You are currently viewing TROUBLEMAKERS-1

TROUBLEMAKERS-1

Spread the love

TROUBLEMAKERS-1

“Insual ru…in sual ru”

“An intih nat tak tak hma hian ţhelh vat vat zawk rawh u”

“Ngai lo, tuman ţhelh suh u insual rawh se”

“In incho bawk a insual tak tak teh u”

“Lut thar nu i khawih ve thei dawn na nge a?”

“In kek char char ringawt lo ula, a boring ţep tawh”

“A pui riap riap”

Kan chhehvel ri dur dur reng chu ka ning kher mai. Kun ngur chungin kan thaw dun hlawp hlawp a, chuti chung chuan tlawm zawk nih ka tum lo bur. Ka school luh ni hmasaber a ni lehnghal. Midang te nuihzat bur ni leh mai mai turin ka insual lo.

Ka insual pui nu lah chuan thawkna atan a hnar ringawt a duh tawk lo, a kâ a hmang tel a, shikhar a ei lehnghal a rimchhe lutuk. A thaw rim leh ka awmdan chu a inrem hlawl lo. Hniam te ah chhuat bih zawngin ka kun a, dah chhuah chak tawh viau mah ila ka sam a kehna a thlah duh miau si lo va. Min vir kual pui sek a, shikhar rim zawng zawng nen a khai khawm phei chuan hremna namai lo tak a ni. Ka hai chhulh tawh.

Chung zawk a a ţan rih miau vangin ka kek ve hlei thei lo va, hnek tumin vai buan buan mah ila duh ang a na in ka vai fu thei lo. A shikhar ei lai chu ţhial pah ni awm tak hian a ri leh bawp ţhin a, a rik rualin a tep pah chuap chuap zel. Chutia shikhar ţhial mai mai pah a min sual let kher kher chuan min ti tlawmngai kher mai.

Nghet zetin kut ka hum a, ka tha tawp a ţangin hnuai lam aţangin a khabe ah kut tumin ka do a, shikhar rah seh keh ri ni tawh lovin a kâ aţang chuan na tuar ri a lo chhuak a, “Ahnaa…ka lei ka teh” ti nawk nawkin ka sam a thlah zui zat a, a hmui a hup zui vang vang a. A na ka lei ka seh a tihna ni hmiang ka ti mai.

Tlawm zawk a ţan a lo tum bik aw kawng lo va, hah tawh viau mah ila kan la inveh ţhem ţhem tho. Ka kawng kham ut ut tawh mahse a ţhianten tih dan tur an lo hrilh zat zat lai takin ka pawm chilh a, a inrin hma a keuh thlu ţhuaiin a chungah ka ţhu vang a. Au ri a ring lehzual a, thip ram a min melh chu ngaithei lovin “Vawikhatmah i hmeichhiatpui fiamthu thawh nan hmang tawh suh” tih leh a hmai a hnek ka rual a, “Hey lut thar nu, a hnarah khan hnek miah suh. Sinus a nei a nia aw a hahchhiau ang. Mipa ho khan ţhelh ta che u” a ţhiannu in rawn ti tuar tuar mahse tuman min ţhelh phah chuang lo. Aman min ţhelh ngam miau lo va bakah hnar ti za tham lekin ka hnek dawn lo hrim hrim. A sam a ţham beh a chhuat tauh tir nghal bawp bawp mai duh viau mah ila cement chhuat a nih miau vangin a thih palh ka hlau a, rilru ka thlak leh thuai.

Vawihnih nan a hnarah ka hnek leh siah a, vawithumnaah pawh a hnarah tho. An au leh dur dur dawn emaw tih laiin thawm a reh ta duk a! “Tawp nghal rawh” ti fiak ţhak ri ka hre ta zawk a. Ngai pawimawh duh lovin na vak lovin vawili nan ka hnek leh a, chhunzawm leh ka tum lai takin ban tha chak zet hian ka uniform kawrlum ah ţhamin min pawt tho dawrh mai.

“Tawp tur a ka tih che kha” a tih leh hluk hnu chuan ka inher vut a, mipa pakhat hmelţha zet nen kan inhmachhawn ran mai. Kan uniform ang a ha ve tho a, zirtirtu a ni bik lo phawt.

Ka insawithiam hma hauhin rum zet a min melh run chung hian “Tu nge i nih?” a ti bung hmuk a, zawi te in “Lalnunmawii” ka lo ti sep a. School naupang punkhawm hnem hman zia ka hmuh meuh chuan zah vangin ka sa nghal pup pup mai.

“Vawiin aţanga rawn lut tur kha maw?” awih loh hmel zet hian a ti a, ka lo bu nghat nghat a. Min hau zui hrep dawn emaw ka tih laiin ka hnung lam a kawk a, “Saw lamah sawn toilet a awm a, va inti fai rawh” a ti ta zawk a.

Che chang lo va ka din reng laiin ka insual pui nu ngaihven tumin a ţhu tung a, khup a ban khâm chung meuhin a thlek kual a, a hnar aţanga thisen tlemte chhuak a hmuh takah chuan tihdan tur ngaihtuah ni awm takin a kutzungtangin a hmui a tuai neuh neuh a, a rawn hawi chhuah veleh a ka lo la awm ve reng a hmuh chuan “Kal ta che” vin lek lek hian a ti leh a, zaizirin toilet awmna lam min hrilh nawn leh zat bawk.

Ka hlau ve deuh tho bawk sia, tha tho lo zetin ka kal hnu hnu a, ka inthen phei hliau hliau a ni mah zawk. Toilet ka luh hnu a darthlalang a ka in en chiah chu dang thler duai khawpin ka au chhuak lo chauh. Thlahrang takngial pawn lan hlauhawm lamah min tluk kher lo vang.

Ţek leh current ţang kawpin min shock rawn mahse tun ang em em a nasa hian ka sam an ti tho zo chuang bik kher awm lo ve. Ka samţawnna chu ka sam hmawr tawpah a la inham tang ve ţawk ţawk a, ka sam tak phei chuan chhim leh hmar, chhak leh thlang an kawk kim vek. An phar darh vek mai ni. Ka chal sam tan thar ve lah chuan rinawm takin chung lam an kawk va a, min phatsan duh lo a la bei thlap an awm nual bawk. Ka bek sam tawi lai ka kilh behna bakilh te lah chu ka beng chhungah a lut thla hman lek lek a, ka kamis nghawng a pawr tun bawk. Ka necktie lah chu ka kawrlum chhung a inthun tawh lovin a chhuak daih a, sir lamah a uai hnâp mai. Kawrlum phelh buai si se lova zen lutin ka kamis kilhna ka chhiar a, a lo la kim thlap. Hetiang teh nuai hi ka landan a ni dawn tih hria ila chu ka ding khawmuang miah lo vang. Mihring pawh ka ang tawh lo. Ka kawrkilh tal a la kim alawm le.

Ka hmai a ham pilh ve phing pheng a, nasa phei zawng a ni lo. A thip zek lehnghal a, ka lu lei a na ut ut a, ka sam ţham khawmin ka zut a, rin ang ngeiin sam ka zut thla ţeuh.
“Min va han kek na em em ve maw le” tiin keimahin ka phun nuah nuah a, ka sam a hnuk chung khan min pawt phar nasa ka ti reng a, ka mit a pawt kalh tel vek lo chauh a ni. Ka hah lutuk a ka tha thlengin a khur der der hialin ka hre mai.

Sam ka siam ţhat mawlh mawlh laiin ka insual chhan ber nu ţi dekin a rawn lut zal zal a, min hnaih ngam si lovin ka piah lawkah a ding dum zat reng ringawt.

“A na em?” ti a phun sepin min melh kar a, a kawrlum ban hmawr a pawt fan nasa hle bawk.

“A nat chu thuhran ka hah lutuk” tiin ka lo chhang a, ka bek sam phir lai kilh beh ka tum lai chuan meng phar awn awn chung a min rawn kawkin “Khalai bik kha a pawt bung tihna em ni? I sam pangai nen a va in chen lo bik ve. Kha a pawt bung hmurh a nia” tiin a rak chel chul mai.

“Pawt bung nang aw. Ka ziat kawlh a, a la ţhang mek, ka sam dang ho hi a chen thei lo vang” ka lo ti sam et a. Youtube a an tihdan nalh ka tih em vangin ka ti ve ringawt a, ka ti sual a ni mai ni. Mahse ka ziah kawlh loh ho a sei tho a, a hliah thei vek. Ka chal sam pawh hi mi tih ka hmuh vang a tan veleh ka ni. Ka ti fuh reuh phian a, mahse school ah chuan kilh bo a ngai. In a ka haw veleh ka sam zawng zawng suk vek ni a nih lem loh chuan ka chal sam chiah ka su a, thuawih deuhin an awm veleh mai zel. Ka sam tawi lai ho hi a sei laiin ka hliah tir a, chal sam ka uai tir leh hniang a, in lamah chuan ka dik thlap zel.

Ka bul a rawn ding ve reng nu chu a che sek a, a changin tawi te in a kar a, a chip leh vat zel a, chutiang chuan a la awm char char.

“Dindini ka nia..eng lo, Ronnie kha a thinrim hmel sia, Hruaii hnar a thi leh kher kher bawk nen, inu leh pa in an hriat phah ka hlau e” zam tih hriat tak a tih pahin a la che sek a. A zam poh leh a hah dawn tihna a ni mai.

“Tu nge Ronnie chu?” ka lo ti ha. He school a lut tur hian tukin zingah ka kal ve chauh a, tumah hriat ka la nei lo.

“Hruaii i ţhut beh lai a khai kang tu che kha a nia” a ti dek dek a, “Min khai lo min pawt tho a nih kha” ka lo ti vin hlar mai.

“Engtin pawn ti che se la a thinrim hmel tho tho a, kan class CR a nia, section tin hi kan in el ve ropui sia, kan class aţanga buaina chhuak a nih miau vangin a thinrim dawn chiang sa. Zirtirtu te hnenah sawi kher lo mahse Hruaii te khan an sawi tho tho ang” a ti mual mual a, ka hlau ve lem lo. Ka school luhna apiangah zirtirtu te hauh bur ka ni ziah a, ngaiah ka nei tawh.

Rin lawk ang ngeiin office ah min ko a, min hau nasa mai. Ka pa hming bulah Rev. a lo awm ve kher kher bawk nen, midang kaihruai turin min lo beisei lawk diam a, Aizawl kan awm hmaa kan awmna khaw mipuite hnen aţangin ka chanchin an la hre lo a ni ngei ngei ang.

Vawikhatna chiah a la nih vangin min hrem lo va, ka tih leh vaih chuan hremna ka pumpelh tawh loh tur thu an sawi lawk thlap thung. Office aţanga ka chhuah hnuah class room lam panin ka kal nghal nal nal a, min hmu apiang ten min lo chhaih fiam laih laih a. Bon min tih zia min hrilh tawk te an awm a, ka engahmah a thawk lo. Tumah en chiang lem hlei lovin ka kal pel mawp mawp ringawt.

“Nang nu kha” mipa aw bawk hian a rawn ti leh hmuk a, ka ning lutuk chu pawnfen parh hawrh khawp a nasa in ka inher a, mahse kan class CR, hmelţha ka tih deuh bawk kha a lo ni. Kei aia a san daih vangin dak vahin ka en a, a lungawi lo hmel rum ul leh a mitmeng dur khup te chuan tlemin min ti hlau ve deuh. Muang chang a hawi sawn riai riai in kal lehnghal mai ka tum chu ka ban puam laiah lo vuanin min pawt let leh dawrh a.

“Thisen chhuah khawpin tumah sawi sa tawh suh. I rawn luh hmain school ah buaina kan nei ngai lo. Hmeichhia inih tak tak pawh ka ring hrep lo ve ah” min melh chhuk run chung hian a ti nghut nghut a, “Hmeichhia ka nih tak tak i rin loh leh fiah rawh” ka tih veleh “Phelh la” tiin min lo cho let a, ka chhip aţanga ka ke ler thleng a min en thlak dan dan takah phei chuan ka inla hrang rang a sin aw. Min tih hlauh a tumna mai mai pawh ni se hetiang a in en den den chu ka duh bau lo.

“Ka phelh kher lo vang. Zakthei lo lutuk mai bakah thiam lohna pakhatmah ka nei lo. S Hruaii khan midang fiamthu thawh nan a lo hmang vel a nih kha” ka ti tan tan a, ka mi sawi chu hre ngai lo ni awm tak a thle deuh chung hian “S Hruaii?” tiin a lo phun ve sup a, zawhna min zawt a ni mah zawk.
“Shikhar Hruaii ka tih na a nih kha” ka tih leh chuan a hriat thu a min chhan hnuah lu thin pah a chek tlak tlak chungin min thlek vang vang a. Luh mai tum lo va ka ding reng chu “Lut ta che” min nuihzat hmel tak hian a ti a, rang lutukin ka kal nghal vat vat a ni ber mai.

A hnung berah keimahin ka ţhu a, Ronnie erawh a laihawl ah a ţhu thung. Keimah chauhin ţhu mah ila Ronnie ka hmu chiang thei tho a, ka khuahar lo nasa mai. A kamis te chu angel te thla hmang a siam ni awm takin a var sar a, a inhmeh bik vang te pawh a ni maithei. Ka sawi uar mah mah te pawh a niang, duh zawng ka pe na ve a, a hnar ngul a nalh takzet tih hi kan sawi tel leh hram teh ang.

Miss in kan zirlai a sawifiah mawlh mawlh lai te chuan tak runin rilru pe deuhin a ngaithla a, keiin amah ka lo thlir reng thung.

“Lalnunmawii” miss in a tih veleh “Present mii-” tih hluai pah a ka ding zawk chu min lo nuih dar dar a, ka zak kher mai. Class ţan tirhah khan ka present daih tawh, ka hre chhuak chiah. Miss in min zilh malh malh lai chuan Ronnie khan mit ti zim sunin min lo en reng a, ka zahna a ti zual. A hawisawn duh miah lo lehnghal a, muangchangin hnuai lam ka bih riai riai ringawt.

Min hau nasa viau mahse ka nin loh phah chuang lo. Kan zirlai hi pakhatmah zir nuam tih leh ngaihnawm tih ka nei lo va, zirlai a nih hrim hrim chuan ka tui na a ni lo vek. A vai hian ‘No Hne” a ni tawp.

Lunch break a nih veleh a ri huk a, miss a chhuah hnu phei chuan an phu nghal suau a, Ronnie ka melh vat a, tumah ngaihven lem amah chiahin muangchangin a chhuak nul nul a, a ngen hmel takzet a ni.

“I bulah tiffin ka lo ei ve ang aw” Dindini bawk khan a rawn ti leh a, tiffin box leh tui bottle pawm ţat chungin ka dawhkan bulah a ding zum zat a, a tiffin leh bottle ah te chuan eng rawng ber nge a nih hriat hleih theih loh khawpin sticker a inbel rang chiai chuai a, k-pop a ngaina ve a ni ngei ngei ang.

“Ka pai lo a” ti liam puat mah ila ka bulah a rawn ţhu lui ta tho a, “I ei ve dawn nia, ka pai hnem thei lutuk. Ka ei bang ziah alawm. Vawiin chu kan ei zo vek dawn nia” a ti pah mawlh mawlh a.

Chuti na na na chu tiin ka lo ei pui ve a, canteen ah mi an tam tlangpui zel sia, canteen kal kher ngai lo va ei tur awm hlauh chu a tihzia khawp mai.

“Pastor fanu maw i nih?” ti a min zawh chuan ka nih ngei thuin ka lo chhang a.
“Pui riap riap” uar fe a a tih lai chuan a ngaihna hre lo zetin ka lo en heu mai.

“Eng ber nge pui riap riap?” ti a ka lo zawh chuan “Pastor fa te hi chu fel turah kan dah ringawt zel a. Ka sawi thiam chiah lo, fel tur a ngaihna a awm. In tan pawh hian a hrehawm ve ţhin ngawt ang. Mihring ve tho in ni chungin nungchang ţha bik turah te, thil ti sual thei lo turah te kan ngai ringawt zel cheu sia, mahse nang chu i fel lutuk” a ti hliam hliam a, a hmarcha pai a thak ţha bawk a a si zui nasa mai.

A sawi lawk ang chiah a chaw pai kan ei zo dun vek a, fang khat tè pawh a bang lo. A ţhutna a kal mai lovin a ti ti zui siam siam a, “Hruaii te ţhian ho hi chu mi tihbuai an hrat lutuk a, an huai bawk sia, ngawihsan tawp an ţha ber. A nih loh chuan an tibuai zui char char mai ang che” a ti a, ka hlau lo nasa mai sia aw.

“Chuan saw lai tuai pahnih ţhu saw hnaih loh a tan an ţha zawk bawk. Buaina an nei reng a, thil tihna reng rengah tuai tha chhuah hun leh mipa tha chhuah hun an hria a, an hrem reng a, an nu leh pa an ko sek zel. Kawm nel vak duh suh” ti a min hrilh leh hnu chuan a kawh va na lam ka hawi a, tuai pahnih hi inhmatawnin an lo ti ti nasa khawp mai. An hmui an hup ve ve a, an kut lehlam an phar kak ţha a, nuih pahin no deuhin an inbeng zeuh zeuh a, tuai hi an tam tawh khawp a, chi thlah duh ngat se la chuan khawkhat daih an thlah thei hial ang.

Ronnie a lo lut chu pakhat zawk chuan “Nini…muah hlups aw” a lo ti no duai a, an nui zui har har bawk a, Ronnie chuan a ten hmel kher mai. Mipa ţhutna lam hnung ber kil aţangin ball a la chhuak a, a chhuak leh tur chu “Nini…good luckzz” tuai pahnih in lo ti leh duai mahse a hre lo der hmiah tawh.

“Ronnie hi chu…ka star thei lutuk a” ka bula mi lah chuan a lo ti fan raih a.

“In inhriatna a rei tawh mi?” ka tih chuan, “Rei tawh e,kan inkawm ţhin bakah school kan lut dun char char a, kan chhungte ve ve an inhre ţha bawk a, mahse…ka star zia a hriat hnu kha chuan min kawm tawh ngai lo” a ti chuai raih a.

“A va sual ve” pawr fe hian ka ti tuar a, Dindini’n min lo kheuh vat. Class a awm kan tlem bawk a a awm chhun ho an lo hawi ţhap lehnghal.

“Nang nu pawh kha…pui riapz riapzz” tuai pahnih bawkin ka ţhutna lam rawn hawi reng chungin an ti pherh duai a, “Ka lawm e ka ti tawh mai teh ang” nui hak hak chung a ka ti chiah chu rang lutukin an pahnihin min rawn pan nghal rawk rawk a, ka ţhutna an rawn thleng phei har lo kher mai.

School ban a in ka thleng chiah chu chhungten min lo en ţhap a, an landan aţangin school aţangin hriat an nei tawh tih ka hre mai a, an khu luih luih a, an alh but but ţep tawh ang.

“Lalnunmawi buaina pumpelh tum rawh ka ti fo che a ni lawm ni?” ka pa in a ti khur khur a, bag hrui vuanin lai deuhin ka ding ta reng ringawt a.

“A zahthlak thei emai. Vawiinah i lut ţan chiah a, in class a mi ngei na takin i sawi sa nghal pang a, an hnawt chhuak duh mai dawn che sin” pawi tih hmel zetin ka nu in a lo ti ve vawng vawng bawk.

“Aww…hmeichhe dang fiamthu thawh nan a hmang vel a nih kha. An ţhian ho in an nuihzat rawn a lawm mawle. Chhan ngai te chu ka chhan ve bawk ang chu” thiam inchan tir tum tak hian ka ti a, ka hneh zo chuang lo.

“Chu zawng, i buaina a ni lo ve. Midang buai naah hian dak ve de de zel suh. I insum thei dawn lo va i hriat chuan i mit chhing la, beng hup chungin kal pel rawh tiin ka hrilh ziah che” ka pa in beidawng zetin a ti veleh a, “Mit chhing leh beng hup chhungin engtin nge ka kal theih ang? Ka tlu sual mai nga sin” ka ti leh ţalh a.

“Lalnunmawi enkawl i har emai. Engtin nge maw kan tih zel dawn che ni? Inu lah hian hmun dang a dah che a phal der lo lehnghal a, phal se chu i ţhatna tur hmun ah ka dah daih tawh ang che” ka pa bawk a ni. A mangan luatah a chal kawlh lai khuh ţang ţang tu a sam tlem awmchhun a tuai sawn palh a, rang lutuk a tuai ţha lehin rum deuhin min melh leh vut a.

“Kan awmna hmasa ah lah nangmah vangin kan zak fo a, i ţhian kawm te awmdan apiangin i awm ve zel. Mi bawng vulh lai thlengin i kai chhuak ru duh. Nangmah vang hian ngaihdam kan dil ngun lutuk tawh. Hmeichhe tih tur ni awm lo tak tak i ti reng mai bawk a, enkawl i hahthlak emai. Min ti zak tawh hlek suh. Ţhian kawm miah lovin inah tawm tlat ang che. School kal la, inkhawm la, thil dangah chhuak reng reng suh” a ti tawn tawn mai. Min hauh apiangin kha bawng lah kha a sawi chhuak ziah lehnghal a, min hrem nan thla hnih chhung bawng hnim pet min zui tir bawk. Min hau peih bawk si, a chang leh min hrem a, mahse pianpui mizia hi e, a sim theih loh.

Hmui kawh luau a ka nu ka melh takah chuan nu a nihna lang chhuakin a thaw halh a, “Va inthlak rawh. Thingpui ka lum ang che” a ti ta nge nge a, hrilh nawn ka ngai lo kher mai.

Zan ka muhil thei ngang lo chu dar10 velah pawh khumah ka la let tawn chhen reng a. Mit chhing lui tlat ila kan muhil mai an ti ve ziah a, mit ka chhin lahin ka mitmu a che det det ringawt a, ka harh tial tial a ni ber. Ka naute nen a kan pindan inţawm ah hian hniam te ah tukverh a awm a, chhuak ru duh mah ila awlsam deuhin a chhuah ruk theih. Chutiang bawkin awl sam deuhin misual an lo lut thei bawk. Chuvang tak chuan ka pa in a ngaihţhat nan liau liau kan pindan kawngkhar bulah bell lian pui a dah a, kan unau inkim thlapin hrui a thlun zawm a, a thun zawmna hrui a sei bawk a, kan vaiin zantin hrui kan mutpui ziah. “Thawm in hriat palh chuan hrui hi pawt vak ula, bell a inkhawng ri ang a, ka rawn tho vat ang” a ti ţhin a, hrui pawh ngaiin kan la awm em lo ve. Ka muhil thei lo mu ning tawh bawk si chu ka ţhu chhuak hluai a, midang kaihthawh nan hrui ka pawt mai dawn em maw ni ti rilru rauh rauh mah ila zanin kher kher chu ka pa ka fiam ngam lo.

Khum aţanga chhukin tukverh ka pan ding a, a reh ţhuap tawh na a hlauh ka nei lem lo. Thlahrang ka hlau lo va, mihring ka hlau lo bawk a, ka pa pawn ‘I ât huai’ min ti fo mai. Tukverh chul kual reng chungin pawn lam ka thlir a, ka rilru ah eng emaw a rawn luh zawk rualin ka nau te khum ka melh thuai a.

An mu tui nasa tawh mai. Nui ver ver chungin kawrlum ka ha a, thawm dim deuhin tukverh aţangin ka chhuak ru zal zal a. Pawn boruak ka hip chiah chu ka thlawk delh delh ni maiin ka hria.

Kal tumna bik nei lem lovin thawveng deuhin ka duhna apiangah ka kal kual a, rawl vek dawn mah ila pawi tihna ka nei tawh lo. Khum a ka inleh na lamah ka rawl dawn tho tho. Kan awmna veng hi hmun reh deuh deuh lai a tam ve khawp a, ka duh daih zawk. Thingtlangah kan awm nasa a, Aizawl kan awm tur thu ka hriat khan ţhiante nen a thil tih rukna hmun tur remchang deuh lai a awm loh ka lo hlau ve nghal em em ringawt a. Mahse, min dahna hmun takah hi chuan remchang lai a tam khawp mai.

“Min rawn hnaih ngam leh si na nge?” ti vin tuar ri ka hriatna lam chu beng chhi pah reng chungin ka pan a, ka lo hnaih angreng hle mai. Mi panga vel hi inring ranin an lo ding khawm laih a, eng nge an tih hriat chian tumin an sir lam thim laiah thawm dim thei ang berin ka phei ţhem ţhem a, ka hmuh chian theih veleh an mit ka lak palh hlau in ka ţhu hniam vat.

Mipa pakhat hian tiang kengin a hma a mi te chu a vau khur khur reng a, tam zawk mahse hmanrua a neih miau vangin an hnaih mai ngam bik lo ni awm tak a ni. Thla eng bak eng dang a awm si lo va, an hmel ka hmu chiang hlei thei der lo. Mahni chauh a ţang pa chu an khawih rawn mai ka lo hlau a, insual ţhang ve tho ka nia, in mal beih leh a hu ho in a min beih rawn chu a in ang lo lutuk tlat. Chhip leh ke hmawr te a rualin a na thei a, pakhat chauh in a a khawih phak miah loh tur kha tam deuh chuan an khawih pha vek.

An awmna hmun ah hian midang hmuh an inbeisei lo a ni maithei, hawi kual zuk zuk leh thawm ngaichang âwm a awm an awm lo hrim hrim a, chutiang a ni chung chuan thawm dim deuhin ka bih rukna aţangin ka chhuak a, thui deuh thleng ka let leh hnuah chumi te awmna lam bawkah chuan hmanhmawh hmel zet a tlan hlawk hlawk chungin “He ta hi an awm a nia, rawn man vat rawh rawh u” tiin ka rak chel chul a. An rawn hawi phei zawk a, an hlauh em vangin rilru mumal an pu thei tawh lo aniang a chet dan awihawm loh lutuk te chuan a ti chiai in a ti hlau zo a, chak deuhin an tlanchhe bo ta diak a, tiang keng pa chauh kha a awm tawh.

Hawi let meuh a an tlanchhiat na lam ka thlir dauh dauh lai a “Ti nge i rawn inrawlh?” mipa aw thum deuhin a rawn tih nghut chuan ka phu nasa teuh hle. Tiang keng pa ngei mai kha ka bulah a lo ding reng tawh.

“Ka lo inrawlh kha lawm hle zawk rawh aw. Tiang nen pawh i tlanchhia a nia” ti hlak hlak chungin ka melh chho ar a, min din hnaih chiah hian a san zia a hriat. A dar pawh ka chen mang tlat lo. Lawm tak a ruang a min dem zawk te chuan ka thin a ti rim hlur mai.

Ka thusawi ve chu hre lo ang hmiahin min kal pel a, ka haw na lam tur tho a ni bawk a a hnungah ka kal ve zel. Khang ho kha a hmuh leh thut a ring a ni ngei ang, a tiang kenlai chu thlah duh miah lovin a hum reng a, hliam tuar ni awm takin a kal pai chhut chhut a, a kal pahin tiang kha a hnuk ve zel bawk.

“Eng nge i la duh?” min nin hmel zet a tih pahin a rawn leh hawi a, ka hmai bul a a rawn kun hniam rual chuan hnung lamah ka tawlh let ve dawrh a.

Bike ri thum dut dut kan hre zui zat a, ka pa a nih ringin ka hlau tawh kher mai. Rawn hnai zelin kan hmaah a ding chawt a, hmanhmawh zetin mipa pakhat a rawn chhuk sawk sawk a, bike light in a chhun eng vek tawh bawk a tiin anmahni enchian tumin sir lamah ka tawlh hret a, ka che sawn chiah chu bike khalh tu zawk khan “Nangmah hi maw?” tih leh ka kawr awm a ţham a rual a, kut min thlak nghal miah miah dawn emaw ka tih laiin tiang keng pa zawk khan a ţhianpa kut chu rang zet hian a rawn phih thlak sak a, “Hmeichhia a nih hi” zawi sup a a tih lai te chuan dak deuh vah chung hian ka lo en a.

Engin min chhun pha ta bawk a, a hmel ka hmu chiang thei tawh; a sam a buk ve hle a, tenawm khawpin ngo hluak lo mahse ka rin aiin a ngo hmel, zan a nia ka hmu sual maithei, a hnar ngul chu mizo ah chuan sang pawl tak a ni ngei ang. A mitko ah barbell ring a inthiat va bawk.

“Haw tawh rawh” a mit khur thuk deuh raih a min melh chhuk ve run chung hian a ti a, a kam sir a thi a, a biang ki lai vel duk kual raihin a mit ko a khem nian bawk. A taksa dang hmu tel thei lo mah ila hliam a tuar ngeiin ka ring.

“Ti nge khang ho khan an um che a?” ka ti leh hram a, “Hmeichhe zan vak ka pel ţhin a” min nuihzat hmel zetin ti mahse min melhna mitmeng thim khup leh dul ruihah chuan a chau tih a hriat ngawih ngawih. Sam kawh fur khawpin an kek ve lo tal alawm.

“Kal ang Fredy, khang ho khan min rawn zawn hmuh leh hmain in sa seng vat teh ang” a ţhianpa in a tih tak phutah chuan min ngaihtuah ve ni awm tak hian “Thlah i ngai em?” tiin min zawt ve mial a.

“Aih keimahin ka haw thei” inringtawk zet a ka tih chuan a bu nghut a, kawng sirah tiang theh pheiin a ţhianpa a zui a, chak deuhin min tlanpel zui vawn vawn mai. An tlan liam chiah chu a thim nghal khup a, hlau lem lo mah ila nuam tih lohna ka nei ve.

Kan in kawngah chak deuhin ka pen hlawk hlawk a, mi buai naa ka dak de de ţhin hi ka sim vat a ngai. Ka mi puih pa te tlan na kawng zelah khan kun ngul chungin ka kal ve zel a, ka tlan ti tih tawh. Nuam ka tih em vangin ka lo ngaihtuah chiang mang lo va, rin aiin ka kal thui zek mai.

Quarter ka thlen veleh tukverh aţang bawkin kan pindan chhungah ka lut leh a, ngawi rengin ka mu ngil nghal awt a. Kha mite ţhian dun kha ka rilru ah an awm zui reng a, miin an um chhan kha hriat ka chak rualin ka pa zahna ka siam ang tih ka hlau ve tho bawk si. An buai na a dah de de tum lo viau mah ila ka ngaihtuah naah an awm reng mai. Rukru emaw ruihhlo zuar an nih te ka ring rum rum a,mahse chutiang chu lo ni ta se a um tu te khan police an hlau awm der si lo. Tiang hmang a midang vau khur khur tu zawk phei kha chu a landan aţang reng khan mi pangngai a ni lo tawp ang.

Mi chanchin ka lo ngaihtuah ve vak vak chu ţullo tiin ka thaw hawk a, mi pangai an nih lohna chiah dah len ka tum tlat.
“Au Mawimawii’n min hau” ti a fiah lo deuh a ka nauin ka hming a lam hnu lawkah a rum zui ţuah ţuah a, a ţawngvai tih hriain a khum lam ka hawi phei vat a, sawi ngai bawk chu hriat theih mang loh hian a sawi nawn leh a, ve ringawt chuan ah…

CONT (Hei Through thick and thin peng pakhat ang tho a nia, zantin ka dah hman loh chuan zankhat dan zelah ka lo dah ang. Story min chhiar sak ţhin tu te zawng zawng chungah ka lawm nawn leh aw hehe)

This Post Has One Comment

  1. Anonymous

    Punga k ngai veg² lai sticker 😭❤️

Leave a Reply