You are currently viewing TROUBLEMAKERS-6

TROUBLEMAKERS-6

Spread the love

TROUBLEMAKERS-6

Ka thusawi vang a na ni âwm tak a Ronnie an a awm a dawm vang vang lai chu ner nang a melh rawm rawm chung hian “I over lutuk aw. Engtin mah ka tih loh che kha” ka ti hlak a, “Ka awm lohin nuam i ti zawk a” ti supin ka thusawi tawh chu min vuak let nan a hmang a, ka nui ta ringawt a.

“Min ti buai reng a nih kha aw. Tinge i lokal loh reng reng?” tiin ka zawt nawn leh a, “Ka peih lo” tih ringawtin min la chhang zui.

Corridor a tlak dal an dah chu vuanin thlang lam a thlir leh a, thli thaw in min chhem rual a a rimtui inhnawih rim rawn nam leh ţhin chu ka lo hip leh vang vang zel. “I piangthar tawh em?” min ti teh daih a, min en kher lo mahse keimah min zawt tih ka hre tho.

“Nu leh pa thu awih reng lo mah ila ka piangthar tho chuan ka hria” ka ti nawi niaih a, a nuih ka ti za khawp mai.

“Thih i hlau em?” a ti leh sup a, min rawn en tawh thung. A hmel a tak run tawh a, ka hamhaih lek lek a ni.

“Hlau e, dam zel ka la chak. Ka ţhiante leh ka nu leh pa te hi ka thihsan ui” tiin ka lo chhang a, bu nghut nghut chungin thlang lam bawk a thlir leh daih a, a awmdan hi a mak riau.

“Ti nge min zawh a?” ka tih chuan “Nun hi nuam i tih ve hmel het huat em a” ngeiawm fahran hian a ti a, ka lungawi lo leh pek kher mai.

“Ti e, ka tih lutuk vangin ka tal huat huat zel alawm. Ngaihthlak nuam deuh hlek sawi tur i hre ve ngang lo a nih hi” ka ti hlak hlak a, a bulah pawh awm rei duh lovin class ah ka let tau nghawng nghawng nain ka ngei tak tak chuang lo.

Lunch break ah Nghaktei nen school thlang lam kan pan dun hnak hnak a, meizial kha a la ak ţha reng. Midang in an hriat chuan an sawi darh kan hlau sia, kan pahnih chiahin kan kal ta mai.

“Hetah hian a rem ang. Tuman min rawn hmu pha lo ang” hawi kual thuak chung hian ka ti a, a hmun pawh a reh khawp mai.

Kan pahnih len na tawk tur lung rual rem vak lo a awm a, kan ţhu rei dawn chuang lo bawk a tiin hnah ro in kan hru fai thuak thuak a, kan ţhut veleh Nghaktei bawk chuan meizial leh lighter a phawrh nghal zat a.

“I duh ve em?” ti a min zawh pahin a ţan kai a, a fawp khu zui hlat hlat mai. “Ka la zu chhin miah lo a, ka zu thiam lo” zawi te hian ka ti a, ka ţawng ring ngam tlat lo.

“Step a tam lo. Step indawt dan ka hrilh ang che. Fawh a hip tur a nia, mahse hip luh hrawk loh tur. Ka chhung ah hian tih tan tur a nia, chumi hnu chuan zawi te a hip luh leh hret tur. Hip rei leh rei loh chu i thu thu. Chuan i thaw chhuak leh ang, hnar leh ka hmangin a thawk chhuah theih a, kha chu i duhthlanna a ni tawh mai” a ti siam siam a, a zuk dan phei chu a nawm hmel rapthlak.

“Khawi ka lo tih ve chhin” tih leh ban ka rual a, a la zu ral tam lutuk lo. Nghaktei sawi ang khan ka ti ve ngei na a ka khuh nasa mai.

“Step1 lekah ah i hip nasa lutuk a nih kha” tih nang nang pahin ka hnung a chum det det a, ka la khuh bawrh bawrh tho. Ka sa chhuak vek a, ka khuh nghawr na lamah ka hai luk thei hial.

“Ka duh tawh lo, ka sim nghal..Ka sim nghal hmak” ka tih mawlh mawlh laiin mipa nui ri kan hre thut a, khuh bawrh bawrh chungin nui ri lo chhuahna lam kan hawi a, Ronnie a lo awm ve reng mai.

“A tui loh dan hi, a lum kha fek ringawt. Hetiang halpuah u awrh hi engtin nge an peh pawt peih zawk le?” hlauthawng tak chungin Nghaktei chuan a ti mial mial a, a meizial pai ruk chu kan ţhutna lungah ngei mai chuan a nawr nawk nawk a, a sawm hneh kher mai.

“Engtik aţangin nge i awm?” vin lek lek hian ka ti a, midang an awm ve hlauin ka vin vak vak ngam bik lo.

“Step 1 aţang khan” min nuihzat hmel tak hian a ti a, ka khuh a reh tial tial a, ka hlauthawng tual tual thung.

“Min zui ru ni maw?” melh rawm rawm chung hian ka ti a, “Class room hman tawh loh ah hian ball kan dah nual a” ti a pangai deuh a min hrilh pahin a hnung lawk, building hnuai ber, pawn lam aţanga en ringawt pawh a a chhung thim khup chu a kawk zauh a, “Lokal teh u” amah bawk chuan ti leh supin min kal pel a, kan ţhiandun chuan hreh deuhin kan tho ve ţuah ţuah a.

Ronnie-a bulah kan ding dun ran a, class CR a nihna angin min hau hrep dawn maw kan tih laiin “Khu lai ah zawk khuan kal ţhin rawh u” a ti ta daih a. Kan lo ţhutna thlang lamah khan hmun biru deuh zawk a lo la awm reng a, mahse kal ngai lohna tih hriat takin hnah ro tla a tam hle.

“Min hau dawn maw ka tia” ka ti chhuak hap a, tak deuh a min melh chhuk run chung hian “I zuk theih loh kha. I ţhiannu tan ka sawi angah ngai rawh” a ti nghut a, min lo hmu tak tak a nih dawn kha.

“A rukin min lo report ang e aw” ka ti leh hram a, Nghaktei phei chuan engmah a sawi ngam tawh lo. Meizial case a ni miau a, pawr vak ngam na chi a ni lo.

“I zuk ve chuan ka report ang che” min ti hmuk a nih chu. Ka insual vang khan min ngaina thei tak tak lo ni berin ka hre tawh. A sawi duh sawi zo tawh ni awm takin a kal nghal daih lehnghal.

“Teuh ther ther ve” thawveng hawk ni awm takin Nghaktei chuan a ti chhuak hap a, kan ţhutna ngaiah bawk khan kan let leh a.

“Khapa kha mi Nini chu?” ti a min zawh chuan buk nghat pahin “Ni e, Ronnie ka tih tawh kha. Nini chu phuah chawp mai mai lawm” ka lo ti vat a.

“Ho mai mai, Nini tih in a awlsam zawk” a tih liam puat puat hnuah a kiu a min nghawk pahin “A duh che mi a?” a rawn ti leh thut a, ka nur nang mai.

“I mawl em ni? School ka zawm ţan na a la rei loh ve tho hi. Min duh lo nasa uchuak bon phirz. Ka luh ţan ni ah sual pui ka nei nghal a, min huat nak lai a” uar fe hian ka ti tan tan a, min en heu chungin “A duh chiang che lawm” a la ti ban charh a.

“In duhna hun a la awm lo ka tih mawlh mawlh chu. Hmelţha min ti viau mahse hun tawi te chhungin min duh thei lo hrim hrim” ka ti a, ka ţang lutuk a ka awki thlengin a sang vek tawh.

“Hmangaihna hi second khat lek chhung pawn a piang thei tih hre ta che Penglengping” min ti ve kher a nih chu! Zan a ka thil tawn ka hrilh khan ‘Penglengpunga bialnu Penglengpingi’ min tih kha ka hrilh tel vek a, haihawt viau chungin a lo la hre ran a nih dawn hi.

“Khatiang khan min ko kher suh aw” ka ti hlak a, ngaipawimawh lo zetin a nui zui uar uar lehnghal.

Meizial zuk ruk tur ber Nghaktein a nawr pherh vek tawh bawk a kan awmna ngaiah chuan awm reng peih lovin class lamah kan chho leh thuai a, Dindini’n min lo zawng nasa chu lo niin.

“Triple S-i ten an zawng cheu nia” a tih chuan kei aia lut tlai zawk Nghaktei a bo mep mep khawp mai.

“Ţhian pathum an nia, shikhar an ei vek. Chuvang chuan triple S an ti ţhin. Shikhar Hruaii, Shikhar Ţha-i leh Shikhar Muani te” tiin ka’n hrilhfiah leh rih a, a lo bu ve ta nghat nghat.

Class room ah kan dawhkan bulah lehnghal an lo ding far a, an shikhar hmuam lai an seh leh tawh aniang an khabe a che leh det det tawh hlawm.

“Dawnga leh Faka te hnenah engtin nge min lo sawi a?” S Muani chuan a ti nghal thawr a, Dawnga leh Faka lah chuan min hre lo der hmak tawh. Hawi pawh an rawn hawi duh lo. He school a lut ve ţhenkhat te hi rin ai daihin an lo ţhing a nih dawn hi.

“Engmah kan sawi lo. In awm ve tih pawh kan hre tawh lo” ka ti liam puat a, mi chanchin chhia ka sawi ve chiam chiam ngai lo reng a ni.

“In lo sawi chiang emai. An khawsak a chhe ve hlawm ngawt ang te in lo ti. Eng nge in nih bik a?” S Hruaii chuan thinrim tak hian a ti vin leh ţhat a, Nghaktei ngaihdan ni lo chuan “Kan ti thlawt lo. In chanchin kan sawi peih loh bakah midangte inchhung khawsak kan endik sak ngai lo. Hey.. tuai pahnih kha, Triple S ho hi eng nge in lo hrilh chiam a?” a ti khar khar tawh mai.

Class chhung a zirlai awm ho in an en huang a, pawn aţangin an rawn dak lut far bawk. “In sawi sa kan hrilh chhawng. In pahnih chiah a in kal hran chiah phei kha chuan in sawi nasa ngawt ang” Faka zawk chuan a lo ti a, Nghaktei nen a kan kal hrang kha an lo thik a ni ngei ngei ang. An rilru a van lo chhe riap riap ve aw.

“In va zak lo tak e aw. Chutiang em em a ţhing leh cheap kan ni lo. In rilru chhiat kawih kual chiat vang a nih kha” ring leng lawng a a tih leh hnuah kan hma chiah a ţhu te box, thir ngei mai chu a la a, tuai pahnih te ţhutna lamah a kal ta mai. Ka pa in buaina neih a phal tawh miau loh vangin ka umzui vat a, a kawrlum ah pawt dawr dawr mah ila “Vawih lo vawih a inpuh mah a na alawm le. Ka sawi miah lo sawi ang a inpuh ka duh lo reng reng” a ti kha kha a, a pan lui zel tho.

Tuai pahnih lah chu inring deuhin an lo ding ve ran tawh a, an thil tih dan chu ţhing ka tiin keipawn ka pa thu zawm lo va insual pui mai ka duh rum rum mah se an mipa tha an chhuah vaih chuan kan hneh dawn lo nasa lutuk tlat.

Tuai pahnih nen a kan inhnaih viau tawh hnuah “Ti lo teh ang kumtluang pawhin” tih hla sa in kan inkarah Aaron a rawn lam ta auh auh a, kan insual mai a hlau nge ni midang melh kualin a mitmu a ti che pah rulh rulh a, a khat tawkin “Ti lo teh ang kumtluang pawhin” a ti leh ţhin a, chutia lam pah chuan Nghaktei nen min nam pah zeuh zeuh a, a chut hmel ka tih theih tehreng nen, ka lo la hrechiang lo viau a nih dawn hi.

Mipa tlang hmasaber a ţhu ţhin Rca pawhin ka pawnfen a lo pawt ve zeuh zeuh a, amah en tum a ka chhuk melh lai chuan rawn dak ve vahin “In huai kher mai mahse ti reng reng suh u an tha a fei lutuk chutah an lian zawk lehnghal” thluk deuh si, fan raih bawk si hian a lo ti dam dap a, Aaron lahin lam su auh auh chungin min nawr ve sek bawk nen, Rca ka en leh a, muangchanga lu a thin takah chuan Nghaktei nen kan tawlh let ta nge nge a.

Corridor ah Nghaktei, kei, Aaron leh Rca te kan ding tlar ţhap a, tuai pahnih te min lo sawi dan kha ngei viau mah ila engtinmah ti lovin ka awm thei. Mahse Nghaktei zawk a lungawi thei der lo.

“An ţawng duh hlek hluak ka ti reng a ni. Dawt ngat a inpuh hi ţhing ka ti ngawih ngawih, an la chak lo viau ang mawle” Nghaktei chuan a la ti tan tan mai.

“Engtinmah ti suh u. Hetiang mi hi chu nam nul a pumpelh zeeel tur” Rca chuan a thusawi chu zawi te in a thluk leh delh delh a, “Zirtirtute an awm loh hi bakah mizo zir hun bik a ni lo va, khati khan ti thlap thlap zel suh” Aaron-an a lo ti pung pung a, an inlen hleih angreng bawk sia, inchhang zawm lo se a ţhat zawk ringin “Nia ngawihsan hmak ang u. Ka hmuh tirh aţang khan an fel vak ka ring lo hrim hrim. Kawm tur dang ka neih loh lai chiahin ka kawm. Mahse an tiffin pai a tui thei rapz” tiin thu dang ka lo zep a, Aaron leh Rca te hi ka chhar chawp leh chiah mah ni se ţhianah ka ngai leh hmiah tawh a, keini ho inkar lehzel a buaina a thlen ka duh lo ve tlat.

Bell rik veleh class ah kan inzui lut dial a, kan class a thlahrang specialist, thlahrang a sawi thiam leh sawi nasat theih em vang a PC Hranga an tih mai ţhin chuan thlahrang bawk a lo sawi thum leh dut dut tawh a, an ngaithla tui leh tawh hlawm lutuk a tuman bell ri an ngaihsak lo. Mahse vawiin chu ka mood a fuh loh em vangin ka kal pel ve tlat. A sawi hlauhawm thei lutuk a, a chang chuan ka ngaithla lo lui ţhin. A tawpah ‘nangmah kha’ tih a hrat lehnghal. Hnar parh hawrh khawpin kan phu leh dual ţhin.

Min Tawni a rawn luh rualin mizo text bu kan phawrh sap sap a, a meng rum leh hle tawh. Mizo ţawng na na na chu a duh uluk a, a fir ţhakz. Thu a thiam reng bawk a, ‘duh ngat se chu lehkhabu ţha deuh deuh a ziak ţeuh thei tawh ang’ kan ti ve laih laih ţhin. He mi school a ka luh hma aţang daih tawh hian a thawnthu ziah ka chhiar ve ţhin a, kan zirtirtu a lo ni reng tih ka hriat khan mak ka ti a sin aw. A thu ziah ka chhiar khan ‘a zei ngawt ang’ ka tia, a zei ka ring nghal ringawt a, mahse kan miss hi a la single. Nakina ţheh huk turin a la in up no a nih kan ring far hlawm.

Kan class hi chu a nuam ve thlawt a ni. Hei vang hi a nia school kal ka chak theih em em. Star ka neih mai bakah reilote chhungin min ti tlangnel hman vek a, lehkhazir tih loh school leh a kaihhnawihah hrehawm tih ka nei lo.

Ban veleh phur takin Nghaktei nen kan haw dun a, tuai pahnih kha chuan min hel char char. A hlawm hlawm a gate a an chhuah sup sup lai chuan an tlem deuh hun nghakin kan ding ve ran a, midang an phut sup sup laiin kan chhuak ve peih ngai lo, pheikhawk a bal duh emai. Zing a a dum bun siin tlaiah a uk leh a dum ţial kan bun haw ziah mai.

Chutianga kan din vauh vauh lai chuan ka lu ah tuemaw hian thil chang deuhin min rawn khawng bal a, ri keuh ringawt mah se a na takzet tho. Tuai vut vut chungin ka hawi let a, Ronnie nen kan inhmachhawn ran mai. Min khawnna hmanrua ka hmuh loh hlau ni awm takin a helmet ken lai chu ti che zeuhin a nui zui suk a, star viau mah ila ngei chang ka ngah mai.

“Thlah i ngai em?” tiin pangai deuhin min zawt ve teh mial a nih chu. “Ngai lo ka ţhiannu nen hian kan in a inhnaih a” ka ti chiah chu a ngen na lai ka kawm chhuak leh ta aniang a kal nghal vut a, vawikhatmah a rawn hawi let lo.

“A duh chiang che alawm” Nghaktei lahin a lo ti leh hman pek a, “Sawi sek lo teh. Min duh ni se ka lu aia chang daihin min khawng lawl lawl lo ang” ka ti hlak hlak a, ka kalpui nghal dawr dawr bawk.

Thui pawh kan kal hma in kan school bul lawk hmun zau laiah hmanni a ka hmuh nu bawk khan min lo nghak leh ran tawh a, min hmuh veleh “I lo bang tawh maw?” tiin hlim hmel pu sângin min lo zawt a.

“Aw kan bang chiah. I dawrah khan ka lo la kal hman lo a, hman veleh ka lokal ang” ka ti nghal zung zung a, ka nutei angin insawi mahse ka nu nen inang ka ti lo reng reng.

“Awle i duh duh hunah i lokal thei alawm. Ka hmu chak thut che a, i school bang nang hman turin ka rawn kal vang vang a nih hi” dam thlap a a tih lai te chuan min en uluk kher mai.

Nghaktei nen min thlah haw thlap a, a hma ang bawk khan ka nu leh pa te hnen a a chanchin sawi lo turin min hrilh. Ka thuruk midang bul a ka hrilh a nih chuan thuhran, midangin ‘sawi suh’ an tih chu ka sawi chhuak ngai bik lo va, tunah pawh zep sak ka intiam leh thlap. Ka nutei a lo nih tak tak phei chuan a thuruk zep chu ka tih turah ka ngai.

“Saw Penglengpunga bialnu Penglengpingi” an rawn ti leh tawh. Damdawi chicks ho bawk kha an ni tih ka hre nghal mai a, kan inkawt lehnghal a hmuh chu ka duh lo khawp mai.

“Ka châng char char dawn che ka tih kha aw. I duh loh chuan bike siam man i bialpa lo dil ang che” an zing a inti thu ber khan thupe aw zet hian a rawn ti lung lung a, kalsawn vat turin ka duh bawk a lu ka bu zawt zawt a ni ber.

Thil dang an sawi leh hmain kan inah ka tlan lut a, inleng kan nei leh tawh a, ka nu in min lo ko hrang vatin “Zanin ah i pa te kan inah an committee dawn a, chaw eikhamah an ţan leh rum rum mai ang. I nau te an la tirh tlak si loh a, inbual la dawrah va kal leh lawk rawh aw. Rami a inhralh zawh duak hmain chhang leh bawnghnute vel va lei leh rawh rawh aw” a lo ti nghal mawlh mawlh a, awmpuinu ka ni ringawt.

“Aw ka inbual phawt ang a lum ropui si” tih leh pindan lam a kal ka rual a, ka nutei inti in min lo be khawmuang ve bawk nen min thlah thlap mahse nidang aiin ka haw tlai daih zawk.

Ka inbual zawh hnuah thingpui ka in khawmuang leh rih a, ka pa hmuh lohin phone ka khawih pah mual mual a, phone ka khawih chang apiang hian Fredy Penglengpunga phone tumtelek kha ka mitthla ah a awm ve ziah lehnghal.

“Bawihi in hmanhmawh deuh rawh aw chaw ei a hun mai ang” tiin ka nu in min lo tur leh hmanhmawh a, “Ti khan lo ti ziah lo la, ka in phai ve zel tho lawm” ka ti nang nang a, ka nutei inti bawk kha ka ngaihtuah leh tawh. Vawiin phei kha chuan hmanni ai khan ka hmu hmelţha lehzual zawk a, ka nutei a lo nih ngei chuan ka intithei ngawt ang.

“Khawi pawisa” tih hlak pahin ka nu hmaah kut ka dawh a, pawisa bakah ip min la pe tel zui.

“Tukin a ip ka sem khan Pi Chhuani hi a lo awm lo va, kawngthlang maiah khuan an awm tho a rawn pe kawi lawk rawh” a tih leh phei chuan in hampuar pawp pawp a thlawh bo vang vang ka chak kher mai. Dawr kal hian chhawm tel a ngah thei nia aw.

Ka thil lei ho khai na tur keng thlap chungin ka chhuak a, damdawi chicks ho lah chu an lo la ţhu ţhap. Hmu reng chungin ka hmu lo der hmiah. Anni ang em em a mihring hman hi ka la hre ngai lo. Min zui niin ka hre lehnghal a, ka hnungah kal lo mahse ka ep chiah ah ka rualin an kal ve zel a, kawngpui karcheh in kan kal a nih ber chu. A damdawi hralhna ringawt pawn bike siam man chu a nei thei daih awm sia, pawisawi miah lo min ti buai reng a, cher deuhin a pawr ve em em zel, sual thlir thler lutuk mai.

“Nu Ram, chhang ka duh leh nual a, zanah ka pa te an committee dawn a” tih pahin dawr hma inhawng aţangin a chhungah ka dak lut a, hralh zawh chu khawi lam, a lo la inrem tlar dal mai.

“Chuan maw Nu Ram, khawi lai nge Pi Chhuani te in?” tiin ka thil lei tur ka thlan hma in ka zawt hmasa te te bawk.

“Kawng thlang lam khu a nia, kan in nen a inhlat lo. I hriat theih dan ber tur chu, Fredy-a te in nen hian a inzawn” a lo ti a, ka zawn hmuh theih mai ringin ka bu nghat nghat a.

“Sawng ho saw i kawi khawm leh tawh mi mawli?” ti a ring leng lawng a rawn au ţhawt ri ka hriat chuan ka ding ngil nghal awt thei hial mai. Bike ri leh dawr kawt tho si, ka sir lam deuh a a rawn ding dat thawm te kha ka hre vek a, Fredy Penglengpunga aw ka hriat hma kha chuan ka lo ngaihven hran lo.

Bike a ţhu run chungin min lo melh run a, a kut leh lamin helmet a kuah bawk. A sam a buk tawh lo ka tih tawh kha. Khaw engah phei chuan a danglamna a hmuh chian theih lehzual a, a sam buk deuh lai a lang thur siang ţhin si kha a meh hnu hi chuan a kir chiat thung a, a pianpui sam a nia nga, a ti danglam peih tawh lo ni ah ka ngai.

A tshirt hak lah chu rawng chi thum velin a ţial a, jeans kekawr a ha a, a khup a ţet ve ngei. Sneaker var a bun leh tawp a, a inchei emai class a kal ve tawh aniang. A bike chu a lian viau na a a bawp sei thlerh thlawrh nen chuan a inrem viau thung. Amah a lian ţha a, scooty chu khalh se scooty zawk hmuh tur a awm lo maithei. Aaa…ka sawi uar leh tawh.

“Ka biak che chu ka bialnu” tlem a nuihza insum deuh chung hian a rawn ti sup a, ka lo thlir vung vung em maw ni dawn le?

“Nangmah vang vek” vin zet a ka tih chuan a chal a chuang nawng a, “Vak de de suh ka tih kha” a lo ti chang ve bul a, zawk zamah hian a.

“I ţhianpa nen a in pawi khawih ka tuar a nih hi. Ka pa’n a hriat vaih chuan in chak lo khawp ang aw. Mi bike tih chhiat sak kha eng nge a ţulna?” ka ti vin leh nghek a, min melh run ringawt.

“Fredy, Rema te in a i kal dawn chuan Mawimawii hi Pi Chhuani te in thleng hruai ve rawh aw” Nu Rami’n a lo ti lang lang a, kan inhau ri a hre ve vek tho awm sia.

“Kal rih lo ang mahse ka hruai ang che” a rawn ti sup ri ka hriat rualin ka ner nghal nak mai.

“Ka zui che chuan damdawi chicks ho inzui tir ka duh tihna a ni mai. Nangmah vangin hming thar ka neih phah lehnghal a, sawng ho sawn Penglengpunga bialnu Penglengpingi min ti vek” thinrim zet a ka tih tan tan chuan a ri meuhin a nui chhuak hawk hawk a.

“Penglengpingi maw? Naa ka bialnu tih kha a mawi zawk” min nuihzat tak chung hian a rawn ti leh kher a, “I hruai ka duh bawk lo” ka ti leh hmuk a, “Ke a i kal chuan an umpha hma zawk ang che” bike tih nun pah chuan a ti bung nghut a, lo la melh rawm rawm mah ila ngaipawimawh lo fahranin a rawn tlan hma a, ka hmaah dingin mit ko a kan ak a, “Hruai i duh nge duh lo?” tiin a tawp nan ti ni awm takin min zawt a, kan ep chiah a ţhu tlar ţham ho ka melh zawk a, a sawi dik ve tho. Min zui zel dawn a nih chuan min um pha hma dawn lutuk. Amah vang a buai ka nia, min hruai dawr dawr se ni mai.

Ka nu thil min chah lei hmasa lovin Fredy vuan ţawng ţawng chungin bike ah ka ţhu kai a, zan a min phurhna kha chu a ni tawh lo. Helmet a khum lai a “I pawi khawih pawisawi lovin ka tuar ta ber a nih hi. Mawhphurhna lak leh theih dawn loh te chuan inhnamhnawih loh mai tur a lawm. Damdawi vawrh ţhin an ni lehnghal” ka la ti hlak hlak a, a taksa a chet dat danah chuan min nuih leh tawh tih ka hria.

Kawng te reuh te a kan tlan lai te chuan kan tlan liam daih mai ang tih hlauin a kawngah ka kuah bet ţung a, a tshirt ah ka ţham nghet hle bawk. In lian vak lo kawtah a ding a, amah vuan chung bawkin ka chhuk leh. Kawngkhar kik ka tum lai takin thawm ka hria a, hmeichhia leh mipa ni ngei chuan ka hria. An in bang tile vek a ni bawk a, thawm an dim lo angreng phian bawk sia, duh aiin ka hrechiang mah mah. Bike thawm te kha an hre ve vek awm tho sia, an chawl chuang lo reng reng. Heng lai tlar bik a awm ho hi chu an mi pangai lo hlawm hrim hrim a, ka lokal kher kher kha ka inchhir rum rum mai. A reh dawn ta emaw ka tih hnuah thawm an rawn nei ţha leh a, nupa a tih chi an ti mekin ka hria.

Phawk hra in Fredy lam ka hawi a, ani pawn a hre pha ve vek tih hriat takin a lo nui ruh ruh a, “Lokal mai rawh beng thek thek an ti a nih kha” zawi sup a tih pahin Pi Chhuani te in lam hawiin a ţhen zui sak a, an thil tih lai an la tui chilh rih em vangin a ţawng ring ngam bik lo.

“Tun a mi kha Pi Chhuani tihna mi?” tiin kan tlanchhuah leh rualin ka zawt nghal tawng a, “A fanu aniang” tih ringawtin min chhang a, mipa bulah ngat phei chuan an thil tih lai ang kha sawi nuam ka ti chiah lo a, engmah ka zawt zui lem lo.

Nu Rami dawr thleng min thlah leh thlap a, a hma a min châng ran reng tu te kha an lo awm tawh lo. Min tih hlauh an tum ve hrim hrim ni berin ka hre tawh.

“I zuk hmu thei em?” tiin bike aţanga ka chhuk leh rualin Nu Rami’n min lo zawt a, “Hmu e” ka ti mawl tawp a, thil dang ka sawi zui duh ţhak lo.

Dawr chhungah lutin ka chhang duh zawng ka la kual a, Fredy kha chu a haw tlang nghal daih. “A rui ve zeuh zeuh tih lohah chuan a rilru a ţha a nia aw. Mi ngaihdanah a buai lo ang bawk hian mi chanchin a ngaihven lem lo va, in inhmu fu lo laklawh mai mai a nih kha. Inkawm nel ula i hrechiang mai ang” tiin Nu Rami chuan Penglengpunga a la fak tak deuh deuh a.

“Chimawm si, nghal bawk si, ka kawm nel peih lo. A nu leh pa lah hian an duat hmel ropui sia, an duat sual vek tawh niang” ka ti bawrh bawrh a, Nu Rami hnenah hi chuan tupawh kan ang ngam a nih ber hi maw.

“Thi hnu dam leh ang kha a nia, a tet laiin a thi lek lek tawh a, kha khan a la nghawng ve aniang, a pa ngat phei hi chuan ţawngkam vinin a la hau lo hrim hrim. A nu nen hian an inhau tun tun reng a, mahse a nu pawh hian thinrim tak takin a ti ngai chuang lo. Ti hian an en tawp a, an hau phal bar lo. Fa tlum ber hi chu an puitling har bik te pawh a nia nge” tiin min hrilhfiah ve tak na a chimawm ka ti tho tho.

Pawisa ka pek hnuah hmanhmawh lo deuhin ka haw a, ka nu in min tir kual nasa a, chhuan lam tur a ţha emai. Mahse ka thlen veleh ka pa’n “I va rei em em ve” min lo ti leh hram pek a, “Pi Chhuani te inah ka kal kawi alawm mawle. A lo awm lo lehnghal, ka hah nak lai a” ka ti vin hlar a, “Tu nge phur che kha?” a lo ti khauh mai. Ka pa hi chu cctv a ni ringawt.

“Keimahin ka kal” ţi dekin ka ti chhuak sep a, a lu a che det a, a lu a chet det tawh chuan a thinrim lutuk tihna a ni mai.

“I rei leh pek a, ngaihven tur che in ka rawn kal. Kawng sir hrik ho in tlangval pakhatin a phurh thu che min lo hrilh alawm mawle” a ti khui khui tawh a, rei lah hi min ti hma thei a nia.

“Min hmu sual a nih chu” tiin ţan ka khawh ve tlat a, a kut tum aţanga a kutzungchal chang pir bik vah ka hmuh rualin hnung zawngin ka tawlh hret hret a, dawt sawi chi a ni tawh lo tih hriain “Pi Chhuani te in ka hre lo a Nu Rami vahpa in min hruai a nih kha” ka ti leh hnuhnawh. Dawt tlem ka la belh ţalh tho.

“Tlangval te hi i lo hmu ru ange aw, i â si a, reilote ah an bum thlu der mai ang che” thutak deuhin awki pangai takin a ti leh daih a, “Teuh lo mai tlangval te chu ka allergy lawm” uar fe a ka tih hnuah dawhkanah ka thil lei ka nghat chawrh a, zung tur a bathroom a kal ka tum laiin “Khaw nge upa Chala’n ka pen a hman kha a awm tak daih le” tiin pen zawngin ka pa a kun du du a, ka zawn pui hman tawh lo.

Zun thuai thuai tum a ka kal chu ka khupin ka pa a do palh a, ani lah a lo inring lawk hman tawh si lo “Khaih khaih” ti chungin invawn tan na tur a awm hma chu kun reng chungin chak deuh hma lamah a kal det det a, mahse inchhung bungrua kan ngah ve tho a, a in nem khalh thuai a, a buai zual chhung kha second khat pawh a tling kher lo ang. A thau lutuk a a in tha zo tawh lo a ni ber.

“Lalnunmawi” a tih vin ţhat hnuah a hmui hnuai pet fuat chungin a rawn hawi a, a meng rum nasa mai si, in hup ţut chungin ka tawm chawih ringawt.

“Ka hmu lo che a” zawi te in ti mah ila ring lutuk tak maiin “Kal kawng en ta che. Ngati nge kha tia mi pal buan buan? Centre table awm lo phei se chu ka tlu na dawn nih kha” a ti khur khur a, chhuat kawh va pahin “Zawng rawh ka pen tla chu zawng rawh” amah bawk chuan a ti leh hmuk hmuk a, ka ip thei tawh thlawt lo, “Ngawi rawh pa ka zun a chhuak tawh lutuk” tih leh bathroom chheh chhawl lam a tlan ka rual a, a phun zui ri ka hre hman vuai vuai ringawt.

Zanah Nghaktei te in lamah ka kal leh hnak hnak a, dar9 a haw turin ka pa’n min chah thlap. Nghaktei hi Penglengpunga cousin a ni kher a, Penglengpunga te inah a awm kher lehnghal, chak lo chung chung a hmuh ziah a ngaih phah.

“Nizanah pawn ka rawn kal tawh kha min ngai viau lo teh” ring leng lawng a mipa ţawng ri chu Nghaktei te gate ka luh hma aţangin ka hre pha nghal a, “Ka phone aţangin whatsapp a khawih ve theih loh. Thlalak tel lo pawn ka bialnu i ni tho a” gate chhung ka luh lai mek chuan a lo ti leh lung lung a, min hmu reng mahse a ţawng zawi duh chuang der lo. Hausa deuh ni siin phone tumtelek a nei a, a tla dah lutuk a ni.

“Mi’n an hriat hluai a ngai lo. Ka bialnu i nihna a bo chuang lo” a zawn ka thlen lai vel chuan a ti bung leh nghut nghut a, min ngaihven lem lo. Ka lawm daih zawk.

“Nge maw in ruk i sawi sek le? Ar i vulh peih mi? Ka ru daih tak tak mai tur che nia” a tih chu ka hriat tawp ber a ni. Ka hriat tham lekin ka nui hul hak a, door bell ka hmet zui zat. Penglengpunga nei duh tu chu hmeichhe mawl tak a ni ngei ang.

CONT..

Leave a Reply