh a, “Heng zawng zawng ka hrilh chhan che hi phuba la tura ka duh vang che a sawi ka nilo, mahse i u in a hriat duh em em te ka hrilh hman tak silohah chuan i hnena thudik hrilh mai che ka ni, a chhanchu nangni hian hriat in phu miau a.” Tiin min en reng a, ka thu hriat zawng zawng te hian min ti chau takzet tawh. Dawn sawn dan ka thiam lova, heng zawng zawng hrilh hriat ka nih ve loh avangin ka thinrim thar bawk a, Sangpuii kha awm sela chuan eng emaw tak min ngaihtuah pui thei ngei awm si a.

“I u a buai zual tih a hriat vela, Rinsangpuii enthlak hna thawk tura tirtu kha tu nge i hria em?” a tih chuan, a hma zawng aia mak ka tih zia a hria a ni ngei ang, nui lui sakin, “Lalrengpuia ngei hi a ni asin, i awilo ang tih ka hria, mahse Sangpuii call Records ka neih hi ngaithla teh.” tiin a phone a audio chu a play a, Sangpuii aw ngei a ni, “Rp, ka hlau a ni, min man chhuakin ka hria.” a ti khur dar dar a, “Ka lokal ang, lo enzui zel phawt rawh.” Rengpuia aw ngeiin a tih chuan, ka ṭhutna aṭang chuan ka tla mai dawnin ka hria. Ka lu a hai muai muai a, ka mit a vai vek bawk.

“Ms, harh teh, khatianga chaklo khan i awm theilo ania, hriattur ila ngah lutuk,” tiin ka biang a beng dat dat a, “Eng nge hriat belh tur ka la neih cheu a,” aw tham chal a ka tih chuan, no ah tui thli in min in tir a, ka ṭhutdan siamrem in, Ani pawh a ṭhu ṭha nghal vat a, “Vawiin bak hun ka neilo, engkim ka hrilh che a ngai ania.” atih leh chuan, “Lalrengpuia hian ka hnen aṭangin eng nge a duh?” harsa ti zeta ka zawh chuan, “Pawisa, i nu leh pate khan sum tam tak damdawi siamna hmun aṭang khan an tlanbo pui a, chu chu a rawn umzui a ni.” atih leh chuan Malsawma’n ka hminga pawisa a dahna lehkha leh a zat vel ka ngaihtuah chhuak a, kha pawisa kha a ni thei mai angem, a tam em em si a.

“Chu chauh chu maw?” ka zawhna vang chuan mak ti hmel a pu a, mahse a reilo, “Ka hrelo a bak chu, mahse i nu leh pa thuruk hi hre ve turah an ngai che niin ka hre bawk, nangmah thah tuma veh tu che pawh an awm.” atih chuan, damdawi ina nikhaw hrelo a ka awm laia hmeichhe khawngaih thlak min ti tu kha a ni thei mai angem? Ani khan ka u a thah hunah min thah tur thu a sawi anih kha, Sangpuii tana phuba lak a duh avangin. “Engvangin nge min thah an tum?” ka tih chuan khawngaih hmel takin min en a, “Ka hrelo, ka sawi ang khan in chhungkaw thuruk hre turah che an ngai a ni mahna, pawisa awmna te pawh.” a tih chuan, “Chutiang engmah ka hrelo.” ka ti sap a.

“I hrelo tih ka hria lawm, a chhan chu i u khan i hriat a duhloh zia ka hria, misual angin Malsawma kha i ngai a ni mai thei mahse a hmangaih che a venhim che a duh, Black Magic kan tih hi India ram thingtlang ṭhenkhatah hian an la hmang nasa a, chung vanga Malsawma kha buai a ni, tin, damdawi a ei bawk. Kha damdawi khan a thluak a ti chaklo thei tih vawiin khan Dr. Reuben-a hnen aṭangin ka hria, a sawi danin a Malsawma’n a ei tih a hriat chuan alo addict tawh anih hmel, nangpawn chu chu i zawt thei ang.”

“Tichuan khang thil kha a ti ṭhin i tihna a mi?” Ka zawhna chu chhan har a ti nge a ngawi leh vang vang tawh. “Ka hrelo, engvang berin nge khatiang khan a awm ka hrelo, keichuan I nu leh pa phuba lak kan tum avanga pui mai ka ni a, mahse khatiang lamah khan alo talbuai daih si a.” tiin a mittui tling pam chu a hru zeuh a, Ani pawh hian a sawi anga Malsawma hi a ngaina ve anih chuan a tuar ve em em ang, ka lo zawt thui mah mah a ni mahna.

Ka ding hluai a, “I sawi kim tawh chuan ka kal phawt ange.” tiin a file min pek chu ka en a, “Awle, ka number i neih kha aw, engpawh ti la, i tan ka awm reng a ni tih theihngilh suh ang che.” tiin kawngkhar thleng min thlah a, chhuah ka tum mek lai chuan, “Lawk aw,” tiin a pindan chhunglamah chuan a lut leh a, a thil dahna hai rawk rawkin, Sana danglam zet hi a rawn keng a, “Hei hi i nu khan duhsak taka min leisak a ni a, vanneihna a ti a, tunah hian kei aiin i mamawh in ka hria,” tia pek min tum chu lakloh ka tum zet a, a tih luih tlat avangin ka la a, “Kan inbiak ṭanna vangin i hming min hrilh miah lo,” ka tih chuan a chal dawmin, “Ni tak, Lalrinzuali ka nia, i duhdanin min ko dawn nia,” a tih chuan pindan chu ka chhuahsan ta a.

11

(Rpa Pov)

Delhi ka thlen rualin Malsawma thih thu ka hre nghal a, Rsa’n thil thlen dan kimchang min rawn hrilh hun ka nghak ve tawp, Msi ka ngaihtuah êm avângin let leh rum rum ka duh mahse helamah hna ka nei a, a tawp ka khar ngei a ngai si a. Ka thlen aṭangin Sanjay-an ka hriat tur ṭul engkim a sawi a, chips ka ken leh kenloh min zawt hmasa ber bawk. Mizoramah khan zawh tur tam tak nei mah ila hun kan neih loh êm avangin engvakmah kan sawi zui lo kha a ni a, tunah la ka phone hack a ni a, call ah takngial pawh kan inbe mumal lo. Hack ala ni reng em tih hrelo mah ila, thu pawimawh sawi nan ka hmang ta miah lova.

Airport aṭanga ka Apartment kan panna kawngah phone thar ka lei a, Msi ka bia kha ania. Office kan luh chinah erawh biakna hun ka nei meuh lo. Chips la Office chhunga phawrh ngam a nilo a, kan zingah hian phatsantu an awm tih Sanjay-a khan a sawi miau a, kan hna a sawt lovin, Nitesh Roy inpuanna la bawhzui tur a tam lo viau bawk si. Chuti chung chuan a hma zawng aiin Ram pumah damdawi a hluar a, mihring hmanga sumdawnna la kalpui reng a ni bawk a. Kan hriat theih chinah North-East lamah damdawi thar hi ala lut lo tih mai a ni. Mihring rukbo erawh hmun ṭhenkhatah a thleng ṭan a, mang a ang duh takzet. Mihring hmuh let an tlemin, a tam zawk an ruang hlawm tur takngial pawh a awm lo hian lu a tihai takzet. Khawi ṭanga rawn inṭan nge tih chhui ala ni zel a, mahse hriatchhuah erawh thil harsa tak a ni. State tin a Police station lamah thuchhuah siam in, border lamah pawh a hma zawng aia strick tura thupek a ni a, man awm ve fo mahse a bul erawh hriat ala nilo fo.

Karkhat zet ka awm tawh a, Mizoram ka be khat a, Msi takngial pawh ka be hman meuh lo. Kan hnaah ka buai in, Hotu te hriatpui lovin kan chip min ensak thei tu tur ka zawng ru reng bawk a, ka thil kawl avangin Sanjay-a te chhungkua venhimna hnuaiah an awm a ngai a, tin, ka let leh pawh an hre tawh ngeiin ka ring a, ka tan pawh a hlauhawm theih avangin fimkhur taka chet kan lak a ngai bawk. Ka phone erawh Office lama kan Computer khawih thiam te hnenah ka dah a, Anni in an lo zawng chhuak ve tawh mai ang chu.

Ka chhuahna hmunah hacker hriat ka nei hlauh a, chip chungchang ka sawi khan a phur viau lehnghal, sawi chhuak lo tura vo ti tiha kan inbiak hnuah Sanjay nen bawk kan pan dun ta a, ka thil ken ka entir chuan uluk taka la in, a enkual vel a. “Hetiang hi thil vang tak a ni asin,” tiin a Computer chu khawih mawlh mawlhin kan chip chungchang chu a sawifiah mawlh mawlh bawk a, a Computer a On ṭha a, en a tum chu password a ngai a intih tlat avangin, “I hawng thei angem?” ka tih chuan, “Ka hrelo, ni hnih tal hun ka mamawh ang,” a tih chuan Sanjay nen chuan kan in en a, “Prakash, ka ring tawk che a, i hawn velah min lo be dawn nia,” tia pawisa tam tham ve tak pek ka tum chuan, la duh lovin Investigation ka pui ve na che u alawm a ti tlat a, a lak duh miau loh avangin kal leh tura inti in kan kalsan ta a.

Office chhungah pawh kan inringhlel tawn vek tawh avangin hnathawh a har viau a, tupawh mai chu ka en uluk em em vek a ni mai. Kan office a hotu ber Anil-an min koh chuan ka rualin Sanjay a rawn lut ve a, kan pathum chuan kan hnathawh chin kan sawi ho a, He hna bik hi ka kut ni mahse heti taka a darh avang hian tupawhin an ngaihven a, ṭhenkhat case te nen suihzawm theih tura a awm zel avang pawhin ka thlen hnu pawhin meeting vawi4 ngawt kan nei tawh.

“Rp, Sanjay hian Goa lama kal ṭha a tih thu a sawi a, Goa police station ka be tawh a, in duh hunah in kal thei ang.” Anil-an atih chuan, “Awle, Office chhunglamah boruak kan nei si a, kan zinna tur hi tuman hrelo se a ṭha ang,” ka tih chuan a lu a bu nghut nghut a, “Heti taka ram tibuai tu kan zawn laia phatsantu kan nei hi chu a pawi ngawt mai tiraw.” Aw zawi tak hian a ti sup a, a hmel ka en chian chuan, kan buaina nen a lang upa zual sawtin ka hria. Kan inhrawn rei tawh a, nakum maiah a pension tawh dawn a, a chhuah hma ngeia chingfel tur pawhin min duh hle tih ka hria.

“Ni e Sir, a pawi a ni, mahse kan la man vek ang, a tawp kan thleng ṭep tawh alawm.” ka tih rual chuan, “Anih chip kha in hawng thei ta em?” a tih chuan, Sanjay ka melh zawk a, “Aih mahse Sir engtin nge i hriat?” mak ti zeta melhin ka ti a, “Ama min hlan zawk hi ania,” Sanjay chuan alo ti vat, “Ka neihna min zawt suh thuruk aw, mahse kha thil kha hawng vat ula ka duh, a zawngtu an tam zia in hriat kha, nunna chan la an tam tawh ania.” Anil chuan tiin pawnlam a thlir ta vung vung a, nunna chan an awm ka hre ve hauh lo, tin, a zawngtu an awm hre mah ila engtiang taka pawimawh nge ka hrethiam rih lo a ni.

Office aṭangin kan chhuak a, Sanjay-a nen restaurant pakhatah thil eiin kan chawl a. “Kha thil kha Sir khan a pek dawn che in sawi a nei em?” ka tih chuan, a thingpui in khawlhin, “Um, Nupa in nunna an chan a, ka kut thlentu thah a ni tawh bawk a, tunah hian Rpa emaw nang hi an ringhlel che u tih ka hria, mahse chuti chung chuan kawl ula hawng theitu tur zawng rawh u a ti a, mahse Mizoram-ah khan khatiang buaina kha kan tawkin kei la kah hliam ka lo ni ve lehzel nen khan, engmah kan ti thei dawn a ka hriat loh avangin i rawn let hun kha ka nghak tawp a.” tiin a paratha chu ei in, a thingpui chu a in leh khulh a.

“I phone i chhan loh khan buaina i tawkah ka ngai a, message-ah khan i ṭhat leh ṭhatloh chauh ka lo zawt bawk che, mahse ka ngaihṭha lovin Inspector kha ka lo bia a, ka tisual tam ṭep a ni.” tiin a nui zui huk a. Kei erawhin Nupa nunna chan a tih leh a hnen thlentu atih kha, hriat ka duh. Ka ngaihtuahna chuan Kum thum liam taa Mumbai ka kal ṭuma ka hmelhriat Dr. Johnson-a te nupa ka hrechhuak zawk a, Mizo niin nupa inngeih tak an ni a, a nupui Rebecca erawh hmeichhe ṭawngtlem tak a ni. An fel em avangin ka ngaina hle a, an inah pawh vawi thum ngawt chaw ka ei a. Anni pawn min ngaina ve viau anih kha. Mahse nikhat thil thuah an bo daih a, an ṭhenawm te ka zawh khan kan ramah kan haw dawn an ti an ti mai si a, Mizoram-ah an haw anih ka ring a, mahse a hma zawnga ka hrechhuak lo kha mak ka ti, tin, tunah la engvanga ngaihtuah chhuak ringawt nge ka nih ka hrelo.

“Rp,” ka hmai zawna kut chang ri khepah chuan hawi sawnin, Sanjay-an min melh run tih ka hmuh chuan, “Thil ka ngaihtuah, Prakash kha phone teh,” ka ti nghal zat a. A phone phawrh a, Prakash biak a tum lai chuan ka phone a rawn ri a, ka en chuan number hlang a ni, Hello ka tih ruala, Prakash-a’n hlauthawng leh thaw hlawp hlawp chunga, “Sir min rawn hruai rawh, min um ania,” atih chuan rang taka tho in a awmna ka zawt a, a sawi rualin hmanhmawh zetin Sanjay nen chuan a birukna a sawiah chuan kan kal ta nghal a.

Prakash-a sawina hmun kan thleng a, Amah a rawn inlan mai silo nen kawngsira thingpui dawrah chuan kan ṭhu a, kan melh kual pah reng bawk. Kan piah aṭanga mipa lukhuh rawn kal chu Prakash-a a ni tih ka hria, mahse a kut a rawn vai zeuh avang chuan pan lovin kan ṭhutna aṭang chuan kan lo nghak ta zawk a. Kan bul dawhkanah chuan ṭhu in, thingpui a lam a, a racksack ah chu a ṭhutna bulah a dah bawk a, hmanhmawh angreng taka thil ei in a bag chu a kalsan ta daih a, umzui ka tum chuan Sanjay-an min lo dang vat, “Kal tir rawh a inchingfel thei ang.” a tih chuan a bag chu la in kan motor lam kan pan ta zawk a.

Ka Apartment kan thleng a, bag chu hawng nghal in Laptop chu kan on a, kan thilpek chu alo hawng vek tawh tih hriat takin alo lang zut zut a, an pawl inrelbawl dan hrang hrang te, damdawi siam chhuah dan hrang hrang te, hnathawk leh neitu hming te a in ziak thluah a, tin, thlalak tam tak a awm bawk chung zinga ka mit la tak pakhat chu ka hawng a, Dr.Johnson-a te nupa leh mipa hleitling tak leh pian thiam tak, suit nena induang ap an rawn lang a, chupa hmel chu chik zetin ka en a, Mizo a ang ka ti chuan hmuh tawhna ka neiin ka hre bawk.

Dr. Johnson-a te nupa thlalak chuan damdawi siamna hmunah an thawk tih a nem nghet a, mahse Anni kha chu mi ṭha tak an ni miau si a. Ka ngaihtuah let a, khatih laia damdawi buaipuitu te’n Doctor nupa an um chungchang an sawi ṭum a, Anni kan man anih chuan an hmunpui kan luh chhuah thei tawh ang an tih kha, hemite nupa hi an ni angem? Tin, damdawi siamtu leh mihring hmanga sumdawnna kalpui tu te hi mi thuhmun an thei mai angem?

“Rp, hei lehkha a hnutchiah ania.” Sanjay-a chuan tiin Prakash-a lehkha hnutchhiah chu a chhiar a, “Umzuitu ka nei, ka lehkha hi in hmuh chuan engkim ka Laptop-ah a awm tih in hria ang, mahse in original chip erawh ka la ania.” tih zawng a ni. “Original a lak chuan engtin nge niang?” Sanjay-a’n a tih chuan, “A pawilo, hei engkim a dah vek alawm, an man thut pawh a, a nunna chhan nan a hmang thei ang.” ka tih chuan a lu a bu ve nghut nghut a, Laptop chu ka ensan lehnghal.

Thlalak dang ka hawng zel a, ka hmelhriat awmlo mahse mihring hmel chu ka en uluk thei hle a, damdawi thar thlalak pawh a karah a awm nual bawk. Ka keu zel a, Clinic leh Hospital hming List sei tak chu uluk takin ka en a ṭhenkhat hi chu India ram pawn lama Hospital an ni tih ka hria, mahse engvanga he List hi kawl nge an nih? Ka keu leh a, a tawp bera hmeichhe thlalak lo lang avang chuan ka ding nghal zawk, Sanjay-a’n, “Eng nge?” a rawn tih chuan, thlalak chu ka zoom nghal vat a. Lalrinzuali a ni, Ani hi engvang mahin ka hai ngai dawnlo tih ka in hrechiang. Damdawiin kawrfual a ha a, a hmel a dawldangin a cher hle a, a sam sei hniang ṭhin kha a tawi mat a, a mit khur a tla dak bawk. Thlalak chu ka melh ngawt ngawt a, ka mittui hnam nghal ṭiam ṭiam chu tuai zeuh in, ka thaw hawk a. Lalrinzuali hi ala dam tihna em ni? Mahse engtin nge anih thei? Kum sarih lai liam tawh mahse engtikah mah a hmel leh a landan ka theihnghilh nga dawn lo. Ala dam anih chuan khawiah nge a awm ang?

“Ṭhianpa eng nge thil awmzia?” Sanjay-an hrilhhai hmel lek lek a atih chuan, sawi tuma ka kâ ka ang zuau tawh ka phone a rawn ri a ka nu call ka hmuh chuan ka biak khat zia ka hrechhuak. “Hello,” ka tih ruala, ka nu inhnit faihah chuan, “Eng nge thleng?” ka ti nghal vat a. “Bawiha, Sawmi awmna chin kan hrelo,” tia a inhnit leh faih faih chu ka pa aw ka hre zawm nghal. “Nimin zan khan ka nuam lo deuh emai tiin a mu hma a, zing kan thawh khan ala rawn tho lova, chaw ei dawn thlenga a rawn thawh tak loh avangin a damlo viau anih ringin i nu hi a pindanah a kal a, mahse kawngkhar a inkalh lova, a pindan a lut kha Amah a awm lova, a zing chhuak anih ringin ngaih pawh kan la ti ṭhalo hranlo, mahse nilengin a rawn haw lova, kan be tlang thei bawk silo nen i nu mangangin Rsa te a ko a, kan ngaihven ṭan a, mahse khawiah mah hmuh tur a awm lo a ni. Tunah chuan Ruatpuia ruahman angin FIR kan thehlut a, kan inbuaipui mek a, hrilh loh che ṭhalo in kan hria a.” ka pa in a rawn tih chuan, sawi mai tur hrelo in ka ngawi run a, “Bawiha, ka ṭawng i hria em?” a rawn tih leh takah chuan, “Um ka ngaithla ania.” ka ti nghut.

Ka pa nen kan inbe zo ka tawt lutuk thinrim bawk si chuan ka bula glass no chu ka vawm keh pawp a, Sanjay-an min lo dang vat. “Ṭhianpa eng nge thleng?” a tih chuan, “Min chet khalh, ka nupui hual an ru bo.” ka ti rum ul a, ka nupui hual tia ka sawi lai chuan Lalrinzuali thlalak kha mitthlaah a rawn lang zawk a, nuamlo tih rukna ka nei ngawt bawk. “Office-ah kal ang Sir Anil be rawh.” ka tih chuan, a phone phawrh in call a hmang nghal a. Ka tawt up up tih daih tum chuan chhuar a ka zu dah ṭhat chu la chhuak in, no chanve thli chhuakin ka thawkkhat pawp a.

“Rp, zu in suh ngaihtuahna fim i hman angai nia,” Sanjay-an a rawn tih chuan, thlit leh tuma ka zu bottle ka hum tawh chu ka dah thla riai riai a, Ka phun nghal hluk bawk. Laptop chu la in, kan inzui chhuak a, thil hriatchian a duh tih ka hria mahse ka sawi chak rih tlat lo. Office kan thleng a, tumah be lovin Anil-a room-ah kan lut tlang nghal a, kan hmel a hmuh chuan thil thlen dan min lo zawt vat. Sanjay-an thil thleng a hriat ang ang a sawi laiin kei erawh hmeichhe pahnih te awmna ngaihtuahin ka rilru a buai hle thung. ‘Khawiah nge Malsawmsangi a awm ang tia ka ngaihtuah rualin Lalrinzuali kha ala dam tak tak angem?’ tih ka ngaihtuah telna chuan min ti hah takzet.

“Hei chu,” Anil-a’n a tih hluai chuan an lam ka hawi a, Ani pawn min lo en ve chiah, “Eng nge awmzia, kum sarih lai a liam tawh si a?” tia min zawh letna chu chhan pawh ka tum lo. Ni e, Lalrinzuali kha ka thawhpui te hian an hre ve vek. Hna ka zawm tir khan Rinzuali hi hnathawkin Delhi-ah a awm ve a, Inneih kan sawi avangin haw kan ni a, khatiang khan accident tawngin ka hmuh lai ngeiin silaia kah a ni a, Rajiv pawh a tel ve anih kha, mahse tunah a thlalak ka hmu a, kum7 hmalama mi kha chu a ni hauh silo.

“I nupui hual chu engtia bo nge?” Anil bawk chuan atih zawm a, “Ka hrelo,” tih chauhin ka chhang. Kan pathum chuan kan ngawi reng a, ka bo ang tho hian Anni pawh hian a ngaihna an hre bik lo tih ka hria.

“Mizoram aṭanga chhui zui i duh chuan Goa lam chu midang ka kal tir thei ania.” Anil-an atih chuan Sanjay zawk chuan lo chhang vatin, “Sir keimah nen kan kal ang.” alo ti vat a, Mihring hmanga sumdawnna lam pawh buaipui zui turin mi pathum a tih belh a, “Sir evidence kan nei vek tawh a, List a awm ho hi man tawh mai ila?” Sanjay-an a tih chuan, “Ni rih love, hei aia prove ṭha nei phawt ang u, Case chhui zawm theih zawng zawng zawm khawmin, Police Station Incharge ṭeuh te pawh kan be bawk a nga, kan en ho dawn nia, nangni erawh in hna thawk rawh u,” tiin ka darah a hmer vawng vawng a, office chu kan chhuahsan ta a.

Patner ka nei fel bawk a, thlawhna ticket a buaipui nghal zung zung a, keierawh ka inah ka awm tawp. Ka ngaihtuahna a kal hla theilo hrim hrim te chuan ka thin a tirim hlur a, Lalrinzuali ka lo la hmangaih zia ka hrechhuak thar a, chutih ruala keimaha innghat Malsawmsangi, ka nupui hual ni mek bo in min tibuai hle bawk a. Ka thinrim tihngaihna hre silo chuan zu bawk ka in leh a, rui khawpa in erawh ka tum hauh lo. Tu chiah nge heng thil zawng zawng ti tu hi ni ang le?

Khua a thim ṭan tawh a, Sanjay-a ala rawn let loh avangin chahbi la chhuakin Jail lamah ka inkhalh chhuak a, Jail ka thleng a, dan pangngai in duty hnenah ka batch hmuh in Nitesh Roy hmuh ka duh thu ka sawi a, duty chuan ka zu rim a hria tih hriat takin min melh zuk zuk a, warden a phone lai te chuan ka dawhthei hlawllo ka tei sek a, a che muang lutuk chu hauh hrep mai ka duh hial. Warden a rawn chhuak a, thil awmzia min zawh chuan, Emergency thil avanga Nitesh Roy hmu duh ka nih thu ka sawi chuan, min luh tir ve ta hram.

Inhmuhna pindana min hruai hnu in, min chhuahsan a, Nitesh-an ka hmel a hmuh rual chuan a hmel a pha nghal dai a, a chhan pawh a hmaa ka lo sawisak tawhna ala theihngilh bik miau dawn lova. Ka hmaa a rawn ṭhut rualin, “Zawhna ka zawt dawn che a, diktakin min chhang ang che.” ka tih chuan, a lu a bu nghut a, ka phone phawrhin Rinzuali thlalak chu a hmuh theih turin ka tilang a, “I hre ngai em?” ka tih chuan en zawkin, “Aih” a tih nghut a, a kawr awmah ṭhamin, “Chiang takin en la, min chhang rawh.” ka tih chuan hlauh hmel zet hian thlalak chu a en a, “Aw, ka hriatchinah chuan mi anglo ang maiin a awm ṭhin a, chuan Doctor ṭhenkhat ten an enkawl a.” atih chuan, ka ṭhut dan siam remin, “Khawi hmunah?” ka ti hmuk.

“Ka hriat hnuhnung ber chuan Panaji-ah, mahse a hnua ka kal leh chuan ka hmu tawh lo.” atih chuan, “Tu nge heng zawng zawng a thuneitu ber hi?” ka tih chuan a chil a lem khulh a, “Sir, ka sawi loh pawhin ka nunna a derthawng a, ka sawi anih phei chuan thi sa ang ka ni.” a ti lawi rat a, ” I sawiloh pawhin he jail chungah ngei hian thi sa ang tho i ni.” ka ti let hmak, a thlanfim bawl ṭak ṭak te chu ka hmuh hmaih lo, mahse midangin an dawp chhuah theihloh hi keiin ka zawt chhuak ngei ang. “Ka rawn kal hmasak kha chuan ṭhian ka hruai a, engmah ka ti theilo anih kha, mahse tunah chuan keimahin ka rawn kal a, i thihna tur thangkam duh mi ka ni tih i hria, ni lawm ni? Tharum ka ngaina tih i hriat kha.” nui lui suka ka tih chuan, melh pawh min melh ṭha ngam tawh meuh lo.

“I sawi dawn nge, i tan pui te kutah zanin hian i thi nghal dawn?” ka tih leh chuan, “Engtiang pawn awm ila thihna chu ka chungah a thleng tho ang.” ati zawi sup a, “Ron, a hming tak chu Roney a ni. Ron tiin kan ko mai zel, thlahpawlh a ni a, Anu hi Northeast lam mi a ni. Hmun hrang hrangah a awm kual reng a, chuvang chuan a awmna tak erawh ka sawi theilo. Tin, keipawhin phone a ka biak tih loh vawikhat chauh ka la hmu.” atih chuan ka phone chu khawi kual leh in thlalak ka neih chu ka entir a, “Hepa hi a ni em?” tia Dr.Johnson-a te nena an thlalak chu ka entir a, a lu a bu nghut a. Kan inbiakna a zawh hnu chuan warden hnenah chuan en bik turin leh ka hmuh avanga a nunna a derthawng thu hrilhin Jail chu ka chhuahsan ta nghal a.

In ka thlen leh meuh chuan dar11 alo ri fel der tawh, Sanjay-an ka in chahbi a kawl ve avangin inah alo awm tawh a, ṭhutthlêngseia alo muthlu ka hmuh chuan a bulah kalin khuma insawn turin ka ti a, a rawn thawh rual chuan, “Ka ril a ṭam tawh lutuk,” a ti nghal zat. Chhuna thil kan ei bak engmah kan la eilo tih ka hrechhuak ve chiah. Chaw alo Order sa chu dai dupin tui ti vak lovin kan ei dun a, ril alo ṭam ve deuh tawh nen a ei theih ve phian mai. Kan puar hnuin mikhual pindan lamah mu turin a kal a, keipawh ka pindanah ka lut ve nghal. Mahse muthilh erawh a har takzet.

Zingkar news Sanjay-an a ngaithla a, keiin ka in enkawltu hnenah ka zin tur thu hrilhin thil ṭul ka sawi mek lai chuan Sanjay-an, “Rp rawn kal teh,” a rawn tih hluai chuan ṭhutkhawmna lamah ka kal a, ruang chhar anih thu Tv lama an puan mek chu kan en duh a, Prakash-a a ni tih kan hria, a in sawifiah zo lo tihna a ni. “Nimin khan lo umzui ila a thi kher lovang,” ka ti chhuak sap a, “Nilo, kan nunna hi kan thu a nilo, kan thih hun tur pawh ruat lawk vek a ni.” Sanjay-an atih chuan ka rum nghut ringawt.

Pawisawilo ka hnuk lut a, keimah vangin a nunna hial a chan a ni si a. “Case IO i hre tawh em?” ka tih chuan, “Um, thil ei ila kan kal dawn nia,” tiin choka a pan nulh a. A sawi fo ṭhin, ‘rilṭâm in hnathawk suh, rilru a fim theilo’ a ti ziah a. A hun thlap thlapah ei tur a lam a, rilṭam tuar theilo ber a ni ve hialin ka hria. Kan ei tur kan ei zo a, ka insiam laiin Ani a chhuak a, insiam turin a haw dawn tih ka hria, insiam chungin Rsa ka bia a, thu thar a awm leh awmloh ka zawt a, mahse eng thu thar mah hriat an la neilo, ka haw tur thu hrilhin phone ka dah a, pawn ka thlen rualin Sanjay pawh a rawn thleng leh tawh.

Police Station kan thlen rualin, Prakash-a ruang chungchanga zawhna kan neih ang ang te kan zawh chuan, A kuta lehkha them ken police in evidence atana an lak chu min entir a, “HELL” (Hremhmun) tih a ni, mahse a awmzia ka hriatloh tluk zetin Sanjay pawh hian a hre biklo tih ka hria. Police te nena kan inbiak zawh chuan station chhuahsanin report pe turin Office lamah kan let a. Kan thu hriat kan sawi chuan Anil chu a ngawi ngul a, eng emaw ngaihtuah a nei tih ka hria. Pawnlamah chhuak vutin case lo awm tawh kan chhinchiahna file chhuar chu hawngin a keu mawlh mawlh a, file pakhat la chhuak in, “Hei hi lo en rawh, in lo thawh ve hma Kum15 lai liam tawh buaina a ni. Tun buaina nen hian inzawmna an nei mai thei,” tiin file chu min pe a.

Sanjay nen kan dawhkana file kan en chu thil tam tak ka hre thar. Kum 15 liam ta khan ‘Project Hell’ tih hmang hian ruihtheih thil tam tak siam chhuah alo ni tawh a, inthahna a thlen tam phah hle bawk a, chung thil zawng zawng chu zirlai ka nih laia thil thleng a ni. Chûng mite chu a tam thei ang ber man an ni a, Project a hotu ber pawh man a ni. Thuthang a tam in, a chhungte khan bail emaw a natna chhuanlama tan tir loh an tum tih te pawh tlangkamah ka hre ve a, ka ngaihtuah zui ve fo bawk anih kha. An hotupa ber Rakesh Mukherjee erawh a tang ta tho a, tichuan kum 15 hnuah an rawn thar thawh leh ta tihna a ni thei mai angem? Anni tih hi ni ta se, mihring hmanga sumdawnna ka buaipui mek leh ka nunna derthawnga siamtu te hi mi thuhmun an ni angem?
Nitesh khan Ron hming kha min hrilh a, Ani chu tu nge ni ta ang? Doctor tam tak ruai a damdawi siam chhuak tu nge mihring hmanga sumdawng ṭhin. Nitesh kha chu chutiang hmanga sumdawnna an kalpui avanga manchhuah a ni ngei a, chuti anih chuan mihring hmanga sumdawng mi a ni ngei ang. Lo ni ta se, Dr. Johnson-a te nupa kha chulai hmunah chuan tihluihna emaw an duhthlanna ngeia thawk ni ta se, talchhuah an tum vanga umzui in an that zui tihna em ni? Nge ni a he thuruk ru chhuak tu hi an ni zawk?

Ram chhungah mihring hmanga sumdawnna a lar em em a, a bikin South India-ah mi tam tak man an ni in, tualthahna a thleng tam in, insuamna a thleng reng a, tin, chung zawng zawng a thlen rualin ruihhlo thar chi hrang hrang an siam chhuak a, vawikhata thleng vek atan leh ram pakhat tawrh atan chuan a rapthlak mah mah a ni. Nasa taka beiin, kan umzui a, mahse silaia hliam ka ni a, umzuitu ka nei lehzel nen Mizoram lama haw tir ka ni a, mahse kan ram thlenga min umzui avang leh heta kan hna ka chinfel zawhloh zo turin tunah koh ka ni leh a, mahse Msi a bo a, tin, Rinzuali ala dam niin ka hre leh a, engkim hi a buai nuai anih hi. Msi bo hian chhan a nei ngeiin ka ring a, tin, Rinzuali pawh a tak ngeia hmuh ka duh takzet, ruang kha tu ruang nge ni ta ang tih tal hriat ka duh.

Mizoram kan thleng a, Rsa’n min lo hmuak a, kalkawngah Rinpuii chungchang ka hrilh ve a, Amah hre ve lo mahse ka lusun laia ka chhar ka ṭhian a ni a, a chungchang erawh a hre ve vek a. Rinpuii ala dam nia a hriat chuan sawi tur a hre bik lo tih hriat takin a ngawi vung vung a. Kan in kawt kan thlen chuan, “Engtin nge hma lak i tum?” a ti vut, “Ka hrelo” ti mawl tawpin motor aṭangin ka chhuak a, inchhung ka lut a, ka nu in hnukulh ṭeuhin min kuah a, ka chhungte tan pawh hian a hrilhhai thlak hle in ka ring. Ka nupui tur atana ka duh hetianga an bo leh harsatna an tawk zel hi, hriatthiam pawh a har ngawtin ka ring.

Kan hahdam hnu chuan, kan pathum chuan chhuah lehnghal mai kan tum a, ka pa chuan ka dara dawm meuh hian, “Ka monu tur chu lo zawng hmu ngei ngei ang che aw.” atih chuan ka lu ka bu nghut a kan chhuak ta nghal a. Durtlanga Msi te ina kal ka rawt a, chahbi pakhat kha Msi pe tawh mah ila a spare ka la neih avangin kan luh theih mai ka ring.

In leh a vel chu tlawhtu a nei em tiin uluk takin kan enkual a, a chhunglama kan luh chuan inchhung bungrua te chu an chhuahsan ang angin ala awm a, pindan lamah kan lut kual a, pindan lian bera ka luh chuan mipa room tih a hriat hliah hliah. Malsawma pindan anih ringin a lehkhabu bawm te chu uluk takin ka enkual a, zawn em em neilo mah ila, he in aṭang hian thil eng emaw tal hmuh ka inbeisei miau si a.

A lehkhabu hrang hrang ka enkual lai chuan lehkhabu pakhat aṭang hian lehkha phek a rawn tla chhuak hlawl a, ka hawn chuan malsawma ṭawngkam, “Thihna Kawngkhar” tih kha alo in ziak kulh a, lehkhabu chu ka keu leh a, Passbook lo awm chu ka keu a, pawisa tam tak Malsawmsangi hminga awm chu ka en tawp. Mizo te ah Millionaire tia inchhal ngam tumah an awm ka hrelo, mahse Malsawmsangi erawh a pawisa neih zat ka en hian Millionaire chu a ni reng si a. He thil hi a hre ve angem le?

Thildang ka enkual zel a, hmuh erawh ka nei em em lo. Police case a kal lai khan heng thil te hi an hmu miah lo em ni? Nge an hmuh hmaih zawk. Miin hre ta se, a sum neih avang ringawt pawh hian buaina a tawk thei ngei ang. Heng zozai hi Malsawmsangi pawisa khawl a nilo tih ka hria, Malsawma thawhchhuah ti dawn ila a tam mah mah a ni. A nu leh pate kha doctor tho an ni tak, car accident in an thi tih Rsa khan a sawi tawh. Chutiang pawh nise hetiang zat a tam pawisa nei tur chuan eng emaw tal an tih a ngai ngei ang.

Ka ngaihtuahna hmanga ni thei ka dap lai mek chuan Rsa a rawn lut a, “Ruatpuia’n min lo call a, airport CCTV footage-ah Msi an hmu a nih hmel.” a rawn tih chuan passbook chu la in, kan inzui chhuak ta nghal a. Ruatpuia Office kan thleng a, CCTV footage kan en chuan Msi a lang zeuh zeuh a, rukbo nge anih a mahni duhthlanna a kalbo ka hrethiam ta hauh lo. A hnaihah tumah an awm lova, tin, a awmdanah hlauthawng angin a awm hauh lo bawk. Vo a ni zawk em ni ang? Chutiang anih ngat chuan kan buaina nen hian a inzawm ngei ang.

“Eng nge thil awmzia hi?” Rsa chuan a ti hluai a, Sanjay leh Ruatpuia erawh in ka ngaihdan ang tho an nei, a phenah vo tu a nei an ring ve tho? Kan buaina nen hian inzawm ta se, Roney hian min hria tihna a ni. Keipawhin a takah hmu lo mah ila a thlalak tal ka nei tawh alawm. Call ka dawn rualin ka phone ka en vat a Anil-a a ni. Ka pick up rualin thlalaka Dr. Johnson-a te nupa chanchin leh chip ru chhuak a, midang hnena pe a, a hnen thleng anih dan te, umzui an nih avanga Mizoram lama haw an nih te, Mizoram an awm hnua Car accident anga langa thi an nih thu te a rawn sawi chuan hrehawm ka ti ru veng veng. Anni nupa kha ka ngaina tak tak a, an thih thu takngial pawh ka hrelo chu ka inthiamlo takzet.

Call ka hman zawh chuan Ruatpuia telin Airport lamah kan kal nghal a, thil harsa tak ni mahse Msi kalna kan hre duh miau a, Ruatpuia zarah kan hre ta chiah bawk. Airport pawnah kan ding a, “Goa kal kan tum tho alawm.” atih rualin, “Chawlh la in inrualin langlo lamah hna ka lo thawk ve ang.” Rsa’n a tih chuan ka nui huk a, mahse a hmel thutak zet avang chuan, “I tak tak a mi?” ti supin, kalsan mai ka tum chu, “Aw ka ti tak tak,” tiin min rawn kalpel hmak a.

12

(RENGPUIA POV)

Goa kan thleng a, Rsa pawh chawlh la in kan bulah a rawn kal ve a, hetiang taka ṭhian ṭha ka nei hi ka lawm a ni. Kan thawhpui te dang nen pawh kan inbe pawp reng a, kan hna buaipui a hautakin keini chuan Malsawmsangi leh Lalrinzuali kan zawng ru reng a, Panaji kan awm hnu phei chuan Rsa pawh nitin a chhuak a, mahse kan kal ho ngailo. Misual hnu chhui a awlsam lovin, ringhlelh mai nilo, thlalak tam tak kan neih tawh avâng erawh chuan kan hnathawh a ti awlsam viau a, chutih rualin an awmna hmun kan dap apiangin buaina kan tawk a, a chang leh an lo awmlo hman leh ṭhin.

“Sanjay keini chu kan nilo chiang a, Anih chuan lehlam te hi an ni thei mai angem?” Beidawng lek lek a tiin, damdawi an dahna hmun nia kan hriat, mahse kan thlen hnua hmun ruak vek si chu ka melh kual a, Sanjay-a chuan min chhang lo, police kan hruai nual bawk a, anni pawh an hawihai tih hriat takin an phun mar mar a. He hmunah hian karkhat lai kan awm tawh a, Malsawmsangi leh Lalrinzuali ngawr ngawr kan buaipui thei miau lova, Rsa a awm ve erawh ka tan vanneihna a ni thung. Ani in a ni telin a zawng reng a, keini in kan hna kan thawh theih phah a.

Beidawng zeta kan awm lai chuan khuh thawm a rawn ri kharh kharh a, a khuh zawi em avangin midang chu thawm neilo turin ka kut ka vai nghal zauh a, kan reh nghal ṭhap. Khuh kharh kharh thawm awmna lam chu ka pan ṭham ṭhâm a, rangva hlai zet bang hrula an dah chu ka la kang a, naupang bal zet, tawnzau uk khak ve tak ha chauh hmel taka ṭhu ka hmuh rual chuan kun hniam vatin, “Bawiha ngati nge hetah i awm?” ka tih chuan, mitmeng dul ruiha min melhin, “Ka ril a ṭam a ti sap a,” a awn riai riai chu dawm vatin, midang chu Ambulance ko nghal turin ka ti a, nikhua a hrelo chu a ni nghal der mai. Pawm kang vatin pawnlamah ka chhuahpui a, a dinhmun chiah hrelo mah ila a thawk dan diklo chu hrethiam in Ambulance pawh nghak hman lovin police motor kan ken chuan kan in phur chhuak ta nghal a.

Damdawiin kan thleng a, min lo buaipui vat a, an en chhungin Anil ka call a, “Sir, kan zingah hian enthlatu kan nei, mahse tu ber nge ka la hrelo,” ka tih chuan a thaw ri hawk a, “Um, helamah thu a put tawhlo kan lo tia, helam aṭangin team dang a rukin kan rawn tir lut dawn a, documents kan neih te kha ka pe ngam tawh ang, in hna pawh a sawt tawh ang.” a tih chuan, “Rinhleh i nei em ni?” ka ti nghal vat, “An pathum zingah khan tu emaw ber an ni ang, a tirah ka hrilh loh che avângin min hrethiam dawn nia, ka ringtawk che a, i hriatchhuah vat ka beisei reng a ni.” a tih chuan, “Awle,” tiin call kan dah a. Doctor te pawh an lo chhuak ve chiah bawk.

Chanchin kan lo zawt thuai a, “A kal pakhat lakchhuah a ni a, eng emaw vangin an tihlum lo anih ka ring, a bak a taksa peng a kim vek e, ei tur mumal pek a nihloh vangin a chau anih khi, a harhchhuak vat mai ang.” Doctor-in a tih chuan, Sanjay chuan, “Kan information a diklo em ni? Helam te chu Ajay-a te khawih tur a ni si a,” a tih chhuak hlawl a, keipawn chu chu ka lo ngaihtuah mek a ni. Sanjay-a pawh ka chhang lo, mahse eng emaw fello chu a awm ngei alawm. Damdawiin kan chhuahsan a, kan kalpui Police te nen police station-ah kan inhmu khawm a, “Lehlam hna engtin nge kan kutah a luh theih? Keini chuan damdawi kan dap si a,” Sanjay chuan tiin Inspector chu a melh kulh a, enthlatu kan dah a, Ani kha phone number pe in kan kalsan anih kha. Tin, Ajay-a te lam pawhin kan tih ang tho hian an ti dawn tih ka hria, a chhan chu helai hmunah chuan rinhleh kan neih chuan civil mi pawisa pe a, kan tih tir dan fo a ni tlat.

“Sanjay enthlatu kan dah kha,” ti chhuak hlukin ka ding vut a, Ani khan he thil hi a sawifiah thei ngei ang. Station chhuahsan ka tum lai chuan, rinloh deuhin Ajay leh midang chuan Mi pali ngawt Station-ah an rawn nawr lut nawk nawk a, Ajay-a hmela lawmlohna chu chiang takin ka hmu thei. Thil awmzia a fiah ta kuar mai. Enthlatua kan dah kha mi in ang a ni a, Ani khan information min pek thleng palh tihna a ni, tichuan keini in kan hna kan hrilh ve miau loh avangin damdawi kan man tur ngei zawk chu an va man ta a, tichuan an lam ngei in engmah in rinlawkna awm miah lova an man chu kan zinga enthlatu tan a pawi thei khawp ang. Keini lam erawh an kalna tur nia a hriat zawk anih avangin alo hrilh lawk a, an lo bo hman vek tihna a ni. Mahse tu ber hi nge Anni lam chu ni ta ang? Ajay-a hmel hlimlo lutuk kha eng nge a chhan ni ang? Midang pahinh te ve kha, Anni pawh kha hmel an hmel hmuh a nuam tehchiam lo. Harsatna an tawk hrep zawk em ni?

“Kha in va hlawhtling ve?” tia Ajay-a ka en chuan a nui lui suk a, Ani hi an team lamah chuan a hotu ber a ni. “Eng nge in chanchin?” a tih chuan lu thingin, “An tlanbo hman leh tawh mahse naupang pakhat erawh kan chhan hman,” ka ti zawi sup a. Chutia a ruk deuh taka ka sawi chuan, inti hrethiam takin a lu a bu nghut nghut a, “Khawiah nge naupang chu?” tiin station chu a enkual a, “Damdawi Inah,” ti nghutin thudang sawi tawh lovin ka chhuahsan ta nghal a.

Motor chhung ka luh rualin damdawi In ka phone nghal a, naupang nunna a derthawng avangin a ruka enkawl tu tur nurse ka mamawh thu leh lakchhuah theih a buatsaih tura ka tih chuan, ka bula Sanjay-a zawk chuan mak ti hmel takin min en hu a, phone ka dah rualin, “Eng thil nge tih i tum?” a tih chuan ka nui suk a, chhanna beisei takin min melh reng chuan, “Rental Car ilo ngaihtuah hi chu i fing ka ti,” ka ti daih, hetia midang pun reng ngailo a motor hman tur a awm hi a nuam. “Eng nge damdawi in leh Rental Car chuan in zawmna aneih?” a tih chuan, nui hawkin, “Kalna hmun apianga ṭhianṭha siam ṭhatna, ka hrilh ang che” ka tih te hlei hlei chu a hawi buai ni mai in ka hria. “Maw?” a ti leh hu a, a bang bo thei lutuk hi ka nuih a za ṭhin. Ani hi chu thluak seng vak aiin tharum hman lamah hian a ṭha zawk reng a ni.

Hun rei tak ata ka ṭhian ni tawh Amit ka call a, a puihna ka mamawh thu ka sawi chuan engkim alo buatsaih tur thu a sawi vat a. Anni hi a nu leh pate nena la cheng an ni a, eizawnna lian tak an nei a, a nupui nen hian kum10 an innei tawh a, mahse fa an neilo. Hei leh chen fa neilo in an awm a, an inngeih viau tho chu ania, mi tam tak nise hnam dang lehnghalah chuan harsatna an nei ve em em ang, mahse vawiin ni thlengin nupa hlim tak niin ka hria. Midang chhungkua an nih avangin an dinhmun diktak ka hriatpui lo pawh a ni mahna, mi chhungkaw chanchin in zawh vak thu awm bik heklo.

Amit-a te in kan thleng a, room min kawhhmuhna lamah chuan kan indah lut a, nurse pakhatin a vil dawn a, tin, doctor khan check up hun apianga a kal tur thu a sawi bawk a. Kan naupang hruai chanchin ka hriat ang ang leh kan hmuh dan te ka sawi a, Amit-a nupui Sonali’n lainat hmel taka a en reng ka hmuh chuan mak takin ka hlim ve tawp. Ṭha taka an enkawl tur thu sawiin kan inthlah a, pawn kan thlen ruala Rsa’n a rawn call chuan ka pick nghal vat.

“Msi ka hmu,” a rawn tih chuan, “Khawiah?” ka lo ti nghal thuai a, address a rawn sawi a, phone dah mai ka tum chu, “Vanlal tunah chuan kan hmu theilo ang, hotel-ah inhmu phawt ang u,” a rawn tih chuan Aih tih mai ka duh rum rum, mahse a hmutu a ni a eng emaw hmuh nghal theihlohna a awm a ni ngei ang. Sanjay-a hnena thil awmdan sawiin kan thlenna hotel lam kan pan leh ta zawk a. Damdawi In lamah enthlatu kan dah tawh a, tin, Ajay-a te lama enthlatu man a, Team dang rawn thlen ruala a bu pui luhkhung chiah hna kan nei tawh, rilru chu tlemin a thawveng deuh. Tunah la Rsa’n Msi a hmuh thu a rawn sawi a, Lalrinzuali erawh Misual rual pawl kan luhkhung hunah chiah kan hmuh theih ka beisei, chupawh beiseina chauh a ni, ala dam ngei em tih fiahna ka nei miau lova.

An hmunpui ni ngeia kan hriat hi a sual hauhin ka ringlo mahse Ajay-a team te hian engkim an ti khawlo thei tih hria in fimkhur erawh a ngai takzet. Kan inhmuh khawm pawhin ṭawng chheh sual hlau takin kan thusawiah kan fimkhur a, tin, Anni lam hian Rsa kan hnenah a awm tih an hrelo. Chu chu kan tan chance ṭha tak a ni ve bawk.

Hotel kan thleng a, Rsa’n, “Zui tu a ngah lutuk, chuvang chuan ka en zui tawp, thil mak tak erawh Amah mantu an anglo, a bodyguard te an ang zawk. An awmdan kha tihluihna engmah ka hmulo a ni.” a ti zawi ruih a, a thil hmuhah ka ringhlel a ni lo mahse tihluihna tello chuan Msi an hruai ka ring miah lo thung. Mipui hmuhah man angin langlo mahse an vau anih ka la ring tho. Ka rin hi a dik ngei ang tih ka chiang, Msi ka hriat kha chu buaina neih hlau tak, buaina leh harsatna te’n an umzui reng lai pawha ka bula awm thlahlel em em ka hmangaih leh min hmangaih tu kha a ni tlat alawm. Engvang tehrengin nge kei min kalsan in hriat ngailohna hmunah hian a kal tehlul ang ni.

Ka hmangaih tia ka ngaihtuah rual chuan Lalrinzuali mitthlaah alo lang a, Ani kha la dam ta se, heng kum zawng zawngah hian a chungah Anni khan eng nge an tih ang, Kum tam a liam tawh a, ka hmuh lai ngeiin a lungah kah a ni a, ka venghim zo lo anih kha, mahse engtin nge a dam khaw chhuah thei, a ruang te kha vui liam a ni ngei si a. Ani kha lo let leh ta se Msi hian engtin nge a ngaih ang, hmeichhe dang ka nei tawh tih a hriat hunah Lalrinzuali nat dan tur nen lam ka ngaihtuah a, hrehawm ka ti mahse Malsawmsangi erawh ka thinlunga lian ber a ni tawh tlat si a. Rinzuali pawh ka paih chhuak chuang hauh lo mahse Ani chu hmana ka hmangaih kha a ni miau a. Hetiang ngaihtuah vak tur pawh ka nilo, a hun lo thleng phawt se engkim a dik vek mai ang.

“Eng nge i ngaihtuah?” Rsa’n a tih chuan, “Zaninah ruahmanna felfai tak nei ila, kan hmanhmawh erawh a ngai.” ka tih chuan bu nghutin a pindan lamah a kal a, Sanjay pawh a chhuak ve ta nghal a. Engtiangin nge ruahmanna kan siam ang tih pawh ka hrethiam lo chu ania, tun ṭum ka hna khawih zet zawng harsa ka ti a ni. Hmeichhe pahnih te hi tel ve kher lo sela ngaihtuahna te pawh ka hmang thei deuh tur, mahse ka duh vang ni hauh lovin an tel miau si a, an nunna tana pawi thei tur eng ruahmanna mah ka siam theilo, chu chuan ka hna hi a ti harsa lehzual em a ni.

(Msi Pov)

“An thlenna kan hre tawh, Zaninah i tih a ngai.” ka hmaa ding mipa sang ṭha zet leh thuneitu tih hriat zet, Ronney-an a tih chuan, “Awle” ka ti vat a. Ka rilru khawimaw lai hi chuan, “Aih” ala ti hram, keimaha mi pahnih awm te hi an insual reng chu anih hi. Ka pindan tura min pek nuam takah chuan ka lut nghal a, keimaha ka awm chuan ngaihtuahna ka hmang ve thei deuh ṭhin mahse helaia awm te leh ka chhungkaw thattu nia min hrilhtu ngei, ka u ṭhiannu anga insawi Rinzuali hian mahnia ka awm tam a remti lo. Taksa tih chakna tiin nitin damdawi min pe a, ka ei chuan ka harh kawk in ka hre ṭhin, ka rilru nu but a reh a, huaisenna nei tharin ka chhungte thattu Lalrengpuia huatna in ka khat leh ṭhin. Tun dinhmuanah erawh chu thil chu ka duh ber pawh a ni.

He hmuna kal tura ka rilru ka siam fel hun kha ka ngaihtuah let a, Rengpuia te an hnaa an buai em avangin kan inbe hman meuh lo mahse kha thil kha ka tan a ṭha zawk tlat a ni. Rinzuali thu sawi te kha a dikna duhin kan inah ka kal a, a hmaa Malsawma’n kal a remtih miah lohna hmun ka ngaihtuah a, kan in chhak kawt zim te kha a ni ka ngaihtuah chhuah tak chu. Police te khan an dap vek tawh in ka ring a, mahse hmuh hmaih an neih tak mialin tiin ka hai kual a, helaia lei pawn lang zet te hi dah chawp an ni tih a hma khan ka hre tawh miau a ni.

Eng ber nge ka zawn hrelo mah ila engvangin nge pindan ruk a siamna chungah hian lei te hi a dah chawp tih hriat ka duh miau a, hmanraw remchang awm chuan lei chu na lo te te in ka hai ka hai a, darkar thum dawn ka hai hnuah chuan in lam hnaihah chuan bawm ka hai chhuak ta nawlh mai. a len loh avangin ka la nghal vat a, pindan ruk a siam khan helai hi a chim nge hetia a vaia a lei hi a ngheh lo tih te ka ngaihtuah a, mahse thil phum nan erawh a hmang ngei tih ka hre ta phawt alawm. Ka zawhna chhanna zawng zawng neitu Malsawma a awm tawh miau lova, keimahin engkim ka dap chawp a ngai chu a ni si a.

Bawm chu ka hawng a chahbi lian vaklo ka hmuh chuan ka enkual ngial a, mahse eng chahbi nge ka hre miah lo, in chahbi ni pawhin ka hre lo, chutih rualin helai hmuna Malsawma’n a thukru anih chuan a pawimawh viau ang tih ka ring. Chahbi chu ak ṭha in, khatiang taka tam pawisa min dahsak kha ngaihven turin ka kal leh a, heng thu zawng zawng erawh tumah ka hrilh lo thung.

Bank Manager Pa upa ve lam tawh in min hmuh rual chuan min hre sa ang takin min be bawrh bawrh a, a chhan ka zawh chuan, “I u khan a phirpuinu tan tiin account alo hawng a, khatiang taka mi ṭha kha ka theihngilh theih i ring a mi?” a tih chuan, ka sawi tum tak ka zawt a, mahse ka zawhna chhanna a nei mang hauh lo. Ka passbook chu hmuh in update ka duh thu ka sawi a, melh nghal vung vung in, aw thian kharh in, “Bawihi he passbookah hian kan bank thil engkim a chuang a, mahse Logo hi a diklo, a awmzia chu he passbook hi kan bank ta a nilo tihna a ni,” tia min melh kalh chuan a ngaihna hrelo zetin ka en let ha a, “Hetiang hi dan bawhchhiatna a ni a, mahse i hmel landan khan i bang bo ve zia a lantir a, harsatna dang ka siam lovang che, i u erawh i zawtfiah leh mai dawn nia,” atih chuan inthlahrung ru takin ka tho a, ka chhuak ta nghal a.

Passbook lem kha eng nge a ṭangkaina, chahbi hian eng nge awmzia a neih. Passbook te chu a thar pawh a siam tir theih tho alawm, mahse engvangin nge a lem hi ka hmuh turin a dah khawiah nge a tak tak zawk chu. Ina let leh hman ka nih tawh loh avangin Rengpuia te inah bawk ka let a, mahse Rinzuali nen kan inbe reng thung, ka nu leh pa thih dan a hriat ang ang min hrilh zel a, min ngaihsak em em a, ka taksa a chakloh zia hria in vitamins min lo leisak hial a, ka lawm hle bawk. Tin, ka nu sana a leisak nia a sawi min pek kha ka bun a, ka en leh vawng vawng ṭhin. Ka u banbun kha ka hrechhuak fo a, kha banbun kha khawiah nge a awm tak ang le?

Ka ngaihtuahna kal zel chuan damdawi Ina ka awm laia tu nge tih ka hriatloh min lo tlawhtu kha ka ngaihtuah thleng a, Ani khan ka u a dahṭhat hnuah kei min thah ve tur thu a sawi anih kha mahse engvangin nge kei min thah nachhan tur, ni tak, ka u phir pui ka nih vanga min thah tum anih thu a sawi anih kha. Tunah hian min thah tumin min la veh reng angem tih pawh ka hrelo. Ka ngaihtuahna ka hmang nasa tih hriat takin ka lu a na ngut ngut a, tun hnaiah hian hetianga ngaihtuahna ka hman vak hian ka lu a na ziah a, thil tam tak ka ngaihtuah theilo fo ṭhin.

A ni telin Rengpuia thiltih ka hre tam tulh tulh a, ka bengah hian a chanchin chhia a lut reng a, midang chunga a hna hmachhuan a zahngaihna a neihloh dan te, a chetdan rawva tak tak te ka hre tam telh telh bawk a, ka nu leh pate umzui tu te pawh an pawl ngei a ni tih ka hre tawh bawk. Ni e, heng zawng zawng hi thu hmang chauh a min hrilh nise awiloh ka ngah viau ang mahse prove min pek zel avangin ka tan awiloh theih a nilo. Ka nu leh pa te thihnaa mawhphurtu ni ngei a thawhpui Rajiv nena an inbiakna ka en zana ka nat zia te kha, ka nat em avangin ka ṭap tlaivar hial anih kha.

Keimahah hian Lalrengpuia huatna in ka khat a, Ani hian min hre sa ngei pawhin ka ring bawk, ka huatna a zual zel a, chu ka huatna chuan thi ve se tih ka duhna a ti tam telh telh bawk a, ka thinrim na te ka thunun theih loh chang a awm ta fo mai. Ka vitamins kha ka mamawh ngawih ngawih reng a, eng vitamins nge ka hrelo mahse ka ei apiangin ka taksa a ti hahdam ṭhin miau a, a tello in ka awm thei tawh meuh lo.

Goa ka thlen khan Rinzuali’n min lo hmuak a, a kiangah min chen tir a, ka lungngaihna te min hnem in helai hmunah pawh nurse hna ka thawh duh chuan thawh tur a awm reng tur thu te min hrilh a, mahse keimaha danglamna awm zel hian hna reng reng ka ngaihtuah thei lo, Rengpuia thah ve duhna in ka khat miau a, ngaihtuah lova Amah ngei biaa sawipui duh chang ka nei ve ṭhin mahse chu ka duhna te chu a ni telin a reh a, ka huatna hian min thunun ta a ni ber mai. Ka u that tura thupe tu pawh kha Amah anih ka ringnghet hmiah tawh. Mahse chu erawh eng finfiahna mah ka neilo.

Ka thluakah hian Amah tihnat chakna hlir a khat a, huatna ka pai te hi ka ngaihtuahna fim taka ka hman ve chang chuan diklo ka ti ṭhin, mahse ka thunun phak baka min thunun tu a awm miau si a. Ka mangchhia ten min kalsan tawh mahse Lalrengpuia thisen ka chhuah hun tur suangtuahna in ka khat thung a, ka mang lama ka kut ngeia ka that ka hmuh chang te hian, ka harh ruala a awm leh silo hian thinrimna in min tuam a, ka bula bungraw awm te ka tichhe vak zel. Chutiang hun alo thlen changa dawhthei taka min buaipui a, nghak hret tura min fuihtu Lalrinzuali hi ka tan a hlu takzet.

A hnathawhna neitu Ronney-a hnuaiah staff pakhat angin ka awm ve a, Ronney hi thlahpawlh a ni a, a nu Mizo a ni. A pa bula seilian ni in he hmun hi a enkawl a, damdawi siamna hmun lian tak a ni, Doctor tam takin damdawi an siam a, keipawh nurse ka ni a, an thil siam chhuah tifel a, list lo buaipui tuah ka ṭang a, karkhat zet ka awm hnuah Rengpuia ten Goa an lo thleng tih ka hriat khan, an awmna zawn chhuah a pan nghal rum rum ka duh laiin Ronney zawkin ruahmanna felfai tak nena che chhuak turin min ti ta zawk anih kha. Rengpuia hmuh chakin ka za zek zek a ni ber mai mahse ka ngaih vanga hmu chak ka nilo, ka kut ngeia thi tura ka duh vang a ni.Zaninah chu ka duhna te chu tih hlawhtling a ni dawn a, engkim a tawp tawh ang.

(RENGPUIA POV)

Ka pindan chhunga phone a rawn rik chuan ka la vat a, reception counter duty thu rawn sawi avang chuan ka ding khawng nghal awt thei. Hmanhmawh taka ka pindan aṭanga chhuakin counter lam chu ka pan a, Rsa leh Sanjay-an ka thawm hria in min rawn zui ve bawk. Counter bula Msi kawr ṭet hnuang leh sam thur zeta a ding ka hmuh chuan, “Bawihi” tia pan hnaii ka kuah nghal thlawp a, a taksa ka deh ruala ka hlimna leh lawmna te hi tumah hian an hrethiamin ka ringlo. A inhnit feih feih a, ka kuahna thlahin, a sam ka chul mam sak thuak a, ka kamis tshirt chunga ka hak chu phelh vatin ka sintir a, ka mita min melh kalhin, “Min rawn zawng tur i ni asin,” a ti zawi sap a. A mitmeng dul ruih chu ka lainat takzet.

“Ka rawn zawng che alawm, mahse ka hmuh hma che in min rawn hmu ta zawk anih hi, a pawi ka ti ka tlai lutuk a, mahse engtin nge hetah kan awm tih i hriat?” ka tih chuan min chhan hma in, “Room lamah in hruai chho phawt ang mikhual dang an awm ve si a,” a tih chuan Msi kuah in kan pindan lamah ka chhoh pui ta a. Ka pindanah chuan kan pali in kan lut a, Msi chu a ṭap leh a ka kuah vat a, a hnungah ka chul a, a insut ri hraih te chuan ka chhungril a ti na ut ut thei. Malsawmsangi hetianga siam tu hi ka chhuah hauh lovang ti rilru in ka inhum ruh ngawt ngawt.

“Vawiin khan ka awmhmun min sawn a, chutah chuan ka hmu che u a, mahse min veng reng si a, chuvang chuan ka rawn kal theilo a ni. Tichuan ka tlanchhuak ta a, mahse in hotel kawtah khan min umtu te an awm tlat avangin ka rawn pawh theilo che u a, nichin deuh lawk khan an kalsawn a, nangni la in lut ka hmuh aṭangin in chhuak ta miah silova tikhan ṭanpuina ka dil tawp anih kha,” Msi’n mittui tling pama a tih chuan, a kutah chelhin, “Tunah chuan i him tawh alawm, engkim a ṭha vek mai ang,” tiin ka hnem a, Rsa thusawi ka ngaihtuah a, vengtu a nei a tih te, a bodyguard an ang zawk a tih te kha, thil thleng zawh ka chak, mahse a dinhmun en hian a hun ka la tilo. Rsa pawh khan a hmu ringawt a fiah kher biklo a, Msi thusawi hi a dik zawk ngeiin ka ring bawk.

Rsa chuan a be ve luam a, Sanjay erawh engmah a sawi lo. Msi’n a ril ṭam thu a sawi avangin ei tur ka order sak a, Rsa leh Sanjay pawhin zing lama inbe leh tura inti in min chhuahsan a, Msi rilṭam hmel zeta a thil ei te chuan min ti thinrim takzet. A mitmeng vai ruai hi ka hrethiam lo. Rui angin a awm miah silova, mahse a mitmeng erawh a diklo tih ka hailo, a chauh lutuk vang a ni thei tho bawk. Thil a ei zo a, intifai turin bathroom-ah a lut a, ka tshirt leh kekawr bul ka pek chu a inbel ve mai bawk a, a chauh ka rin avangin ka khuma mu turin ka ti a, engmah sawi lovin a mu ve mai bawk a. Mahse rei a mut hma in mahnia mut hrehawm a tih thu a sawi avangin a bulah chuan ka mu ve ta a. Ka lo chau ve bawk nen kan muhil zui nghal a ni mai.

Ka dar na zawkah chuan harhin chemte tle zawk ka hmuh ruala min vih nawn tumtu kut chu man in khumah ka paih thla nghal tawp a, ka dara a vihna chu dawmin ka tho nghal vat. Ka sira switch ka on ruala Msi thinrim hmel zeta min melh khai a, chemte keng ka hmuh chuan mak ti zeta en in, “Ms eng thil nge i tih hi?” ka ti vin ṭhak a. “Ka nu leh pa bakah ka unaupa thattu i nih vangin ka that ve dawn che.” a tih chuan a ngaihna hrelo zetin, “Malsawmsang eng thu nge i sawi?” ka tih leh rual chuan, a chemte chu ka lamah a rawn vai nghal thuak a, mahse insual thiam a ni miau lova, min vai fuh lo. Min vih ngei tuma min rawn pan chu ding chawtin kawngkhar lamah chuan a tlan let thut a, chemte nena tlanchhuak a ni a, pawn lama Sanjay-a au ṭhawt ka hre nghal.

Rsa corridor a tlan chu enzui in, “A vit ve che mi?” tiin Sanjay-a ban dawm chu ka melh zawk a, “Min vit lo min tai ringawt, I dar chu,” a ti zawm nghal zat. Ka dar ka dawmna chu ka en a, a vit thuk chiah em ka hrelo mahse thisen erawh a chhuak nasa viau mai, ka pindan lamah chuan lutin Msi chetdan kha a chhan ka hrelo, nga ti nge khatianga a awm?

Rsa thaw hlawp hlawp a room chhung a rawn luh rual chuan, “Ka man hman lo,” tiin ka dar towel chana ka dawm chu a melh zeuh a. Room service rawn lutin First Aid Box alo ken chu a la nghal vat, Bandage leh lapua, dettol a phawrh a, ka hliamah chuan hnawihin Bandage chhah taka a thuah chuan a bel a, “Ṭhui a ngai anih hmel, a thuk bakah a kak thui angreng si a, a thi a tawp miah lo,” atih te chuan ka chhang lo, Msi chauh ka ngaihtuah a, a chhungte thattu min ti anih kha, khatiang sawi a min thah hial duh tur khan a chungah eng nge thleng.

Damdawiin hnai berah kalin ka hliam kan ṭhui tira, a na nge na lo pawh ka hrelo, tuna ka ngaihtuah ber chu Msi thusawi mawlh kha a ni. Amah ka ngaihtuah a, hmeichhe nun zawi tak leh mangchhia tena a tihbuai fo avanga nun ral ṭi taka awm ṭhin a ni a, mahse karhnih leka min thah tuma min bei ngam tur khawpa a rilru suk sak tu hi ka hre duh takzet.

Hotel kan let chuan zan tlai ka sawi theilo Ruatpuia ka call a, mutchhuak aw zeta min rawn chhan chuan, “Ruatpui keimah Rengpuia,” ka tih rual chuan, “Eng nge ni ta?” a ti nghal thuai a, “Malsawmsangi te chhungkaw chanchin ka hre duh, a nu leh pa Dr. Lalsawmpuia leh Dr. Lalliansangi te chanchin, a rang lamin min hriat sak a ngai,” ka tih chuan, a reh vung vung a, “An hming chu ka hre tawh” a ti chhuak sup.
“Hmanhmawh a ngai ania, naktukah tal min rawn hrilh tum rawh.” ka ti hmuk. Awle tiin phone kan dah a.

Msi chetdan avanga ka thinrimna leh ka natna hi a in zat reng chu chuan awm nuam in min awm tir mawlh lo. Karhnih lek chhunga khatiang taka a danglam hman kha ka awi theilo zawk. Ka mit ngeiin hmu lo ila a danglamna kha ka pawm theih miah loh tur a ni. Mahse zanina a chetdan erawh min ṭhawngin a hmelah khan
Malsawmdawngzuala ka hmu. Kha zan Sangpuii a thah a, Msi pawh thah ve hial a tum zana a mitmeng buai zet leh mipa tam tak tan pawha rapthlak tak hmel kha a pu miau alawm. Thisen chhuah chak ngawih ngawih hmel a pu ti ila ka sawi dik ber ta ve ang.

“Eng chiah nge thleng?” Rsa’n a tih chuan ka rum nghut a, thil thleng te kha sawi pawh ka chak hrep love. Ka ban la chuan min tur ut ut a, Ani khan a chemte hmawrah khan tûr a tat zawk emaw ni, nge ni a m, a vit tu ka hriatchianna hian a ti na zawk? “Vanlal, chet chhuah a hun tawh viau a ni, thil thleng te hi sawi lo mah la Malsawma chunga thleng ang tho kha Msi chungah hian a thleng niin ka hria, kan tlai hma in hma kan lak a ngai i ti ve lo em ni?” a tih chuan ka lu ka bu nghut a, “Sanjay, Ajay-a te lama enthla tu tur kan dah khan chanchin a rawn sawi tawh em?” ka tih chuan, “Naktukah kan inbia ang, chuan zanin dar11 khan Team dang pawh an rawn thleng tawh e, Sir Anil khan i kutah a dah leh vek tawh a, i thupek chiah kan nghak.” a tih chuan, “A ṭha khua var se, enthla tu te chu bia la, team thar rawn thleng te nen inhmuhkhawmna tur lo ruahman rawh, plan kan siam zawhah Police te nen chet kan la dawn nia.” ka tih chuan, “Awle” tiin min chhuahsan a, Rsa erawh thil thleng hriat ala duh ṭal emaw ni ngawirenga ṭhu in min melh run a, sawi ka tum chuang hauhlo.

13

(Msi Pov)

Ka hlawhchham avanga thinrim zetin ka bula dawhkan awm chu ka nam thlu ṭhuai a, ka inthunun theihloh khawpin ka thin a rim tlat si a ni. Engkim hi tihchhiat ka duh a, ka pindan a bungrua ka vawm darh nuai bawk. Ka kawngkhar a rawn ri rak a, Rinzuali’n ka damdawi min rawn pe dawn nia ka hriat avangin inthunun tum takin thaw la halh halh in ka ding a, mahse chumi reilo tê chhung chauh pawh chuan ka taksa a khur hman nia mawle.

Kawngkhar a rawn in hawn rual chuan, “Ka damdawi,” ka ti hman ṭawk, Rinzuali nilova Ronney-a leh mipa pahnih Amah zui rengtu te hmel ka hmu chu thinrim zetin ka melh khui a, kan hotu ber anih ka hailo mahse ka awmdan hi a dik hlawllo. Chu chauh chu ka hriat a ni, ka thimrimna ka thunun theih lohna hi a ni telin a zual chu anih hi.

“I hlawhchham a,” nui hul haka a tiin chair an rawn pekah chuan a ṭhu a, a awmdan chu ka pawi sa thei lo, ka tha khur nasa lutuk chuan ka thluak a tibuai vek ni mai in ka hria, ka thlan a tla bap bap a, ka ngaihtuahna te chu a nû but mai. Chhuatah chuan ka ṭhu thla hnawk a, “Ka damdawi,” ka ti chhuak sap a. Ka thi mai dawn ni te in ka hria, engvangin nge hetiang hian ka awm, ka damdawi kha min pe sela tih ka duh ber mahse Rinzuali hmel reng reng a rawn lang theilo.

“Thi turin ka duh lo ania, ka bungraw kawltu anih kha,” Ronney-an a tih chuan, Amah vengtu pakhat chuan damdawi mum min rawn pe a, ka lo la vat. Ka ei zawh hnu reilo teah chuan ka taksa khur a reh a, ka thinrimna te pawh ka bengdai thei ta. A hma kha chuan ka ngaihtuahna kal kual vak vak laka min chhawk tu leh hahdama min awmtirtu a ni a, ka lawm anih kha. Mahse Nurse ka ni a, tuna ka awmdan kha hrethiam lo ka nilo. Ruihhlo ngai te’n suffer an tih ang mai in ka awm anih kha. Ni e, kha vitamins kha ka mamawh em em chu a ni. Mahse eng vitamins mah ruih theih a awm lo, anih chuan Kei hi damdawi ruih theih chak tak ei ziahin, a zûnah ka tang der tihna a ni zawk em ni?

Ka taksa a pangngai hnu chuan ṭhu chhuakin thil thleng ka ngaihtuah a, ka nui ri hak a. Ronney-a min melh run chu ngai pawimawh lo zetin, pindan aṭanga chhuah ka tum chu mipa pakhat chuan min rawn pawt let dawr a, chhuatah bawk ka tlu leh hnawk. “Eng thil phiangsen nge i tih?” ka tih tuar chuan, “Ngawi hmak rawh, hlawhchham in i rawn let a, ka that lo che hi a chhan ngaihtuah zawk rawh.” Ronney-an a tih chuan mak ti zetin ka en anih kha. Nichin lawk khan a bungraw kawltu ka nih a sawi tak e, mahse eng thil nge thleng hi.
“Ka thusawi hi uluk takin lo ngaithla ang che, nuamsa in ka siam rei tawh bawk che alawm.” Ronney-an a tih rualin, mipa pakhat chuan ṭhutna rawn la in min pawt tho lawp in min ṭhut tir a, Ronney-a chu mit khap hauh lovin ka melh thung. “Engtin nge ka sawi ṭan ang aw, hmanraw pakhat i ni.” a tih chuan, “I hmanrua ka nilo,” ka ti let vak a, engvang mahin he mihring hmanrua hi ka nilo. “I u chu i tluk lo deuh anih kha maw, i u kha chu a fing mah mah asin, mahse Ani pawh thang a dai per ta tho a, khawvelin mi nunrawng leh misual an ti anih kha.” tiin a kut a hum ngawt ngawt a, a thinrim rawn lang chhuak chu engvang nge ka hrelo. Engtin nge ka u a hriat?

“Ka u i hria a maw?” ka tih chuan, “Hre mah mah zawk, Rinsangpuii i hriat ang tluk zetin ka hria, Hmeichhe khawngaihthlak.” a rawn tih chuan, ka thluak hi a vir zawk ni mai in ka hria. Damdawi ina ka awm laia ka hmelhriatloh min tlawhtu kha. Hmeichhe khawngaih thlak tia min thah tur thu sawi tu ngei kha, Ronney-a hi maw lo ni a? A hma zawng khan engtin nge ka hriat loh theih zawk?

“Sangpuii bialpa kha nangmah hi maw?” mak ti zeta ka zawh chuan, “Thawnthu sei tak a ni.” ti zawi sap in bang chu a melh kual a, min rawn en leh ruala a mitmeng sen rum chu a hlauhawm takzet. “Ani kha ka hmangaih asin, ka hmangaih lutuk mahse thlahpawlh ka nih vang leh nupui pakhatna ka neih tawh avangin kan inneih phalsak kan ni lova, hun reilo tê chauh min nghak tura ka tih laiin, i unaupa nunrawng zet khan a tihlum anih kha.” a tih chuan, “Anih chuan nangmah hi em ni damdawi ina min rawn tlawh tu kha?” tia ka zawh chuan, “Ilo hre vek a maw?” tiin mak ti ve hmel a pu zawk a, mahse. a reilo. “I hre sa tho bawk a, Keimah ngei ka ni e, nang hian kha detective Lalrengpuia kha thah i tum tih ka hriat vang chauh a i nunna hi la zuah ka ni, hmanraw ṭangkai tak i ni thei tih ka hriat vang chauh in,” atih chuan sawi tur ka hrelo.

Damdawi ina min tlawhtu kha anih chuan Amah hi em ni Malsawma thattu nge ni a, Lalrengpuia thah a ni tho zawk? “Malsawma kha i thah a ni em?” ka tih chuan nui sukin, “Ni e, Sangpuii phuba anih kha tichuan tunah hian i thih lohna chhan tur chhan ṭha tak min pe ta che,” atih chuan phawk zeta melhin ka chil ka lem ri khawlh a. Min thah tuma min vehtu, ka huatna avanga ka lo theihnghilh tawh, mihring ngei kha ka hmaah a ding a, ka mi hnaih tak alo ni reng bawk a. Kha chen thi lova ka awmna chhan erawh Rengpuia laka phuba ka lak theih nan mai a ni. Mahse ngati nge Ani lakah chuan phuba ka lak phalsak ka nih a, ka nunna min la zuah sak nge anih?

“Rengpuia chuan i eng pawi nge a sawi ve?” ka ti leh chuan, “Thawnthu sei tak a ni,” atih rual chuan a kut a vai zeuh a, mipa pahnih te’n nghet lutuk a, min dawm rual chuan duh lovin ka tal nghek a, pakhat chauh pawh hian min dawm sela ka tal chhuak thei dawn lo tih ka inhre chungin tal chhuah tumin ka ṭang ngar ngar chu a ni sia. Doctor mask vuah a rawn lut a, ka bana syringe lian tak a rawn vih luh chuan ka rum chhuak hak a, mi pahnih te chuan ka khumah min ṭhut tirin ka bulah an ding nghal run a. Ka ban an chiu na chu a zawi thla raih raih ni mai in ka hria.

“Khawiah nge ka pawisa kha a awm?” titu hmel chu chiang takin ka hmu theilo, nichin lawk kha chuan engkim kha ka hmufiah em em a ni si a. Ka lu a hai muai muai a, ka awmdan zet chu a hrehawm tih piah lam a ni. “Mai mai chuan,” tihluk ri te chu hla taka sawi ang mai in a ri tawh. Ka hriatthiam dan ber chuan ka ral riai riai ni berin ka hria.

Ka bul vela awm te thawm chu ka hre thei ngei a, mahse tu te nge an nih tih ka hmu thei hauh lo, nichin lawk khan ka bulah mihring an awm a, mahse tu te nge awm tih pawh ka ngaihtuah chhuak zo tawh heklo. Damdawi min pek lai kha chiang takin ka hria a, damdawi in ka taksa a fanna te chu engkim ka feel thei thung.

“A sawi em?” titu chu hmeichhia a ni. “Aih a pe diklo em ni, nikhua a hrelo nghal der ringawt alawm.” tia phun hluk ri pawh ka hria, tu emaw hian ka nghawng a rawn khawih a, “A thi em hleinem, damdawi kha pe zel ula ala sawi chhuak em em ang,” hmeichhia bawkin a tih chuan, “Nang hmeichhia vanga henu hi that lo mai ka ni, a sawi lo anih chuan ka chansawm khawp ang.” mipa thinrim aw tih hriat zetin atih chuan, “I hmangaih nunna la tu nau anih vang chauhin maw!?” tia hmeichhia zawkin a chhan rual chuan eng emaw hi a ri rawk rawk a, ṭawng harsa tih hriat zet hian, “Min thlah rawh,” a tih chu ka hriat hnuhnung ber a ni ta.

(RENGPUIA POV)

Thlalak ka dawn chu uluk takin ka en a, ka ennawn leh ṭhin. Dr Johnson-a leh Dr Rebecca-I te nupa leh an fate tih hriat zet mipa leh hmeichhe phir te an ni. Ruatpuia hnena Msi te chhungkaw thlalak ka duh thu ka sawi khan hei hi min rawn thawn a, Dr. Rebecca-i hmel zoom meuha ka en chian chuan Malsawmsangi ka hrechhuak lo theilo. A hma khan nga ti nge ngaihbel nachang ka hriatloh. Hetiang tak hian a hmelah a nu an chhun a, mahse ka ngaihtuah chhuak hauh lo kha â ka inti thar takzet.

Malsawmsangi nu leh pate thih dan min rawn thawn chu ka en leh a, car accident in an thi tih ringawt a ni. Anni nupa hi Mumbai-ah ka hmelhriat a, chutah chuan chenna hmun pawh nuam tak an luah ngei anih kha, tin, Mumbai khawpuiah hna an thawk tih min hrilh bawk. Msi sawi dan leh Malsawma inpuanna khan an nu leh pate hi thah an ni, accident satliah an nilo tihna anih chuan engvangin nge an thah ang? Zawhna tam tak awm te hian chhanna a nei ngei ang tih ka hria mahse khawi aṭangin nge chhanna hi ka neih tak ang.

Rsa leh Sanjay-a bulah chuan ka thu hriat ang ang te ka hrilh ve a, ka sawi zawh ruala Sanjay-a’n, “Chip kha,” a rawn tih chuan, ka hriatna te chuan engkim a hmu tlang ta vek ti ila a dik ber ang. Nga ti nge a hma zawng khan helam hawi hian kan ngaihtuahna kan lo hman miah loh. Dr.Johnson-a nupa kha HELL Project khawihtu te zinga mi an ni, Ronney-a te nen pawh an thlalak a awm ngei alawm. Anih chuan helaiah hian misual tam tak pawh man mah ila a bu pui kan tichhe dawn miah lo tihna a ni. Mumbai-ah ngei an hmunpui hi a awm tihna.

“Sanjay Mumbai-ah hian eng Industry nge lian ber?” ka tih chuan a hawi buai leh tawh, nuih sukin, “Roy Industry hi khawi khawiah nge a awm?” ka tih zawm a, ka thil ngaihtuah hria ni awm takin a phone. a phawrh vat a, ka zawhna chhanna a zawng a ni mahna. Rsa ngawi vung vung chu ka thlek zuk a, “Rs, eng nge i ngaihtuah?” ka tih chuan min chhang lo, “Lalrinsang,” ti hluka a ban a ka ben zeuh chuan a phu uih a, a aw thian kharh a, a awmdan siam remin “Eng nge in sawi?” a tih chuan chik zetin ka melh nghal. Kha zat thil kan sawi a, Ani hian a hre ve miah lo tihna em ni?

“Eng nge i ngaihtuah?” ka tih leh chuan, “Msi kha nangmah that tura nawrluih anih i ring ve lo em ni?” a tih chuan lu ka thing a, “Ka ringlo, A nu leh a pate thattu ah min ngai a, chu chuan kei min huat phah ta a, misual thawhpui duh khawpin a rilru a siam fel tawh a ni ngei ang.” Ka chhanna avanga Rsa mitmenga lungawilohna chu ka hmuh hmaih lo, mahse he thu ka sawi ruala ka chhungrila na ngut ngut awm hi a hriatthiam ve tho ka ring. Ni e, ka hmangaih, ka nupui hual hmelma nih chu ka na lo theilo a ni. Ka tih a nilo a, a nu leh pate umzuitu ka nilo tih tal hrilh ve te pawh ka duh alawm, mahse Ani khan min sawipui pawh duh tawh lovin ka nunna a duh miau si a, thih ka duhlo anih chuan ka nunna ka laktir ngawt thei bik silo a ni.

“I ngaihdan ang kha ka pu ve lo, kei ai daihin Msi hi i hrechiang a, khatiang teh tawpin a ti duh lovang.” a ti leh hram a, keipawn a mitmeng leh a landan te kha hmu lo ila Rsa thusawi hi ka ngaihdan pawh a ni ve tho ang mahse nizan lawk khan Malsawmsangi nilovin, Malsawmdawngzuala hmel anih kha Amahah ka hmuh. Thisen chaka tuihal, tualthah pawi ti miah lo hmel a ni ka hmuh, min huatna mitmenga min melh laia ka natna te kha hrethiam turin ka duh, mahse min hmangaih em em tu kha Amahah a bo tawh tih chiang takin ka hre thei.

“Min hmangaihna kha Amahah a bo tawh,” ka ti zawi sup a, “Lalrengpui,” ti vin ṭhawt a, Rsa thinrim zeta a ding chu ka melh chho ve reng a, heti taka Msi zawk ṭana a khawsa hi ka lung a awi bik tehchiam lo a ni. Sanjay-a chuan kan thusawi hrethiam lo zetin min melh tawn zak zak a, Rsa kut hum ruh tlatah chuan keipawh ka in ring ru ve reng tho. Rinsanga hi hetiang hian a awm ngai miah lo, mahse tunhnai kan boruak tawn chho mawlh mawlh hian kei min nghawng ang tho in a nghawng na ve ang tih ka hria, kei ang tho in thil tam tak a ngaihtuah ve dawn a, mahse kan ngaihtuah dan erawh a in ang lo tih a awmdan aṭang hian a hriat.

“I hmuh tirh pawn vêngtu a nei i ti a ni lawm ni?” ka tih chuan min chhang lovin phun hlukin a chhuak nghal daih a, Sanjay-a chuan mak ti zetin, “Nga ti thut nge?” a ti nghal zat. “Msi a ngaihtuah anih kha,” ka tih chuan a bu nghut nghut a, “Anih nang?” tia min zawh chuan ka melh zawk a ka chhang lo. “I nupui hual a ni a, i hrechiang ber tur a ni, engtiang pawn lo awm se a chhan zawn hi i mawhphurna ah i ngai lo em ni?” tiin a phone chu dawhkanah dahin, “Hei aw Industry list chu,” ti lehin a tho vut a, a chhuak nghal daih a.

Eng nge an hriat a Msi pawh chu ngaihtuah viau nge an nih? Ani khan min thah a tum tih pawh an ngaihtuah duh derlo chu ania. Malsawmsangi awmdan bawk kha ka ngaihtuah let a, ka natna leh thinrimna hi a in zat reng, khatiang taka min huat kha a duh ve hrim hrim em ni? Nge ni a Ani khan a hma aṭangin min lo haw daih tawh zawk. Malsawma bula a awm khan hetiang zawng zawng hi a hre tawh angem? Hria nise nga ti nge inneih ka sawm khan a pawm si. Ka ngaihtuah apianga ka ngaihtuahna buai nuai zel ka duhloh vang hi alawm ngaihtuah lova ka hna chauh thawh ka tum, mahse khami te pahnih khan ka tumna te hi an hrethiam lo zawk anih hi.

Mumbai-a Industry hrang hrang te chu ka enkual a, kan hna lo thawh tawh dan leh kan mi man tawh te ka chhui let a, Nitesh Roy-a sawi Ron kha ka ngaihtuah let a, Ani kha a ni lawm ni tuna ka zawn mahse karkhat lai kan awm tawh chung pawh in helai hmunah hian ka hmu miah lo chu ania, khawiah nge Ani kha a awm ang. Engkim hi ngati nge a tawp hmuk hmuk le, kawng a inhawng kan ti a, mahse chhui zui tur awm miah lo khawpin a ping leh zel chu a ni si a. Msi ngaihtuah nen, kan misual rual um nen ka nih dan ni miah lovin ka ding thut a lehkha chu ka paih darh vek a, dawhkan tê pawh ka pet tlu nghal pawp, hetiang tehhrep a thinrim leh rilru naa min siamtu te hi tihhlum vek ka duh, mahse naa min siam tu erawh Malsawmsangi a ni tlat.

Ka thawm hria in Rsa leh Sanjay te an rawn lut a, ka hmaa dawhkan tlu leh lehkha darh nuai an hmuh chuan rawn lut vatin, Sanjay chuan a chhar khawm a, Rsa zawk chuan, “I ṭha em?” a tih chuan thaw hawkin, ka ban ka chet thut vanga Bandage chhana rawn thi ṭiam ṭiam chu ka melh zeuh a, “A ṭhui na a peh a nilo maw?” a rawn tih chuan ka ṭhu thla hnawk. Hetiang taka dinhmun khirh a ka ding pawh hi ka ning tawh takzet a ni e. Ka chhan loh vang chuan lehkha tla chu a chhar khawm pui a, dawhkan te an dah fel hnu chuan, “Khaw maw ka lo en,” tiin ka ban tuamna chu a phelh a, Sanjay-an first-aid box a rawn la vat. Ṭhian ṭha tak hi chu an ni ve chiang alawm.

Ka ban kan tuam ṭha zo a, Ajay-a te team tello in meeting nei turin kan chhuak a. Meeting naah pawh ka rilru ka pe thei meuh lo chu ania, mahse a tawp kan thlenpui tawh dawn tih ka hriatna hian tlem chuan phurna min la pe ve deuh tal alawm. Kan ruahmanna kan sawi zo a, kan inṭhen hrang leh ta nghal keichu ka partner Sanjay nen bawk kan inzui leh a, Rsa erawh Hotel-ah a awm thung. Zanina chet chhuah tum kan nih avangin zanriah kan ei hma ka hmanrua leh thildang ka tifel a, Anil a hnenah report ka pe bawk, Ajay leh a thawhpui mi pahnih te bula false information kan pek thu sawi in, kan chetchhuah hun tura kan ruahman ka hrilh a, kan inbiakna tih tawp a tum chuan a ṭawng pawtchat in, a hmaa a sawi loh zawhna ka zawt a.

“Chip vanga thi i sawi te kha Dr. Johnson-a te nupa an ni em?” ka tih chuan, “Aw ni e,” a ti zawi sup a, “Thil thleng hriat ka duh Sir,” ka tih hmuk chuan a thawhawk ri ka hre thei, “Ilo let…” a ti hman ṭawk, “Sir ka lo let hma in ka hriat a ngai,” ka tih chuan, ka dinhmun a hrethiam tih hriat takin, “Anni kha a rukin ka thawhpui a, kha case kha ka kuta dah anih angin. Hell Project kha Sunil Khan leh Vijay Roy te bul ṭan a ni nghe nghe. Khan leh Roy Industry ṭangkawp thuruk a ni. Tichuan an hnuaia thawk Lalnunpuia telin Anni kha ka thawhpui vek. Engvangin nge i hnampui kher ka thlan, mi huaisen, dikna duh an ni tih ka hriat avangin. Tichuan, Dr.Johnson-a te nupa in chip min ruk chhuah sak a, chu chu Lalnunpuia khan ka hnenah a rawn thlen a. Mahse khawi aṭangin nge Anni pathum tlanbo kha Headquaters hian an hriat ka hrelo, chip ka tlangzarh hma hauhin Dr.Johnson-a te nupa kha um an ni tih ka hria, mi tam takin an umzui a, an man ta a ni. Lalnunpuia erawh kan lamah um zuitu a neilo, mahse Hotel-ah a ruang hmuh a ni. Dr.Johnson-a te kha keini lam thah a nilo tih ka hria, a chhan chu Mizoram an thlen ni ah an accident thu hriat a ni, an tlanchhe rei a, kei nen pawh kan inbe pawp fo, kan lam te chu an pumpelh theih nan ka pui bawk mahse lehlam um tu te an pumpelh zo ta lo a ni.”

A thusawi chhung zawng chuan ka thaw lo ni mai in ka hria, phone kan dah a, ka ngaihtuah zui lo thei lo. Dr.Johnson-a te khan ka hna an hrelo a, Anni pawhin doctor an nih bak hna chungchang engmah min hrilh lo, ka ngaina a, min ngaina ve hle pawh in ka hria, buaina an tawh te kha min hrilh sela, tlem talin ka pui thei mai thei asin. Mahse an thi tih takngial pawh ka hrelo anih kha. Kum tam a liam hnuah an fanu nen kan intawng leh a, mahse engkim hi a diklo vel vek tawh si a, Msi hian a nu leh pate ka tana an hlut zia tal hi hre ve se ka ti takzet.

“I inpeih em?” Sanjay-an a tih chuan, ka silai paina siam ṭha in ka coat ka ha a, zanriah kan ei khamah lobby aṭangin Ajay-a te pathum kan nghak phawt dawn a ni, Anni nen kan inbiak dan tur kan sawi fel hnuah kan hna thawk turin kan chhuak tawh ang. Team hran lo kal mi paruk leh police ṭhahnem tawk tak erawh an hnathawkin an kal daih tawh thung chu erawh Ajay-a te hian an hre ve lo.

Zanriah kan ei lai chuan Rsa chu a ngawireng a, eng chiah hi nge a ngaihtuah ka hrelo zawh duh viau mah ila tun hi hun ṭha ber a nilo tlat a. Chutih rualin Msi hmuh leh ngei ka inbeisei a, tin, Rinzuali pawh ala dam anih chuan ka hmuh ngei ka ring. Lalrinzuali hmuh leh ka chakna chuan kan hna thawh vat vat min ti chak a, mahse Msi harsatna erawh engtin nge ka chinfel ang, Ani hian min thah ngei tum reng ta se, ka ngaihtuahna chu duhlo in ka chawhmeh chu ka ei nghal hmak a, ka hawi chhuah ruala Rsa’n min lo en reng tih ka hriat chuan, “Eng nge ilo tih ang?” ka ti nghal sup. A tui chu in khawlh in, “Min mamawh tawh loh hmel bawk sia, Vai lam Tv ah ka lo en mai mai ang chu ka tia, nge ni nga nula chhelo deuh deuh an tam sia ka lo chhaih kual mai mai zawk dawn ni.” a tih chuan ka nui hawk a, Rsa diktak a ni leh ta, diktak chuan a mi tak run kha chuan a bula awm a hahdam hlawllo, keimah ang mai in a awm tlat alawm.

Ajay te an rawn thleng a, engkim peih sa a ni bawk a tiin reilo teah kan inṭhen ta a, Rsa’n Hotel kawngkhar aṭanga ban min rawn vai zeuh chuan ka nui suk a, kan ṭhiante awm sa te lam Sanjay-a nen chuan kan pan ta vang vang a.

Kan hmaa building hlui ve zet tawh, ṭhenkhat te’n a hrang an tih fo lam chu kan en chik hle a, a building a lian in inhlui alo ni ve nen a hrang ti duh tu tan chuan insawi ṭhaihna tham chu a ni ve hrim hrim a. Sana ka en dar9 chiah a ni. Kan hual zim tial tial a, Police squad te langlo lamah awmin keini in hma kan hruai a, pawnlama duty an dah ṭhenkhat te silai an ken miau avangin an hnunglam aṭangin kan bei a, Sanjay leh Inspector te ka bulah an awm a, kan luhna tur kawngka kan tihfel hnuah, kan lut ta ṭham ṭham a.

A chhunglam chu a pawn anglo zetin a eng a, engtin nge pawnlamah kha eng hi a chhuah miah loh ka hre lo, silai keng awm ve mahse kan che fimkhur bawk a, chhawngkhatna chu kan kalpel mai a, mahse inchhung ka chhoh dawn chuan silai a rawn ri a, vanneih thlak lutuk in min fuh lo hlauh. Silai a ri chhunzawm nghal a, mahse sahim nan a rem laiah biru in keini lam pawh kan kap let ve zel a, kan thawm aṭangin pawnlam pawh an rawn lut ṭep tawh in ka ring, police rual an rawn luh rualin ṭhenkhat inchunglamah chho in, keini in inhnuai pindan kan dap a, ka rinhleh ruk ang ngeiin lei hnuai puk alo awm ngei a, duty pahnih pawh kan kap hlum fel der bawk.

Lei hnuai pindan kan luh rualin kan thawm hriaa hlaua bangkila tawm an awm nual a, chutih rualin kan luh ruala silai nena min lo bei doctor thuam inbel te pawh an awm bawk, mahse kan tam hnen em avangin nunna tam tak chan lovin kan man thei a, bangkil lama tawm khawm lam chu ka pan vat a, “In ṭha em? Nangmahni ṭanpui tura rawn kal kan ni.” ka tih chuan tleirawl pakhat hi a rawn ṭap chhuak a, heng ho hi hnathawk tura an chhawr nge tihluihna hmanga helai hmuna an hren ni ta ang.

Nula puitling pakhat chuan, “Ka pu sawtah sawn naupang an awm.” tiin kan sira kawngkhar chu a kawk a, Police ṭhenkhat ten mi tang te an hruaichhuah rualin keini in pindan lam chu kan pan a, chhunglam aṭanga a inkalh avangin Kawngkhar chu ka nek pawp pawp a, a inhawng mawh em em lehnghal. “Sanjay ka hawn tur pawh niin ka hrelo,” tia ka melh chuan, “I peih ka ti reng a ni,” tia vai hla hlui zet sa a min melh let chuan ka lo nui tawp. Hepa tak hi chu. Palian thluak thawl tak erawh a ni miah lo fiamthu erawh a duh a, a bula hnawthawh chu thihna hmunah pawh nuih tur a awm leh ṭhin tun angah te hian.

Kawngkhar chu a tlawh pawp a, a kawngkhar chawpin a thlawk lo chauh, a intheh hawng nghal ṭhuai a, inti thei zeta min melh rual chuan, “Wow,” tih sakin ka lut nghal a, naupang tumah ka hmulo. Mahse bang chhuar a, bur chhunga mihring taksa bung hrang hrang awm diat diat chu ka enkual a, ka thinrim lutuk chuan ka bula chair chu ka pet let nghal tawp. Pawnlamah ka tlanchhuak a, inchung chohnaa ka kal lai te chuan rilru mumal ka pu lo. Ka thinrim hrikthlakna tur hi ka duh ber.

Khatiang taka tam mihring taksa an lakchhuah chuan mi engzat nunna nge an lak ang. Helai hmunah hian damdawi siamna luhchhuah turin kan kal a, mahse damdawi nilovin mihring hmanga sumdawnna zawk kan luhchhuah chu anih ber hi. First floor ka thleng chho a, police leh an mi man te an lo zi nuai nuai a, Msi emaw Lalrinzuali pawh hmuh ka inbeisei tlat bawk.

“Sir Ani hian helai hmun hi a thunun tih a sawi a,” tia ka thawhpui te zinga pakhatin a tih chuan chhang lovin ka hnek let nghal tawp a. Chhuata a tlu chu a kawrawmah ṭham in, “Dawt i sawi, khawiah nge Ronney?” ka tih chuan chupa hmela mak tihna chu chiang takin ka hmu. Ka silai phawrhin a chalah ka tin a, “Khawiah nge Ronney a awm?” ka tih chuan a hriatloh thu leh chhunah pawh a awm tawh loh thu a sawi a.” Ka phone phawrhin Msi thlalak chu ka entir a, “Ani hi khawiah nge?” ka tih chuan, “Ka hrelo,” a tih rualin a biang a ri leh nghal pawp. “Sawisak hlum i duhloh chuan a awmna sawi vat rawh.” vin tuara ka tih leh chuan, “Ka hrelo mahse chhunah khan Boss chhuah dawn khan a bodyguard pakhat khan ruang bag chhunga an dah a rawn pu chhuak, chupawh chu a ni mai thei.” a tih ruala ka thinrim lutuk insum zo lo chuan ka hnek nghal pawp pawp a, ka thawhpui ten min lo pawh ṭhen meuh chuan, chupawh chu thisen nen chhuatah a mu zawi reng tawh. “Hruai chhuak rawh u,” Ka bula miin a tih rualin police ten rawn kuah tho lawp in an chhuahpui ta nghal a.

Inchung chohna step-ah chuan ṭhu thla hnawkin, “Pindan zawng zawng in en kim ve a maw?” ka tih chuan, ka bula mi chuan An en kim vek thu leh damdawi ṭhahnem tak an hmuh thu a sawi a. Malsawmsangi emaw Lalrinzuali takngial pawh ka hmu lo chuan ka thin a tirim zualin, kan chet tlai avangin pawi ka ti vawng vawng.

Pawnlamah an chhuak sap sap a, keierawh ka ṭhut ngaiin ka ṭhu reng a, ka bulah Sanjay-a a rawn ṭhu ve bawk. Ambulance siren a ri nuai nuai a, mihring thawm pawh a tam, police motor-a nawr luh tur pawh an tam viau in ka ring.

“Ṭhianpa a pawi ka ti.” Sanjay-an a tih chuan ka lu ka bu nghut nghut a, “Kan tlai deuh a ni tiraw?” ka ti chhuak sup. An lam ṭang emaw anih tiin ka thinrimna te ka dah lian zawk a, ka che chhuak vat lo chu pawi ka ti takzet. A ruang tal hmuh duh mah ila khawiah nge an paih ang emaw an phûm bo ang tih la ka hre bawk silo. Ka tawt up up a, ka kuta ka pistol ken chu ka melh ngar a. “Ronney ka man ngei ang che,” ka ti chhuak sup a.

“Dar11 a ri dawn ania, hotel-ah kan let tawh dawn em ni ang?” Sanjay-an a tih chuan, he hmun kan hriat theihna ka ngaihtuah daih. Kan naupang chhanchhuah that turin mi pahnih an rawn kal ngei a, mahse Anni chuan an hmuh zawh tak loh avangin helai hmun hi min hruai thleng ta kha ania, Nizana Msi a rawn lang aṭanga ka ngaihtuahna kual thui zet leh ka mood inthlak sek hi mak ka ti. Eng thil mah hian ka hnuchhuina kawng hi min la dal ngailo asin, mahse Malsawmsangi vangin rilru mumal pawh ka pu theilo chu ania. Min thah a tum nia ka hriat khan ka na a, ka thin a rim a, min huatna chhan tur tam tak ka hre zawm a, chu chuan na tak chungin a lakah min ti hel a mahse a thih thu in min den rual erawh chuan ka na vawng vawng chu anih hi.

Pawnlam buaina tam zawk an chingfel tawh a, hmeichhia an man khawm kan chhan tak te zinga nichina pindan awmna min hrilhtu ka hmuh leh rual chuan pan vatin zawhna zawh ka duh thu ka sawi a, naupang an awm a ti a, tumah ka hmulo kha ania, an hruaina tal a hriat ka beisei vanga zawt pawh ka ni. He hmunah hian hnathawk tura tihluih anih thu sawi in, naupang chu chhunah pawh ala hmuh thu a sawi a, engzat nge an nih ka zawh chuan sawm emaw a aia tlem deuh pawh an ni mai thei a ti a. Ka phone bawk chu phawrh in, Lalrinzuali thlalak chu ka entir a, uluk takin a melh vang vang a, “Ka pu Amah hi a ni em ka hrelo a, mahse doctor nen an inbe lai ka hmu a, nimin piahah,” a tih chuan, “Awle ka lawm e,” tiin ka kalsan a, Rinzuali dam nia ka hriatna chuan ka rilru tawt lutuk chu tlem chuan a ti zia deuh. Dama ka hmu anih chuan a hnenah hian zawhna ka ngah lutuk tlat a ni.
Car chhunga kan luh rualin ka phone a rawn ri a, ka en chuan Rsa a ni, Hna ka thawk tih a hria a, mahse ngati nge min lo call. “Hello” ka tih rual chuan, “Airport-ah rawn kal rawn,” tiin phone a dah leh daih a, hepa hian kan misual chhuah tak te a hmu em ni? Engvangin nge Airport-ah a awm? “Sanjay Airport pan rawn,” ka tih chuan motor ti nungin a tlanchhuak ta nghal a.

14

Airport kan thleng a, Rsa leh duty lo inhnial ka hmuh chuan an bulah ka kal vat a, Rsa’n min hmuh rualin, “An kal tawh,” ti supin kan hmaa mipa chu a melh nghal khui a. “Eng nge thleng?” tia ka batch ka hmuh chuan security chu a meng buai nghal nak a. “Ronney-a a chhungah hian a lut, mahse he security hian min luh tir a phallo pek alawm le,” atih chuan, thlawhna a thlawk tawh em? tih ka zawt nghal a, a thlawh chhuah tawh thu a sawi chuan, Rsa ang tho in ka lung a awi biklo.

Airport kan chhuahsan a, Rsa’n Msi kan hmuh leh hmuhloh min zawt hmasa ber a, chhanna ka pe lo. Sanjay-a zawkin thil awmzia a sawi laia Rsa mitmeng chu ka hrethiamlo, tawrhna a ni. “Rinsangpuii ka chhan hman lova, Msi lehzel,” tiin car-ah a lut hmak a. Tun dinhmunah chuan a pawisawi tu nih a hlauhawm viau ang. Ngawirengin Hotel kan thleng a, kan luh ruala Ajay-a leh a ṭhiante lobby-a lo awm te chu nuih sakin ka pan nghal a.

“Nang mi tenawmpa,” Ajay-an a tih rualin ka hnek nghal pawp, “Phatsantu nang ang hi kan mamawh ve lo che,” ka ti nghal hluk a, Ajay-a thinrim hmel chu ka pawi sa lo, “Phatsantu chu kei nilovin Nangmah i nih kha,” tia min chhanna chu ka nuih lui a, Rsa’n min kalpelin Ajay-a ṭawng leh tum chu a rawn hnek ve pawp a, Ajay pawn chu thil chu a beisei biklo tih hriat takin a pai nghal khat khat a, thinrim zeta Rsa khawih let a tum erawh Sanjay-an a kawr awmah ṭhamin, “A tawk,” a ti vin ṭhat a. Ajay-a thawhpui mi pahnih ding ngawi reng lam chu hawi in, “Police in an rawn hruai dawn che u a, in pathum in headquarters lamin in chungthu a rel ang.” a sawi zawh rualin Police an rawn lut a, kan thawhpui pahnih an rawn kal ve nghal bawk a, Ajay-a mak ti hmel chu enin,”Tunah chuan engkim i hrethiam tawh ang tiraw?” ka tih chuan, min melh khui in, “I him bik hauh lovang.” ti zui in Police te chuan an hruai chhuak ta a.

Ka pindan zawn ka thleng a, luh mai ka tum chuan, “A ruang tal i zawng lo em ni?” Rsa’n a rawn tih chuan, ka melh zawk a, “A hnu hrim hrim engmah hmuh tur a awm lo.” ka tih chuan a pindanah a lut nghal hmak. Zing lama kan thusawi te ka ngaihtuah a, Rsa ka laka a lungawilo hi awm pawh ka ti, nizanah he pindanah ngei hian ka bulah a mu a, mahse Ani chu min thah tuma rawn kal a ni reng si a. Ka hmangaih Malsawmsangi kha Amahah a awm tawh lo, tualthattu nungrawng hmel tak a pu zawk anih kha. Ka thin a rim a, ka na a mahse a thih ka phal chuang lo. Thil engkim hrilhfiah a, Amah ṭanpui ka duh thu tal hrilh ka duh mahse a ruang takngial pawh khawiah nge a awm ka hre silo.

Mumbai kan pan a, Rsa pawhin a tawp min thlenpui a duh thu a sawi avangin min zui ve zel a, Hotel-ah bawk kan innghat leh a, Police lam kan biak lawk tawh avangin thiltih a awlsam phah sawt a. Roy Industry kan enthla a, chutih rualin Industry langsar zual te pawh an tel lo theilo. Thil chiang takin kan hre miau lova.

Ni thum zet kan awm leh hnuin Dr.Johnson-a te nupa chenna In ni ṭhin ka tlawh a, Tunah chuan midangin an luah tawh a, mahse pawnlam aṭang ringawt pawhin a chhunga chaw ei a ka kal ṭum te, Dr.Rebecca-i nu ṭawngtam lo nui hmel te leh a pasalin a hmangaih zia te ka mitthlaah a lang zut zut a, engvangin nge umzui an nih kher?

Chhan pahnih a awm thei alawm, chip vang leh an hna an puanzar hlauh vangin. Chutiang lo deuh a dang awm ta se. Msi te ina ka kal ṭum a, Msi hminga passbook ka hmuh kha ka hrechhuak zawk a, kha pawisa kha khawi aṭanga an neih nge ni ang. Hlawh tam tak neiin thawk mahse khati zat sum khawl tur chuan pawisa lakluhna dang an neih a ngai ngei ang. Medical doctor an nilova, ni pawh nise khatiang taka tam nei tur chuan kum tam tak an thawh a ngai ngei ang, fanu leh fapa an nei a, zirna hautak tak nei ve ve an ni a, Anni enkawl bakah an mamawh nen an hun neih zat ka chhut hian sumdawng mi ni tan lo chuan khatiang taka tam chu neih a harsa ve hretin ka ring.

Anni hian pawisa kha an thawhna aṭangin engtin emaw tlanbo pui ta se, khatiang taka tam chu umzui ngei ngei nachhan a tling tlat a ni.

Ka phone a ri a, ka pick up ruala, “Ronney-a kan hmu,” Sanjay-an a rawn tih chuan hmanhmawh takin min kohna hmun lam pan chuan ka kal ta nghal a. Sanjay-a te car park na ka thlen rualin an car-ah chuan ka lut ve nghal a, “Khawiah nge a awm?” ka tih rual chuan kan hmalama restaurant chu a kawk zeuh a, Ronney-a leh mipa pakhat ṭhu chu kan en ta reng a, “A chhungah sawn ka lut dawn,” tia kal mai ka tum chu Rsa zawkin min lo chelh vat a, “Msi’n thah che a tum a, anih chuan Ani sawn a hre ngei ang che, keimah ka lut zawk ange.” a tih chuan, dik ka ti. Car aṭangin a chhuak a, engpawh thleng se invenna silai a pai ve reng tih ka hriat avang leh a hna anih ve tho avangin ka ngaihtuah hran lo, mahse tunhnai chho hian a thinrim fo erawh hi chuan ngaihtuahna a tibuai ve deuh, hna ti harsa khawpin a chebuai em lovang chu maw.

Kan en reng laia Rsa ding thut leh a che vel buan buanah chuan Car aṭanga chhuah a kal ve mai ka tum chu Sanjay-a zawk chuan min lo dang vat a, “Kal suh lem a chang anih saw,” atih chuan ngaihngam vak lo hian ka ṭhu leh a, Ronney-a te ṭhiandunin an pan a, a dara kuaha an bula an ṭhuttir meuh chuan “Lalrinsang leh,” ti chhuak supin ka nui hawk, Sanjay-an, “Thluak hi chu a nei alawm,” atih chuan ka lu ka bu nghut nghut a, darkar chanve dawn kan ṭhut leh hnu chuan an pathum chuan an lo chhuak a, ṭhianṭha ber ni awm tak hian an inkuah a, an inthlah ta a.
“Kan haw thei,” Car a rawn luh ruala phur hmel zeta a tih chuan Sanjay-a a tlanchhuak nghal. “Kan umzui zel dawn lo mi?” atih pawhin, “Angailo, haw ang,” tiin a nui vur vur a, a hriat duh a hria tih ka hrethiam mai, mahse sawi lova hetia a awm kual hi ka dawhtheihna in a tlinlo ṭep. Thil ṭha lam nilo sela kan in zawt leh hmuk hmuk tawh ngei ang.

Hotel kan thleng a, ka pindanah lut lovin Rsa pindanah ka zui lut a, a thawmhnaw hlip paha, “Ka inbual phawt ang,” a tih chuan ka dawhtheihna in a tlinlo, “Lalrinsang, sawi vat teh a chhungah khan eng nge thleng?” ka tih chuan a nui hawk hawk a, Sanjay-a pawh a rawn lut ve a, Rsa nuih za hmel mawlh hi ka ngei lek lek. “Khatiang taka hre chak te chuan kawng tluan khan min zawhna hun i nei tho sia,” Sanjay-a hriatthiam tur kher a a sawi chuan an pahnih chuan an nui ṭhaw a, “Zawh kher ngailo in sawi ve mai ta che.” ka tih hmuk chuan, “Vanlal nui ve teh, thil thleng te hian nuihna chhan tur a neilo i ti anih pawn a der talin nui rawh khatiang kha chuan hna i thawk ṭha theilo ang.” atih chuan a dik ka ti.

Msi a bo tih ka hriat aṭanga vawiin ni thlenga ka ngaihtuahna ka hmang nasa lutuk hian min ti hah viau a ni. Msi ruang tal hmuh tuma ka beihna hian min ti chau zual a, ka thawhpui te tan pawh hmuh hrehawm leh hahthlakin ka awm a ni ngei ang, Rsa hi awmlo sela Sanjay-a tan tak pawh hian a hrehawm ngawtin ka ring. Boruak ka hip lut kawk a, ka thawk chhuah rual chuan lem zet hian anlam hawiin ka nui a, mak ti zeta in entawn zak zakin an nui phuh ṭhawt a, an eng ber hian nge an nuih ti za pawh ka hrelo, an nui hawk hawk chu kawng dawm meuhin ka melh tawp.

“Rp nui lui lo mai rawh i chhe emai,” Sanjay-an a tih chuan, an nui leh chiam a, chu erawh ka nui tawi ve tak tho. “I eiloh i pe na tih ka lo theihnghilh a,” Rsa’n a tih leh chuan, “Ninawm chung mai mai sawi vat teh thil thleng chu,” ka tih leh chuan a khumah a ṭhu a, “Dawhtheilo ve siah,” ti supin, “Phone ka hmang der a, ka bialnu in min bum angin ka awm chiam a, Mizo ṭawng nen ka ang chiam a, mak ka ti tak em em chu Ronney kha Mizo thlahpawlh alo ni reng a, tin, a mi biak pawh kha Mizo ngei a ni e, khatianga ka ang vel kha thil awmzia min zawtin an bulah ṭhu in ka bialnu hnamdang nula in min bum in haw na tur takngial pawh nei tawh lo angin leh ka hna aṭanga ban ni angin ka in sawi a, Ronney zawk khan a hnuaia thawk turin min sawm anih kha, mipa pakhat kha Mike tiin a ko a, Michael-a te pawh ni mahna kha pawh a hnuaia thawk tho a lo nia.” atih chuan Rsa chu ka melh vung vung a, Ani la ti ṭha inti hmel zet hian a hawi sang vah a, a awm kual vel chu Ruatpuia’n hmu sela engtin emaw tak ṭawngkamin a sawisa leh ngei ang.

Ka pindanah lutin report ka pe a, Rsa chungchang ka sawi chuan a thawhna te min zawt luam a, phone kan dah a. Ka thawmhnaw phelhin Bathroom ka pan nghal a. Msi mitthlaah a rawn lang a, kan hun hman tam tak te nen. Ka nupui ni tura ka sawm zana a hlim hmel kâra lungngaihna te khan min chenchilh a, ka lakah khatiang rilru a pu tawh anih si chuan nga ti nge vawikhat tal min zawh loh tiin a thla ka hau a, min huatna nen a thi tur ka ngaihtuahin ka chhungril hi a na vawng vawng. A dinhmunah ka in dintir a, a u thilsual tih a ngaihtuah chhuak ngei in ka ring a, Sangpuii a chan avanga a natna nen, a nu leh pa thih dan felhlel a awm hre renga a chinfel theih loh te, kei min huatna nena, natna hlira khawvel a chhuahsan tur ka ngaihtuaha ka hmangaihna in khawngaihna a hring a, min thah a tum avanga ka thinrim na te khan mahni inthiamlohna min neih tir zel chu a ni si a.

Ka inbual zo inthlakin zanriah ei hma tiin khumah ka mu zal a, mahniin thu ka tiam mawlh mawlh a ni mai. “Malsawmsang, i ruang tal ka hmu chhuak ngei ang,” tiin. Rsa’n pawnlama zanriah ei chhuah min lo sawm chuan inkhung reng ṭhaa ka hriatloh avangin insiam in ka chhuak ve ta a, hepa tak hi chu kal fo tawh ang maiin hmun nuam leh changkang pawh a lo hre leh hman ṭeuh tawh tih hriat takin tuna zanriah kan kilna pawh mi hausa ho kal khawmna a ni tih hriat takin an ei tur leh engkim mai chu a to in a nuam em em ringawt.

“Vanlal in umzui tih hi an hre ngei awm si a, Anni lam pawh hian an enthlak ve tho che i ring em?” atih chuan, “Min enthlak i rin vang em ni inchhungah pawh cap i khum tlat a?” tia ka nuih chuan, a ner nawng a, “Ka ring mahse hmun changkang takah chuan tun hi kan kal dun tawpna ni rih teh se,” ka tih leh chuan a nui vur vur a, “I pawisa ka ti hek khat em alawm, bakah chawlh la lai ka ni sia vaccation nuam tak ka hman theih nan min pui ve ni mai,” a tih chuan Sanjay-a zawk a nui leh vur vur tawh, kei erawh ka mengrum leh em em ringawt.

Engtik hunah pawh a hlim thei leh hlimna tur a hmu thei hi a fakawm in a chhuanawm ve thlawt. Thihna ruamah pawh hepa hi chuan fiamthu maksak tak sawi tur a hrerengin ka ring. Tak ngul hian awm ve ṭhin mahse harsatna a thlen tak tak a, buaina a thlenna karah hian Vitamins ṭha ber hi alo phuh chhuak leh ṭhin a, hei tak hi a ni a bula awm ti nuam em em tu. Kei angin a thinchhe ve lova, kei angin a dawhtheilo ve lo. Tûra hrai ka nih ṭum khan a thinrim viau a, mahse damdawi Inah khan min awmpuitu ber leh min tihlim tu ber ania, a bula awm tupawh hian kan ngaina anih hi, a bikin Sanjay-a hian a ngaina, a pindanah a lut sek alawm.

A tuk khua a var a, ruahman lawk angin Rsa chu insiam peih atin Roy Industry panin a kal a, eng hna chiah nge an pek dawn hrelo mah ila, a recorder tê fel at chu a keng leh thlap tawh. He thil hi khawi aṭanga a neih nge ni, a dangdai in a ṭha phian a, a chhuang viau lehnghal. A leina a sawi duh hauh lo erawh ka huat tawk a tling viau. Amah anglo zetin eng emaw neuh neuh hi a nei thei riau a, Pen chemte tih mai mai, Spy ni sela a tan a ṭangkai khawpin ka ring.

Rsa’n harsatna a tawh theih takin tiin Roy Industry aṭanga hla lo teah Sanjay-an enthlak hna a thawk bawk a, ngaihtuah ngaia ka hriat loh avangin kei erawhin hmun dang dang ka dap kual a, ka phone a thlalak ka neih te hmel zawngin hmun hrang hrang ka kal kual a, mahse khawpui lian takah hian ka mihring zawn hmel hi vang tak an ni.

Nikhatna chu keima lamah chuan engmah hmuhchhuah mumal ka nei lova, Sanjay-a pawhin thil diklo hriat a neilo, Rsa erawh staff pakhat angin Roy Industry-ah chuan thawh tir a ni a, a thu hriat thar pakhat chu Ronney-a hian share tam tak neiin thuneitu ber nia ngaih a ni, chutih rualin an Industry President erawh kan man tak Nitesh Roy-a pa Vinit Roy a ni. Nitesh-a inpuannaah khan an Industry leh a chhungte’n inrawlhna an neih ve loh thu leh a pa in a thiltih engmah a hriatpui loh thu a sawi anih kha. Industry te pawh an dap ngei a, an in te pawh an dap tho mahse engmah hmuh leh hriatbelh a awm loh avanga he Industry lian tak hi la ding a, la kal zel pawh a ni bawk.

An inrelbawl dan hre chiah lo mah ila, Vinit Roy President anih chuan Industry a thuneitu ber nihna nei tur anih laiin share holder lian ber erawh Ronney anih dan hi hriatchian hmasak ber a ngai niin ka hria.

Ka pindanah awmin ka hmaa laptop chu ka enkual a, Mizoram case lian leh te tham deuh thlengin ka chinglet a, a chhan pawh he Ronney-a hian hmingchhiatna emaw hming lanna pakhat tal a nei tawh em tih ka hre duh miau a.

Ka phone phawrhin Ruatpuia ka call a, “Ruatpui, Kum 20 hmalama inrukbo na emaw, tualthah case emaw case lian tham ve deuh record min lo pe leh thei angem le?” ka tih chuan, “I ṭha em?” a ti daih a, “Um, ka duh ka sawi kha aw,” ka tih nghal vat chuan a ngawi vung vung a, “Awle ka lo en dawn nia, Msi ruang tal chu zawng hmu ngei ang che,” a ti ve a, “Ka tum alawm ti supin,” phone ka dah nghal daih. A thusawi te kha ngaihtuah zui duh lovin, Keini department lama case ṭhenkhat ka dil te chu ka ennawn ve leh bawk a, Ronney-a hrim hrim zawng ka ni a, a khaihhnawih thei tur engkim ka ennawn bawk.

HELL PROJECT a hma pawha Anil-a sawi tawh chu uluk takin ka zirchiang a, damdawi siam dan chi hrang hrang te pawh kha he Project hunlaia mi hi a ni ngeiin ka ring bawk. Khawvel a changkang zel a, thil siam te pawh a changkang chho zel angin tunlaia ruihhlo te pawh changkang tak a ni tawh a, a awmzia chu heng damdawi te hi an upgrade ve zel ti ila a dik ber awm e. Ruatpuia file rawn thawn thar chu ka hawng vat a, Case tam tak a awm lemlo tih a hriat a, a rawn thawn chhun erawh uluk takin ka en thung.

Tualthah Case pakhat ka en a, pasal in a nupui a vawhlum a, a chhan nia a inziah dan chuan a nupui hian an fa pahnihna tur atan vai fa a hrin vanga insum zo lovin a nupui chu kut a thlak chiam anih hmel, a hliam tuar lovin an boral a, a pasal pawh Jail tan tir nghal a ni. An fate hming ka en a, Lalbiakhlua leh Lalruatmawia te an ni. Anni erawh an pi leh pute’n an enkawl niin a inziak a. Thil dang awm te erawhin ka mit a la lo. Mizoram lama kala keimah ngeiin thudik zawn chhuah ka duh a, mahse Msi tello haw erawh ka zuam ngang silo. Ka nu leh pate’n zawhna min zawt ngei dawn si a, eng chhanna nge ka pek ang ka hrelo a ni.

Zantlai tawh pawh sawi lovin Ruatpuia bawk ka call a, mak tak mai in tho thang ṭha zet hian min lo chhang a, ala muhil biklo a ni mahna. Ruatpuia hnenah chuan Lalbiakhlua leh Lalruatmawia te chanchin hriatbelh ka duh thu leh a pa jail ala tang em? emaw an chhungkaw chanchin hrim hrim a ṭul apiang hriat ka duh thu ka sawi chuan khawvar ruala a ngaihven nghal tur thu sawiin call kan dah ta a.

Ronney-a chanchin hi ka ngaihven lo a nilo mahse a chanchin kan chhui ṭanna a dikloh avangin engmah hriat tur pawimawh em em kan neilo a, thlalak kan neih a, a lanna khan he Hell Project kal zelah hian pawimawhna a nei tih mai chauh kha a ni a. Tin, neitu nihna ni pha hming lang tam tak zingah khan ṭhenkhat an boral tawh a, ṭhenkhat man an lo ni tawh bawk a, chhui zui tlak an awm meuh lo chu ania. Hming pathum chu tunah hian enthlak mek an ni thung, chu erawh ka kut anih loh avanga buaipui zuilo ka ni. Minister ni lai mek an ni hlawm bawk a, thuneitu lamin team dang an khawih tir miau a, kei chuan Ronney-a leh a ṭhuih hruai te chauh ka buaipui miau a.

Buaina zawng zawng avang chauh nilovin Msi a boral hnu hian mut mumal ka nei hauh lo, ka taksa a rim ve tawk anih ka ring ka mutchhuak in min zem ve chiai chiai a, ka khum ka deh rualin ka muhil nghal anih ka ring. Ka pindan Kawngkhar kik ri dawt dawtah ka harh a, tui taka ka muhil ve erawh ka lawm, ka taksa pawh a harh vang sawtin ka hria. Kawngkhar ka hawng a, Rsa’n, “Nga ti em em nge?” tia thingpui no nen a rawn luh rual chuan, “Tho hma bik ve a,” ti supin kawngkhar ka khar a. “Ka kaihthawh na che a rei tawh lutuk.” tia ka hmaa thingpui a lek zeuh chuan, “I siam lo chu tuilo,” ka ti nghal sup a, Ani pawh a khi ve suk mai.

“Vawiin hian Staff meeting neih tur a ni a, Roy Industry in thil thar siam chhuah a tum anih hmel.” tiin a ngawi vung vung a, a sawi zawm hun nghakin ka melh reng a. A paratha hlai zet chu roll te te in a keih hmawk a, muang lui taka ṭhialin a thingpui chu a in dawt khalh a, a chezia hi chu a ngei duh tu tan hi chuan a ngeiawm ve ṭhin ania. “Min melh reng lo khan i thingpui kha in rawh, eng nge an siam chhuah dawn ka hre biklo,” a tih chuan rum nghutin, “Hria awm deuh khan nge i awm kher,” ka ti hmuk a. Nui hawkin, “Ka awm pawh ka hre hleinem ka ngaihtuahna ka hman ve dan anih hi, ka awmdan hi min chik viau zel suh i bialnu pawh ka nilo,” a ti zek a, a ṭawngkam hman kher kher chu Ruatpuia ka ngai rum rum alawm. Kei hi chuan engtikah mah kei aia kum lama nau hi ka hnialhneh ngai dawn silova.

“Vawiin lamah eng hna nge ilo thawh ang?” atih chuan, “I chawlh kha cancel lovin official taka min thawhpuina a chhuah kha,” ka lo ti daih. “Office aṭangin lehkha ka hmu alawm, Ruatpuia’n min lo thawn a,” a ti ṭha ve mai a, “Ilo sawi em ni?” a tih leh chuan lu ka bu nghut a, chhan tuma ka kâ ka ang zuau hman tawh a thusawi avang chuan ka chip leh hmuk. “Vaccation ka hmang ka tia, i pawisa ka hman i hlauh vang a nih kha ka chawlh i cancel tir.” a ti pek a, chhan ngaihna ka hrelo. “Uikawm ve siah,” hmeichhe aw zeta a ti erawh ka thingpui in lai ka phuh chhuak ṭhawt a, “Ka hnek dawn che a mi le,” ka ti nghal hmuk. A nui vur vur a, “Ruatpuia tello hi chuan thu kher hi chuan min ngam hlawllo,” a tih leh chuan kan nui dun ta hawk hawk a. A sawi dik lutuk tlat a ni, Lalruatpuia tello chuan inhnial a ralah hian ka ngam mawlh lo, a ṭawngthei em em lam a nilo, tawite fing zeta mi hnial a thiam em bawk a ni. A thluak hmanna lam tak pawh a ni ve aniang, school a kal laiin debate naah a tel ziah te pawh a ni mahna.

Ka laptop ka On a, zing dar8 a ri der tawh. Sanjay-a hi ala tho lo nge ni, ala rawn lang miah lova. Ruatpuia message alo awm reng tawh tih ka hmuh chuan ka hawng vat a ka chhiar nghal a. Lalnunmawii sawisak anih hnuah a pasal Lalremliana chu damchhung tang tura tih a ni a, tin, an fate pahnih Lalbiakhlua chu Lalremliana nu te’n enkawlin, Lalruatmawia erawh a sawn anih avangin Lalnunmawii nu te’n an enkawl ve thung a, Lalremliana nu sawi danin Lalruatmawia chu a pa in Kum 15 anihin vairamah a hruai a, Lalbiakhlua erawh tunah chuan nupui fanau neiin Mizoramah a awm a. Lalremliana jail tang chhuah aṭanga kum 1 lekah rawng taka thah anih thu leh tun thlenga a thattu man anih loh thu a rawn sawi a, Lalremliana case pawh a hma zana a rawn thawn tel tawh thu a sawi bawk.

“Ronney-a hian Mizo hming chu alo nei ngei mai,” ka tih chuan, “I hrechhuak ta em ni?” a ti vat a, “Lalruatmawia,” ti supin ka laptop chu ka entir a, sawi tur a hrelo nge thil a ngaihtuah a ngawi leh run tawh. Lalruatmawia chanchin chhui zui erawh thil hautak tak a ni ve ngei ang. Mahse engtik niah emaw chuan a hnen ka thleng ngei ang, Msi thattu anih ngei ang tih pawh ka ring, Ani ngei hian Malsawmsangi thihna man hi a tel ngei ang.

Kawngkhar a rawn in hawng rawk a, phak chual a Sanjay-a rawn lut chu kan en dun ha a, ham bui bui chunga, “Good Morning,meeting ka miss em?” a tih chuan Rsa’n a sawisak zui ka rin nen, “Miss love kan thawhna ala rei biklo,” atih chuan Amah chu en in, “Sanjay-a bulah chuan mark score tum hle mai,” ka tih sap chuan, “Nang aiin a uikawm lo zawk,” tiin a nui lui suk a. A awmdan chu ka ngei let leh zawk tawh. A pawi sawi ve pawh hi tum ila min ti thinrim zawk daih zel chu anih hi!

Zanlama ka buaipui tam zawk sawiin vawiin kan awmdan tur kan rel a, Rsa erawh a hna lem ngawr ngawrah a insawrbing ang. Keiin Lalruatmawia chanchin ka hriat ang ang buaipui zui ka tum ang, tin, Sanjay-an Industry bawk a en thla leh dawn a ni. Anihna takah chuan kei leh Sanjay-a chu kan hmel an hriat tawh miau avangin Anmahni hnaih lutuk a kan awm a rem ve loh vanga ralkhat aṭanga hna thawk mai kan ni.

Tukṭhuan kan eikham a, mahni hna ṭheuh thawk turin kan in inṭhen ta a. Tei chhuah a buaithlak tiin rental bike ka hmang a, kal kual vel pawh a awlsam phian mai. Kan hotel aṭanga Police Station hnai berah ka lut a, Inspector awmlai a ni bawk a tiin ka hriatduh leh mamawh ang ang te ka zawt a, mahse Lalruatmawia tih emaw Ruatpuia’n a naupan lai thlalak alo thawn te chu khawiah mah hmuh tur a awmlo. Mahse chu chuan Lalruatmawia ngei hi Ronney chu a ni tih ngaihdan nghet tak min neih tir miau si a.

Police station aṭanga ka chhuah chuan inti harh pahin tiin tuipui kam lamah ka inkhalh chhuak a, Tuipui kam aṭanga Mumbai khawpui ka thlir chuan tlailam boruak nuam tak nen chuan Msi ka ngai veng veng mai. He khawpui chanchin ngah tak te hi Ani nen khan thlir dun ila, history a tui ve lemlo anih pawhin a khawpui mawi dan leh dinchhoh dan tal hi sawi ila ngaihnawm ti takin a ngaithla emaw kha a ni ngei awm si a. He khawpui hual tu thliar kar hrang hrang te hi hmuh nuam ti ber tu te zinga mi anih ve ngei ka ring. Aizawl khawpui pawh mawi ti taka thlir dauh dauh tu kha a ni miau si a. Ka mitthlaah innei tura ka sawm dawn a, a hlim hmel bawk kha a rawn lang leh a, a hlim em avanga a mittui te nen khan. Kei min neih kha thinlung takin a pawm tih he ka thinung vek hian a hre miau a, kan hlim hle anih kha. Mahse kha hun reilo te kha tunah erawh keimah chauhin ka ngaihtuah let fo chu a ni si a.

Hmeichhe rak tuar thawmah chuan ka ngaihtuahna aṭanga harhchhuak zawkin ka sir ka hawi rual chuan ka biang a ri nghal pawp a, min hnektu tha pek na lutuk leh ka lo inring biklo nen leiah chuan ka tlu nghal thlawp. A tiang kena min rawn hlap a tum erawh tawlh sawn vatin ka tho nghal at a, mipa lian deuh deuh panga ngawt ka hmaah an rawn ding a, an hmai an tuam vek avangin an hmel ka hmu lo thung. Tianga min vuak tuma min beihna chu ka theih tawkin ka sual let a, mahse a tam zawk an ni miau a, ka in veng seng meuh lo. Ka rilru chuan tlanchhiatna tur a dap reng a, ka bike awmna a hla tham a ka bike awmna ka thlen chuan ka tlanchhiat san theih mai ka inring bawk. Tun dinhmunah chuan chu chu ka tana ṭha ber pawh a ni.

A tira min rawn hnektu in a tiang a lek kan leh rual chuan a pumah ka tlawh pawp a, leiah chuan tlu in a tiang ken chu a thlauh a, chhar vatin midang ho chu ka vai nghal fua a, an tawlh hnung dawr chu remchangah la in ka bike awmna lamah chuan chak zetin ka tlan ta a. Ka bike awmna ka thlen dawn hnaiah pakhat chuan min umpha in ka ke ah a rawn hlap a, ka hmalamah ka bawk nghal thlawp. Na sawi hman ka nih miau loh avangin rang taka tho in, ka bul a rawn thlen ruala a tiang rawn vai chu man sakin kan in nawr ta ngat ngat a, midang thawm a rawn rik rual chuan ka kut lehlam chu thlah thut in a bekah ka kiu in ka tauh pawp a, leia a tlu a thawh leh hma in ka bike ah lawnin chak zetin ka tlanchhuak ta nghal a.

Ka hnunga bike-in min um tih ka hriat rual chuan ka speed ti sang belhin kan thlenna hotel lam chu chak takin ka pan a, ka phone ngawr dar dar pawh hrelo ka nilo mahse pick up na hun a awmlo. Hotel ka thlen dawn hnaih chuan ding Rsa te koh mai ka duhna chu thlakin, Anni hian kan thlenna an hre tur a nilo, ti rilru in kan hotel chu ka tlanpel fua a, kawng rem lai laiah chuan ka tlan kual a ni ta ber mai. Hmun remchang ka melh reng a, Rsa leh Sanjay-a ka dinhmun hrilh ka duh a ni. Bike speed up leh in a hma zawng aia chakin ka tlan a, an hmuh phakloh chin ka thlen chuan ka bul vel chu ka melh kual thuak a, ka piah lawka club awm kawtah chuan bike chu park in, khua a thim tawh avangin an rawn hmuh mai beiseilohna nen club chhungah chuan ka lut ta nghal a.

A chhung ka luh rualin ka phone ka phawrh vat a, thawm bengchheng zet avang chuan call hmanna chi anih loh avangin message ka thawn a, ka awmna ka sawi nghal bawk. Call a rawn lut a, ka chhang ta tho a, ṭawng erawh hriat theihloh tluk a ni, an rawn kal nghal tur thu sawiin call a ti tawp a, inchunglamah chho in min kawngkhar lam chu ka enzui reng a, kawngkhar lang thei chinah chuan ṭhuthmun ka rem a, min umtu te hmel kha ka hrelo, palian ve pangngai tak tak panga an ni a, rawn lut pawh nise ka hriat hran ka ring, inhmuh tir ve erawh ka tum hauh lo. Rsa te nghah pahin tiin zu an sem chu no khat ka la ve zat a, chutih lai chuan min um tu te ngei chu an rawn lut a, an hmel chu chiang zetin ka en a, Ronney-a misual rawih vek an nih ka ring.

Thlalaka lang ho hmel kha a pawimawh tura ka rin ho kha chu ka chhinchiah kim thawkhata, tumah an awmlo. Mahse Anni hi min that tur emaw min man tura thupek an ni tih erawh hrilh hran ka ngailo. An hawikual hruk hruk a, an inṭhen darh a, keipawh dingin ka kalsawn a, Rsa leh Sanjay-a rawn lut pawh ka hmu ve nghal. Mahse inchung chhohnaa lehlam lehlama an awm tlat avangin eng emaw a thlen phawt lo chuan ka ṭhiante hi ka pawh theilo tih ka hria. Ka veilama rawn chho zawk chu ka pan a, ka hma zawn a rawn thlen chuan min hmuh chian ve hma hauh in ka hnek let nghal tawp a, ka bul mai a hmeichhia chu a au nghal tuar a, kei erawh inhnuai lam panin ka tlan tla nghal thung. Rsa nen step tawpa kan intawk chu, “Pawnlamah, ” ka tih rualin kawngkhar ka pan nghal a, Ani pawn min lo zui ve nghal zat.

15

Pawn kan chhuah rualin Sanjay-an, “Eng nge i ruahmanna?” a tih chuan, “Kan insual ang,” tih zawng ka sawi. “Nuam dawn ve,” Rsa’n phur hmel zeta a tih chuan ka nui suk a, mi panga te hmel kan hmu nghal, zan tir tak tak anih avangin mihring an la tam a, chutia umtu kan nei chu min en meuh a kawngsira ding tawk la an tam. Pakhat a rawn tlan phei rual chuan Rsa in ring taka ding a ni bawk nen alo pet nghal pawp a, “Enteh flim chang kan ang ngaw ang,” nui vur vur a a hawi kual chu hunlo ti zetin, “Kha,” ka ti nghal hluk a, midang te nen chuan kan in sual buan buan a ni nghal mai. Panga ni mahse keini training chhuak nen chuan insualah na na na chuan min khan lo deuh a ni. Security palian zet zet pahnih in min ṭhelh tum a, min rawn pan chu lehlama mi chuan chemte phawrh in a nakah a vit ta siah a, chu chu remchangah hmangin an tlanchhe ta a, Ambulance ko tura tiin umzui mai ka tum chu Rsa zawkin min lo dang vat a.

“Kal rawh se, Anni man kha chu a ṭangkai viau lovang,” atih chuan kan awmna chu ka enkual thuak a, enthlatu nei reng ang kan ni a, fimkhur a ngaih zia hriatna a ni. Ambulance alo thleng a, kan hliam chu an phur nghal a, Police an rawn lang ve bawk a, kan nihna kan sawi hnu in Hotel lam kan pan ta zawk a.

Hotel kan thleng a, zanriah kan ei nghal a, tumah kan inbe lo, chet lak dan tur kan ngaihtuah ṭheuh a ni mai. Rsa tan pawh fimkhur lehzual a ngai takzet, keini nena min hmu tlang anih chuan, a hnathawh hi a tawp nghal tihna a ni a, ruahmanna ṭha ber nei tur pawhin eng emaw tal kan hriatchhuah a ngai bawk si. “Rs, eng emaw tal hriattur a awm tawh em?” ka tih chuan a lu a bu nghut nghut a, “Naktuk meeting neih zawh hian rawn inlan la,” atih chuan ka ngawi ngul a, ni e, min hria a, min bei a ngati nge biru chunga ka bei let reng ang.

Rsa a hna thawk turin Roy Industry a pan a, Sanjay-an enthlak hna a thawk leh bawk. Kan ruahmanna angin vawiinah hian Ronney ka ṭhawng thut dawn a, mahse man theihna erawh engmah ka la neilo. Min thah tumtu te kha a rawih ngei a ni tih hriat ka duh miau a. Midang an awm hauhin ka ringlo bawk. Tin, tun aṭanga ni reilo teah hian an hmun pui kan hrechhuak tawh ngei ang, an damdawi siamna hmun ka tihchhe tawh a, mihring hmanga sumdawnna an kalpui na hmun hi kan hre leh anih chuan engkim a tawp tak tak tawh ang.

Dar12 a ri a, Rsa’n meeting a zawh tawh thu min rawn hrilh rualin Roy Industry ka pan a, Ronney-an Industry a chhuahsan hma ngeia nan hman ka duh vanga hmanhmawh taka kal ka ni. Office ka luh dawn chuan secretary in min lo dang a, tih luih ka tum avânga security kohna tum lai chuan ka batch hmuhin ka lut tlang nghal hmiah. Pindan chhungah chuan Ronney-a, Vinit Roy leh mipa pakhat an lo awm a, mipa awm ve chu Restaurant-a ka hmuh kha ni tlat in ka hria, a hmel chu a North-East lam mah mah a, mahse Mizo a ni ve em ka hrelo.

Ka hmel hmuh an inbeisei lo lutuk nge min hmu thut chu ṭawng nachang an hrelo, ka lut chu min en tawp a, coach an dahah chuan ṭhu thla hnawkin, bawp khawkherha, “Khatiang khan em ni inleng in dawnsawn ṭhin?” Mizo ṭawng ngeia ka tih chuan Ronney leh mipa chuan mak ti hmel an pu, Vinit Roy erawh ka thusawi awmzia a hrelo lutuk tih hriat takin a hawi buai hle a, ka lo nui suk thung.

“Ka sawm nilova ka Office-a i rawn lut ringawt pawh hi i huaisen hle a ni.” Ronney-an atih chuan, “Hlauh tur ka nei em ni,” ka lo ti let hmak, nui sukin ka hmaa ṭhutna awmah chuan a ṭhu a, “Eng nge i duh?” a tih leh hmuk chuan, “Min that tu tur i ruai leh dawn anih chuan professional deuh ruai tawh la tiraw.” nui lui suka tiin chik zetin ka melh a, “Nang dahṭha tur hian tumah ka rawih a ngailo,” a tih chuan, “Mahse i ruai tho si a,” ka tih chuan nui hawkin, “Khawiah nge finfiahna, ka kawng hi dal tawh lo la i tan a finthlak a ni tih hre tawh tur i ni asin.” rawn kun hniam deuha a tih chuan, “Engtik niah emaw chuan nang hi Jail bang ka la zut tir ngei ang che, tlanchhe zel mah la khawvel tawp thleng pawhin ka um zel tho ang che.” tiin ka ding a, chhuah mai ka tum chu a ṭawngkam avang chuan ka kê pen a tawp chat. “I nupui hual ang khan i tawpna chuan eng rah ṭha mah a chhuah lovang.”

Msi a sawina a ni tih ka hria, inher leh in ka nui lui suk a, “Ilo in veng dawn nia, tuna i ṭawngkam vang pawh khan,” tiin ka chhuak ta hmak a. Msi a thi tih a sawina tih ka hailo a ruang awmna zawh nghal rum rum ka duh laiin he hmunah hian phalna neilo leh eng finfiahna mah neilo a lut ka ni a, engkim ka tibuai thei tih hria in ka insum hram hram a ni. Building ka chhuahsan rualin Sanjay-a phone a rawn ri a, “Sir address ka lo thawn che ilo kal angai,” a tih chuan ka bike ti nungin Sanjay-a sawina hmun lam pan chuan ka inkhalh chhuak ta nghal a.

Kan hmaa Factory hlui ve tawh tak chu kan thlir dun a, “He hmun hi tih i chiang maw?” ka tih chuan a lu a bu nghut nghut a, Factory awm dan vel te kan duh ang tawka kan thlithlai hnuin Hotel-ah bawk kan let a, kan chet lak dan tur report pe in, a tuka kan thil tih tur ngaihtuahin hun ka hmang a, ka silai ka tifai mawlh mawlh laiin Amit-a te nupa in min lo call a. An naupang enkawl fa atana lak an duh thu an rawn sawi chuan ka nui ve suk mai. Hun rei tak fa an neilo a, kha naupang kha enkawl se an nupa leh naupang tan khan a ṭha ber reng a ni.

Mumbai kan thlen aṭangin ni 5na a ni a, vawiin hian engkim hailan a ni tawh ngei ang. Sanjay-a nen Police Station kan pan a, Rsa pawh nidang ang bawkin enthlak hna thawk turin Roy Industry a pan a, vawiin chu bike keng a duh avangin Sanjay-a rualin ka kal thung. Police Station kan thlen rualin search warrant an neih tawh leh tawhloh ka zawt a, engkim peih a ni tawh tih ka hriat rualin Roy’s Factory panin kan chhuak ta nghal a.

Darkar eng emaw zat kan dap hnuah pawh engmah hmuh leh pawimawh hriat kan neih tak loh avang chuan beidawng ru zet hian let leh mai tumin pawnah kan chhuak a, ka phone a rawn rik chuan number a rawn lang a, hello ka tih ruala nui ri ka hriat chuan ka kut ka hum ruh ngawt ngawt ringawt. “Eng chu nge i hmuh chhuah Detective?” Ronney-a’n min elsen zeta a rawn tih chuan, “Hmuh chhuah ka la nei em em ang,” ka ti hmuk a, “A ṭha lawm, nangni ang a huna bansan nachang hrelo hi in khawngaih thlak, a tawpah beidawnna chauh in chang leh ṭhin a,” tiin a nui huah huah a, a ṭawngkam tin min khei lutuk chu chhan let ka duh mahse ṭawngkam nilovin thiltih hmang zawkin ka la chhang let ngei ang.

“Duhtawk tawh mai rawh, anih loh chuan i nunna khan a tuar ve palh ange.” rum ula a tih leh chuan min hmu thei miah lo mahse ka nui suk thung, ka hnaih tawh hle tih ka hrethiam bawk, chu chuan min hlau tih a ṭawngkamah a hriat bawk. “A tawp te chu kan thleng ve ang chu tiraw?” ka tih rual chuan phone a tawp nghal hmak. Motor chhung ka lut tur nu upa ve lamin min rawn pawt nawk nawk a, car phena min dinpui chuan, “Ka pi pui theihna che ka nei em?” ka ti vat a, a mit a sen ram a, ka hmaah kut vuanin a ding a, “Ka pi engmah hlau suh engkim min hrilh vek rawh,” ka tih chuan, “Ka fanu chhanchhuak hram rawh,” tiin a inhnit hlawp hlawp a.

“Ka pi ṭap lovin i fanu chanchin chu min hrilh teh,” ka tih chuan Factory a hnathawk an nih thu leh a fanu zirna senso tur an neih loh avanga an thawhpui thurawn anga a kal hralh mai a tum thu sawiin, kal hralh tura inremna an ziah fel hnu lawkah a fanu a bo thu te, Police Station-ah report thehlut mahse ni 2 hnuah pawh eng chanchin mah an hriat loh thu a sawi chuan, ringhlelh emaw an hruaina tal a hriat leh hriatloh ka zawt a, kan piaha Store room nia an sawi chu a kawk ta mai a.

“Ka pi i chiang maw?” ka tih chuan, “Aw ka chiang midangin an hmu a, Police hnena ka sawi khan min ngaihven sak duh silova, ka mangang em a ni.” a tih leh chuan

Sanjay-a ko in, Store room chu kawk in hawng turin ka ti a. Inspector kan hruai chu ka bulah rawn kalin, “Sir kan haw dawn emaw ka tia,” a tih chuan, “Store room saw en ka duh,” ka tih rualin police dang ho chu an ri nghal nak nak a. Hnathawk zinga an hotu ve deuhin, engmah a awm loh thu leh bungrua an dahna mai a ni tih a sawi chiam te chuan en ka duhna a ti zual tulh tulh thung. Kawngkhar kan hawng a, ka luh dawn chuan, “Sir hei chen kan dap a engmah kan hmu lova, hetah pawh engmah a awm ka ringlo, khanu khan thudik a sawi pawh ka ringlo,” a tih chuan ka melh nghal khui a.

“Tu khanu nge i sawi?” ka tih rual chuan a mitmeng a buai nghal nak a, a chhunglamah chuan ka luhsan ta zawk a. Inchhung chu a thim deuh ruih a, store room anih angin bungrua pawh an dah hnem angreng viau a, mihring emaw finfiahna eng emaw tal beisei in kan enkual uluk hle a, mahse a chhung a zau in a thim bawk nen kan duh ang hmuh tur a vang takzet.

“Sir” Sanjay-a min kohna lamah chuan ka phei vat a, bang chu a kawk zeuh a, uluk takin kan en a, “Ka ngaihtuah ang hi i ngaihtuah ve em?” ka tih chuan a nui sung a, constable pakhat chu ko in, “Bang vuak chhiatna tur hi zawng rawh u,” a ti nghal hluk a, hmanraw ngaihvena an kal laiin silai a rawn puak a birukna tur dapin kan tlan darh nghal a, hetianga chhun lehnghal a silai nena min bei let anih chuan kan thil tih tur hi a dik tih a hriat. Police squad koh belh tura tiin min rawn kap tu te nen chuan silai kan hmet puak tawn reng a, Sanjay-an ka piah aṭanga, kut zai zira mi panga a hmuh phak thu a sawi chuan, midang ho signal in kan hnaih hret hret a, pawnlam aṭanga police motor rawn ri nen, kan in kap leh meuh zawng kan tam hneh em a, an inpe ta nge nge a. Silai hliam kan nei nual a, anni lam pawh an bang chuang lo.

Midangin hliam leh thi te an buaipui laiin keini in kan hna ngai kan thawk zawm a, Bang an vaw chhe zo meuh chu, ṭhenkhat an uak tuar tuar hlawm a, keipawhin hmui hupin chulai chhung thisen thang huam huam nam chu ka enkual a. Inzaina dawhkan pathum ngawt a awm a, Goa-a kan hmuh ang chiahin taksa bung hrang hrang bawm chhungah a indah khawm a. “Sangjay ngati nge hetiang hlir hi anih, khawiah nge damdawi siamna hmun tak hi ni ang?” tia thaw hawka bang ka enkual a, ka thin a rim a ni ber. A ngai bawka mihring hmanga sumdawnna hetiang taka kalpui na hmun ka hmuh hian ka thin a rim takzet.

Kan mi man zinga pakhat chu a kawrawmah ṭham kang nawkin, “Khawiah nge mihring in man khawm te in dah,” ka tih chuan, a lu thing nur nurin, “Ka hrelo ka pu,” atih chuan a dar hliam zawnah chuan ṭham sakin zawhna ngai bawk ka zawt a, “Ka pu ka hrelo tak tak alawm, ni hnih liam ta khan he hna hi chawlh rih tur tih thupek kan dawn avangin bang pawh hi siam kan ni.” a tih chuan, ka thlah thut a, leiah a tlu nghal thlawp a. Sawisak hrep ka chak, tumah hian ka thil hriat duh min hrilh thei dawn lo chu ania.

“Sanjay, Vinit Roy arrest warrant dil rawh, Ani hian engkim a sawi em em ang, he hmun hi a ta a ni a, he thilah hian a chhuak tur a ni hauh lo. Tin, kha chip a langsar zawng zawng pawh man vek ni rawh se, zawhna zawh vek ka duh.” ka tih chuan, Awle tiin a kalsawn a, Kan misual man te an phurh chhuah hnua Ambulance te an tlanchhuah hnuah Factory zawng zawng seal a ni a, Hnathawk tam zawk pawh zawhna ka zawh duh vangin haw lovin pawn lamah an la awm a, a theih chin chin zawhna in zawt mah ila, he hmun hetiang an kalpui tih hria hi tumah an awmlo, mahse chuti chung chuan ringhleh man erawh pasarih ngawt kan nei tho.

Reporter ho tling hmur chu kalpelin Hotel lam pan phawt ka rawt a, khua a thim tawh a, nilengin engmah kan eilo nen ril a ṭam ve tawh takzet. Hotel kan luh rualin pindana tlang lovin zanriah kan ei a, zan7 a ri der tawh. Rsa’n nilengin min lo be lova, kan chanchin pawh a hriat tawh ngei ka ring a, min rawn ngaihven ka rin rualin a rawn lang ta miah lo kha ania, a pindanah a awm anih ringin kan chaw eikham rualin pindan ka pan a, ka room a lut hmasa lovin Rsa room chu ka kik hmasa a, a chhunglamah thawm a awm miah lo tih ka hriat chuan ka kik nawn leh Sanjay-a pawh ka bulah a rawn ding ve run a, hepa hi ala haw lo a mi le?

Ka phone phawrhin a number-ah ka call a mahse chupawh a pick up thei hauh lo nia. “Sanjay call ve teh, tun ang hunah alo haw lo ngai miah lo,” ka tih chuan a call ve nghal a mahse chupawh a pick up hauh lo. “Kawngkhar hi ka tichhe mai dawn mi,” a tih chuan, “Ngailo, inhnuaiah zu hrilh zawk rawh chahbi spare an kawl ang,” a tih chuan Awle tiin a chhuk ta nghal a. Hnathawk pakhat chahbi keng rawn kal chuan pindan kawngkhar chu a hawng a, light a on nghal zat a. Pindan chhung ruak vek lo chu tumah an awm lo. Ala haw lova call a pick up heklo, Ani hian buaina a tawk a ni thei mai angem?

Station lama let leh tur kan ni a, zanin kan buai zan berkher a Rsa rawn haw lo hian chhan a neih ngei ka ring. Nge ni a, Ani hian a enthlak hna a thawh avangin kan biakna a chhang theilo zawk. Hnathawk hnenah chuan ka phone number pe in, Rsa a rawn haw chuan min lo hrilh nghal turin ka ti a. Eng emaw vangin a phone a ti bo pawh a ni thei tho bawk tia ka number dah pawh ka ni. Pindanah lutin hmanhmawh takin ka inthlak sawk sawk a, kan mi man te buaipui turin Police Station lam kan pan leh ta nghal a.

Kan mi man te kan dawp a, zawhna tam tak kan zawh hnu pawhin damdawi siamna hmun tumahin an hrelo hi mak ka ti, he khawpuiah ngei hian a ni Dr. Johnson-a te nupa khan hna an thawh, Anni khan heng mihring taksa peng lakchhuah hna hi an thawk zawk tihna em ni, mahse Anni doctor nih dan kha chu damdawi siamchhuahna lam a ni si a. Hmun pahnih kan dap tawh a, mihring hmanga sumdawnna ve ve a ni a, damdawi chhuak thar siam chhuahna hi khawi hmunah nge a awm ang le?

Police te kutah dahin rihin Sanjay-a nen pawnlamah kan chhuak a, “Rsa call i dawng tawh em?” tiin ka san ka en nghal zeuh a, Zan dar9 a pel der tawh. “Aih la dawng miah lo.” atih chuan, “Police kutah dah ila kan ngaihven dawn em ni ang?” ka tih chuan a lu a bu nghut nghut a, ka ngaihtuah lo a nilo, inchingfel thei tur anih ka hriat rualin helamah hna kan lo nei ve bawk nen ngaihven har ka ni, mahse tun ang hun thlenga chanchin ala rawn sawi lo erawh ka ngaih a ṭha tehchiam tawh lo.

Kan chhuah tur thu hrilhin thu hriat emaw in puan an duh chuan min rawn hrilh vat tura inchah in station kan chhuahsan a, Roy Industry lam panin Sanjay-a nen kan inkhalh chhuak ta nghal a. Gate a inkhar tawh a, pawnlam light a eng pheuh pheuh tih loh eng a tlem a, kan tan chulai hmun enthlak kual pawh thil harsa ni hauh lo. Hmuntinah CCTV an dah a, chu erawh chuan gate chhunglama luh a ti buaithlak a, luh rukna tur pawh a vang raih raih khawp mai. Kan kal kual zel a, Garrage pawhna lam gate-ah chuan Sanjay nen chuan ding dunin Garrage aṭanga luh theih dan a awm mial takin luhna tur kan melh dun a, chupawh a vang takzet.

Sanjay-a chu a hawl kual hruk hruk a, a kil lam chu a kawk zeuh a, ka en chuan CCTV in a lak phaklohna chin anih ngei reng, Ani pawh hian ka ngaihdan ang tho hi a nei ve tih hriat taka banglam min kawhhmuh pawh anih ka ring. “Kan lawn liam thei ang,” ka tih chuan, “A chhungah Camera te hi dah a ni tho awm si a, back up kan call mai dawn a mi?” a tih chuan engmah hmu lo ta ila back up call ringawt kha fuh dawn a ka hriatloh avangin, lut phawt ang tiin gate kil lamah chuan ka lawn ta a, a sang ve bawk nen Sanjay-a ṭanpuina in ka lawn kai a, Ani pawh ka pawt chho ve nghal a. A palian in, a sang bawk sia lawn tur pawn kan inbuaipui leh fe mai. Gate chhunglam kan lut chu a nui kur kur a, a lam ka hawi chuan, “Rsa nen ni ila, kei aiin a nui nasa ang,” a ti vei hmuk a, keipawh ka khi ve suk mai.

Garrage tawn tira Rsa’n ka bike hawh sa a ken ngei ka hmuh rualin ka silai ka phawrh vat a, harsatna a tawk ngei anih ka ring bawk. “Sir kan thil zawn ber hi he building chhungah hian a awm ka ring tlat,” Sanjay-an a tih sur sur chuan ka lu ka bu nghut a, keipawh in chu chu ka ring ve deuh. Garrage a thim em avang chuan indap chawp tak meuh meuh in kan kal a, building chhawng hnuai ber kan thleng chho a, light an off kim vek lo tih ka hriat chuan kan fimkhur zual sauh.

Pen hnih thum kan pen hman awr ang tihin mi pahnih silai keng inchung step aṭangin an rawn chhuk a, Sanjay nen chuan bangah kan biru vat. Mak ka tih ang chiahin mak a ti ve tih hriat zetin che lovin chumi te pahnih kan lam pana rawn kal te chu alo en reng a, kan zawn a rawn thlen dawn chuan pakhat chu a pawt sawn rawk a, a ring a ri ta rawk si, chet a la dawn tih ka hriatchian em avangin keipawhin ka lama mi chu thawm chhuah hman lovin ka siam ve hman. Sanjay chuan, “Khatiang a ring kha herh tliak ve mai ta che,” a tih chuan ka melh zawk a, a lama awm pa chu nikhaw hrelo in maw a siam ve tih laiin a ring alo herh tliak reng nia. Hepa kutthlak na lutuk hi chu a chang chuan a buaithlak ṭhin.

Thawm dim tak bawkin inchung kan pan leh a, mihring tawh kan neih pawh ka thur zeuh zeuh a, chhawng thumna kan chhoh dawn chuan “back up call tawh rawh le,” ka tih chuan min melh hu a, “Message khan thawn mai la, an hmu em em ang,” ka ti leh a, a phone a type zat zat a, a thawn zawh rual chuan kan chho ta nghal a. A chhawng chung ber a ni a, Ronney-a te ka hmuhna pindan kha kan hmaah a awm a, chu lo pindan awm chu a thim vek a, Ronney-a te pindan pawh eng chhete chauh a rawn chhuak. Kan pen ṭham ṭham a, Kawngkhar zawn kan thlen lai tak chuan current a rawn eng pup a, kan hmaa kawngkhar pawh a rawn inhawng nghal bawk.

A chhunga Ronney-a hmel ka hmuh chuan ka silai dahthla in ka lut nghal a, Sanjay-a erawh in a pistolin ala tin reng tho. “Factory thuhruk hmuchhuak tu chuan helai hi i rawn hmuchhuak har dawn lo tih ka hria alawm.” tiin a ṭhutna aṭanga dingin min rawn pan a. Keiin ka silai in ka tin ve thung. “I hun a tawp tawh inpe la, in nunna ka zuah ang,” ka tih rual chuan a nui huah huah a, “Chuti maw!” tiin ka hnunglam chu a kawk zeuh a, Sanjay-an, “Rs” tia pawnlam a pan nghal vut chu ka enzui a, building lai takah chuan Rsa chu an khai a, a hmai vela thisen kai nuai nen a chauh hmel takzet. “Hmela,” tiin ka silai chuan a lu ka chuktuah a, “I duh chuan min kap thei alawm, mahse Ani saw a thi ve nghal ang,” a tih rual chuan Rsa thlakna tur thui zet ka ngaihtuah nghal zat.

“Heti hian ti ang, Ani saw nge Amah hi,” a ti ruala a pindan chhunga bang pakhat chu a che ruai ruai a, glass chhunga Msi hmel ka hmuh chiah chuan ka ding khawng nghal at. Kha hun chung zawng khan thi lovin Ani hi hetah khungbeh a ni tihna maw, Rsa hian a hria angem, a hriat vanga tal awk nge anih a tihsual pakhat an man chhuak zawk? Rsa lam chu ka hawi a, “Engtin nge?”ka tih sup chuan, Ronney chu nui sukin, “A tir aṭangin ka hria, Panaji-ah khan ka hmu daih tawh zawk.” atih chuan thinrim zetin a kawr awm ka ṭham a, anin alo thing thla hmak. “Engkim kha thai bo la, i case buaipui hi ti tawp rawh chuan anni hi ka chhuah ang.” a tih chuan hnek pawp mai ka duh.

“Hei lo pawh i tan surprise ka la nei ania,” atih chuan Rinzuali ka rilruah a lang zawk a, a damlai ngei hmuh leh chu ka thil duh ber a ni. A sawi zawh ruala pindan kil lama kawngkhar a rawn inhawn rual chuan Rinzuali ngei a kut phuara a hmui tuam chungin mipa pakhat hian silai tinin a rawn hruai chhuak a, Rinzuali hmel ka hmuh leh meuh chuan chesawn lovin ka melh ran a, Ani pawhin min hmuh leh avanga lungchhia tih hriat takin a mittui a tling pam a, Ronney-a dinna zawn an rawn thlen chuan chair-ah a ṭhuttir a mipa rawn hruai chhuak tu chuan a dinchilh run a, Rinzuali lak aṭangin ka mit ka la sawn hauh lo. Ka hmuh lai ngeia kahhlum a ni a, a ruang pawh kan vui thlap anih kha, mahse tunah ka hmaah hliam leh na neilo in ka hmu a, ka khawih thei lova zawhna takngial pawh ka zawt thei heklo. Engkim hi mumang a ang rum rum ka ti a, mahse a tak vek a ni si.

“Duhthlan tur pahnih chiah i nei, Anni nunna hi ka zuah dawn nge, engkim i tawp dawn?” Ronney-a bawkin a tih leh chuan, ka ngawi ngul a, Rsa an thlunna phelh zur zur ah chuan Sanjay-a a au nghal tuar, “Duhtawk rawh,” ka tih rualin Rsa an thlunna hrui chu a ding ve chat a, hrui chu an khai chho leh a. “I duh angin engkim ka ti tawp ang, mahse an pathum hian nung damin ka duh.” ka tih chuan a lu a bu nghut a, ka phone phawrhin Station ka call a, kan mi man zawng zawng chhuah vek turin ka ti a. Mahse ala duhtawk mai lo, Headquaters lama report pe tura min tih chuan Sir Anil ka call leh a, report tur engmah a awmloh thu leh kan ram chungah engmah a awm lova ram pawnlam aṭanga engkim lokal anih thu ka sawiin phone ka dah a.

Ronney-a hlim hmel zet chu hnek pawp lo turin ka insum nasa takzet. “Ka duh angin i ti tawh bawk a, a vawikhatna anih angin ka kal tir ang che mahse min chhui zui emaw ka hna kalh zawnga ka hmu leh che anih chuan nang leh i chhungte nen khan tumah in him lovang,” tiin Msi an dahna aṭang chuan a hruai tir a, Msi rawn chhuak ka hmu zet chu ka chhungril hi a na vawng vawng thei, a hmai dang bai te, engmah a hre mumal lo tih hriat zeta kaih chawp a ngai te chuan min ti na takzet. Rsa te lam ka hawi a, an la thla ve chiah bawk a, Sanjay-a nen inmelhin ka hma, a mipa Msi rawn hruai chhuak tu chu ka tlawh nghal pawp a, ka chetdan chu tumah an inring biklo tih hriat takin ka chet nawnna pawh chu an in veng hman meuh lo. Pawnlamah la Sanjay-a thinrim a tal buan buan tawh mai si, Palian lutuk thinrim chu Ronney-a guard te chuan an ngam vaklo tih hriat takin an ri thum dawp dawp hlawm a, pawnlamah police siren a rawn ri a, Ronney-a’n thinrim taka Rinzuali a pawt tho lawp ruala ka pan hnaih chuan a lu ah silai in a tin nghal a, “I rawn kal hnaih leh chuan ka kap ang,” a ti vin nghal tuar a.

A hma nia ka lo hmuh tawh Mizo mipa kha rawn lutin, “Helamah a tih chuan,” an pathum chuan chulam pan chuan an kal a, inchhunglamah police an rawn lut tawh tih hriat takin an thawm a ri ṭak ṭak a, ka hmaa Msi mu reng chu kun hniam vatin ka sawi nawk nawk a, mahse a harh thei hauh lo, “Sanjay Ambulance ko rawh,” ka tih chuan ka bulah rawn ṭhu hniam in, “Ka ko tawh, umzui rawh ka lo buaipui ang,” tiin a pawm kang nghal lawp a, kei Ronney-a te kalna lam panin ka tlan ve nghal.

Lift rawn chhoh leh hun ka nghah theih miau loh avangin step-ah ka tlan thla a, building hnunglam chhuahna ka chhuah ruala silai ri ka hriat chuan chulam chu ka pan vat a, Silai a rik leh ruala Rinzuali silai nena ding khur ngat ngat ka hmuh chuan a bulah kalin a silai chu ka laksak vat a, a hmaa nunna nei tawh lo tih hriat zeta tlu hlawm reng Ronney-a chu en zeuh in, “I ṭha em?” ka tih rual chuan min kuah thlawp in a ṭap nghal hliam hliam a. Kum tam tak hnua a taksa ka khawih leh thei hi awmdan ka thiam lo, mipa tan pawh lawm avangin ka mittui a tla lo chauh a ni e. Thi tawh riaka ka ngaih, kum tam tak ka sun ngei ka hmaah dingin min kuah leh chu ania, ka venhim zawh loh avanga mahni ka inthiamlohna te kha ka thinlungah a thar a, sawi ber tur hre silovin min kuah tu chu ka kuah let ve reng ringawt.

“Min ngaidam rawh aw,” ka tih chuan ka kuahna aṭanga awm hla in ka mitah chiang zetin min melh a, “Hrilh tur che ka ngah lutuk,” a ti sap a, keipawhin nung dama a awm theih dan te, kha ruang kan vui liam tak kha tu nge tih te hriat vek ka duh. “Engkim a ṭha vek tawh alawm,” ka tih chuan, “Mipa kha ka kal tir anih kha,” a rawn tih chuan, ka hmuh avanga ka lawm hamhaih bawk si in an chhuahpui mipa kha ka lo theihngilh daih alawm, “Ani khan a hma aṭangin min ṭanpui ṭhin a, tunah pawh Ama min puihna liau liau in, tunah pawh ka chhuak thei a,” a tih chu ka lu ka bu nghut a, “Sir” rawn titu lam chu kan hawi a, Sanjay-a leh police pahnih te rawn kal chuan Ronney-a ruang chu en in, “In ṭha em?” a tih chuan, “Um lo tifel mai rawh u aw,” tiin Rinzuali kuah chuan ka kalsawn pui ta nghal a.

News zawng zawngah kan hnathawh an puang a, India rama mihring hmanga sumdawnna bu pui haichhuah a ni tiin, tin, Ronney-a Office hnunglam aṭang khan inchung chhohna alo awm ngei a, chu hmunah chuan darkar 24 chhung hnathawk an lo nei bawk a, damdawi siamchhuahna hmun pawh a ni ngei tih damdawi tam tak leh hnathawk tu manchhuah aṭangin hriat a ni a, Ronney-a a thih tawh miau avangin Vinit Roy a chungah engkim a tla a, a bul ber erawh Ronney-a a ni a, tin, shareholder hming kan neih te pawh media lamah tihchhuah a ni in, court in ro a rel sak ngei ang. Roy Industry a thawk a bikin damdawi siamna hmuna mi ten an sawi danin tihluihna hmanga chhawr vek an ni a, an thawk duh lo anih chuan an nunna in a tawrh thu a vau vek an ni.

Engtiangin nge Court lamin a rel dawn hrelo mah ila, thilsual titu te erawh a chhuah hauhin ka ringlo.

Msi, Rsa leh Rinzualinte damdawi inah dah an ni a, damdawi in an awm aṭangin ni 4 ngawt a liam leh tawh bawk. Rsa pawh a harh tawh a, a sawi danin an man ni khan Msi a hmuh avanga enthla zui a, man an nih thu a sawi a, Msi chanchin a hria erawh hrehawm a tih hmel takzet. Kei pawh hian hrehawm ka ti a ni. Doctor sawi danin damdawi chak tak pek fo a ni a, a harhchhuak tawhlo mai thei, a harhchhuak anih pawhin pangngai taka a khawsak leh theih a beisei tawh loh thu a sawi anih kha. ICU ah dahin Oxygen nena enkawl mek a ni a, nitin Amah hmu turin ka kal fo a, mahse ni 4 a liam hnuah pawh eng chanchin mah ala awmlo chu ania. Rinzuali erawh a rilru lama harsatna a tawk tih loh a hriselna chu a ṭha thawkhat niin doctor in a sawi. Rinzuali pindanah ka lut a ka hmel a hmuh rualin a nui sang a, a bul ka thlen rual chuan, “Min hruai haw thei tawh la ka ti,” tiin min nuih sen sen a.

16

Ka hmaa engmah hrelo a, Msi muhil chu ka melh reng a, hetianga siamtu hi nungdamin hmachhawn duh viau mah ila Ronney-a ber a thi tawh miau si a. A hnenah khan zawhna ka ngahin, a taksa hliam sak duh mah ila ka zawhna tam tak chhanna neitu anih avangin thi tur chuan ka duh hauh lo, mahse khatiang kha an dinhmun a ni miau a, Rinzuali pawh ka dem thei chuang lo. Mahse Amah puitu, Ronney-a nena kan hmuh dun fo mipa Rinzuali’n a tlanbo tir erawh a rukin ka ngaihven a, a hmel kha chiang takin ka hmulo, kha zan kha kan inhmuh chian theihna ber tur hmun a ni a, mahse thim chinah a ding a, chiang takin ka hmulo anih kha, Rsa erawh in a hrechiang viau tho in ka ring.

“Ms, Delhi-ah a tawpna engkim ziak fel tura ka kal angai a, ka lo let leh hunah chuan lo harh tawh rawh aw,” tiin a chalah ka fawp vawng vawng a, harh tawh se ka ti takzet. Anu leh a pate ka hriat thu te, ka tana an hlut zia te, a chhungkaw thattu ka nih loh thu te hrilh ka duh mahse vawiin ni thlengin chanchin ṭha lam reng reng hriat tur a nei ve silo. Damdawi Ina karkhat an awmna chiah a ni, vawiinah hian Rinzuali erawh a chhuak thei dawn a, Ani nen pawh hian sawi dun tur tam tak kan nei, chutih rualin doctor thurawn angin a rilru ti hrehawm zawnga ṭawngkam hman erawh ka tum hauh lo. Tin, Mizoram lama a chhungte bula haw a duh pawn ka hruai haw ngei ang ka mawhphurna a ni miau a.

Rsa pindanah ka lut a, Sanjay-a nen an lo nui leh huk huk tawh a, engtak sawi ang maw. Sanjay-a phur danah kha zana an insual dan a sawi anih hmel. Rsa’n, “Insual thiam tak i ni,” a tih ka hre hman miau alawm. Ka hmel an hmuh rualin Rsa chuan, “Delhi-ah in kal dawn maw?” a ti nghal var a, ka lu bu nghutin, “I ṭha em?” ka tih chuan, a ban veilam ruh tliak an tuam var luk chu en in, “Hei tih loh chu ka ṭha tawh viau e,” tiin chik zet hian min melh a, “Eng nge?” ka tih hluk chuan, “Msi a ṭha em?” a ti nghal zat. “A ngai reng,” ka tih chuan a hmel a ngui deuh lap a, Rinzuali kan hmu tel tih a hre tawh a, mahse vawikhatmah a chanchin min la zawt lo hi a mak ka ti.

Sanjay-a zawk chuan, “Rinzuali chhuah ni a ni a, Ani hi engtianga tih nge i tum?” a tih chuan chhan mai ngaihna ka hrelo. Rsa pawh chuan ka chhanna nghak tih hriat takin min melh ve ran a, “Ka hre mai lo, Ama duh dan pawh ka la zawt bik lova, Mizorama haw a duh pawhin ka hruai haw mai aniang chu,” ka ti ta ringawt a. Ka rilru diktak pawh a ni, a duhdan engmah ka hre miau silova. “Ni e, kum10 dawn thi tawh riaka an ngaih an fanu hmel hmuh leh chu a chhungte pawh an lawm ngawt ang,” Rsa’n a ti ve a, mahse a hmel landan hi ka hrethiam lo, Rinzuali hi a hua nge Msi ka thlauh thlak a hlauh vanga hetianga awm tih pawh ka hrelo.

Rsa te nen kan inbiak zawh hnu in Rinzuali an dahna pindan lamah ka kal leh a, pindan ka luh chuan hmana ka hmeichhe hmangaih, hmelṭha leh duhawm tak, a nui hmel ka hmuh changa ka hlimpui em em ṭhin khan min lo nuih var var a, mahse tunah chuan Msi a awm tawh miau avangin a nui hmel te chuan keimaha lawmna hi a ti famkim tawh lo. Chu erawh tih lan kher ka tum lo, Msi harhchhuak lova ala awm avanga ka hrehawm tihna hi hre ve kher turin ka duh heklo. “Ilo thleng tawh maw?” tiin ka hmaah dingin min kuah vawng vawng a, chu ringawt pawh chuan keimahah inthiamlohna min neih tir hial mawle.

Kan inkuahna kan thlah hnu in, “Kan chhuah hmaa i awmdan tur sawi angai a,” ka tih chuan a nui hmel a reh riai riai a, “Ka tana ṭha ber tur i hria lawm,” a ti zawi sap a. A banah kaiin ṭhutna awmah chuan ka ṭhutpui a, “Mizorama i chhungte bula haw i duh em?” ka tih chuan a kun chhal a, min chhang lo. “Rin, min chhang teh?” ka tih chuan, mittui tling pam hian min en a, “Ka chhungte hian min lo lawm angem? A hma pawhin min lawm silova,” atih chuan kan tunhma nun ka ngaihtuah a, an chhungkaw dinhmun ka ngaihtuah chhuak a, a tan hian an ina haw hi a ṭha chiah angem tih ka ngaihtuah a.

Rinzuali nu hian pasal dang neiin a pahrawn sual avangin vawi tam tak a tlanbo ṭhin a, Anu hian a chhan ngam ngailo niin a sawi ṭhin. Engtiang takin nge an in nghir ngho ṭhin tih hrelo mah ila, Delhi aṭanga kan haw khan inneih kan tum a mahse palai takngial pawh an dawnsawn duhloh avang leh a pa hrawnin ka tuithlar tawh a tih avangin a pi leh pu te hnena palai kan ni a, tunah la a pi leh pu te an boral tawh a, A putea’n inpui a nghak a, chu la Rinzuali’n a ngaina lo tih a sawi tawh bawk. An chhungkaw dinhmun avanga haw ngailo anih thu te a sawi ṭhin anih kha.

“Engpawh nise thildang chu kan la sawi dawn nia, ka kutah ngei i ruang kha ka khawih a, ka hmaah ngei vuiliam i ni a, engtin nge i dam theih?” ka hriat chak ber anih miau avangin ka zawt ta tawl a. A mitmenga natna rawn lang chhuak ka hmuh avang chuan ka thusawi avang chuan ka inthiam lo nghal mahse ka zawt tawh miau sia. “Kum10 chhung thil thleng zawng zawng nen khan thawnthu sei tak a ni, mahse hmana ka hmangaih Lalrengpuia kha ila ni reng, dawhtheilo leh nghak peihlo deuh kha,” tia a nui hak chu za lo zetin ka nuihpui ve a.

“Ka hrelo khami nia thil thleng leh a hnu karkhat hnu daiha ka harhchhuah dan kha ka hrelo a ni. Ka hriat zawng chu hun rei tak Doctor nupa in min enkawl a, ka hriselna leh ka dam khaw chhuah theih nan an theih tawp an chhuah tih kha, Anni kha Mizo an ni a, min enkawl nasat em avang khan hmuh leh pawh ka duh takzet.” atih chuan Dr.Johnson-a te nupa bawk ka lo ngaihtuah leh hman tawh. “Engkim ka la hrilh ang che, mahse tunah chuan ka tana ṭha ber tur nia i hriat chu min hrilh ve phawt la,” nui sen sen a atih leh chuan, “Delhi-ah ka rualin i lokal ve duh em?” ka tih chuan a mitmenga hlimna rawn lang chu chiang takin ka hmu. “I inah ila awm em?” atih chuan bu nghutin, “Ala ngai reng.” ka ti sap a.

Delhi-a hruai phawt ka tum hi a dik chiah em ka hrelo mahse tun dinhmunah chuan atana ṭha ber nia ka hriat a ni rih miau a, Mizoram lama haw tir ka tum anih pawhin Delhi lama ka hna leh thildang engkim tihfel ngai ka tih zawh hunah keimah ngeiin ka hruai haw zawk mai ang. Ka tum dan engkim sawiin Rsa pawh damṭha a, Msi lo ngaihven turin ka chah a. Engkim a fel tawh avanga hahdam tura ka rin nen Rsa hmela hlimlohna hi a chhan ka hrechak ngawt mai, mahse a hun a tihah chuan min hrilh mai ka ring. Ruatpuia zawkin chawlh a neih theih thu a rawn sawi a, Rsa farnu Mawimawii nen an rawn kal theih tur thu a sawi bawk a, tlemin ka rilru a hahdam deuh.

Damdawi in an luh tir khan Rsa chhungte hian min rawn bia a, rawn kal vut vut angaih loh thu ka sawi ve bawk a, Rsa a harh nghal mai nen kal lo turin alo ti ve bawk a, mahse karkhat a liam a, headquarters lamah report pek a ngaih avangin kan kalsan a ngai si a, Anmahni chauha awm ai tia rawn kal tur an ni. Rawn kal lo mahse private nurse rawih sak ka tum tho kha ania, mahse chhungte leh ṭhiante nen chuan Rsa pawn nuam a ti zawk ang. A bula ka sawi khan a ngailo asin ti mahse a lawm ve tho in ka hria.

Delhi kan thleng a, Rinzuali nena ka inchhung kan lut leh chu rilru a thar lo theilo, he hmunah ngei hian kan pahnih in hun tam tak kan lo hmang dun tawh ṭhin a, hlim taka kan lo cheng dun tawh ṭhin anih kha. Kan pahniha kan awmdun laia a tih dan ang angin ala awm vek bawk nen, inchhung kan lut chu a huai ruai a, mak ti hmel a pu deuhin ka hria. “Ila tidanglam miah lova,” atih chuan, “Um, ka buai ve zia i hria lawm,” ka tih chuan, “Nia,” tiin ṭhutkhawmna lam a pan a. Ka awmpuinu in kan thawm hria in choka aṭangin a rawn chhuak a, Rinzuali a hmuh chuan mak ti hmel a pu, tu hmeichhia mah ka hruai lut ngai miau lova.

Inhmelhriat tir ka tum chu, Rinzuali zawk chuan alo be vat a, mikhual pindan pakhat zawk chu hmang mai tura tiin be zawm tawh lovin ka pindan ka pansan a, ka awmdan hi ka duhlo. Msi ka ngaihtuah a, mahni inthiam lohna in ka khat a, chutih rualin Rinzuali lakah ba ka nei miau si. Khatih lai khan venghim thei ni ila, vawiin niah hian fate neiin chhungkua kan din tawh ngei ang, mahse engkim hi duhthusam angin a thleng thei miau lova, kum 10 meuh a liam hnuah tihian kan intawng leh a, Msi ka lo hmangaih ta erawh thiamlohna ka neilo, chutih rualin Rinzuali hian engtin nge a ngaih ang?

Ka rilru insual buai reng avang chuan ka thaw leh halh ṭhin. Ni e, mipa hian rilru siam dan tur ka thiam lo, Rinzuali hian eng rilru nge a put hrelo mah ila, ka inchhung ka ti danglam lo ringawt a hmuh pawhin mak a tihna phena hlimna kha ka hmuh hmaih silo. Nupui hual dang ka nei tih hi hre ta se engtiang taka na in nge a awm ang, nge ni a khang kum 10 chhung khan kei ang tho in ka laka a beiseina te bo tawh in rilru dang a pu zawk ang. Engtin niah emaw chuan heng ka ngaihtuah ang hi sawi chhuah ala ni ngei dawn si a. Ka thawmhnaw hlipin bathroom ka pan a, ka rilru buai zet te pawh hi a reh ve deuh mahna.

Ruatpuia ka call a, Anni pawh Mumbai an thleng tawh a, kan inhmu hman lo thung. An chanchin ka zawt luam a, ka let leh hun min lo nghak a, Mizoram pan ho te kan sawi a, tlem chuan rilru pawh a zangkhai phah deuh alawm. Rinzuali chungchang te alo hre ve lehzel a, enkawl ṭha turin min chah luam a, mahse Ani pawh hian a ṭawngkam hman danah Msi ka thlauh thlâk a duh biklo ka hria, keipawh hian Msi hi thlauh thlak tumna ka neilo, engtik niah emaw chuan a rawn harhchhuah ngei pawh ka ring tlat a ni.

Zanriah kan ei lai te chuan Rinzuali chu hlim tih hriat tak hian a titi siam siam a, a thusawi kara zalen taka khawlai chhuah leh theih a chak thu a sawi zeuh zeuh a, kan pahnih chauhin kan ni bawk a tiin keipawhin ka zawhna neih te pawh chhan harsa lo tur ang te te ka zawt a. Zanriah kan eikham chuan ka mut a chhuak viau a, hna khawih tur tlem ka la neih chhuanlamin Ani pawh mu hma turin ka hrilh a, thuawi takin a pindan lam a pan ve nghal a.

Ka pindan ka thleng a, hna ka tihfel zawhloh en tuma ka dawhkana ka ṭhu chu rei pawh ka ṭhu theilo. Mut chhuakin min zem chiai chiai a, ka tilui thei ta ngang lo nen, ka khum lam ka pan a, khum ka thleng hman ṭawkin ka hria, engmah ka hre zui tawh lo. Ka pindana ni zung rawn lang siar siar ah chuan harhin ka ban mu deuh churh churh chu ka hre hmasa ber. Ka ban siamrem tuma ka inher chuan Rinzuali ka bulah alo mu reng tih ka hmuh chuan mak ti zetin ka en a, engtik laiin nge ka bula a rawn insawn ka hre hauh lo.

A tal ṭiah ṭiah a, a rawn meng nghal siar siar a, a mit a meng fiah rualin nui sang hian, “Good Morning,” a ti sap a, “Morning,” ti letin a ngaihna hrelo zetin ka melh a, ka mitmeng chhiar thiam em em tu hian ka awmdan ala hrethiam hle tih hriat takin, “I tho fuh vak na nge?” tiin ka ban a delhna chu a siam rem a, keiin ka ban la sawn vatin ka ṭhu chhuak nghal a. Ka mut ang ang thawmhnaw ka la ha tih ka hriatna chuan tlem chuan min ti awm nuam deuh.

“Nizan ilo insawn lai ka hre miah lo,” ka tih chuan, rawn ṭhu chhuak ve in, “Nangman i bula mu turin min ti anih kha,” a ti ha a, keiman ka bula riak turin ka sawm maw, mahse kei chuan lehkha vel ka enfiah laia ka mutchhuak zet bak kha engmah ka hre zui miah lo. “Engmah i hrelo tak tak a mi?” a tih chuan, “Um” tiin Bathroom-ah ka luhsan a, ka awmdan a sawi hi mak ka ti takzet. Zanah zu ka in miah lova, tui leh zanriah kan ei laia bawnghnute ka in bak engmah ka in in zanriah bak ei ka nei silo, eng nge ka chungah thleng ta hi niang le?

Bathroom aṭanga ka chhuah chuan Rinzuali a awm tawh lova, a awm lo pawh chu ka lawm daih zawk. Engvangin nge kei hian ka bula mu turin ka sawm ngawt ang, mahse dawt a sawi hauhin ka ring silo. Hmeichhia mahni in duhtawk leh fing ve tak a ni a, ka mitmei hmu lo chuan ka pindanah a rawn lut hauh dawnlo tih ka hria. A mizia nen chutiang chuan a ti dawn lo tih ka chianna hian ka awmdan bawk chu a ni mak ka tih tak chu, ka thiltih hrelo tur khawpin engmah tih ka neih ka hre miau silova.

Insiam peih atin pindan aṭangin ka chhuak a, tukṭhuan kan ei lai chuan a ngawireng a, a lungawi vaklo a ni tih ka hria, eng emaw tal a rilru nawmnan ka sawi a ngai a ni. “Tukin zing kha min hrethiam rawh aw,” ka tih chuan, “A pawilo,” tih chauhin min chhang a, “Ka chau ve deuh tak tak anih ka ring engmah ka hrelo tak tak a,” ka tih leh chuan, ‘Um anih ka ring, mahse ka tan a nuamlo.” a tih chuan a dik ka ti. Ka sawm avangin ka bulah a riak a, keiin Ama thua lo lut anga ngaih theih turin ṭawngkam ka lo nei bawk si. “Ka thiamloh a ni, ka chau tak tak anih hi,” tiin egg salad chu a thlengah ka suah a, a chawhmeh ngainat ber a ni tih ka hriat vanga suah kher pawh ka ni. Ka chawhmeh suah sak a hmuh chuan a nui nghal hak a, “Ila ngai reng anih hi.” a tih chuan keipawh ka nui ve tawp.

Tukṭhuan kan ei kham a, hnaa kal ka ngaih avangin in lo nghah pui mai turin ka ti a, Ani pawhin thuawi zetin Awle tiin ka kal tur kawngkhar thleng min thlah a. Hmanah kha chuan hna kan kal dun a, haw lamah ka lam haw leh ṭhin kha ania. Hmeichhe thluak ṭha tak a ni a, company velah hnathawk atan an duh hle ṭhin, a hunlai na na na kha chuan a hlawh pawh a sang a, tin, nizana a sawi dan khan kha Roy Industry-ah khan damdawi siamna lamah khan ziak feltuah an hmang anih kha. Mahse tuna kan man bak hmun an neih a hriat bikloh thu a sawi a. Tunah chuan ruihhlo siamna hmunpui kan ti tawp tak takah ka ngai tawh. Tin mihring hmanga sumdawnna hmun lian tham pahnih ngawt kan hmuchhuak bawk a, tlem chuan hetiang lam pawh a reh deuh in a rinawm. Chutih rualin sual hi chu a awm reng a, tunah hian hmun lian tham tak tak khar mah ila, hmun dang hi siam in ala awm leh fo ang tih erawh hriatchian sa a ni.

Headquaters ka luh rualin kut beng thawmin min lo lawm nghal a, keimah chauha ka thawh nilo mahse case la tu ka nih avangin min fak liam liamin, ṭhenkhatin min chibai sap sap bawk a. Sanjay-a nen kan office chhunga kan inhmuh chuan hlim hmel tak hian min lo nuih var var a, “Sir tunah chuan ka chhungte pawh venhimna hnuaiah an awm angai tawh lo a, nuam ka ti teh ania,” atih chuan ka lo lawm ve em em ringawt. Venhimna hnuaia an awm lai khan an nun a hahthlak ve dawn tih ka hria a, zalen taka an awm leh thei pawh ka lawmpui takzet.

Sir Anil-a pindanah koh kan nih avangin kan lut nghal a, Ani pawh midang zawng aiin a hlim niin ka hria. “HELL PROJECT chu khar a ni tak tak tawh ang.” kan hmel a hmuh rualin a ti nghal a, Court neih hun tur leh Court in an mi man te thiamloh a chantir ngei dawn tih a sawi lai te chuan a hlim ve hmel takzet. Dr Johnson-a te nupa chanchin sawiin an inkawmngeih zia te, mi ṭha tak an nih thu te a sawi a, keipawh in an nupa ṭhatna ka hriat miau avangin a thusawi chu ngaihthlak nuam ka ti. Chutih rualin Msi rilruah a awm reng thung.

“Dr.Johnson-a te khan fa phir an nei tak asin,” a tih hluai chuan aw thian kharh in, Malsawma chanchin tlangpui ka sawi a, pawi a tih ve hmel takzet. “Anih leh a hmeichhia zawk kha khawiah nge a awm?” atih chuan, Msi chanchin pawh ka hrilh ve luam a, a harhchhuah rih loh thu ka sawi laia a hmel ngui zet chu a khawngaih vang a ni ngei pawhin ka ring. An chanchin sawi zawm duh lovin, Minister pathum an enthlak te chanchin ka zawt ta daih a, “Anni pawh court in a rel ang chu, finfiahna tam tak hmuhchhuah a ni a, an fihlim bik hauh lovang, chuvang ania Hell Project khar anih theihna chhan.” a tih chuan thinlung takin ka lo lawm ve.

“Rp, reilo teah ka pension tawh dawn a, tuna i hnathawh ṭhat avang hian i tan kaisan na chance a sang teh ania, thuneitu lam hian an kaisan tir ngei che pawh ka ring, tin, Sanjay-a pawh.” a tih chuan ka khi suk a, Sanjay-a erawh a nui leh hui tawh. Ni e, kaisan a, hlawh tam zawk lak te chu kan duh ṭheuh alawm le.

Office kan chhuahsan a, Sanjay-a nen lunch eia restaurant a kan kal chuan Rinzuali chungchang min zawt a, “Um, a dam ṭha zel turah ka ngai,” tia ka chhan chuan Amah ang lo zetin a tak run a, “Rp chu chu ka zawhna che a nilo, Msi tunah harh pawh harh chhuak lovin a awm a, Rinzuali i nupui ni ṭep alo let leh tawh bawk nen engtin nge hmeichhe pahnih te hi i tih dawn?” a thil eilai chawl meuha a tih chuan ka fian dahthla in, “Ka hrelo,” tih chauhin ka chhang a.

“Rinzuali hi nupuia neih leh i pawi tilo tihna em ni?” atih leh chuan, “Chutiang chu ka la ngaihtuah lo,” ka ti hmuk a, “Msi hi harhchhuak lo ta se,” ati leh hram erawh rum zeta melhin, “A harhchhuak em em ang, a thi theilo,” ka ti nghal hmuk. Eng ngah nge ka thin a rim ve ngawt chhan pawh ka hrelo. Rinzuali tihnat ka hlau si, Msi harhchhuah loh ka hlau bawk si hian ka ngaihtuahna hi a ti buai vek anih hi. “Msi hi harhchhuak vat rawh se, i rilru hah a reh ve thei dawn tlat lo,” atih chuan lu bu nghutin, “Ni e, a harhchhuah ngei a ngai ka ti ve nghut a. Kan thil sawi vang nge ka thil ei pawh a tui thei tawh lo.

Delhi ka thlen aṭangin karkhat zet a liam leh tawh a, Rinzuali nen pawh kan in pawh thar leh tawhin kan inkawmngeih leh viau tawh a, a hma ang bawkin a titi te pawh nuihpui a hlimpui tur ka hmu hnem leh viau tawh. Chutih rualin Mumbai lam chanchin ka zawt ve reng a. Rsa pawh a ban ruh tliak tihloh na dang a neih tawh loh avangin damdawiin aṭangin a chhuak tawh a, chutih rualin Msi erawh ala harhchhuak lo chu ania.

“Zawh duh che ka nei a,” Kan chaw eikham Tv en a kan ṭhut chuan ka ti a, “Um,” tiin a Tv en chu a off a min en nghal vat a. “Kum 10 ral taa i hun hman dan tam zawk min hrilh la ka duh?” ka tih chuan, a rinloh lam ka zawt nge, a heh a liak zeuh a, sawi hreh hmel a pu leh tawh mahse zaninah erawh hriat vek ka duh tlat tawh a ni.

“Ka harhchhuah khan Doctor nupa in min enkawl ka tih kha, a tirah chuan ka taksa peng la in min tihhlum mai dawn emaw ka ti a, mahse ka dam hnu kha pindan lian vak lova dah ka ni a, kha hmunah khan engtia rei chiah nge ka awm ka hrelo. Chaw min pe tawp a, ka mamawh min pe bawk a. Tin, doctor in min enkawl reng bawk. Chutianga rei tak ka awm hnu chuan nikhat chu pindan pawnlamah min hruai chhuak ta a, a tirah chuan detective i nih avangin zawhna mak pui pui min zawt a, mahse engmah hriat ka neihloh avangin kut min thlak ṭhin, chutiang chuan hun rei tak min awmtir leh bawk.” tiin a kut humruh in a in sang mar ṭalh ṭalh a, a tawrhna nasat dan tur hriatthiam puilo mah ila, hmeichhe tana tawrh hrehawm khawp a ni ngei ang tih erawh ka hria.

“Ni khat chu i thih thu leh, an vuina che tawi te tak tak en tir ka ni a, khami nia ka beidawn zia kha, chaw ka ei lova, ka mu heklo, khatiang khan rei tak ka awm. Ka sun che a, sun tawp che ka nei ngailo. A tirah kha chuan min rawn zawn hmuh ngei ka beisei kha ania mahse chu ka beiseina zawng zawng te chu beidawnnaah changin thi ve mai kha ka duh a ni. Mahse doctor an nei ṭha em a, min chhan hman zel ka ti mai. Chaw mumal eilo leh mu ṭha lo na na na chu ka chau a, nikhua ka hrelo fo. Min enkawl leh a, rei tak enkawlna pawh ka dawng leh bawk. Tichuan, Ronney-a kha ka bulah rawn kalin a hnuaia hnathawk turin min sawm ṭan a, a tirah chuan ka duh lova mahse vau ti tih, thlem paha min sawm reng avang leh min enkawl tu doctor te nupa in min sawmna pawm mai a finthlak an tih ve reng avang khan an tan khan ka thawk ta a ni.” tiin a thaw hak a, “Ka chunga thleng a bak, pawngsualna leh kut ka tawrh te hi sawi turin min tilui lovang tiraw?” tiin a inhnit ta hlap hlap a, a ṭah meuh chuan ka indaidanna bang te hi ṭhiah in a awm ka ti mai, a bulah tawlhin ka kuah vat a, Ani pawhin nghet takin min kuah ve bawk a.

A duhtawka a ṭah hnu chuan min kuahna phelhin, “Anih nang i chanchin min hrilh ve rawh?” a tih chuan, kan accident a kahhlum anih dan te, a ruala Rajiv a thih ve thu te leh ka sun avanga rei tak hna pawh thawk theilo a ka awm te chu ka hrilh ve a, mahse Msi chungchang ka sawi dawn chuan hnawh tu awm ang mai hian ka sawi chhuak theilo. Msi chungchang sawi kanin Hell Project ka khawih tira a thlalak ka hmuh avanga zawn hmuh ngei tuma ka beihna te chu ka hrilh ta zawk a. Msi chungchang hi tunah hian sawi ila a tuarthiam dawn a ka hriatloh vang te pawh a ni mahna sawi harsa ka la tih em em ni.

Chawlh ka dil a, Msi awmdan tur tihfel ka duh avangin Mumbai-ah ka let san dawn a, Rinzuali bula ka sawi chuan In alo nghah tur thu a sawi a, ka lawm rilru viau mai. Kal ve a tum tlat ang tih pawh a hlauhawm rum rum alawm. Ka kal dawn chuan min ngai leh thlahlel tih hriat takin min melh a, airport a thlah kher ka ngailo ka tih avangin kawngkhar aṭangin min vai liam a. Sanjay-an airport thleng min thlah thung.

Mumbai ka thleng a, Ruatpuia’n min lo hmuak a, Rsa pawh a chhuah tawh avangin Hotel-ah an innghat a, Ka thlen ruala Rsa hmel ka hmuh chuan ka kuah vat a, chutia ka awm chu a ngaitheilo tih hriat takin, a tal chhuak vat a, Ruatpuia nen kan nui dun hawk hawk a. Kan pathuma kan inhmu khawm leh chu a nuam phian mai. Mawimawii erawh Mizoram lamah a haw leh tawh a, thlen zan mah nise mipa pathum awm tih takah Bar-a kal an rawt leh tlat pek a, a hmaa misual in min umna hmunah ngei khan kan kal a, a ban na ber hian nuam a ti leh ber anih hi.

Hotel kan let leh chuan Rsa leh Ruatpuia ten double room an la a, kei erawh single room-ah ka awm thung mahse kan zu in phur ve deuh nen an room ah kan lut dial a, Ruatpuia’n Rsa a fiam leh zuk zuk tawh a, kan nuihpui tam leh ber tawh chu ania. Rsa chu a inhnem ve deuh bawk nen a muhil vat a, Ruatpuia nen erawh kan la ṭhu a, Ani pawn Msi chungchang bawk min sawipui a, a harhchhuak har kan ti tlang ṭheuh a nih hi. Sofa an dahah ka mu a, Ruatpuia’n khum a pan lai pawh ka hrelo.

Kan thawh meuh chuan zing dar9 a pel fel der tawh. Kan in tam vakin ka hrelo na in Ruatpuia nena kan inkawm kha a rei bawk em a ni. Ka harh chuan khuma mu te pahnih erawh an la hnar burh burh mai, Bathroom lam pana ka kal tur an khum lam chu hawiin Police mu rei ka ti chhuak sup a, keimahin ka nui nghal vur vur a, ka fiamthu thawh ve a ka nuihpui ve awmchhun pawh ni mahna. Mahni fiamthua nuih vak ching Rsa te ang ka ni miau lova, midang fiamthuah pawh ka nui khat tih ka hria. Lalruatpuia leh Lalrinsanga zet hi chuan an muhil chung pawhin min ti nui thei anih hi.

Ka lu rit ve lukah chuan sofa-ah bawk chuan ka mu zal leh a, damdawi kal hun la chhun daih a ni a, hetia hahdam taka mut pawh a pawina a awm lo, ka ril a ṭam vak lo nen. Rinzuali nena kan hun hman dun te ka chhuikir a, kan ṭhiante Birthday lawmnaah kan intawng anih kha. Ka vawikhat hmuhna aṭanga ka duh nghal em em hmeichhia a ni a, ka neih loh hlau in nitin ka umzui a, mipa hmeichhe ngaihven ngai miah lo kha a zunah uai in, ka thiam ang tawka a rilru hneh theih nan ka bei a nih kha.

Hna ka hmuh nia min lawmpui bertu a ni a, ka hnathawh min tuipui bertu leh ka thiltiha min hrethiam em em tu a ni. A Birthday kan pahnih chauha hmandun a duhlai pawha ka hna vang anih chuan kal rawh ti thei zel hmeichhia a ni a, hnathawk ve mahse engkimah min dah hmasa ber a, min zah thiam hle ṭhin. Amah a zahawmin, a hmelṭha a, hmeichhe hleitling tak leh nalh tak alo ni lehzel nen, ka bialnu a ni te kha ka chhuang ṭhin. Chung zawng zawng ai chuan hmeichhe fing tak anihna hian a bialpa zeilo ve tak kha zahawm takin khawi hmunah pawh min lanntir ṭhin anih kha.

Ka ina kan chendun aṭang khan kan mu dun fo a, atana mipa hmasa ber ka nilo chung khan eng zawhna mah ka nei ngailo a, a ṭhatna te khan a tlinlohna pakhat lek kha chu keimahah a hliahkhuh hneh em a, a nunhluiah zawhna ka nei ngailo. A chhungte chanchin min hrilh fo a, ka khawngaih hle ṭhin, kan chendun dawn pawh kha thlem tak taka ka thlem avanga ka bula rawn awm duh a ni reng a. Pawisa khawl a mamawh zia ka hre miau a, ka tan la ka thlakhleh ngawih ngawih alo ni ve bawk nen,. a remtih zana kan dinner ei a kan chhuah te chu ka mitthla zel a, kha zana ka hlimna ang kha tawn leh ka chak hle ṭhin anih kha.

“Vanlal mu nui vur vur suh,” rawn ti thut avang chuan ka meng zawk a, hnai set sawt a min lo en kur tu avang chuan, “Hey,” ti hluai in ka lu ka kan zuk a, ka chal a ri nghal bup. Ka chal chu ka dawm vang vang a, Rsa’n a chal nuai vut vut a, “Mangchhia i nei a mi nge i mut nuih vur vur kher a?” a tih chuan, Throw- pillow chuan vawm pawp in, “Kal mai teh,” ka tih hluk chuan, mutchhuak aw zet a phun nuah nuah lam chu kan en dun vat a, eng nge a sawi pawh a hriat theih loh, a phun zawh chuan Rsa nen chuan inmelh in kan nui nghal sung a. Lalruatpuia tak hi chu aw, a ṭawngvai zuah zuah ania, dar10 dawnah lehnghal.

Rsa Bathroom kal hlan chuan Ruatpuia chu ka kaitho a, phak chial a, dar zat min zawh chuan, “Ehe ti hluai in, damdawi in kal kan ngaih kha,” atih chuan chhamg lovin ka nuih vur vur a, ka phone alo ri a, Msi enkawl tu doctor number ka hmuh rual chuan hlauhthawnna in min tuam a, hetiang taka hlauthawng hma hi ka ni miah lo, mahse Msi ah chuan ka danglam hma hle zel chu ania. “Hello” ka tih rual chuan lehlama mi chuan, “Rp damdawi inah ilo kal angai,” atih chuan, engmah zawt lovin, “Awle,” tiin call ka dah nghal a.

17

Ka che ka hmanhmawh em avang chuan Ruatpuia chuan thil awmzia min zawt a, “Damdawi Inah ka kal angai, Rsa nen in inpeih hunah lokal ve mai rawh u,” tiin pindan ka chhuahsan a, Ruatpuia che ve nghal vat pawh ka be hman tawh lo. Tun ang huna min ko anih chuan thil pawimawh tak a ni ang tih ka hria, a thi anih loh vek pawhin a harhchhuak tihna a ni ang. Taxi la in, damdawi in chu ka thleng vat a, ka rilru chuan “Ms thi suh aw” a ti mawlh mawlh a.

Damdawi In ka thleng a, doctor room a ka luh chuan, “Ilo thleng maw?” atih rualin, “A ṭha em?” ka ti nghal vat a. “Um, a harh tawh a mahse a ṭha lutuk e tih tur a nilo, lokal rawh hmuh phawt teh ang,” tiin a room kan chhuahsan a, Msi pindan kan lut a, khumah an lo ṭhut tir a, kan lut chu min en hauh lo. Nurse in fian in tui a in tir a, kan lut tih hria awm pawhin a awm lo. Ka koh pawh chuan min hria angin a awm hauh lova, a awmdan diklo chu mak ka ti, eng nge a chhan ni ang.

“Doctor ngati min hria awm pawhin a awm miah lova?” ka tih chuan, “Hei vang hi ania hmanhmawh taka ka koh che,” tiin a pindan lamah kan let leh ta a. Kan ṭhut fel rual chuan, “Msi hi damdawi chak tak hmanga nikhaw hrelo a awm tir reng a ni ka tih tawh kha, mahse eng damdawi chiah nge an hman kan hre theilo a ni. Kha thil avang khan rei tak nikhaw hrelo in a awm anih kha. A taksaa damdawi hi paih chhuak vek tawh angin in ngai mah ila, a hnathawh erawh a harh hnuah pawh a lang ta anih hi.” a ti zuai raih a, a thusawi awmzia chu hriatthiam loh pawh tum ila ka hrethiam lutuk tlat a ni. Msi hian mihring pangngai nihna a pha tawh dawn lo.

“Doctor engchen nge hetiang hian a awm ang?” Beisei nei taka ka tih chuan a lu a thing nghut a, “Ka hrelo, a damchhung pawhin a ni tawh mai thei, thil mak a thlen chuan a harhchhuak leh thei bawk.” atih chuan beidawng zetin ka ṭhu a, zawhna ka nei tawh lo. A hriatna hloh pawh nilo, a damchhung a mi pangngai pha tawh lova a awm tur chu na ka ti takzet. Engkim sawifiah a, hrilhfiah ka duhna te pawh tunah chuan ka sawi thei tawh dawn silo. Ka hmangaih a ni tih tal hi hrilh leh ka duh asin. Mahse chutiang pawh hrethiam tawhlo leh hre tawh lo tura a awm tur ringawt pawh ka tan chuan natna a tling miau a ni.

Doctor room ka chhuahsan a, thilmak chauh lo chu alakah beisei tur a awm lo, Msi pindan Kawngkhar ka hawng a, nurse in ei tur a pe leh tawh a, kawngkhar aṭang chuan ka thlir reng ringawt. Malsawmsangi awmdan chuan min ti na a, ka tawt up up thei, hetiang tak hian em ni ka lo hmangaih. Ka dara rawn khawihtu a awm avang chuan ka mit ka nuai zeuh a ka hawichhuah rualin, Ruatpuia’n Msi en a, “pawnlamah awm rih ila,” atih chuan lu bu nghutin kawngkhar chu ka khar ta riai riai a.

Damdawi In bula Coffee dawrah chuan kan pathum chuan kan ṭhu a, sawi tur engmah ka hrelo, Anni pawh in zawhna an neilo a, sawi tur an hre biklo. Hmeichhe pahnih ka kutah an awm a, Msi chhungte tumah neilo leh Rinzuali kum 10 bo tawh hawna tur neilo. Engtin nge ka tih ang ka hrelo a ni, ka hrelo takzet.

“Vanlal Engvang pawh nise Mizoram lamah kan haw phawt a ṭul i ti ve lo maw?” Rsa’n a tih chuan dik ka ti. Ka nu leh pa te pawh rawn ve ila a ṭhat zawk ka ring. Ka nu la in a ngaihtuah in chanchin min lo zawt ve reng bawk nen. Rinzuali chanchin takngial pawh engmah ka la hrilh ve lo kha ania. Hun a liam tam tawh a, boruak a zia tawh bawk nen engkim hrilh ve ila a pawi tawh bik lovang chu.

Zanah kan chanchin Anil-a bula ka sawi chuan, chawlh tam thei ang ber ka neih theih dan tur a ngaihtuah tur thu sawiin kan inbiakna a ti tawp a. A duh anih phawt chuan dan pel deuh pawhin chawlh min pe thei dawn tih ka hriat avangin Mizorama haw phawt a, ka nu leh pa te rorel anga awm mai a finthlak berin ka hre rih miau a ni.

Sana ka en a, zan dar8 chauh anih avangin ka pa ka be leh a, thil zawng zawng sawilo mah ila a ṭhen ṭhen ka hrilh a, Msi chungchang ka sawi lai te chuan ka tawt ṭun mai. Kan haw pui tur thu ka sawi chuan ṭha a tih thu a sawi ve a, phone kan dah ta a. Ruatpuia leh Rsa an fel a, haw na tur engkim an buaipui a, damdawi in aṭanga kan chhuah ruala haw pui nghal a theih avangin Rsa leh Ruatpuia’n kan bungraw neih ang te Taxi in Airport an panpui tawh a, keini damdawi in aṭangin Airport pan tur kan ni.

Nurse in engkim alo siam peih vek tawh a, he hmuna kan luh kha a thawmhnaw hak lai chiah a keng lut a, kawrfual ka leisak a, a inhmeh tur taka ka thlan a ni a. Pindan ka luh ruala Msi ka hmuh chuan a thawmhnaw inbel nen chuan a nalh takzet. A taksa cher ve deuh mahse a hmelṭhatna erawh a bo hauh lo. Nurse in kan haw tawh tur a sawi chuan a ṭang ṭung a, a awmdan chuan min ti na takzet a ni. Min haw em em in min kalsan a, tunah a harhchhuah hnuah pawh ka bula kal a hreh ngawih ngawih chu a ni si a.

“Bawihi min ring rawh, engkim ka la hrilhfiah ang che,” ka kut pe a nui chunga ka tih chuan min melh kar a, nurse puihna in ka kut chu tim zetin a rawn ban a, ka kuta a kut a nghah rual chuan kai in, nuih sukin damdawi in chu ka chhuahpui ta a. Doctor khan a damlohna hi kawng hrang hrang in a langchhuak thei a ti a, chung a sawi zingah chuan min thah a tum laia a awmdan ang khan awm thei reng a ni. Khatianga awm tur khan ka duh tawh lo, tuna a ṭawnglo ringawt pawhin na takin min siam chu a ni si a. Engpawh tawng thei kan ni tih a hriat avangin engtin emaw a buai palh pawh a injection pe mai turin min ti anih kha.

Ka dara Msi muhil chu ka melh leh zeuh ṭhin a, nakin lawkah Mizoram kan thleng tawh dawn a, a tan thil thar vek a ni dawn tih ka hria, buaina neilo hram ila ka duh ber pawh a ni. Airport-ah ka nu leh pate’n min lo hmuak a, ka nu in Msi a hmuh rualin lainat zeta melhin a kuah vawng vawng a, ka nu hmel a hmuh chuan a harhchhuah aṭanga a vawikhatnan a nui ve a, mahse a reilo.

In kan thleng a, ka nu chuan duat takin a pindan hman tawh naah bawk chuan chawl hahdam tura hrilhin a muttir a, a rawn chhuah ruala a mittui a hru zeuh chu ka hmu reng, mahse hnem a aṭha leh mai ang ti turin a dinhmun hrechiang ber tu ka ni a, ka sawi thei bik silo. Unau kan rual lo a, tin, fanu pakhat chauh a nei a, Ani la zirna avang leh ka hna avang te in an awm tlang tam thei ṭhin lova fanu a duh zia leh mo a awh ve tawh zia ka hria. Msi hi hmeichhia ka hmelhriat tir vawi hnihna chiah a ni a, Rinzuali nen khan an inngaina hman tak tak lo, khati khan a boral zui mai bawk nen Msi heti taka a khawngaih hi ka dem lo.

Msi a mut hnuah Ka ṭhiante pahnih leh ka nu leh pate nen ṭhutkhawmna lamah kan titi a, Rinzuali ala dam thu te, Delhi ka ina ka awmtir thu te ka sawi chuan ka nu chuan mak ti hmel zetin min en a, ka pa erawh in dawndawn dan a thiam khawp mai. Msi boruak hetiang anih laia ka nupui hual hlui hetia ka chenpui ngawt hi thil dik a nilo tih ka hria mahse tingaihna ka hre rih miau silova. “Um, Bawiha engpawh nise Rinzuali lakah pawh ba neiin i inhria ang tih ka hria, Msi la hetiang dinhmun a ni si a, Ani hi kan hnenah awm se, kan enkawl thei mai ang. Rinzuali zawk chu a dam fel a, a chhungte hnena let a tum tawh lo anih pawhin hna a zawnna kawngah te, a nitin nuna i puina a mamawh anih phawt chuan pui hreh suh ang. Mahse hei erawh hre reng rawh Ani chu hmanah i tan a liam tawh a, i nunah Msi i nei a, Ani hi a rawn harhchhuah huna na taka siam turin ka duhlo che ania. Tun dinhmunah chuan Rinzuali pawh i ṭhian angin en i tum hram dawn nia.I lo ngaina leh ta anih pawhin Msi harh hun tal nghak hram la emaw kum tal hi vei rawh se, chutih hunah chuan kawng ila dap zawk dawn nia, anih loh zawngin Msi tan a fair lo lutuk dawn asin.” a tih chuan keipawhin dik ka ti.

Ni a ral a, kar hial a liam leh tawh a, Msi dinhmun erawh a ngai reng a, a ṭawng ngailo a, ka nu hian a awm chawt ṭhin. A chang chuan a muhil theilo a, suffer ang mai hian thlan in a bual a, a khua a sik a, a buai hle ṭhin. Chutiang a thlen chuan ka nu leh pate an mangangin buaipui dan em em an thiam loh avangin hrehawm an ti hle ṭhin. Rinzuali’n min rawn be ve reng a, ka ngaihtuah ve tho si nen awmdan thiam har ka ti. Ka pa sawi ang khan hna te ngaihven sela nun bul ṭan ṭha leh se ka duhpui em em a, mahse heta ṭang chuan a tana ka thil duh te sawi a rem ṭeuh silo. Ruatpuia min rawn angin Msi tan kan ina awm tur nurse ka rawih sak a, Ani in inah ka nu a enkawl pui tawp dawn a ni. Ka nu hnenah Msi’n harsatna a tawh chang a injection na tur doctor min pek kha ka kawl tir a, buaina an tawh a, awm hrehawm khawpa a awm anih loh chuan pe lo turin ka ti thung.

Karhnih dawn Aizawla ka awm leh hnuin Delhi pan turin ka insiam a, ka chhuah dawn chuan Msi pindanah lutin khuma a muhil chu ka en reng a. Ka awm avangin nurse chu a chhuak a, a bulah chuan ṭhu in a kut ka vawn sak a, “Ka lo haw leh vat ang, dam takin lo awm rawh aw,” tiin a chalah ka fawp vawng vawng a. Ka kekawr ipte aṭang chuan a hmaa an ina a u pindana Msi hminga passbook ka lak kha la chhuakin, a thawmhnaw dahna lam chu ka pan a, a safe chu alo inkalh ve ṭhap. Chahbi ka zawng a, a vang phian mai, a kawrlum khai pakhat ipte chu ka zen a, chahbi ka hmuh chuan ka la chhuak nghal vat. A chahbi dahna a fimkhur ve lutuk chu ka nui suk a, safe chu ka hawng nghal a, a chhungah chuan an chhungkaw thlalak, Anu leh pate nena kan thlalak leh bawm lian vak lo hi alo awm a, khawih sak hreh viau mah ila kan thlalak erawh la in ka en a, Rajiv, kei leh kan thawhpui pakhat te nena Mumbai-a Msi nu leh pate chennaa kan lak a ni a, engtin nge Ani hian a neih dan ka hrelo. Bawm te chu la leh in ka hawng a, chahbi mawi danglam zet hi a ni a, a nu leh pate aṭanga a neih pawh a ni mai thei. A thil dah chhun ka en zawh chuan passbook chu dah lutin, ka kalh sak leh thlap a, chahbi pawh a ngaiah ka dah leh thlap bawk. Ngawirenga kalsan ka tum chu let leh in, a bulah chuan kun hniam in ka fawp ta vawng vawng a.

Ka ngai em em a, mahse Ani la chuan khang karhnih chhung pawh khan min hria angin a lang ngai lo. A laka ka inthiamlohna ti zual turin mangchhia te’n a ti buai leh fo a, a taksa a damdawi hnathawh a lan chang te hian chhanchhuak tura ka tlai avangin ka in dem fo bawk. A nunna chauh ka chhan hman a, mahse a tan hian nun hian awmzia a nei ve tawh mawlh silo chu anih hi.

Delhi ka thleng a, Rinzuali pawh ka lakah a ṭha in, a fel em em a, harsatna min thlen hlau takin hun a hmang ṭhin. Hna zawn a duh avangin a thiamna certificate hrang hrang la chhuak leh tura ka buaipui te chuan a inthlahrung em em a, mahse hetianga inthlahrung taka a awm hi ka duhlo. Ka bulah chuan zalen takin awm se, ṭhian kan nih angin inpawh taka awm leh pawh ka duh. Mahse Ani chu ka nunhlui a ni tawh a, Msi vang chauh pawhin inngaihzawnna lamin ka melh tawh ngailo.

Thlakhat zet kan cheng dun leh tawh a, kan inngaina leh viau tawh, a chang hi chuan kan inngaizawng lai kha ka ngaihtuah fo a, ngaih chang ka nei ṭhin. Mahse chutiang a thlen pawhin Msi bawkin ka rilru a luah a, Rinzuali lakah awmdan ka thiam phah fo bawk. A Certificate duplicate te kan nei leh thei ta bawk a, company hrang hrangah hna a dil a, a thiamna in a tlin bawk a, a hmu vat reng bawk a. Office lian tak a nilova, mahse hlawh erawh a ṭha ve viau tho.

Zanriah kan kil laiin, “Hna ka nei tawh bawk a, In luah tur hi ka dap ve tawh mai dawn a mi le?” atih chuan engvanga sawi thut nge anih hriat tumin a hmel ka en a, a mitmeng pha dai hi ka hrethiam lo ṭhin. A hun tawn zawng zawng te avang pawh kha a ni mahna. “In luah hran kher a ngai hleinem, thla hnih thum hlawh te la phawt la, duh leh i zawng zawk a nga,” ka tih chuan a nui sen sen a, diktak chuan in luah hrang nghal rum rum tur chuan engmah neih sa a neilo tih ka hria, a tan a harsa dawn lutuk a chuvang chuan inkhawl rih se ka ti a ni. “Ka lawm e aw,” tiin ka chhan let hma in a tho vut a, chokaah lutin, “I bawnghnute ka theihnghilh daih alawm le,” tiin bawnghnute khu vat vat chu ka bulah a rawn hung a, nui sukin ka in nghal khalh. Bawnghnute in hi ka nu min tih ṭhan tir ania, Val sinior nih hnuah pawh hian ka la in reng chu ania, mahse taksa a hah chang leh mut ṭhat hmanloh te hian alo ṭha ve bawk nen, ka in a tuina a pawh bawk a, a awm hi chuan ka in ve reng zel anih hi.

Nitinin hnaah ka chhuak a, kan buai thei hle ṭhin. Rinzuali pawh hna a kal ve ziah a, ka bang tlai fo avangin min lo nghak ngar ngar ṭhin. A hmaa min hrethiam em em tu leh min ngaihsak em em tu kha a ni reng a, muthlu lawp lawp a min nghah chang la a tam. Ka tana a thiltih te hi ka lawm lo a nilo, mahse a hma angin ka ngaihsakin ka care ve tehchiam tawh lo tih erawh a inhria. Msi chungchang ka hrilh hmasak ber ṭum khan a rilru na hmel kha ka hmuh hmaih lo, mahse ka laka awmdan chintawk a thiam theih nan a hrilh ka ni. Khami ni aṭang khan a mizia a danglam ve hret hret a, mahse dawhkan kan kil dun chuan kan titi a, kan nui dun fo a, sawi tur a hria in, Ani pawn a rilru a siam fel niin alang. Kan hun lo hman dun tawhna te kha hmanlaiah a pawm ve niin ka hria, ṭhian kawm tak takin min kawm a, keipawh hetia a mizia a thlak hi ka lawm daih zawk.

Rsa nen kan inbe fo a, Msi a chhuahpui zeuh zeuh tih a rawn sawi chang hian ka thik ṭhin viau, mahse Ani chu ka ṭhian ania, ka tana natna tur a ti dawn lo tih ka hria, mahse a duh huna Msi a hmu thei bik hi ka chak ve ṭhin. Kan hna avangin ka buai em em a, Ajay la a thil tih tenawm tak avangin a hna aṭanga ban tir a ni a, a thawhpui pahnih te pawh tel ve lo mahse an zeppui avangin suspend an ni bawk a, an hna khawih lai zawng zawng ka kutah a lut a, chu chuan min ti buai zual a, Mizorama haw lawk ka duh pawhin a theih meuh lo a ni e.

Thla hnih a ral leh hnu chuan Rinzuali pawhin in dang luah ve a tum a, a in luah tur pawh ka in aṭangin a hla lemlo, zau pangngai tak a ni a, a inchhung bungrua lei puii. engkim ka tihfel pui a, tlailamah ain tharah zanriah kan kil bawk a, ka haw dawn chuan ka melh vang vang a, nidang zawng aiin ka hmu hmelṭha. A nui mawi lutuk te hi hmeichhe dang nena tehkhin phak rual a nilo mahse Msi vangin ka hnaih a rem tawh lo. Ka hmaa hmeichhe hmelṭha tak nui sen sen en a, Msi ka ngaihtuah tlat avang chuan mak deuhin ka thin a rim ru ngawih ngawih a. Ka rilru chuan, engtikah nge a harh dawn pawh hriat anih loh laia hetia mi nep ber ang mai a ka lo nghak ngawt ngawt hi engvang nge tiin zawhna ka in zawt a. Ka tana a hlutna aiin ka laka a thil tih sual bawk kha ka thinlungah a thar a, ka awmdan danglam zet avang chuan Rinzuali in thar luah mah nise zanriah kan eikham rualin hna pawimawh awm tiin chhuanlam siam in ka haw ta daih a, awm ve rih tura min sawmna pawh ka ngai pawimawh thei lo.

Ka awmdan danglam zet chu ka hrethiam lo a ni, Msi huatna in ka khat a, ka thinrimna te la ka thunun thei heklo. Ka huat em avangin anchhia ka lawh bawrh bawrh a, Malsawmdawngzuala thiltih thlengin ka sawi chhuak a, chutianga awm tur chu ka nilo tiin inthunun tum mah ila, ka thei hauh silo, ka rilru insual buai chu tih tawp dan ka thiamlo a ni. Ka lungphu a rang em em a, ka lu a na ngut ngut bawk, ka thinrimna thunun ka tum nasat poh leh ka lu na chu a zual ni mai in ka hria. Msi huatna a ka khat chu duh lovin ka awmdan danglam thut hriatthiam lohna nen bathroom ah lutin shower ka On a, ka thluak nû but te hi a reh ka beisei a ni.

Tui vawtin ka taksa a chiah vang vang hnu chuan ka lungphu rang lutuk chu a ziaawm ṭan a, ka taksa na ut ut te pawhin zia lam a pan a, tin, ka lu na pawh a reh tial tial ni mai in ka hria. Ka thawmhnaw hak huh zawr hnup chu phelhin ka inbual ta law law a, ka awmdan chu a pangngai tih theih nilo mahse a zia viau tho a. Bathroom aṭanga chhuakin ka lu na reh mai loh avang chuan khum ka pan nghal vat a. Chutia hahdam taka ka khum ka thlen takah chuan nichin lawka ka awmdan mak zet kha a chhan ka hrelo, mahse thil mak tak chu a ni ngei mai. Msi hi haw tur ka nilo, ka nupui hual a ni a, hetiang boruak tehhrep hi tawng lo ila kan innei tawh hial mai thei. Rinzuali itna vang ringawt khatiang rilru pu nia ka inhriatna te chuan mahni ka inthiamlo rum rum thei.

(RSA POV)

Rengpuia a kal liam aṭangin vawi tam tak Msi ngaihven turin ka kal ṭhin a, Sangpuii nena ṭhianṭha tak kan nih avangin Msi chanchin lungchhiat thlâk tak hi ka hre tam a, ka ṭhian anihna ang pawhin ka khawngaih a ni. Sangpuii ka venhim zawh loh avang khan mahni inthiamlohna in ka khat a, a tana mi pawimawh em em Msi tal hi chu ka venghimin ṭanpui a ngaihnaah pawh ka pui zel ang tiin mahni ka intiam a, ka nuna hmeichhe ṭhian ka neih awmchhun te an nih vang pawh animahna heti taka ka ngaih pawimawh.
Msi rilru kimlo ang maia a awm ta hi pawi ka ti a, ka tlai avanga hetianga awm a ni tia ka ngaihtuah chang phei chuan hrehawm ka ti ngawih ngawih ṭhin. Ronney-a te’n min man ni pawh khan Msi an khungbehna hmuna ka hmuh vang kha a ni reng a, a awmdan avang khan fimkhurna hloh in min man phah ta kha ania, mahse theihtawpa ka beih ve na pawh a hlawhtling ta silova, Rengpuia a awmlo tho a, ka tih tur nia ka ngaih ve na nen hetia ngaihsak viau pawh ka ni bawk.

Nukimte’n, “I fel ngawt mai, i hna kal loh ni tal a i ṭhian pa ai i rawn awh ṭhin,” a tih chuan ka lo nui vur vur a, Anni nupa hi an fel a, kei tak pawh hi fapa ang chiah in min en a, chhungte bula awmlo ka ni ve nen tun hma aṭangin ka luh chhuahna a ni a, chaw la ka ei tam narawh. Hetia Msi a awm hnu pawh hian ka leng fo a, Msi ka lo awmpui ringawt te hi midang chuan nise mak tiin min sawi zui mai thei mahse Anni erawh an fapa nupui hual ka ngaihven sak avang hian an lawm thiam viau zel chu ania.

“Ka farnu ka rawn tlawh dawn a, chaw ka rawn ei nghal dawn,” ka tih chuan Nukimte chu a nui har har a, “An inneih hunah i in aṭangin neih tir i tum tak tak ange aw, ka phal dawn miah lo ania,” atih chuan keipawh ka lo nui ve tawp. Ka farnu a ni tawh a, ka in aṭangin pasal ka neih tir dawn ka ti fiamthu a, chu chu min fiam let nan a hmang ta ziah a, i khirh awm si, kan neih bak bak man chhiar i tum ang tih mai mai in min fiam a kan phul leh hlut ṭhin. Ṭhutkhawmnaa kan ṭhut laiin Amah enkawl tura Nurse an rawh Mapuii chuan a rawn hruaichhuak a, kan inhmuh rualin ka nuih var var a, Ani pawh tawi te in a nui ve sak.

Hmasawn chak tak nilo mahse kan nuihna tal min chhangleta a nui ve ṭhin tawh ringawt pawh kan tan chuan a lawmawm em em si a. Nukimte pangpar ka khawih dawn a tih avangin Msi chu varanda-ah ka ṭhutpui a, Nukimtei an nula awmpui thar nena pangpar khawih chu kan en dun a. A chang hi chuan Msi awmdan hian bei a ti dawng ve ṭhin mahse kei aia beidawng tur midang an awm laiin Anni chuan vawiin ni thlengin beiseina nen ṭha takin an enkawl a, kei mihrang zawkin lo beidawn pui erawh ka tum lo.

“Ms Rengpuia i ngai tawh em?” ka tih chuan a dan ngai te in min chhang lo. Ka be zawm zel a, Rengpuia nen kan intawn dan ka sawi kai a, kan hnathawhnaah inhretawn lovin Bar chhungah kan insual a, mahse Detective ve ve kan ni tih kan inhriat tawn hnuah zu te kan in dun leh vel kha ania. Keimaha ka nui ruh ruh chu, ka bula hmeichhia chu zawi te hian a rawn nui ri ve a, a nui ri chu zawi viau mahse a aw chhuak avang chuan ka nui lai tawp in ka en vat a, “Ms i nui ri ania,” lawm taka ka tih chuan a nui hmel chu a tawp lehnghal daih.

A tan hian thil ṭha ber ka duhsak a, dam chhuak leh se ṭawng leh se tih hi ka duh ber a ni. Mahse chutiang tur chuan engmah tih theih ka nei bawk silo. Doctor te meuh pawhin thilmak a thleng anih loh chuan mihring thiamna hmang chuan a damna tur a awmlo a ti anih kha. Mahse vanduaina a tawk chunga heti taka ka ṭhianpa leh a chhungte’n an enkawl hi ṭhiante chhungkua mah nise ka fak takzet, Msi tan tak pawh hian ka lawmpui bawk.

Ni a liam a, kar a ral zel a, thla hnih hial a liam tawh a, Msi hmasawnna la hmuh tur a tlem hle thung. A nui ve a, kan ṭawng hrethiam ang taka a awm chang a tam ve deuh tawh tih a ni mai. Mite pawh rilru lamah harsatna an nei fo a, an ṭawng theilo zui ka hre ngailo mahse Msi erawh hetia rilru mumal lova a harhchhuah hnu aṭang hian a la ṭawng miah lo hi mak ka ti ṭhin. Damdawi khan a aw bawm lamah harsatna a thlen tel anih an ring hial a, mahse Test a neih pawhin a chhan an hre thei hleilo chu ania.

Rengpuia bulah a chanchin sawi turin ka call fo a, a chhan pawh Ani hian nghak thei lovin rilru dang a put mai ka hlau a ni. Rinzuali hi ka hua chu ka tilo mahse ka hmeichhe ngainat zawng a ni hauh lo. Damdawi inah khan vawihnih ka tlawh a, a vawikhat naah ka insawi viau pawn min biak duhloh thu sawiin security koh tir hial a tum a, a vawihnihna ah erawh min be miah lo a, ka biakna min chhang heklo. A mizia mak tak kha keichuan ka hrethiam lova, Rengpuia ṭhian ka nihna ang leh man tawk kan nihna ang khan a pindana ka tlawh khan mi pangngai tan chuan biak ka harsa miahin ka ringlo, kha vang ringawt pawh khan ka ngaina lo. Tin, Khang kum 10 chhung khan Roy’s Industry ah khan hna ṭha tak thawkin, a duh anga awm turin zalenna pek hman hial a ni. A tirah te chuan hrehawm takin a awm pawh a nimahna mahse zalenna a neih hnuah erawh tumin bei ngat sela chuan Rengpuia tal a rawn be pawp ngei ngeiin ka ring. Mahse chutiang engmah a thleng lo. A sawi tam tak te kha dik pawh ni se keichuan he hmeichhe phenah hian awm a awm niin ka ngai tlat, chu erawh tu bulah mah ka sawi langlo.

Ronney-a kianga awm Mike-a kha hmuh tawhna ka nei. Restaurant-a hna min offer hma khan khawiah emaw ka hre tawh ngei ang mahse ka hrechhuak zo mai lo. Ani kha kan buai lai khan a bo ta daih a, a tlanbo hman te pawh a ni mahna kha pawh kha ngaihven zui tur niin ka hria. Mizo a ni miau a, Mizoramah ngei hian hmuh ka la in ring. Thil tam tak ka ngaihtuah avangin Rengpuia biak ka tum pawh ka la be miah lo tih hrechhuak in ka call a. Mahse phone ala miah lo. Eng hmunah pawh awm se tun angah ka phone a la lo ngailo tih ka hriatchian em avângin ka call leh ngat a, a ring tawp dawn ṭepah hmeichhe aw in Hello a rawn tih chuan Rinzuali a ni tih ka hre nghal.

Ka call alo chhang ve ringawt chu lawmlo ru viau mah ila “Rengpuia ka lo bia,” ka ti ṭha ve mai a, “A muhil tawh, Rengpuia hi rawn be tawh suh,” tiin call a dah ta hmak a, a thiltih dan chu ka hamhaih in ka thin a rim ru ṭun thei. Chendun rih a sawi aṭang reng khan ka pawmpui viau lo mahse engkim sawi ve kha a ṭha berin ka hre lova, tin, Rengpuia pawh mi rilru nghet tak a ni tih ka hria a, Msi hmangaih thu a sawi fo a, a ti mai mai pawhin ka ring heklo. Chutih rualin Rinzuali pawh a hmangaih em em a ni a, thi nia a hriatna leh a thih danah Amah a indem fo a, hetia harsatna a tawh laia a ṭanpui pawh hi thil ṭha tak a ni, mahse Rinzuali phena thil awm tura ka rin tlat hi a nei ve angem?

Thla a thar a, Rengpuia pawh ka be leh ta rih lo, Nukimte te erawh ka hman chang apiangin ka tlawh a, Msi awmdan a danglam ve hret hret a, a ṭawng lo tih loh chu a chang chuan pangngai takin a awm leh ṭhin, chutih rualin vawihnih ngawt a buai leh tawh a, a mit a sen rum a, a bula thil awm paih in nasa takin a thinrim a, a kut khur te leh a thlanin a bual huh zui te chu en hrehawm tak a ni ṭhin, mahse a khat ve tial tial chu ania.

Inrinni anih avangin ka leng leh a, Nukimtei’n Rengpuia a call ngai loh thu sawi in a vui niah niah a, an call pawhin a pick up ngailo thu a sawi a, kei nen pawh kar hnih ngawt kan inbe ta lo chu ania, an hnaah a buai anih ringin keipawh in ka call duh ta bik rihlo a, Rinzuali min chhanna erawh rilruah a awm reng thung.Engvanga khatianga min rawn chhang ngawt nge anih ka hrethiam lova, Rengpuia hnena zawh erawh ka tum lemlo. Hmeichhe pakhat chingfel theilo tur mipa a ni miau lo alawm, Msi vang chauh pawhin a huang chin a pelh ka ring lo.

“Kei nen pawh karhnih ngawt kan inbe tawh lo asin,” ka tih chuan Nukimtei chuan, “Msi chanchin hi a khat tawkin min rawn zawt reng a, mahse min a rei a min zawt ngai ta lo, tunah phei chuan min call khat ta khawp mai, Rinzuali a buaipui hi a buaipui lutuk mah mah em ni ang,” ngaihṭhat loh hmel zeta a tih chuan, “Ni lovang, i hria lawm i fapa rangkachak ve hi chu a buai thei em a, hna vangin a buai a ni ang, a hma pawn a be reng hman chuanloh che kha,” tiin ka nui lui a, mahse a nui ve hauh lo, “Bawiha, ka fapa hi ka hria, a thil buaipui tawh lamah rilru a pe bur ṭhin,” tiin khawngaih hmel zetin kan hmaa pangpar hnah tifai a Msi ṭhu chu a melh a, hnem dan vak ka hrelo keipawh hian hlauhthawn rukna ka nei ve miau a.

“Nukimte naktuk chu Msi hi ka lenchhuah pui teh ang, tei chhuah pui ila nuam te pawh a ti ve mai thei asin,” ka ti leh chuan, ngaihdan ṭha tak a ni tiin a nui var var a. Ka thil tih tum hi a ṭha ber angem ka hrelo a, mahse an Ina hruai tum ka ni a, an in a hmuh chuan eng emaw tak a hriatchhuah ka beisei vang pawh a ni.

18

(Rsa Pov)

Msi nena kan chhuak chu a nui var var reng a, ṭawng lo mahse ka be reng a, ka chhuahpui avangin hlim hmel a pu ni berin ka hria. Hetiang tak hian a hlimpui dawn a ni tih hria ila, ka hruai chhuak fo tur. Durtlang kan thleng a, a huai ruai a, a awmdan danglam deuh chu ka melh ru reng a, kan tlan zel a, an gate zawn kan thlen chuan khap miah lo hian kan hmaa In lian tak chu a melh ta ngar a. Min rawn en rualin, “Kan lut dawn em ni ang?” ka tih chuan a kawngkhar chu a hawng a, gate hmaah chuan dingin a kut chu a sik niap niap a, a awmdan danglam chu ka hria, chu thil chu thleng se eng emaw tal hrechhuak se ka duh avanga helai hmuna hruai hi ka ni reng bawk a.

“I ṭha em?” ka tih chuan a chesawn hauh lo, a lu a dawm a, a ṭhen leh chhak chhak ṭhin a, eng emaw ngaihtuah a nei tih ka hria, a banah kaiin “lut ang le.” tiin gate chhungah chuan ka luhpui a, kawngkhar ka hawn laia ka bula mit sen rama a ding te chu hmulo ka nilo, beiseina nen a che vel chu ka thlir tawp a ni mai. Inchhung kan lut a, a hawi kual a, engkim chu uluk takin a en ni mai in ka hria, a kutah kaiin ka kalpui zel a, a hmaa Malsawma’n tualthahna hmun atana a hman ngei lama ka chhukpui lai chuan a ṭang ṭung a, mahse Sangpuii emaw Malsawma a hriatrengna avang tal pawhin harhchhuak turin ka duh a ni.

“Lokal rawh,” tiin ka kai lui zel a, pindan kan luh dawn chuan ka chelhna phelh tumin tha tawpin a ṭang a, light engah chuan keiin tihnat hlau tak siin ka pawt ve ṭang ṭang a, a mittui luang te chu ka hmu lo a nilo, hriat a nei tih leh he hmun kan thlen phat aṭanga a danglamna ka hmuh miau avangin beiseina nen ka nawr lui lo theilo a ni. Chutia kan inpawh tawn sek lai chuan ring zet hian, “Aih, ka duhlo,” a rawn ti chhuak ṭhat a, ka chelhna ka thlah chiang takzet. Chhuata ṭhu sawp niai a chhuak lutuk tak maia a ṭap chu lawm bawk si, a ṭah nasat avanga hrehawm ti ru tho si in ka melh reng a, ka ngalah rawn pet ṭawk in, “I sual lutuk,” tiin inchunglamah a tlan chho ta daih a, a chho ta chu um mai nachang pawh ka hrelo, a rawn kaṭawng chhuak leh kha ka lawm ber a ni.

Inchung ka thlen rualin Msi ka ko a, ka tello chuan khawiah mah a kal hla in ka ringlo a, inchhungah hian a awm ngei pawh ka ring. An in a zau ve bawk nen min chhan mai loh avangin pindan awm awm chu ka enkual a, chutia ka zawn kual lai chuan choka kalpel a chhaklam chhuahna kawngkhar zawna a ding chu ka hmu a, ka pan nghal vat a. Pawn ka chhuah chuan, “I ṭha em?” tiin a melhna lam chu ka en ve a, lei in chek phut deuh hrup chu tu emaw tih a ni tih ka hre thei, mahse a rei tawh tih hriat takin a in ro deuh niai tawh hlawm a. Msi chu en in, a ṭhat leh ṭhatloh ka zawt leh a, a lu bu nghat in, “Ka ṭha tawh in ka hria,” tiin nui sakin ka lam a rawn hawi a, keipawhin a hmek landanah chuan a pangngai leh tawh tih ka hria chu chuan min ti lawm takzet a ni.

“Khawiah nge Rengpuia?” a tih chuan a sawi ve tur reng a ni tih ka hria, engkim kha a theihnghilh nge ala hrereng tih hrelo mah ila, a pasal hual ania a laka a chetdan avang pawh khan hrehawm a ti ve viau in ka ring. Delhi-a a awm thu ka sawi chuan a, “Um” tih chauhin min chhang a. “I ṭha tak tak tawh em?” ka ti ṭha leh, “Ka ṭha chuan ka hria, chuan ka lawm e aw,” a ti sap a. Ka lo nui var var thung. Rengpuia’n hria se a lawm ve dan tur ka ngaihtuah a, ka hlim lo theilo a ni.

“Rs, engkim ka la hrilh ang che mahse thil pakhat min zeppui rih la ka duh.” atih chuan, “Eng nge?” ka ti vat a, “Ka harhchhuak leh tawh tih hi tumah hrilh rih lo turin ka duh che.” a tih chuan hretiam lo zetin ka melh ngur a, inchungah a lut nghal daih. Ani khan engvangin nge mi â anga awm a duh, a rawn harhchhuah avanga lawm ber tur leh Rengpuia hriat duh ber tu tur anih laiin zep turin min ti anih kha.

Inchhunga ka luh chuan chaw ei dawhkan bulah ṭhu in, a kut chu dawhkanah a nghat a, ngaihtuah a nei tih ka hria. A hmaah ṭhu in, “Ms, nga ti nge zep i duh?” ka tih chuan, “Min man tu te khan kan chhungkaw thil hlu tak ka kawl tih an hria a, ka chanchin pawh hi an lo hre tawh ngei ang, chu thil lak tum chuan min rawn zawng ngei bawk dawn tichuan ka chhungte thattu ka hre thei tawh ang.” atih chuan mak ka ti viau a, “Mahse Ronney-a ber a thi tawh si a,” ka tih chuan phawk zet hian min en a, “Eng tin nge a thih?” a ti nghal vat. Kan thil tawn leh chhanchhuah kan nih dan ka sawi chuan a ngaihtuahna a buai hmel takzet.

“Ani kha a thi tur a nilo asin,” a ṭawng dawn tawh lo emaw ka tih hnuah a rawn ti chhuak sap a, “Tu maw?” ka lo ti nghal vat. A lu thing nar narin, “Ani kha Sangpuii vang tal pawhin a thi tur a nilo asin, engkim kha hrilhfiah ka duh a, mahse hun pek sak ka ni silova, heng zawng zawng hi Ani vanga thleng vek kha a ni.” tiin thinrim tih hriat zet hian a kut a hum ngat ngat a. Eng nge a sawi hi engmah ka hrethiam lo, mahse rei tak engmah hrelo a a awm hnuah vawiinah a rawn harh chhuak ve chauh a, zawhna zawh vak vak ka duhlo.

In kan thleng a, a duh angin engmah ka sawilo. A chauh deuh ka rin thu ka sawi chuan Nurse in a pindanah a hruai ta vat a. An luh hma kawngkhar zawn a thlen a min rawn en chuan ka lu ka lo bu nghat. Chhan neilo chuan Ani hian sawilo turin min ti hauh lovang, a chhan chu engpawh nise tun dinhmunah chuan ka zep sak rih mai hi a ngai a ni. A pawimawh ber Amah a rawn ṭha chhuak tawh miau alawm.

Msi a harh aṭangin thlakhat lai a liam leh tawh, mahse Rengpuia erawh a reh vang vang a, a chhungte pawh a be tam lo hle tih ka hria, Msi nen hun fal kan neih hnu hian a sawi fo a, a thiltih avanga pawi a tih thu leh ngaihdam dil a duh thu a sawi chang te hian ka khawngaih ṭhin. Keiin call ka tumin a reject tlat a, Ruatpuia pawhin Rengpuia awmdan chu mak a tih thu a sawi ve hial anih kha. Mahse eng nge min mawlh ka hrelo, Lalrengpuia ka ngaihtuah em em a, a chungah eng nge thleng ka ngaihven ru fo ṭhin, mahse a chanchin ka hriatna ber Sanjay-a la hian engvakmah thleng angin a sawi lo. Office-ah an buai thei hle a, nileng leh zan thlengin hna an thawk a, tin, a sawi dan in Rinzuali pawh a inla chhuak daih tawh anih hmel. Msi chanchin takngial pawh a ngaihven ngailo tia ka sawi erawh mak a tih thu a sawi ve.

Office-a ka awm laia Nukimtei’n ṭap aw ṭuau a min rawn call chuan hmanhmawh takin an in lam chu ka pan a, engvanga khatiang teh thuta min rawn bia nge anih ka hrelo mahse a aw a natna kha ka hrechiang em a ni. An in ka thlen rualin, ṭhutkhawmna lama an nupaa an ṭhu chu panin an hmaah chuan ka ṭhu ve nghal a, eng nge thleng ka zawh chuan, “I ṭhianpa thu rawn vai tluk dan chu ka lawm lo hle a ni,” Rengpuia pa chuan a ti hmuk a, a nu chu rawn ṭawng ve leh in, “Tukinah min rawn bia a, a rang lamin nupui neih a duh thu a rawn sawi a, Msi ala ṭhat vakloh thu ka sawi chuan, Ani ka nei dawn lo, Rinzuali a neih tur thu a sawi chuan i pa hian a kal dawna a thusawi bawk kha a sawi nawn leh a, mahse an inhau chiam a, tin, Msi in aṭanga chhuah tir turin min ti a, a huat thu hlir a sawi a, i pa thinrimin a hau a, phone min dahsak a,” atih chuan mak tih bak sawi tur ka hrelo.

Delhi a kal aṭangin thla hnih chhung kha chu pangngai takin kan inbia a, kha zan Rinzuali’n lo be tawh suh a tih hma thleng kha chuan engkim kha a ṭha in ka ṭhianpa rilru nghet zia ka hrechiang lehzual a ka lawm ṭhin anih kha. Mahse ka phone a pick up loh zan aṭang vawikhatmah min rawn be tawh ngailo a, biak ka tum pawhin ka call a chhang ngailo a, thil fello eng emaw hi chu a awm ngeiin ka hria a, Sanjay-a la in engkim a ṭha a ti bawk si a.

“Engkim hi a diklo vek a ni.” ka tih chuan tumah an ṭawng lo, “Engpawh nise Msi chu ka inah awm mai rawh se, ka in a zau tho a, buaina dang awm tur pawh a veng deuh ang, rem inti em?” ka tih chuan, “A ngailo hetah a awm tur a ni,” Rengpuia pa in a ti tlat a, mahse eng emaw palh awm thei thil te ka sawi chiam hnuah, Msi laka ka rilru an hrechiang bawk a, ka ina awm ve chu an remti ta a. Msi thawmhnaw siam tura nurse a hrilh lai te chuan Nukimtei chu a inhnit faih faih a, engkim peih ata an lo chhuah chuan a bag lian vaklo chu ka laksak a, “Engkim ka siam ṭha ang,” tiin in chu kan chhuahsan ta a.

Motor chhung kan luh rualin, “Ms, engtik khan nge i ṭawngtheih?” a ti chhuak hlawl a, pindan an luh khan Msi’n a bia tihna ania, mak a ti viau tih ka hria, ka nui suk a, ka tlanchhuak ta nghal a. “Mimi, min awmpui reng rawh aw,” Msi’n nui var var a atih chuan, Mimii hmela mak tihna chambang la rehlo chung chuan, “I dam tawh tho sia,” a ti niah niah a. In kan thleng a, Msi chuan, “Hetia ka chhuak hi a pawilo mahse Rengpuia hmeichhe thar hi tu nge min la hrilh miah lo,” ka mitah chiang zeta min melh in a ti a, engtin nge ka hrilh ang, na tura ka duhloh ber te zinga mi a ni si a.

Mimi pindan tur ka hrilh a, Msi chu kai hrangin, “Nga ti nge Ani kha la awm tura i duh?” ka tih chuan, “Ka tan ala ṭangkai dawn alawm,” a ti awlsam et a, “Rengpuia hmeichhe thar chu?” a tih ve chuan, Rinzuali kan hmuh dan te, Rengpuia nupui hual thi tawh anga kan ngaih anih thu te, a kim thei ang berin ka hrilh ta vek a, Msi mit a natna chu chiang takin ka hmu, engmah a sawiloh avangin a ṭawng hun ka nghak tawp a. A mittui rawn luang ngiai ngiai chuan Rengpuia lakah ka thin a rim thar a, mipa nghet tak a ni a, hetianga fairlo tak hi chuan chet a lak duh ka ringlo asin, ka ṭhianpa hi ka lo hrechiang hle zawk tihna a ni, nge ni a thildang a awm zawk. Sanjay-a hian sawi sela chuan Delhi pawh ka kal mai tur.

“Ms, ṭawng rawh,” ka tih chuan a mittui hru hulin, a nui lui a, “Engpawh ti ila ka lam i ṭang ang tiraw?” atih chuan, “Um, ka ṭang ang.” ka ti vat a, “Rengpuia hi lakchhuah dan kan ngaihtuah dawn nia, mahse chumi hma in ka chhungte that tu hi hriat ka duh.” atih chuan, “Lakchhuah a!?” ka ti hu a, ka hrethiam miau lo a ni. “Rinzuali hi alawm thudik hrul a dawta min bum chhuak tu leh damdawi a min hrai tu kha, Ronney-a kha chu hmanrua mai a ni, Sangpuii bialpa anih kha, Ani kha chuan Malsawma nen phir kan nih vang chauh a min thah tum a ni. A rilru kha ka hneh a, min that duh ta lova, mahse Rinzuali hian khatianga ka awm theihna tur damdawi kha min pe a, vawi tam min pe hman sela chuan ka harhchhuak tawh lovang.” atih chuan ka thaw haka, he hmeichhia hi ka hmuh tir ata ka ringlo reng kha ania, ka rinloh ang chiah in eng ema takah inhnamhnawihna alo nei reng a.

“Rengpuia chu vawikhat tal hmuh ka duh, engtiang pawn hrilhfiah theih ka duh a ni.” ka tih chuan, za vaklo hian a nui a, mahse engmah a sawi lo, eng chiah nge a ngaihtuah ka hrelo mahse Msi hian tum chu a nei chiang alawm. “Rengpuia be tur chuan kal chhin la,” a tih chuan, “Ngaihdan ṭha tak a ni,” tiin thildang tih tur ka neih avangin ka kalsan ta a. Engkim hi Ruatpuia ka sawipui a ngai a ni.

Station ka thleng a, Ruatpuia bula thil awmzia ka sawi chuan a ngawi vung vung a, Msi nena kan inbiakna ṭhenkhat ka hrilh bawk a. “Mite’n engtin nge an sawi ang, i chhungte bula khawsa i ni silova,” a tih chuan ka nui huk a, chutiang daih lo ngaihtuah mahse ṭhian ṭha chuan kan ngaihtuah phak loh hi kan in ngaihtuah pui fo chu a ni sia. “Chutiang ka ngaihtuah lo reng reng,” ka tih chuan a lu a bu nghut nghut a, “Midang chu engpawh nise Rengpuia chu a ni ngaihtuah ngai.” tiin a ngawi leh vung vung a, “Delhi kal ka tum a,” ka tih leh chuan, “Kalpui i duh em?” a ti nghal vat a, Ani chu chhungkaw pa a ni a, helamah min awl thei ber zawk a, heta alo awm hi kan vai atan a pawimawh tlat a ni.

Rengpuia chhungte ka tlawh a, Delhi a Amah hmu a kal a, sawipui ka tum thu ka sawi chuan an lawm hle a, Apa in ka kal ve ang a tih erawh ka hnial thei hram a ni. Zanriah tur ka bazar a, Number aṭanga call ka dawn chuan ka pick up vat a, “Ilo haw dawn tawh em? Rawng kan bawl peih vek tawh ania,” Msi’n a rawn tih chuan bah deuh nak hian, “Aw, tu phone nge?” ka tih chuan nui hak hakin, “Mimi-i,” tiin a dah a.
Ka number an nei ngawt pawh chu mak ka ti viau mai.

In ka thleng a, mahni chauha awm ṭhin, ho lam taka ei rawngbawl a awm mai mai ṭhin in hmeichhe pahnih ka awmpui a, in ka luh ruala ilo haw tawh maw? titu ka nei ringawt pawh a nuam phian mai. Ka inchhung fel fai lutuk te chuan nupui neih min ti chak rum rum hial mai. Mahse nupui nei tur chuan ngaihzawng neih ve phawt a ngai a, chu la hmu zo lo ang ber hian ka ngaihven der silo. Ka hmu zo lo chu a ni miah lo, ka hna nuam ka tih lutuk vang zawk ania, ka chhungte pawh hian nei tur hian min ti ve fo mai, fapa naupang ber ka ni a, ka u te’n an nei vek tawh a, ka hmanhmawh lo a ni e.

Zanriah kan ei a, kan titi ve nak nak a, Msi chuan thil thlenglo ang maiin eng eng emaw a sawi a, a hmel hlim tak hi hmuh reng ka duh. Mimi-i zawk erawh kan innel vak lo nen a ngawichawi deuh zawk a. Hmeichhe pahnih nui hak hak chu en in, “Ms, i ṭha em?” ka tih chuan min rawn en in, “Ka ṭha tawh lutuk alawm,” tiin a nui a, a dam lohna chhungchang ka zawt lo tih a hrethiam lo zawk em ni le? Mahse Mimi-i a awm ve miau avangin engmah ka sawi zawm lo. Kan eikham a, tv kan en a, Delhi kal ka tum thu ka sawi chuan, “A ṭha lawm,” tih chiahin min chhang, zan a rei deuh a, Mimi-i a pindana a luh hnu in, “Rs, Mimi-i hmeichhe fel tak a ni.” a tih chuan, melh zawkin “Nia,” tiin ka bu nghut a, tv chu ka en san leh daih a “Lalrinsang,” a rawn tih hluai chuan, “Nge ni ta?” ka ti vat a, ka awmdan avang nge thildang vang ka hrelo,
“Beidawn thlak emai,” tiin a tho nalh a, a pindan a pan nghal daih. A awmdan avang chuan mak ti zetin ka en a, hmeichhia hi hriatthiam an har anih hi ah.

Delhi ka kal ni tur a rawn inher a, Msi’n min thlah a duh thu a sawi tlat avangin min thlah turin a rawn kal ve a, Taxi in kan kal a, ka lut tur erawh hawisawn miah lovin min en a, ka ngaihtuah viau mai, mahse Ruatpuia’n alo ngaihven tur thu a sawi avangin ka ngaih erawh a ṭha. Delhi ka thleng a, a hmaa Sanjay ka lo biak lawk tawh avangin min lo hmuak a, a hmel pha dai ka hmuh chuan thil thleng a awm tih ka hria mahse engtin nge Ani hi ka zawh chhuah ang.

“Sanjay ka ril a ṭam, in thlen hma in restaurantah hian chawl ang,” ka tih chuan min hnial ka rin nen motor chu remchang laiah a dah a, restaurant-ah chuan kan lut ta a. Kan ṭhutfel rualin, “Eng nge thleng?” ka ti nghal zat. “Ṭhianpa dawt ka hrilh char char che avângin min ngaidam rawh.” a tih chuan, “Rengpuia chungah eng nge thleng?” ka ti nghal zat a, a lu thingin, mit sen rum a min melhin, “Eng chiah nge thleng hi ka hrelo, Rengpuia ka laka a awmdan leh Msi a huat thut dan hi ka hrethiamlo, mahse tunah hian kan mite ngeiin min enthla a, Rengpuia hian dawt ka hrilh theih nan che min vo bawk a, kei aia rank sang a ni a, ka hnial theilo. Tin, ilo call hian ka bulah a awm fo bawk. Sir Anil-a ngei khan an thu ka awi chuan ka chhungkua nen kan him tur thu a sawi a, tih theih engmah ka neilo a ni.” a tih chuan mak ti zetin ka en a, “,Anil-a maw!?” ka ti nghut a, “Um eng chiah hi nge thleng ka hrelo, mahse Rengpuia chu hmana kan hriat kan ṭhianpa kha a ni tawh lo, a hna aiin Rinzualina pawimawh tawh a, engkim inṭanna chu a hna buaipui theilo khawpa a awm avang khan, Sir Anil-a bulah ka sawi a, chuta ṭang chuan kei leh ka chhungte chu enthlak reng kan ni ta a ni. Vau beh ang ka ni tihna anih chu.” thawpik hmel zeta a tih leh chuan ka nui suk a, ka nui hmel chu mak ti zetin min en let thung.

“Khawiah nge i phone?” Nui lui huah huah a ka tih chuan, “Car-ah mahse ngati nge i nuih?” a ti let hu a, “Nui ve rawh, chuan hawi suh.” ka tih chuan kan dinhmun hrethiam takin ṭhian inkawmngeih hmel taka langin a nui ve huah huah a, pawnlamah enthla tu kan nei tih sawi hran a ngai miah lo. “Kan ṭang ho a nga engkim kan chingfel vek dawn alawm, Rpa pawh a rawn let leh ngei ang.” ka tih chuan, “Um,” tiin a bu nghut nghut a.

Rengpuia In kan thlen chuan min lo lawm thiam khawp a, a awmdan en mai chuan engmah thlenglo ang mai in a awm a, min lam theih loh avangin thupha a chawi luam a, “I ril a ṭam em?” tia ṭhutkhawmna a pan chuan Sanjay nen chuan zui vatin, thil kan lo ei tawh thu te ka sawi luam a, “Taka ilo thleng chauh na in zanin hian Zuali te office kum 10 na an lawm dawn a, kalpui ka lo tum a.” a tih chuan chik zet hian ka melh a, “Khatin min melh suh Nangmaha awm hreh rual pawh i nilo, Aw ka pawh tawh a ka tih a ngai alawm, chuan dinner alo ei dawn ania, Sanjay nangpawh lo ei ve la,” a ti nghal zat a, Sanjay-an, “Nidangah ni mai, Rsa hi ka ngai ve tawh a, ka hmu chak mai mai alawm, ka haw nghal mai nge,” tiin a ding uai a, “Hna i neih loh chuan lo leng ziah rawh,” tiin ka thlah ve bawk a.

Sanjay-a a chhuak a, Rengpuia nen eng eng emaw sawiin kan titi a, minlo dawnsawn ṭhat ka rinloh nen min hmu chu a lawm ve viau in ka hria. Msi a ni emaw, Rinzuali chanchin engmah kan sawi dun lova, a chhungte chanchin erawh a mawi tawkin min zawt ve. An hna buai dan te, court thurel te, mi tang tawh leh Minister an umzui tak te chungchang te min sawipui a, tin, a bu pui luhchhuah ni mahse khawpui anih angin sualna a tam thu te, tualthahna thleng fo te pawh a sawi a, Mizorama rawn awm a chak thu a sawi chuan a ṭawng pawtchatin, “Mizoramah chuan rawn awm daih la, kan zalen si a, hna a tam lova awl pawh i awl zawk daih ang, min en la ka duh hun hunah ka zin theih hi,” nui chunga ka tih chuan, “Ni e, mahse thluak erawh kan sawi zawi nge nge alawm.” tiin a nui ve hawk hawk a.

Kawngkhar a ri rak a, Rinzuali rawn lutin min hmu thut chu a hamhaih ve nge ṭawng mai nachang a hre lo. “Bawihi, Ani hi ka ṭhianpa Rsa anih hi.” tiin min hmelhriat tir a, kan inhmu tawh alawm tih mai ka duh laiin Rinzuali zawk chuan, “Anih chu, Rinzuali ka nia” tiin ka chibai theih nân a kut min pe a, ka lo chibai ve vat. A hmela lawmlo hmel hi ka hmuh hmaih hauh lo. “Mikhual i nei dawn tih i sawi silova,” tiin Rengpuia sirah chuan a ṭhu nghal zat a. “Nia hei min lo surprise ve anih hi, a fel ania.” tiin a tho nulh a, choka lamah chuan in tur a lam a.

Rinzuali mitmeng ling hlar chu nuih sukin, “I lung a awi vak na nge?” ka ti kher a, “Be tawh lo turin ka hrilh che in ka hria, Ani zawkin a zawm a nangin i hnial thung a,” thinrim sehchilh naka a tih chuan, “Mipa fa, inkawm pangngai inbe tawh lo tura thu inhrilh ngawt hi Nang hmeichhia ve mai mai sawi tur hi a ni chiah em le?” thamlo zeta ka tih chuan a kut a hum ngat ngat a, “Hmeichhe hmusit ching hi chuan an ti sual chawk ania,” tiin a nui lui hak a, ka mitko ka kan zeuh. Hmeichhia anih vanga hmusit ka ni hauh lo, mahse a khawsa zia ṭhalo zet avang hian a huat tur taka ṭawng kha ka tum reng a ni. Mahse kan ṭawng zawm hma in Rengpuia a rawn lut a, a landan a dang nghal hlak chu keiin ka lo nuih thung. Hmeichhe fel ber angin a nui sang a, Zanriah kil mai ṭha a tih thu a sawi nghal zat a.

Zanriah kan kil lai chuan a titi siam siam a, Bawnghnute chu kan pahnihin min chhawp sak a, kei erawh in, “Vanlala te anga bawnghnute dawt kuah kuah rual ka nilo,” tia ka nuih huk huk chuan, “Misual,” ti hlukin, “Keipawh zanin chu ka in lo mai teh ang,” tia a bawnghnute dahsawn chu Rinzuali chuan in turin a thlem a, a hnar luih tlat avang chuan ngui hmel zet hian a la let a, “Ṭhianpa keimah avangin i inlo ngawt elaw?” ka tih chuan, “Nilove zanin chu ka in chaklo mai mai alawm,” tiin a chaw chu a ei zawm a.

Zanriah kan eikham chuan, Insiam turin an lut a, Rinzuali’n Rengpuia pindan a pan ve tur chu, “Mipa pindan i ṭawm ngawt a?” tia ka nui lui chu a haw leh viau tih ka hria, “In Mizo culture ṭhing zet kha hetah rawn chhawm lut suh.” tiin a lut ta hmak a. Nangpawh Mizo ve tho alawm i nih tia ka lo chhang leh kher lo chu aw. Hei hi a ṭhalo, Rinzuali a ni emaw midang tan pawh, Mizoram pawna awm avanga nundan zawng zawng hloh hi Mizo te hian kan ching fo, ṭawng tih danglam emaw, chetdan phung tih danglam chiam hi kan tum ṭhin, chung ai chuan mahni hnam zia leh nundan anga nun hi, hnam chawimawi tu a ni tih kan hriat fo a ṭul. Khawpuiah kan awm emaw, Foreign ah pawh awm ila, kan ṭawng emaw kan culture theihnghilh ṭhaka khawsak hi tum loh hram tur. Hnam changkang apiangin an hnam tih dan an ngaisang zel tih tal hi chu hriat tur.

Rinzuali laka sual ka chhuah duh ai mah chuan innei ni miah lova mipa pindan ṭawm mai hmeichhia chu tupawh hian hmuh dan tawk kan nei vek, ka tan phei chuan inngaizawng ang pawh in ka hmulo. Rengpuia chungah hian eng emaw tak tih a nei tih ka hria, chutiang nilo sela he mipa rilru nghet lutuk hian a zia zawng zawng paih in, Rinzuali a pawm ngawt dawn lo, a thinlungah Msi a awm tawh a, engang pawhin Ani hi khawngaih mahse a hmangaih hi a kalsan ngawt hian ka ring hauh lo. Mipa ka nihna angin chu thil chu ka hrechiang tlat.

Zanin atan chuan engmah tih theih a awm dawn chuangin ka hriatloh avangin ka thlen tawh thu sawiin Mimi-i ka phone a, Msi be tur pawhin phone a nei ve miau lova. Msi biak ka tum erawh a chauh deuh avanga a muthilh tawh thu a sawi a, dar9 a pel tawh a, a muhil pawh a awmlo hran love. Rengpuia te chhuah hnu chuan inchhung chu ka enkual a, inthiamlo ru zetin a pindan thlengin ka enkual a, eng nge ka zawn ka hrelo mahse eng emaw tal Rinzuali diklohna finfiahna ka duh a ni. A pindan la chu a felfai thlup a, kei nen hi chuan kan in anglo teh e. Engmah ka hmuh loh avang chuan ka mutna lamah lutin ka ngaihtuahna kawmin ka mu zal a, ka lo muhil anih ka ring, ka phone ri ral ralah chuan ka harh zawk a, ka en rualin Ruatpuia call a ni.

“Hello,” hlauthawng zeta ka tih chuan, “Hrilh rihloh che ka tum zet a, mahse i hriat ve ngei a ngai ka ti leh zawk a,” a tih chuan, “Eng nge thleng?” ka lo ti vat a. “Ruang chhar a ni a, thlalak ka lo thawn ang che, Malsawma kha ka hrechhuak rum rum mai,” a tih chuan, “Hmeichhe ruang em ni?” ka ti nghal vat, “Nilo e, tuna mi hi chu mipa ruang chu ania, mahse a thattu hian a serh a tan sak a, tin, a thisen ni ngei turin, HELL tih a ziak bawk a.” atih chuan, “Thlalak chu lo thawn phawt teh,” ka ti ve ta ngawt a, a sawi dan mai chuan a mak bawk em a ni.

Ka whatapp message a rawn rik chuan download vatin ka en nghal a, Banga thisena thu in ziak chuan chhan a nei ngei ang tih ka hria, mahse eng nge a chhan. Mipa ruang thlalak a rawn dah chu ngun takin ka en a, hmuh tawh na ka nei tlatin ka hria, mahse khawiah nge ka hmuh ka hrechhuak zo lo. A serh bakah a kut ṭang pakhat tan sak a ni bawk a, a thihna tak erawh a hrawka chemte zum tak luh vang a ni. Fingerprint awm turah ngai ila, engvanga hetiang taka rawnga that nge anih hriat a chawkawm.

Pawnlama kawngkhar riah chuan Rengpuia a rawn haw nih ringin ka tho chhuak a, ka pindan aṭanga ka chhuak leh a necktie phelh mawlh mawlh a, a rawn phei ka lo ding min hmu chu a phu zuka, keiin mak ti zetin ka lo melh thung. “Vanlal tunah khan i phu,” mak ka tih em avanga chutia ka tih chuan, a phun hluka a eng nge a sawi ka hrelo. “Ila muhil lo em ni?” tiin min kalpelin ṭhutkhawmna lamah a lut a, a mitmeng dul ruihah chuan a chau ve hle anih ka ring.

A hmaah chuan ṭhu in, “In kalna chu a nuam vak na nge?” ka tih chuan, “Nuam e, mahse party kal hi chu a hahthlak.” a ti sup a, a chau tih hre mah ila, a thin tih rim ka duh tlat, thinrim lai hian ṭawng sum a har bik alawm. Ka phone pe in, “Enteh.” ka tih chuan rawn banin thlalak chu a melh vung vung a, a thil en ka bih zawk chuan, Mitthi hmel chu alo thlek vung vung niin, “A dang kha en rawh,” ka tih chuan, “Ka hmu alawm, hepa hi ka hria,” tiin a ngawi leh vung vung tawh a, eng tak nge a ngaihtuah ka hrelo.

“Lalrinzuali pahrawn kha anih hi,” tiin a ṭhu ngil a, thlalak dang chu en leh in, banga thu in ziak chu uluk takin a en a, “A titu an hre tawh em?” a tih chuan lu ka thing ringawt. Rinzuali pahrawn a ti a, ka hrechhuak uai mai. Lalrinzuali ka chhui naah khan a chhungte thlalak hi ka hmu tak e. Lalrinzuali’n In a haw duhloh chhan kha a ni a, Anih chuan hetia a kut phuar sak anih tak loh hnu hian midang ruai in a thah tir a ni thei mai angem? Engvangin nge Ani nena inkungkaihna nei kher hi rawng taka thah anih.

“Vanlal Amah hi a ni lawm ni Rinzuali haw duhloh chhan bul ber kha?” ka tih chuan, “Um,” tiin min melh nghal run a, “I ringhlel chu a ni em lo maw?” a ti leh hmuk. Chhanna ka pek hma in, ” Ring buai duh suh, Ani hi chuan haw viau mahse midang ruai pawn a ti thei lovang.” tiin ka phone chu dawhkanah a dah a, a pindanah a lut ta daih a. A awmdan chu en zuiin, “I danglamna hmasa ber chu ka hmu ta phawt e,” ka ti chhuak sup a.

19

(Rsa Pov)

Rei tak Delhi-a awm thei ka nilo tih ka hria, chet ka lak vat a ngai tih hre mah ila Mizoram boruak nen eng tak hi nge ka tih ang tih ngaihtuahin ka buai a. A ina thleng ni mah ila, Rengpuia nen inbiakna hun fal kan nei thei meuh lo, zanah tlai takah a rawn bang a, zingah la hma takah a kal a, ni thum ka awmna a ni ta, engmah ka la tilo chu ania. Nizan haw hma a intiam a, alo haw hma ngei mahse Rinzuali a rawn tel miau a, inbiakna hun kan nei leh chuanglo kha ania. Ka ngaihtuahna ṭha lo zet puitlin tur chuan Sanjay-a ka mamawh tih ka hria, Ani khan buaina a tawk tih a sawi anih kha.

Min lo lam bak kan la inhmu leh miah lova, Ani pawh an mi leh sa te’n a chhungte nen lam an enthla a, a puina ka dil theilo ang. Keimaha ti turin eng ruahmanna nge ka siam ang? Ruatpuia ka bia a, Ani nen ruahmanna buaithlak zet kan siam a, tin, Nukimtei pawh bia in Rengpuia call reng reng ni hnih chhunga chhang lo turin ka ti bawk a. Ka hlawhtling lo anih chuan tun bak chance kan nei tawh lo tih ka hria.

Thlawhna ticket ka la a, tlaia Rengpuia hna bang rawn haw bulah chuan ka haw tur thu ka sawi a, “Nga ti teh thut nge?” a tih chuan, mak ti zetin ka en a. “I chhungte i be ngai miah lo em ni?” dem aw taka ka tih chuan a lu a thing a, “Vanlal ilo mak hle mai, i pa a mar chiah an en tawh a, chu thil chu i hrelo a maw!?” ka tih chuan, “Eng tin maw?” a ti hu a, a mitmeng buai zet ka hmuh chuan, “I chhungte hi i kalsan tak tak em ni?” Ka tih chuan, “Aih, engtik lai mahin ka kalsan ngailo,” a ti hmuk a, a mitmeng danglam chu chiang takin ka hmu thei. “Mahse i awmdanah hi chuan i ngaihsak lo anih ka ring, ka rawn zin tur thu ka sawi pawh khan, i nu in mittui tla chungin in inkar i tih tawp thu a sawi ngei alawm,” ka tih chuan. A thaw hawk a, “Chutiang engmah ka sawilo,” a ti zawi sup a.

“I nu chu be chhin la, dawt ka sawi angah i ngai em ni?” ka tih chuan rum zeta min melhin a phone a phawrh a, a chhungte tumah a biak tlang theih loh avang chuan thinrim zet hian, “Ka pa chungah chuan eng nge thleng?” a tih chuan, “Ka hrechiang chiah biklo, tlaiah khan i nu nen kan inbia a,” ka ti ṭha ve mai a, a thaw leh hak ṭhin, a chhungte a ngaihtuah zia ka hria, Msi chu a tan a pawimawh tawh lo anih pawhin a chhungte hi chu a hmasa ber an nih ka ring tlat a ni.

Rinzuali a rawn lut a, chawhmeh leh thil dang a rawn khai bawr ṭun a, kan thusawi sawi zawm ka duhlo tih a hrethiam ve a ni mahna Rengpuia pawhin engmah a sawi tawh lo. Rinzuali’n ei siam hnena ei tur siam dan tur a hrilh mawlh mawlh laiin Rengpuia erawh pindanah a lut a, a inthlak dawn pawh a ni mahna. Rinzuali choka aṭanga rawn chhuak chu ka nuih vur vur a, a mitmeng chezia engkim hian min ngaithei hlawllo tih ka hriat avanga a huat tur zela awm ka ni.

“Ka haw dawn asin, ṭha deuh te khan min be ve la,” ka tih chuan a pen lai chu a tawp chat a, rawn hawi letin, “I ti tak tak em?” a tih chuan bu nghatin, “Min ngai theilo em a ka haw mai ang chu,” ka ti kher a, a mithmul kan zeuh a, “Engtikah?” a tih chuan, “Naktukah,” tiin thawveng hmel zet hian ka ṭhutna aṭangin ka tho a, choka ka pan a, min rawn zui nghal vat. “I rawn kal tawh lovang tiraw?” a tih leh chuan nuih sawng hian, “Ka rawn kal leh anih chuan ka silai nen ka rawn kal ang,” ka nui lai tawp hmaka tiin tui bottle nen choka chu ka chhuahsan a, a nui hmel kha ka hmu peih lo.

Rengpuia rawn chhuak chuan, “Dar engzatah?” a tih chuan a hun ka sawi a ka pindanah ka luhsan nghal daih. Tikhan inngaihtuah buai ve rawh se. Chaw ei dawn hnaihah pindan aṭangin ka chhuak a, Rengpuia hmel ngui bur ka hmuh chuan a rukin ka khi sak. A sawi lo nge ni, Rinzuali chuan, “I damlo mi?” tiin duat hmel zet hian a buaipui a, “Ka ṭha ka chau deuh mai ania,” tih bakin Ani la in a chhang silo. Choka luhna bula ka ding min hmuh rual chuan ka lam pana rawn kalin, “Nang hian a bulah eng emaw sawi i nei em ni?’ a tih chuan ka dar chhin ak in, “Hmeichhe zamlo ve tak chu i ni,” tiin ngeiawm zetin a taksa chu ka melh kual a, “Nang mi zaktheilo pa,” tia a vin ṭhat chuan Rengpuia chu a rawn hawi vat a, kei erawh ka din ngaiin kekawr ipte zenin ka ding ngar a, ka chesawn eih lo.

“Eng nge thleng a, ka chau tih pawh a thawm dang i awm tir sek le?” Lungawilo zeta kan lam pana a rawn tih chuan, “I ṭhianpa min melh dan hi ka duhlo,” tiin Rinzuali chuan min melh ran a, Rengpuia chhan a beisei deuh te pawh a ni mahna. “Engtin nge maw i tih le?” ngaihsam zeta Rengpuia’n a tih chuan nui lui in, “Ka hre bik hauh lo,” ka tih chuan Rinzuali thinrim chu a zual sauh tih ka hria. “Mi hur ang mai in min enkual vel chiam alawm,” atih chuan Rengpuia pawh a nui ve suk mai. Kan awmdan avang chuan, “Kan inhmuh tir aṭang rengin nang hian mi pangngai lo hmuh in min hmu a, heta ka lokal te hi min sawisel a ni lawm ni, ilo thlen zanah khan, pindan ka luh ve avang khan hmeichhe lepchiah min ti anih kha,” tiin a inhnit feih feih a, Rengpuia’n Amah kuah a, “Rinsang eng thil nge a sawi hi,” tia min melh run chu kawng dawm meuh in ka en tawp.

“Sawifiah vat rawh,” vin ṭhaka a tih leh chuan ka phone phawrh in gallery ka hawng kual a, Mimi-i nena kan thlalak chu an lama lek langin, “Ani aia it tur che chuan ka mitah chuan i ṭha lo zawk tlat,” ka tih chuan a ṭap chu a rawn hawi nghal zawk. Rengpuia pawh chuan chutia hmeichhe thlalak ka hmu tir chu mak ti zetin a en a, ka phone rawn lak mai a tum chu phallo in ka ak leh hmiah. “Ka ṭhianpa emaw ka ti che a, mahse…” tiin ka ngawi dat a, ”Ka bialnu hre ve turin ka duh rih lo che,” tia kawngkharpui pana ka kal chu an inhnial thawm ka hre zawm nghal. Pawn ka chhuah rualin ka thaw haka khati khan lo inhau ve hrim hrim rawh se.

Sanjay-a lo call tur awm miau heklo, ka call a pangngai takin min lo chhang mahse hlauhthawn ruk a nei tih ka hria, mahse ka haw dawn thu leh inthlahnan bar a kalpui ka sawm a chutianga ka sawm chhuah chu a fuh berin ka hria. In kawta a rawn din rualin a motor-ah chuan ka lut vat a, Ka luh ruala a hmaa a phone a melh zeuh avang chuan a ṭawng an ngaithla thei anih ka ring ve tawp. Thil pawilo tur hlir sawiin ka titi a, inkhelh te a ni ka sawipui daih.

Bar kan lut a, ka ril a ṭam thu ka sawi chuan, “Chaw i ei lo em ni?” a ti nghal vat a, ka lu ka bu nghat. Dawhkan awlah chuan ṭhu in ei tur a lam a, bar pangngai a nilo emaw ka ti hman mahse pindan lehlam kawngkhar a inhawng zeuh zeuh a, thawm bengchheng a rawn chhuak zeuh zeuh a, boruak awmdan chu ka man ve mai.

Zu chu a mawiah a lam ve a, ei tur chi hrang hrang a lam bawk a, kan dawhkan a khat vek thei nia. “I haw dawn tih sawi la chuan, kan inah ka sawm ang che puar deuh khan ei phawt teh,” a tih chuan ka nui vur vur a, “Mifelpa,” mizo ṭawnga ka tih chuan a bo leh hu tawh. Mizo ṭawng kawi khat pawh thiamlo a Mizoram a rawn kal lai khan hrehawm a ti ve ngawt in ka ring. Ka thusawi awmzia hrilhfiah paha thil ka ei chu paper phawrhin eng emaw hi a ziak mawlh mawlh a. Ka ei lai mawlh mawlh chuan min rawn pe a. “Ka phone kalsan an phal tawhlo.” a tih chuan nichin motor ka luha a awmdan kha mak ka ti reng a ni. “Arsa hi a tui hle mai.” ka tih chuan an ei tur tui zia hlir a sawizawm char char a, lehkhaah chuan eng eng emaw a ziak char char thung a.

Ka ei zawh chuan lehkha chu min pe a, Bathroom-a ka kal tur thu sawiin ka thawh san a, ka luh rualin lehkha chu ka en vat a, ” Fimkhur rawh, tu te nge ṭang rual ka la hre theilo, Rengpuia hi veng rawh, Hell Project kha ala tawp lo. A bul tumtu hi ka hrelo mahse Anil hi ka ringhlel ber min vo tu kha ania, phone thar ka mamawh sim nen keini chu kan kalna apiangah enthlak kan ni a, naktukah ka lo thlah dawn che a, chutah chuan min pe thei ang.” a thu ziah chu uluk takin ka chhiar nawn leh a, ka fimkhurna tur chu tam tak a awm thei, Rengpuia venhimna tur a tih pawh hi ka hre thei mai ang, mahse nga ti nge he project hi thar thawh anih leh kher? Tu te’n nge chuthil chu ti ni reng reng ang le? Anil a tel ve ang maw, Ani te chuan Sanjay-a pawh a ringhlel a a enthlak tir a ni si a, a an inringhlel tawn vek tawh anih hi.

Pawn ka chhuah chuan mi pakhat hian Sanjay hi alo bia a, ngaihṭhat lohna neilo ang takin ka chhuak a, an bul ka thlen chuan, Sanjay-an min lo be vat a, “E Rs hei hi ka ṭhianpa John (JOS) anih hi, Mizo ve tho anih hi,” tiin min inhmelhriat tir a, Ka hmaa mipa hleitling leh smart tak ding chu ka chibai a, “Sanjay hian i haw dawn tih a sawi, Aizawlah a mi i awm?” atih chuan, “Um ni e, Eng nge hetah i tih ve?” ka tih chuan Sanjay-a chu lo nui hakin, John chuan, “Sorkar tan ram pawnah hna kan thawk ṭhin a, kan fate kan ngai a, chawlh kan rawn la anih hi,” tiin kan hmalamah chuan a ban a phar zeuh a, Sanjay-a chu hlim hmel zet hian, “Wow hmelṭha em em ilo kal ve ni maw,” tiin a ding hluai a, kan dawhkan bula hmelchhe chhelo zet ding chu a kuah thuak a, Sanjay-a chu ka bulah rawn in sawnin John-a bulah chuan hmeichhia chu a ṭhu a.

“Ka nupui anih hi Rosaline,” a tih chuan ka thil in lai chu ka hak lo chauh, nula tam tak ai hian a chhelo in a nalh zawk daih, a hmel la duhthusam a ṭha ala ni zui. An nupa titi chu kan ngaithla a, eng hna chiah nge an thawh tih hrelo mah ila, an zin kual nasa tih a hriat. Sanjay-a la chuan ngaihsan hmel tak hian a en a, Rosaline-i chu dingin, “Rs lam ila,” a tih chuan phawk zet hian ka en a, “Ah ka lam ngai miah lo,” ka tih chuan, “Ka zirtir ang che,” tiin min rawn kai a, mipa pahnih la chu an nui mai mai bawk si, ka tihngaihna hrelo chuan Rosaline-i chu ka zui ve ta tawp a, kan lam dun chu ka zeilo nasa mai si, Ani la tleirawl ang mai in a lam thiam em em mai bawk si a, ka zahzelah ka nui ka nui ringawt mai. A lam hla deuh chu min lo hnaih thutin, “Tu nge Rengpuia?” tiin min thlek ha a, a ngaihna hrelo zeta ka en chuan ka lehkha them Sanjay-a min pek kha a rawn lek kang va va a, “Ka hmuh tir che khan Police lam i ni tih ka hria, mahse tu nge i venhim tur chu?” a tih chuan chik zetin ka melh a?

“Engvangin nge ka hrilh kher ang che?” ka tih chuan, “Ka pui thei mai thei che asin, Sanjay-a’n a pui thei silo che a,” tia a nuih sang chuan, “Nang hi,” tia kalsan ka tum chu ka banah chelhin, “Pawnlamah kal suh, hetah chuan enthlatu an awm lo, Sanjay-a’n min ko a, heta rawn kal kan nih hi. Nangmahni ṭanpui turin,” atih chuan mak ti zetin ka en a, “Anih chuan nang hi Police i ni tihna em ni?” ka tih chuan nui hakin a lu a thing a, “Indian Army, ram danga Spy atana tirh chhuah ṭhin kan ni, ka pasal nen khan,” atih chuan sawi tur hrelo in ka en tawp. Hei vang hi anih hi Sanjay khan ngaihsan hmel zeta alo thlek vung vung ni.

A kil lamah chuan min kalpui in, “In buaina zawng zawng ka hrelo mahse naktuka haw i tum danah plan i nei anih ka ring, Sanjay-a chu kan pui ngei ang nang hi engtianga pui nge i duh?” a tih leh chuan, ngaih ṭha vaklo hian ka thil tih tum ka sawi a, ka sawi zawh chuan a nui hak a, “Rinzuali chuan a hriatloh i ring a maw, tunah pawh a hrilh leh vek tawh zawk mai thei chutianga Rengpuia chu a awm tak tak anih chuan. Kan hna kan lo thawk ang, nangin i hna lo thawk rawh, Mizoramah kan inhmu dawn nia, Lokal rawh lehlamah khan kal tawh ila, buaina laka kan him theih nan,” tiin Sanjay-a te awmna lampan chuan kan in zui chhuak ta nghal a.
Kan pahniha kan let chu, a pasal ka en nghal vat a, a nupui ang maia fing a ni ang tih ka ringhlel lo, “In lam chu a nuam em?” tiin John chuan min lo zawt a, “Ka lam thiam ve lova, innu hi ka en tawp,” ka tih chuan a nui hawk hawk a, “Bawihi, India thlen chu a nuam hle a ni tiraw, kan ram kan thlen hma hauhin Mizo hmel kan hmu thei ania,” tiin annu chu a melh vang vang a, eng hna tak nge an thawh ang tih hre veklo mah ila Mizoram thlakhlelhna an nei fo a ni tih an ṭawngkamah a lang a, nupa chhuanawm tak an ni ve hrim hrim. An rawn thlen chinah Hindi leh Mizo bak ṭawng dang an la hmang miah lo. English emaw ṭawng dang an rawlh tel sek lo thei hi an fakawm ka ti hle a ni. An sawi danin ṭawng an thiam hnem hmel hle si a.

Zan a rei deuh hnu chuan kan chhuak ta a, eng nge an plan hrelo mah ila Rosaline-i khan haw tawp turin min ti anih kha, tichuan Mizoram lamah kan inhmuh tur thu a sawi a, ka ring tawp ang nge Rengpuia hi ka bum chhuak ang. Tun dinhmunah chuan Anni kha ka rin mai angai a ni, Lalrengpuia hi bum chhuah ni tur atan chuan a fing lutuk mah mah. In ka thlen chuan Rengpuia leh Rinzuali te ṭhutkhawmna lamah hlim taka inkawm ka hmuh chuan John te nupa ring tura thutlukna ka siam kha ka tisual lo tih ka hre nghal. Min hmuh rualin, “Khawiah nge i kal daih a, i haw dawnah khatiang boruak kha kan nei a, min hrethiam teh aw, ” Rengpuia chuan rawn dingin a ti nghal vat a, melh vung vungin, “Ṭhianpa kei chuan hlim takin awm la ka duh ber a ni.” ka tih chuan, “I ṭha em?” tiin chik zetin min en a, ka nui lui nghal suk.

“Bar-ah ka kal pek alawm le, zu ka in ve deuh bawk nen ka mu mai teh ang naktuk haw tur ka ni si a.” ka tih chuan, “Um inkawm pawh kan inkawm hman lova, naktukah erawh keimah ngeiin ka thlah dawn che nia,” a tih chuan ka pindanah ka lut nghal a. Engmah lungkham ka duhloh avangin ngaihtuah zawm duh lovin ka muhil ta vat a.

Zinga ka harh chuan ka phone ka en a, dar6 chauh ala ni, message awm chu ka hawng a, Mimi-i min lo wish na ka hmuh rualin ka chhang let a, ka tho nui var var mai. He hmeichhia hi hmeichhe fel tak niin ka hria, hmeichhe ṭhian neih hi a nuam ka ti thar te pawh ni mahna, Sangpuii aṭang khan hmeichhia hian mi hriatthiamna te an ngah a nuam ka ti riau zel a ni. Choka ka luh dawn chuan Ruatpuia call ka dawng a, “Ruang chhar a ni leh,” a rawn ti a, Nikum boruak zawng zawng nen ka ngaihtuah a, Bar thla kan chuangkai dek dek a, tiang boruak bawk kan tawng lehnghal a.

“Thih dan ngai em ni?” ka tih chuan, “Aih nilo mahse hriamhrei hmanga thah a ni, Hell tih erawh thisenin a in ziak leh tho.” atih chuan ka thaw haka, a mak em a ni ngati nge Mizoramah kher a thlen leh, he project hi eng chiah nge kan zirchiang deuh chu a ngai ani, a hre ber tur Lalrengpuia la heti hi a ni si a. “Ruatpui, thlalak awm ang te min lo thawn leh phawt teh aw, vawiin chawhnuah ka rawn thlawk haw dawn a, nakinah engkim ka hrilh ang che.” tiin phone ka dah a, thlalak a rawn thawn chu uluk takin ka en a, tuna mi hi chu hmeichhia a ni. Lalneihpuii a ni a, private school-ah zirtirtu a ni. Chemtea a hrawka zai a ni a, Ruatpuia sawi danin a school bang inah a haw loh avangin a chhungte’n an zawng a, ṭhenawm khawveng pun in nizan an zawng tlaivar tawh ni awm e, tichuan tukin zing dar5 khan an in piah kawngthlangah a ruang hi naupangin an hmu anih hmel. A hrawkah chemte in an zai a, tin, a banah zai bawkin Hell tih hi a in ziak a, a lumna vela a taksa pem satliah leh duk ve deuh tih bak lo hliam dang a neilo.

“Eng nge thleng a, ka chhungte lam em ni?” Rengpuia’n ngaihṭha vaklo a atih chuan, “Nilo e, hei,” tiin ka phone chu ka entir a, uluk taka en in, “A mak kher mai, eng nge maw awmzia ni ang le.” atih chuan ka chhanglo. Hell Project chungchang kha sawipui ka duh lutuk mahse tunah chuan ala theih rih miau lova. “Ka chhungte i be pawp tawh em?” a ti daih a, ka be hauh lo tih ka hria mahse, “Ka haw tur thu ka hrilh a, i nu a thla a phang si a, a bak engmah kan sawi lo.” tiin a awmpui nu thingpui rawn dah chu ka in a, ngawirengin kan ṭhu dun a, Rengpuia chuan, “Ani kha, Rinzuali ṭhiannu nau a niin ka hria,” a rawn ti chhuak hlawl a, “A damlai thlalak i nei em?” a tih nghal zat a. Ka phone phawrh a ka entir chuan, “Bawihi,” tiin an pindan lam chu a hawi a, Rinzuali ka hmuh rual chuan Msi ka ngaihtuah chhuak a, chu hmeichhia chu ka haw kher mai, nupui hual a nei tih a hre ve tho awm si a.

“Engtin nge Neihpuii thlalak i neih a?” min tih chuan, “Tukinah a ruang an chhar a,” ka tih chuan a mitmeng danglam nghal chu ka en reng a, “Ka pa hrawn kha chu a sual man ka ti thei a, mahse Neihpuii chu hmeichhe fel tak a ni asin, tu nge hetiang hi a chungah ti duh ang le,” tia chair a a ṭhu chu en in, “An la hrechhuak vat mai ang,” tia ka phone dawhkana awm chu ka la a, chutia awlsam taka ka sawi vang chu nge ngaihtuahna dang a neih vang ka hre lo min melh ling leh hlar tawh. “I hmelhriat pahnih an boral a, a chhan tur awm i hria em?” ka tih chuan a nui hak a, “Delhi tlang aṭang hian engtin nge hria se min tih?” a ti hmak a, ka kâ ka ang leh tur erawh Rengpuia’n mitmeia min khap avângin ka ṭawng zawm lo, pindan lamah a lut leh hmak a, Rengpuia ṭawng tum chu nuih sukin dawhkan ka thawhsan hmak. Min ngaitheilo em em nghal lo sela ṭha takin Rengpuia pawh ka titi pui thei tur, hetia a awmlaia chhan harsa a tih tur hlir sawi hi a nuam ve hrim hrim.

Ka pindan lama ka thawmhnaw tlem te chu racksack-ah akin ngawirengin ka chhuak a, duh leh min lo zawng ve mai rawh se. Lalrengpuia kha chuan tlem te tak takin min la ngaihsak ve kha min zawng lo anih pawhin a pawina a awm lo. Phone dawrah kalin phone man to vaklo ka lei a, sim card ka lei nghal bawk a, restaurant-ah chawlin ka in ei puar a, sana ka en chuan Airport panna tur nen hun ala tam tiin gift item an zawrhna dawrah ka lut a, hmeichhe pahnih ka chenpui miau alawm. Mahse eng nge an duhzawng tur ni ang ka hre mai lo a ni. Ka enkual hrep hnu pawhin lei tur ka hre lo lutuk chuan a nghaktu tleirawl bulah chuan hmeichhe duhzawng tur ka zawt ta ngawt a, hmeichhe tan thilpek ka lei ngai miau lo alawm.

Bag tereuh te mawi danglam zet pahnih chu a hrangin a pack a, rilru nuam deuh in dawr chu ka chhuahsan ta a. An duhzawng a ni em ka hrelo mahse helai thleng ka zin a engmah hawn loh ai chuan a ṭha hrim hrim, a to phian lehnghal a, an duh ngei pawh ka ring. Sana ka en leh a, Ka piah lawka chhang dawrah chuan Sanjay-a tan chhang ka lei a, Amah hmu turin an Office ka pan ta vang vang a, an building kawta ka ding chu hawi chho vang vangin, ka lut ang nge ka ko chhuak ang tih ka ngaihtuah lai chuan Amah zawk hmanhmawh angreng takin a rawn chhuak a, min hmu thut chu a beisei lo lutuk vang nge a ding dat a, min rawn pan lehnghalin, “Ngati nge hetah i rawn kal?” tiin a hawi kual thuak a. “Ka haw hma in ka rawn hmu che,” tiin ka nuih suk a.

“Chhang thlum ka lo ken che a,” tiin chhang ka lei sa chu ka pe a, a hawng a, “Ka lawm e aw,” a tih chuan, “Lawmthu sawi suh, ka thlen velah ka lo bia ang che. Mizoram lam pawh a buai viau ania, news i hre tawh em?” ka tih chuan, “Um, kan ngaihven ru vek alawm,” a ti sup a. “Ka kal ange,” tiin taxi lo tlan chu ka phar a, “Ka thlah ang che ka ti sia,” a tih chuan, “A ngailo, kan inhmu leh vat dawn nia,” tiin kan tlan san ta a.

Airport ka thleng a, ka nghah deuh vang vang hnuah check-in nei turin min ko a, Rengpuia’n chanchin engmah min lo zawt lo leh min lo be lo chu ka rilru in ka lawmlo viau a, mahse an tan khan ka hnawksak ve hle in ka ring a, keimah in ka nui suk a, ka hmaah mi pahnih an la ding tihah chuan Police Inspector hian min lo ti ding a, a ngaihna hrelo zeta enin, “Inspector eng nge ni ta?” ka tih chuan, “Officer Rengpuia bo chungchangah zawhna zawh che kan duh a,” a tih chuan ka mak ti zetin ka en a, Lalrengpuia a bo a maw? Mahse engtikah? Zinga in ka chhuahsan kha chuan a awm reng si a.

Police te chu zuiin Police Station-ah chuan kan kal a, thil awmzia zawtin a bo dan min hrilh a, “Office kal tura a chhuak kha khawiah nge a pen hriat a nilo, office a thleng lova, tin, biak tlang theih a nilo bawk.” a tih chuan, “Darkar 24 pawh a la liam lova in zawng nghal a?” tia ka zawh let chuan, “A nupui hualin tukin zinga a awmdan diklo avangin report a thehlut miau si a, tin, an Pu Anil Sharma pawhin zawng phawt turin thu min pe miau si a ni.” Inspector chuan a ti leh a. Mak ka ti deuh, “Office alokal lo ngailo a, tin, hna khawih lai a neih avangin a mize enin zawn hma a pawilo a ti leh zel a,” a tih leh chuan lu bu nghutin, “Eng nge min zawh duh?” ka ti nghal zat a, “Nang hi a nupui hual chuan a puh che a ni,” tlang taka min hrilh chuan ka khi suk a, a bo anih tak tak chuan a puh hmasak ber tur ka ni miau alawm le.

Ka phone min dil a, ka pe ve mai a, lock ka hawng a, gallery a check a, “Rengpuia nen chuan in in kawmngeih viau em?” a tih chuan, “Aw,” tih chiahin ka chhang. Nga ti nge a bo, mahni inveng zo lo mipa a ni miah silova engtin nge a bo theih? “Heng thlalak te hi engvanga kawl nge i nih?” vin deuh ṭhaka titu avang chuan ka ngaihtuahna aṭangin ka harh zawk a, Ruatpuia thlalak min lo thawn te chu en in, “Ka tihpalh ka ngaihtuahna ka lo hmang deuh alawm mawle,” tia ṭawng zawm ka tum chu, “Ngaihtuah vak lo khan ka zawhna hi chhang rawh.” a ti hmuk a.

“Thinchhe hle mai,” tia ka phun sup chu, a thin a rim tih hriat takin min vin ta vak vak a, a nau te ho a hrawk kual bawk a. “Inspector, mi thinchhe tak i nih kha,” tiin ka wallet ka phawrh chu ka kawr nghawngah rawn ṭhamin, “Engmaw i sawi a?” atih chuan, ka thaw haka, “Engpawh nise Rpa bo dan i chhui dawn nge kei hi min puh thluk i tum?” ka tih chuan, “I ni tih kan hriat avanga heta hruai che kan ni,” tiin ka thawmhnaw leh thildang chu min laksak nghal vek a, “Lock-up ah dah ru,” a tih vin leh ṭhat chuan thawhawkin constable min hruaina lamah chuan ka zui ta a.

Darkar khat dawn Lock-up a ka awm hnu chuan, min rawn hruai chhuak a, Kha Inspector thinchhe zet leh Sanjay-a inbia ka hmuh chuan ka pan vat a, Inspector min biak pawh nghak hman lovin, “In hmu tawh em?” ka tih chuan a lu thingin, “Rinzuali’n a puh tlat che a, lo insawi fihlim tur che lawm, Police te pui tura tih ka nih khan ka hre ve chiah a,” tiin a nui suk a, Lock-upa dah ka nih vanga min nuih tih ka hre mai, hunlo viau mahse ṭhian kan infiam ve na tur kha ni miau a. Ka thawmhnaw min lo pek chuan, “Ka pu min ngaidam rawh, kan hriatloh vang a ni.” Inspector-in a tih chuan, “A pawilo i hna i thawk alawm,” tiin kan kalsan ta a.

Pawn kan chhuak chu khua alo thim der tawh nia, darkar khat lek emaw ka awm ka tia, ka lo awm rei viau anih dawn hi, Sana ka en a, Dar7 alo pel der tawh. “I ril ṭam ka ring.” a tih chuan, “Lalrengpuia ka ngaihtuah lutuk anih ka ring,” ka tih chuan ka darah rawn beng thak thakin, “Ngaihtuah vak duh suh, naktuk atan ticket ka laksak che a, harsatna awm lovin haw rawh, kil tin aṭanga kan zim chuan engkim a ṭha mai ang, chuan ka lawm daih zawk.” tiin thlawhna ticket min pe a, chhang bawma phone ka dah tel tir kha a hmu tih ka hrethiam mai “I tan hian harsa a awm ve em?” tiin ka ticket chu ka melh a, a nui vur vur thung.

Rengpuia inah ka let a, kawngkhar a inkalh loh vangin kik lovin ka lut a, Rinzuali ṭhutkhawmnaa thlanglam hawia phone a hmang chu ka en reng a. “Zanina ral hma ngei hian in zawng hmu tur a ni.” ti vin ṭhakin phone a dah a, tu nge a biak ka hrelo mahse Hindi a hmang miau a, Mizo a belo tih a chiang phawt. A rawn inher min hmu thut chu hlauthawng zetin a tawlh hnung dawr a, “Nang hi engvangin nge hetah i awm?” a tih bah nawk chuan, rum zeta melhin, “Awm lo la chuan Mizoramah ka awm daih tawh tur, Rengpuia awmloh chhuanlamin ka awmna tur i hriatchian vang a ni lawm ni Airport aṭangin min koh let tir?” ka tih chuan mitmeng ling hlara min melhin, “Zaktheilo pa, Ilo let leh avang hian i thi ngei ang,” tia a phone hmeh a tum chuan, “Kha thil kha i ti anih phawt chuan Lalrengpuia hi a thi ve nghal ang, tuna i hmanraw ṭangkai ber.” ti ve hmakin ka phone ka phawrh a, a inngaihtuah nasa tih hriat takin a meng zak zak a. A phone chu a dah thlanta riai riai a.

“He ina kan pahniha riah dun chu i duhlo ngei ang.” Ka tih chuan, “Khawiah nge Rengpuia,” a ti vin ṭhat a, Ka bag dahthla in, ṭhutthlêngseiah chuan ka ṭhu a, “Min thah chak viau mah la i mamawh ber ka kawl tlat sia, inbe zawk ila,” nui suka ka tih chuan, thinrim zet hian a ṭhu a, “Eng nge i duh?” a tih chuan, “Mizorama ka haw a ngai tih i hria lawm, i chhungte thattu ka zawn a ngai a,” a huattur taka ka tih chuan, “Ka chhungte an ni lo,” a ti hmak a, mit ko ka san nghal ak a, “Engpawh nise vawiin hian min haw tir la chuan tunah hian alo let daih tawh tur, a chhungte a thlahthlam vanga hremna anih hi,” ka tih chuan, “Chuvang chauh chu maw?” mak ti hmel deuh hian a ti a, “Um a nu in a ngai em a, mahse i hria a nupui hual thlauh thlaa nang a duh leh takah che khan a pa in an inlaichinna a ti tawp a,” ka tih chuan, a mitmenga lawmna chu ka hmu, lawm anga lan erawh a duh lo tih hriat takin a ṭhutdan siam remin, “Anih naktukah lo haw tir la,” a tih chuan, “Ka thlawhna a thlawh hma in message ka lo thawn ang che, chumi hma chu i hmu lovang,” ka ti tlat a, min rinloh tum mahse ka hmelah a langchiang a, “Awle,” tiin min chhuahsan ta a.

Pindanah ka lut a, Rengpuia chin hrelo mah ila, Sanjay-a kha a rilru a hahlo emai, hahdam ve tawp ang. Tui takin ka mu a, Zing ka thawh rualin ka insiam a, Eirawngbawl tu a rawn kal chuan thil awmzia sawiin a pu lo let hma chu inkalh a, lut miah lo turin ka hrilh a, Rinzuali’n a zawn hmuh theihlohnaa awm turin ka ti bawk a, pawisa tlem pe in ka haw tir leh ta a. Chawhmaah kan thlawk chhuak dawn a, Rinzuali’n phone no min pek chu ka text a, “Khawiah nge a awm?” a tih chuan dawhthei turin ka ti a, hetia chhaih thinrim hi a nuam ve hrim hrim. Thlawhna kan luh dawn chuan, Address ka thawn a, thlawhna chhungah chuan ka lut ta a. Ka address thawnna hmun an thlen huna a thinrim hmel tur ka ngaihtuah a, ka nui suk a.

20

(Rpa Pov)

Lengpui Airport a ka din laiin ka phone a rawn ri a, Rinzuali a ni tih ka hria, nui vur vur in ka pick a, “Nang mi dawheh khawiah nge Lalrengpuia a awm?” a rawn ti vin nghal ṭhat reng a. “Miss i aw kha a chhang palh hlauh ange,” ka tih rualin anchhe tinreng a phuh chhuak nawk nawk a, “Mizoram kha ka rawn thleng anih chuan a pawi viau ang,” tia min vau na chu ngai pawimawh lo zetin, “Lalrengpuia hruaibo tu ka nilo tih i hriat avangin i thinrim anih kha,” ka tih chuan, “Maw” a ti nghek a, Zan lama kan titi zawng zawng dawt anih thu ka sawi leh lek phei chu nasa tak a ni. A hmel awmdan tur zawng zawng nen ka mitthla a, nui vur vurin call ka dah nghal daih a.

Station lamah an buai tih ka hria a, tin, ka haw tur la tumah hrilh ka neilo. Msi te pawh surprise ve hrim hrim ka duh avanga hrilh lo ka ni a, Taxi la in Aizawl ka pan a, Bazar kan thlen chuan dawra Msi lut ka hmu zuai a, ka hmuh sual anih ringin ka en leh ngat a, taxi din tira biak mai ka tum erawh mipa pakhatin a biak avangin ka chhuk tum chu ṭhulhin ka en a, a kalpui nge a be ve satliah tih hriat ka duh vang a ni. Hnamdang tih a chiang a, mahse be satliah a anglo, Msi chuan Restaurant lam chu kawk in an lut dun ta a. Henu hian hnamdang ṭhian a neih ka hrelo, mahse ni nga lek ka awm lova, ṭhian alo lenchhuah pui nghal a, eng nge awmzia ni ta ang?

Ngaih ṭha vak lovin ka in lam kan pan leh ta zawk a. Ani khan engkim a hre leh vek tawh em ni? Nge ni a aharh khan a hre reng zawk? Goa-ah khan hmelhriat a siam ngeiin ka ring a, chuta a ṭhian ruk chu em ni ang, a bialpa zawk nge? A bialpa ni tura ka ngaihtuah chuan ka thin a rim ringawt a, ka in kan thlen chuan chhuan man pe in ka chhuk nghal vat a, kawngkhar a inkalh loh avangin ka kik a, nui sanga Mimi-i a rawn hawn ruala ka hmel a hmu thut chu mak a ti tih ka hria, Ani hian Msi kalna a sawifiah ngei ang.

“Surprise anih hi,” tiin inchhung ka lut nghal a, “Engmah ilo sawi lawk silova,” a ti bah nak reng a, “Khawiah nge Msi?” ka tih chuan, “Ah, englo a ṭhian pakhat nen an chhuak lawk a,” a tih chuan, “Tu a ṭhian?” ka ti lehnghal zat a. Mimi-i hawi buai nak chu chik zetin ka melh a, Anni hian ka lakah eng nge an zep, nge ni a ka awmloh hlanin ka inah hian tenawm takin an lo khawsa reng zawk em ni?

Ka hmel hlimlo a hmuh chuan min biak a hreh deuh nge ni choka lamah a lut ta daih a, Keipawh ṭhutkhawmna lamah ka ṭhu tum bur ringawt. Rei ka ṭhut hma in, kawngkhar a rawn ri a, ka thaw nghal hak. Kawngkhar aṭanga Msi a rawn luh chuan ka lo melh ngur a, mahse rinloh deuhin a kalpui pa kha a rawn tel ve a, Msi’n ka hmel a hmuh rualin nui sang hian, “Ilo haw tur i sawi lova,” a tih chuan a hnunga mipa chu ka thlek zuk a, “E taka, Ani hi Dr. Nikhil anih hi, Malsawma ṭhianpa.” tia min hmelhriat tirin Nikhil-a a tih bulah chuan a cousin angin min sawi a, Ani chuan polite takin min chibai vat a, keipawh an awmdan avang chuan hlimlo hmel put ka duh tawh bik lo.

Nikhil-a chu engti turin nge Mizoram alo kal ka zawt a, Msi zawk chuan, “Ka u thih thu a hre ve deuh chiah a, niminah alo thleng a, vawiin khan a let lehna tur ticket lakpui in, kan in ka u thlanah ka kalpui a,” a tih chuan, “I ṭha em?” ka lo ti vat. “Um ṭha e, ṭha takin lo kawm rawh aw,” tiin choka lamah a lut ta daih a. “I ti ṭha hle mai,” tiin Nikhil-a chu a haw lehna tur te ka zawt a, Kolkata hnaih a thingtlang khuaa an awm thu sawiin, Kolkata-ah hna a thawh thu te, Malsawma thih thu a hriat tlai avang leh chhungkaw lama harsatna a neih avanga rawn kal mai theilo anih thu te a sawi ve a. Doctor hial a ni a, a ṭawngkam pawh a felfai angreng viau mai. Zanriah ei ve tura ka ti erawh a thlenna Hotel-a a order lawk zel thu a sawi a, kan inbe thei ta phian mai.

Thil chiang zawk ka hriat hmaa Msi ka ring chhe lutuk erawh tu hriatpui silovin ka inthiamlo rum rum hial mai. Msi’n thingpui a rawn chawi a, Nikhil-a pe in, kei min pek rualin ka sirah a rawn ṭhu ve nghal a, chutia a ṭhutna a rawn sawn ringawt pawh chu ka lo thawven phah ve ringawt. Ka lo ring diklo ve em bawk a chuvang te pawh a ni mahna. Ani pawh chuan a u nena an inkhawm dan te zawtin Nikhil-a chu a titi pui a, keipawh inbual harh phawt tura min tih avangin ka pindan panin ka inbual ve nghal a. Ka inbual zo ka chhuah hnu lawkah Nikhil-a chu dingin “ka let tawh mai ange,” atih chuan Msi chuan chaw ei ve rawh tiin a chelh a, mahse ka bula a sawi angin a hnial leh tho. Pawn thleng kan thlah a, taxi phar sakin a thlenna hotel chu an pan ta a.

Kan luh rualin, “Enteh ka nu leh pa boral hma in an lo inhre tawh a, ka nu leh pate pawh vawikhat a hmu ve hman anih hmel, tin, hei hi min pe a. Mizo tihdan a ni tih ka hria a ti tlat a,” tiin envelope puar ve angreng tak chu min entir a, “Um a rawn ral ve ni maw, a ti ṭha hle mai.” ka tih chuan, “Nia, enteh mak i ti ngawt ang, kan in kha alo zawng a, chuan kei kan inah ka kal ve bawk nen khan kan intawng fu a,” ka zawh chak mahse zawh mai ka duhloh chu Amah zawkin a rawn sawi a, “A lawmawm hle anih chu, nang la phone i nei silova, kal fu lo la beidawng deuhin a haw dawn chu a ni sia,” ka ti ve bawk a.

Mimi-i’n zanriah a peih thu a rawn sawi a, hma kan la tih deuh avangin ṭhutkhawmna lamah kan inzui a, ka thil hawn ka pek chuan an phur lutuk hmel chu en in ka nui vur vur a, mahse an phelh zo erawhin bag te rawn khai chhuakin an pahnih chuan beidawn hmel zetin min en a, ”Eng nge?” ka lo ti hu ringawt. “Lalrinsang, naupang kan nia mi?” Msi’n a tih chuan, “Maw?” ka ti ringawt a, “Heng te chu naupang bag lem mai mai alawm,” atih chuan Mimi-i zawk chu ka en a, a lo nui ruh ruh a, keimah zawk pawh hi ka hrilhhai zawk a ni. Dawr neitu bulah khan bag te pahnih to deuh deuh kha ka pack tir ngei a, mahse tuna mi hi chu plastic bag naupang lawm dik tak a ni.

“Ih ka thil lei kha a ni miah lo,” hrilhhai zeta ka tih chuan hmeichhe pahnih te chu an nui ta chiam a, “A mak hle mai,” ka tih leh chuan mittui tla phungin an nui tawh, “Engtin nge i thil lei i thleng tir theih?” Msi’n a tih chuan an nui ṭha leh a, kut kuangkuahin ka thil hawn an lek kang vel chu lungawilo zetin ka melh tawp ka nuih pawh a za ve lo. Hetiang te chu ₹50 man vel bak a ni tawp lovang keichuan, ₹800 man ngawt asin an tana ka thlan sak kha. “Kawngpui ka kan khan dawr neitunu kha a rawn chhuak a, a ban min rawn vai lauh lauh a, min bye bye emaw tiin ka vai let a, taxi ah khan ka chuang daih a,” ka tih chuan an nui ṭha leh a, an nui ring bawk si chu tum burin ka en tawp. “Lalrinsang, i la diklo tih hrilh che a tum a ni ngei ang,” Msi’n a tih chuan lungawilo zet hian, ka bu nghut a ka chhang peih tawh lo an nui laklawh a, engpawh sawi ila min nuih vek dawn tih ka hria.

“Ninawm chaw ei ang u,” ka tih chuan nuih awr awr chung hian an tho a chaw ei an siam a, chaw kan kil a, tam pawh ka ei hma in ka phone a rawn ri a, ka charge avangin tho vatin ka la a, number hlang anih avangin tu nge ka hre mai lo. “Hello,” ka tih rualin, “Mizoramah ka lo lawm a che” tia lehlam aṭanga rawn nui hak hak tu chu Rosaline-I a ni tih ka hre nghal. Hindi leh Mizo a hman lai chiah ka la hria a, a mizo aw phawi pai miah silova a lam fiah lutuk hi ngaihthlak a nuam takzet. “Address ka lo thawn ang chutah chuan zaninah ilo kal dawn nia,” tiin phone. a dah lehnghal daih a. Ka Message tone a rawn rik chuan en in “Zemabawk daih maw?” ka ti sup.

Zanriah kan eikham a, thleng chauh mah ila hna ka neih miau avangin ka chhuah tur thu ka sawi a, engmah min zawt lo chu ka inthiamlo zawk. “Hna vang ania,” ka tih chuan, “Man vat rawh u” Mimi-i zawk chuan a ti sap a, Ka kal hmaa Msi, “I ṭha em?” ka tih chuan lu bu nghatin, “Eng nge Rengpuia chanchin?” a tih chuan, ka thawhak ringawt. “Kal tawh rawh, kan boruak heti hi a ni leh si a, kawngkhar kan lo kalh pawhin Mimi-i ilo call mai dawn nia,” atih chuan haw har ka tum loh thu sawiin ka chhuak ta nghal a.

Zemabawk lam panin hmanhmawh ru takin ka inkhalh chhuak a, John-a ka hmuh ruakin ka motor park ṭha nghalin ka chhuk vat a, Kawngthlang lamah building chu kawkin, “Kan in anih hi, kan la luah lut lova,” tiin a pan nghal a, a bul velah in a awm lova, inhnai ber pawh kawngkawi a awm avangin a lang lo, mahse hla erawh a nilo. Tlang boruak a dawng bawk nen a nuam phianin ka ring. Kan lut a, a chhung chu peih fel deuh thaw a ni tawh tih a hriat. Pindanah min luhpui a, Bathroom kawngkhar ni awm tak lam chu a pan a, ka zui ve zel a, a chhung kan lut erawh bathroom a ni hauh lo, Rengpuia pindan ruk ka hrechhuak rum rum mai.

Pindan lian ve angreng tak kil lamah kan kal a, glass vekin bang hran an siam leh a, chumi chhungah chuan Rengpuia chu a mu a, a awmdanah chuan nikhaw hrelo in an siam anih hmel . “I duhdanin i ti thei tawh ang,” tia min kalsan mai a tum chu, “Engtin nge helai hi in thlenpui?” ka tih chuan ka darah beng thawkin a nui suk ringawt a. Ka hriat chak nen a awmdanah min hrilh a tumlo tih ka hrethiam mai.

Pindan chhung chu ka lut a, Rengpuia bula ka kun rualin, chet a rawn la thut a, ka in ringlo nen ka biang a ri chawrh a, inringlo mah ila a duh angin min hnej fuh hman chuanglo. Min hnek fuh se zawng ka tlukpui hial mahna, hepa kutthlak nat zia ka hrechiang ve em a. Min khawih nawn tuma a rawn dinchhuah rual chuan ka awmhmun siamremin ka inring nghal a. A mitmeng a sen rum a, mahse ka hmel a hmuh vang nge, “Rs nang maw?” tiin a in siamṭha nghal a, thaw hawkin ṭhutna awmah chuan a ṭhu nghal zat a. “Engtin nge hetah ka awm tih i hriat?” tiin pawnlam chu a en. “Chhuak vat teh ang, an lokal leh hma in, che hman miah lova min siam thei an nia, an special mah mah pahnih ni mah ila kan hneh lovang.” a tih chuan ka nui hak a, heta a awmna chhan hi keimah ka ni tih a hrelo a nih hi.

Ka nui chu min en in, “Tun hi nuih hun a nilo,” a tih leh chuan, “Ila hrethiam chuang miah na nge?” ka tih chuan chiang zetin min rawn melh a, ka hmela eng fiamthu mah a hmuh loh vang nge a mit a ti zim a, “Nangmah maw heta min hruai tir tu hi?” a tih rualin a hmela lawmlohna chu ka hmu nghal. “Min kal tir rawh,” a ti nghal hmuk a, chhuah a tum erawh ka dang ve tlat a, a thinrim hmel hmuh erawh thil nuam tak a ni lo.

“Rinzuali hlatah khan ka awm thianglo.” a tih vin ṭhawt chuan, “Engvangin?” a awki ang chiahin ka ti ve nghal zat a. “Rs i hrethiam lo a ni, engkim sawifiahna hun ka neilo,” a tih chuan, “Tunah i nei alawm,” tia A hnaiha ka ding chu, ka rinloh zetin chet a rawn la thut a, min nam sawn dawrin pawnlamah a tlanchhuak a, rang taka tho ve nghal in ka umzui a, pawn ka thlen chuan Rengpuia hawikual ruai chu kawngkhar bul aṭang chuan ka en a. Min hmuh rualin ka lamah rawn letin, “Lalrinsang, eng thil nge i tih hi? Rinzuali hlatah khan awm tur ka nilo” thinrim zeta a rawn au chhuah chuan, ka pan ve nghal a, chhang lovin ka hnek ve nghal siah, Ani la in min dawh mai a tum biklo, kan insual chu a ni nghal der mai. A khawsa zia leh a ṭawngkam tin hian ka thin a tirim a ṭha taka hrilhfiah tumna pawh ka nei lo.

“Ani khan damdawi a pe che, Msi hrai anih ang chiah khan, chuan thla hnih thum lek chhungin i danglam a, kei hian kawng dik i zawh leh theih nan pui mai che ka tum, Vanlal harhchhuak rawh.” hah thaw hlawi hlawi a, ka tih chuan, a kam sir thi chu leiah chhak ṭhatin, “Engkim ka hre vek, chuvang alawm Rinzuali bulah ka awm,” a tih chuan beidawng zet hian ka en a, “Khawiah nge kan awm?” a tih chuan ka chhang lo.

“Ka harhchhuak lovin i hria em ni? Ilo kal a ka lawm hmel te kha a tak tak a ni tih i hrethiam lo, mahse engkim ilo hmuh hunah i hriatthiam ka ring ania, ka pindan te kha i dap ve tho sia,” atih chuan a thusawi awmzia ka hriatloh em avangin a lam ka hawi a, light eng hnuaiah ṭhu mah ila, thla eng zet avang hian kan lang chiang a, ka hmaa keimah ang tho a vut kai luai a ṭhu chu en in, “Nang hi?” tia zawhna mitmenga ka melh chuan, “Um, engkim hi ka hria alawm, ka pindan i dap tih kha ka hriatloh i ring reng reng a mi? Eng emaw tal i hmuhchhuah ka ring ania, mahse ka pindan chu ala him a ni mai thei.” a tih chuan, “Engvangin nge Msi kalsan a hetiang hi i tih?” ka tih leh chuan, kan hmaa khawpui lang pe un chu a melh vung vung a, “Engtikah mah Ani hi ka kalsan ngailo ang, mahse a damlohna avang hian a him silova, i hnenah a awm ngei ringin khatiang thu tlukna kha ka siam a ni. Ka rin ang ngeiin i hruai a, i bulah anih chuan a him dawn tih ka hria. Engkim sawifiahnan hun ka neilo ka let angai,” tiin a tho a, “Motor i dah hnai em?” atih leh chuan, “Khawiah nge let i tum?” ka kut beng faia ka tih chuan, “Ka apartment lovah khawiah nge ka let a nga,” a ti heu mai. Hepa hian zan lama Mizoram landan a theihnghilh a ni ngei ang.

“I apartment a i let hma in i hmalam kha uluk takin en leh teh,” ka tih chuan a ngaihna hrelo zetin ral lehlama Aizawl chu a thlek vung vung a, a mit ti zim suna min rawn en in, “Engtin nge ka hriat miah lovin Aizawl min thlenpui theih?” a ti rum ul a, Keipawn ka hre bik miah lo. “Bungraw phurhnaah min phur chiang lutuk,” kawng dawm meuha a tih leh chuan, “I awmna i hre tawh tho a, engkim ka hre thei tawh angem, kha i nupui ni mai tur Rinzuali rawn thlen hma hian,” ka ṭawngkam ngeiawm zet chu a man rang kher mai, a phun hluk a, “Hotel-ah tal kal teh ang,” a tih leh chuan Car lam pan chuan kan inzui ta a.

Lalruatpuia ka phone a, Hotel kan thlen hnu lawkah a rawn thleng ve nghal a, kan inbiakna hre heklo, Rengpuia a hmuh rualin a rawn hnek nghal pawp a, “Mipa nep tak anga i khawsak vang anih kha,” ti hmakin Rengpuia pindan tura kan book-ah chuan a lut zui hmak a. Rengpuia nen chuan in en in kan nui ringawt. Nuih pawh a har kan insual kha kan lo inkhawih sil ve deuh bawk nen biang ruh a na ṭan der ania, naktuk lamah chuan a vung ve khawpin nia ka rin.

Pindan kan lut a, Ruatpuia’n kan pahnih chuan min melh tawn a, “Ehe in insual a ni maw?” tiin a nui hawk a, “Ka hnek che kha chu ka inchhir chuanglo,” a ti zawm zat a, kan luh dawn khan vur leh tui ka lam a, Kawngkhar an rawn kik chuan hnathawkin ka thil lam chu min lo pe a, Rengpuia chu a ṭhen pe ve in, ka rawmawl chuan vur chu fun in ka hmai na deuh lai chu ka dep a, a vung nasa tur a veng thei mahna.

“Zanin khan Mumbai-ah tualthahna a thleng a, Mipa leh hmeichhia an ni,” Ruatpuia’n a tih chuan, “Eng nge kan mitthi te nen inzawmna an neih?” ka ti nghal vat a, a phone phawrhin an Car kawngkhara chiang kelh kulh a Hell tih inziak chu ka en a, a ziahna atan thisen bawk an hmang a, heng zawng zawng hi eng nge awmzia le?

“Hell Project hi keini in kan hriat ve hma khan bul ṭan a ni tawh a,” Rengpuia’n atih chuan a sawi zawm hun nghakin kan en tawp a. “Damdawi danglam tak siam chhuakin ram chhung leh pawnah te thawn chhuah a ni ṭhin a, tin, mihring hmanga sumdawnna chi hrang hrang kalpui a ni ṭhin bawk a, hmeichhe hralh leh taksa bung hrang hrang hralh te, kalpui a ni a, mi tam takin he project atan hian pawisa an thawh a, hlawkna an tel ṭhin. Kum tam tak liam ta khan chu thil chu tih rem vek ni a hriat a ni a, mahse kum2 liam ta aṭang khan he thil hi thar thawh leh a ni a, a enchhin nan mi tam tak hman a ni a, chung zingah chuan Dr. Malsawma kha a tel, Ani kha dawt hmanga bum a ni mahna damdawi pek anih theih dan kha ka hre chiah lo. Tichuan nikum khan khang thil kha a thleng ta a.” a tih chuan, Ruatpuia’n, “Rinzuali ringawt buaipui lo khan buaipui ta reng che.” a tih hluk chuan ka nui chhuak hawk a.

A hmel tak ngulah chuan a fiamthu lo tih ka hria, Rengpuia lakah hian ala lungawilo tih ka hrethiam mai, Rengpuia zawk pawh a biang dawm pahin a nui ve suk tho. “Msi laka ka rilru puthmang hi engtik lai mahin a danglam lo, mahse Rinzuali kha ka mawhphurna a ni ve tho alawm,” nui vur vur a atih pawn, “A danglam chu anih hi Lalrinsanga meuh pawh a rawn kal,” ala ti hram, “Nia, ka thiltih kha a ang thei ang ber ka duh miau sia lawm, Rinzuali kha ka ringhlelh nghal ngawt lo, ṭanpuia bul a ṭanna kawngah pawh pui ka duh lutuk mahse Mike-a kha Ama tlanchhuah tir anih avang khan ka ngaihven zui tho alawm. Mahse ka bawnghnute in tura damdawi a pawlh khan ka hrethiam chiah lo ka awmdan kha, ka thin a rim a, naa min siam hnuhnung ber tu Msi kha ka hua a, alakah khan ka thin a rim em em a, thah hial ka duh a, ka awmdan erawh ka thunun thei miah lo. Mahse damdawi hnathawh ten min la fan tlem a ngaihtuahna fim ka la hman theih miau avangin ka inngaihtuah harh ti mai teh ang,” tia a biang vur a a dep chu Ruatpuia chuan, “Khatiang mai mai sawi zo vat teh.” a ti leh hluk a, zanin a khawsak dan zet chu kei ai pawhin a ho zawk.

“Tichuan bawnghnute min pek apiangin in loh dan ka zawng ta ziah a, tin, hna chhuanlamin ka haw tlai ta fo a, mahse Rinzuali duhdan leh beisei ang chuan ka awm zel a, a chhanchu damdawi ka in lo tih a hriatchhuah la duhloh avangin, nikuma ka phone hack kha in la hria em? Khatiang chiah khan ka phone hack a ni leh a, hack hmasak kha engtianga thleng nge tih ka hrelo mahse tuna mi hi chu Rinzuali’n ka phone a khawih fo a, puh tur a awm mai. Msi chungchang phone a a sawi lai ka hriat ruk hnu khan ka awmdan tidanglamin Msi chu haw tak angin ka lang a, khatiang khan ka rawn ti ta a ni. Tunah hian thil lian tham tak tih an tum a, ka nihna hmang hian chung chu kalpui an duh avanga kei hi pawimawh em em ka ni bawk. Mahse Mizoram tualthahna avang hian he project khawihtu te an buai ta a, a chhanchu pawl phatsan leh tlanbo te tih loh mi an that ngawt ngai tlat lo. Chung te avang chuan hna an thawk thei rih lova, tin, kei ka bo leh nen. An hna hi eng chiah nge la hrelo mah ila ka pawimawh hle tih ka hria, Mizoramah ka awm tih an hriat rualin min rawn hruai turin Assasin rual an rawn tir duh ngei ang, min hruai let tur hian.” a sawi zawh chuan ngaihtuah nei tih hriat zet hian tukverh bulah chuan a ding a.

“Anih Sanjay te chhungkua hi engvanga enthla nge an nih?” ka tih chuan mak ti hmel zetin min en a, “Chu thil kher chu ka hre miah lo, mahse thil thleng a awm a ni tih a hriat theih nan ka awmdan phung ka ti danglam fo, a hrethiam pawhin ka hria.” a tih chuan, “Um a hrethiam a, Anil-a bulah a sawi a, mahse Anil-a chuan vau in Amah leh a chhungkua enthlak hna a thawh tir ta zawk a,” ka tih chuan, “Tunah hian eng nge a dinhmun ni ang le?” tiin a ngawi leh hmak a.

“Malsawma inpuanna kha en let ta ila, engkim hi a bul ṭhut aṭangin kan enfiah a ngai a ni. Tuna i case khawih turah hian special force din dan ngaihtuah la, keiin khawi hmunah pawh awm ila a phen aṭangin ka lo thawk ve ang. A hau tak hle dawn tih hre phawt teh ang u,” thaw haka a tih rualin kawngkhar a rawn in kik a, kan in en nghal ṭhap. A hnaih bera ding ka nih avangin ka hawng a, John leh Rosaline te hmel ka hmuh chuan ka thaw huai thei.

An rawn lut a, Rosaline-in Rengpuia chu en a, a nuih var var chuan, Rengpuia mitmeng a dang nghal vek. A phun hluk a, Ruatpuia zawk chuan, “John,” ti hluai in an inkuah a, ka rinloh daih a an lo inhria chu boruak a nuam phian mai an titi hlut a, Rengpuia ka en chuan a tak ran mai. “Rengpui Anni hi,” ka tih chuan, “Ka hria,” a ti hluk a, “Sanjay-a an pui dawn a,” ka tih leh chuan, “Chutiang turin hun in nei em ni?” tiin John zawk chu a melh daih a, “Chawlh nuam chi ni mai lawm, Siria aṭangin kan rawn let chiah a, mahse hetah chawlh nuam deuh kan lo hmang dawn anih hmel,” John-an a tih chuan, “In nghal ngaiin in la nghal reng,” Rengpuia chhanna chuan an nuih a ti za hle a, “Ka dim lutuk che keiman alawm pack che,” Rosaline-in a tih chuan, a melh rum hle ringawt.

“Rinzuali leh mi eng emaw zatin Mizoram an rawn pan a, duh aiin an rawn kal hma ka ti, Rp i pawimawh awm vet vet hle mai.” tia a nuih hak hak chuan, “Engtik nge an lo thlen dawn?” ka lo ti vat a, “Naktukah chuan an lo thleng mai ang, keini pawh a phenah kan lo thawk ve dawn a, kan tih tur kan lo ti ang, Ruatpui i remti tiraw?” John chuan a ti nghal zat a, Ruatpuia bu nghut nghut chu melh zeuhin, “Sanjay-a te chanchin in hria em?” ka tih chuan, “A ngai reng, engpawh nise kan kal phawt ange, min mamawh chuan kan awmna in hriat kha,” tiin an chhuak zui a, Rosaline-I bawk hi ni ka lo melh leh ṭhin.

“Engtin nge in hriat a?” zawh bik neilo a ka tih chuan, Ruatpuia zawk chuan, “Keichu John-a hi ka hre ve ni mai, College kal laiin kan inhria a, nu leh pa tello a seilian an nia a chhel pawh hi a chhel ania.” a ti a, Rengpuia ka en chuan, “Indian Army Captain a ni ṭhin.” a ti sup a, “Tu?” ka lo ti hu, “Rosaline-i kha, a nu leh pa pawh Army an nia, Apa erawh an kahhlum sak a, i hre pha lo em ni Commander an kahhlum te chu a lar em kha.” a tih chuan ka ngaihtuah let a, Master degree ka zirlai ni ta in ka hria, Mizoram mai nilo India pumah a lar hle tak anih kha.

Rengpuia kan kalsan a, In ka thlen meuh chuan zanlai a pel der tawh. Msi ka call a, a pick mai silo, Mimi-i ka call ta ringawt a. Kawngkhar a rawn in hawng a, a mutchhuak hmel ka hmuh chuan inthiamlo zet hian, “Hna vang ania,” ka ti ringawt ka enga ka hmel a hmu erawh, “Ehe, tikhan lo awm rawh,” tiin a pindan lam a pan vat a, first-aid box nen rawn chhuakin, “Nga ti nge a?” tiin ka kamsir pemah chuan damdawi alo hnawih a, a thip phian lehnghal a. I biang duk chu a vung ngei ang a ti sap a.

“Kan insual a,” tia nuih ka tum chu ka kamsir thip zawk avâng chuan nuih a har. “Nui duh suh, a thip ang, hmun dangah hliam i nei em?” a tih chuan ka kiu chu ka entir a, lung hriam ka nek khan a pilh ni maiin ka hria, kan boruak zawng zawng nen ka lo ngaihven zui lo kha ania. Lapua la in thisen khir chu a hru fai a, “A hliam a thul lova damdawi ka hnawih a nga i mu dawn nia,” tiin damdawi chu a hnawih a, a che vel chu mit khap hauh lovin ka en a, Msi’n mifel tak ania tia a sawi kha ka ngaihtuah chhuak a, a fel lutuk tlat.

Damdawi a hnawih zawh chuan, ” Ka lawm e aw,” tia thawh ka tum chu, “Lawmthu sawi suh ṭhian kan nia lawm,” a tih chuan ka ṭhu ṭha leh a, “Ṭhian pelin kal ve ila,” ka chhanna avanga a zak hmel biang sen nghal ap ap chu nuih sukin, “Lo inngaihtuah rawh aw, va mu tawh rawh ka ti harh bawk che sia,” ka tih chuan Awle tiin a tho vat a, a pindan a pan ta nghal a. A awmdan ka ngaihtuah a, keimah zawk hi ka hlim ru veng veng. Min hnial bika ka rinnlohna chuan tui takin min mut tir niin ka hria.

Zinga ka harh chuan, Msi leh Rengpuia inhmuh tir ṭha ka tih rualin Rengpuia ngaihdan hriat ka duh avangin zingkarah ka chhuak a. Kei angin a taksa ka hliamna enkawl sak tu tur pawh a nei ve dawn silova tiin damdawi eng eng emaw leiin hotel ka pan a, kawngkhar ka kik a, ala tho lehpek lo nge ni alo hawng har phian lehnghal a, kawngkhar a rawn hawn ruala a mit bui luk ka hmuh chuan nuih vur vurin, “Ka kut hnu chu a mawi vak biklo anih kha,” tiin damdawi chu ka khai lang zawk a, “I tho hma thei mah mah aw Rinsang ti hlukin a khumah chuan a bawk leh thlawp a.” ka nuih zui hawk hawk.

“Vawiinah Msi rawn hmu la,” ka tih chuan chesawn hauh lo hian, “Aih” a ti hmuk a, “Nga ti nge?” ka tih chuan rawn in herin, “Vawiinah hian Rinzuali te’n Mizoram an rawn thleng anih chuan kei chauh hi min ngaihven dawn lo. Msi himna hi a pawimawh ber dawn ania, theihnghilh suh.” a tih chuan a ngaihna hrelo zet hian a thusawi awmzia ka zawt a. “Msi nu leh pate khan pawisa tam tak an chhuahpui a, chuvanga umzuia that ta pawh kha an ni, chung pawisa chu Malsawma khan a farnu hming hian a dah vek a, tin, a thawhchhuah zawng zawng pawh kha Msi tan hian a dah vek bawk. A nu leh pa pawisa tello pawhin hnathawk miah lo pawhin Kum10 daih pawisa a nei, a nu leh pa te pawisa nen chuan a damchhung hian nuam chen theihna a nei ka tihna anih chu. Chung zawng zawng chu Rinzuali te hian an hria, chu chu an umzui tur pakhat anih chu. Tin, an damdawi hi a thawh dan tur angin ala thawk lo, chu thil puitlin tur chuan Msi pa hnathawh liau liau formula pakhat an mamawh. Chu chu Msi vek hian a kawl, Amah hian a kawl tih pawh a hre kher lo mai thei.” a tih chuan mak ti zetin ka en a, “I chiang a maw?” ka tih chuan a lu a bu nghut a min chhang lo.

“Vanlal eng chiah hi nge an damdawi hi?” ka tih chuan, “Ka hre bik chiah lo, ruihhlo an siam hi chu engpawh nise, tuna kan buaipui ber erawh chi hnih a ni. Mihring thluak ti buai thei tura siam a ni a, chu damdawi i addict chuan tualthah chakna, thisen chakna in i khat ang. Malsawma kha test na a ni a, mahse an duh angin a thawk lo, Ani chuan a thisen chhuah chakna leh a tum zawng zawng te nen khan Amahah a thawk dang anih kha. Chuan damdawi pakhat erawh midang te thuhnuai na, i thinrim i sum theihlohna kha hmanruaah an hmang ang, Msi chunga an tih ang khan. Ani kha damdawi pe in, a thluak an suk sak a, tichuan a kalna lamah nghet takin a kal a, kei min huatna in a khat a, chu chu Ani chuan a thunun theilo, chu damdawi ngei chu keipawh pek ka ni mahse a reilo.” a thusawi chu mak ka ti a, chutiang siamchhuak tura thiamna san zia ka hriat phah bawk.

“Ka pa chu eng nge a an?” ngui hmel zeta a tih chuan Delhi a ka dawtsawi ka hrechhuak zawk. “E kha kha maw bum chhuah che ka tum vangin dawt ka phuah mai mai anih kha,” ka tih chuan rum zetin min melh nghal khui a, “Mahse zana thinrima ka chhuah khan John te nupa khan Mizoram an haw dawn thu leh min pui tur thu an sawi a, sawifiahna hun pawh a awm ta silova,” tiin ka nui sawng a, lukhama min lo vawmin, “Hmela ka chet buai teuh zia kha, rang taka thlawh haw nghal ka duh a, mahse Rinzuali khan min ringhlel nghal dawn tih ka hriat avangin ruahmanna te ka lo siam a,” a tih chuan, ” Eng ruahmanna maw?” ka ti nghal vat.

“A rukin ka haw ang, chuan bo angin ka in lantir mai ang. Mahse khati khan khami te nupa khan inchei danglamin min ru a, muthilhna min la pe zui, tun thleng hian ka pangngai theilo chu anih hi.” a tih chuan ka nuih hawk hawk a, min pack a ni maw tia a lungawilo hmel kha ka ngaihtuah let a ka nuih a za tulh tulh. Sanjay-an a hriat ve hunah engtin tak ngai ve ang maw.

Ka phone a rawn ri a, Ruatpuia call a ni. “Hello” ka tih rual chuan, “Delhi-ah Minister thah a ni.” a rawn ti nghal a, thlalak alo thawn chu hawngin, A kawr chung uk a Hell tih inziak avang chuan Rengpuia chu ka entir vat a, “Hei chu, chip a list zinga mi kha a ni.” atih chuan, “List ho i hre vek a mi?” ka ti vat a, a lu thingin, ” A tam zawk chauh, Anil khan a kawl vek a, ka buaipui tih hre tur hian Nang leh Ruatpuia bak rin ka neilo a, ka dil theilo,” tiin a ngawi leh vung vung a, “Prakash-a khan a original kha a nei a, mahse Ani la a thi tawh, a ruang bulah khan engmah hmuh a nilo bawk.” a ti leh a, zawhna nei mah ila a hmel tak ngul avang chuan engmah ka sawi zawm biklo…

21

(RENGPUIA POV)

Ruatpuia thlalak lo thawn ho chu ka en chiang thawkhat. Tualthattu hian engtiang chiahin nge mi a thah ka hrelo a, mahse Minister thih dan aṭang hi chuan list a hrut dawn a ang, nge ni a he Project khawihtu te hun zinga a mihring huat te a thur pheuh pheuh zawk dawn ni ang? Engpawh nise Mizo pahnih thi tawh te hian telve na an nei a ni ngei ang, a chhunglam aṭanga tih a ni nge pawnlam aṭang tih hi hriat vat a ngai a ni.

“Rs, Rinzuali te rawn thlen hun tur i hre tawh em?” ka tih chuan a lu thingin, “Engtin nge i awm dawn?” a tih chuan, “Biru chungin hna ka thawk rih mai aniang chu, Msi kha veng ṭha rawh aw.” ka ti vat a. “Awle, ka kal phawt ange, an chaw a tuiloh chuan sawi la, hmundang kan zawng daih dawn nia,” tia nui var varin min chhuahsan ta a. A chhuah hnu chuan a damdawi lo ken chu enin ka pemah chuan ka hnawih a, thla nga kal ta chhunga ka chetdan tam tak ka ngaihtuah a, Rinzuali awmdan te hian min ti na a ni.

Ka hriat tir khan ka natpui em em a, hmeichhe fing leh fel tak a ni ṭhin a, a rilru tluang tak te kha ka ngainatna chhan pakhat a ni ṭhin. Mahse Kum 10 teh meuh thi tawh riaka ka ngaih laiin tihian ka hmu leh a, a mizia leh rilru erawh a dang hlawk tawh a, chu thil chu ka hrethiam lo emaw a tihna erawh ka hmang ṭangkai ta anih hi. Ani a danglam rual hian ka danglam ve a ni tih a hre silo. Sanjay-an, “Nga ti nge zalen hmanin a awm a, a rawn biak pawh loh che, mak i ti ve em?” tia a sawi te kha, ka ngaihdan chiah a ni. Kha hmunah khan hna a thawk a, engvangin nge ka zawh pawha a zep vek, hei hian chhan a nei a ni. Tin, kha Mike-a kha engvangin nge a chhuah tir, fihlim tak tak nise, kan lak aṭanga a tlanchhiatna chhan tur a awm miah lo.

Rinzuali hi rin duh viau mah ila, kha zan engmah ti theilo leh hrelo a ka muthilh aṭang khan ka ringhlel ṭan anih kha. Kha thil fiahna atan a bawnghnute min pek kha ka in leh ngat a, a tuk zinga kan pahniha khuma ruaka kan thawh a, kan mut dun thu a sawi khan engkim chu a fiah ta kuar a ni mai e. Mahse engkim ka hmuhfiahna khan na takin min siam a, ka ngaihtuahna a tibuai hle anih kha, Ani hi ka la let thei angem? Nge ni a, ka man zawk dawn? Ka chhungte ka be tlem a, Msi chanchin ka zawt tlem tial tial a, ni e, ka hnaah ka buai em a ni. Rilru ka siam fel a, a bul aṭanga engkim tichhe vek turin. Rinzuali hmel ka en chang hian na ka ti leh ṭhin. Hetiang lo deuh hi nise tih ka duh asin, mahse thu pe thei khawp anih tawh chinah chuan a lut thuk tawh viau tihna a ni si a.

Msi umzui tura thu a pêk ni khan ka rilru a buai viau a, Ani enthlak leh a thiltih tur apiang hriat ka duh laiin ka hmangaih hi ka vênghim zo lovang tih hlauhna in ka khat a, ka ṭhiante ka hrechhuak a, ka thutlukna hi ka tihsual ka ringlo. Ka pa in thinrima min biak hi ka hre ngailo, ka zah em em chunga ka hna vanga hetiang tak thinrima ka siam hi hrehawm ka ti, ka hna ka zawh hma chu hmuh tumna pawh ka neilo, in sawifiahna ka nei tlat silo a.

Phone leh thildang engmah ka neih loh avangin ka ngaihtuahna chauh hi ka hman theih awmchhun a ni rih a, hnathawh erawh ala har rih hle a ni. Ka kawngkhar kik riah chuan chaw an rawn dah dawn anih ringin ka hawng a, Rsa inkhai bawr ṭuna a rawn luh rualin, hnathawk hian ka chaw tur a rawn dah lut nghal bawk a, “Chaw ila ei na nge?” tiin a thil rawn ken chu khumah a dah a, “In inah ka kal a, i thawmhnaw ṭhenkhat ka rawn ken che a, chuan hei i phone tur, nakinah pawisa in min la pe leh dawn nia,” tiin bathroom lamah a lut nghal daih a.

Hepa zet hi chu a ngaihtuah kim ṭhin a ni. Mahse pawisa hi a duh mah mah, Amah a uikawm tehlul nen uikawm mi ti ziah lehnghal a, mi hausa fapa uikawm anih hi, naupang ber a ni a, a ro khawm tur ngaihtuah chuan sum ren lo taka khawsa pawh nise atan a thlaphan thlak miah lo, mahse a fakawm em em na erawh hna a neih chinah a chhungte pawisa a hmang ngailo tih a sawi ve tlat. A uikawm ka ti na hian a hunah chuan a inren miah lo, a kâ hi a uikawm a, midang hi a fiam peih anih ber hi a, a fiamthu te hi Amah hrelo tan chuan a bon ṭhin mah mah lehnghal a.

Mizo chaw diktak ei hi chu Mizopa hrawkah hi chuan a tui ber fo anih hi. Ka chaw ei lai chuan message a type zeuh zeuh reng a, Amahin a nui leh vur vur ṭhin a, a awmdan chu tleirawl ngaihzawng nei thar a ang ka ti. Ni tak Delhi-ah khan hmeichhe thlalak min hmuh ve ngei anih kha, enchian la a phal hauh lo zui. “I ṭhian ka ni tawh silova i bialnu thlalak en chu ka dillo mai ang che,” ka kut hru fai mawlh mawlh a ka tih chuan min rawn en zawk a, a phone bih leh in, “Rinzuali kha i bialnu a ni ṭhin hi awi a har, mahse mak deuh chu a hmel kha Msi nen hian an in ang ṭep zel, an zia a dang em a ni.” a ti nuah nuah a, a dik chiah. Keipawhin Msi ka hmuh hmasak ber khan Rinzuali ka hrechhuak anih kha, an mizia pawh in anna tam tak an nei, mahse tuna an mizia erawh lei leh van ang maia danglam a ni chu ania.

“Keichu Rosaline-i kha ka duh chi,” tia a nuih vur vur chuan, “I piang tlai hret a ni tiraw?” ka lo ti hmanhmawh. “Hmela, a pa boral i sawi laia i hre pha lo a mi min ti kher kha ka la na aw, University ka lut daih tawh,” a ti hmuk a, nuih hi a ti za ve ṭhin ania. Ka phone thar a rawn lei chu sim vuah in ka khawih vel a, ka tana apps pawimawh tur te ka download bawk a. “Kan chhuak dawn em ni ang, in station lamah kal ila,” ka tih chuan ka khuma a mu chu rawn tho vatin, “Hei ka bialnu,” tia min rawn entir chuan, a phone la in ka en a, a hmelchhe lo, chuan ka hriathnu a ang bawk. “Hei chu,” ka tih rualin, “Msi tana nurse i rawih kha,” alo ti nghal vat, ka nui vur vur a, “Remchanna i lei thiam hle mai,” ka tih chuan, “Mite tih loh dan bik a nilo a,” a ti zui hmak, ka lo nui ve tawp.

Ka insiam zawh chuan kan pahnih chuan Station lam kan pan a, kan hmel en chu ala nuam viau lo mahse kan chhuah a ngai tho a, cap min lo ken erawh a fuh viau mai. A kut ṭangin a stearing khawng dat dat in, hla ring vak lova a play chu a zai pui rut rut a, a awmdan thawveng lutuk hi nidang aiin a thawveng zawk, a ngaihzawng nei hi nuam a ti hle anih hi. Ka hriat theih chinah bialnu a neih ka la hrelo a, ka zawh pawhin ka nei ngailo a buaithlak a ti mai zel kha ania, hmeichhe lamah hi chuan a hleilo ve bawk em a ni. Rinzuali’n ka apartment a Amah melh vel anga a sawi pawh khan ka nuih a ti za viau anih kha.

“I hlim hle ni maw?” ka tih chuan a lu bu nghatin, “A khal em alawm,” a ti pek a, ka nuih hawk hawk chu min melh zeuhin, “Khawvela bialnu nei ber ka ni dawn,” atih chuan Amah en in, “Buaithlak ang,” ka ti sup a, “Mak i ti ve em, nangin Nurse i ngaizawng a, keiin nurse bawk, kan hna nen a nurse bialnu neih inrem zia te hi,” a tih chuan Msi ka ngaihtuah chhuak a, damdawi ina a awm laia vawitam min lo enkawl tawhna te leh kan inhmangaihna ve hun tam ber pawh damdawi in kha ania. Suangtuahna ka nuihpui fo pawh damdawi in kha a ni tlat. Rsa sawi hi a dik, kan hna leh nurse hi a inrem viau a ni.

Station kan thleng a, Ruatpuia room a kan lut chu min nuih leh ruh ruh tawh, “Eng nge?” ka tih chuan, “In hmelchhe hle a ni,” tiin kan inrin hma in a phone a hmet zeuh a, “Kan nu in a nuih leh viau ang che u,” a tih chuan Rsa’n, “A ho emai, ka bialnu neih hi hrilh ang che, chaw eiah min sawm dawn nia, a sawi peih ve ropui si,” a tih chuan nui hawk hawkin, “Vawk a talh duh hial ang che.” Ruatpuia chuan a ti ve bawk a. Ruatpuia’n file phawrh a, thlalak ṭhenkhat min entir hnu chuan paper la in kan mitthi tawh leh thildang ka ringhleh ka zawt kual a. Ka ziak thla zel bawk a.

“Force din kha phalsak kan ni a, member tam tak kan mamawh loh thu ka sawi a, Nang i awm dawn tho a, Inspector Vanlalpeka, Kolasib aṭangin an rawn transfer a, rawn awm chauh mahse Ani hi ko tel ila, Rsa leh kei kan ni tawh a, John te nupa khan langlo lam aṭanga min pui an huam bawk a, Tin, Delhi Police lam ka be pawp tawh a, Anni in a rukin an buaipui ve dawn bawk a, remchang hmasa berah he Project chungchanga meeting hi a awm dawn bawk a, midang tel belh tura duh i nei em Rs?” Ruatpuia’n a tih chuan a ngawi vung vung a, Ruatpuia bawk chuan, “Heti taka Mizoram min zuam leh he sualna bul ṭan nana min hmang ziah hi thin pawh a rim, chuvang chuan hotu lam aṭang pawhin a ṭha thei ang bera inthuam phalsak kan nih angin, an hna engkim tih chhiat vek hi kan tih tur a ni a, in daihloh tih vel ai chuan tunah hian engkim ruahmanna lo siam a DSP lo thlen huna sawi tur a nia, duh i neih chuan sawi rawh.” a ti leh a.

“Um Kan SI Sangpuia hi tel se, Sanjay erawh langlo lama tel sa ah a ngaih theih ang chu.” Rsa chuan a ti ve bawk a, ka partner ni mahse tunah hian enthlak a ni a, a enthla tu nge diklo Amah tih hrelo mah ila John te nupa hial a pun anih chuan Anil Sharma hian inhnamhnawihna a neih rinna lian tak ka nei. Rinzuali ngawr ngawr ka chhuina lamah ka lo hmuh kan te pawh a ni mahna. Dar10:00a.m a rik chuan meeting room-ah kan ṭhu ṭhap a, an SI Sangpuia hi chu ka hmuh ve zeuh zeuh tawh avangin kan inbe ve mai a, Inspector Vanlalpeka a tih erawh ka vawikhat hriatna a ni tlat. Ruatpuia sawi danin a record a ṭha viau a ni awm e, Wonder’s Food Industry neitu an ni a ti bawk a.

Meeting room a rawn luh chuan ka lo en chik viau a, mipa ṭawngtam tak a ni bik miah lo mai. DSP a rawn thleng a, hma lak dan tur leh mahni chanpual tur hna kan sem a, List chungchang ka sawi chuan a copy dil chhuah dan a ngaihtuah tur thu DSP chuan a sawi a, Mizoram aṭanga inṭan anih angin State dang a thlenna hmun Police te nena thawh ho dan alo ngaihtuah tur thu a sawi bawk a, an case ka telpui theih avangin min fak ve luam a, chutih ruala a ruka tel tur ka nih avangin ka fimkhur a ngaih thu min chah ve luam bawk a. A hmaa mal taka ka chhui ngawt ai chuan tuna hetia a huho a kan thawk tur erawh thla a muang deuh alawm.

Ka chhungte himna a pawimawh leh dawn tih ka hriat avangin Rsa leh Ruatpuia telin kan in kan pan a, ka pa thinrim hmachhawn erawh ka huphurh a ni. Ka pindan leh ka pindan ruk ka mamawh miau si a, in sawifiahna neilo a tlawh ka duhlo mahse tunag erawh ka tih a ngai si a. In kan thleng a, ka lut hreh ve ringawt. Rsa’n tlangnel takin hma a hruai a, ka nu in min hmuh chuan ka hmel landan hmuh hrehawm tak avang chuan a mittui a tla a, Rsa nen kan insualna ti ngat ila a ṭah dawn loh nen, mahse engmah ka sawi duh biklo.

“Engvangin nge hetah i lo kal?” Ka pa in rum zeta a tih chuan, “Ka Ni te khuaah in awm leh angai tih rawn sawi turin,” ka ti let ve hmuk a, Rsa’n min nghawk zeuhin, a mitmengin ngawi turin min khap a, “Ṭhu phawt teh ang u,” tiin Thingtlang lama an awm leh a ngaih thu te, an himna tur anih thu leh tuna insiam a kal chhuna chhuak nghal mai tura kan duh thu te a sawi chuan ka pa chu a rum nghut a, “Lalrengpui, sawi tur i nei em?” a ti nghut chuan, “In lo let hunah,” tih chauhin ka chhang, ni e, tunah hian engkim sawina hun a nilo tlat a ni. Ka pa chu a ding vut a, Ka nu chu insiam tura tiin, ka nau te pawh ko haw nghal tura tiin pindan lam a pan nghal a, keini erawh ngawirengin kan ṭhu thung.

Nula awmpui an lo nei tawh a, thingpui a rawn chawi chuan a hming ka lo zawt a, “Mami, i pi leh pu bula kal ve hi i hreh angem, hun rei tak a ngai dawn lova.” ka tih chuan a hreh loh thua min chhan avangin insiam ve turin ka hrilh a, Rinzuali te rawn thlen hun tura report kan dawn kha chawhnu lam anih avangin chumi hma ngei a engkim tih fel kha a ngai tlat a ni. Thingpui kan in laiin Ruatpuia phone a rawn ri a, Hindi a hman avangin state dang aṭangin report a dawng tih ka hre thei, Rsa phone a rawn ri leh a, Ani erawh a ṭawngkamah Lunglei lam a bia anih ka ring.

“Rp i hriat zawng an ni em, Agra lam ni mahse a ngai bawk a ni tlat,” tiin a phone a thlalak chu min entir a, tualthattu ngai a ni, thlalak chu chiang takin ka en a, a hrawka chem zum tak bur vu chu a thihpui tih a hriat, a damlai thlalak ka en chuan mak ka ti takzet, Rajiv-a nau a ni miau a, “Detective Rajiv, ka patner ṭhin, Rinzuali ruala accident a boral ta, nau anih hi Ravi, Ani hi Engineer a ni, Computer engineer a ni ta in ka hria,” ka tih chuan Ruatpuia chu a ngawi vung vung a, “Anih hei ve hi le?” tia Rsa’n thlalak dang lungleia tualthatna thleng chu min entir a, Thlalak chu uluk takin ka en a, “A hmel hi hriat tawhna i nei em?” atih leh chuan, “Nikum Idol an thlan kha anih hi, Lalnunruati a ni a, a pa chu ex-minister ania, a nu erawh a boral tawh. A nu thih danah a pasal khan thil fello a awm a tiin FIR a thehlut a, mahse case chhui chian tak tak anih hma in tih tawp a ni. A nu boral hian Lungleiah ka awm a, he case kan close hnu lawk hian Aizawla sawn phei ka ni bawk, chuvanga hrechiang ka ni.” Rsa’n a chuan a ti a.

Rajiv-a nau a boral a, Minister a thi tawh bawk a, Rinzuali pahrawn Sawma kha thah hmasak ber niin, a ṭhiannu Lalneihpuii a thi bawk a, tin, Mumbai-ah ruang pahnih hmuh an ni bawk a, Khami te nupa pawh an ei zawnna aia hausa daih an ni. Heng zawng zawng hian inzawmna an neilo pawh ti dawn ila, an nei tih hriat nana Hell tih ziah vek a ni a, tin, hliam dang an neih pawhin chem zum taka an hrawka vih vek an ni, Rinzuali’n a tana hnawksak apiang a dah ṭha tihna a ni thei angem? Tun aṭang darkar reilo teah Mizoram a rawn lut dawn a, a tana pawi thei tur alo thian lawk ni ta se, Minister leh Mumbai lama thi te hian eng nge tih sual an neih? Tin, Ravi hian eng nge tel ve na a neih?

Heti taka rawnga thah an nih kher hian chhan a nei ngei ang, vau na pawh a ni thei, lo ni ta se tu chiah nge a vau? Number hlang aṭangin call ka dawng a, ka pick ruala, “Rsa’n i ṭha tih a sawi a,” Sanjay-an a tih chuan, “Engkim kha ka plan vek,” ka tih chuan, “Sir Anil-a min enthlak tir hi i plan-ah a tel em?” a rawn ti nghal. A chhan ka hriatloh thu ka sawi chuan, “Rinzuali nen vawikhat ka hmu tlang a, I ṭhat leh ṭhat loh a zawt a, Rinzuali khan i ṭhat mah mah thu a hrilh a, thla hnih vel a liam tawhin ka ring,” a tih chuan, “Helam aṭangin engkim ka lo buaipui ang, i chhungkaw himnana pawimawh ber, lo in veng la, a theih chin chinah Anil chetna i rawn report dawn nia,” ka tih chuan damdawi a tih at ka nih tak tak loh avanga lawmthu sawiin a dah a, hepa min ring lutuk hi chuan keimahah inrintawkna min siam fo ṭhin reng a ni.

Sana ka en a, Rinzuali te rawn ṭum a hun tawh, Inspector Peka te khan an enzui dawn a, an rawn la thlenglo pawh a ni mai thei report ala rawn pek loh danah, Sangpuia ka call a, ka chhungte’n khawpui an chhuahsan tawh leh tawh loh ka zawt a, Ani hi ka chhungte himna endik rih tura kan tih a ni. Msi leh Mimi-i te erawh Rsa’n inah an awm a ti anih kha, Peka phone call a rawn kal rualin, Rsa a chhuak nulh a, Msi leh Mimi a ngaihven a ngai miau a, Rinzuali leh mi pahnih an rawn thlen thu a sawi a, an zui ru tih a rawn sawi bawk. Phone kan dah rualin Rsa ka call a, Inchhung a luh dawn chiah thu a sawi avangin leh chanchin rawn sawi vat tura tiin phone kan dah a.

“Ruatpui, he project thar thawh tu te hian an tana hnawksak an thianfai anih chuan an mi thah tur te hriat lawk tum vat hi a ṭha a, chutiang nilova pawnlam miin inhnamhnawihte a dah ṭha anig erawh chuan Project hi chawlh lai lawk anih phah hial ka ring a, Rinzuali te rual hian tuna ka sawi tualthattu nia lang thei pawh hi kan ngaihven zui a ngai tho ania,” ka tih chuan a lu a bu nghut nghut a. Tunah chuan Msi leh Mimi-i te himna kan dah pawimawh hmasak ber a ngai rih a ni.

Inchhunga ka thil mamawh tur eng eng emaw ka lakchhuah hnuin, kan ruahmanna angin John-a te in thar ni mai turah ka in suan lut a, heti hian min zawn chhung chu ka awm rih dawn a ni. “Nuam thei ang ber tura kan phak tawka kan ruahman ve ania, i duh danin lo awm phawt la,” nui var vara Rosaline-in a tih chuan, “A nawm dawn hi a, hetah in awm rei angem?” ka tih chuan, “Kan fate bula awm reng hi chu a chakawm, mahse hei hna a awm leh si a, a sawi theih tawh loh, Delhi-ah khan kan let angaih hmel si a,” a tih chuan ka lu ka bu nghut a, Sanjay-a tan ber khan an let a ṭul tlat a ni. Min kalsan hnu chu ka tana an pindan buatsaih lamah chuan ka lut a, choka pawh ka mamawh tur chu an dah kim viau mai, an chei zawh hunah meuh chuan a nuam viau dawn tih ka chiang.

Ka phone a rawn ri a, “Rin lawk ang ngeiin in Inah an kal a, mahse kawngkhar inkalh avangin an let leh a,” Peka’n a tih chuan, “Um, khawiah nge an thlen?” ka tih chuan, “Hotel an pan dawn anih hmel,” tiin call a dah a, message a rawn thawn thung a. A thlalak rawn thawn a, mipa pakhat lang chu ka en chiang a, Ani hi chu an Office kum 10 tlin lawmnaa kan kal ṭum khan ka hmu, tu nge a hming kha aw, Abhijit a ni tak e, an sales manager a ti a nih kha. Pakhat zawk chu ka en leh a, Ani chu bodyguard pawh a ni mai thei.

Mitthi tawh ho thlalak chu bangah chuan ka bel a, eng in zawmna nge an neih ka hre mai theilo. Rinzuali pahrawn Sawma hi engvanga thah hmasak ber nge anih? Rinzuali hian a kawng hnawk thian fai ta se engvangin nge Lalneihpuii hi a tel ve? Zawhna ngai chhanna awm silo ringawt ngaihtuahin ka buai chu anih hi. Heng zawng zawng chhanna nei tur hian Rinzuali ka mamawh mahse tunah hian man ta ila, an Project zawk chhanna hun rei tak ata ka lo umzui tawh hi engtikah mah ka hrechhuak lo thei.

Ka ngaihtuah let a, kha zan damdawi ka in nia a hriat zana ka muhil emaw a tih laia a phone biak kha. “Peih a ni tawh, mahse a ṭha ber tur chuan kha Formula kha kan mamawh a ni, Sorkar hnuaia hralh tur chuan a tello chuan a theih loh, tunah hi chuan ruihhlo satliah a ni mai, ruihhlo chak tak. Kha Formula a tel hunah erawh khawvela ralthuam hlauhawm ber a ni tawh ang, mi zawng zawng thuhnuai theihna tur ralthuam.”

Lehlam aṭangin eng chhanna nge a dawn ka hrelo mahse Amah vek chuan, “Dr. Johnson-a te nupa khan fapa leh fanu an nei alawm, mahse kha minawl lutuk Ronney-a khan an fapa chu alo that daih pek a, an fanu khan Formula chu a kawl ngei ang, tin, kha pawisa pawh kha a kawl tih ka chiang. Ronney-a kha lo dahṭha hma ila Malsawmsangi hnen aṭang khan engkim ka nei tawh ang,” a tih chuan, lehlama mi chuan bengdaih a tum a ni ngei ang, “Aw, ka hria e, zawng hmu la engkim kha kan ta anih ngei angai ania,” tiin phone a dah anih kha. Mizo ṭawng a hman avang khan ka rilru a tibuai viau a, tu nge ni ang tiin ka ngaihtuah fo a, tunah Mizoramah Mizo ngei tualthahna a thleng a, Hell tih hnutchhiah a ni vek a, hei hian chhan a nei ngei tih a chiang.

Ni hnih ngawt a liam leh tawh a, Rinzuali te pawh enthlak reng an ni a, hmuntinah min zawng tih loh chu an chetna engmah a awmlo. Tualthahna lam an buaipui miah lo bawk a, tin, a chhungte leh a ṭhian te tumah a tlawh heklo. In thahna thleng pawh Mizoram an rawn thlen rualin a reh hmak a, State dangah pawh engmah thleng a awm leh tawh rih lo. Chutih rualin tum thuhmuna inthahna thleng leh erawh Mipui titi a ni a, Mizoram mai nilo India ram pum titi a ni hial ang, News zawng zawngin a puang a, a bikin Minister thihna khan chhui a hlawh hle bawk. Kan thawhpui ṭhenkhatin case an la tih thlengin ka hria a, mahse kei erawh mi bo anga ngaih ka ni. Investigation Department leh Police zawng zawng lu ti haitu ti hialin Sanjay khan a rawn report anih kha. Ni e, Hell Project hi lipse vek mahse tuakthattu hi kei ang tho in tu ber nge tih an hre bikin ka ringlo.

Keichuan ringhlelh tur tal ka nei a, Anni chuan kha project kha a tir aṭangin an en ṭha leh phawt dawn chu ania, theih ni ngat sela, ka information neih zawng zawng hi hrilh a, thawhpui ka duh chutih rualin engkim ka tibuai thei tih ka hriat avanga hetia a ruka awm hi ka ni si a. Ka hmaa lehkha tam tak chu hai let nasa viau mah ila, ka duh ka hmu chuanglo. Ka phone phawrhin Sanjay ka call a, “Khalamah eng chen nge an hmuh tawh?” ka tih chuan, “I hmuh chhuah chen pawh an hmu lo, ngaihdan tlem i zarah ka thawh a, i hovin ti thei ila ka ti ngawt mai, mahse mi bo i ni tlat si a.” atih chuan lungawilo zet hian, “Engvangin nge a hma lawkin Ronney a thi a, chuta ṭang tal chuan an chhui loh, Minister la dam te pawh zawhna an zawt thei reng a ni lawm ni?” ka tih chuan, “Kan ti alawm, tuna kan buaipui ber chu tualthatna a ni tih i hria alawm, Project an Run na ni lovin,” a tih chuan, Rinzuali thusawi bawk kha ka bengah a ri nawn a, “Formula tello chuan ruihhlo satliah a ni,” a tih kha.

Phone dahin Rsa ka call nghal a, phone a lak rualin, “Peka report-ah khan vawiinah Police Station-ah Rinzuali rawn kal a tum tiraw?” ka tih chuan, “Aw pawnah an awm,” a ti nghut a, “Phone dah suh,” ka tih rualin hmeichhe aw ka hre zawm nghal. Ruatpuia Office-ah a lut anih hmel, Rsa chu engkimah a puh a, FIR thehluh a duh thu a sawi a, “Chhungte a nei a, a bo anih chuan a thawhna te lamin a chhungte bia in an rawn report tawh ngei ang, ngati nang a bialnu pawh nilo, a nupui hual pawh nilovin FIR thehluh i tum?” Rsa’n a tih chuan, Delhi ang a ni dawnlo tih a hriatchian vang nge a ngawi hmak a, “FIR chu min ziah sak dawn em?” a ti leh hmak. Ruatpuia hnaih takah phone a awm anih ka ring Ruatpuia a nui hawk ri ka hre thei. He mite hian chhaih thinrim an tum emaw ni, “Awle engpawh nise Ani chu ka ṭhianpa ania, an hna angah hi chuan rei tak han bo vang vang te pawh hi an nei ṭhin a, a supervisor emaw a partner tal a be pawp mai in ka ring deuh a, Anni chu zawt phawt la ṭha te i tilo maw? Hnaa a kal te hi a nilo lamah hian ilo zawng te hi nilo maw?” Ruatpuia’n zaidam zawka a tih chuan a reh zui vang vang a.

“Lalrinsang Mizoramah chuan i in ti lal hle mai maw? Nang hian kan inneihna tur dalin Ani kha i hruai bo tih kan hre ve ve,” Rinzuali’n thinrim zeta a ti ri ka hre leh a, “Min ring diklo mai mai a ni, tin i sawi anga ka rukbo pawh nise a bo tih hi Sanjay-a ka aṭang talin ka hre tawh ngei ang, Ani chu a partner a ni tih kan hre ve ve alawm,” Rsa chhanna chuan sawi tur a hrelo nge an ngawi leh tawh. “Kha be rawh,” a tih ri ka hre leh a, Ruatpuia’n Hindi a phone a bia chu ka hre pha, Anil-a a bia a ni mahna, phone an dah a, FIR an ziah luh sak anih hmel, “I ni anih ngat chuan in Office hian an chhui chhuak theilo mai thei che, mahse kei chuan ka thei ang,” Rinzuali ṭawng zawh chuan thawm a reh vang vang a, phone a rawn ri ruk ruk a, “Hello,” Rsa’n lungawilo zeta a rawn tih chuan, “Ka awm,” ka tih rualin, “Ka rek nawk nawk chak lutuk,” a rawn ti nghal hluk a, ka nui nghal hawk.

“Lalruatpuia inti eng emaw lutuk a polite taka a be vel te kha Amah hi hnek pawp ka duh,” a rawn ti leh a, Ruatpuia phun nui nui ka hriat rualin, “Inbeng dai rawh, a ruala thil pahnih lian tham umzui kan nih kha hrereng la, Ruatpuia ang khan dawhthei ve deuh la,” ka tih chuan, “Lemchhan in thiam hlawm si,” tiin phone a dah nghal hmak a. Ka pawimawhna ka hria, Sanjay-a sawi anga Anil hi an lam ṭang anih chuan kei hi min mamawh kher em ni?

Karkhat a liam a, engmah hmuh chhuah ala awm lo, tualthattu a reh hmak a, Rinzuali la Police Station-ah a lawr sek a, heti ringawt chuan kan ruahmanna kan thlak a ngai a ni. Ka awmnaa kalkhawm turin ka ti a, vawiin tlailamah kan inhmu khawm dawn a, chumi hmaa case ka enfiahna tam zawk chu ka ennawn leh a, kan sawi lawk angin tlai dar4:00 ah kim tur kan tih laiin Rsa a rawn lang ve lo. Midang erawh kan kim tawh a, Ruatpuia’n a call a, a pick mai loh avangin Ka call ve leh a, a rawn chhan rualin, “Rinzuali mi ten min enthla pek alawm le, ka rawn thleng ṭep.” tiin phone a dah nghal a, engtin tak in bum kual ang maw.

Rsa a rawn lut a, “Kan in umkual nasa lutuk a,” a rawn ti lawng lawng a, kan en ṭhap a hmuh chuan, “Ka hnu an hloh alawm, hetah chuan min umzui lo,” ti hmukin ṭhutna awlah chuan a ṭhu a, keiin ka ruahmanna ka sawi nghal bawk. “Vanlal an bula let leh chu a ṭha dawn a mi?” Min ngaihtuah hmel taka Rsa’n a tih chuan, “Hetiang ringawt chuan engmah hmuh kan nei dawn lo, kan office lam la nise a bul ṭhut aṭangin an ṭan chauh mai si a, chips takngial pawh an la chhui thleng lova kan nghak theilo ang, Mumbai police la in tualthattu ngawr ngawr an zawng a, an zawn hma khan khawpui a chhuahsan daih tawh ang tih rinna pawh an neilo a maw ni?” ka tih chuan an ngawi ṭhap a. Rawtna dang ṭha an neilo pawh a ni mahna.

“Sir, i ruahmanna chu a ṭha viau a, mahse sawi duh ka nei,” Peka’n a tih chuan ka ṭhu a, “Rinzuali ringawt kan enthla a, Anni hi Nangmah zawng tur chauhin rawn kal ni ta se, kan tum hi kan ṭhelh duai thei a, Kan mitthi ta te chungchang kha ngaihven zui ta ila chuta ṭang chuan Rinzuali nena inzawmna awm thei kan chhui lut thei zawk lovang maw?” a tih chuan lu bu nghut in, “A dik chiah, ka lo en a, ka awmhmun aṭang ringawt hi chuan an inzawmna hmuh tur hi a tlem ka ti, heti zawng hi kan ni a, Rsa leh Ruatpuia kal chhuak thei an nilo a, kan hre vek a, Nang la Anni enthlak hna i thawk a, Sangpuia’n a pui che a, insem rual ila a ṭha tho in ka ring.” ka tih chuan,

“Peka Nang Lunglei lam kha ngaihven la, tin, Sangpuia hian Rinzuali te chu lo enthla zawm mai se, Rsa nen hian kan mitthi te hi ngaihven ta ila,” a tih chuan, ka melh zawk a, “Nang chu la chhuak lo phawt rawh, John-a te nupa khan chanchin an rawn nei ṭep ang,” a tih chuan ka sawi tum pawh sawi lovin ka ngawi zui ta daih a. Midang an haw hnu chuan Rsa chu a awm khawmuang a, “Msi eng nge a chanchin?” ka tih chuan, “A ṭha lutuk ania, englo hrilh che ka duh a, mahse i hmuh hun atan ka khek zel a, hrilh ngei ngei che a ṭul tawh zawkin ka hria,” a tih chuan, “eng nge a?” Ka lo ti vat a.

“Delhi-a i awm lai daih tawh khan Msi hi a harhchhuak tawh, In aṭanga i chhuahtir pawh khan a pangngai tawh mahse a taksa a chaklo in enkawl reng kha angaih avangin Mimi-i kha hruai tel ve zel ka nia,” a tih chuan phawk zetin ka en a, min hrilh lo thei lutuk chu ka haw lek lek zawk. “In hmu tura ka duh luatah che ka sawilo a, a chhanchu damṭha a i hmuh khan, i hrethiam tho ang,” a tih leh chuan, “Um ka hrethiam alawm, mahse tunah pawh ka la hmu thei chuanglo chu ania, min la haw viau em?” ka tih chuan, “Aih a ngaihtuah che. Kan lakchhuah a ngai a ti fo che a, Ani pawhin Rinzuali thuhnuaia awmah ala ngai che a,” tiin Rinzuali’n a bum chhuah dan leh damdawi pek anih dan te, a rilrua a chhungte thattu nia hrilhtu anih dawn te chu a sawi ta vek a, a sawi zawh chuan thawveng huai hmel a pu. “Heng zawng zawng hi Amah ngeiin hrilh ve che sela ka tih vang ania, mahse kan heti nuai ta si a, a sawi ai ka sawi anih chu,” tiin ka darah bengin min chhuahsan ve ta a.

22

(MSI POV)

“Rengpuia hi engtikah nge a bo a, engmah min hrilh ve hauh lo?” lungawilo zeta ka tih avang chuan Rsa kallai chu tawp chawtin a rawn inher a, “Engtin nge i hriat?” ka tih chuan, “Hell vanga buaina news ka en alawm, a bo thu an rawn sawi a,” ka tih chuan a thaw hak a, mahse min chhan erawh a tum hmel loh. Engvangin nge min hrilh duhloh? A chhan ka hriat ngei angai, Rinzuali’n a thukru em ni ang, nge ni a a that ve zawk?

Ka Message tone a rawn rik chuan hawngin ka en nghal vek, “I thupek chiah kan nghak,” tih zawng a ni, Ka nui nghal sak a. Ka phone neih hi Mimi-i lo chuan midangin hria an awm lo. Ani hi ka engkim sawina, ka inbunruahna a ni a, ka natna leh lungngaihna te min ṭawmpuitu, ka tana Sangpuii aiawh tura Pathian min pek ka tilo theilo. Rsa a duh viau a, a tir aṭangin Rsa a ngainat zia ka hriatpui, chuti chung chuan kan pahnih inkar engkim a lakah a zep vek thei hian a lakah ka rinna ka nghat a, eng nge ka tih a, eng nge ka ngaihven hrelo mahse ka hrilh chinah erawh ka lam a ṭang tih ka chiang.

Malsawma boral a, a bungrua min pek zinga note bu a phone number kha ka be kual a, ṭhenkhat chu hman tawh loh te an ni. Mi pathum ka be pawp thei a, chung zinga ka u in a sawi Doctor kha Nikhil-a hi a ni. Nikhil-a hnena ka u boral chungchang ka sawi khan Mizoram a rawn pan nghal a, a rawn kal ṭum khan Pendrive min pe in, uluk taka en a zir chiang tûrin thu min chah a, Ani nen khan thil tam tak kan sawi a, tin, engpawh ti ila min pui tur thu a sawi a, ka u tana ṭhian anih angin ka u thil tum tih hlawhtling sak a duh ber thu a sawi a, keipawhin chu thil ngei chu ka ti dawn a ni.

Midang pakhat ka biak pawh erawh a hming diktak hrelo mah ila, ka tana hnathawh a inpeih thu leh ka u vang pawha ka tan a nunna hial a chan ngam thu a sawi a, Ani erawh Rouge tiin a hming ka save a, Mizo a ni. Awmhmun aṭangin ka nu leh pa thattu ka zawng ṭan a, ka thil hriat duh tam tak min hrilh a, min puitu ṭangkai tak a ni.

A pathumna chu Tebawihi a ni, engtin nge he hmeichhia hi thah ni ve silo ah chuan a bo daih theih, ka U target hnuhnung ber kha a ni a, mahse a bo tak daih avanga Sangpuii khan tuar a ni, phone-ah pawh a aw hi chu ka la hre chiang khawp mai. Ka biak laia a awmdan hlauthawng aw takah khan diklo a awm tih ka chiang, Ani pawh hi ka zawng hmu vat ang.

Thil thleng leh nih dan engkim ka ngaihtuah let a, Mike kha Mizoramah a awm tih ka hre bawk. A hming dang leh anihna engmah ka hriat loh avangin ka tan zawn hmuh ala harsa viau, mahse kha mipa leh Lalrinzuali khan inzawmna thuk tak an nei tih ka hriat miau avangin ka zawn hmuh ngei ngei a ngai bawk. Ani zawn hna erawh Rouge khan min thawhsak thung. Mi fing tak a ni a, an chhungkua in harsatna an tawh laiin Malsawma khan pawisa tam tak pe in a ṭanpui tawh niin a sawi, vawikhat kan inhmu a ka mi rin zawng tak a ni bawk.

Nikhil-a Pendrive min pek kha uluk takin ka en a, a chhunga mihring hming awm zawng zawng ka list chhuak a, “Hell Project” a langsar tak tak, he pendrive a lang chin hi chu ka hre hneh tawh viau a ni. Ṭhenkhat an boral tawh a, a tam zawk man an ni tawh bawk a, mi tlem te chauh an bang tawh, a pawimawh ber ka chhungte thihnaa mawhphurtu te an la bang tlat. Anni zawng zawng hi an thi ve lo anih chuan nun nuamin ka awm hauh lovang.

Rinzuali te chhungkaw chanchin ka chhui chiang a, thil tam tak ka hre bawk. Langsar taka inngeihlo anga lang a pa hrawn Sawmpuia leh Rinzuali te hi a takah an inhaw reng reng lo. Rinzuali hian an pawl sumdawnnaah nihna sang tak a chan tir a, Mizoram pawna bungraw thiarna kawngah pawh a pahrawn hian engkim a buaipui ṭhin. Chung zawng zawng ka hriathnuah ka be pawp a, Hotel-a inhmuh puiah ka sawm a, a fanu tih ang chiah in a in turah damdawi ka pawlh a, mahse kha damdawi ka pek khan a hneh chiah lo nge min khawih a tum avangin kan in chei chiam a, ka hmai veng thei mah ila ka taksa ṭhenkhat erawh a khawih fuh nual. A thawmhnaw phelh chu remchangah hmangin a serh ka tan a, a kut ṭang pawh ka tan bawk, Kha zan khan Nikhil-a nena kal kan ni a, kan awmdan a rawn hmuh khan Sawmpuia chu a hrawkah a vit ta a ni.

Keichu midang hmuh loh tura chhuak tura min tiin, engkim a chingfel a, kha zan khan hotel room in ang kan book loh miau avang leh tumahin ka hmel an hmuh loh avangin manchhuah kan nilo, Tin, CCTV record tihchhiat vek a ni miau a. Kan chhui leh deuh a, Lalneihpuii kha kan man a, Ani khan ka nu leh pate a bum chhuak ngei tih Amah ngei in a inpuanna video ka nei, tichuan thihdan ngai anga lang turin a haw kawngah Rouge khan zui in Ani pawh a dahṭha ve leh ta a ni.

Chutiang zelin, ka nu leh pate thihnaa mawhphurtu leh hlawkna tel ve tu, Lalnunhlimi kan chhui lut a, a boral tawh tih kan hriat avanga kalsan mai kan tum laiin a fanu Lalnunruati leh Lalneihpuii nen an inbiakna kan hrechhuak leh a, Lalneihpuii’n anu in mi lu man a tel avanga pawisa a ngah thu a sawina a ni. Tichuan, ngaihven belhin Lalnunruati leh Rinzuali inbiakna kan hriat chuan ka nu leh pa thihnaa inhnamhnawih ni ve lo mahse a sum zawng zawng dawng tu anih avangin, hotel-ah ko in Rouge bawkin a dahṭha leh ta a ni.

Heng Mi pathum te hi Mizorama Rinzuali thawhpui mi pawimawh tak tak te an nih avangin hetia an thih takah chuan Mizoram a rawn rah ngei ka ring a, Rsa beidawnga a rawn haw khan Rinzuali kohnan hman theih ka inbeisei laiin engmah thlenglo angin a awm hmak thei khan engtiang taka luhlul nge anih ang tih ka ngaihtuah thiam ta ruak mai, a fin zia ka hre tawh a, tunah a luhlul zia ka hre leh tawh a, Ani hi ka nu leh pa te thihnaa a bul tumtu te zinga mi a ni tih ka chianna hian kar chhuah a, Mizoram chhung ngeia hruai luh hi ka tum ber a ni. Chutianga ka tilo anih chuan Rsa hian min man chhuak vat dawn tih ka hre ve tlat.

Ka ngaihdan leh ruahmanna dang Nikhil leh Rouge ka hrilh chuan, Nikhil-a’n Mumbai lama chet a lak tur thu a rawn sawi a, Anni hi Border lama an damdawi kengtu te nupa an ni, ka nu leh pate thihnaah inhnamhnawih ve lo mahse Rinzuali chhaih buai nan leh Ram tana hnawksak Police te’n an man theih miah loh te an nih avangin pawhin an thih a ngai miau a ni. Mitthi te ruang bula Hell tih hian awmzia pahnih a nei. Police bumna leh Rinzuali te chhaih buaina tura ka ruahmanna mai a ni tlat.

Minister thi erawh Nikhil-a’n Hell Project a sum pe lut hnem thei ber a ti anih kha. Minister a thih meuh chuan India ram pumin an buaipui a, Rinzuali pawh a chebuai ta reng a, a chet buaina remchanga hmanga Lalrengpuia bum chhuah kan tumna erawh a flop ta. A chhanchu hetiang plan kan neih hma daihin Rengpuia chu alo bo daih tawh tih ka hrechhuak miau a. Tu in nge ru bo ta ang? Rinzuali hian a man nge a that tawh zawk ni ang? tia ka buai laiin Nikhil-a’n kan ngaihven ruk reng Detective Rajiv-a nau Ama U ngei pawh phatsana Rinzuali thilsual tihnaa pui tam ber tu leh an khawl tam tak ruahmana duan sak tu Ravi a hmuh thu a sawi a, Ani erawh ni hnih ngawt a kawl a, zin tur a a chhuak a man miau avangin a ruang an hmuh hnuah chauh harsatna a atawh hriatchhuah a ni. A inpuanna video chu ka en a, ka ennawn leh ṭhin. Ka nu leh pate car khawih danglamtu anih thu a sawi ngei anih kha.

Rengpuia a bo tih ka hriat rualin engkim chhawl rih turin ka ti nghal a, Rinzuali lam a ṭang emaw he thihna chhuitu anih vaih chuan keini tan man chhuah kan har dawnlo tih ka chiang miau alawm. Chawl tura ka hrilh hnu lawkah Rinzuali’n Mizoram a rawn thleng a, atana mi pawimawh tak tak thihna in a koh kal theih loh laiin tunah Mizoramah a rawn a, anih chuan he hmunah hian Rengpuia a awm tih a chiang, Rinzuali lak aṭangin tlanbo pawh nise, he thihna hi a chhui ngei ang tih ka chiang a, bum kan tum Police hi chuan an rindan an kalpui ang mahse Rengpuia chuan a ti ve dawn hauh lo. Chuvang chuan engkim chawlh rih hi thilṭha ber a ni. Mahse khawiah nge Rengpuia chu a awm?

“Ms, i ṭha em?” Mimi-i’n min sawi nak naka a tih chuan ka kut thip vang vang chu ka hre hmasa ber. Ka thil hum chu thlah vatin ka kuta thisen far fup fup chu Mimi-i chuan a hru nghal vat a, “I ngaihtuahna hmang vak suh ka tih kha, doctor pawn a phalloh kha,” a tih chuan ka mittui a baw nghal zawi a, mahse ka kut lehlamin ka hru nghal vat. Kan thawm hria in Rsa a rawn lang vat a, “Ehe, nga ti nge a?” a tih hluai chuan, chhang lovin lehlam ka hawi nghal daih a, “A inngaihtuah vak anih hi,” thawhaka tiin, Mimi chuan damdawi a hnawih a, thip viau mahse ka chesawn eih lo. “Ms, Rengpuia chu a ṭha ania, I hria lawm kan hna chu, tunah hian tualthattu thiltih hi tun hun reilo te chhungin ti tu thuhmunin mi pasarih ngawt an thi tawh a, hei vang hian Ani chuan a hna a thawh a ngai alawm, Rinzuali lak aṭangin a biruk rih a ngai bawk a, hmu tur che in alo kal thei rih lo a ni.” atih chuan lu ka bu nghat a, ṭah insum taka ka awm chu min rawn kuahin a awmah hmai ka phum a, mahse Rengpuia hna ka hriatna chuan ka ngaihtuahna tibuaitu ber min chhawk tlat alawm.

Rsa sawi danin tunah chuan Rengpuia’n tualthahna a chhui a, anih chuan Lalrinzuali thuhnuaiah a awm tawhlo tihna a ni phawt ka lawm rualin ka rilru kam tu lian tak a awm nghal. Engtik niah emaw chuan he tualthahna zawng zawng hian min la kawk dawn tih ka hria chung zawng zawng thlen hma chuan Rinzuali hi ka kutah a awm ngei tur a ni. Hetiang taka Rengpuia a pawimawh anih si chuan engvangin nge Lalrengpuia ngei hi ka hman ṭangkai mai loh ang.

Heng zawng zawng ruahmanna leh tuna hetiang ka tih theihna bul chu ka mangchhia aṭanga thleng vek an ni. Damdawi hmanga tih at ka ni a, mutheilo leh hrehawm taka tawrh tir fo ka ni mahse muangchangin ka harsatna te’n min kiansan a, mahse Zothanpari leh midang ten min rawn tlawh ta fo a, midang ngaihah chuan damdawi vanga buai ka nih laiin keichuan ka hriatthiam dan ber chuan Anni khan min tidam ni berin ka hre ṭhin. Chakna leh huaisenna nei turin min fuih reng a, Malsawma vanga min huatna aiin mal taka hnutchhiah ka nih avângin min khawngaih thu an sawi fo ṭhin. Ka chhungte tan phuba la turin min ti fo a, an tana ka laksak ang khan. Chu chuan tumruhna min pe fo ṭhin.

Ka ṭawng loh avang khan engmah ka hrelo a mi â lailet der ka ni hauh lo, ka ngaihtuahna hmangin ruahmanna ka siam fo zawk a, mahse damdawi hnathawh te keimahah a reh loh miau avanga buai leh ṭhin chauh ka ni, chutiang alo thlen pawhin mitthi thlarau te’n min awmpui a, ṭang fan fan turin min fuih ṭhin. Rsa’n kan ina min hruai ṭum khan Malsawma ka hmu a, a thiltih nilovin ka nu leh pa te thih dan zawk a ni hmuh tir ka nih. Ka na a, ka nat lutuk avanga kha hmuna lut duh lova chhuak kha ka ni, mahse Rsa hian a hrethiam pha lo, ka harhchhuah hnuah erawh ka mamawh engkim la khawm in, In ka chhuahsan meuh chuan Phuba la turin ka inpeih tawh.

Nikhil ka bia a, Rouge nen tichuan heng zawng zawng hi ka thlen tir ta a ni. Ni e, ka phuba vek a ni. Rinzuali ka kut ngeia ka thah hunah engkim hi a tawp tawh ang. Engkim hian Rinzuali a kawk miau si a. Ka phone vibrate chur chur chu en in ka pick up a, Rouge a ni. “Hello,” ka tih ruala a thu rawn sawi avang chuan ka nui nghal sak a. Tebawihi a kutah a awm tih a rawn sawi miau alawm. Mahse engtin nge ka chhuah ang, Rsa min hriat loh dan tura ka chhuah ngei ngei a ngai miau si a.

Rsa zing chhuak a rawn haw chuan ka lo be vat a, “Rs, Rengpuia nen hian engtikah nge kan inhmuh dawn.” beisei nei zeta ka tih chuan min melh vung vung a, Rengpuia hming ka lam ruala min khawngaihna lang ṭhin hi ka hmuh hmaih ngai miau silo a ni. “Ka hrelo le, mahse tunah rih chuan in pahnih tan hian inhmuh loh ala him miau si a,” atih chuan lu bu nghatin ngui hmel zet hian ka kun lap a, “Ani ka hmu thei bawk silova, hetah la jail tang ang maia khungbeh ka ni a, restaurant a thil ei te ka chak ve a, bazar ka hmuh lohna pawh thla hnih dawn a ni leh tawh a, chhuah tal min phalsak teh,” ka tih chuan min hnial tum zetin a kâ a ang hman zuau tihah chuan, khuh kharh ri avang chuan a chip leh hmak a, ka hnunga Mimi-i ding chu en zeuhin, “Ka â leh thei mai dawn in ka hria,” ka ti leh a, “Nia keimah nen pawh kan chhuak thei alawm, Msi hian chhuah harh a mamawh a ni,” alo ti ve vat a. Rsa’n hnial ngaihna a hrelo tih hriat zetin a kawng dawm meuh hian min melh tawn a, sana bih vutin,”Khaw thim hma ngeiin in in thleng tur a ni.” a tih chuan nui var varin, Awle tiin Mimi-i nen chuan choka lamah kan lut ta nghal a.

“Ngati nge chhuah i duh?” Henu te hi chu kei aia naupang ni mahse a fing ve hle tih ka hria. “Kalna tur pawimawh deuh ka nei a, Ka U thattu kha ka hria a, Amah ka hmu duh a, min Cover thei ang tiraw, darkar hnih vel bak a ngai lovang, chuan kan bazar dun daih dawn nia.” ka tih chuan nui var var hian, “Ka thei mai ang, mahse ka biak reng theih turin i awm angai ania,” a tih chuan nui var varin, tuk ṭhuan kan siam dun ta nghal a.Chaw ei laia Rsa leh Mimi ka fiam zeuh zeuh erawh kan hlimpui ta phian mai.

Kan chaw ei na kan tihfel laiin Chokaah rawn lutin Rsa chuan a rawn call tur thu sawiin, khawiah pawh harsatna a awm chuan Amah call nghal vat turin Mimi-i chu a chah uluk hle bawk a, a hna lama kal turin a chhuak zui ta a. A chhuah rualin kan insiam a, ka ruahmanna angin Durtlangah kan chho a, Mimi-i chu a ṭhiante inah chhukin kei erawh Rouge nen kan inhmuhna turah ka kaltlang a. Address min lo thawnna ka thlen chuan chhuan man pe in ka chhuk vat a, Ka hmaa building la thar ve tak hnuailam panna step chu ka zawh thla a, ka hawikual a tumahin min hmulo tih ka hriat rualin inchhungah chuan ka pen lut ta nghal a.

Ka hmaa pindan thimruih chhun nge zan tih hriatloh khawpa thim chu melhin, light dim ruih inkhai hnuaia hmeichhia chauh hmel taka ṭhutthlenga phuar chu ka en a, ka bula ding chuan, “Engkim ka peih tawh e,” a tih rual chuan ka pen lut nghal a. Thimah ka awm miau a tu nge ka nih a hrelo tih ka hria, a hmui tuamna phelh tura ka mitmei rualin Rouge chuan a phelh nghal vat a, Tebawihi’n chau taka, “Min kal tir hram rawh engmah tihsual ka neilo,” tia inhnit hlap hlapa a tih chuan, aw thian kharhin, “Malsamwdawngzuala kha engtin nge i tlanchhiatsan theih?” ka tih chuan a rawn mengphawk nghal hra a, “A thiltih engkim kha min tirtu khan a hre lawk sa vek alawm, keichuan engmah tih sual ka neilo.” tiin a ṭap pur a.

“Engkim min hrilh la i dam mahna,” ka tih chuan, “Aih thih ka duhlo, min kaltir hram rawh,” atih chuan, “Dawt a tel tur a nilo,” ka ti nghal hmak. Rouge-an camera a on a, “Sawi rawh,” a ti nghal hmuk. “Malsâwma kha enchhinna a ni a, Amah thunun nana a banbun pe tu pawh kha keimah ka ni. Mahse damdawi an pek kha a ṭhat tawk loh avangin a nih dan turin a ni thei ta lova, tin, Malsawma khan puithiam alo pun ve kher nen a ngaihtuahna fim a hmang thei ta lo a ni. Nangin min hriat hma daih aṭang khan Ani nen khan kan inhre tawh a, enchhinna anih theih nâna Amah thlang tu pawh ka ni. Damdawi pe tu erawh Dr. Robert-a kha a ni. Mahse Ani khan Kha puithiam thurawn chauh kha a ngaihtuah a, a nu leh pate tana phuba lak a duh luatah fimkhurna a hloh a, a che buai fo a, kei hial min thah a tum tih a awmdanah ka hriat hnu khan, ka boss nen inbia in Sangpuii zawk a thah theih nân khan ruahmanna kan siam ta a ni. Sangpuii tel ve chhan erawh Rengpuia’n enthla tura a tih vang khan ka hrechhuak a, chu chu remchangah ka hmang a, ka boss khan Ani chu a hriat thu a sawi bawk. Malsawma treatment kha engmah a diklo a, a damdawi kha a doze a ei zawh miau avangin thah nilo mahse rei tak a dam dawn lo hrim hrim,” tiin a inhnit leh hlawp hlawp a.

“Tu nge Malsawma kha that?” ka tih chuan a lu a thing a, “Ronney-a thupek a ni tih ka hria, ka hriat danin Sangpuii kha a ngaihzawng leh a hmangaih a ni a, keipawh min thah a tum avangin ka biru zui ta a ni. Ronney-a leh ka boss kha nupa an ni miau a, chung zawng zawng ka hriat hnu chu keipawh hmanrua mai ka ni tih ka inhrechhuak a, ka theih chen chen biruk mai ṭha ka ti a. Mi tan no. 341 chu chu a thattu tih ka hriat chu a ni mai.”

“Tu nge i boss chu?” a ṭawng zawm leh hmaa ka tih chuan, “Rinzuali tih bakin ka hre lo,” a ti zawi sap a, a ṭah nasat avângin a aw a chhang hle tawh ka hria. Ka duh ka hre zo a, pindan chu ka chhuahsan ta nghal a. Taxi bawk la in, Mimi-i kalna lamah chuan ka kal a, a ṭhiante inah chuan kan ṭhu ve a, mahse rei kan awm lo, Bazar tum kan ni miau a, Bazar lam panin kan kal ta a. “I hre thei em?” zawi deuh sapa Mimi-i’n a tih chuan lu ka bu nghat a, Taxi a chuang kan ni miau a, a bak sawi ka tum lo.

Bank-ah kan lut a, cheque ka ken miau avangin pawisa tam tham tak ka draw chhuak a, mi an tamlo bawk a, kan chhuak leh thuai a, thawmhnaw leh thildang eng eng emaw ka en laiin kawngpui lehlama kal mi pathum te chuan ka mit an lak em avangin ka thil en lai chawl meuhin chu lam chu ka hawi a, Mipa pahnih sang ṭha zet te inkara kal chu a rawn hawi a, Rinzuali ngei a ni. Min hmu ve lo tih hriat takin a hawi kual thuak a, a inher leh tur erawh chiang zetin min rawn melh ta ngar a. Min hmu ve a ni tih ka hriat rualin ka nui lui sak a, a kalpui te hnena eng emaw sawi a ka lam an rawn kawh rual chuan Bus a rawn tlan a, keiin chu chu remchangah hmangin Mimi-i kaiin dawr chu kan chhuahsan ta vat a, Taxi la vatin kan kal duhna ka sawi a, kan dawr kalna kan tlanpel laia mi pathum te hawi kual ruai chu enzuiin ka kut ka hum ruh ngat ngat a.

“I ṭha em?” tia ka kut a rawn vawn chuan thaw hakin, “Ilo hmu em? Kha kha anih kha Rinzuali chu,” ka tih sap chuan, “Maw, nga ti nge min hrilh loh, ka kek hrep chak ania, khatiang misual,” tiin a ang nghal tan tan a, An nihna tak a hre ve vek lo hi atan a ṭha ka tih avangin thil reng reng hrilh vek ngailo ka ni reng a, hlauthawng taka awm turin ka duhlo miau alawm. A phone a rawn ri a, a chhan rualin phun sap hian Rsa a rawn tih chuan ka nuih sak a. Ka ngaihtuahna ka kawm a, ka thiltih engkim hi a diklo ti mah ila ka chhungkua ka ngaihtuah a, mahni thiam ka inchan zel chu a ni si a. Ni e, ka chhungte kha hmanrua atan te, rawng taka thah ni mai tur atan te hian ka phal biklo, ka nu khawvela nu ṭha ber leh min hmangaih em em tu te, ka pa min ngaihsak em em tu leh a thinrim hmel takngial pawh ka hmuh ngailo, Malsawma ka phirpui ka taksa chanve neitu te kha, khatianga misual tak avanga awlsam taka an nunna lak kha an phu bik reng reng lo. An thlarau a chawlh hahdam theih nan tal kei hian an Phuba hi ka la zo ngei ang.

In kan thleng a, kan thil lei tlem te chu kan dah ṭha a, Mimi pawh thawmhnaw pangngai tak pawh ka leisak hman lo chu ka inthiamlo viau. Ka pindanah kalin ka thawmhnaw ka thlak a, ka pawisa lakchhuah chu envelope ah khungin ka char a, polythene dumah tuam lehin ka bag-ah ka dah lut a, ka thun loh bang aṭang chuan pawisa la chhuakin ṭhutkhawmna lamah chuan ka kal a, “Mimi engmah ka lei si lo che a, i chhuah velah hei hian thil lei rawh,” tia pawisa pek ka tum chu a ṭang ve tlat a, mahse ka pe lui ta tho a, a hlim hmel chu hmuh hrehawm lo tak a ni. “Pawisa ka pe che tih hi Rsa hrilh suh,” ka tih chuan, “Nga ti nge?” a ti deuh ha a, nuih hak hakin ” Ka tan a nuam lo alawm, bakah i tan pawh a nuam a mi bialpa te bula pawisa dawn sawi te chu,” ka tih chuan inti hrethiam tak hian, “Nia mahse Ms a zahthlak e, pawisa min pe ringawt a, kan bazar apiangin thil min lei ziah bawk si,” a tih chuan, “Nuamlo ti suh ka lawmthu sawi na anih kha, hei chen min enkawl a, i zarah tihian dam takin ka awm theih phah a,” ka tih chuan, “Chute chu hlawh min pek vang alawm,” a ti nai nai a, “A Bonus angah ngai mai rawh,” ka tih chuan lu bu nghatin a nui ta var var a.

Ka phone a rawn vibrate a, message chu ka hawng a, Nikhil-a a ni, formula chungchang ka hriat leh hriatloh min lo zawt a, a ngaihna ka hriatloh em avangin Mimi bulah chuan call hman ka ngaih thu leh Rsa a rawn thlen chuan min lo ko vat tura hrilhin pindanah ka lut a, ka call ta nghal a. “I u khan Formula chungchang hi a sawi tawh a, mahse khatih hunlai khan ka hrethiam lo, Ravi khan chu thil chu a sawi a, a tirah khan ka lo ngaihtuah miah lova, mahse Rinzuali te Mizoram an rawn thlen chuan chu thil chu an rawn ngaihven ngeiin ka ring bawk a, ilo ngaihven dawn nia,” a tih chuan, eng ang Formula nge ni ang tiin ka ngaihtuah a, mahse chutiang chu ka hnenah vawikhatmah sawi rik a nilo. Malsawma thusawi hnuhnung ka ngaihtuah a, mahse Ani khan engmah chutiang a sawi ka hre tlat lo a ni.

“Eng ang Formula nge ni ang?” tia ka zawh chuan, “Ka hrelo, mahse i nu leh pa te kha damdawi siam chhuak ṭhin an ni a, eng emaw damdawi siamchhuahna lam a nih ngei ka ring,” a tih chuan, ka kawngkhar kik karh karh ri avangin phone ka dah a, ka phone pawh drawer chhungah dah lut nghalin pawnlamah ka chhuak a, Mimi-i chokaa a lut leh kawngkhar pui rawn inhawn a rual a, Rsa hmel ka hmuh chuan ka nui nghal sang a. Ruatpuia rawn tel ve chuan chawhmeh a rawn khai bawr ṭan a, a hnunga mi pahnih lo lut te erawh ka hre ngailo.

“Chaw kan rawn ei dawn,” tia Ruatpuia’n a chawhmeh khai min pek rual chuan nui var varin ka la vat a, kawngkhar a ri rak rak a, Choka luh mai ka tum ka hawi phei leh rual Mipa rawn lut ka hmuh chuan ding chawtin ka melh ngawt ngawt a, Ani pawhin min melh ve reng tho. “Khatia in melh reng lo khan inkuah ve ta che u,” tiin ka chawhmeh khai chu Rsa chuan a rawn la a, Ruatpuia te nen chuan khawiah nge an kal bo vek ka hrelo an reh nghal diak a, Remgpuia nen erawh sawi tur hrelo in kan ding reng thung.

A hmel ka hmuh leh takah chuan ka ngaih zia ka hre thar a, harsatna tam tak ka hmachhawn laia a kianga ka thlamuan ṭhin zia hrechhuak a, kuah a ka ngaih thu hrilh ka duh rualin, a laka ka thiltih ka hrechhuak leh a ka ngam ngang silo. Ka ṭawng hmasa lo anih chuan he mipa ṭawng mawh lutuk hian min be dawn miah lo tih ka hriatchian em avangin sawi tur ka ngaihtuah a, mahse ka hrawkah hian hnawhtu awm ang mai hian ka ṭawng chhuak theilo chu a nih ber hi.

“Vai flimah pawh khatiang chen chen an in melh peih lo,” tia Rsa’n min kalpel zuk chuan, Rengpuia chu pan hnai deuhin, “Damin ka hmu leh che a, ka lawm e,” ka ti sap a. Min chhang dawn emaw ka tih laiin min rawn kuah thut a, “Keipawhin dama ka hmuh leh che vangin ka lawm e aw,” a ti ve nghal sup a, ṭah loh ka duh mahse ka mittui tling pam erawh ka dang theilo, Min kuah vawng vawng hnuin min thlah in, ka mittui chu dim tê in a tuai zeuh a, a hmelah hian kei ang tho in sawi tur leh zawh tur a ngah min ngah ve tho in ka hria, mahse keini pahnih karah hi chuan thu hian hmun a chang tlem ve hrim hrim ṭhin reng a, sawi tur nei ṭeuh si in engmah sawi tur kan hrelo chu anih hi.

Chokaah chuan ṭhu in, ka kut a chelh a, “I damloh laia i kianga ka awm theilo kha a pawi ka ti, ka hna ka thawh a ngai si a,” a tih chuan, “Chemtea ka zai na che kha,” ka ti hman ṭawk, “Sawi suh, a pawilo, ka hria alawm,” a ti nghal vat. Ka bo hnua min umzui dan a sawi a, Thi tawh riaka min ngaih hnua min rawn hmuh leha a hlimzia a sawi lai te chuan dawt a nilo tih ka hriatna hian min ti hlim veng veng, “I chunga khatiang ka ti chunga min la rawn zawng kha ka lawm lutuk aw,” ka tih chuan ka mitah chiang takin min en a, “I thi nia ka hriat lai khan engtiang takin nge ka nat i hria em? Ka thinrim avanga mahni inthiam lohna in ka khat a, ka chhanhim theihloh che avang khan pawi ka ti, mahse ka hmu leh che a damdawi in kan thlenpui che a, i nunna chhan hman anih avang ringawt pawha ka lawmna te kha.” tiin nui sukin ka biang a rawn chul zeuh a.

“Malsawmsang ka hmangaih che a, chu thil chu engmahin a ti danglam dawn lo, ka venghim tlat tawh ang che ka tiam che anih chu.” atih leh chuan, ” Keipawn ka hmangaih lutuk che, i laka ka chetdan kha engkim ka hre vek a, mahse ka thunun thei miau silova, a pawi ka ti, mahse maw khang thil a thlen a, nikhaw hreloa min siam thleng pawh khan ka hre reng che asin,” ka tih chuan min rawn kuah ṭha leh a, “A tawk tawh sawi tawh lovang, engkim a fel hunah Nangnen hian kan innei tawh ang, reilo te chauh min lo nghak leh rawh aw.” atih chuan aw lai rat hian, “Um” tiin ka chhang a, ṭah vak vak ka chak zawk. Kan awmdan lawmawm si lungchhiat thlak tak hian ka mittui a ti hnai leh vek tawh.

Min kuahna thlahin a kekawr ipte a zen rawk rawk a, kan inhualna zungbun ka chhuah dawna dawhkâna ka hnutchhiah ngei kha a rawn phawrh a, “Khang zawng zawng kha i tana ka tih vek a ni, tunah hian engmah ka sawifiah theilo mah ila, engtik niah emaw chuan ka la hrilh vek ang che, mahse he zungbun erawh phelh tawh miah suh, ka kâ hian sawi mahse ka thinlung hian a phatsan ve ngailo che tih hre reng rawh aw,” a tih chuan a zungbun ken chu ka en, ka thil tih mek ka ngaituah a, ka kut ka tih bawlhhlawh dan te ka ngaihtuah kai zel a, ka kut a vawn lai chu che hretin lak ka tum chu nget zetin a rawn hum a, ka hmela inthiamlo na hi a hrethiam ngei ang.

“Engpawh ti la, eng mi pawh ni la, ka nupui hual i ni a, ka ta, ka ta chauh i ni. Ka vênghim ang che ka tih kha, i rinna ka ti chhia a, ka ti na che anih pawhin vawikhat chauh min ring leh turin ka duh che, vawikhat chauh,” a tih leh chuan ka kut chu dawh ṭha in zungbun chu a vawi hnihna atan min bun tir leh ta a. Rsa, Mimi leh Sangpuia te’n eirawng an bawl a, midang zawng ṭhutkhawmnaah kan ṭhu a, an thawhpui Peka a tih chu Rengpuia ang tho a ṭawngtlem tih ka hre mai, Ruatpuia titi kan ngaithla a, Rengpuia’n a zawm ve zeuh zeuh, Peka erawh patling takin a ṭhu a, an titi chu a nuih pui ve suk suk ringawt.

“Zanriah kan peih e,” Rsa’n chuan tiin an pathum chuan kan ṭhutna lamah chuan an rawn ṭhu phei ve a, ala hma tiin tlailam chanchin thar chu a hmet nghal zat a, Chutih ruala Peka phone a rawn rik chuan, tho nulh in choka lamah a chhang a, breaking news a rawn lang ve nghal zat. Durtlanga hmeichhe ruang an chhar thu an rawn puang a, a thlalak an rawn dah chuan mit khap hauh lovin ka melh ngar a, Rengpuia’n ka kutah a rawn hum nghal vat. “Malsawma bialnu bo ta kha a ni tiraw?” a tih chuan ka lu ka bu nghat a, ka chhang lo. Peka phone bia chu rawn lutin, “Kan kal a ngai,” a rawn tih chuan, Rsa chu a tho nulh a, an pahnih chuan an in zui chhuak ta nghal a…

23

(RENGPUIA POV)

“Vawiinah Rinzuali ka hmu a,” Msi’n zawi sapa a tih chuan, ka en nghal vat a, Bazar an kalna a Rinzuali a hmuh thu a sawi nawn leh chuan, “I ṭha em?” ka ti vat a. “Um, mahse min umzui reng nachhan hi min hrilh rawh.” a tih chuan midang chu ka melh kual a, hrethiam takin, ” Rsa te pawh an rawn let dawn tawh ang, chawhmeh ti lum ila, zanriah kan ei dawn nia,” Ruatpuia chuan tiin choka lamah min kalsan a. “Ms, i nu leh pate’n i tana pawisa an dah zat hi i hre reng reng em?” ka tih chuan, “Ka hrelo mahse ka harh khan ka drawer-ah ka hmingin Passbook pakhat a awm a, pawisa tam tham tak chu a awm ngei alawm, mahse ka khawih miahlo, ka u account pawh ka tan chuan a tam lutuk tlat.” a tih chuan a thusawi hi ka ring. Thawmhnaw man to tak leh changkang tak a inbel ngailo a, makeup leh accessories la Amahah hmuh tur a tlem ve khawp mai. Kan inhualna zungbun bak lo chu engmah tlereuh a inbel lova, a incheidan engkim hi a simple em em vek.

“I nu leh pate’n an hna an chawlhsan dawn khan, pawisa tam tham tak an chhuahpui a, chu chu kha pawisa kha anih ngei ka ring, chu thil chu an rawn umzui a ni.” ka tih chuan, a lu bu nghat nghatin, “Nangmah a nilo a mi an umzui,” a tih chuan, nui hakin, “I thik a mi?” tia ka melh kar chuan a nui ve var var a, “Tlem in,” tia min chhan chuan mak deuhin ka hlimpui daih nia. Thikthu kan neihna hmunah chuan kan rilru a awm ṭhin an tih kha.

“An tan hian ka pawimawh lutuk a, mahse tunah chuan Nangmah hi an zawn ber i ni tawh. Karhnih ngawt hetah hian ka awm tawh a, damdawi khan keimahah engtiang takin nge a thawh ang hrelo mahse an duh anga nitina pek a min thuhnuai tumna erawh a reh an ring tawh ang.” ka tih chuan, “Kha damdawi kha a mak takzet, engtianga tam nge i ei hman?” hriatchak hmel zeta min zawh chuan, “Vawi thum,” tiin, Ruatpuia min kohna lamah chuan kan kal ta nghal a. Rsa leh Peka an rawn let a, hmeichhe pahnih an awm ve nen hna lam engmah an sawi zawm lo.

Zanriah kan eikham a, hna buaipui tur nei kan ni miau a, kan chhuah a ngaih thu Msi bula ka sawi chuan min ngaihtuah hmel tak hian, “Ilo let leh ang tiraw?” a tih chuan, “Um” tia lu bu nghutin, “Lo in enkawl ṭha la, zantlaiah emaw naktukah ka rawn kal leh ang, hetah hian i him tih hria la, khawiah mah zanah a ni emaw chhunah pawh Rsa emaw keima hriatpui lohvin chhuak suh ang che,” ka tih chuan, “Awle,” a ti sap a, midang an chhuak vek tawh a, Mimi-i la pindan lamah a lut anih ka ring, midang awm lo chu remchangah la in, a khabe ah dawmin ka fawp zeuh a, mahse fawh zeuh ka duh tawk lo, a mitah en in ka fawp leh ta vawng vawng a.

Kan in thlah rualin ka chhuahsan a, min ngaihtuah dan tur ka hria, mahse a tawp ka thleng ṭep tawh a, engkim a zawh hunah erawh Msi nen hlim takin kan awm ve thei tawh ngei ang. “Mitthi kha eng nge chanchin?” Motor chhung ka luh rualin ka ti nghal a, “A ngai bawk a ni, sawi tur dang a awm chuang lo.” Rsa’n a tih chuan, “Um Mike awmna kan hre tawh a, Ani hi kan man thei anih chuan a tawp kan thleng thei tawh ang,” ka tih chuan a lu a bu nghut a. A tlan chhuak ta nghal a.

Vawiin khan John-an min rawn bia a, Anil Sharma an ruk thu leh a inpuanna video a rawn thawn anih kha, Anil hi bo tia sawi a awm lo, mahse ni hnih ngawt office a kal lova, a nupui in a haw loh thu sawiin Office lamah a thlen a, rukbo a ni tih an hriat hnu lawkah Office parking-ah nikhaw hrelo a phuarin an hmu a, John te nupa thiltih a ni tih vawiina video min lo thawn aṭang khan ka hre ve chiah. Sanjay a zalen tawh a, Anil erawh man a ni thung. Kum upa lam a ni ve tawh nen John te nupa dawpna chu a tuar zo vek biklo anih hmel a inpuanna kan hmu thei hial alawm.

HELL PROJECT a ho a khawih anih lai khan sum tak hmanga tham a ni a, sum ṭhahnem tak vang chuan a mit ti delin an thil man tlem te nen engkim fel angin a ziak bo ta a ni. Mahse chu Project chu a ruka kalpui reng a ni a, damdawi thar vawrh lar te pawh enchhin vek a ni. Tin, an damdawi siamchhuah thunun na tura an siam erawhin hna a thawk lo tih te, damdawi chi hnih siam chhuah anih te, chung chu ram tam takah hralh chhuah an tum thu te thlengin a sawi fai vek a. Formula pakhat vang chuaha an thil tum la hlawhtling lo anih thu pawh a sawi bawk. Rinzuali chungchang zawhna erawh ṭha taka chhan a neilo thung. Tin, tuna tualthattu pawh an pawl tih anih loh thu leh an pawl hre ru tu in a ti anih an rin thu a sawi a, Rinzuali chungchang an zawt chhuak dawn emaw ka tih laiin, Rosaline-i khan, I hna ve tur a ti anih kha.

Anil Sharma man anih thu hi puanzar ala ni lova, tin, vawiin lamah Mike-a awmna kan hrechhuak bawk a, chu thil bawhzui tur chuan tunah hian kan kal mek a, tualthattu hian he pawl hi a then fai a tum anih tak tak chuan ka hma khalh a ngai tih ka hria, misual hi an thi ngei tur tih dan neilo leh, ram zalen ber hnuaia dan ṭha ber neitu kan nih avang pawhin ram danin a rel mai tur a ni, mi pakhat ngaihdan ang nilo in. Ani hian misual um bo tum angin lang mahse thil sual ti tu, dan hmaah chuan misual ve tho a ni. Nunna hi a hlu a, mi pakhat duhdan chauhin ram hi a kal heklo.

“Kan thleng,” Ruatpuia message chu ka en a, Aizawl pawn anih avangin Anni Bike a kal an niha avangin an thleng hmasa a, keini pawh minute sawm hnu velah kan thleng chawpchilh ve nghal a. Kan hmaa building mal ding chu ka en a, Rinzuali te thlenna lamah Peka leh Snagpuia bakah midang hruaiin an kal ve bawk a, thawm dim taka in chu hnaih hret hretin a chhunglam thawm kan ngaithla a, lut tura kan inpeih hnu chuan Ruatpuia’n kawngkhar tlawh nghal burin a chhungah chuan kan lut a, mahse tumah kan hmu lo. Pindan tin kan enfiah hnuah pawh tumah kan hmuh loh avang chuan thinrim zetin dawhkan ka chum bur a, “Engtin nge anih theih?” ka ti nghal chiam bawk.

Rsa zawk chuan inbengdai tura min hrilhin, “Let phawt ang u, Hotel lam pawh ngaihven ve zawk ila a ṭhat ka ring,” a tih chuan ka pistol chu a paiah dahin ka chhuak nghal hmak a, Rsa chahbi ka dil chuan sawi buai hauh lovin a motor chahbi chu min pe a, khawchhung lamah kan let leh ta nghal a.

Aizawl kan luh rualin Rsa’n call a dawng a, Rinzuali an hmuh loh thu leh a rawn kalpui pahnih te an man thu an rawn report a, a mi man pakhat leh Sangpuia’n hliam an tawrh avangin damdawiin lamah an inphurh thu an rawn sawi bawk a, phone a dah rualin, “Vanlal khalh muang deuh teh,” a tih sup rual chuan ka ding thut a, alo in ring biklo nen hmalamah bu dawrhin, a phun nghal hluk a. Motor aṭanga chhukin pawnah chuan ka ding a, ka thaw leh hawk ṭhin. Lalrinzuali a bo a, Mike kan hmu hman lo bawk a, khawiah nge Anni pahnih hi an tlanbo hman. Tlailamah kha chuan Hotel-ah khan an la awm ngei a, kan enthla tu te pawn an la hmu anih kha, tin, Mike pawh zui ruk a ni a, khawiah mah a chhuak lo. Mahse tunah Anni pahnih chu hmuh tur an awm hauh silo.

Kan hlawhchham avanga thinrim ru zetin Station-ah kan let a, damdawi in lama Ruatpuia a kal avanga heta let hi kan ni. Kan luh rualin Peka’n an mi man awmna alo sawi vat a, ṭawng miah lovin an dahna chhungah chuan lutin ka hnek nghal pawp. Ka hmel a hmuh ruala a hlauthawng hmel te hlei hlei hian ka thin a ti rim? A kawrawmah ṭham in a hmai bul chetah chuan ka melh run a, “Zawhna ka zawt dawn che a dawt i sawi anih chuan i thih hma sawisa che in, i ruang hi ka paih darh ang.” tiin ka ding a, interrogation room a hruai tura tiin ka chhuahsan a.

Rsa’n, “Vanlal inbeng dai phawt teh, i awmdan hi a dik miah lo ania,” a tihna pawh ngaithla lo a kalsan ka tum chu na zeta min pawt letin, “Lalrengpui,” a ti nghal ṭhawt a, ka thaw nghal hawk. Ni e, ka inthunun thei meuh lo a ni. He buaina hi zo vat se tih ka duhna leh Msi hlauthlawng leh derthawng taka a awm reng vang ringawt pawh hian engkim hi tawp tawh se ka ti takzet. Chair-ah min ṭhut tirin tui in tur min rawn pe a, “Sangpuia chu eng nge a an?” tia Rsa’n Peka a zawh chuan, “Nia,” ka ti lo ti ve vat a, inbeihdaih phawt ka ngaih zia ka inhriat vanga an thusawi zawm ve pawh ka ni.

“A darah silai in a kap pek alawm le, Keiin a kutah ka kap let thung a, khatianga police min lo bei let mai khan eng emaw tak tih tum an nei tih a chiang a, Rinzuali ber alo awm ve lo nen, keini hi kawng dangah min hruai leh dawn ni tlatin ka hria.” atih chuan, Rsa chuan, “Chutiang ni ta se eng kawng nge Anni hian an zawh i rin?” a tih chuan, “Ka hre mai lo,” tih chiahin a chhang, an ngawih reng avang chuan ka hawi chhuak a, min lo en reng tih ka hriat chuan, Rsa zawhna chu ka chhan an beisei tih ka hria. “Ka hrethiam chiah lo, mahse Anni pahnih hi an inthurual anih phawt chuan, Formula leh pawisa an rawn ngaihven dawn anih hmel,” ka tih chuan a ngaihna hrelo zetin, “Eng Formula?” an ti hu a, ni tak Anil man chungchang kha tumah ka la hrilh lo tak.

“Abhisek kha zawhna zawt phawt ang u, tichuan in hre chhawm ve mai ang,” tiin inti thawveng lui zetin ka tho a, Rsa’n, “I ṭha tiraw?” a rawn tih chuan, Um tiin ka kalsan a, min rawn zui ve nghal vat. Abhisek-a hmaa chair-ah chuan ka ṭhu a, ka hnungah bang nghengin Peka a ding a, Rsa erawh Abhisek-a hnungah a awm thung. A pa len tehreng nen a hlauthawng hmel erawh a nuihzatthlâk zawnga lak chuan nuih ti za tham a ni, dawi lutuk mai.

“Eng ti turin nge Mizoram-ah in lokal?” ka tih chuan, “Nangmah zawng turin.” a ti hmuk a, a awmdan melh kual dan dan in, “Min hlau em ni?” tia ka nuih suk chuan a lu a thing a, “Ka hlauh vang che a khur ka nilo,” tiin a kut khur dar dar en chuan a nui lui a, “Um anih chuan engvanga hlauthawng hmel deuha awm nge i nih?” ka ti leh kher a, “Tu nge mahni thihna kawng zawh mek a, hlauthawnglo awm,” a tih chuan ka meng buai nghal nak a, Rsa pawh a che nghal hrut. “Nang hi,” tia ka ṭhutna aṭanga ka din rual chuan, “Ka ruang chu chansawm in paih darh vek mah la pawi ka tilo,” tiin a nui huah huah a, a khuh nghak bawrh bawrh a, thisen a rawn luak chhuak bawrh rual chuan a khur ngawt ngawt a, a chatthla chu a ni der mai. Thil thleng thut avâng chuan a ngaihna hrelo zetin ka ding reng a, Constable pathum rawn lut chuan Abhisek-a chu zawn nghal vatin an chhuahpui a, Rsa’n, “Kal ang,” a tih rual chuan ka phone phawrhin pawnlamah chuan ka chhuak ve nghal a.

Ruatpuia ka call a, inhliam an man ngaihven vat tura tiin phone ka dah a, damdawi in lam panin kan chhuak ve ta nghal a. Damdawi In hnai ber kan pan a, mahse Abhisek erawh a nunna kan chhan hmanlo. Post mortem tur anih avangin kalsan in Ruatpuia te awmna kan pan a, ka phone a rawn rik chuan, “Tûr a ei a ni awm e, thi in a luak vak a, a chatthla der mai,” a rawn tih chuan thinrim zetin ka hmaa dashboard chu ka chum bur a, Rsa erawh a ngawi hmak thung.

“Lalrinzual leh,” ti chhuak supin ka hun kal tawh ka ngaihtuah let a, “Khawvelah hian mite’n a ṭha zawnga min hrelo anih pawhin a chhe zawng tal hian min hre reng rawh se,” tia a nuih hak hak chu ner sukin, “Mi zawng zawng hian theihnghilh che pawh ni se, kei chuan ka theihngilh ngai lovang che,” tia ka chhanna chu a hlimpui tih hriat takin, min melh ralh a, “Khawvel chawk buai tur hian, chakna leh huaisenna ai chuan thluak neih ṭhat a pawimawh zawk,” a tih chuan dik ka tih avangin ka lu ka bu nghat a, “Nanga fing tan chuan chung thil thlen tîr chu a har lo tawp ang,” ka tih chuan a nui leh har har a. A sawi dik chiah a ni, he hmeichhe thluak ṭha lutuk dai khalh tur hian min hrechiang mah mah a ni. A kianga damdawi ei anga ka lan lai pawh khan min lo zirchiang leh viau tawh tih hriat takin tunah pawh a bum ka ni tihna ania, mahse heti mai chuan a chhuak dawn hauh lo, Mizoram chhungah hian ka man lo anih pawhin ka umzui zel ang, khawvel tawp thleng pawhin um ngai se ka beidawng dawnlo hrim hrim.

Ruatpuia’n thil thleng min lo zawt vat a, Rsa’n a sawi zawh rual chuan thinrim zet hian, “Chumi te mai mai chu,” a ti hluk a, phone call a dawn rual chuan, “Peka” tiin a chhang vat a, “Khawiah?” a tih hluai chuan, Rsa nen chuan kan en vat a, “Aw kan rawn kal nghal,” tia phone a dah rualin, “Tualthahna a thleng, Sangpuia a ṭha tho a, kan kal mai dawn em ni ang.” a tih rual chuan zawhna dang zawt tawh lovin kan chhuak ta nghal a.

Zan dar 11 a pel tawh a, Msi ka ngaihtuah avangin Mimi-i phone ka call a, a pick up ruala Mimi-i ka ko riah chuan Rsa a phun nghal hluk. A awmdan chu nuih sukin, Msi mut tawh leh tawh loh ka zawt a, Bathroom-ah a tlu palh a, a kut a tih nat thu a rawn chuan ka phun nghal hluk, Msi phone a pe a, hello a rawn tih rual chuan, “I na viau em?” ka ti nghal a, Rsa pawh a rawn hawi nghal vat, “Aih na love ka ṭha ania, a nal ka rap sual palh mai mai alawm,” atih chuan, “Kan lo haw har tawh lovang,” tiin phone ka dah a. “Ngati nge?” Rsa chuan a ti nghal vat a, thil awmdan hrilhin, “Haw vat teh ang,” ka tih chuan, “A hmun thleng ila haw nghal mai la, Ruatpuia te nen pawh kan lo haw thei tho alawm,” a tih chuan, “A pawi em lovang, kan haw rual dawn nia,” ka tih chuan min chhan leh tumin a kâ a ang zuai hman, ka phone a rawn rik avangin a ngawi ta daih a.

“Hello, Sanjay eng nge thleng?” ka tih rualin, “Naktukah kan lut thei tawh ang,” a rawn ti nghal hluai a, a thusawi awmzia ka hriatchian em avangin ka lawm takzet. An in kulhna hriatchhuah a ni tawh a, hmun khat mai nilo hmun hnih ngawtah hmun an nei a, tin, Rinzuali’n ka thawhna a tih hmun kha an in phenna a ni, kha hmun a aṭang ngei khan midang nen an in dawr ṭhin alo ni. An hmun pawimawh an dap nual a, chung zawng zawng chu Rinzuali leh a thawhpui Mike hian an hre ngei dawn a, tlanbo daih an tum emaw an thil duh an neih huna biruk an tum pawh a ni mai thei.

Laipuitlang kan thleng a, zantlai tawh mah nise an boruak tawn nen mipui an lo awm pungkawm tam angreng viau a, hmuhloh hlau ni awm taka in nek nawk nawk chu kalpelin inchhunglamah kan lut a, thisen luang ngei nguai chu en in, Peka dinna bulah chuan kan kal a, ruang la seng hawi loh chu kawkin, “Thil tam tak hmuh tur a awm ka ring,” tiin khum a, disc leh pendrive bakah pawisa leh eng eng emaw in chap darh nuai chu a kawk zeuh bawk a.

“Hriat tur a awm em?” Ruang bawkkhup zawnga mu chu thlek vung vung a ka tih chuan, “Malsawmtluanga, Kum 41, a nupui Laltlanhlui niin Serchhip khua an ni. A bak chanchin kan la hrelo, a phone kan check a number tam tak a neilo, a nupui kan be nghal a, an rawn kal nghal turah ka ngai.” Peka’n a tih chuan, ṭhu hniamin a nghawng chu ka en a, chemtea thah a ni velo tih a chiang a, silaia kah anih hmel. A kut hum tlat chu kuai pharhin, a kuta pendrive chu ka la a, Thla la tu te’n thla an lak hnuah ruang chu kan kuai thal a, silaiin hmun ruk laia kah a ni. Tih ṭul an tih zawh chuan Post Mortem turin an la chhuak ta nghal a.

Rsa In kan thlen leh meuh chuan zanlai a pel der tawh, hmeichhe pahnih te an mu tawh a, Mimi-in kawngkhar a rawn hawng a, a tho phang hmel zeta Rsa a be thiam lutuk chu ka lo nui hawk a. Rsa a mengrum teh e. Msi mutna lamah ka kal a, a kawngkhar ka kik dat dat chuan a rawn hawng vat a, a mutchhuak hmel lutuk chu en in, “Ka lo riak ve duh a,” ka tih chuan peih lo hmel zet hian a nui a, ka luh theih nan kawng min kian a, ka lut ve nghal zat a.

“In man em?” atih chuan lu thingin, “Aih, zingah kan sawi dawn nia, mu leh tawh rawh ka in tleuh zuai nga ka lo mu dawn nia,” ka tih chuan thuawi takin a mu leh hlan a, nui sukin Bathroom ah ka lut nghal a.

Bialnu te bula riak tura bal deuha riah te chu ka duh bik hauhlo. Ka tleuh thuak a, Msi bulah chuan ka mu ve nghal a, a muttui lutuk hmel chu en in a chalah ka fawp a, meng hauh lova a nui hak chu enin, “Muttui aw,” tiin ka mut dan ka siamrem ve nghal a. Mahse ka ngaihtuahna hi a chawl ve thei meuh lo chu a ni e. Malsawma buaina aṭangin a vawi eng emaw zatna atan ka chhui let leh a, Engkim hian inzawmna a nei vek nia ka hriatna hi a finfiahna engmah ka nei silova. Finfiahna eng emaw tal hmuh ka inbeisei tam tak te hi chu a mihring an bo rualin a bo ve nghal zel si hian thiltih a ti harsa hle si anih hi.

Msi nu leh pa te thih dan ka ngaihtuah thleng a, Anil-a thusawi ka hrechhuak a, An pawisa chungchang a sawi te khan ka rilru a rawn ti thar a, an tlansan tak te’n an umzui a, tin, keini lam pawhin an umzui a ti anih kha. Hell Project khawihtu lama thamna a dawng a a thup pui anih chuan Dr.Johnson-a te nupa kha pui lovin an thihna tur kawng a sial zawk se. Anni chuan ring tawkin Anil-a pek car-ah chuang in brake fail in khamah khan an liam ta a ni thei. Chung zawng zawng karah chuan heng mitthi te hian inrawlhna nei vek ta se Malsawma duhdanin phuba hi lak a ni thei mai angem? Ka ngaihtuahna avang chuan ka sira mu Msi chu ka melh vang vang a, a muhil pawisawi lo lutuk te, a chhungkua leh ṭhianṭha ber a chan avanga a nun hrehawm dan te leh Sangpuii bialpa leh Kan mi zawng ber Ronney-a’n a chunga thil a tih te, kei min haw tura buma damdawia hrai tu Rinzuali te ka ngaihtuah zel a, tualthat tur chuan a huaisen tawk lo tih ka chianna hian, ka ngaihtuah dan chu diklo tiin ka thaw hak a, Phuba lakna pawh ni tehreng se Msi chu a ni dawn lo. Mahse tu tih nge ni ta ang? Heng inthahna thleng zawng zawng hi mi pakhat tih a nilo tih a chiang a, chutih rualin inthu rual thil tih a ni tih erawh a hriat theih thung.

Msi rawn meng diar diar chu nuih sukin, “Tukchhuah nuam le,” tiin a chalah ka fawp zeuh a, a nui ri nghal hak, “I muttui em?” ka tih chuan, “Um, hman ata tawh vawiin ni thlengin i bulah chuan ka hahdam ziah ṭhin anih hi,” tia a nui var var chu ka lo en reng thung. Ka kalsan dawnah khan a passbook kha ka pe let a, a safe-ah khan chahbi danglam zet ka hmu bawk. Tin, thlalak leh sana te a awm bawk a, kha sana kha sana pangngai nen a in anglo tih ka hria mahse engtianga in anglo nge ka hrethiam chiah lo, chuan kha chahbi khan pawimawh a nei ngei ang.

Zan lama a chetsual thu a rawn sawi kha na a nei em? tih ka zawh chuan, “Aih, mahse ka rawl vek,” tiin a nui hak hak a, “Na i neilo tak tak maw?” tiin a mitah ka melh ran a, “Um, ka rawl ringawt a ni mai, mahse ka mawng hi chu a duk ve mai thei,” nuihza insum zeta a tih chuan, ngaihtuah chiang manglo hian, “Khawmaw ka lo en,” ka tih chuan ka ban a ti nghal thlawp a, “Eng nge?” ti hluaia ka en chuan, a hmui hupin a nui khur dar dar a, keipawn ka thusawi kha ka ngaihtuah chiang a, Msi nuih za bawk nen ka nui ve huk tho. “Fimkhur tawh rawh aw, in enkawl ṭhat i ngai ania, hrisel taka awm turin ka duh che ania,” ka tih chuan, “Um ka inenkawl ṭha alawm,” a ti ve sap a.

“Bawihi, thil hrilh tur che ka nei a, thil pawimawh tak a ni,” ka tih chuan a awmdan siamrem in, “Um,” a ti sap a. I sum tam tak kha la chhuak turin ka ti dawnlo che a, mahse Formula erawh kan vai him zawk nan min pe turin ka duh che a ni,” ka tih chuan a meng buai nghal nak a, “Pek che chu ka duh alawm, mahse keipawhin eng Formula nge ka hre bik tlat lo a ni,” inthiamlo hmel zeta a tih chuan, “Ka kalsan dawn che a, passbook pe tu che kha keimah ka ni a, passbook ka dahsak lai che khan i safe ah khan chahbi ka hmu a ni, tala hawnna chahbi nilovin, kha thil khan Formula awmna hmun min hruai thleng dawn a ni.” ka tih chuan harhchhuak thut ang hian, a tho vat a, a thawmhnaw dahna hawngin eng emaw hi a hai rawk rawk a, bawm a rawn phawrh chu ka hmuh tawh hnu anih avangin chiang takin ka la hria.

Khumah chuan rawn lawn lehin min pe a, “Engtiang taka hlu nge anih ka hrelo, mahse ṭha i tih dan angin i hmang thei ang,” tia nui var var a min pek chuan ka lo kuah vat a, “A ṭha ṭep tawh ania aw, reilo te chauh a ni tawh ang,” tiin inthlah in kan tho chhuak ta nghal a. Msi chokaah lutin kei erawh ṭhutkhawmna lamah ka kal a, Rsa a lo ṭhu leh vang tawh. Hemite pahnih hi innei ta se an tho hma thei hle in ka ring, Rsa reng a tho hma thei emai. An fate pawh zingah an piang vek ang. Ka ngaihtuahna vang chuan ka nui suk a, “Tho fuh awm ve a,” titu avang chuan ka nui tawp lehnghal hmak.

“Khatianga zingkar aṭanga i hlimpui dawn te chuan i rawn let khan hmu daih tawh ta che a ruk tal pawhin tu zuiin,” min nuih vur vur a, kan inhmu theilo tih hrechiang bertu kha a ni reng sia, bakah ka nuih chhan hi Anmahni vang tih a hre tawp silova. “Biak la hian ngawi tlat zel mai a, innei ta ula in fate hi an mawl ngawt ang,” a tih chuan ka nui nghal huk a, “Engvang ngawt chuan nge maw an mawl ang?” tia ka nuih vur vur chuan, “Nu leh pa ṭawng mawh lutuk nei reng reng bulah naupang an changkang theilo,” a tih chuan, “Fa i nei tawh a mi?” ka tih chuan, phun hlukin Tv a on a, kei ka lo nui vur vur thung, “Nui hui lo khan news en ang.” a tih rualin a hmet zut zut a, Msi’n thingpui chawiin ka bulah a rawn ṭhu a, “Innu in a sial a siam che,” tia Rsa no a pek chuan a khi nghal vur vur a, Msi nen in en in kan innuih nghal sak a.

Nizan lama kan mitthi thlalak an rawn tih lan lai chuan, Msi chu ka melh zeuh a, a ṭhu khawng lah a, tv chu a melh ngar bawk a, a awmdan avang chuan ngaihṭha vaklo hian, “Bawihi i ṭha em?” ka tih chuan a phu zawk a, Ani hian mitthi tur a hmu lawk leh tawh zawk em ni ang. Nge ni a, Ani hi a hmelhriat a ni zawk? “Um ka ṭha e, hetiang thu hriat hian min la ṭhawng reng anih hi, choka lamah Mimi-i ka va pui ange,” nui lui saka tiin no nen chuan a tho a, a dinhmun ka ngaihtuah a, hetiang thu a hriat fo te hi a tan hian ngai neih a har ngawt ang. A hma zawnga a buaina te nen phei chuan, engtik niah emaw chuan ka bulah awmin engkim hi pangngai takin a kal leh theih ngei ka beisei a ni.

Vawiin lamah kan mitthi chhungte an rawn thleng dawn a, tin, a khum bula pendrive leh thildang kan lak te kha enfiah tur a ni bawk a, tuk ṭhuan kan ei kham rualin kan chhuak a, inthlakna ka keng ve miau lova, inah tal ka let aniang chu. Rsa ngawi leh run tawh chu ka melh zeuh a, “Thil diklo a awm em?” ka tih chuan, “Ka hrelo ka awmdan hi,” a ti sup a, “A ṭha ṭep tawh alawm, Vawiinah Sanjay-a te’n damdawi siamna an luhchhuah tawh dawn a, Hell Project tih chhiat vek a ni dawn alawm, Kan hnathawh tam tak hian rah ṭha a chhuah ngei ang, ka bo lo tih leh a rukin hna ka thawk a ni tih ka report tawh bawk a, engkim hi a pangngai ṭep tawh ang,” ka tih chuan a lu bu nghutin, “Sanjay-a ka bia lawm, zo thuai teh se.” a ti ve sup a.

Station kan thleng a, Ruatpuia leh Peka an lo awm leh der tawh, Peka nen hian kan inchiang tulh tulh a, mi dik leh fair tak a niin ka hria. Hna a thawk ṭha in a hmaa tih tur awm ṭha takin a ti a, a naupang bik tawh hauh lo tih a hriat mahse a che reng reng a dik thlup a, chhungkaw chungchang kan sawi dun ngailo na in, Ruatpuia sawi danah fa pathum lai a nei tawh anih hmel.

Pendrive laptop-ah vuah a, a hawn rualin Rouge tih folder alo awm a, kan hawn ruala video lo awm ṭeuh chu kan enkual a, ṭhen chu an chhungkaw intih hlimna vel ni awm tak a ni. Rouge 1 tia a dah chu kan hawng a, kan inmelh kual nghal ṭhap. Lalnunruati chu ṭhutthlengah phuarbehin a awm a, zawhna zawttu an awm tih hriat takin, Lalneihpuii nena an inzawmna te, Hell vanga hlawkna a tel dan te a sawi a, tihsual ka neilo tia ngaihdam a dil a, a ṭah lai chuan video chu a tawp a, video dang chu kan hawng leh a, Tebawihi a rawn lang ve leh a, Ani erawh a inpuanna a dang deuh, Malsawma thih dan leh Sangpuii tel ve dan te a sawi a, tin, Malsawma thattu te leh damdawi chungchang bakah Rinzuali hming a sawi a, Anih chuan target dang hi mi tang no 341 hi a ni thei mai angem? Chu thil chu hria in Anni hian an daikhalh tihna zawk em ni ang?

Video dang kan en leh a, Minister thi ta kha a ni. Pawisa tam tak pe in Hell Project hmasawnna nan a vur a, hlawkna pawh tam tak a tel a, tin, naupang leh hmeichhe hmanga sumdawnna pawh a ho a kalpui a ni, Dr. Johnson-a te nupa umzui tura thu pe tura titu anih thu a sawi a, pai zeta Lalnunpuia hming a lam erawh a chhan ka hre chiah lo. Anil-a’n chip pe tu anga a sawi kha Mizo a ni a, Lalnunpuia thihna a, a inhnamhnawih loh thu a sawi a, anih chuan Anil-a sawi kha a ni thei mai angem?

Lalneihpuii thlalak a rawn lang a, Dr Johnson-a te bum chhuak tu, tih a thlalak hmaah a in ziak kulh a, a next leh rualin Rinzuali pa thlalak bakah document ṭhenkhat te a rawn lang nghal nual a, ka rin lawk ang chiaha thil thleng ka hmuh chuan ka thaw haka, Rinzuali pahrawn hi ka ringhleh te zinga mi a ni, mahse finfiahna ka nei thei miau silova, tin, thah hmasak ber alo ni ve lehzel nen keimah ngeiin ka umzui ta lo kha ania. Heng mite zawng zawng thihna hian Dr.Johnson-a te nupa thihna lam a kawk vek a, a next target chu kan mi tang kha a ni tihna. Tukin zinga Mitthi news in a puan laia Msi awmdan ka ngaihtuah a, kei hian ka hmuh kan tihna a ni thei angem? Mahse Msi hian hetiang hi a tih duh ka ring thei bawk silo.

Rinzuali te hian an tana hnawksak dah ṭha in, Msi kawk thei turin thil ti ni ta se engvangin nge Malsawmtluanga hi a thih a, Msi kawk thei tur finfiahna tam tak a hnutchhiah kher. “Hei video ala awm.” tia Peka’n a hawn leh rual chuan, Mumbai lama thah te kha an ni, Anni erawh an thusawi hmangah Hell Project tana mi ṭangkai tak leh Border lam indawrtawnna kalpui tu te an nih hmel. Dr.Johnson-a te nupa chungchang emah an hriatloh thu an sawi bawk.

“Engpawh nise, Jail lamah kan kal phawt angai in ka hria,” kan en zawh ruala ka tih chuan, Nia an lo ti ve hlawm a, Rsa nen bawk kan inzui chhuak leh ta a, kawng chanve kan tlan tawh ang tihah Rsa phone a rawn ri a, Ruatpuia anih hi a tih chuan, “Khawi” tiin ka chhan sak a, Jail lamah in ti an awm thu a rawn sawi chuan, “Hmanhmawh teh,” ka ti nghal hluk a. Romawia a ni a, thlaleh mai a chhuak tawh tur a ni, Tebawihi’n Malsawma thattu tia a sawi kha a ni bawk. Mahse nga ti nge tunah a inawhhlum kher ang. Mi tam tak chu an tan hian an bei a dawng fo a, intihlum te pawh an lo awm fo bawk, mahse tuna mipa erawh puitling a ni a, kum 45 a upa a ni bawk, tin, a pawimawh ber thlaleha chhuak tur a ni tawh a, a tan inawhhlum nachhan tur awmin ka hrelo, mahse a ti miau si a….

24

(MSI POV)

Malsawmtluanga maw a hming tak, ka nui lui sak a, mahse ka nuih zat vang a ni hauh lo. Ka tana mi pawimawh em em, ka mamawhna zawng zawng a min pui huamtu leh ka tana thih pawh pawi tilo tu a thi a, a thihna chuan min ti na a ni. Rouge tia a hming ka save, a awmzia pawh ka hriatloh leh a hming tak pawh ka hriat hma hauhin min kalsan mai chu a ni si a, mahse engtin nge anih theih. Silaia vawi ruk ngawt kah a ni a, a thihna hmun an rawn tihlan te chu chiang takin ka hria a ni.

“Engtik niah emaw heng zawng zawng hi a fel hunah, engkim a pangngaia a awm hunah kan chhungkaw chenna ila rawn tlawh dawn nia,” a tih lai te chu ka mitthla a, a chhungte’n an hriat hunah engtin tak tuar ang maw. An innghahna misual kutah a thi chu a ni si a, min pui lo se a thi kher lo tur. Thil thlen dan ka ngaihtuah let a, Ani nilovin Rinzualinzawk thi tur a ni asin, mahse engtin nge Lalrinzuali kha a tlanchhuah tak?

Rengpuia’n min dai khalh a ni tih ka hriat rualin, Rinzuali man turin ka ti anih kha, Amah pui tûrin tu nge a rawih ṭhin a, engtin nge a tih tih ka zawt ngailo, mahse ka duh ang min tih sak a, keiin an mamawh engkim ka tum a, pawisa tam tham tak ka pe tawh bawk a, Nikhil-a erawh in engmah a la duhlo. Rouge khan Rinzuali a kawl thu a rawn sawi a, kha hmeichhia kha ka kut ngei a tih hlum ka duh avangin, scooty ka kawl leh tawh avangin Rsa te chhuah hmang ṭangkai in min kohna hmunah khan ka kal anih kha. Rinzuali phuar beha awm chu ka hmel chiang taka hmuh tirin a inpuan theih nan eng eng maw sawiin thu ka zawt a, mahse he hmeichhe fing vervek lutuk hian engmah a sawi duhloh avangin a banah chemte in ka zai a, a luhlul zia leh a nunrawng thiam ang chiahin a tawrh lam pawh a chhel viau chu anih hi.

A hmaia chemtea tin leh in, “Ka nu leh ka pa i thah chhan tal te chu i sawi dawn lawm ni?” ka tih chuan, a nui sak a, “Rukru chuan a phu tawk a hmu a ni mai, I nu leh pate khan kan Pawl sum vaibelchhe tam tak kha ru chhuak kher lo sela, umzui an nilo ni mai tur,” tia a nui hak chu, “Dawt,” ka ti nghal vak, “I nunna hi ila hlut ve anih chuan thudik chauh sawi rawh.” tia ka chemtea a hmai ka rin riak riak chu rum zet hian min melh a, “Awle a ṭha alawm,” a tih chuan Rouge chuan camera a On nghal a.

“Eng ber nge i hriat duh chu min zawt ta che?” cho zeta a tih chuan, “Ka nu leh pate kha engvanga that nge i nih?” ka tih chuan a nui sang a, a landan huatthla awm zet hi ben pawp ania ka duh. “Ka sawi tawh kha I nu leh pate hian khawi bank-ah nge pawisa kha an dah tih pawh ka hria, i tel ve ngailo sela engtikah mah i hmu ngailo tur hi ani.” min chhanna avang chuan ka melh ngar a ka kut erawh ka hum ruh viau. “Pawisa bakah final Formula ru tu kha i pa ngei kha a ni.” a tih leh rual chuan a biang a ri nghal pawp a, ka benna avanga ka kut na vawng vawng pawh ka hre nghal. A rum haka min melh ling nghal hlar a, “Mitthi tawh annih avângin i duhtawka puh chhiat i tum tihna a ni maw?” ka tih chuan a hmui a ti sawi zeuh a, “I awi dawn chuanglo,” tiin a lu a thing mat mat a, “Lalneihpuii khan thil tam tak min hrilh asin, Rengpuia nena in inhual hnu lawka i bialpa hlui, nawmsakna i duh luat avanga a fa i pai hial ti tla a i kalsan kha.” ka tih ruala min huatna mitmeng chu en in, “I sawi zawm dawn nge, Mike hi ka call a nga engkim ka hriattir ve zawk dawn?” ka tih chuan a meng buai nak a, min chhan tum hmel erawh a pu lo.

A luhlul lutuk avang chuan tih dan dang hman mai tuma ka kawr ka hlim chho chu Rouge chuan min lo kai hrang vat a, pindan lehlamah chuan min luhpui a. “I kut ti bawlhhlawh ve turin ka duhlo che, haw phawt la engkim ka lo zawt chhuak vek ang,” a tih chuan thaw hakin, “Awlsam takin a sawi dawn lo tih ka hriat kha,” ka tih chuan lu a bu nghut a, Rinzuali kan dahna room-ah chuan kal leh in, “Ka hriat duh a sawi hma chu ngaisa ang che,” ka tih ruala a mita hlauhna rawn lang zawk chu chiang takin ka hmu, a kun zawk a, a rawn hawi chhuak leh erawh a landan a dang leh hlak tawh.

Rinzuali khawsa vanga thinrim ru ṭeuhin ka haw kha ania, Mimi-in min hmuh rualin thil thleng min zawt vat a, mahse engmah sawi lovin pindan ka pansan a, ka awmdan hi a dik hlawllo, ka thinrimna thunun theilo khawpin ka awm a, ka pindana thil awm ka hmuh hmasak apiang chu ka paihdarh a, Ka thawm hria in Mimi-ina rawn lut vat a, min dawm betin, “Ms, i inthunun a ngai ania, eng nge thleng?” a ti chul a, min kuahna te chuan min bengdai hret hret ni mai in ka hria.

“Phone kha ka lo hmang thei angem?” chhuatah kan ṭhu dun a, min beng daih a tumna lamah min pawt ṭhu kha ania, Aw pangngai taka ka biak chuan phone chu a rawn la vat a, Nikhil-a number ka dial nghal a, Mimi-in ka pindan chhung chu a ti fai nghal mawlh mawlh bawk. “Engkim tihfel a ni tawh em?” ka tih chuan, “Aw, engkim a fel tawh, tunah chuan a tawp ṭep tawh alawm,” a ti a, a ṭawngkamah a zangin engkim tawp mai tura a ngaihna chuan a ti hlim tih ka hria.

Thil thleng a hriat ang ang te a sawi bawk a, Rinzuali chungchang min zawt erawh ka thin a rim zual sauh a, mahse Rengpuia ring tura min tiin a man ngei a rin thu a sawi luam a, phone kan dah a. Mimi-i thil tifel ka pui a, mahse ka che ve tur ka khel na zet avang chuan ka dawm vang vang a, engtin chiah nge ka tih nat ka hrelo, ka ban rek nuamlo ka sawi chuan a en vat a, thil kan tihfel zawh chuan oil nen min zut sak thlap a, nui sang hian, “Ka lawm e aw, i awm lovang tih hi ka hlau ṭhin,” ka tih chuan, a nui ve var var a, “Tunah chuan engkim a tawp ṭep tawh, Rengpuia a rawn let tawh a, engkim hi a chingfel ang,” ka tih chuan hrethiam chiah lo mahse a lu a bu ve nghat nghat a, “Heti taka ti na tu che, i chhungte that tu zawng zawng hi man vek rawh se,” a tih chuan Rinzuali ruang hmuh anih hun tur ka mitthla a, ka khi sak a.

Rengpuia rawn call min phatsak na avang chuan ka nui rah rah a, “A nachang i hre lutuk,” tiin a pindan lamah min kalsan ta a. Thinrim viau mah ila nidang ang bawkin Rouge hian a zawt chhuak ngei ang, chu chuan hahdam takin min awmtir a ni. Mahse khua a var a ka thu hriat erawh a dang ta. Rouge thih thu ka hriat rualin zanlama thil thleng hriat ka duh mahse chumi ti tur pawh chuan Rengpuia leh Rsa hi an chhuah phawt a ngai si a.

An kal rualin Nikhil ka call a, “Mi tang no 314 chinfel a ni tawh,” a rawn tih chuan ka thaw haka, “News kha ka lo hmu a, rawn kal turin min duh em?” a tih chuan, “Aih, tunah chuan chawl tawh rawh, engtik niah emaw chuan he thil hi ka la rul ve ngei ang che,” ka tih chuan, “Min mamawh phawt chuan engtik hunah pawh min lo be thei ania, Rengpuia kha ring la, Ani khan engkim a chingfel ang,” a tih chuan min hmu theilo tih hre reng mah ila ka lu ka bu nghut a, “In inneih hunah sawmna ka duh ve ania,” a tih leh chuan ka nui sak a, phone kan dah ta a.

Rouge thihdan hriat ka duh rualin News-ah a lang tawh anih chuan ka hriat vat ka ring, Malsawma thattu dahthat a ni tawh bawk a, tunah chuan Rinzuali’n engkim a sawi huna a thih hun chiah ka nghak tawh. Chu erawh keimah ngei hian ka tih a ngai tih ka hrethiam a, engtin nge hma ka lak ve ang nge ni a, Rengpuia chetdan hi ka ngaichang zel zawk dawn.

Rengpuia leh Rsa hnathawk tura an chhuak chu an rawn let leh hlawl a, engmah an sawi lawk loh avangin ka hamhaih viau a, Mimi-i zawkin a chhan alo zawt vat, Rengpuia hmela thinrimna chu chiang takin ka hmu, pindanah a lut hmak a, tih tur ber hrelo in ka ding ngawi reng chu Rsa’n, “Zui lut rawh,” a tih chuan thuawi deuh in pindanah chuan ka lut ve ta nghal a.

“Thil thleng a awm em ni?” Khuma a ṭhu chu a bula kalin ka ti a, a chesawn lova, min melh eih lo bawk. A ṭhut ngaia a ṭhut reng avang chuan a darah khawihin, “Rengpui,” ka ti sap a, ka bana a rawn vawn thut chuan ka phu zawk a, a nat avangin ka ner nghal sak bawk. A thawk danah in bengdaih a tum tih ka hria, ngawirengin a bulah chuan ka ding a, mahse ka ban a hmerna erawh thlah se ka ti. Min rawn melh a, a mitmeng a natna te hi engvang nge ka hrethiam lo.

“Eng nge thleng?” ka tih chuan, “Romawia, mi tang no.314,” a ti sup a, a thusawi awmzia ka hriatchian em avang chuan chhang lovin ka ngawireng a, Ani hian min hrechhuak ta em ni? tia ka ngaihtuah lai chuan, “I hre ngai em?” tiin nelawmna tel miah lo hian min melh a, lu thingin, “Hre ngailo,” ka tih chuan ka chhanna vang nge a mitmeng anglo zetin a nui suk a, “Malsawmdawngzuala thihnaa mawhphurtu anga ngaih a ni, mahse finfiahna a awm loh avang leh Malsawma kha inawkhlum anih miau avangin a chungah eng action mah lak a nilo.” a tih chuan, “Malsawma chu mahni inti hlum alawm,” aw lai rat hian ka ti a. A thih dan a sawi fak fak chuan engtin emaw min ti na miau alawm. “Um,” tiin a lu a bu nghut nghut a, “A dik i tan chuan mahni intihlum a ni.” a ti leh hmuk a, tuna a awmdan hi chuan min ti awm nuamlo takzet, mahse chebuai thei ka nilo.

“Ngati nge chu thil chu i rawn sawi chhuah?” ka tih chuan, “Romawia chu tukinah a tanna pindanah in awkhluma hmuh a ni.” a tih chuan, chhang lovin ka melh ngar a, “Hriat i nei em?” atih leh chuan, “Jail-ah mahni intihlum an awm a, chutah chuan hriat ka neih leh neih loh min zawt a, mahse engtin nge kei chuan ka hriat i rin?” ka ti let a, “Ka zawhna i chhang lo,” a ti leh hmuk a, tuna a awmdan zet chu hriatthiam a har, hetiang a nelawm loh hian a mi man te a dawp ṭhin ngei awm si a. “Ka hrelo,” ka tih chuan a rawn ding a, kei ka tawlh hnung ve dat a, chik zeta min rawn melh nghalin, “Min hlau hmel i put khan min ti na, kan hun tawn hian min ti chau viau ania,” tiin min rawn kuah a, a chetdan chu ka beisei loh lutuk anih avangin ka ding reng ringawt.

Pawnlam aṭanga kawngkhar an rawn kik chuan min thlah in, a nui suk a engmah sawi tawh lovin kawngkhar lam a pan a, Rsa’n kan kal a ngai a rawn tiin a kalsan lehnghal a, a chhuak tur chu rawn hawi letin, “Eng emaw vangin Rouge tih hi i hre ngai em?” atih chuan phawk zetin ka melh a, ka chhan loh avang chuan thaw hakin min chhuahsan ta nghal a. Rengpuia khan engkim ka hria tilo mahse a hre ngei tih a awmdanah khan ka hria, mahse nga ti nge min man mai loh?

Chhuah tumin ka insiam a, a tawp ka khar ngei a ngai a ni. Lalrengpuia’n min man hma ngeiin engkim hi a tawp tur a ni. Ka passbook chu ka melh ran a, hetiang taka tam pawisa hi ka nu leh pate khan an ru tak tak em ni? Keini unau zirna nen pawisa chu an khawl anih pawhin hetiang em em hi an tan neih a harsa dawn tih ka hrethiam, mahse rukru anga Rinzuali’n a sawi erawh ka pawm theilo, an thiltih hian chhan a nei ngei ang.

Pindan aṭanga ka chhuah chuan thawm a reh ruih a, khawiah nge Mimi-i hi a awm le? Rengpuia te kal hnu pawhin a rawn lang hauh lo. “Mimi” ka kohna a chhan mai loh avang chuan ngaihṭha lo zetin choka lamah ka lut a, mahse a awmlo tih ka hriat rualin ṭhutkhawmna lamah ka phei leh a, chutah pawh hmuh tur a awm chuanglo. Ka ko leh a, a pindan kawngkhar hawnga ka enkual chuan ka hmu mai lo, chhuah leh tuma ka inher tur khumin a hliah lama chhuata Mimi ke rawn lang ka hmuh chuan tlan lut vatin, a lu a thisen kai nuai nen ka hmuh rualin ṭhu hniam in, “Mimi, harh teh, eng nge thleng?” tiin ka sawi nak nak a, chutih ruala ban tha chak zetin ka kâ a puan a rawn hupin nghet zetin min dawm a, ka zawi riai riai a engmah ka hre zawm tawh lo.

(Rengpuia Pov)

Ka bula Rsa ngawi rûn a ṭhu chu ka en a, ka ngaihtuah ang hi a ngaihtuah ve chiah em tih hrelo mah ila, engtik lai pawha Msi lam ṭang ṭhin leh a chhungkua ni tura inpeih em em reng a ni a, hetianga Msi a ringhlel ve ringawt pawh hi kei ang tho in a na ve em em ang tih ka ring. Finfiahna neilo mah ila, engkim hian Msi a kawk miau si a ni. Msi nu leh pate thih dan ka ngaihtuah zui a, rindan chauh lo chu fiahna ka neilo anih kha, mahse kha Rouge File khan chiang takin finfiahna min pe a, video te khan an inpuanna min pe tlat si a ni. Khang zawng zawng kha Msi hian a hmu ve tawh a ngem? Hmu ve ta se a nat dan tur ka hriatthiam rualin, inpuanna nei tur khan Ani hian thiltih a nei em ni? A thiltih ni ta se khang inpuanna zawng zawng te khan awmzia a nei lehzual ngei ang, inpuanna aṭang chuan engkim hian Rinzuali a kawk a, Msi thiltih anih chuan Rinzuali thihna in a khar ngei ang. Chu thil chu ka thlen tir dawn nge, ka dang ang.

“Msi chu a ni theilo ang,” Rsa’n a tih chuan, “A ni ngei ang,” ka tih let rual chuan a motor chu ti dingin, “Engtin nge chu thil chu awlsam takin i sawi theih?” a vin nghal ṭhawt a, a awmdan hi ka hrethiam lutuk mahse hetiang zawnga kan case hi kan kalpui lo anih chuan engtikah mah thudik kan hre dawn lo miau alawm. “Rinsang, dan hnuaia dan kengkawh tura awm i ni a, i hmangaih, i ṭhian, i unau te leh chhungte pawh nise dan zawm lova chet la an nih chuan hrem an ngai a, man an ngai anih chuan i ti mai tur a ni dawn lawm ni?” ka tih chuan rum zeta min melhin, “Malsawmsangi thiltih a ni ngei a ni tih fiahna min pe la, tichuan a chungah engpawh i ti thei ang.” a ti hmuk a, hetiang taka venghim duhtu ṭhian a neih avang pawh hian Msi tih nilo hram se ka ti, mahse a bank account a pawisa chevêl leh Rouge a file a Malsawmdawngzuala te nena an thlalak vang ringawt pawh khan ka tan chuan rinhlelh loh rual a ni silo.

“Ka hmangaih hmasa nilo mahse a tawpna erawh ni tura ka duh, thil tam tak a thlen hnu pawha ka nupui ni tura ka duh leh ka chhungkaw nu tura ka thlan a ni tih i hria alâwm ka tan hian a awlsam lo asin.” ka tih chuan min chhang lo. “Station chu thleng phawt ang, engkim kan tih tawp a, kan dai khalh chuan Msi pawh hahdam takin a awm thei tawh ang.” ka tih leh chuan, “Ka farnu a ni tawh tia ka sawi hi thinlung takin ka sawi tih i hria tiraw?” a tih chuan, “Ka hria lawm,” ka ti vat a, “Hlim ve tawh se, nui se tih hi ka duh ber, ka hriat theih chin ata hlim taka a nuih hi a tlem em asin, hei vang hian ka rinhleh chang pawhin ka rinhlehna dah bo vin, nupa in nih huna in fate nen hian Suangtuahna ka neih sak zawk fo che u a ni si a,” a tih chuan, ka melh vung vung a. Hepa ang rilru ṭha ṭhian ka nei hi ka lawm a ni.

Station kan thleng a, Ruatpuia’n hlim hmel taka min rawn koh chuan, Peka telin a pindanah kan lut a. Delhi Police te hnen aṭangin thu a dawng tawh tih sawiin engkim hriatchhuah anih tawh thu a sawi a, hmaih a awm tawh lovang, tia a sawi lai te chuan a thawveng hmel takzet. Rsa nen kan in en a, kan tan erawh hlimna hi a famkim theilo, Rinzuali leh Mike kan la man lo miau alawm le, tin, Msi hi a tel ve anih takzet chuan engtin nge ka tih ang ka hrelo. A tan hian a chhungkua zawng zawng thattu te laka Phuba lak hi dem thei ka nilo, ka chunga thil thleng nise ka tih ve tho tur a ni, chutih rualin dan hnuaia awm kan ni a, chu dan kengkawh tura thutiam ka ni bawk. Ka hmangaih ni mahse thil sual ti tu anih chuan ka hna ka thawk tur a ni. Ka hna hi ka thawk thei angem?

Sanjay-an min lo call a, “John te nupa kha an rawn let tawh ania,” a aw a hlimna chu ka hriat hmaih lo, khua a vawt ṭan tawh a, Sanjay-a ning ber khawvawh laia zana duty a chhuah kha ania. “Mizoram a vawt tawh em?” a ti leh a, boruak awmdan kan sawi luam a, “Taka Nupa leh Ravi bakah kan Minister thih hmaa video kan dawng asin,” a tih chuan, “Khawi aṭangin?” ka ti vat a, “A landan chuan tualthattu min thawn hi a ang ka ti, mahse an inpuanna kan en a, tupawh hian mitthi te hi an dem niin ka hria, kan pu thar phei chuan, kan hna min thawhsak tu ania case close rawh ru, fiamthu in a ti nge nge.” a tih chuan video chu en ve ka duh ka ti vat a, “I tih ka ring reng a ni, chuvang chuan ka lo thawn mek che,” a tih rualin ka phone a rawn vibrate a, ka nui suk. Phone kan dah a video chu ka enkual a, Minister leh Nupa te inpuanna chuan Msi lam a kawk lo, mahse Ravi erawh in, “Ka pianpui pawh sum vanga ka that thei anih chuan engvangin nge Anni nupa ka hriat zawng pawh nilo chu ka theih lovang, kha Detective khan pawisa tam tak min pe miau alawm,” a ti anih kha. Detective a sawi chu Anil Sharma a ni tih ka hria.

Video ka en zo ka phone ka hmet thim chiah number aṭangin call ka dawng a, ka chhan rualin lehlama mi chuan, “Msi nunna hi ila duh anih chuan, Formula kengin address ka lo thawnah hian nangmah chauhin rawn kal ang che,” tiin phone a dah lehnghal hmak a, a thu rawn sawi avang chuan Mimi number chu ka dial nghal vat a, phone a la thei hauh lo. Rsa leh midang inbe bulah chuan kal vatin, “Khawmaw chahbi,” ka tih rualin, “Eng nge thleng?” tiin motor chahbi min pe nghal a, ka chhang hman lo hmanhmawh taka ka chhuak chu min rawn zui ve nghal vat a, Rsa in kan thlen chuan kawngkhar in hawng sa avang chuan hmanhmawh taka motor aṭanga chhukin kan tlan lut nghal a, Msi pindana ka lut chuan engkim hnawk nuai avang chuan thil thleng tur awm ka hrethiam mai, Formula an zawng tih ka hria, mahse ka kawl miau a, Msi safe ka check a, a passbook erawh a awmlo tih ka hria, an duh pakhat an nei ta phawt a, Formula chauh an mamawh tawh tihna a ni.

Pawnlamah ka chhuak a, Rsa’n Mimi-i a rawn pawm chhuak ka hmuh chuan, “A harh lo em ni?” ka ti nghal vat a, “Ka ko harh a, mahse thisen a chhuak tam ve nen a lu a hai a, damdawiin lamah kal angaih hmel.” a tih chuan, Mimi-i in tur tui ka pe vat a, damdawiin lama kal phawt a tih avangin Rsa’n a chawi a, keiin inchhung enfiah leh in kan chhuak zui ta a. Motor chhung ka luh ruala message tone alo rik chuan hawngin ka phone chu ka ak lehnghal a, Formula ka pek hma chu Msi kha an that dawn lo tih ka hria, mahse kut an thlak angem? Na takin an siam angem? tih mawlh a ni ka ngaihtuah.

Damdawiin kan thleng a, Rsa’n Mimi casualty-ah a luhpui a, sana ka en a dar1 chiah a ni. Ngawirengin damdawi In ka chhuahsan a, kan inah ka kal a, vawiinah ngei hian engkim a tawp tur a ni. Ka pindanah lutin ka thawmhnaw ka thlak a, ka boot bun chu melh vung vungin, ka bula bawm chu ka la a, a chhunga chahbi chu la chhuakin ka boot sirah chuan ka zep lut a. Ka pindan rukah lutin ka mamawh tur ka la khawm zung zung a ,he mite pahnih hian ruahmanna fel fai tak nen min rawn hmuak dawn tih ka hria, chuvang chuan silai ka ken ngei ngei angai.

Ka pistol chu ka kawngah zepin, ka boot lehlamah chuan a dang ka zep lut bawk a, ka kawnghrenah chemte ka pai bawk a, silai mu khat sa pakhat chu lakbelh in, address min rawn thawnna hmun pan chuan ka chhuak ta nghal a. Aizawl khaw pawn anih avangin tlan chhung pawh hun a duh takzet. Ka thlen dawn hnaih chuan ka phone phawrh chhuakin, location ka on a, Live location chu kan whatapp group-ah forward in motor-ah chuan hnutchhiah in ka chhuak ta nghal a. Engpawh thleng dawn se ka chin an hriat ka duh miau alawm, min rawn umzui ngei dawn tih ka hre bawk.

Ka hmaa building lian tak chu ka en reng a, eng zat nge an nih ka hriatloh miau avangin luh a fuh berin ka hria. Gate-a ka luh rual chuan pawnlama duty pahnih chuan silai in min rawn tin nghal a, heng te chu ram dang chauha thleng ṭhin tura ka ngaih anih laiin kan ramah ngei pawh a thleng ania, helpawl in kulhna hmuna lut tur ka in chan ber. Pakhat chuan,” I hriamhrei dah thla vek rawh,” a tih chuan ka hnunga ka pai pistol chu leiah ka paih a, pakhat zawk chuan, “I chemtê pawh kha,” alo ti vat, ka chemte ka paih a, min rawn kal hnaihin, min dap thuak a, ka kawr iptea ka pai silai mu chu rawn phawrhin leiah chuan a paih a, “I ban phar rawh,” a tih rual chuan muangchangin ka phar a, an awmdanah training chhuak an nilo tih ka chiang a, kawngkhar bula ding mi pahnih dang te tih loh midang ka hmu lo bawk nen, ka ban phar pakhatin ka kekawr lama a dap thlak dawn chuan a khabe ah ka khup a tauh chawrhin pakhat chu a silaiah manin a hnar ruh tliak rawp khawpin ka lu in ka tauh nghal bawk a, an na ti in dawm lai chuan ka hmanrua chhar vatin, thlanglamah chuan tlanin silai a rawn puah rual chuan an lamah silai ka hmet puak ve nghal a.

A tira mi pahnih te tello a min um tu te chu paruk lai an ni, midang pawh an awm ngeiin ka ring. Ram pilril lama ka tlan lut chu, ṭawng danga umzui tura min tihna chu ka hre pha, chhuk lama ka tlan chu ding chawtin, in kual dan tur nia ka hriatthiam danin ka tlan phei a, thui erawh ka tlan lo, min rawn umpha tih hriat taka an thawm ka hriat rualin ka chho tlan ta a, reilo teah an thawm a reh a, nui sukin, “Chho tlanah chuan min khan lo deuh ni maw,” ka ti nghal sup.

Hmanhmawh angreng takin in lam kha ka pan leh a, Anni ho kha an rawn lan hma ngeiin inchhung kha ka lut hman tur a ni. ka sana ka en a, dar3 chiah a ni. Back- up an rawn kal ngeiin ka ring a, an rawn thleng dawn tawhin ka ring bawk. Building hnunglamah ka chhuak chho a, tumah ka hmuh loh avang chuan luhna zawngin in chu fimkhur takin ka kal hual a, tukverh lo in hawngsa ka hmuh chuan ka lutnghal vat. Inchhung chu a reh viau a, Rinzuali emaw Mike tal hmuh ka inbeisei a, mahse tumah ka hmu lo, step-ah chuan thawm dim zetin ka chho a, pindan awm hmasa ber hawngin ka enkual thuak a, ka khar leh ruala, “Che tawh suh,” titu avang chuan ka ding nghal chawt.

Step tawpa, Msi kut phura a kâ char phui chunga a lu zawna Mike-an silai a tin ka hmuh chuan chhuk a, hnek nghal pawp ka duh. Msi’n mittui tling pama chiang taka min melh chu en in lu ka bu nghat a. Muangchangin inhnuai lam pan chuan ka chhuk a, “I silai kha paih rawh,” a tih chuan, “Nangpawn i paih bik chuang loh kha,” tiin ka tin ve ran a, ka chhanna avang chuan Msi chu a silai chuan a nawrna zual sauh a, “I ti na anih vaih chuan,” tia step tawp ka rah rual chuan ka sir aṭang hian, “In pahniha thih i thlang zawk a mi?” Rinzuali’n a rawn tih rual chuan ka hawi phei zawk a, Silai bawkin min lo tin ran tawh. Ka silai ka dah mai duhlo chu a thinin a tuar lo nge, Msi te bulah chuan kalin a samah kek in chhuatah chuan a ṭhingṭhit tir nghal rawk a, “Lalrinzual,” ka ti nghal ṭhawt, a pistol chu load in, “I dah thla lo anih chuan ka ti ngei dawn tih i hria lawm,” tiin a bekah silai a chuktuah nghal a.

“Awle,” tiin ka silai chu ka paih a, “Formula chu,” a tih chuan, “Ka neilo,” ka ti hmak. Mahse ka chhanna vang chuan a lungawilo tih hriat takin Msi bekah chuan a silai chuan a chhu a, a samah bawk man leh in, “Lalrengpui, tunah kha thil kha min pe rawh,” a ti vin nghal tuar. Msi beka thisen luang zai zai chu melhin, “A ṭha alawm,” tiin ka boot sira ka thil dah chu ka phawrh a, Mike-an, “Khati daih tawh tur alawm, ka keite chet kher nghak lo khan,” tia ka lam pana a rawn kallai chuan pawnlamah silai a rawn ri a, Rsa te an rawn thleng tih ka hriat rualin Mike chu ka ban nghal zuai a, a silai leia a tlak rual chuan ka thil ken min chuh tumin min rawn bawh tlu ve nghal a, Rinzuali’n tawp rawh u, ka kap a ni mai a tih pawh kan ngaipawimawh hman tawh lo.
Kan chahbi ber a per tak daih avangin chahbi chhar tumin kan in man beh lai chuan silai a puak ṭhuai a, Mike chu a er nghal zawk, a thawh kawk a, a hnung ka dap rual chuan a lung zawnah a hnunglam aṭangin kah a ni tih ka hre nghal. Ka hawichhuak a, Rinzuali silai hmawr khu vat vat ka hmuh chuan, “Eng thil nge i tih?” ka ti vin ṭhat a, tho chhuakin ka melh ngur a, “Heng zawng zawng hi nangmah vanga thleng vek anih hi,” mit sen rama tiin, chhuata Msi tlu chu pawt tho lawp in, “Hlim taka i awmna chhan tur awm bik lo,” a tih leh rual chuan, a rawn phe zawk a, silai a puak leh nghal a, Msi rawn ṭang ve in Rinzuali a nek tlu le Rsa taksaa silai mu lut avanga a hnunga thisen rawn per chhuak ka hmuh rual chuan rang takin ka pan a, Rsa tlu tur ka dan rualin, “I thil sual tih tam tak te avangin man i ni,” Ruatpuia’n a ti ri ka hre nghal. Rsa hliam chu ka dawm a, “Rinsang, engkim a tawp tawh ania,” ka tih chuan harsa ti zet hian a rawn nui a, “Msi hi ngaidam ang che.” a rawn tih chuan, Msi lam ka hawi a, Peka’n a phuarna alo phelhsak mawlh mawlh a, “Ka hmangaih alawm,” ka tih chuan, a nui a a mit a chhin ruai ruai a, “Lalrinsang thi miah suh,” tia ka sawi chuan, rawn meng leh in, “A na ve tho lawm,” a rawn ti hluk a, a awmdan avang chuan mipa pathum te chu kan nui ta hawk hawk a.

Msi chu Rsa bulah a rawn ṭhingṭhi ve a, “Min thih tir mai la a ṭha zawk tur.” a ti sap chu, ka benga hriat hrehawm ber a ni hial ta ve ang. “Mawli, i fate velh tur ka nei dawn lo asin,” Rsa chhanna avang chuan Msi pawh a ṭah nuih hak a, Ambulance a rawn ri a, a thisen a chhuak tam hman nen, Rsa pawh damdawi in lam an panpui nghal a, Mike telin mi pathum laiin nunna an chan a, midang zawng man an ni a. Msi chu kai in motor ka dahna lamah chuan ka kalpui a, “Tunah chuan engkim a tawp ta,” ka tih chuan a lu a thing a, “Ni e, ka chhungte thattu zawng zawng chungah phuba ka la tawh alawm, i duh chuan min man tawh ta che,” tiin min melh ran a, “Dan kengkawh tu ka nih avangin i thiltih kha sual a ni, mahse ka hmangaihna che hian a ngaidam che, a chhanchu Rsa velh tur fa tam tawk min hrin sak dawn avangin.” ka tih chuan a nui ta hak hak a. “Hetiang hian i damchhung hunah nui ziah tawh ang che.” tiin ka fawp ta vawng vawng a.

Hell Project chu a tawp tak tak ta, Rinzuali man a ni a, tin, an hnathawhna engkim ti chhia in, an building zawng zawng khar a ni a, tunah chuan hman ata tawh buaina zawng zawng tih tawp a ni tawh miau a, tlem chuan hah a dam ve ta, mahse khawvel a ni miau a, sual dang tam tak a rawn chhuak leh ngei ang tih ka hria, chumi do tur chuan theihtawp kan chhuah zel pawh a ngai dawn a ni. “Rengpui, Rinzuali inpuanna record kha ka en ve hrim hrim duh,” Rsa’n a kut awrh hnuanga a tih chuan, “Um vawiinah kan en dawn nia,” tiin ka nui suk a, “I nui ve ta fo mai,” tia Station lama a lut nghal nul nul chu en in, “A dik chiah, Msi vang liau liau anih hi,” ka ti chhuak sup a.

Rinzuali kan man ni mitthlaah a rawn lang a, Interrogation room-ah khan keimah ngeiin thu ka zawt anih kha. “Engkim ka hriat a hun tawh i ti ve lo maw, nge ni a midang ka zawh tir zawk dawn che?” ka tih chuan kun chhal hian, “Kan inngaizawng ṭan aṭang khan engkim kha ruahmanna vek a ni.” tiin min rawn en a, “Ka pahrawn nen khan kan inremlo reng reng lo, kan inrem lutuk mah mah a ni, mahse ka nu khan hrechhuak in Delhi-ah khan min dah ta a, chutah chuan Lalnunpuia tuna Mike tia inhriat nen hian kan intawng ta a ni. Kan inhmangaih em em a, mahse mipa ler tak anih avangin min ti na fo bawk, a fa ka pai khan min kalsan a, tichuan keipawhin a fa ka pai tih hrilh duh biklo in ka ti tla ta a, harsatna ka paltlang laiin ka nunah ilo lang a, a tirah kha chuan i bulah khan ka hlim ve ṭhin lutuk mahse a rei a, ka pahrawn nen kan inbe reng nen Ronney-a pa nen thawh ho na kan ziak ta hial a, mahse nangmah avangin ka duh angin ka awm thei lo a, i ṭhianpa Rajiv-a nau nena kan inhmelhriat hnu khân ruahmanna siam in, sum tam tak tiamin Ravi kha ka ti lungawi ta a ni.

Tichuan ka thihna lem tur kan ruahmana, ro chungchanga buaina an neih avangin Ravi khan Rajiv kha silai takin a kap hlum a, keierawh reilo te atana lungphu ti chawl thei ka ei miau a, silai lema kah ka ni a, nang i harh lo bawk a, khatih laia min buaipui tura rawn kal Ambulance kha ka pa hrawn rawn tirh a ni bawk. Tichuan i lakah chuan mitthi ka lo ni ta a ni. Damdawi siamna hmunah nihna sang tak neiin ka awm a, pawisa a tam a, kei ka duhâm zel a, Ronney-a nen kan inneih dan tur ruahman in a pa ka ti lungawi a, Mizo hnena a fa anih avangin chhungkaw hminga ziah luh a ni ve lova, a rokhawm tu tur pawhin dah a ni ve heklo, Tichuan ka duh ang ngeiin, Apa chuan kei min neih phawt chuan, chhungkaw hminga ziah anih tur thu damdawi siamna hmun hi a pek tur thu a sawi a, a bialnu nen an innei thei bawk silo rilru na khan min nei ta a ni. Tichuan ka duh ber damdawi siamna sum tam tak lut chhuak ṭhin chu ka ta alo ni ta a ni.

Thil thar duh siam chhuah duh reng rengin ka khawsa a, Dr. Johnson-a leh Dr. Rebecca-i te khan ka duh ang siam chhuak turin theihna an nei tih ka hria, a chhanchu Anni aia thiam kha India scientist-ah hian an awm kherin ka ring lo. Ka duh ang chu an siam chhuak ngei a, test kan neih erawh engmah kha a fuh ta lova, a chhan ka zawh khan hlawh pe phawt turin min ti a, chu chuan ka thin tirimin an hmuh laiin an ṭhian an thawhpui ka kap hlum ta a, chu chu ka vau na a ni. Ka thuawi anga langin awm mahse Anni chuan ruahmanna an lo nei reng si a, tichuan kan pawl pawisa tam tak ru chhuakin an Formula tawp ber nen an tlanbo ta a, Anil Sharma hi hman ata tawh ka tham lungawi a ni a, tin, ka pahrawn, Lalneihpuii, a thih ni thleng a ka pahrawn hmei, Lalnunruati nu Lalhlimpuii, Ravi leh kei te kha Dr.Johnson- a thihnaa inhnamhnawih te kan ni, tin, Tebawihi erawh ka hnuaia thawk Malsawmdawngzuala enthla tura kan tih a ni, Dr.Robert-a pawh telin. Pawisa kan umzui khan Anil-a leh Lalnunpuia kha an lo inhre reng alo nia, tikhan chips kha a hlan a, Ani in a hming lanna zâwng zawng thai bo in Ronney-a awhnan kan pe che u anih kha. Nunpuia kha keimah ngeiin ka la lut a, Ronney-a tan, mahse ka pasal ve kha Sangpuii thih tawh hnu pawh a, khum min ṭawmpui duh tak lovah khan dahṭhat dan ka ruahmanna ka ruahman ang zelin engkim kha a thleng bawk.”

A sawi zawh chuan a hmaa ka hmuh ngai miah loh a hmaia ser thar, rin thlak tih hriat zet chu a kawk zeuh a. “Msi siam anih hi,” tiin a nui hak a, “Khati khawpa ka ngaisa a, Anu ngeiin kei min tihhlum theihnana a siam sana kha ka pe bawk a, Malsawma pawh kha ka pe alawm, a ro hle anih tak kha, mahse hemite chhungkua hi an mak khawp mai, nu leh pa fing tak an nei a, an fate pawh an bang hauh lo, hmeichhe nû tak tihchhiat awlsam tura ka ngaih khan min bei let ngam ta kha ania, Rouge min man tura a rawn tir kha a tihsual lian ber a ni hial ang.” tiin a nui lui sak a. “A phuba lakna a tih tawp hma in keiin thaw leh tawh ngailo tura siam ka duh laiin nang kar chhuah nan che hman a duh zawk tlat avangin Nunpuia thu ka lo zawm kha ania, mahse lo zawm lo ila, vawiin niah hian Nunpuia nilo in Malsawmsangi kha a ti zawk ngei ang, khati taka thih hlau lo khan a chhungte leh Sangpuii a ngai viau pawh a ni mahna.”

“Vanlal i ngaihtuah zawm a mi, keichu ka peih tawh lo, Lokal ru thil ei ang u,” Rsa’n ka dara beng dawta a tih chuan, laptop lam chu ka melh a, an lo khup daih tawh tih ka hmuh chuan, Rsa te chhuak chu dingin ka zui ve ta nghal a. Engkim a fel tawh a, ka chhungte an rawn let tawh a, Mimi-i pawh an inah a let tawh bawk a, Msi erawh Rsa bula awm a duh zawk avangin a awm rih a, Inneih erawh a hla lo. Msi duh angin Durtlanga an in chu a siam ṭha vek a, tin, Malsawmtluanga chhungte pawisa tam tak a pe tih pawh ka hriatpui thlap. A pawisa pawh engtianga tih tur nge hrelo mahse bank a dah mai a finthlak ka tih avangin khawih miah lovin a la dah thlap chu ania. Karleh maia innei tur kan nih avangin Delhi lamah pawh chawlh ka la a, ka haw lamah erawh Mumbai-ah ka cham a, mi hausa te’n an thil hlu dahkhawmna bank-ah ngei chuan kalin Msi hnen aṭanga ka lak tak chahbi chu ka pe a, pindan pakhatah min kalpui in, banga thil dahna tam tak zawna pakhat chu a kawk a, chu chahbi chu chahbi alo ni ngei e. Box pakhat pawrhin a chhung ka hawng chuan, lehkha pahnih alo awm a, pakhat zawk chu Formula chu a ni ngei e, pakhat erawh thu a inziak a,

“THIHNA KAWNGKHAR chu zau takin a inhawng a, chutah chuan mi tam tak an lut ṭhin, mahse keichu Hremhmun fapa ka ni a, chu hmun aṭang chuan rawn chhuakin thihna kawngkhar a midang te nawr liam tura Ruat lawk ka ni, he ka taksa hi khawvelah awm tawhlo mahse ka thlarau erawh a awm reng a, ti chhe tu ni turin.”

A thuziak chu a awmzia hrelo mah ila, Malsawma’n Thihna Kawngkhar tih a hman laia a mitmeng danglam ṭhin kha ka hrechhuak a, Msi pawh kha vawikhat tak tak khatiang khan a awm anih kha, dawi thil chu a ni takzet em, nge ni a Anni chhungkua hi a bika duan chu an lo ni takzet zawk..

A TAWP TA..

Leave a Reply