You are currently viewing TROUBLEMAKERS-3

TROUBLEMAKERS-3

Spread the love

TROUBLEMAKERS-3

“Khatin mi ko ve khanglang suh” a rawn ti bul hmuk a, ar in lam panin a kal leh hmawk hmawk a. Ke na chung pawn a buai eih lo, a kal ţhang tih a hriat khawp mai.

“Kg engzat nge i duh?” ti a min zawh lai chuan ar in bul ka thleng ve mek a, a chhung ka bih chiah chu an lo tam ngang mai. Chaw leh tui pekna atan a sen vek an hmang a, an hmuhnawm kher mai.

“Kg4 vel a ni mai lawm” ka tih veleh “Lut la va man rawh” a lo ti liam satliah a, a thusawi chu awih lo lutuk in ka ka hau mai.

“Ka man ngam reng reng lo. Arpui in min lim nghek tawh a, ka hnaih ngam tawh lo hrim hrim” uar fe a ka ka lo tih tan tan takah chuan, “Va buaithlak e aw” a ti bul bul a, a tawi khaw muang rei si, chhungten rei min ti tawh viau ang.

Ar in bang nam chung a a inngaihtuah vung vung laiin thlang lamah thawm ri bur kan hria a, kan tang nghal hra a.

“Bang den nan ka hmang e te mi tih le. Ka chhuak ang Remlalfak, hrawk hrawl lianpa, rawn ţap leh hluam hluam mahla ka nei leh tawh lovang che” hmeichhe aw hian a ti vin tuar tuar a, Fredy chuan “U Rema a nih chu” a lo ti sup a.

Inthurual ang hrimin thawm dim deuhin ar in bangah kan in ham phei zal zal a, ar in tawp aţangin lu kan dah lawr a, huan thlang lam a lang chiang thei ta. In ţha vak lo kawtah hian nutling pakhat sam thur bumin a ding a, hnung lam a kut dahin a kekawr chhungah a zen lut a, a awm a pho luah bawk.

“Chhuak rawh chhuak rawh. Zantin i sam chhe lutukin min ât ziah a, zingah i lei hriam lutuk hmangin lu na bur khawpin min ankhum leh a, Ţhahmingthang, ka ma a che” Fredy-a U Rema chuan a nupui chu kut zungchalin a kawk siah siah mai. Rui tih hriat zetin a ding bu luk luk a, nichin lawk a thawm ring lutuk kha engtia chhuah thei nge an nih ka hre lo. Langsar deuhin tuman an rawn en lo na a an inhau ri chu an ngaithla furin a rinawm. Hetiang mi hi an awm ve fur a, thingtlang a kan awm lai pawh khan kan in ep chiahah chhungkaw inhau bur bur reng an awm. An ni phei kha chu bungbel a thlawk fua fua zel.

“Min ma kher suh. Keimah zawkin sum ka rawn chhuah dawn. Bungraw pakhat pawh ka hnutchhiah lo vang che” a nupui chuan vin tak bawkin a ti leh a, inchhungah lutin polythene dum a rawn khai chhuak le le a.

“Ţhahmingthang kha thil kha paih reng reng suh” U Rema’n a tih lai te chuan paih tumin polythene chu a then vir kual nasa tawh a, Fredy pawn “Paih suh paih suh” zawi te te in a lo ti thum ve dut dut a, chuti khawp a an ui chu eng tak ni ang maw?

An inbul kawm thlang a a theh thlak rualin an pa chuan a nam bu dawrh a, a tla ve lo chauh a ni ber. A sam a ţham chung a a hnuhsawn lai chuan insum thei tawh lovin ka tawm rukna aţangin ka chhuak a, an hmuh tur a ding teu chungin “Hey hmeichhia a nih kha. Thinrim mah la hmeichhia kutthlak tur a ni hleinem” ka zu ti lang lang a. Mipa berin kut an thlak chuan eng mi pawh nise kan hmeichhiat pui te thlavang chu kan hauh ve ngam tur alawm.

An nupa chuan an rawn hawi chho a, “Tu nge i nih a?” an pa zawkin a rawn tih laiin Fredy chuan “Rawn let nghal rawh hmeli” a lo ti ve khur khur mai bawk a, “Hmeichhia kha kutthlak lo la a ni mai. A nih loh chuan police ka phone dawn nia” tih pahin ipte ka zen rak rak a, a lawm zawk dawn emaw ka tih laiin an nu chuan “Mi nupa inkarah rawn inrawlh ve ringawt suh. Naupangte lehnghal, police i phone chuan i chak lo viau ang. Zakthei lo reuh lutuk mai” min ti ta zek a. Fredy-a dinna lam ka hawi phei a, ‘ka tih reng kha’ tih melhin min lo melh a, hei vang a nih dawn hi tumah an inrawlh duh miah loh.

“I kalsawn dawn na nge? Mi nupa inkar a inrawlh turin tu nge ni a i inhriat a?” vin zet a an nu a au leh ţhat ţhat laiin zingkar a kan in a rawn leng kohhran upa ngei kha chu kawng tereuh te ah chuan a rawn kal tlang a, a rawn hawi chho hram lehnghal. Min hmu chiang lutuk tlat.

“Ka uang a nih kha ka hmu reng reng lo che u” tiin ka riat nawi ta vel mai mai a, “Kal rawh kal rawh” duh dah zet a a rawn tih leh phei chuan ar in lamah ka zuang phei zawk a ni ber.

“Ka koh lai che khan rawn phei mai ta che” tiin pakhat-a lah chuan min lo hau veleh zui a, “Ar kg4 awm vel chu lo melh rawh” en pawh min en lova a tih liam puat hnuah phone a phawrh a, a kutphah a lian bawk si, a phone lah chu a te angreng sia, hmu chiang viau lo ila chu phone a ni tih ka hre lo hrim hrim ang. Hmeh zeuh a zai rat rat thei tur ni awm a ni.

A hmeh mawlh mawlh hnuah “Ti nge tawtawrawt kha i paih tir daih?” a ti nghal tawng a, a lungawi loh hmel kher mai.

“Chu pawh ni se i chhuh sak hman reng kha. Ka hmu reng che u lawm mawle” vin deuh hlek hian a ti leh a. Rilru hah hmel takin bai auh auh chung hian kawng dawmin a vei kual sek a, “Zu chhar leh rawh” bul hmuk hian a ti leh a, “Naaa…rui mah la in kawmthlang lekah te chuan tluk natna tham a awm hleinem. I chhar loh ten zanin kan fawp êng thei nang” a ti leh a, amah en a ka lo la ding reng a hmuh chuan mitmeiin ar in kawngkhar lam min kawh hmuh leh a, lu ka la thing tlat. Lei tu tur zawk ka nia, a buaipui turah ka ngai.

“Aw ka rawn chhar ang. Nep zel zul emai” tih leh phone dah a rual a, an hausak nen phone ţha deuh hlek te chu nei zo awm tak a nia sin le.

“Duh zawng i hmu tawh em?” ti a phone ah ţhat leh pah a min zawh chuan “Ka hrethiam lo. I duh ber min pe mai rawh” ka lo ti nghal thuai a.

“Ninawm e ka ke a na sin le” ti ban charh chung hian ar in kawngkhar lamah a bai phei suih suih a, ngawi rengin ka zui ve zel ringawt.

Ar in chhungah lutin a pawm kual den den a, an lo ri ţuk ţuk mai. Hneh sawh deuh a pakhat a pawm kan hnuah la kun reng chung hian min rawn melh a, “Hei hi i duh em? Kg4 a nih hi” ti a min rawn zawh chuan awih lo lutuk in ka lo chek tlak mai.

“I buk dawn lo mi?” tiin dak dek dek chung hian ka zawt a, an vai a an chhuah hlauin kawngkhar hawn zau a phal tlat lo.

“Buk a ngai lo, chawi zeuh ila a hriat mai lawm. Sawi vat vat teh” a ti vin hluk hluk tawh.

“Buk loh te chuan” ka lo ti fan leh raih a, chawi kân tawpin ar kg zat a hriat nghal theih ka ring tlat lo.

“Kum2 vel ka vulh tawh. Min rin loh leh lei tur dang zawng mai rawh” a ti bul nghut nghut a, a ar pawm sa a nghat chawrh lehnghal. Thinchhe peng pung emai a.

“Ka lo duh mai ang, leina tur dang a awm si lo va” rawn chhuah a tum lai a ka lo tih leh ngat phei chuan a hmel a dur nghal khup khupin ka hre mai.

“I va khawlh kham reuh e. Nichin khan sawi ţha hle hle ta che” tiin min vin nghek a, ar kg4 tling tur awm ang zawngin a pawm kual leh dun dun tho sia. Min zawn sak dawn tho te chuan vin kher loh tur mai tur a nia.

Pakhat a rawn pawm chhuak a, ar in kawngkhar a khar phui leh hnuah “Lo pawm rawh ka kalh lawk dawn” tih pahin ka awmah tak a rawn nawr bet a, ka lo vawn beh mai ringin a thlah a, ar in kalh tum a a inher leh chiah chu ring lutukin ka ţe nghal chel chul a.

“A chhuak a nia, ka pawm ngam lo ka tih ka tih kha” ar um dawr dawr pahin ka ti mawlh mawlh a, umpha reng mah ila ka pawm ngam lo.

Ke na chung chungin min um pui a, a tlan peih tawh lo hnuah “Hetah hian ka lo chang ang rawn um phei rawh” ti a min au lung lungin a din na ngaiah che sawn lovin a ding tlat tawh. Mahse a inring ran thung.

“Chir..chir..tlan ang le” ti a thlem chungin ka um a, Fredy-a dinna lam a ka um phei chuan harsa tak chungin a lo man thei hram. Tlan kual nasa viau mah ila huan chhung an ti fai ţha a, bal ve nian nuan mah ila hmuh hrehawm khawp a bal ka ni lo.

Ar chu leiah a nam bet a, ar in bang a buara hrui inthiat far zing a pakhat chu pawt thla hlawkin a ke a ţawn zui mawlh mawlh. A hralh ngun viau tak tak a nih hmel a hnehsawh tawh emai.

Biak pawh min be duh tawh lovin ar khai chungin a kal chho hmawk hmawk a, bai lo phei se chu ka hmu pha lo hma ngawt ang. An in kawtah pawisa vel kan inpe fel a, kg1 man zat min hrilh hnuah kg4 man min la chhut tir zui. Ti ţhang inti ve viau si a pumpui zat tur hre leh der si lo.

Pawisa kir la turin inchhungah a lut a, rei vak lo hnuah a rawn chhuak leh nghal mai. Chhuat a a ar dah chu la in a ke a khai turin min hrilh leh thlap a, ka khai kan rual a ka hlau ner vel chu min melh khui khuiin “Vawikhatmah min rawn dawr tawh suh” a ti bung hmuk a, ka dawr duh vanga lawmthu min hrilh miah lovin inchhung ah a lut leh daih. Kawngkhar a la khar ring em em zui.

Hlau chung chungin ka khai haw a,kut hnung suihin kawtah ka pa a lo vei tawn chhen tawh.

“I va rei em em ve Lalnunmawi. Tu nupa buainaah nge i lo dah leh de de tawh a?” min hmuh rualin a lo ti nghal pang a. I hlau em? I hah em? intih chu awm lo ve khawp mai.

“Huan thlang a miin a nupui a sawisa a nih kha. Bakah ka ar lei tur a chhuak a, kan um leh phawt alawm. Thil hrechiang lo hian min hau vak zel suh” amah aia pawr zawk hian ka lo ti let a.

Mi an awm leh awm loh hriat tumin a hawi kual a, inchhung ah chiah thawm a awm. Ar ka dahthlak zawh hnu a ka ding chhuak leh chiah chu ka darah nghet deuhin a dawm a, a kut hum ruhin a kut zungchal châng a pir bik a, chumi pir bik tak mai chuan ka chal a nawr pahin “An in vaw hlum dawn a nih loh chuan mi buaina ah dak de de suh ka tih fo kha, nimin lawkah pawh ka hrilh che a ni lawm ni?” a ti a, nawr ringawtin na lo mahse a kut a tih chet chuan tlemin a na ve deuh.

Ka nat hlau ngawih ngawih tu a ni bawk a, min thlah leh vat a, ka chal ka tuai vut vut laiin “Mi buaina a inrawlh i chak tlat zel hi engtin nge ka tih sim dawn che ni?” a ti hap a, “I hming sa tu tal hi zah la, i hming let ling thawk hian nung lo teh. Mipa awm ţha duh lo an sawi ang mai i nih hi” a tih zawm leh a, chhang lovin ka ding ngawi ngul ringawt.

Min en vung vung hnu a “Kha i kekawr a kai kha ar ek em ni?” ti a min zawh chiah chuan ka in bih thuak thuak a, “Kha i khawih fu dawn” ka pa in a tih rualin ka khawih fuh chiah bawk. Ka kut a a kai chiah chu ten lutuk vangin ka rak ţhat a, inring hman lovin ka pa kawr, dul sak ţulin a tawn marna lai takah ka tat hmiah.

“Lalnunmawi ngati nge mi tah rik ngawt?” a kawr pawt fan der der chung hian a ti a, ka pa hi ten chhe chi a ni bawk nen, a ner nasa kher mai.

“Ka hamhaih lutuk a i dul kiar lai chiah kha ka hmu lawm. Phelh rawh pa ka su mai ang” inthiam lo deuhin ka ti ve ngei a, ka inthiam lo khat a sin aw. Ka ar khai khan ka kekawr a si reng a, ka khai laiin a e palh nge pawh ka hre lo. Buaipui tu zawk Fredy lah kha kai ve ang pawn a awm si lo va, ka haw kawngah khan leiah ka nghat zeuh zeuh a, khami chhung vel khan a lo e hman a nih ka ring mah.

“Ka inbual zo chauh a inbual leh ka ngai dawn a nih hi. Ar ek phei hi chuan uih bikna riau an nei lehnghal a” ti chuar chuar chungin inchhungah a lut a, ka zui ve zel bawk a, a ţhiante hnen a “Ka fanu in ar ek min ti kai pek alawm mawle, kan inbual lawk ang e, thingpui te lo in leh rawh u” a tih ri pawh ka hre pha vek. An pindan a bathroom a hmang a, keiin bathroom chheh chhawl ka hmang thung. Ka ten chhe ve tho a, uluk lehzualin ka inbual nawn leh ngat. Inhau te nupa kha ka la ngei, annu lah kha chhan man a awm lo ropui si. Lawm tak a ruangin min la ankhum let erh a, ka pa lah hian a lo hre ve hman ziah. Mi nun a inrawlh tam ka duh lo. Mahse an ui em em tawtawrawt leh fawh ên theih kha eng nge a nih ka hre chak.

Buaina hranpa nei em em lovin school ka kal kar tluan ve ngei a, ka pa in min hau khat deuh. Inrinni a lo nih chuan ka nu ka pui a, ka nin ber darthlalang min nawh tir. Ka naute pahnih an awm mai mai a, ka hnathawhna bulah eng eng emaw ei chungin an infiam a, hah deuh a ka awm laiin an nui awr awr reng ringawt. Ka nau chiah hi hmeichhia a ni a, kan te ber erawh mipa a ni thung.

“Bawihte ventilation khi nawt tel vek rawh aw” ka nu in a rawn ti dam thlap a, peih lo viau mah ila ka pa in min rawn mit sir nghal rulh vangin aw ka pawh ve hram.

Dak vah a ka nawh mawlh mawlh laiin ka pa a rawn kal hnai a, ka nawh tawh hnu a rawn endik nasa mai.

“Pa, ka dak reng a, ka ning tawh lutuk. Ka nghawng a kham vek tawh” lo ti mah ila “Reh veleh mai ang” a ti liam puat a, a ţhutna ngaiah bawk ţhuin lehkha a chhiar zawm leh daih.

“Chhungkaw chheh chhawl mai pawh ni lo, chhungkaw nawhfe nih hi ka kham. Min sawr fe vek tawh, na lo lai pawh ka nei tawh lo” ti a ang hlak hlak chungin na deuh deuhin ka nawt sawk sawk a, ka pa in “Ân tir mai mai rawh. A thinrim poh leh a fai a ni mai” ka nu hnen a a ti ri ka hre pha vuai vuai a. Ka hriat loh tur a sawi mah ni se ka chanchin an sawina a nih phawt chuan ka beng a var lutuk tlat.

Zanah lehkhazir turin ka ţhu ve vung a, zirlai rilru ah a lut thei hlawl lo. Keimah a ka inchawm theih hun tur leh ka hausak hun tur te ka ngaihtuah daih a, a chang leh mi lar ka in nih tir a, a chang leh ka zaithiam duh deuh deuh te bialnu. Ka lehkhabu hnung lam ka ziak hnawk nuai a, phone ka khawih sek bawk.

Lehkhazir peih deuh nih a, zirlai zawng zawng a vai a thiam vek ka chak. Mahse a zir a tak hi a har em a ni. Lehkhazir ka ngai ti ve reng mah ila exam hall ah ka hawi ka hawi leh tho a, mi fate mark ţha deuh nei chung a an lungawi zawh loh laiin ka fail loh phawt chuan ka lawm tawk. Fail ţhin te pawh hi ka dem em em lo. Lehkhazir harsat zia ka hrechiang ve em.

Inkhawm tur a chhungkua a kan chhuah vek tawh hnuah dawrah ka kal peng leh rih. Nu Rami a lo awm lo va, patling pakhat lo awmin ani pawh inkhawm turin a insiam diam tawh. Ka duh zawng ka lei sawk sawk a, a la hma bawk a dawr aţanga ka let leh chu ka hmanhmawh tawh lo nasa mai. Kal hma leh kan ţhu rei a, ţan hma a thlen hman a tawk chiah.

Ka ar leina ka thlen dawn ţepah Penglengpunga khan bike dum fai ser sawr tak mai hi a rawn nawr chhuak zal zal a, kan intawk hman vel chiah chiah. Inkhawm ve tur ni awm takin coat suit body fit pawl duk a inbel a, a sang ţha mai bawk si, a taksa lian leh nalh tak nen a inrem thlup mai. A sam a lang thur leh siang tawh a, mahse kan ar um ni a awmze nei lo deuh a thur ve ringawt ang kha a ni lo. A biang vung lai te kha lo dam vekin ke a bai tawh lo bawk.

Bike a a lawn hnuah min rawn hmu ve chiah a, a hmazawnah ding reng mah ila min hria angin a awm duh ţhak lo. Nghah nei ni awm takin a tlan chhuak nghal mai lo va, a kut pahnih chu bike hma pawng laiah a dah a, a kutţang fai sar mai chu dawhtheih loh hmel zetin a inchhawkin a ti che zeuh zeuh bawk. Chutiang zawng zawng hmu kilh kelh vek thei khawp chuan ka awm hnai a, min be miah lo. Ar kan um dun ni aţang kha chuan inhmelhriat ang a kan awm ve theih ka ring a nia. Ţhian ka ngaina lutuk hi lawm ka pa in a duh loh ber ţhin ni.

“Hmanni khan ar in a ek khum ve che em?” tiin ka zawt ta ringawt a. Ka ding ve reng si a, amah ka hmuh vang mai a danglam angah min ngai ang tih ka hlau. Min hriat ve tawh ka rin vang chauh a ding ka ni.

“Ek khum nang” a lo ti ve mai a, vin lem lo mahse min chhang bul hmek hmuk khawp mai. Min hmu angin a awm ve tawh tal alawm.

“Keichu min ek khum a” kawm nel tumin ka ti leh.

“An pu i sawisa hneh em alawm” nui miah lo hian a ti a, a fiamthu niin ka hre deuh bawk sia, a nuih loh lai a han nuih bik vak lah thil tih chi ber a ni si lo.

“Ka sawisak hneh vang che ni lovin a mak em a, ka hrilh ve mai mai che” ţhen ţha chung a ka tih chuan a kutzungchal a a mithmul buk tak thai neuh neuh chung hian “Ka lawmpui dawn che nge?” min nuihzat hmel zet hian a lo ti tawh a, ka pa min tih dan phei kha chu hria se min nuihzat lehzual viau ang.

“I va inchei nasa khep khup ve” tiin ar nen a inzawm lo lutuk thil ka sawi leh.

“Zaipawl form a nih hi” zawi sup a a tih chuan ring fahranin ka lo nui. Ka hmuh tawh ţhin dan zawng zawng nen zaipawl a tel ve a inhmeh hlawl lo. Ka nuihza zual a reh chiah tihah “Dei duai che hian” a lo ti leh hluk a. Inkhawm nachang pawh a hriat ve ka rin loh laiin zaipawl ah a lo tel leh thlap tawh.

Hmanhmawh tawh hmel zet a a sana bun lawk bur a en lai chuan “Inhmeh lo e” tiin ka lo phun sep a, ka ţawng a hre pha tih hriat zetin min rawn melh a, “Duh vang a tel ka ni bik lo tunah te hian lum ka tih zia aw” min nin hmel zet a a tih hnuah hrechhuak leh thut ni awm takin “Nang hi” ti hluaiin bike hma bawh meuhin min han thlek hmasa te te a, “I ni tiraw?” a ti leh sup a.

“Eng maw?” tawlh hnun hret pah hian ka ti a, amah chhanchhuak tu kha ka ni tih a hre chiang mai.

“Hman zan a mi kha” a ti chiah reng a, ka insawifiah hmain hmeichhe samtawi mat dawr a ka hmuh tawh nu ngei mai kha helmet pawm chungin a rawn chhuak a, “I helmet em em chu lak ve mai tur alawm. Ka kutah dah vek zel suh. Veng dangah kan inkhawm dawn lehnghal a, nangmah vangin kan tlai vek ang” ti zat zat chungin bike bulah a ding a, Fredy pawn hnai set sawtah min en ta bik lo e.

“Zawk zamah che hian. Ka phur lo tawp dawn che mawni le” lungawi lo deuh hian a ti thum bul bul a, an inhnial zui bap bap a, “Nang kha eng nge i la tih reng a, i inkhawm dawn lo mi?” an inhnial laklawh lai lai a chutiang a min rawn tih chuan ka tum bur a, “I ar tui loh loh nen” tih leh kal ka rual nghal a.

“Helmet hian ka vawm zui zawt dawn mawni le” a tih ri ka hre pha a, a ti tak tak duh dawn a hriatna ka neih tlat vangin ka kal chak zual sauh a. Helmet a ken loh hunah a la hre ve khawp ang mawle.

Zaipawl a a tel ve ţut kha ka la awih thei chuang lo. Nawr lui tu an awm a ni chiang ka ti rilru a, zaipawl form a tih lah kha a inhmeh zek a, kam sir thi phung a ka hmuh pa kha a ni lo emaw tih mai a awl dawn rum rum alawm le.

Zan inkhawm banah dawr kal turin phur takin ka chhuak a, pawimawh ah lo ka pa in chhuah a phal tlat si lo va, miin ‘pastor fanu’ tiin fel deuh turah min ngai ve ting tang bawk si a, ka hmingchhiat a hlau khawp mai. Duh reng vang a pawi khawih ţhin ni lo mah ila pawi ka khawih a hlau a ni ber.

Dawr hma tlem te chiah an lo hawng sia a chhungah ka lut leh ta ringawt. Nu Rami a lo awm tawh a, tlangval inleng a ngah mai. Fredy pawh kha a lo awm veleh hman pek a, len a cheh ve ngawt mai.

“Lokal rawh Mawimawi, min lo dawr leh ţeuh rawh” Nu Rami’n a lo tih veleh tlangval ho chuan min en deuh ţhap a, awm a nuam lo duh a sin aw.

“Aw ka lo en kual ang. Ice cream te pawh ka duh tel a” ti a duh ka sawi hnu chuan duh duh lo la mai turin min hrilh a, hmui pet fuat chunga ka en lawr de de laiin, “Pastor fanu kha i ni tiraw?” an zing a pakhat chuan a lo ti a, min be tu lam hawi chuan ka bu nghat nghat a. Fredy nen an ţhu dun a, “Hman zan zanrei deuh a tukverh a i kar lut ţhem ţhem kha ka hmu che” chupa bawkin a tih phei chuan Fredy chu min melh run chung hian a kiai suk a, zingah khan min lo zawt ve tawh tho bawk nen min zawt fuh a intih hmel cher cher khawp mai.

“Min hai a niang” inven tum lutukin ti ve mah ila hrechiang inti fe hian “Ka hai che a tiiikah….ka leng haw in inbul vel a ka kal lai a nia, gate i luh aţangin ka hmu tawh che, ka enzui zel che a, khanu kha i ni chiang khawp mai. I chhuak ru chiang lutuk aw” pawr fahran hian a ti a, chupa bul leh chiah a mi chuan min nuihzat deuh tak hian “Nghal reuh e pastor fanu ve si” a lo ti ve zeuh a, a sawi zawh rual rualin Fredy chuan rang lutukin a lu ah a beng lawlh a, a ri pelh a, a tuai nghal vut vut mai.

“Pastor fanu an mu hma kher ngai lo mawla. An tukverh a nia, duh leh inbin lut se, chhuah te pawh a chhuak ru ve bawk ang chu” a tih hnuah “Tiraw?” ti a min zawtin awmze nei deuhin min rawn melh leh kher a.

“Ni ngawt mai, Puia leh Hruaia hi chu in kal khat mah mah. Rilru hi tih parh harh tur a nia, thil dangah a lian lian in duh tho a, rilru te deuh neih loh tur” tiin Nu Rami’n ka thlavang a lo hauh ve a, amah lah chu a nui zui huau huau lehnghal a, tlangval ho chuan an lawm kher mai.

“Fredy hi chu pastor fanu thlavang hauh a pe na hrim hrim. Kan pastor chhuak chiah fanu nen te khan eng emaw awm a awm a ni lawm ni? In ni ve hman zuaiin ka hria” pakhat hian a lo ti veleh a, kan la mikhual bawk a an hming pawh ka hre hlawm lo.

“A pa kha hlauhawm e, zan rei a an kawmthlang a ka kal tiang nen min um mai aaa” a tih nang nang laiin Nu Rami’n “Aw..a fanu ruk chhuah i tum emaw a ti niang chu. Eng nge i tih reng reng a zanrei ah lehnghal?” tiin a lo zawt ve khauh a, “Bialnu te berin min ngai a min ko a nih chuan kan kal ve bawk ang chu. Pastor pui roh kha a lo la meng a, zia lo tak tak a ni. Ka thlen hma hma in ka haw leh” a ti a, a thusawi chu amah ber lah chuan engahmah a ngai lo tih a hriat. Midang an nuih dar dar lai te chuan zak ang pawhin a awm lo. Kei lah pek chu an thusawi ka ngaithla tui lutuk a, thil lei tur thlang ang deuh a lang derin ka awm ve ta reng ringawt a.

“Keichu pastor kha fel ka ti sin. Khawlai a min hmuh te hian hming ngeiin min ko nalh nalh thei a” ti a a ţhianten pastor an fak lai chuan “Fel ang chu a fanu in ngaizawng ve hleinem” a lo ti leh hman pek a, a phone tereuhte bawk kha phawrh chhuak lehin a hmet leh mawlh mawlh tawh a, midangin “Phone lah hi i nei chau rau sia” tiin ka rilru a awm an rawn sawi chhuak hlauh a.
“Niang chu a bo zel a, naute pianghlim kephah tiat bak lei an phal tawh lo a nih hi” phone en reng chungin a lo ti ve hap a, phone leh a beng chuktuahin “U Rem” tih leh pawn a chhuah a rual a, a tawtawrawt bawk kha aniang chu. A buaipui rei tawh ngar ngar khawp mai.

“Rinhlui nen sawn an inzui ngawrh sia, an ni ve zawk a maw ka lo tia” tiin tu emaw chanchin an sawi leh a, ka hriat ngai loh an sawi tawh emaw ka tih laiin Nu Rami bawkin “Puia ţhin hi chu a, an in ngaizawng lo rapthlak lutuk. Awi awi awi…innei ngat phei se la chu nung dam a kan hmu reng duh ve ve anih chuan inţhen tir tawp an ngai ang. Fredy leh Rinhlui te chu inţan tlat siin an in ngeih reng reng hleinem” a lo tih takah chuan khapa chanchin bawk kha an la sawizawm a ni tih ka hre chawpchilh mai. Ka chhuak ru min hmu tu ni a insawi ngei kha Puia a tih chu a ni.

“Puia, Hruaia lo chhuak ru, kan thluak dèk harh ang u” ti a pawn aţanga a rawn au lung lung takah chuan nichin lawk a a bul a ţhu te pahnih kha an ding nghal hluai a, “Dêk nui leh hiar hiar ila ni mai lawm” phur zet a ti chungin an chhuak nghal nul nul mai.

Anni pathum an chhuah meuh chuan a reh nghal dûk a, ka thil lei ho Nu Rami’n a chhut khawm a, polythene a min dah luh sak pahin “Lo leng ve ţhin rawh ka inhawng rei thei teh mai nia. Kuhva te min rawn thel pui ţhin ang a, inti tlangval ve uaih tawh ho ringawt hi chuan min pui lo emai, an rawn awm hnawk ve ringawt a” a ti bawrh bawrh a, dawr chhung a la awm ho an phun nang nang hlawm.

“Hman changin ka lo leng ţhin ang” ti a hrilh pahin pawisa kir ka la a, chhuah pahin ka la inchhuih zui, in vuan bet hman lo ila chu ka tlu na viau maithei a ni.

Ka thil khai lai then hliau hliau chungin muangchangin in lam ka pan a, kan veng a dâm bawk a a vawt var mai. Fredy te inkawt ah zing a ka bike hmuh ngei mai kha a lo inhung leh ran tawh a, a bulah tumah an awm mang si lo va. Gate pawn aţangin chhung lam ka bih ru dek dek a.

A ţhiante nen a an inzui bo dial ka rin laiin an kawt eng laiah a nu nen an lo ding a, an inhnial ni awm tak a ni, a lo inthlak leh diam tawh a, helmet lawk deuh a keng bawk. A nu chuan a ban ah dawm ve bawk mah se rang deuhin a phih let a, a chhuak tur dan tum ni awm takin a kawrah a pawt leh hram a, chhuah luih tum a ka dinna lam a a rawn phei chiah chu hmanhmawh deuh hian ka bi ru vat a, zing a ka hmuh dan nen khan a inang lo leh viau tawh.

“Lalrintluang min bum tum reng reng suh aw. Mawitea’n damlohna pakhatmah a nei lo. A chhungte nen kan inbe vek” a nu in a tih ri chu ka hre pha tawh a, hmu kher lo mah ila a um zui tho a nih ka ring.

“A na thut ka ti reng a lawm. Tlaiah a nih kha i biak, natna ah thu kan nei lo” a ti a, a awki pawh a sang ta deuh alawm.

“Vawiinah i nau a rawn thleng chiah a, leng reng lo in kawm hlim ve zawk ta che” a nu chuan a ti leh a, an ţawng a hnai tial tial a, che sawn ngam lovin bike bulah bang nghengin ka ding bet thlap tawh.

“Ka leng dawn lo Mawitea dam lo ka kan dawn” tiin a nu thusawi chu a lo tih dik sak a, a chhungte hian an thunun hneh lo viau ni a rin na nghet deuh ka neih phah nghal mai.

“Huan a Rema leh i ţhiante pahnih inzui thla kha thlang lam tukverh aţangin ka hmu vek. In rui leh dawn a ni maw? Rawn vung haw leh na teh, vung nasa lehzual turin ka khawn belh ngei ngei ang che hre rawh” a nu in vin zet a a tih hmuar hmuar hnuah pawh ngai pawimawh lo fahranin “U Rema te inah an kal dawn nih kha. Hla zir naah ka tlang maithei aw” a la ti ham ham a, “Hla zir naah i kal dawn lo chiang lutuk. I chhuanlam mai mai a nih kha” a nu in a tih leh lai mekin hmeichhe aw hian “A mak e, pawnah au lung lung zel suh u. A zahthlak thei emai” a rawn ti lang lang a, chu chu remchangah la in a rawn put ru zeuh , ka dinna ah kher a rawn kal lehnghal a, engmah hre lo ang a lan tum a ka din ţhat sawk sawk lai chuan, “Nang te hi zawhte vak vai ang mai, meng de ker chung hian khawi khawi emaw aţangin i rawn pawk chhuak nawlh nawlh a” ti hluk hlukin min hnawl sawn a, a nu in a koh leh hlau ni awm takin chak fahranin a khawh chhuak nghal puat mai.

Bih zawk ka tum laiin an lo inhau kher a ka awm reng phah. Kan awm na hmasa a kan tih ţhin dan a nia, kan inhre chiang vek a kan inpawh bawk a, ţhiante nen khan en nawm tur zawng reng rengin kan khawsa ţhin a, ka sim hlei thei lo a ni ber.

Ka pa in min lo melh khui khui a, hre lo der hmakin pindanah ka lut tlang a, zirlaibu keuin a hriat phak turin ka chhiar a, ka ţhiante ka ngaih em vang khan Aizawl awm ka huphurh a, mahse kan awmna vengah hian ka ţhiante ang deuh deuh an tam dawn riau in ka hria.

“Mawimawi i ice cream lei tui saw rawn hawp ve rawh” ka pa in a rawn tih chuan ka hawi phawk hra a, dawr a ka luh tirh khan ice cream ka la chhuak hmasaber tih ka hre chiah. Nu Rami lah khan a hre der mai si lo va, a tui nasa tawh viau ang le.

CONT…

This Post Has One Comment

  1. Anonymous

    khogaiin next

Leave a Reply