Lalruatsaka :

“Mami tho rawh vawiin i ni hmasa ber tur a ni lawm ni?,” Ka room a rawn luh pah in ka nu chuan a ti lang lang a, ka tukverh parda zar te chu a hlip eng nghal bawk. Mit nuai chat chat pah a tho chhuak in ,ka lukham hnuai a ka phone dah chu ka ban zui nghal zat bawk,chuta dar zat ka han hmu chiah chu ka mengzau nghal kawk thei.

“Ka tlai dawn,nu, tun aia hma deuh ah min kaihthawh tur a lawm,ka nikhat na a ka tlai nghal chuan midang in mak min ti ngawt ang” ti zui hlak hlak in,hmanhmawh deuh in ka che zui sawk sawk, “zawk za mah che chuan, nula puitling i ni tawh a,nu te kaihthawh ngai a awm ziah te kha zak zawk ta che, nizan ah pawh ka sawi reng a, ‘thawh i hai a nge, rei deuh phone khawih suh’ ka ti mawlh mawlh a lawm” ka nu in a lo ti ve thung. Ka nu thusawi pawh ngaihven zui tawh lo chuan ka insiam nghal zung zung a, ka insiam zo room atang ka chhuah chuan chaw ei an lo siam mek.

“Ka ei lo mai ang ka hman tawh lo” ti a chhuah mai ka tum chu, “a tullo, rawn thu rawh i la ei hman” ka nu chuan a lo ti nghat a, dar zat ka en a, a tlai ang reng tawh,mahse ka nu hi chu a tih tawh loh lam ah chuan palzam mai mai theih a nilo a,  kan laklawh emaw kan buai zual  viau a nih loh chuan chaw ei rual loh hi a ngaihdan a ni thak lo, ‘chhungkaw kim a chaw kil ho thei lo tam tak an awm lai a, kil ho thei reng, chhuanlam eng emaw vang mai mai a eirual loh hi ka ngaihdan a ni ve lo’ a ti deuh bur mai a ni.

Rilru hmanhmawh ru deuh chung in dawhkan chu ka kil ve leh ta a, hmanhmawh nak alai in ka nu lah chuan min la zilh ang ta lai lehnghal, “tunlai thalai tam zawk hi chu zan ah rei tak tak thleng phone khawih in chhungte muthilh vek hnu ah pawh in meng a, zing lam ah in tho hleithei leh hlawm bawk silo, chin tam loh a tha, zan ah in duh thu in rei tak in la meng a, zing ah pawh tho hma rawh u, in zan menrei kha chu in duh vang a nia ,in zing lam hun a tihbuai keichuan ka rem ti ve lo” ka nu chuan a ti hmarh hmarh a, sawidik viau mahse   chung ka nu min zilhna te chuan ka beng rawng a luh teh chiam lo, “nangphei chu  pasal neih hun i ni ve tawh a, kan in atanga i inzir loh chuan inzir na tur hmun dang i neilo, i mothar tuk ah i tho tlai a nih chuan i hnar i hmu lian ve viau  ang, chu mai bak ah i mo na te in a i nungchang leh i khawsak dan a zir in ,kei i nu hi min chawimawi in min chawimawilo thei a ni tih hre reng ang che, ‘in lam ah zirtirna a dawng lo a nih hi’ ti a i mo na ten an sawi che a nih ngat chuan,an tawngkam ka hriat rual rual in ka rawn kal a nga, mi zing ah pawh ni rawh se i hnungzang kha ka kutphah lak atang hian a him dawn miah lo a nia” ka nu bawk chuan a ti leh a, ka chaw ei pawh a tui hrep lo e.

“A ninawm min hau vak vak zel suh, chutiang chu hrelo ka ni bik lo, a hun ah chuan ka in siamrem ve mai ang tun atang lo buai vak suh” lawm vak lo chung a ka tih chuan, “O mami hi a nu in a hauh a piang che hian i hnial ve ziah” ka nau chuan a lo ti a, ka melhrum nghal vak, “nangpawh kha ngawi rawh, mipa i nihkha ,mipa chu tawngtam loh tur” ka lo ti hmak, ner nang nang chungin chaw chu a bar a,min chhang zui tawh lem lo.

“Han zilh che ila,zilhna ka hua e i ti ve khanglang ziah lehnghal i zahpuiawm mang e, nakin ah tun a ka zilhna che hi a pawimawh zia leh a dik zia i la hre mai ang, nangman a tawn a i in tawn harh a ngai a nih hi” ka nu bawk chuan a lo ti leh hmak. Ka nu min zilhna ah khan diklo a awm lo a,ka haw hek lo,mahse ka ning a ni,midang pawh an nih ve tho ka ring,  kan tan a tha tur a min zilhna ah hian lawm tak a ruang in kan lungawilo zawk duh tlangpui,nge keimah hi ka sual ve hrim hrim pawh ka hre bik lo, mood fuh loh chang phei chuan an lo phun ve sek hian a ninawm ve duh em bawk a ni.

“Aww!!  Ka hria e, naktuk zing atang i thusawi chu ka lo practice ang, ka tlai dawn” tih leh thawh chu ka rual a, ka kut ka sil hnu ah, “a nih ka kal aw” tiin ka nu leh ka nau chu ka chhuahsan ta nghal.

Kei hi Lalrinzuali ka ni a,  Zualbawih tiin a tam zawk chuan min ko mai thin, kum 27 na ka hmang mek a , tun thleng hian ngaihzawng nghet ti a sawitur ka la neilo bawk, lerh ti a sawi ka ni ngai lo bawk a ngaihzawng pawh hi pakhat chiah ka la nei ,kan tawp dan lah kha a that vak loh avang khan ngaihzawng dang han buaipui leh vel kha ka peih lo a,ti hian kum 4 zet chu ka single ta a nih hi,ka pa hian kum 3 kal ta khan min boralsan tawh a, ka nu ho in ka nau mipa kum 15 mi nen tun ah hian kan cheng ho ve mek bawk , ka pian hnu khan ka nu hi a rai leh lawk thei lo a, nau ken leh pawh an in beisei tawh loh hnu ah ka nau hi a pai leh ta sia,ka nau pian lai hian keichuan kum 10  ka pel tawh, mipa a lo ni kher bawk nen ka nau pian hlim a ka nu leh pa hlim hmel kha tun thleng hian ka mitthla ah a la cham reng mai. Chuan vawiin hi hna ka hmuh atanga ka ni hmasa ber tur a ni a,college zirlai ho nen kan in hrawn dawn a nih hmel e.

Ka tlai ve deuh tawh avangin two wheeller taxi la in college lam ka pan a, ka thlen ve meuh chuan ka thawhpui tur te chu an lo kim thap tawh, thawk thar tur lehnghal a tlai ber a ka tang chu a ruk tak chuan ka zak chem chem mai,ka nu thu min hrilh pawh ka hrechhuak uaih uaih mai a lawm. Principal in in hmel hriattirna te a neih zawh hnu ah keipawh ka dawhkan lam ka pan ve chauh a, ka thawhpui tur te chuan min lo be nghal luam a,an fel hmel viau hlawm mai,mahse a nikhat na te a ni bawk a ka zia tak tak ka la chhuah ngam lo,ka in la zakzum ve deuh tihna a nih chu,ka han tlangnel a nga ,ka phawk a chhuah phei chuan ka nui ring leh thei viau ang.

Nikhat na atang class ka nei nghal a, a ruk chuan ka zam ru ve reng, college naupang hi chu highschool zirlai ang chauh a treat theih an nih tawh loh na lai ah hian buaithlak na chen a awm ve a. Class ka luh dawn chuan thawk kan la hmasa halh a, class ah chuan ka penlut ta a, a hmasa in introduction te ka pe hmasa te te a, chumi zawh ah zirlai lam ah kan kal nghal mai. Zirlai ka explained mawlh mawlh lai chuan, “Miss kan lo lut thei em?” Tih ri avang chuan ka thil chhiar lai pawh tawp in , aw lo chhuah na lam chu ka hawi a,mipa pathum hi kawngka ah an lo ding reng mai.

“In va tlai ve?” Ti a ka lo zawh chuan pakhat chuan, “nia, kan hma thei thlawt lo a ni” ti in a nui zui ham ham a, a mi chhan duh dan mai mai chu in zahloh thlak ka ti viau mai , “office lam ah va in report ru, class zawh dawn tawh lam ah chauh in rawn lut a, in tlai dan hi a mah mah” ka ti ve hmak, nichin a min chhangtu bawk kha a lo nui leh a, “miss, tun chauh chu min hrethiam mai la” nur nang chung a  a tih chuan kei mi zaidam zawk zawk lo chuan ka vaw zawt chak ngei mai.

“Vawiin ka ni hmasa ber a ni bawk a, tun chiah chu ka ngaidam mai ang cheu,lehpek awm tawh lo se” keipawh chuan ka ti ve ta a, diktak chuan ka ni hmasa ber a hrem neih kha ka duh loh vang leh thawhpui dang ten ngampa hma min tih ka hlauh vang a ni pakhat, thinchhe viau mah ila mi mitmei ven hi ka pe na ve riau .

Class ah an ni mipa thum te chu an rawn lut a,chiang deuh in ka lo en hlawm, a tawp ber a lo lut chuan min rawn en in, “sorry”a ti sup a , a beng a pawt pah zeuh bawk, a in thiamloh tak tak erawh ka ring hauh chuang lo,thaw hak in zirlai chu ka la zawm leh a period change hun a ni har tawh ka ti viau mai, khang naupang pathum ho khan ka mood an rawn ti chhe ringawt a lawm, chutih rual in an ni pathum avang ringawt a naupang dang ho zawng zawng tawrh tir tel ve kher chu ka tum lo,ka hna hi ka lo chak em em thin a ni bawk a, theihtawp chhuah pawh ka tum.

“Zualbawih eng in nge i haw dawn a?”   College building ka chhuahsan fel chiah tih ah,ka thawhpui Rinfela chuan a rawn ti a , a ni hi tlangval a la ni tih kan sawitel hram a nge, “ka hre lo le, bus emaw taxi emaw in a niang” tiin ka lo chhang, “ka va thlah dawn che em ni? Khawi veng ah nge in awm a?” Rinfela chuan a ti lehzel, “a ngailo, taxi pawh ka la thei tho alawm” tiin ka lo hnar a ,mahse a tihluih deuh tlat a vangin  kan veng chu ka hrilh ta nge nge a, kalkawng ah pawh kan ti ti pah luam mai, rin ai tak in a tawngduh reuh a, biak pawh a nuam viau e.  In kan thlen chuan thingpui in kawi tur in ka sawm tak na a, chhuanlam siam in min hawsan ta zawk a,ka tum aia hma a in ka thlen leh tak si avang chuan thildang ti hmasa miah lo in ka khum ah ka bawk zawi nghal nguai. Vawiin ka hun hmandan chu ka ngaihtuah a, a phurawm dawn viau e , mahse college boruak khan ka nikhat na a ni bawk a min hmet chau ka ti mai, kar hnih khat a liam hun ah erawh keipawh ka tlangnel ve deuh tawh a nga,ka in siamrem ve thei tawh mai ang chu.

Tlai a ka nu hnathawk lo haw chu ka lo be luam a,zinglam boruak erawh thleng lo ang hmak in kan awm leh ve ve tawh ,hei hi chu kan nufa dan ve reng a nia, a tul hun ah chuan min zilh a, min hau a, mahse reitak ka nu hian min lungawi loh khum ngailo,keipawn chutiang bawk in ka nu hi ka lungawiloh khum rei ngai meuh lo,thawk khat rik hluai kan nei e tih mai chauh a ni,tukin erawh kan ri hluai em em hran lo a nihkha , chuvang chuan kan boruak pawh a nuam viau mai. Ka nu hian ka pa boral hnu ah a theihtawp chhuah in kan unau in min enkawl a,  a mah a la valai a ,nu tam tak nise pasal dang an nei leh daih tawh maithei a ni,thenkhat phei chuan an pasal te thlanlung an phun hma hauh in pasal dang an nei leh thei a nia,chungte a nih avang chuan ka nu chu han inhnial pui leh bap bap thin mah ila,ka zah in ka chhuang ru takzet a ni. Ka  nu hian MC ah thawmhnaw dawr lian ve pangai tak a nei a, ka pa kha a dam lai khan sawrkar department pakhat ah hna a thawk ve a,chumi a pension hlawh chu tam vak lo mahse kan la la ve reng a, chuvang chuan khawsak harsa kan ni lem lo,mahni in leh lo ngei a khawsa kan ni bawk a, tun ah keiin hna pangai tak, hna zahpuiawmloh tak ka thawk ve leh bawk nen kan khawsa nuamsa viau mai.

“Nu, Muansanga hian bialnu a nei a nia” kan chaw eilai a ka tih chuan rang zet in ka nau chuan min rawn en a, “daw lo mai teh” a ti hluk bawk, “lehkhathawn ka chhar a lawm,i lukham hnuai ah” tiin ka nui pah rah rah a, “tinge ka phalna lovin ka thil i lo khawih” a ti nghal hlur mai, a in la pa ve tan tawh a ,rawlthar rawn zuangkai chho a ni bawk nen lerh a rawn hre ve tan pawh chu a hun lo hran tawh lo,mahse awmdan tur leh nungchang erawh hrilh fo a ngai ang, hei erawh ka nu kut ah ka dah, a tul hun ah erawh keipawn ka hrilh hre tho ang.

“Lungngai suh, engmah ka chhiar lo,tunlai ah phone a awm tawh reng a,tinge lehkhathawn te in la hman, in va che hmanlai reuh ve a” ka tih chuan, a zak ve deuh nge a chaw thleng a chawi nalh a, “hmanlai pawh ni mahse a special alawm” ti sup in a thleng a dah daih, kei erawh  ka nau lai che vel chu ka lo nuih hak hak thung.

A tuk ka college kal chu a hma ni ai ngawt chuan boruak pawh a zia viau e,thawhpui te an fel a keipawh ka ni hnih na chauh la ni mahse ka tlangnel ti tih nghal der, thawktu zing ah hian a naupang lam ka ni bawk a fiam pawh ka hlawh viau.

Class chu a ngai te in ka va la leh a, nimin lam a naupang tlai ho pawh vawiin chu an tlai lo e ,an ni ho chu an class ah chuan an in dah chungnun hmel viau mai, ka luh dawn pawh khan zirlai dang tawngkam mawi vak lo in an lo chhaih a, an mi chhaih pa lah chuan a ngam vak lo nge ni , a ngawi reng a , pawn atang reilote an chezia chu ka en a, ka luh hnu ah an tawp ve ta chauh, an hmel chu a chhe hran lo ,mahse he college ah hian naupang sual,awm tha duh lo pawl chu an ni ve maithei ,midang an chung tlak dan atang hian an zia awm chu ka lo man thiam ve mai, chu vang chuan an ni pathum bik chu ka ngaina lo ,ka hmel huat deuh tlat, a zirtirtu tih chi loh viau pawh in ti maithei, mahse mihring ve tho ka nia mil zawng leh mil loh zawng te chu ka nei ve bawk ang chu.

Lunch ei hun a nih chuan college canteen lam ah Rinfela nen kan inzui lut a, naupang ho pawh an lo awm nual mai, chutia keini pahnih inzui lut chu an lo ‘ee’ dual a, nuam lo ka ti ru ang reng,mahse Rinfela zawk chuan, “del dual hlawm cheu chuan, in thil eilai kha ei mai mai ru” a ti deuh hluk a, a nuih pah bawk avangin naupang ho pawh an nui ham ham mai,Rinfela hi a fel bawk a niang naupang ho pawn an ngamtlak riau a, fiamthu te hi a duh phian a,a bul a awm pawh a nuam viau.  “E nge i ei duh?” Ti a min zawh chuan , “chow a ni mai” ka lo ti thuai a, a ni pawn a eitur a tan chow chu lam ve in,ka ti ti pah bawrh bawrh , hmeichhe thenkhat hi chuan mipa hma a chow ei te hi an hreh thin a, a sei deuh vang pawh a ni maithei,kei erawh  mipa hma a chow ei hi ka zaklo a, ka ei duh a nih chuan eng thil pawh nise ka ei mai zel,ei mawi leh mawi loh lam ka care ve tehchiam lo.

Chutia thil ei pah a kan ti ti dun mawlh mawlh lai chuan canteen pawn ah chuan thawm ri hluai awm in, naupang thenkhat canteen chhung a awm ve te pawh chu an tlanchhuak a, keini pahnih pawh thil thleng hriat tum in kan chhuak ve thuai, chuta pawn lam a thil thleng ka va hmu ve chiah chu ka ner nghal sawk mai, a hma ni lam a naupang pathum bawk kha an lo ni, an pathum chuan mipa pakhat hi an lo dinchilh ran a,pakhat zawk a pawh chuan a hlauh hmel loh hle, “ka thil tih ah rawn inrawlh lo mai rawh” an pathum zing a sual ber,ti ila nimin lam a chaltlai deuh a min chhang tu khan a ,a hma a mipa mit ah tak en chung chuan a ti chang rat a, a hma a mi lah a zam duh der bawk silo. “Eng thil nge thleng?” Tiin Rinfela chu a va in rawlh ve ta a, an sir a hmeichhe pakhat thlaphan hmel deuh a lo ding chu ka va hmu bawk, “sir hei chu mipa buaina a nia” naupang sual pathum zing a pakhat chuan a lo ti a, Rinfela chuan a melh nghal hrawk mai, “Dinsang ngawi rawh” a ti ram hmak bawk,Dinsanga a tih pawh chu a ngawi chiang hle, chutah mipa hnih la in melh dun ran te hnen ah chuan, “e nge in buaina?”  Tiin a zawt leh, an ni pahnih erawh rum deuh in an in en a tu a zawk ve ve mah chuan Rinfela chu chhan an tum lo, “sir , cho leh cho te chu mipa tak in kan tih tir mai dawn em ni?” Sual ka tih te zing a mi pakhat chuan a rawn ti a, “Lalruatsak nang a pawh chu(h)” Rinfela chuan a ti hawk mai,Ruatsaka a tih chu a nui suk a, nimin lam a ‘sorry’ ti sup tu kha a ni. “In buaina in sawi duh silo a nih chuan principal office lam ah in luh a ngai ang, Ruatsaka lah hi  ‘cho leh cho’ lo  tih kha a tulna a awm lo, boruak thelh dai tur zawk in nih lai a khatiang tawngkam lo hman, in vai hian detension room ah ka dah zawk dawn cheu em maw ni” Rinfela chuan a ti leh hluk hluk.  Ruatsaka a tih chu a lo nui ruh ruh a, chu chu Rinfela chuan a lo hmu nge ni, “Lalruatsak nui suh nangni ho hi buaina in ni ziah” a ti leh hlak a, la nui ruh ruh chung in Ruatsaka chuan, “sorry sir” a ti sup a, a in thiamlo tak tak lo a ni tih erawh tu pawn ka hmu thiam vek ang,  Rinfela ai mah in Ruatsaka chu a sang zawk a, a hleitling viau bawk, en chian chuan biangsum a nei a ni tih a nuih zawng khan ka hmu , a hmel chu tha viau mahse a chimawm thiam ve hle mai ka lo ti ru neuh neuh, ka ngei ru viau bawk.

Tu man thil thlen dan an sawi duh tak siloh ah chuan Rinfela chuan, “principal room a kal nge detension room a awm in duh” a ti ta a,chutia a sawi ve leh chuan naupang dang ho chu an kalsawn pheuh pheuh a buaina nei ho zawng chauh chu an awm tawh, detension room a awm chu an lo hlau tlang hlawm viau pawh a ni maithei,thil thlen dan hmu vek tur a kan rin ho lah  in ka an ang ngamlo nge, engmah lah an sawi duh der bawk silo, “sawi ru khawi zawk a kal nge in duh” Rinfela chuan a ti leh thak a, chutah zet chuan an ner ta nang nang hlawm mai, “aaa!! sir khawi zawk ah ve ve mah kan lut duh lo,tun tum chauh chu min hrethiam mai la” Ruatsaka bawk chuan a lo ti nang nang a, ka kuk fawk chak reuh lutuk , “a nih chuan in in tihbuai chhan min hrilh a ngai dawn a nihchu” Rinfela chuan a lo ti a, an in melhkual ralh ralh hlawm mai, “sir mipa buaina a nia, hrethiam mai em ,a hma ang bawk kha a ni mai” naupang sual pathum zing a la tawng ve lo leh buaina nei ber chuan alo ti a, Rinfela chuan a lo hrethiam nge ni a bu nghat a, “in buaina lah hi a ho si, hetiang mai mai a buai lo hian,in zirlai zir tha zawk rawh u, tun ah chuan ka hrethiam cheu a nga, a lehpek a awm tur a nilo” a ti a, an lo bu ve nghat nghat hlawm mai, pakhat chu a kal hrang nalh a, naupang sual pathum pawh an kalsawn ve ta a, an kalsawn hnu ah thil awmzia Rinfela ka zawh chuan, hmeichhe pakhat in chuh vang a ni awm e, nichin a thlaphan hmel deuh a an sir a ding nu kha an hmeichhe inchuh chu a nih ka ring, Rinfela sawidan ah an vawikhat na a nih loh hmel,chuvang a niang pehhel tak a an sawi chung pawh a a hriatthiam tho ni.

Ka tlai haw tur chu taxi ka chang leh ta ran a, hman mai tur lah chu a vang hrep lehnghal  ,chutia taxi ka lo chan lai chuan ka hma ah bike pakhat hi a rawn ding a, ‘tu nge ni ang’ ti a ka ngaihtuah lai mek in a helmet chu a phelh a , ka rinloh deuh in Ruatsaka kha a lo ni,a biangsum lang kalh in min nuih var var a,mahse ka ngei laklawh  tawh avang khan ka nuih let ve lem lo, “miss ka lo thlah dawn che em ni?” Ti a la nui var var chung a min zawh chuan, “a ngailo taxi ka la mai ang” tiin ka lo chhang, ka milloh ruk mai bak ah ka zirlai nen a inphurh chu ka duh teuh lo mai.  “Taxi a van em hi ka va thlah ang che ruah a sur thut chuan i buai zawk a nge” a ti lehzel a, van lam chu ka en a ,a sawi ang tak tak in ruah chuan sur a tum hnai nge ni khua chu a dur khup khup mai a sur har tawh lo tawp ang.  Ruatsaka chu ka en vang vang a, ka chuang mai dawn nge ti a ka in ngaihtuah lai chuan, “lo chuang la” a mah bawk chuan a lo ti leh, ruah in min sur hnan mai ka hlauh vangin Ruatsaka bike ah chuan ka lawn ve ta nge nge a, “chak deuh in khalh suh aw” ka lawnkai veleh ka ti nghal bawk, a nui ri hak a , “yes miss,i thu ber” chimawm deuh huat chi ni mang silo chuan a ti  a , a tukhum ah chuan ka nem bu lawp chak reuh ngei mai.  Tlan ve ta ngar ngar chu kan veng kan thleng a, ‘ding rawh’ ka tih na lai ah a ding ve mai bawk, “khawilai tak ah hian nge in awm a?” Ti a min zawh chuan, “helai step ah hian reilote chhuk a ngai a, in mal ding a lo awm mai ang a hai theih loh” tiin keipawn tha tak in ka lo chhang ve mai, millo ru viau mah ila min thlah tu a nih mai bak ah min be chhe lo a,biak chhiat ngawt chhan tur ka nei lo.

“A nih fimkhur deuh in haw la, lehkha zir that tur aw” ka tih chuan a ner nak a, “college pawn ah chuan zirlai lam sawi lo teh” a tih nang nang lai chuan tum loh deuh in ka nui hawk mai, a hmel nur nang  chu a hmuhnawm reuh phian lehnghal. “Haw tawh rawh” ka tih leh chuan chiang zet in ka mit ah min en a, a mitmeng a fiah si, ka zam lek lek nia mawle, “Lalrinzual ka la rawn leng ang” ka mit a min en reng chung chuan a ti a nihchu, tun ah khan engtin nge min koh kha, ‘Lalrinzual’ maw, nuih a va za lem lo ve,ka student in ka hmingpum in min ko a nia. “Hey Lalruatsak!” ka ti vin that a, a ni erawh au ring min tih hmel deuh in a lo ner nang a, “thinchhe ve hle mai, chuan hmingpum ai ah Saka min ti dawn nia, ka kal aw” tiin a bike a ti nung a, biak leh hman hauh loh in a tlan chhuak nghal nal nal,  za lo deuh in ka nui hawk ringawt, kha thil teh hrep kha eng in zahlohna nge ni ngai.

In ka luh hnu thleng chuan Ruatsaka ngawt chu ka ngaihtuah a a ngeiawm ve chiang a lawm. Zan lam ah ka nau in an zirlai ah thiamloh a neih avangin ka enpui a, ka nau hi lehkha  thiam thei tak a ni lo na in a zir peih hrim a, a thiam hma chu bur ngat ngat ang kha a ni, 12 a zawh hun ah sipai ah in tlar ve daih se a tha ang ,a mah pawn  12 thleng bak ka kal dawn lo a ti bawk a. Chutia ka nau nen a zirlai kan lo in hrilhfiah mawlh mawlh lai chuan ka phone a lo ri a, ka en chuan number lawng a lo ni,lak loh mai ka tum na in thil pawimawh pawh a ni thei tiin call chu ka chhang leh ta zawk a, “hello” ka tih chuan a reh vang vang a, vawi hnih vawi thum “hello,tunge aw” ka tih hnu ah pawh lehlam thawm a la reh vang vang a vang chuan phun nuah nuah chungin call chu ka ti tawp a , min rawn call nawn leh lem lo.

Ka nau nen lehkha kan in zirtir  zawh hnu  ah keipawh ka room ah mu tur in ka phei a, a la tlai lem lo dar 10 chauh a la ni, mu mah ila ka muhil vat dawn chuang lo, zinglam dar 2 chu ka thleng leh tho ang, mi chu zan dar 10 a rik chuan an muhil mai a ,kei ve  chu vawiin zan a ka mu hi naktuk zing ah ka muhil chauh thin,ka nu min hauh tam na pawh a ni reng bawk.

Khum a ka mut fel hnu ah  whatsapp ah ka lut zuai a , nichin a min lo call tu number atang khan message a lo awm vang mai open lo a ka chhiar kim theih tho avang chuan ka open lem lo, ‘i aw a nalh hle mai’ tih te mai a ni, ka chhang lo, whatssap atang out in youtube lam ah korean serial mizotawng a an recap enlai ka neih chu ka en zawm leh ta zawk a, rei pawh ka la en lo ang tih ah number lawng atang bawk chuan message a lo thleng leh, “i online reng sia, induh ve hle mai” tih hi a ni, “tunge?” tiin ka chhang ve ta a, “ring chhin la,tunge ka nih” ti in min chhang, a ngampa reuh hle mai .

Chhan en ah pawh ka en tawh lo, an mahni insawi tha duh lo ho hi ka be peih lo , ka chhan loh vang nge number lawng bawk chuan, “naktuk ah ka thlah leh dawn che nia” tih hi a rawn thawn leh a, chu message vang chu reilote chhung chu ka buai deuh na in ka buai rei lo, “LALRUATSAK” tih hi hawrawppui ngat in ka va thawn ta a, ‘min ko chang thei si’ tih a rawn thawnlet a, nui then tha emoji hi a rawn dah tel tuarh bawk, ka chhang tawh lo.

A tuk ka thawh pawn Saka hnen atang chuan morning wish a lo awm, “e nge a hriat a hepa hian” ka ti tawp ringawt, duh ai chuan min ngamtlak mah mah hret in ka hria. Hun a kal ve bek bek zel a college a ka thawh atang thla hial a liam ve leh ta reng mai, zantin Saka chuan min rawn bia a,tuktin morning wish min hnutchhiah bawk, chhanglet tam ngai lo mah ila min biak a  thulh ngai lo a,keipawn ka ngai neih deuh tawh, college group atang ka number chu a nei a nih hmel, a ni tel in Saka chu ka hrechiang telh telh a, in ah pawh vawithum dang chu min thlah leh tawh, ka hriatdan leh ka hmuhdan ah chuan misual lutuk a lo ni hran lo, a thian te zing ah pa lo bik leh huai lo bik ang a lan a hlauh avang in midang lak ah pawh that a chhuah duh lo ve mai mai chauh ni in ka hria.

Inrinni tlai lam a ni a, bazarpui ah chawhmeh eng ilo lam khawm ka ngaih a vangin hmanhmawh deuh in ka chhuak a, kan awmna atang bazar a hlat vak loh avangin tlai lam a bazar pawh ka ni, chutia bazar a chawhmeh vel en a ka din lai chuan, “miss” ti a  min ko thawm ka hria a, ding mar in ka hawikual nghal thuai bawk, ka hnung hla vak lo a Saka lo kalphei chu ka hmu a, “e nge i tih?” Ka bul a rawn thlen veleh  a ti zang vah a, “hei ka bazar lawk a nih hi, e nge i tih ve zawk?” Ti a ka zawh let ve chuan,”keipawh hei ka bazar a” tih pah in a thil khai lai chu a lekkang zeuh a ,a biangsum lang kalh in a nui leh var var tawh, tawng leh ka tum lai tak chuan nutling pakhat hian Saka chu a rawn ko a, “ka lo kal” Saka pawh chuan a lo ti tha ve mai, “ka nu a nia” min melh zawk pah a a tih chuan a nu ni a a sawi chu ka va ennawn leh  a, chiangzet in min lo en a, a mitmeng a nelawm loh mai bak ah min huatna nei ni awm tak in min lo melh kul bawk nen ka mit ka lasawn rang viau, “a nih,ka nu in min nghak sia ka kal mai ang” tiin Saka chuan min kalsan a,keipawh ka duh ang ka lei zawh hnu ah in lam pan in ka haw veleh. In ka thleng a,ka chawhmeh lei vel ka rem fel lai chuan ka kekawr ipte a ka phone dah chuan min nghawr dat dat, ka phone phawrh a ka han en chuan number lawng hi a lo ni a, “hello” ka tih rual in nutling aw tih hriat zet hian,

“Miss Zualbawihi a ni em aw?” A rawn ti a, “aw ni e,e nge  ni ta?” Tiin keipawn tha tak in ka lo chhang ve mai, lehlam a mi chuan ,”i hman chuan tun ah inhmu lawk ang hmiang” a rawn ti leh a, tunge a nih ka hre bawk silo ka hrilhhai ang reng, “min hrethiam la ,tunge i nih tih min hrilh thei em le?” Ti a ka zawh chuan, “Lalruatsaka nu ka ni e,chuan hmuh lawk che ka duh a, ka sawina hmun ah hian lo kal mai ta che i hman chuan” a rawn ti nghal zat a, min hmuh duh chhan e nge a neih ang le tih ka ngaihtuah lai in, “power house chhaklam a thingpui dawr ah khan ka lo nghak ang che” tiin call a ti tawp zui nghal hmak,thu minpe a ang ka ti viau bawk ,a ngaihna ka hrelo lutuk chu ka ni huih mai,mahse Saka zirna chungchang ah harsatna a awm a nga min hmu duh a niang tiin ka ngaihtuah leh ta zawk a. Ka nu hnen ah ka kalna tur te hrilh in Saka nu hmu tur chuan ka chhuak a, min lo nghah na tur hmun a sawi ka thlen chuan coffee in in a lo thu vang tawh ,a mah a nu lian a, a mitmeng a hriam hret na in a lang zahawm khup mai , a incheina atang chuan mi awmthei chhungkua chu an nih ngei ka ring ve tawp.

A bul ka thlen chuan min lo enchiang leh hle, a mitmeng vang hian nuamlo ka ti lek lek ,nichin pawh khan Saka bul a ka ding kha min enchiang hle a nihkha, “thu la” tih pah in ka thutna tur min kawhhmuh zauh a,keipawh ngawireng in ka thu ve mai a, kan in hawitawn ta ran mai, Saka ang in mitmeng fiah tha tak a nei a,mahse Saka mitmeng erawh a dam dap thung a nu ve hi chu(h).

“E nge ni ta, pawimawh a awm ni tur ah ka ngai tawp a” tiin a upa zawk in tawng mai a tum loh avang chuan keimah zawk chu tawng hmasa ah ka tang a,min chhang nghal mai dawn emaw ka tih laiin a hma a coffee no in hung chu ban in,an in leh hmasa te te a,chumi zawh ah chiang zet bawk in min rawn en leh,chutah “i hriat ang in ka fapa hi i zirlai a ni a, kum lam ah pawh nang ai daih in a naupang zawk bawk” a ti fiah fak fak a, engtak sawitum ang maw ka ti ru rauh rauh mai , a tawngkam chhuak lah a nelawm tehchiam loh lehnghal , mi chungtlak dan a thiam viau in ka ring.

“Chu vang chuan Saka hi i zirlai ang chiah in en la ka duh a ni, a bak a awm tur a nilo” a ti deuh nghat a, a mi tih dan mai mai chu(h) a fapa nen kan inkar a inzawmna awm ang mai in a lawm a tawng le, “e nge i sawitum ka pi” ka ti ve fak, min biak dan leh min endan atang hian min thamlo hle tih ka hmuh hmaih bik lo,  chutah Saka nu chuan , “ka sawitum tak chu ka fapa hi hlat rawh, ka fapa nen in inkar ah eng emaw boruak a awm ni in ka lo hria a,chuvang chuan ka fapa hi college pawn lam ah chuan hnaih tawh lo tur in ka duh che a nihchu, ka thusawi i hriatthiam chuan ka ngenna che hi min hnawl sak lo hram dawn nia” a ti leh fak fak a, ngenna maw,hah!!..ka  nuichhuak hawk, ngenna te chu a ti vel a thupek a nih zawk chu, min tihdan avang chuan ka lawm lo viau bawk, “ka pi ,hriatsual i nei a va nih hmel em” ka ti hak a, kei aia upa zawk a nihna chuan ka thinrim na min la up beh then tir mai mai chauh a ni, Saka nu chu a nui tawi tak a,min thamloh hmel zet a min en in, “hresual ila ka ti khawp mai,ka fapa hlat a i awm hi ka duh chu zawng chu,a chiang em?” A tih leh chuan ka insum thei tawh biklo,ka ding hluai a, “ka pi, hriatsual i nei a nih ka ring, i fapa  hi ka student ang bak in ka en hauh lo a nia  , engtin nge tun a i ngaihdan atthlak lutuk kha i neih pawh ka hrelo e, chuan i fapa nen hian college pawn lam ah a fal in kan in be ngailo bawk. Khatiang ngaihdan i siam hma khan ka side lam hi uluk tak in zirchian hmasak tur che a nia, lungngai suh i fapa nen eng inzawmna mah kan neilo a nia,a nih ka lo va kal hmasa mai a nge” ti ve hmak in ka kalsawn nghal daih, ve mai mai a, upa zawk mah nise khatiang a min rawn tawngkhum ringawt kha ka ngaithei bik miah lo, Lalruatsaka nen kan inkar ah eng boruak mah a awm hek lo.

Thinrim deuh in in ah ka lut a, ka room ka pantlang nghal,Saka number hmetchhuak in ka call a, call a chhan rual in, “Lalruatsak i nu bul ah engchiah nge i lo sawi a, kan inkar a boruak awm ang a ngai thei tur in” ka ti nghal tawn tawn, lehlam a mi chu a ngawi reng a a hamhaih ve deuh a nih ka ring, “vawikhat mah min rawn be tawh suh a chiang em, i nu hnen ah pawh kan inkar ah engmah a awm loh thu hrilh ang che” ti leh in call chu ka ti tawp hmak, ka thinrim lutuk chu ka sa pup pup thei in ka hria, thinchhe mi lo nih ve bawk nen, chutiang a Saka nu in min ti ringawt pawh chu paidam har ti tak ka ni.

A tuk a class ka lak pawh chuan Saka chu ka hmulo der ta ngat ngat, a ni chuan min melh zeuh zeuh reng tih ka hre na in, a mah pawh hi a nu vang khan ka ngei, ni e, phone kaltlang chuan kan inbe fo ,college ah sual ang in lang mahse a ruk a a sual loh zia leh nungchang tha ve pangai tak a nih zia ka hre bawk,a chhungril thatna ka hmuh a vangin keipawn a tir a millo viau si kha, ka ngaina riau a ,maherawh chu ‘ngaina’ tih khan kentel dang a nei hauh lo thung.

Nileng in ka pehhel a, a call leh text engmah ka chhang duh lo, ka zirlai a ni a, ka zirlai ang chuan awm mai rawh se zirlai lam kaihhnawih a nihloh chuan biak tum na ka nei tawh lo, “Zual, ka lo thlah dawn che em ni?” Tiin ka bul ah Rinfela a rawn ding a, mahse ka chhan hma in, “sir,miss chu keiman ka lo thlah mai ang, an veng ah ka kaldawn tho a” Saka chuan a rawn ti a nih chu, a va han zamlo reuh tak, “a tihzia hlauh tak chu a, va thlah zawk mai rawh i remchang zawk a nihchu” Rinfela chuan a ti sam leh et a, a ni pawh chu ka van ngei reuh tak, a kalsawn nghal daih lehnghal, Rinfela kalsawn veleh Saka chu na zet in ka melh a, “thlah ka ngailo” ka ti ram hmak, a ni erawh a lo nui suk a, a biangsum a lang leh tawh,aaa!!! ka thil ngaihtuah mai mai chu(h).

“Min lo zui la,sawlai deuh ah sawn bike ka dah” dam dap hian a ti a,kei erawh in ka la melhrum al al hle, “thlah ka ngailo ,i nu khan diklo deuh ten min lo ngai leh vel a nga” ka lo ti  hmak,a mit tizim deuh san  chungin a ni chuan min en a, “ka nu chuan engchiah nge i bul ah a lo sawi a”  a ti ta nge nge, thawk ka la hmasa te te a,ka thinrim tha leh dawn in ka hria, min tihdan zawng zawng chipchiar mangkheng in ka hrilh ta vek, ka sawi zawh meuh chuan ka thaw hawk thei nia.  “Ka nu chuan a ring dik a nihchu” thawm rikloh lai tak chuan a rawn ti nghut a, ka melh rang hle, “eng chu maw a rindik a?” Ka lo ti he haw, “aww!! Kan inkar ah boruak awm ang a a ngai chu mawle” a tih chuan ka van ner  nasa tak, “Lalruatsak i nu khan engmah rindik a nei lo e,kan inkar ah hian eng boruak mah a awm lo thilnung zawng zawng hip theih oxygen bak” thinrim deuh a ka tih chuan a ni erawh a lo nui hawk a nih chu,ka van melhrum tak. “Nuihzatthlak ka sawi lo” ka ti ram leh hmak a, “mahse ka nuih hi a za tlat bawk sia,a mak tiraw, nuihzatthlak chu i sawi chuang miah silo” tiin a la nui hak hak reng a, a ngal ah ka chhuih pawp, “a na lutuk!!” A ti vin hluk a, a ngal chu a dawm zui nghal vat bawk, “thu lawilo sawi reng lo khan i kalna tur ah kal vat mai rawh” ti a ,in her a kal mai ka tum chu, rang zetin  ka ban ah min lo chelh a, a lam ah min hnukhnai hrawk bawk,a chetdan teh thut chuan min tih hamhaih em avangin min pawh lai a ka au deuh that bak thawm ka chhuah lo hrim hrim, “min ngaithla teh” a tih chuan a mah chu ka en a, mitmeng hriatthiam har zet a min lo melh in a thu tak hmel viau bawk,ka ban a chelhna atang talchhuah ka tum chuan a kut lehlam in ka kawng ah a lo chelh leh hmiah a nihchu.

“E..e nge i hriat a min thlah vat rawh!” Ka tih chuan , “shhh!! Zual ka duh che, i hria em ka sawi chu kei hian ka duh lutuk che” a ti ta a, kan in en hnai bawk nen in melh chiang tak kan ni, mak ka ti lutuk chuan sawitur min ti hrelo zawk, “i mawl a mi a” ka ti tawi tak ringawt, ka kawng a a chelhna a la thlah lo bawk nen a thusawi zawh tak chiah avang chuan engtin emaw ni ka awm, ka awm a nuam chiah lo miin min lo hmu ang tih pawh ka hlau viau bawk.

“Nang duh che hi mawlna ah i ngai dawn a nih  chuan,i mit hmuh a mi mawl nihchu ka pawi ti lo” a tih leh chuan ka chil ka lem khawlh,hetiang a hnai ah hian mipa in ka pian a hnu lam ah min duh thu an la sawi ngai hauh lo,tun hi a tum khat na a ni. “Min thlah rawh,midang in min lo hmu a nge” pangai tak ang a lan tum hram  hram chung chuan ka ti a, dik tak chuan kan awmdan avang hian ka thinphu a rang lutuk tlat.

A ni pawn min thlah ve mai a , a taksa atang ka hrang ta chu ka thaw hawk thei, thawk ka lo van chelh nasa awm em em ve le(h)..Chutah chiang zet a a mit a en chung chuan “Saka, nang leh kei a inkar ah hian eng boruak mah a awm lo a, awmtir pawh ka duh hek lo, eng a mah hma a i nu in khatiang a min tawngkhum ringawt pawh kha ka lawm lo viau a nia,nang leh zel chuan ka lawm loh na hi belhchhah suh, chuan, nang leh kei a inkar ah hi chuan  zirtirtu leh a zirlai ang bak eng mah awm a awm lo tih i hre dawn nia, i nu pawh i lo hrilh dawn nia” ka ti ta fak fak a, Saka chu a ngawi reng, a hmel atang ringawt chuan enge a ngaihtuah ka hrethei lo na in ka tawngkam chuan a deng ve dawt dawt tho in ka ring,ka student nen a inzawmna danglam neih tum na ka nei miau lo a tin ni. Eng mah sawi tawh lo in kan bul a taxi lo tlan chu ka phar ding a taxi ah chuan ka luhsan nghal hmak bawk,  a nu bul ah engtiang chiah in nge ka chanchin a lo sawi tih chuan ka ngaihtuahna a tibuai deuh dawn na in , a ri ruang erawh a mah Saka sawi hmang atang khan ka hrethiam ta tho, Saka hi kum 22 a ni a kei 27,kan inkar ah kum 5 ngawt a tlazep a a nu chuan min hmumawh ta pawh a nia nge, mahse keichuan min hmuhmawh ngawt chhan tur ka hre ve lo, a duh tu zawk ka nilo miau a.

Mahse Saka chu a reh nghal mai dawn emaw ka tih lai in a ni hauh lo, nitin zantin min bia a, college ah nise a theihna apiang ah min zui kawi a, ka thawhpui te leh zirlai ho pawn min fiam tan ta zeuh zeuh mai. Han vin chiam mah ila, ngawi reng in ka an hla a lo ngaithla a ,a tawp ah nuisang chungin min kalsan leh thin, a tih ngaihna tak pawh ka hre tawh lo, a nu erawh a reh ta vang vang a, a fapa nen inzawmna kan neihloh zia kha ka hrilh chiang ve bawk em a ni.

“Miss min lo nghak” ti a ka hnunglam atang min ko ri ka hriat chuan ka ke pen ka ti chak sawt, mahse ka hma ah min rawn din khalh leh ta tho,thaw hak chungin Saka chu ka melh chho a, a lo nui leh sang tawh, a biang sum langkalh a a nuih hi chuan a hmel a chhe miah lo,a sang a, ka duh dan ang chiah in mipa hang tak a nilo bawk, ngo var hlung lah a ni hek lo, a hma a ka lo hriat thin zia kha a ze diktak nilo in a inthup na kawr mai chauh a ni  tih ka hre lehzel bawk nen ,ka zirlai a ni kher chu pawi tihchang ka nei ve ta zeuh zeuh mai., mmmmm!!! e nge maw ka ngaihtuah hrep le.

“E nge i duh?” Ka ti chang fak a, “lunch eidun ka duh”tiin zangkhai vah in min lo chhang, “Lalruatsak nang aia upa ka nih hi min zah ve deuh teh, chubak ah ka zirlai i nih hi nungchang mawi hre rawh” ka lo ti leh hmak, a mit a ti che ralh a, “chuan” a lo ti duh lek a nihchu, ka van beng chak reuh tak, “kal teh, kal vang vang teh,ka hne lutuk che” ka ti ta zek, min en vung vung a, “min hne tak tak em?” A tih leh chuan melh hrawk in, “hne tak tak lo che ila,ka hne che ka ti dawn em ni, min zui kual reng suh, engkim ka hrilh chiang tawh che, nangmah vang hian college ah pawh thlamuang in ka awm thei lo, thawhpui te leh i zirlai pui te pawn min sawi sep sep tawh hi, ka hlat ah awm la ka thla a muang ang” duhthawh zet chuan ka ti leh a, a hmel ah chuan natna ka hmu thei ,mahse ka haider lui tlat tho, a nu a nasat hmel bawk si a,buaina neih ka peih lo pakhat bawk.

A ni chu tawite in a nui hawk a, ka hma a a ding chu sir lam ah a tawlh hret a, “a tha e, kal rawh, thlamuang lo khawp a ka lo siam thin che avangin min ngaidam dawn nia,tun atang chuan zalen tak leh thlamuang tak in awm tawh rawh, ka inthiar fihlim ta e” a ti nghet charh a,  rum zet a melh leh hram in ka kal ta nghal nal nal,vawikhat te mah ka hawilet lo.

Khami ni atang khan Saka chu a reh ta vang vang a, ka thaw huai thei, ka boruak hip pawh a zang ta vah ni mai in ka hria, mahse tumkhat inrinni a ka bazar chuan Saka leh hmeichhe pakhat,a mah ang rual tur vel bike a an inphur lai chu ka hmu a, in ka thlen thleng in a hmeichhe phurh kha tunge niang le tiin ka ngaihtuah ta a nihchu, karkhat lai a reh tawh a, college ah lah min pehhel zel a, nuam ka ti viau khan ka hre si a,tun ah lem a hmeichhe phur lai ka hmuh vang ringawt in ka awmdan a danglam vek a nia,mak ka van in ti tak , “Lalrinzual, e nge i hriat a, ngaihtuah loh tur tur ngaihtuah suh, a hmeichhe phurh kha i tan hriat a tangkaina a awm miah hleinem” tiin keimah chu ka inhrilh nawn sek a, a tawp ah erawh ka phone la in , Saka nen kan chat ah ka lut a, online a lo in ti kulh mai, ka ngaihtuahna a luah ngut ngut a hetiang ka ni ngailo a sin mak ka van in ti tak, khum ah ka mu a,a changin ka thu leh uai thin ka awmdan chu ka in hrethiam lo nasa a ni.

‘Online’ in ti reng chung a minbe lo te chu ka thinrim dawn dawn nia mawle, ka awmdan danglam tak chu ka hriatthiamloh em avangin ka thiannu Peki ka be ta ringawt, Saka nen kan chungchang leh tun a ka awm mek dan tlangpui te chu ka hrilh nual a, Peki chuan, “eng dang a nilo,i duh a nihkha” a ti a nihchu, ka van awih lo tak, “chutiang a nilo ang,thildang zawk a niang doctor pan mai ka duh keimah hian diklohna ka nei a niang” ka tih chuan a nui uarh uarh a, “awi awi awii!! ti khan doctor hnen ah va kal teh, an nuihzat ngawt ang che, kum 30 i tling tep tawh a, i la zeilo em em reng tho hi mak ka ti,i mawl huih mai bawk si, i duh tih kha pawm tawp rawh,i in hrethiam lo mai mai a nihkha, nang aiin naupang hret mahse tunlai ah te chu tuman kum lam an care tak tak tawh lo, a duh che a,i duh ve a nih phawt chuan midang chu hmawlhte ang in hmu vek rawh, i senior tawh easy rawh” ti zek in a mah chu a nui pah uarh uarh bawk, “i van biaktlak loh tak” ka tih tak hlak ah chuan,pangai zawk hian, “ka ti tak tak a nia,i inhrethiam lo mai mai a nihkha, Saka chu i duh alawm, college in kal leh hmak ber ah a mah i hmuh chuan i awmdan a danglam ngei ngei ang,ka hrilh tawp ang che,ngaihzawng lan ah tawnhriat i la ngah lo a i hrethiam lo zawk mai mai a nihkha” tiin min hrilh a, eng eng emaw sawi zui luam in phone kan dah thei hram,mut hmun ah ka inngaihtuah a,kei hian ka student ka duh thei dawn em ni, mahse Peki sawidan ah leh ka awmdan ah hi chuan ka duh ni in keipawh ka inhria.

Monday a lo ni leh ta, vawiin chu phurna leh phurlohna inpawlh in ka awm, Saka chu hmuh a biak ngei ka tum kum lam ah ka naupang chhia zawk zawk tawh lo bawk a, keimah a diklo awm ang chu chinfel vat vat ka duh, zak rual lah ka ni tawh hek lo. Lunch break laiin Saka chu ka call ta ngei a,a vawikhat na chu a la lo,mahse ka call nawn leh ngat a “hello” a rawn ti ta, thil a ei niin ka hria, “library ah lo kal lawk ta che” ka tih chuan mak a ti deuh a niang, “ti nge?” A ti hu mai, “lo kal tawp rawh” tiin call ka ti tawp a, library ah chuan ka lo nghak ran, lunch break lai a ni bawk a, midang tumah an awm lo thil ei in an chhuak vek a nih hmel,chumi hun thawl lai chu chuh ka ni reng bawk.

Rei vak lo ah Saka chu a rawn thleng a, min hmuh chuan , “e nge?” a ti nghal a,a chocolate kenlai a hmawm pah zeuh bawk library a ka ko chu mak a la tih hmel viau mai, chutah a hma ah ding in chiang zet in a mit ah ka en a, “nimin nileng leh zankhua in ka in ngaihtuah tawh ,nanghi ka duh che em ni?” Ka tih chuan a chocolate eilai hak in a khuh nghal bawrh bawrh mai, ngawireng in ka lo en tawp, a khuh nasa zualpui a reh hnu chuan meng phelh phang a min rawn en in , “chu…engtin nge chutiang te ka hriat a nga, nangman i hre zawk ang chu” a ti lawi rut mai, ka thusawi chuan a thawng ve hle a nih ka ring, a thil ei a hak na lam ah khan a mittui a tla phung bawk nen, “kha in hru rawh” tiin ka rawmawl kenlai chu ka pe a,a lo ban ve vat. A hmai a hru lai chu uluk leh chiang zet in ka lo en a, a hmai a hru zo min rawn en leh chu ka lo endan avang nge ni, “e nge i hriat a?” A ti ringawt, chutah kalhnaih deuh in “e nge ka hriat le” ka ti zui sap bawk , a mit a enreng chungin ka kalhnaih zel a, a ni a lo tawlhhnung zel thung, lehkhabu dahna chhuar sang a deh rawk hnu chuan, “e nge i hriat reuh le” a ti sup a, “inrinni khan hmeichhia i phur lai ka hmu, i reh hmak chu ka hrethiam,mahse keimah zawk hi ka in hrethiam lo,ka thiannu chuan ‘i duh a nihkha’ min ti a, ka duh che em ni?” A mit a la enreng chung a ka tih chuan a nui chhuak hawk a, chutah ka in rin hma in, ka dar ah a chelh a,min lehthlal in keimah zawk chuan a bet zawk ah ka tang ta ran mai, a kut lehlam in ka lu chung deuh lehkhabu inrem na chu a nem a, chhuar hi bang dep a awm nilo se chuan a tlu maithei a ni, “a nih nangin eng ang in nge i thiannu thusawi chu i ngaih?” Tiin min zawt let, “ka student i ni a” ka ti dek dek chu, “shhh, tun kum ah college ka zo dawn i student ka nilo thuai ang” a lo ti, “chubak ah kei aiin i naupang zawk bawk” ka tih leh chuan, “kum ka care lo,care ni ila ka duh lo ang che, kum te chu number mai mai alawm , a saptawng tak in ‘age is just a number’ an tih kha” a tih chuan,ka ner nasa mai , “kan pahnih inkar ah chuan a ni maithei, mahse thenkhat hmuh ah erawh a ni lo,number thil tihtheih zia i nu atang pawn a hriat khawp hi, eng a mah hma in min hmu mawh nghal a” ka ti a, a ni reng a, ‘age is just a number’ kan ti fo a, number thil tihtheih zia kan hriat hmaih leh thin.

“A nih chuan ka nu chu buaina a nih tak chu, chu erawh ka chinfel tur ah dah rawh, min ringngam a nih chuan engpawh ka hmachhawn huam” thu tak zet a a tih chuan, “ka duh che tih ka in hrechhuak ve chiah a” ka ti a, “chu chu a tawk, min duh tih i hria a,keipawn ka duh che” a lo ti nghat a, keipawh chu ka nui ta ringawt,kan han in lem kual dan vel chuan ka nuih a tiza deuh tlat bawk. Chutah ka kawng ah a kut lehlam chu rawlh lut in a rawn kunhniam a, “ka fawp dawn che” tih pah in ka hmai zawn ah a nui lum hak, a hmui in ka hmui chu a bawhthuah nghal zat bawk, zawimuang in min fawp a, ka mit ka chhing riai riai , he mipa ka zirlai ni bawk hi kei aiin naupang zawk mahse, ka duh miau a, a nu in min duhlo eng ang mahse ka hma chu ka sial mai ang, mahni tan chuan hma kan sial vek a ni lawm ni.

Saka nen kan inkar pawh pangai tak in kan kalpui ve ta, college chin a ni tawh bawk a kan inkar pawh kan zep lem lo, kan kum inthlau deuh erawh nuamlo tih chang ka nei thin, mahse ti hian Saka chuan a ti thin, “kum lam ah naupang zawk mah ila, lungngaih leh harsatna i tawh chang a innghahna tlak mipa nih ka tum, mi thusawi ah buailo la kan inkar a tlakzeh tum an awm a nihchuan keiman ka hmachhawn ang, kan in rintawn phawt chuan kan inkar ah buaina a awm ngai lo ang, kum hian thil ti thei viau mahse , hmangaihna hian kum aiin thil a ti thei zawk a ni tih hrereng rawh” tiin, a chang chuan upa zawk ni mah ila kei aiin a puitling tih chang ka ngah thin, zilh ka ngaihna ah min zilh hreh lo a, min duat thiam in,kei lah in chu chu nuam ka ti in upa zawk mah ni ila pangchan chang ka nei fo,ka thin a chhia in han vin leh chiam ka ching a,chung ah pawh chuan dawhthei tak in ka inbengdaih hun min nghak mai thin, keimah vang in a college nungchang tam tak a thlak a,tuman sual an ti tawh ngailo, chungte a vang chuan a ni tel in Saka ka duh na chu a pung telh telh a, zankhat lek min lo biak loh pawn ka buai ti tih der tawh, tin , a hmeichhe phurh ka tih kha a cousin a lo nia, mahse an inphur lai ka hmu kha a lo pawi loh hi ka ti ta,ka duh tih ka in hriatchhuah phah a.

Chutia kan inkar tha tak a kan kalpui lai chuan a nu hnen atang call ka dawng leh ta tlat mai,kan inkar vang a nih ka ring nghal hmiah bawk,mahse ka zam duh bik lo, tun hma atang ka duh na ah chuan huai ve tak ka ni a,ka zahloh vang nilo se min inthen tir a tum a nih pawn hnial tlat ka tum, Saka nu chuan inhmuh a rawt leh ta a, keipawn ka lo pawm ve mai, kan inhmuh na tur ka thlen chuan a ni chu a lo la thleng lo , a thusawi tur awm ang ngaihtuah in ka thu ngawi ran a, a rawn thlen hnu chuan in hmatawn in kan thu, chik zet in min en a, a mitmeng a fiah ka tih tawh kha, ka zam lek lek hial a ni, ” ka fapa nen in inkawp tih ka lo hria a, a hma khan boruak engmah in neilo ang khan i sawi si a” a ti a, a mitmeng a rum ang aiin a awiki a dam daih mai, ka chil ka lem khawlh,

“Nia, diktak chuan kha tih lai kha chuan kan inkar ah eng boruak mah a awm lo tak tak” ka ti dek dek chu, “mahse tun ah chuan a awm, ka sawi dik em?” A lo ti chat, ka bu nghat ringawt, a hma khan pawr deuh in kan inkar ah boruak a awm loh tur thu ka lo sawi tawh a, tun hun hi kan thleng leh ta sia nuam lo ka ti ve deuh, “englo a nia” ka tih lai chuan,ka hma ah invelope lian tha nelh nawlh tak hi a rawn dah a, “a chhung ah khan cheng sing thum a awm, i duh chuan ka pek belh ang che,mahse ka fapa hi kalsan rawh, ka fapa tan hian ka duh lo che” a ti bawl mai,ka nui ro hak ,a thil tih duh dan mai mai chu le(h) “ka pi min hrethiam la,Saka hi pawisa vanga ngaizawng ka nilo a,ka mipa duhzawng tak leh ka rilrem zawng tak a nih vang a ngaizawng zawk ka ni,i pawisa hi la let leh mai ta che ka mamawh lo e” ka lo ti ve hmak, min melh no lo teh asin, “tha tak a ka sawi lai hian ka thu hi zawm mai la i ti fuh ang mawle” in kuangkuah nghat chung a a tih chuan, “ka tihpalh ka pi, ka nu i nilo a,kan chhungkhat hnai lah i ni hek lo,chuvang chuan i thu zawm ngawt chhan tur ka neilo tlat min hrethiam dawn nia” ka ti leh ngat, “nungchang mawi i tlachham hle mai,ka fapa tan ka duhlo che pawh hi ka tisual lo e, khatiang mizia nen kha chuan engtik ah mah kan inrem thei ngailo ang” a tih leh chuan, cho zet a en in ka nui sak, “i ngaih ang a nungchang thalo chu ka ni biklo a sin ka pi,mahse ni e, min treat dan a zir zel in keichu ka in siamrem thei, ka chung a that chhuah lo tu lak a thatchhuah hi ka bat a ni bik in ka  hrelo” ka ti leh hmak , ka sual vang leh ka rilru chhiat vanga hetiang a awm hi ka nilo ,keichu ka rilru a lian a,ka kawlh bawk,mahse aia upa te hi chu ka zah viau thin, tun a ka hma a thu mek erawh ka bialpa nu mah nise min chungtlak in min hmusit em a ,hetiang hi ka tawrh theih zawng a ni ve lo, ka sawi ang khian kei chuan min treat ang apiang in ka treat let ve mai thin, chu chu ka mizia a ni,mi thenkhat ang in ka zia hi ka thup ve tit tet ngailo,a chang erawh chuan he ka zia , savage ve tak hi tha tih loh chang ka nei ve fo mai.

“Zaktheilo!!” Tih pah in Saka nu chuan a hma a tui inchhawp chuan ka hmai ah min theh thawt mai, a khurh dat dat dan ah a thinrim viau a nih hmel, ni e a lei la zawng a tawng kha ka thiam ve bawk em a ni keipawn, ka nui hawk a, kan awmdan chu a korean drama riau a ka hriat chu. “I duhtawk tawh em ka pi,a nih chuan ka kal phawt a nge” tiin ka tho nalh a, kal mai ka tum chu ka kut ah invelope chu min lo hmehbel chawt chawt mai, “ka duh lo la let rawh” ka ti chung pawn mi hmehbel lui in a mah zawk chu a chhuak nalh a, kan bul a vel te chuan min en he haw hlawm mai,ka zak ru viau bawk.

Thinrim teuh chungin ka haw a  Saka then erawh ka tum lo nasa,  a tuk college kan chawl bawk a, Saka nen kan lengchhuak , a nu nen kan inhmuh chungchang kha engmah ka la hrilh lo, reiek tlang ah kan kal a,midang awm pawh an lo awm ve nual mai, a hmun a thengthaw nuam in keipawh ka hahdam sawng sawng niin ka hria, hmun rem deuh ah kan thu a, “kha hei hi i nu i lo pe let dawn nia,ka mamawh lo tih lo hrilh tel bawk la” tih pah in a nu invelope min pek chu ka pe a, a ngaihna a hriatloh hmel hle, “e nge a?” A tih chuan, “cheng singthum a nih kha, khami kha ka kal chuan nang then tur che hian min ti a” ka tih chuan, “a nih chuan hei hi i la tihna em ni?” Tiin min zawt, a hmel a thu tak viau bawk.

“Nilo  e, ka duhlo ka ti chung pawn min hmehbel lui a,a kal daih a nihkha,chuvang chuan nangman i lo pe let mai dawn nia, keichuan kha pawisa kha ka mamawh lo a, then tum na che ka nei hek lo” ka tih lai chuan min rawn kuah thawk a, “ka tihpalh, ka nu thil tih dan avang hian ka zak hle bawk a ni,” a ti mawlh mawlh bawk, a hnung ah ka chul sak a, ” i thiamloh engmah a awm lo, i nu tan pawh ka lo iai awm viau a ni thei a, i tan a tha ber tur a ngaihtuah vang pawh a ni thei,chuvang chuan nangmah chu in thiamlo duh suh” tiin ka hnem a, a nu thil tih vang chuan nuamlo a ti in a lungawilo viau bawk, a haw hun ah buaina a va siam mai ang tih ka hlauh avangin a dam zawngin thu ka lakpui hram hram.

Inkuah rial in ni tla tur kan thlir dun a, “ka nu hi i hua em?” Tiin min zawt a, “ka lo ngaihtuah ang” ka ti liampuat, mahse a hma aia thu tak deuh zawk in, “ka nu a ni a, a chung ah thinrim viau mah ila ka nu a ni reng dawn tho a, mahse nang chan che hi ka duh lo,inrem tak a in awm hi ka duh, keimah hi ka nep em vang zawk a ni,ka nu chu haw suh aw” a tih tak mawlh mawlh ah chuan a hmel hmu thei tur chuan ka in her rem a, a hmel a lo dul ruih mai, ka kut khinghnih a a biang khuap in “nangmah in dem suh,i thiamloh pakhat mah a awm lo,i nu pawh huatna ka neilo a nia, ka lungawilo ve deuh mai chauh a lawm,keipawh aia upa zawk a nih ang a dawhthei tur ka nihlai in ka tawngkhum chiam a ka dik bik lo,chuvang chuan in thiamlo tawh suh” ka tih chuan ka mit ah chiang zet in min en a, “ka hmangaih che” a ti zawi sup,sawi zawi viau mahse ka beng ah erawh ring tak a ni,ka nui sak a,”keipawn ka hmangaih che” ti let in kan inkuah vang vang.

Kan haw chuan kan in lam ah min tlanpui dawn emaw ka tih lai in kan inkawng lo lam min pan pui a,”hei kan inkawng a nih loh hi” ka tih chuan, “ka hria, kan in ah kan kal dawn” a ti a nihchu, “hey! ka duh miah lo a nia aw ,kan inlam ah tlan leh rawh” ka tih pawh chuan an in lam min la pan pui reng tho , a tawp a tawp in lian tha zet kawt ah min dinpui in gate lo in kalh chu a va hawng a, kei erawh tum bur in bike ah ka la chuang , gate chhung ah chuan inkhal lut in a bike a hunrem hnu chuan, “lo kal rawh’ tiin ka kut chu a chelh a, “a nuam lo a nia, i nu a lo awm ve dawn bawk si” ka tih chuan, “i upat tawh kha, ka nu te lek lek chu i chawk zero vek thei ang i huai bawk si” a tih chuan ka melh nghek, a ni erawh a nui ruh ruh mai.

Min tihluih deuh tlat avangin in ah chuan kan in zuilut ta a, ka rin ang ngeiin a nu pawh a lo awm ngei e, min melh no vak lo, “kha hei hi la rawh” tih leh an bul kan thlen rual un Saka chuan ka invelope pek kha a nu lam a thehphei a rual a,ka lo up zawk thei, anu leh apa chuan keini pahnih chu min en haw mai, “e nge hei hi bawiha” tiin apa zawk chuan invelope chu a chhar a, “cheng singthum a nihkha,nimin ka nu hian ka bialnu hi a hmehbel lui a, min then theih nan,mahse hei pelet leh tur in min ti a ka pelet a nih hi” a tih chuan apa chuan a nu chu a en vut a, “chutiang thil chu i ti em ni?” Tiin a zawt nghal bawk, Saka nu chuan keini pahnih chu rum zet a min rawn en in, “he hmeichhia hi ka fapa bialnu turin ka duh lo, kum 5 laiin kan fapa aiin a upa zawk” tihpah in min rawn kawk va mai,kei erawh ka ngawi tlat kan inchhung a nih loh bak ah ka tan Saka a ding a, chuvang chuan ka tan tawng ve kha thil tihchi a nilo tih ka hre ve kar.

“Nu , nangpawh ka pa aiin kum thum in i upat zawk ve tho kha” Saka chuan a lo ti khauh a, “nangkha lo ngawi rawh” a nu chuan a lo ti chang fak mai , a ruk tak chuan nuam lo ka ti mi inchhung ah buaina ka va siam ringawt niin ka hria , “A zialo thin e mai Remi, kan fapa hi puitling a ni ve tawh a,a tan a tha tur leh thalo tur thliar thiam rual chu a ni ve tawh a lawm, tun a innei nghal tut tut tur pawh an nilo a,tun atang lo buai chiam kha  a tul ber lo” Saka pa chuan a ti charh charh a,dik ka ti viau, “nu Zuali hi duhloh chhan dang i nei zawk a ni lo maw,hetiang mi i nih ngai loh kha” Saka chuan a ti a, a nu chu beisei nei tak in a en bawk,chutah pi Remi chu a thaw hak a, “kan neihchhun i ni a, mi thalo i tawn leh hi ka hlau a ni, a hma a i hmeichhe kawp tawh te ang a i neih chauh duh ang kha a nih ve ka hlau a ni, in kum a in thlau bawk si” a ti ta a, chutah chuan zet chuan tawng ve ngei ka ngai in ka hria, “ka pi, Saka hian eng hmeichhia nge a lo kawp tawh thin chu ka hrelo a,mahse keichuan  sum leh hausakna um avang a kawp ka nilo a nia, ka sawi tawh ang khan ka mipa duhzawng leh ka rilrem zawng tak a nih vang zawk a ni, sum leh pai lam ah chuan hausa lutuk ni lo mah ila  kan phang bik lo a,tumah hi ka awt ngai bik lo, i ngaihdan chu ka hriatthiampui viau che in i mi ngaih ang chu ka nilo a nia” zaidawh tak chuan ka ti a, Saka nu pawh a thaw ve ta hawk mai.

“Ni e hei sum vang a nilo tih chu a chiang ta e, he invelope hi lo dahlet lo ni la chu ka ngaihdan ka sawhsawn hauh lo ang,mahse i lo dahlet a ka ringngam ang che tih ka hria e, ti rawh pa a,keini chu room lam ah lut ila” a ti ta thliam a,keimah zawk chu hrilhhai ka hawi hai viau , chutia ka thusawi a pawm nghal thliam chu a hma a a lo chet duh dan nen ngaihtuah chuan mak tih loh rual a ni hleinem, “e nge kha kha a awmzia” room an luh hnu chuan ka ti chhuak hawk, “lo kal teh” tiin Saka chuan ka ban ah min kai a,a room lam ah min chhohpui, khum ah min thutpui in , “ka nu hi i rin ang em em a misual chu a nilo a nia, ni e hmeichhe pakhat ka nun a pawimawh tak a awm thin a kum thum lai chu kan inzui ve, mahse a ni chuan ka neih chiah a duh  ka hrechhuak leh si a,ta tang khan ka nu hi ka ngaihzawng tur ah a fimkhur a ka nat leh a hlau viau bawk, min ngaihtuah luat ah tiang khan a che ta mai a ni, i hriatthiam ka beisei a nia” tiin min rawn en a, hrethiam tur a min duh zia ka hria, “awle, ka hrethiam a lawm, nu leh pa hmangaihna hian eng pawh a huam a, an hlut na hrethiam lo tu chu mi mawl tak an ni ngei ang,i nu pawh ka dem hauh lo e, i tawng sual tawh a, mi thalo i tawn leh a hlau tihna a nia, a hmangaih hle che a ni” ka ti ta a ,ka thusawi chuan a ti hahdam sawt niin ka hria, min rawn kuah in “ka lawm e, thinchhe viau mahla i rilru a tha tih hu ka hria a lawm” a tih chuan a nak ah ka lo piai a, a ai-ah tuarh rual in ka hmui ah min fawp tawk a, a inlak hran dawn in ka hmui hnuai a seh tel zeuh bawk, “kha kha e nge, a na a nia” ka tih chuan, “hremna” a ti sup a, a nak a ka piai vang tih ka hria, in en in kan nui dun hawk a.

A tawp ta.