You are currently viewing ZANTHIANG REH LAI Takin! 
Oplus_131072

ZANTHIANG REH LAI Takin! 

Spread the love

*************************’+***********

Chu hla rimawi tak, zanrei lam a rawn ri chhuak riai riai mai chuan ka mutchhuak tawh mengkhup lap lap pawh chu a rawn hmet mit chiang hle. Ral khatah chuan ‘Ringtu zawng zawngte u’ tih hla kha an lo lo sat hap thap hi a lo ni.Tho chhuak vut in, veranda thlanglam ah chuan ka inkhawhchhuak thuai a, ngai teh, boruak chu alo vawt vin kher mai lah tak a! Kawr ha lo leh boxer nen chauh a awm kha ka ni bawk aṭ chu thlasik boruat zet chuan min hmaizah lo chiang teh e.

Ka dinna hmun aṭang chuan kan chhak lam tlâng pawng sang leh fal nalh mai a kan Biakin lian ve pangngai tak lo ding deuh lurh lam chu hawiin ka thaw khu zui hlat hlat. Tunah hian zanlai dar 12 chiah chiah a ri tawh a, biakin pawh chu ala eng ṭha ut ut hle ani. Tu tak chu awm ang maw ti a ka ngaihtuah zawh rualin thil pakhat ka hrechhuak leh nulh. Ni dawn tak e, kan khaw tleirawl hmelṭha leh duhawm Irene-i kha kan hma lawk Lalpiancham lo thleng tur ah hian inkhawm hun apiang a zai turin an ruat tak anih kha mawle. A hla sak tur a zir lawk tak aniang a, tiin ka ngaihtuah zui ta neuh neuh a. Chu chu lo ni ta se, eng aiah nge zanlai ah berkher chuan a han zir duh tak tlat niang le aw ka ti. Chupawh, tlângchhip a Biakin lian leh reh ruih mai ah lenghal. Zanlai ani tawh si a, amah chauh chuan a kallo tur ah han ngai phawt ila tiin Biakin aṭanga fakna rimawi lo chhuak zui riai riai chu ka ngaihthlak chhunzawm leh ta zawk a. Chutiang chuan zing lam dar 2 thleng in Krismas hla chu a music chauh play in a duhtawk ta ani ngei ang, zing dar 2 ah chiah a reh zui ve ta a, keipawh ka mut hmun ah chuan lungawi fahran hian kalo chhing zui ve ta diar diar bawk.

Kan khua hi Khawnuam khua niin , thingtlang In 300 vel bawr lek awmna ani a, Champhai District khawchhak tlangdung a awm ani bawk. Khawpui pahnih karcheh khua tih takah a mi chengte hi kan thingtlang mi lemlo hle a, engkimah khawpui nun zia chhawm chho in kan la chhawng ve mek zel bawk a, kan incheina te pawh a sang chho viau zel e. Eizawnna lamah nise, khawdang leh ramdang ngailo hian kan intodelh em em a, ram hna hi chhungkaw tam zawk chuan an thawk meuhlo ani e. Khua leh tui ṭha tak ni hlawm in, mahni khua ti hmingchhe thei tur thil emaw, mihring pawhnise he khaw chhung a cheng mekte aṭang hi chuan kan la chawr chhuak lemlo ka ti ngam sak awm e. Chutiang khawp a khaw thianghlim leh in venghim chu kan ni. Zirna kawng ah nise hma kan sawn in hmasawn zel pawh kan tum a, kan naupangte pawh fuih thar sauh sauh in an hmalam hun atan mi zahawm annih theih nan kan fuih nasa hle ṭhin. Tin, aia upa zah kawngah pawhnise, nitin mai hian zirna ṭha leh hrisel tak an dawng reng a, ram dang, veng dang, naupang te hi kan ngai bik lo reng reng. A chhung a cheng ten kan zir miau chuan ram nuam leh khawtlang muanawm kan lo siamchawp zel mai hi alo ni. 

Tunah hian December ni 18 lai ani tawh a, kan hma lawk a Lalpiancham ropui lo thleng tur urlawk nan keini khua pawh chu kan inbuatsaih chho mup mup tawh a, nu leh pa leh naupang chang nilo, ṭhalai te hlei hlei chu kan buai in hunawl pawh hi kan nei hman meuhlo zawk ani e. Biakin chei hnatlang leh programme set, aaa a chi hrang tamtak hi ani mai e. Kan phe buai ve vut vut a, hlimawm in nuam ṭhin viau mahse, a chauhthlak ve ṭhin khawp mai. Lehlamah, ka bialnu nuthlawi virgin ngat lah hian a tan hun ka nei tlem ta lutuk chu ngaih kawih phet lo tum in min lo chhuahchhal ve reng bawk. Ka buai zia leh keima tan takngial pawh a hun ka neih tlem zia te hi a hre mang tak silo a.

Kohhran chanchinbu kan print zo chiah tih in ka bul a ṭhu kan ṭhiannu Kimtei pek chuan

“Muanawm, zanin chu min thlah haw teh aw. Khua a tlai lam tawh nen a nuamlo em mai” a rawn ti nulh. Kei chuan phawk fe a lo melh pah hian

“Eh..Sangkima nen in haw dun ziah sia, eng nge ka tel ve kher a ṭulna?” Kalo ti let he haw. Chutah, Kimtei chu ner zui sawk in Sangkima chu ava melhrum nghal a, Sangkima erawh alo nui deuh hak hak.

“Saw mihring saw maw ka haw rualpui tawh nguarh ang. Kawng reh ṭha lai kan thleng ta maw tih ah hian min barakhaih a ching a, ka phu hlum lo chauh ṭhin” atih leh takah chuan chulai hmun a awm te chu kan nui zo ta vek.

Chutiang a in ṭhenawm hnaivai ni se an inkawp zui theihloh tak ah chuan tiin Kimtei chu ka thlah haw a, Sangkima erawh kal kawina tur ala neih thu a sawi avang chuan kan nghak zui ta lem lo thung.

Kimtei ka thlah zo ka let leh lai chuan ka hma zawn hla lutuk lo ah hian thil phe vuai ka va hmu ta phut a, ka ke pen pawh a tawp chawt. Hetih hun hi zan dar 11 a ri tawh nghe nghe  awm e. Chu thil ka thlir mek chu a reh zui tak daih si ah chuan tiin ka hmalam pan bawk chuan ka pen chhunzawm leh mai a, inti hlau duhlo luiin a tlan liamna niawm a ka hriat te chu ka thlir thla vung vung. Mahse, hnimbuk pik tak tih chauhlo chu hmuh zui tur engmah reng a awm hauhlo. Hmm, helai kawng hi a fal in a reh ṭha ṭhin em a, Pu Ruata bawng ten riah nan an hmang leh tawh ani ange tia kal leh mai ka tum lai tak chuan hnimbuk bawk chu a rawn che zui ta lawih nia! Ka phu nasa lutuk kha hnunglam ah ka kat dawrh thei a, ka hmazawn chu ka en ngawt ngawt ringawt. Thil engemaw tak hi rawn tlanchhuak tur ah ka ngai tlat pek a, khawdang ka hawi zui thei ngang lo ani. Chutia inralring reng a kalo din mar ṭung lai leh ka hma a hnimbuk ka la melh vung vung lai tak chuan hman zan a ka hriat tawh krismas rimawi ngei mai kha Biakin aṭang chuan a rawn ri chhuak leh phut zui a! Ka va han phut belhchhah nasa mai mai tak em! A tawp ah zawng, eng thil danglam mah thleng zui heklo le, haw tur chuan ka inher ve mai a, mahse e tukkhum lam chu za ṭha duh mem mem tak hi ani e. Ngawi reng a min thlir reng tu hi awm tlat in ka’n hre lehpek a. Mipa hi alo pa famkim theih bik ṭhin lo aniang e.

Kan inhnuai a  a in tur ṭha tak a ka siam sak ka arpa Bobby-a khuang ul ul thawm chuan ka mu tui lai chu min ti harh zawk mai a. Peihlo zet a inperh tho zuiin phone sana chu ka en vat. Ehe! Dar 8 lai a ri tawh si a bobby-a chu tumahin a kawngkhar an la hawnsak lo emni aw. Hrim hrim in thawm riva hi ava awm lo em em bawk ve mawle. Ka chhungte chu an thawhloh reng a hun tawh mawlh silo a, khawnge maw zing tin a ṭap bengchheng ṭhin ṭhenawm nau te ho zozai pawh chu an tlanbo tak diak ni ti rilru bawrh bawrh chung hian ka tho chhuak a, in ha fel sawk sawk in choka lamah ka chhuak phei. Kawngkapui chu inhawng hiai hian an lo kalsan a, chutihlai vek chuan kan in kawt rawn tlanpel leh fua ṭhin hi an awm zeuh zeuh bawk. Mahse, engmah ngaih tih ṭhatloh na tur thil chu ka hria in ka hmu chuang eihlo. Umm, engpawhnise bobby chu zu chhuah zalen phawt teh ang a khuang bengchheng rei tawh em mai tiin pawn ka chhuak chiah chu kan in lam pan a kan khaw rawlthar Malsawma rawn tlan thaw phei hlawp hlawp chu ding meuh hian kalo thlir leh rih. Chutah,

“Au Muanawm, au muanawm, api Ziki’n (ka nu a sawina) hmanhmwh tak in rawn tlan nghal rawh se ati che” tiin ka hmaah chuan a rawn ding zui vat a. A thaw deuh hlawp hlawp bawk. Kei chuan chik zet a lo en chung hian

“Eng nge thleng a? Iva hmanhmawh reng reng ve. Khawnge i pi Ziki pawh chu a awm hrim hrim a?”kalo ti thuai. Chutah Malsawma pek chuan chil lem khawlh pah hian

“Balhla hmun ah khan ruang an chhar a! Ihh” a tih lai chu lo pawt chat in ring fahran leh awihlo tih hriat zet hian

“Ruang â!? Tu ruang maw. Ava awihawm loh” 

“Aw, Usangkima ruang kha an chhar alawm. Balhla hmunah khan” ati leh ta mai. Chutah zet chuan han zawh zui zel tur pawh hretawh lo hian Balhla hmun lam pan chuan ka thlawk phei zui ve hi ani hawt e. Balhla hmun kan tih mai hi kan khawchhuah lam a awm niin zan hmasa lama ṭhiannu kimtei ka thlahna kawng tho kha ani a, tin, Sangkima leh Kimtei te veng kalkawng ani bawk. An veng kalkawng han ti ila, helai bawr ah hian anni chhungkaw hnih tihloh hi chu cheng leh khawsa ve dang an awmlo thung. Tin, anni chhungkua hi inlaichin hnai tak anni nghe nghe bawk tak e.

An ruang chharna hmun kan va thlen chuan mi chu an lo bawr khawm laih laih tawh mai a, a bul velah pawh kan khaw mipuite chu an kat deuh nuk bawk. An bawr khawm tamna lai bikah chuan va in zep lut ve in, hmeichhe ho hian ruang chu an lo ṭah deuh laih laih tawh. Karei leh! Sangkima ruang ngei chu ani sia maw!? A taksa chu puan in khuh ṭha vek tawh mahse, a hmel chu an lo khuh ve lo teh tlat a, a hmai lang thei chin hrim hrim pawh kha thisen hlir thisen hlir hi ani mai e. A rapthlak takzet ani. Ka thlen aṭang darkar chanve pawh a liam lo ang tih ah Police rual pawh lo thleng in ruang chu Postmortem tur hian an phur chhuak zui ta a. Tu tute emaw chu thu han zawt ve bawk mahse, a tu amah chuan hmuh leh hriat nei heklo i, switur kan hrelo tlang ani ber. A reng thu ah hetiang thil rapthlak hi kan khawchhung ah hian tunhma aṭang tawh alo la thleng ve ngai hauhlo a, chu vang nimaw, a mi deh dan chu a dang in mi tinte chuan kan rap ru em em. Kan ṭi ngha hrâ vek nimai hian a hriat. Kei tak pawh chuan kan ṭhianpa a nih mai piahlam ah ka hlau ru zual hle. Zan lam a helai kawng ngei mai a ka thil lo hmuh leh hriatte kha, ka sawichhuak mai dawn emni aw tiin ka in ngaihtuah hman rum rum a. Mahse,  lo sawi chhuak ta pawh ni ila, engmah finfiahna mumal ka nei leh chuang bawk silo, keimah zawk chu min leh rin daih theih ani tih hria in ngawih ah ka tlak leh ta zawk ani.

Postmortem result chhuah hnuah pawh Sangkima chu thah ngei ani tih hriat nimahse, tu tih leh engtinnge tih chu hriat zui tur a awmlo a, kan police chak tak leh huaisen takte hian an chhui chhuak vat tur ah dah mai ang.

Chutia kan khaw mi leh sa ngei, kan khaw tlangval zing a chhuanvawr ni bawk si a han tualthi ringawt mai chuan hun rei tak chhung kha chu kan khua min rûn a, kan titi pui ni chho in a thih aṭanga ni engemawzat chhung kha chu a khaw pum mai hian sawitur dang reng kan hrelo tlang ani e. Kan sûn a, kan ui ngawih ngawih a, kan ngai a, mak erawh kan ti hlawm ṭheuh thung si. Keini engkim a tihpui leh a ṭhalaipui te tak hian ania tuarna chu. A chhungte erawh sawiloh a lum ni ta se. A unaunu leh a ṭhian ni bawk Kimtei tak khan ania tuar bawk chu, hmuh theih khawp khan a cher kawk kawk in nia ka hriat. Ni e, an in ngaina in khawikip ah pawh kal se an inzui chawt a, in ngaizawng ni hauhlo mahse an inhmangaihna kha keini chuan kan hriatpui vek. Kimtei chu ka lainat reuh ngawt mai.

“U Muanawm, i chhungte hi an awmlo emni?”

tia min rawn be tu lam ka’n hawi nak chuan kan khaw tleirawl zaithiam leh hmelṭha em em, Irene-i chuan chiang zet hian min lo melh kiau mai a. A nui hauhlo lehnghal. Hmm, hei hi lawm he nu hi chu han pawh ve viau tum pawh hian hmel hlim hi a pu ngai miahlo tih theih ani a, min hua emaw tih tur hian min tum khum vuau ringawt zel. Hmelṭha in chhelo reuh hle mahsela, kan khuaah hian bialpa a neih awm pawh ka la hrelo. Min duh ve dawn se zawng ka hmin sa mawle. Mipa te hian kan melh ru ṭhum na in a ruk tak chuan kan ngaina lo vek thung. A mizia lah chu hmelṭha viau e ti lo chuan a nu hnâp hran lo lehnghal a, a pa lutuk han tih dawn in dik chiah bawk silo, patil anga khawsa leh chuang miah silo ang hi ani a. Amah a induhtawk in mahni chauh a khawsak nuamti zawk chi anih hmel a, a inringtawk phian zel lehnghal. A ṭawng tlem em em a, eng pawh ti ho ila ani chu in la hrang nalh ang chi kha ani zel. Mahse, a mizia hi ka duh ru phian thung a, bialnu nei lai chu ni lo ila ka bem ve chhin hrim hrim ang ka ti ṭhin. 

A chanchin hi han sawikai ta zel ila. Hetia a tlangnel loh chhan pakhat ni a lang pawh hi  kan khuaah hian a tal tam lo hle a, amah hu fahrah, a nu leh pa ten an boralsan tawh niin, tunah hian a patea te chhungkua in an enkawl mek ani. A patea te chhungkua hi kan khuaah pawh a khawsa thei ve pawl anni a, a patea, Pu Rodingliana tak phei hi chu kan khaw VC Secretary ni lai mek ani nghe nghe. Khatia a nu leh pa te an boral hnu khan rei pawh a patea te bulah chuan awm lo in Bangalore ah Bar vel a zai tur hian a chhukthla ve rawih mai a, mahse amah a zaithiam piah ah alo chhiatloh tel zel bawk avangin bar pakhat mai nilo, a aia programme lian leh function neuh neuh ah te zai tur a koh kual a hlawh ta zel mai a. A hming a zuk chher phah in sum leh pai te pawh a khawl ru ve nual hman awm asin. Mahse, tluang taka a eizawnna a ṭan ve mek lai chuan vanduaithlak tak hian Covid19 chuan kan ram a rawn luhchilh ta mai si a, ani pawh sawrkar thupek angin hreh tak chung chuan a rawn haw ve ta kha ania, hei alo haw aṭang kum hial te pawh a vei leh der tawh.  Tichuan, a zaithiam zia hria in kan kohhran upa leh committee te chuan Krismas leh a kaihhnawih thil tih bawr vel a zai ṭhin tur chuan an ruat thlu ta ani. Tin, kohhran chanchinbu leh tualchhung chanchinbu tih vel hi zingtin a cycle nen a inkhalhchhuak chungin a sem kual ṭhin a, ava han inhmeh tehlul. A cycle khalh lai mawlh mai kha, a bawpsei leh zen thlarh mai in a han rap hrual vel te chu e, chilthli tla lo chauh hian kan thlir ṭhin a tih theih awm e.

“Hey…eng nge i ngaihtuah vung vung a!?” Tiin a kut chuan ka mit zawn chu a rawn zâp ta chiam. Chutah, harhchhuak zawk in ka hma mai ah Irene-i kha alo la ding reng ani tih ka han hria chu ka zak hnuhnawh hle mai.

“Aw..aw…eng nge kan sawi lai kha!?” Ka zui nawk nawk. Chutah, za lo zet a min nuih sak pah hian

“Engmah sawi lai kan neilo. Ka bia che a, min chhanglet lo zawk anih kha” ati leh ta hmak. Ni e, amah ringawt kalo ngaihtuah leh pek anih kha. 

“Eng thil ah nge min biak duh a?” Ka ti let deuh hû chu min nin tawh hmel kher. 

“Aa… i chhungte an awm lo anih dawn hi. Biak tlak loh, mawl em mai” ti zui hlak in a cycle chu a han kuaiher zui a, kal mai a tum lai takin kei chuan

“E, ka unaupa chu a awm kha, kei aiin a biaktlak zawk asin” tiin ka kekawr mawng ka beng fai zui thuak thuak a, amah en chung hian ka khi vur vur bawk. Tichuan a thiltih lai chu tawp in min rawn melh leh ta ran mai.

“Umm..ṭhat chu.” Tiin inchhungah chuan a lut zui a, ka unaupa Em-a chu alo awm ngei aniang, reivak lo hnuah lawmthu sawi mawlh mawlh pah hian Irene-i cbu a rawn chhuak veleh mai. Hmm..chanchinbu man an in dil lek anih dawn hi a.

Ka unaupa, ka û zawk Emmanuel-a hi tlangval kum 30 na hmang mek niin, kan khua ang ah chuan a senior pawl ani ve ta. Amah hrim hrim hi kei ai chuan a hmelchhe hret na a a hmelṭha em em tho ania. Mipa hleitling tak niin a dam dup roh a, a cool hle bawk. Tin, kan khaw highschool ah hian a nghet in zirtirtu hna a chelh ve mek a, chu chu kan ei ber pawh ani hrih. Kei erawh kum 28 na hmang ve mek in ka unaupa ang lo tak  hian ṭhen leh rual ka ngaina a, ka ṭawng duh hrep bawk. Inchhung a tawm ngut ngut leh mahni a awm chet chet ngaitheilo zet chi hi ka ni a, mi ngainat erawh ka hlawh phian. Tunah hian Graduate val chu ni tawh mahila, tum mumal pawh nei theilo in virus vang pakhat ni bawk in heti hian khuaah a ṭul ṭul te thawk tur hian ka la tawmsen tlawk tlawk mai ani. Min hrechiangtu apiang te chuan ka unaupa nen a kan danglam thu hi an sawi vul chuk ṭhin. Nia, kan hmel tihloh kan engkimah hian in anna kan neilo ve alawm. Mahse, a ṭha em em vek e ka ti thei zel. Unau kan nihna a bo lo a, kan inhmangaihna nise a dal phah hek lo.

“Lalmuanawm, engtia rei nge maw khawhar tak hian min dah i tum le?” Chu chu ka bialnu, ka duh leh a zun a ka uai ve hnup hnup na, Lalrinhlui min thawn ngei ani. Ani nen hian kum 2 leh a chanve vel chu kan inkawp ve ta a, a fel in a hmel pawh a ṭha a, kei aiin kum lamah lah a naupang zawk bawk. Mahse, a tir lam a ka sawi tak ang khan Rinhlui hi nuthlawi niin fa pakhat kum 3 mi a nei tawh nghe nghe . Mahse, a fa hi enkawl lo in a pasal hluu hian a chuh tlat mai a, an khaw lamah a kawl ta daih thung ani. Thawk khat lai khan an fa in chuh vang hian an han buai ve deuh rap rap a, mahse, a neinung zawk leh thiltithei zawk na na na chuan an chang ta kan ti mai ang chu. Heng vel vang hian Rinhlui pawh a khua a har thei hle a, reilote kan inhmuh loh leh biakloh chhung ringawt pawh hian min thlahlel in min ngai viau hman zel. Tin, a nuthlawi thu hlaah hi chuan ka chhungte hian eng mah sawi buai an nei lemlo a, nulat lai ata tawh khawtlang tan a mi ṭangkai leh fel kha lo ni ve ṭhin in tihian humsual a dai palh ve ani mai a, amah hi demna tur reng reng awm in ka hre tlat lo. Hemi chungchang bik ah ngat hi chuan ka chhungte hi an ngaihtuahna a hrisel pawh ka ti hle bawk. 

Sunday zan inkhawm ban rual in ka thinlung lalnu rim tur chuan biak in aṭang ka khi chhuam deuh vur vur a, mahse, thui pawh ka kal hman lo tih in Irene-i leh ka unaupa rawn inzuichhuak chu ka va hmu ta mai. An titi bawrh bawrh a, an nui leh har har ṭhin bawk si. An pahnih chuan an in huat hmel loh kher lehnghal a. Engtia awm thei nge mihring ah tih melh a kalo melh vung vung lai chuan ka hma lawk ah an rawn ding dun ta mai.

U Em-a zawk chuan nui sâng chung hian

“I haw nghal dawn nge. Kei chu Irene-i hi ka va thlah haw lawk ange” a rawn ti sup. Min rawn insawitheih khum a tum nge maw ni le. Mahse ka ngaihtuahna ata harhchhuak thuai in Irene-i kalo melh reng na aṭang ka mit pawh chu ka la sawn leh vat.

“Aw ah, Rinhlui te inah ka leng lawk dawn. Aw va thlah haw rawh” tiin step bir thla zet ah chuan ka in pal thla zui nawk nawk. Ka hnunglam a min nuih zui dun kar kar thawm chu ka hrereng lenghal.  Mai mai chuan! Ka unaupa mahnise ka thik ve lek lek mai, engtinnge maw a tih bik aw.

Rinhlui bul a ka awm tawh hnu  pawh chuan Irene-i te pahnih ringawt kha kalo ngaihtuah leh ṭhin a, a zialo taktak. Mahse, ka bialnu hi zawng a zei ve hrim hrim a, a titau hmel a lantir tawh dek hi chuan rang lutuk a thlem ka ba ani tih ka hrenghal ṭhin. Chubakah, naupang nuar ṭha ngamlo ang hrim a chik ngher nger pah a min han nek deuh tawh chin ah phei hi chuan awmdan tawk kalo thiam lo leh fo zel. 

Tichuan, Rinhlui te In aṭang zan dar 11 leh a chanve velah ka chhuak zui thei ta hram a. Ka haw na tur kawng pawh alo reh duk tawh mai. Thlasik boruak vawt vin tuk leh khawlai reh duk te chu a inmil phian kan ti dawn nge a rapawm riau kan ti zawk dawn. Diktak chuan mahni chauh a kal ka ni bawk a, a nuam tehchiam lo. Chutia lungte chhir pah a ka kal boh boh lai chuan kawngsir thim riai ruai hnuai a tuemaw lo ding chu ka va hmu thut. Min ṭhawn em avangin ka ke pen pwh chu a tawp zui chawt a. Mahse, tunge anih tih ka’n en chian deuh hnu chuan Irene-i maw!? Tun ang zan ah, tun ang darkar tlai tawh takah hmeichhia lehnghal, helai hmunah hian eng thil nge maw tih a tum le. A hmel ka en chian lai khan ani pawh in chiang kel kawl zet hian min lo melh ve reng a, a mitmu a lian reuh sia a ding zum reng bawk si nen, a thawmhnaw hak nise a dum lam hlir alo ni lehzel bawk a, rapawm duh reuh tak hi ani. 

“Eh…Irene-i chu eng nge tun ang hunah hetah i tih a? Min ti hlau dawn alawm le” ka tih hnu chuan a han thaw zui hawk a.

“Biakin ah ka kal leh dawn a, mi ka nghak mek anih hi” a rawn ti nem ve dap mai. 

“Umm, tunge kalpui dawn che a. Nghah pui te i ngai em?” Ka ti leh hram. Ani chuan lu thing nak chung hian

“Ngailo e, alo thleng ṭep ang” ati zui leh sup. He nu hmek hmuk hi chu aw. Star tawh lo in ka beng zui pawp zawk dawn emaw ni. Confi leh lutuk mai hian, em em a.

“Aw anih chuan a tlai tawh sia, muttui phawt” tiin muangchang chuan ka kal liamsan ta a. Ngaihtuah zui duh viau pawh ni ila he nu kher hi chu a harsa ve thlawt ani e. Eng em a ti lo tur ah ngai phawt ang tiin mut hmun ah phone  chu ka khawih zui leh melh melh a. Chutihlai tak chuan U Em-a room kawngkhar ri rak rak thawm ka hre zui. Ka han ṭhu chhuak hluai tak na in thawm a reh zui leh daih si a, tihtheih a awm lemlo. Umm, Irene-i mi nghah kha amah ngei hi alo nih dawn hi tiin ka ner zui sak a, ka mu ṭha veleh mai. Ka mut leh aṭanga darkar chanve hnu velah Biakin aṭang bawk chuan Krismas hla rimawi thawm chu a rawn ri leh ta riai riai a, ka mut a ti chhuak zui nghal hle.

Khua a rawn var a, tukṭhuan ei lai te chuan ka  U Em-a hmel chu ka en leh zuk zuk ṭhin. Ani lah chuan min melh duh hauhlo nia. Han fiam zoh ka chak tehreng nen a, ani lah ngawi reng hian a chaw thleng chauh chu melh in a bar mawlh mawlh.

ZANTHIANG REH LAI TAKIN(2)

Hemi ni hian Biakin lamah hnatlang leh tur kan nih vangin tukṭhuan eikham rual chuan ka insiam lehnghal sawk sawk. UEm-a erawh a nawmloh thu sawiin In lam a lo awm chu a tum tlat a, ṭhalai indaihloh nak alai in ka ngei ru ang hlemai. 

Chutia Biakin lam pan a ṭhianpa Sena nen kan kal mek lai chuan tlangau thawm kan hre zui leh a. Ding meuh chuan kan han ngaithla leh te te phawt. Chutah, tlangau chuan

“Hello hello, YMA Information centre aṭang in chhiat tawh thu kan han puang ange” tiin kan kohhran upa, Pu Chalthanmawia ruang chu Lo kalkawng a an chhar thu a rawn puang ta mai anih kha. Sena nen chuan phawk fe hian kan in en a, kan ‘ehee’ rual ṭhawt bawk. Tichuan le, a rang a rang in chhuahkhawm na tur an sawina lam pan chuan kan tlan zui dun ta hlawk hlawk. Kan veng kawn  lai tak kan thlen phei chuan hnatlang tur a chhuak ve kan ṭhian dang te leh khawtlang mipui a zat ve tur lai te chu an lo phu mur mur tawh a. Engpawhnise, ruang chu postmortem tur a lak hmasak phawt a ṭul dawn avangin chung zat zat mihring chuan tihtur kan nei hauhlo tih hre mahila, thil thleng mek hi a rapthlak em a, a boruak chuan min huikhawm zo ta ani atih loh theihloh.

Lo lam panna kawng a kan inzui dam dam laiin ambulance leh police motor pawh chu an rawn thleng zui chawpchilh ve bawk. Kan thil tawn teh hrep hian min ti hlauthawng in min ṭhawng takzet a, a mak ani tih leh a rapthlak thu sawi mai loh chu thudang pawh a leng hleithei meuh lo e. 

A hmun kan thlen thlak ve meuh chuan ruang chu hmuh tur alo awm tawhlo a, a hmu hmasa tute sawi dan in, ruang chu a chhe hneh hle a, a thawmhnaw inbel leh a sana bun lai aṭang tihloh chuan tunge anih tih hriat theihna pawh a awmlo hial ani awm e! 

Engpawh chu nise, Pu Chalthanmawia hian tu pawi nge alo sawi tak ang tih ringawt ka ngaihtuah. Amah lah hi pa fel leh khawtlang pa rawn ve tak, kohhran ah hial pawh upa nihna chelh thei kha ani si a. Amah in a chesual palh ve mai nge? Aa chu zawng, a ruang hmu tute sawidan aṭang pawh in a awihawm chiahlo. Anih chuan, tu misual awm ṭha duhlo kut emaw zawng a tuar ngei ani tih ka chiang. Kan khuaah hian tunhma a thleng ngailo thil a thlen tak fo ah chuan a ruk a tualthah hrat mihringte hi kan lo in kawl ru reng tawh zawk anilo maw. Mikhual rinhlelhawm deuh nei lah chu ka hre miah lo lehnghal a. 

Chutia ruang awmna hnuhma vel thlek a ka hawi kualna lamah chuan piah deuh a U Em-a leh Irene-i te lo ding ngawi ve reng pawj chu ka va hmu tehmial a. Irene-i lah chuan chiang zet leh fiah kel kawl hian minlo en reng lehnghal. Ka unaupa pawh chu damlo inti ve si, a hawkdak ve khawp mai maw ka ti ru neuh neuh. Engpawhnise, hun pui chu a hnai tual tual mai si a, chhiat lah kan tawk ve reng nen, a ruk chuan rilru a hah in a thlabar ṭan takzet a. Hetiang teh hrep chuan krismas te pawh hi keini khua hi chuan hlim tak leh engthawl tak a kan hman theih pawh hi ka ring ta nek lo ea. Chu erawh, chung Pathian kut ah awm thung se. Chhiat tawk chhungkua te an lainatawm takmeuh ani. Chhungkim a hlim tak a kan hmuah mek, lal pian ni chu anni erawh chuan an hmang ho ve thei tawh dawn silo. Mihring hma hun hriat loh zia tak hi aw. 

“Zanin ah ka fanu an rawn dah dawn a, heta krismas hmang turin” tiin phur hmel zet hian Rinhlui chuan a sawi sep sep. Chiang zet a amah melh zui kawk pah chuan

“Chu, i bul a awm tir an phal ve tawh maw?” Ka tih chuan a ner deuh nak. Muangchang a lu buk zeuh pah hian

“Umm mahse, krismas chhung chauh aniang. Ka neih hlen hi an hlau khawp a” a ti zui leh. Han sawipui zui vak ngaihna ka hriat tak lo ah chuan reilote ṭhu leh in zanriah kil hun awm velah ka haw san ta daih. 

“Unaupa chu, ngawi reng in ilo hung ṭha bik hlemai a, a fel em?” Tiin zanriah kan kil ṭhep ṭhawp lai chuan ka Û chu ka fiam zeuh. Chutah, rawn hawichhuak zauh in a kiai vei suk a, a chaw chu a bar chhunzawm leh daih. Chutia ka han sawi tak zeuh ah chuan ka nu leh pa te beng chu ka ti vir deuh nge ni, an la rawn phur zui em em lehnghal a. Ka pa zawk chuan nuihza insum deuh a ka û melh pah hian

“Eheu! Chu! Mama pawhin nupui neih chakna te a neih hmel ṭan niin ava hriat ta em! Nu i, nangpawhin mo neih i mamawh ve tawh tho ani lom’ni?” A tih zawm zat. Kei chu ka û melh reng pah hian kalo nui deuh tut tut tawh a, ani lah chu a thutak deuh run bawk si. Ka nu leh pa te phur pheng chuan ka duh aia rei mah mo chungchang chu an sawi zui ta nghek lehnghal a. An hlimpui zui phian a a ṭha e ti tawh mai ang. 

Zanriah eikham aṭanga rei pawh ala nilo ang tih tur ah ka û chu nalh ve angreng fe hian a room aṭang chuan a rawn chhuak hlawl. Kei chuan chik zet a amah lo en reng chung in

“Nula i rim dawn ani maw. Min lo hruai ve teh” kalo ti zoh. 

“Lo ngawi ve mai mai ṭhin la. Rim tur neilo pawh inih loh kha” tiin a khi zui leh suk.

“Taktak a mama, ilo haw har angem? Kan tunlai boruak nen kawngka kalh lo a dah rei chi pawh anih loh hi. Hrim hrim in zanah te hian leng chhuak tam lo ula ka duh, inkhawm in nih loh chuan” tiin ka nu alo inrawlh vat.

UEm-a thung chuan a hma aia thutak zawk hian

“Duh chuan lo kalh daih ula, Irene-i ten inah ka riak mai ang. Hla ka zir pui leh dawn sia, ka rei deuh ang” tiin a chhuak zui nghal a. Tlangval ve uaih, nula In a han riah daih mai chu kalo ti rilru vang vang. 

Umm..zanin chu keipawh Rinhlui te inah chuan leng lo phawt mai teh ang. A fanu a rawn thleng dawn si a, min kawm ṭha hman taktak dawn chuanglo tiin ka va text ta zawk a. 

Hun chu a kal bek bek a, ṭhutthlengsei a mu zal ar ar chung a Tv ka  en chu kalo muhil zui daih hi niin. Irene-i aw tliang ral leh fawn hlarh hlarh maiin

“Ringtu zawng zawng te u” tih hla ngei mai muang fan raih a a sak ri chuan min kaitho zuiin sana ka bih vat. Zanlai dar 12 alo ri vu vu tawh chu niin. Inperh tho vat in khaw vawt hnuaiah ka hmai te chu ka han phih leh rih. Chutah, eng rilru nge ka put tak pawh ka hrelo, Irene-i zai chu hmunah ngei han en a han ngaihthlak chu ka chak ta tlat nia! Chubakah ka unaupa nen tho an awm dawn ani tih ka hriat lawk avangin ka hmaizah hranpa lem lo bawk. Ka bihthla hmaasa phawt ang mawle tih rilru pu chuan ka in ha lum leh sawk sawk a, ka ngaihtuahna chu ka nuih pui vur vur bawk. Ka nu te chu an mut daih tawh avangin kawngka chu pawn lamah ka hawlhkalh rawk a, biakin lam pan chuan ka pen zui ta chhat chhat. 

Biakin ka thleng chho thuak tih in Irene-i zai pawh chu a tawp zui ve ta mai a, boruak chu a reh nghal duk thei. Dimte a pen in biakin sir, tukverh hrul ah chuan ka phei zel a, biakin chhung chu a hmuh nuam tawk chauh a light an chhit avangin reilo ah anmahni pawh chu ka va hmu thei. Mahse le, eng thil nge an tih tak hi! Duhthawh tak a in keih buan buan chung in Upa ho ṭhutna tlar ah chuan an lo in bawh deuh ûr anih chu mawle! Thawmhnaw pakhatmah an la inbel hauhlo lehnghal! Irene-i pawh tun mai khan a zai zo chiah sia, chutiang a khawsa leh mai thei tur chuan engtinnge a tih theih zawk le ka ti hial. Chutia Biakin chhung meuh pawh zah zo lo a an han khawsa dun ta mai chu ka lawm lo hle a, ka tha a khur zui thei hial mai. Mahse, puitling ṭhankin ve ve anni tawh a, harhfim kak a thil ti anni bawk ang tih ka ring. Engkim a nih tur ang an nih tir mek a, lo va chawh buai erawh kha chu ka tum bau lo thung. Khua han var se la, ka unaupa chu chhungkaw kim ṭhep ṭhawp laiin tun a a wmdan hi ka sawichhuah sak ang tiin ka inher vut a, in lam pan bawk in ka let ta vang vang. Inchhung ka luh rual a Irene-i zai ka hriat leh pawh chuan ka ngaithla tui thei tawh hlawllo, ka ten zui tlat nia. Tichuan, earphone vuah hmak in youtube ah Rca Chhangte channel ka ngaithla a,  lungdam lo zet chuan ka muhil zui ve ta ani.

“Nilo Irene, hetiang chuan min ti suh. Awm in awm em? Min ṭanpui r’u” tiin U Em-a chu a au ṭial ta ruan ruan mai. A kut leh ke phuar sak vek niin chhuat daiah a mu hlawm reng bawk. Chutihlai chuan a lam pan hian Irenei ngei mai chu a rawn kal ta chhut chhut a, a kut ah chuan hreipui hi ala rawn keng tel zui lehnghal. A hreipui hnuhna avangin chhuat a carpet inphah te pawh chu a thler phei deuh kawk kawk a. Ka û hlau lutuk chuan theihtawp a talchhuah han tum ve bawk mahsela, a chet theihna ber tur a kut leh ke phuarbeh tlat ani lawi si. Theihpatawp a tal chungin a han in lengkual vel tak na a, awmzia erawh chu a nei thui lo hle.

“I khawvel tawp dan tur chu kei hian ka rel fel sak dawn che ani dawihzep pa, chumi hma in ka aw mawi tak hmang a krismas hla ka sak hi lo ngaithla leh phawt rawh aw” tiin a hmaah chuan a han ṭhu tung zui ve zat a. A hmel hlim sâng reng chuan a landan chu a ti rapawm zual hle bawk. Chutah, tape recorder ti ila, woofer ni zawk mah tur lian vak lo hi rawn lek chhuak leh in ama zai ngei mai

“Aw, zan thianghlim, mawi takin arsi an eng,

Kan chhandamtu Krista lo pianna ah;

Reitak khawvel sual leh thim hnuai a leng tawh,

Tunah thlamuanna ropui a thleng ta,

Beiseina tharin khawvel lawmin a khat.

Chibai bukin, aw, van angel thu ngai ru,

Aw, zan duhawm, lal krista pian hun chu,

Aw, zan thianghlim, aw zan, aw, zan thianghlim!

Tih hla, a record sa thlap  muang fan raih leh nalh tliang zet a a sak tawh ngei mai kha a han play khum ta anih chu. Chutah a hla changkhat a sa zo ta maw tih chuan Irene-i chu ding chhuak thut in

“Ka zai ngaithla chung ngei hian thi rawh aw” dam tak a ti chung chuan ka û chu a hreipui ken la8 ngei mai chuan a han chek ta bur mai anih kha le! 

Ka ṭhu chhuak zawk a, ka thaw zui hlawp hlawp bawk. Ka mumang mai anni tih ka hriat hnu erawh in ka earphone vuah lai te chu ka hlip zui sawk sawk a, ngai teh, kha hla ngei mai kha biakin aṭang chuan a rawn ri chhuak ruai ruai anih chu! Ka rap lutuk chu ka meng phawk hman viau lehnghal. Mahse, ka story ngaihthlak te nen ka mangphan kual vel maimai anih dawn hi tiin ka mu ṭha zui leh vat. Rinai takin anni pahnih pwh chu an va bei rei angreng ve aw ka ti rilru deuh a, mahse krismas thlen nan ni 4 vel bak a awm tawhlo ani tih ka hriat hnu chuan ka inbengdai leh thei hram ani. Ka mumang rapthlak lutuk vang khan chu zan chu chhin khat pawh ka chhing nawn leh tawh eihlo. Mumang mahnise, a tak ang chiah anih si dan te, rimawi ri ruai ruai zawng zawng te nen a rapthlak zia mawlh mai kha. Irene-i hmel rapawm ta lutuk leh thisen vel te, aaa azavai mai khan an rapthlak in a tak nen danglamna an neih ka ring hauhlo.

Khua a var chiang ta maw tih in kan kawngka thawm ri rak ka hre zui a. Ka û anih ring in room aṭang chuan ka tlanchhhuak ve vat. Alo ni ngei bawk e. Chutia inchhung a rawn luh rual deuhthaw a ka hmel a han hmu zui zat chu a bangbo in ka ti hamhaih zawk hle ani ang, min melh phawk deuh hrû hman a. Mahse, a rei lemlo, a thaw hawk a, ka dinna lam rawn pan pah chuan

“Iva tho hma ve bawiha” a ti sup. Kei chuan engdang a chhang ta lo hian

“Biakin chhung ah khatiang in vawikhatmah khawsa dun tawh suh u. Hmun thianghlim in ti bawrhbang ani tih hre ta che u, in duh anig chuan hmundang pawh a tam lutuk. Zak hle rawh u”  ka aw chu a ring lo na in a fiah ṭha hle a, a tak ngel ngawl viau bawk. Chutah, ka hmel chu rawn en zawk in, a nui lek duh chauh a. Tunhnai ah hian a mizia a inthlak nasa hrim hrim tih ka hria. Chu pawh, a ṭha lo zawng vek lehnghal in. 

Tunhma zawng a zingthawh nachang hre em em kha chaw ei dawn ah chauh te a rawn tho chhuak a, hnatlan nikhua ah pawhnise a ṭhahnem ngai pawl ni ṭhin kha tunah chuan a kal tlem pawl ani lehzel. Zanah nise, a inkhawm anih loh chuan a leng chhuak ngai hauhlo bawk. Mahse hetia Irene-i nen an inkawp aṭang hian rawlthar hawklak ho mizia kha a rawn nei thar ve ṭan nimai hian ka hria kei chuan. Bialnu te nei ve sela ti a ka lawmpui ṭan dawn lai takin a khawsak dan erawh hi chuan min ti lawm zui hauhlo mai.

“Chu, min enthla turin zanlai ah ilo kal vang vang ani maw. I che mawi lo reuh ka ti mange” min la ti let sak zui a! Hei hi hman a ka unaupa ngei kha chu ala ni si a maw? Ka awih theilo hial zawk mai. Ka chhanlet hma in a room ah a lut zui daih a, ka inhumruh zui ngawt ngawt ringawt. Tharum nen han bei vak dawn ila, upa zawk alo nihna leh kan chhungkaw mualpho theihna tur thil anni zel si a, thinrim insehruh ṭeuh chung chuan bobby-a chhuah turin inhnuaiah ka chhuksan daih.

An khawsak dan ka sawichhuah tak vang nimaw, ka unaupa chuan chumi nileng chuan vawikhat pawh min melh duhlo a, min be heklo. Kei chu awm ve lo ang mai hian min ngai ni ta ber in ka hria. Chutia keimah zawk min han ngai khawlo let daih thei chu mak ka tiin zaklo ka ru hle a, ka thinrimna a sosang tulh tulh bawk. Inkhawm lai a Irene-i nen an zai lai hmel mawlh te chu ka en tlawk tlawk ringawt tawh. Ka va han ten dun tak em. Irene-i pawh chu kalo duh ruk ve ṭhinna te kha an bo deuh duak hian ka hre nghe nghe a, ka ngainep ni ber hian ka hria. Hmeichhe pawisawilo leh midangte tan a buaina thlen ngailo tu ang hial a kalo hriat ṭhin na te phei kha chu e, sawtah sawtah anni ta e. 

Inkhawm kan bâng, biakin aṭang ka chhuak chiah tih in ka phone chu a rawn nghawr ta dar dar a. Ka’n en nak chuan ka tawih Rinhlui alo ani reng. Ava han ṭuah tawh awm bawk ve aw tih pah a kiai suk in call chu ka chhang zui a.

Ka lak rual chiah hian lehlam aṭang chuan hlauthawng thaw hlawp hlawp ri hi ka hre zui a! 

“Aw Muanawm, hmanhmawh in kan inah lo kal vat teh”  min ti bangbo reuh hlemai a.

“Tinge? Thil thleng a awm emni? Iva hmanhmawh hmel ve a. Inkhawm kan bang chiah a, tihtur te kan la nei zui” ka’n ti dek dek chu 

“Chutiang tihtur swi hun ani lo, lo tlan thuai mai rawh. Chuan, midang kha tumah rawn hruai suh ang che” chu thu a sawi lai chuan ṭhianpa Biaksanga hian min rawn kuah thuak thuakin

“Luck ṭhin ve aw, inkhawm ban rual rual pawh hian” tiin min chum zui leh dawp a. Kei lah chu Rinhlui thilsawi vang khan ka ngaih chu ṭha chiahlo mahse, ka la ngai thutak tehchiam lo hle. Biaksanga te chu kalo fiam let ve zuk zuk. Chutah, lehlam aṭang bawk hian Rinhlui ṭe ṭhawt thawm chu ka hre leh ta mai a.

“Ai ah! Muanawm, lo tlan thuai rawh” tiin a aw te chu a khur deuh hlawk hlawk . Tichuan muangchan chi ani tawh lo tih hria in step ah chuan ka tlan thla zui hlawk hlawk a, Biaksanga lah khan hnunglam aṭang chuan

“Valto lo pa, committee tur kha aw” ala rawn ti lang lang. Ka chhang let hman tawhlo thung.

Rinhlui te in ka thlen chuan hah thaw hlawp hlawp hian inchhungah ka tlu lut lo chauh a, anni chhungkua lah chu kulmuk em em hian an lo ṭhukhawm deuh ṭhap lehnghal. Ka hmel an hmuh rual in an rawn hawi zui ṭhap a, kei erawh in 

“Khawnge Rinhlui?” Tih chu ka sawi hmasa ber thung. Min chhang dawn ta lo emaw ka tih hnuah pa ber chu rawn ṭawng chhuak in

“Muana, hetah lo ṭhu ve phawt teh. Hei, kan chhungkua hian mi hriat tam chi loh buaina kan tawk dawn a ang riau mai a” alo ti zui sup. Ka zawhna min chhan let loh em avangin ka hawi buai deuh nak hman a. Mahse, a kiangah chuan ṭhu zui ve mai in amah pa ber bawk chu a rawn ṭawngchhuak leh

“Muana, tunah hian Bawihi fanu Sangsangi kha a bo niin kan hria a, mahse khawtlang pun buai erawh kan la duh rih lo thung. Sangsangi tlai leng kha tun thlengin a la rawn haw ta lova, chuvang chuan ṭhenawm hnaivai leh a ṭhian kawm ṭhin te In vel kan han dap ru chhin ngial a, a awmlo zel bawk si a, kan mangang ṭan khawp mai. A nu mangang zual phei chuan tun thleng hian ala zawng a, alo haw ṭep tawh ang” a tih zawh rual chiah chuan an kawngkapui a rawn intheh hawng lawp a, chutah, Rinhlui ngei mai chu khup thi hnuang leh ṭap deuh pur chung hian a rawn lut ta mai. Inchhung a lo awm ho chu kan tho suau hi ani ringawt a, mahse, a nu leh a unau te ho in an lo buaipui tak sap sap ah chuan kei chu ka ṭhu ṭha zui leh daih. Chutia rinloh lam daih thu in min han deng ta chu ka su dup dup thei hial a, ka awmdan chu ka theihnghilh hman lek lek mai. Amaherawhchu, in bengdaih hram hram angai tih ka hria a, an manganna belhchhah tu mai ka ni ang tih pawh chu hlau in ka ṭawngkam pawh fimkhur a ṭul dawn tih ka hria.  Ka awi lawi thup hram hram chung chuan

“Chu, helai hnai in dap vek tawh a, a awm silo anig chuan a pa te lam hi chanchin in va zawt mai lo emni? Anni hi a ruk a ral hian an lo che ta mai te hi ani lo’ng maw? Naute hi an hauh nasa in an ui beh hmel mai si a” ka ti ta thlawt. Hetiang thu ka han sawi ve ngam nachhan pawh anni chhungkua ah hian ka mikhual tawh hran lo a, an makpa tluk thawthang ah min ngai ve tawh tlat. Chuveleh, Rinhlui pa Pu Ngurliana chuan lu thing deuh nur nur chung hian

“Chutiang chuan an ti dawn lo tih ka chiang. Helai hmun a an rawn thlah pawhin biak an nuam hle a, krismas zawh rual a hruai lehnghal tur pawhin kan in chah fel thlap zawk anih kha. Duh nise, heta rawn hruai kher lo khan kan thu an hnial thei reng alawm. Keini tan lah khawkar kawng a hla tham a, an remti chung va hruai luih kha thil chakawm zawk zawk ani bik lo, i ngaihdan chu thil ni thei ni tho mahse, anni kher hi chuan an ti dawn lo tih ka hria. Mi puitling leh lehkhathiam rual ṭhah anni lehngal a, a theihloh” a ti zui leh chuar chuar.

“Awi bawihi, khawi hmunah nge i tluk sual theih reng reng a?”  Chu chuan kan boruak chu tlem in a rawn vaw dai ta deuh a. Chutah, Rinhlui chuan min rawn melh zawk pah hian

“Muanawma te kalkawng thim lai ah ka inchhuihbah palh alawm le. Muanawma hi va sawm chhuah ka tum a, anni lah chu an chhungin an lo inkhawm vek lehnghal a. Ka phone light lah a eng ṭha vak bawk silo aṭ chuvang ani e” tiin a na ti chu a ṭhen zui leh sak ṭhin a. Kei erawh sawi tur mai ka hriat tak loh avangin ka ngawi reng thung. 

Tichuan, Rinhlui patea chu rawn ṭawng chhuak ve thung in 

“U Ngur, engtia hma han lak tur nge ni dawn ta le? Hei, khua a tlai tual tual mai si a, zanin chu kan nghak leh phawt ang nge, nang, thu mum han kheh hawng teh a” a rawn tih leh tak dap dapah chuan Pu Ngura pawh alo bu zui nghut nghut. Mahse, chhanna a pek hma in Rinhlui chu a rawn ṭawng chhuak ve ta thung a.

“Pa, zanin hian zawn hmuh ngei ka duh ani. Khawiah emaw haw theilo in lo awm ta se, hrehawm a tiin  a hlau dawn lutuk. A ril te pawh a ṭam tawh dawn asin ka fanu kha”  sawi zawm theilo chuan a hmai a hup a, a ṭap zui tlawk tlawk. Hmeichhe dang awm ve ho pwh chu insum pah tak chung si hian an insut ri zui ta tliar tliar bawk a. Tichuan, pa ber a rawn ṭawngchhuak veleh thung.

“Aw Bawihi ṭhin hi, a mak zung zung thei em mai. Thu bulbal sawi pawh ala awm em hleinem. Chutin, lo hnual nghal ringawt ṭhin teh suh u. Englo in kan ti mai dawn nge aw ka tia, zanin atan chuan hei, ṭhenawm hnai te pahnih aṭang an tlangval te leh keini chhungkua mipa ho hian han dap kual ta phawt ila dai hnai velah. Tin, hei, Muanawma pawh a awm thei bawk dawn a, zanin a kan awmdan a zirin naktuk lam chu naktuk hun in hril se a ṭha awm e” atih zui leh dap hnu chuan kan lo pawm tlang hle tih hriat nan kan bu deuh tliar tliar.

Tichuan Inah pawh haw zui tawh lemlo hian kei chu Rinhlui nen kan inzui chhuak ta a. Ani hi chu kal ve lo tur pawhin han ti lui ngial mahila, a thei thlawt lo ani e. An ṭhenawm hnai, chhungkua te chu ruai in an tlangval lian ṭha nelh nawlh tak mai pathum lai an rawn thehchhuak ta nghe nghe a, a tihzia angreng hle. Rinhlui nen chuan ngaihtuahawm kan ni hran lo bawk a tiin midang rual pawh chuan kan chhuak ve ta lem lo. A hmasa ber atan, Lo kalkawng chu pan leh phawt in, midang ho erawh engtinnge an insemdarh zui dawn tih lam kha kan ngaihtuah tawh lo ani. Kan tum ram pan chuan kan kal mawp mawp a. Rilru chu hmanhmawh ru hle mahse mibo zawng kan ni a, a tih rum rum theih chuang si loh. Kal pahin kan thlen chin apiangte chu kan light neih ang ang hmang chuan kan han chhun kual vel ṭhin a, a hming lam in kan ko pah reng bawk. Mahse, min chhang tu an awm chu sawiloh, a reh hian a reh tlawk tlawk mai ani. Khua a thiangin van boruak zau tak ah chuan thla lah chu alo eng ve kung mai bawk nen boruak reh lutuk chu a ti rapawm zual nimai te hian ka hre leh ta nghal a. Heng lai lai ah naupang kum 3 mi lek kha a kal dawn hauhlo tih chu hre tho mahila, hruai kawi tu a neih erawh chuan alo awm ve daih tho bawk si. Rinhlui hriatpui siloh chuan ka rilru a hah hle a, zanin hian kan inzawn hmuh loh rinna pawh ka nei lian hle nghe nghe.

ZANTHIANG REH LAI TAKIN!(3)

Mahse Pathian nung neitu kan ni a, aman engkim min hriatpuiin ani ngei chuan khawilai hmun ah pawh lo awm mahse, min venhim sak dawn tih hi ka hria. 

Pu Zuimawia te Lo kan thleng thla a, beisei chu sang lo hle mahse an thlâm reh diak lam chuan mit a la lo theilo. Pu Zuimawia hi kan khaw pa khawsa thei pawl niin, Lo te hi a nei zau hle a, a thlâm nise tu huatthu lo ah, pachhe in tia lawih hi ani mai a, a pawn lam bâng leh kawngkhar tih vel chu ṭha lutuk tawh biklo mahsela, a chhung erawh a hnûm hlar thung a, a thianfai reng bawk tih hriat tak hian a fai mam han reng an ti ṭhin. Beiseina sang tak nen thlâm luhka chu kan han nam hawng ta riai riai a, hmahruai tu zawk ka nih ang in inchhung vel chu ka han bih hmasa leh te te phawt. Mahse, ka rinlawk leh rin phal ni chiah silo ang hian inchhung chu a lo ruak huai mai. Tukverh tereuh te aṭanga thla eng lo lut paw ruai chuan a chhung vel chu a rawn chhung eng thui fe bawk a, a lang thei chin ah ringawt pwh khan mihring chetna hnuhma tur awm ang ka hmu miahlo. Thing chair pakhat a awm a, belbawm phuahchawp zet pakhat awm leh in a bulah chuan tui dehna leh thuk tlabal ve tawh tak hi a awm deuh tlawng mai.

“I phone light kha hmang ṭangkai ta che” rawn ti sup tu avang chuan phone ka keng ani tih ka hrechhuak chiah. Engmah a awm dawn lo ti nuah nuah chungin a ngaihṭhat nan chuan ka light chu ka han on ta tho a. Ka rin ang ngeiin ka chhun kual fe hnuah pawh hmuh ka nei ta silo a, beidawng ru zet hian khawchhung lam pan in kan let dun leh ta ngawt mai ani. 

Khawchhung kan thlen hnu chuan han zawn kual leh mai na tur kan hrelo bawk nen kan thurualpui te ngaihchan pah ni fawm in Rinhlui te inah bawk chuan kan inzui lut leh ta.

Pu Ngura leh midang ho te chu khawilam panin nge an kal tak tih chu hre hauhlo mahila, beiseina chhete erawh kan la nei ve e. 

“Hrim hrim in tlaiah chuan tu in nge rawn hruai chhuak a?” Ka ti chhuak hlut. Ka chau ve bawk nen ka awrawl chhuak pawh chu a vin lam lek lek mai. Rinhlui chuan thaw zui halh chung hian

“Lalsiami naute pahnih mawle, bawihtei hi an duh ṭhin lutuk a, an lo hmu khat tawh bawk si nen” tiin a thaw zui leh ham ham. 

“Anni chu thil awmdan in zawtfiah vek tawh em?”

“Aw zawt e. Kan infiamna bul a lung chungah kan ṭhut tir a, kan en loh kar in alo bo mai anih kha anti!” A rawn tih leh chuan mak ka ti angreng hle a. Chutia an bul lawk a ṭhu reng en loh chhung zawk a lo bo ta daih thei chu a mak tihloh rual ani lo. Ngaihtuah tur a tam, rilru nise a khingbai hu bawk si.

Reitawk fang kan chawlh hahdam hnu in Pu Ngura leh midangte pawh chu an rawn let zui ve ta khup khup a. Eng thu mah an sawi hma hauh pawh in an hmel aṭang chuan an hlawhchham hle tih a hriat theih awm e. Rinhlui nu leh hmeichhe dang lo awm ve te chuan chanchin lo zawt nghal sawk sawk in, an insemdarh dan leh a ruk thei ang ber a khawchhung hmun tin an dap kual thu chu an sawi zui sap sap a, beidawng tih hriat tak hian kan thaw zui halh hlawm bawk. 

Chutah, Pu Ngura bawk chuan

“Umm zanin atan chuan tihtheih a tlem, chubakah a zawngtu lam te pawh kan indaihlo hrim hrim a, tihian zanin chu nghak phawt mai ila, Pathian zar ah eng pawi em chu kan ti lo tur ah dah ang u. Ngaihṭha takin nangni pawhin min ṭinsan ta ula, khua lo vat se tha thar in rilru thar nen kan ngaihtuah ṭha leh zawk dawn ania” atih rual chuan Rinhlui alo ṭap zui hawk a. Tun dinhmun a a rilru mangan dan tur hi ka hriatthiampui phaklo zawk.

Tichuan tihtheih nei ta lo chu mangang lutuk lo tur a chah in zan dar 12 velah In lam pan chuan ka hawsan ve ta chauh ani. Kalkawnga kal pah te chuan kan thil tawn vel chu ka han ngaihtuah zui neuh neuh a, tunlai kan khawchhung thil thleng engkim mai hi a mak in a rapthlak tih chauh lo chu sawidan tur leh han suangtuah zui vak ngaihna pawh ka hre em em lo. Chutia ngaihtuahna kawm pah a ka kal boh boh lai chuan chhak kawng thim deuh lai aṭanga min rawn ko thawm chu ka hre ta thut. Min ko tu awmna lam ka’nhawi nak chuan ṭhianpa Biaksanga alo ni reng nia. Min lo nuih deuh vur vur a, mahse ka lam pan a ke rawn pen emaw, chetsawn emaw leh min biak chhunzawm tumna chu anei leh chuang hauh lo thung.

“Ṭhiana, khatah eng nge itih daih a? Nghah nei iva ang em?” Ka tih chuan a lu a thing zui nawk nawk.  A hmel chu chiang tak a en in ala nui vur vur bawk si, he pa khawsak dan hian ka ngaih a ti ṭha hauhlo nia. A chhan erawh ka chiang chuang hauhlo thung a.

“Chuti, lo kal rawh haw ang” ka tih leh pawh chuan a lu a thing leh mai. 

“Mi ka nghak lawk” a ti leh lawi bawk si a.

A awmdan teh hrep hi a ka hrethiam nuaih lo ve tiin ka kalsan ta daih. A ruk a a star em em ṭhin tleirawl te mai Hlupuii nen inhmuh dun an tum aniang tih te chu ka rilru ah a awm ta vel ngawt a.

Inchhung ka lut ṭep tih in Biakin lam aṭanga rimawi lo chhuak thawm bawk chu ka hre zui leh. U em-a pawhin a zirpui leh ngei dawn anih hi ti supin ka ngaihtuah dan chu ka ner pui suk. Biakin ti bawrhbang zawng chuan an khawsak tawhloh hram ka beisei bawk.

“Nizan chu Bawiha, i leng ilo haw har hlemai, hmundang ah i leng ve zawk tihna nge?” Tukṭhuan ei laiin ka pa chuan min rawn ti khauh a. Ni, zan hi ka leng tam hran lo a, ka chhuah ve chhun ah pawh Rinhlui te in ani deuh mai a, chupawh dar 10 a rik dek dek tawh chuan ka haw mai ṭhin. Thudik kha sawichhuah chi ani angem tih chu ka hrelo, mahse anni hi ka thisen zawm ka chhungte, englai mah a ka hmingchhiat duhlo tute annih angin dawt ka hrilh tur anilo ang tiin zan lam a ka len rei chhan zawng zawng chu zep nei map lo hian ka hrilh fai ta vek. Ka sawi zawh rual a ka û in min rawn melh deuh hrawk tih loh kha chu min melh nawn leh tawh lo a, eng thu mah a kâ aṭang chuan a chhuak heklo. Irene-i ringawt a buaipui na lamah hian a chhaw chhuih tawh a, a mize puitlinv takte pawh kha a hloh ta vek nimai hian ka hre ṭhin. A nungchang leh khawsak duhdan lo ni ta hi kei chuan ka lawmpui phah ve thei hauh lo mai.

Tukṭhuan eikham rual in Rinhlui chu chanchin zawt tur hian ka va call ta nge nge. Ṭap aw deuh ṭuau a min lo chhang in

“Tihngaihna a awmlo, tunah pawh ala rawn haw lo a, tute mahin an hmuh thu an sawi bawk silo nen, khawtlang hruaitute hnen a thlen mai loh kha chu duhthlan tur kan nei ta lo ani e. Information an rawn puang ṭep ang” a sawi zawh rual in kan YMA Information mic chu a rawn ri zui ta ṭuk ṭuk reng a.

Tichuan YMA leh VC ṭangkawp thuchhuak angin Rinhlui fanu Sangsangi kum 3 leh a chanve mi bo zawng tur chuan khawchhung tlangval leh mipa a thei thei te chhuak khawm in kan veng kawn laiah chuan kan pung khawm ta mur mur mai. Mipa puitling hlang ṭhah chhuak khawm tih takah kan bengchheng tlang dar dar hle. 

Bung hmasa lamah khan Muanawm bialnu, Rinhlui fanu a bo avangin khawtlang an inpun a nih kha. Tu ruk bo nge ni ang a, engtia bo ringawt nge tih in ngaithla dawn the ang?

Chutia kan lo rik mam mam lai chuan Information mic bawk chu a rawn ri leh. Kan ngaichang zui ṭhap bawk. Chuta tlangau thu rawn puan thar leh zet chuan min ṭhawng take m! A thu rawn puan chu hei hi ani. Mibo dang leh bawk!  Mahse mibo chu naupang mai ni tawhlo in patling, patling ah pawh kum upa lam ala ni zui lehzel chuan min ṭhawng hlawm hle a, amah chu tudang ni lo hian Irene-i patea, kan VC Secretary ni lai mek, Pu Rodingliana ngei kha ani! 

Engtinnge patling ṭhankin uaih tawh, kum lamah nise naupangchhia pawh nilo, rilru kim biai ni bawk si chu a bo ngawt theih zawk le ka ti. Engvang nge ni ang tih chu chulai hmun a awm ho chuan hre ikhaw lo mahila han in zawh kual vel chu kan bansan hlek lo.

Chutia chet lak mai dan tur hrelo a kan lo phut mur mur lai chuan kan Vcp leh YMA President te chu an rawn thleng chawpchilh ve nghal a. Pu Rodingliana bo mai dan te leh a nupui mangang in nichin lawk a thu a rawn thlen chauh dan te chu rawn sawiin. An sawidan chuan, Pu Rodingliana hi a zan mu lai zung tur a pawn chhuah a hrat hle ani awm e, nizan pawh khan a zung tur chu pawnah bawk chhuak leh in hetia a zung hi tlu thawm ang deuh a nupui chuan a hria a, mahse eng thawm mah a hriat zui leh tak silo ah chuan ngaihṭha takin a pasal chu alo muthilhsan leh mai hi ani awm e. Zan dang ah pawh a zun zawh hnu hi chuan reilo ah a rawn lut leh mai ṭhin a, khatiang tur ah khan a ngai ani ngei ang. Mahse a nupui zing tho turin a pasal reng reng alo mut tawhloh thu leh a pasal hian   a thawhkhalh ngailoh thu chu a sawi bawk. Mahse, a thawhsan ve mial ani mahna tiin ngaihṭha takin rawng te chu a han bawl a, mahse tukṭhuan ei hun thleng pawh a alo haw tak silo ah leh a fate ho a han zawh pawh a an pa hmel reng reng an la hmuhloh thu te, Irene-i hla zir zo, biakin aṭanga zing lam dar 3 vel a rawn pawhin an kawngkapui chu alo in hawn huau thu leh mihring tumah a hmuhloh thu te an han sawi takah chuan a len fo na ṭhin chhungkua leh ṭhenawm hnai ho an han zawh kual pawh in a pasal chu hmu tu reng reng an awm lo awm ta silo a, a mangang ta lutuk chuan tihian VC leh YMA ah a rawn thlen ta ringawt mai hi alo ni. Tin, a bo ani tih rinna turin Pu Rodinga hian hetia a awmloh lai hian a cellphone a keng chhuak miahlo a, a mutpui ṭhin a tawnzau bah leh a awmhmun chapal nen tlawng a kalbo ta tihna anih hmel chu.  Chutiang chen a rei patling chhuak tur chhuahpui atan chuan a holam ve bawk em atin ni. Chanchin kimchang kan han hre ta chu kan thum zui leh hak. Kan phun zui mar mar a, kan khawtlang a thil thlen dan mawlh mai hian min ti bangbo hrilhhai ṭhin teh e maw. Tichuan, insem rual in Sangsangi chin dap tur leh Pu Rodinga chin dap turte chu hlawm hnih ah inṭhen zuiin mahni dap tur mual lam pan chuan mipa puitling rual engemawzat chu ramhnuai lamah kan liam zui ta zut zut ani. Kei chu Sangsangi bo zawnna lamah ka kal thung a, kan kalna hmun vel lah chu a khawkrawk in a chhengchhe nasa mai si a, hnimpik bawn karah te chuan kalna tur hmun samfai chawp zelin kan thleng thui ve ta hrep. Engpawhchu nise, ṭhianpa Sena nen kan inzui zel a, a khawharthlak loh phian e.

Tichuan,  rampalaileng ah nileng in mibo zawn hna chu kan han thawk ta kha ani a, mihring sulhnu ni thei awm chi lah chu kan han belchiang a, ramkal leh sava veh ṭhin ho sulhnu  alo leh zel bawk si. Chawhnu her bawih ah phei chuan hmun pakhat ah hian Sena nen chiah kan awm tawh a, kan thurualpui te erawh khawilamah nge an kalbo tak diak pawh kan hre zui lo. An reh zui ṭhap mai. Ram pilril tihtak ah kan awmna chu a thim deuh khap tawh mai a, thosi nise an tam ṭan hle bawk. 

Sena hah tawh leh chau pheng chuan thaw hlawi hlwi chung hian

“Helai ah naupang kha a kal lo tawp ang. Ṭhiante awmna lamah kal ve daih ila kan hlawk zawk ang mawle. Anih loh pawhin haw teh ang” ati bui bui a. Lungpui chung ah chuan a ṭhu deuh hnawk bawk. Keiin lungpui kehkak kar a tui lo luang chhuak ker ker chu kalo dût zui karh karh bawk.

“Naupang chauh kan zawng lo tih kha theihnghilh suh la” tiin ka nuih vur vur. Ani chuan melh pawh min melh peih eihlo thung. 

“Kal teh ang” ti hluk in a tho chhuak vut a. A hnungah ka zui ve zat.

Kan ṭhian dangte chu kan han zawng kual viau tak na a an reh deuh ṭhap tawh si avangin khaw lam an pan tawh anih kan ring mai a, kan haw zui ve daih.

Khawchhung kan lut a, rin ang ngeiin kawn zawl zau lai ah chuan mi tlemte hi an lo ṭhu reng tawh. Kan hmel an hmuh rual rual chuan an lo phun nghal sap sap a, an beidawn zia thu te min lo hrilh nghal luam. Ni e, he thil hi a mak ani. Hmeichhe naupang chin hriat map loh in aa bo hmasa a, a tuk leh zan mai ah patling, naupang bo nen a inzawmna nei miahlo chu a zan zung lai a bo veleh hmiah bawk. Thilmak tihloh rual ani hleinem le. A titu chu tupawhnise engvang a hetiang thil hi ti mai nge anih ang? Chupawh, naupang leh kum upa lam chungah kher lehnghal. Nge ni a, kan khua hian a pawi sawi kan nei ta emni. Kan lo nei anih pawhin ka pian ve hma thil thleng ani phawt ang. Heti hian mi pahnih ngawt chu a ru bo ta ani a, phut let leh beisei te a nei tih thawm riva lah hriattur a awm chuang silo, thilmak ani e tih mai loh chu sawitur ka hre hauhlo.

“Pu Roa zawnna lamah chuan kan kal veleh mai dawn emni? Ala hma angreng si a” ka han tih chuan ṭhiante pawh chu an lo phur vei phian a, tho ngal sang sang in kan kekawr mawngbal te kan bengfai zui leh thuk thuk. Tichuan kan khaw bul lawk a lui luang, ‘Driver lî’ kan tih lam pan chuan kan inzui liam veleh ta ani. Mahse a hmun kan zu thleng, ṭhian dangte pawh chu haw mai in ring tak hian vaukam lamah an lo ṭhu ther fir fer tawh hi ani a, an hmel aṭang reng in an chau a, an beidawng hle tih pawh  a chiang bawk. Kal hmasa zawk te chutia an lo awm tak si ah chuan tiin keini ho pawh chu an kiang vel ah kan thep kual ta maimai a. Tlai dar 5 bawr velah chuan tlem a val û deuh te’n haw mai an rawt thlu ta nge nge.

“Awle, hei, a theih chin chin chu kan han dap zo thawkhat ta a, vawiin atan chuan duhtawk ta phawt mai ila, thil awmdan a zirin naktip lamah ruahmanna thar siam ho leh mai nise, chutiang zel in khaw ṭhenawmte pawh kan pur buailo ang tih a sawi theihloh. Mahse a tute mah hi phili buailo ila, kan hma lawk hun pui lo thleng tur atan pawh inbuatsaih pah reng tho kan tum ṭheuh bawk dawn ania”tiin thu chu a han ti tlu ta zung zung a, tichuan khawlam pan bawk in kan inzui haw leh ta dial ani

Chu zing ni chhuak zet chu ava han ṭang ṭha at at ve le, thlasik ni sa chu a sa chiang thei hle na in thlaksik tihtak ah a boruak erawh a lum phah chuang hauh silo. Awle, vawiin hi urlawk ni duhawm tak alo ni leh ta der mai le. Veng dang, ram dang ah te chuan kan unau kan kristian pui ni bawk mi tamtak te kha chuan he hunpui hi er in an theihtawk a nasa leh ropui khan an lo hmuak leh anga, inbuatsaihna pawh an kalpui nasa mup mup tawh viau ang mawle. Tin, lal pianni urlawk hun anih ang ngeiin zan lamah te pawh Pathian faka inkhawmna hun ṭha te neiin tamtak chuan amah biakna hmun an pan khawm leh sang sang anga, ṭhenkhatte erawh lo interek hrang in ṭhen leh rual te nen ar te kang zu leh sa an chen  ngei bawk ang. Veng tamtak ah pawh an veng lun lai te cheimawi in tlawhkual tu pawh an ṭhahnem leh fu anga, lalpian hun nghak an nihna chu an lantir nasa leh hle dawn si. Chutihlaiin keini khua pawn kum dangah chuan hetiang zawng zawng hi kan tihloh leh kalpui dan anilo bik miahlo a, mahse, kumin zet zawng hun pui pawh hmuak ṭha hlethei lo khawp in buaina chhumpui chuan thla a zar mek ani a, a ruk in nunaute an thlabar a, patling ngaihtuahna a buai zo a, hotuten rorel dan an thiam tawh heklo. Khawtlang hian kan lu a hai zo a, phur leh thatho tak a hunpui hmuak hmel pawh hmuh tur kan awm ta mang bar lo. Zan lamah nise, pawn chhuak ṭha ngam kan awm tawhlo a, chutiang bawk in chhun khaw en lai pawh kan sawi theilo, nu leh pa te pawh in an fate tualchai tir ṭha ngam an awm tawhlo a. A landan takah chuan kan khua chu a ṭhing ṭhiap a, rauhsan te pawh a ang tih chang ka nei ra fo mai. Lung a zing a, thinlai a hnim a, kan la tawn ngai reng reng loh thil tawng thut kan nih avang hian thin pawh a ur ru ṭeuh thei nia.

An chin hriat zui tur ala awm miau loh avang leh mizo dan a ni 7 em pawh ala ral siloh avangin Sangsangi leh Pu Rodinga te hnu dap leh tur chuan keini khawtlang te chu inbuatsaih leh a ṭul miau si. Tukṭhuan eikham rualin ka insiam zui leh ta a. Hun pui lam pawh hawi thei lo in mi bo zawn hna bawk thawk leh tur chuan kei mizo tlangval hi phur leh thatho taka ka fehchhuah leh pauh chu a ṭul anih hi. Chutia kalo insiam mawlh mawlh lai chuan YMA Information mic bawk kha a rawn ri leh ta. Tun ni tam pawh ral hma hawt hian he information mic hian thu lawmawm loh hlir a puanchhuah tam tawh em avangin a thawm kan hriat rual pawh chuan keini chhungkua chu kan inmelh hrek hrek tawh

Karei leh! Ṭhianpa Biaksanga a inawkhlum a maw!? Thil ni thei niin ka hrelo. Hman zan lawk ah pawh nui vur vur chungin min la bia anih kha mawle. Mahse, kha a nui hmel phen ah khan thil inthup ril tak alo awm reng zawk emni ang? A pawi zozai tehzawng anih hi. Ka thawmhnaw hak lai pawh hlip tawh chuanglo hian ka awm ang ang chuan Biaksanga te in lam ka pan ve nghal. 

An in ka va thlen lai pawh chuan mi chu an lo pung khawm hnem tawh hle a. Ṭap thawm nen an lo ri nuaih nuaih tawh. Rang tak in a inawhlumna inhnuai lam pan chuan ka kal nghal vat a, hetihlai hian a ruang pawh chu an lo la thla vek mek niin. Kei chuan chiangtak in a ruang chu ka va hmu ve hman ta lo ani. Pawi ka tilo zawk, mipa e ti lo chuan mi ruang hmuh hi nuam ka ti vaklo a, ṭhiante ngat phei chu Sangkima ka hmuh kha ka duhtawk viau ani. 

Biaksanga nu sawidan in ṭhianpa Biaksanga chu zan hmasa lamah pawh ala pangngai viau a, rilru hahna tur leh amah han ti na ngawih ngawih thei tur thil a tawn awm pawh an lo hriatpui ve hauh lo. Mahse le, ngaihbel tur ting chuan a khawsak dan chu nidang nen a danglam ve deuh tih thu a sawi thung . A bikin zan lamah te hian a chi ai zual emaw tih mai tur hian a ṭhu hle hle thei ngailo a, mawng a hawlh ang maiin a za hle ṭhin niin a sawi bawk. A mak angreng hlemai. Kei ngat phei chuan ngaihdan dang dajh kalo pu leh hman tawh a, chu erawh a ṭhalo hle. Nia, heng thil thleng zawng zawng ah hian ṭhianpa kha kalo ringhlel ru deuh tlat anih pek chu! Ka ngaihdan lah chu dik dawn riau hian ka han hre leh ta tlat pek a! A chhan pawh, chutiang a danglam leh a nihna nilo baksak a ṭhianpa Biaksanga a chet ṭhin hi ka hrengai lo a, tlangval hlim thei tak leh thawveng ve ṭhin tak kha ani miau mai si. Chutia ani meuh a han boral takah chuan a ruk tak hian kalo thawveng huai thei nia! Min ngaihdan tur chu ka hre tehmeuh mai. Ni e, ka ṭhianpa a thi a, sûn tur leh tuarna viau tur ka ni ngei e, mahse, ka sawi twh ang khan ka ngaihdan a danglam daih ka tih kha. Kei chuan heng zozai tualthihna thleng tawh  a kutthlak tu ni thei ngei a ka rin chu a nunna tih tawp in a awm ta ah ka ngai hmin hmiah a, a ruk tak chuan kalo thawl hawk zawk ani. Thudik ani em tih erawh hriatchian ani miau lo a, chutin amah ah ka burbun vek thei bik chuanglo ang. Ka rinhlelhna hi tawk se, thudik chu kan hre chhawm chho zel tur ah ngai ang.

Urlawk zan niin van boruak pawh a thiang ṭha leh kher mai. Khawhar in kal hma tiin verandah thlang lamah chuan meizial zuk pah hian ka han hawi thawveng leh phawt a, chutihpah tho chuan kan kawmthlang kawng reh lai a rawlthar rual ho titi khawm nak nak te chu ka ngaithla pah bawk. An awmna hmun sawn lemlo a an rik tak reng ah chuan urlawk zan an chhim ve nimai ah ngaiin ka nui suk a, ka meizial bung chu ka paih zui leh zat. Inchhungah ka lut zui nghal bawk. Ṭhianpa Sena pawh alo thlen ve takah chuan khawhar in lam pan in kan inzui chhuak leh ta a. Kalkawng ah Rinhlui te tlawh kawi leh in a fanu chin hriat ala nihloh cheu avang chuan a hmel a ngui nghiai tawh a. A ṭap nasa tih hriat tak in a mit te chu a bui luk tawh bawk. Tin, hetihlai vek hian Sangsangi pa te lam pawh an tunu chin hriat ala nih loh fo avangin an rawn zin ve ta hial anih kha. A tuk mai hi krismas anih tawh avangin an tan chuan chutiang thil han tawh zet chu a hahthlak dan a thuah hnih ve khawp ang le. 

Hetiang tehnuaih hi kan khaw boruak alo nih tak si avangin zan inkhawm pawh chu khawhar lenkhawm ṭiak hnu a neih zui mai an rel thlu ta ringawt a. Eng hunah pawh sawn mahse a phurawm tehchiam tawhloh. Rilru in mibo pahnih te chu a ngaihtuah zui lo thei silo a, chutihlai karin chhiat kan lo tawh belh ve reng bawk nen. Kumin zet zawng, kan khaw tan chuan anchhe dawn kum anih hi atih loh theihloh. Pathian pawi hi kan sawi ta mai emni aw tih pawh ngaihtuah awl tak ani ta e.

Khawhar in kan luh rual deuhthaw chuan kil khat a lo ṭhu ngawi ve reng ka unaupa leh Irene-i te hmel chu ka va hmu nghal pang a. Mak tak maiin Irene-i zawk chuan chiang zet hian min lo en leh kar tawh nia. Engvang a he nu hian chiang zet zet a min melh fo mai nge anih le. Min ngaizawng ka tih dawn chuan ka unaupa nen an in huat hmel loh zawk si. Min hua ka tih dawn in a pawisawi tur zawng a ka khawsak lai ka hre leh mang bawk silo. A â deuh aniang han ti dawn ila mi pangngai diktak ni chuan ka hre bawk si…aaaa ka rilru hi ala tibuai tluang zel zawng anih hi maw.

Khawhar in lenkhawm hun a tawp a, hetihlai hi zan dar 9 vel chu ani tawh awm e. Kohhran in a dan pangngai a her danglam tak ah chuan nu leh pa ho chu a thei thei biakin lamah an lo kal khawm hmasa tawh nghe nghe. Kei leh Sena pawh chuan hmundang hawi hmasa tawhlo in tlângchhip a kan biakin chu kan pan zui ve nghal.

Biakin kan lut a, ka ṭhu fel, ka ṭawngṭai zo ka han hawi chhuah nak chuan piah deuh hmeichhe tlar hmasa ber leh a sir ta ber a ṭhu Irene-i bawk chu ka va hmu fuh leh ta. Ka unaupa pawh ka hma chiah ah a ṭhu ve tih ka hre zawm leh a, tin, kan unau chuan inzawn chiah hian a sir ber ve ve ah kan ṭhu nghe nghe ani. Eng thil nge maw ka hriat a, anni pahnih ringawt chu ka thluak ah hian an awm reng le. Ka hmu fuh dun thei em em mai bawk si. Tichuan le, inkhawm kan han ṭan a, kohhran secretary in thu pawimawh a puan leh hnuin chairman chuan ṭan tu  a ko hmasa leh te te a, chumi hnuah Irene-i ngei mai chu zai turin a ko chhuak zui leh bawk. A zaithiam in a chhelo tih hi chu ka la hnualsuat thei thlawt lo ani. Tichuan a zai zawh ah chairman lo ding chhuak leh in, ṭawngṭai rual na hun neih chu a rawn rawt ta a. Tin, ṭawngṭai pui ngai thawh duh nei tan hun hawng zui in, kan khawtual mi, mi pahnih bo mek te tan pawh ṭawngṭaina hun chu neih nghal a rawt bawk. Chumi hnuin mipui lam aṭang ṭawngṭaipui ngai an hriat ang ang te chu an rawn thawh khawm leh zung zung a, ṭawngṭai rualna chu kan nei zui ta ani. Chutia ṭawngṭai a kan la rik mam mam lai tak chuan tu emaw min rawn kal pel fua pah a min su thawi thuak tu leh rawn kal thaw fua hi an awm ta tlat. Ka ṭawngṭai lai pawh chu meng chhunzawm ve nghal in tunge ni reng reng tih hriat tum hian hnunglam chu ka han hawi a, ka û chhuak tur chiah chu ka va hmu thawi hman thuak. A ṭhutna ka han en leh a, alo ruak hiai taktak. Awle, amah ngei anih hi. Mahse, tun ang  hunah te chuan zunram thiar tur pawj ani ve thei tho a tia ka mit chhin leh mai ka han tum chu ka thei ta awzawng lo. A chhan pawh hmeichhe ṭhutna tlar hmasa ber a a sir ber ṭhutna pawh kha alo ruak veleh tlat alawm le. Chu chu Irene-i ṭhutna ngei kha ani tih ka chiang bawk. Mak tak mai hian ka thin chu a phu nghal dup dup a, sawifiah thiam chiah si loh ngaihṭhat loh na hian min rawn tuam zui bawk anih kha. Engtinnge ka tih tak ang? Anni pahnih awmdan thlithlai tur chuan ka chhuak ve mai dawn nge? Engvang a inkhawm pawh nghak chhuak zo lo a tun mai a chhuak ta nge annih ang? Nilo, an zunram thiar zo biak in compound vel a an  lo ding khaw tlai maimai anih lek chuan kan ho der ang. A zahthlak dawn lutuk tlat. Ka unaupa phei chuan min ringhel sa tawh nasa mai si a, anmahni chu en thlak leh tum ah min puh thlu fel hmak thei tlat. A hmaa Biakin chhung a an chetla lai ka hmuh thu ka sawi vang ngawt pawh khan tun thleng hian min la be ṭha peihlo ania. Mahse, ngaihtuahna thung chuan ngaihṭhat loh na min pe chhunzawm zel in chhuak ngei ngei tur hian min tur ta ut ut mai a, a lehlam zawng a han ngaihtuah ve thung in chutia inkhawm laklawh lai a an han chhuak dun kher chu mak ve tak ani lawi si. Umm an lo let leh mai bawk silo a tiin inthiamlo ru tak chuan ka chhuak ve ta nge nge.

Pawn ah chuan tumah an lo awm hauhlo nia, anih chuan chhuanlam ah tiin zung tur ang deuh hian zun in kawngkhar tin te chu ka han pawt kual chhin vel a, a zavai mai chuan an lo ruak vek niin! Tu mihring mah an lo awm hauhlo. Rei pawh hawi buai lo hian step lam chu ka pan ta vat a, chutah le, step tawp a an kal liam tur chiah chu ka zu hmu fuh ta. Tun ang hunah eng thil tak chu ti dawn nimaw tiin thawm pawh chhuah ṭha ngam lo khawp a dim chuan ka zui thla ve zat. An hnung ah chuan zui ve zel in zan khaw thim hnu ani bawk a, a tihzia viau e. Anni pahnih lah zui ru tu annei tih hre miahlo hian thlamuang tak leh muangchang fahran chuan an hmalam an pan zel mai si. Min rawn hmuh thut tak pawh a chhuanlam tur atan tiin phone chu ka keng pah reng a, Rinhlui ka va text ringawt. Ani lah chuan Biakin a la awm reng tur ah min ngai a, mak alo ti em em lehnghal. Mahse ka thiltih mek te hi hrilh ve kher erawh chu ka tum bau lo.

Chutia an hnung ka zui reng lai chuan mak tak mai hian anni pahnih chu Lo lam kalkawng  ah an peng ta daih mai! Akhai! Tun ang zanah Lo lamah chuan eng thil nge an tih dawn tak ang? Thinphu dup dup in an kal liamna lam thlir chuan ka ding zui vung vung a zui ve nghal mai tur em ni dawn. Anni pahnih chance neih tum leh urlawk zan hman fal tum hi kalo zui ru lek maimai ani lo maw. Mahse chutiang chu ni thei pawh in ka hrelo, nula leh tlangval inkhawm thawmhnaw nen a tawm dun thu a awm dawn emni? A nuihzatthlak zawk alawm le a. Ka zui anga ka hrechiang dawn chauh zawk ani e. Ka zui ngei ngei tur ani tiin an kalna lamah bawk chuan ka tlan thla veleh ta a. Rei fe ka zui leh ngar ngar hnu chuan a hma pawh a mibo kan lo zwn tawh na tho , Pu Zuimawia te Lo bawk kha ka thleng thla leh hlawl. Anni pahnih lah kha thlâm thim ruap mai chhung ah chuan an inzui lut daih lehnghal. Mahse, tihtheih ka neilo, anmahni zui zel mai loh chu. 

Thawmdim fe a thlâm awmna lam ka pan mek lai chuan thawklehkhat ah mipa aurawl ka hre ta mai. Hlauthawng leh thlabar tih hriat tak a patling rawn au chhuak ri ngei mai chu. Min ṭhawn nasat em avangin ka ding deuh chawt a, ka hawi deuh ruai bawk. Chu aw chu ka hriat ṭhan anih awm ka hrelo a, thlâm chhung a lut ta ka unaupa aw kha ani in ka hre bawk heklo. Mahse, aw kha thlâm chhung aṭang ngei a rawn ri chhuak ani tih chu ka hrechiang thawkhat hle si. Anih chuan tunge ni ta ang? Chu chu ka hriatchhuah ngei a ngai tiin hmanhmawh ru tak, thawmchhuah hlau bawk si chuan thlam lam pan in ka kal zui hmawk hmawk. Thlam chhung a awm te hmuhtheihna tur chu ka mamawh tih hria in bâng awng ka zawng leh vat. Vanneihthlak takin bang chhak lamah awng lian lutuk lo chu ka hmu zui thuai bawk a. Anni erawh cbuan min rawn hmu ve thei hauh lo ang le. Thawm ka chhuah te anih ngawt loh chuan. Tin, palh a awm thei tiin ka phone pawh silent mode ah ka dah fel leh hmiah a, chutihlai vek chuan ṭawng thawm ka hre ta.

“Ema, inkhawm an bang tawh ang , nang chu biakin lamah lo han chho la, ka hla hman thiam bawk kha lo han play leh rawh. Palh thil a awm theih avangin ka rawn koh hma che chu biakin ah khan lo awm reng ang che. Chhuanlam siamdan tur pawh i hriar vek tawh kha” chu chu Irene-i thusawi ngei ani. Helai hmunah hian eng thil nge thleng ta tiin ka phone chu ka ak ṭha sawk sawk a, bang awng aṭang chuan chhunglam chu ka han bih zui ta anih kha. Ka hmuh phak chin chu tlem hle mahse, Pu Rodingliana phuarbeh ni chunga chair a ṭhu zawi nguai mai chu ka va hmu ta ani. Ka ṭim sawk thei a, thil theih niin ka hrelo zui bawk. Irene-i hian ama patea ngei mai chu helai hmunah thukru in a phuarbet ang maw!? Khang a bo ti a khawtlang in kan zawn mup mup lai te pawh khan anni pahnih hi chuan engkim an lo hre vek a maw? Tin, a bialnu ṭanpui tur chuan ka unaupa pawh hi alo inhnamhnawih ve tihna maw ni a!? Thil kal kual vel dan hi ava han mak dawn ve le!

“Mahni chauh chuan ilo buai lem lo ang maw? ” tiin ka û chuan a han zawt let ve a, irene-i thung erawh chuan lu alo thing deuh nawk nawk. Hetah hian ka û hmel chu ka va hmu phak ve lo a, Pu Rodinga leh Irene-i chauh kha hmu theiinṭ Irene-i hian a patea chu a dinchilh ran bawk. A bak zawng chu ka tan hmuhtheih anni tawhlo a, thawmdim ngai nen ka awmdan chu a nuam lem lo hle bawk. 

Tichuan ngawi reng in engmah pawh sawi zui tawh lemlo chuan ka û chu a chhuak ta nimai hian ka va hria. A kalbo taktak hunah Irene-i chu ka va luhchilh dawn ani tih ka ngaihtuah zui rauh rauh. Hmanrua leh min ti na thei thil a pai em tih lam ka ngaihtuah tawhlo a, thil thleng mek te hian ka rinloh lutuk a min hruai kawi avangin ka thin chu a rim hle bawk. Chutah ka unaupa alo inhnamhnawih velej chuan min ti hamhaih hle bawk ani. Engtiang takin nge Irene-i chu ka va phih awh dawn tih lam phei chu ngaihtuah tawhlo tak ka ni. Khawtlang anti buai a, mi an ti phawklek bawk a, lal piancham lo thleng tur pawh nuamsa leh thlamuang taka min hman tir tum lo tute hi ka chhuah dawn lo ani tawp mai. Chutia thawm dang ngaithla a ka ṭhut ngawih leh veng veng lai chuan Pu Rodinga a rawn ṭawng chhuak ve ta. Chau aw tih hriat tak hian

“Mami, min haw tir tawh mai ta che. Dam taka in ka thleng leh anih ngai chuan i thiltih engkim hi ka zep hlen vek ang tih ka intiam e” a sawi zawh rual deuhthaw in a biang chu a ri zui thlawp. Pu Rodinga pawh a thle zui hnawp thei.

“Nang putar hur leh suaksual lutuk hian chhuah zalen te min dil vel a maw? A teuhlo lutuk, helai hmun ah hian ka that zawk dawn che mawle” a ti zui khar khar nia. Chu hmeichhia chu ka rin alo ang lo tulh tulh mai.

Tlem a ka’n en chian leh deuh hnu in Irene-i chuan chemte a keng tih pawh chu ka va hmu zui thei mai a. Ka thin a phu leh dawt dawt tawh. Hmanrua engemaw tal kha lo keng ve ila aw ka ti vawng vawng thei.

Chuti mai in a fanu nula mai lakah chuan Pu Rodinga chu tlawm alo tum bik awzawng lo. Chiang zetin Irene-i mit ah chuan a han melh zui leh kawk a. An in melh hnai set sawt teh asin. A kamsir a thisen kai deuh luai chu liah zeuh pahin

“Ka tihpalh tih thu kha vawi engzat nge ka hrilh tawh che. Ilo va nunrawng em em ve mawle Mambawih. Hetiang tur hi chuan ka enkawl miahlo che asin” a han ti leh chu irene-i alo ter deuh at.

“Ngawi hmak rawh putar. Tihpalh tih thu sawi reng chung khan vawi engzat nge ka chungah thil sual i lo tih tawh. I mi enkawl nise ka mamawh bawk heklo, min enkawl tur hian tu in nge thuneihna pe reng reng che a” tiin a chemte ken lai chu a lek zui ta uaih mai a. Kei chu kalo ding chhuak hluai hman. Mahse, ka la chhe chhuak mai lo, thil kal zel dan tur hi hriat belh leh hlek ka duh ani. 

Irene-i bawk chu rawn ṭawngchhuak leh in

“Chuvang chuan maw putar, helai hmunah hian nang chu i thi dawn…ka kut zalah ngei i thi bawk ang. Mahse, saw naupang erawh saw chuan tihsual a neih ve loh avangin dam pial jn a haw thung dawn ani. Nang ve hi chu” tiin bangkil lam chu a kawk zui ta vu vu mai a.

Naupang maw? Engmah ka va hmuh zui theih tawhloh avangin ka bangbo kher. Leh lawk in, thil ka hrechhuak zawk. Rinhlui fanu bo pawh kha hemi te pahnih thiltih vek hi emni? A chhan tur awm ang ka ngaihtuah ngial pawh hian Sangsangi chu engvanga ru bo ve ngawt nge annih ka la hrethiam thei chuang lo. Kan zawng phiangseni te pahnih hrep chu le. 

Chutia thawm an han neih tak hlut ah chuan bangkil lam a tawm reng naupang pawh chu a rawn ri ve ta sat sat mai. Ka hmuh chhunzawm theih tawhloh avang erwh chuan pawi ka ti hle a, Sangsangi ani ngei em tih lah chu ka chiang bawk silo. Mahse ani lo kha chu han rin tur dang reng reng ka hre leh chuang bawk silo a, chulai ka tawmna hmun chep ang reng takah chuan ka  buai ru ve em em mai ani.

“Anu, anu bulah ka haw duh” tiin naupang ṭawng pawh la ṭawng fiah theilo aw ngei mai chuan ṭap chung in a nu a thlakhlelh tawh thu a rawn sawi chhuak ta. Chutah, zawi lemlo fahran mai hian a han ṭap chhuak ta al al mai bawk a, kei thung chu ka ṭhu maimai thei tawh der lo, ka tho chhuak hluai a, eng thil pawh ka chungah thleng dawn mahse thih leh thih tiin thlam chhungah chuan ka lut ngei tur ani.

Tichuan, Irene-i’n vin leh pawr fahran mai a naupang a hrawk tuar tuarh lai chu remchang ah la in thlam hma lamah chuan ka pen phei ve ta ṭhem ṭhem a. Thlam luhka phen aṭang chuan inchhung lam bihthlak tum hian ka han dak zui dek dek phawt a, vanneihthlak takin Irene-i chuan Sangsangi chu lo dinchilh in min hnungchhawn hlauh. 

Chutah, Pu Roa chu zawimuang hian a rawn hawi phei a, keiin rang zet hian bengchheng suh tih nan ka kut zungchal chu ka hmui ah kalo dah zui vat. Ani pawhin hlauthawng tih hriat zet hian min lo melh ve a, irene-i a melh zui leh. Tichuan muangchang leh thawmdim thei ang ber a pen lut ve nghal in kan ramhuai nu chu ka veh phei ta ṭhem ṭhem mai. Ka hnaihchilh fe tawh hnu chuan rang lutuk a chet lak ka ngai tih ka inhria a, a tukkhum sam ah ka ṭham sak hmasa phawt a, chumi hnuah rang tak bawk hian a chemte kenna lam akut chu ka chelh beh sak leh vat. Ani chu lo ṭe zui ṭhawt in tunge ka nih tih hriat tum hian rawn inher mai a han tum zet a, mahse a theilo, a tukkhum sam ah khan ka ṭham na hle  a, a chet deuh chuan a hma aiin a na zual dawn tih a hre ve tlat. A chemte ken chu ka thin thlak sak vat a, ka chhir sawn daih bawk. Tichuan muangchang a Pu Rodinga awmna lam pan pui leh in a phuarna te chu ka phelhtir leh vek phawt a.

“I theihtawk a chakin khaw lamah lo han tlan thuai la, midang rawn pun bawk ag che” tiin chhuak vat tur chuan ka ti zui a, mahse a thei kher angem ka hre ta hauhlo, a dul veilam ah chuan thuk hmel fe hian hliam alo tuar tawh reng a, amaherawh chu ani tal hi kal bo thei se tih ka duh si. Ka unaupa pawh kha rawn let leh thut thei reng ani a, buaina chuan zual lam a pan mai mai ka hlauthawng em atin ni. 

Tichuan, Irene-i chu chair ah ṭhut tir in ka phuar zui swk sawka. Hetihlai a mak ka tih em em pakhat chu, chutia amah phuarbeh tum a ka chet vel lai te chuan tlanchhuah tumna emaw, keimah min lo beih let tumna emaw chu a nei eih lo kha a mak ka ti takzet. Chumai nilo in, ka hmel chu chiang tak hian alo en leh kar ṭhina, ka sawifiah thiam dan ber chuan min melh ngawih ngawih hi ani mai e. Mahse, he misual pawikhawihtu hian min ti zam eih tur ani lo tiin ka infuih ru char char thung.

Ka phuar zawh hnu chuan a hmaah ding in chiang tak hian kan inmelh zui leh tlawk tlawk phawt.

“Tinge khatia min en reng a?” Te chu ala rawn ti zawkzawmah lehnghal a. Ka nui chhuak hak ringawt.

“Ka hrelo, i hmel leh i nungchang ka thlir hian hetiang a i chet duh mai hi ka ring phaklo aniang e” ka’n ti chu za lo zet hian a rawn nui chhuak ve halh.

“Chutiang ngaihdan chu mi zawng zawng hian an neih vek ka ring ani. Mahse chhungril a ka buaina leh hrehawm tawrhna zozai te hi ka hmel ah lang chhuak ngat se zawng, hmuh tlak ka awm tawhlo hial ang” tiin a ner zui sawk.

“Umm, chung zawng, ka hriatpui ve hauhlo mai che. Mahse le, nia, hetiang khawp a che duh tur thinlung i put nachhan chu engthil pawhnise, thil thleng namai lo tak anih dawn chu” ka han ti chu a hma aia ring leh pawr mah hian a rawn au chhuak ṭhat a.

“Aw. Thil namai ani hleinem. Ani khan min pawngsual asin. Nilo, amah mai ani hleinem, ani leh kha kohhran upa hurherh, tar awm khawlo,, a lang a pau a Pathian fak ṭhin leh a beram te hmusit ṭhin tu, kha mihring, he ram kalkawng ngei a a ruang in chhar tak Chalthanmawia te khan inthurual in ka thianghlimna hi min tihchhiatsak tawh asin” a ti zui ta ṭhat.

Karei leh! Irene-i chu nula thianghlim leh in vawng fel tak emaw alo nih ṭhin tih laiin mihring tenawm pahnih te khan chemlo in a lu an la tih ang deuh in a engkim chu an laksak ta si maw? Chutah pawh, anni chu rawlthar hawklak leh khawlai a han teiraw lai maimai ṭhin nilo in khawtlang ah pawh a zah kai chin ngat leh khaw khat pa rawn ni pha hial tur a mipuiin kan dah san te, kohhran upa leh VC Secretary lai an la ni leh zel a. Ka ten lutuk hi ka uak zui lo chauh. Kan Mizoram arhmai tiat lek si hi alo va han chhe tawh tehreng em tih chu ka ngaihtuah zui rauh rauh. Pu Rodingliana ngat phei chu Irene-i tan hian a patea ngawih ngawih niin khawvelah hian anj lo chu pa ti a koh theih tur leh thisen zawm hnaivai dang a nei miahlo bawk. 

Mahse, chutiang chu a dinhmun lo ni tawh mahse he hmeichhe pawisawi lo zet mai hian a kut hmang ngei a tual a thah chu ka la ring thei lo bur thung a, chuvang chuan muang ban deuh charh hian zawhna ka zawt leh ta nge nge.

“I patea ngeiin a i zahawmna a ti bawrhbang tih chu lo dahṭha ta ila, engtinnge Pu Chalthanmawia kha i thah theih zawk. Ni leh lo, engtinnge nang hmeichhe awmnem mai hian tual i thah theih zawk le ka ti” tiin ka chal te chu ka han chuar zui nang nang a. Min ten hmel tak ka ti dawn nge, min ngaihsan loh hmel fe hian min melh zui raw raw a, a ṭhen deuh nawng bawk.

“Keiin tumah kha ka that love. A ti tu i hre duh em?” A rawn tih tak sup ah chuan ka thinphu chu nasa zual in ka khur titih der. I mihring sawitur hi tunge anih ka hre lawk vek ti a au chhuah chiam mai chu ka nap takzet a, ka thlan fim nise a rawn bawl nghal ṭuam ṭuam bawk. Chutah, amah chu hnai set sawt a melh chung leh sehchilh rap rap chung hian

“Tunge?” Ka ti chhuak ve hram.

“I hre duh takzet ang maw?” A rawn tih leh pawh chuan kei chu awmngaihna ka hretawh lo ani ber. Ka duh aia ring leh vin tuarh chuan.

“Tunge anih sawi rawh!”  Kalo ti nghek. Chuveleh ngeiawm fahran a nui her her chung hian

“I pianpui, i thisen zawm leh i unaupa, engkim a i engkim ni ṭhin kha mawle! A mawl ruk riau na kha hman ṭangkai alo nuam em a, ka tan hian a pawimawh zui khawp mai” tiin awki zangkhai vah chuan a rawn sawichhuak ta nge nge a. Duhlo teh mahila a sawi zawh chiah thu khan ka thluak chu vilh in min luhkhung a, ka nâ ani. Emmanuel, hetiang mi ah hian maw ilo chhuah tak mai le tiin ka thinglung chu a rum vawng vawng a. Irene-i hmaah chuan tlawm in ka te ngawih ngawih ta ni ber hian ka in hria ani. Mahse, ka thluak leh ngaihtuahna te chu tih fim vat vat an ngai tih hria in a lam chu ka hawi leh. Sehchilh pah rap rap bawk hian

“Chupawh lo nise, engkim kha i ruahmanna anga thleng vek anni ngei e, nang mi tenawm nu hian ka unaupa kha i hnuk lut ani. A duhlo chungin i hnuk lut anih kha. Dawt mu hlum ringawt chu sawi miah suh ang che” tiin ka kawk zui ta sawk sawk. 

Chutah, rinloh tak maiin a mittui chu a rawn luang zui ta ngiai ngiai a. Min ti hamhaih kher.

“Diktak chuan Muanawm,nang hi he khua a ka rawn awm tirh aṭang khan ka mipa duhzawng tak ini tawh a, ka zahtheihloh na sang ber thleng a sawm khawm in ka mitmei te pawh ka hmuh ve ṭhin che. I haider nge i hrethiam lo ṭhin tih chu ka hre miahlo na in nang lah khan min ngaihsak der mai silo nen,  khatihlai vek khan ka patea leh Pu Chalthanmawia te inthurual khan ka nutei te nufa zinbo lai chu remchang ah hmangin zanah min pawngsual ta a. Ka mut tawh hnu a thil thleng ani nghe nghe. Tikhan thil reng rwng ah inthlahrung zo in khawtlang ah pawhnise ka kimki chho ta hle a, ka inkiltawih a, khawtlang thiltih leh puipun nikhua pawh khan ka hmel in hmu tlem sawt hle ang. Khua hi nuam ka tilo chho tial tial a, kan inchhung kha hrehawm ka ti chho tulh tulh bawk. Ka chung a thil thleng te kha ka sawichhuak anih vaih chuan ka patea  khan thah ah min vau bet tlat bawk si nen. Tikhan, i hmel hmuh thlahlel reng chung si in ka ṭhiannu min sawi hmuh zar ah Bangalore chu ka pan ve ta rawih kha ania. Helam a min lo ngaih ang duak in ka zu khawsa zui heklo. Ni e, ka zai ṭhin ngei e, ka zaithiam a ka aw lah a mawi tih pawh ka hre narawh. Zai chhuanlam pah leh bar vel a zai reng chung si khan ka taksa tenawm tak hi ka zuar pah reng bawk. A dik alawm, ka tenawm, mahse ka thianghlim tawhlo tih ka hriatna khan pawisak min neih tir thei tawhlo ani. Ka zaina aṭanga sum lo lut ringawt pawh kha ka khawpkham lutuk tho na in inzawrh chu nuam ka ti ṭan a, ka zawngchhang zel a, alo hlawk vei hrep nen khan ka inkhawl ngah ve hman khawp mai. Mahse, i hriat angin covid19 khan India ram a rawn luhchilh chho ṭan a, State tin in an ram mi leh sa te chu min ko khawm ṭan ta si nen keipawh khan duhthlan tur nei bik heklo le, hreh tak chungin ka rawn haw veleh ta a. Kalo haw hnuah erawh ka sum rawn hawn zozai te chu a ṭhen a zar ka nutei kut ah dah in a bak zawng chu tunah pawh hian ka thuhruk na hmun ah him takin an la awm kim ṭhap ani. Kalo haw leh ta chu, angai te bawk in i hmel ka hmu leh a, ilo la danglam tehchiam lo tih ka hrenghal bawk. Tunhma ang tho khan i hmel ka han hmu leh ta chu ka vei zui leh ngut ngut mai si che a, i hria anga engemaw chang chuan kalo en zui leh renh zel che tih pawh” 

chu thu a sawi lai chuan mak tak maiin ka lawm a, ka nui chhuak var var lo chauh ani. Insum leh hram in a hmel chu thutak zawk hian ka han melh leh a, a thusawi bawk chu ka ngaithla chhunzawm leh ta zawk ani.

“Mahse, midang kâ aṭangin ngaihzawng nghet i neih thu leh i bialnu pawh Rinhlui nuthlawi fa pakhat nei tawh anih thu te nen chuan ka han hre chhawm leh ta zel a.

“Ka thinrimna in vawrh chho vel chuan nangmah ka duh ṭhinna che chu huatna ah rawn thlak in ka tunhma thil tawn rapthlak tak te avanga ka patea hmel leh Chalthanmawia hmel ka hmuh rual a thinrimna rawn lang chhuak leh ṭhin te nen khan pawi nasa tak khawih chakna min pe in min tuam hlup hlup a, ka inthunun zo ta thlawt lo ani e. Tin, khatianga ka tan ilo rem tawh tak silo ah chuan tiin mipa tha chak leh fei, bum nuam tak tur ni a ka rin min lo hnar bik bawk silo tu i unaupa ngei mai kha ka taksa nalh na hmang chuan ka bum tlu thei ta a. Ani lah kha alo tlu hma em em mai bawk si nen, thildang pawikhawih na kha chu dahṭha ta ila, nangmah leh i bialnu tihbuai che u ka duh vang hrim hrim in ania he naupang, i hmangaihi fa pawh hi kan ruk bo. Tihnat erawh chu kan tum hauhlo thung tih kha min hriatsak la” tiin hnuailam chu a melh zui ta daih a. 

A sawi zawng zawng te kha dawt anih si loh chuan kei ngei pawh hian he hmeichhe thinglung ah leh a nun ah hian pawimawh na ril tak ka lo nei ve reng ani tih chu ka hriat phah a, mak ka tiin awmdan tur pawh min ti hrelo hial mai. 

” awle ani hi chu him dam takin ala awm a, a lawmawm. Anni hi lo dahṭha ta ila, engvangin nge kan ṭhianpa Sangkima kha i thah ve nachhan? Ani khan i nunah eng buaina nge a thlen che le” ka’n tih chuan rang tak leh ram hmak hian

“Eng buaina lian tham mah thlen lo e, mahse, ka kawng min dal tu anih kha” a rawn ti hmak.

“Aw chu chu sawifiah rawh. Engtia i kawng rawn dal thei mai nge anih?” Chutah, rinloh tak hian a rawn nui chhuak ta hawk hawk a. Kalo en reng ringawt.

“A boral zan kha a nihna takah chuan Pu Chalthanmawia thih zan tur zawk ania. Mahse, kha mihring laktlak loh zet khan ka chetchhuah tumna lamah ka kawng kal lai min hmu in min be buai ta sek a, min ngaizawng ru hle tih kalo hriat daih tawj bawk avang khan chhimbudawi kual te te in hmun pakhat ah ka din tawi pui ta a, chutihlai chuan i unaupa kha va text in rawn kal vat tur chuan ka hrilh a, ani pawh engkim hrethiam sa leh thikna a khat sa ani bawk a, a buaithlak tehchiam loh. Tikhan ṭha te te a inkawm pah zelin Sangkima chu thlah haw kan tum ta a, tikhan an in kawng reh lai ah i û chuan a sawisa ta mai a, a khawih na angrenh bawk a, a thi tho dawn tih  hria in kan kalsan a, biakin kan pan zui daih bawk. A bak chu eng thil mah kan hre zui tawhlo ani e. A chungchang bik ah chuan hriat zui kan nei tawhlo” a tih lai chuan mak kalo ti kher a. A chhan pawh, anni khan an kalsan zui daih anih si chuan khami zan a ka thil hmuh leh thawm hriat te kha eng nge ni ta ang le. He nu hian min hrilh kim loh thu zep ṭhen a nei em niang aw? Mahse, chu zawng, nakinah ka la hrechhuak leh khawp ang ti rilru in thudang ah ka pakai pui leh ta zawk a. 

“Anih chuan maw Irene, ṭhianpa Biaksanga chungchangah khan inrawlhna in nei em? Ani kha mifel leh harhvang tak, rilru hahna em em pawh nei ngailo kha ani a, khatiang teh thut a a nunna a han ti tawp ta mai khan rinhlelhna min neih tir lo theilo ani. Hriat ineih chuan zep hauhlo in sawi vek ang che” kati zui leh hluk hluk. A hmel ah chuan chhiar thiam theih siloh natna nge lungngaihna tih pawh hriat loh hi ka hmu tel nawk mai a. Ka mit ah pawh min melh ṭha ngam tawh eihlo bawk. Min chhang dawn lo emaw tih hnuin a rawn ṭawngchhuak ve ta hram lehnghal a.

“Biaksanga khan Sangkima chung a kan thiltih leh engkim kan tih zAwng zawng, tualthah leh mi rukbo chen khan a rukin min lo hriatpui vek mai a, keini lah in min hre ru kar tih chu karlo ah kan hre zui leh vek bawk sia, kan vau bet ta. Ama nunna ngei chu hun tiam chhung a la turin kan ti anih kha. Anih loh chuan a chhungte emaw a bialnu tupawh, ama tan a mi pawimawh chin tupawh anni mai, thah sak ah kan vau bawk. Mi dawihzep tihtak ah chu chu ngaingam lo in ama nunna ngei chu a la ta anih kha” a ti zui leh ta mai a. A thusawi laiah chuan han inthiamloh na em em hranpa pawh a hmel ah ka hmu hauhlo a, an pawi lo khawih tawhna te zozai khan a vaw let ve hauhlo emaw tihtur hi ani zawk e. A awmdan vel chuan ka thin chu ti rim thar leh in a hmai a ben hwi sawk mai chu min ti chak takzet bawk. Mahse ka la insum hram hram ani.

“Anih leh, in tualthah dan te pawh kha han sawi leh law law la mawle” tiin sehchilh nawk nawk chung hian a hmai bul set ah ka zu kun hniam a, kan in melh hnai set sawt hle. A mitmeng lian kel kawl leh mawi fahran mai a min rawn melh tak kiau ah chuan ka thinlung,lung ang mai a sak tak kha a tuiril leh ta zawih zawih nimai hian ka hria. Ava han hun lo ṭhin tak em. Engvangin nge ka thinlung chhungril ber hian he pawi nasa tak khawih tu hmeichhia hi a huat theih miahloh a, a ngaihdam tlat mai le? A lakah hian ka tlawm a, ka te chem chem ṭhin ni ber hian ka hria a, ka zam takmeuh meuh ani. 

“Chu zawng, i unaupa kha ila zawt vek dawn ania, target tur ka sawi mai a, a bak zawng chu a kut ah khan awm chhunzawm in ani chuan alo chingfel mai ṭhin. Pawi khawih tur a a chhuahbo hlan in kei chu biakin ah music ka play a, mipui ka awi muhil phawt ṭhin che u. Tichuan Emmanuela pawi khawih zo lo let leh kha biakin ah rawn tlang nghal in, a lawmman tur nawmchen chu kan chhunzawm leh ta anih kha. Engtinnge, khawi hmunah nge ava chinfel tak a engtinnge a tih tih hi engmah ka hriatpui lo taktak a , ka hriat leh zawng chu an ruang an chhar hnu a kan hmuh leh hi ani mai. Mahse, zep tur a awmlo, zanin hi ka patea mi laktlak loh tak thih zan tur ani a, keimah ngei hian thah ka tum bawk. Amaherawhchu tihian i rawn lang chhunzawm ve ta si a, thawnthu cbu a tawp dawn ta anih hmel e” tiin a mittui chu a rawn tling leh ta piau a. Ka khawngaih reuh hle.  A hmai bul chet a kun hniam in a hmel chu chiang zet hian ka la en reng a, a mitmeng chu natna hlir in a khat tih ka hre thei bawk. Chutah le, ka inrin hman hma hian amah chu rawn tho kang zawk in chiang tak hian ka hmui ah a rawn fawp ta anih kha! Kha hun kha reilote chauh mahnise, a nuam a ka khatliam veng veng a, ka kham lo hle. Chair a ṭhut ṭhat leh hle hle pahin min han nuih zui var var bawk a, amah vang chuan ka awmdan theihnghilh in ka danglam zo vek a, tih at in ka awm ta emni ka hrelo, amah phuarna te chu phelh zui sawk sawkin ka phelh zawh rual a a rawn ding chhuak chuan nghet zet hian min han kuah zui a, a tawp nan ti niawm fahran chuan chiang zet leh duhthawh fahran hian ka hmui ah bawk min rawn fawp leh ta mai. Keipawh chu eng ruai kalo nilo, amah chu lo kuah let ve chial in duhthawh tak bawk chuan  kalo fawp let ve anih kha. Mahse, muangchan chi ani lo tih hria in kawngka lamah ka nawr phei rawk rawk a. 

“Tlan rawh! Chhuak thuai rawh. Khawiah pawh kal la, fimkhur ang che” tiin amah chu ka en vawng vawng a, ani pawh chuan hreh hmel tak hian min lo melh let ve ṭawk ṭawk bawk. Hreh eng ang mahse chu hun ṭha chu a tan bawhpelh chi kha ani lo tih hria in rang tak chuan a inher zui vut a, a bibo hlen ta ani.  Keipawh ka tlanchhuak ve vut a, a kalna tur awm reng reng ka hria in ka hmu zui hauhlo. Che rang ve hlemai ti rilru sup in chu zanthiang leh reh ruih hnuai ah chuan a tlanna tur awm a ka rin,Lo mawng lam chu ka thlir zui vawng vawng. Mahse, rei rial lovin  inchhungah chuan ka lut leh a, bangkil a lo ṭhu ngawi reng leh ṭit hmel tak a lo meng khup dai mai hmeichhe naupang bal hrip hrep awmna lam chu pan in engkhaw sawi set set lo chuan ka han pawm kang zui nawlh a.

“A nu bulah kan haw dawn nia”  tiin thlam chu kan chhuahsan ta a. 

Thlam aṭanga hla lutuk lo kan thlen in  kawnglai tak ah hian Pu Rodinga lo mu hlawm reng chu ka hmu zui ta mai a. A bul kan han thleng, ka nau pawm chu lei a nghat sawk sawk chung hian Pu Rodinga chu sawi harh ka han tum leh a. A rawn meng zui ve suar suar bawk. Kan hmel a han hmu thut chu engdang sawilo in

“Khawnge irene-i kha” alo ti. Kei chuan aw nem lemlo tak a lo chhang let ve thuai in

“A tlanchhuak. A kalbo tawh” ka’n ti chu a rawn meng zau ta kawk mai. Thei leh theilo a ka kawr awm rawn ṭham chung hian aw khur hlak hlak in

“Tualthat a mi ru bo tu anih kha. Engtinnge i tlanchhuah tir theih zawk? ” a rawn tih chuan a kut chu zawimuang in kalo phelhsak ve riai riai a. Ram deuh hmarh hian

“Hmeichhe thianghlimna tih bawrhban sak a a hmakhua tihchhiat sak vek tu leh mi nunna tih tawp sak tu chu eng nge an danglamna? ” tiin ka thawhsan zui a. Ani chu alo thaw deuh hawk. Ka phone phawrh in Rinhlui ka call nghal a, kan awmna chin leh chanchin chu tlem a zawng hrilh in khawtlang hruaitute rawn hrilh ve nghal tur chuan ka ti zui leh zat zat. A fanu nungdam a ala awm thu an hre zet chu lawm avangin a ṭe ring ngei mai. Phone ka off thuai a, Sangsangi chu ka hnungpuak leh hnuin lei a mu hlawm reng Pu Rodinga chu no lo fahran hian ka han melh zui leh hram.

“Nungdam a ila awm thei kha Pathian hnenah lawmthu sawi rawh. Tin, i hun kal tawh a i thiltih sual lian takte kha ngaihtuah chhuak la, vawiin hi krismas anih tawh avangin rilru thar put hram lo tum tawh ang che. Krismas chibai” ti leh sup in kan kalsan ta a. 

Hetihlai hian khua pawh var ve ṭan ek ek tawh in leilung te pawh fiah lo ruai chuan an lang thei tawh ani. Chutia nau paw pah a ka kal bek bek lai chuan ka û nen kan in tawk deuh chawt. Ngawi reng a rei lutuk lo kan indinchilh leh hnu chuan min kal pelh mai a han tum zet a, chutih lai in zawi sap hian kei chuan

“Hmuh tur a awm tawhlo. Ka kalbo tir tawh” ka ti chu a ding zui leh chawt. Kei erawh chuan engdang sawi tawhlo in ka kalsan ta nal nal a. 

A pawikhawih chungchang emaw, a inchhirna thu hla emaw eng thil mah kha ka ngaithla zui peih tawhlo ani ber. Tun atan chuan mut hahdam chiah ka thlahlel tawh a, ka chak ber bawk ani. Tichuan kal zel in khua kan lut ta nge nge a, kar lovah Rinhlui leh midang tamtak pawh kan hmu zui ve ta. Rinhlui chuan a fanu chu  rawn ban vatin midang ho erawh Pu Rodinga buaipui tur chuan Lo lam an pan nghal sang sang. Rinhlui nen reilote kan inbiak leh hnuin chawlh hahdam duh chhuanlam chuan rei pawh rial tawh lo hian ka haw san zui daih a.

In ka thlen chuan chanchin la hre ve lo ka nu leh pa te chu an lo la mu reh ṭhap mai a. U Em-a hmel erawh ka hmu zui ta mai lo thung. Ka pa te room kawngka chu kik deuh karh karh in reilo ah ka nu chuan a rawn hawng ta mai a. Chutiang zingkar hma lutuk a ka han kaitho ta mai chu a hmel ah chuan a hamhaih hle tih pawh a hriat theih awm e. 

“Eng thil nge ni ta bawiha?” Tiin a mit te chu a han nuai zui chat chat a. Kei erawh chuan

“Ka pa kha han kaitho ve phawt la” tiin ṭhutkhawmna lam chu ka pan san leh. 

Reilote ka nghah leh hnu in an pahnih chuan an rawn inzui chhuak ta nge nge a. Ka hma zawn chiah a rawn ṭhut thlak pah in ka pa chuan a tarmit kar aṭang min rawn melh deub kar ta mai. Kalo zam chhe leh hman lek lek a, chutah, ka pa bwk chuan a aw han then deuh kharh pah hian

“Bawiha, eng thil hmanhmawh thlak nge ni ta le..tun ang varṭian ah te min rawn kaih thawh tak nulh mai. Han sawi ta che” a rawn tih tak sup ah chuan ka insangphek a, muangchan kual na hun a ni tawhlo tih hria in ka nu leh pa te chu tha khur der der chung hian engkim kha ka hrilh ve ta ani. Ka han sawi zo chu anni pawh an lo thaw deuh hawk nimai hian ka hria a. An pahnih chuan an in melh tawn ralh ralh bawk. An hmel ah khan lungngaihna tamtak pawh ka hmu tel thei asin. Ka va han khawngaih dun tehreng em aw. An fapa, chutah pawh û zawk nihna hauh tu leh piang hmasa zawk, an kut leh ke ber tur a an lo ngaih ve in chutia an hnunglam ah leh an hriatpui phak hauhloh leh rinloh lutuk a pawi alo khawih ta mai chu amah hring tu nu leh pa tan zawng a nat dan tur hi a chiang bik ngawih ngawih in a rinawm. Kei tak pawh hi ka na a, ka tliak hnawp anih si hi. 

Kan naupanlai te ka han ngaihtuah  kir a, ani chu ka û zawk anih na ah khan engkim ah ka ring in sulsutu ah ka hmang ṭhin. Midang lak a chhan ka ṭul chang in  ani chuan min chhan em em a, ṭanpui leh hnem ka ngaih lah in ani chu a tlanchhe ngailo. A kalna hmun apiang ah min hruai ve a, min hruailoh ṭum pawh khan ka ngen ṭawk ṭawk ṭhin a, min han hau ve deuh se, keimah vang bawk in nu leh pa te hauh a tuar let ve zat ṭhin anih kha. Tlem in kan lo leikang deuh a, lehkha zirna kawngah pawh khan min fuih fo ṭhin tu ani zel bawk. A thiam ang tawk tawk a thu ṭha min hrilh kha a bang lo a, nu leh pate thu a awih ṭhin em avangin keipawhin a tihdan chu ka zir chho ve zel a, tun hi kan lo thleng ta zel ani. 

Chutia ka û nen kan zinkawng te ngaihtuah pah a kalo mut dar dar lai chuan ka mittui alo luang kawi niaih tawh tih pawh ka lo hre miahlo. Ka han in hriatchian leh meuh chuan ka lukham te chu alo huh dup tawh hi niin. Tichuan engdang mah ngaihtuah chhunzawm duh tawhlo in ka muhil zui ta siai siai mai a.

Ka muhil ka harh leh meuh chuan khua pawh lo var chiang tawh hle in ni alo tlangsang tawh hle. Sitting room lama thawm ri leh khut khut ṭhin avang chuan ngaihṭha fahran lo hian ka han tho chhuak ve a, room ka chhuahsan rual a ka thil  va hmuh chuan min ti na in min va ṭhawng chiang si em. Police 3 te hian ka unaupa neihchhun chu hnungkhirh in chhuahpui an lo tum vel mek hi ani a, ka nu leh pa te pawh ka û thlir pah chuan an inkuah rial a, kanu phei chu hawi chhuak ṭha ngamlo hian ka pa awm ah a hmai alo phum bo daih a, a ṭap char char ani tih chu ka va hre thei. Chutah, kei room bul a lo ding ngawi reng chu ka û chuan min rawn hmu ve thuai in a mitmeng thuk leh thip zet chuan min rawn melh ta ngat ngat. Sawi tur chu a tam narawh, mahse, eng ber nge ka sawi chhuah tak ang. Unaupa, a pawi ani. I tihsual leh pawikhawih man chu i hmuh ngei a ṭul si a ti rilru vawng vawng in ka unaupa neihchhun chu jail run thim bel turin ka thlir liam ta. 

Lalpa, i rorel dan hi a fair lo, a fair hlawllo tih chauh lo chu sawitur dang ka hrelo ani e! 

*    **   *   **    **   **  *  *—-*

Leave a Reply