You are currently viewing TROUBLEMAKERS-8

TROUBLEMAKERS-8

Spread the love

TROUBLEMAKERS-8

“Chuan nausen angin maw min lo hmuh” ka ngawih ran ran hnuah ka ti chhuak leh hap a, lu a lo bu nghut. A nui sawng lehnghal.

“Ka englai hi nge sen ila tih a?” ka tih kha kha takah chuan a nui chhuak ta hawk.

“Cute tihna a ni leh si” a ti leh sup a, ka awih tawh chuang lo.

Chhan leh ka tum laiin nutling hmelţha veh vawh tak mai hi kan ţhutna bul tukverh ah a rawn dak a, “Bawiha hetah a ni maw i lo awm? I in eipuar tawh em?” ti a a rawn zawh takah chuan a nu a nih ka ring hmiah.

“Baobei hian a la ei puar ve lo ang” tih el zet a min melh chung hian a ti kher a, insehruh ţeuh mah ila a nu a awm miau vangin eng thil mah ka ti ngam lo.

A nu chuan min rawn en pahin “E..ţhian i lo nei a ni maw? Eng nge i tih ve a?” tiin min zawt veleh a, ka nau vang a kal kan nih thu sawi mah ila a natna ber ka sawi tel lo. Min nuihzat sa nak laiin min nuihzat lehzual palh ang.

“A nih chu in rawn lut rual mai dawn nia aw ka awmna ngaiah khan ka lo awm leh ang. I rei lutuk a ka ngaihtuah deuh che lawm mawle” Nini-a hnen a a tih hnuah “Ei ţeuh rawh Bombay” nui sang tho chung si hian min ti a nih chu! A hre ţhelh lutuk.

Nini pawh a lo nui leh hawk a, ka meng rulh rulh ringawt. A nu a kal sawn veleh “Ka hming pangai sawi ve mai ta che” a hmai bul set sawt ah ka vin nghek. Hnung lamah a tawlh dawrh a, vin leh tum a zau deuh a ka an lai takin a nu bawk kha a rawn let leh.
“Bawiha mask kha vuah ţha rawh aw” tih zawng a rawn sawi a a kal leh hmak.

“I nu kha mi damlo chu?” tukverh lam kawh va pahin ka ti hu a, “Aw” ti a min chhan pahin a bu zeuh a, inbe tam hman lo mahse nufa inpawh tak an niin ka hria.

Ka ei zo ta bawk a kan ţhu zui rei lo. Kan chhuah hmain mask a vuah leh thlap a, vuah lo se ka tih zawk nen. Chhe lo deuh bul a kal chu a nuam ve em a sin. Chhuah pahin pawisa a pe a, kan kalna ngaiah bawk kan inzui phei leh dat dat.

“Lukhum hi” amah en chho ha chung a ka tih chuan “I inhmeh zawk nei rawh” bul zet hian a ti a, ţawngkam nem te hi a nei lo ve nia. Min fak lai takngial pawhin a ţawngkam a ti nem thiam lo.

“Khaw nge i nu te chu?” tiin min zawt ve tehmial a, phur zetin keimah chen turin ka kuai kun a, ka nu leh nau ţhutna ka kawh hmuh lai chuan a bu ve nghat nghat a ni tih ka lukhum chet det det danah ka hre thei. Chuti khawp chuan kan inhnaih a, nuam ka ti veng veng.

“Helamah hian ka kal dawn a” tih sup pahin ka kalna tur lo lam a kawk a, pawi ti viau mah ila “Aw kal rawh, monday ah school lokal ngei ngei rawh aw” tiin ka chah ta zawk a.

“Ka inkhel min en dawn chuan” tih pah a a nui deuh suk ka hmuh chuan ka thinphu a rang lehpek. Inkhel en turin min sawm ni ah ka ngai a, ka kawchhung zawng zawng hi an lâm parh harh harh vek ni berin ka hria.

“Ka lo en ang che i lokal loh vaih” ka ti khar khar a, kal nghal mai tumin ka inher a, thui pawh ka kal hman lo, hnung lam aţanga ka ban a min vuan tu a awm vangin ka lehhawi leh thuai.

Nini bawk a lo ni a, ka hrilhhai rei hmain phone a lek chhuak a, “I number” a ti nghal tawng a, ka lak hun pawh nghak hman lovin ka kutphah leh a phone a hmeh bel chawt chawt a, penglengpunga tumlelek phone ka hrechhuak leh zawk tawh.

Phone a lock lem lo bawk a ka phone number ka chhu lut ve nghal mawlh mawlh a, phone number min dil thut chu mak ka ti lutuk. Ka chhut luh mawlh mawlh lai pawhin ka meng phawk hra tho maithei.

Ka pek let rualin a dial nghal zat a, a beng nen chuk tuahin a ngaithla zui vung vung. Ka kekawr ipte a ka phone ah a che det det a, “A tawk tawh ka hre tawh” ka lo ti chhuak sep a, mak ka tihna a la bo thei tak tak lo.

“Ka biak theih reng turin awm ang che, Bombay” nui sukin ngeiawm fahran hian a ti a, a kal liam thlengin ka thlir ta ngawt ngawt. Ka ngei zawng deuhin awm ţhin mahse Nghaktei ka va hrilh chak tawh tak.

Vanneihthlak takin ka nau chuan ţhat lohna em em a lo nei lo va, ka nu hmel hmuh a nuam sawt. Ka pa leh Mampuia chiah an awm vangin tawi khawmuang lovin kan haw leh thuai a, nidang a ka chhuak haw angin ka pa’n min lo hau chiam chiam tawh bik lo. Ka nu’n thil awmdan a hrilhfiah zung zung a, keichu nui ver ver chungin pindan lamah ka zuang phei euh euh.

[Nghakte ka hmuh chak zia che hi. Ka pa’n chhuah a phal si lo a, kan inhmuh veleh ka hrilh ang che] tiin ka ţhiannu Nghaktei message ka thawn hram. Ka inthlak hma hma in min rawn chhang let lehnghal.

[Penglengpunga police in an zawng. Kan bia a, ar ka insual tir lak lawh a ti tlat a, kan buai nasa mai. Mahse min hrilh tho rawh] tih hi a rawn thawn a, tlem chuan ka hlauthawng ve deuh. Ka hming a lan ve ka hlau a, chhuatah ţhingţhi nghal rawk rawkin ka hming an sawi lan ve loh nan ka ţawngţai mawlh mawlh. Min man ve kher lo mahse ka hming a lan hrim hrim chuan ka pa a sa ţha ham ham dawn lutuk. A khu rum rum ang a, a alh phet phet mai ang.

Hlau chung chungin Nghaktei chu ka be ta nge nge a, “Tunah in inah police an awm em?” ka ti nghal thawr.

“Awm lo ti ila kan cousin tho chu a awm. Police a nia, report an rawn theh lut a a tia, midang an lokal tel ve lo. Kan cousin a nih vang hrim hrim hian a hlau lo a, police motor pawn rawn hruai a tum lo mawle. Midangin an rinhlelh loh nan amah ngeiin station a hruai a thu zawh fiah a duh a, penglengpunga lah hian rawn haw hman a la inti si lo a” a rawn ti mawlh mawlh a, duh tawk nghal mai lovin “Chhungte kan nei nual a, thil pawi lutuk thleng lo a tih dan a awm ang an ti chung pawn an ko haw thei chuang lo. Damdawi te an sawi tel nawk a, ka hrethiam ve kilh kelh lo” a tih zawm niah niah.

“Chhungte in ngah vangin a hlau lo a nih chu. Eng nge an report chhan ni reng reng a?” tiin hre lo âwm deuhin ka zawt.

“Nizanah damdawi zuar ţhin pakhat a lo sawi sa chiam a, a sawisak pa lah kha damdawi chungchang vang a enthlak lai reng a nia, Pa Buatsaiha phei chuan pawngsual thleng thleng a sawi kai tawh nia aw, tun ang em em a a thinrim hi ka la hmu ngai lo” a rawn ti leh ser ser.

“A na viau a mi? Ti nge amah pawn a tuar tel ve thei tih hrereng chung a an report a?” ka lo ti veleh a, keipawh ka ţawng zawi khawp mai. A hmaiah a hnek chawrh chawrh reng a, thinrim tawp khawk a kutthlak a nih bawk vangin a na dawn tih chu ka hria.

“Nizan ah la la hospital ah an kalpui an tia, mahse thil thlen dan a sawi theih tawh chuan a harh tawh niang. Pa Buatsaiha hian ‘ka fapa in damdawi a khawih lo’ a ti tlat a, keipawn a khawih lo tih ka hria. Eng nge an sawi kha aw, hmeichhe duh lo chung awmpui tih vel an sawiin ka hria, chu chu pawngsual chungchang an sawi vangin rilru fim a hmang thei lo aniang te an tia, an buai nuaih nuaih mai. Tunah pawh biak an tum char char a, phone a la duh tawh lo. Thil thlen dan an zawh lahin mumalin ka hre lo a ti tlat a, dawt a sawi chiang lutuk” a rawn ti leh duah.

Zam lutuk vangin kuttin ka seh neuh neuh a, midang ka ngaihtuah lo. Ka hming a lan ve mawlh ka hlau. Kutthlak hmasa ber tu ka nia, hnek ve buan buan lo mah ila ka bag in a hmaiah ka hem pawp tho a nih kha.

“Pawngsual vel chu eng nge awmzia?” ka ti leh sep a, ka rinlawk dan vel ni tho mahse mahni inhloh ţhak khawp a a awm tir thei kha mak ka ti.

“Ka hriat bik loh chu mawle. An sawi zuai a, an sawi chiang duh hleinem. Ka hriat zawng chu mi sawisak leh damdawi chungchangah thu an zawt fiah duh a tih a ni mai” a rawn ti hlak hlak a, keimah ang bawkin a hrechiang ve chak tih ka hre nghal. Rin zawn ngaihna lah ka hre der lo lehnghal.

“Jail a tang dawn tihna mi?” ka ti leh a, ka ngaihtuah zawng ringawt pawn ka rap.

“Tang lo ang. Tumah a that lo a, thi ţep khawpin a sawisa lo bawk a, nikhaw hre lo pawn awm se luhai vang te a ni thei a, damdawi a khawih miah lo lehnghal a, jail tan ngawt nachhan tur a awm lo” a ti tan tan. Cousin an ni bawk a, a ţan ve pang pang khawp mai.

Inbual phawt ka duh vangin kan inbiakna kan ti tawp leh rih a, ka hlim tur angin ka hlim thei lo. Penglengpunga vang vekin Nini-a chanchin pawh kan sawi hleithei lo. Mi’n sual an tih tawh sa nak laiin an hriat darh vaih chuan tlangval ho in Nu Rami dawrah a chanchin an sawi leh sep sep dawn ni mai. Amah lah hian a ngaipawimawh lo ve ropui si.

“Khaw nge ka tshirt pan hling hleng kha a awm? Aizawl kan awm hnu hian ka la hmu leh miah lo a, hak a nawm tehlul nen” ka pa in a tih chuar chuar lai chuan kan awm kim vek. Ka nu’n pudding a siam a, chaw ei dawhkan kil meuhin kan unau in kan ei.

“Au Mawimawiin kekawrte atan a ţhiannu a ţhui sak” ka nau chiah No-in a lo ti zeuh a, ka ngei tak tak a ni. Ka pa lah chu rang lutukin ka ţhutna lamah a rawn inher vut a, min melh leh khui tawh.

“Tu i ţhiannu nge kekawrte i lo ţhuisak? Thawmhnaw pawp tereuhte pawh chilh thiam lo hian kekawrte ţhui i thiam amaw?” a ti khui khui a, kawng dawm meuhin ka hmazawnah tak a ding luah tawh.

Ka nu lah chuan beidawn hmel deuhin a sam a lo hui a, min lo chhan ve ţhin tur hi nia, ka nau te lah hi duh aiin an ţawng thei mah mah tawh.

“Chhura-hema fanu Mengdere-i an tih ţhin kha” ka ti chhuak sep. Kawm a phal miah loh a ni lehnghal.

“Dere-i te chu nang aia u daih, nang aia nun uluk duh lo lehzual a nia, kawm suh ka tih ziah kha. Ngati nge kekawrte thleng thleng a i lo ţhui sak? Kan pem hma lawkin pasal a um nghe nghe kha. Ka vaw zawt zawk dawn che em mawn le?” thinrim deuh a a tih takah chuan zunchhuak si lovin ka ip nghal chawih.

“Ka ţhui sak lo bawk aw. Puanţhui ka thiam lo hrim hrim. Bial i fan laiin a rawn leng a, a period thut a nih kha” tiin insawithiam ka tum ve ţang ţang.

“Inu hrilh mai ta che. Ka kawr cheh chhiat a ngai em ni?” a la ti zel. A va hnial hrat ţawng ţawng tak aw.

“Bawihpuia a bual daih lawm. Kekawrte angin ka chep a, a kawngah ka suih beh sak ringawt a nih kha. Thil hrechiang lo hian min hau hrep zel suh” ka ti ve ta hlak hlak a, hmeichhe ţanpui ngai ka pui ve a ni mai ni.

“I â lutuk hi chuan a la ti damlo ang che. I khua a sik hluah hluah lo te hi a mak khawp mai” ban charh a a tih laiin “Nachhawkna chi hrang hrang a tam e. Lo sik ta tehreng pawh ni se ka ei mai dawn lawm” ka lo ti liam puat a, a harsa lo miau alawm.

“Pa te an chhang zuah zuah ngai lo. Ei thuai thuai la inu rawngbawl pui rawh” a tih hnuah na tawkin ka sam a tuai kher, ka chhip dawm vung vung chungin ka melh a, “Zawhna min zawt a nih kha. Ka chhan loh che leh min chhang rawh i tia, ka chhan che leh pa te an chhang ngai lo i ti leh a, ka nu in hah deuh a ei a siam sa te hi min ti ei tui lo vek zel” ka ti hlak hlak a, a lu che det det leh a hmui peh dan aţang chuan a thinrim leh tawh zia a hriat.

“I pawi khawih a nih hi nitin kan buaipui. Pawn lam a buaina i thlen loh leh inchhungah min ti buai tho a—” a tih lai chuan lo pawt chatin “Len chhuah de de ai chuan in chhungah zalen deuhin awm rawh u iti anih kha” ka lo ti leh hram.

“Tui a so tawh ang, va inbual tawh rawh” ka nu in a ti ta hlauh a, ka pa chuan engtinmah min ti zui bik lo.

Thinrim ţeuh chungin ka tho chhuak a, Noi ţhutna hnung a ka din vang vang hnuah “Ţawngthei zep zuap lutuk mai. I thawh at ţhin vang a ka buai theih tehreng nen” ka ti hlak a, a lu ah ka beng zui pawp.

Ben nawn leh tumna ka neih miah loh laiin “Apa ka hrilh dawn nia aw” a la ti ve kha kha a, unaute lehzel hek zawt zawt ching hi chu ka ngei zawng tak.

“I duh leh hrilh la, a inbual daih tawh. Zan a i thawh ât leh chuan pawnah ka chawi chhuak tawh ang che” ti a ka vau khar khar hnuah pindan lam a kal nghal mai ka tum a, mahse ka lungawi thei thlawt lo. Noi ţhutnaah bawk let lehin a bek sam tawn tawnah ka vuan a, chho zawngin ka pawt hrawk. Ka pa au in a ţe teng tung mai.

“LALNUNMAWI” ti vin ţhawt ri ka hriat takah chuan ka thlah vat a, towel veng chungin ka pa a rawn chhuak.

“Tv bulah khan che lo in ding char char rawh. Kalsawn rawh ka tih hma chu khawiah mah kal suh ang che” tv kawh vah pah hian a ti a, a vin khawp mai. Min en run reng vangin a kawhna lamah ka kal hna hna a, ka din fel hnuah inbual turin a lut leh mai. A pil rual chiahin Noi bawk chu ka pan leh a, a tukhumah na zetin ka nam pawp a, a pudding ei lai a tauh baw hial. A hawichhuah leh meuh chuan tv bulah ka ding leh daih tawh.

Zanah rin loh lutukin Nghaktei a rawn lang hlawl. Ka chhungte inkhawm turin an insiam vek tawh a, kei chuan dawhkanah lehkhabu ka lo chap darh niaih. Ka inkhawm peih lo in lehkhazir ka chhuan lam daih a, an awih ve tho.

“In va nalh hlawm em em ve” lai deuh chung hian a ti a, sawi tur dang a hre thlawt lo maw ni le?

“Lo leng rawh Nghakte, lehkha i rawn zir ve dawn em ni?” ka nu in a lo ti dam thlap a, Nghatei chuan lu a thing mat mat ta mai. Subject zawng zawng kan test vek dawn ka tia, amah vang a min man chhuah chuan a chak lo khawp ang.

“Ka chhungte tumah an awm lo a, in lo nghak rawh min ti bawk sia, midang in a awm chuan an thu ang a awm loh a nuam si lo a, keimahin ka awm hlau lutuk a, kan in a lehkha lo zir in phal em?” a rawn ti deuh duah.

“A rawn haw tlai thei lutuk a, chhuah kan phal tawh meuh lo a, kan inah hian zir mai ula” ka pa’n a lo ti dam ve thlup.

“Rawn zir chu ka duh a, mahse ka chhungte thil ţul ah an chhuak leh thut sia, ka rawn sawm tawp. Zanin chauh chu phal mai ula” ngen ngawl tak hian a ti a, mitmeng ti khawngaihthlak chawpin ka pa a en dauh dauh mai.

“Nih leh i chhungte rawn haw veleh lo haw rawh se aw. I rawn thlah leh thlap dawn nia” ka pa hmanhmawh tawh bawk si chuan a ti ta nge nge a, hmanhmawh lo se chu zawhna a zawt chiam chiam ang a, a tawpah a rem ti lo daih mai ang.

“Awle ka lawm lutuk a nia aw pu” zangkhai vah a Nghaktein a tih laiin lehkhabu ka lo khup ve sawk sawk.

“Tikhan kal ula kawngkhar hi chu i nu in lo kalh mai rawh se” tih leh chhuah a rual a, phur thak ka kai chhuak lehnghal vek tawh. Phur tak ka ni ringawt.

Nghaktei nen inkai rialin kan chhuak a, lehkhabu zawng zawng ken vek a ngai sia, bag tè khai lovin school bag ka ak law law.

A sawi ang tak takin tumah an lo awm lo va, muangchang lovin a pindanah lamah kan kal tlang. Kan lut nghal mai dawn maw ka tih laiin a pindan a kal pel leh ang lawi a, Nghaktei awmna te in hi a pui ka tih tawh kha. Inchungah pawh hian ţhutkhawmna pindan ang kha a awm tho a, inhnuai ang emin zau lo mahse inkawm mai mai nan chuan nuam tak a ni tho. A bul velah chuan a chei nan pangpar pot pali vel a inhung ve a, mahse helai hmunah hi chuan kan awm ngai meuh lo. Pindanah kan inkhung tlawk tlawk zel. Chulai ţhutkhawmna thlen hma a pindan pakhat kawngkhar a hawng a, a bih vang vang hnuah ipik hmel lutukin a thaw chhuak halh.

“Eng nge i hmuh a?” ti a zawh leh kawngkhar hawn zau ka rual a, mipa pindan tih a hriat ngei mai.

A bang leh chhuat vel, khum thlengin rawng dum lam vek a nih laiin parda velah rawng lar vek an hmang thung a, chhuar nalh deuh pakhatah batman leh superman tih vel, super hero kan tih mai ang ho kha, khang ho lem kha fel fai deuhin a inrem thla khat vek a, khum lu lam bang a eng eng emaw dahna tur an dawh chung zawkah helmet pathum a intlar ţhap a, a hnuaiah chhungkaw thlalak ni awm tak frame thlapin a dah thung. Ka sawichhuah bak pawh a la tam. Mipa pindan a ni tih hriat tho siin inrem thlupin an chei a, pindan neitu tur awm ka ngaihtuah kual lai mekin “Penglengpunga pindan a nih hi” Nghaktein a rawn ti chhuak hap a, ka hawi kual leh thuak. Pindan chhung fel thup leh a mizia hi a inhmeh mawlh lo a ni.

“Ti nge a pindanah min hruai daih? A lo haw lai a kan lo awm chuan a ti thinrim khawp ang aw” ka lo ti ve bawk.

“Tunah hruai turin an kal mek. An vaiin an kal vek. Kan cousin police ka tih ţhin U Joseph-a kha a tel bawk a, rawn haw tir leh lovin an man daih ang tih ka hlau. Nizan kha chuan a pindanah hian thlamuang deuhin a mu awm sia” a ti chuai raih a, over lutuk hian a.

“Tihsual a neih loh miau chuan a lo haw veleh mai ang chu. Khatiang khan awm vel lo teh, i ti mah mah zel” tih fak fak pahin ka kuai her a, a pindan ka panpui lai mekin “U DIDIKI VANG A NI LO” ti a ring zet a mipa au ţhawt ri kan hria a, na tak a kawngka khar riin a zui a, kan ke pen a tawp chiang hle.

In hnuai aţanga rawn ri chhuak a nih miau vangin tlem kan kal phei leh a, an lan theih veleh inthurual ang hrimin chhuatah kan ţhu nghal rawp rawp. Tlak dal an dah rinchhanin kan ţhu a, a karah kan dak zui de de. Kan lu a len miau loh vangin nasa deuhin kan dakchhuak thei lo thung.

“Didiki vang a nih loh chuan engvang a buai vak nge i nih? I sawisak nachhan an sawi kha ho te a nih laiin i thinrimna a chawk chhuak thei tho a, eng nge i thinrim hluai chhan?” a pa in thinrim zetin a ti ve khur khur a, a duat zia ka hre ve a, chutianga thinrim a a ti chu mak ka ti ve kher mai.

“I rawn leng tih an hre lo aniang” Nghaktein a lo ti ve sep a, ka melh zawk a, hnuai lam bawk ka en chhunzawm leh.

Fredy chu police form ha pakhat nen an ding dun a, an cousin an tih chu a nih ka ring. A pa nen an in hmachhawn ran a, kan awmna aţanga hmuh rem deuhah kher an awm bawk a, chiang deuhin kan hmu vek thei.

“Bike ka ruk sak” Fredy chuan a ti chhuak hulh a, phawk hra hlawm mahse a pa chuan “Ruk i ruk loh nan i duh zawng zawng ka tih sak vek che. Didiki i hmuh phak a a awm chhung chu i pangai thei lovang. Kha thil kha i hrechhuak leh ţhin ang a, a nghawng reng ang che. Kan in hi chhuah san mai rawh se” a ti ta khawl mai.

Hrilhhai deuhin Nghaktei ka melh a, ka ngaihtuahna hria ni awm takin “Inhnuai a awm te khu an nia, Fredy-a u, U Kimkimi ţhiannu a nia, an unau in inhnuai khu an luah a” a lo ti ser ser. Ka hriat duh a la sawi kim chuang lo. Fredy te buaina a Didiki an tih hming lo lang ve chu ka hrethiam lo.

“Lalrindiki vang a nihna chhe te mah a awm lo. Ka awm chhung chu i chhuah tir lo ang” Fredy chuan a ti chang bal a, Nu Mahruaii mangang hmel chu a khawngaihthlak zawk.

“Didiki thil tawn zul zui deuh a miin thil an sawi apianga chhia leh ţha hriatna i hloh ţhak zel ai chuan an chhuah a ţha zawk” a pa chuan a lo ti leh hmak.

“Khaw nge an awm ang? An unau lek khuan khaw nge awm se i tih?” a pa awm hnaih thuak chung hian a ti vin leh tuar a, a au a ni mah tawh zawk. Police pa khan lo dang lo se chu a pa a hnaih chilh rum rum maithei.

“Mi hausa fa an nih ve loh khu. Keimah vangin hmeichhe pahnih hnawh chhuah i tum maw?” a pa thil tum awih loh hmel zet hian a ti leh a, a aw ki a san tawh lo.

A pa in a chhan hma in Shin Air-i leh hmeichhe pakhat sam tawi dawr a ka hmuh nu kha an rawn inzui lut a, an inhnuai luah tu a ni tih ka hriat miau tawh vangin ka lo hlauthawng ve em em ringawt.

“Ti nge Lalrinhlui kha i rawn hruai?” Fredy bawk chuan a lo ti leh a, Shin Air-i a ngawih reng laiin a pa in “Ka koh tir a nih kha” a lo chang ve bal mai.

“Tei vet che hian. Eng thil mah i ti lo ang” ti a bung zet a a pa a chhan hnuah “Lalrinhlu zu haw rawh” tiin thu a pe zui zat.

Che miah lo va Rinhlui ding tlawk tlawk reng chu a mitmeng rum ul a a melh run run hnuah a pan hnai a, dim te a kuai herin kawngkhar lamah na vak lo in a nam a, chu nu lah chuan pen thum vel bak a pen lo a ding leh daih.

“I ţhatna tur a ka thil tih tum hi dodal hlek suh. Didiki pawngsual a lo nih tawhna in a la nghawng nat che avangin tuat i that ţhelh a nih kha” Fredy-a pa, Pu Buatsaiha chuan a ti chhuak ta rawih mai. Ka thu hriat mak ka ti lutuk chuan kâ ka hup a, chutiang bawkin Nghaktei pawh. Mak ti viau mah ila min rawn hmuh mai loh nan thawm kan chhuah ngam lo.

“A nih loh thu vawi engzat nge sawi ngai dawn? Chungte chu ngati nge i lo la hriat sak reng? A nau hmaah i sawi chhuak lehnghal a, fanu pahnih i neih ve hi. Pawngsual tawk ve thei lo ah i ngai a mi? Hrehawm an tih loh nan leh an him tawh tih an hriat theih nan thlamuan la, hum tlat zawk ta che. Tunah tak hi chuan i tih pun lun sak mai mai a ni. Nangmah ang chiah nih ka chak theih nen” aw thuk raih a a tih hnuah za lo zetin a nui ro hak.

“Ka awm chhung chu an unau hian kan hnenah an awm ang” a ti khauh bur tawh a, Rinhlui rilru nat hmel zet a lo ding ve reng chu ka khawngaih takzet.

“A theih loh. Rilru ka siam fel tawh” a pa in a lo ti nghet ve charh. An luhlul dun hle mai.

A pa chu a chhang let leh dawn emaw tih laiin “Rawn kal rawh” tih leh Rinhlui kaih a rual a, inchung pan na kai lawn a a rawn chhoh pui takah chuan kan in sa seng vat.

“Lalrintluang” ti a a pa in a ko tuar ri te pawh kan la hre pha vek a, ngaipawimawh lovin penglengpunga chuan inchung lam a pan ding ngur tho.

A hma lawk a ka lo sawi tawh ţhut khawmna ve deuh an siam lamah khan a kal phei pui pawk pawk a, an thlen hma chu a vawnna a thlah miah lo. Pindanah lut hman mah ila kawngkhar phen aţangin kan bih a, min kal pel lai takngial pawhin min hmu lo.

An thusawi a mak angreng sia, hriat chian chakin an kalna lamah chuan kan kal ve a, bang phen a biru chungin kan bih leh de de. Inhma tawnin an ding a, an sir lam chiah kan hmu thei.

“Ka pa chu ni lo se ka hnek ang” rum ul hian a ti chhuak hulh a, a hmel hmu chiang lo mah ila a tih tak zia a hriat.

“Ipa thusawi kha a dik ve tho a” Rinhluin a tih chuan “Sawi tawh suh” lo ti hlukin a rum zui nghut.

“I ţhatna tur an duh a, ka u vangin a chhe ber i thleng ang tih an hlau a nih kha” chu nu bawk chuan ti leh mahse “I u vang a ni lo. Hmeichhe zah nachang hria se ka duh vang zawk” tak run hian a lo ti leh a, mahse zep a neih ka ring ve tlat. A pa sawi ang khan eng emaw amah nghawng nasa deuh thei tu a awm a nih ka ring.

“Ka u vang a ni lo tak tak a nih chuan a lawmawm. Ipa in a duat tehreng che nen ngati nge a do zawng a i awm? Ipa angin engmah kan tihsak ve thei lo che a, ti nge kan unau vang mai mai a ipa i tih thinrim?” a ti mawlh mawlh a, a lung a chhia tih pawh ka hre ve thiam.

“Hlawh beiseiin ka hum hleinem cheu. Keimah lo pawh ngaihtuah tu in nei tho a, bakah in dang in zawn chuan min ti buai sek dawn a, ka phur kual reng peih hleinem cheu” fiamthu deuh hian a ti leh daih. A thinrim viau maw ka tia.

“I chhe lutuk aw, mahse i pa khan min chhuah tir tho a tum hmel sia, engtia tih nge i tum?” a lo ti leh khauh.

Hmui hnuai pet zeuh a a en run run hnuah vanvadakin ipik hmel zet hian a thaw chhuak hawlh a, “In luah tur dang min zawn pui mai rawh” Rinhlui bawk chuan a lo ti leh.

“Min nei mai rawh” penglengpunga chuan a ti chhuak thawr mai. Nghaktei kâ aţanga thawm sin lutuk a chhuah rêt rêt rualin min sik vawt vawt a, ka au chhuak ţhelh nghe nghe. Thawm chhuah lo turin zaizirin ka hrilh a, bu nghat nghat mahse ka thla a ngam zan thei tawh lo.

“I mawl em ni? Tih ngaihna dang hlawl i hriat loh chuan kan chhuak mai ang. U Kimkimi te pawn min ngaihtuah thei tho ang. In ngaizawng miah lo an innei tawp ngai em ni? Bakah nupui pawh nei la i ar an lal zawk dawn tho tho. I nupui i ngaihsak tak tak chuang lo ang” chunu chuan a ti hlak hlak a, inchung lam boruak chu rin aiin a ho daih. Ngaihthlak tlak a awm vak lo.

“Ka duh bik hleinem che. A lem lemin kan innei ang a, chhuatah i mu ang. Ka ţhen vat che nga, ex monu inih chuan a hnawt chhuak thei lo ang che” a ti nih chu. Penglengpunga nge nge, hmeichhe bul a sawi awm leh awm loh pawh a hre lo. Inneihna lah a ngai ho ropui mai bawk sia, a awmzia a hre lo veleh chhawng a nih hmel.

“Min tih nuih i tumna a nih chuan ka nuih a za miah lo a nia, ipa hi chuan a tum tawh chu a tum tlat zel sia, in luah tur dang a awm mai ang” Rinhlui zawk chuan a ti leh nang nang a, “Hmun dang a in awm chuan luah man chawi a ngai dawn. In chhuak lo ang, hahdam deuhin awm rawh. Ka lo sawi sawipui leh ang” nghet charh hian a ti a, a tum ruh ve hmel nasa mai. Nih chuan inneih chungchang kha chu an fiamthu mai mai a nih dawn kha. He mi te ţhian dun hi an dangdai riau.

“Pawngsual chungchang kha chu ka u hnenah ka sawi chhuak lo ang. Tun thlengin a ni pawh a la nghawng reng dawn a, tun a ka sawi hi a tawpna a ni ang. Nangpawh, a ţhawng che a tun thleng a a la nghawng che a nih pawn lan chhuah tir tawh suh. Ţhian kan nih ang a min ngaihtuah tak tak a nih chuan i thinrim thunun la, kan unau kaih hnawih thei thil engmah ti tawh suh” a ti ngauh nghauh a, ka unaute pawngsual ve se chu jail ah ka lut ru ang a, pawngsual tu kha a sazu ka hleh sak ang.

“Nang pawh chu nge maw i sawi sek le? I u vang a nih loh zia ka sawi chiang thawkhat tawh chuan ka hria, tawk tawh rawh se” thupe aw zet hian a ti a, a sawi zawm ta bik lo.

“Min ţhawng lutuk a ka hah vekin ka hria. I pa i hneh theih loh phei chuan kan insawn chhuah ngei ngei a ngai ang a, in nghet ang chiah a kan lo neih tawh vangin kan bet ve lak lawh tawh a, chhuah san a har ngawt ang. Ka nu leh pa te hrilhfiah dan tur a vang dawn bawk si. Didiki ngei hnenah pawh eng tin nge ka sawi fiah ang. Ipa te thinrim zual hma a haw thlak vat ka duh mahse inhnuai chhuk ka ngam rih si lo a” ti chuai raihin sofa ah a ţhu thla hnawk a, a awmdan chu over ka ti miah lo. Ka hriatthiam pui lutuk tlat.

“Chhuak lo turah in dah rawh. Vawikhat tal min ring ve em em teh” a ti hluk a, keimahni hnung chhawn zawngin sofa ah bawk a ţhu ve ta daih.

“Penglengpingi leh Nghak hir ha-i te kha, lo ţhu hahdam ve lawk teh u. Kha ti ţeng ţung kha chuan in inherh mai ang” ring leng lawngin a rawn ti a nih chu.

Nghaktei nen chuan ‘min hmu ru vek’ tih melhin kan inmelh a, kan din dan lah a sawi ang tak takin a kawi sawi. Chung zawkah nghaktei a awmna, a hnuaiah kei ka awm thung. Kan taksa thukru vek siin lu kan dah lawr a, herh deuhin kan ding.

“In ţhian dun khan Rinhlui hi zu thlah nghe nghe teh u” a la ti zui!

(Ti chin hi aw…ka lu na lutuk a, tih luih a har emai. In ngaihdan te comment ve thliah thliah ula aw🥰)

CONT…

2
0

Leave a Reply