You are currently viewing THUP HLEN TUR
Oplus_0

THUP HLEN TUR

Spread the love

BY : Vanlalpeki Fanai

‘’ Thusawi reng reng zawm țha duh si lo. Mahni thu thu a khawsak ka tum e te hi itia, kum naupang te si hian I zahpuiawm reuh ê mai’’ ti hmuar hmuarin ka nu chuan min hau leh tawh a. Tuk tin hian min hau a, zing chhun tlaiin min hau awllo a, mahse, inhauh hi ngaia neih harsa ka tiin, ka thiamloh vek zawk ni thin mahse ka titau ngei ngei zel. Ka titau let ngei ngei thin. Tunah pawh hian ti tura min tih thawmhnaw bal suk leh pindan tihfai chu ti peih lo in phone ka khawihsan a, ka la mu dar dar lai min rawn hmuh chuan min hrawk zui hrepin tihian darkar chuang dawn chu keimah min hauhnan hun a hmang leh tawh a nih hi.

‘’ Awi! I ninawm ve e.. ka ning tlat. Englaipawh a mi hauh tur emaw han tih, hauh tur hrim hrima piang te hi ka nih hmel zawk thin’’ ti ve zat zatin, amah ka nu bawk chuan

‘’ Aw. Hauh ngai lova khawsak te hi tum ve la, nula ini tawh a, nula fel tak ang te hian nung ve ta si che. Tichuan kan hau fo lo mai dawn che alawm’’ a rawn tih leh chuan chhang peih tawh lo in in chhung chu ka chhuahsan a, ka tih ve theih tawk kawngkhar te chu na zet hian khar zuiin ka chhuak tau nghawng nghawng.

Pawnah chuan tihtur em em hre lo hian ka tei ka tei a, tuallaia lungte awm te chu na zet zet hian ka han chhir pah leh zawk zel bawk a. a hnuah phei chuan tihtur dang hre thlawt hek lo, kan thenawm lawka thingpui dawr tereuhte an siamah chuan lut ve thawrin, thingpui ka chah a, reivaklo hnuah patling pakhat, khabehmul zuah buk ve deuh leh mitmeng rum zet si hi ka bulah chiah chuan rawn thu thla ve in,kei chuan ka lo melh deuh zawk. Ani thung chuan melh pawh min lo hian a chanchinbu ken lai chu a bih chhunzawm nghal mual mual a, a palianin a fai vung roh bawk si, engvanga a khabehmul chu zuah buk tlat nge maw a nih le, tih mai mai chu ka lo ngaihtuah lehpek. Chutah, chiang zeta min rawn melh thutin a nui zui suk a, ka mit chu ka lasawn rang ngei mai. Eng thumah sawi ta lem lo chuan  a chanchinbu bawk chu bih lehin, keipawhin ka thingpui chah lo thleng chu a na thei ang ber hian ka han dawt ri deuh hraih bawk a, ka hmaa thu pa bawk kha  a rawn nui leh ta vur vur mai. Chang deuh hleka,

‘’ Eng nge’’ ka han tih chuan a chanchinbu chhiar lai chu dahin a rawn hawi chhuak ta a. A coffee chah chu muangchanga lem ve leh te te phawtin,

‘’ Lungawi loh rukna I neih a nih ka ring’’ rawn ti ringawtin, a risk huai lutuk cu ka ngaih dan alo ni lo nasa. 

‘’ I buaina turah chiah buai rawh’’ ti let hlakin ka thingpui bawk chu ka in leh miah miah a, a mitmeng rum zeta min la en reng chung khan  a khat twk hian a kiai leh suk suk thin.

‘’ Buai hi ka peih lo. A hahthlak’’ a rawn ti leh hram nia. Patling nghal tak a nih dawn hi a. ka theihtawpa ruma va melh chung chuan

‘’ Awi! I â deuh mi’’ lo ti ve in, a hma aia nasa mah khan alo nui leh mai a. a chanchinbu te pawh chu a thlep tha zui mawlh mawlh bawk. 

‘’ Um, patling buai leh a ve tawh tak ka ni e. ka kalsan phawt ang che aw, kan la inhmu leh dawn nia, I bula awm pawh a nuam e’’ ti zung zungin min thawhsan a, bill a pek zawh hnuah dawr chu chhuahsanin, keiin a kal liam tur chu uluk fe hian ka lo thlir ve vang vang bawk. Che maksak ve hle mai a. kan vawikhat inhmuhna chauh a ni lehnghal a, min la nel em em zui. A zakthei lo ve ngawt ang, ti rilru bawrh bawrh chung chuan ka thingpui chu ka in zo va, ka chhuak zui ve nghal. 

In chhung lut peih tak tak si lo chuan tual velah ka thep kual ka thep kual a, ka hne hluah hluah. Fanu nilo in fapaah te lo piang zawk ila tih chu ngaihtuahin ka ner deuh sak sak reng a. ka tihtur hrelo leh haw peih bawk si lo chuan ka thian pakhat Becky phone in a scooty a min rawn hruai tur chuan ka va ti leh ringawt a, peih lo hle mahse he nu hi chuan ka thu hi a hnial ngai loh avangin phun hlak hlak chung cuan min rawn hruai leh ta nge nge. Ka hmel a hmuh rual rual hian la tum bar bar chungin,

‘’ Rawn chuang rawh. Ninawm lutuk mai ka mutchhuah tehreng nen’’ ti hlak hlak reng mahse kei chuan nui var var chungin ka lo en ve thung a, chhang let lem lo in ka chuang zui ve mai bawk. An in kan thlen rual chuan nidang pawha kan lo tih fo thin danin a roomah kan lut nghal nal nal a, khumah chuan ka let thla zui nghal tawp bawk. Rei pawh mu lo in ka tho leh vat a, ka kekawr ipte chu zen deuh rak rakin meizial ka phawrh ta zal zal mai.

‘’ Duh ve em’’ ti sapin Becky chu ka va melh a, a lu alo thing deuh nawk nawk. A titau rei lo leh ang chu aw. Tihian a hah a han dam deuh a nga ninawm khawpin min rawn be leh mai ang tih chu ka ngaihtuah neuh neuh a mahni in ka khi ta vur vur. 

‘’ Eng nge khatia I nuih vur vur a’’ a rawn ti țan e. min melhrum dan atang hian a lungawi țan tih ka hria, ka hlau lo ve chiang e. 

Meizial ka pak hlat hlat lai chuan ka bulah rawn thu thla zui thlarhin, a phone a rawn lek chhuak nghal vat a. Thlalak pakhat hi min rawn entir zui zat

‘’ Hei, he pa hi a nia I number min rawn dil tu chu . A chhelo asin aw. A pangngai lutuk’’ ti nghal zung zungin ani chu ka lo mit sir ve ralh ralh a, zial pawh kha ka la pet khu vang vang reng tho.

‘’ A takah ka hmu ve tawh em’’ lo ti let sapin, ka la ngai pawimawh lo angreng viau. Bialpa tih vel hi e, min ti na tu tur mai mai an nih ai chuan neih loh vang vag a len tar țhak pawh ka duh zawk e. 

‘’ Aw I hmu tawh ang. Kan chawlh ziahna café neitute fapa kha a nia. Amah pawh a hmu tawh che chuan I hmu ve tawh dawn lutuk. I number chu ka pe dawn aw. Duh ve rawh, I single rei tawh rapthlak si. Chubakah, hei chu I duh vak loh pawn money chhass atan I hmang thei dawn asin’’ rawn ti leh zat zatin, ngaihsam zet hian ka lu ka lo bu ve nghat nghat ringawt a. Ho ka tih zawng tak.

‘’ Awmpui, lo ding lawk. Iva tlan chak ve’’ hnunglam atanga rawn ti lung lung thawmah chuan dingin ka hawi let vat a. Thingpui dawr chhunga patling mengrum deuh ka hmuh kha alo ni leh tih ka va hmuh chuan ka țhen deuh sak.

‘’ Tu in nge ka hming kha hrilh che a’’ thawk lak halh paha ka han tih chuan ka sir maiah rawn ding ve in, a thaw zui ta halh halh bawk. 

‘’ Thingpui dawr kha zing tina ka len luhna a nia. A harsa lo’’ a lo ti ve mai a. ka melh zui deuh nghek. Patling nghal tak leh awm mai mai lo tak chu a nih dwn hi ka ti.

‘’ A thuhrimin exer laknaah te camera I rawn keng chhuak a, engatan nge itih’’ tih pahin a nghawnga a bah hnawk nuai camera chu ka lo melh pah leh zuk bawk a, ani pawh a lo kiai ve leh sak mai.

‘’ Hei hi maw, nia, thla ka la ve thin a. A bikin ram nalh tak tak te leh nungchate thla laksak hi nuam ka ti zual’’ alo tih chuan ka lu chu ka lo bu zui ve nghat nghat a, chhan ngaihna vak pawh ka hre tawh lo. Chutiang chuan a thlalak dan chungchang te sawiin a hming pawh ka zawt bawk a, tlan pah chuan a remchang lai lai te chu a camera chuan a tin pah leh zeuh zeuh thin bawk. Tin , a hming pawwh kha ka bialpa hlui neih ve chhun Nunsanga hming nen alo inang chiah bawk a, mahse, an pianphung leh engkim mai erawh hi chu a danglam hlang hlak a tih theih thung si. 

Khami ni atang khan ka hmelhriat thar pa Sanga nen chuan kan inhmu ngun sawt nimai hian ka hriaa, thenawm thingpui dawra ka hmuh fuh loh leh, khwi emaw han tei chhuahna velah hian a camera nena a teikual lai hi hmuh tur a awm leh nulh nulh thin. A nun dan pawnlang tak hmuh theih chin ringawt pawh hi a tlawmin a zangkhai ru riau ka lo ti a, a awlsam hmel viau bakah ka hmuh ngun tak hnu phei hi chuan a nun chu engemaw ti zwng takin awhawm tih rukna riau ka neih phah ta tlat. Ka sawi thiam chiah lo. Kan neih ve loh nun duhawm leh hlimawm ru riau hi a nei bik tlat a ni. A bula khawsak vang vang te hi a chakawm duh zawk hial.

‘’ Pa Sang’’ ti lauh lauhin thingpui dawr atanga a rawn chhuak chiah chu kei ka lut ve tur chuan lo hmu fuhin midang pawh ka zah zo tawh lo, ka ko ta nghek mai a nih kha. A rawn hawi rang em em mai lehnghal.

‘’ Pa Sang te min tih. Ka fate pawh kum naupang te te chuah an la nia, ah, nupui hi ka nei har hrim hrim a’’ nui huk huk chunga alo tih chuan kei chu ka lo che zui ve dawt thei.

‘’ Nupui inei tawh maw. Tlangval lengrei ve mai mai turah ka lo ngai che a’’ ti zui niah niahin, chu chu ka ngaih dan diktak pawh a ni chiah reng a ni.

‘’ Ni bikk love. Mahse, kan inthenna hi a rei leh tawh angreng a, ka nei leh tawh lo zawk a nih chu’’ a nui zui leh hak hak bawk. A hminga mawi tur tawk lekin keipawh ka lo kiai ve sak sak ringawt a. chumi țum chuan inbe rei lem loin dawrah ka luhsan a, ani pawhin hna a neih thu sawiin min kalsan ta bawk. Mak ka ti. Ka pa rual zet hmuhin ka hmu a, chutianga chhelo han tih em emna pawh ka nei hran chuang lo mahse, a pianphung leh mitmeng te erawh kha chu mipa tia chhiar loh ngam chi an ni hauh chuang si lo. Pa ve tawk tak a ni. Chu zawng ai chuan engvanga vei zui tlat nge maw ka nih le tih lai hi ka hrethiam thei lo ta ber a nih hi. Zan mutnaah nise ka mitthlaah hian amah kha rawn lan loh lai a awm lova, eng hun leh eng darkar ah pawh a hmel, a che zia leh a engkim mai te kha ka mitthlaah hian an rawn lang zut zut a ni ber mai. Ka ta tur anga ka suangtuah chang te chuan ka lai chhe leh vak zel a, engtin nge a tih kha, nupui fanau nei tawh niin tun dinhmunah erawh a pathlawi mek a nih tak kha. Lo inngaizawng ta tehreng pawh ni ila ka dinhmun hi a derthawng dawn lutuk a ka ngaingam chiah bawk si lo. Engtin nge ka tih ang. Engtin nge he ka ngaihtuahna leh lu bur chhung atang hian ka paih bo daih theih ang. Ava hrehawm duh ngat ngat tak aw. Chutihlaiin lehlamah lah Becky khan tlangval pakhat hi min tihpui alo tum ve char char bawk a, ka rilru hi an chawk buai phir kual zo vek tawh.

‘’Awmpuii ini em aw’’ ka whatsaap message dawn thar ka han en chuan number hriat ngai loh atang hian  alo ni a. Reply mai lo in ka en deuh vang vang phawt. Lawkin, a dp chu. Becky hnena ka number lo dil ngat ngat tu kha a ni tih ka hrechhuak leh hnuhnawh a, Lalrebecki mai mai chu le. Bialpa neih hi ka peih lo ti mawlh mwlh a, a timak hram hram e. Tun dinhmunah phei chuan amah kha, a,, ka sawitam peih lo zawk. Ka ngaihtuah a a hmel ka hmuh tam pauh leh ka vei tual tual zel bawk si, a hrehawm thei m mai. Kha pa kha chu ka tana ruat a ni ve thei dawn lova, ka theihnghilh hi a tha zawk. A nih chuan amah pumpelh a theihnghilh theihnan he pa, tuna min rawn betu ngei mai hi ka lo biak that ve mai chu a pawi dawn emni le, heiham! 

‘’ Dintluanga khan alo bia che em’’ Becki’n a rawn tih chuan meizial phawrhin ka han țan hmasa leh te te phawt a. ka pak khuk tulh tulh hnuah zawite hian

‘’ Bia e’’ ka ti nghut.

‘’ Chu ilo be tha ve em. A duh ve hmel tehmai che nia aw. A sawi ngun lutuk che a ka ningve tawh em a ni’’ rawn ti lehnghal zatin, kei lah chuan awlsam fe hian

‘’ Ho lutuk. Meizial leina man ka neih chhung chuan a tawk mai’’ lo ti awlsam leh etin, ani chuan mitko san ak chung hian

‘’ Lehkhathiam lo pawh ini lova, I duh phawt chuan air hostess tur pawh khan I inziak tling thei reng mawle. I duh lo zel a’’ rawn ti leh bai baiin, kei erawh ka lo ner deuh sak sak thung.

‘’ Air hostess ka nih daih te chuan meizial ka zu thei tawh nang’’ lo ti ve in,

‘’ Thei e, hnathawh loh hunah I zu thei lutuk ang’’

“” aih. Nungchang chu thuhran, taksa enkawl uluk a ngaih hmel em mai ka peih teuh lo. Chubakah, ka pa hian min ngai a min duat bawk a, ka kalbo daih te chu a phal dawn teuhlo mai’’ lo ti let ve zat zatin min chhang tawh lem lova. Keipawhin tui ti zet hian zai rat rat chungin ka zial zuk lai chu ka lo fawp leh vang vang tawh.

***************

‘’ Kan inbe ve fo tawh sia, inhmu ve tawh em em ila’’ ka tlangval biak Dintluanga bawk kha lo ni lehin, ani nen hian kan inbiakna pawh thla khat chuang lai chu lo tling ve leh tawh mahse, kan la inhmu hauh lo mai aa, ti ila, ani hi chuan min hmu tawh thung a nih hmel. A hmingin ka biaa, a hming taktakin ka be tha ve a ni ber mai e.

‘’ Nia, kan tum dawn nia. Mahse khawiah’’ tia ka lo chhan let chuan phur em em mai hian

‘’ Café-ah. Ka rawn hruai ang che’’ ti nghal zatin lo insiam tur chuan min ti bawk a. ka thawmhnaw bawm te pawh chu zawi em em chung hian ka han hai zui ve tak na a, ka hai darh vek. A tawpah chuan hak tur ber hre tawh hek lo le, kekawr thawl tha hnek hnawk tak hi la chhuakin crop ka ha leh a, pheikhawk pum inthawlh zui leh thawkin ka sam chu sang takah ka țawn zui vah bawk. Dintluanga pawh chu lo thleng zui ve vatin an café-ah min luhpui a, rin loh tak hian a chhungte ho chu an lo la awm kim țhap zui. Heng hi a ruahman lawk a nih si te chuan min hrilh hmasak ve tur a nia, ka inthuam dan te lah hi a zahawm loh angreng bawk si. Min tizak reuh hle mai. A chhungte ho bulah chuan inhmelhriattirna te min nei leh zung zungin an ni ho pawh chuan hlim hmel pu sang chung hian min lo dawngsawng hlawm bawk a. chutah, Dintluanga chuan

‘’ Khawnge ka patea hi. Lo kal ve tur khan ka hrilh lawk sa thlap sia’’ a han tih leh he haw phawt a. mahse, a sawi zawh rual deuhthaw in pawnlam atang chuan tuemaw hi a rawn au lut ta lung lung mai.

‘’ Hello ka fapa. Inhmuh ava han khat thin ve tiraw’’  aw lo chhuahna lam hawia ka han inher ve nak chuan pa Sanga kha alo ni daih nia mawle! Eng nge thil awmzia. Pa Sanga hi Dintluanga patea chu a ni tihna emni? Thilmak leh awm ang lo lutuk a ni. Thildang reng reng ngaihtuah lo in pa Sanga hmel leh che zia ringawt mai chu ngawi reng hian ka lo thlirta veng veng mai a, Dintluanga min koh lawm lawmna pawh hre lo lekin ka lo khawsa a nih tehreng chu.

‘’ Awmawm, hei, I tha em?’’ min ti mawlh mawlhin ka hmai zawnah te chuan a kut alo zap vak vak bawk a. ka harh zui zawk thei. Ka han hawi kual leh nak chuan an vai mai khan mak tih hmel em em hian min lo thlir thap hlawm a, chutah pa Sanga lah chuan la nui deuh vur vur chung hian

‘’ Awmpuii kha ini tiraw?’’ min la rawn ti tak deuh deuh. Ka lai kual vel vek tawh hi a ni ber e. 

‘’ Pate, Awmi nen hian in inhria maw?’’ Dintluanga lah chuan mak tih hmel deuha rawn ti ve in, kei chuan sawi ber tur pawh ka hre tawh lo. Ka hawi deuh lawl lawl ringawt tawh.

‘’ Hria chu a ni ve tawh mai. Ka chawlh thinna dawr pakhatah hian kan inhmu thin a. E khai! Nangni pahnih inkawp tur chu in hmuhnawmin, in inhmeh dawn khawp mai ka fapa’’ a tih leh lek phei chuan haw nghal daih mai ka duh tawh a. diktaka sawi chuan Dintluanga nen hian inngaizawng tia sawitur chiah pawh kan la ni lova, engvangin nge hetiang hian a chhungte bulah pawh min hruai tih ka hrethiam bawk hek lo. Tlan haw nghal nal nal mai chu ka duh a ni.

Vanneihthlak deuhin café-ah chuan hun rei pawh kan awm lova, Dintluanga chuan kalpui duhna min nei anga a insawi miau avangin chulam pan chuan kan inzui chhuak dun leh ta zawk a ni.

‘’ Hrehawm iti em?’’ a rawn tih chuan ka lu chu lo thing ve bawk mah ila, a rukin nuam lo ka tihna a rei tawh a, meizial zuk te pawh ka chak leh et et tawh zawk. Ka za vek thei. Tichuan, in lian tak pakhat kawtah a motor chu ti dingin kan chhuk a, a chhung kan han luh chuan keimahni ang rual vel tur hmeichhia leh mipa chhelo leh changkan hmel tak tak te hi lo phusa deuh nuai nuaiin kan hmel an rawn hmuh rual chuan an thawm a na zual sawt emaw tih mai tur, an ri zui hluai mai.

‘’ Aw haw! Changtupa te an lo thleng e. party chu kan țan thei ta’’ ti hluaiin pakhat chuan min rawn chibai zui nghal mawlh mawlh lehnghal a, chu zawng ai chuan hmeichhe thenkhat zial pet khu vang vanga thu ho mawlh mai chuan ka mit an la leh tawh nasa. Ka dil ve chawt dwn emaw ni tih ngaihtuah a ka lo din ngawih vang vang lai chuan Dintluanga khan min rawn kaisawn thut a, a thiante ho hmaah chuan inhmelhriattirna min han neihpui leh te te phawt. Awi! Inhmelhriattir reng rengin vawiin nileng hun chu ka hmang ral dawn a nih ber hi a. ka hne lutuk.

Ka kut chu chelhin a bulah min thut tir tlat a, sawitur ka hre ve mang bawk si lo ngawi rengin an hmel chu ka lo thlir kual ve a, he hmunah hian ka duh lo chung chung a khung beh ang mai niin ka inhria. Ka tawt vek. A tawpah phei chuan tumah pawh hmaizah duh tawh biklo in hmeichhe pakhat zial zuk lai chu zuk ve va dilin ka thutchilh nghal a. Dintluanga khan mak min lo ti viau dawn emaw tih laiin min ngaihsak awm pawhin a awm hauh lova, a thian pakhat nen chuan an lo inbe tui vel bawk nen, ka awm leh awm loh pawh chu a ngaihven pawhin ka hre hek lo.

Duhthawh zetin meizial ngei mai chu ka han hip vang vang a, ava han tui chiang tak.

‘’ Dintluanga nen hian in inzuina a rei tawh em’’ meizial min pe tu nu khan rawn tiin, ka lu chu ka lo thing zui nawk nawk. Chutah, chu nu bawk chuan ka beng bul seta rawn kun hnaih pah hian

‘’ Kan piah chiaha thu, kawrfual ha nu hi a bialnu hlui a nih hi. A thikthu chhe thei raps’’rawn ti sur surin  a sawina lam chu ka han hawi ve vat a, a mi sawi pawh chu va hmu nghalin ani pawn min rawn melh ve ta chiah. Kei aia a chhiat lohna leh hmelthat fal bikna pawh ka hre lo ve. Tun ang laiah sum leh pai a awm phawt chuan a hmelchhiat theih tak tak tawh loh. Chutihlaiin kei thung hi chuan make-up leh thuamhnaw nalh tih  vel ai mahin meizial ka thlang a, nghei hlen hi ka hlau vet vet em.

In ka thlen leh meuh chuan khua pawh chu lo thim deuh chhulh tawhin, in chhung ka luh rual rual hian ka nu lah chuan vin zetin,

‘’ Dar zat I en thiam em?tlangval emaw hi I inti reuh a, inah reng reng tawm thei lo mai. Ka kham riau’’  ti bawrh bawrhin hmun te chu a hawl fai leh zung zung bawk a,ner sawk chungin ka kalsan nghal daih.

Khum chunga mu zal dar dar chungin  thil thui tak ka han ngaihtuah kual a. Dintuanga hi ka duh tak tak em. A khawsak a sangin thian nise a ngah nasa mai si. Chutihrualin kei ve erawh hi chuan thian tih tham tu vakmah ka nei lo thung a. ka neihchhun tlemte te erawh hi chu ka hmangaihin ka thlahthlam ngai hauh lo. Kan duhzawng leh khawsak phung, kan nungchang engkim mai hi a inpersan in kan mizia a inhmu lo nasa mai si a, ngaihzawng atan hian ka duh tak tak a ngem. Tun maiah hi chuan a chhanna la nei lo mah ila hun rei erawh kan inkawp rem theih ka ring chuang lo a ni. Thil ka hre chhuak leh ta zawk. Pa Sanga kha. He pa hi ka rilruah a thi thei miah lova, ka ngai leh veng veng zel bawk. Diktaka sawi chuan tunah pawh hian a bula awm ka chak a, Dintluanga hnenah a patea number chu va dilin thil engemaw zawh lawk ka duh thu ka chhuanlam nghal bawk. Ani pawh chuan min rinhlelhna awm miah lo hian min lo pe ve mai bawk a, lawm tak ka ni.

Tichuan, pa sanga number chu rei pawh rial thei lo in ka hmet chhuak zui a, ka va text ta ringawt. Thinphu dup dup chung hian ka thawn chhuah tak message bawk chu ka han en nawn leh thin a, rinai takin alo seen har ve bawk nen, ka inthiamlo deuh chuan delete te ka han tum leh ut ut thin. Mahse, chutia a message tur ena ka lo thut chawrh chawrh lai chuan rawn seen ve ta hramin, min reply nghal bawk. 

‘’ Tu nge aw?’’  Ni dawn tak! Ka insawi reng reng hleinem. Ka dp ah lah khan zawhte dum lanna chiah ka la hmang zui a. mawli zet hi chu!

‘’ Keimah Lalawmpuii kha’’ va ti lehin, sticker hmang hian min rawn chhang let a, a hnuah,

‘’ Iva fel em em ve’’ rawn ti lehin ka kiai ve sak. 

‘’ Kan inhmu khat sia ka rawn be ve mai mai che’’ ka tih leh chuan nui lai emoji rawn dah tel teuh chung hian

‘’ Hmu khat emni? Chhunah pawh café-ah kan inhmuh kha’’ a rawn ti! Kei hi chu aw. Mahse, chhuanlamah chuan

‘’ nia, a hma anga pangngai deuha inhmuh ang chi kha mawle’’ ka ti ta ringawt. Ka chesual palh teuh thei khawp mai.

Chumi zan chuan rei pawh inbe ta lo in, muttui tia min thlah hnu atang khan amah chu ka ngai nghal em em lehnghal a, mut pawh ka muhil lawk thei lo zawk nghe nghe. Zahthlak hian.

Zingah pawh hma lutuk takah tho in thenawm thingpui dawrah bawk khan ka va kal leh ta nal nal mai a, ka kal chhan tak hi chu ka riltam vang lam ni lo in, amah vang zwk kha a ni chiang alawm. Tichuan, ka duhthusam ang takin rei pawh ka thut hma chuan amah ngei mai chu a rawn lut leh ta zan zan mai a, a chunga hetiang rilru ka put chhoh tak vang hi nge chu hre hauh lo mah ila, a hma ai mah khan ka hmu chhelo in ka hmu thar deuh vuk bawk a, ka en deuh ngawih ngawih reng hi a ni ber e. min rawn hmuh rual chuan ka bulah rawn thu thla ve nghalin

‘’ Tho hma ve a’’ a rawn ti deuh sup a. A aw te thleng mai hian nalh ka ti tharin ka vei em em vek tawh vchu a nih hi. A hahthlak ka ti. 

‘’ Tukin chu alarm te ka set ve a. Tuktin mai thawh tlai pawh chhungte lakah mark a tha theilo’’ lo ti let duahin ani chu a lo nui zui ve huk huk. A hmuihmul hi ziat fai se chu tun ai mah hian a lang felfai leh zual a nga, pa hmelchhe lo tak tur pawh a nih ngei ka ring. Mahse, heti chung pawh hian a inhmeh em em a, ka duh loh phah chuang si lo.

‘’ I thingpui kha in tawh rawh, a dai ang’’ a rawn tih leh chuan thingpui in tura kal ka ni tih ka inhrechhuak leh chiah a, ka harh zawk nimai hian ka hria. Lai deuh țut chunga,

‘’ Awle’’ tih leh thingpui no lak chu ka rual a, chiang zet hian min lo la en ve reng zui. Ka țim zui sawk thei.

Dawr atanga kan chhuah hnu pawh chuan kal hrang nghal mai lo in pawnah kan han ding dun leh te te phawt a, amah bawk chuan chiang em ema min lo la melh reng chung hian

‘’ Remchangah ka inah te pawh ila rawn leng ve a nga, ka hnathawh te pawh min enpui ve ang chu tiraw?’’ a rawn tih chuan kal nghal rum rum mai ka duh hial. Mahse, insik ru nawk nawkin ka insum a, a mawi thei tur ang bera ka hriat chuan ka han nui ve ta sen sen zawk a nih kha. Ka la kal ngei tur thu hrilh ve in kan inthen hrang leh ta. A kalsawn ruala ruak huai ni a ka inhriatna te, ka ngaih veng veng reng na te hi tih reh dan ka hre lo. Hei hi hmangaihna nge duhna satliah ni zawk ang tih pawh ka hrethiam tawh lo. Ka duh tih erawh chu chiang takin phat rual loh hian ka hre thung bawk si. Hmalak dan ka hriat loh bakah ani khan kei hi min vei ve em tih takngial pawh ka hre lo nia. Heiham, khawvel hi rilru hahna tur hlir alo nih phiangsen dawn hi a!

‘’ Dintluanga nen chuan in ni ve tak tak tawh em. Duh ve ngei ngei rawh ka tih che kha aw’’ Becky’n a rawn tih chuan  thaw ipil tih hriat zet hian ka lo thaw chhuak deuh halh. He nu hian ka rilru puthmang pakhat te mah hi a hre ve der silova aw.

‘’ Nge, khatia rilru hah hmel deuha I thawk huai a. hmeichhia ang te hian nung ve la tih hi ka duhpui che a nih hi. Fanu neihchhun inia, I khawsak danah erawh tlangval awmtha duh lo ang hlauh ini thung’’ leh zek zel chuan aw.

‘’ Dintluanga hi ka duh theih ka ring lo. A khawsak a sang si, mi khawsak sang satliah lutuk hi ka mil rei ve thei lo. Thiani, kei chu min hriatchian em kha aw. Tihian hniam tak leh holam deuh, hmuhsit wm ni silo hian nung ve mai mai ila a awlsam ka ti ber, ka hahdam phah zawk bawk’’  amah melh ralh paha ka han tih chuan alo ner deuh nang nang tawh a.

‘’A khawsak a san leh iti sang chho ve mai dawn alawm. Sum leh pai nei lo pawh in ni bik lova, tuna I lan dan ah kha chuan mahni anpui kawp hreh lo te pawh I ang zawk alawm le. Nula ang hian nung ve rawh’’ a rawn tih leh chuan ka lo nui deuh har har tawh a.

‘’ Kum 20 em pawh ka la tlin loh hi. Nula angin ka awm peih lo. Ka patil loh chuan a tawk. Dam chhung tawiteah mahni nuam tih dan a awm theih hi a hlu ber’’ ka lo ti let ve leh zat zat mai chu min chhang peih tawh lo in a kalsawn nghal daih.

A ni telin pa Sanga ka duhna chu a zual tial tial a, a hmel ka hmuh tam poh leh amah ka ngaihna te lah chu an lo pung ve thur thur zel bawk si. Rilru hi a tibuai chhiava a ni. 

Ni khat pawh ka tihtur hre lo leh tihtur ti peih bawk si lo chu pawnah tei chhuak nulhin, phone ka phawrh a, Becky bawk chu ka va call leh ta. Vin zet hian,

‘’ Eng nge? Ka peih lo’’ raw ti nghal ringawtin kei chuan thluak vawrh a hun tih ka hriaa, nui har har chung hian

‘’ Dintluanga bulah min va hruai lawk la’’  chutia ka han tih takah chuan phur em emin chawp leh chilh hian a mood a rawn inthlak danglam nghal vek thei a, alo kal nghal tur thu pawh a sawi leh ta zat zat mai. Ka koh chhuah chhan diktak hi chu hria se chuan a rawn kallo nasa viau ang mawle.

‘’ Khawnge Dina chuan alo nghah che a. Ti nge a motor khan I inhruai tir mai loh’’

‘’ A motor ke a puak! Kal vat ang’’ ti zung zungin a hnungah chuan ka lawn kai nghal vat a. Ani pawh chuan min hnial tawh lo in ka sawina lam chu a pan ve ta mai.

Hnunglam rawn hawi zawk zawk pah a,

‘’ Khaw nge ka dinna tur chu. Ka tlanpel tawh em’’ a rawn tih tak tuarh tuarh ah chuan kan tlan pel tep tih hrechhuakin ka au zui țhat țhat mai. Ani pawh chuan a break ri zui nghal tuarh thei. 

‘’ Ilo lut ve dawn em,ka rei maithei’’ ka han tih chuan rang zet hian,

‘’ Lut ve zuai ang ka zun a chhuak tawh lutuk’’ tih pahin in chhungah chuan kan tlanlut nghal ta vat a. 

‘’ Lal pa sang, kan lo leng dawn I awm em?’’ zahtheih loh chhuah in ka ti lut ham ham. Chutah, pa Sanga pawh chuan phawk zeta min rawn melh ve chung hian

‘’ Ehe! Awmtei te ni reng chuan, lo leng rawh u. Lo thu r’u’’ rawn ti nghal sawk swkin a thil tih lai te chu a dah fel sawk sawk a, kan bulah chuan a rawn thu thla ve nghal vat bawk.

‘’ Khawilam thli chhia in nge rawn chhem lut ve tehmiah che u’’ a rawn tih leh laiin ka bula thu Rebecki lah khan ka beng bulah zawite hian

‘’ Khawnge Dina chu’’ alo ti ve sek reng a, ka nin lutukna lamah vin zet hian

‘’ Va zung rawh, I zun a chhuak a ni lawm ni?’’ lo ti let daihin ani pawh chu a meng zau nghal kawk mai.

‘’ E, in zun a chhuak maw. Helamah hian inthiarna chu a awm kha’’ Pa Sanga chuan bathroom awmna lam kawh zeuh zeuh pah hian a rawn ti ve nghal a, Becky pawh chu hrilhhai zeta tho chhuakin bathroom lamah chuan ngawi reng hian a kal zui ve ta hnak hnak.

‘’ keini in angah te in rawn leng lut ve duh tak tak a, in tilawmawm hle mai’’ a rawn tih chuan a tha thei ang bera awm tum chungin ka lo nui sen sen reng a, ka nui hmel mawlh mai kha chhia  ti ang tih hlau in a nu thei ang ber tura ka hriat hmangin ka nui ve thin a ni.

‘’ khawnge Dintluanga chu’’ bathroom a rawn chhuahsan rual rualin Becky bawk chuan a rawn ti leh hram a, ka han melhrum zui nghek. Pa Sanga lah chuan rang em em mai hian

‘’ Dintluanga chu alo kal hauh lo mai. Class a kal leh daih te hi a nilo maw’’ ti chunga tho chhuakin,

‘’ Thingpui in ru aw’’ a rawn ti leh nghal zat a, kei leh Becky chu kan lo ngawi rneg. A hmuh loh turin kan lo inmelh rum ngat ngat a, he nu hi lo luh tir ve lo tawp ila tha tur a nia. Chhi chhe mai.

‘’ Aih kan kal tawh zawk mai ang. Ni dangah ka la rawn leng leh zawk dawn nia’’ ti sawk sawkin ka thut hmun ka thawhsan a, becky chu kaiin pawnlamah kan inzui chhuak nghal dawr dawr.

‘’ Eng nge awmzia. Hetah hian eng ti turin nge kan kal a’’ Becky bawkin lungawilo zeta a rawn tih chuan ner nang nang chung hian ka lo melh ve ngar ngar tawh. Ka thaw zui leh hak thin bawk a. He nu hnenah hian thudik hi ka sawi vek mai dawn nge, ka ngawihbopui hlen zawk ang tih ka hrethiam lo. Engpawhnise tiin a kutah chuan na zet hian ka han hmersak salh phawt a, ani erawh chu ala tum zui deuh bar bar reng mai.

‘’ Diktak chuan maw thiani, Dintluanga hi ka rilru ka pe thei tak tak lo a ni’’

‘’ Chuvang chuan maw hetah hian kan kal a? Eng nge thil awmzia’’ a rawn ti ve vat.

‘’ Nia, nichina patling I hmuh zawh tak chiah kha ka hmangaih alawm!’’ zawi sapa ka lo tih leh chuan a meng phawk zui nasa ta mai a. min beng hrep tawh dawn emaw tih laiin a scooty ngheng chuan zawimuangin a han ding tha leh te te phawt a, thil thui tak ngaihtuah ve te pawh a ang alawm le.

‘’ Nichina patling ang deuh, upat hmel zet patling uaih tawh kha I duh zawk tihna maw!’’ muang fan raiha a rawn tih leh chuan za vak lo hian ka lo kiai ve ta sak a. A chek zui hlak hlak mai.

‘’ ka duh rukna hi a rei leh tawh. Mahse, ka tilang tha ngam lova, a hriat ka hlau a hria se ka duh tho bawk si’’

‘’ Nupui nei lai a ni lo emni?’’

‘’ Aih. Fa erawh a nei’’ 

‘’ Um, theihnghilh tum rawh! Nupui nei tawh te phei hi chu e, eng ang pawn lo duh ve che pawhnise khuareiah an nupui hlui te tho tho an tih hun a thleng leh thin. Bansan daih kha tum la I hahdam hma a ni mai, fa nei tawh ala ni zui bawk sia, beiseina tisang duh suh. Kal tawh ang’’  ti leh charh charhin scooty a tinung zui a, kei chuan a thil sawi ringawt mai kha ka lo ngaihtuah ve bawk. A dik theina lai tamtak pawh a awm ang mahse, engtin nge ka rilru ngaihtuahna engkim mai hi ka thunun hneh theih tak ang le. Pathlawi pawhnise nupui fanau nei tawh a ni miau a, beisei theih turin a nupui hlui ala dam bawk. Nia, ka tan hi chuan tlangval ngei hi an tha ber ang ti rilru in insiamthat ve chu ka duh takmeuh meuh a, ka tum zui ve ta bawk a ni.

Hemi chin hi chu Pa Sanga hmuh tumin ka hun ka khawhral duh tawh lova, amah vangin alarm nise ka set duh tawh hek lo. Biak te chu chak hle thin mah ila ka insum lui ve ngar ngar reng a, a status a a fate nen an thlalak hona a rawn dah chang te hian amah bik chu uluk takin ka lo thlir ru ve thin. A ngaih zawng ka ngai chiang a ni. Mahse, ka tan hian a rem ve thei ngai dawn lova, inthiarfihlimsan mai loh chu ka tan tihtheih a tlem khawp mai. Hetih chhung zawng pawh hian Dintluanga nen khan kan la inzui ve char char tho a, rilru chu pe hleithei lo hle mah ila hun khawhral nan ka hmang tangkai hi a ni deuh ber mai. A khawsak phung ringawt thlir hi chuan engtikahmah min hneh theih ka ring lo hulhual.

‘’ Awmtei chu I dam em? I reh thin hle mai’’  karei! He pa hi engtikahmah ka bansan hlen thei pawhin ka inring lo zawk e a. Theihnghilh tumin ka bei ve ngar ngar a, tunah lah tihian amah zawkin min rawn pan leh bawk si. Theihnghilh tak tak hi ka lo la tum tawk lo tih chu ka inhre ve tho, chuti maia awlsama theihnghilh theih lah a ni bawk hek lo. A message chu en in ka hmui ka pet fan fan a, rilru insual buai tak chungin a tawpah chuan ka chhang leh ta nge nge a nih kha.

‘’Vawiin chu tlâng lampangah thla la turin ka kal dawn a, tunlai chu ka chawl ve deuh bawk nen boruak thianghlim ka va hip pah a nge’’ a rawn tih chuan tih danglamin ka awm leh tawh a, ka kal chak ve ta et et. Mahse, min sawm ve bawk siloa engtin nge ka tih ang.

‘’ I riak dawn em/’’ ti hmasa leh te tein, ani chuan reilote bak a awm dawn loh thuin min lo chhang ve leh mai a, phone chu dahin ka insiam zui ve ta sawk sawk . Zak thei ka ni lo. A kianga awm leh a, ni hman ral ve hi ka thlahlelin ka chak zek zek zawk a ni e. ka insiam zawh chuan ka mamawh tur dahna racksack chu akin ka chhuak zui vat a, a chenna lam pan chuan taxi in ka kal nghal vang vang bawk.

Kawngka chu kikin, rang tak hian in chhung atang min lo chhawn ve lauh lauh a, chuta ka hmel a han hmu thut mai chu a hrilh a hai ve in, a bangbo hle tih a hriat theih. Chhuanlamah kei chu ka lo nui zui ve var var ringawt.

‘’ Ka lo kal ve chak a. min hau suh aw’’ inthiamlo hnuhnawh zeta ka han tih chuan ani pawh chu ngaihnobei em emin alo nui ve ta var var mai.

‘’ hau lo e. sawm che kha ka tum zet a, I peih loh ka hlau deuh a’’ a ranw tih chuan thudik lo pawh sawi se ka rilru a hahdam phah tawh tho tho.

Tichuan, a insiam zawh hun chu nghakin reiloah in chu kan chhuahsan thei ta a. Bungrua kan ngah dun lo bawk nen a bullet-ah pawh chuan hnawk bawr lutuk lo in kan chuang fel dun thei mai. Tin, sakawrhmuituai tlang lam kan pan dawn a nih hmel e. ka tha za lutuk hi kawngtluanin in control ngaihna mang ka hre lo leh hial zel a, ka phur takzet zet tawh a ni. A hmun kan thlen hnuah pawh a hnungah zel kalin ka zui ve hnak hnak reng a, a khat tawka min rawn be leh thin tih loh ah chuan hah tawh nen ka tawng tha peih vak rih lo. 

‘’ Chawl lawk ang. Ilo chau lutuk a nge’’ tih paha min chawlhpui chuan kei ka lo thaw deuh hak thung a, a remchang laiah chuan thudang pawh sawi theilo hian ka thu sawp nghal nuai ringawt. Chutihrualin ani erawh chuan a camera kha phawrhin ram thla te chu a hmet kual zung zung a, hmuhnawm ti zet hian a che vel te chu ka lo en leh veng veng ringawt thin. Diktaka sawi chuan tunah hian meizial zuk chakna hlirin ka khat huam huam tawha, mahse, ka pai lo. He pa bulah ngat phei hi chuan zuk ka tum loh bakah amah vang hian zial takngial pwh ka zuk tlem phah tawh tih ka hrechhuak a, amah ah danglamna thlen ve dawn lem lo mah ila kei ka danglam phah thung a, a tha ve reng reng ka ti. A bulah hi chuan mipa mizia ka put thin te pawh kha tih lan vak hi ka hreh thin em em a, hmeichhe diktak anga khawsak ve pawh ka tum nasa. Hrethiam ve tak ang maw.

‘’ Nui rawh le’’ a rawn tih thut takah chuan ka suangtuahna khawvel ata harhchhuak zawkin amah chu ka han melh vat a, camera nen khan kei chu chiang em em hian min lo tin vang vang tawh chu niin. Rilru pawh ka siamfel hman tawh lo, ha hmai lang deuh țhâ chung chuan ka han nui chhuak ve ta var var mai a, a hmet zui nghal chat bawk. Chutah, a camera chu melh zui nghal vang vangin zawi sup hian,

‘’ Tha lutuk’’ a han ti zui bawk a, thinlung chhungril takin ka lo hlim ve veng veng. Tha min ti ve a nih chu!

A tlang chhip zawl lai tak tak kan thlen chhoh chuan boruak pawh a nuamin hawi thawvenna hmun a nuam angreng bawk si a, keimah ber hian nuam ka lo ti lutuk chu ka khek chhuak rawih rawih lo chauh a ni. Ka thiante nena kal chu ni ngat ila ka bengchheng tawh ang chu aw.

‘’ In dah fel hmasa phawt ila, hmet kual turin kan kal dawn nia’’ a tih leh chuan ka lo nuih ve sen sen reng a, ka phur tawh takzet a ni. Khawiah pawh kal se a hnungah chuan zui zelin, hah reng reng hi ka hre tawh lova, ka titi siam siam reng mai bawk. A khat tawka ka thla a rawn la ve leh zeuh thin te chuan min tihlimin famkim hliah hliah nimai hian ka inhriaa, he pa hi ka bialpa mai ni lo, ka pasal ni thei se ka va han duh tak em.

A duhtawka tam thla a lak zawh hnu chuan tlang chhip zawl laiah thu dunin, a coffee ken te chu kan in dun bawk a, boruak awmdan in a lo zir kher bawk nen a fuh vel vek hi nimaiin ka hria. Chutah, tunhma atang ka rilru a zawhna lo awm tawh ka up bo char char chu up bet thei tawh lo in ka zawt chhuak ta phawng.

‘’ Pa Sang, in nu nen khan inhruai leh tumna in nei em?’’ ka tih chuan a mitmeng rum leh pa zet mai khan min rawn melh nghal kawk thei a, a coffee chu a han dawt ri zui leh khalh phawt a, a tep zui chap bawk.

‘’ Ka hre mai lo le. Thil keh chhe zawm that leh hi thil awl ai leh awlsam a ni lo ve thin a. zawm tha thei tu an awm a nih chuan Pathian rorel dan dan ni rawh se. Ka pawm vek’’  aw,, he pa hian keimah ah hian eng rilru mah a pu ve lo chu a nih hmel si a maw. Engtin nge ka tih tak ang le. Ngun thluk zeta amah melh vang vang pah chuan,

‘’ nih leh, nupui dang neih leh hrim hrim hi tumna I nei em’’ ka han tih leh chuan min rawn melh zawk chungin a kiai ve ta suk a. Ava han pa chiang tak.

‘’ Ka nupui hlui ang maia hmeichhe diktak leh, in chhung awp bet thiam, chhungpuinu a nihna hrethiam a min enkawl thei tu, che fel leh mi invawng fel tak, zuk hmuam ti bawk silo hmeichhia ang kha ka tawng leh te a nih chuan ka la nei leh lo ang tih pawh hi a sawi theih loh. A pawimawh berah chuan han induh tawnin han inhmangaih thiam em em mai ila a tha vek’’ a rawn ti leh ta. A,, kei chu a beidawnthlak ka ti. A nupui duhzawng lah chu keimah nena inpersan chi hlir an ni bawk si. A hrehawm. Mahse, nungchang leh mizia te chu a thlak danglam theih bawk alawm le, chuti maiin Lalawmpuii mi sehhel leh luhlul hi a beidawng tur a ni lo. Tun hi ka luhlul zia ka tih lan hun tur diktak zawk chu a ni lo emni. Ka tum anga ka thei bawk ang.

Chawhma lamah tihtur tifelin tlâng chu kan tlan hawsan leh ta vang vang a, kan in kawt kan thleng, ka chhuk dawn tep tih ah min rawn ko tu an awm vang chuan keini pahnih chu hnunglam en in kan hawi rual țhawt. Dintluanga leh bawk chu. A car atanga rawn chhuakin a patea nena min han hmu dun thut mai kha maktih hmel zet hian min entawn deuh zak zak mai a, chutihlaiin pa Sanga thung chuan nui var var chung hian

‘’ Bawiha, iva nalh zar zar ve a’’ lo tiin, Dintluanga thung chuan tawngka in a chhang lova, a kiai ve sak ringawt. A ngaihdan nih loh hmel lutuk chu pa Sanga pawh khan hrethiam ve in min mangtha dun hnuah a tlanliam zui ta nghal a ni. Chutah, a patea a tlan liam ta maw tih rual rual chuan ka banah rawn man zui chawtin hnai zetah hian kan inmelh dun ta vang vang mai a, ka zam duh lo lui ve ngat.

‘’ Eng nge in tih. Ka patea nen khan eng thil chiah nge in tih dun’’ sehchilh rap rap chunga a rawn tih chuan keiin chiang zet hian a mitah tak ka lo melh ve kar. Chutah, min vawnna kut chu phelhsak nawk nawk chungin,

‘’ Inthen ang! Min lo be tawh suh’’ ka ti let ve ta salh mai a. A mitmeng kha a danglam zawk tih pawh ka hria.

‘’ Ka patea vang khan maw!?’’ nui sang chunga rawn ti veleh in ka chhang duh tawh lo a. A chhan diktak hi hriattir ve kher pawh ka tum lo. Buaina a sosang mai mai.

‘’ Inthen ila a tawk. Rilru pek che hi harsa ka ti rih a ni e. ka tihpalh’’ tih pahin in chhungah ka tlan luhsan a, ani pawh chuan min ko zui tawh lo in min lo thlir ve vang vang ringawt. Hmangaih dang ka neih chhung chuan ani hi engtikahmah ka tihlim ve thei dawn lo tih ka hria, chuvang chuan inthen ila, ka hmangaih ber duhthusm ang hmeichhia kha ni turin beih ve ka duh. Ka bei em em ang. Ka thei bawk ang.

Chumi ni atang chuan Dintluanga pawh reh zui ve maiin, min rawn biak leh pawh tum se biak nawn hi ka tum tawh lo hrim hrim zawk. Ka nun dan leh nungchang siamthat tumin ka bei chho dawn zawk a ni. A hmasa ber atan ka meizial kawl sa zawng zawng te chu ka paih ruak vek phawt a, zeploah chuan ka ui hlawm khawp mai. Mahse, ui thei ka ni lo tih ka hria. Tichuan, nitina ka nu min phut thin leh beiseina te, room tih felfai leh in chhung hna thawh te pawh chu țan nghalin, tun atang chuan heng zawng zawng hi hmeichhia ka nih angin nitin ka ti ve tawh a nga, fel taka nungin hmeichhe diktak anga khawsak pawh ka tum ve tawh ang tih chu ka intiamna diktak a ni a, ka khawsak dan hi thlak danglam a hun tawh takzet a ni. Chutianga ka han khawsa ve ta thut mai chu a tirah chuan ka nu leh pa te mang pawh kha ka ti ang lek lek zawk hial a, ka pa nen chuan hrilhhai deuhin an in mitmei tawp thin tih pawh ka hria. Mahse, kei erawh chuan ka haider lui ve ngar ngar thung.

‘’ Tihfel tur zawng zawng ka tifel tawh a, ka inbualfai anga ka mu lawk dawn a nia. Chuan, tlai eirawngbawl hunah ka rawn bawl ang’’ ka han tih leh lek phei chuan ka nu kha alo phur nasa tawh mai a, nui har har chung hian

‘’ E,, eirawngbawl chu ka lo awl vek ang che han mu hahdam daih rawh’’ min rawn ti nghal chung mai. Nia, ka nu tan tak pawh hian inhrawk leh hrep hrep ai chuan mu tura intih mai kha a awlsam zawk a ni ngei ang. Eirawngbawl chu ka thiam miau lo tlat a tin ni. Hnial duh lo in ka mutsan a, hm,,pasal turte ka hmu zo ve a nih chuan ka la thiam chawp ve mai ang chu.

Ka thil chin thar chu tih dan țhan ah neiin, tuktin hian hma takah ka tho chhuak a, ka nu leh pa te rawn thawh chhuah ve hmain in chhung hnawk zawng zawng ka thianfai vek bawk a, thingpui te lum sak leh te te in chumi hnuah kei chu thenawm thingpui dawrah khan pa Sanga hmu turin ka kal chauh thin a ni.

Tuk khat erawh chu ka tih dan ngai te bawkin thingpui dawrah chuan alo kal hun tur nghakin ka lo thu leh vang tawh a, mahse, alo lang thei ta hauh lo. Darkar chanve zet ka nghah hnuah pawh a rawn lan theih tak si loh avang chuan beidawngin dawr chu ka chhuahsan leh ta hnak hnak a, pawnah chuan tihtur ber pawh hre lo hian ka hawi ka hawi ta mai. Ka va be tawp mai dawn nge ka hrethiam lo. In ah haw leh phawtin tukthuan te pawh chu phur lo zet hian ka ei ve nial nual phawt a, chumi hnu chuan ka insum theih tawh thlawt loh avangin pa Sang chu ka va call ta nge nge. A lo la thei miah lo lehnghal a, a chungah hian thil tha lo a thleng nge, a buai nge a damsam lo ni zawk ang. Message hnutchhiah in tukin zinga a reh daih chhan chu ka va zawt a, a dam leh dam loh te pawh ka zawt tel bawk. Chutah, message chu rang em em hian a rawn reply leh ang lawi bawk sia. Mahse,

‘’Keini pahnih hi kan inbiak tawh loh a tha a ni’’  chu zawng chu rawn thawnin ka mit deuh sulh nimai hian ka hria. A sawi awmzia zawta ka reply hnu reivakloah min rawn chhang ve lehin, 

‘’ I hriat angin kei chu pathlawi mah ni ila nupui fanau nei tawh ka ni a, ka nupui fanaute hi ka ngaiin ka la hmangaih em em bawk. Min hrethiam dawn nia. Thian tha tak I niin I bula awm pawh a nuam em em a, I hmel hmuh pawh a nuam. Thian anga min en ve thei dawn a nih loh chuan inhmuh fo hi ka tan leh I tan pawh a tha lo a ni’’ eng thil nge a hriat tak hi le. Ka duhin ka hmangaih a, ka ngai em em thin ka zep lo. Mahse, chu chu a hriat theih tur hian vawikhat pawh ka la tilang ngai lo thung sia. Engtin nge amah hi ka duha ka ngai a nih tih a hriat theih zawk. Thil dik lo engemaw tak hi chu a awm chiang a ni.

‘’ I hresual a nih kha. Nia, nang hi ka tana kawng min sial saktu leh mi pawimawh tak ini tih pawh ka hria. Chuan, ni e, ka duh bawj che. Mahse, chu chu I hriat ka hlau lutuk asin. A chhan pawh, nang chu mitin chungah I tha em em vek reng thei a, nupui fanau nei tawh ini lehzel bawk. Ka in vengthawng ve thin tho. Tunah pawh nangmah vang liau liau in meizial zuk ka bansan vek tawh a, in chhungah pawhnise fel leh tha taka awm ka tum vek mek a ni. Heng zawng zawng hi nangmah vang vek a ni e. min ngaizawng la, I bialnu leh I nupui ni kher ila tih hi ka phut lo, I thei dawn lo tih ka hria. Mahse, nangmah ka duh che a ka hmangaih em che avangin heng ka nuna danglamna lo awm te hi hre ve la ka duh zawk a ni’’  ka thawn let ta duah mai a nih chu. Chutah, amah bawk chuan tawi fel angreng tak hian

‘’ Nula fel tak nih kha tum zel la, ila naupang bawk a, hma hun eng tak I nei mek a ni. Khang I thil tha tih zawng zawngte pawh kha keimah vang chauh ni lo in I chhungte leh nangma tan lo chhunzawm zel rawh aw’’ tih chu a rawn thawn veleh a, ka mittui a rawn hnam zui nghal țiam țiam thei. Hei hi min thlahna thu hnuhnung ni turah ngaiin ka hnual nghal rawih rawih thei a, khum chungah chuan thu thla hnawkin ka mittui rawn dir zaih zaih te pawh chu hruk hul tumna ka nei hran lo. Amah kha ka ngaia, ka hmu chak em em reng a, ni e, kei hi kum 18 chauh la niin ka mipa hmangaih leh duh em em erawh chu patling kum 50 mi ni lek lek tawh a ni thung. Ka hria alawm. Hei hi tleirawl duhna leh hmangaihna mai mai pawh a lo ni thei e, mahse, ani kha chu ka damchhung zawngin ka theihnghilh theih ka ring tawh lova, pitar tar kun khup bh thleng pawhin dam mah ila, hmangaih dang pawh tawng leh eng angmah ila e tuna ka khawvel hman mek te erawh hi chu ka theihnghilh theih ka ring tawh lo. Ka hriatreng naah hian an cham tlat tawh dawn a ni. A chhan chu, ani hi ka nuna tihtak zeta rawn lut hmasa ber niin, runthlak taka min chhuahsan leh hmasa ber tu pawh amah tho hi a ni. Ka thinlung kawngkhar hawngtu diktak a ni e ka ti lo thei lo.

‘’ Patling nupui fanau nei duah tawh lo duh ve em em mai chu a hrehawm viau lo maw. Nge,  a nuam zawk’’  Dintluanga message min rawn thawn chu en vang vangin ka khap deuh sak sak reng a, he mihring hi a ni ngei ang hetianga ka hlim ve na awmchhun min tihchhiatsak vek tu hi. Tho chhuak sawk sawkin ani chu ka call nghal a, inhmuh ka duh thu ka hrilh zui bawk. Siam pawh insiam mumallo chuan teichhuak zui nulh in, inhmuhna hmun tur nia kan sawi lam panin ka va thlen phei chuan ani chu alo awm deuh vang tawh a, ka pan zui nghal hmawk hmawk mai. Ka hmel a rawn hmuh rual chuan lo ding chhuak in min lo nuih ve vur vur mahse, kei thung chuan a âwmah ka va nam zui sawk sawk mai a, ka thinrim em a tin ni. 

‘’ Ka hlimna la botu, hlimna hi engtia neih chi nge tih I hria em. Misual rilru chhe kawiswi tak chu ilo nih hi’’ ti sawk sawkin ka beng bawk a. ka kut chu alo man zui ve chat mai.

‘’ Duhtawk the. I tana tha lo tur lakah kei hian laksawn che ka tum chauh zawk a nih kha’’

‘’ Ka tana tha tur leh tur lo chu nanga lo buaipui hi a ngai lo. Mahni hmasial lutuk mihring inih zawk kha hre rawh’’ ti let sak sakin, ani chu alo thaw zui ve halh mai.

‘’ Hei leh chen hi I thinlung hmu ve lo chung pawhin ka zui che a, ka ngaihsak bawk che a, eng aiah nge kei hi min hmangaih ve theih loh. Eng nge dik lohna ka neih bik. Heti khawpa I duh dan pawh hnialsak lo chea pawmpui zel thin tu che hi min thlauhthla in, duh ve lo tu che leh naupang ang leka ngai tu che lakah khan min kalsan I tum ang maw? Chu pawh ka patea ala ni zui’’ min hmuhsit hmel zet chuan ahan nui zui deuh hak bawk a. kei thung chuan uluk zetin amah chu ka lo en ve tlawk tlawk ringawt.

‘’ Hre rawh. Duhna hi chu awlsam tak pawhin a piang thei a ni mahna. Mahse, hmangaihna thung hi chu mw chuti maia awlsama hlawh chhuah chi a ni ve lo asin. Mi bik pakhat tan chauha siam a ni. Tun atang chuan ka duh duh ka hmangaih a nga ka zui bawk a nga, nang hi lo buai ve tawh suh ang che. Mahni hmasial theuh theuh, intihbuai tawh loh tur kan ti ang chu’’ tih pahin ka inher a, kalsan mai ka tum lai chuan min rawn pawt ding lehin min fawh a rwn tum ringawt a nih chu. Chiang zet hian a hmaiah chuan  ka lo bensak chawrh thung a, min thlah rang ngei mai. Tichuan, thudang pawh sawi tawh lo in ka kalsan ta vang vang bawk. 

Rilru na leh lungchhe em emin khumah chuan ka let thla zui tawp thei a, tihtur ber pawh hi ka hre tawh lo. A hmasa berna ni turin ka nunah mipa ka tawng ve a, ka la vanduai bik em em zui. Hmangaihna kawng ka zawh chhoh tur hi hetiang zel a nih dawn chuan Lalpa, kei chu ka tlawm e. ka peih ve lo. Hmangaih neih hi ka peih tur chi niin ka hrelo, a hahthlak dawn em mai. Ka tlin ve lovang. A nih loh chuan tawp thei lova min hmangaih tu leh keipawhin ka hmangaih theih ngei tur mihring chauh min tawn tir tawh rawh aw. A harsa ka ti em a ni. 

Thla a liam a, kum chanve kan hman zawh leh hnuah pawh rilru kilkhatah hian amah, amah chauh kha la awm veng veng rengin, thil dang reng reng hi ka rilruah an lian hleithei tawh tlat silova, tuar chhuak tura ka beih țang țang vang chauh a tun hun hi thleng thei ni ve mai hian ka inhria. 

Zan khat pawh ka lungleng khawhar tihtur hre lo lutuk chuan a phone number chu hmet chhuakin sakawrhmuituai tlanga ka thla min laksak te pawh kha ka hmetchhuak leh a, ka en ta ngawih ngawih. A ruka ka hmehsak a thlalak te pawh chu thlek zui ngawih ngawihin ka insum zo leh ta lo. A tawp nan tak tak amah chu hmuh leh ka duh a, hmaichhana inbiak leh inhmuh kher pawh ka phut lo. Ka hmu duh a nimai.

Ka mittui chu hru hul sawk sawkin Becky chu ka call nghal a, engkim min hriatpui vek tawh tu a lo ni bawk nen , tun țum chu min hnial lo hlauh. Rang takin a rawn thleng phei a, pa Sanga te in lam pan bawk chuan kan tlan leh ta vang vang. An in kan thlen lai hian zan chu ala tlai chhe lo bawk nen, ani pawh alo la eng ut mai.

‘’ in chhunga luh I tum bawk si lo, engtia hmuh nge I tum a’’ Becky’n a rawn tih sar sar lai chuan keiin tukverh lam kawh zoh pahin

‘’ Sawta țang sawn’’ lo ti ve maiin ka kal nghal bawk a, tukverh inkhar tha thlap, parda erawh inzar phui silo atang chuan inchhung chu a hmuh theih vek avangin chuta tang chuan ka en thla dawn tihna a nih ber chu. Misual thil ti ru turte pawh ka ang zawk dawn alawm le.

Chutia amah hmuh tuma ka ring ka lo fan uak uak lai chuan tum loh deuhin amah ni lo zawk, a nupui hlui zwk kha in chhungah chuan ka va hmu ta thut mai a! Ka phu thlawk lo chauh a ni. Nui har ahr chung hian a hnungah a pasal pa Sanga ngei mai khan rawn zui ve bawkin an inkuah a, thutthlengah te chuan an thu dun bawk a, ka hmuchiang thei nasa mai bawk si nen a hrehawm dan chu pui tak a ni. Chumi hnu reivakloah an fate kha room atanga rawn chhuak ve in an chhungkua chuan hmun khatah an thu khawm ta dal hlawm a, fiamthu te thawhin an nui ho dar dar reng tih ka va hmuh chuan ka mittui hi dan sen rual a ni tawh lo. A rawn dir zung zung ringawt mai a ni. 

Chutia ka lo awm lai chuan ka thiannu khan ka darah rawn vuanin amah chu ka han melh zawk a, ani thung chuan in chhunga mite kha uluk takin alo en ve mek thung. A mitmeng atang khan min tawrhpuiin hrehawm alo ti ve tih chu hre tho mah ila tihtheih dang vak a nei bik cjuang silo, hrehawm min tihpui mai loh chu.

Tikhan ani chuan chjungkaw thar din in bul a țan tha leh anga, kei ve hi chu thlauhthlak chauh ka lo ni tawh ang. Engvangin nge ani kher kher kha ka lo tawn a, ka lo hmangaih zui tak ka inhrethiam tawh bik lo. Hei hi ka duh thlan leh duh dan a ni bik hauh lo asin. Ava han hrehawm duh tak em. Tihian thup hlen tur hmangaihna paiin hringnun kawng hi ka zawh chho ve a nga, nia, nang ka hmangaihna che hi chu par ve lo tura kuhmum mai niin , thup bo hlen tur chauha lo piang ve a nih dawn hi. 

Thawk lak halh halh pahin ka kekawr ipte chhunga meizial chu ka han phawrh chhuak a, mahse, ka tilui thei lo. Ka hmangaih ber kha ka ta ni ve dawn lo mahse, amah atanga ka zir chhuah thil tha zawk tamtak te erawh hi chu ka damchhung atana vawnhim reng ka duh tawh ang tiin meizial pawh chu a bawm chawpin ka vawm bo zui ta lawng lawng zawk a. ka tha e. ka tha. Ka dam mai ang.

************************************************************************************

Leave a Reply