(Maruata Pov)

Class pawh kal peih lovin ka haw a, ka nu in min hmuh chuan a chhan min lo zawt vat a, ka lu nat deuh thu leh mut ka duh thu ka hrilh a, ka room lamah ka chho nghal a. Ka thil hmuh te khan min ti chau takzet a ni. A tana huaisen taka ding a, ka duh thu hrilh a, a bula ka damchhung hun awm ka duh thu hrilh ka duh laiin, ka beisei loh ner thil a thleng a, chu chuan ka thlarau thleng hian a ti chau vek ni mai in ka hria. Veronica-i kalsan hlen tura ka in ngaihtuah hian ka thinlung hi a na vawng vawng a, mipa dang nena an awm hlek pawh in ka thik em em ṭhin kha a ni a, midang nena awmdun tira, ka ta a ni ve ngailo tur hi tawrhthiam har ka ti takzet mahse kha thil ka hmu khan min ṭhawng a, ka chhungril ber thleng hian na takin a siam belh a ni.

A tellova awm tura ka inngaihtuah ringawt pawh hian harsa ka ti a, ka khua a harin mal ngawih ngawih a inhriatna nasa tak ka nei a mahse inṭhiangṭhatna chauh nilo rilru dang ka pu miau si a, mahse eng nga ti nge Ani hi ka hmangaih anih chuan a hlimna hi ṭawmpui in kaltir angaih pawh in kal tir mai tur ka ni zawk dawn lawm ni? Na lo turin ka infuih mawlh mawlh a mahse ka na tho si a. Mipa tan pawh hmangaihna vanga nat erawh tawrh a har lam chu a ni e. Hei vang hi lawm ka thinlung ka kharphui tlat ṭhin a, tumah ka hnaih ngailoh. Mahse hmangaihna chuan kal tlang theih loh alo nei hauh silova. Ani kha ka ṭhian ni turin ka hringnunah a rawn lut a, ka thinlung min ruk sakin, ka ta a ni ve leh thei dâwn silova.

Ka ngaihtuahna ka hmang nasa in ka taksa alo chau deuh nen ka lo muhil anih ka ring ka mit ka men a sana ka en chuan zan dar 7:00p.m alo ri tawh. Ka mutna aṭanga thawh ka tum chu ka bulah mu an awm tih ka hre nghal a, ka phu deuh zawk. Tu nge a?Light ka on vat a, ka en chu Veronica-i a ni, ala mu tui em em zui. Mahse henu hi engvanga ka bula rawn mu ngawt nge anih? A muhil hmel chu ka en vang vang a, hmeichhe hmelṭha tak hi chu a ni chiang alawm, a mit hmul buk lam lek lek dum ṭha zet te, a hnar ngur sang vah leh invuah fuh lutuk te, a hmui senno chek a strawberry rim nam veng veng ṭhin te hi, angel tam tak ai pawh in a ṭhat hial ka ring ṭhin mahse nga ti nge hetah a rawn mut ve? Ka ngaihtuahna zawk em ni le?

Ka ngaihtuahna emaw ka mumang pawh a ni thei, ringhlel zetin a hmai chu ka kut in ka chul thla dan dan a, ka khawih ngei si a. Henu hian eng nge a hriat leh tak? A mak hle mai heta a awm ve ngawt dan hi. A rawn meng thut a, min melh kuau a, ka phu nasa lutuk chu khum aṭangin ka tho nghal zawk, min la nuih nghek zui. A nui ring em em mai lehnghal, henu hi a â tawh zawk a mi? “Eng nge i rawn tih.?” Ka ti nghal hluk a, ala nui uar uar a, eng nge nuih zatthlak awm. A mittui tla phungin a nui a, atih dan ziah in ka nui kaih dawn a la ti vak vak zui. Ka tih ngaihna hrelo leh nuihna tur hre ve bawk silo chu khum bulah Amah melhin ka ding ngawi kur ringawt a.

“Nui nui lo khan eng nge i rawn tih sawi vat rawh?”ka ti ṭhawt chuan a ngawi chiang teh e. A tum nghal bar reuh a, Ka vin bawk si, ṭawng ring bawk si ah chuan ka nu a rawn thleng chho ve nghal a.

“Nu Vanlalruata hian min vin ziah ania.” ka zawhna pawh chhang lovin min la hek zat zui. Ka nu bula a inla pangchang kual vel chu ka pen lawlh zawk dawn a mi, chimawm thiam lutuk mai.

“Mama, nga ti nge kan naute hi ilo vin vak vak a, inphih fai la, chaw ei rawh u.” ka nu pawh chu eng nge a hriat ni, engtik lai pawh in Veronica Bawihi, Ka naute ti reng mai, hmeichhe ho hi chu ka hrethiam thei hlollo a ni.

“Nu, Maruata hi nupui neih tir tawh rawh a thinchhe si.” Chunu mai mai chu eng nge a hriat ni, rum zetin ka melh a, ala ngaipawimawh duh hauh lo lehnghal a.

“Aw, Bawihi tu nge kan neih tir chuang ang, bialnu pawh a hmu zo ve mi a?” Ka nu in a tih chuan hmeichhe tih dan takin ka ngei.

“Aw nu ngaihzawng a hmuh zawh loh pawh in kan innei mai ang, ti hian ka awm nghal mai ang chu.” ala ti deuh deuh a, A â takzet tawh anih hi! Ka nu la chuan ala hlimpui viau zui a. Nui var var in min chhuahsan a, ka meng rum ṭha leh Ani pawh a mitmeng a dang leh hlak tawh, a hmaa hlim hmel zeta nui kha tunah chuan kei ai aiin a mengrum zawk, a theih tawka rum in min melh ve khai a. ṭawng hmasak erawh ka tumhauh lo.

“Engvangin nge ka call i pick duh loh?” A ti chang fak a, a aw te chu bei rum ve sia, ka nuih nghek zawk dawn a mi le.

“Vanlalruat ka biak che chu.” thinawrhi a che leh dawn ta. “Ka pick leh pick loh chu ka thu thu alawm, buaina i nei a mi?” ka ti hluk a, lehlam ka hawisan deuh hmak a. Engtin nge a awm tiin ka melh ru reng tho. Ka chhanna avanga ngaihdan nih loh hmel zetin a lu a thing mat mat a, kut kuang kuah in a vei sek lehnghal a. Eng emaw tak a ngaihtuah leh tawh tih ka hria, thil atthlâk tak chu a ti bii em lovang chu maw.

Eng thil nge a tih hi, ka hnungah a zuang lawn thut a ka samah a kek anih chu. Ana bawk si a, ka dawh reng thei bik lo. Khum lamah ka bin thla pawp a, a chungah lawn kai in a kut hnih a man bet in a lu chhung lamah ka nem bet nghal a, a mit leh ka mit chu an intawng chat rual chu min melh zui kar a,
a che zawm ngam tawh bik lo, ahmui a liak huh zeuh a, a khawsa zia itawm ru lutuk chuan fawp mai lo turin ka in thunun nasa takzet.

Ka thlah thut a, bathroom lamah ka luhsan nghal daih. Engvanga khatianga atthlâk zeta chet la nge anih? Henu tak hi chu aw, min tibuai ve ngawt mai. Boruak lum ta lutuk leh ka lungphu rang lutuk vang chuan ka thaw hawk a, inbual ka mamawh ni in ka hria. Veronica Mimawlnu, ka lungphu hi i thunun vek anih hi maw! Natna min pe a, tunah kan inah lokal in ka pindanah i rawn awm leh a, ka natna te theihnghilh vek khawp in min siam leh chu a ni si a. Ka rilru hi hria la, hetiang hian ka bulah ila awm tho angem le?

(Veronica’s Pov)

Boruak lum ta lutuk avang chuan thaw halh in inhnuai lam ka pan a, Nuhmingtei te ṭhutna lamah chuan ka ṭhu ve a, Engthil atthlâk tak nge ka tih leh tak kha? Tuna thil thleng kha a mak tih bakin ka sawi thiam lo. Khatiang kha mi Ṭek chhuai an tih ve ziah hi le?

“Tunlai chu i rawn lang khat khawp mai, thil thleng a awm em ni?”tia Nuhmingte in min zawh chuan chhan mai ngaihna ka hre lehpek lo kan in hau a ka ti ringawt a, engtin nge a ngaih ang tih ka hrelo mahse nui sang hian, “Anih chuan zanin chu i riak dawn tak tak mi?” tiin min zawt lehnghal a, kan inhau tak tak em tih leh a chhan min zawt lo chu ka lawm rilru viau mai. “Um, a lungawi hma chu hetah ka awm char char mai ang, ka ti.” ka tih chuan an nupa chuan min nuih vur vur zui a, min zawt zawm tawh lo.

Chaw kan ei a, he misual lutuk pa hian vawikhatmah min be lova, melh pawh min melh lo anih chu, a thei ṭhin ania. Hetiang ringawt a min dawr leh chuan a chak lovang chu aw. A pawi sawi zawng hlir leh a nghal zawng hlir hian ka khawsa leh khawp ang.

Min biak duh miau loh avangin Inbe miah lovin kan mu a, a room a ka awm tlat avangin room ruakah a riak anih ka ring ve tawp, a room chu ka enkual a, a lehkhabu engkim mai chu a in rem fel em em a, kan in an lohzia ti chiangtu a ni. Mipa room anglo takin engkim a dah fel deuh thlap a. A thawmhnaw, pheikhawk dahna leh thildang awm reng reng chu fello lai hmuh tur a awm lo, engkim chu a awmna turah a awm thlap a, heng anih vang hian ka pindan chhung a luh chuan sawisel tur a hre ziah bawk. Khum lu lam bangah chuan thlalak tam tak awmze nei takin a bel ṭeuh a, ka hmuh fo tawh ni mahse ka en fo a, tunah pawh ka ennawn leh tho anih hi.

Uniform kan hak lai te, volleyball khelh lai leh kan pahnih thlalak tam tak a ni mai, thlalak thar alo bel nual anih hi tiin ka en chiang a, classroom a ka muthlu dawhkana ka bawk lai te, week laia a bag ak a ka ding tau lai te an ni hlawm pakhat chuan ka mit alak em avang chuan ka enchiang zual a, kan spot a keimah chiah a ka ṭhu lai a ni, Amah nghaka keimah chiah a ka ṭhut fo na ah khan a lokal ve ṭhin tihna em ni? Anih chuan min hmuh avangin a lokal thleng duh ngailo em ni ang. Kan misualpa mai mai chuh! Khalai hmunah khan nitin ka nghak ṭhin che asin, mahse ka awm tih i hriat avangin i lokal duh lova, a chhan pawh ka lakah i lungawiloh vang mai mai in. A ṭha e, ka hmangaih che tih hi i hriat kher a ṭul tawh lo, mahse ka ṭhian ni kumkhua tur erawh chuan ka chelh fo ang.

Ka hmangaih anih chuan a hlimna ka ṭawmpui mai hi ka tih tur a ni, min duh ve lo anih pawh in eng nge pawi, ka ṭhian chan hi ka duh lo daih zawk. Mahse ka ṭhian chauh ni tura ka ngaihtuah nawn leh chuan ka ui a, engtik niah emaw chuan midang ta, midang bialpa leh midang pasal ala ni daih awm si a, chutih hunah chuan kei hi engtin nge ka awm ve ang, ka duhna te hi reh lo ta se, ka natna ti zual tu mai mai a ni dawn si a. Ka thil ngaihtuah avanga ka mit a mittui tling pam chu duh lovin ka khap per sak a, nui lui sak in, “A hlim phawt chuan ka hlim em em ang” ka ti chhuak sap a. A khum nuam zetah chuan rilru kim lo tak si, hlim luih tum tlat in ka mu a, ka muhil tui hle aniang ka harh chuan zing dar5 a la ri lo deuh, ka tho a, thawm dim zetin Maruata room lam ka pan a, Ka room piah chiah a room ah chuan a mu ngei alawm.

Ka lut ṭham ṭham a, a muhil lai hmelṭha zet chu ka thlir vang vang a, ka ṭhianpa hi ka ta ni thei se ka hlimna hi a famkim mai tur mahse ka ta anilo a, ka duhthusam te pawh puitling turin ka beisei ngam tawh heklo. A nat viau pawh in ka nui hram hram tur a ni. Vanlalruat hmelṭhapa i tan ka nui reng tawh ang aw, ka chhungril hi na viau dawn mahse i tan ‘Ka ṭha’ tiin ka nui zel ang. Khuanu hian engtin nge kan chungah ro a rel dawn kan hre lo mahse kan ṭhatna tur chauh in a rel ngei ang tih hi ka ring tlat a ni.

(Maruata Pov)

Ka room a hmeichhia sawn min tibuai takzet, kalsan ka tum a mahse tunah kan inah, ka room ah ngei a rawn riak leh chu a ni si a. A ruka hetianga duhtu nih ringawt hi a lungawi thlak hlollo mahse a hlim lohna thlentu nih pawh ka duh chuang lo, chuvang chuan reilo te atan a laka ka rilru puthmang te hi ka thup thei mai ang. A bula awm ka thlahlel em em a, ka ta ni ve ngai dawn lo mahse ka bula reilo te chhung awm tir chu a sualna ka hrelo.

Zinglam dar3 thleng kha chu ka la meng a,a hnu lam erawh ka hre zui tawh lo mumang hahthlak zet ka nei lehnghal a, ka mumangah chuan tu emaw hian ka pumah lung lian zet hi a dah a, ka thaw a sakin hrehawm ka ti lutuk chu ka harh chhuak hlol. Ka meng ruala ka thil hmuh zet chuan min ti phu ve chiang hle mai. Veronica-in ka pumah alo thut bet a, min lo melh ran anih chu. Mi dawizep tak ni ila Ramhuai tiin ka au chhuak ngei ang. A va han hahthlak ṭhin tehreng em!

“Veronica, eng nge i tih hi, tho rawh i rit si ka thaw theilo.” ka tih chuan a meng rum zual sauh a, zingkar aṭangin kan in tibuai leh ṭan dawn a ni maw?

“I tih tauh avang leh min hauh avangin ngaidam min dil phawt raw..” a ti chang fak a. Eng nge maw a sawi leh tak hi, huiham ngaihdam indil hian ṭangkaina a neih ka hrelo.

Ka kut leh ka taksa chip vekin ka chungah a ṭhu a, Ka awmah a kutin a nem bawk a, a mitmeng rum tak sexy ru em em in min melh ve khai bawk a, hetianga a awm reng chuan kei mipa hi ka dik dawn hauh lo, mawl lutuk chutiang pawh a hrethiam lo chu ania.

“Veronica tho teh.” zaidam deuh a ka tih chuan,
“Aih ngaihdam min dil phawt rawh.” a la ti tlat zui.
Henu zet hi chu, kan mutna khum a te si, ka tal vaih chuan a tlak ka hlau bawk si. A duh ang hian han awm leh rih phawt mai ang. Anih loh zawngin ka khawih sil awng vek palh ang. A tlak hlauh zawngin a taksa a na ngei dawn si a.

“Anih Min ngaidam rawh, a thleng tawh lovang.” ka tih chuan, a ner nang a, “Mipa ka nih angin Ka ti tau tawh lovang,ti rawh.” a ti leh hram. Ka ti tau der silova, mawl reuh lutuk mai. “Awle ka ti tau tawh lovang.” ka tih pawh chuan ala tho duh chuang lo, va han hahthlâk ṭhin em? Min tikhawlo ṭep tawh tak tak a ni.
“Vawiin ah min treat ang.” hei erawh a sawi hmasak ber ka ring zawk a, a thinrim ka thlem apianga a sawi ziah a ni miau a.

“Umm kha chu.” ka tih rualin ka pum chungah a sawt nghek a, rit reuh bawk si, Ka aw leh ta nghe nghe alawm.

A tho a keipawh ka tho ve nghal, a nui var var a, a landan chu a lawmawm reuh lutuk, Nilo chu thil chu ka ngaihtuah tur a nilo. “I van chak dawn lo em!” Ka tih rualon a rak chhuak ṭhat a, nui hawr hawr chungin room aṭangin a tlanchhuak a ka um ve nghal, hetianga ka vanga a nuih hian nuam ka ti.

Ka thinlung erawh thup bo hlen turin rilru ka siam sauh sauh a, harsa chu ka va ti si em! Mite pawh in an hmangaih hmasa ber nupui pasalah an nei kher bik lo, ṭhenkhat te pawn ngaihzawng tam tak an nei alawm, ti te in ka in hnem ve bawk a, mahse henu bula ka awm tam poh leh Amah ka duhna a zual zel si a.

A tana ṭhianṭha ka nih ang chiah in ka ṭhianṭha chauh ni ve turin ka inhrilh nawn fo ṭhin. Ka vang chauha nui ṭhin kha tunah chuan RLa a tel ve ta, an infiam lai te, an nui dun te, an inchhaih te hian thik lo ka nilo, mahse V-i a hlim chuan ka hlim a ni mai. Ka Chhungril erawh tumah in min hriatpui lova, ka natna pawh tu hriat mah ka duh hek lo. Ka inthunun theih loh ka hlauh em avangin nasa zawk in lehkha ka zir a, Ka ngaihtuahna ata paih bo tumin ka lehkha zirah rilru ka pe nasa a, Doctor zir ngei tumin lehkha ka zir bawk a, entrance tihna tur form ka fillup thlap. Doctor nih hi ka tum ngailo, V-i nen Proffessor nih kan tum ṭhin. Mahse ka rilru ka thlak a chu erawh tumah ka hrilh lo.

Lehkha ka zir loh changin Save the last dance for me Classic zet hi ka ngaithla ṭhin a, a hla hi ka ngaithla ngai lo mahse V-i laka ka phut ngam ve awmchhun leh min hre ve reng se tia ka ngenna nen hian a inhmeh ka ti ve tlat alawm. Veronica-i la hian he hla ka ngaihthlak apiang hian min nuih nghek zel a, a chhan la ka hre der lo. Ani pawh ka ngaihthlâk nachhan engmah a hrethiam biklo. Amah ka ngenna ka sawichhuah ngam loh a ni reng si a.

Christmas kan hmang zo a, kum a thar a kan exam ni pawh a thleng ta. Kan exam zo a ka tling ngei dawn a ni tih ka chiang mahse Veronica-i ka kalsan a ngai dawn. Chu Ni lo thleng tur chu ka huphurh a, ka ngai nghal em em bawk, chhungril takah hian ka na a, mipa hi mittui tello in ka thinlung a ṭap ṭhin mahse tuna ka thil tih hi a dik a tih ka hria, Ka Veronica-i hlimna daltu hi ka ni tur a nilo. A kianga ka awm zel chuan ka inthup theihloh hunah rilru hrehawm takin RLa min pansan dawn tho tih ka hria, chu thil chu thleng turin ka duh lova, ka duh ngai dawn heklo.

Ka awm loh hunah chuan Anni pawh hlim takin an awm thei ang, khuanu hian rem a tih a kan la intawng leh anih chuan engkim a danglam tawh ngei ka beisei. Mahse kei erawh chuan engtikah mah Ka Veronica-i hi ka thinlung aṭangin ka paih chhuah ve theih ka ring tawh lo. Tu ma hriat lovin, ka thinlung chhungril berah hian hawn leh rual lohvin ka kalh hnan tlat si a.

Result a chhuak a, ka tling ngei e, ka chhungte ka hrilh chuan an lawm thiam khawp mai, mahse an mahni rawn lova ka exam erawh ka nu a lungawi chiah lo. Mite chuan Couching Class te kalin an beih laia kei tumah hrilh lova, ka tling erawh ka nu leh pa te hian sawi lo mahse min chhuang ve tih an awmdanah leh an ṭawngkamah ka hrethiam, chu chuan eng emaw kawng zawng takin min ti hlim thung. Mahse Veronica-in a hriat hunah engtin nge a ngaih ve ang le?

Dan pangai tê in, Veronica-i tih loh a, ka duh ber ka bike la chhuak in College ka pan a, ka rilru erawh a tawt ṭun mai, hrehawm ka tih zia hi tumah hian an hrethiam in ka ringlo. Ka rilru chuan “Ka Veronica-i hlimna tur a ni, atan vek alawm ka tih” tiin ka inhrilh nawn mawlh mawlh a chu chuan tlem te tak tak in min hnem ve.

College ka thleng a, a tam zawkin class an nei a, V-i nen kan kal rual tawh ngai lem lo a, Vawiinah pawh chhuanlam siamin ka kal tlai dawn thu ka hrilh kha ania. Gate aṭangin a chhunglam chu ka thlir vang vang a, helai hmunah hian V-i nen sulhnu tam tak kan nei hman a, lokal ve tura ka duhna hmun rinawm taka ka lo nghahna hmun ngei aṭang hian rilru na takin ka kalsan leh ta zawk dawn a. Ka va han ngai dawn tak em! A tello hian ka hlim leh thei angem tih pawh ka ngaihtuah ngam lo.

Thaw la hawk in, ka pen lut a, A first day aṭanga nimin thlengin ka ngaihtuah kim vek hman, tunah hian class a awm lovin ka bulah lokal in ngeiawm tak takin ṭawng in inhnial leh ila ti te in ka ngaihtuah a, ka ngaihtuahna dang erawh chuan heng zawng zawng hi Veronica-i tan vek a ni tiin min hrilh nawn thung. Sulhnu chhui lovin, Atan tih chauh chuan ka rilru luah se ka ti takzet.

Staff room panin ka kal a, Kan class teacher hmu turin. College-ah hian a thiam thei pawl ka ni a, kan class ah pawh ka sang ber ziah, sport lam ka lo ti thei ve leh zel nen duhsak pawh ka hlawh ve ṭhin khawp mai. Kan Sir hnena ka chanchin sawi a college ka chhuahsan a ngaih thu ka hrilh chuan min ui ve hmel takzet. Duhsakna min hlan luam a, zirtirtu dang lo awm ve te pawhin min chibai ve sap sap bawk, Staff room ka chhuah san a, Kan class room lam pana ka kal chu RL-a leh Veronica-i te ka lam pana hmanhmawh zeta lokal ka hmuh chuan ka ding nghal chawt a. Anni hi ka la hrilh hauh lo, mahse V-i hmel ka en chuan nuamlo tihna in min tuam nghal a, mittui tling pam in min melh ngawt ngawt a, Ka Result kha an hre tawh a mi le? An hria anih chuan keimah ka ni tih a hre nghal dawn, a chhan chu pakhatna ka ni tlat alawm.

“Nang Misualpa..” ṭawh aw ṭau in a ti a, a hmelah chuan a thinrim hle a ni tih ka chiang, ngawi reng in ka en ngawih ngawih ringawt, ka rilru chuan heng zawng zawng hi i tan a ni ka ti lehnghal mawlh mawlh a. “Misual, mi sual tak, Misual Boss i nih kha, ka haw lutuk che.” a au chiam a, a mittui a tla nasa bawk nen ka en thei tawh lo, ka pan hnai a ka awmah kuah bet a, tal chhuah tumin a ṭang ve nghal phat, mahse a tal chhuak hauh lovang, a hnungah ka chul heuh heuh a, a inhnit nghal hlap hlap a. A awmdan zet hian min tih nat rualin,eng emaw kawng zawng tak chuan ka lawm. A ṭah avanga lawm chu ka ni hauh lo, mahse henu hian min hre ve reng dawn a chuan ka ngaih ang em chuan min ngai ve lo anih pawh in tun dinhmunah erawh min ngai ve hle tih ka hriat hian ka lawm takzet.

A duh tawka a ṭah hnu chuan, ka thlah ve hram a. Min en duh miah lo lehnghal, a biang tawn tawnah dawm in ka kuai dak a, a mit ala chhing tlat zui,na biang huh hliam chu ka kutin ka hruk sak a. “V min en rawh..” ka tih chuan muangchangin a meng a, a mitmeng mawi tak hi engtikah nge ka hmuh leh ang. Ka nuih suk a, a chalah ka fawp nghal vawng vawng a.

Kha Ni Veronica-i ka Best Friend leh ka hmeichhe hmangaih leh a awmchhun ka thlah liam na Ni kha ka theihngilh leh tawh ngaiin ka ringlo. Ka nuna hmun pawimawh ber changtu, ka hmangaih em em ka ta ni ve ngailo kha ka ngai a ni. Khang Ka nunhlui hlimawm leh nuam zet te kha chu Kum8 liam ta a mi vek kha an ni tawh si a. Mahse nimin ral ta ang mai khan ka la ngai a, Nitin a tharin ka inhrilh nawn fo ṭhin Ka hmangaih tana ka thil tih theih awmchhun a ni a, ka tisual lo, tiin.

Ka kalsan aṭang khan Ka ṭhiante leh midang biak pawh theih loh turin ka phone number ka thlak a, ka chhungte takngial pawh Kan hostel phone number chauh ka hrilh, Ka chhungte chauh ka bia a, ka biak chang a Veronica-in a tlawh ṭhin thu leh a lung a len thu an sawi ṭhin, mahse be tura min tih pawh in ka duh loh thu leh min biak tir lo turin ka ti tlat a,ka nu leh pate pawh an lung a awi lo hle, mahse eng nge ka tih chuan ang. Ka tana ruat hmeichhia a ni miau silova.

Khang kum 8 chhung khan Nikhat te mah ka theihngilh ngai lo a, a hlim a ngem? A ṭap angem engtin nge a awm ve tak zel tih te ka ngaihtuah a. A chanchin hriat chak em em ni mah ila ka natna ti zual tu mai anih dawn avangin, Ka nu in a chanchin min hrilh dawn pawh in sawi ka duh ngai loh avangin chhuanlam siam in phone ka dah zel. Thil dang zawng zawng ai chuan anpasal neih Hun hriat ka chak lo ber bawk. Tunah chuan ka nu pawh in a chanchin a sawi tawh ngailo.

A la hmelṭha reng angem? Bike ala lawm in sport ala thiam angem nge ni a, chung zawng zawng chu a bansan vek tawh zawk? RLa nen khan an innei tawh ngei in ka ring a, chhungkua din a fa te nei a an hlim bik tur zia ka ngaihtuah in thikna hlirin ka khat ṭhin.

“Eng nge ilo ngaihtuah leh tak vung vung a?”
Ka dara kut nghat paha ti tu chu Emily a ni. Ani hi doctor ka zir pui a ni a, hmeichhe hmelṭha leh nu tak niin, kawm a nuam hle bawk. Mipakhat telin kan inkawm chawt ṭhin. Coffee no 3 khu vat vat chawia rawn nui phei vur vur chu ka sawi tak kan ṭhian, kan doctor pui David-a a ni, Ani hi chu a harh a, a zuan a zang bawk a, kei ai ngawt chuan a ṭawng duh bawk.
Kan zir ho a, intern kan ti ho bawk a, chuan tunah kan thawk ho leh vek a, Mizoram hnuaiah kan dil ho leh vek bawk a, thla tharah kan ram ngeiah kan haw thei tawh ang. Mahni rama hnathawh chu chak viau mah ila, Midang zawng aiin Veronica-i ka hmu hreh, Ngai em em chung siin, a danglamna hmuh erawh ka hreh takzet a ni.

Ka ṭhiante an ti ti mawlh mawlh lai chuan kei erawh Veronica-i nena kan inbiak tawpna ka ngaihtuah let daih a, “I sual ka ti ngawih ngawih che.” teh thlawt ṭhin hian, ka rilru hi a hrethiam ve bawk silova.

“Veronica.” ka ti chuai raih a. A hlimna tur ti si hian hreh taka min kal tir tu a ni bawk si.

“Hetiang hi i ti dawn tih hria ila min hrilh in kan ti dun thei reng, Min ning viau tawh a ni ngei ang.”a ṭap tiau a. College a aṭah hrep hnu khan min hmu duh miah lova, chuan Airport-ah RLa nen an lo lang hlol a.

“Tu in nge min duat in, min ti thinrim tawh ang. Tu in nge harsatna ka neih in min chinfel pui ang, ṭap thlemtu pawh ka nei dawn tawh lo asin?” Naupang chhia zetin a ti a. A thusawi avang chu chhang lovin ka ngawi ngul thung. Nidang ang ni se zawng ka nuih leh ngei tawh ang.

“I laka ka thinrim ziah vang leh ka ṭah ziah vang mi min kalsan i tum?” tiin a inhnit leh hlap hlap tawh a. A ṭap reng hian min ti hrehawm takzet.

“Hey, ṭap tawh lo la, RLa pawh a awm a, kei aiin a duat zawk dawn che alawm chuan i hlim bawk nga, nui chungin min thlah la umm.” Naupang chhe inthlem kan ang takzet. Ani pawh Ka thusawi avang chuan a ṭah nuih hawk a, eng emaw sawi tumin a ang zuai a, a chip leh hmuk. Midang min thlah tura rawn kal te hmun dangah an kal vek a, kan pahnih chauh in kan inbia a.

“Misualpa Tu nen mah intehkhin suh, ka tan chuan i danglam tih in hre reng rawh. Ka Best Friend i nih hi.” atih chuan ka lu ka bu nghal nghut a, ṭawngkamin ka chhang theilo. Veronica-i ka chhun zo tawh ka ṭap ve mai dawn tlat. Min kuah a,,,midang an rawn kal hnu pawh in min thlah lo, Mittui kar aṭanga nui lui in min thlah liam anih kha. A best friend ka ni, a dang a awm lo. Ka let hunah erawh engkim a danglam tawh ngei ang. RLa nen an ni dawn tawh a, chu thil hmachhawn tur chuan kum8 chhungin ka inbuatsaih tawh bawk. Mahse ka inbuatsaih nasat poh leh Ani hmachhawn leh kha ka huphurh tulh tulh si a.

Khang Kum8 chhung khan a aw (Voice) vawikhat te mah ka hrelo a, a nui ri la ka hre ngai heklo. Ka mitthla theih zawng uniform ha a min chhaih thinrim fo leh College a, a tlanchhe kual zawr zawr bak ngaihtuah tur ka neilo. Tunah chuan nula puitling tak a ni tawh ngei ang, eng hna nge a thawh ve ang le? Lehkha thiam thei tak a ni a, hna sang tak pawh a thawk ngei ang, nge ni a inchhungah nu niin a fate a enkawl ang. Veronica ka ngai ṭhin che asin, ka ngai reng che a, tunah ka rawn haw dawn a, min haw viau anih pawh in, i hmelmaah min chhiar lo la, i thinrim hmel nilovin i nui hmel tal kha min hmuh tir leh rawh aw. I fate hnenah tal I Best Friend ka nih thu hrilh la, hring fate khawvelah awmdun theilo mah ila, ṭhianṭha chu ni reng ang aw. I lungawiloh avanga i ṭhianṭha ber ka ni thei ta lo anih pawh in, i hmelhriat tal nih ka la duh ania.

Conti…..

BEST FRIEND-10

(Maruata pov)

Mizoram ka thlen aṭangin thlakhat lai a ni leh ta reng mai. Veronica-i hmel hmuh tur a awm lova, hmelhriat neuh neuh hmu ve ṭhin mah ila, Veronica-i chanchin erawh hriat tur reng a awmlo. Ka chhungte pawh in an sawi ngai hek lo. Ka zawt dawt hreh ve tho avangin hmu chak viau mah ila tihian Amah hmu miah lovin ka la awm chu ania. Thil pakhat atthlâk zet tih ṭhin erawh ka nei, zan tlaiah ka duty zo ka haw fo a, an in kawtah rei tak tak dingin ka in ang chiah a ka lo ngaih ṭhin, ka ṭhiannu leh ka hmangaih te in lam chu ka thlir vawng vawng ṭhin.

Kum8 hnuah pawh Ka thinlung hi a danglam ve thei silo a. Ani khan vawikhat chauh pawh ka en ang hian min en ve sela chuan kei hi he khawvela mipa hlim ber ka ni mai tur. Mahse atan chuan A Best Friend chauh ka ni si a. Ka tih ṭhin ang bawk in an in kawtah ka car in ka ding leh a, a room light thim ṭiap chu ka thlir reng a, ka bula ṭhu an awm pawh ka lo theihngilh daih a ni e, ka dara kut a rawn nghah chuan ka harh chhuak nghal zawk a, “Sorry Em.” ka ti nghal sap.

Emily-i chuan uluk zet hian min lo en a, a hmela hrehawm tihna ka hmuh chuan ka in thiam lo zawk,
“Hmeichhe vannei tak ni tur a ni asin,” tiin a nui sen sen a, “A mawl lutuk a chutiang chu a ngaihtuah pha ve lo.” tiin ka nui lui a. Ka ṭawngkam hman mawilo deuh avang chuan a mithmul a kan ak, mahse sawifiah ṭul ka tilo. Hetiang ṭawngkam te chu Veronica-i hnen aṭanga ka zir vek alawm. Min ngaisang ti ziah tu hian ka lo ngaisang a ni zawk hial ta ve ang, a tih dan leh chindan thil tam tak ka la chhing fo si a.

“Kan lut dawn lo a mi?” Emily-in a tih chuan, ngawi ngul in motor ka ti nung a ka tlan nghal, ka lut duh lo tih sawi hran a ngai lo. He hmeichhe fel zet hian ka ṭawng ngai lovin ka awmdan aṭangin ka duh zawng a hre vek ti ila a sual lovang, ka thinlung thlenga min hrethiam tu ṭhian ka tawng hi ka lawm a ni, Veronica-i erawh engkimah tumah in keimahah hian an tlukin an luah lan thei ngai dawn lo.

Ward ka round zo a, OPD lama ka duty hma tiin coffee lam turin ka kal a, corridor-a ka kal pel te chu ding meuh in ka en a, Anni pawh in min lo hmu ve chiah, RL-a leh Veronica-i te anni chuan RL-an mipa naupang kum2 rual tur vel a pawm a, hai rual lovin a fapa tih a hriat. Anih chuan an innei tawh tihna a ni ngei ang, chuan naupang saw an fapa anih ka ring ve tawp bawk. Sawtiang thil hmuh saw ka inpeih emaw ka ti a, mahse ka la inpeih meuh lo chu a ni e, ka chhungril lam hi a na nghal vawng vawng a, thaw chhuak hawk in ka room lamah let leh in a zat vang ni miah lovin ka nuih hawk.

Ka pindan lama rei lo te ka awm hnu chuan thaw la vak in, ka awm chu ka dawm vang vang a. Tunah hian ka hmachhawn tur a ni, tuna ka ti tilo anih chuan engtikah mah ka hmachhawn thei ngai dawn lo ti rilru in ka tawhna lamah chuan ka let leh a, “V” hmu thit anga lang luiin, Veronica-i chu a hma ang tho in ka ko a, mahse a nui lova, thinrim hmel a pu hek lo, min melh ngar thung. RLa zawk chuan ka chibai theih nan a kut rawn phar chhuak thuai in, “Maruata chu, engtik nge ilo haw a, chuan hetah i thawk a ni maw?” A tih chuan ka chibai ve ngha vat a.

“Thlakhat lai chu ka awm leh tawh, eng nge in rawn tih dawn a?” pangngai taka lan tumin ka chhang a, Veronica-i erawh a ṭawng lo hrim hrim, a mit ala sawn hauh lo a, a awmdan chuan min ti awm nuam lo zo vek. Biak duh viau mah ila midang ta anih tawh ang bawkin RL-a nena kan ṭawng kara biak tum hram kha thil nih dan tur pawh a nilo. “Bawiha check up tura rawn kal kan nia, a hun ṭep ang, kan la inhmu leh dawn nia,” a tih rual chuan an kalsawn nghal a. Ka en zui lovang tiin ngaihtuah ve mah ila Veronica-in min be miah lo khan ka awm a ti nuam lo in, kan kar a tawp tak tak tawh a ni tih min hriattir a, min haw hle anih ka ring bawk.

Mahse ka hawi let a,,,RLa chuan a kut pakhata a fapa pawm in a kut leh lam in V-i dar a chul heuh heuh a, kuah chungin damdawiin chhung lamah an kal liam a, Ka awmchhung tawt ru ṭun hi tirehna tur ka va’n duh em. Hetianga awm tawh tur hi ka nilo, Ka kalsan chhan ang chiah in Veronica-i pawh a hlim in a hmangaih ber nen chhungkua an din tawh alawm, ka ti rilru a, mahse ka chhunglama na vawng vawng ṭhin erawh a reh thei silova. Ka dara tu emaw in min khawih zeuh chuan hawi let vut in, ka nui nghal suk.

“Kha kha mi Veronica-i chu?” Emily-in a tih chuan Aw tih nan ka lu ka bu zeuh a, “A va chhelo ve, min hmelhriat tir ve rawh aw.” tiin a nui sen sen a, ka chhang lo.

“Nangni pahnih chu, duty in nei lo a mi?” Kan bul a rawn thlen ruala David-a’n a tih chuan Coffee in phawt ka duh thu sawi in, kan inzui leh ta dial a.

Ni a ral a, kar thar kan chuangkai leh ta. Khami ni a Veronica-i ka hmuh bak kha ka la hmu leh ta miah lo.
Vawiin chu University lamah kan kal dawn a, blood donation programme kan hmang dawn a,nDavid-a leh Emily-i te an tel ve dawn bawk a, staff dang pawh kan awm nual ang, Thisen pe duh tana hmun kan neih zau lutuk loh avanga pan tur kan ni. Kan thleng a zirtirtu ṭhenkhatin min lo dawngsawng a, Hall-ah kan pe dawn anih hmel, keini lam pawh kan inbuatsaih nghal zung zung a, Chaw hma lamah ringawt mi 80 chhuang in an pe hman, chhun chawlh anih vangin corridor ah chuan ka ding a, ka ṭhiante erawh khawi lai dawr velah emaw an kal anih ka ring, Eng nge ka hmuh leh tak hi! Mak ti hian henu hian min siam reng dawn anih hi!

Ka lam pana coffee cup kenga lo kal chu ka en reng a, smartpant dum thui nalh zet leh pheikhawk tlem a sang a bun a, a chunglamah erawh kamis var body fit zaih ha in a inthun thlap a, a sam dum tle zet chu a thlah a, hman ang tho in make up sawi tham a hmang lo, a incheina chu inhmeh tak a ni. Tunah chuan a landan pawh a puitling ve ta hle mai. Ka bul a lo thlen chuan rum zet hian mi melh a, min ti hrilhhai leh hle tawh. Min be dawnlo tih hriat zetin a chip hmak bawk si, biak ṭan dan tur a vang takzet.

“Eng nge hetah i tih ve?” Ka tih chuan ala ner sak zui, Sawi tur dang hre miau hek lovin, ka ngawi ve nghal hmak. Ni leh lo sawi tur leh zawh duh chu ka ngah lutuk mahse bul ṭan dan tur ka hre mai lo a ni.

“Kei chu tu emaw anga rilru thlak zung zung chi ka ni ve lova, helai hmunah hian Vanneih thlâk ka ti dawn nge vanduai thlak ka ti dawn hna ka thawk ve tlat.” Min chhang tawh dawn lo emaw ka tih hnuah ngeiawm zetin min chhang a. A ṭawng duhdan la chu min tihchhan tih la chiang reng. Ala chimawm reng anih hmel. “A va lawmawm ve a, hnathawk an tam si a, eng hna ber nge i thawh a?” tiin ka zawt lui kher a, mahse hei erawh ka chiang henu hi heta a thawk anih chuan Professor a ni dawn tih hi. Mahse hetianga ka zawhna chhan erawh a mize ngai kha tlem tal ala nei em tih ka hrr duh a ni.

“Hmela, Misual Boss aṭangin Doctor-ah, Chuan hei tunah Misual Boss i nih leh tawh.” tiin min melh rum al a, a nui duh miah lo lehnghal. Ala danglam lo tak tak anih dawn hi.

“Wow Professor ilo ni tawh bik a, ka lawmpui lutuk che nia aw.” tiin ka nuih suk a, mahse tinge henu hian hetianga min melh leh tak a, chik zetin min melh a, a thinrim mitmeng kha a hmuhnawm zawk asin le. Eng nge a ngaihtuah ang le? Engtin nge a ngaihtuahna hriat theih miah lova hetianga a awm ve tak theih a?
Kum8 liam ta te kha chuan engtin pawn awm se a ngaihtuahna zawng zawng hi lehkhabu a inziak chhiar ang mai khan ka chhiar thei ṭhin kha a ni a, tunah chuan eng nge a ngaihtuah tih ka hre thei hauh lo, a mize danglam ka hriat hmasa ber a ni.

“Tu in nge Professor ka ni ti?” A thusawi avang chuan ka meng phawk viau mai, Proffessor anih siloh chuan hetah hian eng hna nge a thawh? Sawi tur pawh ka hre tawh lo. Ka hre tawh lo tak tak.

“Mawl lutuk.” ka hriat tur kherin a phun sup a, inher in min kalsan nal nal zui. Eng chu nge a hriat teh hrep ni? Ka best friend i ni min ti ve a, tunah kum8 ral hnuah kan in hmu leh chauh a, engah mah min ngailo ang mai in min la en zui a, Misual Boss min ti a, Amah zawk hi anih hi Misual Boss dik tak chu.

Ka lungphu la hi hun lo deuhah hian lo phu rang ve ziah lehnghal, “Ṭul lo lutuk mai” ti hlukin ral leh lam ka en nghal nulh a. “Eng maw ṭullo chu?” David-a leh Emily-i te ka bulah an rawn ding ve nghal a, min la nuih sawng zui, Veronica-i nena kan inbia kha an lo hmu hman a ni ngei ang. Chawhnu lam kan ṭan leh hnu pawh in Veronica-i ka hmu leh tawh lo, a lo luh ve mial takin tiin ka zawng ru reng a mahse hmuh tur a awm lo hrim hrim.

Kan haw dawn chuan Chevrolet Car Pawl nalh zet hian min rawn tlan pel fua a, ka ṭhiante nen a kan dinna zawnah chuan rawn back leh in, glass a down a, Ka mihring hmuh chuan mak tiin min siam leh ta, Veronica-i leh bawk.

“Vanlalruat,” tiin card min pe a, ka la ve mai bawk a.

“I number min pe ve dawn lo a mi?” A tih chuan ka hrilh nghal vat a, henu em em hi chu mipa te zawng zawng khum tura Pathian siam sual anih ka ring. A no ka dil hma in min pe a, chuan ka no min dil bawk a, a lalna huang chhungah chuan ala in Duh em em zui a, “I va induh ve?” ti ngawt ila, min chhanna tur la chiang sa, “Ka in paih phal ngawt lova chuvang chuan ka induh ve lovin.” a ni leh tawp mai. Ka no ka sawi zo a, a tlan chhuak nghal daih a,”Hrep tak hian.” ti chhuak supin ka motor ke kan pet ringawt bawk a.

Tunah tak hian ka ṭhiante hmaah hian nep ka in tih vang nge, Veronica-i ka hmangaih em em danglam ta lutuk leh min ngaihtuah lo tih hriat zeta a khawsa vel ka hmuh vanga thinrim ka nih pawh ka in hre hrep love. Ka ṭhiante pahnih chu ngawi rengin ka bulah an ding a, an tih sual ni miah lova ka thinrimna an hmaa ka tihlan avang chuan ka inthiam lo zawk. Car kawngkhar hawnga Driver seat a ka lut tur chu David-a chuan min chelh in, “Maruat, ka lo khalh zawk dawn a mi?” A tih chuan ngawi renga chahbi pe in a hnunglamah ka lut nghal vut a, Emily-i pawh a rawn lut ve nghal vat bawk.

Ṭawngka in sawilo mahse ka inthunun theih nan Emily-i chuan ka kut a hum ran a, a hma a David-a chu bia in an titi dun char char tho. Kei erawh glass down in, pawnlam ka hawi daih a. Kha nu kha engtin nge a danglam theih em em a? A mize ngai reng ala nei nia ka hriat laia ka hlim hman tehreng nen, alo danglam tawh hle si a. A tan hian ṭhian takngial pawh ka ni tawh lo tihna em ni zawk? Ka hmangaih em avanga a hlimna tur tia hrehawm tam tak tuar tu hi, hre ve kherlo mahse ṭhian ang tal pawh in min en thei tawh lo tihna zawk em ni?

Kei chuan khang hun chhung zawng khan vawikhat tê pawh ka theihngilh ngailo asin. Ka hmangaih angin min hmangaih ve lo tih hre reng chungin engvangin nge a lakah beiseina ka lo neih ve leh ritngawt le? Midang ta a ni tawh a, a hma anga innel tak leh inhnaih takin kan awm thei tawh lo anih pawh in, kan in hmuh leh dan erawh ka ngaihtuahna nen chuan in ang lo tak a ni. Hlim takin ṭhianṭha angin kan inhmu khawm tawh ang tiin ka ngaihtuah ṭhin kha ania mahse henu khawsa zia en chuan hmelma kumhlun kan ni maw tih tur kan ni. ‘Mi Mawlnu, I ṭhianpa hi engtin nge khatiang teh hrep khan i ngaih pawimawh loh theih a?

(Veronica’s Pov)

“Feli, Veronica.” ka nu min kohna ri ring zetah chuan Ṭhutkhawmna lam chu ka pan ve a, chawhmeh lei turin min ti lehpek tawh. Lei tur a ziahna list min pek chu la in, Ka pa scooty chahbi ka la a, thuawi ber angin kei Nula Sinior hi ka chhuak nghal. Chhungkaw chaw eikhawm kan nei dawn a, ka buai leh ber anih hi. Kum 6 liam ta khan Umaman nupui a nei a, an vannei nge fa3 an nei tawh zing deuh deuh in, Udindini pawh in sinior hnuah a nei ve bawk a,nfa 2 an nei tawh bawk, Usanga pawh in Kumkhat leka upa fanu hmel cute zet a nei tawh a, a hna avangin khaw dangah an awm a Umama te nupa erawh In puiah an awm thung.

Usanga te chhungkua an rawn zin avanga chaw eikhawm hi rawt an ni a. Udindini te nupa pawh an fel khawp leh viau, zing aṭangin an rawn lang tawh a, Umama nupui nen rawngbawl leh thil dang ṭul an ti a, ka pa leh Udindini pasal Sangpuia leh Umama erawh Ṭhutkhawmna lamah eng eng emaw sawiin an ṭhu a, kei ve chu tirhkah ah ka ṭang leh tawh. Tirh rual pawh hi ka ni tawh chiah lo asin le. Ti tu tur dang an awm ngang lo ania nge.

Kan awm khawm hi chuan children park kan hawng hi a ni ringawt, kan ri laih laih reng ṭhin. Kan inchhung bengcheng zet kalsan chuan ka pa scooty chu khalh in Bazar lam ka pan a. Maruata te in a pen kawi zawk ka tum chuan kawngkhara Maruata leh Hmeichhe pakhat hmelṭha zet leh nalh em em rawn in zui chhuak ka hmu thut a, ka hmuh sual anih ringin ka en ngun viau mai mahse ka hmu sual lo, Amah Vanlalruata ngei kha a ni. Ka awm chu ka dawm vang vang a, ka lungphu chu a inthum rawn tluk tluk a, thaw ka la nghal halh bawk. Anni chuan min hmu ve lo tih ka hriat avangin lut duh lovin ka tlan liam nghal a, Ani kha Mizoramah a awm leh tawh nge alo haw mai mai zawk? A chanchin engmah ka hre ngai lova, a kal hnu lawkah biak pawh theih lovin a awm a, a chhungte pawh Amah in a rawn bia a nih loh chuan biak pawh na tur an hre lo.

Engvanga hetianga ti nge anih? A tan hian ka lo hawksak viau a mi? Ani kha ka ngai em em a, engtik lai pawhin ka ngaihtuah ṭhin. Ka rilru put hmang tal hrilh lova ka kal tir kha ka inchhir ṭhin. Ka theihngilh theih mai ka rin avanga sawi lo ka nih te kha pawi ka ti ṭhin mahse se bo hnua se khawngkhar an sawi ang maiin engkim a tlai zo vek tawh si a. A kal liam a, ka velah mi tam tak awm mahse a tello chuan ka mal ngawih ngawih a, min kalsan avangin ka thin a rim a, ka na em em bawk a, Ka tana ṭhian satliah a niloh zia a hrethiam duh tlat lo te khan ka natna hi a tizual fo ṭhin si a. Nga ti nge Lalramliana min kalsan ang mai a, Ani hian a tih ve kher? Kalsan ziah hi ka phu reng em ni?

Vawikhat chauh ka thinlung hi hrethiam ve se ka ti ṭhin mahse a hrethiam duh silova, hrilh ka duh em em chang pawh in a inkhar khip tlat avang khan ka ngam leh ṭhin lo anih kha, min kalsan chhan ka hrelo a, Ama vanga ka mittui tla zawng zawng avang tal pawh khan min khawngaih ve tal tur a ni asin. Ka ṭhian chan ka hlauh luatah mahni inthup in a bulah ka awm ṭhin a, mittui tla a min siam pawh in ka pan zel a, mahse Ani hian min kalsan tumna rilru alo pu reng a. Class a ka awm laia kan class hmeichhia ho in, Result chungchang an lo sawi laih laih na lamah chuan ka kal ve a, eng result nge ti a ka zawh chuan an vaiin mak ti hmel takin min en ṭhap zui, a ngaihna hrelo zeta ka melh let takah chuan pakhat hian,

“College Star kha entrance exam naah pakhatna a ni tih i hre lo maw? In inkawmngeih viau si a.” atih chuan mak tiin ka melh hu ringawt a. An phone bih lai chu ka pawtthla a ka en ve nghal a, Vanlalruata ngei a ni chuan kei hian engmah ka hre ve lo.

Ka chhungril hi a na nghal vawng vawng a, min kalsan dawn, ka mipa hmangaih in min kalsan dawn, he thu chiah hi ka thinlungah a awm anih kha. Class aṭangin ka tlan chhuak a, RLa nen kan intawk, Ani hian a hre ve em?

“Fel, maruata.” sawi zo lovin min thlek vut a, a hre ve chiah anih ka ring.

Corridor lamah ka kal hlawk hlawk a, ka tlan a ni mah zawk, rin loh lutuka Maruata hmel ka hmuh chuan ka na zual sauh. Ka sawi duh pawh ka sawi chhuak ṭha thei lo, min kuah pawh ka hua. A thil tih dan engkim mai hi ka haw vek. Engtin nge kei hi awm ve se min tih reng reng? A tello a nikhat lek ka awm pawh hrehawm ka ti anih kha, thla 4 ngawt min hel a, Amah hnaih turin ka theih tawp ka chhuah a, mahse tunah min kalsan hlen a tum leh tho a, Misual Boss diktak chu alo ni takzet anih hi!

Ka thinlung a ti na a, ka ṭhian ang chiah a hriat reng tum khan theih tawp ka chhuah a, hun awl nei hman lovin lehkha ka zir nasa em em a, Professor ni turin theih tawp ka chhuah a, Ka hlawhtlin hnu pawh in min lawmpui turin Maruata ka kiangah a awm chuang silo. Kum8 chhung khan nikhat te pawh ka theihngilh ngai lova, ka thinlung a danglam hek lo, Mahse Ani khan vawikhat tê mah min rawn be lova, Mizorama a rawn let pawh ka hre lova chuan a nunah hmeichhia a nei tawh bawk.

Ka scooty tidingin kawng sir rem laiah ka ding a, ka ngaihtuahna vak vel avang chuan ka mittui a far fap fap a, nui lui sak in, “kum 8 hnuah chauh maw i lo let” tiin ka phun sap a, sana ka en chuan dar4:00p.m ri ṭep tawh. Ka nu chuan rei min ti leh tawh ngawt ang chu, thaw la hak in Bazar panin ka tlan leh nghal a.

Nimin chaw eikhawm lai khan RLa khan Bawiha checkup a ngaih thu kha a sawi a, vawiin anih avangin ka insiam mawlh mawlh a. RLa hian M.A a zawh khan an chhungkaw sumdawnna a enkawl a, a thutiam ang chiah in ka tan ṭhianṭha ber leh ka mamawhna apiangah ka tan a awm reng ṭhin.

Maruata vanga kar1 zet in a ka tawmbo lai khan Nitinin RLa hian min lo tlawh ṭhin a, Maruata chanchin pawh a hnen aṭanga hria ka ni. Kan ina Maruata’n a kal hun tur a rawn sawi pawh in room-ah ka inkalh hnan a, ka hmu duh lo anih kha.

Airport-ah khan Rl-an tih luihna hmang tak takin min hruai a, kei hian ka hmangaih ka kal tir mai tur kha na ka ti em a ni, nui lui chunga ka thlah lai te khan ka chhungril erawh a na vawng vawng a, tu hriat pui si lovin ka thinlung hi a rum vawng vawng kha a ni si a. Engmah min tiam lova, kan inbe ṭhin dawn alawm emaw ka lo haw min lo nghak rawh, pasal lo nei bik suh tih tal pawh engmah a sawi lo. Thu tlem tal sawi se, min tiam se ka ti a, kan inṭhianṭhatna tal vawng reng tur talin mahse eng thu mah a sawi lo anih kha.

A sawi loh ang chiah in kan inkar pawh a tawp fel hmak tih hrethiam lo rual ka ni lo, ka ngaih avanga ka ṭahna te khan a awm loh zia min hriat nawn tir a, ka ngaihtuahna zawng zawng hre vek thei khan ka duh zia a hre duh miah lo te, tuna alo let takngial pawh min hriattir duh lo te hian kan inkar tawp zia a tichhiang tawh. Chuvang chuan ka hmangaihna dai ve lo mahsela engvangin nge kei hian ka umzui reng bik ang? A nunah hmeichhe dang a nei tawh a, kei chu hmana a ṭhian ve mai ka ni. A nunah ka awm tawh lo tih chiang takin ka hria.

Min haw em em tu Sarah-i vang khan Maruata awmloh hnuah pawh buaina kan nei reng a, Lalramliana ka lam aṭan tawh miau avangin an inṭhen fel a, lam min zirtirtu Nula hmelṭha leh fel zet Maria-i kha RLa nen an inzui a, an innei ta hial a. He mite nupa hi awm lo sela chuan kei hi hetiang hian ka hlawhtling kher in ka ring lo, college-ah leh in lamah min fuih a, min backup tlat ṭhin tu an ni a, Maria-i vang hian hmeichhe ṭhian neih nawm zia ka hriat phah bawk.

Damdawiinah khan Keimaha Bawiha hruai tum ka ni a, mahse Rl-a te meeting cancel avangin kan kal dun a, tum loh zeta Maruata kan hmuh khan Rl-a a kal ve kha ka lawm letling viau mai.

Rl-a leh Maria-i te Rl-a te chhungkaw sumdawnna lian zet an enkawl dun a, fapa pakhat an nei a, Ka hming phuah ngat ala ni zui Maruata hming chawi a ka phuah a ni a Lalruatkima niin Bawiha tiin kan ko thung. An hman loh chang apianga an baby sitter tho ka nia, chawlh ka lak phah ve fo bawk.

Damdawi ina Vanlalruata ka hmuh chuan sawi ve tur ka hre lo. Ka vawi2 hmuhna a ni, a rawn haw satliah lo tih ka hriat phah tal alawm le. Kan kal pel a, ka mittui bawk chu, RL-an hrethiam takin min kuah a, engmah a sawi zui lo. Motor chhungah erawh ka tum loh deuh in ka nui hak hak thung.

“Eng nge?”a tih hu takah chuan ka nuih chhan pawh ka hre biklo tiin ka chhang pek anih kha. Ka chhanna avang chuan a nui ve hawk hawk tho, khawvel hi alo mak em alawm. Vanlalruata huatna in ka thinlung a khat a, a chhan ka hre bik lo, a ṭhiannu ngawih ngawih hetiang taka a ngaipawimawh lo thei hi ka hua a, kan dam a khawvel hi a mum chhung chuan kan intawng leh dawn tih ka chiang, kum8 hnuah pawh kan inhmu leh alawm le. Kei aia sual hi a tawng tawh reng reng em kan en ang chu.

University lamah kan buai nak nak a, kan department bik kan awm khawm lai chuan kan thawhpui Kima chuan, “Kha nang chu Sport lam i ti ṭhang bawk a i infit deuh ang chu.” a tih chuan ka melh zawk a. Sinior inti ve tawh viau mah ila, fitness maintain nan hrim hrim tiin volleyball ka la khel ṭhin fo a, tunah hian university lamah pawh incharge niin, kan veng club ah pawh ka la khel zeuh zeuh bawk.

“Nga ti nge infit chu.” Ka ti let ha a, min zawh thut nachhan hre miau lova. “Ah, thisen pek chungchang kha kan lo sawi a, Nang te chu i taksa a fit chuan unit hnih i pe ang chu kan lo tia.” tiin min melh ran a.

A thusawi awmzia chu ka bo map mai, thisen unit2 ka pe ang maw? a hmel ka en a a nui duh miah bawk silo, hrilhhai zetin ka melh kual hlawm a, an tak run hlawm vek bawk si. Engtin nge unit hnih ngawt te chu ka pek theih bik ang.

Ka hawihai hmelah chuan Sangtei a insum thei tawh lo a ni chek ang chu a nui chhuak ta vak a. An fiamthu a ni tih ka hrethiam ve chiah, ka hrilhhai hmel awmdan an la zir chiam zui a, kan nui nasa viau mai.
Hetiang ve tho hi kan ni, Puitling rual awmkhawm pawh hian fiamthu hi kan duh ve in nuih te pawh hi nuam kan la ti ve tho a, kan ho ve hlawm in kan nui ve nasa ṭhin lutuk tho, department dang hi an ni ve em ka hrelo, mahse keini erawh kan in pawh in kan nui nasa ṭhin viau a ni.

Class ka neilo a, thisen an pek hlawm avangin hall ah a tam zawk an awm anih ka ring, keipawh tih tur ka neih loh avangin hall lamah ka kal ve a. Kawngkhar zawn aṭanga doctor seat a Maruata ṭhu chu ka hmu chiang kher mai. A hmelṭhat dan ala ngai reng, tlem in alang upa ve deuh tawh tih mai loh chu, doctor form te chu a tana thui ni awm hliah hliah in a inhmeh a, a nui hmelṭha tak pawh ala danglam chuang lo, mahse ka vanga nui a ni tawh lo tih tichiang turin a bulah hmeichhia a awm ve tawh tlat si a.

A hmeichhe biak chu ka en a, a hma a an in aṭanga alo chhuahpui ka hmuh kha a ni, doctor a ni ve tih a form hak aṭangin ka hre bawk. Doctor leh Doctor maw, Huhh! A ṭha alawm. Coffee in phawt teh ang anih loh chuan a chhûngah sawn lut in Vanlalruata saw ka kek dak awrh duh mai ang.

Coffee la turin ka kal a, hall lama let leh tawh lovin kan room lam panin corridor-ah ka kal a, hall nen a inhlat lem lo bawk. Tu nge ka hmuh hi? A bul ka thlen ruala ka coffee hi a hmaia theh ṭhawt ka chak, mahse chu thil ka tih vang chuan eng nge hlawkna ka neih ang, ENGMAH chuvang chuan ka insum leh ta mai.
Kalsawn mai ka tum lai chuan alo hawi ve chiah a, min hmuh takah chuan tiin a lam panin ka kal ta zawk a, mahse ka be hmasa awm lo emai. Ani pawh in engahmah min ngailo thei anih chuan keipawn ka thei ve a ni tih a hre khawp ang.

Vanlalruata rilru buai thei zet kha ala ni reng anih hi. A ngeizawng taka awmdan chu kei aia thiam an awm ka ringlo bawk. Ka kalsan deuh hmak khan ka ti thinrim dawn tih ka chhiang viau mai, a thu a duh ropui si. Haw tumin car ka la chhuak a, thui pawh ka tlan hman lo, Vanlalruata te leh bawk, an ṭhianpa awm ve lai renga an inkhawih vel saw ka ngei khat tlat, ka tlan pel zet tawh na in, ka back leh ngat a, ka tum lawk ni miah lovin ka business card ka pe a, a no ka dil zui, A nula-i hian min en duh tih ka hria, sunglass ka vuah tlat avangin ka melh rawm rawm a ni tih a hre kher lovang.

Vanlalruata’n a thinrim avanga a motor ke a pet pawh ka side glass aṭangin ka hmu a, “A bul ṭanna chiah anih kha” ka rilru chuan tiin ka ner nghal sak a. Ka thin a rim em em a, mahse ka thinrim chhan diktak hi ka hrechuang der lo, hei erawh ka chiang, he mihring hi ka ta a ni thei ta lo anih pawh in vawikhat na na na chu min theihngilh avang hian hrehawm tiin ka siam dawn hrim hrim. Lalramliana nen khan nupaah min ngai anih kha, a ṭha viau tak e, ruahmanna ka siam a, ka ruahmanna te avang chuan Keimah in ka nui khi vur vur a. Infiamna hote ka ṭan a ni ang chu. Vanlalruat i hlim viau anih pawh in, vawikhat na na na chu i rilru hi ka chawk buai ve khawp ang. I vanga ka ṭahna zawng zawng kha, engmah hrelo mah la, min ti ṭap tu i nih vang pawh in vawikhat tal i lakah sual ka chhuah ang. I thin tih rim pawh a chakawm tawh hle mai.

Conti…