KEIMAH, THINGTLANG NULA S2-18

Mak ti deuha Maski ka en reng lai chuan, “Min lo ngai em?” tih pahin a nui vur vur a, “Awii..i nui vel, Sangkhuma hian thi mai tur angin a sawi che sia” ka la ti a, a lo kal ve thut hi mak ka ti lutuk a ka meng kâwk kâwk maithei a ni.

“Ka la thihsan phal lo che” a ti fiamthu ve ngei a, “Thingpui va lum rawh” Sangkhuman a lo ti bawk a, Fawnvela lahin an chhang rawn lei min pe a, Maski-a a ngawi leh reng tawh thung.

Choka a ka phei chu Nutein min zui ve nghal a, gas ka on laiin, “A va han hmelţha em em ve le, ka duh a nia aw Remkalam, i duh loh rau rau chuan min tihpui daih rawh” a rawn ti sar sar mai.

“Khatiang ţep ţup a i inchei chhung chu a duh lo ang che” ka tih chuan, “A hmelţha ka ti e, u Zirbawnga aiin a hmelţha fe zawk. Tun aţangin a bialnu ka thik nghal, ka mipa hmuh tawhah chuan hmelţha ka la ti ber ang” a ti melh melh reng a, “Kan naupan deuh lai phei chuan a hmelţha thei teh mai a nia aw, tun ai hian a hmelţha zawk” ka lo ti a, lamkhuang meuh ka pek chuan a hmelţha hle tihna a ni mai.

“Amah saw ka duh chi a nih saw, a nuih phei kha chuan a hmelţha lehzual” a tih hnuah, “Hmelţha kan tih deuh kan chang lo ţhin hi a pawi e, mipa hmelţha hian hmeichhe hmelchhe deuh deuh an duh daih zel” a ti leh a, banga darthlalang tereuhte inkhaiah chuan ka in en vat a, Maski te ang mipa hmelţhain min duh nain ka hmelchhiat em em pawh ka hre lo.

“A mak ka ti e, in khaw mite an lo kal a kan unauin star kan nei vek. I u Mama hi u Lianpuiin a star a, Nunuin Sangkhuma a star bawk a, keiin Maski-a, in khuaah ka rawn pem mai dawn” a ti duah a, “U Lianpuiin u Mama a star maw?” ka tih chuan, “Star e..a fing a a ti lang lo mai mai a nih hi, a ţhiante bula a sawi ka hre fuh tawh alawm. In khua hi boruak a ţha aniang, in thlai thar te, in tui tlan te a ţha bik a nih ka ring in hmelţha hlawm emai” a ti zat zat a, “Kan khaw tlangvalin mikhual an lawm ve lo a nia aw, rawn pem mahla pu Taipuia leh u Lalhuma ten an rim tlut tlut che ang a, midang chuan an en liam mai mai ang che” ka ti chu a lung a awi loh hmel khawp mai.

“I sual e a, mipa hmelţha tih ka nei khat teh mai a nia aw” a tih chuan, “Kolasib tlangval an hmelchhe ngai lo i tih kha” ka lo ti a, ţawng tuma a an zuau laia Maski-an, “Ka lo pui dawn che em?” a rawn tih chuan a hmui a chip leh rang khawp mai.

“A ngai lo, a so ţep tawh, lo va ţhu mai mai rawh” ka ti tak nain a ruk chuan ka rilru a hah, u Zirbawnga nen an inhmu ngei ang a, ka hriat lohin an inbia ang a, an pahnih hian min ngei daih ang tih te ka hlau. Kal ta mai lo vin min rawn din hnaih sauh lehnghal a, Nutei ka melh rulh a, Maski chiah a lo la en zui a, melh man a awm hlawl lo.

“Puipuii pasal neih chhuanlamin ka lo kal mai mai” ka beng bula a rawn tih chuan, “Chu bak bak a kal” ka lo ti a, no ka dah chhuak lawk sa vek a, chhang a awm chuan a thlumin an in tlangpui bawka tiin chini ka telh lawk sa vek bawk a, “Lo kal chhan ka nei alawm” ka thingpui chhuan ka suan laia a lo tih leh chuan, “Eng nge? I pi a boral sia, bank dawr turin an tir che em ni?” ka ti he haw a, a pi kha a hausa ve em a ni. No a thingpui ka thlit chhuah laiin, “Ka pi vang a ni lo” a ti a, a lo kal ve chhan zawh ka tum laiin amah vêkin, “Nangmah vang zawk, ka hmu chak che a” zawi tein a ti leh a, Nutein a hriat phak ka ring lo nain ka zak tho, min si chêtin a ding bawk si a, ka lai lutukin chini ka chawk sual vel a, a zia lo tak tak a ni.

“Ţhiante chu hmuh kan chak vek zel alawm” nui lui har har chunga ka tih chuan, “Ţhian ngawt aiin a thuk zawk ang, ka ţhianţha te aiin ka hmu chak zawk che” a lo la ti tlat a, inngaihzawn ka duh lo ka tih mawlh mawlh hnuah pawh min ngaizawng lui zel a, hmangaihna luhlul a ni ringawt.

“I ţhianţha te aia min hmuh chak chuan i ţhianţha ţha ka ni mai” ka ti a, ka nuih rualin a lo nui ve a, ka hrethiam lo der tih a hre vek ang. Nutein, “Ngati nge in inhrilh ruk bik char char a?” a rawn ti hlauh a, a ţawngchhuak har ka ti reng a ni, beisei loh deuha a rawn inrawlh thut chu ka lawm lutuk a ka ţap lo chauh alawm le.

“An sangha dil chanchin min hrilh a nih hi, a hrang a, i hriat a kan sawi chuan i hlauh kan hlau a” ti a dawt ka hrilh hnuah ka rilruin ka uang a ka ti a, Nutei lahin, “A ruka thlahrang sawi ho hi an inmelh no zel tihna mi? Thlahrang in sawi a in lai daih a, a hlauhawm loh hmel e” a la ti ve tlat a, “Thlahrang pahnih inngaizawng an nia, an thlan a inhnaih lutuk a an inngaizawng daih a, chu chu mawle” ka tih hnuah ka rilruin ka uang a ka ti leh a, fiamthu a dawt ka sawi hi chuan ka thla a muang deuh hlek ţhin. “In khaw thlahrang ho hi an skew e…an lerh hmel si, in inpawh hmel bawk si, in thlahrang ho hi in duat hmel tlat” a tih chuan, “Duat ang chu mawle…an thau tût tût hlawm mai a ni” ka lo ti a, “Kha, i bula thlahrang lu kir deuh khan thingpui a in chak tawh hmel emai siam vat vat rawh. Thau ve tût tût rawh se” awmze nei zet hian a ti a, kei aiin a naupang na a ka bum thei bik ţhak lo.

“I va rei ve Remkalam, i thingpui chhuan kha a ut ange” Sangkhuman a rawn ti deuh kher bawk a, “Ka lo kenpui ang che” tiin Maski-an no hnih a la a, ka hmuh reng chuan ka duh leh daih ka hlau, u Zirbawnga lah ka star lai angin boruak a alh hluai tawh si lo a, Maski hi ka star chuan u Zirbawnga ka star lai ang vel khan ka vei leh dawn a, ka peih lo reng reng, vei neih chu mut a har bawk si, hmelchhiatna mai mai a ni.

Thingpui kan in laiin Sangkhuma bawkin, “Fawnvela hi Fithangi a rai emaw a tih hnua a rai leh si loh hian min puh daih zel a, rai tur zawk ka ang ţhin, Fithangi hi ka rai chhawk daih mai dawn em mawni” a ti leh tawh a, kan nui ho dar dar a, ka ţhiante nen a kan inhmu leh chiah chu nuam hawr hawr tak a ni.

“Puitean, ‘Valdiki hi ka ning tawh lutuk a ka inti nula daih dawn’ a ti” Fawnvelan a lo ti ve thung a, “A duh miah loh nupuiah a nei ve ringawt a nih kha” ka tih chuan, “A ruih reng phah reng alawm. ‘Ka ruih lai chiahin ka hmu peih, ka ruih loh chuan hmelchhia ka ti zel’ a tia lawm” Fawnvelan a lo ti a, Sangkhuman, “Ka thih chhanah Valdiki tih in ziak dawn nia te a tia, a ruih chuan a au vak vak zel, hmana tukverh aţanga a tlak ţum a a lu a sawh khan a thluak a sawh chhia aniang a mit khap dan te hi a dangdai tlat tawh, 1,2…1,2,3 anga rang deuha a khap hnuah a khap lo vang vang a, a khap tawh dawn lo emaw tih hnuah 1,2..1,2,3 angin a khap leh pawp pawp a, a mak lutuk, ka lo chhiar thlap zel. U Valdiki pawhin nu Raltlani bulah, ‘ka pasal hi a tho â reng zel, mi pasal te angin mu ve mai mai se kan inhau reng lo ang’ a tih kha” a ti ve bawrh bawrh bawk a, Puitea te nupa zet hi chuan chanchin sawi tur an ngah a ni.

“A dik ang, Valpuii pawhin, ‘Nizanah Puitea a tho â a, voon voon tih pahin Valdiki bengah a pawt a, a bike emaw a ti aniang a chungah a ţhu thurh a, a tlawh chawrh chawrh a, a va nung thei lo ve te a tia, Valdiki a tlan daih’ a tih kha. Mahse, Valpuii sawi chu ka awih lo, Puitea thiam loh chantir an duh vang mai mai aniang Valdiki a tlan apiangin Puitea an sawichhe ziah” Fawnvelan a tih chuan kan pawm tlang khawp mai, kan inkawm ve nasa bawk a keini chuan Puitea kan ţan daih zel.

“Naktukah lengchhuak ila step kal theiah chuang ang u, step tawlh thei hi vawikhat chiah ka la rap a nia” Fawnvelan a tih chuan, “Keichu ka duh lo, amahin kal thei mah se ka pen zel tho, hahdam deuhin ka awm ngai chuang lo, step pangngaia kal aiin ka hah zawk ziah” ka lo ti vat a, “Amaha tawlh thei na na na ‘ngah nge i pen zel kher? Ding tawp la hahdam deuhin a chhawng chung lam i thleng chho mai dawn alawm” a tih chuan, “Chhuk hun hriat a har bawk si, keichu step pangngai aţanga chhoh ka duh zawk” ka ti tlat a, din mai mai ka tum ve ţhin tak na a ka thla a muang ngai lo.

“Keipawh hmun sang ka hlau a step pangngai aţanga chhoh ka duh zawk” Sangkhuman a tih ve chuan, “Lutuk a che…hmun sang ka hlau i ti reng a, inzuan san siakah pakhatna i ni ziah” uar zetin Fawnvelan a lo ti a, “Hmun sang hlau mah ila ka zuang sang thei tihna a ni mai alawm. Nangpawh thlahrang i hlau a, i zawng ziah tho” pakhatin a lo ti ve bawk a, “Maski hi chuan hlauh a nei lo, ngam loh pawh a nei chuang lo, Nobawihi team ten an hlau tehmai a nia” keimah min en reng chungin Fawnvelan a ti zauh a, awmze nei deuhin a nui vel a, “Hlauh nei miah lo va kawţhalo a thih a hlauhawm aw” Sangkhuman a tih chuan kan nui leh dar dar a, “Setanic Nicky-a pi ha dar a nih chu a” Fawnvelan a tih phei chuan kan nui uar sauh a, Nutein, “Eng nge ha dar mai mai vanga in nuih chiam a?” a lo ti hlak a, min melh ram ram laiin nui chunga, “A pi in ha dar a vuah a, rangkachak a hmuam emaw a tia, ‘ka pi thih veleh a ha lem rangkachak hi ka hralh dawn’ a ti ziah a, a pi kha a dawm hlum ţhak alawm” Sangkhuman a tih hnuah Fawnvelan, “A pa lah hian a hauh apiangin, ‘chhuak vang vang la, i thluak bo va zawng rawh, i hmuh hma chu zawng la, i thluak nen ngei rawn haw rawh’ a ti ve ziah a, sangha leh arsa an hmeh apiangin a thluak awmna a lu a ei tir ziah a, a engahmah a thawk lo aniang tun thlengin a la â” a lo ti ve a, Nutei takngial pawhin a ngaithla tui khawp mai.

“In khua hi a nawm hmel e” a lo ti deuh reng a, “Nuam tak a ni, lo awm ve daih rawh” ka tih chuan, “Tih tur a vang awm e” a ti leh ang lawi a, “Vang nang aw..englai pawhin tih tur a awm. Keipawh naupanlaiin doctor nih ka tum a, ni leh lo mah ila hna ka nei reng tho” Sangkhuman a lo ti ve a, “Keipawh scientist nih ka tum a science ah ka fail daih zel” Nutein a tih laiin ka ute an rawn haw a, Maski an hmu thut chu, “Ehe…i lo kal ve elo?” an ti a, mak an ti ve khawp mai.

“Ka lo kal zuai a, ka haw leh har lo ang” a tih chuan u Bawihan, “Guitar lo keng ta che” a ti a, Maski vang hian ka chhungten min hau dawn lo nain pasalah neih tum ila chu an phal hauh lo ang. An be ţha em em a, makpa atan chuan an duh leh tlat lo, rui ţhin lo se chu u Zirbawnga aiin min duh pui zawk daih ang. Mahse, ka nu vaihlo zial a lei sak ţeuh hnu kha chuan u Zirbawnga pawh ka nuin a rel tawh ngai lo a, vaihlo zial an duh apianga be turin a hrilh a, phone number pawh a nei ve thlap tawh.

Maski chiah an chhungte ina riak turin a haw a, ka ţhiante chu kan inah an riak leh thung a, Aizawl a an kal chak vang a nih rualin min ngaih vanga rawn kal hma an nia, kei phei chuan ka zir chhung zawng awm ve thei se ka ti. An haw hunah ka khua a har leh ang a, ka peih lo lawk sa.

Zingah Maski a lo kal leh a, ka hriat miah lohin u Bawihan chaw eiah a lo sawm chu niin, an inkawm ve ţhin a, a awm ve tho mai. Min ngaizawng tih chu hria se a sawm kher lo maithei bawk. A rukin Nutei ka hrilh vat a, ka duhsak vang a nih rualin ka tel ve ngai lo vin inngaizawng se ka ti, mipa a ka duh zawng zawng amahah hian a kim vek nain u Zirbawnga a la dam ţha a, ka la duh ve deuh chhung chu inţhen mah ila bialpa dang neih ka tum tawh lo. Ka duh tawh loh hun a thleng te a nih chuan ka nei leh tho ang a, bialpa tur hi chu a tlachawpin an awm ve zel mai.

‘Tukţhuan eikham veleh ka lo chhuk ang, vawiin chu inah kan awm nileng dawn nia’ a rawn ti a, ţhiante awm lai phei chuan chhuah daih a peihawm loh a, pawi ka ti lo nasa. Ka duh ber alu kawr ka vel mual mual laiin ka bulah Maski a rawn ţhu a, a rimtui chem chem mai. Zahzel a, “Parbawr ka hmuh hian i sam ka hrechhuak ziah” tih pahin ka hmaa parbawr chu chemte hmawrin ka hawlh zauh a, “Ka duh tehreng che nen chawhmeh nen te min tehkhin vel mai mai a” a ti fiamthu a, “Aww…chawhmeh tel lo in kan awm thei hleinem” ka tih chuan lungawi hmel deuhin a nui a, tunah tak hian bialpa nei lo mah ila Aizawla an cham chhung zawng lehlam lehlam a insawithiam char char ka ngai dawn a nih hi.

“Enteh” tih pahin ka va hnaih a, “I pi boral kha pawi ka ti teh mai a nia aw, pawi ka tih zia ka sawithiam lo mai mai a nih kha” ka ti ţha leh a, “Thihna chu tuman kan dang thei hleinem” a lo ti a, a tawrh thiam phian hi a, Sangkhuma khan thi ve thei thut angin a sawi a, ka inthiam loh vangin ka be leh a, rin aiin a tuar thiam bawk a thawk khat chu a veng huai mai.

“I thil zir chu eng nge a an?” a ti ta daih a, “Ka rin aiin ka thiam chak. Kuttin han hnawih par vel te pawh ka thiam tawh a, hmanrua ka neih veleh ka hnawih sak ang che aw” ka tih chuan, “Aw le” a lo ti ve mai a, “Sampawhna pawh ka keng a, hun a awm chuan ka pawh ngil sak dawn che nia” ka tih leh pawhin, “Aw le” a lo ti leh a, Sangkhuma rawn phei ve chu, “Sangkhum, beng verh vel te ka thiam tawh a, nakinah i hnar ka verh sak ang che aw, mipain an hnar an verh hian a mawi ve duh riau a nia aw” tiin ka lo thlem a, “Hmun hnih ngawtah a kuak hi, verh belh a ţul lo, enkawl tur a tam mai mai” a ti hluk hluk a, bualinah a lut tlang daih a, a tho fuh lo leh pek tawh aniang chu.

Puipuiin min rawn biain, “Zanin tlai chu in vaiin chaw rawn ei rawh u aw” a ti a, midang chu rawn der pawh an ngai lo, an aw nghal vek dawn tih ka hriat vangin, “Aw le” ka ti a, sachek an siam ţeuh thu a sawi phei chuan phur tak ka ni; sachek hi chu ka duh lutuk a, ka ei lai reng pawhin midang ka huphurh ţhin.

Kawngkhar ri karh karh chu, “Lo lut rawh” tiin ka lo chhawn vat a, Maski-an hmeichhe nû deuh a duh ka tih vang maiin pawnfen fual fengin Nutei a rawn lut a, rawng sen no ka duh lo ti ziah si kha kawr rawng sen no a ha a, a sam lem kha a vuah bawk a, a tih ţhan tawh vang aniang inchei nu ve viau mah se a kal theng theng a, mipa, hmeichhia anga chei a ang daih.

“Inah tih tur a awm lo lutuk a ka lo leng dawn” tih pahin Maski nena kan ţhut naah a rawn ţhu ve a, a rukin min kheuh zeuh zeuh reng a, kei lahin a awmzia ka hrethiam bawk si lo, a mithmul a ti che ralh ralh a, kei lah ka hawi hu hu a, Kalvari nena kan in man ang hian midang nen kan in man ve thei lo reng reng. Kalvari nen chuan hahchhiau ringawt mah ila kan sawi tum kan inhriatsak vek zel a, vai ţawng phuahchawp hmang pawn kan inbe thiam, ţhianţha hi chu ţawng miah lo pawn kan inbe thei ţhin.

Chhunah Nunui a rawn lang ve hlawl a, Sangkhuman, “Naaa….isss” a lo ti nghal a, ka duh lo e a ti ve khanglang a, star tu a neih khat tehreng nen hian, kan khaw nula ho phei chuan ngaihzawn enah an en tawh lo hrim hrim.

“U Khumte, ka cake siam hi ei ve chhin rawh u” Nunuin phur zeta a tih chuan, “A va lawmawm ve, cake i siam thiam tih ka hre reng reng hleinem” ka lo ti thuai a, “U Khumtea puar hunah in ei ve chauh dawn nia” a ti deuh kher a, dawhkana a nghah chawrh hnuah zah hmel deuhin a chhuak leh nghal daih a, Nutei lahin Maski a rawn rim char char a, phir ve si an in ang hlawl lo.

Keiman thingpui ka lum a, cake lah chu zai a har em em mai lehnghal a, Sangkhuma ei tur ka zai thla thei ţawk a, chemte bil vang mai mai emaw ka tih laia Sangkhuman cake a ei chiah chu, “Ehiau” a ti hluai a, kan en nghal ţhap mai.

“Eng cake nge a? A va sak em em ve, savun a telh hial lo maw? Savun cake a nih hi, hmuam vang vang hnuah ţhial chauh ila ei a nuam tawk chiah ang” a ti bui bui a, kan la zai ve loh chu pawt hnaiin Fawnvelan a chung lam a kik karh karh a, “Nunui cake siam chu khuangah a hman theih dawn a nih hi” a ti ve bawk a, “Paih tawp aiah ka lo beng ri ang a, u Khumtea tana a siam a ni bawk a u Khumtea hi lam mai rawh se” a tih leh phei chuan Sangkhuma a tum lian tawh ngang mai.

“He cake han sak em em zia hi, kuhva rah ang vel a ni. Panhnah leh chinai nen a ei mai chi a nih hi a, hetiang em em a sak hian engtin nge a siam thiam zawk le, naupangin kum khat chhung pawh khalh se an khal chhe mai mai lo vang. Cake tuarchhel tak a nih dawn hi, ka hmuamna a rei tawh nen ka hmuam zawp hleithei lo, tuiah chiah hmasa mai rawh u” Sangkhuman a ti leh hluk hluk a, tuman ei enah kan en loh laiin Maski-an, “A siamtu a zahawm” tiin a ei sak a, a seh rik rawp rualin a tum hmuk a, inthiam loh hmel deuha min rawn en chuan, “Va chhak mai rawh” ti mah ila, “Ka hmuam ve rih mai ang” a ti deuh tlat a, “Thlum deuh hlek phei se chu chithlum mum a ni mai” Sangkhuma bawkin a lo ti leh a, a lungawi hleithei lo a ni ber. Ei leh in lama phunchiar lo ber Fawnvela pawhin, “A siam chang thiam hle mai, lung lianpui khel angin ka awm” a ti a, “U Rinchutan ei ve se engtin nge a tih ang le?” a tih zawm zat a, “Hetiang chiah hian Nunui siam tir leh ila u Rinchuta eiturin hawn ang chu” lo ti ve in Sangkhuma pawh a nui leh kur kur tawh a, “Remkalami atta kan khawng lutuk pawh hmaizah a ang hle mai a tih kha. He cake hi ei ve chiah se chu saruh a ang hle mai a ti ngei ngei ang” Fawnvelan a tih chuan kan nui bâwk bâwk hlawm a, in ti no deuha Nutei nui ve lah chu Maski-an, “I thaw a hah em ni?” a lo ti daih a, a ţan ve tehreng nen ka khawngaih reuh tak tak a ni.

“Cake tuarchhel, sawisak dawl deuh hi chu dah ţha rih ila nimina kan chhang lei kha ei zawk mai ang u” Sangkhuman a ti ta thlawt a, “Nakinah cooker ah kan phit tir dawn nia” Fawnvelan a lo ti ve nghal zat a, “Phit tir ila, a nem deuh hnuah savun angin saum in kan bawl mai dawn nia” Nutein a tih chuan Maski meuh pawh a nuih a za ve viau mai.

“Kan lo â alawm, zai hmasa lo khan a hnuai lam zawng kha kher kua ila, helmet ah kan hmang thei mai tur a nia” Maski-an a ti ve ngei a, Nunui ka khawngaih vang liau liauin keipawhin ka ei ve a, ţhial sawm vek tur chuan ţan lak nasat a ngai khawp mai.

Ţhutthleng te ber mi pathum inhnawh khawm kan nih avangin kan chep lutuk chu kan insi chêt a, kan thaw thei a, kan che thei lo thung. Kan nuih ve lahin ţhu ngil auh chungin kan nuih a, kan nuih a zat viau leh kan dâk awrh awrh a, kan lu chiah a zalen, kan in nek sil ţhum maithei a ni. “Ka haw dawn” ti a Nutei thawh tum pawh a tho thei lawk lo va, Maski nen a kan din ve hnuah a tho thei chauh a, kan chep lutuk a pakhat a din dawn pawhin din rual zel a ngai, chang kan sawi rual ţhap ţhap lo chauh a ni. Kan pathum hian ţhu nileng ila chu kan in nek duk thluah maithei a ni.

Nutei haw hnuah inla zei deuhin Fawnvela leh Sangkhuma te an chhuak nulh a, ka u te an lo la haw bawk si lo, Maski nen chiaha kan awm chu ka zamin sawi tur ka ngaihtuah char char a, a la vang em em zui a, amah zawkin, “U Zirbawnga a lo kal ve dawn em?” a ti hlauh a, engkim ka hrilh tawh a, a tir aţanga a tawp thlengin a hre vek tawh.

“Lo kal ve chu a tum a” ka tih chuan, “Nalh a ti khawp ang che” a ti daih a, nuam lo ti deuh angin a awm lo reng reng, a hmel a pangngai reng a, “I mawi dawn sia” a ti leh tawp a, tim daia, “Nia” lo tih tawp bak sawi tur dang ka hre lo.

“Lu kir min ti ziah sia, ka’n nawr kawlh daih teh ang” a lu tuai pah hian a ti a, sawi tur a hre vak bik lo a nih hmel. “A ngai lo” rang zeta ka lo tih chuan phawk deuha min en chung hian, “Engati maw?” a ti hu a, “I lu nawr kawlh suh, Fawnvela pawh a lu a kawlh lutuk a a chhip a hang bik kan tih ziah hi. Nu Mawisacheki phei chuan, ‘a lu a kawlh emai, nisa hnuaiah a chhuak peih si, a thluak a puak ang tih te a hlauhawm a tih kha. Nawr kawlh reng reng suh, lu nawr kawlh ho chuan sam an nei tlem nge nge” ka ti duah a, ka thusawi ngaithla reng chungin a lo nui suk suk a, “Tuna i sam ang, sava bu tiat lawih kha a ţha ber, ruah pawh sur se nihliap i mamawh ve lo ang, i sam khan a veng hneh dawn lutuk che, ţek pawh a lo do let thei ang ka ring” tiin ka sawisa zui a, “Nangpawh i samtawi lai, chalsam i neih lai thlalak ka hmu a, i sam hnunglamah ISI chhinchhiahna chuang vâng se, tarmit dum vuah bawk la chu helmet khum ang char char i ni ang” a lo ti ve a, “Hmh” tih paha ka hawi sawn hmak rual chuan, “Bul i ţan hmasa a nih kha” a ti leh thuai a, “Hmeichhia zawk hnena i samah ISI chhinchhiahna chuang se chu helmet khum char char i ang ngawt ang han tih te chu a, ang tak tak dawn mah ila ka lawm lo. Kan khaw hoin hria phei se chu Remhelmet-i min ti leh ang a, sawi tawh reng reng suh” ka ti zung zung a, “A mak ve ngawt mai” a tih chuan, “Engmaw?” bul zet hian ka lo ti a, “I samtawi lai thlalak kha mawle, khatiang em em a chalsam rual kha ka la hmu ngai lo. I tan thiam zawk ka tia, i tih tur chi tak aniang, i chalsam rual hmarh khan engpawh teh ila kan teh sual ka ring lo. Tuna i thil zir mek ka tuipui nachhan che pawh a nia, khati khawpa chalsam tan rual thiam chuan tan rual loh pawh i thiam ang” a ti ve duah a, inhmeh lo tak a ni. “Chalsam tan te chu ka uluk thei e, ka tan laiin ka mit ka khap ngai reng reng hleinem” uar fahranin ka lo ti a, kan inkarah eng emaw de zawk a awm ve tawh chung hian kan ti ti a ho tak tak a ni, “Khawi khua nge i pu?” ka ti thut a, a hawihai nasa teh a sin aw..ka nuih hnuah za lo deuhin a lo nui ve a, “Khawi veng nge i pi?” ka tih leh phei chuan kan nui dun nasa tawh khawp mai. Ka bialpa han ni chiah se chu ka tum leh bur emaw a nia nga, bialpa neih ka thiam vak lo a nih dawn hi, ka neih lohin ka hlim zawk ziah.

“Chaw ei a min sawm tu ber a chhuak a, ka leng zui reng sia, ka inthlahrung deuh reuh” a tih chuan, “Damchhung reiloteah vawikhat tal i inthlahrun ve lohin” ka ti leh kher a, ka uang tih a hre bawk a nui chung hian a lu a thing a, “Tak taka kan khuaa ka awm lai khan i lo leng ziah sia, u Zirbawnga vel ka sawi leh thut hi hrehawm i ti lo tiraw?” thutak deuh zawkin ka ti ţha leh a, fel famkim lo mah ila mi rilru tihnat ka duh bik tlat lo a ni.

“Hrehawm ve tho e..mahse i hlim chuan a ţha. Hlimna baka hlu a awm lo” a tih chuan ka inthiam lo ve deuh a, lo kawp hman phei ila chu tun ai hian hrehawm ka ti lehzual zawk ang. “U Zirbawnga i hmuh pawhin engtinmah i ti dawn lo tiraw? Ka inpuang vek tawh sia, engmah i sawi lo ang tiraw?” ka ti mawlh mawlh a, “Hmeichhia ka nih loh hi” tih pahin a nui hawk a, “I hlim chuan a ţha ka tih kha, mi hlim hmel hi a hmuhnawm ber. Hlim reng la a ţha a ni mai, i rilru a tih nat chauhin chanchin min hrilh tawh dawn nia” a ti a, “Ka rilru ti na ta se engtin nge i tih ang?” ka tih leh chuan, “E le…bialnu dang nei thei tawh lo turin ka siam ang mawle” tih pahin uangthuang deuhin a kuttum a lek zauh a, kan han nui dun leh ţhin, min veng him thei tu ah ka ngai nghal hmiah mai a ni.

“Naktukah ka hman dawn lo a nia aw, zanin tlaiah Puipuii te inah zanriah kan ei ang a, kei phei chu ka riak nghal daih maithei. Naktukah pawh eng eng emaw buaipui tur a awm dawn a, kan inah hian ka awm hman dawn lo a” ka ti a, ka insawikhalh nghal a ni ber. “A pawi lo, keipawh ka lo leng hman dawn lo a” a tih chuan, “Eng nge i tih dawn?” ka lo ti thuai a, “Jail ah ka pa a awm a, ka hmu ve zawk ang chu” tih zawngin min chhang a, ka zawt zui lem lo. Maski-a pa chanchin hi ka ţhiante pawh hian keimah aţang chuan an hre kher lo ang, ka ţawng duh bawrh bawrh viau nain thuruk chu thuruk a ni tawp mai ti chi ka nia, thuruk min hrilh tawh tu nen eng ang pawn inhua ila damchhungin ka zep sak tho ang.

“I pi ber a boral ta sia, in chhungkua in darh nuai ang tih ka hlau e…i nu unauten thawm an rawn nei em?” ka tih chuan, “Kha lam kha chu sawi rih lo ang” a lo ti a, a nu unaute hi ka hrechiang ve thawkhat a, sum duh leh rilru chhia tiin an sawi ţhin. Maski ber hi a puitlin loh phei chuan an buai ve viau ang ka ring.

Fawnvela leh Sangkhuma te rawn haw rualin kan insiam a, Maski pawh chaw ei ve turin kan sawm ngial na a, “Ka lo ei ve lo zawk ang” a ti tlat a, Fawnvela te lahin zu an lo ak leh ţat tawh a, mi inah han rui nawi vaih teh se, buai chung chung pawhin kan khaw lamah ka thawn haw nghal ang.

“Ka riak nghal dawn a nia aw” u Mama bula ka tih chuan a lo phal ve mai a, “Inchhunga i awm huat huat ang hian mi inah awm suh aw, â buang angin awm lo la, a ţul ţul ti sawk sawk la” a ti thlap a, chhungten thu ţha min hrilh hi ka ngaithla uluk thei viau nain zawm nachang ka lo hre lo ţhin, hre reng mah ila ka zawm theihnghilh ziah, ka haihawt ve na lam tak a ni.

Taxi a sikulpuikawn thleng kan kal hnuah bus in Puipuii te veng thleng kan kal leh a, Nutei pawh kan zingah rawn tel vein Maski a awm ve lo tur chu a lungawi vak lo a, Puipuii te in kan thleng chu mi an lo tam angreng khawp mai.

“In lo van kal har em em” tih pahin Puipuiin min kai nghal chawt a, “Lo kal ru ka pindanah lut khawm phawt ang u” ti a midang a hui zauh hnuah a pindan lam panin min kalpui nghal rawk rawk a, kan luh fel ruala, “Pasal neih ka peih leh lo e” a tih chuan sawi tur pawh ka hre lo, a duhthlanna a pasal neih tum a nia, ngui bur mah se khawngaih ngaihna ka hre lo a ni ber mai.

“Kan inring vek tawh, phun phun lo khan nei mai mai teh, ticket man a to tawh tehreng nen nangmah vangin kan lo kal vang vang a nia” Sangkhuman a ti hluk hluk a, “I thinchhe tun tun emai Sangkhum, in chawhmeh hing mai mai pawh i hau hrep zel a, tun ang reng i nih chuan i putar hunah pawh i la tlangval ang” Puipuiin a ti let ve a, “Akhaih…ka nupui neih niah thingpui i sem dawn nia..Isss” tiin Sangkhuman a lo chhaih nghal a, u Zirbawngan min lo call vangin hmun reh laiah ka kal daih a, a sawi ho leh viau ang chu.

“I va la har ve” a rawn ti nghal a, “Apate” tih riin a zui a, “Huiham…tlangval lai aţangin i chhangchhe nghal ringawt a” ka tih chuan, “A ngaihna a awm lo, ka unaute fa an nei pawp pawp hlawm a, a chhangchhiat loh theih loh. Engtikah nge Aizawl ka rawn kal dawn?” a rawn ti ve a, “Naktuk tuk leh hi man hlan a nia, naktukah lo kal la a ni mai alawm. Puipuiin man ka ei tir ve a tih che kha” ka tih chuan, “Eng nge ka leisak ang?” a la rawn ti chauh a, “I lei vek tawh ang chu tih nak laiin” ka tih veleh, “Man ka ei dawn tih ka hre miau lo, duh duh a eitir tawp aniang. Eng nge lei chi ang?” a ti nawn leh a, “Ka hre bik nang, a pindanah hian a mamawh tur ang chu a awm ruih tawh, an lei nual tawh aniang, pawisain pe mai rawh” ka ti tawp a, man ei tu an tam aniang a dawng hnem emai.

“Vani ka zawt mai ang, u Lalhuma kolasib ah an rawn chhohpui a, damdawiinah a awm mek” a rawn tih chuan min ţhawng ve deuh a, “Ani hi a na viau tak tak em ni a? Puipuii khan a zia tawh a ti sia” ka lo ti ve ngei a, u Lalhuma hi chu sual thiam viau mah se kan tan a hlu ve em a ni. A awm loh chuan kan kim lo huih zel.

“Zia tawh e..amah hi a ngaih a ţha lo a, zu a heh nain a in enkawl peih alawm, a taksa in a tuar dawn ni a a hriat chuan damdawiinah a in admit tir hmak zel a, a hnar tih loh chu a la hmuh tlak em hi” a rawn ti duah a, “Kum a zir hian kan hnar hi ţhang thei ta se i hnarah hian khaw hnih vel a din theih tawh ang a” fiamthu a ka tih chuan, “Huh…what a funny thing” a rawn ti ve ngei a, “Kan inţhen hi nuam i ti riau mai” a tih leh chuan, “Nia, thil ti nghal bawrh bawrh lo a inngaihtuahna hun a awm a, a nuam ve alawm” ka lo ti vat a, “Bialpa neih dawn pawha inngaihtuah hmasak zel ngai chu a rilru chak loh thlak emai” a ti a, a lungawi lo leh ringawt tawh aniang chu.

“Naktukah chuan lo kal la a ni mai, naute i rawn hruai dawn phei chuan tunah khan insiam sa vek rawh, in in theihnghilh pheng phung ange” tiin ka chah ve thlap a, ka nuna mipa pahnih lo lut thar te hi biak loh an har mai sia, an rilru tihnat ka hlau bawk si, keimah ka nat ka hlau tho bawk si, Maski hian Nutei hi atchilh bur se ka ti khawp mai, a hawi lo angreng ropui si a, keimah hi ka inchhir deuh tawh zawk.

Mikhual chaw ei ve tur an awm lo bawk a Puipuii pain chhung inkhawm hman a rawt a, Puipuii u, zu rim nam huam, rui chhur mai hian, “Zanin tlai hi ka hun a ni maw?” tih leh din a rual a, hun an inhman chhawk ve ţhin aniang tuman sawi buai lo vin kut an kuangkuah ţhap a, “In ril a ţam tawh takin engmah ka chhiar lo mai ang a” tiin bul a ţan a, kan rilţam hlau hle si a ţawngţai rei nasa mai; an ţhenawmte ui te a dam reng theih nan te, an gas a puah thut loh nan te leh Puipuiin a pasal a ţhen loh nan te a ţawngţai a, a sual vangin thupha a chawi bawk a, “Kan chhungkaw tan hian pangngang ai pawhin ka ţangkai lo zawk a” a tih phei chuan tu emaw hian min rawn kheuh zeuh a, a ţawngţai zawh meuh chuan Puipuii pain, “Chawhmeh kha chhuang lum ţha leh lawk mai rawh u aw” a ti hial a, kan chhuan lum hnu lawka chhung inkhawm nei kan nia, a ţawngţai chhung khan a daih hman a ring deuh a ni maithei a ni. Mahse, zu rui chung pawh a a ţawngţai kha a ţha hrim hrim, Pathianin a lo ngaihthlaksak tho ka ring.

Zanriah eikham hnuah hmun kan ti fel sawk sawk a, hmeichhe ho bikin Puipuii pindan a bungraw awm hnawk nuai chu kan ti fel a, a pasal tur hi an veng a mi tho a nih avangin Puipuii tan chuan a nuam letling phian ang. Nutein, “Ka peih tawh lo, naktukah tih zawm mai ang” a tih hnuah kan mu a, Sangkhuma leh Fawnvela erawh kan in lamah an haw thung a, ka ute bulah rui bual bual mai rawh se.

Nutei mutthilh tawh hnuah pawh Puipuii nen khawvar dawn thlengin kan ti ti a, “Naktukah ka pi Binladari leh ka pu an lo kal dawn a, an haw dawnah ka thlah miah lo ang, ka thlah chuan keimah zawkin hrehawm ka ti dawn” a ti leh ţan a, “Kan kohhran mi ka neih dawn vangin ţhianah ka hmang thei dawn che a, kohhran dang daih hi a buaithlak i ti ve em? An ropui ve ni berah pawh an ţhianţha ten an dinpui thei lo ţhin a nia, kan rinna te hi a hrang nuai a ang ka ti” a tih chuan, “Keichu kohhranah ka buai ve vak lo, Bible ka ring a a tawk mai. Bible a thu inziak hi lak bik nei lo vin mi zawng zawng hian a bu chhung thu hi zawm vek ila chu kan inpumkhat zawk maithei a ni. Kohhran hrang hrang a awm kher hi buaithlak ka ti, mahse kohhran a nih hrim hrim chuan ka zah vek tho a” ka ti malh malh a, “Kohhran ţhing deuh bik hi chu a awm alawm, kohhran tereuhte ho te hi kohhran lian a awm ve mai tur a nia, an rindan a mak hmel si” a tih leh chuan, “Kha kha a nia kan inpumkhat theih lohna chhan. Kan insawm dan hi insawm chhuah a har hmel e. ‘In kohhran a ţhing, a te si, in rinna hi a dik lo kan kohhranah lo awm rawh’ an ti bawl bawl zel a, hetiang chuan tumah kan sawm chhuak zo lo vang. Eng kohhran mah a ţhing lo, kan nu leh pate rin ang kan ring a, an lawina kohhranah kan lawi ve a ni mai a, kan kohhran rin dan hi han belchiang chhin teh te tih zawk tur a nia. Muhil ang ka ning” ka tih chuan a lo nui hak a, “Pi Puipuii ka ni ţep tawh sia, nangpawh pi Remkalami ni ve tawh rawh. I induh leh lutuk chuan i pitar hunah ‘ka va ui e aw’ i ti vang vang reng mai ang” a ti a, rei deuh inngaizawng ho hi an innei kher lo tih hre tho mah ila reilote inngaihzawn a inneih nghal ang hi ka ngam ve lo, ka ţhiannu ve em em Nunhlimin a ti sual tawh bawk si a, u Rinchuta te ang law law an nih loh chuan ka ngam hlawl lo. U Rinchuta hi chu lerh pawh tum se lerh thiam lo chi, hmeichhiain an duh thu an hrilh pawh a lawmthu lo sawi tawp chi ang kha a nia, hetiang mipa hi nei ngat ila chu rilru hah awmzia pawh ka hre lo ang, Kalvari hi a vannei tak tak a ni.

Zingkar aţangin kan buai leh ţan a, man hlan kha hmun danga ti kher lo vin inah ti ang u an tia, an in a zau tho bawk a kan ti fai a, an chei nial nual tawh nain kan chei belh leh a, Puipuii pain, “Ho lam deuhin ti ang, tih ropui chiam hi inneih reina pawh a ni chuang lo” a tih miau avangin lungawi deuhin inchhung kan chei a ni ber. A nu a lungawi vak lo thung a, man hlanna a kal te tan ruai an buatsaih dawn a, chuti chung chuan, “Ho lam deuh a tih te chu a” a ti deuh reng a, a nu phunchiar lutuk chu Puipuiin a rukin kan hnenah thupha a chawi mawlh mawlh reng mai.

Tlai lama ka pi Binladari te lo thleng chu kan buaipui nghal a, Puipuii pain inchhunga ka pu a kaih luih laiin ka pi Binladari chu Sangkhuman a lo pawm nawlh a, “Mi dah thla vat rawh Sangkhum, mawlah pawh hian chintawk a awm ngai, min pawm khaw lo mai tur a sin” a ti chul a, a hmai lah chu a eng em em mai lehnghal a, inneih naa a kal dawn vang maiin ka aieng siam kha a inhnawih uchuak leh bik tawh a ni ngei ngei ang. Puipuii pa lo chhuak leh pawhin, “Ka nu, i va eng ve, i damlo em ni? Ţhenawmah sawn doctor a awm a sin” a ti hial a, “Ka dam, ka hrisel” tih hmuk pahin ka pi Binladari chuan rum zetin min melh a, mi aiin a inhnawih tam a, a phih fai leh thei tawh ţhin si lo, keimah min mawhpuh daih zel a, hmang ve lo se ka lawm daih zawk ang.

An ipte vel khaiin kan zui lut a, “Ka nu, mikhual pindanah hian ka ute an lut chiah a, a dang hi naupang ho pindan a ni bawk si a, in cham rei dawn chuang lo a chhuatah, midang bulah in mu ve mai dawn mi? Pawi in ti em?” Puipuii nuin a tih chuan ka na ve zawk a, ka puin, “A pawi lo reng reng, zanhnih khat lek chu chhuatah kan mu thei lutuk, midang pawh an mu dawn tho a, kan inhnawh ve nawk nawk anga a ni mai” a lo ti tak nain ka rilru a na veng veng tho.

“Nu leh pate ber chhuata han muttir tum chu le(h)” tih pahin ka inher hmak a, ka ţawng an hre pha em ka hre lo va, hre pha mah se pawi tihna ka nei lo. Puipuiin min rawn umzui thuaiin, “Remkalam, ka pindanah inhnawh khawm ila” a ti hlauh a, “Ka pi leh pu te khumah an mu ang a, kan pahnihin ka pindanah tho, chhuatah kan mu thung ang a” a tih leh chuan, “A ţha alawm, tar chak tawh lo chhuata muttir tum kha ka hrethiam thei lo. Khual ţha thlen a in lo thlen ka rin nen mikhual satliah angin in lo dawngsawng a, in thil tih hi in chungah a let ve mai tur a sin” ka tih laia Puipuii nu lo kal chu ka hmu lo der a, hmelchhe bawk, rilru chhe bawk, film a misualnu ai pawhin a sual ka ti daih zawk.

“Puipui, i pite thawmhnaw saw i pindanah dah sak mai rawh. I unaute an lo thleng khawm ţan a, pindan thawl bik a awm tawh lo. An thawmhnaw vel saw i pindanah dah la, zanah chuan chhuatah mutna dup deuh kan phah sak dawn nia” a rawn ti a, chhang let lo tura ka insum nasa lutuk chuan ka kut ka hum ruh ngat ngat a, ka kutphah pawh ka tin in a chhun na vek thei hial a ni.

“Chhuatah mu suh se, ka khumah mu se la, keichu ka ţhiante nen hian chhuatah kan mu mai ang, ţhalai zawk kan nia, hrehawm kan tuar thei zawk” Puipuiin a tih chuan, “I tih dan dan le..mikhual pindanah lah i nu Zuali te an awm hman si a, i pi te pawh hi an lo kal tlai lutuk a, niminah te khan lo thleng se ţha tur” a ti kual vel a, kal hmasaber mah se midang kian turin a ti tho ang.

Puipuii nen chiaha kan awm hnuah, “I pa hi a nep e” ka ti ţha leh a, min haw mah se pawi ka ti tawh lo reng reng. “Nia, ka nu thu thu a ni mai” a tih chuan, “Hmeichhe lalna chhungkua a nuam ngai lo. Ka pi te hi hetiang mai mai a a tih tur an ni lo reng reng, malsawmna pawh in dawng thei nang. Keichu ka pasalin ka chhungte a ngaithei lo a nih chuan a chhe ber pawh huamin ka ţhen vang vang ang” ka ti a, ka pi te hruai tura kan phei leh pawhin Puipuii nuin, “Ka nu, in ipte vel kha choka lamah hian lo khai phei rih daih rawh. Mikhual an rawn inthlen chhawk zut dawn a, hnawk an ti palh ang. Ka pa pawh duh leh Puipuii pindanah ţhu hahdam daih la, naktuk man hlan a ni tawh a, rin aiin mikhual an tam bawk si a” a ti nem hlawi a, a ţawng hlawi hlawi vang tak te hian a fel ka ring lo hrim hrim.

“Khawi laiah khan nge kan dah ang?” tih paha ka piin an ipte khai a tum chuan ka tlan phei vat a, “Khawi, Puipuii pindanah ka lo dah sak ang che. Choka a ipte dah te chu a, kan vei tawn sek hlawm bawk si, a bal duh dawn emai” ka ti ve zaih a, “Puipui, ka pu kha lo hruai la” ka tih leh hnuah ka pi te ipte khai chungin Puipuii pindan lam ka pan a, a nu ve kha, nem deuh si, ngeiawm deuh siin a ţawng reng a, tu mitmei mah a veng bawk si lo, an inah hian karkhat vel awm ila chu kan insual rup rup thei hial ang mawle.

“Pi, khumah hian mu rawh u aw” pindana kan luh ruala ka tih chuan, “Mikhual an tam a ni lo’m ni? Chhuatah pawh kan mu thei alawm. Keini chu khum dup a mut kan thiam lo zawk a, kan khum pawh a ruh theih em kha” a ti tak nain, “Chhuata mut ai chuan a nuam zawk ang” ka ti tlat a, Puipuiin ka pu a rawn kaih luh rualin khuma mu turin ka lo hrilh leh a, “Mikhual pindan kha in awmna turin kan lo tifai a, mahse ka nu Zuali te kha ka nu’n a awm tir ta daih sia” inthiam loh hmel zetin Puipuiin a lo ti ve a, “A pawi hleinem, an rawn kalna a hlat hlawm hmel si a, keini aiin an chau zawk ang. Keini chu intihna hmun hmunah kan mu thei alawm” ka pu’n a tih chuan Puipuii khuma an ţhu dun bâm chu ka en a, sumo an chuanna lamah an pawr deuh chhap bawk si, hetah lah tuman an lo dawng sawng ţha duh lo a, a lal ber tur kha chhuata muttir an tum leh nghal a, ka lainat lutuk chu ka hnuk a ulh ţeuh a, ka pi te ţhut lohna lama inherin ka mittui ka hru zauh a, ka phone ri chu ka en vat a, Sangkhuma hming ka hmuh rual chuan ka aw thian kharhin ka hello zui nghal a, “In in lamah kan haw” a rawn ti mawl tawp a, “Tih tur a la tam a sin. Ar talh tur te kha an tia, ngati nge in haw daih a?” ka tih chuan, “Puipuii nuin ka pi te a tihdan kha kan hmu ve vek a, a lawmawm loh emai. Ar chu an khual ţha te khan talh rawh se, man hlan naah pawh kan kal lo vang. Ka pi te chu min awm lian tu an nia, kan nu leh pate pawhin keini aiin an kuah nasa zawk che u an tih ţhin kha a nia, in kalsawn hlana a unaute bula a phun ri pawh kan hre vek. Khanu teh hrep kha kan hmu chak tawh hlawl lo ve” tih leh phone dah a rual a, a va han buaithlak ţhin tak. Naktuk a mi tur ar vel zan lama buaipui an duh bawk si, tunah lah zanriah ei a hun lek lek tawh a, han inbengdai ve hram hram se ţha tur a nia, Sangkhuma thinchhe lutuk hi chu a buaithlak ţhin a ni, thinrim laiin thil a ti tut tut zel a, ka pi te thlavang hi chu kan hauh na vek nachungin tunah tak chuan tih tauh a hun rih lo. Puipuii nu pawh chuan eng nge maw a lo sawi reng reng ni, kan buai phah vek dawn a nih hi.

Puipuii hnena chanchin ka hrilh chuan, “Zanriah eikhamah in vengah kan kal vang vang ang a, kan thlem dawn nia” a ti ta ringawt a, ka pi te berkher hi chu kan khaw nula leh tlangval te tan pi leh pu an ni ve a, an dawr pawh kawngpui an a ni lo nain an inhralh thei ber reng a ni.

Kan veng lama haw tuma kan inpuahchah laiin u Ziran min rawn biain kan in bula a awm thu min rawn hrilh a, “Lo awm rawh kan lo haw dawn” ka ti a, Sangkhuma thinbutut a chhuak bawk si, kan haw hmaa in aţanga an lo chhuah daih kan hlau ber a, kan hmanhmawh khawp mai.

Taxi in kan tlang par par a, tumah kan inbe lo. Nutei takngial pawhin kan boruak hrethiamin engmah a sawi lo a, kan inzawna taxi kan din tir rualin hmanhmawh deuhin kan chhuk a, step bulah naupang pawmin u Zira a lo ding vang bawk. Ka ţhiante mitmei pawh veng lo vin min hmuh rualin naupang ţawng ang maia fiah lo hian, “An lo nai tawh tuk te a Lemtial” a ti a, hmeichhe naupang kut chu a ti che pah zeuh zeuh a, ‘kan lo ngai tawh lutuk che a Remsial’ a tih naah ka ngaihsak mai a, “In nai tak tak mi Zilbawng” fiah lo zeta ka tih ve chuan a tum hmuk a, “Sangkhuma a ti tau a” zawitea ka tih leh chuan, “Ngati nge? Zu vang bawk em ni?” a lo ti nghal a, “Ni lo” ka tih laiin Puipuii te Nutei te kan in lam panin an chhuk a, kan pahnih chiah kan ni tawh bawk a Puipuii nuin ka pite a lo dawn sawn dan ka hrilh a, “A unaunu hnena ka pi te chanchin a sawi lai a lo hre fuh kher bawk sia, a thin a rim leh vut tawh a, kan thlem lungawi loh chuan a haw daih duh tak tak mai ang” ka tih laiin kawngkhar ri bur kan hria a, u Zirbawnga naupang rawn hruai pawh a phu nasa khawp mai.

“Engmah in nih bik loh kha Puipui” Sangkhuma ngei mai chuan vin zetin a ti a, a aw a lawi nasa emai a rui aniang, u Zirbawnga pawhin, “A rui a ni maw? Zu a in vang a ni pakhat ang” a lo ti ve a, Sangkhuma rawn chhoh veleh naupang chu min pawm tir sawk sawkin Sangkhuma awmah zawi tein a lo nam a, “Chhuk rawh, mi vengah buaina an siam ngai lo” awki pangngai deuh hian a ti a, a mitmeng en pawhin a rui hle tih a hriat a, rui lo hai lo chu nise hetianga a awm hi ka ring lo reng a ni.

“In hre ve lo a nih kha, Puipuii nu ve kha, thingtlang mi an tam lutuk a chuti khati a ti sur sur a, ka pi te lo thleng lah a hnaiha an kal apiangin rimchhia ti ni awm takin a ner kual vel a, eng an nih bik loh nen” a ti nghut nghut a, “Chhuk phawt ila inchhungah kan sawi ţha dawn nia” awki dam deuh a tih leh pahin u Zirbawnga chuan a darah a kuah bet a, “Naa..ka peih tawh lo, hnawk min ti tu te innei ka lawmpui peih lo” a tih chuan, “Puipuiin hnawk a ti hleinem che” u Zirbawngan a lo ti vat a, “Chhuk ila ţha deuhin sawi ang aw, a ţul chuan keimah nen kan va kal ang a, kan lungawi loh thu kan sawi ve dawn nia” tih zawngin a thlem a, a kal pui dawn lo tih ka hrechiang viau thung.

Ka naupang pawm lah chuan u Zirbawnga a ban zuk zuk reng a, min hmuh ţhan loh em vangin min la nel bawk si lo, “Ka lo lut hmasa ang” tih pahin Sangkhuma te chu ka kal pel a, zu rim a nam huam mai. Inchhung a naupang pawm chunga ka lut chiah chu hrilhhai hmel deuhin min lo en hlawm a, Maski-a pawh a awm. Guitar a kuah hlun a, u Bawihan lehkhapuan chilh khawm ni awm tak a keng bawk a, an zai dun leh tawh a nih ka ring. U Zira te an rawn luh phei chuan mak an tih hmel lehzual a, “Sangkhuma rui kha bengdaih a har lutuk a” u Bawihan a lo ti zauh a, u Mama leh Maski an ngawih reng laiin Fawnvelan, “Engtin nge nangmaha i lo in zawh vek theih a C. Sangkhum, i biri birh burh burh em ni a? No2 bak ka in ve hman lo aw, kan tui pawlh nen chhut phei chuan no1 chiah in ang vel ka ni” pawr zet hian a lo ti thung a, “Case inkawkalh deuh deuh chinfel tur a tam hmel hle mai” u Zirbawngan a ti ban charh a, Maski lo awm ve pawh chuan rilru a ti hah pha tawh lo, Sangkhuma vangin rilru fim ka hmang thei lo a, a rui lutuk chu ka ngei em em ringawt mai a ni.

CONT…