You are currently viewing TROUBLEMAKERS-4

TROUBLEMAKERS-4

Spread the love

TROUBLEMAKERS-4

“Bawihi tho teh, ţhenawm nu a lo leng a, saw a hmu duh che a niang” ka mu lai ka nu in min sawi det det a, ka che ţuah ţuah a, ka nu din lohna lam hawiin ka saisir ta daih a. Zing thawh hi chu khawvel a hrehawm ber ber te zingah a tel ve ka ti ngam sak.

“Mawimawi ipa rawn kal hma in tho vat rawh. A be duh lawk che a, in nghah tir reng a inthlahrunawm” ka nu bawkin a ti leh a. Zing hma tawk a min rawn hmu tur chu chhelo deuh a nih ka beisei lo phawt. Mipa chhe lo tho hma an vang viau maithei a ni. Ka thawh duh nan ka pa a hmang ţangkai ziah lehnghal. A awm dawn lo, ka hre ve vek.

“A va mak e aw Mawimawi, i harh tawh reng. Ngaihtuahna kawm kual mai mai lo khan tho thuai rawh” ka nu chu a vin lek lek tawh. Nu a zawng a nu zaidam tawp khawk a ni a, nileng pawn min kaitho se a vin miah lo ve thung ang.

Min kuai zangthal thawk a, mit lehlam chiah ka meng dek dek a, ka nu chuan min lo bih nasa mai a, a mangan hmel khawp mai.

“Nidang a i thawh hun a pel tawh hrim hrim a, inti harh la rawn tho chhuak rawh aw” ke ka lek kan ar ar laiin a lo ti leh hman a. Peih lo deuhin ka tho ţuah ţuah a, ka khum bul chiah a ka nau thlamuang tawk a la muhil mek chu vawm irh awk mai te ka chak rum rum mai. Min kaitho hma bik ziah a, ka dam lo der a nih loh chuan kham khawp ka mu ngai lo. Dam loh der hian thawh tlai kan pumpelh thei deuh a, mahse keichuan ka ti leh mah mah a, an hre vek tawh. Min kaihthawh dawn a ka lo rum ţuah ţuah tawh chuan ka pa phei chuan min tung tho lawp zel.

“Nizan Lalnunpuii a tho â lehpek a ni maw?” ti a phun hlakin chhuar chung a ka chapal khing in tung va chu ka la thla a, sam ţawn ţha mawlh mawlh chungin ka chhuak zui hna hna a.

Nu tling thau ve deuh, ka ar leina nu ngei mai kha thingpui no dawmin a lo ţhu luau a, zing kar kar a a ni berkher ka hmu thut chu ka hamhaih lek lek hial a ni.

Ka nu in “An nau in school ah an dah ve dawn a, a rawn hmu lawk duh che a nih hi. Pi Mahruai, hei Mawimawii chu a nia” a lo ti zung zung a, tlem chu ka hrethiam ve e.

“A nih chu, ka hmu tawh tlat che in ka hria” min en vung vung chung hian a ti a, lai deuhin ka lo nui a, min hmu tawh chiang a lawm. Ka awm laiin a fapa nen an inhnial hrep kha mawle.

“Ar ka lo lei tawh a” ka tih veleh ka nu in “E…i ar leina te kha maw an nih?” ti a ka nu’n min zawh hnuah “A tui khawp mai kha chawp chilh deuhin mi chaw eiah kan sawm a, in lo nei hlauh a a tihzia tak tak a ni” Pi Mahruaii a tih nu bulah chuan a ti leh a, ka thingpui tur a siam zawh chiah chu ka lo la vat a.

“Rawn lei ziah rawh u, lei tur kan nei reng a lawm. Huan a zau si a, dah awl mai mai aiah tiin ka fa tlum ber ka vulh tir a, a peih rei ka rin loh nen tun thlengin a la vulh ve hnuk hnuk chu a nia” a sam tih kir chawp tuai thuak thuak chung hian a ti a, ka nu pawh Pi Mahruaii bul hnaiah a ţhu ve tawh a, keiin fridge ngheng ar ar chungin thingpui ka in thung.

“Hmun awl neih phawt chuan hman ţangkaina zawn zel tur. Hei quarter thlang lam pawh hi a awl duai a, eng eng emaw ka la ti ve ang” ka nu chuan phur tak hian a ti a, kut hnathawh lam chu a sawi nuam tih zawng tak a lawm.

“La ti ve rawh keini ar chiah kan vulh a, thlai chinna tur hmun awl kan nei mang tawh lo va, nei ila chu ka ti ve ang. Mahse kan ar pu ber hian huan hi a ta neih hlur a” a ti a, a hma ang bawk khan dul insep dawrh dawrhin a nui leh a.

“Fa i va nei fel ve. Eng rual nge a nih a” ka nu in ngaihven deuh chung a a tih chuan ka nuih loh nan ka hmui chung leh hnuai ka hip tlum hmak mai.

“College a kal ve mek. Fel nang aw…a â lutuk a kan buai a nih hi. An unauah a zia a dang ber. A chanchin te chu…in la hre dawn lutuk. Veng chhung mi te pawn Penglengpunga an ti mai amaw, in la hre dawn chauh bawk a ka zep lo mai a nih chu. A inkhawm peih lo viau emaw kan tih laiin zaipawl ah te a lo tel leh daih a, chutiang chi chu a nia. Ka fapa ah hi chuan sawi lawk theih a awm lo” nui huau huau chung hian a ti a, ka nu a ngam tlak danah an lo ti ti hman viau tawh a ni ngei ang.

“An inang thei lo alawm. Enkawlna khat dawng ţheuh ţheuh an danglam thei lutuk. Kan awmna hmasa ah pawh khan an sawi fo a, unau zing a danglam bik hi an tam a nia, nang ni chauh in ni lo” ti a kan inleng nu ţawng thlamuan pahin ka nu in min rawn melh kher a, a va ţullo thei tak.

“Danglam thei tehreng mai. A ute ngaihtuahawm an awm lo. Penglengpunga hi a boy ve em a tih a ni mai” a ti a, rilru hah hmel pawh pu chuang lovin no ruak a dah thla a, ka hman tawh leh tawh loh hriat tum ni awm takin min rawn melh pah ralh a.

“Fa engzat nge i neih a? An puitling vek tawh tihna em ni?” ti a ka nu in a zawh pah chuan ‘in thuai thuai rawh’ tih melhin min rawn melh ve bawk. Nutling ti ti te chu kan hre ţheuh ang a, fa te chungchang sawi nuam an ti a, hetianga an sawi chiam hi a mak lem lo. Nu te tan chuan an hmangaih ber fa te chanchin sawi chu a hlimawm ve duh dawn lutuk tlat a ni.

“Fa 4 ka nei a, an puitling vek tawh. Kan naupangber tih loh buaipui ngai an awm tawh lo. Kan fihlim ve tawh lutuk. In kawtah sawn pangpar ka rawn hmu nual a, i tuipui ve em ni?” tiin ka nu chu a zawt let daih a, fa te aţangin pangpar ah an pakai duai mai.

“Tuipui ve e, kan insawn khan kan bawr lutuk a, ka rawn kalsan vek a, ka ti leh ţan beuh beuh ang chu ka tia, i nei ve em ni?” ka nu in a tih leh lai chuan an bulah ka lo ţhu ve mek a.

“Ka ngah lutuk, an bul a awm te hi nuam ka tia, nakinah lo la en rawh, kawt a ka dah bakah inchung zawl ah te ka dah a, a tam mai” phur surh hian a ti a, ka nu pawhin a en ngei tur thu hrilhin Pi Mahruaii ang chiahin a phur ve niin ka hria.

“Mawimawi, tun a in school a i luhna hi a la rei bik lo tiraw?” tiin min zawt ve ta nge nge a.

“Aw kar hmasa vel aţang chiah khan” ka ti a, ka kut pahnih ţhutbetin ke ka thluang arh a, ke ţang ka phut zeuh zeuh a, awmdan tur dang ka hre hlawl lo.

“Aw..a nih chu, ka nau fanu hi kan hnenah a awm dawn a, i lo hruai tlangnel theih takin ka tia. Hemi school ah hian i lut ve tih pawh ka hre mai lo mah se nizan Rami haw tur thingpui rawn in in a sawi chhuak a, pastor fanu a lut ve alawm a ti mai a, zing kar karah ka rawn leng tawp mai a nih hi. Ani chu ţhian fel deuh kawm chi a nia, amah kaihruai thei tur” ti a min hrilh pahin keimah a beiseina neih san hmel deuhin min en ka ti mai, ka nu a awm ve kur bawk sia ka zak lek lek a ni.

“Class-12 ve tho em ni?” tiin ka nu in ka zawh ai min zawh sak a.

“Ni e, ti ila class-11 a zo chiah a, 12 a la zawm lo. Helam a rawn dah an tum sa hrim hrim a, mahse api, a pa nu a boral leh sia, hei thla hnih ngawtin a khawtlai phah a nih hi. Rawn phei vat thei anih laiin amah te sawn khawtlai dan phet a zawng reng a an ti mai a, niminah a nu nen an rawn phei chauh a. School kal dawnah Mawimawii hian rawn sawm phei se ka ti deuh a, ka rawn len chhan ho viau mahse rawn kal pah mai mai ka hreh deuh si a” tiin a rawn ti ti duah nachhan a sawi a, rawn kal pah mai mai lova a rawn leng thlap hi ka chhungte duh dan a ni zawk dawn hrim hrim.

“A rawn sawm phei dawn nia, in in lamah tho a kal dawn a, a tan rawn luh kawi lawk a har lo” ka nu chuan lo ti thuaiin ka aiawhin thu tawp a siam nghal hmak mai.

“A ţhat nasat chu. Kan nau chu maw Mawimawi, kaihruai tu ţha deuh nei chi a nia. In inkawm ang a i hre mai ang, amah a pui ve riap riap a, ţhian fel leh rintlak nei se ka tih vang a nia amah a kal tir lo va rawn sawm tur a ka tih kher che ni. Inthlahrunawm viau mahse min tlawmngaih sak hram mai dawn nia” ti a min ngen leh takah chuan inthlahrung lo turin ka hrilh a, ka zia hre lo lutuk a an nau hruai ţha thei tur ang a min ngai nghal tawp mai chu ka nu a zah hmel hle.

Dar7 velah a haw a, ka nu in “Fel deuh a awm a ngai tihna a nih kha. Ipa a awm lo hlauh a, awm phei se chu in inkawm a phal miah lo ang. Pi Mahruaii sawi hmangah khan in zia a in an hmel a, nang tal i insiamţhat a ngai tihna a ni mai. Kha a beisei sang ve ropui che sia, ti hnual reng reng suh” tiin min zilh malh malh a, kan in leng nu kha chu a fel phian. Mi, an hausakna hre run chung a ţhian kawm ang a ni ve lo. A fapa chanchin te kha kan la hriat tho tho dawn vangin inven lawk nan a sawi chhuak ah ka lo ngai ve hmiah a, fel deuh angah ka nu in ngai ta se, chanchin ţha lo hlir hre leh si se, khanu a hmuh dan kha a dang vek zawk ang. A chang chuan ka thil thlir dan hi a fing riau zel. Ka ţhiannu thar tur phei chu hmu chak tawh tak ka ni.

School kal turin phur tawkin in ka chhuahsan a, school ţan hun la hla viau mahse ka ţhiannu thar tur ka hmu chak tawh miau a, kha, ţhian ngainatna rau bawkin min hneh leh tawh.

Gate lianpui kawtah bawk ka ding leh vang tawh a, tawi khawmuang lovin tlem a lo inhawng zau sa laiah ka inzep lut a, ka hmuh chak em em ni lo mihring ve tho si ka hmu hmasa hlauh mai.

Chair tereuh te hniam deuh ah a lo ţhu a, a ţhutna hmaah ar mawi deuh sang âr mai pakhat a lo tlâ a, hliam a nei ni ngei tur a ni a ar ke chu chhah ve deuhin a tuam var luk mai. Ni sa lai kherah a ţhu a, ka hlim thla a hmuh veleh rawn hawi chhuakin mit ti zim sun hian min lo melh nghal run a, ni em na lamah a awm miau a, a tan men full pap theih a ni lo.

“School naupang maw i la nih a?” tiin ring deuh tak mai hian min lo zawt lehnghal. “Aw” tih sep pahin ka bu nghat a.

“School naupang ve si ti nge zanah i vah chhuah de de?” inti thupui fun fahran hian a ti leh a, chhan ngaihna ka hre mai lo. Zan a ka chhuah ruk kha ka sawichhuah vaih chuan ka pa beng a thlen leh ka hlau. A hriat vaih chuan ka thawmhnaw leh pheikhawk zawng zawngah thil ri chheng chheng thei a khai vek duh ang.

“In nau ka lo sawm dawn a?” ka tih leh phei chuan “Ehe….ka nu sawi kha nangmah hi maw?” a ti leh lung lung a, “Aw ni e, school kal turin ka lo sawm dawn” ka ti nawn leh ngat a, ngeiawm deuh hian a nui suk a, “Khai a…in va ropui lo dun dawn ve” a ti leh thawr a, mahni nihna hre mang si lo hian.. a nu ngei pawn tukin ah a ât lutuk vang a an buai thu a sawi zawh chiah kha.

“Chutiangah lo buai ve lo mai teh. Ar vulh bak thiam i neih bik loh kha Penglengpung” ka tih meuh chuan vanvadak meuhin a lo nui chhuak hawk hawk a, a ha lah chu a var ţha em em mai lehnghal.

“Nghapih i ei ngai em? Mami” a ti leh ta daih a, school naupang ka ni tih a hriat tak vang a Mami min han ti vel kher te chu ka ngei tawk a tling viau a ni.

“Ei ngai lo, rimchhe si, hang si—” ka tih lai mekin “Ţhat chu. Keipawn ka ei ngai lo” tlem a nuihza insum deuh chung hian a rawn ti sup a, kan thusawi leh nghapih in inzawmna pakhatmah a nei lo hrim hrim.

“Bawiha i ar chu eng nge a an a?” a pa ni awm takin a rawn tih takah chuan kawngkhar bul veranda chin ka chuh nghal rawk rawk a.

“Ka la hre lo. Ka tuam sak a, mahse vety a hruai tho a ngai ang” tiin a pa chu a lo hrilh a, a pa pawh a ţhutna bulah kut hnung suih a ding ve in a hmazawn a ar tla chu a thlir ve dauh dauh a, an hnung lam a ka awm tawh miau vangin an ţawng chiah ka hre pha tawh.

“Eng zat vel nge sen ngai ang?” a pa bawk chuan a ti leh a, inchhungah ka lut mai ngam bawk si lo, lai deuhin kawngka bulah ka ding hnawk ve reng ringawt.

“Tih neuh neuh tur a tam ţhin a, sen ve ţeuh a ngai zel. Pawisa a hek duh lutuk” a ti thum leh dut dut a, a pa in “Ka pe dawn che nia” a tih lai mekin hmeichhe pakhat a rawn chhuak hlawl a. Fredy te pafa awmna lam a thlir daih vangin min hmu mai lo lehnghal. Anni lah chuan sen so zat tur an la chhut dun mual mual a, tumah an ngaihsak lo.

Min rawn hmuh veleh “Ehe..ka lo hmu miah hleinem che. Nghaktei i lo sawm dawn mi?” tiin pangai takin min zawt a, sawm tum a kal ka nih thu ka lo hrilh ve vat a.

“I lo din na a rei tawh em? Ka van khawngaih reuh che, i inthlahrung lutuk a nih kha. Va lut rawh” ti mahse “Hetah hian ka lo nghak ang” ka ti deuh tlat a, an chhungkaw zat ka hre chiah si lo, an la awm kim ţhap hmel bawk si a, phur viau e ti lo chuan ka zak leh hnuhnawh a, a hmun han thlen meuh chuan kei takngial pawh hi ka zam ve thei.

“Nih leh kan koh sak ang che aw” tih leh inchhung a luh a rual a, reilote hnuah lo chhuak lehin “A hman ţep nghah rei a ngai tawh lo ang. Lo sawm ziah rawh aw” nui var var chung a a tih hnuah min kal pelin gate a hawng a, ka enzui reng a, a rawn let leh lamah chuan ar bulah bawk a ding ve dat a.

“A mak e pa, tum sak ziah suh. Broiler a hralhna leh heng ho a insual tirna aţang hian pawisa a la lut reng. A pawisa tuman kan hman pui ngai hleinem, khawl phei se chu motor hial a lei thei tawh ang chu. Ar dam lo enkawlna tur thleng a pek sak zel a ngai lo hrim hrim” a ti vin hlak hlak a, amah aia vin zawk hian Fredy chuan “Lo inrawlh ve chhen zel suh Shin Air” a ti chang bal a.

“Tu nge Shin Air chu?” hmeichhia bawk khan a lo ti hu mai.

“Shir Air-i chu nangmah kha. Rorel tum tu lian-i, miin misualnu an sawi zingah sual ka la ti ber, nangmah ang chiah chiah” a ti leh nek a, “Shin Air-i pawh ka hre lo ve ah. Eng eng emaw hi chiang mang lo hian i hre ve nil nial a” beidawn hmel zet a ti nuah nuah chung hian garage lam a rawn pan leh a, ka lawm rawn hawiin nelawm deuh a nui chung hian “A rei lo ang aw” tiin min hrilh nawn leh a, scooty a a tlan chhuak chu ka thlir zui vang vang a.

Ka sana bun lai ka bih zawk a, minute15 vel lai ka nghak tawh maithei. Fredy-a lah chuan “Insual turin a tlak tawh kher loh ang. Mahse enkawl dam ila ka vulh zawm tho ang. Insual theih loh vang a talh chu a khawngaihthlak, a thih hma chu la dam ve rawh se. A tar thi a nih loh chuan talh a ngai lo” tiin a ar chanchin chu a pa a la hrilh tui khawp mai.

“Aw haw…i lo awm reng tawh a ni maw? Tumah an awm lo a rawn luh mai tur a lawm. Nidangah chuan i lo lut ziah tawh dawn nia, hei hi kan nau chu a nia” a tih hnu lawkah “Khawnge a lo awm leh tak?” vin angreng tak hian a tih zawm zat a.

“Ka lokal” hmeichhe aw in a tih rualin a rawn dawk chhuak zawk a, ka uniform ang chiah chiah a inbel ve. A sam a sei hle a, sang deuhah a ţawn vah a, tarmit bial ţha zet a vuah vang bawk.

“Mawimawi, hei Nghaktei chu a nia, inu hriatah khan ka sawi hreh deuh a, buaina a hnaih reng rengin dang tlat ang che” tiin Pi Mahruaii chuan min chah nawn leh thlap a, ka lo bu nghat a, ka ke a kham tawh em vangin ka phet sek tawh mai.

“Kal ang” zang khai vah a tih pahin min hre sa ni awm takin ka banah a kuah a, min kalpui nghal bawk. Fredy-a te kan kalpelh dawn lai chuan a pa hnen a sawi ang deuh a lang si keimahni min tih el deuh hian “School kal lai a ngaihawm hle mai a pa” a lo ti leh hman pek a, over lutuk hian a(h). Ka hawi let lai chuan a lo nui sawng a, nizan a a nu phal lo chung a chhuah luih te khan lo sawisa leh hrep se ţha tur. A damţhat poh leh a nghal ting a ni mai. A pa lah chuan hauh chu khawi lam tawi te te in a lo nui ve ringawt a, ka pa nen an inang lo khawp mai.

“Bawiha, ken tur vel i u nen kan siam fel vek tawh a nia, ar kha vety a i hruai dawn leh hruai vat la, i tlai bik lutuk ang e” Pi Mahruaii’n a rawn ti lang lang a, khawiah tak kal ang maw ti a ka ngaihtuah laiin Nghaktei chuan “I rawn piangthar zo ve meuh ang maw?” tiin a lo fiam zeuh a.

“Ka rawn haw dawnah lo inring lawk ang cheu, ka rawn back lut dawn nia” thawveng zet hian a ti a, kan kal leh hmain a hmuh turin ka ner nawk a, ka tih ang chiahin a lo ti ve bawk.

“Khaw nge a kal dawn a?” tiin gate kan pelh rualin ka zawt a, kan kohhran ah gospel camping a awm dawn bawk si lo. Home ah an dah dawn emaw ka ti hman hial. Mahse Nghaktei chuan “Hemi veng ţhalai ho ramhnuaiah Bethel turin an kal dawn a, Nu Mahruaii ten an kal tir ve dawn nih kha. Zan hnih khat lek pawh a len chhuah loh phah pawn a ţha an tia” ti a min hrilhfiah takah chuan ka hrethiam ta uar mai.

“I pa pastor maw a nih?” ti a min zawh chuan lo bu nghatin a nih ngei thuin ka chhang a, chutah inthlahrun hmel zet hian “Miin min tih hmasak loh chuan engtin mah ka ti ngai bik miah lo a nia aw” a ti a, a insawifiah nghal zung zung mai.

“Ho lutuk khatiang te kha chu. I nu leh pa ten eng nge an tih ve ţhin a? Helamah an dah daih bawk che sia” tiin hrevek tawh mah ila ka zawt leh tho a.

“Ka pa SDO a nia, ka nu chuan engmah a thawk lo. Kan upa ber hi nurse a ni bawk a, Nu Mahruaii hi ka nu u a nia, min lo dah chhan chu a tam mai. School ka tlan bo ţhin a, lui kal leh zial zuk ruk te ka hrat. Thil dang pawh a tam mai mah se ka sim vek tawh dawn” a ti leh zuah zuah a, ka kawm duh loh a hlau ni ngei tur a ni a intiam nasa tawh emai.

“Ho lutuk ka tih kha ţhian nghet ka la nei bik lo a, kan inkawm dawn nia” ka ti dek dek a, ka hma zawnah khup zawngin kut a dah a, “Best friend forever” a ti nghal ringawt bawk. Ka pawm zawng tak a ni bawk a nui var var chungin ka kutin a kut chu ka chhin thawk a, kan kut ti su zeuh zeuh chung a “1,2,3” kan tih hnuah sang deuhah phar chhuakin “Huai” tlem a ring deuh hlek a kan tih hnuah inthurual takin kan kal zawm veleh mai a.

Dawnga leh Faka ten an tih ziah danin min lo nghak leh pek a, Nghaktei an hmu tel ve chu tlemin mak an ti deuh aniang zawhna mitmengin min lo en a, “Kan in bul a mi a nia, vawiin aţanga lo lut ve tur a nia” ka tih chuan an phur veleh nghal mai.

“Bts i duh ve em?” an ti nghal pang a, Bts leh blackpink lo chu sawi tur an hre lo a ni ber e. “Duh ve e, anni duh lo tur khawpin ka mawl hleinem. An hmelţhat dan hi a pure ngawih ngawih. Bakah an lar e, an mithmul tla mai mai hmang pawn ei kan zawng thei ang chu” Nghaktei chuan a lo ti a, a sawi uar nasa khawp mai.

“Chu chu lawm an engkim hi a hit vek. Ka duh a nia aw” Faka’n a tih hnuah “Wanna money money, money money” tiin Dawnga a lo zai nghal zat a, a sa dik lo rapthlak lutuk nasa mai bawk.

“Wonhae manhi manhi an tia lawm. An engmah pawngsual hlek suh aw. Keichuan dik thlapin ka thiam vek” Nghaktei’n a lo ti tan tan a. Kan ţawng a ni miau lo va, sak dik loh lai chu a awm turah ka ngai mahse Dawnga hi chuan a ti mah mah deuh chu ni.

Sir in Nghaktei nen office ah min ko a, dawhkan hmaa kan din zum zat hnu chuan, “In ţhiante aiin in tlai deuh hlek a, thla hnih chhung a kan lo zir tawh ho kha exam naah a pawimawh vek dawn tho a, subject dangah engtin nge an tih dawn ka hre lo na a ka subject bik hi chu ti hian ti ang u. In in awmna a inhnaih niin in sawi bawk a subject dang zir pah tho siin hunawl in neih apiangin in tello a kan lo zir tawh kha lo en dun ţhin ula, hriatthiam loh in neih chuan school ah min zawt leh mai ang a” tiin Sir chuan rem a ruat a, chhuah thuai thuai kan duh miau vangin kan rem ti nghal mai. Ka pa in len chhuah a phal phah dawn a, ka lawm zawk mah.

Ronnie-a ţhutna a ruak hiang reng a, a hmel ka la hmu lo hrim hrim. A hming an lam lai te chuan a kal loh thu in an lo chhang zel a, nitin ka ţhutna aţangin ka en ţhin a, hmuh tur a awm lo thut chu ka awm thiam lo dawn dawn mai.

Nghaktei nen kan ţhu dun a, kan ti ti nasa in tih tum hrang kan nei nual tawh. Lunch break a nih veleh phur deuhin tiffin kan phawrh a, ka ţhian lo neih tawh sa te pathum pawh rawn lang thuaiin kan hmaah an rawn intlar ţham a.

“Artui mix ka pai a nia, tui in ti viau ang. Chhum,kan, bawl, rawt mix chhuaiz” tih pahin Dawnga’n phur deuhin tiffin a hawng a, an it awm siar siar khawp mai.

“Keipawh mini alu ka pai, khawng ar khawp a kan ro” Faka chuan a lo ti ve bawk a, a sawi ang tak takin alu te reuhte phel phek phek hnu a kan ro chi, tui ka tih chi tak a ni.

“Keichu ka hre lo. Keiman ka siam lo va” Nghaktei chuan a lo ti ve thung a, tiffin a hawng uih zui hak. Hnar kan tum vut vut hlawm a, Nghaktei ngei a ni. Muangchangin a hawng riai riai a, kil khatah nghapih a lo bawk vung mai.
“Ehe…hetiang hi ka ei ngai miah lo. Tukin ah pawh kan hmeh lo hrim hrim” ti niap niap chungin fian a lek va a, a thil pai a en tlawk tlawk ringawt.

“Kan pai hnem em hi fian i nei tho a, lo ei ve mai rawh” tiin kan sawm liam liam a, “Penglengpunga bawk a niang. Tukin a tho hma ve ngei a, coffee ka siamsak duh loh vangin nghapih a lo thun ru a nih hi. Choka ah a tei ruk ruk ka ti reng a ni. U Rintei bakin nghapih a ei ngai der si lo” tih hlak hlak pah a tiffin a chhin te chu bang a perek kan chhu lut ri bur bur ang vel a ni. Kan tiffin a nghawr che dat dat a, a tlak hlauin kan vuan bet far hlawm.

“Ronnie hi ti nge a lokal loh le?” ei mawlh mawlh pahin ka ti chhuak sep a, a ţhutna lam kan hawi ţham a, “Nini hi chu a kal lo thut thut alawm. A thiam thei tho a, duh duh hunah a chawl mai zel. Ngaihtuah duh suh” an lo ti a, “Eng nge Ronnie leh Nini chu” Nghaktei’n a lo ti ve ha bawk.

“Mi pakhat tho a nia, Ronnie a nia, mahse Dawnga leh Faka hian Nini an ti ţhin a” tiin ka lo hrilhfiah a, ngeng viau mahse zirlai na na na chu a la thutak a, a kal lo ringawt hi a mak ve riau.

Banah Nghaktei nen kan haw dun leh a, an inkawtah Fredy-an zial a lo zu pawt pawt a, gate hrul bang nghengin a ding a, a Bethel ve ang chu tih nak laiin in bul velah a la awm mai mai sia.

“U, ngati nge ka tiffin chhungah nghapih i lo thun a?” tiin Nghaktei chuan a chhuah chhal nghal thawr a, kan pahnih chuan amah en tumin kan dak deuh ar a, ani pawn min lo en chhuk ve run mai a, “Tiffin ka khawih lo, Shin Air-i niang” ti a awlsam fahran a Nghaktei a chhan laiin a mit chu keimahah a fu vung thung.

“Nangmah i nih kha aw ka hrechiang lutuk che. Nu Mahruaii ka hrilh vek dawn, min ti zak khawp mai aw” Nghaktei chuan a la ti tan tan a, thingpui lo in haw rawh a tih vangin ka zui ve bawk a, mihring nghal lutuk pakhat vangin kan khaw tlai leh tawh.

“I ţhiannu hi a va chhe lo ve a” a ti leh daih a, a nui deuh suk ka hmuh phei chuan muangchangin hnuai lam ka melh thla riai riai a, “Chhe lo a ti ve lo che. I nghal ropui si ka hauh tir dawn khawp che” Nghakte in a tih lai mekin Nu Mahruaii hmanhmawh hmel deuhin a rawn chhuak ve chiah a, ka ţhiannu ngei mai chuan a nghapih pai chungchang sawiin Fredy a hek nghal zat zat mai.

“Ngati nge chutiang thil i lo tih a? Bethel naah chuan i kal dawn na nge?” phawk hra hian a ti a, a kal daih tawh a ring ve tho a nih hmel.

“Ka lo haw tawh” a ti bul hmuk a, Nu Mahruaii lahin awih lo tih hriat zet hian “I va han rei lo bik em em. Mi faten Pathian thu an tui chilh a, an ţawngţai tluk tluk a, sermon ţha deuh deuh an sawi a, mi fa te i tluk lo emai” a ti tan tan a, Fredy lah chuan “Aww..i fapa lawm ka nih” a rawn ti let khauh a

A nu nen an inhnial leh hmain mi pakhat hian a rawn ko a, Nghaktei nen inthurual ang hrimin kan inher ve vat a, U Rema a tih kha niin ka hria, helmet da bul, hlui deuh tawh a khum lehnghal.

“Lalrintluang kal reng reng suh” Nu Mahruai’n ti ve bawk mahse “Kan inkhel dawn” tih leh kal a rual a. U Rema kuahin kan school kawngah an kal chho dun a, kan hmuh lai rengin basketball court lamah an peng a.

“Rema pawh kha zu a in dawn a ni chiang mai helmet a khum leh bur tawh kha” thinrim zet a Nu Mahruaiin a tih chuan kan lo kâ hau mai, Nghaktei zawkin “Helmet a khum ringawt a, engtin nge zu a in dawn tih i hriat?” tiin a lo zawt a, ka lo bu ve nghat nghat mai.

An kalna lam thlir dauh dauh chung hian “A rui nawi lutuk ţhin a, a insawh pem rum zel. A lu a sawh nat palh a hlau ve a, zu a in dawn chuan helmet a khum ziah lawm” a ti a, kan ţhiandunin nui tet tet chungin kan inmelh ralh ralh ringawt.

Nu Mahruaii kal ai dawrah kan kal sak leh phawt a, chumi hnuah thingpui in turin ka leng kawi a, ka ar lei ni a hmeichhe naupua kha a lo awm tawh lo va, hmeichhe pakhat hian inchhung lo ti faiin Nghaktei nu ni awm tak hi sofa ah a lo ţhu bawk a, midang tumah an awm lo.

Nghaktei nu chuan min lo be ve luam a, thingpui in tur a choka a kan luh hnuah nichin a inchhung tifai tu khan thingpui min lo lum sak leh a, chhang nen min chhawp sak thlap a, a fel reuh khawp mai.

Puitling in min be kawi rei angreng si a, ka pa’n min hauh hlauin thingpui in zawh veleh ka haw nghal a, gate aţanga ka pen chhuak chiah chu Fredy-a rawn haw tur nen kan intawk leh chiah. An va’n inkhel rei awm lo em em. Ngainat loh sa nak laiin ka hmu fuh thei em em mai lehnghal.

“Hey Fredy” rawn ti lung lung tu te awmna lam a hawi vut a, kal mai ka tum chu “Che suh” lo ti vin hlukin min din hliah a, kan dinna bul chiah a pen ri khup khup a tawp chawt rualin min hliah reng chungin a inher. Eng tak ni leh ang maw?

“Hman zan khan police in min umzui lo. Min tihder a ni maw? Khaw nge i bialnu kha? I ţhianpa lah kha him pialin kan hmu lehnghal. Bike min tihchhiat luih sak khang lang a, ka hmuh hun hunah ka sawisa hrep dawn tho a nia” pakhat hian a ti lung lung a, an thusawi lah chu ka hrethiam lo nasa mai.

“Ti khan exer lakna remchangah ngai mai la. Bike khalh reng a hrisello” a ti let ve a, in si chet
a ding kan ni bawk a amah en kher lo mah ila a taksa nghing che dat aţang chuan a nui tih ka hria.

“Siamna tur pawisa min pek loh chuan in ţhian dun hian in la tuar ve dawn khawp mai. Bialnu te puih ngai turin awm tawh lo bawk la” chu pa bawk chuan a rawn ti leh kher a, vak zau leh tla dah na na na chuan buaina an lo ngah a nih hi.

“Mitmu pawng hlawt hlawtin i tlanchhe leh awm tho sia” Fredy chuan a lo ti ve leh a, a fiam kual mai mai niin ka hre tawh. A taksa in hmalam ah min khuap run a, hnung lamah bag in min do reng bawk si, ka ning tawh takzet.

“I hre mai ang. Bike siamna tur min pek hma chu ka zawng zel dawn cheu” ti a a tawp nan a a vau hnuah a ţhiante a kalsawn pui ta chauh a, pen ri kan hriat phak loh veleh ka nam dawrh mai.

“Nge min tih khaw tlai ve kher a? Nangmah a i hmachhawn ngam loh te chuan bike ti chhe tu Mawitea chu ko ve mai ta che?” ti vin ţhatin ka melh hrawk a, “No4 zuar an nia, an hmuh che ka hlau a nih kha mawli” a ti chang bal a, haw tawh rawh ti awm tak a min hui thuak hnuah a tumtelek phone bawk a phawrh leh a, hmet nuap nuap chung a an in lam a a pen lut tawh chu “Tu nge i bialnu an tih kha?” tiin ka au leh hram a.

A hriat ngei tur a zawt ka ni bawk a, rawn leh hawiin min kawk va a, “Nangmah kha” a ti chhuak thawr mai.

“Keimah maw?” awm dawm meuhin ka lo ti he haw a, “Aw, ka bialnu” tlem a nuihza insum deuhin a rawn ti sup a, kan la in hlat lo bawk a, a thusawi chu ka hrechiang ngang mai. Anni bike tih chhiat vang mai maiin bialpa ka nei dawn lo hrim hrim. Ka duh zawng ni miah lo mipa lehnghal.

CONT…

This Post Has One Comment

  1. Anonymous

    5 ka cciar chak twh

Leave a Reply