You are currently viewing TROUBLEMAKERS-7

TROUBLEMAKERS-7

Spread the love

TROUBLEMAKERS-7

“Lalrintluang, i rawn haw tlai leh vaih zawngin aw.. kawngkhar ka kalh hmak tawh dawn nia, ar in ah i riak ngei ngei ang” tiin Nu Mahruaiin Fredy a vau khar khar a, Nghaktei nen choka ah wai wai kan bawl a, an ţawng rin lehpek em vangin kan lo hre pha ve vek.

“Ar ho nen khuan ang khat rengin min en suh aw” kan awm na a rawn kal pahin a ti lung lung a, a hnungah ka kawr awm a min ţham tu ngei mai khan a rawn zui bawk.

“I rawn haw tlai chuan i riak khawp ang. Zu riah pui la, an thla te pawh a muang deuh ang chu” Nu Mahruaii chuan ring fahran hian a ti leh a, a aw aţang ringawt pawhin a nui tih a hriat.

“Ka hralh vek nghal loh” thinrim aw lek lek hian a ti a, fridge a pawt hawng rawp a, a hrawk bawk che khawlh khawlh a tui a in leh pawp pawp hnuah “An vak tam si, kalna apiangah hmuh tur an awm a” a ti nghut a, a mi huat ber te chanchin sawi ang hrimin a hmel a rum ul bawk.

“Bike chhia vang mai mai a in um kual reng chu a ninawm khawp mai. Tu tih chhiat nge ni reng reng a? Keimah min puh daih bawk sia” a ţhianpa chuan a lo ti ve vat a. A thusawi dan kal hmang aţang chuan Mawitea an tih kha a ni tih ka hre mai.

“Ka hre lo, a chhe hneh viau tih ka hria a chuzawng chu” a ti thum leh dut dut a, Mawitea chuan a ngaihna hriat loh hmel deuhin lu thak lo pui a hiat a hiat ringawt.

“U hei wai wai kan bawl lo ei ve ru” ti a Nghaktei’n a sawm chuan pawi ka lo ti ru khawp mai. Nghapih kha a theihnghilh leh daih tawh a ni ngei ang, a huat ve nen khan.

Fredy chuan tih el fe a min rawn melhin “Ka bialnu tè khan a phal loh hmel emai” ngeiawm fahran hian a ti a, ka thinrim meng rum kual vel chu a lawm zawk mah emaw tih mai tur a ni.

“Naktuk chu phur awm tawh ve. Pawisa in thap tam dawn sia” a ţhianpa in a tih chu ka hrethiam lo hmin hmak thung a, “Chak loh leh chân duai ni mai” vei loh hmel fe hian a chhang liam puat a, a ţhianpa in “Pakoy khu mi?” ti a a zawh leh pawh chuan a bu nghut nghut ringawt. Ar an sawina bawk a nih ka ring a, Penglengpunga zarah ar sual huai hming pathum vel ka hre ve tawh tihna nih chu.

“Ţhing e, tlangval a pum pa in a ar pawm chhuah reng mai” nui kur kur chungin Nghaktein a lo ti ve zeuh a, “Ar pawm vang a hnawl ka la ni em lo” inringtawk tak hian a ti a, chhe lo mah se a sual emai.

Nghaktei nen a kan ner nang nang te chu engahmah ngai duh lovin “Ka’n inthlak lawk aw Mawite” a ti liam puat a, lungkham neih loh hmel zetin a kal nghal nul nul a.

“Ronnie kha keichu chhe lo ka ti. A duh che chuan duh ve daih rawh aw” a ti ser ser a, lehkhabu kan pharh ve ran a, kan la chhiar eih lo hrim hrim.

“Min duh lo ang ka tih tawh kha mawle keimah zawkin ka star ringawt alawm” ka ti nang nang a, min duh ni se chu ţha deuh deuhin min bia ang.

“Mipa zia hi ka man hma teh mai nia aw. A endan aţang che khan a duh che tih ka hre vek. A melh chang che hian keimah zawk ka lo hik chhawkz zel” a ti leh a, a beidawng duh lo reng reng.

“Kan la hria ang chu. Zunzam story kha chhiar ka tum lehnghal a, Nini-a zunzam ka inphuar tir chhuaiz dawn” ka ti chang fak a, min duh loh zia ka chiang khawp mai. Fiamthu nan a chhaih kual mai mai a tan bak min duh lo.

Lehkhazir lovin Ronnie-a chanchin hlir kan sawi a, a hmel hlir ka mitthla ah a awm bawk a, lehkhazir ai chuan a nuam daih zawk. Nghaktein min han sawi hmuh tak tak phei chu min duh ve se ka ti tuk tawh. A thlalak ka la print ang. A lu chiah ka chep thla ang a, ka lehkhabu a mihring thlalak awm ho lu ah hian ka bel vek ang a, ka keu apiangin min lo nuih bawk ang a, Awiiii lehkhazir ka peih tur zia chu!

Ka pa in dar9 ah rawn haw rawh min ti na a dar10 velah Nghaktei te in ka chhuah san a, kawngkapui thleng min thlah ve thlap. Zan a vah chhuah vel duh ve viau mah ila a chhungte an awm khur zel a, mahni in a awm a nih loh bawk vangin a inthlahrung ve deuh a nih hmel.

“Hey Penglengping” ka va han ning zo zai tak. Gate aţanga ka pen chhuah rualin min lo ko leh nalh tawh. Damdawi chicks ho bawk an ni lehnghal.

“Nge min tih buai ve ziah a?” vin zetin ka ti ţeng hlar a, ka ngei lutuk a hlauhna pawh ka nei thei lo.

“I bialpa a accident a nia” pakhat chuan a ti a, ka bialpa tak tak ni lo mah se Fredy a sawina a ni tih ka hria.

“Hei an in a nih hi. A chhungte va hrilh mai ula” ka la ti khar khar.a, mi an pawt buai ve sek a, ka tlai phah ziah.

“Chi nang a rui lutuk” an ti leh mai a, ka lo ner nak a, “Chutiang a nih phei chuan a chhungte hriat chi zawk a nih chu” ka ti hmak a, kal nghal mai ka tum chu “Amah chauhin a nia, a ţhianten an tlanchhiatsan vek. I lokal duh loh leh kan sawisa hrep ang a ni mai lawm” an hotu berin a tih chuan a ţhuih hruaite chu ngeiawm zetin an lo nui vel a, “I lokal loh chuan ipa kan hrilh dawn nia” an ti chiah chu ka ding chiang ngang mai.

“Khawnge kan misuala chu a awm?” ka ti vin ţhat a, an zing a pakhat chuan min hui pahin “Lokal rawh basketball court ah a awm” tih leh kal a rual a, hreh viau mah ila hmai hup chawih chawih chungin ka zui ve dat dat a.

Basketball court kan thleng chiah chu thinrimna in min hnawh nghal up up mai. A accident awkawng lo. Basketball court ah chuan an awm ngei a, mahse a ţhiante nen an lo nui ham ham a, tumah an ti buai lo va, buaina an tawk lo bawk.

“Nge min tihder ve ringawt a hmela?” tih pahin an hotupa ber ni a ka ngaih chu ka bag tè khai laiin a hmaiah ka hem pawp a, ka lehkhabu a chhah bawk a a na tham ve ang.

“I va kawlh reuh e” a ti sup a, a nui zui hawk a, a hnungah a ţhiante an ding ţhap a, min melh khui khui hlawm mai.

“Eng nge thleng?” mipa aw thum deuhin a rawn tih hmuk rualin ka darah min rawn kuah zui zat a. Ngati nge heng ho buai naah hian ka tel tak ziah mai le? Fredy te an rawnkal hnai tih an hriat vang a nih dawn hi tuman kut min thlak zui loh.

“I bialnu khan kut min thlak ngam ve a” a tih hnuah min rawn hnaihin hmai si lo chauhin min en a, “Kan veng tereuh te a i awm ve chhung chu ka enzui reng tawh dawn che nia aw” tiin min vau zui khur khur a.

“Hmeichhia an khing ngai lo” ti a ţha deuh a a hrilh hnuah Fredy chuan a nam let a, a awm si chetin min hnuk hnai zui hrawk a, “I ţan bawk a, a nuam dawn e” chupa bawk chuan a ti nghat nghat a, a hmel hmu chiang thei lo mah ila a nui niin ka hria.

“Min umzui reng suh u in bike chhia nen inzawmna kan nei lo” pangai tak bawkin a ti leh a, a vin nghal khur khur lo chu mak ka lo ti zawk hial.

“Hmu tu cheu an awm alawm mawle. Nih leh pawisa aiah i bialnu hi a ni mai lawm” a tih hnuah pawisak nei lo zetin ka ban a rawn vuan nghal thawr a, Fredy bawkin rang zetin min rawn vuan tu kut chu a lo phih thlak sak a.

“Inthiarfihlim rawh u” a ti bul hmuk tawh a, amah en kher lo mah ila a thinrim ve tawh niin ka hria.

“Nia, buaina neih rengin awmzia a nei lo. In hming tak ngial pawh kan hre lo va, in bike kha kan tihchhiat a ni lo. Khami zan khan kan kal na hmun a in ang a, bike in rawn lak dawn khan kan lo awm fuh a tih a ni mai. I sawi ang khan kan veng hi tê viau mahse kan hre ngai lo che u” tiin Fredy-a ţhianpa Puia khan a rawn sawi fiah duah a, kei pawn inhre sa emaw ka lo ti char char a, keimah ang tho a an hriat chawp ve tho an nih hmel. An hman em a, mi chhui chianna hun an ngah lutuk a ni ber.

“A tawpkhawkah phatna tur in zawng leh si ni maw?” chupa chuan a ti leh kher a, Fredy te ber pawn a hming an hriat loh chu ka tan hriat ngaihna a awm lo.

“Kan tihchhiat a ni lo tak tak–” Puia’n a tih lai mekin Fredy chuan bul tak mai hian “Sawifiah tawh suh” a lo ti hmuk a, a lo khap kher kher chu ţullo ka ti kher mai. An hriat ngai loh lehnghalin dawt a puhin pawisa tam tham tak an dil reng a, sawi fiah tir awm zawk tak a nia.

Damdawi chicks ho in a ţhiante an la hnial laih laih lai chuan “Kal ang” ka hriat tham lek tur hian a rawn ti sup a, a hma a an lo ţhutna lam a let kan tum laiin “Hmeichhia chu…vengtu an neih loh hnuah an zawr hnap zel mai ni,an chet theih loh hnu ngat phei chuan” an zing a pakhatin keimah min tih chhan tak a a rawn ti chiah chu Fredy a lim phei puat niin ka hre mai. A awmah na zetin a tlawh pawp a, a thal chiang kher mai. A duhtawk mai dawn emaw ka tih laiin a hnek zui chawrh chawrh a, an ţhianpa chhan tum ve ho lah Fredy-a ţhianten an lo dang ve zel bawk nen, an inphek sual a ni ta ringawt e.

An buai nuaih nuaih karah chuan Fredy ka ngaihven vat. An intihbuai pui te hi damdawi zuar an nia, police an inrawlh a ngaih ka hlau a ni. A sawisak pa chuan thawm a chhuah tawh lo va, chu chuan min ti mangang lehzualin a jacket ah ka theihtawp a na in ka pawt a, “I mawl em ni? Jail i tang mai tur a sin, duhtawk tawh rawh” ti lawm lawm mah ila “Tu hmeichhia mah i khawih lui lo vang” la ti chhur chhur chungin chupa, che thei tawh miah lo chu a la khawih zawm zel tho a, ka mangang tawp chuan a ţhiante ka ko vak vak ringawt.

Anni pawn thil awmdan an rawn hmuh meuh chuan an hlauthawng tih ka hria. Hah thaw hlawp hlawp chungin min rawn pui vat a, Fredy an pawh hran hnu chuan leiah a ţhu hnawk a, thla êng bak êng dang awm lo mah se a sawisak hrep pa buaipui a kan kun hniam lai chuan thisen rim a nam huam a, ka buaipui zui thei lo. Fredy-a vau khur khur chungin a ţhianten an hnuksawn a, nikhua a hre tawh lo niin ka hria.

A chal dawm vung vung chung a a ţhu kun ngul chu “I ţha em?” tiin kan zawt laih laih a, nichin lawk kha chuan chhia leh ţha hriatna nei lo ang maiin a che buan buan a nih kha. A rawn hawi chhuah rualin a kâ in a thaw chhuak hawlh a, amah hnaih ber a awm ka nih miau vangin ka banrekah humin min en run a, ka awm a ti nuam lo lek lek. Thil dang engmah in a tih thinrim loh laia hmeichhe chungchang a sawi chhuah zeuhin a thinurna nasa tak a a chawk chhuak thei chu mak ka ti angreng hle. Eng emaw tawn hriat rapthlak tak a lo nei tawh a nih te ka ring rum rum a, mahse hrechiang lovin thutlukna ka siam ngawt duh bik lo.

Engmah sawi set set lovin na zetin min pawt hrawk a, leiah ka ţhu hnawk a, a hma zawn chiah a awm ka ni bawk a min kap kalak a ni ber tawh. A ţhiante awm lai rengin nghet deuhin min kuah lehnghal. A kut pakhatin ka tukhumah ah a dawm a, lehlamin ka hnungah, amah si chet khawpin min pawm bet run mai. Eng nge maw a hriat ni? Mi â ang maiin lawm a awm le.

“I ţha em?” tiin min ngaihtuah hmel takin min zawt let ve thung a, ka chhip zawnah a thaw lum hawk a, eng emaw hlauhna nasa tak siam sak tu a awm a ni maithei tiin kuah rem turin ka insiamţha a, min pawm bet run mahse ka kut dah tawm tlat chu ka pawt chhuak a, ka kuah let ve ta nge nge a. A ţhiante ho in min thlir ţhap tih hre mah ila a hlauhna te tih nêp sak tumin a hnungah muang changin ka chul pah a, amah a len em vangin min kuah pil hneh hle.

A ţhiante lah chuan inthurual ang hrimin min kalsan dial a, kan pahnih chiah a awm chu nuam ka ti lo. ‘Tu hmeichhia mah i khawih lui lo vang’ thinrim tak a a tih ri kha ka bengah a la cham a, ngaihdan eng eng emaw chu nei ve mah ila ka chiang ngam tlat lo. Min mamawh niin ka hria a, chuvang a hetiang a awm hi ka ni.

A hnung a muangchang a la chul chung hian “Ka ţha, engtinmah min ti ve lo” ka ti chhuak sep a, a rilru a nawm phah angem ka hre lo. Chutianga rei tak kan awm hnu chuan min thlah riai riaiin amah zawk inla hrang hmasa ah a ţang a, hnung lam a a tawlh let hret takah chuan ka lo thaw huai thei.

“Ka thlah ang che” tih leh thawh a rual a, din chhuah ve pah a “A ngai chuang hleinem. Keimahin ka haw ngam alawm” ka tih pawhin “Ka thlah ang che” a ti leh nghut a, hnial zui zel chi niin ka hre tawh lo.

Lei a ka bag lo let ve bal ka chhar lai pawhin min ngaichang run reng a, ka inpeih veleh chulai hmun chu kan kalsan a, kawngpui pangai kan pawh veleh ka ban a vuan a, motor tlan lohna lam zawkah min hnuk pheiin kawngsir kil lam zawkah min kal tir a, inbe miah lovin kan kal mawp mawp a ni ber.

An inkawt kan thlen veleh a ka inbih thuak chu leh! Ka bawr banah thisen a lo kai nuan a, ka kawr hma lamah tlem a kai bawk. Khapa kaih harh tum a buaipui tu te khan min khawih palh a nih ka ring. Kai tam lo mah se ka pa’n a hmu dawn tho tho. Rawng var berkher a la ni zui.

Lungawi lo zet a Fredy melh chho hrak chung hian “Engtin nge ka tih ang a? In ka thleng ţep tawh bawk si, ka kai ve vek hi” ka ti hlak hlak a, an in aţang hian kan in a hla tawh lo va, tihfaina hun a awm tawh lo.

Ka dar a vuan chung meuhin min thlek vung vung a, hneh deuh a min kuai herin hnunglam thlengin a en vek. A jacket a phelh lai chuan a ngaihna hre lo zetin ka lo en heu ringawt.

Jacket a min tuam mawlh mawlh pahin “A kai ve maithei mah se a dum a, a hmu lo ang” a ti a, jacket ban a ka zen luh fel veleh a hma a zip phui leh thlap bawk.

“Kal ang le an lo hau ang che” ti leh supin min tih nat hlau ni awm takin dam deuhin ka hnungah a dawm a, phun nawi lovin a rualin ka kal ve zel na a kan inkawt kan thlen meuh chuan ka insum thei tawh lo.

Dak deuh va a en chung hian “Nichin khan mi â ang maiin i khawsa a, eng nge awmzia? I kut tuar tu kha eng mi pawh ni se a thih vaih chuan jail i tang dawn tho tho a nia” ka ti hlak hlak a, a hmui hnuai seh zeuh pahin min melh run run a, sawi tur a hre bik lo.

“Nu Rami pawn i thinrim thunun rawh a tih ziah che kha? Chhia leh ţha hriatna hloh ta ang mai khan che tawh reng reng suh” ka tih kha kha laiin “Zanah chhuak tawh suh” thupe aw zet hian a lo ti bung nghut thung a.

“Thil pawi zawk a thlen hma in i kut tuar tu ngei kha hmu vat ang che” tih leh kan in lam a inher ka rual a, hriatchian chak ka nei leh et et tawh. Eng thil emaw takin a rilru a ti khaw lo niin ka hria. Nidangah nasa tak takin khapa khan a ţawngkhum fo a, a ngaithla liam mai mai zel. Kha thu a huat bik nachhan kha a awm ngei ang.
(He story hi through thick an thin peng pakhat kan tih tawh kha aw)

“Lalnunmawi i va rei lehpek ve” ka pa bawk a ni. A thinrim takzet a niang, vawikhat ai tam lu a ti che. A sai ngar ngar a ni zawk mah.

“Naaa a lo la meng” ka ti sep ri chu hre pha in “Ka men lohin, fa te haw nachang hre lo tu nge mut san ngai?” a ti leh khui khui tawh mai.

“In mut hnuah pawh ka lo haw thiam tho a” ka ti dek dek a, “I thiam leh lutuk vang a nih hi kan buai fo. Veng chhung te hi i lo fang chhuak leh vek tawh lo maw? Lal dak de de-i ni tawh la a ţha ang. Hahthlak leh lutuk” beidawng zetin a ti chuai raih a, min hau zo tawh emaw ka tih laiin “Sana en rawh” a rawn ti leh thut a, zanin a ka thil tawn zawng zawng nen, phu nasa tak ka ni ringawt.

“Dar7” ka ti sep a, rum tawkin sana a melh ve thung.

“Battery i phawi leh pek em ni?” vin lek lek a a tih chuan lu ka thing mat mat a, tun ţum chu ka phawi miah lo tak tak.

“Sana battery phawi leh herh dik loh te i hrat a, hmeichhia ve si nghal chikimin i nghal. Khawlai i ngaina bawk si, inchhungah thi tur ang maiin i awm a, khawlai ah lah dah de de na tur zawng reng rengin i khawsa a, kha tu jacket nge i rawn hak haw?” a ti ta chiah a, a hmuh hman hma pindan a luh bo hman ka duh tehreng nen.

“Nghaktei nu jacket theihnghilh” ka lo ti thuai a, thisen a kai leh kai loh en tumin ka inbih thuak. Val lai chu awm ve bawk mahse a langsar lo hlauh e.

“Naktuk zan aţang chuan i chhuak tawh lo vang” khauh bur a a tih chuan nur nang hian ka melh a, “Sir in lehkhazir ru a ti lawm. Ka thiam lo bik dawn sin” ka ti vin ve ta hlar a, “Lehkhazir i phur viau chuan thil dang tih tur i nei tihna a ni mai. I zir duh ţalh leh Nghaktei chu rawn kal ve thung rawh se” a ti tlat tawh a, a luhlul ropui si.

“Hmh…ka thiam lo bik ang a ni mai. Ka fail pawn i kut chângin min nawr tawh suh ang che” ka ti hlak a, pindan lamah ka kal tau daih. Ka pen ring lui kher lehnghal.

“Nghawng nghawng che hian, ka ti tau e i tia, i kal bu nghawng nghawng a, chhuat a i luphut tla hi rawn phiat rawh” ti a min auh zui phei chuan ka thin a rim kher mai.

“Luphut ka nei bawk lo, fa te lehkhazir pawh phal mang si lo. Ka fail chuan ka thiam loh a ni dawn hauh lo a nia” ka ti lang lang a, a chang chuan ka inthiam lo ve ţhin. Mahse ka thinrim hian thlemna ka do zo lehzual a, ka chhang let chiam zel. Ka pa hi piangthar ţha viau lo se chuan min hralh daih tawh ang.

Zan dang a a tih ţhin ang bawkin a mut dawnah ka pa chuan kan unau pindanah kan unau tan ţawngţaina a nei leh a, zantin ngei ngei a ni tawp mai. A dam sam loh chang a a mut hma ţum leh a zin lai a nih loh chuan a ţhulh ngai lo.

A ţawngţai zawh veleh “Lalnunmawi” tiin ka hming pum ngatin min ko leh a, “Naa..pa..ţawngţai naah min hlan zawh chiah kha, min hau tawh lo la” ka lo ti bai bai a.

“Hriam hrei kawl i nei leh pek em?” ti a min zawh leh chuan lu ka thing mawl tawp. Nail cutter thlengin hriam hrei a ti vek a, kawl a phal lo reng reng. Kan pindanah thir leh intihnat theihna chi engmah kawl a phal lo.

“I nau a tho â leh ngei dawn a, intih palh theihna kawl i neih chuan dah bo rawh” a ti chiah reng a, ka sawi kha, zan tin mumang a tak a chet chhuah pui ţhin kan kawl a, a hahthlak tak tak a ni.

“Ka kawl lo” ka ti tawi tak a, “A ţha, naktuk inrinni a ni bawk a inu nen hospital ah hruai rawh u. Hetiang reng a nih chuan a puitlin hunah a zak ang. Ngaihţhat nan tal pawh va kal pui rawh u. Inu leh i nau an zak zum angreng sia, hma tawng tu a tan zui ang che” a ti a, ka chhang peih tawh lo. Mut hahdam mai mai ka chak ve tehreng nen, naktuk a ka tih tur ka ti lawk ve vek tawh a, ka inthiam lohna a bo vek, ka hne leh hluah hluah tawh.

Ka pa chhuah veleh ka inthlak thuai thuai a, Penglengpunga jacket lah chu a lian em em mai lehnghal. A rimtui inhnawih rim lah chu hnar ping verh kaw hawk thei khawp a nam rum rum a ni lo va, a rimtui chem chem ni maiin ka hria. Thawm dim deuhin ka insilfai leh a, tlai tawkah ka mu ve thei hram.

“Pa, hospital ah ka kal duh lo. Ka tho â tawh lo ang” ka nau in a ti bui bui reng a, nalh lutukin ka inchei ve vek tawh a, ka hruai lui awm tho emai.

“Kan chhungkua ve hi chuan case hrang hrang kan va ngah bik tak em. Chinfel dan pawh ka hre nek lo ve. Doctor hma a ţhut tawp a ni mai. I u leh i nu an awm ve dawn hlauh tur a awm lo. Va kal phawt rawh u” ka pa in a ti charh charh a, a thau vang nge ka hre lo, a thawk mai mai te chian a chang chuan a ri leh sek sek zel.

“Aw ti rawh No-i, hlauh tur a awm lo. I zantin hna a ni ringawt a, dik lo a awm palh takin kan ti mai alawm. Damdawi an lo chawh che nga a tawk mai” ka nu in a lo ti ve bawk.

Rum tawk a meng chungin ka nau chuan dingdihlip deuh chungin a ke a per et et reng a, melh khui khui pahin ka pa chuan “Kha..i tlan dawn em ni?” a ti hmuk a, intlansiak na a tel tur a ang em alawm.

“A thinrim a nih kha” ka nu in a lo ti zeuh a, “Ka fa te hi in fit mah mah deuh a ni. Thinrim intih lan dan lah hi mi fa te aiin a danglam zawk a, kal mai mai rawh u” a ti bak hluk a, ka nu in kan unau in min hruai chhuak a, lirthei ke hnih nei chi a kan len miau loh vangin kawtah taxi kan châng a, taxi aiin Penglengpunga kan hmu hmasa zawk lehnghal.

Kan nufa a kan lo ding ţhap a hmuh chuan kan zawnah a ding ri hrawk a, ar a phur chhuak bawk. A insual tir dawn tak tak a niang.

“Nu Hmingpui khawnge in kal dawn?” tiin thawveng tak mai hian a zawt a, zan lam a a hlauhna kha a bo leh hmak tawh. Ka nu hming a a ko nalh thei te chu ka ngaithla sual emaw ka ti lek lek a ni.

“No-i hi kan va entir lawk ang e. Khaw nge i kal dawn zawk? Ar i zuar chhuak dawn em ni?” ka nu chuan dam thlap hian a lo ti ve a, ka nuih ruk tet tet laiin Penglengpunga erawh a ngaihdan a nih loh hmel kher mai. Ka nu pawh hi a mak ve e, pakhat chiah a phur chhuak a, zawrh chhuah tham a ni lo tih hriat reng reng.

“Ka sual tir dawn” a ti bung nghut a, ka lo nui ve vel te chu rum ul hian min rawn melh a, muangchang a a bike a tawlh riai riai laiin ka nu chuan “Kawn aţang khan taxi rawn tir chho rawh aw Penglengpung. A nih loh chuan kan tlai mai dawn sia, min lo tlawmngaihsak lawk mai rawh” a lo ti veleh a, “Ka lo ngaihtuah ang” ti a ngeiawm fahran a a chhan let hnuah a tlan tlang puat a, a chhan dan chuan ka nu a ti thinrim dawn emaw ka tih laiin thinrim âwm angin a awm lo hrim hrim.

Reilote hnuah taxi a rawn tlan chho a, kan bula a rawn indawh danah Penglengpunga khan a rawn tir chho ve ngei a nih hmel. Ka nu ho in hospital kan pan vang vang a, ka nau lah a men pur reng mai bawk a, ka nu hmuh loh laiin nui ţha chungin ka chiat khum zeuh zeuh a, a huat tawk a tling ve em em ringawt.

Durtlang hospital ah kan kal a, rin aiin mi an lo tam. Ka nau hming an lam har phian lehnghal. Ka ning lutuk chu ka nu phalna thlapin ka kal kual vel a, mahse khawiah mah ka dak de de lo. An lo rik mur mur pawn ka inrawlh lo hrim hrim.

Pawnah pawh tih tur vak a lo awm lo va, luh lehnghal mai ka tum chu tu emaw nen kan insu chawrh. Ka kat dawrh a, ka tluk hmain min lo vuan hman hram.

“Ka tihpalh” a tih sup rualin min thlah a, mahse amah hi ka hrechiang lutuk. Denim jacket ha in lukhum var a khum a, mask a vuah bawk. Chuti chung chuan ka hre tho.

“Nini” ka ti chhuak sep a, helai hmun a ka hmu chu mak ka ti kher mai. Chutiang a ka koh takah chuan ani pawn min rawn en leh vut a, keimah ka ni tih a hre chiah tih a mitmeng danglam dan aţangin ka hria.

“Eng nge i tih ve?” ka ti leh hluai a, a mit bul vun chuar deuh danah a nui niin ka hria.

“Tihpalh ka tih kha ka la let” chimawm chhuahin a ti leh tawh. Nur nang chung hian ka melh rawm rawm a, “Hmelhriat i hmuh te chuan mask kha phelh ve em em la” ka tih chuan lu a thing vut a, “Ka hre ngai lo che” min ti nih chu. Ka va ngei mai mai tak.

“Mawh hetah eng nge i tih ve?” ngen ngawl deuhin ka ti leh a, lehkha var a keng a, eng emaw tih a nei ngei a lawm.

“Damlo ka hruai. Ti nge? He ta ka kal ve i phal lo mi?” tiin tih el zet a min melh chungin min zawt a, ka lo chek tlak.

“Nge ka phal loh ngawt ang a? Ka ta a ni hleinem. In hun a la thleng bik lo mi? Keipawh ka nau ka hruai a” ka ti leh zawt zawt tawh.

“Thleng lo deuh. I rilţam em?” a ti teh daih a, ţam vak lo mahse Nghaktei thu min hrilh kha ka chhinchhiah kiau. A zunzam in min phuar bet ţung tawh a, ka zunzam in a phuar ve nan awm dun tam a ţul.

“Ţam ve deuh tho” tiin hmeichhe dang angin ka zak der vel a, ka awmdan chu lo man nghal chatin “Zak der suh” a ti hluk a a, “Ka zak der lo” ka lo ti let ve thuai a, “Kal ang” tih leh ka chhip a dawm a rual a, mi chu kut an inkai rial a, keichu ka chhip a kut dah run chungin min kalpui hlawk hlawk a, ka la ţhang ve dawn khawp mai, ka ţhan theih nan ka in entir ve nghal daih ang.

In hma tawnin kan ţhu ve ran a, ka khi huih reng mai. Mask a phelh chiah phei chuan ka hma a chhum zing chuk a kiang hawk ang mai a ni.

“I duh duh ei rawh ka leisak ang che” min han ti chiah phei chu zuan rawp a inpawm tir nawlh ka chak et et. Nghaktei vang vek, min sawi hmuh nasa lutuk a ka duh lehzual phah.

Menu ka en lawr dan dan a, ka duh ber chow ka en kan. Star te hmaah chow a ei chi loh, ei sual phei chuan kumkhaw zahna a ni mai. Ei nuam ber tur momo ka chah a, “A hlang chuan ei a har ang. Lassi ei tel rawh” tiin min lo sawi hmuh a, ka remti lehnghal mai.

Ka ei ang chiah ei ve a tum lehnghal. Min entawn chiang lutuk ka ti rilru a, Nghaktei chuan min hmu se a hik nasa lehzual ngawt ang. Ka ei ang a ei ve vang te chuan min duh ah ka ngai a, a awmdan hrim hrim hi min duh ah ka ngai hmiah tawh.

“Ka va hmuhnawm awm ve” kan thil chah ziak mawlh mawlh chungin a rawn ti chhuak sup a, ka hawi sawn rang teh a sin.

Waiter rawn kal hnenah lehkha te a lo pe a, a pek zawh a min endan phei chu tawrh hlelhawm tak a ni. A zahthlak zawngin nia ka tih.

“Mami chu i va hmelţha buang buang ve, kha i buang thang reuh a” kan piah a ţhu pakhat hian a rawn ti a, mipa upa lam tawh an nia, patling an ni tawh maithei. Pakhat phei chu a hmai a ţawk hlur a, a hnar pawh nawh lung hriam deuh ang mai a ni tawh. Zu chhawm chi sachek an hawp lehnghal. Sa chek hi zu in miin an duh lehzual an ti.

Min rawn melh zeuh zeuh ţhin chu ngaithei lovin Ronnie-an “Ka pu school naupang a nih hi” bung zet hian a ti a, a lukhum phelhin min khum tir zui hmiah bawk.

“Fa en in alawm kan en. Mama chu i lawmawm phian mai” an ti fiamthu a, an nui zui huah huah a.

Lukhum hma a kuai hniam nasa mai sia, amah en tumin ţhu reng chungin ka dak vah tho.
“Naupang angah min ngai a ni maw? Nangpawh school naupang ve tho i nih kha” lungawi lo tak chung a ka tih chuan mawi deuhin a kiai suk a.

“Naupang alawm i nih Baobei” min tih phei chuan melh heu chung hian “Engtin maw?” ka lo ti ha a.

“Baobei” min en run chung hian a ti leh a, ka bo kher mai.

“Eng nge chu chu?” ka tih leh chuan dar a kan ak a, “Nalh ka tih ve chhun” a ti chhuak hap a, a awmzia ka hre chuang der lo.

Kan thil chah a rawn thlen veleh ka lukhum hma a tawk zeuhin “Ei ţeuh raw aw Baobei” a ti leh sup a, min nuih suk hnuah a kun daih.

A ţhenin Penglengping min tia, a ţhenin lal dak de de min tia, a ţhenin khawchhak lam ţawng ni awm tak Baobei tiin min ko bawk a, he pa hi khawchhak drama a en ţhin chiang mai.

“Hey khawchhak ho drama i en ţhin mi a?” ka ti chhuak thawr a, hawi chhuak lovin lu a lo thing liam satliah a.

“Baobei chu eng tihna nge?” ka ti leh a, “Ka hre lo” tih ringawtin min chhang.

“Engtin nge i sawi chhuah theih zawk a?” ka tih leh chuan “Ka nau te en laiin ka ngaithla fuh. Ei rawh” a ti leh hmuk a, chuti na na chu tiin ka ei nasa teh a sin.

“I hak ang nawr chilh buan buan suh” min nuihzat hmel fe a ti chung hian ka lukhum hma thlawk lai a rawn kik karh karh a, min pawh hniam sak em a, ka kun meuh chuan amah takngial pawn min hmu thei lo.

Ka dah chhuah duh miah loh vangin “Baobei chu baby tihna” a rawn ti chhuak hulh a, ka hawi chhuak rang teh a sin.

“Naute ang ah min ngai tihna maw?” ka ti hluai a, nui ruh ruh chungin a bu nghut a. Min duh angah ka ngai leh tawh lo e a.

CONT…

Leave a Reply