You are currently viewing TROUBLEMAKERS-9

TROUBLEMAKERS-9

Spread the love

TROUBLEMAKERS-9

Nghaktei nen rang lutukin pindanah kan tlan lut a, a ţhiannu Rinhlui zak hmel kha ka hmu hman hram.

“Teuh ther ther ve” awm dawm vang vang chung hian Nghaktei chuan a rawn ti chhuak hap a, “U Didiki an pawngsual tawh tih ka hre chiah” a ti zui leh.

Khumah kan bawk dun thlawp a, kan sawi zui nasa mai.
“Pa Buatsaiha kha a ti mah mah ka ti. Pawngsual tawk zawk lehnghal han hnawh chhuah tawp mai chu. Mahse penglengpunga khan a ti ve tak tak niin ka hria” a ti charh charh a, ka lo pawm pui khawp mai. A pa a hnial lai ang reng a a thu tak lai kha ka la hmu lo.

“Rinhlui a chhan dam em em kha, a bialnu a ni pawh ti se ka awih hrim hrim” uar zet a ka lo tih ve chuan “Chu chu lawm” tih hluai pahin ka hnung a beng chawrh.

“Min nei rawh a tih pawn ka lo chik ret ret kha. Ka duhpui nghal thlap, an inhmeh ka ti. Penglengpunga a lian ropui sia, Rinhlui lah a te ve bawk sia, an in mil thlap” phur fe hian a tih zawm leh a, “Nia mahse penglengpunga chuan bialnu a neih kha. A lerh ve phian ang a” ka lo ti ve thung.

“A mawl viau na a duh tu a ngah ve nia aw. Ka u mah ni se a hmelchhe hran lo a, hmeichhia zawkin rawn rim chang te an nei. A len san daih zel” ti a min hrilh chuan ka lo nui hak. A inhmeh emai a.
“U Tetea nen hian an inang lo ve e” a ti leh nang nang a, “Tu nge U Tetea chu?” tiin ka lo zawt thuai.

“Penglengpunga u u leh a nia, a phung lung ve lo. U Kimkimi, kha U Didiki ţhiannu ber ka tih kha maw, penglengpunga u chiah a nia, U Tetea leh U Kimkimi zia hi a in ang a, an zawi awi. U Tetea phei chu a ţawng tlem a, min duat rapthlak. Ka rawn thlen hlim pawh khan min rawn video call nghal a” a ti siam siam a, a intithei viau niin ka hria.

“Kimkimi itih chu ka hmu tawh hrim hrim. Ar ka lei dawn a hmeichhe pakhat ka hmuh ve kha niang. Nau kum1 mi vel tur la te deuh mai a pua a, Nu Mahruaii au riin a ti ţap” ka tih chuan a lo bu nghat nghat.

“A nih dawn chu fanu a nei a, kum1 a pel tawh lawm. A te chi a nia, U Tetea pawh a lo haw ţep tawh ang, lo haw tawh se ka ti nia aw, penglengpunga hi a fel phah deuh ang” a ti leh niah niah.

“Khaw nge a awm a?” ka lo ti ha a, “Chennai ah. IPS a inziah tlin hnu ah a training leh a, a lo haw thei ţep tawh ang. An training hun chhung ka hre lo a” a ti nawn leh.

“Penglengpunga nen an inang em?” ka tih leh chuan “Teuh nang” ner nawk chung hian a ti a, “Engkimah an danglam vek. Penglengpunga aiin a lian zawk” a tih chuan “Khai a” ka lo ti chhuak hluai.
“6ft a nih loh paw’n a pel ang. Bakah U Tetea chu penglengpunga aiin a hang zawk a, min duat fe zawk bawk. U Kimkimi nen in anna an ngah ber” a ti a, a sawi tui khawp mai. Penglengpunga pawh sang ka tih tawh tehreng nen. A bialnu chuan a lawn chilh rap a ngai reng dawn sia, te ve deuh pawh ni se thing kung lawn a hneh sawh phah viau ang.

(Through thick and thin a Tetea duh tu te tan ka zep zuai aw. A story ziah kan la tum sia in lo theihnghilh hman palh ang e😊😊)

Boruak a reh zui diak a, ka haw thlengin an inhau zawm tawh lo. Penglengpunga ka hmu tawh lo bawk a, a leng leh daih tawh niang.

Dar9 vel a ka haw chu ka pa’n “A ţha tun ang hian rawn haw hma ziah rawh” a lo ti nghal pang.

“Nih chuan len ziah i phal tihna mi?” tiin beiseina sang tak nei chungin ka zawt.

“Phal awkawng lo. Zan a hmeichhia chhuah thla zen a ţha lo. Mi pawn mak an ti mai ang che” ke hmawr phut hlarh hlarh pah hian a ti a, ka pa hi chu a boring ve chiang e.

“Tunlai mi chu an rilru a zau tawh lutuk. Zan ah chhuak lo ula ka nu pawh i nei thei ang” a ţhutna ep chiah a ţhut thlak pah in ka lo ti ve zat.

“I nu a chhuak ngai lo. Ka rim alawm mawle. Veng chhung nula fel a sawi alawm a nih i nu te chu” a ti a, min zilh nan a hmang ve ziah lehnghal.

“Mipa in min rim i phal chuang si lo va” ka tih chuan “Rim rual la ni hek lo che” a lo ti a, sawi tur a hre thei ropui si.

“Hmangaihna in kum a thliar hleinem” ka tih chuan a ţhu ngil auh. Che rang vet vet tak a ni.

“I va zak lo zit zet e aw. Tun a i thil sawi ang kha tuman an pa te bulah an sawi ngam lo vang. Mi tih thinrim kher hi tum ziah suh” a ti leh kha kha tawh.

“Ka uang a nih kha. Hmangaihna awmzia hrethiam rual ka la ni lo reng reng. Hmangaihna lem ka ziak thiam a ni mai. Mahse pa ka fail pawn min hauh dawn loh kha aw” a ţhutna lam a kun phei deuh chung hian ka ti a, a hma zanah kan sawi lawk vek tawh.

“Fail lo la a ni mai. Lehkha i thiam loh chuan kumkhaw retheih a ni mai. Thil dang thiam i nei si lo, kawr ka fit sak ang che i tih ve lah a nghawng i lo chilh phui vek a, thawmhnaw pawp pawh i chilh dik thiam lo. I nu la phiar sa chhunzawm sak i tum ve lahin phelh theih loh lekin a insuih nghet a, Pi Lali puan tah lai lah tah chhunzawm tlak lohin i siam a, i zai ve lahin kan beidawng ngawih ngawih a, i han lam ve lahin i kawchhungah eng rau ber nge awm tih inrinsiak a ngai a, thil hrang hrang i ti lawr hnem ve tawh viau. Chuvang chuan lehkha tal hi chu ţha deuhin zir teh. I nawmsak theihna tur kawng awm chhun a nih hi” a ti charh charh a, ka ţhatna lai a hmu thei miah lo ţhin hi ka haw ber zel.

“Thiam ka ngah ve tho emai a” ka lo ti hlak.

“Umh..a dik ang. Buaina thlen i thiam a, thla khat pawh i hman tlin hmain i lehkhabu tlang a pawrh turh vek zel a, pheikhawk bun chhiat theih loh i nei miah lo te hi i special na lai a nia, mi faten kum khat an bun tlin theih te pawh thla thum lek chhungin i bun chhe ngei ngei. A kau loh leh a hnuai a phel a, mawza bun chhiat lah i hneh sawh. Mi bawng vulh lai i ru thiam a, gate lawn liam i hneh sawh em em bawk a, dam loh der ah lah tu ma tluk loh i ni. Ţawng theih lamah ni se chawimawina hlan tlak khawp i nia, zan thim lah i ngam nasa. Thlahrang hian an hlau zawk hial che in nia ka rin ni. Kan awmna hmasa ah lah khaw khat ţawng thei a an sawi, tuman hnial en a an en loh i hnial dang ţhak a, ropui riap riap tak a ni. Zing thawh peih loh vangin sana battery thar hlak a chhia i khawl lai nen te i thlak thleng a, battery chhia i khawl zel mai te kha kan nuih liam mai mai laiin hman ţangkaina tur phet i lo zawng a, eng eng emaw ah hi chuan rilru i nei ve” inthen hliau hliau chung a a tih dap dap hnuah hmuh thiang lo hmu ang maiin min en.

“Ka ţhat lohna sawi nuam i ti ve hrim hrim. Sual sa a piang ka nia, fel tum a ka inzir ve zel rualin ka pianpui sual hian hna a thawk ve zeuh zeuh a ni mai lawm” ka niah niah.

“Zan khua a min hnial na tur i hre dawn tho tho. Va mu phawt teh” ban charh hian a ti a, a ni pawn a hre ve dawn tho sia.

Ka kal vek tawh hnuah “Inu pudding siam kha a la awm a, ila ei duh chuan va ei leh lawk la” a ti leh ang lawi a.

“Ka ei peih tawh lo. Zan a thil ei chu thau na. Tui pawh ka in ngam lo” tih leh inher ka rual a, ka pa nui ri ka hre pha reng. Ka chhuahchhal buai peih tawh lo.

Chawlhni nilengin ka pa’n lehchhuah a phal lo ţhak a, zanah pawh inkhawm ban veleh chhungkua in tv kan en. Len chhuah chu sawi pawh ka sawi ngam lo. Kan ţhut ţhap laiin kan kawt ah thawm a awm a, ngaihsak vak lo mah ila a rin tak viau hnu leh inti buai thawm ni ngei a a lan vangin ka pa nen rang lutukin kan tlan chhuak. Kan inhungna gate tereuh te kan su hawng lawp a, ka pa tlan muang lutuk te chu ngaithei lovin a hnungah ka nam dawr dawr.
“Mi nam mi nam suh” a ti khur khur reng lenghal.

Kan inkawtah an lo in ti buai ngei a, an tam tham viau nghe nghe. Khaw lai a eng in chhi a awm vung vangin an hmel kan hmu chiang thei nghal hle. Tu nge a nih in hriat sa vek ka ring. Kan penglengpunga bawk mawle. A ţhianten an lo chelh bet chung pawhin a la tal fat fat reng a, leiah mi pakhat a let zawi hniang.

“Kha eng nge in tih laih laih?” ka pa meuhin a tih pawn an ngaih ven lo. A kut pahnih chet bet tlat mahse a sawi sak pa zawi tawh tak chung a tho hram hram chu a tlawh leh hram a, chelh hneh viau lo se chu a tal chhuak ang a, a sawisa leh ngei ngei ang.

Mi an lo thlen belh a, tlangval hawk lak hlir an nih hmel. Penglengpunga te ţhian ho an bawr luih luih a, an lo inveng ve nasa a, an inphek sual luih luih mai. Ka pa in ţhelh a tum viau na a ka lo man bet ţung mai. Anni angin a intha zo ve si lo va, ţhelh tum tu ber hi a na ber ang tih a hlauhawm.

Khawtlang hruai tu te an lo thleng a, an pawt hrang thei hram. Ka pa hnen a thupha an chawi daih chuan ka hrethiam lo viau. Kan inkawt chiah a ni bawk a an vaiin kan inah an ko lut a, an ţhu khat hmur mai. In leng dang ang an nih miau loh vangin ka nu nen thingpui kan lum lo.

Tupawn penglengpunga an mawh puh vek a, a chhan an zawh ve lahin engmah a sawi duh lo. Kan in a ni tih hrereng siin min en lo va, a ngawi ngal a, a ngeng khawp mai. A mit bul vel duk chur mahse a rui tih ka la hre thei tho. A meng dul raih a, mak tak maiin mawi ka ti tlat. Eng emaw ka hriat ni? Penglengpunga mai mai ka rilru ka lak pen tir dawn lo reng reng.

An fapa duat lai a ni bawk a, a pa an biak pawh theih hnuah an nupa in an rawn lang thuai. An intih buai chhan an zawt ve ngial na a a ngawi ngul tho. A sawi sak pa ka en chiang a, damdawi chicks zing a mi ngei kha a ni. A insawi thiam zuah zuah lehnghal. Penglengpunga a hek zawt zawt lai te chuan ngawi rengin a lo ngaithla a, kut a hum ruh nasa hle tih erawh ka hria, ka mit ngeiin ka hmu ve tlat. Pastor quarter a nih vangin thinrim viau mahse a insum ni berin ka hria.

“Kan haw pui thei mai a ngem? Damdawi chungchangah kha chuan a fihlim a, eng ang pawn hek mahse a fihlim tih ka hria” Nu Mahruaii chuan mangang tak hian a ti a, penglengpunga darah a vuan pah ţung mai. Pakhatin a hek mawlh mawlh lai te chuan a dar a vawn sakna kut chu a ti che leh ţhin a, beng daih a tum ni maiin ka hria.

“Awle midang hi thuzawh fiah turin kan kawl ang a, a ţul leh police kan pun mai ang. Fredy chu lo va haw pui ru, a ţhian te nen hian” khawtlang hruai tu te zing a pakhatin a tih lai chuan ei loh hmel zetin an lo ner nang hlawm. A fihlim bik zel ti a an lo sawi tawh te kha ka hrechhuak leh rum rum.

“Kal ang le Bawiha” a nu in a tih veleh a tho vut a, a chhuak nghal nul nul. A pa, pu Buatsaiha chuan thupha a chawi ve luam a, amah chiah a kal tir ringawt chu an ngaihtuah a niang an zui chhuak ve thuai. Penglengpunga ţhiante chuan an ţhianpa a sawisak vang a rawn ti buai ringawt an nih thu sawiin ţan an khawh ve tlat a, damdawi case vang a vuak tuar fo tawh na na na chu awm hnu fualah an ţang.

Khaw tlang hruai tu te chuan ka pa hnenah thil awmzia an hrilh malh malh a, penglengpunga chanchin erawh an sawi kai lo. Kan in aţanga an hruai chhuah dial hnu chuan ka nu a thaw huaiin ka hria.

“Pu Buatsaiha te inah sawn vawikhat chu ka kal ve tawh a, kan kohhran mi an nih miau vangin kal zeuh zeuh a ngai dawn bawk a, an fapa saw a fel viauin ka hre sia, intih buai naah a lo tel ve ţhin a ni maw? Nang i kal ngun deuh a” ka pa in ka nu hnen a a tih chuan a ngaihna hre lovin ka hawi ka hawi ringawt. Ka hriat laiin vawikhatmah an la kal lo.

“Pangpar en a ka kal bak ka kal ngai lo. Ka awm rei ngai lo va, ka duh zawng ka la lawk a, ka haw leh thuai zel. Vawikhat pangpar ka lak dawnin a class kal tur nen kan inhmu a, inbe ve luam mah ila a mizia tak tak ka hrechiang bik lo” ka nu’n a lo ti ve duah.

“Ka kal ni khan a nu’n pangpar a thiar tir a, a nu sawi ang khan a ti ve pur pur a, tlangval si a va fel e ka lo ti hman a sin. A khawlai mi ve tih reng reng ka hre lo” ka pa chuan a ti leh mual mual a, ka nu a ngawih tak vangin an sawi zawm tawh lo.

Mut hmunah ka phak tawk tawkin ka ngaihtuah chhunzawm ve melh melh a, a sual tih chu khawtlangin an hria, mahse a thiamna sawi ve zawt zawt chi a ni lo in ka hria. A nihna angin a lang tawp a, thil tak tak hre tur chuan a hmun a awm a ngai a, amah belh chian a ngai ni te’n ka hria a, zawh thawr ringawt chuan zawh chhuah a har hmel ka ti.

Nghaktei biak tumin phone ka phawrh a, Ronnie message a lo awm vang.
“Mu tawh em?” tih chiah rawn thawn mahse in ngaihzawn bul ţan nan a an inthawn ţhin tlangpui a ni tih ka hriat vangin ka hlim phah awr awr lutuk ringawt. Ke leng meuhin khumah ka tal huat huat a, ka chîk ka chîk mai.

“Kan setana pangang chu, kha i vun a in lip dawn mi?” ka pa in a rawn tih takah chuan ka tawp chawt. Zan dang ang bawkin ţawngţaina a nei leh a, kan unau hming lam bawkin a ţawngţai leh.

A chhuah hnuah [Mu chiah] tih zawng ka thawn let ve a, a va nuam mai mai tak. A nuam chem chem a ni ringawt.

[Nimin khan i van chhe lo] tih hi a rawn thawn leh a, nimin a tih chu hospital a kan inhmuh ţum kha tihna. Mitmei veng lek lo a au chhuah vak vak ka va chak tak.

[Sava chaw zawng lai ka nia, ka chhe lo ve bawk ang chu] tiin in la zei fahranin ka chhang let a, rei vak lo hnuah Nini-a message a rawn thleng leh nghal.

[Sava thlawk lai an ti ţhin] a rawn ti a, ka hre ţhelh ve viau chuan ka hria. Ka zak ve chem chem thei nia.

[Nia, sava thlawk lai ka nia] ka ti leh hnu hnawh. Mittui tla pur a nui lai lem emoji a rawn thawntuar a, chhan let ngaihna ka hriat loh laiin [Ka ngaihtuah reng che. I dangdai ka ti] a rawn ti leh. Min hmu kher lo mahse ka laih nasat zia chu. Ka biang a sa hat hat a, ka puan sin a pan tehreng nen lum ka ti thar riau.

[Engti zawng a dangdaiin?] ka va ti leh a, a reh vang vang hnuah [I danglam] tih ringawt a rawn thawn. Dangdai leh danglam tih te chuan in anna an nei tih ka hre ve bawk. A chhan zawt na na na a ngai bawkin min rawn chhang. Mawl teh tuh lutuk.

[Ka danglam bik chhan ka zawt reng che lawm] ti a ka thawn let rualin meikhu hnar khu chhuah emoji ka thawn tel.

[Ka hmeichhe hriat tawh ah ila danglam ber] a rawn ti leh. Ka thinrim tawh zawk. Phone ka dah tau nghawng a, a nghawr rualin ka en leh vat tho sia.
[I mizia a danglam. Min hip riau] tih hi a rawn thawn leh a, thli thaw miah lo chungin ka thinrimna zawng zawng thlipui nasa lutukin a chhem kiang duak. Mahse hmeichhe easy deuh nih ka duh lo. Min ngaihnep loh nan a induh a ngai tlat.
[Muttui] tiin ka chhang daih. Min ngaisang sawt zawk ang. Min reply tawh lo va, mahse ka induh na na na chuan min ngai dawn tih ka hria.

Lukham bul a ka phone nghawr leh det chu Ronni, Nini ngei mai a nih ringin ka en leh vat a, whatsapp ah engmah ka dawng lo. Number hlang hian message chu a rawn thawn ngei a, whatsapp a ni lo thung.

[Muhil rawh lulian] tih zawng a lo ni. Nini-a message nen a inthlau hle mai. Min rawn thawn tu tur awm ang rin ngaihna ka hre lo hrim hrim. Min rawn bawl tum mai mai a nih ringin ‘min bawl tum tu’ tiin ka save a, min rawn biak leh pawh a ka hriat chat theih nan.

Zing ka harh rualin ka phone ka en nghal a, eng message mah a awm lo. Ka hip riau te chuan thawh veleh a chhiar tur min hnut chhiah awm tak a nia. Ronnie message tello chuan ka phone chu saruak ang mai a ni.

Phone ka en deuh reng a, ka pa paw’n “I phone ah khan eng thil thar nge awm?” tiin min zawt hial.

“Theme thar nalh deuh ka hmang a, zawhte cute deuh a nia” tiin chhuanlam ka siam a, “En en suh a ning ang che” a lo ti hluk. Khatiang tak a min rawn biak tawh che chuan midangin min neih daih hlau a a rawn chhunzawm mai ka ring a, nghakhlel viau mah ila mipa be hmasa tu zawk nih ka tum bau lo.

In aţanga ka chhuak chiah chu kan kawtah Nini a lo awm reng mai. Bike a ţhu run chung hian min lo nghak a, ka thawm a hriat veleh ka lam hawiin a nui suk.

“Kal ila” a ti nghal tawng a, Nghaktei lahin an kawt a min nghah tawh thu in ka chhuahsan hma lawk khan min hrilh a, Nini-a bike ah ka chuang chak tho bawk si.

“Ka ţhiannu’n min nghak a” zawi sep hian ka ti a, a bul hnai ka thleng tawh bawk a a hre pha tho ang.

“School kawng a hria em?” ti a min zawh chuan ka lo bu nghat.
“Nih chuan chuang rawh” a ti bul hmuk a, min duhpui tho a a thinrim em lo ang chu maw.

Bet lo deuhin Nini-a hnungah ka bet ta vung mai. Bike a ti nung chiah tih ah a dar a vuanin mawng ka kan leh uaih a “Naa..ka rilru a nuam thei thlawt lo ka chhuk leh si mai ang” ka ti leh hnuhnawh.

Ka thusawi chu hre der hmiahin a tawlh hret hret a, “I tla nge” ka lam a rawn thle deuh chung a a tih hnuah a hma aia chak deuhin a tlan leh a, ka ţhu ţha leh tawp. Nghaktei pawn min dem thei lo, chhuk ka tum ve tho a, bike tlan lai em a zuan thlak ka ngam si lo. Duhthlanna ka neih loh vang zawk a ni.

Nghaktei te in zawn kan thlen veleh “Ding lawk ding lawk” ti chul chungin a darah ka sawi nawk nawk a, ka hrilh deuh thut bawk sia ri hrawk khawpin a ding. Mawng kang awk khawpin ka bu dawrh a, Nini pawh ka nek nasa. Ka insiamţha thuai thung.

Kawtah Nghaktei leh penglengpunga an lo ding a, a mit duk hliah nan sunglass dum nalh deuh mai a vuah. Nghaktei hrilhhai hmel chu ka khawngaih em vangin za lo deuhin ka ţhen ţha a, penglengpunga lah chu hmuh thiang lo hmu ang mai a ni. A hmui tlemin a kau a, a sunglass vuah lai kuai hniam meuhin min melh run run lehnghal.

“A hnungah khan ka lo chuang ve dawn tihna mi? Tawlh hma deuh la” tiin Nghaktei chuan min rawn kawk va chung hian min zawt a, rawn kal ve mai a tum laiin Nini-a lah chuan “I ţhiannu hi ka lo hawh lawk” a lo ti satliah.

“Ka lo chhuk ang, ke in kan kal dawn nia” ka tih rualin a tlan chhuak leh daih a, bike a ti thi duh miah lo te kha ka hrethiam ve chiah. Tlanchhuak mai thei tur a a lo inrin lawk sa vang vek.

Nghaktei te in aţanga phit chhuak si kha kan pelh hnuah a tlan muang leh daih a, “Iva tlan muang em em ve” ka ti hluai nghe nghe.
“Kan thlen hma chuan ka phur rei thei lo ang che” a lo ti mai a, lirthei nei thar hlim ang mai ke a kal aiin a chak hlek chauh ang. En mai pawn kan fimkhur hmel ngawih ngawih. Ka sam takngial pawh a phur phe zo lo.

Hmeichhe thlabar ţe chel chul ri leh bike ri inpawlh nuaih chu kan hnungah a tawp chawt. Nini vuan ţung chungin ka hawi let a, rin lawk ang ngeiin penglengpunga leh Nghak hir ha-i te an lo ni.

“I bialpa kha a tlan chak ngam na nge lulian?” tih el zet a min melh chung hian penglengpunga chuan a rawn ti lung lung a, a tarmit bum kha a vuah tawh lo.

“Tlan muang min tih leh tlan hmasa la a ni mai lawm mit ţawih pa” ka ti vin hlar a, Nini-a taksa chet dat danah a nui tih ka hria. A duk nasa a, thlai leh thei ţawih pawh a duk ziah tho lawm. Lu lian min ti lehnghal. Ehe…nizan a phone chhawm sa hmang a message min rawn thawn tu kha a ni chiang mai.

“Nang kha” ka ti leh chiah tihin chak zetin min tlan pel fua a, Nghaktei au ţial ruai ruai thawm nen a inpawlh leh nuk tawh. A dawhtheihna in a tlin lo lehpek tawh a niang, thin chhe hlek hluk lutuk mai.

School bulah min lo nghak leh ang lawi a, bike hma tak a Nghaktei a lo din tak vangin Nini pawh a ding ve ta nge nge. Chhuk hman lo lek a min siam leh hma in ka chhuk tharh.

“In va rei ve. Kawngkal ho nen in ti ti pah mi?” min tih el zet hian penglengpunga chu a lo ţawngchhuak leh hmanhmawh. Duh ila chu ke a kal mai mai ho nen kan ti ti thei tak tak ang.

“Nge i lo la awm reng? Lo haw hmasa mai ta che?” ka ti vin ve khar khar.

“Nau te ka kalsan ngai lo” a ti bul hmuk a, awih lo lutukin ka nui chhuak hak.

“Hah..ti vel suh” tiin min ei loh hmel zetin ka nuih nuih hak dan kha a zir a, ner nawng chungin ka melh chho hrawk.

“Ka duh duhin ka nui ang, i lo sawi ve tur a awm lo. Ngawi rengin haw hle hle rawh” ka ti leh kha kha a, school naupang dang an awm ve tawh bawk a, Triple S ho in kan thusawi an hre pha ni ngei tur a ni “Thinchhe reuh e, hmeichhe nasa tak chu a ni. Enkawlna ţha a dawng ve lo aniang” min kal pelh pahin SHruaii ber chuan ngeiawm fe hian a ti a, ka chhan hma hma in penglengpunga zawk chuan “Eng maw in sawi?” a lo ti khur khur.
Triple S ho lah chak deuhin an kal nghal hlawk hlawk a, Nghaktei nen kan inmelh ralh ringawt.

“Chuan bialpa i nei maw?” min melh chhuk run chung hian a ti ţha leh a, ka bialpa a ni mang si lo va, Ronnie la awm ve reng mahse penglengpunga hi chuan tu mitmei mah a veng ve lo. Keimah zawk ka zak lek lek alawm le.

“Nei lo nei lo, haw mai mai teh” ti hlak chungin a ban puam lai ah ka nam a, a mit a duk deuh chur bawk nen, school naupangin an hlau ang. Ka bialpa maw te an lo ti reu reu ang e, ka duh teuh lo mai.

“Ti nge Nghak hir ha-i i kalsan si?” rum ul hian a ti leh a, ka ning lutuk chu ka thaw chhuak hak.

“Loh theih lohna thil a nih kha. Nge maw i lo buai ve em em le?” ka ti nang nang a, “Ka buaipui lo che” a lo ti bung nghut.

“Min buaipui ka ti hleinem, i lo buai ka ti nih kha. Ngaithla chiang ta che mawl muk” ka ti vin ţhat a, “Ka nau ka ngaihven vang zawk a ni lulian. Nitin he cycle ah hian chuang det det mah la ka ar ho in chaw an ei tui loh phah lo” Ronnie-a bike kawh pahin tham lo zet hian a ti a, ka lo ngei kher mai.

Ronnie lah chuan “Ui te pawh i an kha” a ti sup a, gate chhungah a tlan lut nghal daih a, penglengpunga ngaihdan ni lo chu za lo zet a nui ro hakin a thaw chhuak zui hawk a, a hmui hnuai a peh zeuh lai te chuan hmui hupin ka nui kur kur reng mai. Ui mit lehlam chiah dum kual raih chi kha a ang tak tak alawm.

“U haw tawh rawh, ka thlen tawh hi. Class kal i ngaih ve tho kha” Nghaktei zawkin a lo ti a, lungawi lo deuhin a bike dahna lamah a kal vut. Chak tawkin a tlan let a, ţhian ho a inkai chung a kal tlar dal ho phei chu an ţe chel chul mai.

“Nichin khan min phur ve mai ta che u. Penglengpunga a tlan chak ropui si, ka hlauh zia mai chu” Nghaktei chuan a ti nghal hluai a, min hriatthiam theih nan thil awmzia ka sawifiah nghal zung zung.

“A duh che ka tih tawh kha. A duh chiang che lawm. A melh che hian a mit note a lian bik ziah ka ti reng a ni” a ti a, awih lo viau mah ila a rilru nawm nan ka bu nghat nghat tho.

“Rinhlui te chu ipa Buatsaiha khan a hnawt chhuak dawn ta em?” tiin ka zawt leh rawih a, ka hrechiang chak em alawm.

“Ka ring vak lo. An sawi chhuah hlek leh penglengpunga thin a rim zel bawk sia, mahse U Kimkimi chuan U Didiki vang a ni lo a ti. Eng emaw thil tawn a nei ang a, chu chuan a nghawng a niang an ti mai a, a rui ţhin te hi tawng pawng hauh ringawt su a rawn ti lawm. Nizan chu an buai nuaih nuaih mai, penglengpunga lah kha rawn duk haw chur bawk sia, ka rap hman alawm. Amah chiah chuan rawn haw se misual emaw tiin ka lo khawng thlu tawp duh ang chu” tiin min kuah bet ţung chungin a ti ti malh malh.

“Ti nge an insual reng reng a? Kan inah lawm an rawh luh khawm pui. Amah lah kha a ţawng duh miah lo” ka ti dek dek a, “Awi…awi..awi…a ţawng nguarh ang” uar fe hian a lo ti nghal tan tan.

“Thiam thu a sawi ngai lo hrim hrim. Rinhlui te thlavang hauh a tum lutuk na lamah pawh bike ka ruk sak a tih kha. Insawi thiam zawt zawt ai chuan tawrh tawp a ni mai. A mawl peng pung a nia, penglengpunga a ni reng bawk a” a ti leh zat zat a, a hming put chhan a sawi phei chuan a bialnu emaw min tih vang a a hming ka chhawm ve chu ka lawm lo lehzual. Ka mawl ping peng vang a penglengpingi tih hming pu ang ka ti ve vek dawn. Bakah ka aw a chhang phui vek a nih loh chuan ka ţawng chhuah theih ţek ţek chhung chu thiam thu ka sawi ang.

“Bawihte bialpa chhe lo deuh i nei mi? Pa lutuk vang a mit duk leh bike nei nalh deuh. Triple S ho leh midang pawn an sawi nia aw” Faka’n a rawn ti duai duai a, lo nam sawk pahin “Kal mai teh hnap-a” ka lo ti hriam hrak.

“Hmanni te kha chu in pahnih a in kal daih vangin kan fiam mai mai cheu nih kha” Dawnga’n a lo ti ve thung a, Nghaktein “Ding chung a zung kawh ve put put hmeichhia emaw inti tlat kan kawm peih lo” a lo ti hmak.

An pahnih chuan kan hnungqah min zui det det reng a, “Min zui reng suh u dawheh hling hleng deuh hmaah ka kal peih lo. Ţawng pahin lei in chhuah duai duai a, hmeichhia maw in inti ringawt. Hmeichhia in ţawng pahin lei kan chhuah ve hlawi hlawi ngai lo. In ngei zawngte chungah mipa tha in chhuah leh tho si. Min kalpelh loh chuan pa zawt theihna tham khawpin in sazu ka pet dawn nia” Nghaktei chuan hawi let meuhin a ti leh khar khar a, min kawm chak leh si chuan “Mini alu phel phek phek a kan ro ţhât ka pai a sin” te an han ti vel a, eichak tho mah ila ka hre lo der hmak.

“Kaw rawh kal daih ang engmah ni mang si lo an induh ve emai. Test lai a an hawi kual nasat dun vual vual nen. Thiam thei leh chhe lo ve deuh kawm tur zawng daih ang” Fakan a ti chiah chu ka leh hawi rang kher mai.

Lehkhabu ah tam ni a ni bawk a bag ka la thla sawk sawk a a hmaiah tak na zet hian ka vaw chawrh a, hnung zawngin a tlu thal ţhuai. In ring lo lai vuak nan chuan a rit thaw khat alawm. Dawngan ka sam a rawn kek a, ti nge maw ka samah kher an keh ziah le? Sam keh tham an nei ve mang si lo. Nghaktein min rawn pui a niang “A na lutuk ka hmaiah ham kher suh a pilh ang Vanlalnghak..ka mitah kawm suh” tiin Dawnga a rak teng tung mai.

Ka sam ah min la kek bet tlat a, Faka necktie ah ka pawt ve thung. Nghaktei chuan a hnuk ni ngei tur a ni Dawnga a hnuh rualin Faka nen kan kal ve zel. Kan chheh vel a ri leh dur dur tawh a, keini pali lah kan inhnuk ngat ngat mai bawk. Faka din ngil veleh thei leh thei lovin a hmai ka ban a, kuttin ka tan bul mat lo bawk a na zetin ka ţham a, ka sam a bi tum ve chat lehnghal. Dawnga nen an pahnihin min keh rawn a ni ber. A chang leh Dawnga lamah ka thle sawk a, a chang leh Faka lamah ka thle leh sawk a, chak tak an ni chak tak.

“Ţhelh ta che u” ti a Nini-a vin ţhawt ri ka hriat rual rualin min ţhelh hman hlau zetin na lehzualin Faka hmai ka ţham a, ka sik pilh hman tur a ni ka ti ve tlat. Ka kut a lo phih thlak veleh dap chawpin a beng ka pawt leh a, “Vanlalnghak ka hrawk bawk i pawt thla ang e, a na lutuk Faka thlah tawh mai ang a chak lutuk” tiin Dawnga a rak leh chel chul tawh a, hmu lo mah ila Nghaktei zawkin a khawih nasa tih ka hre thei.
“Min rawn ţhelh vat ta che u” Faka pawn a ti tuarh a, a hnar ka man leh chat. Hnar a nei lian bawk a theihpatawp a na in ka herh a, ka kun deuh hlek vangin a na ti a dingdihlip euh euh tih ka hmu thei.

Tu emaw hian min pawt dawrh a, ka sam an la thlah si lo. A na lutuk chu ka ţe ţhat.
“Thlah nghal rawh u” Ronnie bawk chuan vin zet hian a ti leh a, min thlah rang teh a sin.

A lamah min kuai her lawp a, a hma ang a min hau tawh lovin ka sam min tuai mam sak a nih chu. Awii phur thak ka kai leh tawh.

CONT….

Leave a Reply