You are currently viewing TROUBLEMAKERS-10

TROUBLEMAKERS-10

Spread the love

TROUBLEMAKERS-10

“An ti na che em?” ti a ka sam min tuai mam sak malh malh pah a Nini-an min zawh lai chuan Sir a rawn lang hlawl a, pawi ka ti lutuk chu ka chhing sawk ringawt. Nini-a min khawihna vang a ka taksa ţang ţeuh pawh ka thlah dul nghal riai riai.

“Eng thil nge thleng?” vin zet a tih chuan Nini-an min din hliah thuai a, ka hnungah Nghaktei a rawn ding ve rawk rawk.

“Nunmawii leh Nghaktei ten kut min thlak ringawt a nih kha. Ka hnar pawh a pawt thla lo chauh a lawm. Ka beng te hi en rawh a sen hlur ang, ka hmai te hi a thip sep sep” Faka’n a lo ti nghal zat zat.

Ka hma a ding reng chungin Ronnie chuan ka sir tawn tawnah min vuan bet a, hnunglam aţangin Nghaktein min vuan ve ţung bawk.

“Nangni pahnih kha hetah rawnkal teh u” Sir chuan a ti fiak leh ţhak a, “An thiam loh a awm lo” Ronnie-an a lo ti chang bal mai. Kan din chhuah hma hauhin kan thlavang a hauh a, phur thak lo chi pawh ka ni lo.

“I hmu em ni? Hei an pilh phung hi” Sir chuan a ti leh a, tuai pahnih a sawina a nih ka ring.

“Hmu e kut thlak lo thei lo in an siam” Ronnie, Nini ngei chuan a ti nghet charh a, “A ni lo, an hnungah kan kal mai mai a, kan hnungah kal su an ti zel a nih kha. Kawng dang a awm si lo a, an hnung a kan kal vang chauhin kut min thlak” Dawngan a lo ti ve zat zat.

“In pali khan office ah min rawn zui ru” Sir chuan a ti ta mauh mai. A kal nghal vut lehnghal. Tuai pahnih chuan an zui nghal duan duan a, che chang lo va Nghaktei nen kan din reng laiin lei a ka bag tla chu Nini-an min chhar sak a, a ben fai thuak thuak hnuah pawh min pe let lovin a keng tlat.

“Kal ang u” a ti mawl tawp a, kan pathumin office lamah kan inzui phei a, ka va hreh tak. Min vau lawk tawh sa bawk sia, ka pa’n a hre leh ngei ngei ang.

Office a kan luh dawnah Nini chuan “Tah hian ka lo nghak ang cheu” kawngka bul a ding chung hian a ti a, a mitmeng ringawt pawn min thlamuan thei hial a ka hriat chu.

Tuai pahnih chuan min hek leh zat zat tawh a, Nghaktei nen pawh kan insawi thiam nasa. Kan bengchhen tak viau hnuah Sir chuan “A tawk” a ti vin ţhawt a, “Kal phawt mai teh u. Naktukah in nu emaw in pa te rawn kal rawh se” a tih zawm leh a, ka hlauh ang ngei ngeiin thil a thleng. Ka pa’n ka chal a nawr ngei ngei ang.

Nghaktei nen phur lo fe in kan chhuak hna hna a, ka ban vuan chung meuhin Nini chuan “I ţha em?” tiin min ngaihtuah hmel deuhin min lo zawt.

“Nu emaw pa te rawnkal rawh se a ti. Tuai pahnih te vang vek” ka ti hlak hlak a, ka bag min ken sak chu lak ka tum a, a lo phal ţhak lo.

“Kal rawh” a ti hmuk a, Nghaktei a lo nui leh var var tawh.

Kan hnungah ngawi rengin a kal ve zel a, ka bag in na vak lo in min rawn tai zeuh zeuh, ka hawi let apiangin a nui hmel ka hmu ziah lehnghal a, Nini-an deusawhna tel miah lo in min fiam ve ngei a nih chu! Keimah ngei pawh hian ka awih lo lek lek a lawm le.

Ka bag min ken sak vang mai mai chuan min lo fiam sup sup a, ka bag ti ve ngawt dawn se pink par chuai a ni bawk si, kan ţhutna thleng min thlah thlap a, dawhkan a ka bag a nghah hnuah “Sir kha ka hmuh sak ang che. Chhungte kal a ngai lo vang” a tih chuan ţhu fel at tawh mah ila ka hawi chhuak rang hle.

“Engtin nge i sawi ang? Tuai pahnih sawn min hek zo vek tawh a, i sawi fel thei lo ang” lo ti hluai mah ila ka thusawi tawp lam a zuai raih thung.

“Dawt ka sawi ang” a ti nghet charh a, Nghaktein min lo sik leh vawt vawt tawh.

“Eng dawt nge i sawi ang?” amah en ran chung a ka tih chuan “Chutiang lehzel i hriat a ngai lo” a lo ti hluk.

“Keipawh min sawi sak ve rawh aw Nini” Nghaktein phur fe a a lo tih pawhin a bu nghut a, kan lawm dun kher mai. Hnar ping lutuk vawi leh khat a kaw hawk ang mai ka ni.

A kal hma in “Break ah kan inkhel ang” a ti sap a, nui suk chungin awmze nei deuhin min melh bawk.

A kalsawn hnu thlengin ka la pangai thei lo. Ka khi huih reng a, suangtuahna khawvel ah ka cheng zui veng veng.

“A duh che ka tih tawh kha. Duh ve ngei ngei rawh lehkha a thiam thei si, nangman zir em em lo mahla Nini hian hna ţha deuh a la nei dawn tho a, pasal officer nei ah in ngai nghal tawp rawh” Nghaktein a ti nghal zat zat. A ngaihna hre lovin ka hawi ka hawi ringawt. Kei aiin a lo ngaihtuah thui zawk daih a nih hi.

Ka pasal tur ţhutna lam chu nui ver ver chungin ka va melh a, ka en reng tih hria in a rawn hawi zawk a, nui miah lovin hma lam a melh lehnghal daih. A chang leh min duh lo a nih ka ring a, a chang leh min duh ve deuhin ka hre ţhin bawk sia, a awmdan hi a mak thei e.

“Tuai pahnih sawn min rawn melh ve khanglang mawle, an hmai saw a vual tup mai” tiin Nghaktei chuan nui kur kur chungin min rawn hrilh ru a, ka hawi phei ve vat. A ni tak tak, kan lo van ham na awm em em. An hmai vun a rual rem tawh lo reng reng. An ngo ve angreng sia, an hmai a sen hlar a, a vual deuh tup.

“A hrawk bawk ah i man em ni?” ka lo ti thung.

“Man e mahse ka rek hlum ang tih ka hlau a ka thlah leh har lo. Tuai ve si hrawk bawk a nei lian rap. A kamis kawrkilh pawh a tla ţeuh ang. Ti kha chuan min tibuai ngam tawh lo deuh ang chu” phur zet hian a ti a, min biak hlek pawh ngam tawh lo se ka ti. An ţawng theiin insawi thiam an hneh sawh ropui si.

Break a nih veleh tiffin kan ei sawk sawk a, “An helh awl awl lo a a mak zawk” min ti tawk te an awm. Ka pasal tur inkhel kan en dawn miau a, chaw helh hman kan ni lo. Tui nen a lem thlak leh chhung nen, hun a duh rei dawn lutuk. Tiffin in ei zawh hma siak tum te pawh kan ang.

Inkhel tur te ber an lo thlen hmain kan ţhian dunin kan ţhu vang tawh.
“Ka rin aiin a boring” Nghaktei chuan a ti sek tawh a, a unaupa ang mai dawhthei lo hirh herh lutuk. En tur ber a awm loh chuan a boring ve bawk ang chu.

Mipa ho an lokal chuan inkhel en tum ve dang an ri hluai a, kan section leh section B ho an nih hmel. An inkhel ţan chiah chu hrethiam miah lovin ka ţang ve em em ringawt a, an intlan pawlh hnu phei chuan tu tu nge ţang ho ber pawh ka hre tawh lo.

Nghaktei au ve vak vak chu “I hrethiam em ni?” tiin ka zawt deuh thawr.

“Ball an inchuh nih khu. Thir ban inhung pahnih kar a a luh chuan goal tihna. An tlan na lam apianga tlan kual ve khu referee a nia, a hah ber dawn chiang sa. Ball khu khawih miah loh tur a nia, an khawih chuan i pa in a pek ziah ţhin ang che red card an hmu ve ang. Referee khuan chu chu a pe dawn a, referee khuan inkhel ah chuan pa ber chan a chang a nih ber chu. A hma lam a ding tur leh hnung lam a awm tur te an insiam a, an hming an phuah dan ka hre lo. Aaa…Nini chiah khu en mai ang. Ka sawi chin bak hi ka hre bik lo” ti a min hrilhfiah hnu chuan ka var kuarh mai.

“Kan ţhut hmun hi a sang sia, i ţan lutuk na lamah i lo ţhu lang palh ang e aw” a rawn ti leh zeuh a, ka insiam ţha thuai thuai. Chip chaihin ţang deuhin ka ţhu.

“I hmu em? Nini-a ball pet kha thir ban pahnih karah a lut. A goal tihna, awii van thiam riap riap” min sawi nawk nawk chung hian a ti leh chel chul a, keichuan ka ning tawh. Ball um a tlan kual ringawt hi a hmuhnawm na ka hre lo reng reng.

Nini-a ţhiante lah chu an han lawm khawp a, Nini pawh mawi deuh a nui chungin ka ţhutna lam a rawn hawi chho a, a ţhianten ţe teng tung chung a an kuah bawrh bawrh lai pawn keimah chiah min en.

“A en char char che mawle. A pa zia khu, Nini, hah hmel deuh a kawng dawm chungin field ah khan chil chhak pherh pherh la i pa lehzual ang” ti a Nghak hir ha-i rak ve chel chul chuan min ti zak.

Nini-a ţhiante ho pawh an rawn hawi ta ţhap a, a pet goal tu ber a lo hawi reng miau alawm. An kamis balh an hlau a niang chu tshirt an ha far mai. Nghaktei au dan avang chuan an nui ţhaw hlawm mai.

“Kha lai luruh ring deuh nu kha, naktukah tui vawt tawk min rawn pai tawh rawh aw” an zing a pakhat chuan a rawn ti ve lauh a, Nghaktei a phur kher mai.
“Tehreng mai…hrawk bawk bal hmawk khawpin in in ţeuh dawn nia” tiin a au let a, a nui zui uarh uarh lehnghal. Mipa ho, Nini thlengin an nuih dar dar a, min ti zak fo ang tih ka hlau nghal ringawt. A thawveng hirh herh lutuk hi chu(h). Min ti ip chawih chawih thei lawm le.

An ţan leh hnuah pawh “Keichu infiam mi hi ka ngaina, an thlan mai mai te hi sexy ka ti” ka beng bulah a rawn ti ser ser. A awm ţhat deuh nan Aizawl ah an rawn dah a, mipa thlan mai mai a buaipui leh tho sia. Kan Nghak hir ha-i ve hi zawng, a ngaihna a awm hlawl lo a ni ber e.

Nini te aiin class ah kan lut hmasa a, inkhel ve lo mah ila hah tak ka ni.
“Naktukah tui vawt ka pai ţeuh ang a an inkhelh zawhah ka pe tawh ang” Nghaktei chuan a la ti tak deuh deuh a, en nawn leh ka chak tawh loh nen. Hmuhnawm ka tih chi a ni hlawl lo. Nini pawh chhe lo ti viau mah ila ball um a a tlan mai mai chu ka en reng peih chuang lo.

“Ka en tawh dawn lo” ka ti chhuak hap a, ka lu lei thlengin a sa vek.
“Ti maw? Kan en leh ang chu le, a hmuhnawm em kha, min phatsan dawn maw?” a ti nghal khar khar mai.

“In phatsan na pawh a ni lo. Hmuhnawm ka ti hleinem. Ni a sa bawk si ka thluak ka ngaihtuah” ka ti leh niah niah a, “Ngaihtuah duh suh thluak i nei hleinem. I neih ve pawn i lu ruh sir velah tereuhte a bet ve mai mai ang” min ti kher a, ka va ngei tak.
“Ka neih loh chuan i nei bik lo ang” ka ti hlak.
“Nei lo e, tuman ka neih an ring hleinem” a ti awlsam et a, a nui thler zui nasa hle.

Ban veleh Nini bawk chu kan ţhutna bulah lokal lehin “In chhungte an lokal a ngai lo” tiin min rawn hrilh a, kei aiin Nghaktein a kuah hmasa. Au chul chungin kan kuah bawrh bawrh a, ka pa’n a hre lo tur chu ka lawm kher mai. Kan pahnihin na deuhin min nam kat dawrh a, a meng rum leh tawh rapthlak.

Min en run chungin “Haw ang” a ti sup a, Nghaktei nen kan inhnaih nghal chawih sia, min melh tawn zak zak mai sin.

“Lokal ru” bul hmuk a a tih leh hnuah min hui thuak a, a chhuak zui nul nul. Phur fahranin kan zui chhuak a, chak deuhin a kal a, kan um dawr dawr. Garage ah bike la turin a lut a, keinin school gate pawnah kan lo nghak thung.

Kan ţhian dun a kan lo la ding reng a hmuh chuan a thaw hawk a, ‘chuang ru’ ti ni awm takin a lu a ti che zeuh a, Nghaktei nen min phur haw ta nge nge.
“I va chhang chhe sawt ve” ti a lo au el tawk te pawh an awm.

Ţhalai inkhawm zan a nih vangin inah ka pa a awm run a, “Pa, ka ţhiannu khan lehkha a rawn zir ve thung dawn nia aw” ka ti chuan lo bu nghatin “Dam lo tlawh tur pahnih kan nei a, ka chhuak lawk dawn. Awm lo mah ila ţha deuhin lo zir dun ru aw” a ti ţha ve mai. Ka insual chungchang a la sawi miah lo. A hre lo tak tak a nih hmel.

“I rei dawn em?” ti a ka zawh chuan chiang deuhin min rawn en a, “Pu Lawma te inah ka kawi leh ngei ang a, ani pawh an nu a damlo a, ka rei leh rei loh chu engatan nge i tih?” a ti ve khauh.

“Ngatan vak mah, i rei viau chuan ngaih a ţha lo ţhin a” ka tih chuan ka nu nen an nui ve ve.

“Ngaihţhat loh nachang i hre awkawng lo. I nung mawl ve tawp a, i insiamţhat loh chuan nakinah hrehawm i la ti ang. Mihring chin a hriat loh a, kan la dam pui chhung che hian insiam ţha rawh” a ti leh nghat nghat tawh.

“Kan tar ho dal dal ang chu” ka ti a, nui hak hak chungin a darah ka khawih pah zeuh.

“Kan dam chin turah thu kan nei lo. Thihna hi kan hnaih lutuk. Engthawl deuhin tal huat huat reng suh. I â bet but emai” a ti leh nang nang.

“Fa te â an ti reng ngai lo” ka ti hlak a, lungawi lo deuh a kalsawn pahin ka pa bul a ţhu No-i ka nam zeuh. Tum aiin ka nam na a, ke hlang at chung a ţhu ât a ni bawk nen chhuatah a hlum thla tawl mai. Ka nu in min hau miah lova a buaipui laiin ka pa’n “LALNUNMAWI” a ti ţeng chhuai mai.

“Ka si zeuh ringawt a tla lui a nih kha” thiam inchan tir tumin ka lo ti nghal thuai.

“Kal ţha mai ta la aw, i nau nam kher kher kha a ţul em ni?” vin lek lek hian a ti a, pindan parda vuanin ka ding teu mai.

“A samah ka khawih ringawt a lawm le. Ţan bik viau zel suh, a hlauhawm tehreng nen. Mumang lam a midang puih nan misual a beih nasat poh leh na ka tuar nasa. Ka tih ve hlekin min hau vak vak bik zel” ka ti zat zat.

“A thaw ât ţhin hi sawichhuah sak fo suh” ka pa in a tih laiin “A tho â ka tih loh kha. Tunah khan nangman i sawi chhuak chiah zawk” ti fuh inti takin ka lo ti thung.

“Mi hi i hnial pang pang zel lehnghal a, ka hrem zawk dawn che em mawn le?” a ti khui khui a, “Min hrem daih ten lehkha ka zir thei nang. Fail suh i tih ve ziah kha” ka lo ti veleh vat.

“Min chhang tawh suh” a ti fiak ţhak a, lungawi lo deuh chung hian “Ka chhang che pawh a ni lo a” ka ti zui nang nang.

“Hostel ah awm la a ţha ang. In nawm zia te hi hre ve reng reng la i awm ţha duh deuh ang” a ti nghat nghat a, min dah dawn tak tak lo tih hriain “A nuam daih zawk ang. Ţhiante nen kan inkawm reng thei ang a, hostel a awm ka duh fe” zang khai vahin ka lo ti vat.

“In zirtir tu te biak tur a nih chu” a ti nghet charh a, ka tello a awm thei der si lo.

“An be ve peih lo che” ka ti hlak a, min hauh leh hma in pindanah ka tlan lut. Khum a bawk vung chungin phone ka khawih a, Nini-a message a awm lo lehpek. Kei aiin a lo induh thiam zawk a nih hi a. Nge kan ţhian dun a min phurh leh a hlau zawk niang aw?

“Bawihi i ţhiannu a lo thleng tawh” ka nu in a tih veleh bag nen ka chhuak a, pindan a kan awm daih chuan ka pa ngaih a ţha lo lehpek ang.

Chaw ei dawhkanah kan ţhu ve vang a, hmuh phak rengah ka nu a awm ve sia, kan inmelh ralh ralh ringawt.

“Ka haw mai dawn ka zir peih si lo va, kan inkawm thei bawk si lo” tih hi Nghaktei chuan lehkhabu ah a ziak a, min rawn pek veleh “Min lo thlah rawh ti ngei ngei rawh” tih ziakin ka pe let leh.

“Ti khan a zo naktuk zanah a dang hi kan ti leh dawn nia, ka rin aiin a awl daih” zi mar al al chung hian Nghaktei chuan a ti ta nge nge a, lehkhabu khung ţhat pahin “Test mah ila hei kher kher hi chu kan thiam ngawt ang. Test thut pawh ka ngam” ka ti ve sawk sawk. Ka nu hriat phak ngei turin kan ţawng bawk.

“Kaw rawh min lo thlah rawh. Nu Hmingpui, Mawimawii hian min thlah lawk rawh se aw” ding uai tawh chung hian a ti a, “Awle, rei lo ula aw” ka nu in a lo ti ve mai bawk.

“A la hma tho a, i kalna ţhinah khan min hruai ve rawh” min en vung vung chungin a ti mauh mai.

Kan in lamah ka hawi let a, ka nu chu ka hlau vak lo. Thinrim viau mahse mi hauh thiam lo chi a ni ve a, ka pa in damlo a kan tih ka hre ru reng bawk.

Ka in ngaihtuah ve vang vang hnuah “Lokal rawh” ka ti chhuak ta hap a, kan inthlang lamah kan inzui thla hnak hnak.

“Rei miah lo ang aw, ka pa a lo haw hman vaih chuan min hrem tawh ngei ngei ang. Ka hruai zawk che nga haw lehnghal ila, nakinah school ban hunah kan kal leh zawk dawn nia” kal thlak zel pahin ka ti mawlh mawlh.

“Aw rei lo ang. Keipawh ka haw har ngam bik chuang hleinem. Meizial zuk ruk tur kan lo keng lo ni tiraw?” a la ti tak deuh deuh a.

“Ka duh tawh lo keichu. Ka awm chhung a thip vek alawm bakah ka pasal turin a phal loh kha” ka tih chuan “Ehh” a lo ti duai a, pherh deuhin kan nui zui uarh uarh.

In tawp ber kan pelh chuan tlemin a thim ta deuh. Mahse phone light kan chhi a, kan kal thla zel tho.
“A nawm em em dan hi. Chhungte hian zantin chhuah phal ve se, kal ziah thei ila chu kan hrisel ngawt ang tiraw?” ti a min zawh chuan lo bu nghauhin “Hrisel dawn e le..boruak a thiang a, ramhuai leh misual an awm chuang si lo a” pawr zet hian ka lo ti ve.

Rei deuh kan chhuk hnuah a zawl chin kan thleng a, “Kan chhuk thlakna lai leh helai zawl lai hi a reh zual lai a nia, penglengpunga te insual ka hmuh na hmun chiah a ni bawk. Zawl a kan phei zel chuan in a lo awm leh pheuh pheuh ang a, kan kal phei zel ang a, kan kual leh ang a, kawng chho lo awm ah kan chho leh ang a, kan in kan pawh leh ang” tiin kikawi deuhin ka hrilh a, a lo phur phian.

“I sawi ang chuan kal ang. Kaw rawh phei zel ang” tih leh min kaih a rual a, hlauhna leh vei em em nei lovin kan phei ve zel.

“Saw lai a saw thla ka hmu” ka beng bul a a rawn tih ser ser hnuah “Saw a ţhu vung mai” a tih zawm zat. A kawhna lai ka en ve a, kawngsirah chuan ţhu an awm ngei. Mahse lei a ţhu a ni lo, kan hnaih zel a, bike ah a ţhu a ni tih kan hmu chiah bawk.

“Tunlai thlahrang ho hmasawn chak zia hi, bike an nei tawh vel” ka ti fiamthu a, Nghaktei ka tih el a ni mah zawk.

A ţhu kun ngul a, lighter a talh alh zeuh zeuh, rilru hah deuh te pawh a ang alawm le. Mi pangai chu ni se an kal pel mai ang a, mahse keini ţhian dun chuan kan thei ve lo. Inthurual ang hrimin phone light in kan chhun a, a rawn hawi rang kher mai. A lo ên tak vu si ah chuan a zak kauin a kutphahin a hmai a hliah a, kan awmna lam a rawn hawi reng tho.

Nghaktein “U” a tih hluai laiin “Penglengpung” ka lo ti thung.

A ţhutna lamah kan pen phei hlawk hlawk a, eng tello pawh a kan hmuh dan ang ngeiin bike ah a ţhu. Nghah nei ang pawn a lang lo, awm ve mai mai a ang zawk.

A hma chiah a kan din veleh “Chhuak lo tur a ka tih che kha” a lo ti bul hmuk a, min melh leh run tawh. A nau zawk pawh hau mang si lo hi.

“Nang pawh i chhuak tho lawm” ka tih rualin a jacket ka kawl kha ka hrechhuak zawk.

Bul zet hian “Hmeichhia i nih kha” a ti leh a, ka ngaipawimawh lo nasa.

“A hlauhawm loh e, bakah Nghaktei a lokal tel ve tho a, ti nge nangmah chiah a i awm? Khaw nge i ţhiante an awm?” tiin ka zawt a, chaltlai viau mahse ţhat ka chhuah hram hram.

Ka zawhna chu hre lo der hmiahin “Haw rawh u” a ti leh sup a, ka ngei lutuk chu ka lo chek tlak.

“Nghak hir ha, i ţhiannu hi hruai haw rawh” thupe aw deuh hian a ti leh a, kan che eih lo hrim hrim.

Kan lam pan a lokal thawm kan hriat veleh kan vaiin kan hawi phei ţhap a, ka pa aw thian kharh ri ka hre zui zat. Nitin a aw thian ka hre ziah a, ka pa hrawk hnawk thian fai ri berkher chu ka hai lo khawp mai.

“Nghakte, ka pa te an an nih chu” hlauthawng deuh a ka tih veleh bike hnung a chuh vat a, ka tlan kual ruai reng thung.

“Ni e, saw lam a kual leh vak ai chuan chho deuh mahse he ta ţang hian kal tlang mai ang u. Kan thleng hma zawk ang” ti lung lung tu phei chu ka pa ngei a ni tih chiang lutuk in ka hria. Nghaktei nen a kan chhuk thlak na lam aţanga chhoh an tum chiang mai.

“He tah rawn bi ru ve mai rawh. Min rawn en si se lo vang” Nghaktei chuan lo ti mahse bihrukna ţha zawk zawngin ka hawi kual ruai a, kawng sir a hnim ţo zingah ţhu ve kuk mah ila min hmu dawn tho tho. Mahse ka pa te rawn pheina lam aţang chuan êng a rawn chhuak lo va, thla êng ring ringawt pawn a kal theih viau reng a ni.

Ke pen thawm a rawn hnaih lehzual hnu phei chuan ka ţap lek lek tawh. Ka hlauthawng lutuk chu ka zun thlengin a chhuak vek.

“In va ninawm” tih hluk pahin penglengpunga chu bike aţangin a rawn ţum thla tharh a, ka banrek a humin min pawt nghal hrawk lehnghal. Bike hnung lam ah min kalpuiin tlak loh nan a thir sang deuh thleng a an kaih ah min nam bet rawk rawk a, thir nem a nih vangin a che nasa em em mai lehnghal.
“Penglengpung ka ţhiannu kha i nam thla ang e aw” Nghaktein a lo ti ve khar khar, a ţawng ring ngam si lo a ban a vai ruai mai.

“Min si kher suh” seh chilh zet a tih pahin ka melh chho hrak a, “Ka thuk ru dawn che a nih hi. Ngawi hle hle rawh” a ti thum dut dut a, a vin lek lek tawh lehnghal.
“Ka—” a tih leh veleh a hmui ka lo hup vat a, ka pa te an rawn thleng ang a ni tawh a, ţawng chi a ni tawh lo.

A hmui ka hupna kut chu a rawn hum hnan a, ka bang nghen lai chu a kut leh lamin a nam run bawk. Min khuap hneh kher mai. Kan zawn an thlen chuan ka pa te ho ke pen chu a muang lehzual tih ka hre reng a, ka thinphu a rang takzet.

Ka kut a hum hnan na kha a thlah veleh kut ka la sawn vat a, ka hmel an hmuh loh nan a ti nge ka hmai tlang a chul kual zui dan dan a, a tawpah a kutzungpuiin ka hmui hnuai chu muangchangin a tuai zui zat.

A chet dan chu hrethiam lo viau mah ila ka dawh tawp. Ka pa ten min kal pelh tawh hnuah pawh ka lungphu a la inthum rawn tluk tluk a, ka beisei loh tawp thil a thleng ta thuai.

Ka hmui leh a hmui a insik rual chuan ka meng kawk a, ka hriatna zawng zawng a vir muai muai a, ka mit deuh sulh ni maiin ka hria. Kan hmui a in sik loh hnu pawhin awm hla chuang lo vin “Mipa dang bul a i awm hmuh leh ka duh tawh lo” zawi sup a a tih chuan mak tiin ka ang pham. Chu chu rem changah la in ka hmui hnuai a pet zeuh a, a kutzungpui bawk a a tuai leh hnuah “Ka duh che” a ti ta mai. Keimah aţangin a mit a la la sawn lo hrim hrim a, min ti zam ve det.

“Awii…penglengpunga fiamthu duh zia hi” ka ti chhuak hluai a, ka chhuan lam mai mai. A fiamthu niin ka hre lo va, ka beisei loh lutuk thil a thlen vang chuan ka tha thlengin a khur lek lek.

“Eng nge in la tih a? Ipa te thawm a reh vek tawh hi, in tih ka hria nia aw” Nghaktein per zet a a rawn tih takah chuan rang lutukin a awmah ka nam dawrh a, ka ţhiannu ngei mai chuan a unaupa nen chuan phawk hra hian min melh tawn zak zak mai.

“In tih ka hria nia aw” phawk deuh a meng reng chung hian a ti nawn leh a, “Ka lo hawina a rei tawh nia aw” a tih zui zat. A ţawng ţhin dan aia let hnih vel a rangin a ţawng lehnghal.

“Kal ang” tih leh kal ka rual a, hawi let miah lovin chak deuhin ka kal nghal nal nal.

“Penglengpunga khan a duh che mi? A ţawngzawi lutuk a ka hre ţha thei lo a, ka duh che a ti tiraw? A duh chiang lutuk che” ti tan tan chung hian min um dawr dawr a, min umphak veleh ka banah min kuah nghal ţung.

Ţawng duh viau siin sawi tur ka hre der lo. Ka hmui awm dan te hi a dik thei tawh lo. Hriat chhuah ka neih veleh ka ding chawt a, Nghaktei pen pawk tawh pawh a rawn let leh.

“Eng nge a?” a tih he haw lai chuan lu ka thing nawk nawk. Mipa tumah ka la fawp ngai lo hrim hrim. Naupanlai a inneih lem lem kan chin lai takngial pawn ka la fawp lo.

“Kal chak ang ka pa’n min thlen khalh ang” ka ti hlak a, ka kal pui leh dawr dawr a, penglengpunga berkher ka mipa fawh hmasak ber a ni hi ka la awih thei lo. Ding leh chawtin ring deuhin ka au a, Nghaktei a phu nasa kher mai.

“Eng nge i ngaihtuah?” a ti chhuak hluai nghe nghe. Min fawp ve ringawt kha mak ka ti tawp hleithei lo. Min fawh lai khan a nui deuh lehnghalin ka hria. Ka awm dan hi ka sawi thiam lo.

“Kal chak ang” ka ti leh ringawt a, “In in chuk zeuh a, in in bye bye lehnghal sia, mahse Nini nen in ni dawn maw ka tia” hrethiam lo fe hian Nghaktei chuan a ti leh niah niah a, kan kal chak bawk a kan thaw hliam hliam mai.

Bike ri kan hriat te pawh chuan ka haider tlat. Hmuh pawh ka hmu ngam tawh kher lo vang. Ka hriatna a buai miau vangin ka dawh ve mai bawk sia, ka lo dawh kher kher a ni.

“Lo chuang ru” mipa aw thum deuhin a rawn tih tak hmukah chuan penglengpunga a ni tih hria in ka kal chak sauh. A rui leh pek tawh nga hmeichhe dang emaw min ti a ni ngei ngei ang. A ruih vang mai mai a nih ngat phei chuan min ngainep dawn lutuk.

“I pa i thlen khalh duh chuan tunah rawn lawn rawh” thupe aw zet hian a rawn ti leh a, keimah bik min be leh tawh lehnghal.

“I bike hnung a sang ropui si engtin nge pathum kan chuan theih nga?” vin zetin Nghaktein a lo ti ve thung.

“In rawn lawn dawn nge dawn lo?” rum ul hian a ti leh tawh a, ka pa’n min thlen khalh loh nan ka chuan ngei ngei a ngai bawk si, ka thinrim ţun thei.

“A hnung berah ka ţhu ang. Nghakte a laiah ţhu rawh” ka ti ta nge nge. Bike hma a ti eng reng bawk a, chiang deuhin ka hmu thei. Ro ka rel zat zat lai te khan nui ruh ruh chungin min melh run a, ben sawk mai ka duh.

Ka sawi ang chiahin kan ţhu ta ngei e, “Awii ka mawng thli in a chhem char char bik a nia, in pahnih inkarah ka ţhu sia, seat ka si full ve thei lo. Keichu ka awm dan hi a hrehawm e. Tlan chak suh aw u, i tlan chak chuan ka buk euh euh mai ang” kan thlan chhuah rualin Nghaktein a ti nghal niah niah a, “Nghak hir ha ka kawrah chauh ţham rawh. Ka vun ţham tel suh” Penglengpunga’n vin lek lekin a lo ti ve thung. Keipawh ka mal a vuan ţai mai.

“A hrehawm a lawm mawle. Ka rawn ţhut thlak ve chuan i chhuak daih dawn sia, ka tawlh chhoh leh Mawimawii a tla dawn bawk sia, ngawi rawh…U ding lawk teh ka ţang lutuk a ka ke zungpui a aikhirh” a ti leh rih ţhin. Penglengpunga darah a beng pawp pawp a, a ding ta cheng a, che miah lo in a vanvadak leh dauh dauh sia.

“Chhuk ta si che” Penglengpunga bawkin a lo ti vin ţhawt a, “Chhuk kher a ngai lo ka siam ţha mek. Ţang ţeuh a ţhut a ngai sia, hnuai lam hawi zawngin ka dah kun rei lutuk a a aikhirh hman alawm” a ti leh niah niah a, a siam ţhat veleh a che hrut a, “Tlan leh tawh rawh” a ti zui zat.

A nau a ngaihtuah ve deuh a niang min tlan chak pui lem lo. Ka pa te chhohna tur kawng kha anni tan chuan a thui dawn tih ka hria. An in fit vak tawh lo bawk a, an kal rei ve ang. Kan thleng hmasa dawn chiang lutuk. Thlamuang deuh tawh mah ila ka hmui hi a la dik thei lo. A za mer mer ni mai ten ka hria.

Kan inkawtah ka chhuk tharh a, “Mawimawi naktuk zanah chuk bye mualah khan kal leh ang aw” ti a Nghaktein min sawm chuan a ngaihna hre lo vin ka hawi hai viau. Penglengpunga erawh a lo nui hawk.

“Eng nge chuk bye mual chu?” ka ti he haw a, ka hre lo miau alawm.

“Aw kan bihrukna hmun kha” a tih takah chuan ka zak thar leh. Penglengpunga min fawhna hmun a sawina. ‘In in chuk zeuh a, in in bye bye lehnghal a’ a tih tak kha mawle.

Rum fe a penglengpunga melh pahin “Midang awm laiin khatiang kha ti kher mah ta che” ka ti vin hlar a, tih el zet a min melh ve run chung hian “Midang awm loh lai chuan i duh tho maw?” tiin ngeiawm fahranin min zawt let a nih chu.

“Nangmah vang vek” a hma aia vin zawk mah a ka tih hnuah a ngal ah ka pet pawp a, kan in lamah ka kal nal nal.

Kawngkhar ka pawt hawng rawp a, ka pa a lo awm reng tawh. Min melh khui khui a, “Lalnunmawi khawiah nge i kal?” lu chet det det chung hian a lo ti a, a thinrim leh hle tawh a nih hmel. A ding luah lehnghal. Engtin nge an thlen hmasak theih le? Pu Siama fapa in a hruai leh tawh a ni ngei ngei ang.

“Nghaktei te inah” ka ti chhuak sep.

“I nu’n a phone vek. I kal lo reng reng. Ngati nge zan thim hian a hip tlat che? Bialpa te hi i lo nei ru ve reng a ni lo maw?” a tih chuan ka lo nui hak.

“Nei lo rapthlak e a(h). Nei mah ila pawnah ka hmu kher dawn tihna a ni hleinem” rang zet hian ka ti a, min rawn hnaih thut a, ka chalah ri fawk khawpin min pen. A kut a thawk khum hmasa lo va, thawk khum hmasa se chu ka inveng hman tur a nia.

“Kut min thlak ve ziah suh” ka chal tuai vut vut chungin ka ti hlak.

“Mi pa te chu ni se an vaw nasa tawh viau ang che. Ti khan rei vak lo a sa ham ham ang a a reh zui mai ang” a ti liam puat a, ţhut pahin thingpui a lam nghal zat lehnghal.

“Ka sa huat ah te pen palh ta la ka thi mai dawn sin” ka la ti ţalh.

“I chal te zawng, a kum a kum ka nawr kual tawh a, i sa huat lai awm chu ka hre lutuk. Ka pen fuh lo vang. Vawiin ah ka kut tin lo tla hman hlauh lo se chu kha ai khan a na ang. I thuawih loh vang a khatiang a ti kha ka nia, thuawih tawh ang che” a ti dam leh thlup lawi sia, ka pa hi chu hriatthiam a har ve hrim hrim.

CONT…

Leave a Reply