You are currently viewing TROUBLEMAKERS-11

TROUBLEMAKERS-11

Spread the love

TROUBLEMAKERS-11

“Ngati nge i la tei i la tei? Va mu hle hle rawh” inchhung a ka kal kual mai mai pawh ka pa’n min lo khak leh tawh.

“Hriatna tih harh ka tum a nih hi, min lo en liam mai mai rawh” kal kual reng chung hian ka ti a, zan a rei tual tual a, ka pangai thei lo telh telh.

“Ka pen che avang khan i hriatna i ti buai leh ta ni maw?” a ti deuh kher lehnghal. Amah vang a ni der si lo.

“Ka hriatna buai sa i belh chhah zawk. I rilru hi a mak emai, nangmahah in kuai lut vek zel suh. Rilru chhe deuh min put tir i tum” ding meuhin ka ti veleh vat.

“Khanglang che chuan, mi ila zilh zawk zamah em maw ni?” a ti leh khui khui tawh a, ka chhuah ruk vang khan a lung a la awi thei meuh lo.

“Min puh dan kha ngaihtuah ve la, nangpawh i lawm bik nang” ka lo ti hlak. In pet ruh leh tawh viau mahse ka hlau bik lo. Vawikhat min pen tawh a, a ti tawh dawn lo chiang sa.

“Ti hian nu leh pa duhthusam let ling thawkin i nung mai mai chu a nia, zahna chang lah i hre der lo lehnghal” a ti ban charh a, ner nui chung hian “Tu nge mahni inchhungah zak ngai?” ka lo ti ve khauh.

“Pawn lamah pawh i zak chuang lo. I nun i sim loh chuan i la inchhir ang” a tih te chuan ka lo sawipui vel a, “Insiamţhatna hun i neih lai hian insiamţha rawh tih tel i tum” ka ti nghal zat. Sawi ngai a sawi ngun ve thei bawk em a ni.

“Ka thinrim hma hian va mu rawh” ti hmak tawh mahse “Ngawi rih rawh ka la harh fim lo” ka ti tlat. Chuk bye mual a thil thleng kha nawh reh phawt ka ngai tlat.

“Harhfim lo turin pawnah khan eng nge i tih?” tiin ding meuhin min zawt a, min en chiang hle bawk.

“Ka kal mai mai. Thil ţha lo engmah ka ti lo aw” ka lo ti vat a, min hmu ru reng ang tih ka hlau. Mahse min hmu se chu a zep dawn lo chiang sa a, ka thlen hlim la la khan a sawi chhuak ang.

“Ka ringhlel riau mai che. Zan dangah hetiangin inchhungah i zuang kual reng ngai lo. Sawi vek rawh, eng thil chiah nge i tih?” a ti ta khar khar mai.

“Engmah ka ti lo ka tih mawlh mawlh kha. Exer kan la ringawt alawm” ka tih hnu a kal mai ka tum chu ka kawr lukhum ah a man hman.

“Tu nge zanah exer la ngai? Ruih chi te hi i lo ti ru ve a ni lo maw?” tiin min dawp leh a, lu ka thing rang nasa.

“Ka la rui chhin eih lo aw” ti chang fak mah ila “Ti hian lo ding reng ang che” tih leh an pindan lam a kal a rual a, hman lai torch light lian lawk bur nen a rawn chhuak leh vat. Ka nu in a rawn zui chhuak ve tawh nghe nghe.

Ka chalah min nam dak awrh a, ka mit keuin a torch light rawn lak chhuah êng lutuk tak mai chuan min chhun a nih chu.
“Natna ka nei hleinem, ngati nge light a ka mit i chhun ringawt?” a ban a vuan ţung chungin ka ti ţawk ţawk a, “I ruih leh ruih loh ka en a nih hi. Lo che lo che suh” a ti leh hmak a, ka mit pahnih a keu tawn chhen a, min thlah meuh chuan engmah ka hmu thei lo. Ka dak nasa in ka dah hun chhung a rei a, ka mit a vai muai muai a, ka lu a hai chhup mai bawk. Mit ka nuai nawk nawk hnuah chiang lo ruai chuan ka hmu thei a, ka nu in dim te in min lo dawm reng bawk.

“Ka rui em?” ti a ka zawh chuan “Rui lo” buk nghut pah hian a lo ti hluk a, ka rui lo chu a thinrim zawk emaw tih mai tur a ni.

“Êngin i chhun kher a, an mit no te chiang deuh a en hian a hriat mai an ti ni lawm ni?” tiin ka nu’n a lo zawt ve bawk.

“Torch light nen a chiang nge nge. Ka harhfim lo i ti reng a, i phi cheng bawk a, ruih nei i ang riau” a ti leh nghat nghat a, a chhe zawng hlirin a ngaihtuah lehpek tawh a nih hi.

“Inchhung a zalen deuh a awm tur ti ve si kal kual mai mai pawh phal lo. Ka rui lo nasa ropui lehnghal” ka ti hlak hlak a, thinrim deuhin pindan ka pan daih.

“Hlik hlek che hian, mawng leh tukhum invaw chawrh chawrh khawp a na hian i kal tau ţhin lehnghal a, inhnuai chu nei ila i titau pen ringawt vang hian an insawn chhuak zut reng ang” a ti deuh duah a, ka ngaithla tawh mang si lo, ţawng hah peih mai mai lutuk.

Thinrim deuhin khumah ka mu meng kar reng ringawt. Mit ka chhin hlek chuan chuk bye mual a thil thleng kha ka hmu zel. A rawn kun hniam lai te khan lo thle sawn daih ila ţha tur, tumah ka la fawh loh vangin min fawp dawn tih ka hre lo hrim hrim. Ka meng kawr lehnghal a, a zia lo tak tak a ni. Ka mipa fawh hmasak ber atan penglengpunga hi ka duh lo hrim hrim. Ka bialpa pawh a ni lo va, ngati nge min fawh ve ringawt le?

‘Ka duh che’ a ti ri khan ka hriatna a rawn luah ve thung a, ka ning zo zai tawh lutuk. Vawikhat min fawh vang a ka rilru a a awm reng te hi ka duh lo. A ruih vangin min fiam kual leh mai mai tawh a niang. Ngati nge a ruih ve sek le?

“KA NING” tih tuarh pahin ka ţhu chhuak a, ka nau No-i a che nghal ţuah ţuah, rilru buai lai lai a a thawh ât chuan a chak lo khawp ang.

Rilru lak pen nan phone ka en a, Nini-a message lah a lo thleng thei der lo. He pa pawh hi a induh ngit nget reuh lutuk mai. Penglengpunga takngial pawn min rawn be lo. Min duh ang a awm ve ve siin min be peih lo ni maiah ka ngai. Min duh tak tak lo tihna. Penglengpunga phei chuan thupha chawina a rawn thawn duah ka ring a nia, mi thianghlim min ti bawlhhlawh ringawt a lawm. Ngaihdam dil ka phut ve tlat.

Ka tlaivar deuh thaw bawk a, zing ka thawh chuan lu a hai chhulh thei hial. Phur lo deuhin ka insiam a, Nghaktei sawm phei ka huphurh. Penglengpunga a lo awm veleh luau ang tih ka hlau. In ka chhuahsan dawnah ka pa’n “Rei miah suh ang che” a lo ti leh hluk a, ka chhang buai peih vel lo. Ka school bang ka haw tlang lo ngai mang lo.

Ka hlauh ruk ang ngeiin gate hmaah a lo ding run a, a mit duk pawh tlemin a zia ta deuh e. Chak deuh a kal pelh mai ka tum chu ka kalna tur min lo dâl luih kher vangin a awmah ka intauh dawt. Ner nang nang chung hian ka melh chho nghal hrak.

“Nge min dâl luih kher a?” vin zet a ka tih chuan “Min su lui zawk” tiin nui sukin ngeiawm fahranin min chhang let nghut.

“I awm lohna lamah ka kal a, min dâl turin ka kalna ah kher i rawn awm phei zawk a nih kha. In in pawh ni se duh duh hunah ka lut ve thei tho. I ruih lai a min fiam mai mai theih vang khan min ti buai zui sek kher suh aw” ka tih tan tan lai chuan min ti zim sun hian min lo melh chhuk run a, hnuai lam ka melh thla leh riai riai ringawt.

“Ka rui lo” a ti sup ri ka hriat rualin nui hak chung hian ka hawi chhuak leh a, “Rui miah lo chung pawn khatiang zawng khan min fiam tho maw?” nui hmel la pu reng chung hian ka ti leh a, ka zah em vangin min fiam mai mai ang a puh thluk tum ţalh mah ila tak runin a awm thung.

Tih ngaihna dang hre miau hek lo “Hetah eng nge i tih reng reng?” ka ti ta ringawt.

“Ka lo nghak che” tiin min lo chhang leh pek a, sawi tur hre lo va ka din reng lai chuan “Ka hmu chak che a” min nuihzat hmel tak hian a rawn ti leh kher a, “Min hmu chak thut vel suh. Min din hliah khan duh tawk mai ta che. Khatiang a min tih kher kha a ngai mi?” ka ti vin hlak hlak a, “Engtin nge ka tih che?” a rawn ti let khauh.

“Hre lo der vel lo mai teh. Nghal chikimin i nghal” ka ti deuh thawr. Hauh chiam dawnin ka zak ve tho bawk si, ka pa min hauh ţhin danin ka hau ta ringawt.

“Ka puih che kha” bul hmuk a a tih chuan “Pui reng e, min pui mah mah a nih kha” pawr zetin ka lo ti ve hlak.

“Thinchhe si” a tih hluk hnuah “Mahse ka duh tho che” tlem a nuihza insum deuh chung hian a rawn ti leh sup a, ka ngei tawk tur a min chhaih dan a thiam thei viau mai.

“Ka duh ve lo che” ka tih lai takin “Nang ni pahnih kha in lo in chal tauh leh ang e aw” ti lang lang chungin Nghaktei a rawn chhuak a, ka duh loh zia ka sawifiah hma hmain min rawn ti buai leh tawh. Bag lianpui ah rit tih hmel deuhin eng emaw a rawn khai chhuak pur pur a, hmu kher lo mah ila tui vawt a nih ka ring hmiah.

“Eng nge i khai?” penglengpunga zawk chuan mak tih hmel lutuk a melh run chung hian a lo ti vat a, “Duh duh a khai ang. I lo buai ve na tur a ni lo. School naupang pawh inih ve tawh loh kha. Inkhelh pawh i thiam ve lo a, Nghaktei khai lai saw i ta tur a ni lo. Hriat tum ve phet zel duh” ka lo ti tan tan.

“Ka zawt zit zet lo che. I ţawng theih nen fawh i nuam phian a” a tih lai chuan tih elna ka hre tel. Min fiam zui nan a hmang dawn ka tih tawh kha. Ka lo dawh kher kher kha ka inchhir telh telh.

“Sawi ve ziah suh ka tih tawh kha, ka duh vang a ni miah lo lehnghal. Sual deuh chu ni ila ka khing ang che” ka tih chuan a nui chhuak ta hawk a, tih el fe a min melhin “Nuam itih em kha” a la ti zui. Nuam tih vang a meng phar awn awn chung a taksa khawng awt awt ka hre ngai lo ve.

“Eng nge i khai ka tih chu Nghak hir ha?” vin lek lek a tih pahin Nghaktei bag khai lai a phih thlak sak a, ţhu tung chung meuh a a hawng chiah chu a hma ai mahin mak a ti emaw tih mai tur a ni “Hetiang zat hi tui in tum a maw?” bag kawk va chung hian a ti chhuak thawr mai.

“I in zung da vek ang. Test tur in nei mi?” tiin dinchhuah pahin Nghaktei a zawt leh a, a en chik khawp lehnghal.

“Nei lo, nei mah ila test dawn vang a tui in vak vak nachhan tur a awm hleinem” Nghaktein a lo ti ve hlar a, a vin ve ta nge nge chu ka lo lawm kher a sin.

“Zun pahin a entawn zeuh zeuh theih a” penglengpunga’n a tih bul bul chuan ka lo nui hak. Amah ang vek a sual turah min ngai em maw ni?

“Kan in entawn pass ve ngai lo. Nang angin kan fail ve reng ngai lo bawk a, keini chuan lehkhazir nachang kan hria, nang angin entawn tur ringawtin test kan hmachhawn ngai lo” elsen zet a ka tih lai chuan nui ruh ruh chungin a lo ngaithla a, Nghaktein mitmeiin min lo khap lo se chu ka a rilru ti na khawpin ka ţawng ang.

“Lalrintluang rawn insiam vat ta che. Kal hma ka ngai i ti i tia ni lawm ni?” kawngkhar a rawn dak meuhin Nu Mahruaiin a rawn au lang lang a, “Saw nu lah saw au ring thei” penglengpunga chuan a lo ti vin ve hluk. An inhmeh nufa zia a hre der si lo.

“Au vak vak zel suh. Kan vengah Mahruaii a au ring thei ber an tih ziah che hi” in lam a phei pahin a ti ve lung lung a, an inchhun ka tih tawh kha.

“Kan vengah penglengpunga a all round ber an ti ziah bawk. Phun phun lo khan rawn phei mai mai teh” vin deuh bawkin a ti leh hlak hlak a, a ri meuhin ka nui kher a, penglengpunga a rawn lehhawi phah.

“Lal careful-a kha inphurh tir tawh suh ang che” thupe aw zet hian a ti hluk a, “I thu lo ber” uar zet a ka tih chuan “Fel deuhin awm la aw, ka bialnu” nui suk chung a a tih hnuah in lamah a kal nghal nul nul. Ka va ngei mai mai ţhin tak. A hnung lam ka chhiat khum vak vak a, min bye bye ni awm takin rawn hawi let miah lovin a ban a la vai zui. Ka chhiat khum nasat zia hria se chu min bye bye peih miah lo vang. Ronnie pawh min phurh rei a duh vang mai a tlanmuang lui a nia, Lal careful-a a nihna chhan tur a awm lo hrim hrim.

“Awi…penglengpunga ka ngei zia hi chu aw” uar zetin ka ti chhuak ta reng bawk.

“Ngei deuh te hi an hmangaih daih duh nia” Nghaktein a lo ti khauh a, sawi kher lo mahse school pan a kan kal veleh bag ka zawn pui nghal.

“Ka hmangaih awm lo e..hetiang ţawngthei si, insual hrat si, rui ve peih bawk si hi ka hmangaih phawt chuan chuk bye mualah ngei khan keimah zawkin penglengpunga ka fawp hmasa ang” thinrim zet a ka tih chuan Nghaktei a nui ta ver ver.

“Ronnie hi ka duh pui tawh lo che. Ka u ka ţan vang ni lovin a ngaihtuah tawk lo che ka ti” a ti leh hnuhnawh. A rilru ngheh loh zia hi.

“I u i ţan vang a nih kha. I pasal tur iti vek tawh ni lawm ni?” melh hrak chung hian ka ti a, “Ka uang a nih kha, school kal lai a in ngaizawng chu an inţhen leh ngei ngei. Bakah kum inrual chiah chu a ţha lo. Inkhelh pawh a thiam vak loh kha. Ţhiante zarah a pet goal ve mai mai” a lo ti veleh zat zat a, cousin mai mai pawh ni se an lo in hmangaih viau a nih dawn hi.

“Hrim hrimin tinge penglengpunga kha fail ţhin ang a i sawi ringawt a? Ka lo khap hman hlauh che a, a fail ngai reng reng lo aw” a tih leh phei chuan ka thinrim hmel chu mak tihna in a thlak thleng rang viau ang le.

“A fail ngai lo maw?” ka ti tuarh a, lo bu nghat nghat mahse ka awih chuang lo.

“I ţan vang mai mai nih kha a, penglengpunga te ang thawveng satliahin lehkha an zir peih lo” ka tih chuan “Lehkhazir peih lo thawveng satliah i tih chuan thawveng satliah kan ni ve tho” a lo ti hmak.

Kan bul a bike a din dat rualin Ronnie chuan “In in bulah ka nghak che a, nidang aiin i kal hma ni maw?” a rawn ti a, Nghaktei thil khai a melh zeuh hnuah keimah bawk min en leh. A hmel na na na hi chu ţha ka ti ve thlawt.

“Aw, Nghaktei ka sawm kawi duh sia chaw ka ei hma a ka kal nghal daih” ka lo ti a, min rawn be ve mai se chuan min nghak thlawn lo ni mai tur.

“Lokal ru ţan a hun ţep tawh” a tih chuan ka sana bunlai ka en vat. Penglengpunga vang bawkin kan tlai lek lek tawh. Buaina ral lian a va ni ve chiang tak.

“School a hla tawh chuang lo a, ke in kan kal mai ang” Nghaktein a lo ti tlat tawh a, ani ngat phei chu chuang mahse tuman engahmah an ngai awm tawp si lo.

“Lo han kal rawh i tlai ang” Nini-an Nghaktei bul a a tih hnuah min rawn enin “Lawn rawh” a ti leh nghut a, ţawngka a ka chhan chuan a rilru nat ka hlau sia, lu ka thing ta mai.

“Nangmahin kal mai rawh Lal careful, keini chu i hnungah kan lokal ang. Duh leh kan rualin tlan ve zel la, kan ti ti pah ang a” Nghaktei bawk chuan a lo ti leh a, a rukin ka kheuh zeuh a, “Min kawm suh penglengping, dek ka hua a nia” a ti chhuak hluai lehnghal.

“In rawn kal duh lo maw?” tiin Ronnie chuan min zawt leh a, “Aw ke in kan kal mai ang” zawi tein ka lo ti sap. Nuam lo ka ti ve em a ni.
“Aw kal ru” a ti bul hmuk a, chak deuh a a tlan nghal daih chu kawkin “I hmu maw? I unaupa i ţan em em a, tun a a tlan kha i hmu em? Lal careful-a a ni thei lo hrim hrim” ka ti tan tan mai.

“Mi inkar a inrawlh tum hi ka ngaithei lo” pen hlawk hlawk chung hian a ti a, tlai kan hlau bawk a kan kal chak tawh rapthlak.

“Tu nge inrawlh tum? Ronnie nen kan inkar a inrawlh zawk chu penglengpunga lawm” tiin Ronnie thlavang ka hauh ve thung.

“Penglengpunga chuan ka duh che a ti mai a, a zep buai ve si se lo. Ronnie ve chu duh ang deuh che in a awm a, sawi chiang duh tak tak mang si lo. Beiseina beidawnthlak a ni ringawt a lawm” a tih hmarh hmarh lai chuan “I sawi awmzia ka hre lo e a” ka lo ti ve hlak.

“Ronnie chuan i beiseina te beidawnnaah a chantir a, penglengpunga chuan i beiseina a chhem alh sak zawk che” tiin min hrilhfiah ve ngei mahse “Penglengpunga ah hian beisei ka nei lo hrim hrim” ka lo ti vat.

“Chu reng chu lawm a sial na, beiseina nei miah lo chungin beiseina a siam che a, tih beidawn che chu khawi lam a chhem alh nghal hluah hluah a, i hmuiah chil a hnawm tawh bawk a” a ti tel kher.

“Chil a hnawm kher lo” ti hlar mah ila “Ehh…hre lo ve maw…in chuks hian hmui a ro rap ngai lo. In chuka chuks ve chung pawh a hmui ro rap zel chu an zei lo ve ve tihna. Zei tak takin min chuks chuan hmui a hnawng hlarh a, a hnu ah ân zau ngam loh lekin a ro thung. Pathian hian min siamdan hi a ropui a sin” a ti daih. Pathian nen inzawmna a nei lo hrim hrim a, ka pa’n Pathian hming a fiamthu thawh a phal miah lo bawk. Mahse Nghaktei hi a fiamthu lo. A mawl ti dawn ila kei aiin hriat a ngah daih zawk bawk sia.

School gate kan thlen thlak hmain bell a ri rang rang tawh. Sir pawh gate chhungah a lut ve chiah a, kan awm tih pawh hre lovin hawk dak vang hrim hrimin a rawn hawi let a, min hmuh veleh a kut a min huiin “Rawn hmanhmawh ta che u. Bell ri kha in hre lo em ni?” a rawn ti lauh lauh mai.

“Hria e kan thil khai a rit lutuk a, kan rilru chu a hmanhmawh ve lutuk” ka lo ti ve vat a, zau deuh deuh a kan pen chung pawhin “Rawn tlan thuai ru” a ti leh ngat. Ka au ri kha a hre pha awm reng sia.

“Kan tlan thei lo Sir..a rit lutuk a, a ţhen hi a khal bawk sia, bottle lian pui pui hlir a nia, chak deuhin kan kal ve tho hi” Nghatein a lo ti ve thung.

“Devotion a in tel hman loh chuan an hrem dawn che u nia” a rawn tih leh chuan “Awm ve duh mah ila kan kal chak thei lo a nih hi. Sir min lo zawn pui mai teh” Nghaktei bawkin a lo ti leh. Sir chu a kal nghal daih a, min zawn pui loh hmel rapthlak. A tirah khan rit em em lo mahse chauh tawh nen chuan rit duh tak a ni. Kawng chho kan kal pui tawh a, kan chhuk pui leh mek a, ban a rawl vek tawh.

“Min hrem phah vaih chuan aw, nidangah pai sak tawh reng reng suh. School a mi an in ve thei reng alawm” ka ti hlak hlak a, “Nia ka pai tawh dawn lo. Ka kawng te a na, ka inherh mai dawnin ka hria. Mipa vang a rilru nat ka tum ngai lo hrim hrim a, mipa vang a inherh phei chu ka tum lo lehzual” a ti ve ta nge nge a, ka lawm ru kher a sin aw…a chau ve takzet a nih hmel.

Hremna kan pumpelh hlauh bawk a thlamuang deuhin class ah kan ţhu ve vung. Nghaktein “Penglengpunga bialnu penglengping” min tih chuan lehkhabu in a hnungah na deuhin ka vua a, class ţan aţangin a khat tawkin penglengping min rawn ti ziah a, ka kham tawh lutuk.

“Penglengpingi ka ni ziah lo” vin zet a ka tih chu nui dar dar riin a chhunzawm. Miss in rum deuhin min melh a, midang in min nuih vek thung.

“Ding teh u” a ti chhum hmak a, hnuai lam bih run chungin kan ding zal zal.
“Class a rilru pe lo ber in ni ziah a, thiam lo zingah in tel ziah bawk. Khatiang a in awm leh chuan ka class ah in awm thei tawh lo ang” khauh zet hian a ti a, Miss Duhtei ţhin hi chu a, a pial pet reuh lehnghal a.

Kan ţhut hnuah pawh “Nangmah vang” tiin kan in mawhpuh tawn a, mahse kan ţawng ring tawh lo. Ka lehkhabu lah chu ka pa’n a la ţhui ve loh berkher a ni sia, a kawm a tla daih. Bel ţhat a ţhui leh theih a la ni tho bawk a, zan a ka pa siam turin a karah ka zep.

Zanah ka pa hnenah lehkhabu chu ka pe ngei a, a kawm ka zehna phek ber ka hriat tawh loh vangin a kawm zawng a keu kual chung hian “A mak mang e aw..i ţhiante thleng a i ţhuai bung rem rum lo hi a lawmawm ti tawh mai ang. I lehkhabu keu ngai loh a ni tih a hriat ngawih ngawih laiin a kawm a tla hlawk tho si. Aizawl ah hma a sawn deuh ang chu tih laiin nangmah ang chiah ţhian i nei lehnghal a” a tih chuar chuar laiin Mampuia lehkhazir chuan “5+0 chu 50” thiam inti fe hian a lo ti ve lauh a, ka pa a hui pap mai.

“No-i chu awm lo se chu kan beidawng ngawt ngawt reng mai dawn nih hi” a ti chhuak hap a, ka nu’n “Mampuia te chuan a la zir ţan dawn chauh a lawm. No-i lah pakhatna a ni char char a, Mawimawii pawh a zir duh chuan a rilru chak. Naupang dang aia an ţhat loh bikna a awm lo reng reng” a lo ti vat thung.

Ka nu pindan a a luh veleh “Thir hmang a siam lehkhabu te, thawmhnaw leh pheikhawk te awm se ţha tur. I tlo ve deuh ang” a ti leh kher. Ka ţhat lohna a hriat theih zia ka sawi vek tawh kha.

Ka hnial hman hma hmain hlau hlawpin ka nu a rawn tlan chhuak a, ka pa’n tuboh a ka lehkhabu a chhut lai mek pawh a tawp chawt.

“Eng nge ni?” tiin ka pa chuan a lo zawt thuai a, pindan lam kawh pahin ka nu chuan “Huan ah khuan eng emaw a awm. Hnim hnah ro a ri leh rek rek zel a, misual a nih loh paw’n eng emaw tak a niang. Saphai te hi a lo awm ang e” a ti mawlh mawlh mai.

“Khawi a saphai mah a awm lovang e. In a ding thleh thluah a, misual pawh an beiseiawm loh. Nunmawii ang hian hlauh nei miah lo ula ţha tur” inti huaisen tak hian a ti pang pang a, misual hlauh vangin kan pindan kawngka lu ah bell a dah reng sia, a hre lo der leh hmak tawh.

Tuboh hum ran chungin pindan lamah a phei den den a, a hnungah perek kengin ka zui det det.
“Perek a ka nawr veleh rawn chhu tlum pawp rawh aw pa” ka ti dek dek a, “Let rawh hawkdak heu hau lutuk mai. Ka nâk ah mi vuan ţung suh, a za” a ti leh hluk hluk tawh. Nghaktei ang chiahin ka pa pawh hian dêk a haw ve.

Tukverh karchehin kan ding a, awmze nei deuhin kan inmelh ran. Hnim ro a ri leh rak a, ka pa lu a chet det rualin tuboh a hum nghet sauh.

“Tukverh hi hawng rawh” a ti deuh hmuk a, lu thin pahin “Hawng hmasa rawh” ka lo ti tlat.
“A harsat loh nen hian aw” ti nang nang chungin a hawng a, tu emaw a ţawng thum dut dut a, a thusawi hre thei lo mah ila penglengpunga aw ngei a ni tih ka hria.

“Ar um tur ringawt a inkoh chhuah chu a zia lo e” ti a ring leng lawng a ţawng ri kan hria a, mahse penglengpunga a ni lo.

“Lei thar a nia, a la tlangnel lo. Zawng ringawt rawh” ti vin hluk tu chu penglengpunga a ni ve thung. An ţawng apiangin inring deuhin ka pa a lo che leh det ţhin a, a tuboh ken lai chu a vawm thla ang tih ka lo hlau khawp mai.

“Huanah khan tu nge awm?” ti a ka pa a au takah chuan thawm a reh hmak.
“In awm tih kan hria a nia, tu te nge in nih?” a tih zawm leh a, penglengpunga ţhianpa zawk khan “Ar kan zawng a, Pu Buatsaiha huan aţangin in huanah hian a rawnkal phei a nih kan ring a” a lo ti lauh lauh a, kan awmna hi Aizawl ah ro ro pawh a veng a la thingtlang ve deuh a, a mi chengte changkang tho mahse a awmdan hrim hrim hi khawpui lun lai ang a ni lo.

Kawmthlang lamah hian huan ang deuh an nei far a, nu taima deuh chuan thlai an ching far. Zawrh chhuah tham ni lo mahse chhungkaw eikhawp chu a thar ve theih ang. Thlai ching ve lo in ran te an vulh a, len vahna tur hmun nuam deuh deuh a tam. La thingtlang deuh ruih mahse ka pa chuan ‘a la nuam dawn chauh’ a ti ve tlat. Bit deuh deuhin in a awm ve lo va,in nei ţha deuh deuh an awm ve nual na a kan in zawn phei bik ah tak hi chuan penglengpunga te leh an ţhenawm chiah te hian in an nei ţha a, midang chu an intluk tlang. Kawng thlang lam, kawng tereuhte hrul a awm te khuan hma an sawn vak thei lo thung.

“Helamah a lokal ngeiin in hria maw?” ti a ka pa’n a zawh leh chuan “A hnu kan chhui mek” an lo ti awlsam et a, “Thil sual tih tum emaw kan ti cheu lawm” ka pa’n a tih te chuan fiamthu ah ngaii an lo nui vel.
“Kan hmuh veleh kan kal ang” penglengpunga ţhianpa bawk khan a rawn ti leh a, ka pa paw’n aw a pawh ve nghal mai.

A kal dawnah “Tukverh hi khar la rawn phei nal nal ang che. Eng hnuchhui tur mah i nei ve lo a nia, dak chhuak de de lo la, ding khawmuang hlek suh” a ti khar khar a, ka lo bu nghat nghat.

Ka pa a chhuah veleh tukverh pahnih a vawnna awm chu vawn ve ve pahin ka dak chhuak a, thim deuh mahse hnah ro a tam vangin an pen ri ka hre thei. Ka awmna hnaih deuhah a ni lehnghal a, ar thawm âwm ang ka hre miah lo thung.

“An tih tihin ti teh se” ti a ka phun chhuah sep hnu a tukverh khar ka tum chiah chu penglengpunga a rawn lang heu mai. Ka tawlh hnun dawrh lai te chuan “Kan va phu nasa deuh ve hawkdak te” a la ti ham ham zui. Tukverh ban a vuan a, sang viau mahse a rawn dak pha tur a ni lo. Kawmthlang lam a nih vangin kan unau pindan ai ngawt chuan a sang deuh a, dingdihlip ar ar mahse a awm chin lang khawp hian a rawn dak pha dawn lo chiang sa.

“Engtin nge i rawn lan heu theih zawk a?” amah kawk va chung hian ka ti a, ka la kal hnaih lo hrim hrim bawk.

“Tukverh hnuai a lung lian pui awm hi i hmu ngai na nge? I hawkdak dèn dèn nen hian” min nuihzat hmel tak hian a ti kher a, “Kan huanah eng nge in tih?” ka lo ti daih thung. Kan inhnial vak chuan ka pa a lokal leh palh ang.

“Ar ka um” a ti awlsam et a, “Nih chuan um ta che. Mi tukverh a rawn dah vel kher a ngai hleinem” ka ti hlak a, ţawng ring ngam lo mah ila amah ka hmuh hian lawmna ka nei lo tih a hre tho ang.

“Min rawn zawng nasa em a” ngeiawm zet hian a lo ti sup a, thip râm a melh chung hian “Ka zawng hlawl lo che. Buaina siam bak thiam nei lo hi ka zawng buai vel peih lo. Hman zan a mi te kha ti nge i sawisak ringawt a?” ka lo ti tan tan.

“A ril lutuk naupang hriat chi loh” a lo ti liam satliah mai a, “Zan tin ka rawn kal dawn” nghet charh a a tih leh takah chuan ka hnaih nghal thuak.

“A ţullo ang aw…ka hmu peih reng reng lo che. Ka pa’n thawm a hriat leh phei chuan hliam in tuar tawh ngei ngei ang. Kan chhungkua in kan hmu peih lo che” ka tih bawrh bawrh hnu a “Misual bul a awm hrehawm in ti mi?” fiah fel tak a a tih chuan kâ hauin ka ding ngawi reng.

“In in a a rawnkal tur ka lo dang a nih kha, zanah chhuak tawh suh ang che” thuneih hmel fe hian a ti chang bal a, kei chuan “A rawn kal hnu khan ti nge min hria ang a a awm si loh?” tiin ka lo zawt thuai.

“Engkim hriat vek tum suh. I hriat tur chin chu ka sawi tawh” a ti leh nghut nghut tawh a, zawt lui ngang ngang mah ila a duh chin bak min hrilh chuang lo vang.

“Nge i lo dan kher? A hek zat zat che kha” ka tih chuan “I tawrh ai tawrh ka huam tihna a nih kha” min nuihzat hmel zet a a tih hnuah “I tan engpawh ka huam tihna nen” a ti leh a, awih lo lutukin ka lo nui hak. Bakah ka duh lo hrim hrim. A fiam kual mai mai theihin ka awm tawh dawn lo reng reng.

“Ka tan engmah lo ti tawh suh. Ka duh ve chuang lo che” ka tih chuan reilote chhung a hmel landan a danglam zawk a, a ţhianpa’n thawm a lo neih ve na lam a melh zawk hnuah min rawn enin a kiai sak a, “Muttui aw…Mawimawi” min ti ve teh mial a nih chu.

“LALNUNMAWI” ti a ka pa au kan hre zawm zat a, a va inthlau ber mai tak.
“Ka nu siar ka nu siar” ti a phun hluk hluk chungin penglengpunga pawh a dinna aţangin a chhuk a, ka hmu pha ta lo.

Tukverh ka khar sawk sawk hnu a pindan aţanga ka chhuah leh chuan ka pa’n “Hnu chhui tur engmah i nei ve lo ka ti ni lawm ni? Eng nge i tih ve reng?” a lo ti leh khur khur tawh.

“Pindanah ka awm mai mai lawm, min vin chiam chiam nghal zel a” ka ti nang nang a, ţhutthleng ah ka ţhu zui chawrh.

“Mi ar um mai mai pawh i thlir reng peih chuan ar ka la ve dawn. I awm mai mai thiam chuang lo. Ar vulh rawh” a ti ram leh hmarh hmarh tawh. Na deuhin a chal a tuai pulh a, a thusawi a nem nghet chiah tihna.

(Ka vaccine la ka nuam lo lutuk a, chapter dang a pha kher lo ang🥺mahse Comment kha min ngaihpawimawh sak hram hram theih tho chuan ka lawm ngawt ang🥰)

CONT…

Leave a Reply