You are currently viewing TROUBLEMAKERS-5

TROUBLEMAKERS-5

Spread the love

TROUBLEMAKERS-5

“Rei miah suh ang che. Zanin ang em em a lehkhazir i phur lai ka la hre lo” ti chuar chuar chungin ka pa in dawhkanah perekin ka lehkhabu a verh kaw mawlh mawlh a. Lehkhazir peih mang si lo hian lehkhabu tih chhiat ka awl sam a, ka pa hian hmun thum velah a verh kaw ţhin. A chhah deuh phei chuan tubohin a chhu lut mai zel a, a verh kuak vek hnuah khawl la lian in a ţhui leh thlap ţhin. Chutiang a a tih loh chuan an ţhuina sa a dawk hma a, a tla phung zel.

Ka lehkhabu nghak a ka din reng laiin “In sir chuan a ti tak tak meuh maw? I zan len chak vang te hi a lo ni ang e” min melh rawm rawm chung hian a ti leh a, lu ka thing nasa mai.

“In lo lut tlai bik a, zanah lo zir dun rawh u a ti lawm” ka ti ve tlat. Lehkhazir tur a Nghaktei pan ka tum a, chhuah thawven theihna a nih vang hrim hrimin ka phur viau. Chu chuan ka pa ngaih a ti ţha lo lehpek a nih hi.

“Kha zanin a mi tur bik kha la la, naktuk zingah a kawm ka tuam mai ang” tih leh a ţhui zawh sa min pek a rual a, lo la sawk sawkin ka bag te khai laiah ka khung thuai thuai a.

“Bawihte i zir zawh veleh rawn haw rawh aw. Kan veng hi tlangval phung lung deuh deuh an tam riau in ka hria. A ruk a ruihhlo zuar an tam an ti bawk sia, inhnaih viau mah ila rawn haw tlai suh aw” ka nu in dam thlap a a tih chuan “Aw dar10 velah ka rawn haw ang” ka ti liam puat a, ka pa in “Khaih..khaih” a tih lai chiah ka hre pha, thil dang a sawi hmain ka chhuak fel der tawh.

Nghaktei te in a kal tlang mai lovin dawrah ka kal hmasa a, an lo ţhu khat leh hmurh tawh a, “Nu Ram thil ka lo lei” pawn aţanga tih pahin nep nawi ka enkual den den a, Nghaktei ta tur pawh lei kep ve ka tum ran a.

“Khanglang chuan…ka hnek chawrh nang a” ti a ring leng lawng a au ţhawt ri kan hriat chuan inchhung a awm zawng zawng te nen kan tang hra mai.

“Fredy-a mi? A rui pek em ni?” Nu Rami chuan hlauhthawn hmel tak a ti chungin en chian tumin a ding hluai a, dawr hma inhawng ah a rawn dak chhuak vat bawk.Keipawh ka hawi kual thuak thuak a, tumah ka hmu lem lo. Fredy-a aw a ang ka ti ve tho a, mahse amah hmuh tur a awm lo. Tlai lamah khatiang khan an rawn vau pung pung a, thil hrechiang ve lem lo mah ila ngaih a ţha zan lo khawp mai.

“Aniang, Penglengpunga aniang. Ani te chu buaina nei mahse awlsam deuhin a fel leh mai ang. Mi hausa an nia, veng chhungin a nundan kan hre vek chungin zaipawl ah te pawh an tel tir leh mai lawm. Mi hausa fa te tan nun uluk vak a ngai lo, an hausakna hmangin khawi hmunah pawh an tla tlum” dawr chhung a ţhu zing a pakhat chuan itsik hmel zet hian a ti nghat nghat a, Fredy-a chanchin a sawi lai a a ner kual vel te kha ka lo hmu ve hman tlat.

“Mi hausa hi chu tuman an ti chhe tak tak ngam lo. Hausa lo se chu vengchhung ah na na na chuan an man ngun viau ang. Buaina awm apiangin a hming a ri tel ve ziah a, a fihlim pawlah a ţang ziah thung a” pakhat in a lo ti veleh a, mipa ve si mi chanchin an sawi peih khawp mai.

“Khatiang zawng khan khawtlang hruai tu te dem ringawt suh u. Mipui hi kan phun peih sia, rorel a har ţhin viau ang” tiin la naupan ve hmel berin a lo khap a, tlangval ho in mi chanchin chhe zawngin an sawi khawm ve luih luih ţhin ang tih rin ngaihna ka hre ngai lo.

“An reh leh duk sia, eng nge thleng ang le” ti nuah nuah chungin Nu Rami a ţhu ţha leh a, a ţhu fel awrh tihah thawm a awm leh nghal a, Fredy te ţhian ho him pial a ka hmuh chuan ka lo thaw ve huai ringawt. Hman zan a ka kawr awm a ţham tu khan a kuah a, dawr lamah an rawn kal luih pui a ang mah zawk. Èngin a chhun phak chin an rawn thlen chuan an hmel pawh a hmuh chian theih tawh. Hliam an nei lo ţheuh a, thinrim tih hriat zetin Fredy-a mitmeng chu a thim khup a, a rum tawh sa bawk nen a hlauhawm lek lek a ni.

An rawn thlen rualin Nu Rami’n “Eng nge thleng a? Fredy i thawm a va ţha leh tawh ve. I thinrim thunun ţhin rawh ka tih ziah kha” a lo ti nghal hlak hlak a, “Tenawm e…putar a kar a tuai lehnghal” a ti hluk a, a thinrim tehreng nen a ţhiante ho an lo nui tet tet a, chu chuan thil awmdan min ti hrechiang chak lehzualin ka ding ve ta reng a.

Fredy chu ka bul chiahah a rawn ding na a min hre lo awm hmiah hmiah. A lu a met lehnghal a, amah pawh a awm thiam lo a ni ngei ang a tuai a tuai mai. A kawlh mât lo na a a hma ai chuan tawi tawh tak a ni. A zâng ve huih ang chu. A hma a a sam buk deuh kha inhmeh ka ti viau na a tlem a meh ţhen tak hnu pawh hian inhmeh ka la ti tho. A ţawng kha a kham phei put a, a rui niin ka hria. An rawn thlen aţangin vawikhat pawh min la en lo.

“Eng tuai maw in sawi a? Putar kutthlak i tum em ni?” Nu Rami tho chuan a lo ti leh a, dawr a ţhu dang te pawn an lo en huang mai.

“Putar tuai in a star a, khilai thim lai a kan ţhut lai khian a rawn awm ve reng a, a mak tak tak a ni, nupui fanau a nei tho bawk sia” ti a an ţhianpa pakhat Puia’n thil awmzia a sawifiah takah chuan ka nuih a za nasa. Han nuih chiam lah a tih chi mang si lo va, ka bul a ding hi a thinrim em a, ka nuih vaih chuan min hem thlu tawp ang tih te ka hlau.

“A va hahthlak ţhin. I au ring nasa mai sia, kut i lo thlak duh tak tak mai nge aw” Nu Rami bawk a ni. Fredy chuan “Sazu hman ţangkai vek tawh hnu a ka tuai e tih ţhat leh te chu a” ngaihnep hmel zet hian a ti a, a sawi dik ve reng. Fa a neih tawh miau chuan a hmang ţangkai tawh tihna a ni mai a, dawr a ţhu ho pawh an nui leh ham ham tawh.

“Nu Ram, 30 man ka la aw” tih leh pawisa pek ka rual a, 50 tlang ka pe ve ngei a, a nawi ka nghak ran bawk.

“Eng tin maw a tih che a?” pawisa bawm aţanga 20 phawrh pah hian Nu Rami chuan a ti leh a, pawisa inthlep tawm zut mar hliau hliau chungin Fredy a en ran a, “Min zut…tenawm tak tak a ni” a la ti hluk hluk a, ka lo ten ve kher mai. Keimahni ang rual tuai pawh a over chin chu ten tawh sa nak laiin tar lehnghal!

“Mi mak deuh deuh hi kan tam khawp a, i au ri kan lo hre vek alawm. Kut i thlak hman lo hlauh a a tih zia khawp mai” pawisa kir min pek pah a Nu Rami’n a lo tih chuan “Khatianga a awm leh chuan a inchhir tawh ngawt ang” a la ti pung pung a, a lungawi lo khawp mai.

An in lam pan a ka kal lai mekin “Bike ka va la chhuak ang min lo nghak lawk ru” ti a a ţhiante a hrilh ri ka la hre pha vek a, ka hnung lawk a rawnkal a ni bawk a, “Ka rawnkal dawn nia inah lo awm ang che” thupe aw zet a a ti ri pawh ka la hre pha a, a ţhiante an awm hnaih tawh miau loh vangin phone a bia ah ka ngai ringawt.

“In in a luh i phal loh leh rawn chhuak la” a ti leh bul bul a, gate a ka pen luh dawn lai a “Chhuanlam i siam reng vang tak khan ka rawn hmu duh che. Min dang ţawng ţawng mah la ka lokal dawn” a tih chu ka hriat hnuhnun ber a ni. Bialnu a nei ve ngei em maw ni? Ve lutuk hian a.

Door bell ka hmeh rik hnu rei vak lo ah Nghaktei ngei maiin kawngkhar min rawn hawn sak a, “I va rei ve ka lo phone hman ţep che lawm” a lo ti nghal tawng a, ka luh hun nghak buai lovin ka ban a vuan a, min pawt lut rawk rawk a.Ţhutkhawmna pindan, tv an dahna lam zawkah an lo ţhu ţhup sia ka zak ve lek lek alawm le.

Nghaktei’n “Tui bottle ka va la lawk ang a, inchungah kan chho nghal dawn nia” ti a min hrilh laiin Fredy a rawn lut ve chiah a, inchhung eng a ka hmuh chiah chuan a rui a ni tih ka nem nghet ngam thlap.

Kawngkhar bul a chahbi inkhai ho a khawih lawr dan dan a, engmah la lovin a nu te ţhutna lam a hawi vut a, “Khaw nge Tetea bike chahbi?” ti a a zawh chuan Nu Mahruaiin “Enga tan?” a lo ti ve thuai a, “Ka la chhuak lawk dawn” ti ringawtin a chhang a, a hmanhmawh hmel tawh kher mai.

“Kan pindanah ka khai. I lo tih hmel hem sak hlauh ang e aw, a uluk ropui si. In tlansiak naah te khan i lo tel pui ang e hre rawh Tetea bike a ni emaw ni lo emaw inthlansiak hrim hrim ka rem ti lo bur a nia” Nu Mahruaiin a tih hlak hlak laiin tui bottle kengin choka aţangin Nghaktei a lo chhuak ve chiah a, Fredy pawh nghak tu a nei bawk a anu te pindan ni awm tak lamah a kal hmawk hmawk tawh mai.

“Mawimawii nen hian inchungah lehkha kan zir dun dawn nia” tiin Nghaktei chuan midang a hrilh ve leh a, Shin Air-i khan “Han zir ru nakinah thil tui deuh kan ei ho dawn nia” zang khai vahin a lo ti vat a, midang pawn duh chen chen zir turin min lo hrilh ve liam liam a.

Fredy rawn chhuak leh chuan min kal pel mai lovin ka zawn a thlen veleh ka beng bulah a rawn kun hniam a, ngeiawm fahranin “Ka bialnu” a rawn ti sup a, Nghaktei ka en vat a, phawk hra in min lo en ve ran mai. Thawm dim lem lova kawngkhar inkhar ţhuai ri kan hriat veleh inthurual ang hrimin inchung lamah kan chho hlawk hlawk a, a pindan a min luh pui hma chu kan chawl tawh lo.

“Eng nge a sawi?” a ti nghal tawng a, khum a bag ka theh thlak hnuah ka ţhu thla hnawk a, a va han zak lo tak. “Ka bialnu min ti” ti a ka hrilh phei chuan a hma ai mahin a phawk zawk.

Ka bul a rawn ţhut ve pahin “A bialnu maw i nih?” a ti hluai a, chutiang a a ngai nghal mai thei chu mak ka ti zawk. Ka chhan hma hawtin “Bialnu a nei reng lo mi? Zanriah ei hma pawn an inhauh hrep kha” a lo ti leh hmanhmawh a.

“A bialnu ka ni reng reng lo” pawr fe a ka tih hnuah tlai a thil thleng te, zan a ka chhan chhuah tak dan te ka hrilh a, rum tawk a meng chungin a bu nghat nghat mai.

“Ka ngei ve tho a, nghapih min pai tir hnu phei kha chuan a ar zawng zawng thlengin ka ngei vek. Mahse no4 a khawih bawk lo aw” a ti vin ta tâk mai, hahthlak hlawm hian.

“No4 a khawih ka ti hleinem, a zuar tu te bike an tihchhiat sak ka ti mai lawm” amah aia vin zawk hian ka lo ti ve ţhat a, a hrethiam ta a niang chhuatah pher a phah sawt sawt a, pher chung a dawhkan tê a hun leh hnuah inhmatawnin dawhkan karchehin kan ţhu a, kan lehkhabu ve ve kan keu pharh meuh chuan dawhkanah hmun awl dang a awm tawh lo.

Ţhianten min lo zir san tawh ho ngawi reng a kan chhiar dun rauh rauh laiin “Ninawm, class a an sawifiah vek pawn hriatthiam a har a nia, bakah hetiang chhiar mai maiin awm zia a nei lo” ke leng arh arh chung hian a ti hlak hlak a, ka pawm pui khawp mai.

“Keichu school luh tirh lamah hian ka thiam thei ngai lo. Exam dawnah rilru a chak duh bik a, exam dawnah chauh ka zir zel” ka lo ti ve vat a, “Kan inang chiah nih chu. Exam dawn zanah thiam a awl ber, tlem a rilru hah tel deuh hlek chung a zir loh chuan ka thluak hian a pawm ve thei lo” a ti a, lehkhabu chungah dawr a ka thil lei ho ka bun nghal ruih mai.

“Hman zan i chhuah ruk chuan khawi hmunah nge i kal a?” tiin hriatchian chak deuhin min zawt ta ngei a, “Vengthlang lamah nia, a mawng ve deuh vang aniang in a la awm mang lo va, bakah maw zanah hian hnim hring ho hian an rim diktak an chhuah ka ti mai, perfume inkap hlim ang chiahin ka awm reng” ka ti chiah mai chu min hnaih surh surh mai.

“Chhuah e, zanah leh zingkarah hian an rimtui bik a, mahse zingkarah chuan kan tho thei awm si lo va, zanah kan walk mai dawn mi? Kan thluak tan pawh a ţha deuh ang chu” ti a min sawm chuan ka in ngaihtuah nasa ve khawp mai.

“Mahse inhnuaiah i chhungte an awm vek sia, kan chhuak ru thei nang” ka ti ser ser a, men an theih hmel hlawm bawk si. “Ni bawk si kinah zan dangah kan walk mai dawn nia, school kan ţan hma sia zirlai tan zingkar a walk ve na hun a awm lo” a ti nghauh nghauh a, chupawh ka pawm thlap. Zirlai hi a chang chuan ka chep riau a sin.

Dar10 rik hma in haw tumin ka insiam rak rak a, Shin Air-i thil min eitir tum pawh ka nghak hman lo. Nghaktei nen kan inzui chhuak hnak hnak a, “Naktukah min lo sawm leh rawh aw. Chuan hun remchang kan hmuh veleh a kan tih tur kha aw” tiin min chah vei thlap a.

“Ka lo sawm ang che mahse engmah kan zir si lo a, naktukah Sir in min zawt ta se khawi lai ber nge kan hrethiam lo kan tih ang?” ti a ka lo zawh tak daihah chuan a ngawi vung vung a, tih dan tur a hre bik lo emaw ka tih hnuah “A vaiin kan hrethiam lo kan ti mai dawn nia” a rawn ti chhuak bauh a, “Min hau ang a sin” ti mah ila “Dawt kan sawi chuan Pathianin min hau zawk ang. Kan hrethiam miau lo va, hrethiam kan tih chuan lehkha kan zir dun thei tawh dawn lo a sin” awmze nei deuh a a tih takah chuan ka bu ta nghat nghat a. Lehkha kan zir dun loh chuan thluak hrisel nan a zan lam a walk kha cancel a ngai ang.

Kawng awl sam a haw lovin vengthlang lam aţanga haw kual ka tum a, chu chu ka haw hma chhan a ni tel bawl. Kan in hi kawngpui pakhat chiahin a pawh lo va, kual thei ang ber a haw dan a awm. Vawikhat ka school ban in chutiang chuan ka haw tawh. Min sawisel tawk lah hi an awm ve ziah a, min ngei zual deuh tu pakhat phei chu ka engkim hian a thin a ti rim. Hahchhiau mah ila keimah ka nih chhung chu ‘hahchhiau chungin mit a chhing kher a’ min ti tho ang. Fing ber a in ngai a langsar deuh a midang sawi chhe sek ţhin te hian an mawl zia an ti lang tih an hria angem le? Chuvang tak chuan midangin hmasawnna tur ni miah lo, ngeiawm zawng a an sawisel cheu chuan an sawisel dan cheu khan awm hmiah ula, in mizia a an duh loh lai an sawi chhuah kha lantir hmiah hmiah ula, in nuih ver ver laiin an hah et et mai ang.

Bag khai then nalh nalh chungin eng helh em em nei lovin vengthlang lamah ka chhuk a, ţhian ngaina leh harh vet vawt viau si hetiang hmun reh ka ngaina tlat hi piansualna chi khat a niang ka ti tawh mai. Min hip riau tu hmun kan nei ţheuh ang hian hetiang hmun reh ruih hian min hip tlat. Ţhiante nen a kalin nuam ka ti lehzual a, mahse mahni chauh pawn ka awm reng peih. Nikhua ka hriat theih tirh aţangin thingtlangah kan awm a, phul nuam deuh deuh te, hmun dâm leh hnim ţo tamna hmun te, field zau deuh te hi ţhiante nen a kan infiam duhna hmun a ni ţhin a, ka ţhan hnan tawh ni ten ka hre ţhin.

“Ehe…saw penglengpunga bialnu” mipa aw in a ti hluai ri ka hriat chuan ka ding chawt. Kawngpui zawl lai ka pawh ve chiah a, kawngsir ah an lo ţhu ţhap mai.

“Hey Penglengping” pakhat hian a rawn ti lauh a, an nui zui ham ham. An va ţhing mai mai tak e aw.

“Penglengpunga bialnu Penlengpingi” an ti leh a, ka tan a nuihzathlak ve hauh lo ah an nui leh dar dar ţhin.

Ka lehkhabu a tlak loh nan ka bag te zipper ka zip phui a, lehkhabu ka tih chhiat vaih chuan ka pa’n min hau nasa dawn lutuk.

Chhang let lovin ka kal tlang lui zel a, a zawl tawh bawk a kal a nuam lehzual. Hmun nuam lai ka thlen veleh a min lo tibuai chu ka haw kher mai. Lokal hmasa sa ka bang in ka lo hem pawp pawp ang ka ti rilru a, bag hrui chu vuan nghet tawh tak ka ni.

“Kal tlang a tum ringawt mawle. Hman zan a a kawr lum hak chiah chiah kha a ha lehnghal” pakhatin a rawn ti leh lauh lauh a, ka kal chak zual sauh. A hring êng vawt ka ha a, zanah phei chuan hmun thim deuh pawh ka en vek thei hial ang chu.

“Hmanzan khan i hmel kan hmu vek a nia aw. Tlaiah khan i bialpa in a hliah daih che a, a hliah hma che khan kan hmu hman tho che” an ti leh a, damdawi zuar a rui lehnghal, hlau lo mah ila kal chak tawh vet vet tak ka ni.

Ka hnungah an rawn kal ve zel a, tlan phut mah ila tlanchhia reng reng a hun hmang an ni bawk a min um pha rang khawp mai. Min din bial laih a, an pawi ka sawi tlem nen an thinrim hmel ve em em ringawt.

“Penglengpunga bialnu ka ni lo. A bialnu chu tunah a rim mek ang. Min rawn zial vel lo teh u” ka tih hlak hlak te chuan fiamthu ka thawh ta emaw tih mai tur a ni an nui ţhaw hlawm mai.

“A bialnu ni lo la i rawn pui awm lo emai. I inhuam a nih rau rau chuan khawi bike siamna tur pawisa min pe rawh” rawn ti tu chu ka melh nghek a, min la hlauh loh hmel em em zui. “20 bak ka nei lo” ka ti chhuak hap a, a nur nasa teh a sin.

“Min pek loh chuan ka chang ziah dawn che nia, i dawr kal te, school kal te, i kalna hmun apiangah ka zui char char ang che” a ti chuap chuap a, school kal lai ka ni tih te a lo hre hman vek nia mawle.

“In van hman awm hlawm em em. Min chang ziah mah la ka nu pawisa min pek chin bak ka nei ngai lo” ka ti leh a, midang tihsual a lo tawrh daih ka tum lo reng reng.

Bike ri kan hriat takah chuan ka thaw huai mai. A rik danah a awm hla lo tih a hriat a, tupawh chu lo ni se min rawn tlan pel a nih phawt chuan damdawi chicks ho hian min kalsan ka beisei a ni. Mahse a ni teuh lo mai. Min kalsawn huk rualin keipawh ka kalsawn tel ve. A chhan chu kha bike kha a tlan chak mah mah lutuk tlat. Kan awmna lam a rawn pan ding ngur a, tumah sut hlau lo ni awm takin chak fahranin a rawn tlan a, kawng sirah ka petek nawlh a, min chil hman teuh em avangin ka hlau lutuk chu chet nachang ka hre mai lo va, khang ho pawh kha an nunna pawimawh zia hria in an insa seng thuai mai.

“Rawn invawrh kai rawh mawli” mipa aw ngeiin vin zet a a rawn tih tuar lai chuan ka din dan ka lo siam rem ve mek a, lung bang ka nam na ka kut a hnawng chap a, a thip vung vung mai. Ka bul a bike ding chu ka hmu reng a, mahse ka invawrh kai kher lo ang. Chutiang em emin ka fit bik ţhak lo. Bike lah chu heta kan awm hnuah vawikhatmah ka la hmu lo va, a khalh tu lah helmet in a tuam bo hneh nasa mai bawk. Mahse a aw kha!

Kawr ka benfai mawlh mawlh laiin phawk hra in ka hawi chhuak a, min lo la nghak reng ni awm tak hian a la ding ran a, tlan ri ţak ţak thawm a awm leh takah chuan “Tunah rawn lawn nghal rawh” vin deuh tho hian a ti leh a, min kaih tum ni awm takin ka lamah a kut a rawn phar chhuak a, lo vuan duh lo mah ila hmanhmawh deuhin a hnungah ka lawn a, min hrilh lawk miah lovin a tlan chhuak thut a, ka eu dawrh mai. A jacket ah vuan hman lo ila chuan ka tla leh nghal daih ang. Ka thinphu rang lutuk lah chuan ka awm a deng dawm dawm a, bike ri awm lo phei se chuan ka lung phu ri chu a hriat chian theih ngawtin ka ring. Ka chhuk thlak tawhna lamah min tlan let pui leh a, ka sam lah chu a phe hlawp hlawp a, ka chal sam thlengin an thlawk kual nasa, ka banrekah bag ka khai uai a, ka kutin nghet tawkin a kawr ka ţham bet ţung mai.

Veng chhung lun lai kan thlen chuan a tlan muang ve ta deuh a, damdawi chicks ho kha tlanchhe hman lo ta se a chil duh tak tak angem tih te ka ngaihtuah a, ka awmna a rawn hria te kha mak ka ti. Kan inkawtah a ding dat a, ka chhuk rang kher mai. Zawhna ngah viau mah ila hlauhna in min la ţham ur a, nidang a zawh mai ka duh laiin amah zawk chuan “Kha lai hmunah khan kal tawh suh” a rawn ti a, in a luh nghal mai tum tawh kha a awmna lamah ka inher leh rih a, a helmet hma chu chunglamah a nawr chho a, Penglengpunga, Fredy-a ngei a ni. Hrethiam lo fe a ka lo en ha laiin “Damdawi an inpekna hmun a nia, zan dangah kal tawh suh” thupe aw tak hian a rawn ti nawn leh a, “Engtin nge ka kal tih i hriat?” ka lo ti ve thung.

“An zingah khan ţhian ka nei. In awmna hnai a ka awm lai a ni hlauh a, zan dang a i kal leh chuan ka rawn chhan tawh lovang che” min en run chung hian a ti hluk hluk a, amah vang a buai ka ni reng sia, min chhan chu a ba ve hrim hrim alawm.

“Nangmah vang a nih kha. Bakah min rawn chhan pawh a ni lo, kan vai a min chil i tum zawk a nih kha” ka lo ti ve hlar a, “Aw, vak de de tawh lo la a ni mai” ngeiawm fahran hian a ti leh sup a, “Bike siam man pe ru” ka lo ti vat thung.

“Lut rawh” a ti bul hmuk a, an buaina hi ho ka ti si, damdawi chicks ho lah khan an ngai thutak ropui mai sia, “Bike siam man tur chu pe mai ula, a fel then a ni mai lawm” ka lo ti leh zat zat a.

“Tei vet che hian..i buaina lo ah rawn inrawlh suh” vin deuh hlek a a tih pawhin “Mahse” ka la ti ţalh a, damdawi chicks ho in min chân reng chuan ka pa’n a hre thuai ang. “Keimahni maw min ti nih kha, an hmu phir a” a ti liam satliah leh mai a, “Hrim hrimin khalai hnaiah khan eng nge i tih?” tiin lo zawt leh mah ila bike a ti nung leh vut vut tawh a, “Muttui aw ka bialnu” chimawm fahran a a tih leh hnuah an in lo lamah a tlan zui daih a, a la haw dawn lo a ni chiang mai.

“Lalnunmawi dar engzat nge?” inchhung ka luh rual a ka pa in vin angreng tak a dar zat min lo zawh chuan sana ka en vat a, “10:30” ka ti chhuak sep a. “Eng nge i tih chen chen?” awki ngai reng hian a ti leh a, min melh leh khui khui tawh.

“Nghaktei nen lehkha kan zir” tiin a hriat sa ka sawi a, a awih loh hmel nasa mai. Ka pa thinrim theih zia hi chu aw…k-drama chu nise a ring dawmin a phu euh ang a, hospital ah a awm daih tawh ang. Mizo pa ngei hi chuan thinrim pawh an lo tuar thei nge nge a nih hi.

“He ti chen chen lehkha i zir peih ngai lo. I dak chhuak leh de de em ni?” a tih chuan lu ka thing nawk nawk a, “Teuh lo mai pindan phui deuhah kan zir char char. Chhiar vek angai a, hriatthiam tum tlat a ngai bawk a, hun a duh rei ve zia” ka ti tan tan a, ka vin ngam hauh lo thung.

“Phatna tur lah hi i hre pherh erh a, buaina i thlen leh vaih zawngin aw, a pawi nasa tawh dawn nia” tiin min han vau leh khur khur phawt a, ka mut theih meuh chuan dar 11 a ri vung tawh.

School kal turin Nghaktei ka sawm phei leh ngei a, Penglengpunga ka hmu lo hlauh a a tihzia khawp mai. Damdawi a zuar ve a nih te ka ring rum rum tawh a, inhnamhnawih ve lo se chu khang ho nen khan buaina an nei lo tawp ang. Min chil ţep lai te kha ka hrechhuak leh uar uar a, ka la hlau. Ke bial lir teng teng thei ho hi chu ka hlau em em vek a, khapa lah kha horn pe miah lovin kan din ţhap na lamah vung tawkin a rawn la tlan zui a, bike ri leh èngin min chhan him ti tawh mai teh ang.

“Enteh Mawimawi thil te te ka nei sin” Nghaktein intithei fe a a tih hnuah a form pawnfen ipte aţangin meizial pakhat a rawn phawrh a, kan chhungkua ah meizu kan awm lo va, en tawpin a hming ka sawi thei lo.

“Penglengpunga a la tho lo va, a meizial ka phawi a nih hi. Ka la sim lo deuh hlek a, kan school thlang kha mei zuk ruk nan a rem sia” a ti a, tlem chuan a inthlahrung ve deuhin ka hria.

“Break ah ka kal pui dawn che nia” ka lo ti sam et a, chumi hnuah “Ih maw, i u Penglengpunga kha damdawi zuar ho nen khan buaina an la nei a nia aw” tiin zan lam a thil thleng ka sawi leh vek a. Hmeichhia ka nia, ka ţhiannu a nia, a u a ni bawk a, ka hrilh ve a ni mai ni.

“Nu Mahruai’n tlai tawkah a lo haw a ti reng a, mahse damdawi a khawih lo tak tak” fiah deuh hian a ti a, a la ţan bur mai.

Class a kan ţhut ren rawn hnuah zunchhuak in Nghaktei a ti buai a, test tur kan hre chawp chilh lehnghal. Engtia theihnghilh thei nge kan nih ka hre lo reng reng. En thuak thuak ka duh vangin Nghaktei pawh ka zunpui ta lo.

Ti ti pui tur ka neih loh lai a ni bawk a tiin lehkhabu ka phawrh a, test tur chu en ve thuak thuak ka tum lai takin ka dawhkanah ball a rawn sawt nawlh a, phu nasa viau mah ila man beh nachang ka hria. Ball kuah vung chungin phawk hrain ka hawi chhuak a, ka hlau buai kual vel hmu vek tu Ronnie chuan nui ruh ruh chungin min lo en reng bawk. Nge maw mi tihbuai tak sek le?

Rawn vawm phei rawh ti ni awm takin a kutin min hui thuak a, luhlul chhuahin ka kuah bet lui ve tlat. Min rawn pan hnaiin min laksak mai a tum a, ka lo phal bik aw kawng lo. Ka hawlh thep vek nghal loh.

Vuan bet tlat chungin ka dakchhuak leh a, “Thlah vat rawh” thinrim sehchilh zet a ka tih chuan a chal a chuar nawng a, a hrethiam lo a nih ring a “Awlsam deuhin ka pe dawn bik lo che. I duh duh a i vawm kual tur a ni lo” ka tih lai a a nui deuh suk ka hmuh chuan ka thinphu a rang ve ringawt nia! Hnung lam aţanga min kal hualin ka bulah a rawn ţhu nghut a, “Nghaktei ţhutna tur a nih kha aw, a rawn let ţep tawh ang” ti mah ila min hnaih lutukin a ţhu run tho.

“Zir duh suh Sir a lokal dawn lo” a tih ri ka hriat rual rualin amah en turin a lam ka hawi phei vat a, “Tak tak maw?” ring angreng tak hian ka ti hluai a, lu a lo bu nghut a, “Min va hrilh har ve rilru nuam lo ţunin ka awm reng hman a, a lokal dawn lo hlauh chu a va ţha tak” phur zetin ka ti chel chul a, ka inrin loh lai takin ka ball pawm lai a la a, a ţhutna ah kal lehnghal daih mahse kan test dawn loh miau vangin ka lawm tho tho. Diktak chuan ka zir theihnghilh ve liau liau vang a nia, ka thu hriat chu rik hluai pui tham a ni ve alawm.

Test lo turah ka in ngai nghet hmiah tawh bawk a, bell ri mai mai te chuan thinphu an ti rang zo tawh lo. Mahse reilote hnuah Sir leh Nghaktei an rawn inzui lut a, kan vaiin kan ding ţhap a, hlauh vangin ka thinphu a rang tawh hle. Sir chu a lokal chiang lutuk, test na tur paper a pawm tel luk lehnghal. Ronnie-a ţhutna lam ka hawi vat a, ani pawh rawn hawi ve in chimawm lutukin a khi suk a, hmui phunin ‘good luck’ a la ti zui. Ka va han ngei mai mai tak. Ball la let duhin min tih der hmin der a nih kha.

Ka thiam lo ngei mai, Nghaktei nen kan inmelh leh ralh ţhin a, ani phei chu a pen hmawr a pawrh turh tawh. Thiam lo na na na ka ţhu reng peih lo. Period a tawp ţep tawh tho a tiin dah turin ka ding hluai a, chutiang bawkin Ronnie pawh. Ka din vung vung laiin a ni erawh a kal tlang a, test paper dah mai lovin Sir bulah eng emaw sawiin a phun mawlh mawlh a, a thil sawi ka hre pha lo thung. A nih nih ni turin ka chhuak ve thawr a, paper ka dah chiah tihah Ronnie-an a test paper in a rawn dah hnan nghal chat. Test loh tur a tih khan ka lawm em a, ka thiam loh zia a hre ve a nih dawn hi ka ti rilru ta vel mai mai. Paper a dah hnuah en pawh min en lovin classroom aţangin a chhuak vut lehnghal. Zun chhuak chhuanlamin ka zui chhuak a, corridor ah thlang lam thlirin a ding mai mai tho sia.

“Nge min tihder a?” a bul ka thlen rualin ka ti nghal tawng a, “Ball ka duh a” tih ringawt a min chhan chuan, “Tinge nimin ah i lokal loh?” ka ti leh tawp a, “Min lo ngai a mi?” tiin min zawt let daih a, min nuihzat hmel em em mai lehnghal.

“Ngai nang aw nuam ka ti daih zawk” uar fe a ka tih chuan “Ouch” tih pahin na ti awm tak hian awm a dawm vel a,over lutuk hian.

CONT..

Leave a Reply