You are currently viewing TROUBLEMAKERS-2

TROUBLEMAKERS-2

Spread the love

TROUBLEMAKERS-2

Zingah hma tawkah ka nu in min kaitho lehpek a, zan mut ţhat loh nen ka rit luk mai. Thingpui min pek lai te chuan dawhkanah ka la bawk zawi ngawih a, “Mawimawi inti harh la lehkhazir rawh. Zingkarah hian thiam a awl zawk an ti fo a nia” dam thlap hian ka nu chuan a ti a, ka hre lo der hmak. Zingkarah engmah ka thiam ve thei ngai lo. Ka zir duh tak tak chuan ka meng rei mai zel. Min kaitho hma ve ziah a, dawhkan bawhin ka muhil leh ziah tho sia.

Kan la awm thar hlim bawk a zingkar aţangin inleng kan nei nak nak reng a, kohhran upa tho hma thei deuh deuh ho an lo leng a, ka nu lahin thingpui min lum tir sek lehnghal.

“Mawimawi ila insiam chuang lo va dawrah va kal lawk ta che. In leng kan la neih reng hmel si a, chhun a ka kal hman loh takin chhang leh thingpuife leh bawnghnute va lei lawk rawh” ka nu bawkin a ti leh pek a, hnial chak viau mah ila ka pa a lungawi lo laklawh sia, thuawih ber ni awm takin ka tho ve tharh a. Ka nu kut aţanga pawisa pawh thlak pahin “A bang ka nei vek dawn nia aw” ka pa hriat phak loh turin ka ti sep a. Min chhang let lo na a a phal tih ka hre mai.

Kan in aţanga dawr hnai berah ka lut ve rawih a, a la zing deuh bawk a dawr hma lam an la hawng lo. Nu tling thau deuh, vawk pui tiat lawih a lo ţhu hnur a, “Lokal rawh Mami eng nge i duh? I duh duh kha enkual rawh” a lo ti zung zung a, a hmel en aiin a fel hmel phian.

Ka chhang duh ho ka enkual dan dan laiin hmeichhe pakhat sam tawi mat hi a rawn lut a, “Nu Ram, cup noodles ka duh a nia, energy drink nen aw” a ti lang lang a, dawr nei tu Nu Rami a tih chuan “Zing kar karah chutiang an ei ngai em ni? Dawr i kal dawn a nih pawn tho hma la, chaw eiin kal hram hram rawh” tiin fa te hrilh tak hian a lo hrilh a.

Chunu bawk chuan “Keimah ka ni reng reng lo. Kan mimawla bawk mawle, nizan a lo insawisak tir leh pek a, a ke leh a biang a vung bur alawm. Nizan a haw ngam lo a lo riak a, a rilţamin min rawn tir a nih hi” ti a a phun hlak hlak laiin Nu Rami a lo nui huah huah a.

“Fredy hi chu a naupanlai a a fel reuh nen ruihhlo hian a tibuai hneh ve a nih hi. Ngati nge an insual reng reng a?” Nu Rami’n a tih chuan ka thil tih lai ka tawp chawt mai. Chu hming chu ka hre tawh thanin ka hria.

“Mawitea zawkin an pawi a lo sawi palh aniang. Mawitea an hmu zo si lo va, Fredy-a chungah an ţuan a, saw a inhrosa khur khur reng mai. Tiang ber bur saw chuan class pawh a kal peih leh tawp nang. A nu a rawn chhuk thla leh ţep tawh ang” dawr a rawn kal ve nu chuan a ti leh par par a, Nu Rami’n “Anu leh pa te hian an duat sia, Tetea awm loh hnu phei hi chuan tumah a hlau tawh si lo va, a nun a khaw lo laklawh a nih hi” a tih lai chuan ka inher vut a, an pahnih hnih chuan min lo en heu mai.

“Chhang hi duh ka nei nual a, polythene a awm mial em le?” zahzelah ka ti ta vel mai mai a, “Awm tehreng mai, i duh duh kha thlang rawh” tih pahin dawr neitu nu chuan polythene min lo pe sawk sawk a.

An mi sawi pa hming chu ka hre tawh chiang mai. Ka ngaihtuah vang vang hnuah ka hrechhuak zawk. Zanah khan bike khalh tupa khan tiang keng-a kha Fredy tiin a ko tak e. A biang ki lai vel a duk kha ka hmu a, a ke a bai bawk a, an sawi pa leh ka hriatchhuah pa hi mi pakhat an ni chiang lutuk. Helai hnaiah hian an awm ve em maw ni le?

“Fredy chu a na viau em?” ti a Nu Rami’n a chanchin a sawi chhuah leh takah chuan ka che muang lui a, a rukin ka ngaithla kiau a. Ka ngaihzawn vang a ni miah lo a nia, Ronnie kha ţha ka ti daih zawk. Mahse eng mi nge an nih hriat ka la chak tlat.

“A dam leh mai ang. A insual ngun emai ah, a chang leh a accident thul. Amah hrim hrim saw a sawr bawk nuai lo zawk alawm le” ti chungin a thil lei tur a la a, pawisa a pek hmain ka lo pek khalh a, pawisa bang min kir chu ka ak nghal hmak bawk. Phal lo mahse ka nei tho tho ang.

Dawr kawtah ka thil lei vel en fel ni awm takin ka ding a, hmeichhe sam tawi kha a lo chhuah veleh ka zui vat. Kan in kawngah a kal ve zel a, thui a kal hmain gate lian ve tak a hawng a, a lut ta daih a.

Chu in ding luah chu ka thlir vang vang a, a mi sawi pa te in a nih chuan mi pangai tak an nih hmel sia, quarter nen a inhnaih hle bawk. “Ka buaina tur a ni lo, a awm awmin lo awm ve mai mai teh se” ti rilru in lu ka thing nawk a, in lam ka pan zui vang vang a.

Insiam sa vekin chaw ka ei zung zung a, ka nu in “School a hla chuang lo va, hmanhmawh lutuk duh suh” lo ti eng ang mahse ka hmanhmawh tho tho.

“Vawiin aţang chuan thu chhe lam kan hre tawh tur a ni lo. In zirtir tu te hi infak tir ve tawh em em teh. A nihin a ni lo reng reng” ka pa in a lo ti leh hman tawh.

“Ka pass ve ziah tho lawm. Min hau reng mai chaw ei a tui thei lo. Dal te kha a kha vek tawh” tih leh thawh ka rual a, ka pa in min melh rum ngang mai.

“Siam thiam hlei lo hian ka sawisel e hi in ti ve a” a ti ve tak na a min ngaihsak zui lem lo.

Phur deuhin school kal turin ka chhuak a, ka school luhna hi kan veng chhung a awm a ni bawk a ke in ka kal mai. Ka bag hrui vuan ran chungin ka pen pawk pawk a, tu emaw hi bike in chak zetin a rawn tlan fua a,min thawi thuak lehnghal. Ka hlau lutuk chu ka tlu lek lek a, thin phu dut dut chungin ka ding hle hle ringawt.

A thil tih pawi zia hria ni awm takin a ding ri hrawk a, bike aţanga chhukin ka lam panin a rawn pen phei hmawk hmawk a, helmet phelhin min ngaihtuah hmel takin min thlek vang vang a, “I ţha em? Ka tai fuh che em?” tiin min zawt zui zat bawk.

“I va tlan chak em em ve. Helai kawng hi i ta bik a ni lo tih hre ta che” dingdihlip ar ar chungin ka ti vin hlar a, Ronnie tak pawh chu a inthiam loh ve hmel reuh lutuk.

Ni e, min su thawi fua tu hi Ronnie a ni miau alawm. Ka insual vangin a thinrim em em a, tunah lah min su hlum lo chauh a ni sia.

A inthiam loh em vangin min ngaihsak ve deuh ang chu tih lai laiin tawlh hnun hret pahin “I au ring thei emai i na lo a nih dawn kha” tiin a kiai suk a, ţawng tum a ka an zuau zuau lai te chuan min melh reng chungin helmet a khum leh a, ka sawi tum ka sawi hma in a inher a, a kal leh daih. Class CR ni tur a an ruat chhan ka hre ta lo tawp mai. Chuang duh kher dawn lo mah ila min phurh a tum eih lo kha mak ka ti ve hranpa hrim hrim.

School gate ka luh rualin garage aţanga Ronnie rawn chhuak nen kan intawk a, tlem a kun deuhin helmet in a delh bêkna a chhip sam a tuai thuak thuak a, min hmuh veleh nuihza insum takin min kal pel kher a, ka eng hian nge maw a nuih ti za em em ni? Kei aiin a kal hmasa daih a, tunah ka tawk chauh sia, khaw nge a kal kawi ang le? ti a ka ngaihtuah vel lai mekin garage aţang bawk chuan hmeichhe pakhat a rawn chhuak a, a hawi kual hrek hrek lehnghal. Garage pawh tur hian gate sir aţanga kal thlak hret a ngai a, a zuk puk ve deuh. Ronnie hnung lawk a a rawn chhuah vang hrim hrim in ka ngaih a ţha lo ve ringawt.

“Hming pu zo lo nu” ti hlawi chung a min rawn kuah nawk nawk tu chu ka ţhian thar te pahnih an ni tih ka hre mai. Dawnga leh Faka, kan school a tuai lar ber te pahnih. Ka ban lehlam lehlam a kaiin ka sir tawn tawnah an kal a, Dawnga zawk chuan “Chhun chawlh laiin mipa ho inkhel en ve tawh ang u aw. Kan ‘Nini good luckz’ tuar tuar ang chu le” a ti duai duai a, kei ai mahin an ţawng nem zawk.

“Tu nge Nini chu?” ka lo ti leh he haw tawh. Ka hriatna hi a changin a thawk ţha viau a, a chang leh a in block leh tlat a, ka duh hun a ka hriat duh ka hriat chhuah theih loh phei chuan ka ţahpui lek lek zel.

“Ronnie hi mawle…a thiam vel tawp a maw. Mipa ho inkhel hmuhnawm theih zia chu e…nachhawkna kan ei tawpz zel” Faka chuan a lo ti veleh.

“Mawimawii pawh hi kan eitir ve ang. Bts te hi ka duh tawpz a maw, ka en apiangin nachhawkna ka ei ţhin. V ka hmuh chiah phei chuan maw, a chhiat ber lai pawn ka vun hi ka lu tiat tiat hian a mur chhuak vek zel tho. Chuvang chuan inven nan nachhawkna ei ngei ngei a ngai” Dawnga chuan a lo ti veleh zawt zawt a, kei takngial pawh ka ngawi reng mai.

“E…tak a, Dindini kha thuruk hrilh miah suh aw” Dawnga bawk chuan min sawi nawk pah hian a ti leh hluai a, hrethiam lo zetin “Ti nge?” ka lo ti thuai a.

“Phakar ţawngthei tawpz ang chi kha. A ţawng theih dan chu e….” a tih per duai hnuah an pahnih in “Pui riapz riapz” an ti rual leh kher a, min hmu apiang an nui zel a, zahthlak ve tak a ni.

Dindini chanchin an sawi chu ka awih lem lo. Hmeichhia ang bawkin tuai pawh hian insawi sep sep an peih ve tho a, ngei ang a awm duh miah si lovin a rukin an rel ah ka ngai mai. Sualin phunglung viau mah ila mi ka rel ve ngai meuh lo va, inhauh vak vak leh insual tawp hi a ni mai. Ţhian te thil ruk naah ka tel zeuh zeuh a, mahse ka pa in min dah let tir leh ţhin. Kan it vang a ru kan ni hran lo va, nuam kan tih vang leh tih tur dang awm loh lutuk vang a ni ber. Bawng tih loh thil pawi tham ruk kan nei lo thung.

“Hey nang nu kha” ti vin hlar chungin hma lam a kut phar chhuak meuhin S Hruaii’n min lo dang a, shikhar a ei leh pek tawh a niang a biang a puar leh pang tawh.

“Eng nge a? I hneh leh awm tawp si lo buaina rawn siam tawh suh. Hnar thi purin i tep leh chepz chepz mai tur sin” tiin ka chhan hma in Dawnga’n min lo chhan khalh a.

“Lo inrawlh dei duai lo teh u” S Hruaii chuan pawr zet a a tih hnuah thip ram a min melh chungin “Hey” a ti leh tuar a, “Ka ha a nghing a nia aw” zawi sepin a ti zui zat.

“I ha nghing nen inzawmna kan nei lo hrim hrim. Phawi la a ni mai lawm” ka lo ti awlsam et a, a ha zawnah ka hnek lo hrim hrim a, ha hnek nghing thei khawp a chak ka ni lo bawk.

“Ha hmai alawm mawle nghing ka tih. Phawi chuan a ţo thei tawh nang” a ti leh hlar a, mawhphurtu ang maiin min chei bawl alawm le.

“Ka tih a ni reng reng lo ka tih tawh kha. A ţo theih loh leh ha lem vuah mai la, i ha nghing mai mai kan ţangkaipui lo emai” ka ti hlak hlak a, ka thinchhiat a chhuak leh dawn ţan tawh.

“Ka ha dang rawng nen a inang dawn hleinem. Nimin a kan insual hma khan a la nghing lo hrim hrim. Ka lungawi lo khawp mai” a ti thar leh a, ka ning lutuk tawh chuan ka va hnaih chilh a, ka kut ka lek chhuah lai te chuan a chhing sawk
a, dawih hle si hi mi vau ve pung pung lehnghal.

A hmui chunglam ka keu a, a chhung lam chu a lo him pial a, “Pilh pakhatmah a awm loh kha. Nghing khawpin hnek che ila chu a chhung kha a pilh ngei ngei ang. Daw heh zit zet lutuk” tih leh kal ka rual a, Dawnga leh Faka ten min zui ve vat bawk.

Class chhung a lo ri leh mur mur tawh a, SHruaii kha a ha a nghin tak tak ka ring lo hrim hrim. Min puh chhiat a tum a nih ka ring. Ka hnar ruh a tliak te ti se ka awih zawk hial ang.

Ronnie ţhutna ka kal pelh dawn lai chuan ka ngei em vangin ka su lui kher a, lo nui hawk mahse ka hawi let lo nasa mai. Induh ve tumin en loh luih tum mah ila ka en lo thei lo. Hmelţha ka tih zawng tak a nia, ka en lo phal thlawt lo a ni ber. Tukin a ka hmuh dan aţang khan lerh hmel ti tawh viau mah ila ka la star tho. A faiin a mitmeng a nalh bawk sia, a rum deuh hlek tih lohah chuan sawiselna lai tur ka hre lo.

Sawi lawk nasa viau mah ila kan ti ti tui em vangin mipa ho inkhel kan en leh ta lo a, hah hmel deuh a Ronnie-a lo lut kan lo en ţhap thung. Inkhelh zawh meuh chuan a kamis ban a thlep chho a, a hmawr lam pawh a kekawr kawngah a bilh lut tawh lo. Necktie pawt thawl huaiin ball a pawm a, ni sa hnuai a tal hrep tih a hriat. Dindini nen a kan ngawih reng laiin Faka chuan “Nini…i khel ţha bawk em? Nachhawkna kan pai si lo va kan lo en lo mai che” a ti hman ţawk tihah “A naaa” tih riin a zui zat a, kan hnung bang chu ball in a deng zui dawt a, an chhaih reng chu ngaithei lovin ball in a rawn vawm a, “Lo theh phei teh u” a la ti zui. Kan ngawih reng laiin “Dindin” a rawn ti leh a, harh chhuak zawk ni awm takin Dindini chuan a chhar sak nghal sawk sawk a. A thu ang ngeiin a vawm phei a, a lo dawn chat hnuah kan lamah bawk rawn vawm phei leh tum ni awm tak hian a tin uaih a, Dawnga leh Faka te lahin ţe chel chul chungin min rawn kuah chung chung a, mi hlau thlabar chu hmuhnawm ti zawk ni awm takin a kiai suk a, a rawn vawm ta em lo e. Zirtirtu te beng a thlen dawn loh phawt chuan chimawm a chhuah hreh lo ni ah ka ngai.

“Awiii…Nini, I hate chiuz” Dawnga’n a tih no duai lai chuan class a awm ang ang te an lo nui dar dar hlawm a, ka ngei phal chuang der lo.

“Dindin engtin nge CR a nih theih a?” tiin Dindini ka zawt ta tawp a. Hriatchian ka chakna in min nawr thlu ngang a niang, ka ngawi thei tawh lo.

“Kan thlan chhuah a nia, pakhatna a ni ziah a, sport a thei bawk sia, bakah zirtirtu te hriat laiin nichin a a awm ang khan a awm ngai lo a” a ti a, ka rin dan chiah. Class neih laiin a thutak thei lutuk tlat.

Ka ţhiante pathum kan vengah an awm ve lo bawk a ban veleh keimahin ka haw hnuang hnuang a, school gate bulah hian ban hun awm velah taxi a rawn ding ţhin a, pawisa inchawi ţawmin taxi in an haw mai zel.

Thui ka kal hmain nutling pakhat inchei nalh deuh hian min lo ti ding a, “Mami i school thar chu a nuam em?” ti a min lo zawh chuan a ngaihna hre lo takin ka bu nghat nghat a, engtin nge school tharah ka lut tih a hriat ni? Ka hre ve ngai der si lo.

“I ril a ţam em?” a ti leh zel a, ţam ve tawh viau mahse ka pa in hmelhriat loh hlau turin min ti a, an thil min pek ei miah lo turin min hrilh ţhin. Lo ei ta ngawt ila, luhai a ka tluk hnuah min hruai bo daih ta se, min chhanchhuah rual la la in ka pa in min vaw duh ngei ngei ang.

“Aih, ţam lo e. Ka pi tu nge i nih a?” tiin ka zawt ve ta nge nge a.

Nu lian lam pang hmel fai vung a ni a, a hmai a cheina chuan a ti hmelţha lehzual. A thuam inbel te pawh a man a tlawm zawk zawk dawn lo a ni tih a hriat a, a la upat hmel vak loh. A dinna bulah car a inhung vang bawk.

“I nutei ka nia mahse i nu hrilh kher suh aw. An duh loh zawngin ka awm a, min hmu duh tawh si lo va, i sen laiin ka awm ţhin che a” a tih phei chuan khap fuk fuk chungin ka thle tawn chhen ringawt.

“I lo lian ve tawh hle mai. Aizawl in rawn awm ve ţan chiah sia, eng nge i hmuh dan?” tiin nelawm takin min zawt leh a, a nui sang reng mai bawk nen, hmuh a nuam ve reuh.

“A nuam tho ang. Ka awmna apiang nuam ka ti zel a, kan lo awm hma pawn kan zin ziah tho alawm” ka ti a, Aizawl ber a mikhual lutuk ang a lan ka hreh ve tlat.

“Inrinni apiang in chawl dawn tho a, kan dawrah te i rawn kal ve ţhin ang a, a thlawnin duh duh i ei dawn nia” a tih leh phei chuan “Eng nge a hming?” ka lo ti thuai a.

“YYSK” chhuan hmel takin ti mahse ka hre tlat lo. A lam pum phei chu rin zawn dan ka thiam lo nasa.
“YYSK maw?” ka ti he haw a, lo bu nghatin “Ni e, Yum Yum South Korea tihna” a ti awlsam et a, “Korean food maw?” ka ti tuar a, tui hmel deuh deuh an ei ţhin te hi ka mitthla ah an awm nghal vek thei.

“Ni e, i duh duh i rawn ei thei vek. Mahse ka sawi tawh ang khan i chhungte i hriattir tur a ni lo” kutzungchal ti pir vah chung hian a ti a, ka bu rang zat zat khawp mai. Ka hmui ka liak zeuh a, ka la ei dawn khawp mai.

Kal mai inring tawh ni awm tak a sunglass dum vuah pah hian “Thlah i ngai em?” tiin min zawt a, a ngaih loh thu ka hrilh hnuah “Ţhiante ka lo hruai thei angem?” ka tih leh vat a.

“Thei tehreng mai. I ţhiante an nih phawt chuan tupawh kan lo lawm vek ang” a tih phei chuan phur tak ka ni tawh. Min tlan pelh dawn thlengin kal turin min sawm nawn mawlh mawlh a, korean food a nihna leh a thlawn a ei theih a nihna hrim hrim chuan min ti phur. Min duat hmel emai min ruk bo tir lo turah ngai ang.

Zai rat rat chungin ka kal zel a, phur thak kai ang vel ka ni. Ka thak ngawih ngawih. Ka kal chak tawh lutuk chu ka ke hnuai thlengin a za vek. Dynomite ngei mai kha ka thiam dan dan a sa ve in ka per auh auh a, ka lam lo chauh tawh. Thlek kual vel pahin ban ka vai a, ka kal hah hah tawh. Mahse thingtlang ang a ni tawh lo va, school kawngah in a awm zeuh zeuh tih hrechhuak thutin ka insiam ţha vat vat. Nachhawkna tello chuan ka dik dawn lo ţan tlat keipawh hi.

Rin aiin kan inah mi an lo la tam a, ka nu a phe dawr dawr mai. Inthlak lem lovin a kalna apiangah ka zui det det a, a awl theih veleh “Inthlak la inbual zung zung rawh. Chaw ei kan nei dawn a, i thiam dan danin min han pui ve teh” a ti nghal zung zung a.

“Tu te nge chaw lo ei dawn a?” tiin hmanhmawh lo deuhin ka zawt hmasa te te a.

“Zing a kohhran upa rawn leng ho kha ipa in a sawm a, rawn ei tur tak erawh an tam lo. Puih ka ngai dawn tho tho a, che ve thuai thuai rawh” a lo ti leh a, ka pa ve hi zawng, mi tih buai phet hi a tum a, thingpui lum ngai lo ber hian inleng apiang thingpui in ngeiin a haw tir ziah.

Ka inbual zawh veleh ka nu bawkin “Sangha ringawt chu a ho dawn e bakah ţhenkhat upa lam an ni tawh a, a ruh hakin an buai vak ang tih te a hlauhawm a, sa lei tur a awm thlawt lo em ni?” ka pa bula a ti lai ka hre hman vuai vuai a.

“Vawksa lei tur chu a awm lo tawp ang. Kar laklawh a nih bakah chawhnu lam a ni tawh lehnghal a, ar lei tur tal awm se ţha tur” ka pa pawhin a ti ve nuah nuah a, an mangan ruk hmel kher mai.

“Chawhmeh awmdan hre miah lovin chaw ei ah i sawm ve ringawt a nih kha” ka lo ti ve thar thar chu “Lo inrawlh ve tei vet zel suh. Tih theih nei mang si lo hian i ţawngthei em em ringawt mai” ka pa in a tih chuan ka nu rawng rawn bawl pui tu te an lo nui hak a, ka ti zak ngun ang bawkin ka pa ngei pawh hian min ti zak ngun ve tho.

“Pu Buatsaiha te sawn ar an vulh nasat kha, a pum a in lei duh chuan lei tur an nei ang” an zing a pakhatin a lo tih chuan ka nu leh paten an ngaihven rang nasa mai.

“Tu nge Pu Buatsaiha chu? Kan la awm tir em a, ka bial te ngei ngei pawh ka la hre hleithei lo” ka pa in inthiam lo hmel taka a tih lai chuan nula bawk kha lo ding chhuakin “Dinglam a phei tur hi a nia, peng a awm lo. He ta ţanga kal a dawr thlen hma deuhah sawn an awm a, in lianpui mai. Phei char char a gate lian ber kha a ni mai. An fapa khan a enkawl bik deuh a, a awm kher lo maithei a, mahse an lo hralh ve thei tho ang” a ti deuh duah a, sawi chiang viau mahse kan chhungkua chu kan la bo ha ha khawp mai.

“Hre nghal chat thei lo mah ila kan tlangval hi va kal tawp mai teh se” tih pahin ka pa in ka darah min kuah a, “Ka peih bik lo. Ar nung lai phei chu ka pawm ngam lo hrim hrim” tiin lo hnial mah ila “I ngam lutuk ang, setana pangang khawi lai ka ni iti ziah a ni lawm ni? setana pangang chet hun tak a nih hi” ka pa chuan a ti ve tlat a, a ngeiawm thiam ang bawkin ka ngei khawp mai. Min hauh chang a runluih nan mai mai a ka sawi a ni reng sia. A hre rei thei pelh pulh ropui si.

Ka nu in pawisa min pe a, nula khan an in thleng a min thlah turin min zui bawk. Zing a ka thlir dauh dauh ngei mai kha a lo ni. Gate bul a kan din dun ran hnuah “Ka kal aw Mawimawi, tih tur a la tam sia, inu ka va pui leh lawk ang e” tih leh kal a rual a, keimah chauh ka ni tawh.

Zing a ka zui ruk nu lah kha khawi lai berah nge a luh ka hre tawh mang bawk si lo. Ar vulh tu ber lah chu rin ngaihna ka hre miah lo lehnghal. Zan a ka hmuh pa kha ti dawn ila khatiang ţep ţup khan ar a vulh peih ka ring mawlh si lo.

A nih nih ni turin gate chhungah ka lut ta rawih a, kawt zawl lah chu an lo nei ţha khawp a, tile an phah chhuak vek a, pangpar a inhung far bawk. A ţhen phei chu a sang ţha hle hlawm. Pangpar chi hrang hrang inhung karah chuan inhnuai chhukna ni awm tak a awm a, chu ngei chu a nih ringin ka chhuk thla thuai a. Kawngkhar ka kik karh karh hnuah “Lo lut rawh” hmeichhe aw hian a ti lang lang a, kawngkhar a inkhar phui lo bawk a ka dak lut de de a, nula pakhat hmelţha deuh hian puan a lo ţhui a, ka lu lawr tet a hmuh veleh “Eng nge ni ta?” tiin min lo zawt thuai a. A mitmeng a lianin a fiah kal a, a nalh tawk lek turin a hmui a chhah tap bawk. A ngo ropui mai sia, a lakah chuan setana pangang ka ni tak tak ang.

“Ar lei tur ka lo zawng a” ka ti chhuak sep a, tlemin ka zak ve deuh. Ka la kal ngai lohna hmun a ni miau a.

“Inchung te zawk khi a nia, han zawt chhin rawh. Nu Mahruaii a awm ang” ti a min lo hrilh hnu ah lawmthu hrilh ve in zak deuhin ka let leh nal nal a. Ka pa tak hi chu a, hetiangah chuan puitling kal hram hram tur a nia.

Phun hlak hlak chungin ka chhuak chho leh a, an in bul a garage a lo inhawng huau a, a hma khan ka hmu lo hrim hrim. Hreh ru deuh chungin in kawngkhar lam ka pan ta nge nge a. An veranda bikah chuan foam tile bik an lo phah leh thlap a, an kawt lai zawng zawng a fai thlarh mai bawk si, taimak a ngai awm tih chiah ka rilru ah a awm.

Mi kawt lai zawng zawng zirchiang vek hman ka nih bik loh vangin door bell ka hmet ta nge nge a, rei nghah a ngai lo. Nu pakhat in kawngkhar min rawn hawn sak thuai a.

“Ka pi ar lei tur in nei em? A nung chungin” tiin ka lo zawt thuai a, inchhung lam a hawi let zawk hnuah “Aw nei e, lo kal rawh lo lut rawh” zangkhai vah hian a ti a, kawng min kian sawk sawk a, a fel hmel takzet a ni.

An inchhung pawh a pui riap riap khawp mai. An chhuat te chu naupang awm lo ang maiin a tle hlarh a, an bungraw neih ho lah a man to chi hlir ni awm tak a ni. An in chhung a nuamin a phui sui khup mai.

“Lo ţhu rawh Mami” nutling bawk chuan a tih leh hnuah sofa ah chuan ka ţhu de de a, ka zah em vangin ka ţhu bet thei meuh lo.

“Bawiha hei ar lei duh an awm a nia” a ti lang lang a, a ring ţha kher mai. Ka ep chiah a rawn ţhu ve in a hma aia ring mahin a ko leh a, naute ţap ngak ngak riin a zui a,choka ni awm tak aţangin hmeichhe pakhat la naupan hmel tak a rawn chhuak a, a nau puak lai awi chung in, “Nu i au ring thei emai i au harh alawm mawle. Inchungah han chho mai la a hre pha lo anih kha” a rawn ti nang nang a, “Hre pha ang pindan ah a awm hleinem. Nichin lawk pawn a rawn lawr zuk zuk alawm. I fanu kha chu a ţahbelh ve hrim hrim bawk a” ngaipawimawh lo fe hian a ti a, a hma aia ring mahin “FREDY” a ti leh lang lang a. Inchung chhohna kailawn ep chiah a ţhu ka ni bawk a, ka mitsir ralh a, engmah ka hmu chiang thei lo.

“LALRINTLUANG” a ti leh tuar a, hmeichhe naupua kha a kalsawn rang khawp mai. A fa sen puak lah chu a ţap uar kher mai bawk a, ke zungpui pir vah khawp a nausen an ţah tawh chuan bengchheng ve tham tak a ni.

“MIN AU LUNG LUNG ZEL SUH VUANI” mipa aw hian pawr fe in a rawn ti ve a, ka insum thei tawh ngang lo. Inchhung chhohna lam chu ka melh ta nge nge a.

“Hre thei hek lo che. Koh kal dawn che chuan i hming pum kher a ngai alawm. Phun hluk hluk loh khan ar chu zu thlan tir rawh Penglengpung” nutling lah chuan a lo ti veleh zuah zuah a, anu a nih ka ring ve ngawt. A fapa a koh duh dan chu mak ti lutukin ka hauin ka lo en a, intithei zawk ni awm tak hian dul insep dawrh dawrh khawpin min en ve reng chungin a la nui hluk hluk zui.

“Asil chu ka hralh phal chiah lo va, vang leh trai ka phal. Engzatin nge i ngam a?” a rawn ti lung lung a. A thusawi hrethiam hauh lo chuan chupa lam chu ka hawi leh heu a, kailawn vawnchhan vuan a rawn chhuk mek chu min hmuh veleh a ding chat a.

Awi leh! Khapa kha a ni chiang lutuk. Zan a ka hmuh dan nen khan danglamna tlem te bak a awm lo. A danglamna awm chhun chu a biang vung deuh bar chauh chu a ni mai. A sam buk ve tak te, a hnar ngul sang vah te leh a hmui nem hmel tak te kha, ka rin lawk ang ngeiin a ngo bawk a, mahse tenawm khawp a ngo hluak ang hi a ni lo.

“Insual turin nge i tih vulh ve mai mai turin?” a rawn ti leh a, ka bo nasa tawh kher mai. Min hre ve âwmin a awm miah lo lehnghal!

“Vang leh trai khu la la, keima breed ngat a nia, insual tur a tan chuan duhthusam. Hei min sawi sak vun luk hi” a nu melh zuk zuk pahin nui ruh ruh chung hian a biang duk lai a kawk a, broiler tih tawp bak in ka ar lei tur hming lah hi ka hre der si lo.

Anu bawk chuan “Daw lo mai teh Penglengpung, i hralh duh vang hian dawt belh ziah suh. Ţawng zuah zuah lo khan duhthlanna hun te siam sak ve ta che” a lo ti leh hluk hluk a.

“Insual tur a lokal ka ni lo” ka ti chhuak hap a, ka kawr hmawr khawih neuh neuh chung hian “Ar lei turin ka lokal” ka ti leh sep a.

Rawn chhuk tlang ta mai lo chuan kailawn a invawnna tur an dah chu bawhin “An hming leh an chanchin ka sawi aţang khan i duh thlang mai rawh” nin hmel zet hian a ti a, ka hrethiam miau lo alawm le.

Ţawng tum a ka an chiap chiap lai chuan “Ka hmu tawh che em?” tiin min lo zawt leh daih a.

“Saw lai lawkah sawn kan awm a” ka tih lai te chuan min zir chiang ni âwm tak hian a mit khur thuk lam lek lek chu a lo ti zim deuh san a, “Chuan i sawi kha ka hrethiam lo” ka ti nawi leh niaih a.

“Rawn kal phawt mai teh” tih hluk pahin a ban a vai zauh a, kan awmna a rawn thlen thlak rualin a ke intuam bur chu ka lo en vat a.

Tshirt dum leh kekawrbul par ţial ruai a ha a, a sam lah chu theih pa tawpin a hnawk a, pawnah kan inzui chhuak a, inhnuai ka chhuk tawhna lamah khan min kalpui dawn maw tih laiin an inpiah tho, ka chhukna hmasa lo lam zawkah min chhuk thlak pui daih a, thawm kan neih veleh an lo ri ve khat khat hlawm a, ar chu a ngah na ngiang mai.

“En kual rawh” ti a phal na min pek hnu chuan ka en lawr den den a, mawi tih deuh deuh ka ngah mai.

“Duh i nei em?” hnung lam aţanga a rawn tih thum dut chuan banpharin ka phu eu dawrh a, ka tukhumin a awm a tauh dawt rualin ka kut ţangin a hmai a tai fu fua fua mai bawk a, ka ban rek a lo hum vatin ka din ngil leh theih nan min lo pui a, “Ka ar hnathawh a nih kha. An cho ţha ngam ngai lo, eng ber nge i duh? Asil tih loh ka phal vek” a ti leh a, Asil ber pawh ka hre chai si lo.

“Broiler ka duh” zawi sep a ka tih takah chuan phun hlukin “Sawi vat ta che” bung zet a a tih hnuah kan awmna ai thlang lehzual ah min hruai daih!

“Sawina hun min pe lo a nih kha Penglengpung” ka ti tuar a, a rawn leh hawi rang teh a sin aw.

CONT…

Leave a Reply